སྲིད་པ་ཐ་མ་ལ་རང་སངས་རྒྱས་དྲི་མ་མེད་པ་ཞེས་བྱ་བ་འགྱུར་རོ་ཞེས་ལུང་བསྟན་པ།
༈ ཡང་སྟོན་པ་རྒྱལ་བྱེད་ཀྱི་ཚལ་ན་བཞུགས་པའི་ཚེ། ཀུན་དགའ་ར་བའི་སྲུང་མ་ཞིག་གིས་སོ་ཤིང་ཞིག་ཁྱེར་ཏེ་མཉན་ཡོད་དུ་འོང་བ་ན། ལམ་དུ་ལྟས་མཁན་གྱིས་འདི་གང་གིས་ཟོས་པ་དེས་ཁ་ཟས་རོ་བརྒྱ་དང་ལྡན་པ་ཟ་བར་འགྱུར་རོ་ཞེས་སྨྲས་པས། དེས་བསོད་ནམས་ཀྱི་ཞིང་སངས་རྒྱས་ལ་འབུལ་ལོ་སྙམ་ནས། དྲུང་དུ་ཕྱིན་ཏེ། ཞབས་ལ་ཕྱག་བྱས་ནས་ཚེམས་ཤིང་དེ་ཕུལ་བ་དང་། བཅོམ་ལྡན་འདས་ཀྱིས་ཕྱག་གིས་བཞེས་ཏེ། ཞལ་དུ་གསོལ་ནས་སླར་ས་ལ་བཙུགས་པས། དེའི་མོད་ལ་ཤིང་ནྱ་གྲོ་དྷ་ཆེན་པོ་ཆུ་ཞིང་གབ་པ་ཞིག་ཏུ་གྱུར་ཏེ། དེའི་གྲིབ་མ་ལ་བཅོམ་ལྡན་འདས་བཞུགས་ཏེ་ལྷ་དང་མི་དུ་མ་ལ་ཆོས་བསྟན་ཅིང་། ཁྱིམ་བདག་མགོན་མེད་ཟས་སྦྱིན་གྱིས་ཞལ་ཟས་རོ་བརྒྱ་དང་ལྡན་པ་ཡང་ཕུལ་ལོ། །དེར་ཀུན་དགའ་ར་བའི་སྲུང་མ་དེས་མཐོང་ནས་མཆོག་ཏུ་དགའ་ཞིང་དད་པར་གྱུར་ཏེ་ཞབས་ལ་ཕྱག་བྱས་ནས་རང་བྱང་ཆུབ་ཏུ་སྨོན་ལམ་བཏབ་བོ། །དེར་བཅོམ་ལྡན་འདས་ཞལ་འཛུམ་པ་དང་བཅས་ཏེ། དགེ་བའི་རྩ་བ་འདིས་ཀུན་དགའ་ར་བའི་སྲུང་མ་འདི་བསྐལ་པ་བཅུའི་བར་དུ་ལོག་པར་ལྟུང་བར་མི་འགྱུར་ཏེ། སྲིད་པ་ཐ་མ་ལ་རང་སངས་རྒྱས་དྲི་མ་མེད་པ་ཞེས་བྱ་བ་འགྱུར་རོ་ཞེས་ལུང་བསྟན་ཏོ། །