རྩ་གསུམ་གསོལ་བསྡུས་གྲུབ་གཉིས་འདོད་འཇོ།
༄༅། །རྩ་གསུམ་གསོལ་བསྡུས་གྲུབ་གཉིས་འདོད་འཇོ་བཞུགས། མཆོད་གཏོར་སོགས་འབྲུ་གསུམ་དང་ནམ་མཁའ་མཛོད་ཀྱི་སྔགས་རྒྱས་བརླབས་ལ། ཧཱུྃ། ཆོས་དབྱིངས་སྐྱེ་བ་མེད་པའི་མཁའ་ཀློང་ནས། །མ་འགགས་ཐབས་མཆོག་སྒྱུ་མར་རོལ་པའི་གར། །དྲན་པ་ཙམ་གྱིས་ཕན་བདེའི་རེ་སྐོང་བའི། །སྐྱབས་གནས་དཀོན་མཆོག་སྤྱི་དང་ཁྱད་པར་དུ། །སྔ་འགྱུར་བཀའ་གཏེར་བཀའ་གདམས་ལམ་འབྲས་དང་། །མར་ཤངས་བཀའ་བརྒྱུད་ཞི་གཅོད་སྦྱོར་བ་དྲུག །ཨོ་རྒྱན་བསྙེན་སྒྲུབ་རྩ་གསུམ་ཆོས་སྲུང་སོགས། །མཆོད་ཅིང་བསྟོད་པའི་མགྲོན་དུ་འོས་པ་རྣམས། །འདིར་གཤེགས་རང་མཐུན་གདན་ལ་དགྱེས་པར་བཞུགས། །ཆོས་ཀུན་ཀ་དག་བྱང་ཆུབ་སེམས་ཀྱི་རྩལ། །རོལ་པ་འགག་མེད་རྩ་གསུམ་དཀྱིལ་འཁོར་སྤྲིན། །ཇི་ལྟར་ཤར་ཡང་ཆོས་ཉིད་གཉུག་མའི་བབས། །བསལ་བཞག་སྤང་བླང་བྲལ་བའི་ཕྱག་གིས་འདུད། །ཚོགས་དྲུག་རང་གྲོལ་ཕྱི་མཆོད་འདོད་ཡོན་རྫས། །དུག་ལྔ་གནས་དག་ནང་གི་མཆོད་པའི་སྤྲིན། །བདེ་སྟོང་དགའ་བཞིས་ཉམས་རྩལ་གསང་མཆོད་ཕུལ། །ཆོས་ཉིད་འོད་གསལ་གཉུག་མའི་ཀློང་དུ་འབུལ། །བདེ་ཆེན་འདུ་འབྲལ་མེད་པའི་རང་རྩལ་ལས། །ཞི་ཆགས་ཁྲོ་བོའི་རྣམ་འགྱུར་མ་འགགས་པ། །གང་འདུལ་མོས་ངོར་གཙོ་དང་འཁོར་གྱི་ཚུལ། །དག་པ་རབ་འབྱམས་འཁོར་ལོར་འཆར་ལ་བསྟོད། །ཅིར་སྣང་རྒྱན་དུ་ཤར་བའི་ཨ་མྲྀ་ཏ། །སྲིད་རྩ་ཉོན་མོངས་བསྒྲལ་བའི་དམར་ཆེན་བཅུད། །གཟུང་འཛིན་འཁྲུལ་རྟོག་དབྱིངས་དག་བ་ལིངྟ། །ཟག་མེད་མཆོད་བསྐང་ནམ་མཁའ་མཛོད་ཀྱི་སྒོ། །དགྱེས་དགུར་འཆར་བའི་ཏིང་འཛིན་རོལ་མོ་འདིས། །རང་ཤར་རྩ་གསུམ་དཀྱིལ་འཁོར་ལྷ་ཚོགས་བསྐང་། །དེ་ལྟར་ཐུགས་དམ་གཉན་པོ་བསྐང་བའི་མཐུས། །ཉམས་ཆག་འགལ་འཁྲུལ་ནོངས་པ་སོར་ཆུད་ནས། །མི་འབྲལ་དམ་ཚིག་གཉན་པོ་རྗེས་དགོངས་ལ། །བདག་ལ་མཆོག་ཐུན་འདོད་དགུའི་དངོས་གྲུབ་སྩོལ། །རྒྱལ་བསྟན་སྤྱི་དང་ངེས་གསང་སྒྲུབ་བརྒྱུད་བརྒྱད། །ལོག་རྟོག་རྐྱེན་གྱིས་ནམ་ཡང་མི་སྒྲིབ་པར། །བཤད་སྒྲུབ་ཕྲིན་ལས་ནམ་མཁའི་མཐའ་དང་མཉམ། །དོན་གཉིས་ཕན་བདེའི་དགའ་སྟོན་རྒྱས་པར་མཛོད། །མཁས་གྲུབ་སྐྱེས་ཆེན་ཕྲེང་བས་ཕྱོགས་ཀུན་ཁྱབ། །རིགས་བཟང་བླ ོ་གསལ་དམ་ལྡན་འདུ་ཚོགས་རྒྱས། །ཀུན་ཀྱང་ལྟ་སྤྱོད་ཏིང་འཛིན་དོན་མཐུན་པས། །འཁོར་ལོ་གསུམ་གྱི་ཕྲིན་ལས་རྒྱས་པར་མཛོད། །ཆོས་ལྡན་རྒྱལ་པོ་སྡེ་བཞིའི་མངའ་ཐང་དར། །ནད་མུག་འཁྲུགས་སོགས་དུས་ཀྱི་རྒུད་ཀུན་ཞི། །སྐྱེ་དགུ་ལས་འབྲས་ཡིད་ཆེས་བསྟན་ལ་གུས། །བདེ་སྐྱིད་རྫོགས་ལྡན་གསར་པའི་སྒོ་འཕར་ཕྱེས། །ཁྱད་པར་རྣལ་འབྱོར་བདག་ཅག་འཁོར་བཅས་ཀྱི། །ཞི་རྒྱས་དབང་དང་མངོན་སྤྱོད་ལས་ལ་སོགས། །གང་རྩོམ་ཐོགས་མེད་འགྲུབ་པའི་དགེ་མཚན་གྱིས། །ཕྱོགས་ལས་རྣམ་རྒྱལ་གྲགས་པའི་རུ་མཚོན་སྒྲེང་། །མདོར་ན་འདི་ནས་བྱང་ཆུབ་སྙིང་པོའི་བར། །སྲུང་སྐྱོབ་ཕྲིན་ལས་ཟབ་མོའི་རོལ་རྩེད་ཀྱིས། །དམ་ཆོས་སྒྲུབ་པའི་འགལ་རྐྱེན་ཀུན་ཞི་ཞིང་། །ཆོས་མཐུན་བསམ་པའི་དོན་ཀུན་འགྲུབ་པར་མཛོད། །ཅེས་མཆོད་གཏོར་ཡོད་ན་གཙང་སར་འབུལ་བ་སོགས་རྗེས་སྤྱི་ལྟར་བྱའོ། །ཞེས་པའང་སྔགས་བཙུན་རྡོ་རྗེ་དབང་མཆོག་དགྱེས་རབ་རྩལ་གྱིས་བྲིས་ཤིང་ཕྲིན་ལས་སུ་གསོལ་བ་ཛ་ཡན་ཏུ།