བསྐང་བསྡུས་པདྨའི་རྫིང་བུ།

༄༅། །བསྐང་བསྡུས་པདྨའི་རྫིང་བུ་བཞུགས། ཧཱུྃ། ཆོས་དབྱིངས་བདེ་བ་ཆེན་པོའི་ཡེ་ཤེས་རྩལ། །རྣམ་མང་འབྱོར་པའི་ཁྱད་པར་མི་ཟད་རྒྱན། །མེ་ཏོག་བདུག་སྤོས་སྣང་གསལ་དྲི་ཞལ་རོལ། །འདོད་ཡོན་ལྔ་དང་བཀྲ་ཤིས་རྫས་རྟགས་བརྒྱད། །རིན་ཆེན་སྣ་བདུན་ལྷ་མའི་འབྱོར་པའི་སྤྲིན། །སྨན་རག་གཏོར་མ་སྦྱོར་སྒྲོལ་ཚོགས་མཆོད་དང་། །དྲག་པོའི་ཉེར་སྤྱོད་བཟའ་བཏུང་གོས་རྒྱན་མཚོན། །མཐུན་པའི་ལོངས་སྤྱོད་སྤྱན་གཟིགས་དཀོར་ཆའི་རིགས། །ཕྱི་ནང་གསང་རྟེན་སྒྲུབ་དང་མཆོད་བསྐང་རྫས། །མ་ཚང་མེད་པའི་འདོད་ཡོན་རྒྱ་ཆེན་པོ། །དངོས་སུ་འབྱོར་དང་ཡིད་ཀྱིས་རྣམ་སྤྲུལ་ཏེ། །རབ་འབྱམས་རྩ་གསུམ་དཀྱིལ་འཁོར་ལྷ་ཚོགས་དང་། །ཁྱད་པར་དཔལ་མགོན་ལེགས་ལྡན་ཚོགས་ཀྱི་བདག །ཕྱག་བཞི་མ་ནིང་ཞལ་བཞི་སྔགས་སྲུང་མ། །ལྷ་ཆེན་གཟའ་བདུད་རྣམ་སྲས་ཛམ་བྷ་ལ། །ཞིང་སྐྱོང་དབང་མོ་ལས་གཤིན་འདོད་ཁམས་བདག །ཞིང་སྐྱོང་སེང་གདོང་སྡེ་དཔོན་སུམ་བཅུ་དང་། །ཕུར་སྲུང་བཅུ་གཉིས་བརྟན་མ་སྨན་བཙུན་ལྔ། །དམ་ཅན་རྡོར་ལེགས་བྲག་བཙན་པེ་ཧ་ར། །ཙིའུ་དམར་པོ་བདུད་བཙན་ཀླུ་གསུམ་དང་། །གཉན་ཆེན་ཐང་ལྷ་བཀའ་གཏེར་སྲུང་མའི་རིགས། །ཡུལ་ལྷ་གཞི་བདག་དཀར་ཕྱོགས་སྐྱོང་བའི་གཉན། །འགོ་བའི་ལྷ་ལྔ་སྐྱོབ་པའི་ལྷ་སྲུང་ཚོགས། །ཐུགས་དམ་གཉན་{གཉེན}པོ་ཆོས་ཀྱི་དབྱིངས་སུ་བསྐང་། །རྩ་བ་ཡན་ལག་ཉམས་ཆག་འགལ་འཁྲུལ་བཤགས། །སྒྲུབ་མཆོག་བདག་ལ་ལས་བཞིའི་དངོས་གྲུབ་སྩོལ། །བྱང་ཆུབ་བར་དུ་མི་འབྲལ་རྗེས་སྐྱོངས་ལ། །དོན་གཉིས་བསམ་ཀུན་ལྷུན་གྱིས་འགྲུབ་པར་མཛོད། །ཅེས་པའང་བི་ཛས་གང་ཤར་བརྗོད་པ་མངྒ་ལཾ། ༈ ཀྱེ། རབ་འབྱམས་རྩ་གསུམ་དཀྱིལ་འཁོར་ལྷ་ཚོགས་དང་། །ཆོས་སྲུང་ནོར་ལྷ་གཞི་གནས་གཏེར་བདག་རིགས། །ཁྱད་པར་ཕྱོགས་འདིར་གནས་པའི་ལྷ་སྲིན་ཚོགས། །གཙང་སྦྱར་གསེར་སྐྱེམས་མཆོད་པ་འདི་བཞེས་ལ། །རྣལ་འབྱོར་བདག་གི་བསམ་པ་འགྲུབ་པར་མཛོད། །བླ་མེད་ཐེག་པ་ཆེན་པོར་སེམས་བསྐྱེད་ཅིང་། །འགྲོ་ཀུན་ཐར་པའི་ལམ་དུ་འཛུད་ཕྱིར་དང་། །མཚུངས་མེད་རྒྱལ་བའི་བསྟན་པ་རྒྱས་པའི་ཕྱིར། །ཕྱོགས་འདིར་རྣམ་དཀར་ཕྲིན་ལས་རྩོམ་པ་ལ། །མི་མཐུན་འགལ་རྐྱེན་མཚན་མ་ཀུན་ཞི་ཞིང་། །མཐུན་རྐྱེན་ཚེ་དཔལ་འདོད་དགུའི་སྒོ་འཕར་ཕྱེས། །སྲིད་གསུམ་དབང་སྡུས་ལོག་འདྲེན་བགེགས་ཚོགས་སྒྲོལ། །ཕྱོགས་ལས་རྣམ་པར་རྒྱལ་བའི་དཔལ་སྩོལ་ཅིག །དུང་དུང་སྙིང་ནས་མོས་པས་རྗེས་དྲན་ཞིང་། །ཡང་ཡང་རྩ་གསུམ་ལྷ་ལ་གསོལ་བྱེད་ན། །འཛུམ་འཛུམ་དགྱེས་པའི་ཞལ་བཟང་མྱུར་སྟོན་ལ། །ལེགས་ལེགས་ཕན་བདེའི་དགའ་སྟོན་རྒྱས་པར་མཛོད། །ཅེས་པའང་མཆོག་སྤྲུལ་དམ་པའི་བཞེད་སྐོང་དུ་བི་ཛ་ཡས་བྲིས་པ་དགེ །༈ ཀ་དག་རྫོགས་པ་ཆེན་པོའི་རིང་ལུགས་མཆོག །ཁ་བའི་ལྗོངས་སོགས་གང་དུ་གནས་པ་དེར། །ག་བུར་དྲི་བཞིན་འབྲལ་མེད་འགྲོགས་མཛད་པའི། །ང་ཡི་གྲོགས་པོ་དམ་ཅན་ཚོགས་རྣམས་དགོངས། །ཅ་ཅོ་གྲགས་པའི་རྗེས་འབྲང་ཙམ་མིན་པར། །ཆ་ཤས་ཡོན་ཏན་ཡོངས་གང་སྔ་འགྱུར་བསྟན། །ཇ་རིལ་མགོ་བོའི་རྒྱན་མཆོད་སྒྲུབ་པོ་ལ། །ཉ་རྒྱས་ཟླ་འདྲ་དགྱེས་པའི་ཞལ་སྟོན་མཛོད། །ཏ་ཐཱ་ག་ཏའི་བསྟན་མཆོག་སྲུང་བ་ཡི། །ཐ་ཚིག་རྡོ་རྗེའི་ཞལ་འཆེས་དགོངས་མཛོད་ལ། །ད་ལྟ་ངེས་གསང་བསྟན་དང་བསྟན་འཛིན་སྡེ། །ན་མ་རེ་བཞིན་སྲུང་སྐྱོབ་ཕྲིན་ལས་སྤེལ། །པ་སངས་ལྟར་དཀར་ལྷག་པའི་བསམ་པ་ཡིས། །ཕ་མཆོག་པདྨའི་རིང་ལུགས་འཛིན་པ་ངས། །བ་མཆོག་དཔག་བསམ་བུམ་བཟང་ཁྱོད་བརྟེན་ན། །མ་ལུས་འདོད་པའི་རེ་བ་སྐོང་བར་མཛོད། །ཙ་རི་ཏྲ་སོགས་དབེན་གནས་རི་ཁྲོད་དུ། །ཚ་གྲངས་དཀའ་སྤྱད་སྒྲུབ་ལ་ཞུགས་རྣམས་ལ། །ཛ་ལང་བདུད་ཀྱི་བར་གཅོད་མི་འབྱུང་ཞིང་། །ཝ་ཆུའི་རྒྱུན་བཞིན་གྲུབ་གཉིས་འདོད་དགུར་བྱིན། །ཞྭ་ལྟར་བརྒྱུད་ལྡན་བླ་མ་གཙུག་ན་ཁུར། །ཟ་ཆོག་དཔེ་གྲིམ་ཙམ་མིན་ངེས་གསང་བསྟན། །འ་འུར་བཤད་སྒྲུབ་བརྩོན་པ་ལྷུར་ལེན་རྣམས། །ཡ་མཚན་ལེགས་ཚོགས་མཐའ་རུ་ཕྱིན་པར་ཤོག །ར་བ་གངས་ཁྲོད་བསྟན་འགྲོའི་བདེ་སྐྱིད་ཆེ། །ལ་འུར་འཇོམས་བྱེད་མཐའ་དམག་ཀླ་ཀློའི་སྡེའི། །ཤ་ཁྲག་དྲོད་དབུགས་དགྱེས་པའི་ཟས་སུ་རོལ། །ས་གསུམ་དཀར་ཕྱོགས་རྒྱལ་བའི་རུ་མཚོན་ཕྱོར། །ཧ་ཧ་དཀར་ཕྱོགས་དགྱེས་པའི་བཞད་སྒྲ་ཡིས། །ནག་ཕྱོགས་གདུག་པའི་དགྲ་ཚོགས་ཀླད་པ་འགེམ། །ཨ་ཏི་རྫོགས་པ་ཆེན་པོའི་བསྟན་པ་མཆོག །ཕྱོགས་དུས་མཐའ་རུ་དར་སྨིན་རྒྱས་གྱུར་ཅིག །ཅེས་པའང་སྤྲུལ་མིང་པདྨ་བི་ཛས་དམ་ལྡན་ཆོས་སྲུང་ཚོགས་ལ་ཕྲིན་བཅོལ་དུ་ཤར་མར་བྲིས་པ་དགེ །༈ ཧཱུྃ། ཡེ་ཤེས་སྤྱན་གྱིས་མ་བསྒྲིབས་ས་ལེར་གཟིགས། །ཐུགས་རྗེ་ཆེན་པོས་སྒྲུབ་མཆོག་བུ་བཞིན་སྐྱོངས། །ལེགས་ཉེས་སྟངས་འཛིན་དམ་ཚིག་རྗེས་གཅོད་པའི། །ཆོས་སྲུང་དམ་ཅན་གཉན་རྣམས་དགོངས་སུ་གསོལ། །རྨད་བྱུང་བྱང་ཆུབ་སེམས་ཀྱི་གཞི་བཟུང་ནས། །རླབས་ཆེན་བསྟན་འགྲོའི་ཕན་བདེ་སྤེལ་བ་དང་། །སྐལ་མེད་རྒྱུད་ལ་ཐར་པའི་གསོས་འདེབས་པ། །རྒྱལ་བའི་སྲས་ཀྱི་ཁྱད་ཆོས་མ་ལགས་སམ། །དེ་སླད་སྙིང་རྗེའི་ཡུལ་གྱུར་གདུལ་དཀའི་འགྲོར། །བཟང་འབྲེལ་ཐུགས་རྗེའི་དཔྱང་ཐག་གཡོ་བ་ལ། །མཐུ་ལྡན་དམ་ཅན་སྲུང་མའི་ཚོགས་རྣམས་ཀྱིས། །ཀོ་ལོང་རུ་ང་ཕྲག་དོག་མ་མཛད་ཅིག །ཤིན་ཏུ་མི་བསྲུན་ཉམས་པ་བདུན་ལྡན་རིགས། །དྲག་པོའི་ལས་ལས་གཞན་གྱིས་གདུལ་དཀའ་ཞིང་། བཀའ་སྲུང་དྲེགས་པའི་ཟ་ཁ་ཟུག་རྣམས་ལ། །ཆོས་སྐྱོང་སྲུང་མའི་ཚོགས་ཀྱི་ཟ་ངུ་མཛོད། །རྣམ་བཞིའི་ཕྲིན་ལས་གྲུབ་པའི་རིགས་སྔགས་གཟས། །རྒྱལ་བསྟན་དར་ཞིང་བསྟན་འཛིན་ཞབས་པད་བརྟན། །བཤད་སྒྲུབ་དཔལ་འབྱོར་མངའ་ཐང་གོང་དུ་འཕེལ། །དོན་གཉིས་བསམ་ཀུན་འགྲུབ་པའི་བཀྲ་ཤིས་ཤོག །ཅེས་པའང་རྒྱལ་སྲས་གཞན་ཕན་ཆོས་ཀྱི་བློ་གྲོས་ཀྱིས་བྲིས་པ་དགེ་ལེགས་འཕེལ། ༈ ཧཱུྃ། སློབ་དཔོན་པདྨ་ཐོད་ཕྲེང་གི། །བཀའ་དང་དམ་ཚིག་ལ་གནས་པའི། །སྲུང་མ་གཉན་པོ་འཁོར་དང་བཅས། །འདིར་གཤེགས་མཐུན་པའི་གདན་ལ་བཞུགས། །ཉེར་སྤྱོད་འདོད་ཡོན་ཤིས་པའི་རྫས། །སྨན་གཏོར་རཀྟ་ནང་གི་བཅུད། །སྦྱོར་སྒྲོལ་གསང་བའི་མཆོད་པའི་ཚོགས། །མ་ཚང་མེད་པ་འབུལ་གྱིས་བཞེས། །ངང་ཉིད་ཞི་ལས་མ་གཡོས་ཀྱང་། །གང་འདུལ་ཐབས་མཁས་རོལ་རྩེད་ཀྱིས། །ལོག་འདྲེན་ཞིང་བཅུ་ཚར་གཅོད་པའི། །དམ་ལྡན་བསྟན་སྲུང་ཚོགས་ལ་བསྟོད། །དངོས་བཤམས་ཡིད་ཀྱིས་རྣམ་སྤྲུལ་བའི། །ཕྱི་ནང་གསང་རྟེན་སྒྲུབ་པའི་རྫས། །ལྷ་མིའི་འབྱོར་པ་རྒྱ་མཚོ་ཡིས། །ཐུགས་དམ་གཉན་པོ་དབྱིངས་སུ་བསྐང་། །མི་མཐུན་ཉམས་ཆག་འགལ་འཁྲུལ་བཤགས། །གཡར་དམ་གཉན་པོ་རྗེས་དགོངས་ལ། །སངས་རྒྱས་བསྟན་པ་སྲུང་བ་དང་། །དཀོན་མཆོག་དབུ་འཕང་མཐོ་བར་མཛོད། །མི་བསྲུན་ལོག་འདྲེན་ཆོམ་ལ་ཕོབ། །སྒྲུབ་མཆོག་རྣལ་འབྱོར་བདག་ཅག་ལ། །འགོ་ཞིང་སྡོང་གྲོགས་མི་གཡེལ་བར། །འདོད་དོན་བཅོལ་བའི་ཕྲིན་ལས་མཛོད། །ཅེས་པའང་བི་ཛ་ཡས་སོ། །༈ ཧཱུྃ། རྒྱལ་དབང་པདྨ་ཐོད་ཕྲེང་གི། །བཀའ་ཉན་སྣང་སྲིད་དྲེགས་པའི་ཚོགས། །འདིར་གཤེགས་དམ་རྫས་ཕུད་བསྐོང་བཞེས། །སྔོན་གྱི་ཐ་ཚིག་དྲན་མཛོད་ལ། །རྒྱལ་བསྟན་སྤྱི་དང་སྔ་འགྱུར་གྱི། །བསྟན་དང་བསྟན་འཛིན་ལ་འཁུ་ཞིང་། །ཁྱད་པར་བདག་ཅག་དཔོན་སློབ་ལ། །གནོད་ཅིང་འཚེ་བར་བྱེད་པ་ཡི། །མི་དང་མི་མིན་འབྱུང་པོའི་རིགས། །གནོད་བྱེད་བྱད་མ་ཇག་རྐུན་དང་། །ཁ་མཆུ་གྱོད་ཚོལ་བྱེད་ལ་སོགས། །བསམ་ངན་སྦྱོར་རྩུབ་འཆང་བའི་རིགས། །མ་ལུས་མིང་གི་ལྷག་མར་མཛོད། །ཡིད་ལ་བརྣག་པའི་དགྲ་བོ་འདི། །འཆོར་མེད་དུས་ཀྱི་ཞགས་པས་ཆིངས། །སྡང་མེད་འབྱུང་བའི་འོག་ཏུ་ནོན། །ཤ་རུས་ལྷག་མ་མེད་པར་རོལ། །རྡུལ་ཕྲན་ཙམ་ཡང་མ་བཞག་ཅིག །དུས་ལ་བབ་པོ་ས་མ་ཡ། །བཅོལ་པའི་ཕྲིན་ལས་འགྲུབ་པར་མཛོད། །སྔགས་ནག་ཞེ་སྡང་རྡོ་རྗེས་ཚེས་ནག་ཉི་ཤུ་དགུ་ལ་བྲིས་པའོ། །༈ ཧོ། རབ་འབྱམས་རྩ་གསུམ་དཀྱིལ་འཁོར་ལྷ་ཚོགས་དང་། །ཁྱད་པར་བརྒྱུད་གསུམ་དམ་ཅན་དྲེགས་པའི་ཚོགས། །ཤ་ཁྲག་དམར་གྱི་གཏོར་མ་འདི་བཞེས་ལ། །ཞིང་བཅུའི་ལོག་འདྲེན་ཚོགས་རྣམས་རྡུལ་དུ་རློག །གངས་ཅན་སྐྱེ་དགུའི་ཕན་བདེ་འབྱུང་བའི་སྒོ། །རྒྱལ་བསྟན་སྤྱི་དང་ཁྱད་པར་སྔ་འགྱུར་གྱི། །བསྟན་དང་བསྟན་འཛིན་ཡོངས་ལ་གནོད་པ་དང་། །རྣལ་འབྱོར་བདག་ཅག་ཡོན་མཆོད་འཁོར་བཅས་ལ། །སྔ་དགྲ་ལག་བརྡར་ཕྱི་དགྲ་ཡིད་སེམས་དང་། །ད་དགྲ་གདུག་པའི་བསམ་སྦྱོར་འཆང་བ་ཡི། །གནོད་བྱེད་དགྲ་རྐུན་ཇག་གསུམ་བྱད་མར་བཅས། །ཞལ་དུ་བཏབ་བོ་རྗེས་ཤུལ་ལྷག་མེད་མཛོད། །རྒྱལ་བའི་བསྟན་དར་བསྟན་འཛིན་མངའ་ཐང་བརྟན། །གངས་ལྗོངས་བདེ་སྐྱིད་མཐའ་དམག་དུས་འཁྲུགས་ཞི། །རྫོགས་ལྡན་དུས་བཞིན་སྣོད་བཅུད་འབྱོར་པ་ཡི། །དགེ་མཚན་ནུབ་པ་མེད་པའི་དཔལ་སྩོལ་ཅིག །ཅེས་པའང་བི་ཛས་སོ། །༈ ན་མོ། དགོངས་སུ་གསོལ་ལོ་དཀོན་མཆོག་རྩ་བ་གསུམ། །མཁྱེན་པར་མཛོད་ཅིག་བརྒྱུད་གསུམ་དྲེགས་པའི་ཚོགས། །དེང་འདིར་རྣལ་འབྱོར་བདག་གིས་བསྐུལ་ལགས་ན། །མ་གཡེལ་མ་གཡེལ་དྲག་པོའི་ཕྲིན་ལས་མཛོད། །རྒྱལ་བསྟན་སྤྱི་དང་ཁྱད་པར་སྔ་འགྱུར་གྱི། །བསྟན་དང་བསྟན་འཛིན་ཡོངས་ལ་གནོད་པ་དང་། །བྱེ་བྲག་ཆོས་གྲྭ་ཆེན་པོ་འདི་ཉིད་ལ། །དོ་སྡོ་{བདོ}ཕོད་དུ་བཙུག་པའི་སྡང་བྱེད་རིགས། །ཞིང་བཅུ་ཚང་བའི་བསྟན་པ་སྤྱི་ཡི་དགྲ། །བླ་མའི་ཐུགས་དཀྲུགས་དགེ་འདུན་སྡེ་ལ་བརྙས། །ཆོས་སྲུང་ཁྱད་གསོད་སྔ་དགྲ་ལག་བརྡར་དང་། །ཕྱི་དགྲ་ཡིད་སེམས་ད་དགྲ་ཐད་དུ་བཙུགས། །དམག་སྣ་ཇག་སྣ་རྐུན་སྣ་བསྟན་མི་དང་། །ཁ་མཆུ་གྱོད་འཚོལ་ཟ་འདོད་སྙད་འདེགས་རིགས། །རི་རྒྱ་རྔོན་རྒྱ་ཆོས་ཁྲིམས་བཀའ་རྒྱ་ཕེད། །བསམ་ངན་སྦྱོར་རྩུབ་བྱད་མ་ལྷ་སྲུང་བཅས། །ཞལ་དུ་བཏབ་བོ་ལྷག་མ་མེད་པར་བཞེས། །ཕྱོགས་ལས་རྣམ་པར་རྒྱལ་པའི་དཔལ་སྩོལ་ཅིག །བླ་མའི་ཞབས་བརྟན་བཤད་སྒྲུབ་བསྟན་པ་དར། །དགེ་འདུན་སྡེ་རྒྱས་ཆོས་སྤྱོད་བྱ་བ་འཕེལ། །རྒྱལ་ཁམས་བདེ་སྐྱིད་མཐའ་དམག་དུས་འཁྲུགས་ཞི། །བསམ་དོན་ཡིད་བཞིན་འགྲུབ་པའི་ཕྲིན་ལས་མཛོད། །ཅེས་པའང་སྔགས་བན་ཞེ་སྡང་རྡོ་རྗེས་བྲིས་པ་དགེ །༈ ཀྱཻ། བསྟན་པའི་བདག་པོ་ཤཱཀྱ་སེང་གེ་ཡི། །བསྟན་པ་རིན་ཆེན་གཉེར་དུ་གཏད་མཛད་ལ། །བསྟན་སྐྱོང་རྒྱལ་ཆེན་སྡེ་བཞི་འཁོར་དང་བཅས། །བསྟན་པ་སྲུང་བའི་སླད་དུ་སྤྱན་འདྲེན་གཤེགས། །རབ་མཛེས་ནོར་བུའི་གཞལ་མེད་ཁང་བཟང་དབུས། །རབ་བརྗིད་རིན་ཆེན་ཁྲི་བཟང་དར་ཟབ་སྟེང་། །རབ་དགའི་སར་གནས་རྒྱལ་པོ་ཆེན་པོ་བཞི། །རབ་དགྱེས་མི་གཡོ་བརྟན་པར་བཞུགས་སུ་གསོལ། །ཚོགས་གཉིས་རྒྱ་མཚོའི་མཇིང་ལས་མངོན་སྣང་བའི། །དོན་གཉིས་ཕན་བདེའི་པད་ཚལ་བཞད་པའི་གཉེན། །རྐང་གཉིས་གཙོ་བོའི་གསུང་གི་རྒྱུད་འགྲོལ་བའི། །བསྟན་གཉིས་སྐྱོང་མཛད་ཁྱེད་ལ་ཕྱག་འཚལ་ལོ། །རྣམ་ཀུན་མི་འཛད་ཏིང་འཛིན་རོལ་མོའི་སྤྲིན། །རྣམ་བཀྲའི་མཆོད་ཚོགས་འདོད་ཡོན་ཟད་མེད་གཏེར། །རྣམ་མང་དགྱེས་རྒུར་འཆར་བའི་ལོངས་སྤྱོད་ཆེ། །རྣམ་མཁྱེན་རྒྱལ་བའི་བསྟན་སྲུང་ཁྱོད་ལ་འབུལ། །རྒྱལ་སྲས་འཕགས་པའི་གོ་འཕང་མངོན་བརྙེས་ཀྱང་། །རྒྱལ་བསྟན་སྐྱོང་ཕྱིར་འཇིག་རྟེན་ཆ་ལུགས་འཛིན། །རྒྱལ་བའི་བསྟན་སྲུང་ཡོངས་ཀྱི་རྗེེ་བོ་ཆེ། །རྒྱལ་པོ་ཆེན་པོ་བཞི་ཞེས་གྲགས་ལ་བསྟོད། །དགེ་ལེགས་རྒྱ་མཚོའི་འབྱུང་གནས་ཐུབ་བསྟན་རྒྱས། །དགེ་ལ་འདུན་པའི་བཤེས་གཉེན་ས་སྟེང་གང་། །དགེ་བཅུའི་ཆོས་ཀྱིས་སེམས་ཅན་བདེ་ཞིང་སྐྱིད། །དགེ་མཚན་དུ་མས་རྟག་ཏུ་ཤིས་མཛོད་ཀྱི། །བཀྲ་ཤིས་མཚན་རིང་བཀྲ་བའི་ཐུབ་ཆེན་གྱིས། །བཀྲ་ཤིས་བསྔགས་པའི་མེ་ཏོག་ཆར་བསིལ་བ། །བཀྲ་ཤིས་སྙན་དང་གྲགས་པའི་རྣམ་ཐར་འཆང། །བཀྲ་ཤིས་རྒྱལ་ཆེན་བཞི་ཡི་ཡུལ་འཁོར་སྲུང་། །བཀྲ་ཤིས་རྒྱལ་བའི་བསྟན་ལ་ལེགས་ཞུགས་ཤིང་། །བཀྲ་ཤིས་ཆོས་ལ་སྤྱོད་པའི་སྐལ་བཟང་བདག །བཀྲ་ཤིས་དཔལ་དང་འབྱོར་པ་མ་ལུས་རྒྱས། །བཀྲ་ཤིས་དཔལ་འབར་འཛམ་གླིང་ཀུན་ཁྱབ་མཛོད། །བཀྲ་ཤིས་དཔལ་མང་བརྩེགས་པའི་ལྷུན་པོ་མཐོ། །བཀྲ་ཤིས་ཉི་མའི་འོད་ཟེར་རབ་ཏུ་གསལ། །བཀྲ་ཤིས་གྲགས་པ་གསར་པས་ས་སྟེང་ཁྱབ། །བཀྲ་ཤིས་ཀུན་གྱིས་བཀྲ་ཤིས་རྒྱས་གྱུར་ཅིག །ཅེས་པའང་དབེན་པའི་རི་ངོགས་སུ་རང་གནས་བསམ་གཏན་གྱི་ཁང་བུ་གསར་དུ་བགྱིས་པའི། བཀྲ་ཤིས་འཆི་མེད་གྲུབ་པའི་དགའ་ཚལ་བཏགས་ཤིང་། རྒྱལ་ཆེན་བཞི་ལ་རྟེན་འབྱུང་གི་སྨོན་ཚིག་ཕྲིན་བཅོལ་ཤིས་བརྗོད་དུ་སྤྲུལ་མིང་པ་ཨོ་རྒྱན་ཐུགས་མཆོག་རྡོ་རྗེ་ཚེ་དབང་གྲུབ་པའི་མགོན་པོས་བརྗོད་པ་སྭ་སྟི་སིངྔྷི་མངྒལཾ་བྷ་ཝནྟུ།