འདའ་ཁའི་སྨོན་ལམ།
༄༅། །འདའ་ཁའི་སྨོན་ལམ། ན་མོ་གུ་རུ་བུདྡྷཱ་བོ་དྷི་ས་ཏྭ་ཡ། རབ་འབྱམས་ཕྱོགས་དུས་བདེ་གཤེགས་སྲས་དང་བཅས། །ཁྱད་པར་རྩ་གསུམ་དཀྱིལ་འཁོར་རྒྱ་མཚོའི་ཚོགས། །མདུན་གྱི་ནམ་མཁར་མངོན་སུམ་བཞུགས་ནས་ཀྱང་། །ཇི་ལྟར་སྨོན་པའི་འབྲས་བུ་མཆིས་པར་མཛོད། །ལེགས་བྱས་འདིས་མཚོན་དུས་གསུམ་བསགས་པ་ཡི། །དགེ་ཚོགས་མཐའ་དག་གཅིག་ཏུ་བསྡོམས་བྱས་ནས། །ཀུན་བཟང་མཆོད་པའི་སྤྲིན་དུ་ལེགས་དམིགས་ནས། །མཁའ་ཁྱབ་བླ་མ་རྒྱལ་བ་སྲས་བཅས་མཆོད། དེའི་མཐུས་བདག་དང་མཐའ་ཡས་སེམས་ཅན་རྣམས། །སྐྱེ་ཀུན་མཐོ་རིས་ཡོན་ཏན་རྫོགས་པའི་རྟེན། །ལེགས་རྙེད་དགེ་བའི་བཤེས་ཀྱིས་རྗེས་བཟུང་མཐུས། །རླབས་ཆེན་རྒྱལ་སྲས་སྤྱོད་ལ་འཇུག་པར་ཤོག །སངས་རྒྱས་རྒྱ་མཚོ་མཉེས་བྱས་དམ་ཆོས་འཛིན། །སེམས་ཅན་རྒྱ་མཚོ་ཡོངས་སྨིན་ཞིང་ཀུན་སྦྱངས། །སྨོན་ལམ་ཡེ་ཤེས་རྒྱ་མཚོ་མཐར་ཕྱིན་ནས། །དོན་གཉིས་ལྷུན་གྲུབ་ཆོས་ཀྱི་རྒྱལ་པོར་ཤོག །དཔལ་ལྡན་བླ་མའི་སྐུ་ཚེ་རབ་བརྟན་ཞིང་། །དགེ་འདུན་སྡེ་རྒྱས་བཤད་སྒྲུབ་མངའ་ཐང་དར། །རྒྱལ་ཁམས་བདེ་སྐྱིད་དགེ་བཅུའི་སྣང་བ་རྒྱས། །རྫོགས་ལྡན་དུས་བཞིན་སྣོད་བཅུད་འབྱོར་གྱུར་ཅིག །མདོར་ན་རྒྱལ་སྲས་འཇམ་དཔལ་ཀུན་བཟང་སོགས། །བློ་མཆོག་རྣམས་ཀྱིས་ཇི་ལྟར་བསྔོས་པ་དང་། །སྨོན་པའི་འབྲས་བུ་ཇི་བཞིན་མངོན་གྱུར་ཏེ། །ཆོས་ཀྱི་དབྱིངས་མཉམ་མི་ཟད་འཕེལ་གྱུར་ཅིག །བཀྲ་ཤིས་གང་ཞིག་མཆོག་གསུམ་བདེན་མཐུ་ཡིས། །མི་ཤིས་མཚན་མ་འགའ་ཡང་མི་འབྱུང་ཞིང་། །བདེ་ལེགས་བསམ་པ་ཡིད་བཞིན་འགྲུབ་པ་དང་། །དོན་གཉིས་ཕན་བདེའི་དགའ་སྟོན་རྒྱས་གྱུར་ཅིག །ཅེས་པའང་ཤཱཀྱའི་དགེ་སྦྱོང་རྒན་བུ་ཞེ་ཆེན་པ་འཇམ་དབྱངས་བློ་གྲོས་རྒྱ་མཚོས་བྲིས་པ་དགེ། །།