དམ་ཅན་གཡང་སྒྲུབ་མདོར་བསྡུས།
༄༅། །དམ་ཅན་གཡང་སྒྲུབ་མདོར་བསྡུས་ནི། གཡང་རྫས་སོགས་འདུ་བྱས་ནས། ལས་གཞུང་བསྲང་བའི་མཇུག་ཐོག་མདའ་དར་གཡབ་ལ། ཀྱེ། དུས་གསུམ་རྒྱལ་བའི་བཀའ་སྡོད་མཐུ་བོ་ཆེ། །ཡེ་ཤེས་བརྙེས་ཀྱང་འཇིག་རྟེན་ཚུལ་འཛིན་པའི། །དམ་ཅན་ནོར་བདག་སྐྱེས་བུ་ཐིག་ལེ་རྩལ། །དགྱེས་ཡུམ་ཀོང་བཙུན་དེ་མོ་སྨན་གཅིག་མ། །ཛམ་ལྷ་བརྒྱད་དང་དགེ་བསྙེན་ཉེར་གཅིག་དང་། །བསྟན་མ་བཅུ་གཉིས་མཆེད་འཁོར་སུམ་བརྒྱ་སོགས། །འཁོར་བཅས་དམ་ཚིག་དབང་གིས་དགྱེས་དགོངས་ཏེ། །དེ་རིང་བཀྲ་ཤིས་ལྷ་ཡི་ཉི་མ་ཆེ། །ཕྱྭ་ཆ་གཡང་རྫས་མ་ལུས་བཀྲམ་ནས་ཀྱང་། །རྣལ་འབྱོར་དད་པའི་གདུང་བས་འབོད་ལགས་ན། །བརྟན་གཡོ་སྲིད་ཞིའི་ཕྱྭ་གཡང་མ་ལུས་ཁུག །འཆི་མེད་ཚེ་དང་རྒས་མེད་ལང་ཚོའི་དཔལ། །རྒུད་མེད་རྣམ་དཔྱོད་བརྗིད་ཆེན་གོས་དང་ནི། །བཅུད་ཆེན་ཟས་དང་ནོར་ཕྱུགས་རྐང་འགྲོས་རིགས། །རིན་ཆེན་འབྲུ་སྨན་ལྷ་མའི་དཀོར་ཆའི་ཚོགས། །མ་ལུས་དབང་དུ་སྡུས་ལ་དེང་འདིར་སྩོལ། །སྟེང་ཕྱོགས་ལྷ་གཡང་མ་ལུས་སྤྲིན་ལྟར་གཏིབས། །འོག་ཕྱོགས་ཀླུ་ཡི་ཕྱྭ་གཡང་མཚོ་ལྟར་བསྐྱིལ། །བར་ཕྱོགས་མི་ཡི་རྨུ་གཡང་ཆར་བཞིན་ཕོབ། །བདག་དང་སྦྱིན་བདག་རེ་བ་ཡོངས་སྐོང་མཛོད། །མདོར་ན་ཕུན་ཚོགས་སྡེ་བཞིའི་དཔལ་ཡོན་ཀུན། །མ་ལུས་དབང་དུ་བསྡུས་ལ་དེང་འདིར་བརྩོལ། །ཆོས་མཐུན་བསམ་སྦྱོར་མཐའ་དག་ཡིད་བཞིན་འགྲུབ། །སྦྱིན་པའི་ཕར་ཕྱིན་ཡོངས་སུ་རྫོགས་པར་མཛོད། །ཕན་བདེའི་གཞིར་གྱུར་རྒྱལ་བསྟན་ཡུན་དུ་གནས། །དགེ་འདུན་སྡེ་འཕེལ་བཤད་སྒྲུབ་ཕྲིན་ལས་རྒྱས། །རྒྱལ་ཁམས་བདེ་སྐྱིད་རྫོགས་ལྡན་དཔལ་གྱིས་འཚོ། །དོན་གཉིས་བསམ་ཀུན་འགྲུབ་པའི་བཀྲ་ཤིས་སྩོལ། །ཅེས་གྱེར་ལ་མཐར་རྟེན་རྣམས་ལ་བསྟིམ་ཞིང་ཤིས་བརྗོད་གྱི་མེ་ཏོག་འཐོར་བས་དགེ་ལེགས་སུ་བྱའོ། །ཞེས་པའང་རྒྱལ་རོང་གནམ་མཚོ་མཆོག་སྤྲུལ་དམ་པའི་བཞེད་སྐོང་དུ་ཞེ་ཆེན་པ་འགྱུར་མེད་པདྨ་བསྟན་འཛིན་གྱིས་འཕྲལ་མར་བྲིས་པ་དགེ་ལེགས་ཀྱི་སྣང་བ་རྟག་ཏུ་ཁྱབ་པའི་རྒྱུར་གྱུར་ཅིག