སྦྱིན་པ་དང་ཚུལ་ཁྲིམས་ཀྱི་འབྲས་བུ་དང་དབང་པོ་དུལ་བར་བྱས་ཏེ་ཁྱིམ་སྤོང་ཞིང་དགོན་པ་ལ་གནས་པའི་ཡོན་ཏན་གྱི་བསྔགས་པའང་བསྟན་པ།

༈ ཡང་སྟོན་པ་རྒྱལ་བྱེད་ཀྱི་ཚལ་ན་བཞུགས་སོ། །དེ་ཡང་བཅོམ་ལྡན་འདས་མངོན་པར་སངས་རྒྱས་ནས་ལོ་བཅུ་གཉིས་ལོན་པ་ན་གྲོང་ཁྱེར་སེར་སྐྱའི་གནས་སུ་གཤེགས་ཏེ། བྲེ་བོ་ཟས་དང་། བདུད་རྩིའི་ཟས་ལ་སོགས་པ་སྐྱེ་བོ་སྟོང་ཕྲག་དུ་མས་བདེན་པ་མཐོང་བའི་ཚེ། རྒྱལ་པོ་ཟས་གཙང་མས་བསྐུལ་ནས་བཅོམ་ལྡན་འདས་ལ་བསྙེན་བཀུར་བྱ་བའི་ཕྱིར། ཤཱཀྱའི་རྒྱལ་པོ་བཟང་ལྡན་དང་། མ་འགགས་པ་དང་། ནམ་གྲུ་དང་། ལྷ་བྱིན་ལ་སོགས་པ་ཤཱཀྱའི་བུ་ལྔ་བརྒྱ་རབ་ཏུ་བྱུང་བར་ཆས་པའི་ཚེ། དེ་དག་འབྲེག་མཁན་བསྙེན་བཀུར་བྱེད་པ་ཉེ་བར་འཁོར་དེས་དེ་དག་རབ་ཏུ་བྱུང་བར་མཐོང་ནས་ངུས་སོ། དེ་རྣམས་ཀྱིས་དེའི་རྒྱུ་དྲིས་པས། ཁྱེད་རྣམས་རབ་ཏུ་བྱུང་ན་བདག་ལ་ཟས་གོས་ཀྱིས་སྐྱོང་བ་སུའང་མ་མཆིས་སོ། །དེ་རྣམས་ཀྱིས། འོ་ན་རས་ཐིང་ཞིག་{ཐིངས་ཤིག}དེ་ནས་དེས་བཏིང་བ་ན། ཤཱཀྱ་རྣམས་ཀྱི་ལུས་ལ་ཐོགས་པའི་དོ་ཤལ་དང་། སེ་མོ་དོ་དང་། ནོར་བུ་དང་། མུ་ཏིག་དང་། བཻཌཱུཪྱ་དང་། དཔུང་རྒྱན་དང་། སོར་གདུབ་རྣམས་ཕུང་པོ་ཆེན་པོར་སྤུངས་ནས་བྱིན་ནོ། །དེ་ནས་འབྲེག་མཁན་ཉེ་བར་འཁོར་གྱིས་རྒྱན་རྣམས་ལ་བལྟས་ཏེ་ཤཱཀྱ་འདི་དག་ཆོ་རིགས་དང་། བྱད་གཟུགས་དང་ལང་ཚོ་དང་། འབྱོར་པ་དང་ལྡན་པ་ཡིན་ན། བཙུན་མོ་དང་འཁོར་དང་རྒྱན་ལ་སོགས་པ་འདི་དག་མཆིལ་མ་བཞིན་དུ་བོར་ནས་རབ་ཏུ་བྱུང་ན་བདག་ཀྱང་རྒྱན་འདི་རྣམས་ལ་ཆགས་ནས་ཅི་ཞིག་བྱ་དེ་བས་རབ་ཏུ་བྱུང་བར་བྱའོ་སྙམ་དུ་བཅོམ་ལྡན་འདས་ཀྱི་སྤྱན་སྔར་ཕྱིན་ཏེ་ཚུར་ཤོག་གིས་སྙེན་པར་རྫོགས་སོ། །དེའི་འོག་ཏུ་བཟང་ལྡན་སོགས་ཤཱཀྱ་ལྔ་བརྒྱ། དགེ་སློང་གི་ཆ་ལུགས་ཅན་རྣམས་འོངས་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་ཕྱག་འཚལ་བར་བྱས་པ་ལས་དེ་དག་གིས་ཉེ་བར་འཁོར་གྱི་རྐང་པ་ངོ་ཤེས་ཏེ་ཕྱག་འཚལ་དུ་མ་བཏུབ་པར། བཅོམ་ལྡན་འདས་ཀྱིས་ཚེ་དང་ལྡན་པ་བཟང་ལྡན་ལ་བཀའ་སྩལ་པ། བཟང་ལྡན་གང་གི་ཕྱིར་ངའི་བསྟན་པ་འདི་ནི་ཆོ་རིགས་དང་། བྱད་གཟུགས་དང་ལང་ཚོ་དང་། དབང་ཕྱུག་དང་། རིགས་བཞི་རྣམ་པར་དག་པ་དང་སྦྱར་བ་མེད་ཀྱིས་འདི་ལ་ཕྱག་འཚོལ་ཅིག དེ་ནས་བཟང་ལྡན་ལ་སོགས་པའི་ཤཱཀ་རིགས་རྣམས་ཀྱིས་ཆོས་ཉིད་བཙན་པར་བྱས་ནས་ཕྱག་བྱས་པས། དེའི་མོད་ལ་ས་ཆེན་པོ་འདི་ཡང་རྣམ་པ་དྲུག་ཏུ་གཡོས་སོ། དེ་ནས་ཚེ་དང་ལྡན་པ་བཟང་ལྡན་གྱིས་བརྩོན་པ་དང་། བསྒྲུབ་པ་དང་། འབད་པས། ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་མངོན་དུ་བྱས་ཏེ། དེ་མཐར་གྱིས་མཉན་ཡོད་ཀྱི་གྲོང་དུ་སོང་སྟེ། རིགས་ངན་གྱི་ཁྱིམ་ནས་བསོད་སྙོམས་བླངས་སོ། །དེ་རྒྱལ་པོ་གསལ་རྒྱལ་གྱིས་མཐོང་བས་འཁུམས་ནས་རྒྱལ་བར་གྱུར་ཅིང་། བརྒྱལ་སངས་པ་ན་བཅོམ་ལྡན་འདས་ཀྱི་སྤྱན་སྔར་ཕྱིན་ནས་གསོལ་པ། བཅོམ་ལྡན་འདས་བདག་གིས་ནི་རྨད་དུ་བྱུང་བ་ཞིག་མཐོང་སྟེ་ཤཱཀྱའི་རྒྱལ་པོ་བཟང་ལྡན་དེ་ཕྱག་དར་ཁྲོད་ཀྱི་གོས་གྱོན་ཞིང་ཁ་ཟས་ངན་པ་ཐོགས་ཏེ་ལྷ་དང་མི་དད་པར་བགྱིས་པའི་སྤྱོད་ལམ་ཤིན་ཏུ་ཞི་བས་བསོད་སྙོམས་བླངས་ཏེ་རིགས་ངན་གྱི་ཁྱིམ་ནས་སླར་བྱུང་བ་དེ་ལ་བདག་འདི་སྙམ་བགྱིད་དོ། །བཅོམ་ལྡན་འདས་ཀྱི་བསྟན་པ་ནི་ཤིན་ཏུ་དུལ་བར་བགྱིད་པ་ལགས་ཏེ་དེ་ལ་བརྟེན་ན་འདི་ལྟ་བུར་སྐྱིད་དེ་བར་མཆིས་ལ་བདེ་བས་བསྐྱེད་པ་དག་ཀྱང་འདི་ལྟར་ཚུལ་དུལ་བར་གྱུར་པ་ནི་ངོ་མཚར་ཆེའོ་སྙམ་བགྱིད་དོ། །བཀའ་སྩལ་པ། རྒྱལ་པོ་ཆེན་པོ་བཟང་ལྡན་འདི་ལ་ངོ་མཚར་ཆེ་བ་གཞན་ཡང་ཡོད་ཀྱིས་ཉོན་ཅིག འདི་ནི་དགོན་པ་ན་གནས་སམ། ཤིང་དྲུང་ན་གནས་སམ། ཁང་སྟོང་ན་གནས་ཀྱང་རུང་སྟེ། ཀྱེ་མ་རེ་སྐྱིད། ཀྱེ་མ་རེ་སྐྱིད། བདག་རབ་ཏུ་མ་བྱུང་བཙན་རྒྱལ་པོའི་ཕོ་བྲང་གི་ནང་ན་འདུག་སྟེ་བློན་པོ་ཆེན་པོ་དང་། གྲོང་རྡལ་གྱི་མི་དང་ཡུལ་མི་རྣམས་ཀྱིས་ཤིན་ཏུ་ལེགས་པར་བསྲུངས་ལ། ར་བ་དང་། འོབས་དང་། སྒོ་དང་། གཅན་གཟན་རྣམས་ཀྱིས་བསྐྱབས་ཀྱང་སྙིང་གཞན་ལ་དོགས་ཤིང་མི་དགའ་ལ་ཀུན་ལ་ཡང་ཁུ་འཕྲིག་ཟ་བཞིན་ཏེ། གཉིད་ཀྱང་མི་འོང་བ་ལས། ད་ནི་བདག་ལུས་དང་སྲོག་ལ་ཡང་མི་ལྟ་བས། གནས་གང་དང་གང་དུ་ཡང་བདེ་བར་འདུག་ཏུ་ཡོད་དོ་ཞེས་དགའ་བའི་ཚིག་ལན་གསུམ་དུ་བརྗོད་པར་བྱེད་དོ། །དེར་དགེ་སློང་རྣམས་ཐེ་ཚོམ་དུ་གྱུར་ནས་དེའི་ལས་ཀྱི་རྒྱུ་ཞུས་པ་ན། སྔོན་བྱུང་བ་འདས་པའི་དུས་གྲོང་ཁྱེར་ཝཱ་རཱ་ཎ་སཱི་ན་སྤྲང་པོ་ཞིག་གནས་པ་ལུས་བཀྲེས་ཤིང་ཉམ་ཆུང་བས་ནོན་ནས་ཕན་ཚུན་དུ་འཁྱམས་པ་ན། བུ་མོ་ཞིག་གི་ཁུར་བ་ཞིག་ཁྱེར་ཏེ་འགྲོ་བ་མཐོང་ནས། དེ་ལས་ཁུར་བ་གཅིག་ཕྲོགས་ཏེ་བྲོས་པ་ན། བུ་མོ་དེས་ཕྱི་བཞིན་དུ་བདས་པས། སྤྲང་པོ་དེ་ཚམ་ཚོམ་མེད་པར་ཆུ་ཀླུང་ཟློག་བྱེད་ལ་འབོག་པས་ཐར་རོ། །དེར་རང་སངས་རྒྱས་བྱོན་པས། སྤྲང་པོ་དེ་དགའ་བ་ཆེན་པོ་སྐྱེས་ཏེ་སྔར་སྲོག་དང་བསྡོས་ཏེ་རྙེད་པའི་ཁུར་བ་དེ། རང་སངས་རྒྱས་ལ་ཕུལ་ཞིང་། དེས་ཀྱང་ནམ་མཁའ་ལ་འཕགས་ནས་ཆོ་འཕྲུལ་ཆེན་པོ་བསྟན་པས། དེ་ལྷག་པར་ཡང་དད་པར་གྱུར་ནས། ཞབས་ལ་ཕྱག་བྱས་ཏེ། དགེ་བའི་རྩ་བ་འདིས་བདག་གང་དུ་སྐྱེས་པ་དེར་རིགས་མཐོན་པོར་སྐྱེས་པ་དང་། འདི་ལྟ་བུའི་ཆོས་དག་ཐོབ་པར་གྱུར་ཅིག ། འདི་བས་ཀྱང་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་པར་གྱུར་ཅིག་ཅེས་སྨོན་ལམ་བྱས་སོ། །དེའི་དུས་ཀྱི་སྤྲང་པོ་དེ་ནི་བཟང་ལྡན་འདི་ཡིན་ཏེ། ལས་དེའི་རྣམ་པར་སྨིན་པས་ནི་ཤཱཀྱའི་རིགས་ཕྱུག་པོར་སྐྱེས་སོ། །གཞན་ཡང་སངས་རྒྱས་འོད་སྲུང་གི་བསྟན་པ་ལ། ལོ་ཁྲིའི་བར་དུ་ཚངས་པར་སྤྱོད་པའི་གནས་སྲུང་བ་དེས་ནི། ད་ལྟར་དགྲ་བཅོམ་པ་ཉིད་མངོན་དུ་བྱས་སོ་གསུངས། འདིས་ནི་སྦྱིན་པ་དང་ཚུལ་ཁྲིམས་ཀྱི་འབྲས་བུ་དང་དབང་པོ་དུལ་བར་བྱས་ཏེ་ཁྱིམ་སྤོང་ཞིང་དགོན་པ་ལ་གནས་པའི་ཡོན་ཏན་གྱི་བསྔགས་པའང་བསྟན་པ་ཡིན་ནོ། །