བསླབ་པ་འཆལ་བའི་ཉེས་དམིགས་དང་བསླབ་གཞི་ཕྲ་མོ་བསྲུང་བ་དང་སངས་རྒྱས་ལ་དད་པ་དགེ་འདུན་པ་སོགས་ཀྱི་མངག་གཞུག་ཆོས་བཞིན་དུ་བགྱིས་པའི་ཕན་ཡོན་བསྟན་པ།
༈ ཡང་བཅོམ་ལྡན་འདས་རྒྱལ་པོའི་ཁབ་ན་བཞུགས་པའི་ཚེ། ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ཡུན་རིང་མོ་ཞིག་ཏུ་མ་མཐོང་བས་སེམས་གདུང་བར་གྱུར་ཏེ། དེས་རྒྱལ་པོ་གསལ་རྒྱལ་ལ་བསྐུལ་ནས། རྒྱལ་པོ་དེས་ཡུལ་གྱི་སྐྱེ་བོ་ཀུན་ལ་གོ་བར་བྱས་ཏེ། ཕོ་ཉ་བ་ཞིག་སངས་རྒྱས་སྤྱན་འདྲེན་པར་མངགས་པས། དེ་རྒྱལ་པོའི་ཁབ་ཏུ་སོང་ནས་བཅོམ་ལྡན་འདས་ལ་བསྙུན་གསོལ་ཞིང་རྒྱལ་པོ་ལ་སོགས་པའི་འ ཕྲིན་ཞུས་ནས། ཕོ་ཉ་བ་དེས་རྒྱལ་པོ་གཟུགས་ཅན་སྙིང་པོ་ལའང་གནང་བ་ཞུས་ཏེ། དེར་དབྱར་གནས་ཟིན་པ་དང་སངས་རྒྱས་འཁོར་དང་བཅས་པ་མཉན་ཡོད་དུ་གཤེགས་སོ། །དེ་དང་མཉམ་དུ་ཕོ་ཉ་བ་དེ་ཡང་ཤིང་རྟ་ལ་ཞོན་ནས་འགྲོ་བ་ལ། དེས་བཅོམ་ལྡན་འདས་ཞབས་ཀྱིས་གཤེགས་པར་མཐོང་ནས། ཤིང་རྟ་ལས་བབས་ཏེ་བཅོམ་ལྡན་འདས་ལ་ཕུལ་བ་དང་། བཀའ་སྩལ་པ། རྫུ་འཕྲུལ་རྐང་པའི་ཤིང་རྟ་དང་། །ཡང་དག་རྩོལ་ལ་ང་གནས་ནས། །ཉོན་མོངས་ཚེར་མས་མ་སྣད་པར། །ས་སྟེང་ཀུན་ཏུ་རྒྱུ་བར་བྱེད། །ཕོ་ཉས་གསོལ་པ། བཅོམ་ལྡན་འདས་ནི་རྫུ་འཕྲུལ་གྱི་ཞབས་ཀྱིས་གཤེགས་པ་ལགས་ཀྱིས་ཀྱང་། བདག་ལ་ཕན་གདགས་པ་དང་ཐུགས་བརྩེ་བའི་སླད་དུ་ཆིབས་སུ་གསོལ། དེ་ནས་དེ་ལ་ཐུགས་བརྩེ་བའི་སླད་དུ་རྫུ་འཕྲུལ་གྱིས་ཤིང་རྟའི་སྟེང་ན་བཞུགས་བཞིན་དུ་མཉན་ཡོད་དུ་བྱོན་ཅིང་། ཕོ་ཉ་བས་ཀྱང་རྒྱལ་པོ་ལ་སྦྲན་ཏེ་སྐྱེ་བོའི་ཚོགས་ཐམས་ཅད་ཀྱིས་བསུས་ནས་རྒྱལ་བྱེད་ཀྱི་ཚལ་དུ་ཞུགས་སོ། །ཕོ་ཉ་དེས་ཆོས་ཐོས་ནས་དེའི་མཚན་མོ་ཉིད་དུ་ཤི་ནས་སུམ་ཅུ་རྩ་གསུམ་གྱི་ལྷར་སྐྱེས་ཏེ། ཞག་མ་ལོན་པར་དེ་ཉིད་དུ་བཅོམ་ལྡན་འདས་ཀྱི་སྤྱན་སྔར་འོངས་ཏེ། ཆོས་ཉན་པས་འབྲས་བུ་དང་པོ་ཐོབ་ནས། དགའ་བའི་ཚིག་བརྗོད་ཏེ་ལྷ་ཡུལ་དུ་སོང་ངོ་། །དེའི་ཚེ་འོད་ཀྱིས་རྒྱལ་བྱེད་ཀྱི་ཚལ་ཀུན་སྣང་བར་གྱུར་པ་རྒྱལ་པོ་གསལ་རྒྱལ་གྱིས་མཐོང་ནས་ནམ་ལངས་པ་ན་དེའི་དོན་གསོལ་པས། བཀའ་སྩལ་པ། ཁྱོད་ཀྱི་ཕོ་ཉ་བ་དེ་ང་ལ་སེམས་དགའ་བར་གྱུར་ནས་ཤི་སྟེ་སུམ་ཅུ་རྩ་གསུམ་གྱི་ལྷར་སྐྱེས་ནས་དེ་མདང་སུམ་ངའི་ཐད་དུ་འོངས་ཏེ། ངས་དེ་ལ་ཆོས་བསྟན་ཏེ་བདེན་པ་མཐོང་བར་གྱུར་ནས། རང་གི་གནས་སུ་སོང་ངོ་། །དེ་ནས་རྒྱལ་པོ་དེ་ངོ་མཚར་དུ་གྱུར་ནས། ཀྱེ་མ་སངས་རྒྱས། ཀྱེ་མ་ཆོས། ཀྱེ་མ་དགེ་འདུན་འདི་དག་ལ་ནི་ཆུང་ངུ་ཞིག་བྱས་ཀྱང་རྣམ་པར་སྨིན་པ་ཆེན་པོར་འགྱུར་རོ་ཞེས་སྨྲས་སོ། །དེ་ནས་བཅོམ་ལྡན་འདས་ཀྱིས། རྐང་གཉིས་རྣམས་ཀྱི་ནང་ནས་སངས་རྒྱས་མཆོག་དང་། ཆོས་རྣམས་ཀྱི་ནང་ནས་འདོད་ཆགས་དང་བྲལ་བའི་ཆོས་དང་། ཚོགས་རྣམས་ལས་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་མཆོག་ཡིན་པར་བསྟན་ཏེ། མཆོག་ལ་མངོན་པར་དགའ་བ་དེ་དག་གི་ནི་རྣམ་པར་སྨིན་པ་ཡང་ལྷ་དང་མི་རྣམས་ཀྱི་ནང་དུ་མཆོག་འབའ་ཞིག་ཏུ་ཤེས་པར་བྱའོ་གསུངས། འདི་གཉིས་ཀྱིས་ནི་བསླབ་པ་འཆལ་བའི་ཉེས་དམིགས་དང་བསླབ་གཞི་ཕྲ་མོ་བསྲུང་བ་དང་སངས་རྒྱས་ལ་དད་པ་དགེ་འདུན་པ་སོགས་ཀྱི་མངག་གཞུག་ཆོས་བཞིན་དུ་བགྱིས་པའི་ཕན་ཡོན་བསྟན་པའོ། །ཡང་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ། ཀོ་ས་ལའི་ལྗོངས་རྒྱུ་ཞིང་གཤེགས་པ་ལས་ནགས་ཁྲོད་གཅིག་ཏུ་བྱོན་པ་དང་། དེ་ན་མ་ཧེའི་ཁྱུ་ཆེན་པོ་མ་ཧེའི་རྫི་ལྔ་བརྒྱ་དང་བཅས་ཏེ་གནས་ཤིང་དེའི་ནང་ན་མ་ཧེ་སྟོབས་ཆེན་པོ་དང་ལྡན་པ་མི་གཞན་གྱི་དྲི་ཚོལ་བ་ཙམ་གྱིས་སྟེང་དུ་རྒྱུག་པར་བྱེད་པ་ཞིག་ཡོད་དོ། །དེར་བཅོམ་ལྡན་འདས་གཤེགས་པར་མཐོང་ནས། མ་ཧེའི་རྫི་བུ་རྣམས་ཀྱིས་སྐད་ཆེན་པོས་བོས་ཏེ། འདི་ན་མ་ཧེ་མ་རུངས་པ་མཆིས་ཀྱིས། ཤུལ་འདིར་མི་གཤེགས་སུ་གསོལ་ཞེས་བྱས་སོ། །དེར་བཅོམ་ལྡན་འདས་ཀྱིས། ཀྱེ་ངས་འདིར་དུས་ལ་བབ་པར་ཤེས་སོ་ཞེས་གསུངས་ནས་དེར་གཤེགས་པ་ན། མ་ཧེ་དེས་མཐོང་ནས་རྔ་མ་ལྡང་དུ་གཟར་ནས་ཕྱོགས་དེར་བརྒྱུགས་སོ། །དེ་ནས་བཅོམ་ལྡན་འདས་ཀྱིས་མདུན་དུ་སེང་གེ་རལ་པ་ཅན་ལྔ། གཡས་གཡོན་དུ་མེ་ཆེན་པོ་ལྔ། སྟེང་དུ་ལྕགས་ཀྱི་ཕ་བོང་ཆེན་པོ་བཅས་སྤྲུལ་པས། མ་ཧེ་དེ་རབ་ཏུ་འཇིགས་ནས་བཅོམ་ལྡན་འདས་ཀྱི་ཞབས་ལ་ལྕེས་བལྡག་ནས་ཞུམ་བཞིན་དྲུང་དུ་འཁོད་པ་ན། དེ་ལ་བཞིན་བཟང་འདི་ལྟར་འདུ་བྱེད་ཐམས་ཅད་ནི་མི་རྟག་གོ །ཆོས་ཐམས་ཅད་ནི་བདག་མེད་པའོ། །མྱ་ངན་ལས་འདས་པ་ནི་ཞི་བའོ། །ཞེས་ཚིག་གསུམ་བསྟན་ནས་ཚེ་རབས་དྲན་པར་མཛད་པས་དེ་ངུས་སོ། །དེར། ཁྱོད་ནི་དུད་འགྲོར་སྐྱེས་པ་ལ། །སོགས་གོང་དུ་སྦྲུལ་གྱི་སྐབས་སུ་བསྟན་པའི་ཚིགས་བཅད་རྣམས་གསུངས་ཏེ། ང་ལ་སེམས་དགའ་བར་གྱིས་དང་དུད་འགྲོའི་སྐྱེ་གནས་ལས་ཐར་ཡང་སྲིད་དོ། །ཞེས་བཀའ་སྩལ་པས། མ་ཧེ་དེ་ཟས་བཅད་ནས་ཚེ་འཕོས་ཏེ་སུམ་ཅུ་རྩ་གསུམ་གྱི་ལྷར་སྐྱེས་ཤིང་བཅོམ་ལྡན་འདས་ཀྱི་སྤྱན་སྔར་འོངས་ཏེ་ཆོས་ཉན་པས་བདེན་པ་མཐོང་ནས་དགའ་བའི་ཚིག་བརྗོད་ནས་རང་གནས་སུ་སོང་ངོ་། །དེའི་ཚེ་ནགས་ཁྲོད་དུ་སྣང་བ་ཆེན་པོས་ཁྱབ་པ་མཐོང་ནས་མ་ཧེའི་རྫི་རྣམས་ཀྱིས་དེའི་དོན་གསོལ་པ་ན། བཅོམ་ལྡན་འདས་ཀྱིས་སྔར་གྱི་ལོ་རྒྱུས་དེ་གསུངས་པས། དེ་དག་མངོན་པར་དགའ་ཞིང་ངོ་མཚར་དུ་གྱུར་ནས། དུད་འགྲོའི་སྐྱེ་གནས་སུ་སྐྱེས་པས་ཀྱང་དགེ་བའི་བཤེས་གཉེན་དང་ཕྲད་ནས་ཁྱད་པར་དེ་ལྟ་བུ་ཐོབ་པར་གྱུར་ན་བདག་ཅག་གིས་ཅིས་མི་ཐོབ་སྙམ་སྟེ། སངས་རྒྱས་འཁོར་དང་བཅས་པ་ལ་བཤོས་ཕུལ་ཞིང་དེ་དག་དད་པས་རབ་ཏུ་བྱུང་བས་མཐར་གྱིས་དགྲ་བཅོམ་པའི་གོ་འཕང་ཐོབ་བོ། །དེར་དགེ་སློང་རྣམས་ཀྱིས་དེ་དག་གི་ལས་ཀྱི་རྒྱུ་ཞུས་པ་ན། བཅོམ་ལྡན་འདས་ཀྱིས་སྔོན་སངས་རྒྱས་འོད་སྲུང་འཇིག་རྟེན་དུ་བྱོན་པའི་ཚེ། འདི་རྣམས་དགེ་སློང་སྡེ་སྣོད་གསུམ་པ་འཁོར་ལྔ་བརྒྱ་དང་བཅས་པར་གྱུར་ཏེ། དེའི་ཚེ་སློབ་པ་དང་མི་སློབ་པའི་དགེ་སློང་མང་པོས་དེ་ལ་གསུང་རབ་ཀྱི་དོན་དྲིས་པས། དེས་ལན་མ་ཐེབས་པས་ཁྲོས་ཏེ། ནགས་ཀྱིས་མ་ཧེ་དང་འདྲ་བ་འདི་དག་ཅི་ཤེས་ཞེས་སྨྲས་ཤིང་། དེའི་སློབ་མ་རྣམས་ཀྱིས་ཀྱང་མ་ཧེའི་རྫི་དང་འདྲ་བ་འདི་དག་ཅི་ཤེས་ཞེས་ཚིག་རྩུབ་སྨྲས་པའི་རྒྱུ་དེས། སྐྱེ་བ་ལྔ་བརྒྱར་སྡེ་སྣོད་འཛིན་པ་མ་ཧེའི་ཁྱུ་མཆོག་དང་སློབ་མ་རྣམས་རྫི་བུར་གྱུར་ཏོ། །དེ་ད་ལྟར་ང་ལ་སེམས་དགའ་བར་གྱུར་པས་ལྷར་སྐྱེས་པ་དང་། དེ་རྣམས་ཀྱིས་དེའི་ཚེ་ཚུལ་ཁྲིམས་བསྲུངས་པས་བདེན་པ་མཐོང་བ་དང་དགྲ་བཅོམ་པ་ཉིད་མངོན་དུ་བྱས་སོ། །དགེ་སློང་དག་དེ་བས་ན་ངག་གི་ཉེས་པ་སྤང་བའི་ཕྱིར་འབད་པར་བྱ་སྟེ། ཅི་ནས་མ་ཧེ་དང་མ་ཧེ་རྫི་རྣམས་ཀྱི་ཉེས་པ་དེ་ལྟ་བུ་དག་འབྱུང་བར་མི་འགྱུར་བ་དང་། ལྷའི་བུ་དེའི་ཡོན་ཏན་གྱི་ཚོགས་དེ་ལྟ་བུ་ཐོབ་པར་འགྱུར་བར་དགེ་སློང་ཁྱོད་ཀྱིས་དེ་ལྟར་བསླབ་པར་བྱའོ། །ཞེས་བཀའ་སྩལ་ཏོ། །