ཐུབ་དབང་སྲས་དང་བཅས་པའི་སྤྱན་སྔར་བདེན་ཚིག་སྨོན་ལམ་དུ་གསོལ་བ་ཕན་བདེའི་ས་བོན།
༄༅། །ཐུབ་དབང་སྲས་དང་བཅས་པའི་སྤྱན་སྔར་བདེན་ཚིག་སྨོན་ལམ་དུ་གསོལ་བ་ཕན་བདེའི་ས་བོན་ཞེས་བྱ་བ་བཞུགས། ན་མོ་གུ་རུ་བུདྡྷ་བོ་ངྷི་ས་ཏྭཱ་ཡ། སྙིང་རྗེའི་སྤྱན་གྱིས་རྟག་པར་འགྲོ་ལ་གཟིགས། །བྱམས་པའི་གོ་ཆས་བདུད་རིས་འཚེ་བ་སྐྱོབ། །འགྲོ་བའི་བླ་མ་ཐུབ་དབང་སྲས་དང་བཅས། །དེང་འདིར་བདེན་ཚིག་འགྲུབ་པའི་དཔང་པོ་མཛོད། །མགོན་ཁྱོད་སློབ་པ་ལམ་དུ་ཞུགས་པའི་སྐབས། །སྲོག་ཆགས་གྲོག་སྦུར་ཙམ་ལའང་གནོད་མ་བསྐྱལ། །ལན་གྲངས་དུ་མར་ཉིད་ཀྱི་སྐུ་སྲོག་གིས། །འགྲོ་མང་སྲོག་གི་ཉེན་ལས་སྐྱབས་ལགས་ན། །བདེན་པ་དེ་ཡིས་བསྐལ་ངན་དུས་ཀྱི་ཁུག །མི་བསྲུན་མཐའ་དམག་དུས་འཁྲུགས་དཔུང་ལ་སོགས། །མཚོན་གྱི་ཆད་པས་ཡིད་མི་བདེ་གྱུར་པ། །གངས་ལྗོངས་མཐའ་དབུས་ཀུན་ཏུ་ཞི་གྱུར་ཅིག །བཀྲེན་ལ་རྟ་གླང་དེ་བཞིན་རྒྱལ་སྲིད་གཉེན། །དབུ་དང་ཡན་ལག་སྦྱིན་པས་ཚིམ་མཛད་ན། །བདེན་པ་དེ་ཡིས་བསྐལ་ངན་དུས་འཁྲུགས་རྐྱེན། །ཉམ་ཐག་མུ་གེའི་འཇིགས་པ་མི་འབྱུང་ཤོག །འགྲོ་ལ་བརྡེག་སྤངས་ནད་ཀྱིས་ཉེན་པ་ལ། །སྨན་དང་ནད་གཡོག་སྲོག་གི་སྦྱིན་སྩལ་ན། །བདེན་པ་དེ་ཡིས་མཐའ་དམག་དུས་འཁྲུགས་རྐྱེན། །ཉམ་ཐག་ནད་ཀྱི་འཇིགས་པ་མི་འབྱུང་ཤོག །དམ་ཆོས་ཚིག་བཞི་རེའི་ཕྱིར་རྒྱལ་སྲིད་ལུས། །ཡོངས་གཏོང་འཚོལ་དང་སྲུང་ལ་བརྩོན་གྱུར་ན། །བདེན་པ་དེ་ཡིས་མཐའ་དམག་དུས་འཁྲུགས་རྐྱེན། །རྒྱལ་བསྟན་རིན་ཆེན་ཉམས་པར་མ་གྱུར་ཅིག །གྲངས་མེད་གསུམ་དུ་ཚོགས་གཉིས་གོམས་པའི་མཐུས། །བྱང་ཆུབ་ཤིང་དྲུང་བདུད་བཅོམ་སངས་རྒྱས་ན། །བདེན་པ་དེ་ཡིས་མཐའ་དམག་དུས་འཁྲུགས་སོགས། །མི་བསྲུན་བདུད་ཀྱི་སྟོབས་རྣམས་ཉམས་གྱུར་ཅིག །རིགས་ཅན་གསུམ་གྱི་འགྲོ་ལ་ཁམས་དབང་བཞིན། །ཟབ་རྒྱས་བདུད་རྩིའི་སྒོ་འཕར་ཕྱེས་ལགས་ན། །བདེན་པ་དེ་ཡིས་མཐའ་དམག་དུས་འཁྲུགས་རྐྱེན། །འགྲོ་རྣམས་བསམ་སྤྱོད་ལོག་པར་མ་གྱུར་ཅིག །མི་དང་མི་མིན་འཕགས་པའི་ཚོགས་རྣམས་ལ། །བསྟན་པའི་གཉེར་ཁ་གཏད་ཅིང་སྐྱོང་ལགས་ན། །བདེན་པ་དེ་ཡིས་མཐའ་དམག་དུས་འཁྲུགས་རྐྱེན། །དགེ་འདུན་བཀུར་སྟི་ཉམས་པར་མ་གྱུར་ཅིག །མདོར་ན་དོན་གཉིས་མཐར་ཕྱིན་སངས་རྒྱས་ནས། །འགྲོ་ལ་ཕན་བདེའི་ལམ་བཟང་སྟོན་མཛད་ན། །བདེན་པ་དེ་ཡིས་མཐའ་དམག་དུས་འཁྲུགས་ཞི། །རྫོགས་ལྡན་དུས་བཞིན་སྣོད་བཅུད་འབྱོར་གྱུར་ཅིག །སྲིད་མཐའི་བར་དུ་ཐུབ་བསྟན་ནོར་བུའི་སྒྲོམ། །འགྲོ་བསོད་རྒྱལ་མཚན་རྩེ་ནས་གཡོ་མིན་པར། །གནས་སྐབས་མཐར་ཐུག་ཕན་བདེའི་ཆར་རྒྱུན་གྱིས། །ཐར་གྲོལ་ཡོན་ཏན་འབྱོར་དགུས་ཕྱུག་གྱུར་ཅིག །དེ་ལྟར་གཡོ་ཟོལ་མེད་པའི་ལྷག་བསམ་གྱིས། །བདེན་ཚིག་སྨོན་ལམ་གསོལ་བའི་འབྲས་བཟང་ཕུལ། །དུས་ལས་ཡོལ་མིན་རྟེན་འབྱུང་ཟབ་མོའི་ཚུལ། །གེགས་མེད་མངོན་སུམ་སྣང་བར་མཛད་དུ་གསོལ། །ཞེས་པའང་རྒྱལ་སྲས་གཞན་ཕན་ཆོས་ཀྱི་བློ་གྲོས་སྨོན་ལམ་ཡོངས་སུ་འགྲུབ་པའི་སྡེས་ལྷག་བསམ་རྩེ་གཅིག་པས་གསོལ་ཞིང་སྨོན་པ་དེ་དེ་བཞིན་དུ་འགྲུབ་པར་མཛད་དུ་གསོལ།