བྱང་ཆུབ་སེམས་དཔའི་སྐྱེས་པའི་རབས་ཀྱང་བསྟན་པ་ཡིན་པས་གུས་པ་བསྐྱེད་ལ་ཡོན་ཏན་གྱི་རྗེས་སུ་སློབ་པ།
༈ ཡང་བཅོམ་ལྡན་འདས་རྒྱལ་བྱེད་ཀྱི་ཚལ་དུ་བཞུགས་ནས། སྔ་དྲོའི་དུས་ཀྱི་ཚེ་མཉན་ཡོད་དུ་བསོད་སྙོམས་ལ་གཤེགས་པའི་ཚེ། ལམ་སྲང་དུ་བྲམ་ཟེ་ཞིག་གིས་ཡུན་རིང་བརྟགས་ནས་ས་ལ་རི་མོ་བྲིས་ཏེ། ཀྱེ་ག་ཏ་མ་བདག་ལ་ཀཱར་ཥ་པ་ཎ་ལྔ་བརྒྱ་ཙམ་མ་སྩལ་གྱི་བར་དུ་རི་མོ་འདི་ལས་མ་འདའ་ཞིག་ཅེས་གསོལ་པས། བཅོམ་ལྡན་འདས་ཀྱིས་ཀྱང་ལས་ཆུད་མི་ཟ་བར་བསྟན་པ་དང་། མ་བྱིན་ལེན་པ་ལས་བཟློག་པའི་ཕྱིར་དེ་ཉིད་དུ་བཞུགས་སོ། །དེ་ལྟར་བཅོམ་ལྡན་འདས་བྲམ་ཟེས་ལམ་བཀག་པར་ཐོས་ནས་རྒྱལ་པོ་གསལ་རྒྱལ་དང་། རི་དྭགས་འཛིན་གྱི་མ་ས་ག་དང་། བཙུན་མོའི་འཁོར་གྱི་བླ་དྲང་སྲོང་སྦྱིན་དང་། གནའ་མི་དང་། བརྒྱ་བྱིན་དང་། ཚངས་པ་སོགས་ལྷ་རྣམས་དང་། རྣམ་ཐོས་ཀྱི་བུ་ལ་སོགས་པས་རང་རང་གིས་གསེར་དངུལ་སོགས་ཁྱེར་ཏེ་བྲམ་ཟེ་ལ་སྦྱིན་པར་བརྩམས་ཀྱང་། དེ་དག་ལ་བཅོམ་ལྡན་འདས་ཀྱིས་ཁྱེད་རྣམས་ཀྱིས་སྦྱིན་པར་བྱ་བ་མ་ཡིན་ནོ་གསུངས། དེའི་འོག་ཏུ་ཁྱིམ་བདག་མགོན་མེད་ཟས་སྦྱིན་གྱིས་ཐོས་ནས་གསེར་གྱི་གཞོང་པ་དངུལ་གྱིས་བཀང་པའི་སྟེང་དུ་ཀཱར་ཥ་པ་ཎ་ལྔ་བརྒྱ་བཞག་སྟེ་བཅོམ་ལྡན་འདས་ཀྱིས་སྤྱན་སྔར་ཕྱིན་ཏེ་ཕུལ་བ་ན། བཀའ་སྩལ་པ། ཁྱིམ་བདག་འདི་དག་ནི་ཁྱེད་ཀྱིས་སྦྱིན་པར་བྱ་བ་ཡིན་གྱིས་བྲམ་ཟེ་ལ་བྱིན་ཅིག དེ་ནས་ཁྱིམ་བདག་མགོན་མེད་ཟས་སྦྱིན་གྱིས་གསེར་གྱི་གཞོང་པ་གང་བ་དེ་བྲམ་ཟེ་ལ་བྱིན་ནོ། །དེར་དགེ་སློང་རྣམས་ཐེ་ཚོམ་དུ་གྱུར་ཏེ་དེའི་དོན་གསོལ་ཏེ། བཅོམ་ལྡན་འདས་ཇི་སྲིད་ཅིག་ནས་འདིའི་བུ་ལོན་ཆགས་ལགས་བཀའ་སྩལ་པ། སྔོན་བྱུང་བ་འདས་པའི་དུས་གྲོང་ཁྱེར་ཝཱ་རཱ་ཎ་སཱིའི་རྒྱལ་པོ་ཚངས་སྦྱིན་གྱི་བུ་ཐུ་བོ་རྒྱལ་ཚབ་བྱེད་པ་དེ་དཔྱིད་ཀྱི་དུས་སུ་སྐྱེད་མོས་ཚལ་དུ་སོང་བ་ན། རྒྱལ་བུ་དེའི་གྲོགས་བློན་པོའི་བུ་ཞིག་ཡོད་པ་དེ་དང་རྒྱན་པོ་བ་གཞན་ཞིག་གཉིས་ཆོ་ལོ་རྩེ་བས་བློན་པོའི་བུས་ཀཱར་ཥ་པ་ཎ་ལྔ་བརྒྱ་སྐུག་ཏུ་ཤོར་བ། རྒྱལ་བུས་བློན་པོའི་བུའི་གཉའ་བྱས་ཏེ་མི་དེ་ལ་མ་བྱིན་ནོ། །དེའི་དུས་ཀྱི་རྒྱལ་པོའི་བུར་གྱུར་པ་དེ་ནི་ང་ཉིད་ཡིན་ལ་བློན་པོའི་བུ་ནི་ཁྱིམ་བདག་མགོན་མེད་ཟས་སྦྱིན་དང་། རྒྱན་པོ་བྱེད་པ་དེ་ནི་བྲམ་ཟེ་འདི་ཁོ་ན་ཡིན་ཏེ། ངས་དེའི་ཚེ་རྒྱལ་པོའི་བུ་ཡིན་སྙམ་ནས་རྒྱན་པོ་བྱེད་པ་དེ་ལ་ཀཱར་ཥ་པ་ཎ་མ་བྱིན་པ་དེས་ང་འཁོར་བ་ན་ལོངས་སྤྱོད་ཀྱིས་ཕོངས་པ་མཐའ་ཡས་པ་མྱོང་བ་ད་ལྟར་སངས་རྒྱས་པ་ན་ཡང་འདིས་བུ་ལོན་བདས་སོ། །དགེ་སློང་དག་དེ་ལྟར་ན་ལས་གཅིག་ཏུ་ངེས་པར་གནག་པ་རྣམས་ནི་རྣམ་པར་སྨིན་པ་ཡང་གཅིག་ཏུ་ངེས་པར་གནག་པར་འགྱུར་རོ། །དེ་བཞིན་དུ་དཀར་བས་དཀར་བ་དང་། ལས་འདྲེས་མས་ནི་རྣམ་པར་སྨིན་པ་ཡང་འདྲེས་མར་འགྱུར་རོ། །དེ་བས་ན་ལས་གཅིག་ཏུ་ངེས་པར་གནག་པ་དང་འདྲེས་མ་རྣམས་སྤངས་ལ་ལས་གཅིག་ཏུ་ངེས་པར་དཀར་བ་རྣམས་འབའ་ཞིག་ལ་གཏད་པར་བྱའོ། །མ་བྱིན་པ་ལེན་པ་སྤང་བ་ལ་ཡང་འབད་པར་བྱ་སྟེ། ཅི་ནས་དེ་ལྟ་བུའི་ཉེས་པར་མི་འགྱུར་བར་དགེ་སློང་ཁྱེད་ཀྱིས་དེ་ལྟར་བསླབ་པར་བྱའོ་ཞེས་གསུངས་སོ། །འདིར་ཀུན་ཏུ་རྒྱུ་རབ་བཟང་གི་སྔོན་གྱི་རབས་རྣམས་འབྱུང་སྟེ་གོང་དུ་བསྟན་པ་དང་ཚུལ་མཐུན་ནོ། །དེ་རྣམས་ཀྱིས་བྱང་ཆུབ་སེམས་དཔའི་སྐྱེས་པའི་རབས་ཀྱང་བསྟན་པ་ཡིན་པས་གུས་པ་བསྐྱེད་ལ་ཡོན་ཏན་གྱི་རྗེས་སུ་སློབ་པར་བྱའོ། །