དཀོན་མཆོག་མཆོད་པ་དང་སྦྱིན་པ་སོགས་དངོས་པོ་ཆེ་ཕྲ་གང་ཡིན་ཀྱང་ཐབས་ཁྱད་པར་ཅན་གྱིས་ཟིན་ན་རྫོགས་པའི་བྱང་ཆུབ་ཆེན་པོའི་རྒྱུར་འགྱུར་བ་བསྟན་པ།
༈ ཡང་སྟོན་པ་རྒྱལ་བྱེད་ཀྱི་ཚལ་ན་བཞུགས་པའི་ཚེ། རྒྱལ་པོ་མ་སྐྱེས་དགྲའི་དཔུང་གིས་རྒྱལ་པོ་གསལ་རྒྱལ་ལན་གསུམ་གྱི་བར་དུ་ཕམ་པར་བྱས་པ། རྒྱལ་པོ་གསལ་རྒྱལ་སེམས་ཁོང་དུ་ཆུད་ནས་མྱ་ངན་གྱི་ཁང་བུར་གནས་པ་ན། ཡུལ་དེའི་ཁྱིམ་བདག་ཕྱུག་པོ་རྣམ་ཐོས་ཀྱི་བུའི་ནོར་དང་ལྡན་པ་ཞིག་གིས་གསེར་གྱི་ཕུང་པོ་ཆེན་པོ་མི་འགྲེང་བས་ཀྱང་ཕན་ཚུན་མི་མཐོང་བ་ཞིག་སྤུངས་ནས་བྱིན་ཏེ་རྒྱལ་པོ་ལ་སེམས་གསོས་བཏང་ཞིང་། དེར་རྒྱལ་པོས་ཡུལ་དུ་ཉན་རྣ་བ་བཏང་བས། རྒན་པོ་གཉིས་ཀྱིས་ཕན་ཚུན་གཏམ་སྨྲ་བ་ན་པདྨའི་ཟེ་བ་ཞེས་པའི་གཡུལ་གྱི་དགྲ་ཐབས་ཡོད་དེ་དེ་ལ་མི་སྡར་མ་རྣམས་གཡུལ་གྱི་སྔོན་དུ་བཏང་ལ། འབྲིང་པོ་རྣམས་བར་དུ་བཞག དཔའ་བོ་རྣམས་རྒྱབ་ཏུ་བཞག་ན་དེས་ཐུབ་པར་འགྱུར་ཞེས་སྨྲས་པ་ཐོས་ནས་རྒྱལ་པོ་གསལ་རྒྱལ་གྱིས་ཚུལ་དེ་ལྟ་བུས་དམག་དྲངས་པས་རྒྱལ་པོ་མ་སྐྱེས་དགྲ་ཕམ་པར་བྱས་ཏེ། དེ་ཉིད་གསོན་པོར་བཟུང་ནས་ཤིང་རྟ་ལ་སྐྱོན་ནས་བཅོམ་ལྡན་འདས་ཀྱི་དྲུང་དུ་ཁྲིད་དེ་གསོལ་པ། བཙུན་པ་རྒྱལ་པོ་མ་སྐྱེས་དགྲ་འདི་ནི། ཡུན་རིང་པོ་ན་བདག་གི་འཁོན་ཟླ་མ་ལགས་པར་འཁོན་དུ་འཛིན་པ་དང་། དགྲ་ཟླ་མ་ལགས་པར་དགྲར་བགྱིད་པ་ལགས་མོད་ཀྱི། འདི་ནི་བདག་གི་གྲོགས་པོའི་བུ་ལགས་པའི་སླད་དུ། བདག་ནི་འདི་འགུམ་པར་མི་འཚལ་ཏེ་འདི་བཏང་བར་འཚལ་ལོ། །བཀའ་སྩལ་པ། རྒྱལ་པོ་ཆེན་པོ་ཐོངས་ཤིག རྒྱལ་བར་གྱུར་ན་འཁོན་པ་མང་། །ཕམ་པར་གྱུར་ན་སྡུག་བསྔལ་གནས། །རྒྱལ་དང་ཕམ་པ་སྤངས་ན་ནི། །ཉེ་བར་ཞི་སྟེ་བདེ་བར་གནས། །དེ་ནས་རྒྱལ་པོ་གསལ་རྒྱལ་གྱིས་བདག་གིས་རྒྱལ་སྲིད་ཕྱིར་ཐོབ་པ་འདི་ཚོང་དཔོན་འདིའི་དྲིན་ཡིན་གྱིས་འདི་ལ་ཅི་འདོད་པའི་བྱ་དགའ་སྦྱིན་ནོ་སྙམ་ནས་ཚོང་དཔོན་ལ་དེ་ལྟར་སྨྲས་པས་དེས་ཀྱང་ཞག་བདུན་གྱི་བར་དུ་རྒྱལ་སྲིད་བསླངས་ནས། དེའི་རིང་ལ་སངས་རྒྱས་དགེ་འདུན་དང་བཅས་པ་དང་། རྒྱལ་པོ་གསལ་རྒྱལ་འཁོར་དང་བཅས་པ་སྤྱན་དྲངས་ཤིང་། ཡུལ་ཀ་ཤི་དང་ཀོ་ས་ལ་གནས་པའི་སྐྱེ་བོ་མཐའ་དག་ལ་ཕོ་ཉ་བཏང་སྟེ། ཞག་བདུན་གྱི་བར་དུ་ཁྱེད་ཅག་ཁྲལ་ཐུད་མེད་པ་ཅི་དགའ་བར་གནས་པར་བྱོས་ཤིག་འདིར་ཡང་ཤོག་ལ་དཀོན་མཆོག་གསུམ་ལ་སྐྱབས་སུ་འགྲོ་བ་དང་། ངའི་སྟོན་མོ་ཡང་ཚོལ་ལ་དེ་བཞིན་གཤེགས་པ་ལ་ཡང་བསྙེན་བཀུར་གྱིས་ཤིག་ཅེས་བྱས་ནས། དེ་ཞག་བདུན་གྱི་བར་དུ་སངས་རྒྱས་འཁོར་དང་བཅས་པ་ལ་བཀུར་སྟི་ཆེན་པོ་བྱས་ཤིང་། མི་འབུམ་ཕྲག་མང་པོ་དག་ཀྱང་བདེ་བ་ལ་བཙུད་ནས། བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་བླ་ན་མེད་པའི་བྱང་ཆུབ་ཏུ་སྨོན་ལམ་བཏབ་བོ། །དེར་བཅོམ་ལྡན་འདས་ཞལ་འཛུམ་པ་དང་བཅས་ཏེ་ཚོང་དཔོན་འདི་མ་འོངས་པ་ན་ཡང་དག་པར་རྫོགས་པའི་སངས་རྒྱས་མི་འཇིགས་སྦྱིན་ཞེས་བྱ་བར་འགྱུར་རོ་ཞེས་ལུང་བསྟན་ཏོ། །འདི་རྣམས་ཀྱིས་ནི། དཀོན་མཆོག་མཆོད་པ་དང་སྦྱིན་པ་སོགས་དངོས་པོ་ཆེ་ཕྲ་གང་ཡིན་ཀྱང་ཐབས་ཁྱད་པར་ཅན་གྱིས་ཟིན་ན་རྫོགས་པའི་བྱང་ཆུབ་ཆེན་པོའི་རྒྱུར་འགྱུར་བ་བསྟན་པ་ཡིན་ནོ། །