ཕ་མ་ཡུལ་ཆེས་གཉན་ཞིང་བཀུར་སྟི་བྱ་དགོས་པ་དང་བདག་གཞན་བརྗེ་བའི་བྱང་ཆུབ་ཀྱི་སེམས་བསྒོམ་པའི་ཕན་ཡོན་ཀྱང་བསྟན་པ།

༈ ཡང་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་ན་བཞུགས་པའི་ཚེ། དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱིམ་གང་ན་ཕ་མ་གཉིས་ལ་ལེགས་པར་རི་མོར་བྱེད་པ་དང་། ལེགས་པར་མཆོད་པར་བྱེད་པ་དང་། ལེགས་པར་གཡོག་བྱེད་པའི་ཁྱིམ་དེ་ནི་ཚངས་པ་དང་ལྡན་པ་ཡིན་ནོ། །དེ་ཅིའི་ཕྱིར་ན་དགེ་སློང་དག་རིགས་ཀྱི་བུའི་ཕ་མ་གཉིས་ནི་རིགས་པའི་སྒོ་ནས་ཚངས་པ་དང་འདྲ་བའི་ཕྱིར་རོ། །དེ་བཞིན་དུ་ཁྱིམ་གང་ན་ཕ་མ་གཉིས་ལ་ལེགས་པར་རི་མོར་བྱེད་མཆོད་པར་བྱེད་གཡོག་བྱེད་པའི་ཁྱིམ་དེ་ནི་སློབ་དཔོན་དང་ལྡན་པ་ཡིན་ཏེ། རིགས་ཀྱི་བུའི་ཕ་མ་གཉིས་ནི་རིགས་པའི་སྒོ་ནས་སློབ་དཔོན་དང་འདྲ་བའི་ཕྱིར། ཁྱིམ་གང་ན་ཕ་མ་གཉིས་ལ་ལེགས་པར་རི་མོར་བྱེད་མཆོད་པ་བྱེད་གཡོག་བྱེད་པའི་ཁྱིམ་དེ་ནི་ཀུན་ཏུ་སྦྱིན་པའི་འོས་སུ་གྱུར་པ་དང་ལྡན་པ་ཡིན་ཏེ། བུའི་ཕ་མ་གཉིས་ནི་རིགས་པའི་སྒོ་ནས་ཀུན་ཏུ་སྦྱིན་པའི་འོས་སུ་གྱུར་པ་ཡིན་པའི་ཕྱིར་ཁྱིམ་གང་ན་ཕ་མ་གཉིས་ལ་ལེགས་པར་བྱེད་པའི་ཁྱིམ་དེ་ནི་མེ་དང་ལྡན་པ་ཡིན་ཏེ། བུའི་ཕ་མ་གཉིས་ནི་མེ་དང་འདྲ་བའི་ཕྱིར་རོ། །ཁྱིམ་གང་ན་ཕ་མ་གཉིས་ལ་ལེགས་པར་བྱེད་པའི་ཁྱིམ་དེ་ནི་ལྷ་དང་ལྡན་པ་ཡིན་ཏེ་བུའི་ཕ་མ་གཉིས་ནི་རིགས་པའི་སྒོ་ནས་ལྷ་དང་འདྲ་བའི་ཕྱིར་རོ། །ཞེས་དང་། ཕ་མ་གཉིས་ནི་ཚངས་པ་སྟེ། །དེ་བཞིན་དང་པོའི་སློབ་དཔོན་ཡིན། །བུ་ཡི་ཀུན་སྦྱིན་འོས་གྱུར་པ། །མི་ཡང་ཡིན་ལ་ལྷ་ཡང་ཡིན། །དེ་ཕྱིར་དེ་གཉིས་ཕྱག་གི་གནས། །དྲིལ་བ་དང་ནི་ཁྲུས་རྣམས་དང་། །རྐང་པ་དག་ཀྱང་བཀྲུ་བ་དང་། །ཡང་ན་ཟས་དང་སྐོམ་རྣམས་དང་། །གོས་དང་མལ་ཆ་སྟན་རྣམས་ཀྱིས། །མཁས་པ་དག་གིས་བཀུར་སྟི་བྱ། །ཕ་མ་དག་ལ་བཀུར་བྱས་པ། །དེས་ན་མཁས་པ་དེ་དག་ནི། །འདིར་ཡང་སྨད་པར་མི་འགྱུར་ལ། །ཤི་ནའང་མཐོ་རིས་དགའ་བར་འགྱུར། །དེ་སྐད་ཅེས་བཀའ་སྩལ་པའི་ཚེ། དགེ་སློང་རྣམས་ངོ་མཚར་དུ་གྱུར་ནས་གསོལ་པ། བཙུན་པ་བཅོམ་ལྡན་འདས་ཕ་མ་ལ་སྲི་ཞུ་ཆེ་བའི་བསྔགས་པ་གསུངས་པ་ནི་ངོ་མཚར་ལགས་སོ། །བཅོམ་ལྡན་འདས་ཀྱིས། དགེ་སློང་དག་ད་ལྟར་དེ་བཞིན་གཤེགས་པ་དུག་གསུམ་དང་བྲལ་ཞིང་གནོད་པ་ཐམས་ཅད་མི་མངའ་ལ་རྣམ་པར་གྲོལ་བའི་ཡེ་ཤེས་ཀྱི་གཟིགས་པ་མཐར་ཐུག་པའི་ཚེ་འདི་ལྟ་བུའི་བསྔགས་པ་བརྗོད་པ་ལ་ངོ་མཚར་བ་ཅི་ཡོད་དེ། སྔོན་འཁོར་བ་ན་གནས་ཤིང་དུག་གསུམ་པོ་མ་སྤངས་པར་གྱུར་པའི་ཚེ་མ་ལ་གནོད་པ་ཆུང་ངུ་བྱས་པས་ཀྱང་སྡུག་བསྔལ་ཆེན་པོ་མྱོང་བར་གྱུར་ལ། བཀུར་སྟི་ཆུང་ངུ་བྱས་པས་ཀྱང་བདེ་བ་ཆེན་པོ་མྱོང་བར་གྱུར་པ་དེ་ལེགས་པར་ཉོན་ལ་ཡིད་ལ་ཟུངས་ཤིག་དང་། ངས་བཤད་པར་བྱ་སྟེ། སྔོན་བྱུང་བ་འདས་པའི་དུས་གྲོང་ཁྱེར་ཝཱ་རཱ་ཎ་སཱི་ན་དེད་དཔོན་མཛའ་བོ་ཞེས་བྱ་བ་ཕྱུག་ཅིང་ནོར་མང་བ་བུ་བྱུང་ངོ་ཅོག་ཤི་བ་ཞིག་ཡོད་པ་དེ་ལ། ཕྱིས་ཤིག་ན་ཁྱེའུ་ལྟ་ན་སྡུག་པ་ཞིག་བྱུང་བས་མིང་བུ་མོ་ཞེས་བཏགས་ཏེ་ཕ་དེ་རྒྱ་མ ཚོར་སོང་བ་ལས་དེ་ཉིད་དུ་ཤིའོ། །དེ་ནས་བུ་དེ་ཆེར་སྐྱེས་པ་ན་རང་གི་མ་ལ། བདག་གི་ཕ་སྔོན་ལས་ཇི་ལྟ་བུས་འཚོ་བར་བྱེད། བདག་ཀྱང་དེའི་རྗེས་སུ་འབྲང་ངོ་། །ཞེས་དྲིས་པས། མས་བསམ་པ་འདི་ལ་དྲང་པོར་སྨྲས་ན་རྒྱ་མཚོར་སོང་སྟེ་ཤིར་འོང་སྙམ་ནས་བུ་ཁྱོད་ཀྱི་ཕ་ནི་ཡུལ་ཚོང་པ་བྱེད་པ་ཡིན་གྱིས་ཁྱོད་ཀྱང་འདོད་ན་ཡུལ་ཚོང་པ་གྱིས་ཤིག དེ་ནས་དེས་ཡུལ་ཚོང་པའི་ལས་བྱས་པས་དང་པོའི་ཉིན་པར་ཀཱར་ཥ་པ་ཎ་བཞི་རྙེད་དེ་མ་ལ་བྱིན་ནས། ཡུམ་འདིས་དགེ་སྦྱོང་དང་བྲམ་ཟེ་དང་སྡུག་ཅིང་ཕོངས་པ་དང་བཀྲེན་པ་རྣམས་ལ་སྦྱིན་པ་མཛོད་ཅིག་ཅེས་བྱས་སོ། །དེ་ནས་རེ་ཞིག་ན་གཞན་ཞིག་གིས་ཁྱོད་ཀྱི་ཕ་སྤོས་ཀྱི་ཚོང་བྱེད་དོ་བྱས་པས། དེ་སྤོས་ཚོང་བྱས་པས་ཀཱར་ཥ་པ་ཎ་བརྒྱད་རྙེད་དེ་མ་ལ་བྱིན་ནོ། །ཡང་གཞན་ཞིག་གིས་ཁྱོད་ཀྱི་ཕ་གསེར་དངུལ་གྱི་ཚོང་བྱེད་དོ་བྱས་པས། དེས་ཀྱང་གསེར་དངུལ་གྱི་ཚོང་བྱས་པས་དང་པོའི་ཉིན་པར་ཀཱར་ཥ་པ་ཎ་བཅུ་དྲུག་རྙེད་དེ་མ་ལ་བྱིན་ནོ། །དེའི་ཕྱི་ཉིན་ཀཱར་ཥ་པ་ཎ་སུམ་ཅུ་རྩ་གཉིས་རྙེད་དེ་དེ་དག་ཀྱང་སྔར་བཞིན་མ་ལ་བྱིན་ནོ། །དེ་ནས་རེ་ཞིག་ན་གསེར་དངུལ་ཚོང་པ་ཞིག་གིས་ཕྲག་དོག་བྱས་ཏེ་ཁྱོད་ཀྱི་ཕ་ནི་རྒྱ་མཚོ་ཆེན་པོའི་ཚོང་པ་ཡིན་ན་ཁྱོད་ལ་སུས་དམན་པའི་ལས་འདི་བྱེད་དུ་བཅུག དེ་ནས་དེ་ཐོས་ནས་མ་ལ་སྨྲས་པ་དང་། མས་དེ་ནི་བདེན་མོད་ཀྱི་འོན་ཀྱང་ཁྱོད་ནི་བྱིས་པ་ཡིན་ལ་བུ་གཅིག་པུའང་ཡིན་པས་ང་བོར་ཏེ་རྒྱ་མཚོ་ཆེན་པོའི་ནང་དུ་མ་འགྲོ་ཞིག་སྨྲས་ཀྱང་དེ་མི་དགེ་བའི་བཤེས་གཉེན་ཕྲག་དོག་ཅན་གྱི་དབང་དུ་གྱུར་པས་ཉན་མ་འདོད་ནས་ཐམས་ཅད་དུ་དྲིལ་བསྒྲགས་ཏེ་ཚོང་པ་ལྔ་བརྒྱ་དང་བཅས་ཏེ་རྒྱ་མཚོར་འགྲོ་བའི་ཆས་རྣམས་བསགས་ནས་ལམ་དུ་ཐོན་པ་ན། མ་ནི་བུ་ལ་སྙིང་བྱམས་པས་ཅི་བྱ་གཏོལ་མེད་དུ་གྱུར་ནས་མཆི་མ་འཛག་ཅིང་ངུ་བཞིན་དུ་རྐང་པ་ལ་འཇུས་ཏེ་ང་བོར་ཏེ་རྒྱ་མཚོ་ཆེན་པོའི་ནང་དུ་མ་འགྲོ་ཞིག་ཅེས་བྱས་ཏེ་སྨྲེ་སྔགས་ཀྱི་སྐད་ཕྱུང་བ་དང་དེས་མའི་མགོ་བོ་ལ་རྡོག་པས་བསྣུན་ནས་མགྲོན་པོ་རྣམས་དང་ཆས་པ་ལས། མ་དེས་བུ་ཁྱོད་ཀྱིས་ལས་འདིའི་རྣམ་པར་སྨིན་པ་མྱོང་བར་མ་གྱུར་ཅིག་བྱས་སོ། །དེ་ནས་དེད་དཔོན་མཛའ་བོའི་བུ་མོ་དེ་རིམ་གྱིས་སོང་སྟེ་རྒྱ་མཚོ་ཆེན་པོ་ན་གྲུར་ཞུགས་ཏེ་ཕྱིན་པས། གྲུ་དེ་ཉའི་རིགས་ཆུ་སྲིན་མ་ར་ཀས་མ་རུངས་པར་བྱས་ཏེ་བུབ་པར་གྱུར་པ་ན། མཛའ་བོའི་བུ་མོས་སྤང་ལེབ་གཅིག་ལ་ཟིན་ནས་སྐམ་ལ་ཕྱིན་ཏེ་སོང་བ་ན། ཐག་རིང་པོ་ཞིག་ནས་གྲོང་ཁྱེར་ལོངས་སྤྱོད་བྱེད་ཅེས་བྱ་བ་མཐོང་ནས། དེའི་ལོགས་སུ་ཕྱིན་པ་དང་དེའི་ནང་ནས་ལྷའི་བུ་མོ་མཛེས་ཤིང་ལྟ་ན་སྡུག་པ་བཞི་བྱུང་སྟེ། ཚུར་བྱོན་ཁྱོད་བྱོན་པ་ལེགས་སོ། །འདི་དག་ནི་བདག་ཅག་གི་ཟས་དང་སྐོམ་དང་། གོས་བཞག་པའི་ཁང་པ་དང་། གཟིམས་ཁང་ལགས་ཏེ་ནོར་བུ་དང་མུ་ཏིག་དང་བཻཌཱུཪྱ་དང་དུང་དང་མན་ཤེལ་དང་བྱི་རུ་དང་། གསེར་དངུལ་རྣམ་པ་སྣ་ཚོགས་ཀྱིས་གང་བ་ལགས་ཀྱིས་ཚུར་སྤྱོོན་དང་ལོངས་སྤྱོད་པར་བགྱིའོ་ཞེས་ཟེར་ནས། དེ་དེ་དག་དང་ལྷན་ཅིག་ཏུ་ལོ་དུ་མར་དགའ་བ་མྱོང་སྟེ། འདི་ལྟར་དེ་ནི་བསོད་ནམས་བྱེད་བྱེད་པ་དང་། དགེ་བ་བྱེད་བྱེད་པ་དང་། རྫུ་འཕྲུལ་ཆེ་བ་དང་། མཐུ་ཆེ་བ་ཡིན་པའི་ཕྱིར་རོ། །དེ་ནས་དེའི་ལྷོ་ཕྱོགས་ཀྱི་ལམ་དུ་སོང་བ་ལས་འགྲོ་མི་སྟེར་བ་ལ། ལྷག་པར་ཡང་དེར་འགྲོ་འདོད་པ་བྱུང་སྟེ་སོང་བས་རེ་ཞིག་ན་གྲོང་ཁྱེར་རྟག་ཏུ་མྱོས་ཞེས་བྱ་བ་མཐོང་སྟེ་དེའི་སྒོར་ཕྱིན་པ་ན། སྔ་མ་བས་ཆེས་བཟང་བའི་ལྷའི་བུ་མོ་བརྒྱད་བྱུང་སྟེ་བསུས་ནས། སྔ་མའི་ཚུལ་གྱིས་དེ་དག་དང་ལྷན་ཅིག་ཏུ་ལོ་དུ་མར་དགའ་བ་མྱོང་ངོ་། དེ་ནས་དེ་རྣམས་ཀྱིས་ཟློག་ཀྱང་མ་ཉན་པར་ལྷོ་ཕྱོགས་ཀྱི་ལམ་དུ་སོང་བ་ན་གྲོང་ཁྱེར་དགའ་བྱེད་ཅེས་བྱ་བ་མཐོང་སྟེ། དེའི་སྒོར་ཕྱིན་པ་ན་སྔ་མ་ལས་ཀྱང་མཚར་བའི་ལྷའི་བུ་མོ་བཅུ་དྲུག་འོངས་ཏེ་སྔར་ལྟར་བསུས་ནས་དེར་ཡང་ལོ་མང་དུ་དགའ་བ་མྱོང་ནས། སྔ་མའི་ཚུལ་གྱིས་ལྷོ་ཕྱོགས་ཀྱི་ལམ་དུ་ཕྱིན་པ་ན་ཁང་བཟང་ཚངས་པའི་བླ་མ་ཞེས་བྱ་བ་མཐོང་སྟེ། དེའི་སྒོར་ཕྱིན་པས་དེའི་ནང་ནས་ཆེས་ཁྱད་པར་དུ་འཕགས་པའི་ལྷ་མོ་སུམ་ཅུ་རྩ་གཉིས་བྱུང་སྟེ་བསུས་ནས་དེར་ཡང་ལོ་དུ་མར་དགའ་བ་མྱོང་བའི་མཐར་དེ་རྣམས་ཀྱིས་བཀག་ཀྱང་མ་ཉན་པར་ལྷོ་ཕྱོགས་ཀྱི་ལམ་དེར་ཞུགས་ནས་ཕྱིན་པ་ན་ལྕགས་ཀྱི་མཁར་ཞིག་མཐོང་སྟེ་དེའི་ནང་དུ་སོང་བ་དང་དེ་མ་ཐག་ཏུ་རིམ་པར་སྒོ་བཅད་དེ་ནང་མའི་ནང་དུ་ཕྱིན་པ་ན་དེར་མི་ཆེན་པོ་ཞིག་གི་མགོ་ལ་ལྕགས་ཀྱི་འཁོར་ལོ་མེ་འབར་བ་ཞིག་འཁོར་ཞིང་འདུག་པ་ལ་དེའི་མགོ་བོ་ལས་རྣག་ཁྲག་ཅི་འཛག་པ་རྣམས་དེའི་ཟས་སུ་ཟ་བར་མཐོང་ནས་དེ་ལ་ཁྱོད་སུ་ཡིན་ཅེས་དྲིས་པས། དེ་ན་རེ་ང་ནི་མ་ལ་གནོད་པ་བྱེད་བྱེད་པ་ཡིན་ནོ་ཟེར། དེ་ཐོས་པ་དང་། ང་ཡང་ལས་དེ་ཁོ་ནས་འདིར་ཁྲིད་པ་འདྲའོ་སྙམ་པ་དང་། ནམ་མཁའ་ནས་སྒྲ་བྱུང་སྟེ། བཅིངས་པ་གང་ཡིན་པ་དེ་ནི་གྲོལ་བར་གྱུར་ཏོ། །གྲོལ་བ་གང་ཡིན་པ་དེ་ནི་བཅིངས་སོ། །ཞེས་ཟེར་བའི་མོད་ལ་མི་དེའི་མགོ་ལ་འཁོར་ལོ་མི་སྣང་བར་གྱུར་ནས་མཛའ་བོའི་བུ་མོའི་མགོ་ལ་བྱུང་ངོ་། །དེར་ཤིན་ཏུ་སྡུག་བསྔལ་གྱི་ཉམ་ཐག་པར་མཐོང་ནས་མི་དེས་ཚིགས་སུ་བཅད་དེ་སྨྲས་པ། ཁྱེད་ནི་ལོངས་བྱེད་རྟག་ཏུ་མྱོས། །དགའ་བྱེད་ཚངས་པའི་བླ་མ་ཡི། །ཁང་བཟང་ལས་ནི་ཐལ་ནས་ཀྱང་། །ཅི་ཡི་ཕྱིར་ན་འདི་རུ་འོང་། །མཛའ་བོའི་བུ་མོས་སྨྲས་པ། བདག་ནི་ལོངས་བྱེད་རྟག་ཏུ་མྱོས། །དགའ་བྱེད་ཚངས་པའི་བླ་མ་ཡི། །ཁང་བཟང་ལས་ནི་ཐལ་ནས་ཀྱང་། །འདོད་ཆེན་གྱིས་ནི་འདིར་འོངས་སོ། །ལས་ཀྱིས་རིང་དུ་ཁྲིད་པར་བྱེད། །རིང་པོ་ནས་ཀྱང་ལས་ཀྱིས་ཁྲིད། །གང་དུ་ལས་ཀྱི་རྣམ་པར་སྨིན། །དེར་ནི་ལས་ཀྱིས་ཁྲིད་པར་བྱེད། །ལས་ཀྱི་རྣམ་སྨིན་གང་ཞིག་གིས། །བདག་གི་སྲོག་ནི་གཅོད་བྱེད་པ། །ཀུན་ཏུ་འབར་ཞིང་རབ་འབར་བའི། །འཁོར་ལོ་མགོ་ལ་འཁོར་བར་གྱུར། །མི་དེས་སྨྲས་པ། ཁྱོད་ཀྱིས་རབ་ཏུ་སྡང་སེམས་ཀྱིས། །མ་ཅིག་དགའ་བ་བྱེད་བྱེད་པའི། །མགོ་བོར་རྡོོག་པས་བསྣུན་པས་ན། །དེ་ཡི་ལས་ཀྱི་འབྲས་བུ་ཡིན། །མཛའ་བོའི་བུ་མོས་སྨྲས་པ། ལོ་གྲངས་སྟོང་ཕྲག་དུ་ཡི་བར། །བདག་གི་སྲོག་ནི་གཅོད་བྱེད་པ། །ཀུན་ཏུ་འབར་ཞིང་རབ་འབར་བའི། །འཁོར་ལོ་མགོ་ལ་འཁོར་བར་འགྱུར། །མི་དེས་སྨྲས་པ། ལོ་ནི་སྟོང་ཕྲག་དྲུག་ཅུ་དང་། །བརྒྱ་ཕྲག་དྲུག་ཅུའི་བར་སྲིད་དུ། །ལྕགས་ཀྱི་འཁོར་ལོ་འབར་བ་ནི། །ཁྱོད་ཀྱི་མགོ་ལ་འཁོར་བར་འགྱུར། །མཛའ་བོའི་བུ་མོས་སྨྲས་པ། ཀྱེ་གཞན་ཡང་འདིར་འོང་བ་ཡོད་དམ། མི་དེས་སྨྲས་པ་སུ་འདི་ལྟ་བུའི་ལས་བྱེད་པ་དག་འོང་བར་འགྱུར་རོ། །དེ་ནས་མཛའ་བོའི་བུ་མོ་སྡུག་བསྔལ་གྱི་ཚོར་བས་ཉེན་ནས་སེམས་ཅན་ཐམས་ཅད་ལ་སྙིང་རྗེ་བསྐྱེད་དེ། ཀྱེ་ང་ནི་སེམས་ཅན་ཐམས་ཅད་ཀྱི་ཕྱིར་འཁོར་ལོ་འདི་མགོ་བོའི་སྟེང་དུ་འཛིན་པར་འདོད་ཀྱིས། འདི་ལྟ་བུའི་ལས་བྱེད་བྱེད་པ་གཞན་སུ་ཡང་འདིར་འོང་བར་མ་གྱུར་ཅིག ཅེས་སྨྲས་པས། དེའི་མོད་ལ་འཁོར་ལོ་དེ་ཉིད་མགོ་བོ་ལས་གྱེན་དུ་འཕགས་ནས་ཏ་ལ་བདུན་སྲིད་ཙམ་དུ་ནམ་མཁའ་ལ་འདུག་གོ །དེར་བྱང་ཆུབ་སེམས་དཔའ་མཛའ་བོའི་བུ་མོ་དེ་ཚེ་འཕོས་ནས་དགའ་ལྡན་གྱི་ལྷའི་རིས་སུ་སྐྱེས་སོ། །དེའི་དུས་ཀྱི་མཛའ་བོའི་བུ་མོར་གྱུར་པ་གང་ཡིན་པ་དེ་ནི་ང་ཡིན་ཏེ། ངས་ཉོ་ཚོང་བྱས་ནས་མ་ལ་ཀཱར་ཥ་པ་ཎ་ཕུལ་བའི་ལས་ཀྱིས་ནི་གྲོང་ཁྱེར་ཆེན་པོ་བཞིར་བདེ་བ་ཆེན་པོ་མྱོང་ལ། ངས་མ་ལ་གནོད་པ་ཆུང་ངུ་བྱས་པའི་ལས་དེའི་རྣམ་པར་སྨིན་པས་ནི་དེ་ལྟ་བུའི་སྡུག་བསྔལ་མྱོང་ངོ་། །དགེ་སློང་དག་དེ་བས་ན་འདི་ལྟར་བསླབ་པར་བྱ་སྟེ་ཕ་མ་ལ་བཀུར་སྟི་བྱའོ། །གནོད་པ་མི་བྱའོ། །དེ་ཅིའི་ཕྱིར་ཞེ་ན། བུའི་ཕ་མ་གཉིས་ནི་དཀའ་བ་བྱེད་བྱེད་པ་དང་སྐོམ་སྡུད་པ་དང་། གསོ་བ་དང་བསྐྱེད་པ་དང་ནུ་མ་བསྣུན་པ་དང་འཛམ་བུ་གླིང་བཀྲ་བར་སྟོན་པ་ཡིན་པའི་ཕྱིར་རོ། །གལ་ཏེ་བུས་ཕ་མ་གཉིས་ཕྲག་པ་གཡས་གཡོན་དུ་བཞག་སྟེ་ལོ་བརྒྱའི་བར་དུ་ཁྱེར་རམ། ཡང་ན་ས་ཆེན་པོ་འདི་ནོར་བུ་དང་མུ་ཏིག་དང་བཻཌཱུཪྻ་དང་དུང་དང་མན་ཤེལ་དང་བྱི་རུ་དང་། གསེར་དང་དངུལ་དང་རྡོའི་སྙིང་པོ་དང་། སྤུག་དང་པདྨ་རཱ་ག་དང་གཡས་སུ་འཁྱིལ་བ་དང་། དེ་ལྟ་བུ་དག་གིས་བཀང་བའི་དབང་ཕྱུག་ལ་དབང་བྱེད་དུ་བཅུག་ཀྱང་། དེ་ཙམ་གྱིས་ནི་བུས་ཕ་མ་གཉིས་ལ་དྲིན་བསབ་པའམ་ཕན་གདགས་པར་མི་འགྱུར་གྱི། གང་གི་ཕ་མ་དེ་གཉིས་དད་པ་མེད་པ་ལ་དད་པ་ཕུན་སུམ་ཚོགས་པ་ལ་འཛུད་པ་དང་། ཚུལ་ཁྲིམས་འཆལ་བ་ལས་ཚུལ་ཁྲིམས་ཕུན་སུམ་ཚོགས་པ་དང་། སེར་སྣ་ཅན་གཏོང་བ་ཕུན་སུམ་ཚོགས་པ་དང་། ཤེས་རབ་འཆལ་བ་ཤེས་རབ་ཕུན་སུམ་ཚོགས་པ་ལ་འཛུད་པ་དང་། འདུལ་བ་དང་། གནས་པར་བྱེད་པ་དང་། འཇོག་པར་བྱེད་པ་དེ་ཙམ་གྱིས་ནི། བུས་ཕ་མ་གཉིས་ལ་དྲིན་བསབ་པའམ་ཕན་བཏགས་པར་འགྱུར་རོ། །ཞེས་བཀའ་སྩལ་ཏོ། །འདིས་ནི་ཕ་མ་ཡུལ་ཆེས་གཉན་ཞིང་བཀུར་སྟི་བྱ་དགོས་པ་དང་བདག་གཞན་བརྗེ་བའི་བྱང་ཆུབ་ཀྱི་སེམས་བསྒོམ་པའི་ཕན་ཡོན་ཀྱང་བསྟན་པ་ཡིན་ནོ། །