ཕུར་བུའི་ལུགས་ཀྱི་དབྱངས་ཅན་དཀར་མོའི་བརྒྱུད་པའི་གསོལ་འདེབས་བློ་ཡི་མུན་སེལ།

༄༅། །ཕུར་བུའི་ལུགས་ཀྱི་དབྱངས་ཅན་དཀར་མོའི་བརྒྱུད་པའི་གསོལ་འདེབས་བློ་ཡི་མུན་སེལ་ཞེས་བྱ་བ་བཞུགས་སོ། །པད་དཀར་འཆང་བའི་ཚེམས་གྱི་ཆུ་གཏེར་ལས། །ཉེར་འཁྲུངས་རྒྱལ་ཀུན་མཁྱེན་པའི་དཀྱིལ་འཁོར་རྫོགས། །ཀུན་རྨོངས་གདུང་བ་བཅིལ་བྱེད་ག་བུར་འཛིན། །འཕགས་མ་སྒྲ་དབྱངས་ལྷ་མོར་གསོལ་བ་འདེབས། །གང་དེས་རྗེས་བཟུང་བྲམ་ཟེ་ཕུར་བུའི་ཞབས། །གཏུམ་པོའི་སྡེ་དང་མཆོད་སྡོང་སེང་གེའི་མཚན། །ཉི་སེང་དཔེ་མེད་མཚོ་དང་རྒྱ་མཚོ་ཆེ། །སུམ་པ་ལོ་ཙཱ་རྣམས་ལ་གསོལ་བ་འདེབས། །བཟང་རིན་པོ་དང་རིན་རྩེ་བློ་གྲོས་དཔལ། །ངྷརྨའི་མཚན་དང་ངག་དབང་ལྷ་མོ་ཡིས། །རྗེས་བཟུང་སྨྲ་བའི་སེང་གེ་བསམ་ཡས་པ། །ཚུལ་ཁྲིམས་བློ་གྲོས་ཞབས་ལ་གསོལ་བ་འདེབས། །ཆོས་རྗེ་སངས་རྒྱས་དབོན་དང་སེམས་དཔའ་ཆེ། །སངས་ཡེ་སངས་རྒྱས་རྒྱལ་མཚན་ཚུལ་རྒྱལ་བ། །རྩེ་ལེ་ཡབ་སྲས་པད་དབང་རིན་དར་མཚན། །ཕྲིན་ལས་ལྷུན་གྲུབ་རྣམས་ལ་གསོལ་བ་འདེབས། །ངེས་གསང་བསྟན་པའི་སྒྲོན་མེ་གཏེར་ཆེན་རྗེ། །རིན་ཆེན་རྣམ་རྒྱལ་ཐེག་མཆོག་བསྟན་འཛིན་བཟང་། །ཀུན་བཟང་རྣམ་རྒྱལ་བསྟན་འཛིན་ཆོས་ཀྱི་རྒྱལ། །པཎ་ཆེན་མཐུ་སྟོབས་མཚན་ལ་གསོལ་བ་འདེབས། །ཕུལ་བྱུང་སྐྱེས་ཐོབ་བློ༵་གྲོ༵ས་འཆི་མེད་ལམ། །སྦྱོར་བརྩོན་ཐུགས་རྗེ་སྣང་བའི་མཛོད་ཀྱི་གཟིས། །མཐ༵འ་ཡས༵་བསྟན་འགྲོའི་ཕན་བདེའི་འདབ་བརྒྱའི་ཚལ། །བཞད་མཛད་འཁོར་ལོའི་མགོན་པོར་གསོལ་བ་འདེབས། །དེ་ལྟར་མི་ཕྱེད་གུས་པས་གསོལ་བཏབ་མཐུས། །མཆོག་བྱིན་མ་ལ་ཡ་སྐྱེས་དྲི་བཞོན་གྱིས། །ཀུན་རྨོངས་ཉེས་བརྒྱའི་ཚད་གདུང་གཏན་བཅིལ་ནས། །བློ་མཆོག་སྤོབས་པའི་ངལ་མཚོའི་མཆོག་སྦྱིན་མཛོད། །རིམ་པས་རྒྱུད་སྨིན་དམ་ཚིག་རྣམ་པར་དག །བསྙེན་སྒྲུབ་མཐར་ཕྱིན་མི་མཐུན་གེགས་ལས་གྲོལ། །ལས་བཞིའི་སྦྱོར་བས་དོན་གཉིས་པདྨོའི་ཚལ། །སྐལ་བཟང་རྐང་དྲུག་དགའ་བའི་དཔྱིད་དཔལ་མཛོད། །ཁྱད་པར་ཟུང་འཇུག་སྤྲོས་པ་བྲལ་བའི་མཁར། །མཚན་དཔེའི་འོད་སྟོང་དྲྭ་བས་བྲིས་པའི་གར། །གང་སྐུ་ཟླ་བ་རྒྱས་པའི་ལང་ཚོའི་དཔལ། །མངོན་སུམ་མིག་གི་བདུད་རྩིར་སིམ་པར་མཛོད། །སྒྲ་ཚིག་བྱ་རྩོལ་མཚན་མ་རིང་འདས་ཀྱང་། །སྙན་འགྱུར་ཡན་ལག་འབུམ་རྫོགས་ངོ་མཚར་དབྱངས། །ས་གསུམ་མ་རིག་གཉིད་ལས་སློང་བའི་དཔལ། །བདག་གི་ངག་ལ་མྱུར་དུ་འཇུག་པར་མཛོད། །ཀུན་རྟོག་འཆིང་བ་ལས་གྲོལ་ཆོས་དབྱིངས་མདངས། །ལྷས་རྩེན་ཕ་མཐའ་བརྒལ་བའི་མཁྱེན་བརྩེའི་གཟི། །རབ་འབར་ཐུགས་ཀྱི་གསང་བ་མ་ཎི་ཀཿ། །བདག་ཡིད་ཀུན་གཞིའི་མཚོ་ལ་བརྟན་པར་མཛོད། །དེ་མཐུས་འཆད་པས་མཁས་མང་ཡིད་དབང་འཕྲོག །ལུང་རིགས་རྩོད་པས་ཕས་རྒོལ་དྲེགས་པ་བསྙིལ། །ལེགས་བཤད་རྩོམ་པས་ཐུབ་བསྟན་ཆེས་གསལ་བའི། །སྨྲ་བའི་ཉི་མ་གཅིག་པུར་བདག་གྱུར་ཅིག །མདོར་ན་འདི་ནས་ཚེ་རབས་ཕྲེང་བ་རུ། །བླ་མ་མཆོག་དང་དབྱེར་མེད་ཚངས་སྲས་ལྷའི། །ཞབས་ཀྱི་པདྨོས་བསྲུང་བའི་དགེ་མཚན་གྱིས། །རྣམ་ཀུན་མཁྱེན་པའི་ཡེ་ཤེས་མངོན་བྱེད་ཤོག །ཅེས་པའང་འཕགས་མའི་རིགས་སྔགས་ལ་གུས་པས་ལྷུར་ལེན་པའི་ཟེ་ཆེན་པ་དབྱངས་ཅན་དགྱེས་པའི་སྡེས་གསོལ་བ་བཏབ་པ་སིངྔྷི་རསྟུ།