རྟེན་ལ་འཁོར་ལོ་སོགས་མཆོད་རྫས་ཕུལ་བའི་ཕན་ཡོན་བསྟན་པ།
༈ ཡང་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་ན་བཞུགས་པའི་ཚེ། ཡུལ་དེའི་དེད་དཔོན་ཞིག་རྒྱ་མཚོར་སོང་བ་ལས། དེའི་ཆུང་མས་སྲེད་མེད་ཀྱི་བུ་ལ་ཕྱག་བྱས་ཏེ། གལ་ཏེ་བདག་གི་ཁྱིམ་ཐབ་མྱུར་དུ་འོངས་ན་བདག་གིས་ཁྱོད་ལ་གསེར་གྱི་འཁོར་ལོ་དབུལ་ལོ་ཞེས་དམ་བཅས་སོ། །དེ་ནས་ཁྱིམ་ཐབ་དེ་རིང་པོར་མ་ལོན་པར་བདེ་བར་འཁོར་བས། དེས་གསེར་གྱི་འཁོར་ལོ་བྱེད་དུ་བཅུག་ནས་བྲན་མོའི་ཚོགས་ཀྱིས་བསྐོར་ཏེ་མཆོད་རྫས་སྣ་ཚོགས་པ་ཐོགས་ཏེ་ལྷ་ཁང་དུ་ཆས་པ་ན། བཅོམ་ལྡན་འདས་ཀྱིས་དེའི་རྒྱུད་ལ་རང་བྱང་ཆུབ་ཀྱི་དགེ་བའི་རྩ་བ་བསྐྱེད་པར་གཟིགས་ནས་དགེ་སློང་གི་དགེ་འདུན་གྱི་འཁོར་དང་བཅས་པ་ཕྱོགས་དེར་བསོད་སྙོམས་ལ་གཤེགས་པས། བུ་མོ་དེས་མཐོང་ནས་སེམས་དད་པར་གྱུར་ཏེ་འཁོར་ལོ་དེ་བཅོམ་ལྡན་འདས་ཀྱི་སྟེང་དུ་བོར་ཞིང་། སྤོས་དང་བདུག་པ་དང་། མེ་ཏོག་ཀྱང་ཕུལ་ལོ། །དེར་བཅོམ་ལྡན་འདས་ཞལ་འཛུམ་པ་དང་བཅས་ཏེ། བུ་མོ་དེ་དགེ་བའི་རྩ་བ་འདིས། བསྐལ་པ་བཅོ་ལྔའི་བར་དུ་ལྷ་དང་མིའི་བདེ་བ་ཉམས་སུ་མྱོང་ནས་མཐར་རང་སངས་རྒྱས་འཁོར་ལོའི་བླ་མ་ཞེས་བྱ་བར་འགྱུར་རོ་ཞེས་ལུང་བསྟན་ཏོ། །འདིས་ནི་རྟེན་ལ་འཁོར་ལོ་སོགས་མཆོད་རྫས་ཕུལ་བའི་ཕན་ཡོན་བསྟན་ཏོ། །ཡང་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ཡུལ་མ་ག་དྷཱ་ན་ལྗོངས་རྒྱུ་ཞིང་བྱོན་པས། ཆུ་བོ་གང་གཱའི་འགྲམ་དུ་མཆོད་རྟེན་རྙིང་པ་ཞིག་རལ་དུ་གྱུར་པ་ཞིག་མཐོང་ནས་དེའི་དོན་གསོལ་པ་ན། འདི་ནི་རང་སངས་རྒྱས་མགོ་བཅུ་པའི་ཡིན་ཏེ། སྔོན་གྱི་དུས་སུ་གྲོང་ཁྱེར་ཝཱ་རཱ་ཎ་སཱིའི་རྒྱལ་པོ་ཚངས་བྱིན་གྱི་སྐྱེད་མོས་ཚལ་གྱི་རྫིང་བུར་པདྨ་ཆེན་པོ་ཞིག་སྐྱེས་ཏེ་ཁ་བྱེ་བའི་ནང་ན་ཁྱེའུ་མཚན་དཔེ་དང་ལྡན་པ་ཞིག་སྐྱིལ་མོ་ཀྲུང་གིས་འདུག་པ་ན་རྒྱལ་པོ་དགའ་ནས་བཀུར་སྟི་ཆེན་པོས་ཕོ་བྲང་དུ་སྤྱན་དྲངས་ཤིང་མིང་མགོ་བཅུ་པར་བཏགས་ཏེ་བཙས་སྟོན་རྒྱ་ཆེར་བྱས་སོ། །ཁྱེའུ་དེ་ཡང་དད་པ་དང་ལྡན་ལ། བསམ་པ་བཟང་ཞིང་དགེ་བ། བདག་ལ་ཕན་པ་དང་གཞན་ལ་ཕན་པ་ལ་ཞུགས་པ། སྙིང་རྗེ་ཆེ་བ། བདག་ཉིད་ཆེ་བ། ཆོས་འདོད་པ། སྐྱེ་དགུ་ལ་བྱམས་པ་ཞིག་སྟེ་དེས་རྒྱལ་ས་ལ་འདུག་ན་ཉེས་པ་མང་བར་མཐོང་ནས་རྒྱལ་པོ་ལ་གསོལ་ཏེ། སྐྲ་དང་ཁ་སྤུ་བྲེགས་ནས་གོས་ཚོན་ཅན་གྱོན་ཡང་དག་པའི་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་བརྩོན་པས་རང་བྱང་ཆུབ་ཀྱི་འབྲས་བུ་མངོན་དུ་བྱས་ཏེ། ནམ་མཁའ་ལ་འཕགས་ཏེ་ཆོ་འཕྲུལ་སྣ་ཚོགས་པ་བསྟན་པས་ཡབ་རྒྱལ་པོ་ཡང་དད་ནས་ཟླ་བ་གསུམ་གྱི་བར་དུ་མངོན་པར་མཆོད་ཅིང་། དེ་ནས་དེ་ལུས་ལ་སྐྱོ་ནས་ཆོ་འཕྲུལ་སྣ་ཚོགས་པ་བསྟན་ཏེ། བུད་ཤིང་ཟད་པའི་མེ་བཞིན་དུ་མྱ་ངན་ལས་འདས་ཏེ་དེའི་མཆོད་རྟེན་ཡིན་ནོ་གསུངས་དེར་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པ་ན། སྔོན་འདས་པའི་དུས་བསྐལ་པ་དགུ་བཅུ་རྩ་གཅིག་པ་ལ་སངས་རྒྱས་རྣམ་པར་གཟིགས་འཇིག་རྟེན་དུ་བྱོན་ཏེ་ཕོ་བྲང་གཉན་ལྡན་དུ་བཞུགས་ནས་གྲོང་དུ་བསོད་སྙོམས་ལ་གཤེགས་པའི་ཚེ་དེད་དཔོན་ཞིག་ཀྱང་པདྨ་ཐོགས་ཏེ་སྲང་དུ་ཞུགས་པ་དང་ཐུག་པས། དེད་དཔོན་དེ་སངས་རྒྱས་རྣམ་གཟིགས་ལ་དད་པར་གྱུར་ནས་མེ་ཏོག་དེ་དབུ་ལ་གཏོར་བས། དབུའི་སྟེང་ཤིང་རྟའི་འཕང་ལོ་ཙམ་དུ་གྱུར་ཏེ་གཤེགས་ན་འགྲོ་བཞུགས་ན་སྡོད་པར་གྱུར་ཏོ། །དེར་སངས་རྒྱས་རྣམ་གཟིགས་ཀྱིས་དེད་དཔོན་དེ་རང་སངས་རྒྱས་སུ་ལུང་བསྟན་ཅིང་། དེ་ཁྱིམ་དུ་ཕྱིན་པ་ན་རང་གི་ཆུང་མ་ལ་བུ་བཙའ་ཞིང་འདུག་ནས་དེས་སྐད་ངན་འདོན་པ་ཐོས་པས་སེམས་སྐྱོ་ནས། བདག་ནམ་ཡང་འཁོར་བ་ན་མའི་མངལ་དུ་སྐྱེ་བར་མ་གྱུར་ཅིག ཅེས་སྨོན་ལམ་བཏབ་བོ། །དེའི་དུས་ཀྱི་དེད་དཔོན་དེ་ནི་རང་སངས་རྒྱས་མགོ་བཅུ་པ་ཡིན་ཏེ། དགེ་བའི་རྩ་བ་དེས་བསྐལ་པ་དགུ་བཅུ་རྩ་གཅིག་གི་བར་དུ་ནམ་ཡང་མ་ཡི་མངལ་དུ་མ་སྐྱེས་ལ། སྲིད་པ་ཐ་མ་ལ་ཡང་དེའི་འབྱོར་པ་དེ་འདྲ་བར་གྱུར་ཏོ་གསུངས།