དཔལ་ཆེན་རྡོ་རྗེ་གཞོན་ནུ་ལ་བརྟེན་ནས་ཚེ་གཡང་འགུགས་པའི་ལས་རིམ་འདོད་འབྱུང་གཏེར་གྱི་བུམ་བཟང་།

༄༅། །དཔལ་ཆེན་རྡོ་རྗེ་གཞོན་ནུ་ལ་བརྟེན་ནས་ཚེ་གཡང་འགུགས་པའི་ལས་རིམ་འདོད་འབྱུང་གཏེར་གྱི་བུམ་བཟང་བཞུགས། ན་མོ་གུ་རུ་བཛྲ་ཀུ་མཱ་ཱར་ཡཱ། བླ་མ་དཔལ་ཆེན་ཁྲོ་བོའི་རྒྱལ། །རྡོ་རྗེ་གཞོན་ནུ་ལ་བཏུད་ནས། །དབང་ཐོབ་དམ་ལྡན་རྣལ་འབྱོར་པས། །བསྙེན་སྒྲུབ་མཐར་ཕྱིན་ལས་སྦྱོར་བརྩམས། །དེ་ཡང་གྲུབ་པའི་སྦྱོར་བ་ལ། །ཕྱྭ་ཆ་གཡང་རྫས་ཚེ་རྟེན་བཤམས། །མདའ་དར་སྣ་ལྔའི་གཡབ་མོས་བསྐུལ། །ལྟ་དགོངས་གདེང་བསྐྱེད་འདི་སྐད་དོ། །ཧཱུྃ་ཧྲཱིཿཕྱི་སྣོད་རྣམ་དག་ཡུམ་ལྔའི་མཁའ་ཀློང་མཆོག །ནང་བཅུད་རྣམ་དག་གདན་གསུམ་ལྷ་ཡི་དལ། །ཡེ་ནས་ལྷུན་རྫོགས་ཐིག་ལེ་ཉག་གཅིག་སྦུབས། །སྣང་བ་ཐབས་མཆོག་བཛྲ་ཀུ་མཱ་ར། །སྟོང་པ་ཤེས་རབ་རྒྱས་འདེབས་ཡུམ་དང་སྦྱོར། །ཟུང་འཇུག་རང་མདངས་ཁྲོ་བཅུ་ཕྲ་ཐབས་སྲས། །སྒོ་སྐྱོང་ཕུར་སྲུང་དབང་མོ་སྤྲུལ་འཁོར་བཅས། །རབ་འབྱམས་རྩ་གསུམ་ཆོས་སྲུང་ནོར་ལྷའི་སྤྲིན། །སྲིད་ཞི་ཀུན་ཁྱབ་འཇའ་ཟེར་ཀློང་ན་བརྗིད། །དམ་ཡེ་དབྱེར་མེད་ཆོས་དབྱིངས་གཅིག་གི་རྩལ། །དྲན་པ་ཙམ་གྱིས་ཡིད་ལ་འདོད་དགུའི་དཔལ། །ཅི་དགར་སྦྱིན་མཛད་དཔག་བསམ་ནོར་བུའི་གཏེར། །གཅིག་དང་དུ་མ་ལས་འདས་མཉམ་པ་ཉིད། །སྣང་སྟོང་མཁའ་ཁྱབ་མཁའ་ཡི་རྡོ་རྗེ་ཅན། །སྒྱུ་འཕྲུལ་དྲྭ་བ་ཆེན་པོའི་འཕྲོ་འདུ་ཡིས། །བརྟན་གཡོ་སྲིད་ཞི་དྭངས་བཅུད་འདོད་དགུའི་དཔལ། །སྐུ་དང་ཐིག་ལེ་འཇའ་ཟེར་འོད་ཕུང་ཕྲེང་། །བཀྲ་ཤིས་རྟགས་རྫས་གྲུབ་པའི་བཅུད་ལེན་སྨན། །ཉི་ཟླ་ནོར་བུ་ཐབས་ཤེས་བྱང་ཆུབ་སེམས། །འཆི་མེད་བདུད་རྩི་འབྲུ་གསུམ་ཨ་ཧཾ་དང་། ཛྃ་བྃ་ཨ་ནྲི་ཧཱུཾ་གི་རྣམ་པར་བསྡུས། །རྣལ་འབྱོར་མི་ཤིགས་དྭངས་མའི་ཐིག་ལེ་ལ། །བསྟིམས་པས་རྡོ་རྗེའི་ཚེ་དང་གཡུང་དྲུང་ལུས། །མི་ནུབ་རྒྱལ་མཚན་ཐོགས་མེད་ཤེས་རབ་དང་། །འཛད་མེད་དཔལ་འབྱོར་མངའ་ཐང་སྙན་གྲགས་སྟོབས། །སྲིད་ཞིའི་ཕུན་ཚོགས་སྡེ་བཞིའི་འབྲས་བཟང་དཔལ། །ཐུན་མོང་ལས་ཆེན་བཞི་དང་གྲུབ་པ་བརྒྱད། །མཆོག་གི་དངོས་གྲུབ་དཔལ་ཆེན་ཧེ་རུ་ཀཿའི། །སྐུ་གསུང་ཐུགས་ཡོན་ཕྲིན་ལས་རྨད་པོ་ཆེར། །ད་ལྟ་ཉིད་དུ་སྦྱོར་ཞིང་བརྟན་པར་མཛོད། །ཧཱུྃ་ཧྲཱིཿསྐྱེ་འགག་གཉིས་མེད་བྱང་ཆུབ་སེམས་ཀྱི་ཀློང་། །འབྲས་བུ་རང་ཤར་དཔལ་ཆེན་ཀཱི་ལ་ཡ། །རབ་འབྱམས་རྩ་གསུམ་རྒྱ་མཚོའི་ཚོགས་དང་བཅས། །ཐུགས་དམ་གནད་ནས་བསྐུལ་ལོ་དབྱིངས་ལས་བཞེངས། །རྣམ་ཀུན་མཆོག་ལྡན་ཆོས་དབྱིངས་འདུས་མ་བྱས། །སྲིད་ཞི་ཀུན་ཁྱབ་བགྲེས་རྒུད་འཕོ་འགྱུར་བྲལ། །ཟག་མེད་ཡོན་ཏན་བསམ་མི་ཁྱབ་ཀྱིས་འཁྱུད། །མི་འགྱུར་འཕོ་མེད་རྟག་པའི་ཕྱྭ་ཚེ་གཡང་། །སྣང་སྟོང་འདུ་འབྲལ་མེད་པའི་རྟེན་འབྱུང་མཐུས། །དབང་བསྡུས་འོད་གསལ་དྭངས་མའི་ཏི་ལ་ཀར། །མཉམ་སྦྱོར་དཔལ་ཆེན་བཛྲ་ཀཱི་ལ་ཡའི། །སྐུ་གསུང་ཐུགས་ཡོན་ཕྲིན་ལས་དབྱེར་མེད་པའི། །ཟུང་འཇུག་རྟག་པ་དམ་པའི་མཆོག་སྩོལ་ཅིག །ཛཿམེ་ལོང་ཡེ་ཤེས་གསལ་བའི་རང་མདངས་ལས། །ཞི་བའི་ལས་མཛད་བཛྲ་ཀཱི་ལ་ཡ། །ཞི་བའི་རང་བཞིན་སྐུ་མདོག་དཀར་ལ་འཚེར། །ཕྱག་ན་ཞི་བའི་དངུལ་ཕུར་ཟླུམ་པོ་བསྣམས། །ཞི་མཛད་རྡོ་རྗེ་རིགས་ཀྱི་འཁོར་གྱིས་བསྐོར། །མི་མཐུན་འགལ་རྐྱེན་འཇིགས་བརྒྱད་ཞི་བ་དང་། །ཞེ་སྡང་སྒོ་ནས་ཉམས་འཁྱར་ཆད་པ་ཡི། །བླ་ཚེ་སྲོག་ལུས་དབང་ཐང་ཀླུང་རྟ་གསོས། །ས་ཁམས་རྡོ་རྗེ་རིགས་ཀྱི་ཕྱྭ་ཚེ་གཡང་། །མ་ལུས་རིན་ཆེན་ཤེལ་བུམ་ནང་དུ་བསྡུས། །རྣལ་འབྱོར་ཤ་ཁམས་གཟུགས་ཀྱི་ཕུང་པོར་བསྟིམ། །རྡོ་རྗེའི་ཚེ་དཔལ་གྲུབ་པའི་ལས་མཛོད་ཅིག །ཧཱུྃ། མཉམ་ཉིད་ཡེ་ཤེས་གསལ་བའི་རང་མདངས་ལས། །རྒྱས་པའི་ལས་མཛད་རཏྣ་ཀཱི་ལ་ཡ། རྒྱས་པའི་རང་བཞིན་སྐུ་མདོག་སེར་ལ་བརྗིད། །ཕྱག་ན་རྒྱས་པའི་གསེར་ཕུར་གྲུ་བཞི་བསྣམས། །རྒྱས་མཛད་རིན་ཆེན་རིགས་ཀྱི་འཁོར་གྱིས་བསྐོར། །མཐུན་རྐྱེན་ཚེ་བསོད་འབྱོར་དྲུག་རྒྱས་པ་དང་། །ང་རྒྱལ་སྒོ་ནས་ཉམས་འཁྱར་ཆད་པ་ཡི། །བླ་ཚེ་སྲོག་ལུས་དབང་ཐང་ཀླུང་རྟ་གསོས། །ཆུ་ཁམས་རིན་ཆེན་རིགས་ཀྱི་ཕྱྭ་ཚེ་གཡང་། །མ་ལུས་རིན་ཆེན་གསེར་བུམ་ནང་དུ་བསྡུས། །རྣལ་འབྱོར་ཁྲག་ཁམས་ཚོར་བའི་ཕུང་པོར་བསྟིམ། །རིན་ཆེན་ཚེ་དཔལ་གྲུབ་པའི་ལས་མཛོད་ཅིག །བཾ། སོར་རྟོག་ཡེ་ཤེས་གསལ་བའི་རང་མདངས་ལས། །དབང་གི་ལས་མཛད་པདྨ་ཀཱི་ལ་ཡ། །དབང་གི་རང་བཞིན་སྐུ་མདོག་དམར་ལ་སྒེག །ཕྱག་ན་དབང་གི་ཟངས་ཕུར་ཟླ་གམ་བསྣམས། །དབང་མཛད་པདྨ་རིགས་ཀྱི་འཁོར་གྱིས་བསྐོར། །མོས་པ་རྣམ་བཞིས་ལོ་ཀ་དབང་བསྡུས་ལ། །འདོད་ཆགས་སྒོ་ནས་ཉམས་འཁྱར་ཆད་པ་ཡི། །བླ་ཚེ་སྲོག་ལུས་དབང་ཐང་རླུང་རྟ་གསོས། །མེ་ཁམས་པདྨ་རིགས་ཀྱི་ཕྱྭ་ཚེ་གཡང་། །མ་ལུས་རིན་ཆེན་ཟངས་བུམ་ནང་དུ་བསྡུས། །རྣལ་འབྱོར་དྲོད་ཁམས་འདུ་ཤེས་ཕུང་པོར་བསྟིམ། །པདྨའི་ཚེ་དཔལ་གྲུབ་པའི་ལས་མཛོད་ཅིག །ཧོཿབྱ་གྲུབ་ཡེ་ཤེས་གསལ་བའི་རང་མདངས་ལས། །དྲག་པོའི་ལས་མཛད་ཀརྨ་ཀཱི་ལ་ཡ། །དྲག་པོའི་རང་བཞིན་སྐུ་མདོག་ལྗང་ནག་རྔམས། །ཕྱག་ན་དྲག་པོའི་ལྕགས་ཕུར་གྲུ་གསུམ་བསྣམས། །དྲག་མཛད་ལས་ཀྱི་རིགས་ཀྱི་འཁོར་གྱིས་བསྐོར། །མ་རུངས{མི་རུང}ཞིང་བཅུའི་ལོག་འདྲེན་ཚར་ཆོད་ལ། །ཕྲག་དོག་སྒོ་ནས་ཉམས་འཁྱར་ཆད་པ་ཡི། །བླ་ཚེ་སྲོག་ལུས་དབང་ཐང་རླུང་རྟ་གསོས། །རླུང་ཁམས་ལས་ཀྱི་རིགས་ཀྱི་ཕྱྭ་ཚེ་གཡང་། །མ་ལུས་རིན་ཆེན་གཡུ་བུམ་ནང་དུ་བསྡུས། །རྣལ་འབྱོར་དབུགས་ཁམས་འདུ་བྱེད་ཕུང་པོར་བསྟིམ། །ལས་ཀྱི་ཚེ་དཔལ་གྲུབ་པའི་ལས་མཛོད་ཅིག །ཧྲཱིཿཆོས་དབྱིངས་ཡེ་ཤེས་གསལ་བའི་རང་མདངས་ལས། །མཆོག་གིས་ལས་མཛད་བུདྡྷཱ་ཀི་ལ་ཡ། །མཆོག་གི་རང་བཞིན་སྐུ་མདོག་མཐིང་ལ་དྭངས། །ཕྱག་ན་མཆོག་གི་མཆོང་ཕུར་མཛེས་པ་བསྣམས། །མཆོག་མཛད་བུདྡྷཱ་རིགས་ཀྱི་འཁོར་གྱིས་བསྐོར། །རླུང་སེམས་དྭངས་མའི་ཐིག་ལེར་སྨིན་པ་དང་། །གཏི་མུག་སྒོ་ནས་ཉམས་འཁྱར་ཆད་པ་ཡི། །བླ་ཚེ་སྲོག་ལུས་དབང་ཐང་རླུང་རྟ་གསོས། །ནམ་མཁའ་ཆོས་དབྱིངས་རིགས་ཀྱི་ཕྱྭ་ཚེ་གཡང་། །མ་ལུས་རིན་ཆེན་མཐིང་གི་བུམ་པར་བསྡུས། །རྣལ་འབྱོར་སེམས་ཁམས་རྣམ་ཤེས་ཕུང་པོར་བསྟིམ། །བུདྡྷཱའི་ཚེ་དཔལ་གྲུབ་པའི་ལས་མཛོད་ཅིག །ཧཱུྃ། དགེ་བཅུ་ཕར་ཕྱིན་བཅུ་ལ་དབང་མཛད་པའི། །སྤྲུལ་པའི་ཁྲོ་རྒྱལ་ཆེན་པོ་ཡབ་ཡུམ་བཅུ། །ཟ་གསོད་ཕོ་ཉ་རྟགས་ཀྱི་ཕྱག་རྒྱ་འགྱེད། །ཚད་མེད་བཞི་ལྡན་ཡེ་ཤེས་སྒོ་མ་བཞི། །རྟེན་འབྲེལ་གནས་དག་ཕུར་སྲུང་བརྟན་མའི་ཚོགས། །རང་རང་འཁོར་གཡོག་སྤྲུལ་པ་འབུམ་སྡེར་བཅས། །རང་རང་ལས་ལ་དབང་བའི་མཐུ་བསྐྱེད་ལ། །མི་མཐུན་སྲི་སྐེག་བྱད་ཕུར་རྦོད་གཏོང་ཟློག །ཕྱོགས་མཚམས་སྟེང་འོག་འཁྱར་བའི་བླ་ཚེ་ཁུག །བརྟན་གཡོ་སྲིད་ཞིའི་ཕྱྭ་གཡང་དྭངས་བཅུད་བསྡུས། །ལྷ་གཡང་དངོས་གྲུབ་སྤྲིན་བཅུད་སི་ལི་ལི། །ཀླུ་གཡང་འདོད་དགུའི་རྒྱ་མཚོ་མེ་རེ་རེ། །མི་གཡང་མཁོ་དགུའི་ལོངས་སྤྱོད་སྤུངས་སེ་སྤུངས། །ཕྱྭ་དང་བླ་ཚེ་རི་ལ་མ་བྲོས་ལ། །གཡང་དང་བསོད་ནམས་སྒོ་རུ་མ་ཉམས་པར། །འགྱུར་མེད་ཕྱག་རྒྱ་གསུམ་གྱི་རྒྱ་ཡིས་ཐོབ། །མི་འགྱུར་བརྟན་པ་རི་རབ་ལྟ་བུའི་ཚེ། །མི་ནུབ་གསལ་བ་ཉི་ཟླ་ལྟ་བུའི་སྟོབས། །མི་འཛད་དཔལ་འབྱོར་རྒྱ་མཚོ་ལྟ་བུའི་ཕྱྭ། །མི་ཤིགས་རྡོ་རྗེ་ལྟ་བུར་བརྟན་པར་མཛོད། །སྙན་གྲགས་རྔ་ཆེན་སྲིད་ཞིའི་ཁོངས་སུ་སྙན། །བརྒྱུད་འཛིན་འཁོར་སློབ་འདུ་བ་མཁའ་དང་མཉམ། །ཕྱོགས་ལས་རྣམ་རྒྱལ་བཤད་སྒྲུབ་རྒྱལ་མཚན་མཐོ། །དོན་གཉིས་བསམ་ཀུན་འགྲུབ་པའི་དགའ་སྟོན་སྩོལ། །རབ་འབྱམས་རྩ་གསུམ་རྒྱལ་བའི་བདེན་བྱིན་དང་། །བདེན་གཉིས་དབྱེར་མེད་ལྷག་པའི་རྟེན་འབྱུང་མཐུས། །ཕན་བདེའི་སྣང་བ་ཟབ་མོས་ས་གསུམ་ཁྱོན། །ཡོངས་ཁྱབ་བཀྲ་ཤིས་དགེ་མཚན་འཕེལ་རྒྱས་ཤོག །དེ་ལྟར་དམ་ཚིག་ལྡན་པའི་འབྲས། །བསྙེན་སྒྲུབ་སྦྱོར་བ་མཐར་ཕྱིན་ནས། །ཁ་སྒྱུར་དམིགས་པའི་འཕྲོ་འདུ་ཡི། །དོན་གཉིས་འདོད་པ་འཇོ་བར་ངེས། །འདི་ནི་དཔལ་ཆེན་ཀཱི་ལ་ཡི། །རྡོ་རྗེའི་ཚེ་སྒྲུབ་བརྩོན་པའི་སྐབས། །རྣལ་འབྱོར་རྡོ་རྗེ་དབང་མཆོག་གིས། །ཡིད་ལ་ཤར་བཞིན་མགྱོགས་པར་བྲིས། །དེ་ཚེ་བདེ་བར་གཤེགས་པ་ཡི། །འཕེལ་གདུང་འཛད་པ་མེད་པའི་གཏེར། །ཡིད་བཞིན་ནོར་མཆོག་ལག་ཏུ་འབྱོར། །རྟེན་འབྱུང་ཤིན་ཏུ་དགེ་བར་མངོན། །དགེ་བས་མཐའ་ཀླས་འགྲོ་བ་ཀུན། །མི་མཐུན་བདུད་བཞིའི་གཡུལ་ལས་རྒྱལ། །མཐུན་རྐྱེན་ཚེ་དཔལ་ཡེ་ཤེས་རྒྱས། །ཐལ་འབྱིན་དགོངས་པའི་སྲོག་འགྲུབ་ཤོག །མངྒ་ལཾ། ༈ ༀ་བཛྲ་ཀཱི་ལི་ཀཱི་ལ་ཡ་སརྦ་བིགྷྣན་བྃ་ཧཱུྃ་ཕཊ། བཛྲ་ཛྙཱ་ན་ཨ་ཡུ་ཥེ་པུཎྱེ་བ་སུ་སིངྔྷི་སརྦ་སིངྔྷི་ཕ་ལ་ཛཿཧཱུྃ་ཨཱ།