ལགས་སྤྲོས་བྲལ་སེམས་ཀྱི་གནས་ལུགས་འདི་ལ།
༄༅། །ལགས། སྤྲོས་བྲལ་སེམས་ཀྱི་གནས་ལུགས་འདི་ལ། ཡོད་ཟེར་མཁན་དང་མེད་ཟེར་མཁན་གཉིས་ཀ་མི་འབྱུང་སྟེ། ཡོད་པ་མ་ཡིན་རྒྱལ་བས་འདི་མ་གཟིགས། །མེད་པ་མ་ཡིན་འཁོར་འདས་ཀུན་གྱི་གཞི། །ཞེས་གསུངས་པ་ལ། ངོ་བོ་ཀ་དག་ལ་རང་བཞིན་ལྷུན་གྲུབ་ཀྱི་གདངས་ཤར་བ་རྩལ་འགགས་མེད་སྣ་ཚོགས་སུ་སྣང་བ། གར་ཡང་རྒྱ་མ་ཆད་པ། རྟག་ཆད་གང་གི་ཕྱོགས་སུ་མ་ལྷུང་བ་ཞིག་ཡིན། བསྒོམ་པའང་། སྔར་འདས་ཀྱི་རྗེས་མི་གཅོད། མ་འོངས་པའི་མདུན་མི་བསུ། ད་ལྟར་གྱི་ཤེས་པ་འདི་ཡིན་གྱི་རྩིས་གདབ་གང་ཡང་མ་བྱས་པ་གཞི་ཆ་གསུམ་བྲལ་གྱི་ཤེས་པ། སེམས་བྱུང་གི་དྲི་མས་མ་གོས་པས་ས་{སལ} ལེ། ཡུལ་གྱི་ཕྱི་ལ་མ་འབྲངས་པས་སང་ངེ་། རྒྱ་གར་ཡང་མ་ཆད་པས་ཡེ་རེ། རྣམ་རྟོག་སྐྱེ་མེད་དུ་དག་པས་ཝལ་ལེ། གང་ཤར་གྱི་ངོ་བོ་ལ་རྩིས་གདབ་སྤངས་པས་ཁྱུག་གེ་བཞག་པ་ཡིན། རྣམ་རྟོག་བཀག་ཀྱང་མི་བཀག སྒྲུབ་ཀྱང་མི་སྒྲུབ། འདི་སྒོམ་གྱི་དམིགས་གཏད་མེད་པ། ཚོགས་དྲུག་ལྷུག་པར་བཞག དགེ་མི་ད གེའི་རྣམ་རྟོག་གང་ཤར་ཡང་དགག་སྒྲུབ་མི་བྱེད་པར་དེ་ཀའི་ངང་ལ་ཀློད། བདེ་གསལ་མི་རྟོག་པ་སོགས་ལེགས་པའི་ཉམས་དང་། དུག་གསུམ་རྣམ་རྟོག་སྐྱེ་བ་སོགས་དམན་པའི་ཉམས་ལྟ་བུ་གང་ཤར་ཡང་ལེགས་པར་མི་ཞེན། ངན་པར་མི་དགག སྣང་སྲིད་དག་མཉམ་ཆེན་པོའི་ལྟ་བས་གཉིས་འཛིན་གྱི་མདུད་པ་བཅད། ཡག་ཏུ་འདོད་པ། ཉེས་སུ་དོགས་པ། རེ་དོགས་འཁུ་འཕྲིག་འདི་རྣམས་གཉིས་འཛིན་ཡིན། བློ་གཉིས་འཛིན་གྱི་དབང་དུ་སོང་ན་སྔར་ཡང་བདག་རྟོག་གཟུང་འཛིན་གཉིས་སུ་བཟུང་བས་འཁོར་བར་འཁྱམས་པ་ཡིན། དོན་དམ་ཀ་དག་གི་ཀློང་དུ་དགེ་མི་དགེའི་མཚན་མ་མེད་ཀྱང་། ཀུན་རྫོབ་བདེན་པ་བསླུ་བ་མེད་པ་ཡིན་པས་རྒྱུ་འབྲས་ཆེད་དུ་མི་གསོད་པར་དགེ་ཚོགས་རྒྱ་མཚོ་ལྟ་བུ་བསྐྲུན་དགོས། འགྲོ་ཀུན་ཕ་མར་ཤེས་པའི་སྙིང་རྗེ་དང་ལྷག་པར་བྱང་ཆུབ་སེམས་འདི་མེད་ཐབས་མེད། ཧ་ཅང་གྲིམ་པ་དང་ཧ་ཅང་ལྷོད་ཆེ་བས་སྒོམ་མི་འབྱུང་གྲིམ་ལྷོད་རན་པར་གྱིས། རིག་པ་འདི་ལ་གཏད་བྱ་བའི་གཏད་ས་གཉིས་འཛིན་དམ་བྲིང་ངེ་བ་ཞིག་ཡོད་པ་མིན། བྱང་ཆུབ་ཀྱི་སེམས་སྔོན་དུ་འགྲོ་བས་སྤྱི་བོར་སྐྱབས་ཀུན་འདུས་པའི་བདག་ཉིད་མཚུངས་མེད་བླ་མ་བསྒོམ། མོས་གུས་དྲག་པོས་གསོལ་བ་བཏབ་པས་བླ་མ་འོད་ཞུ་རང་ལ་ཐིམ། བླ་མའི་ཐུགས་དང་རང་སེམས་དབྱེར་མེད་བདེ་བ་ཆེན་པོ་ཆོས་ཉིད་བློ་འདས་ཆེན་པོའི་དགོངས་པ་སྐྱོང་དགོས་པ་ཡིན། སྐབས་སུ་བསྲུང་འཁོར་གྱི་དམིགས་ཟབ་དང་ལྷག་པ་རང་རིག་ཀ་དག་གི་ངང་ནས་འཁོར་འདས་བདེ་སྡུག་ལེགས་ཉེས་ལྷ་འདྲེ་གདོན་བགེགས་ཀྱི་ཚོགས་གང་ཡང་མ་གྲུབ་པའི་ལྟ་བའི་གདེང་བསྐྱེད་པ་གལ་ཆེ། མདོར་ན་རེ་དོགས་འཁུ་འཕྲིག་སྤོངས་མཛོད། པདྨ་བི་ཛས་སོ། །