འཛམ་གླིང་གེ་སར་རྒྱལ་པོའི་གསོལ་མཆོད་འདོད་འབྱུང་ནོར་བུའི་དགའ་ཚལ།
༄༅། །འཛམ་གླིང་གེ་སར་རྒྱལ་པོའི་གསོལ་མཆོད་འདོད་འབྱུང་ནོར་བུའི་དགའ་ཚལ་ནི། མཆོད་གཏོར་གསེར་སྐྱེམས་ཇ་ཆང་འོ་ཕུད་སོགས་གཙང་མར་སྦྱར་བ་འབྲུ་གསུམ་གྱི་བསྔགས་རྒྱས་བྱིན་གྱིས་བརླབས་ལ་འདི་སྐད་དོ། །ཧཱུྃ། སྣང་སྲིད་དབང་སྡུད་པདྨ་ཐོད་ཕྲེང་གི། །བཀའ་ཉན་བསྟན་སྐྱོང་འཛམ་གླིང་དགྲ་ལྷའི་རྒྱལ། །གེ་སར་རྡོ་རྗེ་དགྲ་འདུལ་འཁོར་དང་བཅས། །འདིར་གཤེགས་རང་མཐུན་གདན་ལ་དགྱེས་པར་བཞུགས། །རྣམ་བཀྲའི་མེ་ཏོག་དྲི་ཞིམ་བདུག་པའི་སྤྲིན། །གཟི་ལྡན་སྒྲོན་མེ་དྲི་ཡིས་བྱུག་པའི་མཚོ། །རོ་བདའི་ཞལ་ཟས་སྙན་འཇེབས་རོལ་མོ་སོགས། །ངོ་མཚར་མཆོད་པའི་སྤྲིན་ཕུང་རྒྱ་མཚོས་མཆོད། །རིན་ཆེན་ཁང་བཟང་གཏེར་དང་ནོར་བུའི་ཚལ། །བཀྲ་ཤིས་རྫས་རྟགས་རྒྱལ་སྲིད་རིན་ཆེན་བདུན། །གོ་མཚོན་དཀོར་ནོར་སྤྱན་གཟིགས་འཁོ་དགུའི་རྫས། །མི་འཛད་ནམ་མཁའ་མཛོད་ཀྱི་འཁོར་ལོས་མཆོད། །རྩ་བརྒྱད་སྟོང་སྦྱར་བདུད་རྩི་མཚོ་ལྟར་བསྐྱིལ། །དམར་ཆེན་རཀྟའི་རྦ་ཀློང་མཁའ་ལ་འཕྱོ། །བརྗིད་ལྡན་དམ་རྫས་གཏོར་ཚོགས་རི་ལྟར་སྤུངས། །བསྟན་སྲུང་དགྲ་ལྷའི་དབང་པོ་འཁོར་བཅས་མཆོད། །མདོར་ན་སྲིད་པའི་ལོངས་སྤྱོད་དཀོན་ནོར་རྫས། །མ་ཚང་མེད་པའི་འདོད་ཡོན་སྤྲིན་ཆེན་པོར། །ཏིང་འཛིན་སྔགས་དང་ཕྱག་རྒྱས་བྱིན་རླབས་ཏེ། །གེ་སར་སྐྱེས་བུ་འཁོར་བཅས་དགྱེས་ཕྱིར་འབུལ། །ཀྱཻ། གདོད་ནས་འོད་གསལ་རང་གྲོལ་གཉུག་མའི་གཤིས། །རྟོགས་ན་ཀུན་བཟང་ཧེ་རུ་ཀ་དཔལ་མཆོག །མ་རྟོག་སྣང་ངོར་ཆེ་བཙན་དྲེགས་པའི་རྗེ། །གེ་སར་སྐྱེས་བུ་འཁོར་དང་བཅས་ལ་བསྟོད། །མཛེས་མཛེས་མཚར་སྡུག་ཉམས་བརྒྱས་སྒེག་པའི་སྐུ། །བརྗིད་བརྗིད་ལྷ་ཡི་དར་གོས་གོ་མཚོན་སྤྲས། །མྱུར་མྱུར་མགྱོགས་འགྲོའི་སྟེང་ན་རླུང་ལྟར་བསྐྱོད། །རྔམ་རྔམ་དགྲ་ལྷའི་རྒྱལ་པོ་འཁོར་བཅས་བསྟོད། །མཐུ་སྟོབས་ཉིན་མོར་བྱེད་པའི་གཟི་བྱིན་གྱིས། །བསྟན་འགྲོའི་དགེ་ལེགས་པདྨོ་རབ་བཞད་ཅིང་། །ནག་ཕྱོགས་འབྱུང་བྱའི་མིག་དབང་ཟུམ་བྱེད་པའི། །བསྟན་སྲུང་དགྲ་ལྷའི་དབང་པོ་འཁོར་བཅས་བསྟོད། །མཆོད་བསྟོད་རྦད་བསྐུལ་དབྱར་རྔའི་སྒྲས་འབོད་ཚེ། །རྣམ་བཞིའི་ཕྲིན་ལས་ཆར་རྒྱུན་འབུམ་འཇོ་བས། །སྒྲུབ་མཆོག་རེ་འདོད་རྫིང་བུ་འགེངས་མཛད་པའི། །མ་སངས་དགྲ་ལྷའི་རྒྱལ་པོ་འཁོར་བཅས་བསྟོད། །མགྲོན་ཡག་དར་མ་དགྲ་ལྷ་ཝེར་མའི་ཚོགས། །དཔའ་བརྟུལ་ཕུ་ནུ་མོ་སྨན་སྨན་བཙུན་རིགས། །རུས་ཆེན་སྡེ་ལྔའི་མི་ཡི་མཆོག་ལ་སོགས། །འཛམ་གླིང་སྐྱེས་བུ་འཁོར་དང་བཅས་ལ་བསྟོད། །སྔོན་ཚེ་ཁྲི་སྲོང་ལྡེ་བཙན་སྐུ་ལྷ་ཆེ། །ད་ལྟ་རྒྱ་བོད་གཉིས་ཀྱི་གནས་གཏེར་སྐྱོང་། །འཛམ་བུ་གླིང་གི་སྐྱེས་གཅིག་སེང་ཆེན་རྗེ། དེང་འདིར་རྣལ་འབྱོར་བདག་གི་བསྐུལ་སྒྲུབ་ན། །རབ་དཀར་ཀེ་{ཀཻ}ལ་ཤ་ཡི་ས་འཛིན་སྤོར། །རབ་གསལ་ཟླ་གཞོན་འབུམ་གྱིས་འཁྱུད་པ་ལྟའི། །རབ་མཛེས་དགྱེས་པའི་ཞལ་རས་མྱུར་སྟོན་ལ། །རབ་བཅོལ་རྣམ་བཞིའི་ལས་ཀུན་ཡོངས་འགྲུབ་མཛོད། །རྒྱུད་ལུང་མན་ངག་ཟབ་མོའི་ཏོག་འབར་ཞིང་། །དཔག་ཡས་བཤད་སྒྲུབ་ཕྲིན་ལས་དར་ཤམ་བརྗིད། །སྲིད་ལས་རྣམས་རྒྱལ་ཞི་བའི་དགེ་མཚན་ཅན། །ཐུབ་བསྟན་རྒྱལ་མཚན་ཡུན་དུ་བརྟན་པར་མཛོད། །ཐེག་མཆོག་གངས་རིའི་སྤོ་ལ་གནས་བཅས་ནས། །ལྟ་དགོངས་རྩལ་རྫོགས་རྟོགས་པའི་ང་རོ་ཡིས། །ལྟ་དམན་ཝ་སྔངས་གདུལ་ཡུལ་རི་དྭགས་སྐྱོངས། །བསྟན་འཛིན་གདོང་ལྔའི་དབང་པོའི་མཛད་ཕྲིན་སྤེལ། །བསླབ་གསུམ་འདབ་མའི་ཁྱོན་ཡངས་ཀེ་ས་རར། །ཐོས་བསམ་སྒོམ་པའི་སྦྲང་རྩིས་རྟག་ཕྱུག་པས། །བསྐལ་བཟང་རྐང་དྲུག་ཚོགས་ཀྱི་ངལ་འཚོའི་གཉེན། །དགེ་འདུན་པད་ཚལ་གང་ན་འདུག་ཀྱང་སྐྱོངས། །དམ་ཚིག་རྣམ་པར་དག་པའི་ཞིང་ས་ལ། །དབང་བཞིའི་བདུད་རྩིས་བརླན་པའི་དགེ་མཚན་གྱིས། །རིམ་གཉིས་གསེར་གྱི་སྙེ་མ་གཡུར་སྨིན་པའི། །སྔགས་སྤྱོད་སྐྱེས་བུའི་ཕྲིན་ལས་གཡེལ་མེད་སྒྲུབས། །རབ་དཀར་བསོད་ནམས་སྟོབས་ཀྱི་ཕྲག་པ་ཡིས། །ཐུབ་བསྟན་ས་ཆེན་འདེགས་ལ་མི་ངལ་བའི། །ཆོས་སྐྱོང་རྒྱལ་པོ་ཁྱབ་འཇུག་གཟུགས་ཅན་རྣམས། །ཆབ་སྲིད་ཡར་ཟླའི་དཔལ་ལྟར་རྒྱས་པར་མཛོད། །དྲང་པོའི་མཁར་གནས་རྣམ་དཔྱོད་བསིལ་ཟེར་གྱིས། །གངས་ལྗོངས་རྒུད་པའི་ཚད་གདུང་ཀུན་བཅིལ་ནས། །ཕན་བདེའི་ཀུ་མུཏ་བཞད་པའི་དཔལ་ཡོན་ཅན། །ཡ་རབས་མཛངས་བློན་དྲ་མའི་བློ་རྩལ་བསྐྱེད། །དགེ་བཅུའི་བཀའ་ཁྲིམས་བཙན་པོའི་སྐྱ་རེངས་ཀྱིས། །མགྲོན་དུ་ཁུག་པའི་རྫོགས་ལྡན་ཉིན་བྱེད་གཟིས། །རྩོད་དུས་རྒུད་པའི་གྲང་རེག་ཀུན་བཅིལ་ནས། །བདེ་སྐྱིད་ཕན་བདེའི་པད་ཚལ་རྒྱས་པར་མཛོད། །ལྟ་བ་ངན་ཞེན་ཆང་གིས་རབ་མྱོས་པས། །སྡང་བའི་མཚོན་འཁོར་བསྐྱོད་ལ་ཆེས་བརྩོན་པའི། །བཟློག་དཀའ་ལྷ་མིན་ཀླ་ཀློ་གླང་པོའི་དཔུང་། །མཐུ་སྟོབས་གདོང་ལྔའི་སྡེར་མོས་མིང་མཐར་བྱོས། །གཞན་ཡང་བོད་ཁམས་མཐའ་དབུས་ཐམས་ཅད་དུ། །ནད་མུག་མཚོན་འཁྲུགས་འབྱུང་བཞིའི་འཇིགས་པ་སོགས། །མི་མཐུན་ཀུན་ཞི་ལོ་ལེགས་འབྲུ་འཕེལ་ཞིང་། །དགེ་ལེགས་ཕན་བདེའི་དགའ་སྟོན་རྒྱས་པར་མཛོད། །ཁྱད་པར་རྣལ་འབྱོར་བདག་ཅག་འཁོར་བཅས་ལ། །ལུས་དང་གྲིབ་མ་བཞིན་དུ་མི་འབྲལ་འགྲོགས། །སྲོག་ལུས་དབང་ཐང་རླུང་རྟ་གྱེན་ལ་བསྐྱེད། །ཉིན་མཚན་ཀུན་ཏུ་སྲུང་སྐྱོབ་སྡོང་གྲོགས་མཛོད། །འཇིགས་པ་བརྒྱད་སོགས་འགལ་རྐྱེན་མཐའ་དག་ཞི། །ཚེ་བསོད་དཔལ་འབྱོར་རིགས་བརྒྱུད་ཡོན་ཏན་རྒྱས། །མི་དང་མི་མིན་འགྲོ་ཀུན་དབང་དུ་སྡུས། །ཕས་རྒོལ་དགྲ་བགེགས་ལོག་འདྲེན་ཆོམ་ལ་ཕོབ། །མདོར་ན་རྣལ་འབྱོར་འཁོར་འབངས་བརྒྱུད་འཛིན་བཅས། །ཁྱོད་ལ་གཉེར་དུ་གཏད་དོ་མེལ་ཚེ་གྱིས། །གཞི་བྱེས་ལམ་གསུམ་ཀུན་ཏུ་སྲུང་ཞིང་སྐྱོབས། །ཆོས་མཐུན་བསམ་པའི་དོན་ཀུན་འགྲུབ་པར་མཛོད། །ཅེས་བརྗོད་ལ་མཆོད་གཏོར་གཙང་སར་གཤེགས། རྟེན་ཡོད་ན་བརྟན་བཞུགས་དང་། མེད་ན་གཤེགས་གསོལ་བྱས་པས་དོན་འགྲུབ་པ་ཡིན་ནོ། །ཞེས་པའང་ལུགས་ཟུང་མཁྱེན་པའི་སྤྱན་སྟོང་རྣམ་པར་བཀྲ་བ་ལྷ་རིགས་འབྲས་ལྗོངས་ལྷ་སྲས་དམ་པའི་བཞེད་སྐོང་དུ། མདོ་ཁམས་ཞེ་ཆེན་རྒྱལ་ཚབ་སྤྲུལ་མིང་འཛིན་པ་འཇམ་དབྱངས་མཁས་གྲུབ་རྒྱ་མཚོའི་སྡེས་གཙང་སྟོད་རྒྱལ་རྩེའི་ཚོང་འདུས་སུ་བྲིས་པ་དགེ །