བླ་མའི་རྣལ་འབྱོར་ནི།
༈ བླ་མའི་རྣལ་འབྱོར་ནི། སྐྱབས་ཀུན་འདུས་ཞལ་བླ་མར་སྐྱབས་སུ་མཆི། །འགྲོ་སྒྲོལ་སླད་དུ་བླ་མའི་རྣལ་འབྱོར་བསྒོམ། །སེམས་ཅན་བདེ་ལྡན་སྡུག་བསྔལ་རྒྱུར་བཅས་བྲལ། །བདེ་ལྡན་བཏང་སྙོམས་ངང་ལ་གནས་གྱུར་ཅིག །ཅེས་སྐྱབས་སེམས་ཚད་མེད་བཞི་བསྒོམ་རྗེས། དངོས་གཞི་རྟེན་བསྐྱེད་པ་ནི། ཨ། མདུན་གྱི་ནམ་མཁར་སེང་ཁྲི་པད་ཟླའི་སྟེང་། །དུས་གསུམ་རྒྱལ་བའི་ཡེ་ཤེས་གཅིག་བསྡུས་པ། །འདྲེན་མཆོག་མགོན་པོ་རྩ་བའི་བླ་མ་ཉིད། །མཚན་དཔེའི་གཟི་འབར་མངོན་སུམ་བཞིན་དུ་གསལ། །ཞེས་མོས་ལ། ཡན་ལག་བདུན་པ་འབུལ་བ་ནི། སངས་རྒྱས་ཀུན་འདུས་རྩ་བའི་བླ་མ་ལ། །སྒོ་གསུམ་ཕྱག་འཚལ་མཆོད་འབུལ་སྡིག་ལྟུང་བཤགས། །དགེ་ལ་ཡི་རང་བསྐུལ་ཞིང་གསོལ་བ་འདེབས། །དགེ་བ་གང་མཆིས་བྱང་ཆུབ་ཆེན་པོར་བསྔོ། །དེ་ནས་གསོལ་བ་གདབ་པ་ནི། བླ་མ་མཉམ་མེད་སངས་རྒྱས་རིན་པོ་ཆེ། །དུས་གསུམ་བདེ་གཤེགས་སྲས་བཅས་ཐམས་ཅད་ཀྱི། །སྐུ་གསུང་ཐུགས་ཀྱི་རང་བཞིན་བྱིན་རླབས་པའི། །བཀའ་དྲིན་ཆེན་པོའི་ཞབས་ལ་གསོལ་བ་འདེབས། །ཞེས་སོགས་གང་མོས་ཅི་ནུས་མཐར་དབང་བླང་བ་ནི། བླ་མའི་གནས་གསུམ་འབྲུ་གསུམ་འོད་ཟེར་འཕྲེང་། །བདག་ཐིམ་སྒྲིབ་སྦྱང་ལམ་བཞིའི་སྣོད་རུང་བྱས། །སྐུ་བཞིའི་གོ་འཕང་ཐོབ་པའི་སྐལ་ལྡན་གྱུར། །མཐར་ནི་བླ་མ་འོད་ཞུ་རང་ལ་ཐིམ། །ཐུགས་ཡིད་གཅིག་འདྲེས་དགོངས་པའི་རྩལ་ཆེན་རྫོགས། །རྗེས་ཐོབ་ཅིར་སྣང་བླ་མའི་རོལ་པར་ཤར། །དགེ་བས་སྐྱེ་ཀུན་བླ་མས་རྗེས་བཟུང་མཐུས། །དོན་གཉིས་མཐར་ཕྱིན་རྡོ་རྗེ་འཆང་འགྲུབ་ཤོག །ཅེས་པའང་བསྟན་པའི་སྣང་བྱེད་གནམ་མཚོ་མཆོག་སྤྲུལ་དམ་པའི་བཞེད་ངོར་བྱ་བྲལ་བ་རྒན་པོ་བི་ཛ་ཡས་བྲིས་པ་དགེ །