མེ་ཏོག་ཕུལ་བའི་ཕན་ཡོན་བསྟན་པ།
༈ ཡང་བཅོམ་ལྡན་འདས་རྒྱལ་བྱེད་ཀྱི་ཚལ་དུ་བཞུགས་ནས་མཉན་ཡོད་ཀྱི་གྲོང་དུ་བསོད་སྙོམས་ལ་གཤེགས་པའི་ཚེ། ལམ་སྲང་དུ་བུད་མེད་གཅིག་གིས་ཁྱེའུ་ཞིག་པང་ན་ཐོགས་ཏེ་འོང་བ་དང་ཕྲད་དེ་ཁྱེའུ་དེས་སངས་རྒྱས་མཇལ་བ་དང་མངོན་པར་དགའ་སྟེ། ཀུན་དགའ་ར་བའི་སྲུང་མ་ཞིག་པདྨ་ཚོང་དུ་འགྲོ་བ་ལ་ལག་པ་བརྐྱངས་ཏེ་པདྨ་བླངས་ནས་དེ་བཞིན་གཤེགས་པའི་དབུ་ལ་བོར་རོ། །དེ་ནས་པདྨ་དེ་ཤིང་རྟའི་འཕང་ལོ་ཙམ་དུ་གྱུར་ཏེ་སྟེང་གི་ནམ་མཁའ་ལ་འདུག་ནས་བཅོམ་ལྡན་འདས་གཤེགས་ན་ནི་འགྲོ་བཞུགས་ན་ནི་སྡོད་དོ། །དེ་ནས་བཅོམ་ལྡན་འདས་ཀྱིས་པདྨ་རཱ་གའི་མདོག་འདྲ་བའི་འོད་ཟེར་དག་བཀྱེ་ནས་མཉན་ཡོད་ཀྱི་ཡུལ་ཐམས་ཅད་སྣང་བར་བྱས་པས་རྒྱལ་བློན་ལ་སོགས་པའི་སྐྱེ་བོའི་ཚོགས་རྣམས་དད་པར་བྱས་སོ། །དེར་བཅོམ་ལྡན་འདས་ཀྱིས་ཞལ་འཛུམ་པ་མཛད་པས། ཀུན་དགའ་བོས་རྒྱུ་རྐྱེན་གསོལ་བ་ན། ཁྱེའུ་འདིས་དད་པའི་སེམས་ཀྱིས་པདྨ་འཐོར་བའི་རྒྱུ་དེས། བསྐལ་པ་བཅོ་ལྔའི་བར་དུ་ལོག་པར་མི་ལྟུང་ཞིང་། ལྷ་དང་མིའི་བདེ་བ་ཉམས་སུ་མྱོང་ནས། རང་སངས་རྒྱས་པདྨའི་བླ་མ་ཞེས་བྱ་བར་འགྱུར་རོ། །ཞེས་ལུང་བསྟན་ཏོ། །འདིས་ནི་མེ་ཏོག་ཕུལ་བའི་ཕན་ཡོན་བསྟན་ཏོ། །