ཁྱོད་མ་འོངས་པ་ན་རྫོགས་པའི་སངས་རྒྱས་མི་གཡོ་བ་ཞེས་བྱ་བར་འགྱུར་རོ་ཞེས་ལུང་བསྟན་པ།
༈ ཡང་སྟོན་པ་རྒྱལ་བྱེད་ཀྱི་ཚལ་ན་བཞུགས་པའི་ཚེ། མཉན་ཡོད་ཀྱི་ཚོང་དཔོན་གཉིས་མི་མཐུན་པར་གྱུར་ནས། དེ་གཉིས་ལས་གཅིག་ནི་རྫོགས་བྱེད་ལ་དད། གཅིག་ནི་སངས་རྒྱས་ལ་དད་དེ། དེ་གཉིས་རང་རང་འདོད་ཕྱོགས་ལྟར་གྱིས་ཆེ་བ་བརྗོད་ནས་བདོག་པ་ཐམས་ཅད་ཡལ་བའི་སྐུགས་ཀྱི་གཏའ་བཞག་གོ །དེ་རྒྱལ་པོ་གསལ་རྒྱལ་གྱིས་ཐོས་ནས་བློན་པོ་གཉིས་ལ་བསྒོས་ཏེ་ཡུལ་ཐམས་ཅད་དུ་དྲིལ་བསྒྲགས་ནས་སྐྱེ་བོ་འབུམ་ཕྲག་དུ་མ་འདུས་ཤིང་། ནམ་མཁའ་ན་ལྷ་འབུམ་ཕྲག་དུ་མ་དག་ཀྱང་འདུས་པའི་ནང་དུ། བ་ལང་གི་ལྕི་བས་དཀྱིལ་འཁོར་བྱས་ཏེ། སྤོས་དང་མེ་ཏོག་གི་ཕྲེང་བ་ཐམས་ཅད་བསྡོགས་པ་ལ་ཐོག་མར་མུ་སྟེགས་ཀྱི་དགེ་བསྙེན་དེས། བདེན་པ་དང་བདེན་པའི་ཚིག་གང་གིས་རྫོགས་བྱེད་ལ་སོགས་པའི་སྟོན་པ་དྲུག་མཆོག་ཡིན་པའི་བདེན་པ་དང་། བདེན་པའི་ཚིག་འདིས་ནི་མེ་ཏོག་དང་བདུག་པ་དང་ཆུ་འདི་དེ་རྣམས་ཀྱི་ཐད་དུ་སོངས་ཤིག ཅེས་བྱ་བའི་མོད་ལ། མེ་ཏོག་དེ་དག་ནི་ས་ལ་ལྷགས། མེ་ནི་ཤི། ཆུ་ནི་ས་ལ་ཐིམ་ཞིང་ཡོངས་སུ་ཟད་པར་གྱུར་པས་སྐྱེ་བོའི་ཚོགས་ཀྱིས་ཅ་ཅོ་དང་ག་ཞའི་སྐད་ཆེན་པོ་ཕྱུང་བས་དེ་སྤོབས་པ་མེད་པར་གྱུར་ཏོ། །དེ་ནས་སངས་རྒྱས་པའི་དགེ་བསྙེན་དེས། སྔར་ལྟར་བདེན་སྟོབས་བརྗོད་དེ་མཆོད་རྫས་འདི་དག་བཅོམ་ལྡན་འདས་ཀྱི་ཐད་དུ་སོངས་ཤིག ཅེས་བྱས་པས། མེ་ཏོག་དེ་དག་བྱ་ངང་པའི་རྒྱལ་པོ་འཕུར་བ་བཞིན་དུ་ནམ་མཁའ་ལ་འཕགས་ནས་རྒྱལ་བྱེད་ཚལ་གྱི་ལོགས་སུ་སོང་ངོ་། །བདུག་པ་ནི་སྤྲིན་གྱི་མགོ་ལྟ་བུ་དང་། ཆུ་ནི་བཻཌཱུཪྱའི་སྡོང་བུ་ལྟ་བུར་གྱུར་པས་སྐྱེ་བོ་ཐམས་ཅད་ཡ་མཚན་དུ་གྱུར་ཏེ། དེའི་ཕྱི་བཞིན་དུ་འབྲངས་ཏེ་སོང་བ་ན་མེ་ཏོག་ནི་བཅོམ་ལྡན་འདས་ཀྱི་དབུའི་སྟེང་ན་འདུག བདུག་པ་དང་ཆུ་ནི་སྤྱན་སྔར་འདུག་གོ །དེར་སྐྱེ་བོ་ཕལ་མོ་ཆེ་དག་དགའ་བར་གྱུར་ཏེ་སངས་རྒྱས་ཀྱི་ཞབས་ལ་ཕྱག་བྱས་ཏེ་ཆོས་མཉན་པའི་ཕྱིར་སྤྱན་སྔར་འཁོད་པ་ན། དེ་དག་ལ་བཅོམ་ལྡན་འདས་ཀྱིས་བཀའ་སྩལ་ཏེ། སངས་རྒྱས་དང་། ཆོས་དང་། དགེ་འདུན་གསུམ་པོ་མཆོག་ཏུ་འཛིན་ཅིང་དགའ་བར་བྱེད་པ་རྣམས་རྣམ་སྨིན་གྱི་འབྲས་བུ་ལྷ་དང་མི་རྣམས་ཀྱི་མཆོག་ཏུ་འགྱུར་བ་སོགས་ཀྱིས་ཆོས་ཀྱི་རྣམ་གྲངས་བསྟན་པས་སྐྱེ་བོ་ཕལ་མོ་ཆེ་དཀོན་མཆོག་ལ་དད་པ་རྙེད་ཅིང་ཁ་ཅིག་གིས་སྐྱབས་སུ་འགྲོ་བ་དང་བསླབ་གཞི་རྣམས་ཀྱང་བླངས་ཤིང་། ཁ་ཅིག་ནི་དགྲ་བཅོམ་པའི་འབྲས་བུ་མངོན་དུ་བྱས་སོ། །དེའི་ཚེ་སྔར་གྱི་མུ་སྟེགས་བྱེད་ཀྱི་དགེ་བསྙེན་དེ་ཡང་སངས་རྒྱས་ལ་ལྷག་པར་དད་པར་གྱུར་ཏེ། ཞབས་ལ་ཕྱག་བྱས་ནས་བླ་ན་མེད་པའི་བྱང་ཆུབ་ཏུ་སྨོན་ལམ་བཏབ་བོ། །དེར་བཅོམ་ལྡན་འདས་ཞལ་འཛུམ་པ་མཛད་ཏེ། ཁྱོད་མ་འོངས་པ་ན་རྫོགས་པའི་སངས་རྒྱས་མི་གཡོ་བ་ཞེས་བྱ་བར་འགྱུར་རོ་ཞེས་ལུང་བསྟན་ཏོ། །