དགེ་འདུན་པའི་ཞལ་ཏ་དང་སྒྲུབ་པ་པོའི་གཡོག་བགྱིས་པའི་ཕན་ཡོན་ཀྱང་བསྟན་པ།

༈ ཡང་སངས་རྒྱས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ཡུམ་གྱི་དོན་དུ་སུམ་ཅུ་རྩ་གསུམ་པའི་ལྷའི་ཡུལ་དུ་གཤེགས་ཏེ་ཤིང་གི་རྒྱལ་པོ་ཡོངས་འདུ་ས་བརྟོལ་གྱི་དྲུང་ནས་ཐག་མི་རིང་བ་ཞིག་ན་རྡོ་ལེབ་སྣམ་བུ་དཀར་པོའི་སྟེང་དུ་དབྱར་གནས་པར་མཛད་དེ། ཡུམ་དང་སུམ་ཅུ་རྩ་གསུམ་པའི་ལྷ་རྣམས་ལ་ཆོས་སྟོན་པར་མཛད་དོ། །དེའི་ཚེ་ཚེ་དང་ལྡན་པ་མོའུ་འགལ་གྱི་བུ་ནི་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བར་དབྱར་གནས་པར་མཛད་དེ། དེར་འཁོར་རྣམ་བཞིས་འཕགས་པ་མོའུ་འགལ་ཆེན་པོ་ལ། བཅོམ་ལྡན་འདས་གང་དུ་དབྱར་གནས་པར་མཛད་དྲིས་པར། མོའུ་འགལ་ཆེན་པོས་གོང་གི་དོན་དེ་བསྙད་པས། དེ་དག་གིས་དབྱར་ཟླ་བ་གསུམ་པོ་འདས་པའི་འོག་ཏུ་འཕགས་པ་མོའུ་འགལ་ཆེན་པོ་ལ། བདག་ཅག་གིས་བཅོམ་ལྡན་འདས་མཐོང་བར་འདོད་པས། བཙུན་པ་ལ་གནོད་པ་མ་མཆིས་ན་བཅོམ་ལྡན་འདས་ཀྱི་དྲུང་དུ་གཤེགས་ནས། བཅོམ་ལྡན་འདས་ལ་སྙུན་གསོལ་ནས། བདག་ཅག་འཁོར་རྣམ་བཞིས་བཅོམ་ལྡན་འདས་མཐོང་བར་འཚལ་ཏེ། འཛམ་བུ་གླིང་པའི་མི་རྣམས་ལ་ནི་ལྷ་ཡུལ་དུ་མཆི་བའི་རྫུ་འཕྲུལ་དང་མཐུ་མ་མཆིས་ལ། ལྷ་རྣམས་ལ་ནི་འཛམ་བུའི་གླིང་དུ་མཆི་བའི་མཐུ་དང་རྫུ་འཕྲུལ་དང་ལྡན་པ་ལགས་ན། ཐུགས་བརྩེ་བའི་སླད་དུ་འདིར་གཤེགས་སུ་གསོལ་ཞེས་ཞུས་ཤིག དེ་ནས་ཚེ་དང་ལྡན་པ་མོའུ་འགལ་བུ་སྐྱེས་བུའི་ལག་པ་བརྐྱང་བསྐུམ་ཙམ་གྱི་ཡུན་ལ་སུམ་ཅུ་རྩ་གསུམ་གྱི་ལྷའི་ཡུལ་དུ་བྱོན་ནས་བཅོམ་ལྡན་འདས་ཀྱིས་ལྷའི་འཁོར་བརྒྱ་ཕྲག་དུ་མ་ལ་ཆོས་སྟོན་པ་མཐོང་ངོ་། །དེ་མཐོང་ནས་ངོ་མཚར་དུ་གྱུར་ཏེ། བཅོམ་ལྡན་འདས་དང་ཞུ་བ་ཞུ་ལན་འགའ་ཞིག་གི་མཐར། ལྷ་ཁ་ཅིག་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་ཀྱི་ལོགས་སུ་ཐལ་མོ་སྦྱར་ཏེ་གསོལ་བ། བཙུན་པ་བདག་ཅག་ནི་སངས་རྒྱས་ལ་ཤེས་ནས་དད་པ་དང་ལྡན་ཏེ་ལུས་དང་བྲལ་ནས། འདིར་སྐྱེས་ལགས་སོ། །ལྷ་གཞན་དག་གིས་ཀྱང་དེ་བཞིན་དུ་བཙུན་པ་བདག་ནི་ཆོས་དང་དགེ་འདུན་དང་འཕགས་པ་དགྱེས་པའི་ཚུལ་ཁྲིམས་ལ་ཤེས་ནས་དད་པ་དང་ལྡན་ཏེ་ལུས་དང་བྲལ་ནས་འདིར་སྐྱེས་ལགས་སོ། །དེ་ནས་དེར་ལྷ་བརྒྱ་ཕྲག་དུ་མ་དང་ལྷ་སྟོང་ཕྲག་དུ་མ་དང་། ལྷ་འབུམ་ཕྲག་དུ་མས་བཅོམ་ལྡན་འདས་ཀྱི་སྤྱན་སྔར་སོ་སོའི་རྒྱུན་དུ་ཞུགས་པའི་འབྲས་བུ་བརྡ་སྤྲོད་པར་བྱས་ཏེ་མི་སྣང་བར་གྱུར་ཏོ། །དེར་འཕགས་པ་མང་གལ་ཆེན་པོས་བཅོམ་ལྡན་འདས་ལ་འཛམ་བུ་གླིང་གི་འཁོར་རྣམ་བཞིའི་ཕྲིན་རྣམས་གསོལ་བས། བཀའ་སྩལ་པ། ཁྱོད་སོང་ལ་འཛམ་བུ་གླིང་གི་འཁོར་རྣམ་བཞི་ལ། བཅོམ་ལྡན་འདས་ད་སྟེ་ཞག་བདུན་ན་སུམ་ཅུ་རྩ་གསུམ་གྱི་ལྷའི་ཡུལ་ནས་འཛམ་བུ་གླིང་དུ་གྲོང་ཁྱེར་སྣང་ལྡན་གྱི་འདབ། ཨ་པད་ཛ་རའི་ནགས་སུ་ཤིང་ཨུ་དུམ་བཱ་རའི་དྲུང་དུ་གཤེགས་སོ་ཞེས་སྦྲོན་ཅིག དེ་ནས་ཚེ་དང་ལྡན་པ་མོའུ་འགལ་གྱི་བུ་ཆེན་པོ་འཛམ་བུའི་གླིང་དུ་འོངས་ནས་འཁོར་རྣམ་བཞི་ལ་དོན་དེ་གོ་བར་བྱས་ནས། ཞག་བདུན་ལོན་པ་ན་བཅོམ་ལྡན་འདས་ལྷ་ཡུལ་ནས་གཤེགས་པ་དང་། གནས་དེར་སྲོག་ཆགས་འབུམ་ཕྲག་དུ་མ་འདུས་པར་གྱུར་པ་ལས། དེའི་ནང་དུ་དགེ་སློང་བརྫུས་སྐྱེས་ཤིག་བྱུང་སྟེ། དེས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་དང་། ལྷ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དེ་དག་བཤོས་ལ་སྤྱན་དྲངས་ནས། རེ་ཞིག་ན་གདུགས་ཚོད་ལ་བབས་པ་དང་སེམས་བསྐྱེད་མ་ཐག་ཏུ་ལྷའི་གདན་དང་། ལྷའི་ཞལ་ཟས་དང་བཟའ་བཅའ་དག་བྱུང་སྟེ། སངས་རྒྱས་འཁོར་དང་བཅས་པ་དེ་དག་ལ་ལེགས་པར་མཆོད་ཅིང་བཀུར་སྟི་བྱས་སོ། །དེར་བཅོམ་ལྡན་འདས་ཀྱིས་དེ་དང་མཐུན་པའི་ཆོས་བསྟན་པས། དེ་ཐོས་པ་དང་དགེ་སློང་བརྫུས་སྐྱེས་དེས་དགྲ་བཅོམ་པའི་གོ་འཕང་མངོན་དུ་བྱས་སོ། །དེར་དགེ་སློང་རྣམས་ངོ་མཚར་དུ་གྱུར་ཏེ་དེའི་ལས་ཀྱི་རྒྱུ་ཞུས་པ་ན། སྔོན་སངས་རྒྱས་རྣམ་གཟིགས་འཇིག་རྟེན་དུ་བྱོན་པའི་ཚེ། གྲོང་མེད་པ་དགོན་པའི་གནས་ཤིག་ན་དགེ་སློང་ལྔ་དབྱར་གནས་པར་དམ་བཅས་པ་ལས་དེའི་ནང་ནས་གཅིག་གིས་ཞལ་ཏ་བྱས་ནས། དེ་དག་གིས་བརྩོན་པས་དགྲ་བཅོམ་པ་མངོན་དུ་བྱས་སོ། །དེའི་ཚེ་ཞལ་ཏ་བ་དེས་དེ་དག་གི་རྐང་པ་ལ་ཕྱག་བྱས་ཏེ་འདི་ལྟར་འདི་རྣམས་ཀྱིས་བདག་ལ་བརྟེན་ནས་དགྲ་བཅོམ་པ་ཉིད་མངོན་དུ་བགྱིས་པའི་དགེ་བའི་རྩ་བ་དེས། བདག་རབ་ཏུ་བྱུང་སྟེ་ཡོ་བྱད་ཐམས་ཅད་ཀྱིས་མི་བྲེལ་བར་གྱུར་ཅིག ཅེས་སྨོན་ལམ་བྱས་ཏེ། དེ་ནི་དགེ་སློང་འདི་ཡིན་ལ་འདི་ཉིད་རྫུས་སྐྱེས་སུ་འགྱུར་བའི་རྒྱུ་ནི། སངས་རྒྱས་འོད་སྲུང་གི་དུས་སུ་ཚོང་དཔོན་ཞིག་རང་གི་ཆུང་མ་ལ་བུ་བཙའ་བའི་ཚེ་སྡུག་བསྔལ་གྱིས་ཚོོར་བས་ཉེན་ཏེ་ཉམ་ཐག་པའི་སྐད་འབྱིན་ཅིང་ངུ་བ་ཐོས་པས་སེམས་རབ་ཏུ་སྐྱོ་སྟེ་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་ནས་བདག་གང་དུ་སྐྱེས་པ་དེར་རྫུས་ཏེ་སྐྱེ་བར་ཤོག་ཅིག་ཅེས་བྱས་སོ། །དེའི་དུས་ཀྱིས་ཚོང་དཔོན་དུ་གྱུར་པ་དེ་ཡང་དགེ་སློང་འདི་ཡིན་པས་སྨོན་ལམ་གྱི་དབང་གིས་རྫུས་ཏེ་སྐྱེས་པ་དང་དེའི་ཚེ་དབང་པོ་ཡོངས་སུ་སྨིན་པར་བྱས་པས་དགྲ་བཅོམ་པ་མངོན་དུ་བྱས་སོ་གསུངས། འདིས་ནི་དགེ་འདུན་པའི་ཞལ་ཏ་དང་སྒྲུབ་པ་པོའི་གཡོག་བགྱིས་པའི་ཕན་ཡོན་ཀྱང་བསྟན་པ་ཡིན་ནོ། །