སྤོས་སོགས་ཕུལ་བའི་ཕན་ཡོན་བསྟན་པ།

༈ ཡང་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་ན་བཞུགས་ཏེ། གྲོང་དུ་བསོད་སྙོམས་ལ་གཤེགས་པ་ན། དེའི་ཚེ་ཡུལ་ཆོས་སུ་སྐྱེ་བོ་ཕལ་ཆེར་ལུས་ལ་བྱུག་པ་སྣ་ཚོགས་ཀྱིས་སྐུད་པར་བྱེད་པ་ལས། ཁྱིམ་བདག་གི་བུ་ཞིག་གི་བྲན་མོ་དད་པ་དང་ལྡན་ཞིང་བསམ་པ་བཟང་བ་ཞིག་ཡོད་པ་དེ་ཙནྡན་དམར་པོ་བདར་ཞིང་འདུག་པ་དེས། བཅོམ་ལྡན་འདས་མཐོང་ནས་དད་པ་ཆེན་པོ་སྐྱེས་ཏེ་ལག་གཉིས་ཀྱིས་ཙནྡན་གྱི་བྱུག་པ་ཞབས་ལ་ཕུལ་བས། བཅོམ་ལྡན་འདས་ཀྱིས་ཀྱང་རྫུ་འཕྲུལ་གྱིས་རྒྱལ་པོའི་ཁབ་ཀྱི་གྲོང་ཁྱེར་ཐམས་ཅད་ཙནྡན་གྱི་དྲིས་ཁྱབ་པར་མཛད་དོ། །དེར་བུ་མོ་དེ་རབ་ཏུ་དགའ་ནས་ཞབས་ལ་ཕྱག་བྱས་ཏེ། རང་བྱང་ཆུབ་ཏུ་སྨོན་ལམ་བཏབ་བོ། །དེར་བཅོམ་ལྡན་འདས་ཞལ་འཛུམ་པ་དང་བཅས་ཏེ་བུ་མོ་འདི་དགེ་བའི་རྩ་བ་འདིས་མ་འོངས་པ་ན་རང་སངས་རྒྱས་སྤོས་ཀྱི་ངད་ལྡང་ཞེས་བྱ་བར་འགྱུར་རོ། །ཞེས་ལུང་བསྟན་ཏོ། །འདིས་ནི་སྤོས་སོགས་ཕུལ་བའི་ཕན་ཡོན་བསྟན་ཏོ། །