སྦྱིན་པའི་འབྲས་བུ་དང་དམ་པའི་ཆོས་སྒྲུབ་པ་ལ་འཇིག་རྟེན་མཐུན་འཇུག་གི་དབང་དུ་གཏོང་མི་ཉན་པར་བསྟན་པ།
༈ ཡང་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་ཡུལ་གསུས་པོ་ཆེ་ཞེས་བྱ་བ་ན་གསུས་པོ་ཆེའི་ནགས་ཁྲོད་ན་བཞུགས་པའི་ཚེ། ཡུལ་དེ་ན་རྒྱལ་པོ་སྒྲ་མི་སྙན་ཞེས་བྱ་བས་རྒྱལ་སྲིད་ཆོས་བཞིན་དུ་སྐྱོང་བར་བྱེད་དེ། དེའི་ནུ་བོའི་བུ་ཡུལ་འཁོར་སྐྱོང་ཞེས་བྱ་བ་གཟུགས་བཟང་བ་ལྟ་ན་སྡུག་པ་ཞིག་ཡོད་པ་དེ་གདུལ་བའི་དུས་ལ་བབ་པར་གཟིགས་ནས། དགེ་སློང་གི་དགེ་འདུན་གྱིས་མདུན་བདར་ཅིང་ཞབས་འབྲིང་བྱས་ཏེ་ཡུལ་དེར་བསོད་སྙོམས་ལ་གཤེགས་པའི་ཚེ། ཁྱེའུ་ཡུལ་འཁོར་སྐྱོང་དད་པ་ཆེར་སྐྱེས་ཏེ་རབ་ཏུ་བྱུང་བར་གསོལ་བ་དང་། བཅོམ་ལྡན་འདས་ཀྱིས་ཕ་མ་ལ་གནང་བ་ཞུས་ཤིག་པར་བཀའ་སྩལ་པས། དེ་ཕ་མའི་ཐད་དུ་ཕྱིན་ནས་སངས་རྒྱས་ཀྱི་བསྔགས་པ་བརྗོད་དེ་བདག་དེའི་རྗེས་སུ་རབ་ཏུ་བྱུང་བར་གནང་བ་མཛོད་ཅིག་ཅེས་བྱས་པས། དེ་གཉིས་ཀྱིས་མ་གནང་བ་ན་ཞག་དྲུག་གི་བར་དུ་དེས་ཟས་བཅད་དེ་ཁ་འཆོས་པ་ལས། ཕ་མ་གཉིས་དེའི་དྲུང་དུ་འོངས་ནས་སྨྲས་པ། བུ་ཤེས་པར་གྱིས་ཤིག ཁྱོད་ནི་སྐྱིད་དེ་བར་འདུག་པ་བདེ་བར་འདོད་པ་ཡིན་ཏེ། ཁྱོད་ཀྱིས་སྡུག་མ་མྱོང་བ་ཡིན་ལ་ཚངས་པར་སྤྱོད་པ་ནི་སྤྱད་པར་དཀའོ། །དབེན་པར་གནས་པ་ནི་དཀའོ། །གཅིག་པུར་འདུག་པ་ནི་དགའ་བར་བྱ་དཀའོ། །དགོན་པ་དང་། ནགས་ཁུང་དང་། བས་མཐའི་གནས་མལ་དུ་གནས་བཅའ་བ་ནི་ཡིད་ལ་བསམ་པར་ཡང་དཀའ། བུ་ཁྱོད་འདི་ཉིད་དུ་འདུག་ལ་འདོད་པ་རྣམས་ཀྱང་ལོངས་སྤྱོད་པར་གྱིས་ཤིག སྦྱིན་པ་དག་ཀྱང་བྱིན་ཅིག བསོད་ནམས་དག་ཀྱང་གྱིས་ཤིག་ཅེས་བྱས་ཀྱང་དེས་ལན་མི་སྟེར་རོ། །དེ་ནས་ཕ་མ་དེ་གཉིས་ཀྱིས་ཉེ་དུ་རྣམས་བསྐུལ་ནས་སྔ་མ་ལྟར་སྨྲས་ཀྱང་དེས་ཅང་མི་ཟེར་རོ། །དེ་ནས་དེ་གཉིས་ཀྱིས་དེའི་གྲོགས་པོ་རྣམས་ལ་བསྐུལ་ནས་དེ་རྣམས་ཀྱིས་ཀྱང་དེ་ལྟར་སྨྲས་ཀྱང་ལན་མི་སྟེར་བ་ན། གྲོགས་དེ་དག་ཕ་མའི་ཐད་དུ་འོངས་ནས། ཡུལ་འཁོར་སྐྱོང་གུམ་ན་ཅི་རུང་གིས་ཡང་དག་པའི་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་དུ་སྩོལ་ཅིག་དང་། གལ་ཏེ་རབ་ཏུ་འབྱུང་བ་ལ་དགའ་བར་གྱུར་ན་ནི། གསོན་པོར་མཆིས་ན་ནི་ཁྱོད་ཀྱིས་གཟིགས་པར་འགྱུར་གྲང་། གལ་ཏེ་དགའ་བར་མ་གྱུར་ན་ནི་བུ་འགྲོ་བའི་ས་ཕ་མ་མ་གཏོགས་པ་གཞན་མ་མཆིས་སོ། །ཕ་མ་གཉིས་ཀྱིས་སྨྲས་པ་བྱིས་པ་དག་གལ་ཏེ་བུ་ཡུལ་འཁོར་སྐྱོང་ར བ་ཏུ་བྱུང་བའི་འོག་ཏུ་ངེད་དང་ཕྲད་དུ་འོང་ན་ནི་དེ་བཞིན་དུ་གནང་ངོ་། །དེ་ནས་དེ་རྣམས་ཀྱིས་དོན་དེ་ཡུལ་འཁོར་སྐྱོང་ལ་བསྙད་པས་དེས་ཀྱང་ཁས་བླངས་ཏེ་ལུས་ཀྱི་མཐུ་སྟོབས་བསྐྱེད་ནས། བཅོམ་ལྡན་འདས་ཀྱི་སྤྱན་སྔར་ཕྱིན་ནས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་པར་རྫོགས་ནས་བརྩོན་པས་དགྲ་བཅོམ་པའི་གོ་འཕང་ཐོབ་པ་ན། བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངའི་ཉན་ཐོས་ཀྱི་དགེ་སློང་དགོན་པ་པ་རྣམས་ཀྱི་མཆོག་ནི་འདི་ལྟ་སྟེ། དགེ་སློང་ཡུལ་འཁོར་སྐྱོང་འདི་ཉིད་ཡིན་ནོ། །དེར་དགེ་སློང་རྣམས་ངོ་མཚར་དུ་གྱུར་ནས་དེའི་ལས་ཀྱི་རྒྱུ་ཞུས་པ་ན། སྔོན་བྱུང་བ་འདས་པའི་དུས་ན་ལུས་འཕགས་ཀྱི་རྒྱལ་པོ་ཕོ་བྲང་འཁོར་གྱི་མི་དང་བཅས་པ་ཕ་རོལ་གྱི་དམག་ཚོགས་བྱུང་ནས་ཅི་བྱ་གཏོལ་མེད་པས་ནགས་ཁུང་དུ་ཞུགས་ཏེ། དེ་ཉི་མ་གུང་ལ་ཉི་ཚན་གྱིས་གདུང་ནས་དཔུང་གི་ཚོགས་དང་བཅས་ཏེ་ཕན་ཚུན་འཁོར་ནས་ལམ་ཡང་མ་རྙེད་དོ། །དེར་རང་སངས་རྒྱས་ཞིག་བཞུགས་པ་དེས་དེ་དག་ལ་ཐུགས་བརྩེ་བས་དེ་ལ་ལམ་ཡང་བསྟན། ཆུའི་ལྟེང་ཀ་ཡང་བསྟན་ནས་དེས་རྒྱལ་པོ་འཁོར་དང་བཅས་པའི་སྲོག་ཕོངས་པ་བསྐྱངས་སོ། །དེ་ནས་རྒྱལ་པོ་དེ་དད་པ་སྐྱེས་ཏེ་རང་སངས་རྒྱས་དེ་གྲོང་ཁྱེར་དུ་ཁྲིད་དེ་ཟླ་བ་གསུམ་གྱི་བར་དུ་ཡོ་བྱད་ཐམས་ཅད་ཀྱི་བསྙེན་བཀུར་བྱས་ཤིང་། དེ་མྱ་ངན་ལས་འདས་པའི་འོག་ཏུ་ཡང་དེའི་སྐུ་གདུང་གི་མཆོད་རྟེན་བརྩིགས་ནས་སྨོན་ལམ་བཏབ་བོ། །དེའི་དུས་ཀྱིས་རྒྱལ་པོར་གྱུར་པ་དེ་ནི་ཡུལ་འཁོར་སྐྱོང་འདི་ཉིད་ཡིན་ནོ། །ཡང་སངས་རྒྱས་འོད་སྲུང་གི་དུས་སུ་འདི་རྒྱལ་པོ་ཀྲི་ཀཱིའི་བུ་ཐ་ཆུང་དུ་གྱུར་ནས་སངས་རྒྱས་ལ་དད་པ་རྙེད་དེ་སངས་རྒྱས་འོད་སྲུང་འཁོར་དང་བཅས་པ་ལ་བསྙེན་བཀུར་བྱས་ཏེ། སྐྱབས་སུ་འགྲོ་བ་དང་བསླབ་པའི་གཞི་རྣམས་ཀྱང་བླངས་ཤིང་། ཡོངས་སུ་མྱ་ངན་ལས་འདས་པའི་འོག་ཏུ་ཡང་མཆོད་རྟེན་ལ་གདུགས་བུ་ཆུང་བཏགས་སོ། །གཞན་ཡང་གྲོང་ཁྱེར་ཝཱ་རཱ་ཎ་སཱིར་བྲམ་ཟེ་ལས་སུ་རྩྭ་རྐོ་བ་ཞིག་ཏུ་གྱུར་ཏེ་དེ་ནགས་ཁྲོད་དུ་སོང་བ་དང་། རང་སངས་རྒྱས་ནད་པ་ཞིག་དང་མཇལ་བས་དད་པར་གྱུར་ནས། དེ་ལ་བསྙེན་བཀུར་བྱས་ནས་དེ་སོས་པ་དེའི་ཚེ་ན་ཡང་བཤོས་གསོལ་ཏེ་སྨོན་ལམ་བཏབ་བོ། །ལས་དེའི་རྣམ་པར་སྨིན་པས་འཁོར་བར་ནམ་ཡང་སྡུག་བསྔལ་མྱོང་བར་མ་གྱུར་ལ་ད་ལྟ་ཡང་རྒྱལ་པོའི་རིགས་ཕྱུག་པོར་སྐྱེས་ཏེ། གཟུགས་བཟང་ཞིང་མཛེས་པ་དང་རྒྱུ་དེ་ཁོ་ནས་དགྲ་བཅོམ་པ་མངོན་དུ་བྱས་སོ་གསུངས། འདིས་ནི་སྦྱིན་པའི་འབྲས་བུ་དང་དམ་པའི་ཆོས་སྒྲུབ་པ་ལ་འཇིག་རྟེན་མཐུན་འཇུག་གི་དབང་དུ་གཏོང་མི་ཉན་པར་བསྟན་པའང་ཡིན་ནོ། །