༄༅། །འཇམ་དཔལ་སྒྱུ་འཕྲུལ་དྲྭ་བའི་རྒྱུད་ཀྱི་བཀླག་ཐབས་ཟབ་གནད་སྙིང་པོར་དྲིལ་བ།
༄༅། །ན་མོ་མཉྫུ་ཤྲཱི་ཡེ། བདེ་བའི་སྟན་ལ་བག་ཕེབས་གནས། །ངེས་པར་འབྱུང་བའི་ཀུན་སློང་གིས། །དཀོན་མཆོག་གསུམ་ལ་སྐྱབས་སུ་འགྲོ། །འགྲོ་དོན་བྱང་ཆུབ་སེམས་མཆོག་བསྐྱེད། །ཨཱཿསྐྱེ་བ་མེད་པའི་ངང་ཉིད་ལས། །འགགས་མེད་སྙིང་རྗེ་སྒྱུ་མའི་གར། །ཟུང་འཇུག་ཨཱཿདཀར་འཕྲོ་འདུ་ལས། །སྣོད་བཅུད་དག་མཉམ་ཆེན་པོར་སྦྱར། །ཡོངས་གྱུར་རང་ཉིད་སྐད་ཅིག་གིས། །རྗེ་བཙུན་འཕགས་པ་འཇམ་པའི་དབྱངས། །འོད་ཆེན་སྣང་བ་ལམ་མེ་བ། །ཤེས་རབ་རལ་གྲི་མདའ་གཞུ་ཐོགས། །ཐབས་ཤེས་སྒྱུ་འཕྲུལ་དྲྭ་བར་བསྡོམས། །ཕུང་ཁམས་སྐྱེ་མཆེད་གདོད་ནས་ལྷ། །གདན་གསུམ་དཀྱིལ་འཁོར་འཁོར་ལོར་རྫོགས། །གནས་གསུམ་སྐུ་གསུང་ཐུགས་ཀྱི་ལྷ། །བ་སྤུ་སྔགས་ཀྱི་གོ་ཆས་གཏམས། །ཡེ་ཤེས་དབང་བསྐུར་ཅོད་པཎ་མཛེས། །ཐུགས་སྲོག་འོད་ལྔའི་ཐིག་ལེའི་དབུས། །ཨ་དཀར་རྒྱུད་ཀྱིས་ཕྲེང་བས་བསྐོར། །བཟླས་པའི་རྐྱེན་གྱིས་འབར་བའི་འོད། །འཕྲོས་པས་ཐ་མལ་སྣང་ཞེན་སྦྱངས། །རྡོ་རྗེ་གསུམ་གྱི་ངོ་བོར་རྫོགས། །ཚུར་འདུས་བརྟན་གཡོ་སྲིད་ཞིའི་དཔལ། །མི་ཤིགས་སྲོག་གི་འཁོར་ལོར་བསྟིམས། །ཚེ་དཔལ་གཟུངས་སྤོབས་བློ་གྲོས་སོགས། །འཇམ་དཔལ་རྡོ་རྗེར་མཉམ་པར་མོས། །རྒྱུད་ཀྱི་རྒྱལ་པོ་རྡོ་རྗེའི་ཚིག །གྲགས་སྟོང་སྐྱེ་མེད་ངང་ནས་བཀླག །རྗེས་ཐོབ་འོད་གསལ་ངང་དུ་བསྡུ། །སླར་ཡང་སྣོད་བཅུད་ལྷ་སྐུར་སྦྱངས། །ཐུན་མཚམས་ཚོགས་བསགས་རྣལ་འབྱོར་དང་། །ཐོས་བསམ་ཤེས་རབ་ཕྱོགས་མེད་སྐྱེད། །རྣམ་ཀུན་རིག་སྟོང་གཉུག་མའི་གཤིས། །དོན་དམ་འཇམ་དཔལ་རང་ངོ་སྐྱོང་། །རྗེས་ཐོབ་སྙིང་རྗེ་སྒྱུ་མར་སྦྱོངས། །བསྔོ་བ་སྨོན་ལམ་ཡང་དག་བྱ། །འདི་ཡང་ཟབ་པའི་ཡང་ཟབ་སྟེ། །རྣལ་འབྱོར་ཅན་གྱིས་ཉམས་སུ་བླངས། །དོན་གཉིས་ཕུན་སུམ་ཚོགས་པར་འགྱུར། །འདིར་འབད་དགེ་བས་རང་གཞན་འགྲོ། །གསུང་གི་དབང་ཕྱུག་ཉིད་འགྲུབ་ཤོག །ཅེས་པའང་འཇམ་དབྱངས་བློ་གྲོས་རྒྱ་མཚོས་བྲིས་པ་དགེ །