རྒྱུན་གྱི་གསུར་མཆོད་འདོད་ཡོན་སྤྲིན་ཕུང་།
༄༅། །རྒྱུན་གྱི་གསུར་མཆོད་འདོད་ཡོན་སྤྲིན་ཕུང་བཞུགས། ཕྱེ་མར་འབྲུ་སྨན་དང་མྱོང་གྲོལ་རིགས་མེ་ལ་བསྲེག་ཅིང་ཆབ་ཀྱིས་བྲན་ལ། འབྲུ་གསུམ་དང་ནམ་མཁའ་མཛོད་རྒྱས་བྱིན་གྱིས་བརླབས་ལ། སྟོང་ཉིད་སྙིང་རྗེ་ཟུང་འབྲེལ་རིག་པའི་གཤིས། །འཇིག་རྟེན་དབང་ཕྱུག་འཕགས་པའི་སྐུར་གསལ་བའི། །ཕྱག་ནས་བབས་པའི་གསུར་མཆོད་བདུད་རྩིའི་ཆར། །འདོད་ཡོན་ཟག་མེད་ནམ་མཁའ་མཛོད་ཆེན་པོས། །བླ་མ་ཡི་དམ་དཔའ་བོ་ཌཱ་ཀི་སོགས། །དཀོན་མཆོག་སྲི་ཞུས་མགྲོན་གྱུར་མ་ལུས་ལ། །གུས་པས་མཆོད་དོ་བདག་དང་སེམས་ཅན་རྣམས། །ཚོགས་གཉིས་དཔལ་གྱིས་རྟག་ཏུ་འཚོ་བར་ཤོག །གཙང་རིས་དཔལ་མགོན་དམ་ཅན་ཆོས་སྐྱོངས་སོགས། །མགོན་པོ་ཡོན་ཏན་མགྲོན་གྱུར་མ་ལུས་ལ། །འབུལ་ལོ་བྱང་ཆུབ་སྒྲུབ་པའི་བར་ཆད་ཞི། །མཐུན་རྐྱེན་བསམ་པ་ཡིད་བཞིན་འགྲུབ་པར་ཤོག །ཐོག་མེད་དུས་ནས་དྲིན་གྱིས་ལེགས་སྐྱོང་བའི། །མཁའ་ཁྱབ་ཕ་མ་སྙིང་རྗེའི་མགྲོན་རྣམས་ལ། །སྦྱིན་ནོ་འཁྲུལ་སྣང་སྡུག་བསྔལ་ཀུན་ཞི་ནས། །གནས་སྐབས་མཐར་ཐུག་ཕན་བདེས་འཚོ་བར་ཤོག །སྲོག་ལུས་ལན་ཆགས་ཤ་འཁོན་གཉེར་བ་ཡི། །བགེགས་རིགས་ལན་ཆགས་མགྲོན་གྱུར་མ་ལུས་ལ། །བསྔོའོ་བྱམས་དང་སྙིང་རྗེས་རྒྱུད་གྲོལ་ནས། །གནོད་སེམས་གདུག་རྩུབ་མ་ལུས་ཞི་གྱུར་ཅིག །ཁྱད་པར་བར་དོའི་འགྲོ་བ་མགོན་མེད་པ། །སྣ་ཚོགས་ལས་ཀྱི་རྣམ་པར་འཁྱམས་རྣམས་ལ། །བསྔོའོ་འཇིགས་སྐྲག་འཁྲུལ་སྣང་ཀུན་ཞི་ནས། །རང་སྣང་དག་པའི་འོད་གསལ་འཆར་གྱུར་ཅིག །ཤ་ཁྲག་ཟས་ལ་རྔམས་པའི་འབྱུང་པོའི་རིགས། །ནད་གཏོང་བར་ཆད་རྩོམ་པའི་ཚོགས་རྣམས་ལ། །བསྔོའོ་ཚིམ་ཞིང་གནོད་པའི་སེམས་དང་བྲལ། །རང་གཞན་དུས་མིན་འཆི་ལས་རྒྱལ་གྱུར་ཅིག །བརྐམ་ཆགས་གདུང་བས་ཤིན་ཏུ་ཉམ་ཐག་བའི། །འཇུར་འགེག་ཡི་དྭགས་བཀྲེན་པའི་ཚོགས་རྣམས་ལ། །བསྔོའོ་སེར་སྣའི་སྒྲིབ་པ་ཀུན་བྱང་ནས། །སྦྱིན་པའི་ཕར་ཕྱིན་ཡོངས་སུ་རྫོགས་པར་ཤོག །ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །རྒྱུ་ལ་འགོག་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུངས། །སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་བྱེད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །ཐམས་ཅད་ནམ་མཁའ་མཛོད་བཞིན་དུ། །ལོངས་སྤྱོད་ཆད་པ་མེད་པ་དང་། །རྩོད་པ་མེད་ཅིང་འཚེ་མེད་པར། །རང་དབང་དུ་ནི་སྤྱོད་པར་ཤོག །སྦྱིན་པ་རྒྱ་ཆེན་སོགས། ཇི་ལྟར་རིགས་པའི་བསྔོ་སྨོན་གྱིས་མཐར་བརྒྱན་པར་བྱའོ། །ཅེས་པའང་བཟང་ལུང་པདྨ་ལྷ་རྩེར་གཞན་ཕན་ཆོས་ཀྱི་བློ་གྲོས་ཀྱིས་བྲིས་པ་དགེ །