སྙན་བརྒྱུད་ཡང་ཕུར་སྦྲགས་མའི་རྒྱུན་ཁྱེར་སྙིང་པོར་དྲིལ་བ་གྲུབ་གཉིས་མཆོག་སྦྱིན།

༄༅། །སྙན་བརྒྱུད་ཡང་ཕུར་སྦྲགས་མའི་རྒྱུན་ཁྱེར་སྙིང་པོར་དྲིལ་བ་གྲུབ་གཉིས་མཆོག་སྦྱིན་བཞུགས། །ན་མོ་གུ་རུ་ཤྲཱི་ཧེ་རུ་ཀ་བཛྲ་ཀུ་མཱ་ར་ཡེ། དྲན་པས་མཆོག་ཐུན་དངོས་སྟེར་བའི། །བླ་མ་ལྷག་པའི་ལྷ་མཆོག་ལ། །བཏུད་ནས་ཡང་ཕུར་ཟབ་ཏིག་གི། །རྒྱུན་གྱི་རྣལ་འབྱོར་སྙིང་པོར་བྲི། །འདིར་དབང་ཐོབ་ཅིང་དམ་ཚིག་ལ་གནས་པའི་རྣལ་འབྱོར་པས་རྒྱུན་གྱི་རྣལ་འབྱོར་སྙིང་པོར་དྲིལ་ཏེ་ཉམས་སུ་ལེན་པ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། འབྱོར་ན་སྨན་རག་གཏོར་མ་ཉེར་སྤྱོད་བཅས་བཤམས། གང་ལྟར་ཡང་། ཚོགས་ཞིང་གསལ་གདབ་ལ། ན་མོ། བླ་མ་དཔལ་ཆེན་ཞི་ཁྲོའི་ལྷ༔མཁའ་འགྲོའི་ཚོགས་ལ་སྐྱབས་སུ་མཆི༔གཞན་དོན་བྱང་ཆུབ་མྱུར་ཐོབ་ཕྱིར༔ཟབ་མོའི་རྣལ་འབྱོར་བསྒོམ་པར་བགྱི༔ཞེས་ལན་གསུམ་གྱིས་སྐྱབས་སེམས་དང་། སྤྲོ་ན། རྡོ་རྗེ་སློབ་དཔོན་སོགས་ཀྱི་རྒྱུན་བཤགས་ཡན་ལག་བརྒྱད་པ་བྱ། དངོས་སུ་བཤམས་པའི་མཆོད་པ་ཡོད་ན་ལས་བྱང་ལྟར་བྱིན་རླབས་ཀྱང་བྱའོ། །གཉིས་པ་དངོས་གཞི་ལ། ལྷ་བསྐྱེད་པ་ནི། ཨ༔གདོད་ནས་ཀ་དག་དབྱིངས་ཀྱི་ངང༔ཡེ་ཤེས་རིག་པ་རང་སྣང་བ༔མཚོན་ཆེན་ཧཱུྃ་ཡིག་སྔོན་པོ་ནི༔ནམ་མཁའི་དཀྱིལ་ནས་འཇའ་ལྟར་ཤར༔དེ་ལས་རོལ་པའི་ཆོ་འཕྲུལ་གྱི༔ཡེ་ཤེས་ཆེན་པོའི་འོད་ཟེར་གྱིས༔སྣོད་བཅུད་དངོས་འཛིན་དབྱིངས་སུ་སྟོང༔སྟོང་པའི་ངང་ལས་གསལ་བའི་རྩལ༔སངས་རྒྱས་ཞིང་ཁམས་ཡོངས་སྦྱོང་བའི༔བཀོད་པ་ཆེན་པོའི་རོལ་བ་ནི༔ཀློང་ལྔ་རྣམ་པར་དག་པའི་མདངས༔འབྱུང་བ་རིམ་བརྩེགས་རི་རབ་སྟེང༔ཐར་པ་ཆེན་པོའི་གཞལ་ཡས་ཁང༔དུར་ཁྲོད་དྲག་པོའི་བཀོད་པ་རྫོགས༔དེ་དབུས་པད་ཟླ་ཉི་མ་དང་༔ལྷ་ཆེན་ཕོ་མོ་བསྣོལ་བའི་སྟེང༔ཧཱུྃ་གིས་མཚོན་བྱེད་ཡོངས་གྱུར་ལས༔མཚོན་བྱ་བདག་ཉིད་རྩ་བའི་ལྷ༔རྡོ་རྗེའི་རང་བཞིན་སྟོང་པ་ཉིད༔གཞོན་ནུ་ཡེ་ཤེས་སྙིང་རྗེའི་སྐུ༔ཟུང་འཇུག་ཤིན་ཏུ་རྣམ་དག་པ༔ཆོས་སྐུའི་ཡོན་ཏན་ཐམས་ཅད་ཉིད༔གཟུགས་ཀྱི་རྣམ་པར་ཤར་བ་ནི༔སྐུ་དང་རྩ་ཞལ་རབ་ཏུ་སྔོ༔སྟོན་ཀའི་ནམ་མཁའ་དག་པ་བཞིན༔གཡས་དཀར་གཡོན་དམར་བཞད་གཤེ་རྔམས༔ཕྱག་དྲུག་གཡས་ཀྱི་དང་པོ་གཉིས༔ཐེག་པ་དགུ་དང་ཡེ་ཤེས་ལྔ༔རྫོགས་པའི་རྡོ་རྗེ་མཚོན་ཆར་འབེབས༔གཡོན་གཉིས་ཉོན་མོངས་བསྲེགས་པའི་མེ༔སྡིགས་པའི་མཛུབ་མོའི་རྩེ་ནས་སྤྲོ༔གཉིས་པ་དུག་གསུམ་རྩད་གཅོད་པའི༔ཁ་ཊྭཱྃ་ཅང་ཏེའུ་དྲིལ་བུ་འཁྲོལ༔ཐ་མ་གཉིས་ཀྱིས་ཁམས་གསུམ་པོའི༔ཉོན་མོངས་དུག་ཆེན་སྦྱང་བའི་ཕྱིར༔རི་རབ་ཕུར་བུ་འདྲིལ་བ་ནི༔ཆེ་བཙན་འགྲན་བྲལ་རྟགས་སུ་བརྗིད༔སྔོན་བྱུང་རུ་ཏྲ་བསྒྲལ་བ་ཡི༔དཔལ་ཆེན་པོ་ཡི་ལོངས་སྤྱོད་དང༔དུར་ཁྲོད་མཁའ་འགྲོ་འབུམ་གྱི་ཚོགས༔དགྱེས་དགུར་རོལ་པའི་ཡ་མཚན་ཆེ༔རྡོ་རྗེའི་སྐུ་ཡི་དབྱིངས་སུ་རྫོགས༔ཞབས་བཞི་གྱད་ཀྱི་དོར་སྟབས་ཅན༔མ་ཧཱ་རུ་ཏྲའི་སྤྱི་ནས་བརྫིས༔སྦྱོར་ཡུམ་འཁོར་ལོ་རྒྱས་འདེབས་མཐིང༔ཨུཏྤལ་དུང་ཁྲག་བསྣམས་པས་འཁྱུད༔གཟིག་ཤམ་སྣ་ཚོགས་ཁྲོ་མོའི་ཆས༔ཆགས་དང་གཏུམ་པའི་ཉམས་འགྱུར་རྫོགས༔དེ་ལྟར་གསལ་བའི་ཡེ་ཤེས་སྐུ༔རང་བཞིན་ཅིར་ཡང་མ་དམིགས་བཞིན༔ཐབས་ཀྱི་སྤྱོད་པས་འགྲོ་དོན་ཕྱིར༔བྱམས་དང་སྙིང་རྗེས་གང་འདུལ་བ༔སངས་རྒྱས་འཕྲིན་ལས་རྫོགས་པའི་ཕྱིར༔ཕུང་པོ་སྲས་མཆོག་རིགས་ལྔ་སྟེ༔འབྱུང་བ་དེ་ཡི་ཡུམ་དང་རོལ༔དགེ་དང་མི་དགེའི་ཆོས་རྣམས་ཀུན༔ཁྲོ་བོ་ཆེན་པོ་ཡབ་ཡུམ་བཅུ༔དེ་ལས་ཉོན་མོངས་རྟོག་པའི་རྩལ༔ཁྲ་ཐབས་སྒོ་སྐྱོང་ཕུར་སྲུང་སོགས༔མ་འདྲེས་ཉི་དང་འོད་བཞིན་པར༔ཅིར་ཡང་སྣང་ཞིང་ཅིར་ཡང་འགྱུར༔དེ་ལས་ཡེ་ཤེས་ཏི་ལ་ཀ༔དྭངས་མ་ལྔ་འདུས་སྙིང་པོའི་སྲོག༔བླ་མ་རྡོ་རྗེ་འཆང་ཆེན་པོ༔༔དཔལ་ཆེན་ཡང་དག་ཧེ་རུ་ཀ༔སྤྱི་བོའི་སྟེང་ན་འགྱིང་ཞིང་རོལ༔པདྨ་ཟླ་ཉི་དྲེགས་པའི་སྟེང༔མཐིང་ནག་ནམ་མཁའ་དྭངས་པའི་མདོག༔གཡས་དཀར་གཡོན་དམར་ཞལ་གྱིས་བརྗིད༔ཡེ་ཤེས་ཆེན་པོའི་ཕྱག་དྲུག་གཡས༔རྡོ་རྗེ་ཁ་ཊྭཱཾ་རྔེའུ་ཆུང་སྟེ༔གཡོན་གསུམ་དྲིལ་བྷན་རྒྱུ་ཞགས་འཕེན༔ཡུམ་ནི་དབྱིངས་ཕྱུག་སྙེམ་མ་ཁྲོས༔སྔོ་སྐྱ་རྡོ་རྗེ་དུང་ཁྲག་སྟོབས༔གཉིས་ཀ་གར་དགུའི་རོལ་པ་དང༔དཔལ་དང་དུར་ཁྲོད་ཆས་ཀས་བརྒྱན༔རྡོ་རྗེ་པདྨར་མཉམ་སྦྱོར་བས༔བསྲུབས་ཤིང་སྲུབ་པའི་སྦྱོར་བ་ཡིས༔བདེ་བ་ཆེན་པོའི་གཟི་བྱིན་ནི༔བཟོད་དུ་མེད་པར་འབར་བའི་རྩལ༔འཇའ་ཟེར་ཐིག་ལེ་འོད་ཕུང་གི༔རྣམ་འཕྲུལ་འབར་ཞིང་འཁྲུགས་པའི་ཀློང༔རྩ་བརྒྱུད་བླ་མ་ཡི་དམ་ལྷ༔དཔའ་བོ་དང་ནི་རྣལ་འབྱོར་མ༔ཆོས་སྲུང་ནོར་ལྷ་རྒྱ་མཚོར་བཅས༔ཤིན་ཏུ་བཟོད་པར་དཀའ་བ་ཡི༔བདེ་སྟོང་ཡེ་ཤེས་ཉམས་འབར་བས༔ཨ་ཧཾ་ཧཱུཾ་དང་ཕཊ་ཀྱི་སྒྲ༔འབྲུག་སྟོང་ལྟ་བུར་ཡོངས་སུ་སྒྲོག༔སྣང་སྟོང་གྲགས་སྟོང་རིག་བཞིན་སྟོང༔གདོད་མའི་རང་བཞིན་ཅིར་ཡང་འཆར༔འཆར་བའི་ཐུགས་རྗེ་འགག་མེད་རྩལ༔གདུག་པ་ཅན་རྣམས་རྗེས་འཛིན་ཕྱིར༔སྣང་སྲིད་སྣོད་བཅུད་གཞིར་བཞེངས་པ༔རྡོ་རྗེ་ཁྲོ་བོའི་ཕྱག་རྒྱར་རྫོགས༔རྡོ་རྗེའི་སྐུ་དང་ནཱ་དའི་གསུང༔གཞོམ་མེད་ཐིག་ལེ་ཆེན་པོ་ནི༔སྐུ་གསུང་ཐུགས་ཀྱི་ཕྱག་རྒྱས་གདབ༔སྣོད་ཀྱི་འབྱུང་བ་རྣམ་ལྔ་དང༔བཅུད་ཀྱི་ཕུང་པོ་རྣམ་པ་ལྔ༔རྒྱུད་ཀྱི་ཉོན་མོངས་རྣམ་ལྔར་བཅས༔ཡེ་ཤེས་ལྔ་རུ་རང་དབང་བསྐུར༔ༀ་ཧཱུྃ་ཏྲཱྃ་ཧྲཱིཿཨཱཿཨ་བྷི་ཥིཉྩ་ཧཱུྃ། ཞེས་གསལ་གདབ། སྤྲོ་ན་ལས་བྱང་ལྟར་སྤྱན་འདྲེན་མཆོད་བསྟོད་ཀྱང་བྱ། སྤྲོས་པ་བསྡུ་ན། དམ་ཡེ་དབྱེར་མེད་དུ་མོས་པས་དམིགས་པའི་གཙོ་བོ་ལྷའི་སྣང་ཞེན་ལ་བསླབ་ཅིང་ང་རྒྱལ་བརྟན་པོར་བཟུང་། གཞི་འབྲས་སྦྲེལ་བའི་དག་དྲན་ལ་བསླབས་རྗེས་བཟླས་པའི་རྣལ་འབྱོར་ནི། ༀ༔སྔོན་གྱི་ཐུགས་དམ་ཆེན་པོ་ནི༔བདུད་དང་རུ་ཏྲ་བསྒྲལ་བ་དང༔གདུལ་བྱ་ཡོངས་སུ་སྨིན་པའི་ཕྱིར༔ཐབས་ཀྱི་ཕྲིན་ལས་དེང་བསྐུལ་ན༔འབར་བ་སྐུ་ཡི་གཟི་བྱིན་བསྐྱེད༔རྡོ་རྗེའི་སྔགས་ཀྱི་སྒྲ་གདངས་སྒྲོགས༔ཡེ་ཤེས་ཆེན་པོའི་སྲོག་ལྡན་པས༔དངོས་གྲུབ་རྣམ་གཉིས་མྱུར་དུ་སྩོལ༔དེ་སྐད་བསྐུལ་བའི་དེ་མ་ཐག༔སྐུ་ནི་གར་དགུར་ཤིག་ཤིག་གཡོས༔ཁྱད་པར་རྡོ་རྗེ་པདྨར་གསོར༔གསུང་ནི་སྔགས་ཀྱི་སྒྲ་ཆེན་བསྒྲགས༔ཁྱད་པར་ཨ་ཧཾ་བདེ་སྐད་བླང༔ཐུགས་ནི་མཁའ་ལས་མི་གཡོ་བཞིན༔བཟོད་མེད་བདེ་བ་སྟོང་པར་ཞུགས༔ཡོན་ཏན་ཕྲིན་ལས་བསམ་མི་ཁྱབ༔གང་གང་འདུལ་བ་དེ་དེར་སྟོན༔དཀར་དམར་མཐིང་གའི་འོད་ཟེར་གྱིས༔བདག་དང་བདག་གིར་འཛིན་པ་ཡི༔རྒྱུད་དང་རྟོག་པ་ཀུན་སྦྱངས་ནས༔སྐུ་གསུང་ཐུགས་ཀྱི་རྡོ་རྗེའི་དབྱིངས༔ཡེ་ཤེས་ཆེན་པོར་རོ་གཅིག་གྱུར༔ཞེས་མོས་ལ། ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ཞེས་བླ་མ་ཧེ་རུ་ཀའི་བྱིན་རླབས་བཟླས་པ་བྱ། དེ་ནས། བདག་ཉིད་རྡོ་རྗེ་གཞོན་ནུ་ཆེའི༔ཐུགས་ཀར་ཡེ་ཤེས་སེམས་དཔའ་ནི༔བཛྲ་ས་ཏྭ་དཀར་གསལ་འཚེར༔རྡོ་རྗེ་དྲིལ་འཛིན་ལོངས་སྐུའི་ཆས༔ཞབས་ཟུང་ཕྱེད་དཀྱིལ་པད་ཟླར་བཞུགས༔དེ་ཡི་ཙིཏྟའི་གུར་ཁང་དབུས༔པད་ཉིའི་ལྟེ་བར་ཧཱུྃ་མཐིང་མཐར༔འབར་བའི་སྔགས་ཀྱི་ཕྲེང་བས་བསྐོར༔བཟླས་པའི་འོད་ཟེར་མཁའ་ཁྱབ་འཕྲོས༔ཚུར་འདུས་བདག་ལ་ཐིམ་པ་ཡིས༔མཆོག་དང་ཐུན་མོང་དངོས་གྲུབ་ཐོབ༔སླར་ཡང་སྐུ་སྔགས་ཕྱག་མཚན་དང་༔འབར་བའི་མེ་ཡིས་སྣང་སྲིད་ཁྱབ༔དམ་ཅན་སྲུང་མ་ལས་ལ་བསྐུལ༔སྡེ་བརྒྱད་གདུག་པ་ཚར་ཐག་བཅད༔བར་ཆད་བྱད་ཕུར་རྡུལ་དུ་རློག༔སྣང་བ་ལྷ་ལ་གྲགས་པ་སྔགས༔དྲན་རྟོག་འོད་གསལ་དབྱིངས་སུ་ཐིམ༔སྣང་སྲིད་གཞིར་བཞེངས་དཔལ་ཆེན་པོའི༔སྐུ་གསུང་ཐུགས་སུ་ལྷུན་གྲུབ་གྱུར༔ཞེས་མོས་ལ། ༀ་བཛྲ་ཀཱི་ལི་ཀཱི་ལ་ཡ་སརྦ་བིགྷཱན་བཾ་ཧཱུྃ་ཕཊ༔ཅེས་ཡི་དམ་ཁྲོ་བོའི་བཟླས་པ་བྱ་ཞིང་། ཐུན་མཐར་གཞི་སྙིང་ཆིག་དྲིལ་དང་། སྤྲོ་ན་ཚེ་སྒྲུབ་ཀྱི་བཟླས་དམིགས་ཀྱང་ལས་བྱང་ལྟར་བྱའོ། །གསུམ་པ་ནི། ཐུན་ལས་ལྡང་བར་བརྩམ་པ་ན། དབྱངས་གསལ། རྟེན་སྙིང་། ཡིག་བརྒྱ་བཟླས་པས་སྔགས་ཀྱི་ལྷག་ཆད་བསྐང་ཞིང་ནུས་པ་བརྟན་པར་བྱས་རྗེས། ཨ་ཨ་ཨ༔འཁོར་འདས་ཆོས་ཀུན་བདེན་གཉིས་དབྱེར་མེད་པ༔ལྷག་པའི་ཆོས་སྐུ་ཆེན་པོའི་དབྱིངས་སུ་ཐིམ༔དེ་ལས་སླར་ཡང་ཟུང་འཇུག་སྒྱུ་མ་དང་༔ཆུ་ཟླ་ལྟ་བུའི་ལྷན་སྐྱེས་སྐུ་རུ་ལྡང་༔ཕཊ་ཕཊ་ཕཊ༔ཅེས་ལྷར་སྣང་འོད་གསལ་དུ་བསྡུ་ཞིང་ཟུང་འཇུག་གི་ལྷ་སྐུར་ལྡང་། ཧོཿདགེ་བ་འདིས་མཚོན་དུས་གསུམ་དགེ་ཚོགས་ཀུན༔ཤིན་ཏུ་རྣམ་དག་འདུས་མ་བྱས་པར་བསྔོ༔དེ་ཡི་དགེ་བས་མཐའ་ཡས་ཡིད་ཅན་ཀུན༔ཁྲག་འཐུང་ཆེན་པོའི་གོ་འཕང་མྱུར་ཐོབ་ཤོག༔ཅེས་བསྔོ་སྨོན་དང་། ཧཱུྃ༔ཆོས་སྐུ་ཡང་དག་གདོད་ནས་འདུས་མ་བྱས༔ལོངས་སྐུ་དཔལ་ཆེན་བཛྲ་ཀུ་མཱ་ར༔སྤྲུལ་སྐུ་གང་འདུལ་དེར་སྣང་སྣ་ཚོགས་གཟུགས༔དབྱེར་མེད་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་ཤིས་པ་བརྗོད་པས་མཚམས་སྦྱར་ཏེ་སྤྱོད་ལམ་ལ་འཇུག་གོ །འདིས་ཀྱང་བདག་དང་མཁའ་མཉམ་འགྲོ། །སྐྱེ་ཀུན་བླ་མ་ཧེ་རུ་ཀས། །རྗེས་བཟུང་གྲུབ་གཉིས་པདྨོའི་ཚལ། །ཅི་དགར་བཞད་པའི་རྒྱུར་གྱུར་ཅིག །ཅེས་པའང་རྗེ་བླ་མའི་ཕྲིན་ལས་ཀྱི་རྣམ་པར་འཕྲུལ་བ་ཆེན་པོའི་ཞབས་གྲས་རྣམ་པར་དཀར་བའི་ཐུགས་སྨོན་ཅན། དགེ་སློང་དཔལ་ལྡན་རིན་ཆེན་གྱི་གསུང་བསྐུལ་ངོར། སྙོམ་ལས་པ་རྡོ་རྗེ་དབང་མཆོག་དགྱེས་པ་རྩལ་གྱིས་བདེ་ཆེན་པདྨ་འོད་གླིང་དུ་བྲིས་པ་དགེ །མངྒལཾ།