གཙོ་བོར་སྦྱིན་པའི་འབྲས་བུ་བསྟན་པ།

༈ ཡང་སྟོན་པ་རྒྱལ་བྱེད་ཀྱི་ཚལ་ན་བཞུགས་པའི་ཚེ། རྒྱལ་པོ་གསལ་རྒྱལ་གྱི་བཙུན་མོ་ལ་ཁྱེའུ་གོས་སུ་ཆོས་གོས་ཚོན་ཅན་གྱོན་ལ་དགེ་སློང་གི་ཆ་ལུགས་ཚེ་རབས་དྲན་པ་ཞིག་བཙས་ཏེ་དེ་སྐྱེས་མ་ཐག་ཏུ། ཅི་མཉན་དུ་ཡོད་པ་འདི་ཁོ་ནར་བཅོམ་ལྡན་འདས་དང་། མཆོག་ཟུང་དང་། འོད་སྲུང་དང་། ཀུན་དགའ་བོ་སོགས་ཉན་ཐོས་ཆེན་པོ་རྣམས་བཞུགས་སམ་ཞེས་འདྲིི་བར་བྱེད་པས། དེ་ཐོས་ནས་ཕ་མ་གཉིས་ཡ་མཚན་དུ་གྱུར་ནས། སངས་རྒྱས་འཁོར་དང་བཅས་པ་ཕོ་བྲང་དུ་གདན་དྲངས་ནས་བཤོས་གསོལ་བའི་གྲལ་དུ། རྒྱལ་པོ་གསལ་རྒྱལ་གྱི་ཁྱེའུ་པང་བླངས་ཏེ་སྔར་གྱི་ལོ་རྒྱུས་ཞུས་པ་ན། བཅོམ་ལྡན་འདས་ཀྱིས་ཁྱེའུ་དེ་ལ་སྡེ་སྣོད་གསུམ་པ་ཁྱོད་ནད་མེད་པར་གྱུར་ཅིག དེས་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱག་འཚལ་ལོ་ཞེས་བྱས་སོ། །དེ་ནས་དེ་བཙས་ནས་ལོ་བདུན་ལོན་པ་ན་ཆོས་གོས་ཚོན་ཅན་དེ་དག་གྱོན་བཞིན་དུ་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་སྟེ་བརྩོན་པས་དགྲ་བཅོམ་པའི་གོ་འཕང་མངོན་དུ་བྱས་སོ། །དེའི་ཚེ་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པ་ན། སྔོན་སངས་རྒྱས་འོད་སྲུང་གི་དུས་སུ། རྒྱལ་པོ་ཀྲི་ཀཱིའི་བུ་སངས་རྒྱས་ཀྱི་བསྟན་པ་ལ་དད་པ་རྙེད་ནས་རབ་ཏུ་བྱུང་བར་འདོད་དེ་རྒྱལ་པོ་ལ་གསོལ་བ་དང་། རྒྱལ་པོས་རིང་པོར་མི་ཐོགས་པར་རྒྱལ་ཚབ་ཏུ་དབང་བསྐུར་དགོས་པས་མི་གནང་བར་གྱུར་པ་ན། དེ་ཞག་དྲུག་གི་བར་དུ་ཟས་མ་ཟོས་པས་སླར་གནང་ནས་ཁྱོད་ཀྱིས་སྡེ་སྣོད་གསུམ་མ་ལོབས་ཀྱི་བར་དུ་ང་དང་ཕྲད་དུ་མ་འོང་ཞིག་ཅེས་བྱས་སོ། །དེ་ནས་དེ་རབ་ཏུ་བྱུང་ཞིང་བརྩོན་པས་རིང་པོར་མ་ལོན་པར་སྡེ་སྣོད་གསུམ་ལོབས་ཏེ་རིག་པ་དང་གྲོལ་བར་སྨྲ་བས་ཆོས་སྟོན་པར་གྱུར་ཏེ། རྒྱལ་པོའི་ཐད་དུ་ཕྱིན་པས་རབ་ཏུ་དགའ་བར་གྱུར་ནས། བུ་གཅིག་ཁྱོད་ལ་ཅི་དགོས། དེས་སྨྲས་པ། སངས་རྒྱས་འཁོར་དང་བཅས་པ་སྤྱན་དྲངས་ནས་ཡོ་བྱད་དྲུག་དབུལ་བར་འཚལ་ལོ། །རྒྱལ་པོས་ཅི་དགའ་བར་གྱིས་ཤིག དེ་ནས་སྡེ་སྣོད་གསུམ་པས་བཅོམ་ལྡན་འདས། ཞབས་འབྲིང་འཁོར་དགེ་སློང་ཉི་ཁྲི་དང་བཅས་ཏེ་ཞལ་ཟས་བཟང་པོས་ཚིམས་པར་བྱས་ནས་དགེ་སློང་རེ་རེ་ལ་ཡང་ཡོ་བྱད་དྲུག་དྲུག་ཕུལ་ཞིང་སྨོན་ལམ་བཏབ་པ། བདག་གང་དུ་སྐྱེས་པ་དེ་དང་དེར་གོས་སུ་ཆོས་གོས་ཚོན་ཅན་གྱོན་ནས་དགེ་སློང་གི་ཆ་ལུགས་འདི་དང་ལྡན་ཏེ་ཚེ་རབས་དྲན་པར་གྱུར་ཅིག་ཅེས་བྱས་སོ། །དེའི་དུས་ཀྱི་རྒྱལ་པོ་ཀྲི་ཀཱིའི་བུར་གྱུར་པའི་དགེ་སློང་སྡེ་སྣོད་གསུམ་པ་ནི་འདི་ཉིད་ཡིན་ཏེ། རྒྱུ་དེས་དགྲ་བཅོམ་པའི་བར་དུ་གྱུར་པར་གསུངས་སོ། །འདི་རྣམས་ཀྱིས་གཙོ་བོར་སྦྱིན་པའི་འབྲས་བུ་བསྟན་པ་ཡིན་ནོ། །