སྤྱན་རས་གཟིགས་ལ་བསྟོད་པ་ཕན་བདེའི་ཆར་རྒྱུན།
༄༅། །སྤྱན་རས་གཟིགས་ལ་བསྟོད་པ་ཕན་བདེའི་ཆར་རྒྱུན་བཞུགས། ཨཱཿབརྗོད་མེད་བརྗོད་པ་ཀུན་གྱི་རྒྱུ་ཡི་མཆོག །བསམ་མི་ཁྱབ་ཀྱང་བསམ་བྱ་ཀུན་གྱི་གཞི། །ཡེ་ཤེས་སྐུ་ཅན་སྒྱུ་འཕྲུལ་དྲྭ་བའི་བདག །འཕགས་མཆོག་སྤྱན་རས་གཟིགས་ལ་ཕྱག་འཚལ་ལོ། །ཡེ་ཤེས་མེ་ཡིས་ཉོན་མོངས་ཆུ་བོ་སྐེམ། །སྙིང་རྗེའི་སྤྱན་གྱིས་བརྒྱུད་ལྔའི་འགྲོ་ལ་གཟིགས། །བྱམས་པའི་ཕྱག་གིས་འཁོར་བའི་འདམ་ནས་འདྲེན། །བཙུན་པ་སྤྱན་རས་གཟིགས་ལ་ཕྱག་འཚལ་ལོ། །ས་བཅུའི་དབང་ཕྱུག་རྒྱལ་ཀུན་བསྐྱེད་པའི་ཡབ། །སྲིད་མཐར་མི་གནས་ཞི་མཐར་ཞེན་པ་སྤངས། །དོན་གཉིས་མཐར་ཕྱིན་ཕྲིན་ལས་བསམ་མི་ཁྱབ། །འཕགས་མཆོག་སྤྱན་རས་གཟིགས་ལ་ཕྱག་འཚལ་ལོ། །བདག་གིས་རྩེ་གཅིག་འཕགས་མཆོག་ཁྱོད་དྲན་ནས། །སྒོམ་བཟླས་ལེགས་མཆོད་གསོལ་བ་བཏབ་པའི་མཐུས། །སྒྲིབ་མེད་མགོན་པོ་མཆོག་གིས་རྗེས་བཟུང་ནས། །ཚེ་རབས་ཀུན་ཏུ་བླ་མ་མཛད་དུ་གསོལ། །ༀ་མ་ཎི་པདྨེ་ཧཱུྃ། འཕགས་མཆོག་ཁྱེད་ཀྱི་ཐུགས་བསྐྱེད་སྨོན་ལམ་དང་། །མཛད་པ་ཕྲིན་ལས་མཁྱེན་བརྩེ་ནུས་པའི་སྟོབས། །ཡེ་ཤེས་སྒྱུ་འཕྲུལ་རྣམ་ཐར་ཅི་འདྲ་བ། །དེ་འདྲ་ཁོ་ནར་བདག་ཀྱང་འགྱུར་བར་ཤོག །