སངས་རྒྱས་ལ་དད་པ་དང་ཆོས་ཐོས་པའི་ཕན་ཡོན་ཀྱང་བསྟན་པ།

༈ ཡང་སྟོན་པ་རྒྱལ་བྱེད་ཀྱི་ཚལ་ན་བཞུགས་པའི་ཚེ། པཉྩ་ལའི་རྒྱལ་པོས་རྒྱལ་པོ་གསལ་རྒྱལ་ལ་ངང་པ་ལྔ་བརྒྱ་སྐྱེས་སུ་བསྐུར་བ་རྒྱལ་པོ་གསལ་རྒྱལ་གྱིས་ངང་པ་དེ་དག་ལ་མི་འཇིགས་པ་བྱིན་ཏེ་རྒྱལ་བྱེད་ཀྱི་ཚལ་དུ་བཏང་བས། དེ་དག་སངས་རྒྱས་འཁོར་དང་བཅས་པས་བཤོས་གསོལ་བའི་དྲུང་དུ་འགྲོ་ཞིང་ཁྱོས་མ་བྱིན་པ་དག་ཟ་བར་བྱེད་ཅིང་། འཁོར་རྣམ་བཞི་ལ་ཆོས་གསུངས་པའི་སྐབས་ཀྱང་དེ་དག་ལ་ཕྱིན་ཏེ་ཉན་པར་བྱེད་པ་ལས། དེ་རྣམས་ཚེ་འཕོས་ནས་སུམ་ཅུ་རྩ་གསུམ་གྱི་ལྷའི་གནས་སུ་སྐྱེས་ཏེ་དེ་དག་ཞག་མ་ལོན་པར་བཅོམ་ལྡན་འདས་ཀྱི་དྲུང་དུ་འོངས་ནས་ཆོས་ཞུས་ཏེ་བདེན་པ་མཐོང་བས་དགའ་བའི་ཚིག་བརྗོད་ཅིང་རང་གནས་སུ་སོང་ངོ་། །ཕྱིར་ནངས་འཁོར་རྣམས་ལ་བཀའ་སྩལ་པ། དགེ་སློང་དག་ཀོ་ས་ལའི་རྒྱལ་པོ་གསལ་རྒྱལ་གྱིས། ངང་པ་ལྔ་བརྒྱ་འདིར་བཏང་བ་དེ་ཁྱོད་ཀྱི་མཐོང་ངམ། བཙུན་པ་མཐོང་ལགས་སོ། །བཀའ་སྩལ་པ། དེ་དག་ང་ལ་སེམས་དགའ་བར་གྱུར་ཏེ་ཤི་ནས་སུམ་ཅུ་རྩ་གསུམ་གྱི་ལྷ་ཡུལ་བཟང་པོར་སྐྱེས་ཏེ། དེ་དག་མདང་ངའི་ཐད་དུ་ལྷགས་ནས་དེ་དག་ལ་ངས་ཆོས་བསྟན་ཏེ་བདེན་པ་མཐོང་བར་གྱུར་ནས་རང་གི་གནས་སུ་དོང་ངོ་། །དེར་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པ་ན། སྔོན་སངས་རྒྱས་འོད་སྲུང་གི་དུས་སུ་འདི་དག་རབ་ཏུ་བྱུང་བ་ལས་བསླབ་པ་ལ་ལྷོད་པར་བྱས་པ་དེས་ན་ངང་པར་སྐྱེས་སོ། །ང་ལ་སེམས་དགའ་བར་བྱས་པ་དེས་ནི་ལྷར་སྐྱེས་སོ། །བསླབ་པ་ལྷག་མ་རྣམས་བསྲུངས་པ་དེས་ནི་བདེན་པ་མཐོང་བར་གྱུར་ཏོ། །དགེ་སློང་དག་དེ་བས་ན་ལས་གཅིག་ཏུ་དཀར་བ་འབའ་ཞིག་ལ་གཏད་པར་བྱའོ་གསུངས། འདིས་ནི་བསླབ་པ་འགལ་བའི་ཉེས་དམིགས་དང་། དེ་ལས་བསླབ་གཞི་གཞན་ཕྲ་མོ་བསྲུངས་པ་དང་སངས་རྒྱས་ལ་དད་པ་དང་ཆོས་ཐོས་པའི་ཕན་ཡོན་ཀྱང་བསྟན་པ་ཡིན་ནོ། །ཡང་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་སེར་སྐྱའི་གནས་ན་ཤིང་ནྱ་གྲོ་དྷའི་ཀུན་དགའ་ར་བ་ན་བཞུགས་པའི་ཚེ། སེར་སྐྱའི་གནས་ན་ཤཱཀྱ་ཕྱུག་ཅིང་ནོར་མང་བ་རྣམ་ཐོས་བུའི་ནོར་དང་ལྡན་པ་ཞིག་གི་ཆུང་མ་ལ་ཁྱེའུ་གཟུགས་བཟང་ཞིང་ལྟ་ན་སྡུག་པ་མིའི་ཁ་དོག་ལས་ནི་འདས་ལྷའི་ཁ་དོག་ནི་མ་ཐོབ་པ་འཛམ་བུའི་ཆུ་བོ་གསེར་གྱི་མདོག་འདྲ་བ་ཞིག་བཙས་ཏེ། དེའི་འོད་ཀྱིས་གྲོང་ཁྱེར་སེར་སྐྱའི་གནས་ཐམས་ཅད་སྣང་བར་བྱས་པས་མིང་གསེར་འོད་ཅེས་བཏགས་སོ། །དེར་ཆེར་སྐྱེས་པ་ན་བྱད་གཟུགས་ཀྱི་རྒྱགས་པས་མྱོས་ཏེ་གྲོང་ཁྱེར་གྱིས་ཕྱི་རོལ་ན་རྩེར་ཕྱིན་པ་ན། ཤཱཀྱ་རྣམས་ཤིང་ནྱ་གྲོ་དྷཱའི་ཀུན་དགའ་ར་བར་འགྲོ་བ་མཐོང་ནས་གཏམ་དྲིས་པས། སངས་རྒྱས་ཀྱི་མཚན་ཐོས་པའི་མོད་ལ་སྤུ་ཐམས་ཅད་ཟིང་ཞིང་མཆོག་ཏུ་ངོ་མཚར་བར་གྱུར་ནས། བཅོམ་ལྡན་འདས་ཀྱི་སྤྱན་སྔར་ཕྱིན་པ་ན་སྐུ་མཐོང་བ་ཙམ་གྱི་དེའི་བྱད་གཟུགས་ཀྱི་རྒྱགས་པ་མེད་པར་གྱུར་ནས་ཞབས་ལ་ཕྱག་བྱས་ཏེ་ཆོས་ཉན་ནས། ཕ་མ་ལ་གནང་བ་ཞུས་ཏེ་ཚུར་ཤོག་གིས་བསྙེན་པར་རྫོགས་ཏེ་བརྩོན་པས་དགྲ་བཅོམ་པའི་གོ་འཕང་མངོན་དུ་བྱས་སོ། །དེར་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པ་ན། སྔོན་བསྐལ་པ་དགུ་བཅུ་རྩ་གཅིག་འདས་པའི་ཕ་རོལ་ན་སངས་རྒྱས་རྣམ་པར་གཟིགས་འཇིག་རྟེན་དུ་བྱོན་ཏེ། རྒྱལ་པོའི་ཕོ་བྲང་གཉེན་ལྡན་དུ་བཞུགས་ནས། སངས་རྒྱས་ཀྱི་ཕྲིན་ལས་ཐམས་ཅད་མཛད་པའི་འོག་ཏུ་སྐུ་མྱ་ངན་ལས་འདས་པའི་ཚེ། རྒྱལ་པོ་མཉན་ཡོད་ཀྱིས་སྐུ་གདུང་ལ་མཆོད་པ་བྱས་ནས། རིན་པོ་ཆེ་སྣ་བཞི་ལས་བྱས་པའི་མཆོད་རྟེན་ཁོ་ར་ཁོར་ཡུག་ཏུ་དཔག་ཚད་གཅིག་ཡོད་ལ། འཕང་དུ་རྒྱང་གྲགས་གཅིག་ཡོད་པ་ཞིག་བརྩིགས་ཏེ་མཆོད་རྟེན་གྱི་དུས་སྟོན་ཡང་གཙུགས་སོ། །དེའི་ཚེ་ཁྱིམ་བདག་གཅིག་གིས་མཆོད་རྟེན་དེ་ལ་གསེར་གྱི་མེ་ལོང་ཞིག་བཏགས་ནས་སྤོས་དང་མེ་ཏོག་སོགས་ཀྱིས་མཆོད་ཅིང་ཕྱག་བྱས་ཏེ། བདག་གིས་ཀྱང་ཡོན་ཏན་འདི་ལྟ་བུ་དག་ཐོབ་པར་གྱུར་ཅིག སྟོན་པ་འདི་ལྟ་བུ་མཉེས་པར་བྱེད་པར་གྱུར་ཅིག མི་མཉེས་པར་བྱེད་པར་མ་གྱུར་ཅིག ཅེས་སྨོན་ལམ་བཏབ་བོ། །དེའི་དུས་ཀྱི་ཁྱིམ་བདག་དེ་ནི་ཁྱེའུ་གསེར་འོད་འདི་ཡིན་ཏེ། དེའི་ཚེ་མཆོད་རྟེན་ལ་བཀུར་སྟི་བྱས་པས་འདི་ལྟར་གཟུགས་བྱད་ཁྱད་པར་དུ་འཕགས་ཤིང་། སྨོན་ལམ་བཏབ་པས་ཚེ་འདི་ལ་དགྲ་བཅོམ་པ་ཉིད་མངོན་དུ་བྱས་སོ་གསུངས། །ཡང་སྟོན་པ་ནྱ་གྲོ་དྷཱའི་ཀུན་དགའ་བ་ན་བཞུགས་པའི་ཚེ། ཤཱཀྱ་ཕྱུག་པོ་རྣམ་ཐོས་བུའི་ནོར་ལ་འགྲན་པ་ཞིག་གི་ཆུང་མ་ལ་ཁྱེའུ་མཛེས་ཤིང་ལྟ་ན་སྡུག་པ། ཁ་ནས་ཨུད་པ་ལའི་དྲི་བྲོ་བ་ལུས་ལས་ཙནྡན་གྱི་དྲི་འབྱུང་བ་ཞིག་བཙས་པས་མིང་དྲི་ཞིམ་ཞེས་བཏགས་སོ། །དེར་ཆེར་སྐྱེས་ནས་ལམ་སྲང་དུ་ཞུགས་པའི་ཚེ་ཙནྡན་གྱི་དྲི་བསུང་གིས་གྲོང་ཁྱེར་ཐམས་ཅད་ཁྱབ་པར་གྱུར་ཏེ་སྐྱེ་བོ་ཐམས་ཅད་ངོ་མཚར་དུ་གྱུར་ཞིང་། དེ་ཕྱིས་སངས་རྒྱས་དང་མཇལ་ནས་ཆོས་ཐོས་པས་རྒྱུན་དུ་ཞུགས་པ་ཐོབ་ཅིང་། ཕ་མ་ལ་གསོལ་ནས་རབ་ཏུ་བྱུང་ཞིང་བརྩོན་པས་དགྲ་བཅོམ་པའི་གོ་འཕང་ཐོབ་བོ། །དེར་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པ་ན། སྔོན་སངས་རྒྱས་རྣམ་གཟིགས་ཀྱི་མཆོད་རྟེན་དེ་ལ། ཁྱིམ་བདག་གཅིག་དད་པ་སྐྱེས་ནས་སྤོས་དང་བྱུག་པ་རྣམ་པ་སྣ་ཚོགས་ཕུལ་ཏེ། བདུག་པ་དང་མེ་ཏོག་གིས་མཆོད་ནས་སྨོན་ལམ་བཏབ་པའི་རྒྱུ་དེས་ད་ལྟར་དྲི་ཞིམ་པ་དང་། དགྲ་བཅོམ་པ་ཉིད་མངོན་དུ་བྱས་སོ་གསུངས། །ཡང་སྟོན་པ་ནྱ་གྲོ་དྷཱའི་ཀུན་དགའ་ར་བར་བཞུགས་པའི་ཚེ། ཤཱཀྱ་རྣམ་ཐོས་བུའི་ནོར་དང་ལྡན་པའི་ཆུང་མ་ཞིག་ལ་ཁྱེའུ་དཔེ་ཟླ་དང་བྲལ་བའི་གཟུགས་བྱད་གཙང་བ་ཞིག་བཙས་ཏེ་མིང་བྱད་བཟང་དུ་བཏགས། དེར་ཆེར་སྐྱེས་ནས་ཕྱོགས་གང་དང་གང་དུ་གོམ་པ་བོར་བ་དེ་དག་ཀྱང་གཙང་བར་གྱུར་པས། དེ་བསོད་ནམས་དང་ལྡན་ཞིང་ཆེ་བར་གྲགས་སོ། །དེ་ཉིད་ཕྱིས་བཅོམ་ལྡན་འདས་དང་མཇལ་ཏེ་ཆོས་ཐོས་པས་རྒྱུན་དུ་ཞུགས་པ་ནས་དགྲ་བཅོམ་པའི་བར་སྔར་བཞིན་ནོ། །དེར་ལས་ཀྱི་རྒྱུ་གསོལ་པ་ན། སྔོན་སངས་རྒྱས་རྣམ་གཟིགས་ཀྱི་མཆོད་རྟེན་དེ་ལ་དུས་སྟོན་བྱས་པའི་འོག་ཏུ་མི་དབུལ་པོ་ཞིག་མཆོད་རྟེན་གྱི་འཁོར་སའི་ནང་དུ་སོང་བ་ན། མཆོད་རྟེན་དེ་མེ་ཏོག་རྙིང་པ་དང་རྡུལ་གྱིས་གཡོགས་པར་མཐོང་ནས། དེས་སངས་རྒྱས་ཀྱི་ཡོན་ཏན་རྗེས་སུ་དྲན་ནས་དད་པ་སྐྱེས་ཏེ་ཕྱགས་མ་བླངས་ནས་མཆོད་རྟེན་ཡང་ཕྱགས་མེ་ཏོག་རྙིང་པ་རྣམས་ཀྱང་བསལ་ཏོ། །དེ་ནས་དེས་མཆོད་རྟེན་ལ་རྡུལ་དང་དྲི་མ་མེད་པར་མཐོང་ནས་དགའ་བ་སྐྱེས་ཏེ། ཕྱག་འཚལ་ནས་སྨོན་ལམ་བཏབ་པས་ད་ལྟར་བྱད་གཟུགས་བཟང་ཞིང་འབྲས་བུ་བཞི་མངོན་དུ་བྱས་སོ་གསུངས། །ཡང་སྟོན་པ་ནྱ་གྲོ་དྷའི་ཀུན་དགའ་ར་བ་ན་བཞུགས་པའི་ཚེ། ཤཱཀྱ་ཕྱུག་ཅིང་ནོར་མང་བ་ཞིག་གི་ཆུང་མ་ལ་ཁྱེའུ་གཟུགས་བཟང་ཞིང་ལྟ་ན་སྡུག་པ། སྟོབས་ཀྱི་ཤུགས་གཞན་ལས་འཕགས་པ་ཞིག་བཙས་པས་མིང་སྟོབས་ལྡན་ཞེས་བྱ་བ་བཏགས་སོ། །དེ་ཆེར་སྐྱེས་པ་ན་བཅོམ་ལྡན་འདས་དང་མཇལ་ཞིང་ཆོས་ཐོས་པས་རྒྱུན་དུ་ཞུགས་པ་ཐོབ་པ་ནས་དགྲ་བཅོམ་པའི་བར་སྔར་བཞིན་དུ་གྱུར་ཏོ། །དེ་ནས་དེའི་ལས་ཀྱི་རྒྱུ་ཞུས་པ་ན། སྔོན་སངས་རྒྱས་རྣམ་གཟིགས་ཀྱི་མཆོད་རྟེན་དེ་ཉིད་ཀྱི་དུས་སྟོན་ཚེ་སྐྱེ་བོ་མང་པོས་གླུ་གར་བྱས་པས་མཆོད་རྟེན་དེ་རྡུལ་གྱིས་གཡོགས་པ་ན། ཁྱིམ་བདག་གཅིག་གིས་མཐོང་ནས་སངས་རྒྱས་ཀྱི་ཡོན་ཏན་རྗེས་སུ་དྲན་ནས་དད་པ་སྐྱེས་ཏེ། སྤོས་ཀྱི་ལྡེ་གུ་ཏིལ་མར་དང་སྦྱར་བ་ཕུལ་ནས་སྨོན་ལམ་བཏབ་པས། རྒྱུ་དེས་ད་ལྟར་སྟོབས་དང་ལྡན་ཞིང་དགྲ་བཅོམ་པ་ཉིད་མངོན་དུ་བྱས་སོ་གསུངས། །ཡང་སྟོན་པ་ནྱ་གྲོ་ངྷཱའི་ཀུན་དགའ་ར་བ་ན་བཞུགས་པའི་ཚེ། ཤཱཀྱ་ཕྱུག་ཅིང་ནོར་མང་བ་ཞིག་གི་ཆུང་མ་ལ་ཁྱེའུ་གཟུགས་བཟང་ཞིང་ལྟ་ན་སྡུག་པ་མཛེས་པ་ཆེ་བར་གྲགས་པ་མཐོང་ན་དགའ་བ་ཞིག་བཙས་ཏེ་མིང་སྡུག་གུ་ཞེས་བཏགས་སོ། །དེ་ཆེར་སྐྱེས་པ་ན་སྦྱིན་པ་ལ་མངོན་པར་དགའ་བ་ཞིག་སྟེ། དགེ་སྦྱོང་དང་བྲམ་ཟེ་དང་བཀྲེན་པ་དང་སྡུག་ཅིང་ཕོངས་པ་རྣམས་ལ་སྦྱིན་པ་སྣ་ཚོགས་པ་གཏོང་བས་སྡུད་པར་བྱེད་དེ། ཕྱིས་བཅོམ་ལྡན་འདས་ལ་མཇལ་བ་ནས་དགྲ་བཅོམ་པའི་བར་སྔར་བཞིན་དུ་གྱུར་ཏོ། །དེར་དེའི་ལས་ཀྱི་རྒྱུ་ཞུས་པ་ན། སྔོན་རྣམ་གཟིགས་ཀྱི་མཆོད་རྟེན་དེ་ལ། ནམ་དཔྱིད་ཀྱི་དུས་སུ་ཤིང་རྣམས་མེ་ཏོག་རྒྱས་ཏེ་མེ་ཏོག་རྣམ་པ་སྣ་ཚོགས་པ་བྱུང་བ་ན། ཁྱིམ་བདག་གཅིག་གིས་རྒྱལ་པོ་ལ་བདག་ནི་ལྷ་དང་ལྷན་ཅིག་ཏུ་མཆོད་རྟེན་ལ་མེ་ཏོག་གདགས་པར་འཚལ་ལོ། །རྒྱལ་པོས་ཀྱང་དེ་ལྟར་གྱིས་ཤིག དེ་ནས་ཁྱིམ་བདག་དེ་དང་། རྒྱལ་པོ་དང་བློན་པོ་སོགས་ཀྱིས་དྲིལ་བསྒྲགས་ཏེ་མེ་ཏོག་རྣམ་པ་སྣ་ཚོགས་པ་སྟ་གོན་བྱས་ནས་མཆོད་རྟེན་ལ་མེ་ཏོག་བཏགས་ཏེ། སྲོག་ཆགས་འབུམ་ཕྲག་དུ་མས་སེམས་དགའ་བ་སྐྱེས་ནས་དགེ་བའི་རྩ་བ་ཡང་དག་པར་བསྐྱེད་དོ། །དེའི་དུས་ཀྱི་ཁྱིམ་བདག་དེ་ནི་སྡུག་གུ་འདི་ཡིན་ཏེ། དེས་སྐྱེ་བོ་ཕལ་མོ་ཆེ་དང་ལྷན་ཅིག་ཏུ་དགེ་བའི་རྩ་བ་རྣམས་བསྐྱེད་པ་དེས། ད་ལྟར་སྐྱེ་བོ་ཕལ་གྱིས་སྙིང་ལ་སྡུག་ཅིང་ཡིད་དུ་འོང་བར་གྱུར་ལ་རྒྱུ་དེས་གཟུགས་བཟང་བ་དང་དགྲ་བཅོམ་པའི་བར་དུ་གྱུར་ཏོ་གསུངས། །ཡང་སྟོན་པ་སེར་སྐྱ་ན་བཞུགས་པའི་ཚེ། ཤཱཀྱ་ཕྱུག་པོ་རྣམ་ཐོས་བུའི་ནོར་དང་ལྡན་པ་ཞིག་གི་ཆུང་མ་ལ་ཁྱེའུ་གཟུགས་བཟང་ཞིང་ལྟ་ན་སྡུག་པ་མིག་པདྨ་སྔོན་པོ་དང་འདྲ་བ་མགོ་ལ་ལྷའི་ནོར་བུ་རིན་པོ་ཆེ་མཐོན་ཀ་ཐོགས་པ་ཞིག་བཙས་ཏེ། དེས་གྲོང་ཁྱེར་སེར་སྐྱའི་གནས་ཐམས་ཅད་ནོར་བུ་མཐོན་ཀའི་ཁ་དོག་ཅན་དུ་བྱས་ཏེ་དེའི་མིང་ལ་པདྨའི་མིག་ཅེས་བྱ་བར་བཏགས་སོ། །དེ་ཆེར་སྐྱེས་པ་ན་གང་དང་གང་དུ་འགྲོ་བ་དེར་ལྷ་དང་མི་རྣམས་ཀྱིས་མཆོད་ཅིང་བསྔགས་པར་བྱེད་ལ། ཕྱིས་བཅོམ་ལྡན་འདས་དང་མཇལ་ནས་ཆོས་ཐོས་པས་རྒྱུན་དུ་ཞུགས་པ་ཐོབ་ནས། རབ་ཏུ་བྱུང་སྟེ་དགྲ་བཅོམ་པ་མངོན་དུ་བྱས་སོ། །དེ་ནས་དེ་བསོད་སྙོམས་ལ་སོང་བ་དང་། སྐྱེ་བོ་ཕལ་པོ་ཆེས་དེ་ལ་བལྟས་ནས་ངོ་མཚར་བར་གྱུར་ཏོ། །དེར་དགེ་སློང་པདྨའི་མིག་དེ་བཅོམ་ལྡན་འདས་ཀྱི་དྲུང་དུ་སོང་ནས། ཅི་ནས་བདག་གི་ནོར་བུ་རིན་པོ་ཆེ་འདི་མ་མཆིས་པར་མཛད་དུ་གསོལ་ཞུས་པས་སྟོན་པས། བུ་འདི་ནི་ལས་ལས་སྐྱེས་པ་ཡིན་པས་ན་ནོར་བུ་རིན་པོ་ཆེ་འདི་མེད་པར་བྱ་མི་ནུས་སོ། །འོན་ཀྱང་དད་པ་དང་ལྡན་པ་རྣམས་ཀྱིས་མཐོང་ལ། མ་དད་པ་རྣམས་ཀྱིས་མི་མཐོང་བར་བྱའོ་གསུངས་ནས་དེ་བཞིན་དུ་མཛད་དོ། །དེར་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པ་ན། སྔོན་སངས་རྒྱས་རྣམ་གཟིགས་ཀྱི་མཆོད་རྟེན་དེ་ལ། དེད་དཔོན་ཞིག་རྒྱ་མཚོ་ཆེན་པོའི་གྲུའིི་དོན་གྲུབ་སྟེ་ཕྱིར་འོངས་པ་ན། དེའི་ནང་ནས་ནོར་བུ་རིན་པོ་ཆེ་མཐོན་ཀ་ཆེན་པོ་ཞིག་ཁྱེར་ཏེ་འོངས་ནས། སངས་རྒྱས་ཀྱི་ཡོན་ཏན་རྗེས་སུ་དྲན་པས་མཆོད་རྟེན་གྱི་ཆར་ཁེབ་ལ་བཏགས་པས། དེའི་འོད་ཕྱོགས་མཚམས་མཐོན་ཀའི་མདོག་ལྟ་བུར་སྣང་བར་བྱས་ཤིང་མེ་ཏོག་པདྨ་དག་གིས་ཀྱང་མཆོད་ནས་སྨོན་ལམ་བཏབ་བོ། །དེའི་དུས་ཀྱི་དེད་དཔོན་དེ་ནི་པདྨའི་མིག་འདི་ཡིན་ཏེ། དེས་མཆོད་རྟེན་ལ་ནོར་བུ་བཏགས་པས་མགོ་ལ་ནོར་བུ་རིན་པོ་ཆེ་བྱུང་ཞིང་པདྨ་སྔོན་པོས་མཆོད་པས་མིག་པདྨ་ལྟར་མཛེས་པ་དང་། སྨོན་ལམ་གྱིས་དགྲ་བཅོམ་པ་ཉིད་མངོན་དུ་བྱས་སོ་གསུངས། །ཡང་བཅོམ་ལྡན་འདས་ནྱ་གྲོ་དྷཱར་བཞུགས་པའི་ཚེ། ཤཱཀྱ་ཕྱུག་ཅིང་ནོར་མང་བ་ཞིག་གི་ཆུང་མ་ལ་ཁྱེའུ་གཟུགས་བཟང་ཞིང་ལྟ་ན་སྡུག་པ་བྱ་ཀ་ལ་པིང་ཀ་ལྟར་སྐད་སྙན་པ་རྔ་སྒྲ་ལྟར་གདངས་སྙན་པ་ཞིག་བཙས་ཏེ་མིང་རྔ་སྒྲར་བཏགས་སོ། །དེ་ཆེར་སྐྱེས་ནས་བཅོམ་ལྡན་འདས་དང་མཇལ་ཏེ་ཆོས་ཐོས་པས་རྒྱུན་དུ་ཞུགས་པ་ཐོབ་ནས། དེ་རབ་ཏུ་བྱུང་སྟེ་དགྲ་བཅོམ་པ་མངོན་དུ་བྱས་སོ། །དེའི་ལས་ཀྱི་རྒྱུ་ཞུས་པ་ན། སྔོན་སངས་རྒྱས་རྣམ་གཟིགས་ཀྱི་མཆོད་རྟེན་དེ་ལ་ཁྱིམ་བདག་གཅིག་གིས་རོལ་མོ་མཁས་པར་སྦྱངས་ནས། ཉིན་རེ་བཞིན་དུ་རོལ་མོ་སྣ་ཚོགས་པས་བཀུར་སྟི་བྱས་པས། དེའི་ལས་ཀྱི་རྒྱུས་ད་ལྟར་རྔ་སྒྲ་ལྟ་བུའི་གདངས་ཅན་དུ་གྱུར་ཅིང་རྒྱུ་དེ་ཁོ་ནས་དགྲ་བཅོམ་པ་ཐོབ་བོ་གསུངས། ཡང་སྟོན་པ་ནྱ་གྲོ་དྷཱའི་ཀུན་དགའ་ར་བ་ན་བཞུགས་པའི་ཚེ། ཤཱཀྱ་ཕྱུག་ཅིང་ནོར་མང་བ་ཞིག་གི་ཆུང་མ་ལ་ཤ་སྣག་བུ་ཆེན་པོ་ཞིག་བྱུང་སྟེ་དེ་མཐོང་བས་ཁྱིམ་བདག་དེ་མི་དགའ་བར་གྱུར་ནས་བཅོམ་ལྡན་འདས་ཀྱི་སྤྱན་སྔར་ཕྱིན་ཏེ་ཞུས་པ་ན། བཀའ་སྩལ་པ། ཁྱིམ་བདག་ཁྱོད་མ་འཇིགས་ཤིག ཤ་སྣག་བུ་དེ་རས་བལ་རྨེལ་བའི་ནང་དུ་ཆུག་ལ་ཞག་བདུན་གྱིས་བར་དུ་ཉིན་རེ་བཞིན་དུ་དུས་གསུམ་དུ་ལག་པས་བྲབས་ཏེ། འོ་མས་ཀྱང་ཡང་ཡང་གཏོར་ཅིག་དང་། དེའི་འོག་ཏུ་རྡོལ་ཏེ་བུ་བརྒྱ་འབྱུང་བར་འགྱུར་ལ་དེ་ཐམས་ཅད་ཀྱང་ཚན་པོ་ཆེའི་སྟོབས་དང་ལྡན་པར་འགྱུར་རོ། །དེ་ཐོས་པ་དང་ཁྱིམ་བདག་དེ་ཆེས་དགའ་བར་གྱུར་ཏེ། ཇི་སྐད་བསྟན་པ་བཞིན་དུ་བྱས་པས། ཞག་བདུན་ན་དེ་རྡོལ་བའི་ནང་ནས་བུ་བརྒྱ་བྱུང་སྟེ། ཀུན་ཀྱང་གཟུགས་མཛེས་ཤིང་ཚན་པོ་ཆེའི་སྟོབས་དང་ལྡན་པ་ཤ་སྟག་བྱུང་ངོ་། །དེ་ཐམས་ཅད་ཆེར་སྐྱེས་པ་ན་བཅོམ་ལྡན་འདས་དང་མཇལ་ཞིང་ཆོས་ཐོས་པས་བདེན་པ་མཐོང་ཞིང་། རབ་ཏུ་བྱུང་ནས་ཀུན་ཀྱང་དགྲ་བཅོམ་པར་གྱུར་ཏོ། །དེར་ངོ་མཚར་དུ་གྱུར་ནས་དེ་རྣམས་ཀྱི་ལས་ཀྱི་རྒྱུ་ཞུས་པ་ན། སྔོན་སངས་རྒྱས་རྣམ་གཟིགས་ཀྱི་མཆོད་རྟེན་དེ་ལ་མཛའ་སྡེ་བརྒྱ་མངོན་པར་དད་ནས། དེ་དག་གིས་ལྷན་ཅིག་ཏུ་ཏིལ་མར་སྤོས་ཅན་གྱིས་བྱུགས་ནས། མེ་ཏོག་དང་མེ་ཏོག་གི་ཕྲེང་བ་དང་། མར་མེ་དག་གིས་ཀྱང་མཆོད་པར་བྱས་ཏེ། ལྷན་ཅིག་ཏུ་སྨོན་ལམ་བཏབ་པ་བདག་ཅག་གང་དང་གང་དུ་སྐྱེས་པ་དེར་སྤུན་དུ་གྱུར་ཏེ། ལྷན་ཅིག་ཏུ་ལྟོ་གཅིག་ཁོ་ན་ལས་འབྱུང་བར་གྱུར་ཅིག ཚན་པོ་ཆེའི་སྟོབས་ཀྱི་ཤུགས་ཐོབ་པ་དང་བྱད་གཟུགས་དང་ལྡན་པར་གྱུར་ཅིག མ་འོངས་པ་ན་སངས་རྒྱས་རྣམས་མཉེས་པར་བྱེད་པར་གྱུར་ཅིག མི་མཉེས་པར་བྱེད་པར་མ་གྱུར་ཅིག ཅེས་བྱས་པ་ལས་དེའི་རྒྱུས་ད་ལྟར་དེ་བཞིན་དུ་གྱུར་པར་གསུངས་སོ། །ཡང་སྟོན་པ་ནྱ་གྲོ་དྷཱར་བཞུགས་པའི་ཚེ། ཤཱཀྱ་ཕྱུག་ཅིང་ནོར་མང་བ་ཞིག་གི་ཆུང་མ་ལས། ཁྱེའུ་གཟུགས་བཟང་ཞིང་ལྟ་ན་སྡུག་པ་ནོར་བུ་རིན་པོ་ཆེ་མགོ་བོ་ལ་ཐོགས་པ་ཞིག་བཙས་ཏེ། དེའི་འོད་ཀྱི་སྣང་བས་མཚན་མོ་གྲོང་ཁྱེར་སེར་སྐྱའི་གནས་ཐམས་ཅད་ཁྱབ་པར་གྱུར་པས་ཉིན་མོ་བཞིན་སྣང་བར་བྱས་པས་མིང་ཉི་མ་ཞེས་བྱ་བར་བཏགས་སོ། །དེ་ཆེར་སྐྱེས་པ་ནས་སངས་རྒྱས་དང་མཇལ་ཞིང་ཆོས་ཐོས་པས་རྒྱུན་དུ་ཞུགས་པ་ཐོབ་ལ། རབ་ཏུ་བྱུང་བས་དགྲ་བཅོམ་པའི་གོ་འཕང་ཐོབ་བོ། །དེ་གྲོང་དུ་བསོད་སྙོམས་ལ་བྱོན་པ་ན་བྲམ་ཟེ་དང་ཁྱིམ་བདག་མ་དད་པ་དག་གིས་ནོར་བུ་རིན་པོ་ཆེ་མགོ་ལ་ཐོགས་ནས། ལམ་པོ་ཆེ་དང་། སྲང་དང་། བཞི་མདོ་དང་སུམ་མདོ་དག་ཏུ་འཁྱམས་པ་ལས་ནི། ཤཱཀྱའི་བུའི་དགེ་སྦྱོང་རྣམས་ཀྱི་དགེ་སྦྱོང་གིི་ཚུལ་ནི་ཚིག་པའོ། །བྲམ་ཟེའི་ཚུལ་ནི་ཚིག་པའོ་ཞེས་འཕྱ་བར་བྱས་པས། དེ་ངོ་ཚ་ནས་བཅོམ་ལྡན་འདས་ལ་འདི་མེད་པར་མཛོད་ཅེས་གསོལ་བ་བཏབ་པས། བུ་འདི་ནི་ལས་ལས་སྐྱེས་པ་ཡིན་པས་མེད་པར་བྱ་མི་ནུས་སོ་གསུངས་ནས་ཕྱིན་ཆད་དད་པ་མེད་པ་རྣམས་ཀྱིས་མི་མཐོང་བར་བྱིིན་གྱིས་བརླབས་སོ། །དེ་ནས་དེའི་ལས་ཀྱི་རྒྱུ་ཞུས་པས་སྔོན་མི་ཞིག་གིས་རྒྱལ་པོ་དང་རྒྱན་པོས་རྩེས་ནས་སྐུགས་སུ་ནོར་བུ་རིན་པོ་ཆེ་མེ་ཤེལ་ཞིག་ཐོབ་པ། སྔར་གྱི་སངས་རྒྱས་རྣམ་གཟིགས་ཀྱི་མཆོད་རྟེན་དེའི་ཆར་ཁེབ་ལ་བཏགས་ཏེ་ཕྱག་བྱས་ནས། བདག་གིས་ཀྱང་འདི་ལྟ་བུའི་ཡོན་ཏན་དག་ཐོབ་པར་གྱུར་ཅིག སྟོན་པ་འདི་ལྟ་བུ་མཉེས་པར་བྱེད་པར་གྱུར་ཅིག མི་མཉེས་པ་བྱེད་པར་མ་གྱུར་ཅིག ནོར་བུ་རིན་པོ་ཆེ་འདི་ལྟ་བུ་ཡང་སྤྱི་བོ་ལ་ཐོགས་བཞིན་ཏུ་མའི་ལྟོ་ནས་འབྱུང་བར་གྱུར་ཅིག ཅེས་སྨོན་ལམ་བཏབ་བོ། །རྒྱུ་དེས་ད་ལྟར་འདིའི་མགོ་ལ་ནོར་བུ་རིན་པོ་ཆེ་བྱུང་ཞིང་གཟུགས་བཟང་བ་དང་དགྲ་བཅོམ་པའི་བར་དུ་གྱུར་ཏོ་གསུངས། །ཡང་སྟོན་པ་ནྱ་གྲོ་དྷཱའི་ཀུན་དགའ་ར་བ་ན་བཞུགས་པའི་ཚེ། ཤཱཀྱ་ཕྱུག་པོ་ཞིག་གི་ཆུང་མ་ལ་ཁྱེའུ་གཟུགས་བཟང་ཞིང་ལྟ་ན་སྡུག་པ་ཞིག་བཙས་ཏེ། དེ་བཙས་པའི་ཚེ་ལྷ་རྣམས་ཀྱིས་ཁོ་ར་ཁོར་ཡུག་ནས། ལྷའི་བ་དན་བསྒྲེངས་སོ། །ལྷའི་རོལ་མོའི་ཆ་བྱད་དག་ཀྱང་བརྡུངས་སོ། །ལྷའི་མེ་ཏོག་ཨུད་པ་ལ་དང་། པདྨ་དང་། ཀུ་མུད་དང་། པདྨ་དཀར་པོ་རྣམས་ཀྱང་གཏོར་ཏེ། སེར་སྐྱའི་གནས་ཀྱི་གྲོང་ཁྱེར་ཐམས་ཅད་དུ་གྲགས་པ་རྒྱས་པར་གྱུར་ཏེ། ཁྱིམ་ཐམས་ཅད་དུའང་དེའི་ཕྱིར་བ་དན་བསྒྲེངས་སོ། །རྒྱུ་དེས་ཁྱེའུ་མིང་ལ་སྙན་གྲགས་ཞེས་བཏགས་སོ། །དེ་ཆེར་སྐྱེས་པ་ན་སངས་རྒྱས་དང་མཇལ་ཞིང་ཆོས་ཐོས་པ་ནས་དགྲ་བཅོམ་པའི་བར་སྔ་མ་རྣམས་བཞིན་གྱུར་ཏོ། །དེར་དེའི་ལས་ཀྱི་རྒྱུ་ཞུས་པ་ན། སྔོན་སངས་རྒྱས་རྣམ་གཟིགས་ཀྱི་མཆོད་རྟེན་དེའི་དུས་སྟོན་གྱི་ཚེ། གྱད་འགྱེད་པ་རྣམས་ཀྱི་བ་དན་སྒྲེང་བ་ལས། རྒྱལ་པོའི་གྱད་གཅིག་གིས་གྱད་གཅིག་གནོན་པ་དང་། དེས་གྱད་ཀྱི་བ་དན་ཐོབ་ནས་དེས་བླངས་ཏེ། སྲོག་ཆགས་འབུམ་ཕྲག་དུ་མའི་འཁོར་དང་བཅས་པས་རོལ་མོའི་སྒྲ་རྣམ་པ་སྣ་ཚོགས་པ་ལེན་ཅིང་། བ་དན་དེ་མཆོད་རྟེན་གྱི་སྲོག་ཤིང་ལ་བཏགས་ནས་སྨོན་ལམ་བཏབ་བོ། །རྒྱུ་དེས་འཁོར་བ་ན་བདེ་བ་མཐའ་ཡས་པ་མྱོང་བར་གྱུར་ལ། ད་ལྟར་ཡང་དགྲ་བཅོམ་པའི་བར་དུ་གྱུར་པར་གསུངས་སོ། །