ཞིང་སྐྱོང་དུར་ཁྲོད་མ་མོའི་མངའ་གསོལ་ཕྲིན་བཅོལ་དང་བཅས་མ་མོ་དགྱེས་པའི་གླུ་དབྱངས།

༄༅། །ཞིང་སྐྱོང་དུར་ཁྲོད་མ་མོའི་མངའ་གསོལ་ཕྲིན་བཅོལ་དང་བཅས་མ་མོ་དགྱེས་པའི་གླུ་དབྱངས་ཞེས་བྱ་བ་བཞུགས་སོ། །བྷྱོཿཡེ་གྲོལ་ཀ་དག་སྤྲོས་པ་བྲལ་བའི་ཀློང་། །འཁོར་འདས་རོ་མཉམ་དྭངས་མའི་ཐིག་ལེའི་དཔྱིད། །སྙིང་རྗེས་ཡོངས་གང་ཁ་སྦྱོར་བདེ་བ་ཆེ། །མཚོ་སྐྱེས་རྡོ་རྗེ་བརྗོད་དོན་ལྕི་བར་མཛོད། ༡། སྐྱེ་མེད་དབྱིངས་ཀྱི་ཌཱ་ཀི་ཝཱ་ར་ཧིའི། །རང་རྩལ་འགག་མེད་ཞིང་སྐྱོང་དབང་མོའི་ཚུལ། །ངེས་གསང་བསྟན་དང་བསྟན་འཛིན་སྐྱོང་བའི་གཉན{གཉེན}། །མ་གཅིག་དབུ་འཕང་གཉན་པོ་བསྟོད་པར་བགྱི། ༢། ཁྱོད་ནི་སྲིད་ཞི་ཀུན་ཁྱབ་ཡེ་ཤེས་འཕྲུལ། །ངེས་དོན་རྒྱལ་ཀུན་བསྐྱེད་པའི་ཡུམ་གྱུར་ཀྱང་། །ཀུན་རྫོབ་སྣང་ཆར་མཚན་མའི་ཕྱག་རྒྱར་ཤར། །བདེན་གཉིས་དབྱེར་མེད་ངོ་བོར་མངའ་གསོལ་ལོ། ༣། ཕྱི་རོལ་གནས་ཡུལ་དུར་ཁྲོད་སྐྱོང་བའི་གཉེན། །ནང་དུ་རྩ་རླུང་ཐིག་ལེ་དགའ་བཞིའི་འཕྲུལ། །གསང་བ་ཚོགས་བརྒྱད་དབུ་མར་སྡོམ་པའི་གྲོགས། །འཁོར་འདས་ཀུན་བྱེད་ཆེན་མོར་མངའ་གསོལ་ལོ། ༤། ཀུན་བརྟགས་གཞན་དབང་མཚན་འཛིན་འཁྲུལ་བའི་གཡས། །གོས་མིན་ཡོངས་གྲུབ་གཉུག་མའི་གསེར་སྦྱངས་ཁམས། །ཟུང་འཇུག་འོད་གསལ་རྩིབས་སྟོང་རྣམ་བཀྲ་བའི། །དག་པ་གཉིས་ལྡན་འཁོ༵ར་ལོ༵ར༴ ༥འབད་རྩོལ་རྣམ་རྟོག་གཡོ་བས་གོས་མིན་པར། །ལྷུན་གྲུབ་རྒྱུན་མི་འཆད་པའི་ཕྲིན་ལས་ཆར། །ས་གསུམ་སྐྱེ་དགུའི་རེ་བ་སྐོང་བའི་དཔལ། །འདོད་འབྱུང་ནོ༵ར༵་བུའི་རྒྱལ་པོར༴ ༦སྟོང་ཉིད་སྙིང་རྗེར་ཆགས་པའི་ཟུར་མིག་གིས། །བརྟན་གཡོའི་དཔལ་ཀུན་འཆིང་བའི་འཇོ་སྒེག་བཅས། །སྲིད་ཞིར་མི་གནས་ཐེག་མཆོག་རྒྱལ་ཐབས་ཆེ། །སྦྱིན་མཛད་བཙུན༵་མོ༵་མཆོག་ཏུ༴ ༧དོན་དམ་བདེན་པ་གཟིགས་པའི་བློ་གྲོས་ཟབ། །གཞན་ཕན་ཕར་ཕྱིན་དྲུག་གི་མཛོད་ཀྱིས་ཕྱུག །བསྡུ་བཞིའི་ཕྲིན་ལས་ཉེ་འཁོན་མེད་པར་སྙོམས། །ཆེན་པོ་བདུན་ལྡན་བློན༵་པོ༵ར༴ ༨རླབས་ཆེན་ཚོགས་གཉིས་གོམས་པའི་སྣ་ལྗགས་རིང་། །བསླབ་གསུམ་གསེར་གྱི་དྲྭ་བས་གདོང་མཛེས་ཤིང་། །འཁོར་བའི་གཡུལ་ངོ་ཟློག་པའི་སྙིང་སྟོབས་ཅན། །ཐེག་ཆེན་གླང༵་པོ༵་མཆོག་ཏུ༴ ༩རྫུ་འཕྲུལ་རྐང་བཞིས་རབ་མཛེས་དབང་སྟོབས་དང་། །བྱང་ཆུབ་ཡན་ལག་མགྱོགས་པའི་བང་འགྲོས་ཀྱིས། །འཕགས་ལམ་ཡུད་ཀྱིས་བགྲོད་པའི་སྟོབས་ཤུགས་ཅན། །ཅ༵ང་ཤེས༵་རིན་ཆེན་མཆོག་ཏུ༴ ༡༠ཐེག་བརྒྱད་བློ་ཡི་ཞེན་པས་གོས་མིན་པའི། །རང་གནས་ཡེ་ཤེས་རིག་པའི་མཚོན་རྣོན་གྱིས། །ཡིད་དཔྱོད་ཕྱེ་མར་འཐག་པའི་དྲག་ཤུལ་ཅན། །མཆོག་གསང་དམ༵ག་དཔོ༵ན་ཆེན་པོར༴ ༡༡རིན་ཆེན་བདུན་ལྡན་དཔུང་ཚོགས་ཡན་ལག་བཞིས། །དྲེགས་ལྡན་རྒྱལ་ཕྲན་བྱེ་བའི་ཁེངས་བསྙིལ་ནས། །དགེ་བཅུའི་ཁྲིམས་ཀྱིས་རྫོགས་ལྡན་གསར་པའི་མགྲོན། །འགུགས་བྱེད་འཁོ༵ར་ལོ༵ས་སྒྱུར་བར༴ ༡༢ལྟ་སྤྱོད་ངན་པའི་བྲག་ལ་གནས་བཅས་ནས། །བསམ་སྦྱོར་ལོག་པར་ཞུགས་པའི་གད་རྒྱངས་ཅན། །ནག་ཕྱོགས་ཀླ་ཀློ་གདུག་པའི་འབྱུང་པོའི་བྱ། །གཞོམ་བྱེད་འདབ་བཟང་དབང་པོར༴ ༡༣སྟོབས་འབྱོར་དྲེགས་པའི་དུག་ཆུས་ཆེར་མྱོས་ནས། །བསྟན་འགྲོའི་བདེ་སྐྱིད་འཕྲོག་པའི་མཚོན་འཁོར་ཅན། །འབྱུང་པོས་རྒྱུད་དཀྲུགས་མ་རུངས་གཉིས་འཐུང་ཚོགས། །རླག་བྱེད་གདོང་ལྔའི་དབང་པོར༴ ༡༤ཕྱོགས་ཞེན་སྙིང་ལ་འབར་བའི་རྟོག་གེའི་ཚིག །ལྟར་སྣང་རིགས་པའི་རླུང་ཤུགས་དང་འགྲོགས་ནས། །ངེས་གསང་བསྟན་ལ་འཚེ་བྱེད་འབར་བའི་སྒྲ{སྐྲ}། །གཞིལ་བྱེད་ཆར་ལྡན་སྤྲིན་དུ༴ ༡༥ཕྱི་ཚུལ་འཇམ་པོའི་ཀུན་སྤྱོད་ལྷུར་ལེན་ཡང་། །ནང་དུ་མ་ཞི་གཡོན་ཅན་བྱི་ལའི་མཆེད། །བསྟན་སེལ་སྡེ་འཁྲུགས་སློང་དང་ཡ་ག་སྒྲོགས། །འཇོམས་བྱེད་དྲང་སྲོང་ཁྲོས་པར༴ ༡༦ལས་འབྲས་འཆོལ་བར་སྤྱོད་པའི་ནགས་ཁྲོད་དུ། །འདོད་སྲེད་མེ་ཆེན་སྙིང་ལ་སྤར་བའི་རྒྱུས། །ངན་གཡོ་གསོད་རྐུ་འཕྲོག་བཅོམ་བྱེད་རྩོམ་རྣམས། །བསྐྲོད་པའི་གིང་ཆེན་ཁྲོ་བོར༴ ༡༧བདག་འཛིན་ཁོང་སྐྲན་སྲ་བའི་ཉེར་ལེན་རྒྱུ། །ལས་ཉོན་རྐྱེན་གྱིས་གསོས་པའི་ཟུག་རྔུའི་དཔལ། །མི་མཐུན་བརྒྱད་གཉིས་འཇིགས་པའི་འདུ་འཁྲུགས་དཔུང་། །ཞི་མཛད་སྨན་པའི་རྒྱལ་པོར༴ ༡༨ལེགས་བྱས་འཛིན་མའི་ལྟོ་བར་སྐྱེད་བསྲིང་བའི། །མཐོ་རིས་ཡོན་ཏན་བདུན་གྱི་མྱུ་གུའི་རྩེར། །འཁོར་ལོ་བཞི་དང་འཕགས་ནོར་འབྲས་བཟང་ཁུར། །སྨིན་བྱེད་རྟ་བདུན་དབང་པོར༴ ༡༩དད་གསུམ་ར་བས་ཡོངས་བསྐོར་དགེ་བཅུ་ཡི། །ཐེམ་སྐས་བཟང་པོས་ལེགས་མཛེས་རྫིང་བུ་རུ། །ཕུན་ཚོགས་ཚེ་དཔལ་འབྱོར་དགུའི་ཆུ་བོའི་རྒྱུན། །འཕེལ་བྱེད་འོད་དཀར་དབང་པོར༴ ༢༠གང་གིས་ཡིད་ལ་དྲན་པའི་མོད་ཉིད་ནས། །རེ་བའི་ཤིང་རྟ་ཕྱུར་པོར་འགེངས་མཛད་ཅིང་། །ཕན་བདེའི་གྲིབ་མ་སྣུམ་པོས་ས་གསུམ་ཁྱོན། །ཡོངས་ཁྱབ་དཔག་བསམ་དབང་པོར༴ ༢༡སྲིད་གསུམ་ཆེ་དགུའི་ཡིད་ཀྱི་དྲི་ཟ་མོ། །རང་དབང་བརྟེན་པ་འཕྲོག་པས་ཉེར་བཀུག་ནས། །ངེས་པར་བྲན་བཞིན་མངག་གཞུག་བྱེད་ནུས་པའི། །དོན་ཡོད་འཕྲུལ་གྱི་ཞགས་པར༴ ༢༢མི་བསྲུན་ཉམས་པ་བདུན་ལྡན་ལོག་འདྲེན་དཔུང་། །ཁྱད་པར་ངེས་གསང་བསྟན་དང་བསྟན་འཛིན་ལ། །སྡང་བྱེད་ཕ་རོལ་བྱད་མ་ལྷ་སྲུང་བཅས། །རང་གཤེད་རང་ལ་འབེབས་པར༴ ༢༣ཤེས་བྱའི་ཁོངས་སུ་ཆུབ་པའི་རྣམ་བཞིའི་ལས། །གྲུབ་པ་བརྒྱད་སོགས་གང་འདོད་གསོལ་བའི་འབྲས། །རེ་བའི་མོད་ལ་ཡིད་བཞིན་འཇོ་བའི་དཔྱིད། །འདོད་འབྱུང་གཏེར་གྱི་བུམ་པར༴ ༢༤མདོར་ན་བརྟན་གཡོ་སྣོད་བཅུད་སྲིད་ཞིའི་དཔལ། །མ་ལུས་རྟེན་འབྱུང་ཟབ་མོས་དབང་བསྡུས་ནས། །ཞིང་སྐྱོང་མཁའ་འགྲོའི་དབང་ཕྱུག་མངའ་གསོལ་ན། །བྱང་ཆུབ་བར་དུ་འབྲལ་མེད་གྲོགས་མཛོད་ཅིག །༢༥གནས་སྐབས་ཀུན་ཏུ་མི་མཐུན་འཇིགས་བརྒྱད་ཞི། །ཚེ་དཔལ་བསོད་ནམས་འཁོར་སློབ་འདུ་བ་རྒྱས། །ས་གསུམ་དབང་བསྡུས་སྣང་སྲིད་བྲན་དུ་ཁོལ། །ཕྱོགས་ལས་རྣམ་རྒྱལ་དགེ་བའི་དཔལ་སྩོལ་ཅིག༢༦། སྣོད་ཀྱི་འབྱོར་པས་བཅུད་ཀྱི་མངའ་ཐང་སྤེལ། །བཅུད་ཀྱི་སྤྱོད་པས་སྣོད་ལ་དགེ་མཚན་སྒྲུབ། །སྣོད་བཅུད་རྟེན་འབྱུང་ལེགས་དགུ་གཅིག་ཏུ་འགྲིགས། །རྫོགས་ལྡན་གསར་དུ་འཆར་བའི་དཔལ༴ ༢༧མཆོད་གནས་བྱིན་གྱིས་འབྱོར་ལྡན་ཆབ་སྲིད་བརྟན། །འབྱོར་ལྡན་ཡོན་གྱིས་ཡོན་གནས་མངའ་ཐང་དར། །ཡོན་མཆོད་རྟེན་འབྲེལ་རྣམ་དཀར་ཕྱོགས་སུ་མཐུན། །ཐུབ་བསྟན་ཕྱོགས་མཐར་རྒྱས་པའི་དཔལ༴ ༢༨བླ་མའི་ཐུགས་རྗེས་སློབ་མའི་ཤེས་རྒྱུད་གྲོལ། །སློབ་མའི་དད་པས་བླ་མའི་སྐུ་ཚེ་བརྟན། །བླ་སློབ་རྟེན་འབྲེལ་དམ་ཚིག་གཅིག་ཏུ་གཙང་། །སྨིན་གྲོལ་ལུས་ཟུང་རྒྱས༴ ༢༩ཀློག་པའི་འཁོར་ལོས་སྤོང་བའི་གནས་ལ་འཇུག །སྤོང་བའི་འཁོར་ལོས་ཀློག་དོན་ཁོང་དུ་ཆུབ། །སྤང་ཀློག་ཕྲིན་ལས་བསྟན་འགྲོའི་གསོས་སྨན་གྱུར། །ལུང་རྟོགས་བསྟན་པ་དར་སྨིན་དཔལ་སྩོལ་ཅིག༣༠། རང་དོན་དབེན་པར་སྒོམ་པས་གཞན་ཕན་འབྱུང་། །གཞན་དོན་གྲོང་དུ་སྤྱོད་པས་རང་རྒྱུད་གྲོལ། །གཉིས་དོན་ཕྲིན་ལས་གང་རྩོམ་ཐབས་མཁས་སྒོ། །དོན་གཉིས་བསམ་ཀུན་འགྲུབ་པའི་བཀྲ་ཤིས་སྩོལ། ༣༡། ཅེས་བསྟན་སྲུང་ཞིང་སྐྱོང་དབང་མོའི་མངའ་གསོལ་ཕྲིན་བཅོལ་དང་བཅས་པ་འདི་ལྟ་བུ་ཞིག་དགོས་ཞེས་མཁས་བཙུན་བཟང་པོའི་ཡོན་ཏན་གྱིས་མངོན་པར་མཐོ་བར་མཆོག་སྤྲུལ་བསོད་ནམས་མཆོག་གྲུབ་ཀྱི་གསུང་ནན་ངོར། འདུ་གསུམ་སྤྱོད་པ་འགྱུར་མེད་པདྨ་བསྟན་འཛིན་གྱིས་འགྲུབ་པའི་སྦྱོར་བ་དང་ལྡན་པའི་ཐུན་གསེང་ཞིག་ཏུ་ཤར་མར་བྲིས་ཏེ་ཕུལ་བ་དགེ། །།