འཕགས་པ་སངས་རྒྱས་ཀྱི་རྟོགས་པ་བརྗོད་པ་ཤེས་ལྡན་གྱི་མདོ་ལས།

༈ གཞན་ཡང་འཕགས་པ་སངས་རྒྱས་ཀྱི་རྟོགས་པ་བརྗོད་པ་ཤེས་ལྡན་གྱི་མདོ་ལས། བཅོམ་ལྡན་འདས་ཡུམ་གྱི་དོན་དུ་ལྷ་རྣམས་ཀྱི་གནས་སུ་ཤིང་ཡོངས་འདུ་ས་བརྟོལ་གྱི་དྲུང་ལྭ་བ་དཀར་པོ་ལྟ་བུའི་རྡོ་ལེ བ་ལ་བཞུགས་པའི་ཚེ། ལྷའི་བུ་ཞིག་ལ་འཆི་ལྟས་ལྔ་བྱུང་སྟེ། ཕྲེང་རྒྱན་རྙིང་པ་དང་། གོས་རྙིང་པ་དང་། ལུས་ཀྱི་དྲི་ང་བར་གྱུར་པ་དང་། མཆན་ཁུང་ནས་རྔུལ་འཛག་པ་དང་། རང་གི་སྟན་ལ་དགའ་བ་མེད་པར་གྱུར་ཏོ། །དེས་རང་ཉིད་ཤི་བར་ཤེས་ནས་སླར་གར་སྐྱེ་བརྟགས་པས་ཡངས་པ་ཅན་ན་ཕག་མོ་ཞིག་གི་མངལ་དུ་སྐྱེ་བར་མཐོང་ནས་ཤིན་ཏུ་ཡང་སྡུག་བསྔལ་ཏེ་སྨྲེ་སྔགས་འདོན་པ་ན། ལྷའི་ཟླ་བོ་དག་གིས་སངས་རྒྱས་ལ་སྐྱབས་སུ་འགྲོ་བར་བསྐུལ་བས། དེས་བཅོམ་ལྡན་འདས་ཀྱི་ལོགས་སུ་ཐལ་མོ་སྦྱར་ཏེ། བཅོམ་ལྡན་འདས་དེ་བཞིན་གཤེགས་པ་ལ་ཕྱག་འཚལ་ལོ། །བདག་ལ་ཐུགས་བརྩེ་བའི་སླད་དུ་འདིར་གཤེགས་སུ་གསོལ། བདག་ངན་སོང་དུ་སྐྱེ་བ་རྣམས་ལས་གྲོལ་བར་མཛད་དུ་གསོལ་ཅེས་གསོལ་བ་བཏབ་པས། བཅོམ་ལྡན་འདས་ཀྱིས་དེའི་ལྷག་པའི་བསམ་པ་ཐུགས་སུ་ཆུད་ནས། ལྷའི་བུའི་གན་དུ་བྱོན་ནས་དེ་ལ་བཀའ་སྩལ་པ། ལྷའི་བུ་ཁྱོད་འཆི་བས་མ་འཇིགས་ཤིག དེ་ཅིའི་ཕྱིར་ཞེ་ན། ལྷའི་བུ་བདག་ཉིད་ཀྱི་ལས་ཀྱིས་འོང་ཞིང་འགྲོ་སྟེ། ཁྱོད་ཚུར་ཤོག སངས་རྒྱས་ལ་སྐྱབས་སུ་སོངས་ཤིག ཆོས་དང་དགེ་འདུན་ལ་སྐྱབས་སུ་སོངས་ཤིག དེ་ནས་ལྷའི་བུ་དེ་ཡང་དཀོན་མཆོག་གསུམ་ལ་སྐྱབས་སུ་སོང་ངོ་། །དེར་སྟོན་པས་ཚིགས་སུ་བཅད་དེ་བཀའ་སྩལ་པ། གང་ཞིག་སངས་རྒྱས་ལ་ནི་སྐྱབས་སོང་བས། །དེ་ནི་ངན་འགྲོ་འདིར་ནི་མི་འགྲོ་སྟེ། །ལྷ་ཡི་བདག་ཉིད་དངོས་པོ་སྤངས་ནས་སུ། །མི་ཡི་བདག་ཉིད་དངོས་པོ་ལེན་པར་འགྱུར། །དེ་ནས་རིང་པོར་མ་ལོན་པར་ལྷའི་བུ་དེ་ཚེ་འཕོས་ཏེ་ཡངས་པ་ཅན་དུ་ཚོང་དཔོན་ཞིག་གི་ཆུང་མའི་མངལ་དུ་ཆགས་ནས། ཟླ་བ་དགུ་འདས་པ་ན་ཁྱེའུ་གཟུགས་བཟང་ལྟ་ན་སྡུག་པ་ཞིག་བཙས་ཏེ། དེ་བཙས་མ་ཐག་པར། སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །ཞེས་སྨྲས་པས་ཕ་མ་གཉིས་ཀྱིིས་འདི་ནི་ཤེས་པ་དང་ལྡན་ནོ་སྙམ་ནས་མིིང་ཤེས་ལྡན་དུ་བཏགས། དེ་ལོ་བརྒྱད་ལོན་པ་ན་ལིཙྪ་བི་གཞོན་ནུ་རབ་ཏུ་མང་པོ་དང་ལྷན་ཅིག་ཏུ་སྐྱེད་མོས་ཚལ་དུ་སོང་བ་ན། བཅོམ་ལྡན་འདས་གྲོང་ཁྱེར་ཆེན་པོ་དེར་བསོད་སྙོམས་ལ་གཤེགས་པ་མཐོང་བས། ཁྱེའུ་དེ་རབ་ཏུ་དགའ་ནས་བཅོམ་ལྡན་འདས་ཀྱི་ཞབས་ལ་ཕྱག་བྱས་ཤིང་ལན་གསུམ་དུ་བསྐོར་ནས། བདག་ནི་སྔོན་གྱི་ཚེ་དྲན་ཏེ། །སྡུག་བསྔལ་རྣམས་ལས་རབ་བཀྲོལ་ཞིང་། །ངན་སོང་ལྟུང་བ་ལས་ནི་བདག ། འཇིག་རྟེན་མགོན་གྱིས་གྲོལ་བར་མཛད། །མི་མཆོག་ཐུགས་ནི་བརྩེར་དགོངས་ཏེ། །བསོད་སྙོམས་འདི་ནི་བཞེས་པར་གསོལ། །བདག་གི་གདུགས་ཚོད་འདི་དག་ནི། །གྲོལ་བར་མཛད་ནས་དེང་བཞེས་ལ། །སང་ནི་བདག་གི་ཕ་མ་ཡི། །སྡུམ་པར་འདྲེན་པས་བརྩེར་དགོངས་ཏེ། །དགེ་སློང་ཀུན་དང་ཐབས་གཅིག་ཏུ། །གདུགས་ཚོད་དག་ནི་གསོལ་བར་མཛོད། །ཅེས་གསོལ་ཏེ། ཕྱིར་ནང་ཁྱེའུ་དེས་ཕ་མ་གཉིས་ལ་སྨྲས་པས་དེ་གཉིས་ཀྱང་དགའ་བ་ཆེན་པོ་སྐྱེས་ཏེ་བཀུར་སྟི་ཆེན་པོས་སངས་རྒྱས་འཁོར་དང་བཅས་པ་སྤྱན་དྲངས་ཤིང་། ཁྱེའུ་རང་གི་ལག་གིས་བཟའ་བཅའ་རོ་དང་ལྡན་པ་ཞིམ་ཞིང་མང་བ་དག་བྲིམས་ནས། སོ་སོ་ལ་རས་བུ་ཟུང་རེ་དང་ལྷམ་ཟུང་དག་ཕུལ་ཅིང་། བཅོམ་ལྡན་འདས་ལ་ཆོས་གོས་སར་པ་གསུམ་དང་། ཞབས་ཆགས་སར་པ་ཟུང་དག་གསོལ་ཏེ། དེ་ནས་གསེར་དང་དངུལ་གྱི་མེ་ཏོག་རྣམས་ཀྱིས་གཏོར་བས་དེ་དག་སངས་རྒྱས་ཀྱི་མཐུས་བཅོམ་ལྡན་འདས་ཀྱི་སྤྱི་གཙུག་གི་ཐད་ཀར་ཁང་པ་བརྩེགས་པ་བཀྲ་བ་ལྟ་ན་སྡུག་པ་གྲུ་བཞི་པ། གནས་གཞི་དང་ལྡན་པ་ཞིག་འདུག་པར་གྱུར་ཏོ། །ཁང་པ་བརྩེགས་པ་དེར་དེ་བཞིན་གཤེགས་པའི་སྐུ་སྐྱིལ་མོ་ཀྲུང་བཅས་ཏེ་ཆོས་འཆད་ཅིང་བཞུགས་པ་དེས་མཐོང་ངོ་། །དེ་མཐོང་བ་དང་ཁྱེའུ་ཤེས་ལྡན་དགའ་མགུ་ཡི་རངས་པར་གྱུར་ནས་བཅོམ་ལྡན་འདས་བདག་གི་དགེ་བའི་རྩ་བ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དུ་བསྔོ་སྟེ་དགེ་བའི་རྩ་བ་དེས་ན་བདག་ད་ལྟར་གྱི་བཅོམ་ལྡན་འདས་བཞིན་དུ་སངས་རྒྱས་པར་གྱུར་ཅིག ཆོས་སྟོན་པར་ཡང་གྱུར་ཅིག དགེ་འདུན་ཡོངས་སུ་སྐྱོང་བར་གྱུར་ཅིག ཅེས་བྱས་སོ། །དེར་བཅོམ་ལྡན་འདས་ཀྱི་ཞལ་འཛུམ་པ་མཛད་ནས། འོད་རྣམས་སྤྱི་བོའི་གཙུག་ཏུ་ནུབ་པར་མཛད་པ་དང་། ཀུན་དགའ་བོས་དེའི་རྒྱུ་གསོལ་བ་ན། བཀའ་སྩལ་པ། ཀུན་དགའ་བོ་འདི་ལྟར་ཤེས་ལྡན་གྱིས་ནི་དེ་བཞིན་གཤེགས་པ་མཆོད་པས་ན། བསྐལ་པ་བྱེ་བ་དགུ་བཅུ་དག་ཏུ་ལོག་པར་ལྟུང་བར་མི་འགྱུར་ལ། །དེ་ནས་དེ་མ་ཐག་ཏུ་རྣམ་པར་འདྲེན་པར་ཉེ་བར་སྐྱེ་འགྱུར་ཏེ། །མཚན་ནི་མཁྱེན་གཙོ་རྒྱལ་པོ་ཞེས་བྱ་སངས་རྒྱས་འཇིག་རྟེན་འབྱུང་བར་འགྱུར། །སངས་རྒྱས་ཀྱི་ནི་རྟོགས་པ་བརྗོོད་པས་མཁས་རྣམས་ཡང་དག་དགའ་བྱེད་ཅིང་། །མི་ཡི་མཁས་པ་དག་གིས་ཐོས་ན་དགེ་བ་མང་པོ་བྱེད་འགྱུར་ཏེ། །རྒྱ་མཚོ་མཐའ་གཏུགས་དཔག་མེད་ལྟ་བུའི་དེ་བཞིན་གཤེགས་པ་སངས་རྒྱས་ལ། །རབ་ཏུ་དང་བས་ཡོན་རྣམས་ཕུལ་བའི་འབྲས་བུ་ཆུང་བར་མི་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཁྱེའུ་ཤེས་ལྡན་ལ་སོགས་པའི་འཁོར་རྣམས་ཡི་རངས་ཏེ་མངོན་པར་བསྟོད་དོ། །འདིས་ནི་སྐྱབས་སུ་འགྲོ་བ་དང་སེམས་བསྐྱེད་པའི་ཕན་ཡོན་བསྟན་པའོ། །