བླ་མ་རྡོ་རྗེ་སེམས་དཔའ་ལ་བརྟེན་ནས་བཤགས་སྡོམ་བྱ་ཚུལ་མདོར་བསྡུས།

༄༅། །ན་མོ་གུ་རུ་བཛྲ་ས་ཏྭ་ཡ། འདིར་བླ་མ་རྡོ་རྗེ་སེམས་དཔའ་ལ་བརྟེན་ནས་བཤགས་སྡོམ་བྱ་ཚུལ་མདོར་བསྡུས་ནི། སྐྱབས་སེམས་སྔོན་དུ་འགྲོ་བས། ཨཱཿརང་ལུས་ཐ་མལ་སྤྱི་བོར་པད་ཟླའི་སྟེང་། །རིགས་ཀུན་ཁྱབ་བདག་རྩ་བའི་བླ་མ་ནི། །རྣམ་རོལ་མ་འགགས་བཅོམ་ལྡན་རྡོ་རྗེ་སེམས། །དཀར་གསལ་ཞི་འཛུམ་མཚན་དཔེའི་གཟི་བྱིན་འབར། །ཞལ་གཅིག་ཕྱག་གཉིས་ཐབས་ཤེས་རྡོར་དྲིལ་འཛིན། །ལོངས་སྐུའི་རྒྱན་རྫོགས་རང་འོད་ཡུམ་དང་འཁྲིལ། །གནས་གསུམ་རྡོ་རྗེའི་འབྲུ་གསུམ་འོད་ཟེར་གྱིས། །དཀོན་མཆོག་རྩ་གསུམ་རབ་འབྱམས་དཀྱིལ་འཁོར་སྤྲིན། །ཁྱད་པར་རང་ལ་དབང་བསྐུར་རྒྱུད་བཤད་དང་། །མན་ངག་ལུང་འབོག་དམ་ཚིག་སྐོང་བ་ཡི། །བླ་མ་མཆེད་ལྕམ་རྡོ་རྗེའི་སྤུན་གྲོགས་ཚོགས། །འོག་མིན་ཞིང་དང་རང་རང་གར་བཞུགས་ནས། །སྤྱན་དྲངས་དམ་ཚིག་རྟེན་དང་དབྱེར་མེད་འདྲེས། །སྐྱབས་ཀུན་འདུས་པའི་ངོ་བོར་ལྷམ་མེར་གསལ། །གང་མཚན་ཐོས་དང་དྲན་པ་ཙམ་གྱིས་ཀྱང་། །ཐོག་མེད་ནས་བསགས་ཀུན་དཀྲིས་འཆིང་བའི་ཚོགས། །གཅིག་ཅར་གཅོད་མཛད་བླ་མ་རྡོ་རྗེ་སེམས། །སྙིང་ནས་གསོལ་བ་འདེབས་སོ་ཐུགས་རྗེས་དགོངས། །ཀྱེ་མ་ཀྱི་ཧུད་ཉམ་ཐག་བདག་ལྟ་བུ། །མ་རིག་དབང་གིས་དགེ་སྡིག་དོན་མ་རྟོགས། །དད་མོས་ཆུང་བས་བཀའ་ལུང་ཁྱད་དུ་གསོད། །བག་མེད་དབང་གིས་སྲུང་མཚམས་འཆོལ་བར་སྤྱད། །ཉོན་མོངས་རྐྱེན་གྱིས་འཕགས་ལ་མི་མཉེས་སྒྲུབ། །སྡོམ་དང་དམ་ཚིག་ཕྱལ་བར་གྱུར་བ་དང་། །ཉམས་དང་ཚོགས་འདྲེས་མཆེད་ལ་འཁུ་བ་སོགས། །བཅས་དང་རང་བཞིན་ཉམས་པའི་སྡིག་ལྟུང་ཀུན། །སྙིང་ནས་འགྱོད་པས་བཤགས་ཤིང་སྡོམ་བགྱིད་ན། །དག་ཚངས་ཁྲུས་ཀྱི་དངོས་གྲུབ་སྩལ་ཏུ་གསོལ། །གཏུམ་པོ་རྣམས་ཀྱང་མཆོད་ན་བརྩེ་བྱེད་ན། །བྱམས་ཆེན་མགོན་རྣམས་ཅི་ཕྱིར་དགོངས་མི་མཛད། །བདག་ནི་སྡིག་ཀུན་མ་བྱང་འགུམ་གྱུར་ན། །ཡུན་རིང་དམྱལ་མེ་བཟོད་དཀས་བསྲེག་པར་ཟད། །འདི་ལས་སྐྱོབས་ཤིག་རྗེ་བཙུན་རིན་པོ་ཆེ། །རང་གིས་ནོངས་ཞེས་བཏང་སྙོམས་མཛད་ན་ཀོ། ཐུགས་རྗེ་ཅན་གྱིས་ཐུགས་རྗེ་ཇི་ལྟར་རུང་། །སྡིག་འདི་དེ་རིང་ཉིད་ནས་སྦྱོང་དུ་གསོལ། །སྐྱབས་མེད་བདག་ལ་སྐྱོབ་པ་གཞན་མ་མཆིས། །ཐུགས་རྗེས་ཟུངས་ཤིག་བླ་མ་རིན་པོ་ཆེ། །མགོན་མེད་ཡལ་བར་མ་དོར་དྲིན་ཆེན་རྗེ། །ལྡང་བའི་དུས་ཐབས་དེང་འདིར་བསྟན་དུ་གསོལ། །ཞེས་པས་གསོལ་བཏབ་བླ་མའི་ཞབས་མཐིལ་ནས། །བདུད་རྩིའི་རྒྱུན་བབས་རང་ལུས་བཀྲུས་ཤིང་ཁེངས། །སྒྲིབ་དག་དབང་ཐོབ་སྐུ་བཞིའི་ས་བོན་གསོས། །མཐར་ནི་དགྱེས་པས་དབུགས་དབྱུང་རང་ལ་ཐིམ། །རང་ཡང་འོད་ཞུ་མི་དམིགས་སྤྲོས་བྲལ་དབྱིངས། །འཁོར་གསུམ་རྟོག་པས་མ་བསླད་གཉུག་མའི་གཤིས། །དོན་དམ་བླ་མ་རྡོ་རྗེ་སེམས་དཔའི་ཞལ། །བློ་འདས་རྫོགས་པ་ཆེན་པོའི་ཀློང་དུ་ཨཿ། །རྗེས་ཐོབ་ཅིར་སྣང་རྡོ་རྗེ་སེམས་དཔའི་སྐུ། །སྒྲ་གྲགས་ཐམས་ཅད་བཛྲ་ས་ཏྭའི་དབྱངས། །དྲན་རྟོག་ཡེ་གྲོལ་ཟང་ཀ་རྒྱལ་བའི་ཐུགས། །རྡོ་རྗེ་གསུམ་གྱི་རྣལ་འབྱོར་ཨེ་མ་ཧོ། །དགེ་བ་འདི་སོགས་དང་། དཔལ་ལྡན་བླ་མའི་རྣམ་པར་ཐར་པ་ལ། །སོགས་དང་། སྐྱེ་བ་ཀུན་ཏུ་ཡང་དག་བླ་མ་སོགས་ཇི་ལྟར་རིགས་པའི་བསྔོ་སྨོན་གྱིས་མཚམས་སྦྱར་ནས་ཐུན་མཚམས་ཀྱི་སྤྱོོད་ལམ་ཀུན་དོན་ཡོད་པར་བྱའོ། །ཞེས་པའང་རྣལ་འབྱོར་གྱི་དབང་ཕྱུག་དམ་པ་སྨན་ལྷའི་ལྕམ་གྱི་གསུང་བསྐུལ་ངོར། ཞེ་ཆེན་པ་འགྱུར་མེད་པདྨ་བསྟན་འཛིན་གྱིས་བྲིས་པ་དགེ །