དགེ་བསྙེན་ཆེན་པོ་ནོར་བུ་དབང་རྒྱལ་གྱི་བསང་མཆོད།

༄༅། །དགེ་བསྙེན་ཆེན་པོ་ནོར་བུ་དབང་རྒྱལ་གྱི་བསང་མཆོད་འདོད་འབྱུང་ནོར་བུའི་སྤྲིན་ཕུང་ཞེས་བྱ་བ་བཞུགས་སོ། །ན་མོ་གུ་རུ་པདྨ་ཀ་ར་ཡ། ཕུན་ཚོགས་དགེ་ལེགས་བྱེ་བའི་སྤྲིན་ཆེན་ལས། །ཕན་བདེའི་འདོད་པ་འཇོ་བའི་རྫོགས་ལྡན་ཆར། །འབེབས་མཛད་རྩ་གསུམ་འདུས་ཞལ་པད་འབྱུང་དང་། །དབྱེར་མེད་རྡོ་རྗེ་གཟི་བརྗིད་གཙུག་ན་མཆོད། །དེ་ཡང་བཀྲ་ཤིས་པའི་དུས་ཚེས་དགེ་བའི་སྔ་དྲོའི་ཆར་བཙོག་ནལ་དམར་གྱིས་མ་སྦགས་པའི་བཟང་ཤིང་དྲི་ལྡན་གྱི་དུད་པ། རིན་ཆེན་འབྲུ་སྨན་དར་གོས་ཕྱེ་མར། གསེར་གཡུའི་སྐྱེམས་ཕུད། མཆོད་གཏོར། མདའ་དར། སྤྱན་གཟིགས་དཀོར་ནོར་ཇི་རིགས་སོགས་ཇི་ལྟར་མཁོ་བའི་ཡོ་བྱད་རྣམས་ཚོགས་པར་བྱས་ལ། ཐོག་མར་གསོལ་འདེབས། སྐྱབས་སེམས་ཚད་མེད་བཞི་བསྒོམ་པ་སྔོན་དུ་འགྲོ་བས། བདག་བསྐྱེད་ནི། ཧྲཱིཿཆོས་ཀུན་འོད་གསལ་གདོད་ནས་སྤྲོས་བྲལ་དབྱིངས། །ལྟ་སྒོམ་སྤྱོད་པའི་རང་མཚན་མ་དམིགས་ཀྱང་། །ཀུན་རྫོབ་སྣང་ཆའི་རྟེན་འབྲེལ་མ་འགགས་རྩལ། །གནས་ཡུལ་རྣམ་དག་འོག་མིན་པདྨ་འོད། །ཡེ་ཤེས་ངོ་མཚར་བཀོད་པ་འབྱམས་ཀླས་གཞིར། །རིག་སྟོང་གཉུག་མའི་རང་རྩལ་ཐོད་ཕྲེང་རྩལ། །སྣང་སྲིད་དབང་བསྒྱུར་འཇའ་ཟེར་འོད་ཕུང་ཀློང་། །དམ་ཚིག་ཡེ་ཤེས་དབྱེར་མེད་ལྷུན་གྱིས་གྲུབ། །ཐུགས་སྲོག་འོད་ཀྱིས་མཆོད་རྫས་དངོས་འཛིན་སྦྱངས། །འབྲུ་གསུམ་ཟག་མེད་ཡེ་ཤེས་བདུད་རྩིའི་བཅུད། །རྣམ་པ་འདོད་ཡོན་མཆོད་སྤྲིན་མཁའ་དབྱིངས་ཁྱབ། །མགྲོན་རིགས་ཐུགས་ལ་གང་བཞེད་དེར་འཆར་གྱུར། །ཞེས་མོས་ལ། རྒྱས་པར་སྔགས་དྲུག་ཕྱག་དྲུག་གམ། བསྡུ་ན་ནམ་མཁའ་མཛོད་ཀྱི་སྔགས་རྒྱས་བརླབས་ལ། དངོས་གཞིའི་ལས་རིམ་ནི། རོལ་མོ་བཅས་སྙན་པའི་དབྱངས་ཀྱིས། ཀྱཻ། རབ་དཀར་བསོད་ནམ་འཛིན་མའི་ལྟོ་བ་ལས། །ཉེར་འཁྲུངས་ཕན་བདེའི་འབྲས་མང་དཔག་བསམ་དབང་། །སྐྱེ་དགུའི་རེ་སྐོང་འདོད་པ་འཇོ་བའི་དཔྱིད། །ཡུལ་སྐྱོང་ཆེན་པོ་ནོར་བུ་དབང་རྒྱལ་ཞེས། །དུས་གསུམ་ཀུན་མཁྱེན་ཨོ་རྒྱན་ཆེན་པོ་ཡི། །བཀའ་ལུང་ནོར་བུའི་ཅོད་པཎ་ལེགས་འཆིང་ནས། །ཟབ་གཏེར་བསྟན་སྲུང་ཆོས་བོན་སྐྱོང་བའི་གཉེན། །རྣམ་བཞིའི་ཕྲིན་ལས་གསར་པའི་སྒོ་འཕར་འབུམ། །འབྱེད་སླད་ཞི་འཛུམ་ཆགས་ཁྲོའི་ཉམས་འགྱུར་གྱིས། །མ་ངེས་ཆ་ལུགས་རྣམ་འཕྲུལ་བསམ་མི་ཁྱབ། །ཐུགས་ཀྱི་དགྱེས་སྡེ་གཡུ་ལུང་ལྷ་སྨན་དང་། །མདུན་གྱི་ཀླུ་མོ་ཆེན་མོ་མདངས་ལྡན་མ། །རྩེ་བླ་བཅུ་གསུམ་གཉན་བཙན་དྲེགས་པའི་ཚོགས། །བཀའ་ཉན་བྲན་གཡོག་ཡང་སྤྲུལ་འཁོར་དང་བཅས། །འདིར་གཤེགས་བསང་གི་དགའ་སྟོན་བཞེས་སུ་གསོལ། །ངོ་མཚར་སྤྱན་གཟིགས་བཀོད་པས་རབ་མཛེས་པའི། །རིན་ཆེན་ཁང་བཟང་ཉམས་དགའ་ནོར་བུའི་གཏེར། །བརྗིད་ལྡན་གསེར་ཁྲི་དར་ཟབ་འབོལ་བརྩེགས་སོགས། །རང་རང་མཐུན་པའི་གདན་ལ་དགྱེས་པར་བཞུགས། །དོན་དམ་ཆོས་ཉིད་གཉུག་མའི་མཁའི་དབྱིངས་སུ། །ཀུན་རྫོབ་འཁོར་འདས་སྤྲིན་ཚོགས་ཅིར་སྣང་ཡང་། །རང་གྲོལ་གདོད་མའི་གཤིས་ལ་ཕན་གནོད་བྲལ། །སྲིད་ཞི་མཉམ་ཉིད་རྟོགས་པའི་ཕྱག་གིས་འདུད། །དགེ་ལེགས་བྱེ་བའི་དཔལ་གྱིས་ཉེར་གྲུབ་པའི། །དབང་པོ་དྲུག་གི་ཉེར་སྤྱོད་འདོད་ཡོན་ཚོགས། །མ་ཚང་མེད་པའི་མཆོད་སྤྲིན་མི་ཟད་རྒྱན། །ཆོས་ཀྱི་དབྱིངས་ཀུན་ཁྱབ་པའི་བསྙེན་བཀུར་སྟོབས། །ཚོགས་གཉིས་ཤིང་རྟའི་སྒྱུ་ཐབས་ལ་བརྟེན་ནས། །རྫོགས་ལྡན་ཕན་བདེའི་ཉིན་བྱེད་འདྲེན་པའི་དཔལ། །ཡུལ་སྐྱོང་ཆེན་པོ་འཁོར་དང་བཅས་རྣམས་ལ། །དགའ་དང་གུས་པའི་ཡིད་ཀྱིས་བསྟོད་པར་བགྱི། ཀྱཻ། སྣང་སྲིད་རྣམ་དག་ཀུན་བཟང་ཡུམ་གྱི་མཁར། །མ་དག་ཉེས་པའི་དྲི་མ་མི་མངའ་ཡང་། །སྒྱུ་མ་མཁན་གྱི་སྒྱུ་མའི་རོལ་རྩེད་བཞིན། །བདེན་གཉིས་ཟུང་འཇུག་རྟེན་འབྱུང་མ་འགགས་རྩལ། །བརྟན་གཡོའི་དྭངས་བཅུད་རྩི་ཤིང་སྨན་གྱི་རིགས། །འབྲུ་བཟང་དར་གོས་གསེར་དངུལ་རིན་ཆེན་དབྱིག །མཐུན་རྫས་གཏོར་མ་བརྗིད་ལྡན་དཀོར་ཆའི་ཚོགས། །ཨརྒྷཾ་དཀར་སྔོན་ཕྱེ་མར་གཙང་སྦྱར་ཕུད། །གོས་དཀར་ཡུམ་མཁར་སྦྱངས་པའི་དུད་པའི་སྤྲིན། །ལྷ་སྔགས་ཏིང་འཛིན་ཟབ་མོས་སྤེལ་བསྒྱུར་མཐུས། །མི་གཙང་ཉེས་ཀུན་སེལ་བྱེད་བདུད་རྩིའི་ཆར། །རང་རང་གང་བཞེད་འཆར་བའི་འདོད་ཡོན་མཆོག །ཟག་མེད་ཀུན་བཟང་རྒྱན་གྱི་རོལ་མོ་ཡིས། །ཡུལ་སྐྱོང་གཉན་པོ་འཁོར་དང་བཅས་རྣམས་བསང་། །མཛེས་ལྡ༵ན་སྤྱན་གཟིགས་དཀོར་ཆས་མཁའ་དབྱིངས་ཁྱབ། །སྟོབས་ལྡ༵ན་རྐང་འགྲོའི་འབྱོར་པས་ས་གཞི་ཁེངས། །སྙན་ལྡ༵ན་བསྟོད་བསྔགས་དབྱངས་ཀྱིས་སྲིད་གསུམ་གཡོ། །བརྗིད་ལྡན༵་སྲིད་ཞིའི་དཔལ་འབྱོར་ཡོངས་ཀྱིས་བརྔན། །ཕུན་ཚོགས་གྲུབ་པའི་བཀྲ་ཤིས་རྫས་རྟགས་བརྒྱད། །རྒྱལ་པོ་ལ་འོས་རིན་ཆེན་རྣམ་བདུན་དང་། །བུམ་བཟང་གཏེར་དང་དཔག་བསམ་ནོར་བུའི་ཚལ། །བརྟན་གཡོའི་དངོས་པོ་ཀུན་གྱིས་མངའ་གསོལ་ལོ། །སྔོན་ལས་འཕྲལ་རྐྱེན་དུག་གསུམ་རྒྱུ་འབྲས་ཉེས། །ས་རྐོ་རྡོ་རློག་བྲག་བཤིག་ཤིང་གཉན་བཅད། །དཀར་དམར་ཐབ་གཞོབ་གྲིབ་ཀྱིས་ཕོག་པ་སོགས། །མི་ཤིས་རྒུད་པ་མ་ལུས་ཞི་གྱུར་ཅིག །ཧྲཱིཿདུས་གསུམ་རྒྱལ་བའི་སྤྱི་གཟུགས་པདྨ་འབྱུང་། །ཡེ་ཤེས་སྒྱུ་མའི་གར་མཁན་བཻ་རོ་རྗེ། །གྲུབ་པའི་དབང་ཕྱུག་རྫོགས་ཆེན་རབ་འབྱམས་པ། །ཟབ་གཏེར་མངའ་བདག་མཆོག་གྱུར་བདེ་ཆེན་གླིང་། །འཁོར་ལོའི་མགོན་པོ་རྡོ་རྗེ་གཟི་བརྗིད་སོགས། །སྔོན་བྱོན་རིག་འཛིན་བརྒྱུད་པར་བཅས་རྣམས་ཀྱིས། །བཀའ་རྟགས་ཐ་ཚིག་རྡོ་རྗེ་སྤྱི་བོར་བཅིངས། །དམ་རྫས་བདུད་རྩིའི་དྭངས་མ་ལྕེ་ལ་བཞག །གནས་གཏེར་ཆོས་སྡེ་གཉན་གྱི་སྲུང་མར་བསྐོས། །བདག་ནི་རིག་འཛིན་གྲུབ་ཐོབ་དེ་ཡི་བརྒྱུད། །ཁྱེད་ནི་དཀར་ཕྱོགས་ཡུལ་ལྷ་དམ་ཚིག་ཅན། །དེ་ཕྱིར་སྔོན་གྱི་དམ་བཅའ་དྲན་མཛོད་ལ། །དེ་རིང་བསང་ཁྲུས་ཆོ་ག་ཟབ་མོའི་མཐུས། །མི་མཐུན་ཐུགས་འགལ་ཉམས་ཆག་ཀུན་བྱང་ནས། །དགྱེས་པའི་ལྷ་ཞལ་གཞན་དུ་མ་ཕྱོགས་པར། །དམ་ལྡན་བཅོལ་པའི་ལས་ཀུན་སྒྲུབ་པར་མཛོད། །མཐའ་ཀླས་སྐྱེ་དགུའི་བདེ་སྐྱིད་པདྨོའི་ཚལ། །ཅིག་ཅར་འབྱེད་བྱེད་ཐུབ་བསྟན་ཉིན་མོར་བྱེད། །བཤད་སྒྲུབ་ཕྲིན་ལས་མཁའ་ལ་རྟག་འཆར་ཞིང་། །ཕན་བདེའི་སྣང་བས་ས་གསུམ་ཁྱབ་པར་མཛོད། །ཁྱད་པར་གྲུབ་པའི་སློབ་དཔོན་མཚོ་སྐྱེས་རྗེའི། །རིང་ལུགས་མ་རྨས་བསྟན༵་གཉིས༵་ཟུང་འཇུག་ཕུལ། །འཁོར་ལོ་གསུམ་གྱིས་ད༵ར་སྨིན་རྒྱས༵་པའི་གླི༵ང་། །ཆོས་སྲིད་མི་ཉམས་ཡར་ཟླ་ལྟར་འཕེལ་མཛོད། །བདེ༵་ཆེན༵་རྡོ་རྗེའི་གར་མཁན་པ༵ད་འབྱུང་དང་། །བི་མ༵་བཻ་རོའི་དགོངས་ཉམས་ཨ་ཏིའི་སྲོལ། །འོ༵ད་གསལ་ཐེག་མཆོག་སྙིང་པོའི་སྒོམ་སྒྲུབ་རྒྱུན། །མི་ནུབ་གླི༵ང་བཞིའི་ཁོངས་སུ་རྟག་ཁྱབ་མཛོད། །མི་འགྱུར༵་འཕོ་མེ༵ད་བདེ་ཆེན་གཉུག་མའི་གཤིས། །མངོན་གྱུར་དང་པོའི་སངས་རྒྱས་ཀུན༵་བཟ༵ང་དངོས། །བསྟན༵་པའི༵་ཉི༵་མ༵་མཚུངས་བྲལ་ཟེ་ཆེན་པའི། །ལེགས་མཛད་རྒྱ་མཚོའི་གོས་ཅན་གཞིར་ཁྱབ་མཛོད། །གཞན་ཡང་རིས་བྲལ་བསྟན་འཛིན་སྐྱེས་ཆེན་རྣམས། །ཞབས་པད་སྲིད་མཐའི་བར་དུ་རྟག་བརྟན་ཞིང་། །དགེ་འདུན་སྡེ་འཕེལ་སྤང་ཀློག་ཕྲིན་ལས་རྒྱས། །དོན་གཉིས་ནོར་བུའི་གཏེར་ཁ་འབྱེད་པར་མཛོད། །ལྟ་བ་ངན་ཞེན་ལོག་སྨོན་སྨིན་པའི་འབྲས། །བསྟན་ལ་འཚེ་བའི་མཐའ་དམག་དུས་འཁྲུགས་དང་། །མི་མཐུན་འབྱུང་པོ་གནོད་བྱེད་རྒྱལ་འགོང་རིགས། །མཐུ་སྟོབས་རྡོ་རྗེའི་མཁར་གྱིས་བསྲུང་བར་མཛོད། །ཆོས་བཞིན་སྐྱོང་བའི་མི་དབང་བློན་འཁོར་དང་། །བསྟན་ལ་གུས་པའི་འབྱོར་ལྡན་ཡོན་བདག་ཚོགས། །ཆབ་སྲིད་སྟོབས་འབྱོར་མི་ཉམས་ཡུན་དུ་གནས། །སྡེ་བཞིའི་དཔལ་མང་མངོན་དུ་འདུ་བར་མཛོད། །ཡངས་པའི་རྒྱལ་ཁམས་སྤྱི་དང་ལྗོངས་འདི་རུ། །ནད་མཚོན་མུ་གེ་འབྱུང་བཞིའི་གནོད་པ་ཞི། །ལོ་ལེགས་ཕྱུགས་འཕེལ་དགེ་བཅུའི་དཔལ་ཡོན་རྒྱས། །རྫོགས་ལྡན་དཔལ་འབྱོར་མགྲོན་དུ་འགུགས་པར་མཛོད། །ཁྱད་པར་ཡུལ་འདིའི་ཕུ་མདའ་ཉིན་སྲིབ་ཀྱི། །ཉམ་ཆུང་བྱ་བྱིལ་རི་དྭགས་ཆེ་ཕྲའི་རིགས། །མི་འཇིགས་སྲོག་གི་སྦྱིན་པ་ཁྱོད་ཀྱིས་བྱིན། །ཁྱད་གསོད་གློ་བུར་ལྷག་རྣམས་མིང་མཐར་མཛོད། །ཆོས་སྡེ་འདི་ཡི་གཙུག་ལག་སྡེ་དང་བཅས། །ཁྱོད་ལ་གཉེར་དུ་གཏད་དོ་མཐུ་རྩལ་བསྐྱེད། །ཞི་སོགས་ཕྲིན་ལས་རྣམ་བཞིའི་སྒོ་ཕྱེས་ལ། །སྲུང་སྐྱོབ་སྡོང་གྲོགས་གཡེལ་བ་མེད་པར་མཛོད། །མདོར་ན་རྣལ་འབྱོར་བདག་ཅག་འཁོར་བཅས་ཀྱིས། །ཇི་ལྟར་ཡིད་ལ་བསམ་དང་བཅོལ་པའི་ལས། །མ་ལུས་གེགས་མེད་ཡོངས་སུ་གྲུབ་པ་ཡི། །དགའ་སྟོན་རྒྱལ་མཚན་ནུབ་མེད་བསྒྲེང་བར་མཛོད། །སྲིད་ཞིའི་དགེ་མཚན་ཕྱྭ་གཡང་པདྨའི་བཅུད། །རྟེན་འབྲེལ་བུང་བ་གཞོན་ནུའི་ལེགས་བསྡུས་ནས། །དོན་གཉིས་འདོད་དགུའི་བུམ་བཟང་འགེངས་པ་ཡི། །བཀྲ་ཤིས་དཔལ་གྱིས་ཕྱོགས་དུས་ཀུན་ཁྱབ་ཤོག །ཅེས་བརྗོད་ཅིང་། རྗེས་ནོངས་བཤགས། གཤེགས་གསོལ། བསྔོ་སྨོན་ཤིས་བརྗོད་བཅས་སྤྱི་ལྟར་བགྱིས་པས་དོན་འགྲུབ་པ་ཡིན་ནོ། །སླར་སྨྲས་པ། སྲིད་པ་ཆགས་པའི་ལྷ་རབས་རྨ་ཆེན་གྱི། །རིགས་སྲས་དགེ་བསྙེན་ནོར་བུ་དབང་རྒྱལ་ཞེས། །གྲགས་པ་དོན་ལྡན་དཀར་ཕྱོགས་སྐྱོང་བའི་གཉན། །སྔོན་ནས་བརྟེན་ཅིང་མཆོད་པའི་ཟོ་དོར་རྨད། །གནས་མགྲོན་དམ་ཚིག་གཅིག་པའི་རྟེན་འབྱུང་གིས། །སྔར་བཅོལ་ལེགས་པར་སྒྲུབ་པའི་གཏང་རག་དང་། །ཕྱིས་བཅོལ་གཙུག་ལག་ཆོས་འཁོར་སྡེ་དང་བཅས། །ལེགས་པར་གཉེར་དུ་གཏད་ཕྱིར་ཚུལ་འདི་བགྱིས། །རྨད་བྱུང་ཡུལ་ལྷ་དགྱེས་བྱེད་ནོར་བུའི་སྤྲིན། །ཕུན་ཚོགས་འདོད་པ་འཇོ་བའི་དབྱར་རྔའི་སྒྲས། །ས་གསུམ་རྒུད་པའི་མཚན་མ་གཏན་བཅིལ་ནས། །རྫོགས་ལྡན་དབྱར་མཚོ་དར་བའི་བཀྲ་ཤིས་ཤོག །ཅེས་ཡུལ་སྐྱོང་ཆེན་པོ་མཉེས་པར་བྱེད་པའི་བསང་མཆོད་ཉུང་ངུ་འདིའང་གནས་དུས་ཀྱི་དབང་གིས་དགོས་པ་ཁྱད་པར་བ་མཐོང་ནས། རྒྱལ་དབང་པདྨའི་སྔགས་རིག་འཆང་བ་རྡོ་རྗེ་དབང་མཆོག་དགྱེས་རབ་རྩལ་གྱིས། རབ་བྱུང་ཚེས་ཀྱི་ནང་ཚན་ཁྲོ་མོ་ཤིང་འབྲུག་ལོའི་ནག་ཟླའི་འཕེལ་ཕྱོགས་ཀྱི་རྒྱལ་བ་དང་པོར་བྲིས་པ་བཀྲ་ཤིས་དཔལ་གྱི་སྣང་བས་ས་གསུམ་ཀུན་ཏུ་ཁྱབ་པའི་རྒྱུར་གྱུར་ཅིག་གུ། ཤུ་བྷམ་སྟུ་སརྦ་ཛ་ག་ཏཾ། ༈ ཀྱཻ། བཀྲ་ཤིས་དགེ་བའི་གནས་ཀྱི་མཆོག །ཕྱི་ལྟར་མདོ་ཁམས་སེང་ཆེན་བྲག །ནང་ལྟར་མཁའ་འགྲོ་འབུམ་གྱི་རྫོང་། །གསང་བ་པདྨ་འོད་ཀྱི་ཞིང་། །རྩ་གསུམ་འདུ་བའི་ལྡིང་ཁང་ནས། །བླ་མ་ཡི་དམ་མཁའ་འགྲོ་དང་། །ཆོས་སྲུང་གཞི་གནས་གཏེར་གྱི་བདག །འཁོར་བཅས་འདིར་གཤེགས་བསང་མཆོད་བཞེས། །ཟག་མེད་ཀུན་བཟང་རོལ་པའི་སྤྲིན། །བདེ་སྟོང་དགའ་བཞིའི་ཉམས་མྱོང་རྫས། །འོད་གསལ་བསམ་མི་ཁྱབ་པའི་དཔལ། །གུས་པས་འབུལ་ལོ་བཞེས་སུ་གསོལ། །བདེ་ཆེན་གཅིག་གི་རང་མདངས་ལས། །ཞི་ཆགས་ཁྲོ་བོའི་རྣམ་འགྱུར་གྱིས། །གང་འདུལ་རེ་བ་སྐོང་མཛད་པའི། །དག་པ་རབ་འབྱམས་འཁོར་ལོར་བསྟོད། །ཀྱཻ། དྲི་བཟང་ཤིང་རྩི་སྨན་སྤོས་རིགས། །འབར་བྱེད་མེ་དང་སྦྱར་བ་ཡི། །དུད་པ་ཕུན་ཚོགས་འདོད་ཡོན་སྤྲིན། །མགྲོན་རིགས་ཐུགས་ལ་གང་བཞེད་ཆར། །ཟག་མེད་ཡེ་ཤེས་རོལ་མོ་འདིས། །རབ་འབྱམས་རྩ་གསུམ་ཆོས་སྲུང་དང་། །ནོར་ལྷ་གཏེར་བདག་འཁོར་བཅས་བསང་། །མི་གཙང་ཉམས་གྲིབ་འཁོན་འགྲས་བསང་། །ལྷ་ཞལ་ཟླ་ལྟར་རབ་དཀར་ཞིང་། །དགྱེས་རབ་ཕུལ་དུ་བྱུང་ནས་ཀྱང་། །བདག་ཅག་དཔོན་སློབ་འཁོར་བཅས་ལ། །གནས་མགྲོན་དམ་ཚིག་ཉེར་དགོངས་ཏེ། །སྲུང་སྐྱོབ་རྣམ་བཞིའི་ལས་ཀུན་སྒྲུབས། །རྒྱལ་བསྟན་དར་ཞིང་རྒྱས་པ་དང་། །དེར་འཛིན་ཞབས་བརྟན་བཤད་སྒྲུབ་དར། །བོད་ཡུལ་མཐའ་དབུས་བདེ་ཞིང་སྐྱིད། །རྫོགས་ལྡན་དུས་སྟོན་གསར་འཆར་མཛོད། །ཁྱད་པར་བདག་ཅག་སྒྲུབ་པ་པོའི། །མི་མཐུན་འགལ་རྐྱེན་འཚེ་བ་ནི། །མཐུན་རྐྱེན་བསམ་ཀུན་ཡིད་བཞིན་འགྲུབ། །བཀྲ་ཤིས་བདེ་ལེགས་འཕེལ་རྒྱས་མཛོད། །ཅེས་པའང་བི་ཛ་ཡས་སོ། །
༄༅། །ཀྱཻ། རབ་འབྱམས་ཕྱོགས་བཅུའི་ཞིང་ན་བཞུགས་པ་ཡི། །བླ་མ་ཡི་དམ་ཌཱ་ཀི་ཆོས་སྲུང་དང་། །སངས་རྒྱས་བྱང་སེམས་བསྟན་འཛིན་འཕགས་པའི་ཚོགས། །ཡུལ་ལྷ་གཞི་བདག་གནས་གཏེར་ཆོས་འཁོར་སྐྱོང་། །ལོ་ཟླ་ཞག་དུས་སྤར་སྨེ་ཚེས་ཀྱི་ལྷ། །སྣང་སྲིད་མཆོད་སྦྱིན་མགྲོན་གྱུར་མ་ལུས་ལ། །བདུད་རྩི་བསང་དང་གསེར་སྐྱེམས་འདི་འབུལ་བས། །བདག་ཅག་དཔོན་སློབ་ཕྱོགས་མཚམས་གར་འགྲོ་ཡང་། །འཇིགས་པ་བརྒྱད་སོགས་མི་མཐུན་རྒུད་པ་སོལ། །མཐུན་རྐྱེན་ཚེ་དཔལ་ལེགས་དགུའི་འབྱོར་པ་རྒྱས། །མི་དང་མི་མིན་སྐྱེ་འགྲོ་དབང་དུ་བསྡུས། །ཕས་རྒོལ་དགྲ་ཇག་ཆོམ་རྐུན་འཇིགས་པ་བཟློག །གཞི་བྱེས་ཀུན་ཏུ་སྲུང་སྐྱོབ་སྡོང་གྲོགས་གྱིས། །འདོད་དོན་བཅོལ་པའི་ལས་ཀུན་འགྲུབ་པར་མཛོད། །རྒྱལ་བསྟན་སྤྱི་དང་ཁྱད་པར་སྔ་འགྱུར་གྱི། །བསྟན་པ་དར་རྒྱས་བསྟན་འཛིན་ཞབས་པད་བརྟན། །བོད་ཁམས་བདེ་སྐྱིད་དགེ་བཅུའི་དཔལ་ཡོན་འདུ། །རྫོགས་ལྡན་འབྱོར་ཚོགས་རྒྱས་པའི་བཀྲ་ཤིས་ཤོག །ཅེས་པའང་འགྲུབ་པའི་གཟའ་སྐར་དུས་ཚེས་༢༧དགེ་བར་དགོས་པ་མཆོག་ལྡན་དུ་མཐོང་ནས་བི་ཛ་ཡས་བྲིས་པ་མདྒལཾ།