བླ་མའི་རྣལ་འབྱོར་སྐལ་ལྡན་དགྱེས་པའི་དགའ་སྟོན།

༄༅། །བླ་མའི་རྣལ་འབྱོར་སྐལ་ལྡན་དགྱེས་པའི་དགའ་སྟོན་བཞུགས། ཨཱཿཀ་དག་སྤྲོས་པ་བྲལ་བའི་དབྱིངས། །ལྷུན་གྲུབ་འགག་པ་མེད་པའི་གདངས། །རོལ་རྩལ་མ་འགགས་བླ་མའི་སྐུ། །རིག་འདུས་བཛྲ་ས་ཏྭ་ཆེ། །དཀར་གསལ་རྡོ་རྗེ་དྲིལ་བུ་འཛིན། །རང་འོད་སྙེམ་མའི་བདེ་བས་འཁྱུད། །མཚན་དཔེའི་གཟི་འབར་ལོངས་སྐུའི་ཆས། །སྣང་སྟོང་ཟུང་འཇུག་ཡེ་ཤེས་སྐུ། །དྲན་པ་ཙམ་གྱིས་མཆོག་སྟེར་བའི། །སྐྱབས་ཀུན་འདུས་པའི་ངོ་བོར་གསལ། །རང་རིག་དོན་གྱི་བླ་མ་ལ། །རང་ངོ་ཤེས་པའི་ཕྱག་གིས་འདུད། །ཅིར་སྣང་རྒྱན་ཤར་མཆོད་སྤྲིན་སྟོབས། །ཉོན་མོངས་རང་གྲོལ་ཆེན་པོར་བཤགས། །ཟག་མེད་དགེ་ལ་རྗེས་ཡི་རང་། །རིག་རྩལ་འགག་མེད་ཆོས་འཁོར་བསྐོར། །འོད་གསལ་གཉུག་མའི་ཐིག་ལེར་བཞུགས། །སྲིད་ཞི་མཉམ་ཉིད་ཀློང་དུ་བསྔོ། །ཡེ་གྲོལ་གདོད་མའི་མགོན་པོ་ལ། །བློ་བྲལ་རྗེན་པར་གསོལ་བ་འདེབས། །བསྐུར་ཐོབ་བྲལ་བའི་དབང་བསྐུར་ལ། །གདོད་གཞི་གྲོལ་བར་བྱིན་གྱིས་རློབས། །བླ་མ་འོད་ཞུ་རང་ལ་ཐིམ། །རང་སེམས་བླ་མའི་ངོ་བོར་ཤར། །ཅིར་སྣང་ཀུན་བཟང་སྤྱོད་པའི་བརྒྱན། །བདེ་བ་ཆེན་པོའི་ཀློང་དུ་ཨཱཿ། །དེ་ལྟར་བླ་མའི་རྣལ་འབྱོར་ཚུལ། །ཉུང་ངུས་ངག་གི་གསལ་བྱེད་པ། །སྔགས་བཙུན་པདྨ་བི་ཛ་དེས། །ཨ་ཚོགས་དགྱེས་པའི་དགའ་སྟོན་ནོ། །དགེའོ། །༈ དྭངས་པའི་ཡིད་མཁར་དད་བརྒྱའི་ཆུ་འཛིན་དབུས། །རྩ་བའི་བླ་མ་ཨོ་རྒྱན་རྡོ་རྗེ་འཆང་། །བདེ་སྟོང་ཟག་མེད་རྡོ་རྗེ་ཚེ་བུམ་འཛིན། །དྲན་པས་སྲིད་ཞིའི་འཇིགས་འཕྲོག་ལྷམ་མེར་གསལ། །རབ་འབྱམས་རྩ་གསུམ་འདུས་ཞལ་པད་འབྱུང་དང་། །དབྱེར་མེད་དྲིན་ཆེན་རྩ་བའི་བླ་མ་ལ། །མི་ཕྱེད་སྙིང་ནས་གུས་པས་གསོལ་བ་འདེབས། །དབང་བསྐུར་བྱིན་རློབས་སྨིན་གྲོལ་དངོས་གྲུབ་སྩོལ། །བླ་མའི་གནས་གསུམ་འབྲུ་གསུམ་བདུད་རྩིའི་ཟེར་། །འཕྲོས་པས་སྒོ་གསུམ་སྒྲིབ་དག་དབང་བཞི་ཐོབ། །བླ་མ་དགྱེས་པས་འོད་ཞུ་རང་ལ་ཐིམ། །ཐུགས་ཡིད་གཅིག་འདྲེས་དགོངས་པའི་རྩལ་རྫོགས་གྱུར། །དགེ་བ་འདི་ཡིས་བདག་སོགས་ཡིད་ཅན་ཀུན། །འཁོར་ལོའི་མགོན་གྱིས་འབྲལ་མེད་རྗེས་བཟུང་ནས། །དད་དང་དམ་ཚིག་མོས་གུས་རྣམ་དག་པས། །རྗེ་བཙུན་བླ་མའི་གོ་འཕང་མྱུར་ཐོབ་ཤོག །ཅེས་པའང་བློ་བསྟན་ངོར་བི་ཛས་བྲིས་སོ། །