དཔལ་ལྡན་བླ་མ་རྡོ་རྗེ་འཆང་འགྱུར་མེད་པདྨ་རྣམ་རྒྱལ་གྱི་རྟོགས་བརྗོད་མདོར་བསྡུས་དད་པའི་འཇུག་ངོགས།

༄༅། །ཤྲཱིམཱནགུརུབཛྲདྷཱརཱཀྵརཔདྨབིཛཡསྱཱབདཱནསཱུཏྲཔིཎྜཤྲདྡྷཱཀཱུལནཱམཔིཧརཏིསྨ། །
༄༅། །དཔལ་ལྡན་བླ་མ་རྡོ་རྗེ་འཆང་འགྱུར་མེད་པདྨ་རྣམ་རྒྱལ་གྱི་རྟོགས་བརྗོད་མདོར་བསྡུས་དད་པའི་འཇུག་ངོགས་ཞེས་བྱ་བ་བཞུགས་སོ། །
༈ སྡེབ་སྦྱོར་ཕྱེད་མཉམ་པའི་བྲྀཏྟའི་ནང་གསེས་ལས་ཏོག་ལྡན་མ་ཞེས་བྱ་བ་དགེ། ས ཛ ས ག བྷ ར ན ག ག
༄༅། །ཀུ ལ བ ཛྲ ཙི ཏྟ ས ཀ ལ ཏྭཱ ཤྲཱི ས ག རཾ མ ཧཱ སུ ཁ ཛི པ དྨ །
༄༅། །རྡོ་རྗེ་སེམས་དཔའ་རིགས་རྣམས་ཀུན་གྱི་བདག །དཔལ་གྱི་འབྱུང་གནས་བདེ་ཆེན་པདྨའི་རྒྱལ། །ས ཛ ས ག བྷ ར ན ག ག
༄༅། །ག ཏ ཛཱ ལ ནཱ ཊ ཤ ཏ མྲྀ ཏྟི བྷྲ དི སུ བཛྲ མཱ ཏྐུ ཤ ལ དེ ཧཱི །
༄༅། །ཡེ་ཤེས་སྒྱུ་མའི་གར་གྱིས་ས་གསུམ་གཡོ། །དཔལ་ལྡན་དང་པོའི་རྡོ་རྗེས་ཤིས་པ་སྩོལ། །དུས་གསུམ་རྒྱལ་བ་སྲས་དང་བཅས་པའི་ཡེ་ཤེས་གཅིག་ཏུ་བསྡུས་པའི་སྐུ། །མཁྱེན་བརྩེ་ནུས་པ་ནམ་མཁའི་མཐའ་ཀླས་ཟབ་རྒྱས་ཆོས་ཀྱི་གསུང་དབྱངས་སྒྲོགས། །གང་ཐུགས་འོད་གསལ་ཆོས་དབྱིངས་ཆེན་པོར་རྟག་ཏུ་མི་གཡོ་སྙོམས་པར་འཇུག །སྐྱབས་ཀུན་འདུས་ཞལ་རིགས་རྣམས་ཀུན་བདག་དཔལ་ལྡན་བླ་མར་ཕྱག་བགྱིའོ། །གཟོད་ནས་མངོན་པར་བྱང་ཆུབ་མཆོག་བརྙེས་ཀྱང་། །ཐུགས་རྗེས་ཕྱག་གིས་སྲིད་འདི་མི་གཏོང་ཞིང་། །ཤཱཀྱའི་རྒྱལ་ཚབ་མཚོ་སྐྱེས་རྡོ་རྗེ་ཡི། །ཞབས་ལ་ཡན་ལག་མཆོག་གི་གུས་པས་བཏུད། །གངས་རིའི་ཁྲོད་འདིར་མདོ་སྔགས་ཤིང་རྟ་རྣམས། །འདྲེན་མཛད་ཆོས་རྒྱལ་སྤྲུལ་པའི་ལོ་པཎ་དང་། །བཀའ་གཏེར་བཤད་སྒྲུབ་རིག་འཛིན་བརྒྱུད་པ་ལ། །མི་ཕྱེད་གུས་པའི་མེ་ཏོག་ཡང་ཡང་འཐོར། །རྒྱལ་ཀུན་གསང་བའི་མཛོད་འཛིན་ལག་ན་རྡོ་རྗེ་ཅན། །འཇིག་རྟེན་མིག་གཅིག་ལོ་ཙཱ་ཆེན་པོ་རྣམ་སྣང་སྲུངས། །འགྱུར་མེད་བདེན་དོན་གཟིགས་མཁས་ཡེ་ཤེས་རྡོ་རྗེའི་སྐུ། །སྔ་འགྱུར་བསྟན་པའི་ཉི་མ་གཏེར་ཆེན་བླ་མར་འདུད། །འཇམ་དཔལ་དབྱངས་དངོས་མཁྱེན་དང་བརྩེ་བའི་གཏེར། །ཆོས་ཀྱི་ཤིང་རྟ་བློ་གྲོས་ཕ་མཐའ་ཡས། །ཕྱོགས་ལས་རྣམ་རྒྱལ་མི་ཕམ་ཆོས་ཀྱི་རྗེ། །འཇམ་མགོན་ཡབ་སྲས་སྙིང་གི་པདྨོར་རོལ། །གང་གི་གསང་བ་གསུམ་གྱིས་བྱིན་བརླབས་པ། །འཇམ་དབྱངས་བླ་མ་མཁས་གྲུབ་རྒྱ་མཚོའི་སྡེ། །རྩོད་དུས་ཀུན་མཁྱེན་གཉིས་པའི་རྣམ་ཐར་མངའ། །རབ་འབྱམས་ཤེས་བྱ་ཀུན་གཟིགས་ཆོས་ཀྱི་རྗེ། །རྣམ་ཐར་རྒྱ་མཚོའི་ཀླུང་ཆེན་འཁྱིལ་བ་ལ། །རྨོངས་བློས་སྐྲ་རྩེས་བགྲང་བར་མི་ནུས་ཀྱང་། །རང་གཞན་དད་པའི་གསོས་སུ་འགྱུར་བའི་ཕྱིར། །ཤས་ཙམ་བརྗོད་འདིར་བླ་མས་ཤིས་པ་སྩོལ། །ཅེས་གུས་པའི་ཕྱག་དང་ཤིས་པའི་ཚིག་གི་དགེ་ལེགས་ཀྱི་པད་ཚལ་ཡངས་པོར་ཕྱེས་ནས། གང་གླེང་བར་བྱ་བ་ནི། བདག་ཅག་རྣམས་ཀྱི་སྐྱབས་གཅིག སྙིགས་དུས་བསྟན་འགྲོའི་དཔུང་གཉེན་མ་རིག་མུན་པ་སེལ་བའི་སྒྲོན་མེ་འཁོར་བའི་རྒྱ་མཚོ་ལས་བརྒལ་ནས་ཡང་དག་ཐར་གླིང་བགྲོད་པའི་དེད་དཔོན་ཁམས་གསུམ་འགྲོ་བ་ལྷ་དང་བཅས་པའི་གཙུག་གི་ནོར་བུ་འོད་སྟོང་འཕྲོ་བས་ཞབས་ཀྱི་པདྨོ་ལ་འདུད་པ། ཆོས་ཀྱི་རྗེ། ཆོས་ཀྱི་དབང་ཕྱུག ཆོས་དམ་པའི་འབྱོར་པ་ཕུན་སུམ་ཚོགས་པས་བརྒྱན་པ་མཚན་བརྗོད་པར་དཀའ་ཡང་། དོན་གྱི་སླད་དུ་མཚན་ནས་སྨོས་ན། ༧འགྱུར་མེད་པདྨ་བསྟན་འཛིན་མཁས་གྲུབ་རྒྱ་མཚོའི་སྡེའམ་ཨོ་རྒྱན་ཐུགས་མཆོག་རྡོ་རྗེ་ཚེ་དབང་གྲུབ་པའི་མགོན་པོ་ཞེས་མཚན་གྱི་སྙན་པ་སྲིད་ཞིའི་བླ་ན་མངོན་པར་མཐོ་བ་འདི་ཉིད། ངེས་པའི་དོན་དུ་སྲིད་ཞི་ཀུན་གྱི་མགོན་པོ་ཁྱབ་བདག་འོད་མི་འགྱུར་བའི་ངོ་བོར་བཞུགས་ཤིང་འཕོ་འགྱུར་སྤྲོས་པའི་མཚན་མ་རྡུལ་ཙམ་མ་དམིགས་ཀྱང་། དམིགས་མེད་ཡེ་ཤེས་ཆེན་པོའི་ཐུགས་རྗེའི་རང་གདངས་འགགས་པ་མེད་པ་ལས། རང་སྣང་འོག་མིན་ཆེན་པོར་ལོངས་སྤྱོད་རྫོགས་པ་སྐུ་ཡི་ཞིང་ཁམས་ཀྱི་སྤྲིན་ཆེན་པོ་ཚད་མེད་པ་བཀོད་དེ། རང་ལས་དགོངས་པ་མི་གཞན་པའི་རིགས་ལྔའི་འཁོར་རྒྱལ་བ་རྒྱ་མཚོར་རང་སྣང་གི་དགོངས་པའི་ཆོ་འཕྲུལ་མཐའ་ཀླས་པ་རྒྱལ་བ་ཉིད་ཀྱི་སྤྱོད་ཡུལ་ཁོ་ནར་གྱུར་པ་དང་། དེ་ལས་མེ་ལོང་གི་བྱད་ལྟར་ཕྱེད་སྤྲུལ་ལོངས་སྐུའི་ཞིང་དུ་རྒྱུད་ཐ་དད་པའི་འཁོར་རྒྱལ་བ་སེམས་དཔའ་དང་རིག་འཛིན་དཔའ་བོ་མཁའ་འགྲོ་བསམ་གྱིས་མི་ཁྱབ་པ་ལ། སྟོན་པ་རིགས་ལྔའི་སངས་རྒྱས་ཀྱིས་འདུལ་ཐབས་ཚད་མེད་པས་ལུང་དུ་སྟོན་པ་དང་། དབུགས་དབྱུང་བས་འབྲས་བུའི་ས་མཆོག་ལ་སྦྱོར་བར་མཛད་ཅིང་ཞིང་དང་སྟོན་པ་དེ་ཡི་བྱིན་རླབས་ཀྱིས་མ་དག་འཇིག་རྟེན་གྱི་ཁམས་སུ་འགྲོ་འདུལ་སྤྲུལ་པ་ཚད་མེད་པ་བྱིས་བློས་དཔག་པར་དཀའ་བའི་བཟོ་དང་སྐྱེ་བ་སོགས་དག་དང་མ་དག་གི་རོལ་པ་ཅིར་ཡང་འཆར་བ་དང་། དེ་ལས་ཁྱད་པར་དུ་མཆོག་གི་སྤྲུལ་པའི་སྐུ་སྤངས་རྟོགས་ཀྱི་ཡོན་ཏན་རྒྱ་མཚོའི་མངའ་བདག་རྐང་གཉིས་རྣམས་ཀྱི་ཁྱུ་མཆོག་ཐུབ་དབང་ཤཱཀྱའི་རྒྱལ་པོ་སོགས་ཀྱི་སྐུ་ཡི་སྣང་བ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཚད་མེད་པའི་གདུལ་བྱ་རྣམས་ལ་ཆོ་འཕྲུལ་ཆེན་པོའི་འདུལ་བ་རྣམ་པ་བཞིས་སྒོ་ནས་ནམ་མཁའ་ཇི་སྲིད་ཀྱི་བར་དུ་འགྲོ་བའི་དོན་མཐའ་ཡས་པ་འབྱུང་བ་ལས། བྱེ་བྲག་འཛམ་གླིང་ཆུང་ངུའི་ཡུལ་དབུས་ཀྱི་ལྟེ་བ་བྱང་ཆུབ་ཀྱི་ལྗོན་པས་མཚན་པའི་གནས་མ་ག་དྷ་རྡོ་རྗེའི་གདན་ནས་བྱང་ནས་བྱང་དུ་བགྲོོད་པ་ན། ས་ཡི་ཆ་ཐམས་ཅད་གླང་ཆེན་གྱི་གཙུག་ལྟར་མཐོ་ཞིང་གངས་རིའི་ཕྲེང་བས་བསྐོར་བའི་ལྗོངས་གཙང་ཞིང་བསིལ་ལ་མི་རྣམས་དཀར་པོའི་ཆོས་ལ་སྤྱོད་པའི་སྐལ་བ་ཅན་སྙིང་རྗེའི་དབང་ཕྱུག་འཕགས་མཆོག་ལག་ན་པདྨོའི་ཕྱག་མཚན་དུ་བཞེས་པའི་བོད་ཁ་བ་ཅན་གྱི་ལྗོངས་འདིར་སྙིང་རྗེའི་དབང་ཕྱུག་གི་ཐུགས་རྗེའི་ཟླ་གཟུགས་གདུལ་བྱའི་དད་མོས་ཀྱི་དྭངས་ཤེལ་གཙང་མའི་ས་གཞིར་འཕོས་པ་ལས། སྐྱེ་དགུའི་བསོད་ནམས་ཀྱི་མགོན་དུ་བྱོན་པའི་སྤྲུལ་པའི་རྒྱལ་པོ་ཆོས་རྒྱལ་མེས་དབོན་རྣམ་གསུམ་གྱི་ཐུགས་བསྐྱེད་མཚུངས་པ་མེད་པའི་ཤིང་རྟས་རྫོགས་ལྡན་ཆོས་ཀྱི་སྣང་བའི་དགའ་སྟོན་གསར་དུ་འདྲེན་པའི་དཔུང་གཉེན་དུ། ཨ་ཌི་ཡཱ་ནའི་སློབ་དཔོན་ཆེན་པོ་པདྨ་ལས་གྲོལ་སྤྱན་དྲངས་པའི་ཐུགས་རྗེའི་བྱིན་རླབས་ཀྱི་སྤྲིན་ཆེན་པོ་ལྗོངས་འདིའི་མཁའ་ལ་ནུབ་པ་མེད་པར་རྟག་ཏུ་འཆར་བ་ལས་ཉིད་དང་དགོངས་པ་མཉམ་པའི་རྗེ་འབངས་རིག་འཛིན་གྲུབ་ཐོབ་རྒྱ་མཚོ་རྣམས་ཀྱི་དངོས་དང་བྱིན་གྱིས་བརླབས་པའི་སྤྲུལ་པ་བྱམས་ཆེན་རྒྱལ་བའི་བསྟན་པ་མ་ཤར་གྱི་བར་དུ་དངོས་སྦས་ཅི་རིགས་པར་བྱོན་པ་ལ། དུས་ལས་ཡོལ་བ་ཅུང་ཟད་ཀྱང་མངའ་བ་མ་ལགས་ཏེ། ལས་བརྒྱ་པ་ལས། རྒྱ་མཚོ་ཆུ་སྲིན་གནས་རྣམས་ཀྱི། །དུས་རླབས་ཡོལ་བར་འགྱུར་སྲིད་ཀྱི། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་མི་མངའ། །ཞེས་དང་། ཡིད་བཞིན་རྣམ་པར་བཀོད་པའི་རྒྱུད་ལས། སེམས་ཅན་ཀུན་གྱི་ཚོགས་ཆེན་པོར། །ཇི་སྲིད་རྣམ་པར་གནས་དེ་སྲིད། །སངས་རྒྱས་སྤྲུལ་པ་རྒྱུན་མི་ཆད། །གྲོལ་བའི་ཆོས་ཀྱང་ནུབ་པ་མེད། །ཅེས་དང་། རྒྱལ་ཚབ་བྱམས་མགོན་ཆེན་པོས། དེ་ཡིས་ཆོས་ཀུན་སྒྱུ་མ་ལྟ་བུ་དང་། །སྐྱེ་བ་སྐྱེད་མོས་ཚལ་འགྲོ་ལྟར་རྟོགས་ནས། །འབྱོར་པའི་དུས་དང་རྒུད་པའི་དུས་ནའང་བདེ། །ཉོན་མོངས་སྡུག་བསྔལ་དག་གིས་འཇིགས་པ་མེད། །ཅེས་གསུངས་པ་ལྟར་རོ། །དེས་ན་རྒྱལ་སྲས་བྱང་ཆུབ་སེམས་དཔའ་ཆེན་པོ་རྣམས་ནི། འཁོར་བ་ན་ཉེས་པའི་སྐྱོན་གྱིས་མ་གོས་པ་འདམ་གྱི་པདྨ་ལྟར་དག་ཅིང་གཙང་བ། བྱ་དཀའི་གནས་སོགས་ལ་སྐྱོ་ངལ་མེད་པ། གཞན་གྱི་དོན་གཙོ་བོར་བྱེད་ཅིང་རང་བདེ་དོན་གཉེར་གྱི་ཞི་བའི་མཐའ་ལ་གཞོལ་བའི་སྐབས་མ་མཆིས་ཤིང་། སྙིང་རྗེའི་གཞན་དབང་གི་ཆུ་གཏེར་ཆེན་པོ་གཡས་སུ་འཁྱིལ་བར་དཔལ་ལྡན་བྱང་ཆུབ་སེམས་ཀྱི་ཀླུ་དབང་དགྱེས་པར་རོལ་པ་ལ། བསྡུ་བ་རྣམ་བཞི་སོགས་བྱང་ཆུབ་སྤྱོད་པའི་ཆུ་ཀླུང་ཆེན་པོ་དལ་གྱིས་འབབ་པས་བསྟན་འགྲོའི་སྙིགས་མའི་དུས་ཀྱི་རྒུད་པའི་མེ་དབལ་དྲག་པོས་གཟིར་བ་རྣམས་བྱམས་ཐུགས་བརྩེ་བའི་ཆབ་ཀྱིས་ལེགས་པར་བསིལ་བར་མཛད་པའི་ངལ་གསོའི་གོ་འཕང་མཆོག་སྦྱིན་པ་ལ་ནམ་ཡང་བསྙེལ་བ་མེད་པའི་སྙིང་སྟོབས་ཀྱི་རྡོ་རྗེའི་ཡ་ལད་བགོས་ཤིང་། བསླབ་པའི་ཚུལ་ཁྲིམས་ཀྱི་ནོར་བུ་རིན་པོ་ཆེའི་འབྱོར་པ་ཕུན་སུམ་ཚོགས་པས་ཡོངས་སུ་ཕྱུག་པའི་རྣམ་རྒྱལ་ལྷ་ཡི་བ་གམ་མཐོན་པོར་ཏིང་ངེ་འཛིན་གྱི་ལུས་སྟོབས་རབ་ཏུ་རྒྱས་ཤིང་། མི་བརྗེད་པའི་གཟུངས་དང་སྤོབས་པ་མངོན་ཤེས་དྲན་པའི་དཔལ་ཕུན་སུམ་ཚོགས་པ་དང་། ཚད་མེད་རྣམ་བཞིའི་ཡན་ལག་བཟང་པོ་དང་ལྡན་པ། ལྷག་པའི་ཤེས་རབ་ཀྱི་རལ་གྲི་སྔོ་སངས་ནམ་མཁའི་མདངས་འོད་ཀྱིིས་མུན་པའི་ཁང་བུར་ཞུགས་པའི་ཐེ་ཚོམ་གྱི་བློ་ཅན་དང་། གཞན་འཕྲུལ་བདག་པོའི་མདའ་ལྔ་སྙིང་ལ་ཟུག་པ་སྡེར་བཅས་ཀྱི་མགོ་བོ་དྲུང་ནས་གཅོད་ཅིང་། སྐལ་ལྡན་ལས་འཕྲོ་ཅན་རྣམས་བློ་གྲོས་ཀྱི་པདྨོ་ཡོངས་སུ་འབྱེད་པར་མཛད་པའི་བསྟན་འཛིན་གྱི་སྐྱེས་བུ། མཁས་པ་དང་གྲུབ་པའི་གོ་འཕང་མཐོན་པོར་གཤེགས་པས་རང་སྣང་དབང་དུ་འདུས་ཤིང་གཞན་སྣང་ཟིལ་གྱིས་གནོན་པ་ལ་ཞུམ་པ་མེད་ཅིང་། ཕྲིན་ལས་རྣམ་བཞི་འབད་མེད་དུ་གྲུབ་པ་དང་། ཐུགས་ཀྱི་དགོངས་པ་གཏད་པ་ཙམ་གྱིས་མོད་ལ་ཀུན་བཟང་ཆོས་སྐུའི་དགོངས་པ་མངོན་སུམ་ལག་མཐིལ་དུ་སྟོན་པར་ནུས་པའི་རིགས་ཀྱི་རིག་པ་འཛིན་པའི་འཁོར་ལོས་སྒྱུར་བ་ཆེན་པོ་འདི་ཉིད་ཀྱི་སྐུ་སྐྱེ་བའི་ཕྲེང་བ་ནི། བོད་ཆེན་པོའི་ལྗོངས་འདིར་སྔ་འགྱུར་བསྟན་པའི་སྣང་བྱེད་མཚུངས་ཟླ་མ་མཆིས་པ་ཁམས་གསུམ་ཆོས་ཀྱི་རྒྱལ་པོ་གྲུབ་དབང་རྫོགས་ཆེན་པ་པདྨ་རིག་འཛིན་ཞེས་སངས་རྒྱས་རིན་ཆེན་གཙུག་གཏོར་ཅན་དང་རྣམ་དབྱེར་མ་མཆིས་པ་དེ་ཉིད་ཀྱི་ཐུགས་སྲས་ཡོངས་ཀྱི་ཐུ་བོ། དེ་བཞིན་གཤེགས་པ་མྱ་ངན་མེད་པའི་དཔལ་གྱི་རྣམ་འཕྲུལ་ཞྭ་ལམ་རབ་འབྱམས་པ་ཆེན་པོ་བསྟན་པའི་རྒྱལ་མཚན་གྱི་ཆོས་ཀྱི་སྲས་གཅིག་པུར་གྱུར་པ་གྲུབ་དབང་པདྨ་རྒྱལ་མཚན་ཞེས་སྒྲུབ་བརྩོན་རྣལ་འབྱོར་གྱི་དབང་ཕྱུག་ཆེན་པོ་དེ་ཉིད་ནི་འཕགས་ཡུལ་གྱི་གྲུབ་པའི་སློབ་དཔོན་ཆེན་པོ་པྲ་བྷཱ་ཧ་སྟི། གནུབས་སྟོན་ནམ་མཁའི་སྙིང་པོ། བླ་ཆེན་དགོངས་པ་རབ་གསལ། ལང་ལབ་བྱང་ཆུབ་རྡོ་རྗེ། རྗེ་བཙུན་ཏཱ་ར་ན་ཐ། རིག་འཛིན་གཏེར་བདག་གླིིང་པ་སོགས་དང་། གཞན་ཡང་རྒྱལ་ཚབ་བསྟན་འཛིན་ཆོས་རྒྱལ་ལ་རྗེ་བཙུན་མི་ལས་ཞལ་གཟིགས་ཏེ་ཁྱོད་ཁོ་བོའི་ཐུགས་སྲས་རས་ཆུང་པའི་སྐྱེ་བ་ཡིན། ད་དུང་ཀྱང་རས་པ་ཞི་བ་འོད་དང་། དྭགས་པོ་རིན་པོ་ཆེའི་རྣམ་འཕྲུལ་ཁྱེད་ཀྱི་སྐྱེ་མཐའ་མིང་ཐོགས་པ་ལ་འབྱུང་ཞེས་ལུང་བསྟན་པ་ལྟར་བདག་ཅག་གི་དཔལ་མགོན་བླ་མ་འདི་སྙི་སྒོམ་ཆེན་པོའི་རྣམ་རོལ་དུ་གྲགས་པས་དྭགས་ཞུ་དབུ་ལ་བཞེས་པ་ཙམ་གྱིས་གདུལ་བྱ་རྣམས་ཀྱིས་མཇལ་ཚེ་ཐ་མལ་གྱི་སྣང་བ་རང་འགགས་སུ་འགྲོ་བའི་དད་མོས་དབང་མེད་དུ་སྐྱེ་བ་ཞིག་ཡོད་པར་གྲགས་པས་མཚོན་འགྲན་བྲལ་གྱི་མཁས་གྲུབ་དུ་མའི་སྐྱེ་བའི་ཕྲེང་བ་བརྒྱུད་མར་བྱོན་པའི་མཐར། རྗེ་འདི་ཉིད་མདོ་ཁམས་ལྷོ་རྒྱུད་དུ་འཁྲུངས། དགུང་ལོ་བཅུ་གསུམ་པའི་ཐོག་ནས་ཆོས་བྲོས་ལ་བྱོན་ཏེ་ཚེ་རབས་ནས་འབྲེལ་བའི་བླ་མ་རབ་འབྱམས་བསྟན་པའི་རྒྱལ་མཚན་གྱི་ཞབས་པད་མཉེས་པ་གསུམ་གྱིས་བསྟེན་ནས་ལོ་དགུའི་བར་འབྲལ་མེད་དུ་འགྲོགས་ཅིང་གདམས་ངག་གི་ཞུན་ཐར་བཅད། རྗེ་རབ་འབྱམས་པ་གཤེགས་རྗེས། ཁོང་རང་དགུ་གྲངས་ཉེར་དྲུག་ནས་བརྩམས་སྐབས་གསེང་ཕྲན་བུ་མ་གཏོགས་སྒྲུབ་པ་ཉམས་ལེན་ཁོ་ན་གཙོ་བོར་བཏོན་པས། ཁྱོན་དྲིལ་ལོ་མཚམས་ཞེ་བདུན་སོང་། བར་སྐབས་རྣམས་སུ་རྗེ་རབ་འབྱམས་པའི་ཡང་སྲིད་ཁྲི་འདོན་དང་། ཕྱིས་ཆོས་གྲྭ་འདི་ཉིད་བཞེངས་པའི་སྐབས་སོགས་སུ་ཞབས་ཏོག་ཕུལ་དུ་བྱུང་བར་མཛད་པས་ཆོས་སྡེ་འདི་ཉིད་ཚུགས་པའི་བདག་རྐྱེན་ཐུན་མིན་གྲུབ་དབང་འདི་དང་། རྭ་ལོ་རྡོ་རྗེ་གྲགས་པའི་རྣམ་འཕྲུལ་སིབ་རྫོགས་ཆེན་དགོན་པའི་བླ་མ་ཨོ་རྒྱན་བསམ་བསྟན་སྐུ་ཕྲེང་གོང་འོག་ཡིན་པ་རབ་འབྱམས་གཉིས་པའི་རྣམ་ཐར་དུ་གསལ། བླ་མ་དང་ལྷག་པའི་ལྷས་རྗེས་སུ་བཟུང་བས་མི་མིན་འབྱུང་པོ་དམ་ལ་ཉན། དབུ་རལ་གྱིས་མཚོན་ཆའི་འཇིགས་པ་བསྲུང་བ་སོགས་གྲུབ་པའི་རྟགས་མཚན་མངོན་དུ་བརྙེས། སྐུ་གཤེགས་སྐབས་ས་གཡོ་བ་སོགས་སྐྱེས་བུ་དམ་པ་ས་ནས་སར་འཕར་བའི་ལམ་རྟགས་ཡ་མཚན་པ་དང་། སྐུ་གདུང་ཞུགས་ལ་ཕུལ་བར་དབུ་ཐོད་མ་ཉམས་པར་བཛྲ་གུ་རུ་རང་བྱོན་གསལ་དག་དང་། ཐུགས་ཞུན་ཐིགས་ལྕགས་གཅོད་དབང་མདོག་ཏུ་འགྲིལ་བ་སོགས་རྡོ་རྗེ་འཛིན་པ་མཆོག་གི་ཆེ་བའི་ཡོན་ཏན་རྫོགས་པ་དེས། སྔར་རང་ཉིད་ཞལ་བཞུགས་དུས་ནས་ལུང་བསྟན་པ་བཞིན་དུ། མངའ་བདག་ཆོས་ཀྱི་རྒྱལ་པོའི་གདུང་བརྒྱུད་ཅིག་ཁམས་སུ་འཕོས་པར་གྲགས་ཤིང་སྤྲུལ་པའི་གཏེར་ཆེན་ཡོན་སྨྱོོན་མི་འགྱུར་རྡོོ་རྗེ་སོགས་མཁས་གྲུབ་ཀྱི་སྐྱེས་ཆེན་དུ་མ་བྱོན་པའི་དབོན་བརྒྱུད་རིགས་རུས་ཆོ་འབྲང་ཕུན་སུམ་ཚོགས་པར་ལྕགས་འབྲུག་ཧོར་ཟླ་དང་པོའི་ཚེས་གཅིག་ལ་རིགས་ཞང་སེ་བོ་སྔགས་པ་ཉི་མ་ཐག་བཏོད་ཀྱི་ཁྱིམ་དུ་ངོ་མཚར་བའི་ལྟས་དང་བཅས་ཏེ་འཁྲུངས། ཟླ་ངོ་མཐོང་ཙམ་ནས་ང་བླ་མ་པད་རྒྱལ་ཡིན་ཡང་ཡང་གསུངས་པ་དང་། སི་ཏུ་ཀུན་མཁྱེན་དྷརྨ་ཀ་ར་སོགས་ཀྱིས་ལུང་བསྟན་པ་བཞིན་རྗེ་དབོན་སངས་རྒྱས་རབ་བརྟན་སོགས་ཀྱིས་གོང་མའི་གདན་ས་ལྕང་བྲག་རི་ཁྲོད་དུ་སྤྱན་དྲངས། སིབ་སྤྲུལ་པདྨ་དབང་རྒྱལ་གྱིས་གཙུག་ཕུད་བཞེས་ནས་མཚན་པདྨ་གསང་སྔགས་བསྟན་འཛིན་དུ་གསོལ། གདུང་གྲངས་བདུན་པའི་ཐོག་ནས་ཞེ་ཆེན་དུ་བྱོན་ནས་རབ་འབྱམས་གཉིས་པའི་ཞབས་པད་བསྟེན། བླ་སློབ་སྐྱེ་བ་དུ་མར་འབྲེལ་བ་དང་། སྐུ་ཚེ་འདིར་ཡང་དོན་བརྒྱུད་ཀྱི་རྒྱལ་ས་འཛིན་པའི་རྟེན་འབྱུང་ལ་དགོངས་པའི་དགྱེས་པའི་དབུགས་དབྱུང་བཅས་ཟབ་རྒྱས་ཀྱི་གདམས་པ་རྒྱ་མཚོ་ལྟ་བུས་རྗེས་སུ་བཟུང་། ལྷག་པར་ཕུར་པའི་སྒྲོལ་དབང་གི་སྐབས་སུ་བླ་མ་རྡོ་རྗེ་གཞོན་ནུའི་སྐུར་མངོན་སུམ་དུ་གཟིགས་ཤིང་རང་ཉིད་ལང་ལབ་བྱང་ཆུབ་རྡོ་རྗེ་ཡིན་པའི་ཐུགས་ཤེས་གསལ་པོར་འཁྲུངས། གཞན་ཡང་དུས་སྔ་ཕྱི་ཅི་རིགས་པར་གནུབས་ནམ་སྙིང་། བླ་ཆེན་དགོངས་པ་རབ་གསལ། ཇོ་ནང་རྗེ་བཙུན། སྨིན་གླིང་གཏེར་ཆེན་སོགས་ངོས་ཟིན་པ་དང་། མི་ཟིན་པའི། རྒྱལ་པོ། རབ་བྱུང་། སྔགས་འཆང་། གཏེར་སྟོན། ཁྱིམ་པ། བུད་མེད། རྣལ་འབྱོར་པ་སོགས་སྐུ་སྐྱེ་སྔ་མའི་བག་ཆགས་མང་པོ་སད་པའི་རྐྱེན་གྱིས་མཁྱེན་རྟོགས་ཀློང་ནས་རྡོལ། དགུང་ལོ་བརྒྱད་པའི་ཐོག་དག་པའི་སྣང་བར་གུ་རུ་རིན་པོ་ཆེ་མཇལ་ཞིང་གསོལ་བ་བཏབ་པས་གུ་རུའི་ཐུགས་ཀ་ནས་འཇའ་འོད་སྣ་ལྔའི་ཟེར་ཐག་འཕྲོས་པ་སྐུ་ལ་ཕོག་པའི་རྐྱེན་གྱིས་གུ་རུའི་སྐུ་དང་དབྱེར་མེད་དུ་འདྲེས་ནས་རིག་པ་གཏད་མེད་དུ་སོང་སྟེ་ཐུགས་རྒྱུད་ཀྱི་བྱིན་རླབས་འཕོས་པ་སོགས་དག་པའི་གཟིགས་སྣང་མཐའ་ཡས་པ་ཤར། དགུང་གྲངས་བཅུ་གཅིག་པའི་མཇུག་ཐོག་རྗེ་རབ་འབྱམས་པས་སྐུ་གསུང་ཐུགས་ཀྱི་བྱིན་རླབས་འཕོ་བའི་དབང་བསྐུར་དང་བཅས་ཏེ་དོན་གྱི་བསྟན་པ་གཏད་ནས་རྒྱལ་ཚབ་ཏུ་མངའ་གསོལ་ཏེ་སྤྲུལ་པ་བསྡུས་པས། བཅུ་གཅིག་ནས་གཞན་དོན་ཀྱི་ཕྲིན་ལས་སྐྱོང། རྡོར་བྲག་ཞབས་དྲུང་པདྨའི་མཚན་ཅན་གྱིས་དག་སྣང་པདྨ་དྲག་པོའི་ཆོས་བདག་དང་ནམ་སྙིང་སྤྲུལ་པར་དབུགས་དབྱུང་། ཀཿཐོག་རྨོག་གྲུབ་ནམ་མཁའ་ཆོས་དབང་ནས་དག་སྣང་མཁའ་འགྲོ་བཀའ་བརྒྱད་ཀྱི་ཆོས་བདག་དང་སློབ་དཔོན་པྲ་བྷ་ཧཱ་སྟིའི་རྣམ་འཕྲུལ་དུ་ངོས་བཟུང་ནས་ཀེའུ་སྟོད་འགྱིང་བ་བྲག་དཀར་དུ་ཚེ་གཅིག་སྒྲུབ་ལ་གཞོལ་ན་ཟག་ཟད་འོད་སྐུར་གྲོལ་བར་ལུང་བསྟན། གཞན་ཡང་སྨིན་གླིང་ཁྲི་ཆེན། དཔལ་རི་སྤྲུལ་སྐུ། ཀོང་པོ་གཏེར་ཆེན་སོགས་དམ་པ་རྣམས་ཀྱིས་བསླུ་མེད་རྡོ་རྗེའི་ལུང་གིས་མགྲིན་གཅིག་ཏུ་བསྔགས། སྔ་ཕྱི་ཅི་རིགས་པར་གོང་སྨོས་ཀྱི་དམ་པ་དེ་རྣམས་དང་། མཁན་ཆེན་ཨ་ཌི་ཡཱ་ན། གཙང་སྒྲུབ་ཆེན་པདྨ་བཤེས་གཉེན། ལྕགས་ཟོམ་པ་བསྟན་འཛིན་ཡེ་ཤེས་ལྷུན་གྲུབ། རྫོགས་སྤྲུལ་ངེས་དོན་བསྟན་བཟང་། ཀཿཐོག་དྲི་མེད་ཞིང་སྐྱོང་། པཎ་ཆེན་ཚེ་དབང་མཆོག་གྲུབ། ཀུན་བཟང་ངེས་དོན་དབང་པོ། རྗེ་དབོན་པདྨ་ཀུན་གྲོལ། འདྲེན་མཆོག་རིག་འཛིན་བཟང་པོ། ཕུ་ཁུང་པདྨ་རིན་ཆེན། གྲུབ་དབང་འཇིགས་མེད་ཕྲིན་ལས་འོད་ཟེར། འབར་ཆུང་འཇིགས་མེད་གོ་ཆ་སྐུ་མཆེད་སོགས་དང་། སི་ཏུ་ཀུན་མཁྱེན་དྷརྨ་ཀ་ར། ཞྭ་ལུ་མཁན་ཆེན་ཀུན་དགའ་མཁྱེན་རབ། ར་ཉག་གྲུབ་ཆེན་བློ་བཟང་མཐུ་སྟོབས་སོགས་གྲུབ་མཐའ་རིས་མེད་ཀྱི་སྐྱེས་ཆེན་དུ་མའི་ཞབས་པད་བསྟེན་ནས་ཟབ་རྒྱས་ཀྱི་གདམས་པ་མཐའ་ཡས་པ་གསན་ཅིང་ཐུགས་ཉམས་སུ་བསྟར་བས་སྣང་སྤྱོད་ཐམས་ཅད་དག་པ་ཡེ་ཤེས་ཀྱི་འཁོར་ལོར་འབྱམས་ཀླས་པས་གཟུང་འཛིན་གྱི་མཚན་མ་དབྱིངས་སུ་དག མཉམ་བཞག་འོད་གསལ་རྣམ་པར་མི་རྟོག་པའི་ངང་ནས་རྗེས་ཐོབ་གང་ཤར་རང་གྲོལ་མཉམ་ཡང་ཕྱམ་བདལ་གྱི་དགོངས་པ་རང་བྱུང་རང་ཤར་དུ་འཁྲུངས་པ་ལས་མཉམ་རྗེས་རེས་འཇོག་གི་ཤུན་པ་བུད་ནས་རིས་མེད་འོད་གསལ་འཁོར་ཡུག་གི་ཏིང་ངེ་འཛིན་ལ་རང་དབང་འབྱོར་ཏེ། གྲུབ་ཆེན་ས་ར་ཧ། ཨོ་རྒྱན་ཆེན་པོ། ཆོས་རྒྱལ་སྲོང་བཙན། ཡེ་ཤེས་མཚོ་རྒྱལ། ལྷ་ལུང་དཔལ་རྡོར། ལྷོ་བྲག་མར་པ། ཚར་ཆེན་བློ་གསལ་རྒྱ་མཚོ། སྨིན་གླིང་གཏེར་ཆེན་ཡབ་སྲས། རྗེ་བཙུན་བླ་མ་འགྱུར་མེད་ཀུན་བཟང་རྣམ་རྒྱལ་སོགས། རྒྱ་བོད་གྲུབ་བརྙེས་རིག་འཛིན་དུ་མས་དག་པ་ཡེ་ཤེས་ཀྱི་སྐུས་དབང་བསྐུར་བྱིན་གྱིས་བརླབས་ཤིང་རྗེས་སུ་གདམས་པའང་གནང་། ཆེ་མཆོག་ཧེ་རུ་ཀཿ རྡོ་རྗེ་ཕུར་པ་སོགས་ཡི་དམ་གྱི་ལྷ་དང་། སངས་རྒྱས་བྱང་སེམས་མང་པོའི་ཞལ་གཟིགས། མ་མོ་མཁའ་འགྲོ་ཐམས་ཅད་དབང་དུ་འདུས། རྡོ་རྗེ་ཆོས་སྐྱོང་རྣམས་ཀྱིས་ལས་ཀྱི་སྟངས་ཕུལ། དཀར་ཕྱོགས་ཀྱི་ལྷ་ཀླུ་གཞི་བདག་ཐམས་ཅད་བྲན་དུ་ཁོལ། ནག་ཕྱོགས་ཀྱི་མི་དང་མི་མ་ཡིན་པ་རྣམས་ཚར་བཅད་པ་སོགས་ལས་གང་རྩོམ་ཐོགས་མེད་དུ་འགྲུབ་པའི་གྲུབ་པའི་མངོན་རྟགས་ཀུན་གྱི་མཐུན་སྣང་དུ་གྲུབ་པ་སོགས་ཀྱིིས་དུས་མཉམ་གྱི་ཆེ་དགུ་ཕལ་ཆེར་གྱིས་ཞབས་ལ་གཏུགས་པས་སྐུ་བསོད་དང་སྙན་གྲགས་རྒྱས། ཆོས་སྡེ་འདིའི་འདུ་ཁང་དང་མགོན་ཁང་ཙམ་མ་གཏོགས་གཙུག་ལག་ཁང་རྟེན་དང་བརྟེན་པར་བཅས་པ་གསར་དུ་བསྐྲུན། འོག་མིན་གཉིས་པ་ཨོ་རྒྱན་སྨིན་གྲོལ་གླིང་གི་ཕྱག་བཞེས་ཇི་ལྟ་བ་བཞིན་གྱི་སྤྲོས་བཅས་ཚེས་བཅུ་ཆེན་མོ་གཙོ་བོར་གྱུར་པའི་དུས་མཆོད་ཆེན་པོ་ལྔ་རྗེས་འབྲེལ་དང་བཅས་པ་རྒྱུན་བཙུགས་ཐོག་སྤྲོས་བཅས་ཀྱི་ཡོ་བྱད་སོགས་གང་དགོས་ཁྱད་ཐོན་དང་། ཉེར་མཁོའི་སྒྲུབ་དཀྱིལ་ཁྲིད་ཡིིག་སོགས་ཆ་ཚང་སྤར་དུ་བསྒྲུབས། སྒྲུབ་སྡེ་བདེ་ཆེན་པདྨ་འོད་གླིང་གསར་དུ་བཏབ་ནས་སྤོང་བ་བསམ་གཏན་པ་བཅུ་གསུམ་རྒྱུན་འཇགས་དང་། གཞན་ཡང་། སིབ་དགོན་གསང་ཆེན་བཀྲ་ཤིས་ཆོས་གླིང་། ལྕང་བྲག་རིག་འཛིན་མཁའ་སྤྱོད་གླིང་། ཕུག་དགོན་ཆོས་འཁོར་བདེ་ཆེན་ལྷུན་པོ། སྒོ་མེ་དིང་ཀྱཱ་དགོན་གསང་སྔགས་ཆོས་གླིང་། འཇུ་མོ་ཧོར་གསང་སྔགས་བཤད་སྒྲུབ་གླིང་། ཉག་གཟུར་པ་ལྷ་འབུམ་དགོན་གསང་སྔགས་ཆོས་གླིང་རྣམས་སུ་གཙུག་ལག་ཁང་གསར་བཞེངས། རྙིང་པ་ཞིག་གསོས་མཆོད་ཐེབས་རྟེན་གསུམ་སྩལ་པ་སོགས་མཐའ་ཡས། ལྕགས་ཁྱི་ལོར་གུ་རུ་རིན་པོ་ཆེས་ཞལ་གཟིགས་ནས་ལུང་བྱང་སྩལ་པ། པདྨས་བྱིན་བརླབས་བདུད་འཇོམས་རོལ་པ་རྩལ། །ཁྱོད་ནི་སྔོན་ཚེ་ནམ་མཁའི་སྙིང་པོའོ། །བདག་ནི་སྣ་ཚོགས་སྐུར་སྟོན་པདྨ་འབྱུང་། ཁྱོད་ལ་རྟག་ཏུ་བྱིན་གྱིས་བརླབ་ཕྱིར་འོང་། །ཁྱོད་ཀྱི་སེམས་ཉིད་ཡིད་བཞིན་ནོར་བུ་དེ། རང་ངོ་ཤེས་ན་ང་ཉིད་ལོགས་སུ་མེད། །ཞེས་སོགས་ཁ་བྱང་ལུང་བསྟན་སྩལ་པ་ལྟར། ཀེའུ་སྟོད་འགྱིང་བ་བྲག་དཀར་གནས་ཞལ་ཕྱེས། ཤིང་གླང་ལོར་དག་སྣང་ཁ་བྱང་ཕེབས་པ་བཞིན་གནས་མཆོག་སེང་གེ་གནམ་རྫོང་གནས་སྒོ་འབྱེད་པར་མཛད་པས་མཚོན་ཟབ་གཏེར་གྱི་ཁ་བྱང་ལུང་བསྟན་སྔ་རྗེས་མང་ཙམ་བྱུང་ཡང་སྙིགས་དུས་ཀྱི་སྐྱེ་བོའི་སྒྲོ་སྐུར་དང་བསྟན་པའི་མིག་རྐྱེན་སོགས་ལ་དགོངས་ནས་ཆེད་གཉེར་མ་མཛད། ལྷག་པར་བསྟན་རྒྱུན་ལ་དགོངས་པའི་མདོ་སྒྱུ་སེམས་ཕྱོགས་སོགས་ཟབ་རྒྱས་ཆོས་ཀྱི་འཆད་སྤེལ་སྤྱི་དང་། བྱེ་བྲག་ཡང་གསང་རྫོགས་པ་ཆེན་པོ་སྡེ་གསུམ་སྙིིང་པོའི་ཆོས་འཁོར་རྒྱ་ཆེར་བསྐོར་ཞིང་དེ་དག་ཀྱང་གང་ཟག་སོ་སོའི་བློ་རིམ་དང་འཚམ་པར་མྱོང་ཁྲིད་རྒྱུད་ལ་ཅི་སྨིིན་ལ་གཙོ་བོར་མཛད་པས་ཞལ་སློབ་ཀྱང་། པཎ་ཆེན་འགྱུར་མེད་མཐུ་སྟོབས་རྣམ་རྒྱལ་དང་། ཀུན་སྤངས་གྲུབ་ཆེན་ཤེས་རབ་ཡར་འཕེལ་ཏེ་ཟླ་བྲལ་གྱི་པཎ་གྲུབ་རྣམ་གཉིས་དང་། གཞན་ཡང་། རྣམ་འདྲེན་རྫོགས་ཆེན་བཞི་པ། རབ་འབྱམས་སྐུ་ཕྲེང་གོང་འོག ཀཿཐོག་ཞིང་སྐྱོང་དང་། རྨོག་ཚའི་ཡང་སྤྲུལ། དགེ་ཕྱག་རྣམ་གཉིས། ཉི་སྤྲུལ་གསུམ་པ། རྡོ་གྲུབ་ཆེན་རིན་པོ་ཆེ། གྲུབ་དབང་འཇིགས་མེད་གོ་ཆ། གླིང་རྗེ་དྲུང་རིན་པོ་ཆེ། ར་ཉག་གྲུབ་ཆེན། སྐུ་ཞབས་ཡེ་ཤེས་རྡོ་རྗེ། མགོ་ཚ་མཆོག་སྤྲུལ། གོང་གསལ་དགོན་མ་ལག་རྣམས་ཀྱི་བླ་སྤྲུལ་དམ་པ་རྣམས་ཀྱི་གཙོས་བསྟན་འཛིན་གྱི་སྐྱེས་ཆེན་བཟང་ལ་མང་བ་དང་། བྱེ་བྲག་སྙིང་པོའི་སྒྲུབ་པ་ལྷུར་ལེན་པའི་སྤང་བ་པ་སྐུ་ཚེ་རིལ་པོར་གྲུབ་པའི་རྒྱལ་མཚན་བརྟན་པ་སྒྲུབ་ཆེན་འགྱུར་མེད་བསྟན་འཕེལ་དང་འགྱུར་མེད་མཐའ་ཡས། སློབ་དཔོན་ཧཱུྃ་ཀ་རའི་རྣམ་འཕྲུལ་དུ་ལུང་གིས་ཟིན་ཅིང་རིག་པ་ཚད་ཕེབས་ཀྱི་རྟགས་ཚད་མཐར་ཕྱིན་པ་མཁས་གྲུབ་འགྱུར་མེད་བསྟན་འཛིན་གྲགས་པ། རྟ་ནག་དང་། སྨིན་གླིང་རྡོར་སེམས། བདེ་གཤེགས་ཀུན་འདུས། གར་ཚེ། འོད་དཔག་མེད་བཅས་ཀྱི་བསྙེན་པ་དུང་ཕྱུར་རེ་ཐེམ་ཞིང་དཔལ་རྟ་མགྲིན་གྱི་ཞལ་དངོས་སུ་མཐོང་བ་གྲུབ་ཆེན་ཀུན་བཟང་ངག་དབང་ཆོས་དབང་ཡང་བདུས་ཀྱི་སྙིང་པོ་ཡིག་དྲུག་དུ ང་ཕྱུར་བཅོ་ལྔ་འགྲུབ་ཅིང་འཕགས་པ་སྤྱན་རས་གཟིགས་ཀྱིས་བསྟན་པའི་བླ་མ་བསམ་གཏན། བླ་མའི་ཞབས་པད་མཉེས་པ་གསུམ་གྱིས་བསྙེན་ཅིང་སྐྱེ་འཆི་ལ་རང་དབང་ཐོབ་པ་བླ་མ་དབང་ཆེན་འབུམ། ཉམས་རྟོགས་མཐར་ཕྱིན་པ འི་སྔགས་རམས་པ་ཀུན་བཟང་གསང་སྔགས་སོགས་བར་དོ་གསུམ་གང་རུང་དུ་གྲོལ་བའི་གདེང་ཚད་མངོན་དུ་བརྙེས་པའི་ཡང་དབེན་གྱི་སྒྲུབ་ཆེན་བཅུ་གསུམ་གྱིས་མཚོན་རྟོགས་པ་དོན་བརྒྱུད་ཀྱི་རྒྱལ་ས་ཟིན་ངེས་ཀྱི་བུ་སློབ་ཆེས་མང་ཞིང་། ཐ་ན་དམ་པ་འདི་ཉིད་ལས་སྒོོམ་ཁྲིད་སྣ་རེ་ཐོབ་པའི་གྲྭ་རྒན་དཀྱུས་མ་རྣམས་ཀྱང་འདའ་ཀ་བླ་མའི་སྣང་བ་འཆར་བ་དང་། འདའ་ཚོད་ཟིན་པ་སོགས་རྟགས་ཡ་མཚན་བརྒྱུད་མར་འོང་བ་ཐོས་སོ། །དེའི་སྤྲུལ་པའི་སྐུ་ཨོ་རྒྱན་རང་བྱུང་རྡོ་རྗེ་ཚེ་དབང་གྲུབ་པ་རྩལ་ནི། རྡོར་སྨིན་སོགས་དམ་པ་དུ་མའི་ལུང་གིས་ཟིན་པ་ལྟར་གོང་མའི་ཆོས་ཁྲིར་མངའ་གསོལ། ཆུང་ངུ་ནས་སྔོན་གནས་རྗེས་དྲན་སོགས་དམ་པའི་རྣམ་ཐར་སྒྲིབ་མེད་དུ་གསལ་དབོན་སྤྲུལ་ཐུགས་རྗེའི་གཏེར་ཆེན་དང་། རྫོགས་ཆེན་བཞི་པ། སྨིན་གླིང་ཁྲི་ཆེན་ཡིད་བཞིན་དབང་རྒྱལ། འཇིགས་མེད་རྒྱལ་བའི་མྱུ་གུ། ལྷ་འབྲང་དཔལ་ལྡན་ཆོས་རྒྱལ་སོགས་དམ་པ་དུ་མ་བསྟེན་ནས་གསན་བསམ་གྱི་སྒྲོ་འདོགས་བཅད། སྒོམ་སྒྲུབ་ཀྱིས་ཉམས་སུ་བླངས་པས་གནས་ལུགས་ཀྱི་རྟོགས་པ་འཁྲུངས། ལྷག་པའི་ལྷ་རབ་འབྱམས་ཀྱིས་ཞལ་བསྟན་ཞིང་རྗེས་སུ་བཟུང་། བར་སྲིད་ཀྱི་རྣམ་ཤེས་དང་ལྷ་འདྲེའི་སྤྱོད་ཚུལ་སོགས་ལྐོག་གྱུར་གྱི་ཆོས་རྣམས་སྒྲིབ་མེད་དུ་གཟིགས། ནུས་མཐུས་མི་དང་མི་མ་ཡིན་གཟུགས་ཅན་རྣམས་ཚར་བཅད། ལྷ་ལྡན་ཕྱོགས་སུ་འབྲུམ་པ་ནག་པོའི་ནད་ཀྱང་དཀར་པོར་བསྒྱུར་པ་སོགས་གྲུབ་པའི་སྤྱོད་པའང་ཅི་རིགས་མཛད། རང་དགོན་མ་ལག་རྣམས་འཛིན་སྐྱོང་སྤེལ་གསུམ་དང་ཉམས་པ་གསོ་བ། ཆོས་རྗེ་རབ་འབྱམས་ལྔ་པ་གོང་མའི་སེང་ཁྲིར་མངའ་གསོལ་བ་སོགས་བཤད་སྒྲུབ་ལས་གསུམ་གྱི་ཕྲིན་ལས་མཐར་ཕྱིན་ནོ། །དེ་སྐད་དུ་ཡང་རྣམ་ཐར་གསོལ་འདེབས་ལས། ཕྱོགས་བཅུ་དུས་གསུམ་ཀུན་ན་བཞུགས་པ་ཡི། །ཡེ་ཤེས་གཅིག་ཏུ་བསྡུས་པའི་རང་གཟུགས་མཆོག །དྲན་པས་སྲིད་ཞིའི་འཇིགས་པ་འཕྲོག་མཛད་པ། །དཔལ་ལྡན་བླ་མའི་ཞབས་ལ་གསོལ་བ་འདེབས། །གཟོད་ནས་གདོད་མའི་དབྱིངས་སུ་བྱང་ཆུབ་ཀྱང་། །ཚུ་རོལ་འགྲོ་ལ་རྗེས་བརྩེའི་སྤྲིན་ཆེན་འཁྲིགས། །བྱིན་རླབས་ཐུགས་རྗེའི་གྲུ་ཆར་འབེབས་མཁས་པ། །དཔལ་ལྡན་དང་པོའི་མགོན་པོར་གསོལ་བ་འདེབས། །མཐའ་ཡས་ཞིང་ན་དག་དང་མ་དག་གི། །བཟོ་སྐྱེ་ངོ་མཚར་མཆོག་གི་སྤྲུལ་སྐུ་སོགས། །ཡེ་ཤེས་གཅིག་ཉིད་དུ་མར་འཆར་ཞིང་འཕྲུལ། །མཁྱེན་བརྩེའི་དབང་ཕྱུག་མཆོག་ལ་གསོལ༴ ཁྱད་པར་འཛམ་གླིང་ཐུབ་མཆོག་བསྟན་པ་འདིར། །འཕགས་བོད་གཉིས་སུ་མཁས་གྲུབ་དུ་མ་ཡི། །སྐྱེ་བའི་རོལ་གར་ཨུ་དུམ་ཝཱ་རའི་ཕྲེང་། །བགྲང་ཡས་སྟོན་པར་མཛད་ལ་གསོལ༴ བྱེ་བྲག་བསིལ་ལྡན་གངས་ཀྱི་རི་བོའི་ལྗོངས། །འཕུར་འགྲོའི་སློབ་དཔོན་པདྨ་ལས་གྲོལ་གྱི། །ཐུགས་སྲས་ཡང་དག་གྲུབ་བརྙེས་ནམ་སྙིང་སོགས། །བསྟན་འགྲོའི་མགོན་དུ་བྱོན་ལ་གསོལ༴ བོད་ཆེན་ལྗོངས་ཀྱི་གདུལ་བྱ་འདུལ་བའི་སླད། །མྱ་ངན་མེད་དཔལ་རྡོ་རྗེ་སློབ་དཔོན་གཟུགས། །གང་དེས་ཆོས་ཀྱི་རྒྱལ་ཚབས་མངའ་གསོལ་བའི། །རྣམ་རོལ་བཞི་པར་སྟོན་ལ་གསོལ༴ ཞེས་པས་དོན་བསྡུ་བའོ། །གཟོད་ནས་སྤྲོས་པ་ཉེར་ཞི་ཡེ་ཤེས་སྐུ། །འཁོར་འདས་གཉིས་ཀའི་མཐའ་ལ་མི་གནས་ཀྱང་། །སྲིད་དང་ཞི་བའི་སྲོག་ཏུ་རབ་ཞུགས་པ། །མཁའ་འདི་སྣོད་བཅུད་ཀུན་ལ་ཁྱབ་པ་བཞིན། །གཅིག་དང་དུ་མའི་ཆོས་ཉིད་ལས་འདས་ཀྱང་། །གཅིག་པུའི་གར་གྱི་ས་གསུམ་ཁྱབ་པར་སྟོན། །སྒྱུ་མའི་རོལ་གར་ཁེངས་པ་བསྙེལ་བྱེད་འདི། །རྒྱལ་སྲས་རྣམས་ཀྱི་མཛད་པའི་ཆོ་འཕྲུལ་ཆེ། །བདུད་རྩི་འོད་ཅན་ས་ལ་ལྟུང་མིན་ཀྱང་། །སྣོད་ཀྱི་དབྱེ་བ་ཇི་སྙེད་མཆིས་པ་དེར། །ཅིག་ཆར་སྣང་བཞིན་འཕགས་ཆེན་དམ་པ་རྣམས། །སྐྱེ་འདི་ལས་ཀྱི་སྣང་མིན་ཐུགས་རྗེའི་མཐུ། །འགྲོ་རྣམས་བརྩེ་ཆེན་ཐུགས་རྗེའི་ཕྱག་སོར་ནི། །པདྨའི་ལྕུགས་ཕྲན་གསར་པའི་འཁྲི་ཤིང་གིས། །དུཿཁས་གཟིར་རྣམས་མཁྲིག་མ་ནས་བཟུང་སྟེ། །བདེ་ནས་བདེ་བའི་སར་ཁྲིད་བླ་མ་རྗེ། །ཞེས་པའང་བར་སྐབས་ཀྱི་ཚིགས་སུ་བཅད་པའོ། །ད་ནི་སྐུ་ཡི་སྐྱེ་བ་འདི་ཉིད་ཀྱི་རྟོགས་པ་བརྗོད་པ་ལ་ལྷུམས་སུ་ཞུགས་ནས་སྐུ་བལྟམས་པའི་ཚུལ་དང་། རྒྱལ་བའི་བསྟན་པ་ལ་ཞུགས་ནས་རང་དོན་དུ་ཐོས་བསམ་སྒོམ་པ་མཛད་ཚུལ། གཞན་དོན་དུ་འཆད་རྩོད་རྩོམ་པས་ཐུབ་བསྟན་གསལ་ཚུལ། གཉིས་དོན་དུ་མཁས་བཙུན་བཟང་པོའི་ཡོན་ཏན་ཇི་ལྟར་མངའ་བའི་ཚུལ་དང་སྤངས་རྟོགས་དེ་དག་གི་མཐུ་ལས་སྐལ་ལྡན་གྱི་སློབ་ཚོགས་ཇི་ལྟར་བྱུང་ཚུལ། བྱ་བ་ལས་ཀྱི་འཁོར་ལོས་མཛད་པ་ཇི་ལྟར་གནང་ཚུལ། མཐར་གཟུགས་སྐུ་ཆོས་དབྱིངས་སུ་བསྡུ་ཚུལ་བསྟན་པའི་སྐབས་ཏེ་ཕ་རོལ་ཏུ་ཕྱིན་པ་དྲུག་གི་གྲངས་སུ་བསྟན་པ་ལ། དང་པོ་སྐུའི་སྐྱེ་བ་འདི་ཉིད་ལྷུམས་སུ་ཞུགས་ཤིང་སྐུ་བལྟམས་པའི་ཚུལ་ལས་བྱུང་བའི་རྟོགས་བརྗོད་མདོར་བསྡུས་པ་ལ། ཀུན་མཁྱེན་བླ་མ་འདི་ཉིད་ཀྱི་སྐུའི་སྐྱེས་རབས་སྔོན་མ་ཨོ་རྒྱན་རང་བྱུང་རྡོ་རྗེ་དེ་ཉིད་དགོངས་པ་ཆོས་དབྱིངས་སུ་གཤེགས་ལ་ཉེ་བའི་སྐབས་ཉེ་བར་གནས་པ་རྣམས་ལ། ད་སྟེ་བདག་ནི་རྒ་དང་ན་བའི་ཟུག་རྔུས་མནར་བའི་ལུས་འདི་བོར་ནས། བྱིས་པ་ལུས་ཡང་ཞིང་གམ་ཟོ་བདེ་བ་ནད་ཀྱི་མི་གཙེར་བ་ཞིག་གི་སྐྱེ་བ་བླང་ན་དགའ་བར་འདུག ཅེས་ཕེབས་པ་དང་། ཡང་ངེད་རང་ཚེ་མགོ་རྟིང་གཉིས་ཀར་བསྔོས་ཤ་ཟོས་པའི་རྣམ་སྨིན་ཤིན་ཏུ་ལྕི་བས་ཐར་པ་ཐོབ་དཀའ་བར་འདུག་ཅིང་སང་ཕྱི་རེས་སྐྱེ་ངན་འདྲ་སྲིད་ན། ཤ་འདི་ཟ་མི་དགོས་པ་ཞིག་བྱུང་ན་ཨེ་རེ་ཤི་གསུང་ཞིང་ཐུགས་སྐྱོ་བའི་རྣམ་པ་ཆེས་ཆེར་མཛད་པ་དང་། མ་ཧཱ་པཎྜི་ཏ་འགྱུར་མེད་མཐུ་སྟོབས་རྣམ་རྒྱལ་གྱི་གསུང་སྲས་ཨ་གྲོ་སྒྲ་རམས་པ་ཞེས། ཀུན་མཁྱེན་ཆོས་འབྱུང་གིི་ཞལ་སློབ་ཀྱི་ཐུ་བོ། འབེ་ལོ་ཙཱ་བ་ཚེ་དབང་ཀུན་ཁྱབ་ཀྱི་སྐྱེ་བར་གྲགས་པ། བཅུ་ཕྲག་རིག་པའི་གནས་ལ་མཁྱེན་རབ་ཀྱི་པདྨོ་རྣམ་པར་རྒྱས་ཤིང་ངེས་དོན་ཆོས་ཉིད་ཀྱི་དགོངས་པ་ལ་དབང་འབྱོར་ཞིང་། དབུས་གཙང་གངས་རི་སོགས་རྒྱ་བོད་ཀྱི་རྡོ་རྗེའི་གནས་རྣམས་སུ་སྦས་ཚུལ་ཀུན་སྤངས་ཀྱི་ཚུལ་གྱིས་བྱོན། རྒྱ་ནག་རི་བོ་རྩེ་ལྔ་ནས་པཎ་ཆེན་བི་མ་ལ་ཨ་ཙ་རའི་ཆ་བྱད་ཅན་གྱིས་རྗེས་སུ་བཟུང་བ་སོགས་དང་ལྷ་ལྡན་དུ་ཇོ་བོ་མཇལ་བའི་སྐབས་མཛོད་སྤུ་ལས་རིང་བསྲེལ་མཐེ་བོང་ཙམ་བྱོན་པ་སོགས་ཉམས་དང་རྟོགས་པའི་ཡོན་ཏན་མཐོན་པོར་སོན་པ། སྦས་པའི་རྣལ་འབྱོར་ཆེན་པོ་དེ་ཉིད་ཀྱི་མཚན་དངོས་འགྱུར་མེད་རྣམ་རྒྱལ་ཞེས་པ་དེ་ཉིད་ལ་ཞུ་ཡིག་དང་པད་ཞུ་བཅས་གནང་བའི་ཟུར་འཛིན་ཕྱག་རྟགས་ཀྱིས་སྤྲས་པའི་ནང་དུ། ཨེ་མ་ཧོ། ངོ་བོ་ཀ་ནས་དག་པ། །ནམ་མཁའ་ལྟ་བུའི་མེ་ལོང་། །རང་བཞིན་ལྷུན་གྱིས་གྲུབ་པ། །འཇའ་ཚོན་ལྟ་བུའི་འཆར་སྒོ། །འགགས་མེད་ཤར་བའི་ལུང་ལ། །སྔོན་ཚེ་འདས་པའི་སྐབས་སུ། །རྡོ་རྗེའི་མཚན་གྱིས་འོད་ཟེར། །ཤར་ནས་འཆར་བའི་ཁྲི་གདུགས། །གཟུང་འཛིན་སྤྲིན་གྱིས་མ་གོས། །ད་ལྟ་ཚེ་འདིའི་ཉམས་ལེན། །སྟོང་ཉིད་སྙིང་རྗེ་གཞན་ཕན། །བསྐྱེད་རྫོགས་མངོན་དུ་གྱུར་ཚེ། །ནུབ་ནས་ཚེས་པའི་ཟླ་བ། །མ་འོངས་པ་ཡི་དུས་སུ། །རྩ་གསུམ་སྒྲུབ་པའི་རྣལ་འབྱོར། །ངུར་སྨྲིག་ཆ་ལུགས་འཛིན་པ། །རང་རང་མོས་འདུན་གར་གཏད། །སྐྱེ་སྲིད་བཟུང་བར་གདོན་མི་ཟ། །ཞེས་སྐུ་སྐྱེ་ཕྱི་མ་མཁས་གྲུབ་རྡོ་རྗེ་འཛིན་པ་ཆེན་པོ་སྔགས་འཆང་ཀུན་གྱི་གཙུག་རྒྱན་དུ་གྱུར་པ་དེ་ཉིད་དང་ཉེ་བར་ཐུགས་གཏད་ཅིང་། ཞབས་འབྲིང་བ་དག་ལ་སྒྲ་རམས་པའི་ཡོན་ཏན་འབའ་ཞིག་གསུངས་ཤིང་། ཁྱད་པར་གསོལ་དཔོན་པདྨ་རང་བྱུང་ལ། ད་ནས་ཁྱེད་རང་འདིར་སྡོད་དགོས་མེད། ལྷོ་ཁོག་ཏུ་སོང་ལ་ལོ་ཆེན་བི་ཛ་ཡའི་མདུན་ནས་རིག་གནས་ཕྲན་བུ་རེ་ཨི་ཤེས་ལྟོས། ང་དང་མྱུར་དུ་འཕྲད་འོང་ཞེས་གསུང་གི་ཐ་མ་ཞལ་ཆེམས་སྩལ་པ་ལྟར། བདེ་གཤེགས་མྱ་ངན་མེད་ཀྱི་རྣམ་རོལ་རབ་འབྱམས་ལྔ་པས་ཀྱང་། སྒྲིབ་བྲལ་མཁྱེན་པའི་དྭངས་ཤེལ་གྱི་ངོགས་སུ་མཆོག་སྤྲུལ་ལྷོ་རྒྱུད་དུ་འཁྲུངས་པའི་གསལ་སྣང་བརྟན་པོར་བྱུང་བ་དང་། གངས་ཅན་མཁས་གྲུབ་ཡོངས་ཀྱི་གཙུག་རྒྱན་འཇམ་དབྱངས་མཁྱེན་བརྩེའི་དབང་པོའི་དྲུང་དུ་མཆོད་བསྔོ་ཕུལ་བ་དང་སྦྲགས། སྤྲུལ་སྐུ་གར་འཁྲུངས་དགོངས་བརྟག་ཞུས་པའི་བཀའ་ལན་དུ། སྐྱབས་རྗེ་མཆོག་སྤྲུལ་རིན་པོ་ཆེའི་ཡང་སྲིད་གར་ཕེབས་སོགས་རང་ལ་མངོན་ཤེས་ལྟ་ཅི། རྨི་ལམ་རྣོ་བ་ཙམ་ཡང་མེད་པས་ཐུགས་ཕན་ཐོགས་པའི་ཞུ་རེ་བྲལ་ཡང་། གསུང་མི་གཅོག་ཙམ་དུ་གུ་རུ་རིན་པོ་ཆེའི་སྐུ་ཚབ་མདུན་བརྟག་བསྒྲིལ་ཞུས་པར། སྤྱིར་ཡང་སྲིད་འཁྲུལ་མེད་འབྱོན་ངོ་དང་། དེའང་ལུག་ལོ་ལས་མི་འགྱང་བར་ཡུལ་ལྷོ་ཕྱོགས་ཀྱི་རྒྱུད་ལ་འབྱུང་སྙམ་པ་ཤར་ལགས། ཞེས་རྡོ་རྗེའི་ལུང་གིས་ཤིན་ཏུ་གསལ་བར་བསྟན་ཅིང་། དེ་བཞིན་དུ་སྔ་འགྱུར་བསྟན་པའི་གཙུག་རྒྱན་རྫོགས་ཆེན་བཞི་པའི་ཡེ་ཤེས་གཟིགས་པར་ཡང་། རྒྱལ་ཚབ་དམ་པའི་ཡང་སྲིད་ནུབ་ཀྱི་ཕྱོགས། །ཕ་མ་ཐབས་ཤེས་ཉི་ཟླ་ཀླུ་གནས་མཚོ། །ངང་པའི་ལོ་ལ་འཁྲུངས་པའི་རྟེན་བཟང་ཤར། །ཞེས་དང་། རྟ་ནི་ངང་པ་གསེར་ལྡན་ཕུལ་བ་ཡི། །ཚོར་བ་རྟ་ཡི་ལོ་ནི་དེ་ནས་བྱུང་། །ཞེས་རྟ་ལོར་ལྷུམས་སུ་ཞུགས་པའི་ལྐོག་གྱུར་མངོན་སུམ་གཟིགས་པ་དང་། སྨིན་གླིང་ཁྲི་རིན་པོ་ཆེ་འགྱུར་མེད་ཡིད་བཞིན་དབང་རྒྱལ་དང་། འཇམ་མགོན་ཀོང་སྤྲུལ་རིན་པོ་ཆེ་སོགས་ཡེ་ཤེས་གཟིགས་པ་རྣམས་ཀྱིས་ཀྱང་། ལྷོ་རྒྱུད་ཕྱོགས་འདིར་དམ་པ་རྣམས་བཀའ་བགྲོས་པ་བཞིན་དཔལ་གྱི་མགུལ་ནས་མགྲིན་གཅིག་ཏུ་ལུང་བསྟན་པ་ལྟར་རུས་ཆེན་བཞིའི་ཡ་རྒྱལ། སྨུག་པོ་གདོང་གི་རིགས་ཨ་གྲོའི་རུས་སུ་གཏོགས་པ་ལྷ་ཐོག་དཔོན་གྱི་མངའ་འོག་བསིལ་ལྡན་ཆུ་བོའི་གཡས་ཟུར་ལྷོ་ཟླ་དལ་འབབས་ཀྱི་གཡོན་དུ་ཨ་གྲོ་ཚང་ཞེས་གྲུབ་དབང་སྦས་པའི་རྣལ་འབྱོར་མཁས་གྲུབ་ཆེན་པོ་ཆེ་བའི་ཡོན་ཏན་དུ་མ་དང་ལྡན་པ་གོང་དུ་སྨོས་མ་ཐག་པ་དེ་ཉིད་ཀྱི་གཞིས་ཀར། བསྐྱེད་པའི་ཡབ་ནི་ཤེས་རབ་ཅེས་པ་དཀོན་སྤྱི་ཡི་དམ་དུ་བྱེད་ཅིང་རང་བཞིན་བཟང་ལ་དཀོན་མཆོག་རིན་པོ་ཆེར་མཆོག་ཏུ་གུས་ཤིང་འཇིག་རྟེན་ཡང་དག་གི་ལྟ་བ་ལ་ངང་གི་གནས་པ། དངོས་རྫས་རྣམས་ཆོས་ཕྱོགས་ལ་བཏང་། ཨ་མི་དྷེ་ཝ་མ་ཎི་སིདྡྷི་རྡོར་སེམས་སྙིང་པོ་རྣམས་ཁྲི་མཁར་ཉེར་གསུམ། རྒྱལ་བཀའ་རིན་པོ་ཆེ་སོགས་གསུང་རབ་བཀླགས་པ་དང་། མ་ཎི་སོགས་དུང་ཕྱུར་ཁ་ཤས་ཐོན་ཅིང་སེམས་དོན་ཉམས་ལེན་བཟང་པོ་ཡོད་པ་ཞིག་དང་། ཡུམ་ནི་དཔའ་རྩལ་སྟོབས་ཐུགས་ཆེ་ཞིང་ཡ་རབས་དྲ་མའི་རིགས་བརྒྱུད་འབྲོང་པ་དཔོན་ཚང་གི་བུ་མོ་ནམ་མཁའ་སྒྲོན་མ་ཞེས། ཨ་མི་དྷེ་བ་དུང་གཅིག མ་ཎི་དུང་གཉིས། སིདྡྷི་དུང་གཅིག བཛྲ་ས་ཏྭ་དུང་གཅིག བཀའ་ཐང་བསྡུས་པ་ལེའུ་བདུན་སོགས་རྒྱུན་དུ་ཁ་ཏོན་བྱེད་ཅིང་དགེ་སེམས་དང་ལྡན་པ། ཆོས་ལ་མོས་ཤིང་དད་པ་དང་དག་སྣང་ཆེ་བ། དམན་ལ་བརྩེ་ཞིང་བུད་མེད་ངན་པའི་སྐྱོན་གྱིས་མ་གོས་པ་གཏོང་ལ་གོམས་པའི་བློ་ཅན་ཏེ། ཡབ་ཡུམ་དེ་གཉིས་ལ་སྲས་ལྕམ་སྲིང་བདུན་འཁྲུངས་པའི་ཆེ་བའི་འོག་མ་རྗེ་བླ་མ་འདི་ཉིད་ཡིན་ལ། ལྷུམས་སུ་ཞུགས་པ་ན་བྱང་ཆུབ་སེམས་དཔའ་ཆེན་པོ་གླང་པོ་ཆེ་ཐལ་དཀར་མཆེ་བ་དྲུག་ལྡན་གདོང་གསེར་གྱི་དྲྭ་བས་གཡོགས་པ་ཅན་གྱི་རྣམ་པས་ལྷུམ་ཞུགས་དང་ཆོས་མཚུངས་པ། ཡུམ་ལ་ངོ་མཚར་དགེ་བའི་ལྟས་མཚན་རྨི་ལམ་བཟང་པོར་བྱུང་ཞིང་སད་པའི་དུས་ནའང་བག་ཆགས་ཡིད་ཀྱི་ཀུན་རྟོག་གི་རི་མོ་ནུབ་པ་མེད་པ་དད་དང་སྤྲོ་དགའ་ཕུན་སུམ་ཚོགས་པའི་ཆུ་ཤེལ་དབང་པོ་དགའ་བ་བརྒྱ་ལྡན་གྱི་མཁའ་ལ་བཀོད་ཅིང་། རིག་འཛིན་བྱང་ཆུབ་སེམས་དཔའ་ཡུམ་གྱི་ལྷུམས་གཞལ་ཡས་ཁང་དུ་བྱིན་གྱིས་བརླབས་ནས་བཞུགས་པའི་ནུས་མཐུ་སྒོ་གསུམ་ལ་ཞུགས་པའི་རྟགས་སུ། ཤར་རིའི་མཁའ་ངོས་ལ་དར་དཀར་པོ་དྲི་མ་མེད་པ་ཞིག་ཤར་གྱིས་བྱུང་བས་རང་གི་ལུས་ལ་དཀྲིས་པའི་མོད། དར་ཅིག་ཤེས་པ་བརྒྱལ་བ་ལྟར་གྱུར་པ་དང་། གཉིད་ལས་སད་པ་ནའང་ལུས་སེམས་ལ་སྔར་མེད་པའི་དགའ་བདེ་ཁྱད་པར་ཅན་སྐྱེས་ཤིང་ལུས་ཀྱི་ཟོ་མདོག་རྒྱས་པ་དང་། ལུས་མི་ངལ་ཞིང་། ཡང་བ་སོགས་གྱུར་ཏོ། །ལྷུམས་སུ་ཞུགས་པའི་ནུབ་མོར་དཀར་ཕྱོགས་ཀྱི་ལྷ་ཀླུ་རྣམས་ཀྱང་མངོན་པར་དགའ་ཞིང་འཇིག་རྟེན་གྱི་ཁམས་སུ་དགེ་ལེགས་རྒྱ་ཆེན་པོ་འབྱུང་བའི་རྟགས་སུ་ཆུ་ཤེལ་དང་མཚུངས་པའི་ཁ་བ་འདབ་མ་མེ་ཏོག་གི་དབྱིབས་ཅན་གྱིས་འཛིན་མའི་ཁྱོན་ཐམས་ཅད་ཁེབས་ཤིང་དཀར་པོར་གྱུར་པ་ནི་རྗེ་བླ་མ་འདིས་བསྟན་འགྲོར་ཕན་བདེའི་ཕྲིན་ལས་ཀྱི་སྣང་བ་དཀར་པོས་འཇིག་རྟེན་གསུམ་ན་ཁྱབ་པའི་བལྟས་སུ་གོར་མ་ཆགས་ཤིང་སྐྱེ་བོ་དཔྱོད་ལྡན་རྣམས་ཀྱིས། ཨེ་མ་འདི་ནི་སྐྱེས་བུ་དམ་པ་ཞིག་སྐུ་འཁྲུངས་པ་སོགས་གང་རུང་གི་རྟགས་ངོ་མཚར་ཅན་ཞིག་གོ་ཞེས་དབང་པོའི་མངོན་སུམ་གྱི་དགེ་བའི་རྟགས་ཁྱད་པར་མཐོང་བའི་ཡ་མཚན་ཅིར་ཡང་སྒྲོགས་སོ། །རྗེ་འདི་ཉིད་ལྷུམས་སུ་ཞུགས་པའི་ཟླ་བ་ཕྱི་མར། རྗེ་མཁས་གྲུབ་ཆེན་པོ་བི་ཛའི་མཚན་ཅན་གྱི་དག་པ་ཡེ་ཤེས་ཀྱི་སྣང་ཆར་བྲག་རི་དཀར་པོ་རྡོ་རྗེ་གྱེན་བསླངས་འདྲ་བའི་ངོས་ནས་སྒྲོམ་བུ་ཞིག་རྙེད་པ་ཁ་འབྱེད་དེ་གཟིགས་པ་ན། སྔ་ན་མེད་པའི་དྲི་བསུང་འཕྲོ་བ་དང་ལྷན་ཅིག་ཨོ་རྒྱན་རིན་པོ་ཆེའི་སྐུ་བྱིན་རླབས་ཀྱི་གཟི་འོད་འབར་བ་དགྱེས་པའི་ཞལ་མདངས་འཛུམ་མེ་རེ་བ་ཞིག་འདུག་པ་སྤྱི་བོར་བཞག་ནས་དབང་བཞི་ལེན་པའི་དམིགས་གནད་བཅས་རུམ་དུ་འཛུད་པ་དང་། རང་བྱུང་ལྷན་སྐྱེས་འཕོ་མེད་ཀྱི་དགའ་བའི་ཡེ་ཤེས་རྒྱུད་ལ་སྐྱེས་པ་ལྟ་བུའི་ཉམས་མྱོང་དེ་ཀའི་མུར། མདུན་གྱི་བར་སྣང་ལ། མཁའ་འགྲོ་ཤེལ་དཀར་རྡོ་རྗེ་མཚོ་ཡིན་ཟེར་བ་གྲི་ཐོད་འཛིན་ཅིང་གར་སྟབས་སྒྱུར་བ་གཅིག་གིས་གླུ་དབྱངས་གསལ་མི་གསལ་ཐུང་ངུས། ཨ་ཧོ་མ་ཧཱ་སུ་ཁ་སིདྡྷི་ཧོ༔ སྐྱེ་མེད་ཆོས་ཀྱི་དབྱིངས་ཉིད་ལས༔ འགགས་མེད་ཤར་བའི་བུ་མོ་ང༔ རིག་པའི་བུ་ཆུང་སྐྱོང་ཕྱིར་འོང༔ དེ་ཕྱིར་རང་ངོ་ཤེས་འཚལ་ལོ༔ སྣང་བ་སེམས་ཡིན་སེམས་ཉིད་སྟོང༔ སྟོང་གསལ་མཐའ་དབུས་བྲལ་བའི་དབྱིངས༔ དེ་བཞིན་ཉིད་ལ་འཕོ་འགྱུར་མེདཿ གཟུང་འཛིན་སྤྲིན་གྱིས་མི་སྒྲིབ་འཚལ༔ བློ་ལས་འདས་པའི་བདེན་དོན་རྟོགས༔ མཐའ་བྲལ་ཨ་ཏིའི་ངོ་བོ་སྐྱོང༔ མ་བཙལ་འབྲས་བུ་ལྷུན་གྱིས་གྲུབ༔ ཀུན་བཟང་དེ་ཉིད་ཨེ་མ་ཧོ༔ ད་དུས་བདུད་འཇོམས་རོལ་པ་རྩལ༔ རྟ་བདུན་ཆིབས་ནས་གླིང་བཞི་ཉུལ༔ གདུལ་བྱའི་ཞིང་ས་འཚོལ་སྐབས་སུ༔ སྦས་ཡུལ་པདྨ་ཤེལ་ཕུག་གི༔ གནས་སྒོ་འབྱེད་པའི་ལྟས་བཟང་ཤར༔ ཞེས་སོགས་ཀྱི་བརྡ་དང་ལུང་བསྟན་ཁྱད་པར་ཅན་བྱུང་བ་ལ་དཔག་ན་རྗེ་འདིའི་སྐྱེ་འཕྲེང་གོང་མ་རྣམས་ཀྱང་ཡང་དག་གྲུབ་པ་ནམ་མཁའི་སྙིང་པོའི་སྐྱེ་བ་དམིགས་སུ་གསལ་བ་དང་། བདུད་འཇོམས་རོལ་པ་རྩལ་ཞེས་ནམ་སྙིང་གི་གསང་མཚན་ཡིན་པས། ལྕགས་རྟ་ལོར་གདུལ་བྱའི་ཞིང་ས་ཚོལ་ཏེ་ལྷུམས་སུ་ཞུགས་པ་སོགས་ལུང་བསྟན་གྱི་དངོས་དོན་དང་འགྲིགས་པས། རྗེ་བླ་མ་འདི་སྦས་པའི་ཚུལ་དུ་བཞུགས་པ་ལས་ངེས་དོན་ལ་ཨོ་རྒྱན་རྗེ་འབངས་ཀྱི་སྤྲུལ་པའི་གཏེར་སྟོན་ཆེན་པོ་ཞིག་ཡིན་ངེས་ནའང་རང་སྐལ་གྱི་ཟབ་གཏེར་དངོས་ལ་ཐུགས་གཉེར་མ་གནང་བ་ནི་མཆོག་གཏེར་ཐུགས་སྒྲུབ་བསམ་ལྷུན་གྱི་ལོ་རྒྱུས་ཤེལ་ཕྲེང་ལས། རེས་འགའ་ཐུགས་གཏེར་དགོངས་པའི་ཀློང་ནས་བརྡོལ༔ འགའ་ཞིག་ལྷ་དང་མཁའ་འགྲོས་དངོས་སུ་སྟོན༔ ལ་ལས་བཏོན་ཀྱང་རང་ཉམས་ཁོ་ན་ལེན༔ ཕལ་ཆེར་ལོ་གྲངས་བཀའ་རྒྱས་བཏབ་ནས་སྤེལ༔ ལ་ལས་ཁ་བྱང་ལུང་བསྟན་གསལ་གྱུར་ཀྱང༔དངོས་སུ་མི་འདོན་བཀའ་རྙིང་བསྟན་པ་སྐྱོངས༔ དེ་ལྟར་ཚད་ལྡན་སྐྱེ་བུ་དེ་དག་གིས༔ གང་ལྟར་སྤྱོད་ཀྱང་པདྨ་བདག་ཉིད་ཀྱིཿ བྱིན་རླབས་སྔོན་སྨོན་དབང་གི་བྱེ་བྲག་སྟེ༔ འབྲེལ་ཚད་འཚེངས་ཤིང་དོན་དང་ལྡན་པ་ཡིན༔ ཞེས་གསུངས་པ་ལྟར་བཀའ་རྙིང་གི་བསྟན་པ་བསྐྱང་བ་ཁོ་ན་ཐུགས་ལ་བཅགས་ཤིང་དགོངས་གཏེར་ཟབ་མོ་དག་དང་ཁྱད་མེད་པའི་བསྟན་བཅོས་རྣམས་མཛད་པ་ལས། དངོས་གཏེར་འདོན་པ་དང་སྤེལ་བར་མ་མཛད་དོ། །ཡང་རྗེ་སྦས་པའི་མགོན་པོ་བི་ཛའི་མནལ་ལམ་དུ། རང་རེའི་ཁྱིམ་དུ་རྒྱལ་ཚབ་རིན་པོ་ཆེ་འབྱོན་རྒྱུ་རེད་ཟེར་ནས་མི་མང་པོས་ཁྲི་བཤམས་པ་དང་། གཞན་དང་མི་འདྲ་བའི་མི་སྨུག་པོ་དར་ཐོད་ཅན་ཤིན་ཏུ་འཇིགས་སུ་རུང་བ་གཅིག་གི་དར་ཁ་དོག་སྣ་ཚོགས་ཁྲུ་གང་ཙམ་ཞིག་འདུག་པ་ཕྱག་མདུད་རྒྱུ་ཡིན། ད་ནི་རེ་ཞིག་ཁྱེད་ཉིད་ཀྱི་ཉར་ཚགས་དགོས་པ་ཡོད་ཟེར་ནས། ཕྱག་ཏུ་སྤྲོད་བྱུང་བའི་ཐུགས་སྣང་དང་། ཁྱིམ་དེར་གནས་པ་གཞན་དག་གི་རྨི་ལམ་དུའང་དགེ་བའི་ལྟས་མཚན་འགའ་ཞིག་བྱུང་འདུག་ཀྱང་མཐའ་དག་བྲི་བར་མི་ལང་ལ། གཏེར་སྟོན་ཚད་ལྡན་དུ་མཆོག་གླིང་དང་མཁྱེན་བརྩེ་སོགས་སྐྱེས་ཆེན་རྣམས་ཀྱི་ཚད་མར་མི་མཛད་ཀྱང་རླང་དཔལ་སེང་གི་རྣམ་འཕྲུལ་དུ་སྒྲོགས་པ་གེ་མོ་གཏེར་སྟོན་དུ་གྲགས་པས་ཀྱང་རྒྱལ་ཚབ་སྤྲུལ་སྐུ་འདིར་འཁྲུངས་རྒྱུ་ཡིན་ཚུལ་དང་། འགྲོ་ཁར་མ་ཡུམ་ལ་གཙང་སྦྲ་དགོས་ཚུལ་སོགས་སྨྲས་སྐད་འདུག གང་དུ་སྐུ་བལྟམས་པའི་གནས་ནི་སྡེ་བཞི་དགེ་བ་བཅུའི་དཔལ་གྱིས་མཐོ་བ་ལྷ་ཐོག་གི་ས་ཡི་ཆར་སྤང་ལྗོངས་དང་མེ་ཏོག་སྣ་ཚོགས་བཀྲ་བ་ཡན་ལག་བརྒྱད་ལྡན་གྱི་ཆུ་ཀླུང་གི་སྒྲ་ལྷུང་ལྷུང་སྒྲོགས་པ། བྲག་རི་དང་རྩི་ཤིང་ནགས་ཚལ་རྒྱས་ཤིང་སྤང་ལྗོངས་ཉམས་དགའ་བས་མཛེས་ཞིང་འདོད་རྒུའི་དཔལ་ཡོན་ངང་གིས་འདུ་བ་རྫོགས་ཀྱི་མཚོ་ལུང་ཞེས་པར་མངལ་གྱི་ཟླ་གྲངས་ཐེམ་པ་ན། ལྕགས་ཕོ་རྟའི་ལོ་མཇུག་བདེ་མཆོག་མཁའ་འགྲོ་རྒྱ་མཚོ་དང་དགོངས་འདུས་སྐར་མཛོད་སོགས་ཀྱི་ལོ་མགོར་རྒྱལ་ཟླ་བ་རྩི་བའི་དབང་དུ་བྱས་ན། པྲ་ཛ་པྲ་ཏི་སྟེ། སྐྱེས་བདག་ཅེས་པ་ལྕགས་མོ་ལུག་གི་ལོ། ཧོར་ཟླ་བཅུ་གཉིས་པ་ལྷག་པའི་ཕྱི་མ་སྣ་ཚོགས་ཤིང་རྟ་ཆུ་སྲིན་གྱི་ཁྱིམ་དུ་ཞུགས་ཤིང་ཆུ་ཤེལ་དབང་པོ་རྒྱུ་སྐར་གྱི་ལྷ་མོ་རྒྱལ་གྱི་ཉ་བའི་ཚེས་༡༩ རེས་གཟའ་ལྷའི་བླ་མ་ཤར་བའི་འཕྲོད་ཆེ་ཆུང་སོགས་སྦྱོར་བ་ཕུན་སུམ་ཚོགས་པར་མ་བསྒྲིགས་ལྷུན་གྲུབ་ཀྱི་རྟེན་འབྲེལ་བཟང་པོ་ངང་གི་འགྲིགས་པ་དང་རྟ་བདུན་རྒྱལ་པོ་རྡོ་རྗེ་ཅན་གྱི་ཕྱོགས་ནས་འོད་ཟེར་གྱི་སྣང་བས་ནུབ་ཕྱོགས་བདེ་ཅན་ཞིང་གི་ཕྱོགས་ཀྱི་རི་རྩེར་སྣང་བའི་མོད་ལ་བྱང་ཆུབ་སེམས་དཔའ་མངལ་ལས་གྲོལ་ཞིང་། དེ་ཡང་ཕྲུ་མས་ཆོས་གོས་ལྟར་དཀྲིས་པ་དང་། སྤྱན་ཟུང་རྡོ་རྗེའི་ལྟ་སྟངས་ཁྲ་ཧྲིག་གེ་བ། དཔྲལ་བའི་དབྱེས་ཆེ་ཞིང་དབུ་གདུགས་ལྟར་རྒྱས་པ། ཤངས་ཀྱི་གཟེངས་མཐོ་བ་སོགས་མཐོང་ན་མི་མཐུན་མེད་ཅིང་། སྐུ་སྨད་ཐམས་ཅད་དུ་སྟག་རིས་བཀྲ་བ་དང་། ཀུན་ནས་བལྟ་བས་ཆོག་མི་ཤེས་པ། གང་གི་མཐོང་བ་ལ་དགའ་བ་དང་བདེ་བ་གྱ་ནོམ་པ་སྦྱིན་པའི་སྐྱེས་བུ་ཁྱུ་མཆོག་ཆེན་པོ་ཞིག་ཉིན་བྱེད་དབང་པོ་དྭངས་པའི་མཁའ་ལ་འཆར་བ་དང་ཕན་ཚུན་འགྲན་པ་ལྟར། ས་ཡི་སྟེང་འདིར་བྱོན་པ་དང་། དར་ཅིག་ནས་ཀླུ་ཡི་རྒྱལ་པོ་རྣམས་ཀྱིས་ཁ་དོག་སྣ་ཚོགས་པའི་ཆུ་འཛིན་མཁའ་ལ་བཀོད་ཅིང་འབྱུང་བ་ཐམས་ཅད་དབྱར་གྱི་དཔལ་ཡོན་ལ་ཤིན་ཏུ་ངེས་འབྱུང་གི་ངང་ཚུལ་བསིལ་ལྡན་རྒྱལ་མོའི་རེག་པས་དམ་པར་བསྡམས་པ་ཡང་ལྷོད་པོར་གྱུར་ཏེ་སྤྲིན་སྒྲའི་དབྱངས་སྙན་ཡུད་ཙམ་ལ་ལྷང་ངེར་སྒྲོགས་ཤིང་། འཇའ་སྤྲིན་ཁ་དོག་དང་དབྱིབས་སྣ་ཚོགས་ཀྱིས་མཁའ་དབྱིངས་མཛེས་པར་གྱུར་ཏོ། །དེ་ཡི་ཚེ་སྦས་པའི་རྣལ་འབྱོར་གྱིས་སྐུ་ཚེ་དང་ཤེས་རབ་འཕེལ་བའི་རྟེན་འབྲེལ་གྱི་གནད་ཁྱད་པར་ཅན་དང་བར་ཆད་བསྲུང་བའི་རྫས་སྔགས་སོགས་ཕྱག་བཞེས་གནང་། མཚན་ཚེ་རིང་འབྲུག་རྒྱལ་ཞེས་པར་གསོལ་བ་སོགས་ཐོག་མའི་རྟེན་འབྲེལ་ལེགས་རྒུའི་ཕྱོགས་སུ་བསྒྲིགས་པར་མཛད་པ་དང་། ཡང་རྗེ་ཉིད་ཀྱིས་རྒྱུན་བསྣམས་སྣག་བུམ་དང་ཕྱག་སྙུག་སྦ་མཁར་བཅས་རྗེ་བླ་མ་ལ་ཕུལ་ཏེ། ཁོ་བོའི་སྤངས་རྟོགས་ཀྱི་ཡོན་ཏན་ཐམས་ཅད་ཁྱེད་ལ་ཡོངས་སུ་རྫོགས་པའི་རྟེན་འབྲེལ་ཡིན་ཞེས་གསུངས་པ་དང་། དེ་ནས་ཡབ་ཡུམ་རྣམས་ཀྱིས་བཀུར་{བསྐུར}སྟི་རིམ་གྲོ་ཕུན་སུམ་ཚོགས་པའི་ཞབས་འདེགས་བཅས་ནང་དུ་རྩ་རླུང་ཐིག་ལེའི་སྟོབས་འཕེལ་བའི་ཐབས་དང་ཕྱི་རུ་སྐུ་ཡི་དཀྱིལ་འཁོར་ལ་འཕྲོད་བཞེས་གང་ཆེའི་བསྐྱེད་བསྲིངས་ཤིང་། རྗེ་འདི་ཉིད་གཞོན་ནུའི་སྐབས་ནས། རྒྱལ་ཚབ་བྱམས་པས། སྦྱོར་བའི་སྔོན་དུ་སྙིང་རྗེ་དང་། །མོས་པ་དང་ནི་བཟོད་པ་རྣམས། །རིགས་ཀྱི་རྟགས་སུ་ཤེས་པར་བྱ། །ཞེས་དང་། ཆུ་སྐྱར་ལས་ནི་ཆུར་ཤེས་དང་། །དུ་བ་ལས་ནི་མེར་ཤེས་ལྟར། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །ཞེས་གསུངས་པ་ལྟར། རྒྱལ་སྲས་སེམས་དཔའ་ཆེན་པོར་གཟོད་ནས་གྲུབ་པ་ལ་གཞན་ཕན་བརྩེ་ཆེན་སྙིང་རྗེའི་ཁུར་ཆེན་ཅུང་ཟད་ཀྱང་བྲི་བ་དང་དོར་བ་མེད་པ་རང་གི་ཆོས་ཉིད་དུ་གྱུར་པས་སེམས་ཅན་བསད་པའི་ཤ་ཁྲག་ལ་མི་དགྱེས་ཤིང་། དངོས་སུ་བཞེས་པ་ལྟ་ཞོག་དྲི་ཙམ་བྲོ་བ་དང་། ཤ་ཡི་དྲི་མས་སྦགས་པའི་སྣོད་ཅན་གཙང་དག་མ་བྱུང་བར་གསོལ་ཐུག་ལ་སོགས་བསྐོལ་བ་ན་དེའི་རོ་ལྗགས་ལ་སྨིན་པས་ཀྱང་སྐུ་ཁམས་མི་དྭངས་པར་གྱུར་པ་དང་། སེམས་ཅན་གསོད་པ་སོགས་གཟིགས་པ་ནས་སྙིང་རྗེའི་ཤུགས་ཀྱི་གདུང་བའི་སྤྱན་ཆབ་ཆར་དྲག་པོ་ལྟར་བསིལ་ཞིང་ཐབས་ཅི་ནུས་ཀྱིས་བཟློག་པ་དང་། སྐུ་གཞིས་ཀྱི་ཨ་ནེ་སོགས་ལ་ཤ་གཅོད་དུ་འཇུག་པ་སོགས་ཀྱིས་མཚོན། ཉམ་ཐག་གི་འགྲོ་བ་རྣམས་ལ་ཤིན་ཏུ་བརྩེ་ཞིང་སྦྱིན་པ་ལ་དགའ་བ། བླ་མ་གྲྭ་པ་སོགས་ངུར་སྨྲིག་གི་རྒྱལ་མཚན་བགོས་པ་དང་། སེར་ཆས་གྱོན་པ་གཟིགས་ན་དེ་ལ་དགའ་ཞིང་བརྩེ་བ་དང་། སྐུ་གསུང་ཐུགས་ཀྱི་རྟེན་དང་། མཆོད་རྫས་སོགས་ལ་དགྱེས་ཤིང་། དབང་བསྐུར་ཆོས་འཆད་ཀྱི་སྟངས་ཀ་དང་། ཌ་དྲིལ་དཀྲོལ་ཞིང་། སྐབས་འགར་བསམ་གཏན་ལ་གནས་པའི་བཞུགས་སྟངས་ཀྱང་རྒྱུན་རིང་གནང་བ་སོགས་ཐ་མལ་བྱིས་པའི་སྤྱོད་པ་གཏན་ནས་མི་གནང་ཞིང་། དངུལ་ཆུ་སར་ལྷུང་ཡང་རྡུལ་དང་མ་འདྲེས། པདྨ་འདམ་ན་གནས་ཀྱང་འདམ་གྱིས་མ་གོས་པའི་དཔེ་ལྟར་དམ་པའི་ངང་ཚུལ་ལ་ཉེས་དྲིས་གཞར་ཡང་མི་མཛའ་ཞིང་རྒྱལ་བའི་སྲས་ཀྱི་སྤྱོད་པ་ཁོ་ནས་དུས་འདའ་བ་ཞིག་བཞུགས་པར་གྲགས་སོ། །དེ་སྐད་དུ་ཡང་རྣམ་ཐར་གསོལ་འདེབས་ལས། ཡེ་ཤེས་གཟིགས་པའི་ཆ་ཤས་ལྷོ་ཟླའི་ལྗོངས། །ཡུལ་གྱི་དགེ་བཅུ་གཡང་དུ་འཁྱིལ་བ་དེར། །གྲུབ་པ་མཆོག་གི་རིགས་སུ་ཞུགས་པ་ན། །དགེ་ལེགས་སྣང་བས་ཁྱབ་ལ་གསོལ་བ་འདེབས། །བལྟམས་ཚེ་བཀྲ་ཤིས་མཚན་རྟགས་བཟང་པོས་སྤྲས། །རང་བཞིན་ཏིང་འཛིན་བཟང་པོར་དབང་འབྱོར་ཞིང་། །ཕལ་པའི་སྤྱོད་ལས་རིང་དུ་འདས་པ་ཡི། །ལྷ་མི་སྤྲོ་བ་བསྐྱེད་ལ་གསོལ་བ་འདེབས། །ཆུང་ངུའི་དུས་ནས་ཡོན་ཏན་ཚད་མེད་མངའ། །ཐེག་ཆེན་རིགས་ཀྱི་ནུས་པ་ཡོངས་སུ་སད། །མཆོག་གཟིགས་རྣམས་ཀྱི་ལུང་གིས་བསྐུལ་བ་ཡི། །སྤྲུལ་པའི་བདེན་དོན་རྙེད་ལ་གསོལ་བ་འདེབས། །ཞེས་ཀྱང་བྱུང་ངོ་། །འཕགས་པའི་ས་ལ་བཞུགས་ཀྱང་བུང་བའི་རྣམ་པར་རོལ། །འཕོ་འགྱུར་སྤྲོས་པ་བྲལ་ཡང་གཞོན་ནུའི་གཟུགས་སུ་སྣང་། །རྣམ་པ་ཐམས་ཅད་མཁྱེན་ཀྱང་སྦྱང་བའི་ཚུལ་བསྟན་པ། །རྒྱལ་སྲས་དཔའ་བོ་མཆོག་འདིས་རང་བཞིན་བརྟག་པར་དཀའ། །གང་གི་ཐུགས་ལ་ཤེས་བྱ་ཀུན་ཤོང་ཞིང་། །སྐུ་མཆོག་མཚན་བཟང་མཐོང་བས་ཡིད་འཕྲོག་པ། །གསུང་གི་གདངས་སྙན་ཀ་ལ་པིངྐའི་དབྱངས། །ཡོན་ཏན་ཐམས་ཅད་འབད་མེད་ལྷུན་གྱིས་རྫོགས། །རིགས་ཀྱི་མཛད་པ་བཟང་པོ་ལས། །བརྒྱ་ཕྲག་བསྐལ་པར་གོམས་པའི་མཐུས། །ངལ་བས་ནན་གྱིས་མ་བརྩོན་ཀྱང་། །དམ་པའི་སྤྱོད་པར་ངང་གིས་མཛའ། །ས་ཡི་སྙིང་ནས་གསེར་བཞིན་དུ། །བཟང་པོའི་དཔལ་འོད་འཕྲོ་བ་ཡི། །སྙན་པའི་དྲི་བསུང་རྒྱང་དུ་འཐུལ། །ལྷར་བཅས་ངོ་མཚར་གཏམ་གྱི་གཞི། ཞེས་པ་འང་བར་སྐབས་ཀྱི་ཆེད་དུ་བརྗོད་པའོ། །༈ དེ་ལྟར་མི་ཡི་ཁྱུ་མཆོག་འགྲོ་བའི་བླ་མ་རྒྱལ་སྲས་གཞོན་ནུ་དེ་ཉིད་སྔ་འགྱུར་བཀའ་གཏེར་གྱི་བསྟན་པའི་གསལ་བྱེེད་ཆེན་པོར་སྔོན་གྱི་སྐྱེ་བའི་ཕྲེང་བ་མང་པོའི་གོང་ནས་སྨོན་ལམ་གྱི་མཐུ་གྲུབ་པས། དེང་གི་དུས་གསང་བ་གསུམ་གྱི་མཛད་ཚུལ་ཚུ་རོལ་མཐོང་བའི་བློ་ཅན་སྦྱངས་དང་མ་སྦྱངས་ཐམས་ཅད་ཀྱིས་སྐྱེས་བུ་འདི་ནི་རྒྱལ་དང་རྒྱལ་སྲས་དམ་པའི་རྣམ་འཕྲུལ་ཁྱད་པར་ཅན་ཡིན་ནོ། །རྒྱལ་ཚབ་ཆོས་ཀྱི་རྒྱལ་པོ་བསམ་བཞིན་འབྱོན་པ་ཡིན་ནོ་ལ་སོགས་པའི་གཏམ་གྱི་གྲགས་སྙན་རླུང་གིས་ཁྱེར་བ་ལྟར་དཀར་ཕྱོགས་ཀྱི་ལྷ་དང་མི་ཡིས་ཕྱོགས་ཀུན་ཏུ་བསྒྲགས་པ་ན། སྔོན་གྱི་རིག་འཛིན་གོང་མ་གྲུབ་པའི་ཁྱུ་མཆོག་དེ་ཉིད་ཀྱི་ཞལ་ཆེམས་གནད་ཐེམ་དང་། ཡེ་ཤེས་གཟིགས་པའི་འཕགས་ཆེན་རྣམས་ཀྱི་ལུང་བསྟན་པ་ལ་སོམ་ཉིའི་སྐབས་ཆེར་མ་མཆིས་ཀྱང་། ཡིད་ཆེས་བླ་ལྷག་ཏུ་བསྐྱེད་པའི་ཕྱིར་འཇམ་དབྱངས་སྨྲ་བའི་སེང་གེ་མི་ཡི་བརྫུ་ལ་ཞུགས་པ་ཀུན་མཁྱེན་རྡོ་རྗེ་གཟི་བརྗིད་ཀྱི་གསེར་སྙན་རིན་པོ་ཆེར་ཡུལ་ཕྱོགས་ཡབ་ཡུམ་འདི་དང་འདི་ལྟ་བུ་ལ་ངོ་མཚར་བའི་མཚན་ལྟས་དང་ལྡན་པའི་སྐྱེས་མཆོག་ཁྱད་པར་འཕགས་པ་སྐུ་བལྟམས་པ་འདི་རང་བྱུང་རྡོ་རྗེའི་རྣམ་འཕྲུལ་སྒྱུ་མའི་རོལ་རྩེད་ལ་ནོར་འཁྲུལ་ཐེ་ཚོམ་གྱི་སྐབས་མ་མཆིས་སམ། ཐམས་ཅད་གཟིགས་པའི་བདེན་པས་སྐབས་དབྱེ་བར་གསོལ་ཅེས་དད་གསུམ་གུས་པས་གསོལ་བ་བཏབ་པ་ན། མཉམ་པར་མ་བཞག་པའི་ཐུགས་མི་མངའ་བ་དང་ལྡན་པ་དེས་པདྨའི་ལྗགས་རིང་གཡོ་བས་བསྙེལ་བ་དང་ཞུམ་པ་མེད་པའི་གསུང་ཚངས་པའི་དབྱངས་དང་། འབྲུག་སྒྲ་ལྟར་བརྗིད་པས་དོན་འདི་ལ་ནི་ལན་བརྒྱར་བརྟགས་ཀྱང་ནོར་བ་མ་མཆིས་ཤིང་གདན་ས་ཆེན་པོར་ཞབས་སོར་བཀོད་ན་དོན་དང་ལྡན་པར་འགྱུར་རོ། །ཞེས་པའི་བཀའ་ལུང་རྡོ་རྗེ་རིན་པོ་ཆེའི་ཅོད་པཎ་སྤྱི་བོའི་གཙུག་ཏུ་བཅིངས་ནས་འགྱུར་མེད་པདྨ་བསྟན་འཛིན་མཁས་གྲུབ་རྒྱ་མཚོའི་དབང་པོའི་སྡེ་ཞེས་པའི་མཚན་འབུལ། ཞབས་བརྟན་གྱི་བདེན་ཚིག་ཤིས་དབྱངས་བཅས་སྩོལ་བར་མཛད་པ་དང་། ཟེ་ཆེན་ནས་རབ་འབྱམས་ལྔ་པའི་མཆོག་སྤྲུལ་རིན་པོ་ཆེ་དབུས་བཀའ་བགྲོས་ཏེ། བླ་མཆན། མགྲོན་གཉེར་སོགས་ཆེད་ཕེབས་ཀྱི་རྗེ་བླ་མ་དགུང་གྲངས་ལྔ་བཞེས་པ་དང་མཆོག་སྤྲུལ་ཉིན་བྱེད་གཞོན་ནུའི་གསེར་ཞལ་ཐོག་མར་མཇལ་བའི་སྐབས་དེ་དག་ཀྱང་དགའ་བ་དང་སྐྱོ་བའི་ཉམས་སྣ་ཚོགས་པ་རྒྱུད་ལ་སྐྱེས། དད་མོས་དྲག་པོས་ཇི་ལྟར་འཁོར་ལོས་སྒྱུར་བའི་རྒྱལ་པོར་དབང་བསྐུར་བའི་དུས་བདེན་ཚིག་གྲུབ་པའི་བྲམ་ཟེ་ཆེན་པོ་དག་གིས་ཤིས་པ་བརྗོད་པ་དང་། བདུད་རྩིའི་ཆུས་ཁྲུས་བྱེད་པ་ལྟར། གཙང་མའི་ཆབ་ཀྱི་སྐུ་ཁྲུས་གསོལ་བས་ཕྱི་ནང་གི་ཉེས་ཚོགས་ཤིན་ཏུ་དག་པར་བྱས་ཤིང་དྲང་སྲོང་ཆེན་པོའི་ཆོས་གོས་དག་ཕུལ། དགའ་སྟོན་བཟང་པོ་སྣ་ཚོགས་པ་དང་ཞལ་ཟས་སྣ་ཚོགས་ཀྱིས་མདུན་བསྟར། བཀྲ་ཤིས་པའི་ཚིགས་སུ་བཅད་པ་དུ་མ་སྒྲོགས་ཤིང་ཧོར་ཟླ་དགུ་པའི་ཚེས་གཟའ་སྐར་སྦྱོར་བྱེད་དགེ་ཞིང་ཤིས་པ་འཛོམས་པ་ན། སྤུ་སྡུག་མཛེས་ཤིང་ཡིད་དུ་འོང་བ་མྱུར་མགྱོགས་ཅང་ཤེས་རིན་པོ་ཆེར་སྒ་སྲབ་སོགས་རྒྱན་གྱི་རྣམ་པར་མཛེས་པའི་སྟེང་དུ། བརྟན་པའི་འཁོར་ལོ་གདོང་ལྔའི་དབང་པོར་བསྒྱིངས་པ་ལྟར་ཤིན་ཏུ་མཛེས་པའི་སྐུ་མཆོག་ལྷན་ནེ་ལྷང་ངེ་ལྷམ་མེ་བ་གཟི་བརྗིད་མཚུངས་པ་མེད་པ་ལ། འཁོར་མི་དང་མི་མ་ཡིན་དཀར་ཕྱོགས་ཀྱི་ཚོགས་རྣམས་བཞོན་པ་སྣ་ཚོགས་ལ་ཞོན་པ། ལག་ན་དར་ཟབ་ཆེན་ཁ་དོག་སྣ་ཚོགས་པའི་བ་དན་འཕྱར་བ་དང་བཅས་དལ་འགྲོས་ཀྱི་གསེར་ལྡན་འབྲི་ཀླུང་དམ་པ་ཆོས་ཕྱུག་གི་གཙང་ཆབ་ཆེན་པོར་ཀོ་གྲུའི་འཁྲུལ་འཁོར་གྱི་བརྒལ་བ་དང་། གདན་ས་ཆེན་པོ་ནས་ཀྱང་རྟ་ཐབས་ཀྱི་བསུ་བ་སྔ་རྗེས་རིམ་པར་བརྒྱུད་དེ་སྔ་འགྱུར་བཤད་སྒྲུབ་བཀའ་གཏེར་གྱི་ཆུ་ཀླུང་འབུམ་ཕྲག་གཅིག་ཏུ་འཁྱིལ་བ་རིག་པ་དང་གྲོལ་བའི་ཡོན་ཏན་དཔག་ཏུ་མེད་པའི་དགེ་འདུན་གྱི་སྡེ་དང་། མཁས་དང་གྲུབ་པ་བརྒྱུད་མར་བྱོན་པའི་གནས། དཔལ་ཞེ་ཆེན་མདོ་སྔགས་བསྟན་པ་གཉིས་ལྡན་བཤད་སྒྲུབ་དར་ཞིང་རྒྱས་པའི་གླིང་ཆེན་པོར་ཉེ་བར་ཆིབས་བསྒྱུར་བ་ན་ངུར་སྨྲིག་གི་རྒྱལ་མཚན་བགོས་པའི་དགེ་འདུན་གྱི་ཕྲེང་བ་ཚར་དུ་དངར་ཞིང་། དྲི་ཞིམ་པོ་སྣ་ཚོགས་བསྲེགས་པའི་སྤོས་ཀྱི་གླང་པོ་ཕྱོགས་བཅུར་འཕྲོ་བ་དང་། ལྷ་ཡི་རོལ་མོ་སྣ་ཚོགས་པ་དང་། དར་གྱི་ལྡ་ལྡི། ཟ་འོག་གི་རྒྱལ་མཚན། རིན་པོ་ཆེའི་ཏོག་གི་མཛེས་པའི་བཀྲ་ཤིས་པའི་གསེར་གྱི་གདུགས་དཀར་པོ་སོགས་མཆོད་པའི་ཡོ་བྱད་སྣ་ཚོགས་པས་མདུན་ནས་དྲངས་ཏེ་གཙུག་ལག་ཁང་ཆེན་པོར་ཕྱག་ཕེབས་པ་དང་། བདེ་གཤེགས་མྱ་ངན་མེད་དཔལ་དགེ་བའི་བཤེས་སུ་རོལ་པ་རབ་འབྱམས་ལྔ་པ་དང་ཡབ་སྲས་གཉིས་མཇལ་ཞིང་ལྷ་རྫས་གངས་རིའི་མདངས་ལྡན་བཀྲ་ཤིས་རྟགས་ཀྱི་རི་མོས་སྤྲས་པ་རྣམས་བསོད་ནམས་བརྒྱ་ལས་གྲུབ་པའི་ཕྱག་སོར་ཕན་ཚུན་མཛེས་པར་བརྐྱངས་པས་ཐོགས་ཏེ་སྐུའི་སྐྱེ་བའི་ཕྲེང་བ་དུ་མར་སྨོན་ལམ་དང་ཐུགས་བསྐྱེད་མཐུན་པས་འགྲོགས་པ་སླར་ཡང་དུས་ལ་བབ་པར་མཁྱེན་བཞིན་དུ་དགྱེས་པ་ཆེན་པོས་གསུང་རྡོ་རྗེ་འོད་དཔག་མེད་ལོངས་སྤྱོད་ཀྱི་འཁོར་ལོའི་རྒྱན་དུ་མཛེས་པར་བྱས་པས་བསྟན་འགྲོར་དགེ་བའི་རྟེན་འབྲེལ་གྱི་གཞི་ལེགས་པར་ཐེངས་ཤིང་། བཞུགས་ཁྲིར་ཞབས་པད་བཀོད་ཟིན་པ་དང་འབྲུག་གི་སྒྲ་ཆེས་ཆེར་སྒྲོགས་པ་དུས་མཉམ་དུ་བྱུང་བ་ནི་ཟབ་རྒྱས་ཆོས་ཀྱི་སྒྲ་ཆེན་པོ་འཇིག་རྟེན་གསུམ་ན་སྙན་པར་སྒྲོགས་པས་སྐལ་བཟང་མདོངས་མཐའི་ཚོགས་དགའ་བའི་དཔལ་བསྐྱེད་པས་སྨིན་གྲོལ་གྱི་ལང་ཚོ་ཅི་དགར་རྒྱས་ཏེ། སྔ་འགྱུར་གྱི་བསྟན་པའི་གསལ་བྱེད་ཆེན་པོར་འབྱུང་བའི་རྟགས་ཡོངས་སུ་གྲུབ་པའོ། །དེར་འདུས་པ་ཐམས་ཅད་ཀྱི་གུས་པའི་ལྷ་ཕྱག་གྱང་འགྱེལ་བ་ལྟ་བུ་སྔོན་དུ་འགྲོ་བས་བཀྲ་ཤིས་པའི་ལྷ་རྫས་ཕུལ་བ་དང་། སྐྱབས་མཆོག་འཇམ་དཔལ་གཞོན་ནུའི་ཕྱག་སོར་དེ་བཞིན་གཤེགས་ལྔར་བྱིན་གྱིས་བརླབས་པ་སྤྱི་བོར་བཀོད་པ་ལས་བྱུང་བའི་བདུད་རྩིས་སྒོ་གསུམ་སྨིན་པར་བྱས་སོ། །དེ་ནས་དུས་ཚེས་བཟང་བར་སྟོན་པའི་སྣང་བརྙན་གྱི་དྲུང་དུ་དབུ་སྐྲ་མཐོན་མཐིང་ལྟར་གནག་པའི་གཙུག་གི་ཕུད་བུ་བྲེགས་པ་དང་། མཚན་ཨོ་རྒྱན་མི་འགྱུར་ཀུན་བཟང་བསྟན་པའི་རྒྱལ་མཚན་འཇིགས་བྲལ་ཕྱོགས་ལས་རྣམ་པར་རྒྱལ་བའི་སྡེ་ཞེས་པའི་མཚན་སྙན་གྱི་དྲིལ་ཆེན་བསྒྲགས། དེ་ནས་རྒྱལ་བ་ལྷ་ལས་བབ་པའི་དུས་ཚེས་བཟང་པོར་རྗེ་གོང་མའི་ཆོས་ཀྱི་ཁྲི་ལ་མངའ་གསོལ་བའི་སྟ་གོན་རྣམས་ལེགས་པར་འཚོགས་པ་དང་། ཆོས་བརྒྱུད་འདིར་གཏོགས་པའི་ཕྱོགས་མཐའི་འདུས་པ་རྒྱ་མཚོ་རྣམས་འཚོགས་པའི་དབུས་རྗེ་འཇམ་དཔལ་གཞོན་ནུ་ཉིད་འཇིགས་མེད་གདོང་ལྔས་བཏེགས་པའི་ཆོས་ཀྱིསབསྲུང་པའི་ཁྲི་ཆེན་པོར་ཞབས་པད་འཁོར་ལོས་མཚན་པ་བཀོད་དེ་སྐུ་མི་གཡོ་བ་རྣམ་པར་སྣང་མཛད་ཆེན་པོ་ཆོས་བདུན་གྱི་ངོ་བོར་བཞུགས་པ་དང་། གསུང་བརྗོད་པ་རྣམ་པ་ཐམས་ཅད་པའི་ཆོས་ཀྱི་སྒྲ་དབྱངས་སྒྲོགས་ཤིང་། ཐུགས་མཁྱེན་བརྩེའི་དཀྱིལ་འཁོར་རྒྱས་པས་གདུལ་བྱའི་རྒྱུད་སྨིན་གྲོལ་གྱི་མཐུ་དང་ལྡན་པ། ཡོན་ཏན་ཕྲིན་ལས་འཛད་པ་མེད་པའི་ཡིད་བཞིན་གྱི་ནོར་བུ་དང་། དཔག་བསམ་གྱི་ལྗོན་ཤིང་ལྟར་བསྟན་འགྲོའི་རེ་སྐོང་ལྷ་མིའི་གཙུག་རྒྱན། ཐུབ་དབང་ཤཱཀྱའི་རྒྱལ་པོ་ལྟར་བཞུགས་པ་ལ་ཆོས་ཀྱི་རྒྱལ་པོར་འོས་པའི་རིན་ཆེན་སྣ་བདུན། བཀྲ་ཤིས་པའི་རྟགས་རྫས་སོགས་དང་ལྷ་ཀླུ་མི་ཡི་དཔལ་འབྱོར་ཕྱུར་བུར་སྤུངས་ཤིང་མཆོད་པའི་ཡོ་བྱད་སྣ་ཚོགས་པས་མདུན་བསྟར་དེ་རིམ་གཉིས་ཀྱི་དྲོད་ཚད་དང་ལྡན་པའི་དགེ་འདུན་འདུས་པའི་སྡེས་བསྐྱེད་རྫོགས་ཟབ་མོས་འཆི་མེད་རྡོ་རྗེར་སྒྲུབ་པའི་བརྟན་བཞུགས་ཀྱི་ཆོ་ག་དང་འབྲེལ། གླིང་བཞི་རི་གླིང་ཉི་ཟླ་བཀོད་པའི་མཎྜལ་སྟོང་གསུམ་གྱི་སྟོང་ཆེན་པོར་ཀུན་བཟང་མཆོད་པའི་སྤྲིིན་དུ་སྤྲོས་ཏེ་འབུལ་བ་དང་། ག་ན་ཙཀྲའི་དགའ་སྟོན་རྒྱལ་ཆེན་པོས་འདུ་བ་ལ་ལོངས་སྤྱོད་ཅིང་། རྒྱལ་བའི་ཞལ་ནས་གསུངས་པའི་བཀྲ་ཤིས་ཀྱི་ཚིགས་སུ་བཅད་པའི་དབྱངས་དང་། ལྷའི་མེ་ཏོག་མནྡ་རའི་ཆར་པུས་ནུབ་ཙམ་དུ་བསྙིལ་བས་དགེ་ལེགས་ཀྱི་རོལ་མོ་སྲིད་ཞིའི་ཁོངས་སུ་རྒྱུན་མི་ཆད་པར་སྒྲོགས་སོ་ཅེས་གྲགས་སོ། །ལྷ་ཡི་བླ་མ་གང་གི་ཡབ་ཡུམ་གཉེན་གྱི་ཆར་གཏོགས་འཁོར་དང་བཅས་པར་ཡང་ཞལ་ཟས་སྣ་ཚོགས་ཀྱི་བཟའ་བ་དང་། ལྷའི་བདུད་རྩིའི་བཏུང་བ་ཕུན་སུམ་ཚོགས་པས་མཆོད་ཅིང་། བདོག་དགུའི་དངོས་པོ་གྱ་ནོམ་པ་རྣམས་རང་རང་གི་བགོ་སྐལ་དང་འཚམ་པར་རྣམ་ཐོས་བུའི་བང་མཛོད་ཁ་འབྱེད་པ་ལྟ་བུར་བསྙེན་བསྐུར་ཞུས་པས་མགྲོན་དུ་བོས་པ་རྩ་ལག་དང་བཅས་པའི་ཞལ་བཟང་ཟླ་བ་ལྟར་གསལ་ཞིང་སྙན་ཚིག་གི་གླིང་བུ་རབ་དགའི་པི་ཝཾ་ལ་འགྲན་པར་ཆས་སོ། །དེ་སྐད་དུ་ཡང་། རྣམ་ཐར་གསོལ་འདེབས་ལས། མདོ་སྔགས་བསྟན་པ་གཉིས་ལྡན་ཆོས་གྲྭ་ཆེར། །གོང་མའི་ཆོས་ཀྱི་ཁྲི་ལ་མངའ་གསོལ་ཚེ། །རྫོགས་ལྡན་ཉི་མ་གསར་པའི་དགའ་སྟོན་ནི། །ནུབ་མེད་ངོམ་པར་མཛད་ལ་གསོལ་བ་འདེབས། །ཞེས་བྱུང་ངོ་། །ཚངས་དང་བརྒྱ་བྱིན་ལ་སོགས་པ། །ཆེ་དགུས་ཐོར་ཅོག་གིས་བཏུད་པ། །གདོང་ལྔའི་དབང་པོ་བསྒྱིངས་པའི་ཁྲིར། །མགོན་པོ་ཀུན་གཟིགས་གསང་གསུམ་བརྗིད། །སྲིད་ཞིའི་དཔལ་འབྱོར་མཆིས་སོ་ཅོག །འདི་ན་གཅིག་ཏུ་སྤུངས་བྱས་ནས། །མཆོད་པས་ཀུན་ཏུ་བཟང་པོ་ཡི། །ཏིང་འཛིན་སྤྲིན་ལ་འགྲན་པར་ཆས། །འཇིག་རྟེན་ཆེན་པོར་གྲགས་པའི་སྲེད་ལྡན་རྣམས། །རིན་ཆེན་ཁྲི་རྐང་མཐོན་པོར་འཛེགས་གྱུར་ན། །འཕགས་རྣམས་ཆོས་ཀྱི་ཁྲི་ལ་མངའ་གསོལ་བར། །བརྩོན་པ་བརྒྱ་འགྱུར་བསྐྱེད་ནས་མཆོད་འདི་འོས། །ཞེས་ཀྱང་སྨྲས་སོ། །དཔལ་ལྡན་བླ་མའི་རྣམ་པར་ཐར་པ་ལས་སྐུ་བལྟམས་པའི་ཚུལ་ལས་གཙོ་བོར་གླེང་བའི་སརྒ་དང་པོའོ།། །།༈ གཉིས་པ་རྒྱལ་བའི་བསྟན་པ་ལ་ཞུགས་ནས་ཐོས་བསམ་སྒོམ་པའི་རིམ་པ་ཇི་ལྟར་མཛད་པའི་ཚུལ་ལས་གཏམ་གྱི་སྦྱོར་བ་བསྙད་པར་བྱ་སྟེ། རྗེ་འདི་གདན་སར་མངའ་གསོལ་གྲུབ་ནས་ཁུ་བོ་སྐྱིད་གཡང་ཞེས་པ་མིང་དངོས་པདྨ་དབང་ཆེན་ཟེར་བས་སློབ་དཔོན་མཛད་ནས་གངས་ཅན་གྱི་ཡི་གེའི་ཕྱི་མོ་འཇམ་དབྱངས་ཐུ་མིའི་མཁྱེན་རབ་ཀྱིས་བསྐྲུན་པའི་ཡི་གེའི་སྦྱོར་བ་ཐམས་ཅད་ལ་མཁས་པའི་ཕུལ་དུ་ཕྱིན་པ་སྦྱངས་ཤིང་། སྨྱུག་འཛིན་པ་དེ་ཉིད་ལས་ཕྱག་བྲིས་ཀྱི་སྨྱུག་འགྲོས་རྣམས་ཀྱང་ལེགས་པར་ཆུབ་པ་དང་། དེ་ཡང་དམ་པ་རྣམས་ཀྱི་བྱ་བ། རྒྱལ་བ་བུ་རམ་ཤིང་པའི་བསྟན་པ་རིན་པོ་ཆེ་དང་། རིས་མེད་པའི་འགྲོ་བ་མཐའ་དག་ལ་ཕན་བདེའི་དབུགས་འབྱིན་ཆེན་པོ་སྟེར་བའི་དོན་ཁོ་ན་ལས་གཞན་དུ་མི་སེམས་ཤིང་དེ་ཁོ་ནའི་དོན་ལ་རྟག་ཏུ་བརྩོན་པའི་སྙིང་སྟོབས་ཀྱི་འཇུག་པ་ཟླ་མེད་པས་འཕགས་པ་སྤྱན་རས་གཟིགས་དང་། རྒྱས་སྲས་ཐུ་བོ་འཇམ་དཔལ་གཞོན་ནུ་ལྟར་སྐྱོ་ངལ་དང་བརྩོན་པ་ལྷོད་པའི་དྲི་མས་ཤིན་ཏུ་རྣམ་པར་དག་ཅིང་བསྟན་འགྲོའི་དོན་རླབས་པོ་ཆེ་སྒྲུབ་པ་ནི་སྐྱེས་བུ་དམ་པ་རྣམས་ཀྱི་ཆོས་ཉིད་ཡིན་ཏེ། དཔེར་ན་ཡིད་བཞིན་གྱི་ནོར་བུ་ལ་དགོས་འདོད་འབྱུང་བ་དང་། ཙནྡན་དང་དྲི་བསུང་། མེ་དང་མེ་ཡི་ཚ་བ་ལྟར་ངོ་བོ་དང་མཚན་ཉིད་འབྲལ་མི་ཤེས་པའི་ཚུལ་ཅན་ཏེ། ཁྱད་པར་སྙིགས་མ་རྩོད་པ་རྒྱས་པའི་དུས་འདིར་སྡིིག་ཏོ་ཅན་དམ་པར་བརྫུས་ནས་ལོག་པའི་ལམ་སྟོན་པས་ཐམས་ཅད་ཕུང་ཁྲོལ་ཆེན་པོར་འགྱུར་བ་དང་། ཆོས་བརྒྱད་ཀྱི་སྒེག་མོའི་བསླུ་བྲིད་ལ་གཡེངས་པས་ཚེ་འདིས་ཆེ་ཐབས་ལྷུར་ལེན་ཞིང་ཐོས་བསམ་སྒོམ་སྒྲུབ་བགྱིས་པའི་མཁས་དང་གྲུབ་པའི་གསོབ་ཏུ་ཞུགས་ཀྱང་རང་ཉིད་མ་སྨིན་ཅིང་མ་གྲོལ་བས་མཐར་གྱིས་ནང་གི་དེ་ཉིད་མ་རྟོགས་པར་འགྱུར་བ་དང་། ལ་ལ་དག་སྡེ་སྣོད་ལ་དགྲར་བལྟས་ཤིང་གཡོ་ཅན་གྱི་ལྟ་བ་ངན་པའི་མཆེ་བ་རྣོན་པོ་གཟེངས་ཏེ་ལས་འབྲས་བཤས་རོལ་དུ་བྱེད་པ་རྣམས་ཀྱིས་ས་སྟེང་ཕལ་ཆེར་གང་ཞིང་། འགའ་ཞིག་ནི་ཕྱོགས་རེའི་མིག་ཅན་གྱིས་རང་ཕྱོགས་ཀྱི་དམ་ཆོས་ཅུང་ཟད་ཀྱིས་ཆོག་པར་སེམས་ནས་རྒྱལ་བསྟན་རིས་སུ་ཆད་ཅིང་ཆོས་སྤང་གི་ལས་བསགས་པ་དང་། སྐྱེ་བོ་མང་པོ་དག་སྒོ་གསུམ་མ་བསྒྲིམས་ཞིང་མ་དུལ་བས་ཆོས་ལ་མི་འཇུག་ཅིང་ཁྱི་སྔོན་དུ་རྩྭ་འཇོག་པ་ལྟར་གལ་ཆུང་ཆོས་ལ་བྱེད་པའི་སྐབས་འདིར། རྗེ་བླ་མ་འདི་ནི་ཐོས་པའི་སྒོ་ཀུན་ནས་བསྡུ་ཞིང་བསྟན་པ་རིན་པོ་ཆེ་ཚད་མ་གསུམ་གྱིས་དག་པའི་བཤད་རྒྱུན་ཀ་ཆེན་བཅུ་དང་། སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱི་གཞུང་གདམས་མན་ངག་ཐམས་ཅད་བུང་བས་བཅུད་ཚོལ་བ་ལྟར་དཀའ་ཚེགས་དང་སྐྱོ་དུབ་སྤངས་ནས་ཡོངས་འཛིན་བཤེས་གཉེན་ཆེན་པོ་རྣམས་ལས་གསན་པར་མཛད་པས་དམ་པའི་ཆོས་ཀྱི་མཛོད་ཉམས་པ་མེད་པར་བསྲུང་བའི་གོ་ཆ་ཆེན་པོ་བགོས་པ་སྟེ། འཕགས་པ་སྤྱན་རས་གཟིགས་དབང་ཕྱུག་ཅེས་བྱ་བ་ཐེག་པ་ཆེན་པོའི་མདོ་ལས། གང་གིས་སངས་རྒྱས་སྟོང་རྣམས་དང་། །སངས་རྒྱས་བྱེ་བ་གྲངས་དག་ལ། །བསྐལ་པ་གང་གཱའི་བྱེ་མ་སྙེད། །དེ་སྙེད་བསྐལ་པར་བཀུར་བ་ལས། །འཇིག་རྟེན་མགོན་གྱི་གསུངས་པ་ཡི། །དམ་ཆོས་འཇིག་ཚེ་གང་ཞིག་གིས། །ཉིན་དང་མཚན་དུ་འཛིན་བྱེད་པ། །དེ་ནི་བསོད་ནམས་ཁྱད་པར་འཕགས། །ཆོས་འཇིག་དུས་སུ་ཆོས་འཛིན་པ། །སྔོན་གྱི་སངས་རྒྱས་ཐམས་ཅད་དང་། །སངས་རྒྱས་ཡེ་ཤེས་རབ་གནས་པ། །ང་ལ་དེ་ནི་མཆོད་པ་བྱེད། །དམ་པའི་ཆོས་ནི་འཇིག་པའི་ཚེ། །སྟོན་པའི་བསྟན་པ་སྲུང་བྱེད་པ། །བསྐལ་པ་བྱེ་བ་སྟོང་རྣམས་སུ། །དེ་ནི་ནམ་ཡང་རྒུད་མི་འགྱུར། །ཞེས་སོགས་རྒྱ་ཆེར་བཀའ་སྩལ་པ་ལྟར་སྟོང་གསུམ་རིན་པོ་ཆེ་སྣ་བདུན་གྱིས་བཀང་བས་ལེགས་པར་གསུངས་པའི་དམ་པའི་ཆོས་ཀྱི་ཚིགས་སུ་བཅད་པ་གཅིག་གི་རིན་ཐང་གཞལ་བར་མི་ནུས་ཤིང་བྱང་ཆུབ་སེམས་དཔའ་ཆེན་པོ་རྣམས་ཀྱི་སྐུ་ལུས་ཏིལ་མར་གྱི་ནང་དུ་བཅུག་སྟེ་མར་མེ་སྦར་བ་དང་། སྐུ་ལ་ལྕགས་ཀྱི་གཟེར་བུ་སྟོང་བཏབ་སྟེ་ཆོས་བཙལ་བ་སོགས་དམ་པའི་ཆོས་འབྱུང་བར་དཀའ་བ་དང་། དོན་ཆེ་བའི་ཚུལ་ལ་དགོངས་ནས་དཀའ་ཆེན་དང་དུ་བཞེས་པ་ལྟར། བདག་ཅག་གི་དཔལ་ལྡན་བླ་མ་ཆོས་ཀྱི་གཏེར་མཛོད་ཆེན་པོ་འདིས་ཀྱང་དེ་བཞིན་ཐུགས་ཉམས་སུ་བཞེས་པ་སྟེ། དེ་ཡང་བསྟན་པ་རིམ་ཞུགས་ཀྱི་དབང་དུ་བྱས་ན། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་པ་ལྟར། ཐོག་མར་ཚུལ་ཁྲིམས་ཕུན་སུམ་ཚོགས་པ་ནི། མངོན་མཐོ་དང་ངེས་ལེགས་ཡོན་ཏན་ཀུན་གྱི་གཞིར་གྱུར་ཅིང་། ལྷ་མི་ཀུན་གྱི་བསོད་ནམས་ཀྱི་དཔལ་ཞིང་། དེ་བཞིན་གཤེགས་པའི་བསྟན་པ་རིན་པོ་ཆེའི་རྗེས་སུ་སློབ་པའི་དྲང་སྲོང་ཆེན་པོ་ངུར་སྨྲིག་གི་རྒྱལ་མཚན་ཐོགས་པ་ཞེས་ས་གསུམ་འགྲོ་བ་མཐའ་དག་གི་སྐྱབས་ཀྱི་མཆོག་ཏུ་གྱུར་པས་མུ་སྟེགས་ལྷ་མིན་གྱི་ཆོས་ལུགས་ཉམས་སྨད་པར་བྱས་ཤིང་། རིག་པ་དང་གྲོལ་བའི་ཡོན་ཏན་གྱི་འབྱོར་པ་དམ་པས་བརྒྱན་པ། རྒྱལ་བ་དགྱེས་པའི་དྲི་བསུང་ཞིམ་པོ་བསྣམས་ན་བདེ་བ། སྐུ་ཡི་དཀྱིལ་འཁོར་མཐོང་བས་ཡིད་འཕྲོག་པ་འཁོར་འདུས་པ་རྒྱ་མཚོའི་དབུས་ན་གཟི་བརྗིད་མཚུངས་པ་མེད་པ་དེ་ལྟ་བུའི་ཡོན་ཏན་བརྗོད་པར་དཀའ་བའི་ཚུལ་ཁྲིམས་ཀྱི་བསླབ་པ་རིན་པོ་ཆེར་ཐུགས་ཉམས་སུ་བཞེས་པའི་ཕྱིར། མདོ་ལས། ཁྱིམ་པ་རྣམས་ནི་མེ་ཡི་འོབས་ན་གནས་པ་ལྟ་བུའོ། །རབ་ཏུ་བྱུང་བ་རྣམས་ནི་བསིལ་ཁང་ན་གནས་པ་ལྟ་བུའོ། །ཞེས་དང་། འཇམ་དཔལ་ཞིང་གི་ཡོན་ཏན་བཀོད་པའི་མདོ་ལས། ཤཱ་རིའི་བུ་རབ་ཏུ་བྱུང་བ་ལ་མངོན་པར་དགའ་བའི་བྱང་ཆུབ་སེམས་དཔའ་ནི་ཡོན་ཏན་བཅུ་ཡོངས་སུ་འཛིན་ཏེ། བཅུ་གང་ཞེ་ན། འདོད་ཆགས་ལ་ཆགས་པར་མི་འགྱུར་བ་དང་། དགོན་པའི་གནས་ལ་དགའ་བ་རྙེད་པ་དང་། སངས་རྒྱས་ཀྱི་སྤྱོད་ཡུལ་ཐོབ་པ་དང་། ཆུང་མ་དང་བུའི་ཆགས་པ་དང་བྲལ་བ་དང་། ངན་འགྲོར་འགྲོ་བ་རྣམས་སྤོང་བ་དང་། བདེ་འགྲོར་འགྲོ་བའི་ཆོས་ལ་བརྟེན་པ་དང་། སྔོན་གྱི་དགེ་བའི་རྩ་བ་ཡོངས་སུ་མི་ཉམས་པ་དང་། དགེ་བའི་རྩ་བ་ཕུན་སུམ་ཚོགས་པ་ཐོབ་པ་དང་། དེ་ལ་ལྷ་རྣམས་རབ་ཏུ་དགའ་བ་དང་། དེ་ལ་མི་མ་ཡིན་རྣམས་བསྲུང་བར་འགྱུར་བ། རབ་ཏུ་འབྱུང་བ་མངོན་པར་དགའ་བའི་བྱང་ཆུབ་སེམས་དཔའ་ནི་ཡོན་ཏན་བཅུ་པོ་དེ་དག་ཡོངས་སུ་འཛིན་པར་འགྱུར་རོ། །ཞེས་རྒྱལ་བ་སྐྱེ་རྒུའི་ཉི་མ་ཐུབ་དབང་མཆོག་གི་ཡང་དག་པའི་བདེན་པས་ཆེས་ཆེར་བསྔགས་པ་མ་ཟད། གང་ན་དམ་ཆོས་འདུལ་བ་ཡོད་པ་དེར་སངས་རྒྱས་ཀྱི་བསྟན་པ་གནས་པར་གསུངས་ཤིང་། ལྷ་དང་བཅས་པའི་འཇིག་རྟེན་གསུམ་ན་མཛེས་པའི་རྒྱན་གཅིག་པུར་གྱུར་ཅིང་། དེ་བཞིན་གཤེགས་པའི་སྤངས་རྟོགས་ཀྱི་གསང་བ་ཐམས་ཅད་པའི་གཞིའམ་རྟེན་རྨད་དུ་བྱུང་བས་བསྐལ་བཟང་འདིར་བྱོན་གྱི་དེ་བཞིན་གཤེགས་པ་རྣམས་ཀྱང་ཛམ་བུའི་གླིང་འདིར་མངོན་པར་རྫོགས་པ་སངས་རྒྱས་པ་ན་ཁྱིམ་ནས་ཁྱིམ་མེད་པར་རབ་ཏུ་བྱུང་བའི་མཛད་པ་བསྟན་ཅིང་འཁོར་འདུས་པ་རྣམས་ཀྱང་ཕལ་ཆེར་རབ་ཏུ་བྱུང་བ་ངུར་སྨྲིག་གི་རྒྱལ་མཚན་ཐོགས་པ་ཆེན་པོ་ལ་བཀོད་ནས་དེ་རྣམས་ཀྱིས་བསྟན་པ་དམ་པའི་ཆོས་སྐྱོང་ཞིང་འགྲོ་བའི་དཔལ་མགོན་དུ་བཞུགས་པ་སྟེ་སོ་སོར་ཐར་པའི་མདོ་ལས་ཀྱང་། སངས་རྒྱས་འདུལ་བ་གངས་ཆེན་མཚོ། །གཏིང་མཐའ་མེད་པ་ཐམས་ཅད་ཀྱི། །གནས་པའི་སྙིང་དང་སྙིང་པོ་ནི། །སོ་སོར་ཐར་པ་འདི་ཡིན་ནོ། །འདི་ནི་དམ་ཆོས་རྒྱལ་པོ་ཡི། །ཆོས་ཀུན་གྱི་ནི་འདྲེན་པ་མཆོག །འདི་ནི་དགེ་སློང་ཚོང་ཚོགས་ཀྱི། །བསླབ་ཟོང་ཚོང་ཁང་ཆེན་པོ་ཡིན། །ཚུལ་ཁྲིམས་འཆལ་བས་ཟིན་རྣམས་ཀྱི། །གདུག་པ་རྣམ་སེལ་སྨན་འདི་ཡིན། །ཞེས་དང་། འདི་ནི་ཐར་པའི་གྲོང་འཇུག་པའི། །ཐེམ་སྐས་གཞི་དང་འདྲ་བར་གནས། །ང་ནི་མྱ་ངན་འདས་གྱུར་ནས། །འདི་ནི་ཁྱོད་ཀྱི་སྟོན་པའོ་ཞེས། །རང་བྱུང་ཉིད་ཀྱིས་གུས་བཅས་པར། །ནན་ཏན་དགེ་སློང་ཚོགས་མདུན་བསྟོད། །ཅེས་པ་ལྟར་སྟོན་པའི་བསྟན་པ་རིན་པོ་ཆེའི་གཞི་མར་གྱུར་ནའང་། དེང་སང་ཉོན་མོངས་པའི་སྙིགས་མ་ཆེས་ཆེར་བདོ་བའི་འདོད་ཆགས་ཀྱི་ཆུ་ཀླུང་དྲག་ཏུ་འཕྱུར་བས་བསྟན་པ་ལ་ཞུགས་པ་ཕལ་ཆེར་ངུར་སྨྲིག་གི་རྒྱལ་མཚན་ལ་སྡང་བར་གྱུར་པས་རྒྱབ་ཀྱིས་ཕྱོགས་པ་དང་། བསྟན་འཛིན་སྐྱེས་བུར་གྲགས་པ་རྣམས་ཀྱང་བདུད་ཀྱི་བར་དུ་གཅོད་པས་ཚུལ་མ་ཡིན་པའི་དུག་ཆུས་མྱོས་ཤིང་། ལ་ལ་དག་དམར་སེར་རྟགས་ཀྱི་སྤྲས་པའི་འོག་ནས་དུག་མདའ་འཆང་བ་ཤ་སྟག་གི་གང་བར་གྱུར་པའི་སྐབས་འདི་ལྟ་བུ་ན་ཆོས་ཀྱི་རྗེ་གནས་བརྟན་འདུལ་བ་འཛིན་པ་ཀུན་གྱི་གཙུག་རྒྱན་དུ་གྱུར་པ་འདི་ངེས་པའི་དོན་དུ་གསང་བ་སྔགས་ཀྱི་ལམ་ནས་ཡེ་ཤེས་བརྙེས་པའི་དམ་པ་ཉོན་མོངས་པའི་འཆིང་གྲོལ་ལས་འདས་ཀྱང་། ཇི་སྐད་དུ། ཕྱི་རུ་ཉན་ཐོས་སྤྱོད་ལ་གནང་། །ནང་དུ་འདུས་པའི་དོན་ལ་དགའ། །ཞེས་པ་ལྟར། རྗེས་སུ་སློབ་པའི་གང་ཟག་རྣམས་ཀྱང་ཡང་དག་པའི་སྤྱོད་པར་གདམས་པ་དང་། བསྟན་པ་མི་ནུབ་པའི་ཆེད་དུ་དགུང་གྲངས་བཞེས་པར་འདུལ་བ་རྒྱ་མཚོའི་མངའ་བདག་ཉེ་བར་འཁོར་གཉིས་པ་བརྟན་མཁས་ཡོན་ཏན་རྫོགས་པའི་དགེ་བའི་བཤེས་གཉེན་ཆེན་པོ་རྫོགས་ཆེན་མཁན་རིན་པོ་ཆེ་པདྨ་དམ་ཆོས་འོད་ཟེར་ལས་རབ་ཏུ་བྱུང་བ་དགེ་ཚུལ་གྱི་དངོས་པོར་སྒྲུབ། མཚན་འགྱུར་མེད་པདྨ་རྣམ་རྒྱལ་ཞེས་གསོལ་ནས་དགེ་ཚུལ་གྱི་བསླབ་བྱ་རགས་པ་བཅུ་དང་། བླངས་འདས་སོ་གསུམ་སོགས་དགེ་ཚུལ་གྱི་བསླབ་གཞི་ཆར་གཏོགས་དང་བཅས་པའི་གནས་ཕྲ་མོ་ལས་འདའ་བ་མེད་པ་མཛད་ཅིང་། ཚིགས་ཕྱི་མ་བསྙེན་པར་རྫོགས་པ་ནི་རྒྱལ་སྲས་གཞན་ཕན་མཐའ་ཡས་ཀྱི་སྤྲུལ་པའི་སྐུ་མཆོག་ཐུབ་དབང་བསྟན་པའི་ཉི་མ་ལས་གསན་བཞེད་ཀྱིས་དུས་རིང་པོར་འགྱང་བ་སྐྱབས་མགོན་མཆོག་གི་སྤྲུལ་པའི་སྐུ་བསྙེན་སྒྲུབ་ཟབ་མོའི་དམ་རྒྱ་ལས་ནམ་ཡང་མི་འདའ་བས་གསན་བཞེས་མ་གྲུབ་ཀྱང་བརྟན་མཁས་ཕན་འདོགས་ཀྱི་ཡོན་ཏན་དུ་མས་ཁྱད་པར་དུ་བྱས་པ། དགེ་མང་མཁན་རིན་པོ་ཆེ་ཡོན་ཏན་རྒྱ་མཚོ། ལས་སློབ་ཟུར་མང་དྲུང་སྤྲུལ་ཀརྨ་ཆོས་ཀྱི་ཉིན་བྱེད་སོགས་དད་པའི་དགེ་འདུན་གྲངས་ཚང་བའི་དབུས་སུ་སྔ་འགྱུར་བསྟན་པའི་ཤིང་རྟ་ཐུབ་དབང་གཉིས་པ་མཁན་ཆེན་ཞི་བ་མཚོའི་སྡོམ་རྒྱུན་ལོ་ཙཱ་བ་ཆེན་པོ་དྷརྨ་ཤྲཱིའི་བཀའ་དྲིན་ལས་བྱུང་བ་ཉིད་ལེགས་པར་བཞེས་པས་གནས་བརྟན་འདུལ་བ་འཛིན་པ་ཀུན་གྱི་གཙུག་རྒྱན་སྔགས་ཀྱི་རྡོ་རྗེ་འཛིན་པ་ཆེན་པོའི་རྟེན་མཆོག་ཏུ་གྱུར་པ་ཡིན་ཏེ། དུས་འཁོར་རྩ་རྒྱུད་ལས། གསུམ་ལས་དགེ་སློང་མཆོག་ཡིན་འབྲིང་། །དགེ་ཚུལ་ཞེས་བྱ་དེ་ཉིད་ལས། །ཁྱིམ་ན་གནས་པ་ཐ་མའོ། །ཞེས་གསུངས་པ་ལྟར་དེའི་བསླབ་བྱ་ཕྲ་རགས་རྣམས་ཀྱང་ཉམས་པ་མེད་པ་མིག་གི་འབྲས་བུ་ལྟར་བསྲུངས་པས་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་ཤིང་ནང་དུ་ཟག་པ་མེད་པའི་ཏིང་ངེ་འཛིན་གྱི་མཐུས་ཚུལ་ཁྲིམས་ཀྱི་དྲི་བསུང་ཡང་སྐུ་ཡི་ཉེ་འཁོར་ཐམས་ཅད་ལ་ཁྱབ་པས་ཡིད་འཕྲོག་པ་དང་། སྐུ་ལ་གཉེར་མ་མེད་ཅིང་གཞོན་ཤ་ཆགས་པ་སྣུམ་བག་གཟི་བརྗིད་དང་ལྡན་པས་འཁོར་རྣམས་ཟིལ་གྱིས་གནོན་པ་སོགས་བསླབ་པའི་ཚུལ་ཁྲིམས་ཀྱི་ཡོན་ཏན་ཡོངས་སུ་རྫོགས་པ་ཉིད་དོ། དེ་ནི་ཕྱི་སོ་སོར་ཐར་པའི་དབང་དུ་བྱས་ཤིང་། ནང་དུ་བྱང་ཆུབ་ཀྱི་སེམས་རིན་པོ་ཆེ་རྟག་པར་ཐུགས་རྒྱུད་དང་གཉིས་སུ་མི་ཕྱེད་པས་སྐྱེ་བ་དུ་མར་སྙིང་རྗེའི་གཞན་དབང་དུ་སོང་བས་སྐུ་ཚེ་འདིར་ཡང་གཞན་ཕན་ལྷག་པའི་སེམས་རིན་པོ་ཆེ་དང་ཆུང་ངུའི་དུས་ནས་ཙནྡན་དང་ཙནྡན་གྱི་དྲི་ལྟར་འབྲལ་མེད་ཡེ་ལྡན་དུ་ཡོད་ཀྱང་། རྒྱས་འགྱུར་གྱི་རིགས་ལྷག་པར་སད་པའི་ཉེར་ལེན་དུ་འཇམ་དབྱངས་བླ་མ་མཁྱེན་བརྩེའི་དབང་པོ་ལས་དབུ་མ་ལུགས་ཀྱི་སེམས་བསྐྱེད་ཀྱི་བཀའ་སྲོལ་དང་། འཇམ་མགོན་བློ་གྲོས་མཐའ་ཡས། མཁན་ཆེན་ཀརྨ་བཀྲ་ཤིས་འོད་ཟེར། རབ་འབྱམས་ལྔ་པ་སོགས་ལས་སྲོལ་གཉིས་ཀའི་སེམས་བསྐྱེད་སྡོམ་པའི་ཚུལ་ཁྲིམས་གསན་བཞེས་གནང་ནས། དེ་ཕྱིན་ཆད་ནག་པོའི་ཆོས་བཞི་དང་ཕམ་འདྲའི་རྩ་ལྟུང་བཞི་སོགས་སྤོང་ཞིང་དེའི་གཉེན་པོ་དཀར་པོའི་ཆོས་བཞི་སྒྲུབ་པ་དང་། གཞན་ཡང་ཉེས་བྱས་བཞི་བཅུ་ཞེ་དྲུག་དང་། ནམ་སྙིང་གི་མདོ་ནས་གསུངས་པའི་བྱང་ཆུབ་སེམས་དཔའ་རྒྱལ་པོ་ལ་འབྱུང་ཉེ་བའི་ལྟུང་བ་ལྔ། བློན་པོ་ལ་འབྱུང་ཉེ་བའི་ལྟུང་བ་ལྔ། དམངས་ཕལ་པ་ལ་འབྱུང་ཉེ་བ་བརྒྱད་སོགས་ཀྱི་བསྲུང་སྡོམ་གྱི་ར་བ་ལས་ནམ་ཡང་མི་འདའ་ཞིང་སྔར་སྨོས་པ་ལྟར་སྐུ་ན་ཕྲ་མོའི་དུས་ནས་ཤ་ཆང་ལ་གཏན་ནས་མི་དགྱེས་པས་ཤ་ཟ་བ་ནི་ཉེས་པ་དུ་མའི་ཕུང་པོ་སེམས་ཅན་ལ་གནོད་པའི་གཞི་རྒྱལ་སྲས་ཀྱི་སྤྱོད་པ་དང་འགལ་བ་དེ་ལས་ཆེ་བ་མེད་དེ། ཁྱད་པར་འཕགས་བསྟོད་ལས། སེམས་ཅན་གསོད་པར་བྱེད་པ་གང་། །འཇིག་རྟེན་པ་ཡི་ཆོས་སུ་འཚལ། །ཁྱོད་ཀྱི་བསྟན་ལ་དེ་དག་སྨད། །གང་ཞིག་སྲོག་ཆགས་ལ་རྟག་གནོད། །དེ་ལ་ཆོས་ཉིད་ག་ལ་ཡོད། །གཙོ་བོ་ཁྱེད་ཀྱིས་རང་ཉིད་ཀྱི། །སྲོག་གིས་སེམས་ཅན་ལེགས་པར་བསྲུངས། །ཞེས་དང་། ཞི་བ་ལྷས། གང་དག་བདེ་བས་ཐུབ་རྣམས་དགྱེས་འགྱུར་ཞིང་། །གང་དག་གནོད་ན་མི་དགྱེས་འབྱུང་འགྱུར་བ། །དེ་དག་དགའ་བས་ཐུབ་པ་ཀུན་དགྱེས་ཤིང་། །དེ་ལ་གནོད་པས་ཐུབ་ལ་གནོད་པ་བྱས། །ཇི་ལྟར་ལུས་ལ་ཀུན་ནས་མེ་འབར་བ། །འདོད་པ་ཀུན་གྱིས་ཡིད་བདེར་མི་འགྱུར་བ། །དེ་བཞིན་སེམས་ཅན་གནོད་པ་བྱས་ན་ཡང་། །ཐུགས་རྗེ་ཆེ་རྣམས་དགྱེས་པའི་ཐབས་མེད་དོ། །ཞེས་གསུངས་པ་ཐུགས་ཉམས་སུ་བཞེས་ནས་ཐུབ་རྣམས་དགྱེས་པའི་བརྟུལ་ཞུགས་ཟླ་མེད་པ་འདི་གཅིག་པུས་རྣམ་པར་ཐར་པ་ལའང་སུས་ཀྱང་འགྲན་ཟླ་མེད་པར་གྲུབ་བོ། །གསང་བ་རིག་འཛིན་སྔགས་ཀྱི་སྡོམ་པ་ནི། འཇམ་མགོན་བླ་མ་རྣམ་གསུམ་གཙོ་བོར་གྱུར་པ་ལས་དབང་ཁྲིད་གདམས་པ་རྒྱ་མཚོ་གསན་པ་འོག་ཏུ་ཅུང་ཟད་འབྱུང་བ་ལྟར་ལ། པདྨ་འོད་གསལ་མདོ་སྔགས་གླིང་པ་ལས་རྡོར་གླིང་བཀའ་བརྒྱད་གསང་རྫོགས་དང་། སོ་ལུགས་ཡང་དག་སོགས་དང་། འཇམ་མགོན་པདྨ་གར་དབང་ལས་བཀའ་བརྒྱད་བདེ་འདུས། བཀའ་མ་སྒྱུ་འཕྲུལ་ཞི་ཁྲོ་སོགས་ཐོག་མའི་སྨིན་བྱེད་དུ་གྱུར་པས་སྦྱང་གཞི་སྦྱོང་བྱེད་ངོ་འཕྲོད་ཅིང་སྐུ་བཞིའི་ས་བོན་ཐེབས་པ་དང་། ཐ་མལ་སྣང་ཞེན་ལས་སྡོམ་ཞིང་། དགོངས་སྤྱོད་ཐམས་ཅད་དག་པ་ཡེ་ཤེས་ཀྱི་འཁོར་ལོ་ལས་མ་གཡོས་པར་བཞུགས་པ་དང་། རྡོ་རྗེ་ཐེག་པ་སྤྱི་ལ་གྲགས་པའི་རྩ་ལྟུང་བཅུ་བཞི། ཡན་ལག་སྦོམ་པོའི་རྣམ་གྲངས་བརྒྱད་སོགས་དང་ཁྱད་པར་ནང་རྒྱུད་ཡོ་ག་གསུམ་གྱི་སྤྱི་དང་ཁྱད་པར་ལྷག་པས་བསྡུས་པའི་དམ་ཚིག་རྣམས་ལས་འདའ་བ་མེད་ཅིང་། ཅུང་ཟད་བྱུང་ནའང་དེ་མ་ཐག་ཏུ་བཤགས་སྡོམ་དང་ཐུན་མོང་དང་ཐུན་མིན་གྱི་ཆོ་ག་རྣམས་ཀྱིས་བྱང་ཞིང་དག་པར་མཛད་ནས་ཉེས་པ་དང་ཞག་ཏུ་འགྲོགས་པར་མི་མཛད་དོ། །སྔར་དགུང་གྲངས་སུམ་ཅུ་སྐོར་ཡན་ཆོད་ལ་རྒྱུན་གྱི་ཐུགས་དམ་ཁྲིགས་¡eཆགས་ཞུ་མཆན། ¡fཀྱང་། སྔ་བྱ་གྲགས་ཙམ་ལ་ཡར་བཞེངས་ནས། སྙིང་ཐིག་རྣམ་གཉིས་ཀྱི་བླ་བརྒྱུད་གསོལ་འདེབས། ངག་བྱིན་རླབས། སྨེ་བརྩེགས། རྣམ་འཇོམས། བླ་མ་གསང་འདུས། ཚེ་སྒྲུབ་གསང་འདུས། ཐུགས་རྗེ་ཆེན་པོ་བདེ་གཤེགས་ཀུན་འདུས། བཀའ་བརྒྱད། ཕུར་པ། ཁྲོས་ནག སེང་གདོང་དམར་མོ། ཆུ་གཏོར་བཅས་གསུངས་ནས་གསོལ་ཇ་བཞེས། བསང་བདུད་རྩི་སྤྲིན་ཕུང་གསུང་བ་སོགས་མཛད། དུས་ཕྱིས་ནི་སྤྲོས་མེད་ཀྱི་རྣལ་འབྱོར་གཙོར་བཏོན་ལས་ཁྲིགས་ཆགས་ཀྱི་རིམ་པ་ཆེར་མེད། དབྱར་སྒར་ལྟ་བུས་མཚོན་གྲོང་ཆོག་མང་རིགས་ལ་ཨ་མཆོད་ནུས་པ་ཁ་ཡིན་གསུངས་ནས་གསུངས་ཆོག་ཞིབ་རྒྱས་མཛད། བསྔོ་རྟེན་བྱུང་རིགས་ལ་བསྔོ་སྨོན་ཟབ་རྒྱས་རེ་གནང་། དབྱར་སྟོན་སྒར་པར་བྱོན་གདོང་། འབྲེལ་ཐོགས་ཀྱི་ཆེད། ཐོག་མཐའ་བར་གསུམ་དུ་ཞི་ཁྲོའི་གནས་བརྒྱ་རེ་བླ་བྲང་ནས་ཡོན་སྦྱར་ནས་གསུང་སྲོལ་ཡོད། ཕྱུགས་ཟོག་རྣམས་ལ་སྐྱེ་བདུན་མྱོང་གྲོལ་གནང་ཞིང་གཟུངས་སྔགས་ཁྱད་འཕགས་དང་། སངས་རྒྱས་བྱང་སེམས་ཀྱི་མཚན་མང་པོ་རྣ་ལམ་དུ་བསྒྲགས་ཤིང་བསྔོ་སྨོན་ཡང་ཡང་མཛད་ཅིང་བསྔོ་རྟེན་བྱུང་རིགས་རྣམས་ཀྱི་མིང་ཡིག་ཕྱོགས་བསྡོམས་བཀོད་ནས་ཟླ་རེའི་ནང་བྱང་ཆོག་ལན་ཁ་ཤས་དང་། ཉེར་དགུའི་བསྐང་གསོ། ཡར་ངོའི་ཚེས་བཅུ་ལ་བླ་སྒྲུབ་རེ་དང་མར་ངོའི་ཚེས་བཅུར་ཡི་དམ་མཁའ་འགྲོ་གང་རིགས་དང་། ཉ་སྟོང་ཚེས་བརྒྱད་རྣམས་ལ་མཆོད་འབུལ་སྐབས་དང་བསྟུན་ནས་དགོངས་མོ་ཡང་དམ་ཅན་སྤྱི་གཏོར་དང་དུར་ཁྲོད་ལྷ་མོ་གཙོ་བོར་གྱུར་པའི་ཆོས་སྐྱོང་གི་གཏོར་འབུལ་དང་ལུས་སྦྱིིན་དམར་གསུར་མ་ཎི་བསྔོ་སྨོན་བཅས་གནང་། དེ་ལྟར་དད་སྦྱིན་རྣམས་ནས་འབྱོར་པའི་ནོར་རྫས་རིགས་རྟེན་རྩར་ཕངས་མེད་དུ་བཏང་ཞིང་དད་རྫས་ཆུད་མི་གསོན་པར་དགེ་ཚོགས་སུ་ཐིངས་ངེས་ལས་དཀོར་རྫས་ལས་གཟི་བྱིན་སྒྲུབ་པ། ཁེ་དྲགས་དོན་གཉེར་གྱིས་དགོན་སྡེའི་ཞབས་ཞུ་ཡིན་རློམ་སོགས་ཆོས་བརྒྱད་ཀྱི་བྱ་བ་ལ་ཐུགས་སྐྱོ་སྐྱོ་མཛད། སྤྱིར་འདིར་སྣང་གི་བྱ་གཞག་ལ་ཐུགས་གཏན་དུ་ལོག་ནས། གར་སོང་ཆ་མེད་དུ་རྒྱལ་ཁམས་ཉུལ་ནས་བྱོན་དགོངས་པར། རིགས་བདག་འཇམ་མགོན་རྣམ་གཉིས་ལ་དེ་ཚུལ་ཞུས་པས་དེ་ལྟ་ཐུགས་བཞེད་ལེགས་ཀྱང་བསྟན་དགོན་དར་རྒྱས་ཆེད། གོང་མ་རྣམས་ཀྱི་ཐུགས་བསྐྱེད་བསམ་ཡས་ཀྱིས་བསྐྲུན་པའི་ཞབས་འདེགས་མ་ཉམས་གོང་འཕེལ་དུ་སྒྲུབ་ན་རྒྱལ་བསྟན་ལུང་རྟོགས་གཉིས་ཀྱིས་འཛིན་མཁན་འདུས་པའི་སྡེ་ཡིན་པས་དེ་ཉིད་བསྡུ་བའི་གཞི་གྱུར་པ་དགོན་སྡེ་རྣམས་ཡིན་ཕྱིར་དེ་དག་ཉམས་གསོས་རེ་མཛད་གྲུབ་ན། ཡོན་གནས་མཆོག་དམ་པར་གྱུར་ནས་ཚོགས་ཆེན་བསགས་པ་རྒྱལ་བའི་བཀའ་དང་། གོང་མའི་ཕྱག་ལེན་ལྟར་ཡིན་པས། རྙེད་པ་རྣམས་ཀྱང་སུམ་ཆར་བགོས་པའི་ཆ་གཅིག་ཙམ་ལས་གཞན་རྟེན་རྩར་སྨིན་ངེས་མཛད་ཐོག་སུམ་ཆ་ལོངས་སྤྱོད་ན་དེ་ལྷག་མེད། ལོ་རེར་ཞག་བརྒྱ་རེ་བསྟན་འགྲོར་སྨན་པའི་སྐུ་མཚམས་དང་། གཉེར་ཕྱག་སོགས་འཁོར་རྣམས་ལ་དཀོར་ཟས་རྔམས་སྤྱོད་དང་སྲོག་བཅད་སོགས་ཀྱི་ཉེས་དམིགས་བཤད་ན་དད་རྫས་ཆུད་མི་ཟ་བ་ཡིན་ཞེས་བཀའ་ཕེབས་པ་ལྟར་ན་བཟའ་གསོལ་ཆས་རྟེན་ཕྲན་བུ་རེ་ལས་དེ་མིན་རྟེན་རྩར་གཏོང་བ་དང་བླ་བྲང་གི་སྒོ་བཤས་ཀྱི་སྡིག་རྒྱུན་བཅད་པ་སོགས་ལས་འབྲས་ཤིན་ཏུ་ཞིབ་པར་ཕྱག་བཞེས་སུ་བསྟར་བར་མཛད་པའོ། །ཁམས་མང་རིན་ཆེན་སྣ་བཞིའི་ལྷུན་པོ་ལ། །ཀ་ཤིའི་རས་ཀྱིས་བྱི་དོར་བྱས་པ་བཞིན། །བསླབ་པའི་ཚུལ་ཁྲིམས་ཡོན་ཏན་འབྱུང་གནས་ལ། །གཅིག་ཏུ་བརྩོན་པས་ཆེས་ཆེར་གསལ་བར་གྱུར། །གང་ཐུགས་དམ་པའི་དེད་དཔོན་གྱིས་བཟུང་ནས། །གཞན་ཕན་བརྩེ་བའི་ཁུར་ཆེན་ཐོད་དུ་དཀྲིས། །རང་ཉིད་དལ་གྱིས་འགྲོ་བ་རིང་སྤངས་ནས། །འགྲོ་བ་སྲིན་མོའི་གླིང་དུ་ཞུགས་རྣམས་སྒྲོལ། །དེང་སང་ཕལ་ཆེར་སྐྱོན་ངན་འདམ་གྱིས་གོས། །ད་དུང་འཛེམ་མེད་ངོ་སོ་མཐོན་པོར་བྱེད། །ཁྲེལ་དང་ངོ་ཚ་མེད་པའི་བ་གླང་སེམས། །ཀུན་ཏུ་རྨོངས་པའི་ཚོགས་རྣམས་ཀྱེ་མ་ཧུད། །དེ་ལྟར་སྙིགས་མའི་སྤྱོད་ཚུལ་ངན་པའི་ཁྲོད། །མགོན་ཁྱོད་རྡུལ་གྱིས་མ་གོས་པདྨ་དང་། །རྒྱལ་མཚན་ཏོག་ལྟར་མངོན་པར་མཐོ་བ་ཡིས། །ཉི་མའི་གཉེན་གྱི་བསྟན་པ་གསལ་བར་བྱས། །ལྷག་པའི་ཏིང་འཛིན་ཤེས་རབ་ནོར་བཟང་པོས། །ཁྱོད་སྐུ་གོ་སྐབས་མེད་པར་གཏམས་པ་དང་། །ཡོན་ཏན་རྒྱ་མཚོའི་རང་བཞིན་ཁྱོད་ཉིད་ཅེས། །བློ་ལྡན་རྣམས་ཀྱིས་བསྔགས་པའི་མེ་ཏོག་འཐོར། །སྡོམ་གསུམ་ཏི་སེའི་ལྷུན་པོར་གནས་བཅས་པའི། །སྟོབས་ལྡན་མི་ཡི་སེངྒེ་ཁྱོད་ཉིད་ལ། །དུས་མཐའི་མཆེ་ཅན་རྣམས་ཀྱི་འགྲན་མི་བཟོད། །ཐོས་བསམ་སྒོམ་པའི་རྩལ་རྫོགས་གཞན་སུ་ཞིག །དེས་ན་མཆོག་གི་རྣམ་ཐར་ཕྲ་མོས་ཀྱང་། །བདག་ཡིད་དད་པའི་འདབ་སྟོང་དབང་མེད་བྱེ། །བྱིན་རླབས་སྙིང་གི་བདུད་རྩིར་སིམ་པ་དང་། །བྱང་ཆུབ་བར་དུ་སྐྱབས་ཀྱི་མཆོག་ཏུ་བསྙེན། །ཞེས་པའང་བར་སྐབས་ཀྱི་ཚིགས་སུ་བཅད་པའོ། །ད་ནི་དགེ་བའི་བཤེས་གཉེན་བསྟེན་ནས་མང་དུ་ཐོས་པ་ལུང་གི་རྒྱ་མཚོ་ཆེན་པོའི་ཕ་རོལ་ཏུ་སོན་ཅིང་། བསམ་བྱུང་གི་ཤེས་རབ་ཀྱིས་ཐོས་དོན་ལ་སྒྲོ་འདོགས་ཇི་ལྟར་བཅད་པའི་ཚུལ་ལས་བརྩམས་ཏེ་གཏམ་གྱི་གླིང་བུ་ཅུང་ཟད་འཁྲོལ་བར་བྱ་སྟེ། དེ་ཡང་སྔ་རབས་འདས་པ་དང་། ད་ལྟར་དང་། མ་འོངས་པའི་རྒྱལ་བ་ཆོས་ཀྱི་ཉི་མ་ཐུབ་མཆོག་ཇི་སྙེད་བྱོན་པ་རྣམས་ཀྱང་སྲིད་པའི་གྲོང་ཁྱེར་གྱི་རྒྱུན་གཅོད་ཅིང་། མྱ་ངན་ལས་འདས་པ་ཆེན་པོའི་ཁང་བཟང་ཉམས་དགའ་བར་འཇིག་རྟེན་ལྷ་དང་བཅས་པས་བཏུད་པའི་ཆོས་ཀྱི་ཁྲི་སྲུང་བ་ལ་འཇིགས་པ་མེད་པའི་དཔལ་གྱི་དམ་པ་ཐོབ་པར་བྱ་བའི་ཕྱིར་དུ་དུས་རིང་མོ་ཉིད་ནས་དགེ་བའི་བཤེས་གཉེན་བསྟེན་ཅིང་གདམས་ངག་བདུད་རྩིའི་སྨན་མཆོག་གིས་སྲིད་པའི་རིམས་བརྒྱ་དུས་གཅིག་ཏུ་སེལ་བར་བྱེད་པ་དག་ཡང་ཡང་ཐོས་པ་དང་། བསམ་བྱུང་གིས་རང་དང་སྤྱིའི་མཚན་ཉིད་ལ་གཞན་དུ་མི་སེམས་པར་དེའི་དོན་བཅུད་མྱོང་བས་གཏན་ལ་དབབ་པ་ཉིད་དོན་ཡིན་ལུགས་གཤིས་ཐོག་ཏུ་ཕེབས་པས་དེ་ཁོ་ན་ཉིད་མངོན་སུམ་དུ་རྟོགས་པའི་མཐུས་མཐར་གྱིས་བྱང་ཆུབ་ཀྱི་ཤིང་དྲུང་དུ་གཤེགས་ནས་བདུད་བཏུལ་བ་དང་། མངོན་པར་རྫོགས་པར་སངས་རྒྱས་པ་དང་། ཆོས་ཀྱི་འཁོར་ལོ་ངོ་མཚར་རྨད་དུ་བྱུང་བ་ཡོངས་སུ་བསྐོར་བས། སེམས་ཅན་དཔག་ཏུ་མེད་པ་འཁོར་བ་ལས་གྲོལ་བའི་ཕྲིན་ལས་འགོག་པ་མེད་པ་རང་འཆར་བ་སྟེ། དེ་ལྟར་ཡོན་ཏན་གྱི་འབྱོར་པ་འཕགས་ཆེན་གྱིས་ཀྱང་བརྗོད་པར་དཀའ་བ་རྣམས་བཤེས་གཉེན་བསྟེན་པ་ལས་འབྱུང་བ་ཡིན་ཏེ། འཕགས་པ་ཀླུས། དགེ་བའི་བཤེས་ལ་ལེགས་བརྟེན་ཚངས་པར་སྤྱོད། །ཡོངས་སུ་རྫོགས་པར་ཐུབ་པས་གསུངས་དེའི་ཕྱིར། །སྐྱེས་བུ་དམ་པ་བརྟེན་བགྱི་རྒྱལ་བ་ལ། །བརྟེན་ནས་རབ་ཏུ་མང་པོས་ཞི་བ་ཐོབ། །ཅེས་པ་ལྟར་འདི་ཕྱིའི་ལེགས་ཚོགས་ཐམས་ཅད་ཀྱི་གཞི་རྟེན། ཐར་པའི་ལམ་མཁན། མ་རིག་སེལ་བའི་སྒྲོན་མེ། རྒྱ་མཚོར་བགྲོད་པའི་དེད་དཔོན། ལམ་འཕྲང་འཇིགས་སར་སྐྱེལ་མ་ལྟ་བུ་ཡིན་པ་དང་། མཚན་ཉིད་ལྡན་པའི་དགེ་བའི་བཤེས་གཉེན་གྱི་ཞབས་ལ་གུས་པས་བསྙེན་པ་ལས་གང་ལ་གནས་པའི་ཡོན་ཏན་རྣམས་ཀྱང་ངང་གིས་འགོ་བ་ཆོས་ཉིད་དེ། ཀུན་མཁྱེན་ཆེན་པོས། ཇི་ལྟར་ཙནྡན་ཤིང་ལ་འཁྲི་ཤིང་དང་། །མི་གཙང་འདམ་དུ་བརྟེན་པའི་ཀུ་ཤ་ལྟར། །དམ་པ་བསྟེན་པས་རང་ཉིད་དམ་པར་འགྱུར། །ངན་པ་བསྟེན་པས་རང་ཉིད་ངན་པར་འགྱུར། །དེ་ཕྱིར་སྐྱེ་བོ་དམ་པ་བསྟེན་པ་དང་། །སྡིག་པའི་བཤེས་གཉེན་སྤངས་ལ་ནན་ཏན་བྱ། །ཞེས་སོགས་བཀའ་དང་བསྟན་བཅོས་ཐམས་ཅད་ནས་ཡང་ཡང་འདོམས་པ་ལྟར་དཔལ་ལྡན་བླ་མ་ཆོས་ཀྱི་གཏེར་མཛོད་ཆེན་པོ་འདིས་ཀྱང་སྐྱོ་ངལ་མེད་པར་བརྩེ་ཆེན་ཐུགས་རྗེའི་གཏེར་ཆེན་དཔལ་མགོན་བླ་མ་དམ་པ་རྣམས་ཀྱི་ཞབས་པད་གཙུག་ཏུ་མཆོད་ནས་མཉེས་པ་གསུམ་གྱིས་ལེགས་པར་བསྙེན་པ་ལས་ཐོས་པ་རྒྱ་མཚོའི་ཕ་རོལ་ཏུ་སོན་པར་མཛད་ཅིང་། དེ་ཡང་ཐོག་མར་ཨ་གྲོ་སྒྲ་རམས་པའི་དངོས་སློབ་ཨ་ཁུ་སྐྱིད་གཡང་ལས་གཙུག་ལག་རྒྱ་མཚོར་འཇུག་པའི་སྒོ། བྷོ་ཊའི་མཁས་པའི་གཞུང་ཐམས་ཅད་ཀྱི་ཕྱི་མོ་སུམ་ཅུ་པ་དང་རྟགས་ཀྱི་འཇུག་པའི་འགྲེལ་བ་འཇམ་མགོན་སི་ཏུ་ཀུན་མཁྱེན་གྱིས་མཛད་པའི་སྟེང་ནས་གོ་དོན་དཔྱིས་ཕྱིན་པ་དང་། དཔལ་ལྡན་དཎྜིའི་ཚིག་རྒྱན་གྱི་བསྟན་བཅོས་སྙན་ངག་མེ་ལོང་གི་ལེའུ་གསུམ་ཁམས་པའི་འགྲེལ་ཆེན་དང་སྦྱར་བའི་གོ་དོན་རྩོམ་རྒྱུགས་བཅས་པ་དང་། སྒྲ་རིགས་ལས་ཀ་ལ་པའི་མཚམས་སྦྱོར་ལྔ་པའི་བཤད་ཁྲིད་ཙམ་ལས་གཞན་གསན་རྒྱུ་མ་བྱུང་ཡང་། དེ་དང་རྗེས་འབྲེལ་སྡེབ་སྦྱོར་རིན་འབྱུང་རྩིས་དཀར་ནག་གི་གཞུང་རྣམས་བཅས་ལེགས་པར་སྦྱངས་ཤིང་ཐུགས་ལ་མཁྱེན་པར་མཛད་དོ། །ནང་དོན་རིག་པའི་སྐོར་ལ་གསན་སྦྱངས་གནང་ཚུལ་རགས་པ་ཙམ་འོག་ནས་འབྱུང་བ་ལྟར་ལ། མདོར་ན་ཤེས་བྱ་རིག་པའི་གནས་མཐའ་དག་གང་ལའང་སྐྱེས་སྦྱངས་ཀྱི་རྣམ་དཔྱོད་ཟླ་མེད་པས་ཡང་དག་པར་ཐུགས་སུ་ཆུབ་པར་མཛད་པ་དང་། ཞི་བ་ལྷས། རྒྱལ་སྲས་རྣམས་ཀྱིས་མི་བསླབ་པ། །དེ་ནི་གང་ཡང་ཡོད་མ་ཡིན། །ཞེས་དང་མདོ་སྡེ་རྒྱན་ལས། རིག་པའི་གནས་ལྔ་དག་ལ་མཁས་པར་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་མི་འགྱུར་ཏེ། །དེ་ལྟ་བས་ན་གཞན་དག་ཚར་གཅོད་རྗེས་གཟུང་དང་། །བདག་ཉིད་ཀུན་ཤེས་བྱ་ཕྱིར་དེ་ལ་དེ་བརྩོན་བྱ། །ཞེས་གསུངས་པ་ལྟར་ཕྱི་ནང་གི་གཙུག་ལག་རྣམས་ལ་ལེགས་པར་སྦྱངས་པ་ཉིད་དོ། །དེ་ལས་ནང་དོན་ཐུན་མོང་མ་ཡིན་པ་མྱུར་ལམ་ཟབ་མོ་བཀའ་གཏེར་གསར་རྙིང་གི་སྨིན་གྲོལ་གདམས་པའི་བདུད་རྩི་སྩོལ་བའི་རིགས་ཐམས་ཅད་ཀྱི་བདག་པོ། རྒྱལ་བ་ཀུན་གྱི་ཡེ་ཤེས་གཅིག་ཏུ་བསྡུས་པའི་རང་གཟུགས་དུས་གསུམ་ན་འབྱོན་པར་དཀའ་བ་འཇམ་མགོན་བླ་མ་རྣམ་པ་གསུམ་གྱི་ཐུགས་ཀྱི་སྲས་མཆོག་ཏུ་གྱུར་པ་རྗེ་བླ་མ་འདི་ཉིད་ཡིན་ཏེ། དེ་ཡང་དགུང་གྲངས་དྲུག་ཏུ་སོན་པ་མེ་མོ་ཕག་གི་ལོའི་མགོ་ཟླ་བའི་ཚེས་དགུ་ལ་བྱང་ཆུབ་སེམས་དཔའ་ཆོས་འཕགས་རྟག་ཏུ་ངུས་ཚོལ་བ་ལྟར་ཐུགས་ཤིན་ཏུ་རིངས་པའི་སྟབས་ཀྱིས་བྱོན་ཏེ་དཀར་པོའི་ཕྱོགས་ཀྱི་འཕེལ་ཆ་ཡོངས་སུ་རྫོགས་ཤིང་སངས་རྒྱས་པ་རྣམས་ཀྱི་དུས་ཆེན་མཆོག་ཏུ་བྱིན་རླབས་པའི་ཚེ་བཅོ་ལྔ་བཟང་པོར་མཁས་དང་གྲུབ་པ་མང་པོས་བྱིན་གྱིས་བརླབས་པའི་གནས་རྫོང་སར་བཀྲ་ཤིས་ལྷ་རྩེ་ཞེས་དུས་འདི་ཙམ་ན་ཤྲཱི་ནཱ་ལེནྡྲ་གཉིས་པར་བསྔགས་པའི་ཆོས་གྲྭ་ཆེན་པོ་ག་ལ་བར་ཆག་ཕེབས་ནས་བཞུགས་སྟན་ཆགས་ཤིང་། ཟླ་བ་དེའི་དམར་ཕྱོགས་ཀྱི་དགའ་བ་དང་པོར་ཁམས་གསུམ་ཆོས་ཀྱི་རྒྱལ་པོ་པདྨ་གར་དབང་བློ་གྲོས་མཐའ་ཡས་ཀྱི་གསེར་ཞལ་འཇལ་ཞིང་ཕྱག་རྟེན་མཎྜལ་རྣམས་ཕུལ་བ་དང་ཆབས་ཅིག་མདོ་རྒྱུད་བཀའ་གཏེར་སྨིན་གྲོལ་གྱི་ཆོས་ཀྱིས་ཐུགས་རྒྱུད་ཡོངས་སུ་གང་བའི་བཀའ་དྲིན་སྩོལ་གྲུབ་གུས་པའི་ཕྱག་དང་བཅས་ཏེ་གསོལ་བ་འདེབས་པ་ན། འཇམ་མགོན་རྣམ་སྣང་ལོ་ཙཱ་བ་ཆེན་པོ་དེ་ཉིད་ཀྱིས་སྐུ་ཡི་ཕྲེང་བར་སྨོན་ལམ་འབྲེལ་བའི་ལས་ཅན་གྱི་རིག་པ་འཛིན་པ་ཆེན་པོ་ཡིན་པར་མཁྱེན་བཞིན་དུ་དེ་བཞིན་རྗེས་འཛིན་ཆོག་པའི་གསུང་མཆིད་ཨུ་དུམ་ཝཱ་ར་ཐོད་དུ་བཅིངས་ཤིང་། དེ་བཞིན་དུ་མངའ་བ དག་ཚངས་པ་ལྷ་ཡི་མེ་ཏོག་བསམ་བཞིན་སྐྱེ་བ་བཞེས་པ་འཇམ་དབྱངས་མཁྱེན་བརྩེའི་དབང་པོའི་མདུན་དུ་ཕེབས་པའི་ཚེ་ན་འཇམས་དབྱངས་བླ་མ་དེ་ཉིད་ཁྱུ་མཆོག་གི་སྟབས་ཀྱིས་གཟིམས་སྒོའི་ནང་ལོགས་སུ་དྲི་ཞིམ་པོའི་སྤོས་རིང་ཕྱག་ཏུ་བསྣམས་ནས་བསུ་བའི་ཚུལ་དང་བཅས་བྱོན་པའི་ཚེ། གུས་པའི་ལྷ་ཕྱག་གིས་བཏུད་པ་ན། བརྩེ་ཆེན་ཐུགས་རྗེའི་དབང་ཕྱུག་དེ་ཉིད་ཀྱིས་ཀྱང་ཕྱག་ལེན་དང་། མཇལ་དར་རྩེ་སྤྲོད་སོགས་སྔར་ནས་འདྲིས་པ་ལྟ་བུའི་གཟུགས་བཟོས་ཐུན་མིན་གྱིས་བསྐྱངས་པ་དང་། ཕྱག་རྟེན་མཎྜལ་སོགས་རྒྱ་ཆེར་ཕུལ་ཞིང་། ཐུན་མོང་ཐུན་མིན་གྱི་གསུངས་གླེང་ཞིབ་རྒྱས་གནང་བའི་ཉིན་དེ་ཉིད་ནས་ཁྲོ་བོ་ཐམས་ཅད་ཀྱི་སྤྱི་དཔལ་ཆེན་པོ་བར་ཆད་སེལ་བའི་ལྷག་པའི་ལྷ་མཆོག་དཔལ་ཆེན་རྡོ་རྗེ་གཞོན་ནུ་ཀུན་མཁྱེན་རོང་ཟོམ་པ་ཆེན་པོའི་བཀའ་སྲོལ་ལས་བྱུང་བའི་སྨིན་དབང་ཟབ་མོའི་ཆོས་ཀྱི་སྒོ་འཕར་དབྱེ་བ་ནས་བརྩམས་འཇམ་མགོན་རྡོ་རྗེ་འཆང་རྣམ་གཉིས་ལས་སྨིན་གྲོལ་གྱི་རྒྱུན་བར་མ་ཆད་དུ་གསན་པའི་ཚུལ་རགས་བསྡུས་འོག་ནས་འབྱུང་བ་ལྟར་ལ། སྤྱིར་འཇམ་དབྱངས་བླ་མ་རྣམ་གཉིས་ཀྱི་མཚན་དང་པོ་ཐོས་པ་ཙམ་ནས་ཚེ་རབས་ནས་འབྲེལ་བའི་བླ་མར་སོང་གཤིས་རྗེ་འདི་སྐུ་ན་ཕྲ་ཡང་བཟོད་མེད་ཀྱི་མོས་གུས་ཆེན་པོ་རྒྱུན་ཆགས་སུ་ཡོད་པ་དང་། སྐུ་ཡི་དཀྱིལ་འཁོར་ཐོག་མར་མཇལ་བ་ཉིད་ནས་ཐ་མལ་གྱི་སྣང་ཤེས་རང་འགག་ཏུ་འགྲོ་བ་ལྟ་བུས་མོས་གུས་ཀྱི་རྐང་ཚུགས་པས་ཐོག་མའི་རྟེན་འབྲེལ་ལེགས་རྒུའི་ཕྱོགས་སུ་ངང་གིས་འགྲིགས་པར་གྱུར་ཏོ། །དེ་ཡང་གངས་ཅན་མཁས་གྲུབ་ཡོངས་ཀྱི་འཁོར་ལོས་སྒྱུར་བ་ཆེན་པོ་པདྨ་འོད་གསལ་མདོ་སྔགས་གླིང་པའི་ཞལ་སྔ་ནས་རྣམ་སྣང་ལོ་ཙཱ་བ་ཆེན་པོའི་ཡེ་ཤེས་སྒྱུ་འཕྲུལ་དྲྭ་བའི་རོལ་གར་ཆོས་རྒྱལ་གཏེར་བདག་གླིང་པས་ངོམས་ཤོད་བྱིང་མདའ་ཨོ་དཀར་བྲག་ནས་སྤྱན་དྲངས་པའི་རིགས་ཀུན་ཁྱབ་བདག་དཔལ་རྡོ་རྗེ་སེམས་དཔའ་ཐུགས་ཀྱི་སྒྲུབ་པའི་སྨིན་བྱེད་དབང་། གྲོལ་བྱེད་ཁྲིད། རྒྱབ་རྟེན་ལུང་བཅས་ཚངས་སྤྲུགས་སུ་སྔོན་རྗེས་ལན་གཉིས་དང་གཏེར་སྟོན་གྲུབ་ཐོབ་ཡོངས་ཀྱི་སྤྱི་མེས་མཆོག་གཉིས་སུ་གྲགས་པའི་ཡ་གྱལ་གུ་རུ་ཆོས་ཀྱི་དབང་ཕྱུག་གི་གཏེར་བྱོན་བླ་སྒྲུབ་གསང་བ་འདུས་པའི་དངོས་སྟ་འབྲེལ་བའི་དབང་བཞི་ཡོངས་རྫོགས་དང་། གཏོར་དབང་གནད་ཀྱི་ཤོག་གཅིག་མ་བཅས་ཚོགས་འཁོར་དང་རྗེས་འབྲེལ་དུ་སྩལ། གཏེར་ཆེན་དེ་ཉིད་ཀྱི་གཏེར་བྱོན། དཔལ་ཡང་དག་ཧེ་རུ་ཀའི་ཆོས་སྐོར་དང་། ཕུར་པ་ཡང་གསང་སྤུ་གྲིའི་ཆོས་སྐོར་གྱི་སྨིན་གྲོལ་རྒྱབ་རྟེན་བཅས་དང་། གཏེར་ཆེན་དེ་ཉིད་ཀྱི་གཏེར་བྱོན་གསང་འདུས་ཐེམ་མེད་ཀྱི་ཆོས་སྐོར་ལས་བྱོན་པའི་གསང་འདུས་ཡུམ་བཀའ། དྷཱ་ཀི་གཙུག་གི་རྒྱན་གཅིག་ཡེ་ཤེས་མཚོ་རྒྱལ་གྱི་སྒྲུབ་པའི་དཀྱིལ་འཁོར་གྱི་དབང་བཞི་ཡོངས་རྫོགས་དང་། ཕྱི་ནང་གསང་བའི་སྒྲུབ་ཐབས་ཀྱི་ཡིག་ཆ་གཏེར་གཞུང་ཚད་མའི་ལུང་བཅས་ཚེས་ཉེར་ལྔ་ཉིན་ཚོགས་འཁོར་དང་འབྲེལ་བར་གསན་པའོ། །གཏེར་འབྱིན་གྲུབ་ཐོབ་ཡོངས་ཀྱི་སྤྱི་མེས་ཉང་རལ་ཉི་མ་འོད་ཟེར་གྱི་ཟབ་གཏེར་ལས་བྱོན་པ་མཁའ་འགྲོའི་སྒྲུབ་སྐོར་ཟབ་རྒྱས་གཉིས་སུ་ཡོད་པ་ལས་ཟབ་མོའི་ཆོས་སྡེ་བསམ་ཡས་མཆིམས་ཕུ་ནས་སྤྱན་དྲངས་པ འི་ཁྲོས་མ་ནག་མོའི་སྨིན་གྲོལ་དང་། གཞུང་པོད་ལུང་རྗེ་བླ་མ་རིན་པོ་ཆེའི་ཉེ་གནས་བྱང་སེམས་མ་ཏི་བྷ་དྲ་ལས་གསན། གཏེར་ཆེན་གླིང་པ་བརྒྱད་དུ་གྲགས་པའི་ཡ་རྒྱལ་རྡོ་རྗེ་གླིང་པས་ངོམ་ཤོད་གནམ་ལྕགས་བྲག་གི་རྟ་མགྲིན་ཕུག་པ་ནས་སྤྱན་དྲངས་པའི་འདུས་པ་སྐོར་བཞིའི་ནང་གསེས། ཡི་དམ་བཀའ་བརྒྱད་འདུས་པ་གསང་བ་ཡོངས་རྫོགས་ཆེན་པོའི་ཆོས་སྐོར་གྱི་སྨིན་གྲོལ་རྒྱབ་རྟེན་བཅས་རྗེ་བླ་མར་དག་སྣང་ཉེ་བརྒྱུད་དུ་བཞུགས་པ་ཉིད་ངོ་མཚར་རྨད་དུ་བྱུང་བའི་རྣམ་ཐར་དུ་མ་དང་བཅས་ཏེ་མཆོག་གི་རིག་འཛིན་འདུས་པ་རྣམས་དང་ལྷན་ཅིག་ཏུ་ཐོག་མར་སྩལ་སྐབས་དང་། ཉང་གཏེར་བཀའ་བརྒྱད་བདེ་འདུས་ཀྱི་ལས་བྱང་རྒྱུན་ཁྱེར་སྨིན་གླིང་རཏྣ་བི་ཛ་ཡས་བསྒྲིགས་པ་དང་། ནང་ལུས་དཀྱིལ་དང་། ཕྱི་ཧཱུྃ་སྒྲུབ་ལ་བརྟེན་པའི་རྒྱུན་ཁྱེར་རྗེ་ཉིད་ཀྱི་མཛད་པ་བཅས་ཀྱི་སྟེང་ནས། སྔོན་འགྲོ་ནས་དངོས་གཞི་བསྐྱེད་བཟླས་རྫོགས་རིམ་བཅས་ཀྱི་ཁྲིད་གསུང་བཤད་ཀྱི་བརྒྱན་པ་དང་། གཞན་ཡང་གཏེར་གཞུང་ཐོག་ནས། ཁྱད་པར་གྱི་རྫོགས་རིམ་རྣམ་ལྔའི་ཁྲིད་རྒྱས་དང་། ཆོས་དབང་གཏེར་བྱོན་བཀའ་བརྒྱད་གསང་བ་ཡོངས་རྫོགས་ཀྱི་ལས་བྱང་བསྡུས་པ་སྐོང་ཟློག་དང་འབྲེལ་བ་སྤོང་སྟོན་དབང་ཕྱུག་གྲུབ་པས་མཛད་པ་ལ། རྗེ་ཉིད་ཀྱི་ཅུང་ཟད་ཁྲིགས་བསྡེབས་མཛད་པའི་ཐོག་ནས་བསྐྱེད་རྫོགས་ཁྲིད་བསྡུས་ལུང་དང་བཅས། གཞན་ཡང་གཏེར་གཞུང་གི་ཐོག་ནས་རིམ་ལྔ་གདན་གཅིག་མའི་ཁྲིད་ལུང་། རིག་འཛིན་རྒོད་ལྡེམ་གྱི་གཏེར་བྱོན་བཀའ་བརྒྱད་དྲག་པོ་རང་བྱུང་རང་ཤར་གྱི་ལས་བྱང་གཏེར་གཞུང་གི་སྔགས་སྒྲུབ་ནར་མའི་ཐོག་ནས་བསྐྱེད་རྫོགས་ཀྱིི་ཁྲིད་ལུང་དང་། གཞན་ཡང་ཁྲིད་གཞུང་ཡེ་ཤེས་ཟང་ཐལ་དང་། གནམ་ཞལ་དོན་ཁྲིད། རིམ་ལྔའི་ཁྲིད། དགོངས་པ་སྙིང་ཐིག་གི་ཁྲིད་བཅས་གཏེར་གཞུང་ཡིག་ཆ་ལྟར་དང་། གཏེར་ཆེན་ཀློང་གསལ་སྙིང་པོའི་བཀའ་བརྒྱད་ཡང་འདུས་ཀྱི་ཕྲིན་ལས་འབྲིང་པོ་ལ། ཁྱབ་བདལ་ལྷུན་གྲུབ་ཀྱི་མཛད་པའི་ཁྲིད་ཡིག་གསང་ཆེན་ཡེ་ཤེས་མྱུར་ལམ་རྗེ་མཁྱེན་བརྩེའི་ཞུ་བཅོས་ཅན་གུང་བསྒྲིགས་ཀྱི་སྟེང་ནས། སྔོན་འགྲོ། དངོས་གཞི་བསྐྱེད་བཟླས་རྫོགས་པའི་རིམ་པ་རྗེས་འབྲེལ་བཅས་ཀྱི་ཁྲིད་ལུང་ཚང་བ་དང་། ཉང་གཏེར་ཕྲིན་སྒྲུབ་རིན་ཆེན་སྒྲོན་མེ། ཀུན་མཁྱེན་ངག་གི་དབང་པོའི་ཡིག་ཆའི་ཐོག་ནས་གཏོར་མ་ལ་བརྟེན་པའི་དབང་བཞི་དང་། དེའི་རྫོགས་རིམ་རྒན་མོ་མཛུབ་བཙུགས་ཀྱི་གདམས་པ། རྒད་པོ་འཁར་བཙུགས་ཀྱི་གདམས་པ། བྲན་ཀ་ནམ་མཁའ་ལ་གནང་བའི་གསང་སྔགས་གསེབ་ལམ་བཅས་ཀྱི་ཁྲིད། ཉང་གཏེར་སྤྱི་བཤད་རིན་ཆེན་སྤུངས་པ། ནང་བཤད་གསང་སྔགས་ལམ་རིམ་ཆེན་མོ། མན་ངག་ཁྲིད་ཀྱི་རིམ་པ། གདམས་ངག་ངོ་སྤྲོད་ཀྱི་རིམ་པ་རྣམས་ཀྱི་ཁྲིད་ལུང་། བཀའ་མའི་སྐོར་ལ། སོ་ལུགས་ཡང་དག་གི་དབང་དང་། རོག་ཕུར། རོང་ཕུར་གྱི་དབང་། གྲུབ་ཐོབ་ཀརྨ་གླིང་པའི་གཏེར་བྱོན་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་དབང་འབྲིང་པོ་འགྲོ་དྲུག་རང་གྲོལ་ལྟར་གྱི་བུམ་དབང་རྗེས་འབྲེལ་དང་བཅས་པ། མཆོག་དབང་གསུམ་སྨིན་གླིང་རྡོར་སེམས་ལྟར་དང་། མཐའ་རྟེན་གཏོར་དབང་། རྫས་རྟགས་སྦྱིན་པ་བཅས་སྨིན་གླིང་གཏེར་ཆེན་ཡབ་སྲས་ཀྱི་ཕྱག་བཞེས་རྣམ་པར་དག་པ་ལྟར་མཛད་ནས་ཁྲིད་ལུང་ལ། ལོ་ཆེན་ཆོག་ཁྲིགས་སྡིག་སྒྲིབ་རྣམ་སྦྱོང་དང་། རྗེ་ཉིད་ཀྱིས་མཛད་པའི་རྒྱུན་ཁྱེར་ཟུང་འཇུག་ལམ་སློང་བཅས་ལ། གཏེར་གཞུང་སྔོན་འགྲོའི་འདོན་ཆ་སྦྲེལ་ཐོག་སྔོན་དངོས་རྗེས་སོགས་ཀྱི་ཁྲིད་ཚང་རགས་བསྡུས་ལུང་བཅས། གཏེར་གཞུང་བར་དོ་དྲུག་གི་རྩ་ཚིག་ནས་བར་དོ་དྲུག་ཁྲིད་ཞིབ་རྒྱས་དང་། རྗེས་འགྲེལ་ན་རག་སྐོང་བཤགས་ཀྱི་ལུང་། ལྷ་ལྕམ་པདྨ་གསལ་གྱི་སྐྱེ་བ་པདྨ་གླིང་པའི་ཆོས་སྐལ། ཚེ་སྒྲུབ་ནོར་བུ་ལམ་ཁྱེར་གྱི་སྨིན་བྱེད་གཏེར་གཞུང་ཐོག་ནས་སྩལ། བྱང་གཏེར་རིག་འཛིན་གདུང་སྒྲུབ་ཀྱི་དབང་། ཆོས་རྗེ་གླིང་པའི་ཡང་དག་བདེ་ཆེན་སྙིང་པོའི་དབང་ཁྲིད་ལུང་། ཆོས་གླིང་ཕུར་པ་ཡང་གསང་ཐུགས་ཀྱི་ཐིག་ལེའི་དབང་ལུང་ཆ་ཚང་། ཆོས་གླིང་གཏེར་བྱོན་བདེ་གཤེགས་རྩ་གསུམ་འཆི་མེད་དྲིལ་སྒྲུབ་ཀྱི་སྨིན་གྲོལ་རྒྱབ་རྟེན་བཅས་ཚང་སྤྲུགས་དང་། རྗེ་བཙུན་ས་སྐྱ་པའི་བཀའ་སྲོལ་སྤྱན་རས་གཟིགས་ཕྱག་བཞི་པའི་རྗེས་གནང་། དེའི་རྒྱུན་ཁྱེར་དཀོན་མཆོག་ལྷུན་གྲུབ་ཀྱི་ཡིག་ཆའི་ཁྲིད་ལུང་། བརྒྱུད་འདེབས་རྗེ་ཉིད་ཀྱིས་མཛད་པའི་ལུང་། མན་ངག་རྫོགས་པ་ཆེན་པོའི་ལམ་གྱི་ཤིང་རྟ་གཅིག་པུར་གྱུར་པ་རིག་འཛིན་འཇིགས་མེད་གླིང་པའི་བཀའ་འབུམ་པོད་དགུ་བཞུགས་པའི། དགོངས་གཏེར་ཀློང་ཆེན་སྙིང་ཏིང་གི་རིགས་འདུས་རྩ་དབང་རྒྱས་པ་དང་མཐར་ཀློང་སྙིང་ཡོངས་རྫོགས་ཀྱི་བྱིན་རླབས་གདམས་གཏད་ཐུན་མིན་ཀྱང་མཛད་མཐར་དོན་བརྒྱུད་ཆོས་ཀྱི་བདག་པོ་ལས་ཐོབ་པ་ཡིན། ཚིག་བརྒྱུད་འཇུ་དབོན་འཇིགས་མེད་རྡོ་རྗེས་ཁོ་བོ་ལས་ལན་གཉིས་ཐོབ་པ་ཡིན་པས་དེར་ཞུས་བརྒྱུད་པ་ངེད་རང་ལ་འདེད་ན་ཆོག་གསུངས། ཕུར་པ་རྒྱུད་ལུགས་ཀྱི་དབང་ལུང་། ཡོན་ཏན་རིན་པོ་ཆེའི་མཛོད་ཀྱི་རྩ་བ། དེའི་རྒྱས་འགྲེལ་ཤིང་རྟ་རྣམ་གཉིས་རྩ་འགྲེལ་སྦྲགས་མའི་སྟེང་ནས་བཤད་ལུང་རྒྱས་པ་དང་། འཕྲོས་བཀའ་འབུམ་བོད་ཆེན་བཞི་བཅས་ཀྱི་ལྗགས་ལུང་གསན། སྤྲུལ་པའི་གཏེར་འབྱིན་མཆོག་གྱུར་གླིང་པ་དེ་ཉིད་ལ་བཀའ་བབས་བདུན་ལྡན་གྱི་མཛོད་མངའ་བའི་ནང་གསེས། ཨ་ཏི་ཟབ་དོན་སྙིང་ཐིག་གི་སྨིན་གྲོལ་རྒྱབ་རྟེན་བཅས་དང་། གཏེར་ཆེན་དེ་ཉིད་ཀྱིས་རུ་དམ་གངས་ཁྲོད་ནས་སྤྱན་དྲངས་བའི་ནང་སྐོར་དཔལ་འཁོར་ལོ་བདེ་མཆོག་སངས་རྒྱས་མཉམ་སྦྱོར་གྱི་དབང་དང་ཁྲིད་ལུང་བཅས་དང་། པདྨ་ཤེལ་ཕུག་ནས་སྤྱན་དྲངས་པའི་གསང་སྒྲུབ་ཡང་གསང་ཁྲོ་བོའི་སྨིན་གྲོལ་རྒྱབ་རྟེན་བཅས། གཏེར་ཆེན་དེ་ཉིད་ཀྱིས་ཡེ་རྒྱལ་ནམ་མཁའ་མཛོད་ནས་སྤྱན་དྲངས་པའི་སྡེ་གསུམ་གྱི་དགོངས་ཉམས་གཅིག་ཏུ་དྲིལ་བ་རིགས་གསུམ་སྙིང་ཐིག་ཏུ་གྲགས་པའི་སྨིན་གྲོལ་རྒྱབ་རྟེན་བཅས་དང་། གཏེར་ཆེན་དེ་ཉིད་ཀྱི་གཏེར་བྱོན་ཐུགས་སྒྲུབ་བར་ཆད་ཀུན་སེལ་ལས་བླ་མ་བཀའ་བརྒྱད་ཀྱི་དབང་ཁྲིད་ལུང་བཅས། བླ་མ་བསྟན་གཉིས་སྐོར་གསུམ་གྱི་ཆོས་བཀའ་རྡོ་རྗེ་འཆང་མཁྱེན་བརྩེའི་དབང་པོ་ཉིད་ཀྱི་ཡང་གཏེར་དུ་བཀའ་བབས་པའི། སྨིན་གྲོལ་རྒྱབ་རྟེན་དང་། རྗེ་བླ་མ་ཉིད་ཀྱི་དག་སྣང་ཆོས་སྡེ་ལས་བྱོན་པའི་གྲུབ་ཐོབ་ཐུགས་ཏིག་གི་དབང་དང་ཁྲིད་ལུང་བཅས། དཔལ་ཆེན་ཡང་དག་ཟབ་ཏིག་དང་། རྡོ་རྗེ་ཕུར་པའི་གནད་ཏིག་བཅས་ཀྱི་སྨིན་གྲོལ་རྒྱབ་རྟེན་བཅས་དང་། གོང་སྨོས་ལྟར་དུས་གསུམ་རྒྱལ་བ་ཀུན་གྱི་བགྲོད་པ་གཅིག་པའི་ལམ་མཆོག་ཐེག་ཆེན་བྱང་ཆུབ་མཆོག་ཏུ་སེམས་བསྐྱེད་པ་དབུ་མ་ལུགས་སུ་གྲགས་པའི་སྡོམ་པ་འབོགས་ཆོག་གཏེར་ཆེན་གསུང་ལ་ཀུན་མཁྱེན་ཆེན་པོའི་གསུང་རབ་ཀྱིས་ཟུར་བརྒྱན་པ་ཉིད་ལན་གཉིས་བར་དུ་གསན་པ་དང་། ལོ་ཙཱ་བ་བཻ་རོའི་རྣམ་འཕྲུལ་འཕྲེེང་གཏེར་གསུང་བྱང་སེམས་སྨོན་ལམ་ཕན་བདེའི་ལྗོན་པ་དང་། གསང་སྔགས་སྨོན་ལམ་འདོད་འཇོའི་དགའ་སྟོན། དེའི་འགྲེལ་པ་རིག་འཛིན་འཇིགས་གླིང་གསུང་བཅས་ཀྱི་སྟེང་ནས་བཤད་ལུང་རྒྱས་པ། འཇམ་དཔལ་བསྟོད་སྒྲུབ་ཀྱི་རིགས་གཏད་ལན་གཉིས་དང་། རྗེ་བླ་མའི་གསུང་། བརྒྱུད་འདེབས། བསྟོད་སྒྲུབ། བསྟོད་འགྲེལ། མཚན་བརྗོད་བཀླགས་ཐབས། འཇམ་དཔལ་མཚན་བརྒྱ་རྩ་བརྒྱད་ཀྱི་བསྟོད་པ། ས་པཎ་གསུང་བསྟོད་པ་དཔལ་ལྡན་བློ་གྲོས་སོགས། བཟང་སྤྱོད་ཀྱི་བཤད་པ། རྒྱལ་སྲས་ཐོགས་མེད་གསུང་བློ་སྦྱོང་དོན་བདུན་མ། དེའི་འགྲེལ་པ་རྗེ་བླ་མ་ཉིད་ཀྱིས་མཛད་པ་བཅས་ཀྱི་ཁྲིད་ལུང་། དེའི་བརྒྱུད་འདེབས་སྨོན་ལམ་དང་འགྲེལ་བ་རྗེ་ཉིད་ཀྱི་གསུང་། རྗེ་བློ་བཟང་གྲགས་པས་མཛད་པའི་བྱང་ཆུབ་ལམ་རིམ་དེའི་ངག་འདོན་མཁྱེན་བརྩེ་རིན་པོ་ཆེ་ཉིད་ཀྱི་གསུང་། ཞྭ་དམར་མཁའ་སྤྱོད་དབང་པོས་མཛད་པའི་བློ་སྦྱོང་སྙིང་པོའི་དོན་བསྡུས་ནཱ་རོ་མཁའ་སྤྱོད་ཅེས་རྗེ་བཙུན་ས་སྐྱ་པ་ཡབ་སྲས་ལ་བཀའ་བབས་པའི་གདམས་སྐོར་གྱི་སྨིན་གྲོལ་རྒྱབ་རྟེན་བཅས་པ་དང་། ཀརྨ་པ་དབང་ཕྱུག་རྡོ་རྗེས་ཁྲིད་ཡིག་རྒྱས་འབྲིང་བསྡུས་གསུམ་མཛད་པའི་ཕྱི་མ་ཆོགས་སྐུ་མཛུབ་ཚུགས་དང་། སྔོན་འགྲོ་ཟུར་གསལ་གྱི་ཐོག་ནས་ཁྲིད་ལུང་། མི་བསྐྱོད་རྡོ་རྗེས་མཛད་པའི་ཀརྨ་པ་ལ་བརྟེན་པའི་ཐུན་བཞིའི་བླ་མའི་རྣལ་འབྱོར། ཆགས་མེད་གསུང་ཐུན་བཞིའི་རྣལ་འབྱོར་གྱི་ཁྲིད། བན་སྒར་བ་འཇམ་དཔལ་བཟང་པོའི་གསུང་གསོལ་འདེབས་རྡོ་རྗེའི་འཆང་ཐུང་མ། དེའི་ཁྲིད་ཨ་རཱ་གས་མཛད་པ་བཅས་སྦྲེལ་བའི་ཁྲིད་ལུང་། རྗེ་བླ་མ་ཉིད་ཀྱི་གསུང་ཐོར་བུའི་གྲས། བླ་མའི་རྣལ་འབྱོར་ཡེ་ཤེས་མཆོག་སྩོལ། རྣམ་ཐར་གསོལ་འདེབས་སོགས་དང་ཞབས་བརྟན་མཆོད་ཆོག་གསུང་མགུར་སོགས་ཀྱི་སྐོར་ཐོར་བུ་མང་ཙམ་གསན་ཀྱང་རྒྱས་པར་བྲི་བར་མ་ནུས་སོ། །༧ རྒྱལ་བས་ལུང་བསྟན་འཇམ་མགོན་བློ་གྲོས་མཐའ་ཡས་ཀྱི་ཞལ་སྔ་ནས། རྗེ་ཉིད་ཀྱིས་བཀའ་བསྡུ་མཛད་པའི་ཐུན་མོང་ཤེས་བྱ་མཛོད། རྒྱ་ཆེན་བཀའ་ཡི་མཛོད། ཟབ་མོ་གཏེར་གྱི་མཛོད། ཡང་ཟབ་གདམས་ངག་རིན་པོ་ཆེའི་མཛོད། ཐུན་མིན་གསང་བའི་མཛོད་རྣམས་བཞུགས་པའི་ནང་ཚན། གཏེར་སྟོན་སངས་རྒྱས་བླ་མ་ནས་མཆོག་གྱུར་བདེ་ཆེན་གླིང་པའི་བར་གཏེར་སྟོན་ཉིས་བརྒྱར་ཉེ་བའི་སྨིན་གྲོལ་གདམས་པ་ཁུངས་ཐུབ་རྣམས་ཕྱོགས་གཅིག་ཏུ་བསྡུས་པ་རིན་ཆེན་གཏེར་གྱི་མཛོད། རབ་ཚེས་མེ་བྱི་ལོ་ཡན་ཆད་ཀྱི་གླེགས་བམ་ཀ་ནས་ཨ་བར་སུམ་ཅུ་དང་། བཀའ་རྒྱ་མ་པོད་བཞི་བཅས་ཀྱི་དབང་ལུང་ཁྲིད་གསུམ་ཡོངས་རྫོགས་རྫོང་སར་བཀྲ་ཤིས་ལྷ་རྩེར་འཇམ་མགོན་མཁྱེན་བརྩེའི་ཞབས་དང་ཕལ་ཆེར་ལྷན་དུ་གསན། དེ་རྗེས་ཁ་སྐོང་གླེགས་བམ་སུམ་ཅུ་སྐོར་ཡོངས་སུ་རྫོགས་པའི་སྨིན་གྲོལ་རྒྱབ་རྟེན་བཅས་ཟུར་མང་དྲུང་རིན་པོ་ཆེ་ཀརྨ་ཆོས་ཀྱི་ཉིན་བྱེད་མདུན་ནས་གསན། ཐུན་མོང་ཤེས་བྱ་མཛོད་སྐབས་བཅུ་རྐང་པར་རེ་བཞི་ཡོད་པའི་རྩ་བ་དང་འགྲེལ་པ་བཅས་གླེགས་བམ་སྐུ་གསུམ་གྲངས་ལྡན་ནི། རྗེ་བླ་མ་སྐུ་དངོས་ཀྱིས་ཐོག་མའི་མཆོད་བརྗོད་དང་། བརྩམ་པར་དམ་བཅའ་བ། མཇུག་གི་སྡོམ་བྱང་སྟེང་ནས་ལྗགས་བཤད་མདོར་བསྡུས་དང་། དཔེ་རྣམས་དབུ་ཐོག་ཏུ་བཞག་ནས་བཀའ་རྒྱ་གདམས་གཏད་སྨོན་ལམ་ཤིས་བརྗོད་རྒྱས་པར་སྩལ་ཅིང་། སྔ་འགྱུར་གྱི་རིག་འཛིན་མཁས་གྲུབ་ཀློང་ཆེན་པ་དང་། ཀརྨ་རང་བྱུང་རྡོ་རྗེ། ཀུན་མཁྱེན་དོལ་པོ། སྨིན་གཏེར་ཡབ་སྲས། ཀཿཐོག་དགེ་པཎ། ཞེ་ཆེན་པའི་མཁས་གྲུབ་སོགས་ཀྱི་ལྟ་བ་དབུ་མ་གཞན་སྟོང་ཡིན་པས་དེ་ཉིད་འཛིན་དགོས་པར་བཀའ་སྩལ། འབྲུ་ལུང་ཡོངས་རྫོགས་ནི་ཁྲོ་ཤུལ་མཁན་ཆེན་རྡོ་རྗེ་འཛིན་པ་ཚུལ་ཁྲིམས་རྒྱ་མཚོ་ལས་གསན་པ་དང་། ཟུར་མང་དྲུང་རིན་པོ་ཆེ་ཀརྨ་ཆོས་ཀྱི་ཉིན་བྱེད་ལས་མངའ་བདག་མར་པ་ལོ་ཙཱ་ནས་བརྒྱུད་པའི་བདེ་དགྱེས་གསང་གསུམ་གཙོས་བླ་མེད་ཀྱི་རྒྱུད་སྡེ་ཟབ་ཅིང་གཉན་ལ་ཆེས་དཀོན་པ་རྣམས་ཀྱི་སྨིན་གྲོལ་དང་། ལྷག་པའི་ལྷ་འགའ་ཞིག་གི་རྗེས་གནང་སྐོར་ཕྱོགས་གཅིག་ཏུ་བསྡུས་པ་སྔགས་མཛོད་ཆེན་མོའི་སྨིན་གྲོལ་རྒྱབ་རྟེན་དང་བཅས་པ་དང་། འཇམ་མགོན་བླ་མ་དངོས་ལས་བརྟག་གཉིས་སྤྱི་དོན་དང་ཚིག་དོན་རྣམ་བཤད། རྒྱལ་དབང་རང་བྱུང་རྡོ་རྗེས་མཛད་པའི་རྣལ་འབྱོར་བླ་མེད་ཀྱི་རྒྱུད་སྡེ་རྒྱ་མཚོའི་སྙིང་པོ་བསྡུས་པ་ཟབ་མོ་ནང་དོན་ཉུང་ངུའི་ཚིག་གིས་རྣམ་པར་འགྲོལ་བ་ཟབ་དོན་སྣང་བྱེད། རྣམ་ཤེས་ཡེ་ཤེས་འབྱེད་པའི་བསྟན་བཅོས་ཀྱི་འགྲེལ་བ། དེ་བཞིན་གཤེགས་པའི་སྙིང་པོ་བསྟན་འགྲོ་ལ་བཅས་ཀྱི་བཤད་ལུང་དང་། སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱི་མན་ངག་གི་གཞུང་དང་གདམས་ངག་ཡོངས་རྫོགས་ཕྱོགས་གཅིག་བསྡུས་པ་གདམས་ངག་རིན་པོ་ཆེའི་མཛོད་ནི། ངེས་གསང་བཀའ་ཡི་བསྡུ་བ་ཆོས་ཀྱི་བདག་པོ་རྗེ་བླ་མ་མཆོག་ནས་དཀར་ཆག་བརྒྱུད་ཡིག་དབུར་བཞག་གིས་བརྒྱུད་པའི་གཤར་འདེབས་གཏད་རྒྱ་སྨོན་ལམ་བཅས་ཐུགས་ཚིམ་པ་དང་། སྨིན་གྲོལ་རྒྱབ་རྟེན་བཅས་ཡོངས་སུ་རྫོགས་པ་ཞལ་སློབ་ཡོངས་ཀྱི་གཙོ་བོ་ངེས་དོན་ཆོས་ཀྱི་རྒྱལ་ཚབ་གཅིག་པུ་མདོ་དང་སྔགས་ཀྱི་གཞུང་ལུགས་རབ་འབྱམས་སྨྲ་བ་མཁན་ཆེན་རྒྱལ་བའི་སྲས་པོ་ཐམས་ཅད་མཁྱེན་པ་ཀརྨ་བཀྲ་ཤིས་འོད་ཟེར་མདུན་ནས་ལེགས་པར་གསན་བཞེས་གནང་ཞིང་། ཐུན་མིན་གསང་བའི་མཛོད་ནི་ཡབ་རྗེ་འཇམ་མགོན་བླ་མ་ཉིད་ཀྱི་ཟབ་གཏེར་གྱི་སྐོར་ཏེ། ལྷ་མདོ་འབུར་མོ་ནས་སྤྱན་དྲངས་པའི་རྩ་གསུམ་དགོངས་འདུས་ཀྱི་ཆོས་སྡེ་མཛོད་གཅིག་ཏུ་འདུས་པ་སྔོན་མེད་ཟབ་ཅིང་རྒྱ་ཆེ་བར་ཁྱད་པར་དུ་འཕགས་པ་ངོ་མཚར་ཅན་དུ་བཞུགས་ནའང་རྟེན་འབྲེལ་གཞན་རྐྱེན་གྱིས་དབང་གིས་ཡོངས་རྫོགས་གཏན་ལ་འབེབས་པར་མ་གནང་ཡང་སྙིང་པོ་བསྡུས་པ་ལུང་གཏེར་གྱི་མཛོད་ལ་རྩ་གསུམ་ཆོས་སྐྱོང་གི་སྐོར་བཞི་བཞུགས་པ་ལས་བླ་མ་རིག་འཛིན་མཆོག་སྒྲུབ་ཀྱི་ཆོས་སྡེ་ཚན་དྲུག་ཙམ་གཏན་ལ་འབེབས་མཛད་གནང་བ་དང་། ཙཱ་འདྲའི་གཏེར་བྱོན་གསང་ཐིག་ཡབ་བཀའ་ཡུམ་བཀའི་སྐོར་རོང་མེ་དཀར་མོ་སྟག་ཚང་ནས་གཏེར་བྱོན་གྲོ་ལོད། ལམ་ཟབ་ལེ་བདུན་རྣམས་སྐུ་དངོས་ལས་གསན་ཅིང་། དག་སྣང་ཚིག་བདུན་ཡབ་བཀའ་ཡུམ་བཀའི་སྐོར་སོགས་དྲུང་རིན་པོ་ཆེ་ལས་གསན་པའོ། །དེ་དག་གི་རྗེས་འབྲེལ་བཀའ་འབུམ་རིན་པོ་ཆེ་པོད་བཅུ་བཞུགས་པ། ལྔ་རིགས་སྨྲ་བའི་དབང་པོ་ཀརྨ་བཀྲ་ཤིས་ཆོས་འཕེལ་དང་། དྲུང་རིན་པོ་ཆེ་གཉིས་ལས་གསན། ཡང་འཇམ་མགོན་བླ་མའི་མདུན་ནས་རྙིང་མ་རྒྱུད་འབུམ་སྡེ་དགེའི་སྤར་དུ་གང་འཁོད་ཀྱི་ལུང་ཡོངས་རྫོགས། རྒྱ་ཞང་ཁྲོམ་གཏེར་བྱོན་གཤིན་རྗེ་ཚེ་བདག་གི་དབང་ལུང་ཡོངས་རྫོགས། ཡང་བཟློག་མེ་ཡི་སྤུ་གྲིའི་དབང་ལུང་ཡོངས་རྫོགས། སྙིང་ཐིག་ཡ་བཞི་ཚར་གཅིག ལྷ་འབྲང་མཆོག་སྤྲུལ་དཔལ་ལྡན་ཆོས་རྒྱལ་མདུན་ནས་ཀྱང་ལན་གཅིག་གསན། བཀའ་བརྒྱད་དབང་ཡོངས་རྫོགས་སྒྲུབ་ཆེན་དང་འབྲེལ་བར་འཇམ་མགོན་རིན་པོ་ཆེའི་ཞལ་སྔ་ནས་དང་། དབང་རྐྱང་ཙམ་རབ་འབྱམས་ལྔ་པ་ལས་ཀྱང་གསན། ཞི་བའི་དབང་དང་ཚེ་དབང་། རྒྱུད་རྣམས་ཀྱི་ལུང་མཁན་པད་རྡོར་མདུན་ནས་དང་། པོད་ལུང་ཡོངས་རྫོགས་དགེ་བའི་བཤེས་གཉེན་ན་ཆུ་ཕྲིན་ལས་མདུན་ནས་གསན། གཏེར་ཆེན་ཉང་རལ་གཏེར་བྱོན་རྡོ་རྗེ་ཕག་མོ་ཁྲོས་ནག་གི་དབང་ཁྲིད་ཡོངས་རྫོགས། དུར་ཁྲོད་ལྷ་མོའི་བེ་བུམ་དང་། ཕྲིན་སྒྲུབ་རིན་ཆེན་སྒྲོན་མེའི་དབང་། རྒད་པོ་འཁར་བཙུགས། རྒན་མོ་མཛུབ་བཙུགས། གསང་སྔགས་གསེབ་ལམ་ཁྲིད་ཀོང་སྤྲུལ་རིན་པོ་ཆེ་དང་། མཁན་པད་རྡོར་གཉིས་ལས་ཀྱང་གསན། གཏེར་ཆེན་ཆོས་དབང་གཏེར་བྱོན་བླ་མ་གསང་འདུས་ཀྱི་དབང་གཞུང་པོད་ཀྱི་ལུང་། བཀའ་བརྒྱད་གསང་བ་ཡོངས་རྫོགས་ཀྱི་དབང་རྣམས་འཇམ་མགོན་བློ་གྲོས་མཐའ་ཡས། གསང་རྫོགས་པོད་ལུང་དཔལ་ཡུལ་རྒྱ་སྤྲུལ་རིན་པོ་ཆེའི་མདུན་ནས་གསན། ཆོས་དབང་གཏེར་བྱོན་ཡང་སྙིང་འདུས་པའི་དབང་དང་གཞུང་པོད། ཆོས་དབང་ཡང་དག་སྙིང་པོའི་སྨིན་གྲོལ་རྒྱབ་རྟེན་བཅས་ཆ་ཚང་། ཆོས་དབང་ཕུར་པ་ཡང་གསང་སྤུ་གྲིའི་སྨིན་གྲོལ་རྒྱབ་རྟེན་བཅས། འཇམ་མགོན་རྡོ་རྗེ་འཆང་རྣམ་གཉིས་དང་། རབ་འབྱམས་ལྔ་པའི་མདུན་ནས་ཀྱང་སྨིན་གྲོལ་ལན་གཉིས་གསན་པའོ། །པདྨ་ལས་འབྲེལ་རྩལ་གྱི་གཏེར་བྱོན་གསང་བདག་དྲེགས་པ་ཀུན་འདུལ་གྱི་དབང་དང་གཞུང་པོད་སངས་གླིང་གཏེར་བྱོན་བླ་མ་དགོངས་འདུས་སྨིན་བྱེད་ཡོངས་རྫོགས་རྣམས་ཀོང་སྤྲུལ་རྡོ་རྗེ་འཆང་དང་། དགོངས་འདུས་པོད་ལུང་ཁྱུང་སྤྲུལ་རིན་པོ་ཆེ་ཐུབ་བསྟན་ཆོས་དཔལ་རྒྱ་མཚོའི་མདུན་ནས་གསན་པའོ། །རིག་འཛིན་རྒོད་ལྡེམ་གྱི་གཏེར་བྱོན་བླ་མ་ཞི་བ་གདུང་སྒྲུབ་ཀྱི་སྐོར་དབང་ལུང་ཡོངས་རྫོགས། ཐུགས་སྒྲུབ་དྲག་པོ་རྩལ་གྱི་དབང་དང་གཞུང་པོད་ཡོངས་རྫོགས་ཀྱི་ལྗགས་ལུང་། ཐུགས་རྗེ་ཆེན་པོ་འགྲོ་བ་ཀུན་གྲོལ་གྱི་དབང་ལུང་ཡོངས་རྫོགས། རྫོགས་ཆེན་ཀུན་བཟང་དགོངས་པ་ཟང་ཐལ་གྱི་དབང་ཁྲིད་ལུང་དང་ཀ་དག་གི་སྐོར་བཅས་ཡོངས་རྫོགས། བཀའ་བརྒྱད་རང་བྱུང་རང་ཤར་ཆོས་སྐོར་གྱི་དབང་ལུང་ཡོངས་རྫོགས། བྱང་གཏེར་ཕུར་པ་ལུགས་གསུམ་གྱི་དབང་ལུང་། གཏེར་ཆེན་རཏྣ་གླིང་པའི་གཏེར་བྱོན་རྡོ་རྗེ་ཕུར་པ་ཡང་གསང་བླ་མེད་ཀྱི་དབང་ལུང་རྣམས་འཇམ་མགོན་རྡོ་རྗེ་འཆང་དང་། རཏ་ཕུར་དབང་ལུང་རབ་འབྱམས་ལྔ་པའི་མདུན་ནས་ཀྱང་ལན་གཉིས་ཀྱི་བར་གསན། འཇམ་མགོན་རྗེ་ལས་རིག་འཛིན་པདྨ་གླིང་པའི་གཏེར་བྱོན་རྫོགས་ཆེན་ཀུན་བཟང་དགོངས་འདུས་ཀྱི་གཞུང་པོད་ཡོངས་རྫོགས་ཀྱི་བཀླགས་ལུང་། མངའ་རིས་པཎ་ཆེན་གྱི་གཏེར་བྱོན་བླ་མ་བཀའ་བརྒྱད་ཡོངས་རྫོགས་ཀྱི་དབང་ལུང་ཡོངས་རྫོགས། གཏེར་སྟོན་མ་ཏི་རཏྣས་བ་ཐང་ཤིང་རྒྱལ་བའི་དབེན་གནས་ཀྱི་ནུབ་ཕྱོགས་ཨོ་རྒྱན་གསང་ཕུག་སིནྡྷུ་རའི་ཆུ་བོ་ནས་སྤྱན་དྲངས་པའི་མཁའ་འགྲོ་བདུད་འདུལ་དྲག་མོའི་ཆོས་སྐོར་གྱི་དབང་དང་། གཏེར་གཞུང་སྐོར་རྒྱ་སྤྲུལ་རིན་པོ་ཆེའི་མདུན་དང་རབ་འབྱམས་ལྔ་པ་ལས་ཀྱང་གསན་པའོ། །འཇམ་མགོན་རྣམ་གཉིས་དང་དྲུང་རིན་པོ་ཆེ་བཅས་ཀྱི་མདུན་ནས་འཇའ་ཚོན་གཏེར་བྱོན་དཀོན་མཆོག་སྤྱི་འདུས་ཀྱི་སྐོར་སྨིན་གྲོལ་རྒྱབ་རྟེན་བཅས། ལོ་ཆེན་བཻ་རོ་ཙཱ་ནའི་རྣམ་འཕྲུལ་བསྟན་པའི་ཉི་མ་རིག་འཛིན་གཏེར་བདག་གླིང་པའི་ཟབ་གཏེར་ཆོས་ཀྱི་སྨིན་གྲོལ་རྒྱབ་རྟེན་བཅས་ཇི་ལྟར་གསན་ཚུལ་ལ། གཡའ་མ་ལུང་ནས་སྤྱན་དྲངས་པའི་རིག་འཛིན་ཐུགས་ཐིག་སྨིན་གྲོལ་རྒྱབ་རྟེན་བཅས་འཇམ་མགོན་བླ་མ་དང་། ལུང་རྐྱང་མཁན་ཆེན་ཀུན་བསོད་དང་། རྡོར་སེམས་སྨིན་གྲོལ་རྒྱབ་རྟེན་བཅས་འཇམ་མགོན་དང་། རབ་འབྱམས་ལྔ་པ་བཅས་ཀྱི་མདུན་ནས་དང་། མ་ཧཱ་གུ་རུ་དྲག་པོའི་སྐོར་གྱི་དབང་ལུང་ཡོངས་རྫོགས། ཨ་ཏི་ཟབ་དོན་སྙིང་པོའི་སྐོར་གྱི་དབང་ལུང་ཁྲིད་གསུམ་ཚང་བ་འཇམ་མགོན་བླ་མའི་མདུན་ནས་ལན་གཅིག རབ་འབྱམས་ལྔ་པའི་མདུན་ནས་ལན་བཞི་གསན། བཀའ་སྲུང་ཡེ་ཤེས་མ་མོ་རག་གདོང་མའི་དབང་ལུང་ཡོངས་རྫོགས། འཇམ་དཔལ་གཤིན་རྗེ་དྲེགས་འཇོམས་ཀྱི་དབང་ལུང་ཡོངས་རྫོགས། ཟབ་ལམ་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་དབང་དང་ཁྲིད་བཅས་རྗེ་བླ་མ་བློ་གྲོས་མཐའ་ཡས་དང་། མྱོས་རིགས་རྗེ་བཙུན་མ་འགྱུར་མེད་བདེ་ཆེན་ཆོས་སྒྲོན་གཉིས་ལས་གསན་ཅིང་། གཏུམ་མོའི་ཁྲིད་སོགས་ཞེ་སྤྲུལ་ངེས་དོན་བསྟན་འཕེལ་ལས་གསན་པའོ། །རྒྱབ་རྟེན་ལུང་གི་རིམ་པ་ཡོངས་རྫོགས་སྒྲུབ་བླ་དམ་པ་རབ་འབྱམས་དབོན་ཐུགས་རྗེའི་རྒྱ་མཚོ་དང་། གཏེར་ཆེན་རིན་པོ་ཆེའི་བཀའ་འབུམ་ཡོངས་རྫོགས་དགོན་སྟོད་མཆོག་སྤྲུལ་ཨོ་རྒྱན་ཚེ་དབང་རིག་འཛིན་ལས་གསན་པའོ། །གཏེར་ཆེན་བླ་མས་རྡོ་རྗེ་ཐེག་པའི་ཆོས་ཚུལ་རབ་འབྱམས་ལས་ལྷག་པའི་ལྷ་དུ་མའི་སྒྲུབ་ཐབས་བྱིན་རླབས་ཀྱི་དབང་ཆོག་བཅས་ཕྱོགས་བསྡུས་སྒྲུབ་ཐབས་འདོད་འཇོ་བུམ་བཟང་གི་དབང་ལུང་འཇམ་མགོན་རྡོ་རྗེ་འཆང་གི་མདུན་ནས་ལན་གཅིག སྐྱབས་རྗེ་རབ་འབྱམས་རིན་པོ་ཆེའི་མདུན་ནས་ལན་གཅིག་བཅས་དང་། དྲུང་རིན་པོ་ཆེའི་མདུན་ནས་འབྲུ་ལུང་ལན་གཅིག་གསན། ཡང་རྗེ་གུ་ཎའི་ཞབས་ལས་གཏེར་ཁ་གསུམ་འདུས་ཟབ་ཏིག་ཆོས་དབྱིངས་རང་གསལ་གྱི་དབང་ལུང་ཡོངས་རྫོགས། ཆོས་གླིང་གཏེར་བྱོན་རྩ་གསུམ་དྲིལ་སྒྲུབ་དབང་ཁྲིད་ལུང་བཅས་ཡོངས་རྫོགས། དེའི་གཏེར་བྱོན་ཡང་དག་དབང་ཁྲིད་ལུང་བཅས་ཡོངས་རྫོགས། དེའི་གཏེར་བྱོན་ཕུར་པ་ཡང་གསང་ཐུགས་ཀྱི་ཐིག་ལེའི་དབང་ལུང་ཡོངས་རྫོགས། མཆོག་གླིང་གཏེར་བྱོན་ཟབ་བདུན་མངོན་སྤྱོད་ཀྱི་ཟབ་པ་ལུགས་ཐུགས་ཀྱི་ཕུར་གཅིག་གི་སྨིན་གྲོལ་ཆ་ཚང་། ཀར་ལུགས་དགྱེས་རྡོར་ལྷ་དགུའི་དབང་ཆོག་ཉིད་ཀྱི་ལྗགས་བསྒྲིགས་སྟེང་ནས་ལན་གཉིས་གསན། བི་རུ་པའི་བཀའ་སྲོལ་ཕ་རྒྱུད་ཞེ་སྡང་འདུལ་བྱེད་གཤིན་རྗེ་གཤེད་དམར་ལྷ་ལྔའི་དབང་ཆོག་སྟ་གོན་སྔོན་འགྲོ་ཇོ་ནང་ཡིག་ཆའི་སྟེང་ནས་དང་། རྗེ་ཉིད་ཀྱི་གསུང་ཐུན་མཚམས་ཆོས་སྤྱོད་སྡོམ་གསུམ་གསོ་སྦྱོང་ཐར་པའི་ཐེམ་སྐས་སོགས་ཀྱི་ལྗགས་ལུང་། ཕྱག་ཆེན་ལྷན་ཅིག་སྐྱེས་སྦྱོར་གྱི་ཁྲིད་ཡིག་རྒྱས་པ་དབང་ཕྱུག་རྡོ་རྗེས་མཛད་པ་ངེས་དོན་རྒྱ་མཚོ། འབྲིང་པོ་མ་རིག་མུན་སེལ། བསྡུས་པ་ཆོས་སྐུ་མཛུབ་བཙུགས་སོགས་འཇམ་མགོན་བླ་མ་འཆི་མེད་བསྟན་གཉིས་གཡུང་དྲུང་གླིང་པ་དངོས་ལས་གསན་པ་གཙོ་བོར་གྱུར་པ་རྣམས་མདོར་བསྡུས་པའོ། །མཁན་ཆེན་བཀྲ་ཤིས་འོད་ཟེར་ལས་དབུ་ལུགས་སེམས་བསྐྱེད་ལན་གཉིས། འཇུ་དབོན་ཨ་བྷཱ་ཡ་ལས་རྩེ་ལེའི་སེམས་བསྐྱེད་སྲོལ་གཉིས་འདུས། ཁྱུང་སྤྲུལ་ཐུབ་བསྟན་རྒྱ་མཚོ་ལས། བཀའ་གདམས་གླེགས་བམ། བློ་སྦྱོང་སྙན་བརྒྱུད་ཆེན་མོ། བཻ་རོའི་འདྲ་འབག མཆོག་སྤྲུལ་ཀརྨ་རསྨི་ལས་མདོ་སྡུད་པའི་བཤད་ལུང་། སྐྱེས་རབས་སོ་བཞི་པ་ཁ་སྐོང་བཅས་དང་། དྭགས་པོ་བཀྲིས་རྣམ་པའི་འོད་ཟེར་སྐོར་གསུམ་རྣམས་གསན། མཁས་དབང་ལྔ་རིག་སྨྲ་བ་ཆེན་པོ་བཀྲ་ཤིས་ཆོས་འཕེལ་ལས། ཇོ་ལུགས་དུས་འཁོར་གྱི་དབང་ཁྲིད། བཀའ་གདམས་དོལ་པོའི་བེ་བུམ་སྔོན་པོ། དམ་པའི་འཁྱུད་སྤྱད། ན་བཟའ་བེ་བུམ་རྣམས་ཀྱི་ལུང་དང་། མངོན་རྟོགས་རྒྱ་རོང་ཊཱི་ཀ་སྟེང་ནས་བཤད་ལུང་དང་། སྒོམ་རིམ། བྱམས་པའི་ཆོས་ལྔ་འཇམ་མགོན་མཁྱེན་བརྩེའི་ཉེ་བརྒྱུད་རྩ་བའི་སྟེང་ནས་བཤད་ལུང་། རྒྱུད་བླ་དོ ལ་པོ་དང་རོང་སྟོན་ཆེན་པོའི་ཊཱི་ཀ་གཉིས་ཀའི་བཤད་ལུང་། སྤྱོད་འཇུག་ཐོགས་ཊཱིཀ་རྣམས་གསན། མཁས་པའི་དབང་པོ་ཁྲོ་ཤུལ་མཁན་ཚུལ་རྒྱལ་ལས། ཇོ་བོའི་ཆོས་ཆུང་བརྒྱ་རྩ། དཔལ་སྤྲུལ་རིན་པོ་ཆེའི་ཤེར་ཕྱིན་འབྲུ་འགྲེལ་དང་སྤྱི་དོན་གྱི་བཤད་པ་ཞིབ་རྒྱས། སྡོམ་གསུམ་རྣམ་ངེས་ཞིབ་རྒྱས། ཡོན་ཏན་མཛོད། རྒྱུད་བླ་ཞིབ་བཤད། རོང་ཊཱི་ཀ་སྟེང་ནས་འབྱེད་རྣམ་གཉིས་བཤད་པ། དྲུང་རིན་པོ་ཆེ་ལས་འཇམ་མགོན་བློ་གྲོས་མཐའ་ཡས་ཀྱི་རྒྱུད་བླའི་འགྲེལ་པའི་སྟེང་ནས་བཤད་ཁྲིད། འཇུ་དབོན་ཨ་བྷཱ་ཡ་ལས་སྤྱོད་འཇུག་གི་བཤད་པ། དགེ་མང་མཁན་ཀུན་བཟང་དཔལ་ལྡན་ལས་དབུ་མ་རྩ་འཇུག མངོན་པར་མཛོད། དབུ་མ་རྒྱན། རྒྱུད་བླ་མ་མི་ཕམ་རིན་པོ་ཆེའི་མཆན་ཊཱི་ཀ ཡིད་བཞིན་མཛོད་སོགས་གཞུང་ཤིན་ཏུ་མང་པོའི་བཤད་ཁྲིད། བླ་མ་གྲགས་རྒྱལ་ལས། ཉིད་མཛད་བཟང་སྤྱོད་ཊཱི་ཀ མཁན་བསམ་གཏན་བློ་གྲོས་ལས། མ་ཏིའི་འཇམ་དཀར། བོ་དོང་དབྱངས་ཅན། ས་འཇམ་སྦག་སྒྲུབ། ཉེ་སྲས་སྒོམ་ལུང་རྣམས་དང་དྲུང་རིན་པོ་ཆེ་ལས་ཟབ་མོ་ནང་དོན་རང་འགྲེལ། རི་ཆོས་ངེས་དོན་རྒྱ་མཚོ། དྭགས་པོའི་བཀའ་འབུམ། འཇའ་ཚོན་པོད་དྲུག་གི་ལུང་རྣམས་གསན། ཀུན་མཁྱེན་མི་ཕམ་རིན་པོ་ཆེ་ལས། འཇམ་དཔལ་ཚེ་བདག་གི་བསྙེན་སྒྲུབ་གྲོལ་སྐབས་དངོས་གྲུབ་ལེན་ཆོག་རྗེ་འདི་ལའང་སྩལ་པ་དང་། འཇམ་དཔལ་རྫོགས་ཆེན་སྐོར་དང་། བཀའ་བརྒྱད་སྤྱི་དོན། མཁས་འཇུག་སོགས་རྗེ་བླ་མ་ཉིད་ཀྱིས་མཛད་པའི་བསྟན་བཅོས་རྣམས་ཀྱི་བཤད་ལུང་དང་། མདོ་སྔགས་ཀྱི་གཞུང་དོན་དཀའ་གནད་དོགས་གཅོད། ཉམས་བཞེས་སྐོར་གྱི་དོགས་སེལ་སོགས་གནང་ཞིང་། ཡང་དག་གསང་འགྲེལ་སོགས་གསུང་གནད་གལ་ཆེ་རིགས་བཤད་ལུང་མཛད་མ་ཐུབ་པ་དུ་མའི་གཏད་རྒྱ་བྱིན་རླབས་སོགས་གནང་བས་ཆེས་ཆེར་བཀའ་དྲིན་ཆེ་བའི་བླ་མ་འཇམ་མགོན་རྣམ་གཉིས་དང་ངོས་མཉམ་པའི་དད་མོས་མཛད། རྗེ་དེ་ཉིད་ཀྱི་ཉེ་གནས་ཐེག་པ་མཆོག་གི་རྣལ་འབྱོར་པ་འོད་གསལ་དང་མཁན་ཀུན་དཔལ་གཉིས་ཀ་ལས་ཀུན་གཟིགས་མི་ཕམ་རིན་པོ་ཆེའི་བཀའ་འབུམ་དུ་བཞུགས་སོ་འཚལ་ཐམས་ཅད་གསན། འཁོར་ལོའི་མགོན་པོ་རབ་འབྱམས་ལྔ་པ་འགྱུར་མེད་པདྨ་ཐེག་མཆོག་བསྟན་པའི་རྒྱལ་མཚན་ལས་དབུ་ལུགས་སེམས་བསྐྱེད་དང་། ངལ་གསོ་སྐོར་གསུམ་སོགས་དང་། འདོད་བུམ་དབང་ལུང་། སེམས་ཀློང་གི་དབང་ཁྲིད་ལུང་། ན་རག་དོང་སྤྲུགས། སྒྱུ་འཕྲུལ་ཞི་ཁྲོ། གཤེད་དམར་རྣམས་ཀྱི་དབང་ལུང་གཙོས་ཤིན་ཏུ་མང་པོ་དང་། དཔལ་ཡུལ་རྒྱ་སྤྲུལ་རིན་པོ་ཆེ་ཀུན་བཟང་མདོ་སྔགས་བསྟན་འཛིན་ལས་ཀར་གླིང་ཞི་ཁྲོའི་དབང་ལུང་ཁྲིད་གསུམ་དང་། མ་ཎི་བཀའ་འབུམ། རཏ་ཕུར། མ་ཏི་རཏྣའི་སེང་གདོང་མའི་དབང་ལུང་སོགས་གསན། ཀཿཐོག་སི་ཏུ་པཎ་ཆེན་ལས་དྲི་མེད་རྣམ་གཉིས་དབང་ལུང་། མཁན་དཀོན་མཆོག་འོད་ཟེར་ལས་ཁྲིད་ཡིག་ཀུན་བཟང་བླ་མའི་ཞལ་ལུང་། དགེ་མང་མཁན་ཡོན་ཏན་རྒྱ་མཚོ་ལས་གསང་འགྲེལ་ཕྱོགས་བཅུ་མུན་སེལ་དང་སྤྱི་དོན་འོད་གསལ་སྙིང་པོའི་རྒྱས་བཤད། མཁས་དབང་རྨེ་རུ་ཆོས་འགྲུབ་ལས་ཉིད་མཛད་བདེ་སྨོན་དང་། གང་བློ་མའི་འགྲེལ་བཤད་རྣམས་གསན། མཁན་པད་རྡོར་ལས་ཉིད་མཛད་མང་ཤས་ཀྱི་བཀླག་ལུང་། དཔལ་སྤྲུལ་རིན་པོ་ཆེ་འཇིགས་མེད་ཆོས་ཀྱི་དབང་པོ་ལས་འཇམ་དཔལ་མཚན་བརྗོད་ཀྱི་བཤད་ལུང་སོགས་དང་བསླབ་བྱ་རྒྱ་ཆེར་སྩལ། འབར་ཆུང་མཆོག་སྤྲུལ་ཐུབ་བསྟན་དགེ་ལེགས་དཔལ་བཟང་ངམ་རྡོ་རྗེ་བདེ་གཤེགས་རྩལ་ལས་ལུང་ཨ་ནུ་ཡོ་ག་ཚོགས་ཆེན་འདུས་པའི་ཐེག་དགུའི་དབང་ཆེན་གསན། རྒྱལ་བཀའ་རིན་པོ་ཆེའི་བཀླག་ལུང་ཡོངས་རྫོགས་སྐྱབས་རྗེ་རབ་འབྱམས་ལྔ་པ་དང་། ཁྲོ་ཤུལ་མཁན་ཆེན་ཚུལ་ཁྲིམས་རྒྱ་མཚོ་བཅས་ཀྱི་ཞལ་སྔ་ནས་ལན་གཉིས་ཀྱི་བར་དུ་གསན་པ་སྟེ། དེ་རྣམས་ནི་གསན་ཡིག་ལས་ཆེ་ལོང་ཙམ་དུ་བཀོད་པ་དང་། མདོར་ན་རྗེ་བླ་མ་འདི་ནི་ཐོས་པས་ཆོག་ཤེས་དང་ངོམས་པ་མེད་ཅིང་། གང་ན་རྒྱུན་རྣམ་པར་དག་པ་བཞུགས་པའི་ཐུགས་ངེས་འབྲངས་ཕྱིན་མཚན་གྱི་སྙན་པ་ཆེ་བ་དང་། གོ་ས་མཐོན་པོ་དང་། བཟང་པོར་གྲགས་པ་མིན་ཀྱང་། བསྟན་པའི་རྒྱུན་ལ་ཕན་པར་དགོངས་ནས་ལེགས་པར་བཏུད་ཅིང་གསན་བཞེས་གནང་བ་སྟེ། ཆོས་ཀྱི་རྗེ་ས་པཎྜི་ཏས། ལེགས་བཤད་བྱིས་པ་དག་ལས་ཀྱང་། །མཁས་པ་རྣམས་ཀྱིས་ལེན་པར་བྱེད། །དྲི་ཞིམ་བྱུང་ན་རི་དྭགས་ཀྱི། །ལྟེ་བ་ལས་ཀྱང་གླ་རྩི་ལེན། །ཞེས་པའི་དོན་ལ་ཐུགས་གཞོལ་བས་ཐོས་པ་རྒྱ་མཚོའི་ཕ་རོལ་དུ་སོན་པ་ཡིན་ཅིང་། གཞན་དུ་ན་ཐོས་ཉུང་ཅུང་ཟད་ཙམ་གྱིས་ཆོག་ཤེས་པ་ནི་རང་ཕྱོགས་སུ་ལྷུང་བས་བསྟན་པ་ཐམས་ཅད་འགལ་འདུར་འཆར་ནས་རྨོངས་པའི་མུན་ནག་ཆེན་པོར་འཕྱན་ཏེ་ཕྱོགས་རེའི་མིག་ཅན་གཡག་ཞར་གྱི་རྩྭ་ཟོས་པ་ལྟ་བུ་ལས་འབྱུང་བར་མི་འདུག་ཅིང་། མདོ་རྒྱུད་ནས་བསྟན་པའི་བཤེས་གཉེན་རྣམས་ཀྱི་མཚན་ཉིད་ཐམས་ཅད་ཚང་བའང་དེང་སང་སྙིགས་དུས་ན་ཨུ་དུམ་ཝཱ་ར་ལྟར་དཀོན་པས་དེ་ཕྱིར་རྒྱལ་བསྟན་རིས་མེད་པའི་ལུང་གི་ཆོས་ལ་འཆད་ཉན་གྱི་གཟུགས་བརྙན་ཡོད་པ་རྣམས་ཀྱི་རྒྱུན་མི་གཅོད་པར་རྗེ་བླ་མ་འདི་ཉིད་ཀྱི་རྣམ་ཐར་བཞིན་ཐོས་བསམ་ཕྱོགས་མེད་དུ་མཛད་པར་རིགས་སོ། །དེ་ལྟར་མང་དུ་ཐོས་པ་ནི་ནོར་རྣམས་ཀྱི་མཆོག་ཡིན་པ་དང་། ཕྱི་ནང་གི་གྲུབ་མཐའ་ཤེས་པས་བླང་དོར་གྱི་དམིགས་ཕྱེད། ཚུལ་ཁྲིམས་ཀྱི་བསླབ་པ་ཐོས་པས་དོན་མེད་གཡེང་བ་སྤོང་། ཤེས་རབ་ཀྱི་བསླབ་པ་ཐོས་པས་ཟག་ཟད་ཀྱི་མྱང་འདས་ཐོབ་པར་བྱེད་པ་ཡིན་ཏེ། འཕགས་པ་ཀླུས། ཤེས་རབ་རྒྱས་བྱེད་པ་ནི་ཐོས་པ་སྟེ། །དེ་དང་བསམ་པ་གཉིས་ནི་ཡོད་གྱུར་ན། །དེ་ལས་བསྒོམ་པ་ལ་ནི་རབ་ཏུ་སྦྱོར། །དེས་ནི་དངོས་གྲུབ་བླ་ན་མེད་པ་འབྱུང་། །ཞེས་དང་ལུང་རྣམ་འབྱེད་ལས། མང་དུ་ཐོས་པ་ལ་ཕན་ཡོན་ཡོད་དེ། ཕུང་པོ་ལ་མཁས་པ་དང་། ཁམས་ལ་མཁས་པ་དང་། སྐྱེ་མཆེད་ལ་མཁས་པ་དང་། རྟེན་ཅིང་འབྲེལ་བར་འབྱུང་བ་ལ་མཁས་པ་དང་། དེའི་གདམས་ངག་དང་རྗེས་སུ་བསྟན་པ་གཞན་ལ་རག་མ་ལས་པ་ཡིན་ནོ། །ཞེས་སོགས་ཕན་ཡོན་མཐའ་ཡས་པ་དང་། འཇིག་རྟེན་པའི་རིགས་གཟུགས་ལང་ཚོ་དཔལ་འབྱོར་གྱི་ནོར་རྣམས་ནི་བསོག་བསྲུང་དཀའ་ཞིང་ཚེ་འདི་པ་ཙམ་ལས་ཕྱི་མར་ཕན་པ་ཅུང་ཟད་ཀྱང་མེད་ལ་མྱུར་དུ་འཛད་པ་དང་བཅས་པ་ཡིན་པས། དེང་དུས་ཀྱི་བསྟན་འཛིན་སྐྱེས་བུར་གྲགས་པ་བདག་དང་བདག་འདྲ་ཁ་ཅིག་ནི་སྐུ་སྐྱེ་དེའི་མིང་དང་གོ་ས་ཐོབ་ཐང་རིགས་རུས་ཀྱིས་སྙེམས་ཤིང་། གསེར་དངུལ་གྱི་མཆོད་ཆ་ངོམ་ནས་དར་ཟབ་ཀྱིས་ཀླུབ་པ་ཙམ་ལ་སྙིང་པོར་བྱེད་པ་རྣམས་ལ་དཔག་ན་བདག་ཅག་གི་དཔལ་ལྡན་བླ་མ་དམ་པའི་ངང་ཚུལ་ནི་དངུལ་ཆུ་ས་ལ་ལྷུངས་ཀྱང་རྡུལ་གྱིས་མ་གོས་པ་བཞིན་དུ། དགེ་བའི་བཤེས་གཉེན་བསྟེན་པ་དང་། ལུང་གི་ཡོན་གྱིས་རྒྱུད་ཕྱུག་ཅིང་རྟོགས་པའི་གོ་འཕང་མཐོན་པོར་གཤེགས་ཀྱང་ཉམ་ཆུང་སྦས་པའི་ཚུལ་དུ་ཁེངས་པ་བསྐྱུངས་ཏེ་སྤྲོས་པའི་ཀུན་རྟོག་ཐུགས་ལ་མི་མངའ་བར་བཞུགས་པ་ལ་རྨོངས་པ་རྡོལ་ཐབས་སུ་སྨྲ་བ་ཁ་ཅིག་གིས་བླུན་པོར་རྩི་ཡང་། བློ་གྲོས་དང་ལྡན་པས་དཔྱད་ན་སྙིགས་དུས་ཀྱི་ཐམས་ཅད་མཁྱེན་པ་ཞེས་མཚན་གྱི་མངའ་འབུལ་ཀྱང་དོན་ལ་ངེས་པར་གནས་ཤིང་། དེ་ལྟར་ཆོས་ཀྱི་རྒྱལ་པོ་མཁས་གྲུབ་ཀུན་གྱི་གཙུག་རྒྱན་དུ་གྱུར་པ་ཉིད་ཟབ་དང་རྒྱ་ཆེའི་གཞུང་ལ་སྐྱེས་ཐོབ་དང་སྦྱངས་སྟོབས་ཀྱིས་ཐོས་བསམ་མཐར་ཕྱིན་པ་ལས་ཡོན་ཏན་གྱི་དཔལ་ཐམས་ཅད་ངང་གིས་འབྱོར་པ་སྟེ། ཇི་སྐད་དུ། ཡོན་ཏན་ཡོད་ན་རྒྱལ་བའི་གོ་འཕང་དང་། །སྐྱེ་དགུ་མངོན་པར་འདུ་བའང་ཐོབ་པར་འགྱུར། །ལྷ་དབང་དཔལ་ཡང་ཡོན་ཏན་ལ་ལྟོས་ཏེ། །ཡོན་ཏན་ཡོད་ན་ཕ་རོལ་མགུ་བར་འགྱུར། །གྲགས་པ་རྣམས་ཀྱང་ཡོན་ཏན་ཉིད་ལས་འཕྲོ། །བདག་ཉིད་ཆེ་བའང་ཡོན་ཏན་ལྡན་ལས་འབྱུང་། །ཟླ་འོད་ལས་ཀྱང་གསལ་བའི་ཡོན་ཏན་གྱིས། །དགྲ་བོ་མི་བཟད་དྲེགས་ཤིང་སྡང་བ་དང་། །འཁོན་རྙིང་ཡོད་ཅིང་ཕྲག་དོག་ཆེ་བ་དག །ཡིད་ནི་རབ་ཏུ་དྭངས་ཤིང་མགུ་བྱེད་དོ། །ཞེས་འབྱུང་བ་ལྟར་འཇིག་རྟེན་དང་། འཇིག་རྟེན་ལས་འདས་པའི་མཆོག་ཐམས་ཅད་ཀྱི་རྟེན་གཞི་ཡིན་ནོ། །དེ་ལྟར་ཐོས་པ་རྣམས་ཀྱང་ཡང་ནས་ཡང་དུ་འདྲིས་ཤིང་གོམས་པར་མཛད་ཅིང་བསམ་བྱུང་གི་ཤེས་རབ་ཀྱིས་ཚིག་དོན་གྱི་ཆ་ཐམས་ཅད་ཚད་མ་གསུམ་དང་། རིགས་པ་བཞི་དང་མི་འགལ་བར་དཔྱད་ཅིང་ངེས་ཤེས་ཁྱད་པར་ཅན་དྲངས་པས་མདོ་སྔགས་རིག་གནས་དང་བཅས་པའི་དཀའ་བའི་གནས་གང་ལའང་ཐེ་ཚོམ་གྱི་དྲྭ་བ་ཆོད་ཅིང་། གཞན་དུ་དཀྲི་བར་མི་གཏུབ་པའི་ཟབ་མོའི་དོན་ལ་གདེང་ཁྱད་པར་ཅན་རྙེད་པ་ནི་རྗེ་བླ་མ་ཉིད་ཀྱི་བསྟན་བཅོས་རྣམས་ལ་ཕྱོགས་ལྷུང་གི་དྲི་མ་སྤངས་ཏེ་དད་གུས་དང་ལྡན་པས་མཇལ་ན་ཤེས་པར་འགྱུར་བ་ཉིད་ལས་མང་དུ་སྨྲོས་པའི་ངལ་བ་མི་དགོས་སོ། །གཙུག་ནོར་དམ་པ་གོང་དུ་མདོ་ཙམ་སྨྲོས་པ་དེ་རྣམས་ལས་མཆོག་ཏུ་བཀའ་དྲིན་ཆེ་བ། འཇམ་མགོན་རྣམ་གསུམ་ལ་མཁྱེན་རྟོགས་ཆེ་ཆུང་གི་དབྱེ་བ་དང་། གུས་འདུད་ཆེ་ཆུང་མི་མཛད་ཀྱང་གཉུག་མ་ཡེ་ཤེས་རྡོ་རྗེའི་རང་ཞལ་མངོན་སུམ་ངོ་སྤྲོད་པའི་མཐར་ཐུག་ངེས་པ་དོན་གྱི་རྩ་བའི་བླ་མ་སྐྱབས་ཀུན་འདུས་ཞལ་ཆེན་པོ་ནི། བཻ་རོ་དངོས་སྣང་འཛམ་གླིང་ཆོས་ཀྱི་ཤིང་རྟ་ཆེན་པོ་འཆི་མེད་བསྟན་གཉིས་གཡུང་དྲུང་གླིང་པའམ་པདྨ་གར་དབང་བློ་གྲོས་མཐའ་ཡས་ཕྲིན་ལས་འགྲོ་འདུལ་རྩལ་ཡིན་པར་འདུག་པའང་ཞར་བྱུང་དུ་སྨྲས་སོ། །དེ་སྐད་དུ་ཡང་རྣམ་ཐར་གསོལ་འདེབས་ལས། ཆོས་ཀུན་བསླབ་པ་ཙམ་གྱིས་ཐུགས་སུ་ཆུད། །སྐྱེས་ཐོབ་སྦྱོར་བྱུང་ཤེས་རབ་ཕུན་སུམ་ཚོགས། །ཇི་ལྟ་ཇི་སྙེད་གཟིགས་པ་རྣམ་དག་པས། །འཇམ་དཔལ་གཞོན་ནུར་གྱུར་ལ་གསོལ༴ ངེས་འབྱུང་ཚུལ་ཁྲིམས་བསླབ་པར་བརྟེན་བཅས་ཤིང་། །གཞན་ཕན་བྱང་ཆུབ་སེམས་ཀྱིས་ཐུགས་རྒྱུད་གཏམས། །སྣོད་བཅུད་དག་མཉམ་དབྱེར་མེད་ཆེན་པོར་བསྡོམས། །སུམ་ལྡན་རྡོ་རྗེ་འཛིན་པར་གསོལ༴ རིགས་བདག་དགེ་བའི་བཤེས་ཀྱི་ཞབས་པད་ལ། །མཉེས་པ་གསུམ་གྱིས་སྐྱོ་ངལ་མེད་པར་བསྙེན། །ཕྱི་ནང་རིག་གནས་མདོ་སྔགས་བཀའ་གཏེར་གྱི། །ཆོས་ཚུལ་རྒྱ་མཚོར་འཇུག་ལ༴ ཁྱད་པར་འཇམ་དཔལ་གཞོན་ནུ་སྙིགས་དུས་སུ། །དཔལ་ལྡན་བླ་མའི་རྣམ་ཐར་རོལ་པ་ཡི། །འདྲེན་མཆོག་མཚུངས་མེད་རྣམས་ལས་ཟབ་རྒྱས་ཀྱི། །གདམས་པའི་བཅུད་མཆོག་བཞེས་ལ༴ རང་གནས་ཡེ་ཤེས་རྡོ་རྗེའི་རང་ཞལ་ནི། །དགོངས་བརྒྱུད་འཕོ་བ་ཐོབ་པའི་རྟེན་འབྲེལ་གྱིས། །རང་ཞལ་ལྷུག་པའི་ངང་དུ་མངོན་སུམ་མཇལ། །ཆོས་ཀུན་དེ་ཉིད་རྟོགས་ལ་གསོལ༴ ཡོངས་འཛིན་དགེ་བའི་བཤེས་ཀྱི་ཞལ་སྒོ་ལས། །ཐོས་པའི་དོན་ལ་བསམ་པས་སྒྲོ་འདོགས་བཅད། །ཇི་བཞིན་བསྒོམས་པས་ཤེས་བྱའི་གཏིང་མཐའ་དཔོག །ཟག་མེད་ཤེས་རབ་རྡོལ་ལ༴ ཞེས་པས་དོན་བསྡུ་བའོ། །རྒྱ་ཆེན་ཤེས་བྱའི་མཁའ་ལ་སྐྱེས་སྦྱངས་ཤེས་རབ་མཁྱེན་གསུམ་རྩལ་རྫོགས་པའི། །སྨྲ་བའི་དབང་ཕྱུག་གདོང་ལྔ་དེ་ནི་བསླབ་གསུམ་ལུས་སྟོབས་རབ་རྒྱས་པས། །རྩལ་གྱིས་མཆོངས་པའི་ཤུགས་ཆེན་གཅིག་གིས་འཁོར་འདས་ཤེས་བྱའི་རླབས་རྒྱ་གཅོད། །འདི་ནི་འཇམ་དཔལ་སྨྲ་བའི་སེང་གེ་དངོས་སམ་དེ་ཡི་སྤུན་ཟླར་གྲགས། །ཆོས་ཚུལ་མང་དུ་ཐོས་པས་མི་ངོམས་ལན་ཚྭའི་ཆུ་བཞིན་ཡང་ཡང་བཞེས། །ཆ་ཤས་ཐོས་པའི་ནོར་ལྡན་ལས་ཀྱང་རང་གི་འདོད་པ་དང་དུ་བླངས། །ལུང་གི་ཡོན་ཏན་རྒྱ་མཚོའི་གཏེར་མཛོད་སྙིགས་དུས་ཁྱེད་འདྲ་གཞན་མ་མཆིས། །བུང་བས་རྩི་བཞིན་ཐུགས་རྒྱུད་དམ་པའི་ཆོས་ཀྱི་ནོར་བུའི་སྒྲོམ་དུ་གྱུར། །དེ་ལྟར་ཡོན་ཏན་ཚོགས་རྣམས་ཀྱང་། །བརྗེད་ངས་རྐུན་བུས་མ་ཕྲོགས་ཤིང་། དཔེ་ནག་སྟེང་དུ་མ་ལུས་པར། །ཐུགས་དབྱིངས་ཟབ་མོར་ཟུབ་མེད་བྲིས། །རང་ཉིད་ལྷག་པར་འདོད་པ་དང་། །གཞན་དག་ཁྱད་གསོད་ཕྱིར་མིན་ཅིང་། །བཀའ་དང་བསྟན་བཅོས་ལས་འབྱུང་བཞིན། །ཐོས་པ་དོན་ཡོད་ཉིད་དུ་བྱས། །ཁྱད་པར་ངེས་དོན་སྙིང་པོའི་བཞུགས་ཚུལ་གྱི། །ཕྱིར་མི་ལྡོག་པ་སེང་གེའི་སྒྲ་བསྒྲགས་པ། །དེང་དུས་ཀུན་མཁྱེན་བླ་མ་མཆོག་ཉིད་ལས། །གཞན་པ་སུ་ཞིག་མཐོང་ཐོས་མ་གྱུར་ཏོ། །རྒྱལ་བའི་ཡུལ་འདི་ལ་མོས་སྐྱེས་བུ་དེ། །སངས་རྒྱས་ཡོན་ཏན་ཚོགས་ཀྱི་སྣོད་གྱུར་དང་། །ཡོན་ཏན་རྣམ་བཅུ་ཐོབ་པར་རྒྱལ་བས་གསུངས། །དེས་ན་འདི་འཛིན་སྐྱེས་བུ་འཕགས་ཆེན་དངོས། །ཞེས་བར་སྐབས་ཀྱི་ཚིགས་སུ་བཅད་པའོ། །ད་ནི་ཐོས་བསམ་མཛད་པའི་གྲུབ་དོན་སྒོམ་པ་ཇི་ལྟར་ཛད་པའི་ཚུལ་མདོར་བསྡུས་སུ་གླེང་བར་བྱ་སྟེ། དེ་ཡང་ཟླ་བ་སྒྲོན་མེའི་མདོ་ལས། རབ་ཏུ་བྱུང་བས་ཆོས་སྤྱོད་ཅི་འདྲ་བར། །ཟས་དང་གོས་དང་དེ་བཞིན་སྐོམ་རྣམས་དང་། །མེ་ཏོག་སྤོས་དང་ཕྲེང་བ་རྣམས་ཀྱི་ནི། །ཁྱུ་མཆོག་རྒྱལ་བ་བསྙེན་བཀུར་བྱས་མི་འགྱུར། །གང་ཞིག་བྱང་ཆུབ་རབ་ཏུ་འདོད་བྱེད་ཅིང་། །འདུས་བྱས་ངན་པས་ཡིད་འབྱུང་སེམས་ཅན་གྱི། །དོན་དུ་དབེན་པར་ཕྱོགས་ཏེ་གོམ་བདུན་བོར། །འདི་ནི་དེ་བས་བསོད་ནམས་ཁྱད་པར་འཕགས། །ཞེས་དང་། དེ་ཁོ་ན་ཉིད་བསྟན་པའི་མདོ་ལས། ཤཱ་རིའི་བུ། གང་གིས་བསྐལ་པ་གཅིག་གི་བར་དུ་ཉན་པ་བས། གང་གིས་སེ་གོལ་གཏོགས་པ་ཙམ་ཅིག་ཏུ་དེ་ཁོ་ན་ཉིད་ཀྱི་ཏིང་ངེ་འཛིན་བསྒོམས་ན་བསོད་ནམས་འཕེལ་ལོ། །ཤཱ་རིའི་བུ་དེ་ལྟ་བས་ན། དེ་ཁོ་ན་ཉིད་ཀྱི་ཏིང་ངེ་འཛིན་འདི་གཞན་ལ་ནན་གྱིས་གདམས་པར་བྱའོ། །ཞེས་དང་། རྟོགས་པ་རྒྱས་པའི་མདོ་ལས། ཐང་ཅིག་བསམ་གཏན་ཐུན་ཞུགས་ན། །ཁམས་གསུམ་གང་བའི་མི་རྣམས་ལ། །སྲོག་སྦྱིན་པས་ནི་འདི་དོན་ཆེ། །ཞེས་གསུངས་པ་ལྟར་སྔོན་བྱོན་གྱི་འཕགས་བོད་མཁས་གྲུབ་རྣམས་དང་། འཇིག་རྟེན་གྱི་འདྲེན་པ་ཐུབ་པ་མཆོག་གིས་ཀྱང་ལོ་དྲུག་ཏུ་གཅིག་པུར་དཀའ་བ་སྤྱད་ཅིང་ཏིང་ངེ་འཛིན་ནི་སྒོམ་པར་མཛད་ནས་མཐར་བདུད་ཀྱི་སྡེ་བཏུལ་ཅིང་བྱང་ཆུབ་ཀྱི་སྙིང་པོར་གཤེགས་པ་ཡིན་ན། དབེན་པ་བསྟེན་ནས་ཡང་དག་པའི་དོན་ལ་སེམས་པར་ཅིའི་ཕྱིར་མི་བྱེད་དེ། ཐོབ་བྱ་མཐར་ཐུག་འགོག་པ་ཞི་བ་གྱ་ནོམ་ངེས་འབྱིན་གྱི་མཚན་ཉིད་ཅན་ཐེག་ཆེན་ལམ་གྱིས་བསྒྲུབས་པའི་རང་འབྲས་དམ་པ་མངོན་དུ་བྱེད་པ་ལ་བརྩོན་པ་བརྒྱ་གྱུར་དུ་སྐྱེ་བར་འོས་ཤིང་། སྐྱེས་རབས་ལས། མང་དུ་ཐོས་པ་སྙེེམས་པ་མེད། །འབྱོར་པ་རྣམས་ལ་སེར་སྣ་མེད། །ནགས་ཚལ་གནས་སུ་ཆོག་ཤེས་པ། །ཡོན་ཏན་རྒྱན་གྱི་མཆོག་ཡིན་ནོ། །ཞེས་པ་ལྟར་དཔལ་ལྡན་བླ་མ་དམ་པ་འདི་ཆོས་བརྒྱད་ཀྱི་བུ་མོའི་འདུ་འཛི་ལས་རིང་དུ་བྱོལ་ཞིང་ཕྱི་ནང་གི་རྒྱུ་འགྲུལ་དང་གླགས་འཚོལ་{གླག་ཅོར} གྱིས་དབེན་པའི་གནས་དམ་པར་སྒོ་གསུམ་དབེན་པར་བསྟེན་ཏེ་རྒྱུའི་ཐེག་པའི་བྱང་ཆུབ་སེམས་དཔའི་བློ་སྦྱོང་གི་སྐོར་བཀའ་གདམས་རིན་པོ་ཆེའི་གཞུང་དང་གསུང་སྒྲོས་མན་ངག་རྣམས་ལ་ཐུགས་དམ་གྱི་སྙིང་པོར་མཛད། ཚད་མེད་རྣམ་པ་བཞི་དང་འབྲེལ་བས་བདག་གཞན་མཉམ་པ་དང་། བརྗེ་བ། བདག་བས་གཞན་གཅེས་ཀྱི་ཐུགས་ལེགས་པར་འབྱོངས་ཤིང་། སྟོང་པ་ཉིད་དང་སྙིང་རྗེ་ཟུང་དུ་འཇུག་པའི་བྱང་ཆུབ་ཀྱི་སེམས་ཡིད་བཞིན་གྱི་ནོར་བུ་རིན་པོ་ཆེ་བཅོ་ལྔའི་ཟླ་བ་ལྟར་ཉམས་པ་མེད་པ་ཐུགས་རྒྱུད་ལ་བསྟར་བས་སྐུ་གསུང་ཐུགས་ཀྱི་མཛད་པ་ཕྲ་མོ་རེ་རེས་ཀྱང་གཟུགས་ཅན་དང་གཟུགས་མེད་ཀྱི་འགྲོ་བ་མང་པོ་ལ་དངོས་དང་བརྒྱུད་ནས་ཕན་པ་མཐའ་ཡས་པ་སྟེར་ཞིང་ཐར་པའི་ས་བོན་ཐེབས་པ་དང་། གསང་སྔགས་རྡོ་རྗེ་ཐེག་པ་ནི་དུས་གསུམ་ཀུན་ཏུ་འབྱུང་བར་དཀའ་སྟེ་དེ་དང་འཕྲད་པ་ནི་ཨུ་དུམ་ཝཱ་རའི་མེ་ཏོག་ལྟར་དཀོན་པ་དང་། རྒྱུད་དོན་ཚུལ་བཞིན་རྟོགས་ནས་སྨྲ་བར་བྱེད་པ་ལ། དེ་བཞིན་གཤེགས་པ་རྣམས་ཀྱི་ཕྱག་རྒྱ་རྒྱ་ཆེན་དམ་པའི་དབང་བསྐུར་བ་ཡོངས་སུ་རྫོགས་པ་དང་། རྡོ་རྗེའི་རིག་པ་འཛིན་པ་དེ་ནི་བྱང་ཆུབ་རྡོ་རྗེ་དང་མཚུངས་པར་བལྟ་བར་གསུངས་ཏེ། གསང་སྙིང་ལས། དེ་བཞིན་གཤེགས་པ་ཐམས་ཅད་ཀྱི། །ཕྱག་རྒྱ་གསང་ཆེན་སྙིང་པོ་འདི། །རྟོགས་ནས་སྨྲ་བར་གང་བྱེད་པ། །དེ་ནི་ང་ཡིན་དབང་ཡང་རྫོགས། །ཞེས་དང་གསང་བ་འདུས་པའི་རྒྱུད་ཕྱི་མ་ལས། གང་ཞིག་གཙོ་བོ་སྒྲུབ་པ་པོ་མཐོང་རེག་པ་དང་། །ལེགས་པར་དྲན་དང་མིང་ཙམ་ངེས་པར་ཐོས་པ་དང་། །དད་པར་བྱེད་ཅིང་ཕྱོགས་གཅིག་ཙམ་ཞིག་འཛིན་པ་དང་། །བྱང་ཆུབ་རྡོ་རྗེ་འདྲར་བལྟ་དེ་ལ་རྟག་ཕྱག་འཚལ། །ཞེས་འབྱུང་བ་ལྟར་དེ་བཞིན་གཤེགས་པ་ཀུན་གྱི་གསང་བ་དམ་པ་སྔགས་ཀྱི་ཐེག་པའི་ཡང་རྩེ་རྣལ་འབྱོར་བླ་མེད་ནང་རྒྱུད་སྡེ་གསུམ་གྱི་བསྐྱེད་བཟླས་རྫོགས་པའི་རྣལ་འབྱོར་གྱིས་དྭངས་མའི་སྒོ་གསུམ་རྡོ་རྗེ་གསུམ་དུ་གྲུབ་པར་བྱེད་པས་སྐུ་ཚེ་དེ་ཉིད་ལ་ཟུང་འཇུག་སྐུ་བཞིའི་དབང་ཕྱུག་དཔལ་ཧེ་རུ་ཀཿརྡོ་རྗེ་འཛིན་རྒྱལ་ཆེན་པོའི་ས་མཆོག་དམ་པར་གཤེགས་པའི་རྟགས་སྣང་མངོན་དུ་གྱུར་པ་སྟེ། དེ་ཡང་སྔ་ཕྱིར་བསྡོམས་པས་བགྲང་བྱ་ཉི་ཤུ་ལྷག་ཙམ་དུ་ལྷག་པའི་ལྷའི་བསྙེན་སྒྲུབ་དང་། མཚན་བཅས་མཚན་མེད་ཀྱི་ཐུགས་དམ་ལ་ཆིག་དྲིལ་དུ་བརྩོན་པ་ཆུ་བོའི་རྒྱུན་བཞིན་གནང་བ་སྟེ། ཏིང་འཛིན་རྒྱལ་པོ་ལས། ཆོས་འདི་བ སྒོམ་པར་མ་བྱས་ན། །ཆོས་ཉིད་མཐོང་བར་མི་འགྱུར་ཏེ། །ཆུ་བོ་མཐོང་དང་ཐོས་པ་ཡིས། །མ་འཐུངས་སྐོམ་པ་ཇི་ལྟར་སེལ། །ཞེས་དང་། གཙུག་གཏོར་ཆེན་པོའི་མདོ་ལས། བསྐལ་པ་མང་པོར་ཐོས་པ་དང་བསམ་པ་བས་ནི་ཉིན་གཅིག་ཆོས་ཉིད་ཀྱི་དོན་བསྒོམས་པས་བསོད་ནམས་ཆེའོ། །དེ་ཅིའི་ཕྱིར་ཞེ་ན། དེས་སྐྱེ་འཆིའི་ལམ་དང་རིང་དུ་བྱེད་པའི་ཕྱིར་རོ། །ཞེས་སོགས་རྒྱ་ཆེར་འབྱུང་བ་ལྟར། ཁམས་གསུམ་གྱི་ཟག་པ་དང་ཀུན་སྦྱོར་གྱི་འཆིང་བ་དང་། ཆོས་ཉིད་ཀྱི་གནས་ལུགས་ལ་མཚན་འཛིན་ཤེས་བྱའི་སྒྲིབ་པ་ཀུན་གཞིའི་བག་ཆགས་སྣང་གསུམ་འཕོ་འགྱུར་གྱི་སྒྲིབ་པ་ཐམས་ཅད་ཤིན་ཏུ་རྣམ་པར་དག་པ་ཡེ་ཤེས་ཀྱི་སྐུ་མཚན་མ་མེད་པ་ཟག་མེད་རྡོ་རྗེའི་སྐུ་མཆོག་མངོན་དུ་བྱེད་པ་ནི་ནང་དུ་ཡང་དག་འཇོག་པ་ལས་བྱུང་བ་ཡིན་ཏེ། ཇི་སྐད་དུ། ཅི་འདྲ་བ་ཡི་ལས་བྱས་ན། །རྣམ་པར་སྨིན་པ་དེ་འདྲར་འགྱུར། །ཅེས་པ་ལྟར་ཁམས་དྲུག་ལྡན་གྱི་རྟེན་འདི་ནི་རྡོ་རྗེ་ཐེག་པའི་ལམ་གྱི་རྟེན་ཆེས་ཁྱད་པར་དུ་འཕགས་ཤིང་། སྦྱང་གཞི་སྦྱང་བྱ་སྦྱོང་བྱེད་གནད་དུ་སོང་བ་ལས་སྦྱངས་འབྲས་མངོན་དུ་གྱུར་པ་དབང་པོ་རབ་དད་བརྩོན་མཆོག་དང་ལྡན་པ་ལ་མཐོང་བའི་ཆོས་ལ་མྱོང་བར་གྱུར་པས་ཏེ་རིག་འཛིན་གྲུབ་པ་རྒྱ་མཚོའི་འཁོར་ལོས་སྒྱུར་བ་སྟེ། དེང་གི་དུས་ན་དཔལ་ལྡན་བླ་མ་དམ་པ་འདི་ལྟ་བུ་ཤེས་པར་བྱ་ཡི། གཞན་དུ་ཐོས་པ་ཅུང་ཟད་ཀྱང་མེད་ཅིང་བླུན་སྒོམ་མུན་པའི་གཏིང་རྡོ་ཡིད་ལ་བྱེད་པས་གཏི་མུག་གི་མུན་པ་ཆེས་ཆེར་འཐིབ་པ་དང་། ལ་ལ་དག་མང་དུ་ཐོས་ཀྱང་སེམས་ཐོག་ཏུ་མ་ཁེལ་ཞིང་པྲ་ཡས་པས་ཆོས་དང་གང་ཟག་ལ་རྒྱབ་གྱེས་ཏེ་ལས་མཐའ་ལོག་པའམ། ཡང་ན་དུག་ལྔ་འཁྲུག་ཅིང་དག་སྣང་ཅུང་ཟད་ཀྱང་མེད་པ་གྲུབ་མཐའི་གདོན་ཆེན་པོས་ཟིན་ཏེ་ཆོས་སྤངས་པའི་ལས་ཚབས་པོ་ཆེ་ལ་ཞུགས་པ་དང་། བདག་འདྲ་འགའ་ཞིག་ནི་བསྙེན་སྒྲུབ་བྱེད་པ་ཡིན་ཟེར་རྣམ་རྟོག་རྒྱ་འབྱམས་ཀྱི་དབང་དུ་ཤོར་ཏེ་ལྷ་སྔགས་ཏིང་འཛིན་གྱི་འཁོར་ལོར་མ་ཡེངས་པར་གནས་པ་ལྟ་ཞོག མོས་པ་ཙམ་ཡང་མི་བྱེད་པར་བཟླས་པའི་གྲངས་ཙམ་ལ་རྩིས་སུ་བྱས་ནས་ཕྲེང་རྡོག་མཛུབ་མོ་ཟད་ཟད་དུ་བགྲངས་པ་རྣམས་ལ་བལྟས་ན། རྗེ་འདིའི་སྒྲུབ་ཚུགས་དང་། དམ་བཅའི་སྙིང་སྟོབས་གང་ཐོག་མར་གཡར་དམ་བཅས་པ་དེ་ལས་ཅུང་ཟད་ཀྱང་མི་འདའ་བར་བསྐྱེད་བཟླས་ལ་ཉམས་བཞེས་རྒྱུད་ལུང་མན་ངག་རིག་འཛིན་གོང་མའི་ཕྱག་བཞེས་ལྟར་དུས་གྲངས་མཚན་མའི་བསྙེན་པ་ཚད་དུ་ཕྱིན་པ་གནང་བའང་། རྗེ་ཉིད་ཀྱི་གསུང་ལས། བདག་འདྲ་ཡུལ་དུས་བསྐལ་པ་ཆེས་དམན་ཡང་། །སངས་རྒྱས་དངོས་བྱོན་བཤེས་གཉེན་དུ་མ་ཡིས། །རྗེས་བཟུང་སྨིན་གྲོལ་བདུད་རྩི་མང་ཙམ་མྱོང་། །དེ་སླད་སྙིགས་མའི་དུས་མཐར་སྐལ་བཟང་སྙམ། །མི་ཚེ་ཕལ་ཆེར་གཡེང་བས་ཁྱེར་མོད་ཀྱི། །བཅུ་ལྷག་བགྲང་བྱར་བསྙེན་སྒྲུབ་བརྩོན་ཁུལ་བགྱིས། །ངེས་རྫོགས་ལམ་ལ་བརྟན་པ་ཐོབ་མིན་ཡང་། །མོས་སྒོམ་ཙམ་ལ་ཅུང་ཟད་འདྲིས་པར་བྱས། །ཞེས་སྔ་ཐོག་མཛད་པའི་གསུང་ཞིག་ལས་འབྱུང་བ་དང་། ཕྱིས་ལྕགས་བྱ་ལོ་ནས། མེ་སྟག་ལོར་མྱ་ངན་འདས་པ་ལ་ཐུག་གི་བར་དུ་ཟེ་ཆེན་རི་ཁྲོད་པདྨ་འོད་གླིང་གི་ཡང་དབེན་བདེ་མཆོག་བཀྲ་ཤིས་དགེ་འཕེལ་གླིང་དུ། ཕྱོགས་གཞན་དུ་བྱོན་པ་ལྟ་ཞོག་དགོན་དུའང་མ་ཕེབས་ཤིང་། དབང་ཆོས་ཀྱི་སྐབས་ཁ་ཤས་ལས་བཅད་རྒྱ་ཁོ་ནར་བཞུགས་པ་ཡིན་ལ། དེ་ལྟར་བཞུགས་པའི་སྐབས་རྣམས་སུ་སྒྲུབ་པའི་རྟགས་མཚན་བསམ་གྱིས་མི་ཁྱབ་པ་ཡོད་པ་གོར་མ་ཆགས་ཀྱང་སྔོན་གྱི་བཀའ་གདམས་པའི་རྣམ་ཐར་བཞིན། དམན་མོའི་ས་བཟུང་། ཧྲུལ་པོའི་གོས་གྱོན་གསུངས་པའི་དཔེ་ལྟར་ངེད་ནས་ཅིའང་མི་ཤེས་མི་གོ་ཞེས་ཐུགས་གཏིང་ནས་མི་མཁྱེན། མི་རྟོགས་པའི་ཚུལ་ཁོ་ན་གནང་བ་ལས། འགའ་ཞིག་གི་ཁ་ནས་མི་ཤེས་ཟེར་ཡང་དོན་ལ་ཐམས་ཅད་མཁྱེན་པར་ཞལ་གྱིས་འཆེས་པའི་རིགས་དེ་འདྲ་གཤིས་ལ་མི་གནས་པས་ནང་གི་ལམ་རྟགས་ཀྱི་སྒྲོས་ཙམ་ཡང་ཕྱི་ནང་སུ་ལའང་མི་གསུངས་ཤིང་བུམ་ནང་གི་མར་མེ་ལྟར་སྦས་ཤིང་རྒྱུན་བསྣམས་ལི་ཐོ་འགའ་ཞིག་ཏུ་དྷརྨ་གུ་ཎ་སོགས་རེ་ཟུང་ཕྱག་བྲིས་གནང་འདུག་པ་འདི་ཅི་ལགས་ཞེས་ཀོང་སྤྲུལ་ཡང་སྲིད་ནས་བཀའ་འདྲི་ཞུས་པས་བླ་མ་སོགས་རྨི་ལམ་དུ་མཇལ་བ་རེད་གསུངས་ཀྱང་འདི་ཞེས་སོ་སོར་ངེས་དཀྲིགས་ཅན་དུ་འོལ་ཚོད་ཀྱིས་ཡི་གེར་འགོད་མ་ནུས་ལ། དམིགས་བསལ་རྗེ་ཉིད་ནས་ཕྱག་ཐོར་བཏབ་པའང་འོག་ཏུ་འཁོད་པ་འདི་ཙམ་ལས་ཅིའང་མི་འདུག་ཤིང་། ངག་རྒྱུན་ཁུངས་མར། རྗེ་མི་ཕམ་རིན་པོ་ཆེ་ནས། ཁྱེད་ཕུར་པའི་གྲུབ་བརྙེས་ཀྱི་སྐྱེ་རྒྱུད་ལ་འདི་ནས་ཕར་བྱོན་ནས་ཕུར་པ་རྟགས་མ་རྫོགས་པར་སྒྲུབ་དགོས་རྟགས་ནམ་རྫོགས་ན་སྦྱིན་སྲེག་གྱིས་ཞེས་ཕེབས་བཞིན་བསྙེན་སྒྲུབ་གནང་བས་ལོ་གཅིག་ནས་རྟགས་མཚན་རྫོགས་ཏེ་སྦྱིན་སྲེག་གནང་ཞིང་། དེ་སྐབས་ཀྱི་ཕྱག་བྲིས་ཐོ་བཀོད་པར་ཉེ་གནས་པར་ལྐོག་མཇལ་བྱུང་བར། རྡོ་རྗེ་གཞོན་ནུའི་དཀྱིལ་འཁོར་ཡོངས་རྫོགས་ཀྱི་ཞལ་བསྟན་ཚུལ་དང་། ཉེ་གནས་པའི་རུས་པ་རྡུང་སྤྱད་ཀྱི་རྡོ་ཞིག་ཡོད་པ་ཞབས་ཀྱིས་འདམས་ལྟར་བརྫིས་པ་ཉེ་གནས་པས་བསྐུངས་ནས། ད་ལྟ་སྒྲུབ་ཁང་པདྨ་འོད་གླིང་གི་གྱང་ལོགས་སྦྱར་བའི་ཞབས་རྗེས་འདི་རྗེ་ཉིད་ཀྱི་འཁྲུལ་མེད་ཡིན་པ་ལ་སྦས་མ་ཐུབ་པ་མངོན་པར་གྱུར་ཀྱང་བླ་མ་གཞན་ཞིག་གི་རེད་ཅེས་ནན་གྱིས་གསུངས་པ་དང་། སྐྱབས་རྗེེ་རབ་འབྱམས་ལྔ་པ་དང་སྐུ་རྩེད་ཀྱི་ཚུལ་དུ་ཕྱག་སྨྱུག་ལ་མདུད་པ་མཛད་པ་དང་། ལྡུམ་བུ་གྲངས་བཀྱེ་མཛད་པ་དང་རྗེ་འདིས་རྡོ་རིལ་ཞིག་ཕྱག་གིས་དྲིལ་ནས་ཆངས་བུ་བཅངས་ཏེ་འདི་འདྲ་ཁྱེར་ཤོག་གསུངས་པ་སོགས་རླུང་སེམས་ལ་རང་དབང་ཐོབ་པའི་གྲུབ་པའི་རྟགས་མཚན་མངོན་སུམ་གྱུར་པ་དང་། དད་ལྡན་དག་གིས་ཞུས་པའི་གང་ཟག་སོ་སོ་ལ་གནང་བའི་ཞལ་གདམས་ཀྱང་མ་འོངས་པར་ཆོས་མཐར་ཕྱིན་མིན་སོགས་ཐམས་ཅད་ལྐོག་གྱུར་མངོན་སུམ་གཟིགས་པའི་ལུང་བསྟན་འབའ་ཞིག་ཏུ་སོང་བས། གནང་ཡུལ་དེའི་རྒྱུད་ཐོག་ཏུ་ཚད་མས་ཕབ་ཕྱིར་ཕྱིས་ངེས་ཤེས་ལྷག་པར་སྐྱེ་བའི་རྒྱུར་སོང་བས་མཚོན་དུས་གསུམ་སྒྲིབ་མེད་དུ་གཟིགས་ཤིང་། ཕྱིས་སེམས་ཅན་སྤྱི་མཐུན་གྱི་བསོད་ནམས་དམན་པ་དང་། ལྷག་པར་རྙིང་བསྟན་ལ་གེགས་ཆག་ཆེ་བས་ཟས་དུག་གིས་སྙུན་གྱིས་ཐེབས་པ་ན། རྩ་རླུང་འབྱོངས་པའི་ནུས་པས་སྐུ་དངོས་ལ་གནོད་པར་མ་ནུས་ཀྱང་སྙུན་རོ་ལྟ་བུས་འཕར་ལྡང་སྐབས། མི་ཕལ་པ་ཡིན་ན་མལ་སར་ལྷུང་བ་ལས་ཐབས་མེད་གྱུར་ངེས་ནའང་། བསྙུན་གྱི་རྣམ་པ་ཡེ་མི་མངའ་བའི་ཚུལ་གྱིས་ཞལ་ཏ་དང་སྐུ་རྩེད་བཞེས་པ་ལྟ་བུ་ཐུགས་སྤྲོ་སྤྲོ་ལྟར་མཛད་ནས་བཞུགས་ཤིང་། བསྙུན་དྲིས་ཞུས་པ་ན་དེ་ཙམ་དྲག ངེད་སྔོན་ལས་ཀྱི་ནད་སྨན་དཔྱད་ཀྱིས་བཅོས་རྒྱུ་མེད་འདྲ་ཞེས་བསྙུན་གཟུགས་ཡོད་པའི་ཚུལ་བསྟན། རང་ཉིད་གཅིག་པུར་བཞུགས་པ་ན་ཕལ་ཆེར་སྐུ་གཅེར་བུར་ལུས་གནད་དང་ལྡན་པར་བཞུགས་པ་དང་། བསམ་གཏན་གྱི་ཟས་ཀྱི་འཚོ་བས་དཀའ་སྤྱད་ཀྱི་གསོལ་ཆས་ཉུང་ཟད་ཙམ་ལས་མི་བཞེས་ཀྱང་སྐུ་མདོག་དཀར་ཞིང་སྐུ་ཤ་རྒྱས་པ། གཉེར་མ་མེད་ཅིང་། གཟི་མདངས་དང་ལྡན་པར་ཕྱིས་སྐུ་ན་སྨིན་པའི་དུས་སུའང་ཡོད་ཅིང་གང་དུ་བཞུགས་ཀྱང་ཚུལ་ཁྲིམས་ཀྱི་དྲི་བསུང་འཐུལ་བས་སྣོམ་ན་དགའ་བ་དང་། བཀའ་བཀྱོན་སོགས་གཏན་ནས་མི་གནང་ཡང་མཆོག་དམན་སུ་ཡང་ཟིལ་གྱི་གནོན་ཅིང་འགྲོགས་ན་བདེ་བ་དང་། དབང་དུས་ཡེ་ཤེས་འབེབས་པ་དང་ཁྱད་པར་རིག་པ་རྩལ་དབང་ལྟ་བུའི་སྐབས་དགོངས་པ་ལ་བཞུགས་པས་སྐུ་གནས་འགྱུར་ཅིང་སྐུ་ཟིལ་ལྷག་པར་བརྗིད་པས་ཐམས་ཅད་ཀྱི་ཐ་མལ་སྣང་ཤེས་རང་འགགས་སུ་འགྲོ་བ་བཅས་ཀུན་གྱི་མཐུན་སྣང་དུ་གྲུབ་པ་སྟེ། འདི་དག་ཀྱང་ནང་གི་གྲུབ་པའི་ཡོན་ཏན་ལས་བྱུང་བའི་རྟགས་མཚན་ཡང་དག་པའོ། །དེ་ཡང་རྗེ་བླ་མ་ཉིད་སྔར་ཞེ་ཆེན་རི་ཁྲོད་དུ་དཔལ་ཆེན་བཛྲ་ཀུ་མ་རའི་ལྗགས་བསྙེན་བཞུགས་སྐབས་ཐུན་མིན་གྱི་རྣམ་ཐར་ཕྱག་བྲིས་སུ་བཀོད་པ་ཚན་པ་ཁ་ཤས་ཉེ་གནས་པས་མཐོང་ཡང་རིང་པོར་མ་ཐོགས་པ་གོས་དཀར་མོའི་ཀློང་དུ་རྒྱས་བཏབ་པ་ལས། གསང་རྣམས་འདི་སྐོར་མགོ་ཚན་གཅིག་ཆབ་གསང་བྱོན་ཤུལ་ཉེ་གནས་པས་བརྐུས་ཏེ་སྦས་པ་ལས་འབྱུང་བ་རྗེ་ཉིད་ཀྱི་གསུང་ཉམས་པ་མེད་པ་བཀོད་པ་ལ་བླ་མ་ཡེ་ཤེས་མཁའ་འགྲོའི་གནང་བ་སྩལ་ཏུ་གསོལ། དེ་ཡང་འདི་ལྟར་འབྱུང་སྟེ། བླ་མ་དང་གཉིས་སུ་མེད་པའི་དཔལ་རྡོ་རྗེ་གཞོན་ནུ་ལ་ཕྱག་འཚལ་ལོ། །རིག་པ་ཡེ་ཤེས་ཀྱི་ཕུར་པ་ཆོས་ཀྱི་དབྱིངས་ལ་ཐེབས་པར་བྱིིན་གྱིས་རླབས་དུ་གསོལ། དེ་ཡང་དགའ་བ་ཡི་ལོ་སྨིན་དྲུག་གི་ཉ་བའི་དམར་ཕྱོགས་ཀྱི་རྫོགས་པ་དང་པོར་ལྷ་ཡི་བླ་མ་རྒྱལ་སར་ཕེབས་པའི་འཕྲོད་སྦྱོར་དགེ་བའི་ཉིན་སྒྲུབ་སྡེ་པདྨ་འོད་གླིང་དུ་ཁོ་བོ་ཨོ་རྒྱན་ཐུགས་མཆོག་རྡོ་རྗེས་བསྟན་འགྲོ་སྤྱིའི་ཞབས་འདེགས་སུ་དམིགས་ནས་རྒྱལ་ཀུན་ཕྲིན་ལས་གཅིག་ཏུ་བསྡོམས་པ་དཔལ་ཆེན་པོ་རྡོ་རྗེ་གཞོན་ནུའི་བསྙེན་སྒྲུབ་ཀྱི་མཚམས་ལ་ཞུགས། ཚེས་༢༤ཉིན་བླ་མ་རྒྱང་འབོད་བྱས། ཚེས་༢༦ཉི་དྲོོས་སུ་བསྡམས། འདི་སྐབས་ཕྱི་ཡི་འདུ་བ། ནང་གི་རྣམ་རྟོག གསང་བའི་ཉམས་སྣང་ཀུན་ཅུང་འཚུབ། ཉེར་དགུའི་ནུབ་རྨི་ལམ་དུ། ཕྱོགས་ཀུན་ནས་སྤྱང་ཀི་མང་པོས་ངུར་མོ་རབ་ཏུ་སྒྲོགས་ཤིང་། དེའི་ནང་ནས་སྤྱང་ཀི་ཤིན་ཏུ་ཆེ་བ་ཞིག་ཁང་སྟེང་དུ་མཆོངས་ནས་རེས་ངུར་མོ་དྲག་ཏུ་བྱེད། རེས་ང་རོ་སྒྲོགས། རེས་ཁྱི་ཟུག་བྱེད། རེས་གར་བྱེད། རེས་མཁའ་ལ་འཕྱོ། རེས་ལུས་ས་ལ་བརྡེག རེས་ས་འབྲད་པ་སོགས་འཇིགས་པའི་རྣམ་འགྱུར་སྣ་ཚོགས་བྱས་མཐར་ཁང་པའི་ནང་དུ་ཡོང་གྲབ་བྱེད་པ་ལ་དགག་སྒྲུབ་འཇིགས་སྣང་གང་ཡང་མ་བྱས་པར་ལྷོད་ཀྱི་གློད་ནས་བལྟས་པས་ཡལ་སོང་། ཡར་ཐོ་རེངས་ཁར་སྔར་གྱི་མཆོད་རྟེན་རྙིང་པ་ཞིག་པོ་ཞིག་སླར་ཁོ་བོས་ཞལ་གསོ་འདུག་པར་བུད་མེད་ཞིག་བྱུང་ནས་བརྩིགས་པའི་གྲོགས་དན་ལེགས་པོ་བྱས་ནས་བུམ་ལྟོ་བར་བརྩིག་དེ་ནས་ཁྱེད་རང་གིས་བརྩིགས་དང་རིང་པོར་མི་ཐོགས་པར་འགྲུབ་པར་འགྱུར་རོ་ཟེར་བ་རྨིས། མགོ་ཟླའི་ཚེས་གསུམ་ནས། རིག་འཛིན་བླ་མའི་བྱིན་རླབས། ཆོས་ཉིད་བདེན་པའི་ནུས་མཐུ། གསང་སྔགས་ཟབ་མོའི་བྱིན་འབྲས་བསླུ་མེད་ཀྱིས་ཕྱི་ནང་གི་རྐྱེན་དང་འཚུབ་སློང་རྣམས་དབྱིངས་སུ་ཞི་སྒོ་གསུམ་ཆོས་ཕྱོགས་ལ་ཅུང་བཀོལ་ཐུབ་པས་དགེ་སྦྱོར་ན་ཕྲན་བུ་འཕར་རོ། །འདི་ཡར་མར་ཉམས་རྨིས་འདྲ་མིན་སྣ་ཚོགས་བྱུང་ཡང་འདིར་མ་བྲིས་སོ། །འདིའི་བཅུ་བཞི་ནུབ་རྗེ་བླ་མ་ཀུན་གཟིགས་བློ་གྲོས་མཐའ་ཡས་མཇལ། ཨ་ཏི་རང་བྱུང་ཆེན་པོའི་ཉམས་ལེན་ལག་ཁྲིད་ཟབ་མོ། རིག་པ་རྩལ་གྱི་དབང་བཅས་ཐོབ་པ་རྨིས། བར་འདིར་མཆོག་སྤྲུལ་རིན་པོ་ཆེར་བསྙུན་གཞི་འབྱུང་ཚུལ་དང་། ཁྱིམ་ནས་ཁུ་རྒན་མ་འཚོ་བ་སོགས་ཀྱི་སེམས་ཚོར་ཟ་ཟི་བན་བུན་རྣམས་ཀྱང་བྱུང་། ཡང་སོར་མོའི་རྩེ་ནས་རཀྟའི་རྒྱུན་བབ་པས་ཐམས་ཅད་འཇིམ་པ་འབའ་ཞིག་ཏུ་སོང་། ཡང་རྗེ་བློ་གྲོས་མཐའ་ཡས་མཇལ། བླང་དོར་བསླབ་སྟོན་མང་། ཡང་ཚིགས་སུ་བཅད་པ་འགའ་ཞིག་ཀྱང་ཐོས། ཆུ་སྦྲུལ་གྲོ་བཞིན་ཅན་གྱི་ཉེར་དྲུག་ནུབ་དམ་པ་རྒྱ་གར་ཡིན་ཟེར་བའི་སྐྱེ་བོ་ཕོ་མོ་མང་པོའི་དབུས་ན་ཨ་ཙ་ར་ནག་པོ་རས་རྐྱང་འཕྲག་ལ་བཀལ་བ་ཞི ག་དང་མཇལ། དབུ་རལ་ཐོར་ཅོག་ཏུ་འདུག སྨིན་དྲུག་ཟླ་བའི་ཚེས་གསུམ་ནུབ་རྗེ་བླ་མ་གུ་ཎ་ས་ར་དང་མཇལ། ཐུགས་ཁ་ཤིན་ཏུ་གཤིན་པའི་གསུང་གླེང་མང་། ཚེས་བཞི་ནུབ་དཔལ་ཆེན་ཡང་དག་ཧེ་རུ་ཀའི་བསྒྲུབས་པ་བྱས་ན་བསྟན་འགྲོ་སྤྱིི་སྒེར་ཕན་པའི་ཡི་གེ་ཞིག་དང་། གཞན་བཀའ་ཤོག་གཅིག་བཅས་འབྱོར། ཞབས་དྲུང་རིན་པོ་ཆེའི་མདུན་ནས་རེད། དགོན་ལ་ཅུང་འཚུབ་པའི་ལྟས་དང་རིམ་གྲོ་འགའ་ཞིག་ཐོས། ཡང་ཁོ་བོས་དམག་དཔོན་བྱས་ཏེ། བྱང་ཕྱོགས་ཀྱི་ཡུལ་གྲུ་ཐམས་ཅད་བཅོམ། རྫོང་མཁར་ཐམས་ཅད་ཤུལ་མེད་དུ་བཤིགས། ཡུལ་འཁོར་སྲུང་ཡིན་ཟེར་བའི་མི་དཀར་པོ་ཞིག་གིས་ཞུམ་པའི་སྟབས་ཀྱིས་བཀའ་ནོད་པ་རྨིས། ཡང་ཁྱི་སྨྱོན་ནག་པོ་ང་རོ་འབྲུག་ལྟར་སྒྲོགས་པ། མ ཆེ་བ་གངས་རི་ལྟར་གཙིགས་པ། ནམ་མཁའི་རླུང་ནག་ལས་བང་མགྱོགས་པ་ཞིག་གིས་སྔར་ཡང་ཡུལ་ཁམས་མང་པོ་བརླག་ཟེར་བ་ཞིག་འཇིགས་པའི་གཟུགས་ཀྱི་ང་ཡི་ཟུར་དུ་བྱུང་བས་ང་ཡི་གྲོགས་ཕལ་ཆེར་བྲོས། ལ་ལ་སྔངས་ཤིང་འགའ་ཞིག་གིས་རྡོ་ཡིས་བརྡེག་པར་རྡོ་རྣམས་སིལ་བུར་འཐོར་ཏེ་ཐམས་ཅད་ཅི་བྱ་གཏོལ་མེད་དུ་གྱུར་པས་ཁོ་བོས་མ་འཇིགས་ཤིག་ཅེས་དབུགས་ཕྱུང་སྟེ། ཁྱི་སྨྱོན་དེ་ཁོ་བོ་རང་གིས་བསད་སྙིང་དེ་བཏོན་ཏེ་ལག་པ་གཡོན་དུ་ཐོགས་ཏེ་གར་བྱེད་པ་རྨིས། ཡང་ཡིད་དུ་མི་འོང་བའི་ཡུལ་ཁམས་ཞིག་ན་འབྲོག་དུད་སྐྱུག་བྲོ་བ་དུ་མའི་ནང་དུ་ཁོ་བོ་འདུག་པ་དེ་ལ་ཡིད་སྐྱོ་ནས་གཅིག་པུར་སོང་བས་བྲག་ངོ་ཁུང་དོག་པ་ལྕོང་རོང་དང་ངམ་གྲོག་སོགས་ཤིན་ཏུ་བགྲོད་དཀའ་བ་འབའ་ཞིག་བརྒྱུད་ནས་མཐར་ལ་གནམ་དུ་ཟུག་པ་ཞིག་ལ་འཛེག་པས། ལམ་བར་དུ་ཡུལ་དང་སྤང་ལྗོང་སོགས་མཆོག་དམན་སྣ་ཚོགས་འདུག་པའི་རྩེ་མོར། རྩྭ་རྣམས་རིན་ཆེན་བཻཌཱུཪྻ་ལྟར་སྔོ་བ་སྲིད་དུ་སོར་ལྔ་ཙམ་ཡོད་པ། ཕལ་གྱི་རྩྭ་ལྟ་བུ་མ་ཡིན་པ། འཇམ་ཞིང་མཉེན་པ། རེག་པ་ཙམ་གྱིས་བདེ་བ་སྟེར་ནུས་པ། མེ་ཏོག་རྣམས་རིན་པོ་ཆེ་གསེར་ལས་བྱས་པ་སོགས་ཕུན་སུམ་ཚོགས་པའི་གནས་ཞིག་ཏུ་ཕྱིན་པ་སོགས་ཉམས་རྨིས་སྣ་ཚོགས་བྱུང་ངོ་། །མགོ་ཟླའི་ཚེས་བཅུ་ནས་སྙན་བརྒྱུད་ཡང་ཕུར་སྦྲགས་མའི་སྔོན་འགྲོ་ཁྱུག་ཙམ་བཏང་ནས་ཚེས་བཅུ་བཞི་ནས་བསྙེན་པའི་དབུ་བཙུགས་པས་དེ་ཉིད་ནས་བཟུང་རིམ་གྱིས་མགོ་ལོག་གི་ཡུལ་དུ་ཕྱིན་དུས་ཀྱི་བར་ཆད་གློ་བུར་བགེགས་ཆེན་གྱི་གཙོས་ཐམས་ཅད་རིིམ་གྱིས་དྭངས། ཏིང་ངེ་འཛིན་ཡང་མཆོག་ཏུ་འཕེལ། ཚེ་རབས་ནས་ལས་འབྲས་ཡོད་པའི་ལྷ་ཞིག་ཡིན་སྙམ་སྤྲོ་བ་འཕེལ། ཉེར་ལྔའི་ཐོ་རེངས་ཀུན་གཟིགས་བློ་གྲོས་མཐའ་ཡས་དང་མཇལ། ཡང་ཕུར་སྦྲགས་མའི་དབང་བཞི་སྔར་ཡོད་འདི་ཉིད་ལན་གསུམ་བར་བསྐྱར་ནས་གནང་། ཐུན་མིན་རྫོགས་རིམ་གྱི་སྐོར་ངོ་མཚར་བ་སྔར་མེད་པའང་མང་པོ་གནང་། དེ་རྣམས་འདིར་ཡོད་པ་ཡིན་གསུངས་ནས་ཉིད་ཀྱི་ཕྱག་བྲིས་ཤོག་དྲིལ་ཆགས་གང་དང་། མགོ་ཚེམས་ཆུང་ངུ་ཁ་ཤས། སམ་ཊ་ཞིག་གི་གང་ཕྱག་བྲིས་མཛད་པ་བཅས་གནང་བ་རྨིས། རྒྱལ་ཟླའི་བཅོ་བརྒྱད་ནུབ་ཀུན་གཟིགས་བློ་གྲོས་མཐའ་ཡས་དང་། ཛར་སྤྲུལ་མཁན་སློབ་སྐུ་སྔར་བས་གཟི་བརྗིད་ཆེ་བ་ཞིག་མཛད་ནས། དགྱེས་པའི་ཉམས་འགྱུར་དུ་མ་དང་བཅས་ཤེལ་དཀར་གྱི་ཕྲེང་བ་བརྒྱ་རྩ་རིན་ཐང་དང་བྲལ་བའི་རིན་པོ་ཆེའི་རྒྱན་གྱིས་སྤུད་པ་ཞིག་སྩལ་ནས། བླང་དོར་གྱི་བསླབ་བྱ་མང་པོ་མཛད་པ་སེམས་ལ་ཆོངས་ཤིག འདིའི་ཉེར་དྲུག་ནུབ་ཀུན་མཁྱེན་འཇིགས་མེད་གླིང་པ་ཡིན་གསུངས་པའི་རྣལ་འབྱོར་པ་སྐུ་མདོག་དམར་སྨུག རལ་པའི་ཐོར་ཅོག་གླེགས་བམ་གྱིས་མཛེས་པ། སྙན་གོང་དུང་གི་བརྒྱན་པ་ནང་གོས་དཀར་པོ་ཕུ་དུང་ཅན་སྟེང་གཟན་དཀར་དང་ཤམ་དཀར་ཅན། སྒོམ་ཐག་གསོལ་བ་ཞིག་དང་མཇལ། ཕྱག་གཉིས་ཁོ་བོའི་མགོར་བཞག་ནས་སྨོན་ལམ་དང་ཞལ་ཏ་མང་པོ་མཛད་པ་རྨིས། ཉེར་དགུའི་ནུབ་ཀུན་མཁྱེན་ཆོས་ཀྱི་རྒྱལ་པོ་མཁྱེན་བརྩེའི་དབང་པོ་དང་མཇལ། རྒྱུད་སྡེའི་དབང་མོ་ཆེ་ཐོབ། ཀུན་གཟིགས་བློ་གྲོས་མཐའ་ཡས་མཇལ། རྡོར་སེམས་དབང་སྟོང་ཐོབ། རྗེ་བླ་མ་རྣམ་པ་གཉིས་ཀས་དགྱེས་པའི་རྣམ་འགྱུར་དང་བཅས་སེམས་དོན་སྐོར་གྱི་ཞལ་འཕྲོས་མང་པོ་མཛད་པ་རྨིས། ཤིང་རྟ་ཆོ་འཕྲུལ་ཟླ་བའི་ཚེས་གཉིས་ནུབ་ཀུན་གཟིགས་བློ་གྲོས་མཐའ་ཡས་མཇལ། བཞེས་དཀར་ཞིག་གི་ནང་གསོས་འབྲས་ཞིག་གསོལ་ཅིང་འདུག་པའི་ལྷག་མ་རྣམས་མཆོག་སྤྲུལ་རབ་འབྱམས་ཚང་ངེད་དཔོན་སློབ་གཉིས་ལ་གནང་ནས་རྟེན་འབྲེལ་ཞིག་ཡོད་པ་ཡིན་གསུང་གཞན་དགྱེས་པའི་གསུང་གླེང་མང་པོ་གནང་རང་གི་དོགས་གནས་ཀྱི་བཀའ་འདྲི་འགའ་ཞིག་ཞུས་མཐར་ཁྱེད་དད་དམ་རྣམ་པར་དག་ཅིང་བདག་ལ་མོས་པའི་མི་ཡིན་པས་སྐྱེ་འདི་ནས་བཟུང་ཚེ་རབས་ཐམས་ཅད་དུ་འབྲལ་བ་མེད་པ་ཡིན་པས་ད་དུང་དད་མོས་དང་གསོལ་འདེབས་ལ་རེམ་མཛོད་གསུངས་པ་རྨིས། བཅུ་བདུན་ནུབ་དེ་དང་ལྷན་དུ་པཎྜི་ཏ་ཆ་བྱད་འདི་གཉིས་དང་མཐུན་པ་ཕྱག་ན་དུང་དཀར་བཟུང་བ་ཞིག་འདུག ཆོས་ཀྱི་གྲགས་པའི་ཕྱག་ན་གླེགས་བམ་དང་། ཕྱོགས་གླང་ཕྱག་ན་རྨ་བྱའི་གདུགས་གཅིག་བསྣམས་འདུག་གོ །བཅོ་བརྒྱད་ནུབ་དཔལ་ཆོས་གྲགས་དང་ཕྱོགས་ཀྱི་གླང་པོ་ཡིན་ཟེར་བའི་པཎྜི་ཏ་མཁན་ཞུ་དམར་པོ་དང་ཆོས་གོས་རྣམ་གསུམ་གསོལ་བ་དབང་པོ་ཞི་ཞིང་དུལ་བ་མཇལ་བ་ཙམ་གྱིས་དད་པ་སྐྱེ་བ་གཉིས་དང་མཇལ་བ་རྨིས། ཉེར་དགུའི་ནུབ་མོ་ཡང་མཇལ་བ་རྨིས། ཚེས་གཅིག་ནུབ་དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོ་སྐུ་གཟི་བྱིན་འོད་དུ་འབར་བ་ཞིག་མཇལ། བཅུ་བདུན་ནུབ་རྗེ་བློ་གྲོས་མཐའ་ཡས་ཡབ་སྲས་མཇལ་བ་རྨིས། བཅོ་བརྒྱད་ཉིན། མཉམ་བཞག་དྭངས་པའི་ནམ་མཁའ་ལ། །སྣ་ཚོགས་སྒྱུ་མའི་གཟའ་སྐར་བཀྲ། །ཡིན་ཀྱང་ཆོག་ལ་མིན་ཀྱང་ཆོག །མཉམ་པ་ཉིད་ཀྱི་ཀློང་དུ་ཨ། །ཉེར་བཞིའི་ནུབ་སྙན་བརྒྱུད་ཡང་ཕུར་སྦྲགས་མ་འདི་ཉིད་ཀྱི་རྩ་བའི་སྒྲུབ་གཞུང་ཆེན་པོ་ལྡེབ་ལྔ་བཅུ་ནང་སྐོར་དང་། ཚེ་སྒྲུབ་སོགས་ལས་ཚོགས་ཀྱི་དཔེ་ཆ་ལྡེབ་ལྔ་བཅུ་ནང་སྐོར། ཡང་གསང་ཐེམ་མེད་གུད་སྦས་ཚན་བཅས་མཇལ་བ་རྨིས། ནང་པར་ཡང་ཚིག་རྐང་འགའ་ཞིག་བློ་ལ་ཟིན་པ་ལྟ་བུར་འདུག ཡིག་འབྲུ་རྣམས་འོད་ཟེར་དཔལ་དུ་འབར་བར་འདུག ནག་པ་ཟླ་བའི་ཚེས་བཞི་ལ། ཚེ་སྒྲུབ་ཀྱི་ཐུན་མགོ་བཟུང་། འདི་ནུབ་ཉམས་རྨིས་ཀུན་ལ་འཚུབ་ཆ་ཤིན་ཏུ་ཆེ། ཁྱད་པར་ཚེ་འཕྲང་དང་ཚེ་སྐེག་གི་མཚན་མ། ལྷག་པར་མཐུ་བྱད་ཀྱི་ངོ་ཤིན་ཏུ་ཆེར་བར་སྣང་ནའང་། དཔལ་ལྡན་འབྲུག་པའི་བུ་རྒྱུད་བཞིན། །དྲག་སྔགས་གསུམ་གྱིས་ཨར་ལ་གཏད། །ཇོ་བོ་བཀའ་གདམས་དགེ་བཤེས་བཞིན། །གང་བྱུང་ལམ་དུ་ཁྱེར་བར་བྱས། །ཨ་མ་ཇོ་མོའི་ཆོས་ལུགས་བཞིན། །སྐྱེ་མེད་དབྱིངས་སུ་ཕཊ་ཀྱིས་བཅད། །ཀུན་བཟང་པདྨའི་བུ་རྒྱུད་བཞིན། །གང་ཤར་རིག་པའི་ཀློང་དུ་ཨ། །སྟོང་པ་ཉིད་ཀྱི་ངང་དུ་བཤིག །ཧ་ཧ་ཧ། ཚེས་བརྒྱད་ནུབ། ཉམས་ཀྱི་སྣང་བར། ལྕགས་ཧོམ་འབར་བའི་ནང་དུ་ཚུད། །བྱད་ངོ་སྣ་ཚོགས་སྣང་ནའང་། །སྟོང་པ་ཉིད་ཀྱི་ངང་དུ་བཤིག ཧེ་ཧེ། ཚེས་བཅུ་ནུབ། རྨི་ལམ་དུ། སྣུམ་ཟད་མར་མེ་ཆེར་རྒས་ཀྱང་། །སླར་ཡང་སྣང་གསལ་སྒྲོན་པ་རྨིས། །བཅོ་ལྔའི་ནུབ། ཙི་ནའི་ལྗོངས་ཀྱི་གྲུབ་པའི་དབང་། །རྣལ་འབྱོར་སྤྱོད་པའི་བརྟུལ་ཞུགས་ཅན། །མཐོང་བས་ཡིད་འཕྲོག་དཔའ་བོ་དང་། །ཉམ་མྱོང་ལྟ་བ་གོ་བསྡུར་རྨིས། །ཉེར་གསུམ་ནུབ་མོའི་རྨི་ལམ་དུ། རྐྱེན་སྣ་ཚོགས་མཐོང་བ་ལ་བརྟེན་ནས་གླུ་འདི་འདྲ་ཞིག་བླང་བ་རྨིས་སོ། །མཛེས་ལྡན་མེ་ཏོག་ནི་མང་ཡང་། །ཨུ་དུམ་ཝཱ་ར་ནི་མི་སྣང་། །གངས་ལྗོངས་སྐྱེ་བོ་ནི་མང་ཡང་། །དལ་འབྱོར་དོན་ལྡན་ནི་དཀོན་བྱུང་། །གློོ་བུར་སེར་རླུང་གིས་གཏོར་བའི། །པད་རྫིང་སྟོང་པ་འདི་མཐོང་བས། །མི་རྟག་སྒྱུ་ལུས་ཀྱི་ཕུང་པོ། །ནམ་ཡང་བསླུ་མེད་དུ་གོ་བྱུང་། །ཞིང་པས་དཔྱིད་བཏབ་ཀྱི་ས་བོན། །སྟོན་འབྲས་འཆོལ་མེད་དུ་སྨིན་སྣང་། །དཀར་ནག་དགེ་སྡིག་གི་འབྲས་བུ། །ནམ་ཡང་བསླུ་མེད་དུ་གོ་བྱུང་། །མཛེས་ལྡན་མེ་ཏོག་གི་འདབ་མས། །སྦྲང་ཆུང་སྲོག་གཤེད་དུ་ཕབ་སོང་། །ཁམས་གསུམ་འཁོར་བ་ཡི་གྲོང་ཁྱེར། །སྡུག་བསྔལ་རང་བཞིན་དུ་གོ་བྱུང་། །མཁའ་ལ་གསལ་བྱེད་འདྲ་མང་ཡང་། །ཉི་གཞོན་གཉིས་པ་ཞིག་མི་འདུག །དགེ་བའི་གཤེས་གཉེན་ནི་མང་ཡང་། །གུ་ཎ་དང་མཚུངས་ཞིག་མི་སྣང་། །རཏྣ་མཆིང་བུ་ནི་མང་ཡང་། །དགོས་འབྱུང་ཡིད་ནོར་ནི་མི་སྣང་། །གདམས་ངག་ཟབ་ཟབ་ནི་མང་ཡང་། །རྫོགས་ཆེན་དང་མཚུངས་ནི་དཀའ་སྙམ། །མཁའ་ལ་ཆར་སྤྲིན་ནི་གཡོ་ཡང་། །རང་ངོ་འགྱུར་བ་ནི་མི་སྣང་། །གཟུང་འཛིན་སྒྲིབ་ཚོགས་ནི་མང་ཡང་། །ཡེ་གཞིའི་རང་ངོ་ནི་མ་བསྒྲིབས། །ཆུ་ལ་རླབས་ཕྲེང་ནི་གཡོ་ཡང་། །ཕན་མེད་གནོད་མེད་དུ་སྣང་བས། །རྣམ་རྟོག་འཆར་སྒོ་ནི་མང་ཡང་། །སྒོམ་ལ་གནོད་སྙམ་ཞིག་མི་འདུག །ཧེ་ཧེ་སྨྱོ་གཏམ་ནི་དེའོ། །ཞེས་བློ་ལ་ཕལ་ཆེར་ནངས་སྔ་དྲན་ཞིང་འགའ་ཞིག་བརྗེད་པ་ཕྱོགས་འདྲར་བྲིས་པའོ། །ཉེར་དྲུག་ནུབ་གཏེར་སྲས་དབང་མཆོག་རྡོ་རྗེ་དང་མཇལ་ཐུགས་དགྱེས་པའི་གསུང་གླེང་མང་པོ་བྱུང་། མཛོད་བཏགས་དཀར་པོའི་སྐུ་ཤམ་དང་བཟང་གོས་དམར་སེར་གྱི་འགན་སྦྱར་མནབ་འདུག སྔར་བས་གཟི་བརྗིད་བརྒྱ་འགྱུར་གྱི་ཆེ་བ་ཞིག་རྨིས། ཚེས་བདུན་ནུབ་རྗེ་བླ་མ་གུ་ན་ས་ར་དམ་གཙང་རྡོ་རྗེའི་མཆེད་གྲོགས་རྣམས་དང་བཅས་ཚོགས་ཀྱི་འཁོར་ལོའི་འདུ་བ་ལ་ལོངས་སྤྱོད་པ་དང་མཇལ་ཞིང་། རང་ལའང་ཚོགས་སྐལ་མང་དུ་གནང་བྱུང་། གཞན་ཡང་གླུ་བྲོ་སོགས་དགྱེས་ཉམས་མང་དུ་མཛད། ཁྱད་པར་ཁོ་བོས་དབྱངས་དྲངས་ཏེ་དཔོན་སློབ་ལྷན་གྱིས་དབྱངས་སྙན་པོས། སྲིད་པའི་མཚོ་ལས་སྒྲོལ་བར་ཤོག །ཅེས་ལན་མང་འདོན་པ་རྨིས། ས་ག་ཟླ་བའི་ཚེས་བཅོ་ལྔ་ཉིན་སྒྲུབ་ཆེན་བཀའ་བརྒྱད་བདེ་གཤེགས་འདུས་པའི་ཞི་སྒྲུབ་ཀྱི་ཐུན་མགོ་བཟུང་། དེ་ནུབ་ཐོ་རེངས་ཀུན་གཟིགས་བློ་གྲོས་མཐའ་ཡས་དང་མཇལ། ཧཱུཾ་ནག་སྙིང་ཏིག་གི་ཞལ་ཁྲིད་ངོ་སྤྲོད་རྒྱས་པ་དང་། རིག་འཛིན་བརྒྱུད་པའི་གསོལ་འདེབས་སོགས་སྔར་མེད་པ་མང་པོ་གནང་། དེ་རྗེས་རྗེ་བློ་གྲོས་མཐའ་ཡས། ཛར་སྤྲུལ། ཁོ་བོ་གསུམ་གྱིས་རྗེ་མཁྱེན་བརྩེ་རིན་པོ་ཆེར་ཀུན་བཟང་མཆོད་སྤྲིན་རྒྱ་མཚོས་མཆོད་མཐར་ཞབས་བརྟན་མངའ་དབུལ་རིགས་ཤིན་ཏུ་རྒྱས་པར་ཕུལ་བ་རྨིས་པ་མཆོག་སྤྲུལ་ཟླ་བའི་ལང་ཚོ་གསར་དུ་ངོམ་པ་ཡིན་ནམ་སྙམ། ཧོར་ཟླ་བདུན་པའི་ཚེས་བཅུ་དྲུག་ནུབ་གངས་ལྗོངས་ལྷ་འདྲེ་ཆེ་ཕྲ་ཐམས་ཅད་འདུས་པ་ལ་རྡོ་རྗེ་ཕུར་པའི་དཀྱིལ་འཁོར་དུ་དབང་བསྐུར་ཞིང་དམ་ཚིག་ཕོག གསར་བྱུང་གི་འབྱུང་པོ་རྣམས་ཀྱི་སྲོག་གི་སྙིང་པོ་ཕྲོགས་ནས་དམ་ལ་བཏགས་པ་རྨིས། རྨི་ལམ་འཁྲུལ་རྟོག་ཟ་ཟི་ལ། །སྙིང་པོ་ཡོད་པ་ངས་མ་མཐོང་། །གཟའ་གཏད་མེད་པའི་རིག་པའི་ཀློང་། །གང་ཤར་རང་གྲོལ་ཆོས་ཀྱི་སྐུ། །ཅི་ལྟར་སྤྱོད་ཀྱང་བློ་བདེའོ། །ད་འཆི་བདག་བྱུང་ཀྱང་ཡ་མི་ང་། །འདི་གྲུབ་འབྲས་ཀུན་གྱི་རྒྱལ་པོར་འདོད། །ཤིང་ལུག་ཟླ་བ་བདུན་པའི་ཚེས་གཅིག་ལ་དངོས་གྲུབ་ལེན་ཆོག་བྱས་པ་ལགས་སོ། །དེ་འཕྲལ་གྱི་རྫོགས་པ་དང་པོའི་ཉིན། །གཟའ་སྐར་དང་འཕྲོད་སྦྱོར་དགེ་བ་ལ། །ཆོས་ཡང་ཟབ་ཀྱི་བླ་མའི་སྒྲུབ་པ་མཆོག །དཔལ་གསང་བ་འདུས་པའི་བསྙེན་དབུ་བཙུགས། །སེམས་ཉམས་སྣང་རྫུན་གྱི་རི་མོ་ལ། །འདི་མ་མཐོང་བྱ་བ་དགུ་གཅིག་མཐོང། །ཞག་བདུན་ཕྲག་སོང་བའི་ཉིན་མོ་ལ། །སེམས་མེད་སྣང་སྟོང་པའི་མཁའ་དབྱིངས་སུ། །ལྷ་མ་ཧཱ་གུ་རུ་སྤྲུལ་པའི་སྐུ། །སྐུ་ཆེ་ཆུང་རང་གི་མཐོ་ཚད་ཙམ། །འཇའ་འོད་ཟེར་སྣ་ལྔའི་དབུས་ན་མཐོང་། །ཡུན་རིང་རབ་ཅིག་ཏུ་མངོན་སུམ་བཞིན། །ཕྱི་གཟུགས་ཀྱི་ལྷ་སྐུས་ཅི་བྱར་ཡོད། །ནང་རང་རིག་མ་ཧཱ་གུ་རུའི་སྐུ། །ཞལ་མངོན་སུམ་དུ་མཇལ་བ་འདི་ཨ་ལ་ལ། །རྨི་ལམ་དུ་མཁའ་ལ་འཕུར་བ་སོགས། །ངོ་མཚར་གྱི་སྤྲུལ་སྒྱུར་ཅིར་ཡང་རྩེ། །ཡང་སྐབས་ཤིག་བེམ་རིག་བྲལ་གྱུར་ནས། །རང་བར་དོར་སླེབ་པའི་སྣང་ཚུལ་སོགས། །རྨི་ལམ་གྱི་རྫུན་རིས་ཅིར་ཡང་འཆར། །ཡང་རྨི་ལམ་དུ་རྗེ་བཙུན་གུ་རུ་རྗེ། །འཁོར་ཐུབ་དྲུག་སྤྲུལ་པའི་སྐུ་དང་བཅས། །འཇའ་གུར་གྱི་ནང་དུ་བཞུགས་པ་སོགས། །སྣ་ཚོགས་ཀྱི་བཀོད་པ་ཅིར་ཡང་གསལ། །ཡང་གུ་རུ་རྡོ་རྗེ་གྲོ་བོ་ལོད། །སྐུ་དམར་སྨུག་བཟོད་པར་དཀའ་བའི་ཉམས། །གདན་ཆེ་བཙན་སྟག་གི་སྟེང་ན་འགྱིང་། །རྒྱན་ཆ་ལུགས་སྤྱི་དང་འདྲ་བ་ལ། །ཉི་ཟླ་ཡི་དབུ་རྒྱན་བྱས་པ་སོགས། །ངོ་མཚར་གྱི་དཀྱིལ་འཁོར་མཇལ་བ་རྨིས། །ཡང་སྨན་མཆོག་ཨ་རུ་རྣམ་རྒྱལ་གྱིས། །གཏམས་པ་ཡི་བཻཌཱུཪྱའི་ལྷུང་བཟེད་མཆོག །ཁོ་བོ་ཡི་ལག་པར་སོན་པ་རྨིས། །ཡང་ཉི་ཟླ་དུས་གཅིག་ཤར་བ་དང་། །གསེར་གྱི་མེ་ཏོག་ལྡེར་ཆེན་ཙམ། བཏུ་ཞིང་བཏུ་ཞིང་འགྲོ་བ་རྨིས། །ཡང་ཀུན་མཁྱེན་ངག་གི་དབང་པོ་མཇལ། །མོས་གུས་ཀྱི་གདུང་བ་བསྐྱེད་ཙ་ན། །རྒྱུད་བྱིན་རླབས་འཕོ་བའི་དགོངས་གཏད་ལ། །ངོ་སྤྲོད་ཀྱི་གནད་གཟེར་གནང་བ་རྨིས། །སྨིན་ཟླའི་ཚེས་བཅོ་ལྔ་ལ་དངོས་གྲུབ་ལེན་ཆོག་བགྱིས་པ་ལགས་སོ། །ཟླ་བ་དེའི་ཚེས་བཅུ་བདུན་ལ་ཉང་གཏེར་ཁྲོས་མ་ནག་མོའི་བསྙེན་པའི་དབུ་འཛུགས་ཀྱི་འདིའི་སྐབས་སུ་ལུས་ལ་ཤིན་སྦྱངས་ཀྱི་བདེ་བ་བསམ་གྱིས་མི་ཁྱབ་པ་དང་། སེམས་ལ་བདེ་གསལ་མི་རྟོག་པའི་ཉམས་འཁོར་ཡུག་ཏུ་འབྱམས་པ་དང་ཏིང་ངེ་འཛིན་གྱི་འཆར་སྒོ་དུ་མ་བྱུང་བ་རྗེ་བཙུན་རྡོ་རྗེ་ཕག་མོའི་བྱིན་རླབས་འབར་བ་གསུམ་གྱི་ཡོན་ཏན་ཆ་ཤས་ཙམ་ཡིན་པར་སེམས་སོ། །གཞན་ཡང་སྔ་སོར་ཉེས་སེལ་དུ་རྡོ་རྗེ་ཕུར་པའི་བསྙེན་སྒྲུབ་བགྱིས་སྐབས་གུ་རུ་རིན་པོ་ཆེ་ཆོས་ཀྱི་དབང་ཕྱུག་སྔགས་པ་དར་ཡོལ་གཟི་བརྗིད་བཟོད་པར་དཀའ་བ་ཞིག་གིས་ཕུར་པ་སྤུ་གྲིའི་སྨིན་གྲོལ་ཆིག་རྫོགས་སུ་རྩལ་པའི་ཉམས་རྨིས་བྱུང་བ་དང་། སེང་གདོང་མ་བསྙེན་དུས་ཌཱ་ཀི་མས་ཕྱག་མཚན་གསེར་གྱི་རྡོ་རྗེ་རྩེ་བརྒྱ་པ་བྱིན་པ་དང་། མཁའ་འགྲོ་མང་པོའི་ཚོགས་གྲལ་དུ་ཕྱིན་ནས་ཚོགས་ཀྱི་འཁོར་ལོའི་འདུ་བ་ལ་ལོངས་སྤྱོད་པ་སོགས་ཀྱི་ཉམས་རྨིས་བྱུང་བ་རྣམས་དེང་སང་ཡང་མ་བསྙེལ་བར་གསལ་བར་དྲན་འདུག་པའང་ཉམས་མཚར་དུ་བྲིས་པའོ། །ལར་ཆུང་ངུ་ནས་ཀུན་མཁྱེན་ཆོས་རྗེའི་གསུང་སོགས་ཐེག་མཆོག་རྫོགས་པ་ཆེན་པོའི་བསྟན་བཅོས་ཀྱི་ཚིག་འདྲ་ཐོས་ཚེ་ཐ་མལ་གྱི་ཤེས་པ་ཡད་ཡུད་འགགས་ནས་རིག་པ་སོ་མའི་སྟེང་དུ་གནས་པ་ཞིག་ཡོང་འདུག་པ་ལ་དཔག་ན་ལམ་ཟབ་དེར་སྐྱེ་སྔོན་འབྲེལ་བ་ཙམ་ཐེམ་པ་ཞིག་གི་སྐྱེ་བ་ཡིན་ནམ་སྙམ། རྗེ་བླ་མ་རྣམ་གཉིས་ནས་སྨིན་གྲོལ་གྱི་གདམས་པ་ཞུ་སྐོར་བྱིས་པ་མིི་རྒོད་དུ་གྱུར་གཤིས་དབང་གི་བརྡ་དོན་སོགས་ལ་ཡིད་འཇུག་པ་མེད་ཀྱང་། བྱིན་འབེབས་དང་ཚིག་དབང་ལྟ་བུའི་སྐབས་སུ་བླ་མའི་བྱིན་རླབས་འཕོས་པ་འདྲ་བས་ཐ་མལ་གྱི་འཁྲུལ་སྣང་ཐམས་ཅད་འགགས་ནས་རང་རིག་སྟོང་གསལ་སྤྲོས་པ་དང་བྲལ་བའི་ངང་དུ་ཆམ་ཆམ་གནས་པ་དང་། བླ་མའི་ཐུགས་དང་རང་སེམས་འདྲེས་སྙམ་པའི་ཉམས་བརྒྱུད་མར་ཡོང་འདུག་པ་ཕྱིས་འདིར་ཅུང་ཟད་བསྒོམ་ལོ་བྱས་པའི་འབྲས་བུས་ཀྱང་སྔར་དབང་དུས་སོགས་སུ་རྒྱུད་ལ་ཤར་བའི་རིགས་པ་སྟོང་གསལ་ཟང་ཐལ་རྟོགས་པ་དེ་ཅུང་ཟད་བརྟན་པ་ཙམ་དུ་གྱུར། ཀོང་པོ་གཏེར་ཆེན་ཀུན་བཟང་བདེ་ཆེན་རྒྱལ་པོ་དེའི་མཚན་ཐོས་པ་ཙམ་གྱིས་སེམས་ལ་དགའ་བདེ་རྒྱུན་ཆགས་སྐྱེ་བ་ཞིག་ལྷན་སྐྱེས་སུ་མཆིས་ཤིང་ཡང་ཏི་གསེར་འབྲུ་ལ་མོས་པ་མི་འཕྲོག་པ་རྒྱུན་དུ་མཆིས་ཤིང་། ཕྱིས་གཏེར་ཆེན་དེ་ཉིད་ཀྱིས་ཡང་ཏིའི་སྨིན་ཁྲིད་གསན་ཚུལ་གྱི་ལོ་རྒྱུས་དེ་མཐོང་ཚེ་དེ་སྐབས་ཀྱི་གནས་ཚུལ་འལ་འོལ་དྲན་པ་ཞིག་བྱུང་ཡང་ཡིད་བརྟན་ཅི་ཡོད། གཞན་ཡང་ཇོ་བོ་རྗེ་གཤེགས་ནས་འབྲོམ་སྟོན་དཔོན་སློབ་རྭ་སྒྲེང་དུ་བྱོན་སྐོར་སོགས་ཀྱི་ལོ་རྒྱུས་འགའ་རེ་མཐོང་བས་རྐྱེན་བྱས་ཏེ་སྔོན་རབས་ཀྱི་ཀུན་རྟོག་འལ་འོལ་འཆར་བ་འདྲ་མོ་ཡང་འདུག རྫུན་རྐྱལ་གྱི་འཁྱལ་གཏམ་མཐོ་ལོ་བཤགས། ༀ་བཛྲ་ས་ཏྭ་ཧཱུྃ། མེ་སྤྲེལ་དབོ་ཟླ་བའི་ཡར་ཚེས་དགེ་བ་ལ་དངོས་གྲུབ་ལེན་ཆོག་བགྱིས་པའོ། །འདིའི་དངོས་གྲུབ་ལེན་ཆོག་གི་སྐབས་༧སྐྱབས་རྗེ་ཀོང་སྤྲུལ་རིན་པོ་ཆེའི་མདུན་ནས་མཚུངས་བྲལ་ཐུགས་བརྩེས་རྗེས་འཛིན་གྱི་བཀའ་གླེགས་རིན་པོ་ཆེ། ཚེ་རྫས་འཆི་མེད་བདུད་རྩིའི་བུམ་པ། ལྷ་གོས་ཚེ་ལྷ་རིས། བཟང་གོས་འབྲུག་མ་དབང་གི་མདོག་ཅན་བཅས་སྩལ་པ་བུ་ཆུང་དགེ་ལེགས་རྒྱ་མཚོའི་ལག་བརྒྱུད་ཀྱིས་འཕྲོད་པའི་རྟེན་འབྱུང་གི་དགེ་མཚན་ཤིན་ཏུ་ལེགས་པར་གྱུར་ཏོ། །༈ སྭསྟི། རིགས་ཀུན་བདག་པོ་སྨྲ་བའི་སེང་གེ་ཡིས། །ཐུགས་ཀྱི་དགོངས་གཏད་ཐུན་མིན་བསླབ་གནང་མཛད། །རྩ་གསུམ་ལྷ་ཚོགས་ལུས་དང་གྲིབ་མ་བཞིན། །མི་འབྲལ་ལྷན་ཅིག་འགྲོགས་པའི་ལྟས་མཚན་ཤར། །རྒྱལ་བ་གཉིས་པ་གུ་ཎ་ས་ར་ཡིས། །སྡེ་གསུམ་དགོངས་པའི་གསང་མཛོད་ཕ་ཕོག་སྩལ། །འོད་གསལ་བསམ་མི་ཁྱབ་པའི་ཡེ་ཤེས་གདངས། །བདེ་གསལ་མི་རྟོག་ཞག་གསུམ་འཁོར་ཡུག་བརྡལ། །གྲོལ་བ་དྲུག་ལྡན་རྡོ་རྗེ་རྩེ་མོའི་སྲོལ། །ཆེས་ཆེར་འཕེལ་གནས་ཀརྨའི་ཡང་དབེན་དུ། །མོས་གུས་རྩལ་ལས་བླ་མའི་སྒྲུབ་པ་ཤར། །བྱིན་རླབས་ཚན་ཁ་ཅུང་ཟད་ཡོད་དམ་སྙམས། །ཀོང་ཡུལ་ལྟེ་བ་པྲ་ཏི་མཐོན་པོ་སྒང་། །མངའ་བདག་བརྒྱུད་པའི་ཕྲིན་ལས་སྨིན་པའི་སར། །སྒྲུབ་པ་སྡེ་བརྒྱད་མཚོ་ལ་གཟའ་སྐར་བཞིན། །ལྔ་ལྡན་འཇའ་ཟེར་ཐིག་ལེའི་དཀྱིལ་འཁོར་མཛེས། །རིན་ཆེན་གཉིས་པའི་སྒྲོམ་བཟང་ཆུ་སྐྱེས་རིས། །འཛིན་མའི་ཁོངས་ནས་ཐོན་པའི་ནང་ཁོངས་སུ། །སྟོང་ཆེན་དེ་བཞིན་ཉིད་དབྱིངས་ཤེལ་གྱི་མཆོག །མངོན་སུམ་ལྷུག་པར་སོན་པའི་ཉིང་འཁྲུལ་མངོན། །གསང་ཆེན་སྨིན་གྲོལ་ཆོས་ཀྱི་དགའ་ཚལ་དུ། །མཁའ་ངོས་དར་དཀར་སྦྲེལ་བའི་ལམ་ཡངས་པོར། །རིག་འཛིན་རྩ་བརྒྱུད་བླ་མའི་ཚོམ་བུ་མཛེས། །ཡེ་ཤེས་ཌཱ་ཀི་ནི་ཡི་རྗེས་ཐོག་དེར། །རྡོ་རྗེ་དབང་མཆོག་དགའ་བའི་གར་གྱིས་བྲེལ། །ཧ་ཡ་གྷྲི་ཝས་གད་རྒྱངས་སྒྲོགས་པ་རུ། །ཨ་མྲྀ་ཏ་ཡི་སྒྲུབ་ལ་ཞུགས་པའི་ཚེ། །གཟུང་འཛིན་མཚན་མ་དག་པའི་མཁའ་དབྱིངས་སུ། །དོན་དམ་ཀུན་བཟང་ཆོས་སྐུའི་རང་ཞལ་མཇལ། །གཞན་ཡང་ལྷ་དང་བླ་མ་དགྱེས་པའི་ལྟས། །དཀར་ཕྱོགས་ལྷ་ཀླུ་འགོ་བའི་མཚན་མ་སོགས། །ཅིར་ཡང་མཐོང་མོད་རེ་ཞིག་དེ་ཙམ་མོ། །གཏད་མེད་སྨྱོན་པའི་རྫུན་གཏམ་ཨ་ཐམ་རྒྱ། །༈ ས་ཕག་དབོ་ཟླར་ཤྲིས་སརྦ་ཏར། །དྲིན་ཆེན་རྗེ་ཡི་ཞབས་ཀྱི་པདྨོར་བཅར། །ཞལ་མཇལ་ཙམ་གྱིས་གེགས་གོལ་མང་པོ་གྲོལ། །ཕྱི་མཐར་གཟིགས་པའི་གསུང་གི་དབུགས་དབྱུང་ཐོབ། །ཁྱད་པར་སྟོན་པའི་ཞལ་སྐྱིན་མུ་ནེ་ལ། །གསོལ་བཏབ་དབང་བླངས་རྗེ་ཡི་ཐུགས་དགོངས་གཏད། །བདེ་དྲོད་རང་འབར་སྙན་ཤར་མཁའ་ལ་ཕྱུར། །བར་ཆད་ཚེ་འཕྲང་གཡུལ་ལས་རྒྱལ་ཞེས་གསུངས། །མགོ་ཟླའི་ཚེས་༢༧ལ་དྲིན་ཆེན་དགུང་དུ་གཤེགས། །ཉེར་དགུའི་ཐུགས་དམ་གྲོལ་བསྟུན་ས་གཡོས་ཀྱི། །རྐྱེན་གྱི་ཐ་མལ་ཤེས་པ་གཤིས་ལ་ཕེབས། །ལྟ་སྒོམ་ཞེན་པའི་རྫུན་ཕུག་དེ་རུ་རྡིབ། །ཨམྲྀ་ཏ་ཡི་སྒྲུབ་ལ་ཞུགས་པའི་ཚེ། །སྣང་རིག་འདྲེས་པའི་ཉམས་མྱོང་ཐུན་གཅིག་ཤར། །དེ་སྐབས་དལ་ལ་འཇའ་ཚོན་ཟུག་ཅེས་གླེང་། །མྱོང་གྲོལ་སུམ་གཉིས་ཙམ་དུ་འཕེལ་བར་སྣང་། །ལྕགས་བྱི་ཐ་སྐར་ཟླ་བ་དབེན་སྤྱིལ་དུ། །རིགས་འདུས་རྡོ་རྗེ་སེམས་པའི་བསྙེན་པར་བརྩོན། །རྨི་ལམ་ཕལ་ཆེར་དགེ་ལྟས་འབའ་ཞིག་ཤར། རྫོགས་རིམ་བདེ་གསལ་མི་རྟོགས་ཞལ་འདྲིས་ཞུས། །མཚན་སྣང་སྲབ་མོའི་འོད་གསལ་ཟིན་ཙམ་བྱུང་། །དེ་ལས་མང་དུ་མི་སྨྲ་ཨེ་མ་ཧོ། །༈ གནས་འོག་མིན་ཆོས་དབྱིངས་ཀྱི་ཕོ་བྲང་ན། །དཔལ་སྟོན་པ་ཀུན་བཟང་རྡོར་འཆང་ཞེས། །མཚན་ཡོངས་ལ་གྲགས་པའི་གཡེར་བོ་ཆེ། །དོན་གཞན་དུ་མ་དམིགས་དྲིན་ཆེན་རྗེ། །ཕ་བློ་གྲོས་མཐའ་ཡས་མ་ལགས་སམ། །སྐུ་མཐོང་བས་ཐ་མལ་འཁྲུལ་སྣང་འགགས། །གསུང་ཐོས་པས་བདེ་ཆེན་ཡེ་ཤེས་བསྐྱེད། །ཐུགས་དྲན་པས་གཟུང་འཛིན་བདེན་ཞེན་ཞིག །རྗེ་ནམ་མཁའ་ལྟ་བུའི་རྣལ་འབྱོར་པ། །མི་ང་ལ་བསམ་རྒྱུ་རྗེ་ལས་མེད། །དབྱིངས་ཆོས་སྐུའི་ཀློང་ནས་རྗེས་དགོངས་ལ། །དུས་ད་ལྟ་འཕོ་ཆེན་གྱི་ཡེ་ཤེས་སྐྱེད། །འབྲལ་མེད་དུ་འགྲོགས་པའི་དགའ་སྟོན་སྩོལ། །མི་ང་རང་ཞན་ཏེ་བླ་མ་བཟང་། །སངས་རྒྱས་རིན་ཆེན་གྱི་ཞབས་པད་བརྟེན། །ལྟེམ་རྐྱང་མེད་པས་གསོལ་བ་བཏབ། །བྱིན་རླབས་སྙིང་གི་དབུས་སུ་སད། །ཆོས་དབུ་མ་དང་ཕྱག་རྒྱ་རྫོགས་ཆེན་གྱི། །གྲུབ་མཐའི་སྤུ་རིས་དབྱིངས་སུ་ཡལ། །བློ་བྲལ་ཆོས་ཉིད་ཀྱི་མལ་དུ་བསླེབས། །ཐ་སྙད་ཀུན་ཇི་ལྟར་དགྱེས་དགྱེས་མཛོད། །ཨུ་ནུས་ཀྱི་སྡུག་ཙིར་མ་བྱས་ཀྱང་། །ལྷན་སྐྱེས་ཀྱི་ཡེ་ཤེས་ཁོང་ནས་སད། །གནས་འགྱུ་ཡི་འདམ་ཀ་བདག་ལ་མེད། །སེམས་འཛིན་ཀུན་ཇི་ལྟར༴ དཔྱད་སྒོམ་གྱི་སྤྲོས་པ་མ་བྱས་ཀྱང་། །སྤྲོས་བྲལ་གྱི་མཚན་ཉིད་མངོན་སུམ་མཐོང་། །དགག་སྒྲུབ་ཀྱི་སྤང་ལེན་བདག་ལ་མེད། ཡིད་དཔྱོད་ཀུན་ཇི་ལྟར༴ གཏད་མེད་ཀྱི་རིག་པ་ཕྱམ་བདལ་ལ། །འཇུར་དྲན་གྱི་ཞབས་ཏོག་མ་བསྒྲུབས་པས། །ཉམས་སྣང་གི་སྤུ་རིས་དབྱིངས་སུ་ཞི། །བཟང་རྟོག་ཀུན་ཇི་ལྟར༴ ཆོས་མདོ་རྒྱུད་སྒྲུབ་བརྒྱུད་མན་ངག་སྲོག །ཀུན་མཐར་ཐུག་ངེས་དོན་ཀློང་དུ་གཅིག །གནད་བློ་བྲལ་གཉུག་མའི་རང་ངོ་རིག །ཐོས་བསམ་ཀུན་ཇི་ལྟར༴ ཁོང་རྟོག་གེ་མཁན་གྱི་སྟོན་ཆེན་གྱི། །ཨུ་ནུས་ཀྱིས་ལོ་བརྒྱར་འགེགས་བྱས་ཀྱང་། །མི་ང་ལ་ཐེ་ཚོམ་འཁུ་འཕྲིག་མེད། །ངོ་བོ་ལ་རྟག་ཆད་མི་འདུག་ན། །རང་བཞིན་ལ་འཕོ་འགྱུར་མི་འདུག་ན། །ཆོས་དབྱིངས་ལ་བྲི་གང་མི་འདུག་ན། །འབྲས་བུ་ལ་ཐོབ་ཤོར་མི་འདུག་ན། །ལམ་ནོར་གོལ་བྱ་བ་ཅི་ལ་ཟེར། །སྒོམ་མ་བྱུང་བྱ་བ་ཅི་ལ་ཟེར། གནད་མ་ཤེས་ཟེར་བ༴ དོན་མ་རྟོགས་བྱ་བ༴ ལྟ་དང་སྒོམ་དང་སྤྱོད་པ་གསུམ། །ཐམས་ཅད་གཉུག་མའི་ཀློང་དུ་གཅིག །གེགས་དང་གོལ་ས་མཚན་འཛིན་གསུམ། །བློ་ཡིས་བརྟགས་པའི་སྤུ་རིས་ཏེ། །བློ་བྲལ་གཤིས་ལ་ཕན་གནོད་ཅི། །རང་གྲོལ་རྣལ་འབྱོར་ཨ་ལ་ལ། །འདི་ཡང་དཔལ་ལྡན་བླ་མའི་དྲིན། །དྲིན་ལན་དུ་རྟོགས་པའི་མཎྜལ་འབུལ། །ད་དུང་ཡང་འབྲལ་མེད་ཐུགས་རྗེས་སྐྱོངས། །དོན་གཉིས་མཐར་ཕྱིན་གྱི་དགེ་མཚན་སྩོལ། །མངྒ་ལཾ། ཅེས་འབྱུང་བ་འདི་རྣམས་ནི་གང་ཟག་ཕལ་གྱི་སྤྱོད་ཡུལ་དུ་མ་གྱུར་ཅིང་གསང་བ་ལས་ཀྱང་ཆེས་གསང་བའི་རྣམ་ཐར་ངོ་མཚར་རྨད་དུ་བྱུང་བ་དང་། ༧ སྐྱབས་རྗེ་རབ་འབྱམས་ལྔ་པ་སྐུ་གཤེགས་པའི་སྐབས་ཀྱི་འདས་རྗེས་ཀྱང་འདི་ལྟར། ན་མོ་གུ་རུ་རཏྣ་ཡཱ། དྲི་མེད་འོད་གསལ་དེ་བཞིན་ཉིད། །གློ་བུར་སྦུབས་རྒྱ་ལས་གྲོལ་བའི། །གདོད་མའི་མགོན་པོ་བླ་མ་ལ། །འདུ་འབྲལ་མེད་པར་ཕྱག་གིས་འདུད། །མགོན་ཁྱོད་གཟོད་ནས་རྣམ་གྲོལ་གཞིར། །འཕོ་མེད་རྟག་པའི་དཔལ་བརྙེས་པས། །སྐྱེ་འཆིའི་མཚན་མ་ཡེ་དག་ཀྱང་། །གདུལ་བྱའི་སྣང་ངོར་ཅིར་ཡང་སྟོན། །ཇི་ལྟར་མཁའ་ཟླ་ཆུ་སྣོད་ལྟར། །འགྲོ་སེམས་སྐལ་བའི་ཁྱད་པར་གྱིས། །སྐྱེ་དང་འགགས་པའི་ཚུལ་ཡང་སྟོན། །ཡང་དག་དོན་ལ་སྐྱེ་འབྲི་དབེན། །དེ་སླད་མགོན་པོ་མཆོག་ཉིད་ཀྱང་། །ཞིང་འདིར་སྲིད་པ་ཉེར་བཟུང་ནས། །རླབས་ཆེན་བསྟན་འགྲོའི་དོན་ཟིན་ཏེ། །སླར་ཡང་གཟུགས་སྐུ་བསྡུ་ཚུལ་བསྟན། །དེ་ཚེ་ཉམས་ལ་འདི་ལྟར་ཤར། །ཀྱེ་མ་ཕྱོགས་འདི་ཡུད་ཀྱིས་སྟོང་། །ཉམ་ཐག་འགྲོ་བ་སུ་ལ་རེ། །བུ་སློབ་ཚོགས་པ་སུ་ཡིས་སྐྱོང། །དབང་ཁྲིད་གདམས་པ་གང་ལ་ཞུ། །ཉམས་ལེན་སྒྲོ་འདོགས་གང་དུ་བཅད། །འདི་ཕྱིའི་བློ་གཏད་སུ་ལ་འཆའ། །བདག་སྙིང་མི་འགས་བདེ་ཅི་ཞེས། །དྭ་ཕྲུག་ཐང་ལ་ལྷུང་བ་བཞིན། བཟོད་ཐབས་མེད་པའི་མཆི་མ་ཤོར། །གདུང་བའི་འོ་དོད་ཕྱོགས་བཅུར་བོས། །གསོལ་བ་བཏབ་ལ་དབང་བཞི་བླང་། །རྗེས་ཐོབ་ཉམས་ལ་འདི་ལྟར་ཤར། །ཡ་ཀི་ཐུབ་པ་ཆེན་པོ་ནས། །མ་ཀི་འཇག་མའི་སྲིན་བུ་ཡན། །གཤིས་ངོར་འཕོ་འགྱུར་མ་དམིགས་ཀྱང་། །སྣང་ངོར་ཆོ་འཕྲུལ་བསམ་མི་ཁྱབ། །ཀུན་ཀྱང་མི་རྟག་སྒྱུ་མའི་དཔེ། །སྔོད་ཆད་རྟག་འཛིན་གདོན་གྱིས་བསླུས། །དེ་རིང་བརྡ་ཆོས་མངོན་དུ་བསྟན། །འགྱུར་མེད་གཏན་སྲིད་མ་ཟིན་ན། །བྱ་བྱེད་མང་པོའི་དགོས་པ་སྐྱུངས། །སྔོན་ཚེ་ཆོས་རྗེ་ཞབས་བརྟན་ནས། །ཚེ་གང་འབྲལ་མེད་འགྲོགས་ལགས་ཀྱང་། །དད་དམ་ངོ་ལྐོག་ཤོར་མ་མྱོང་། །མོས་གུས་ལྟེམ་རྐྱང་བྱས་པ་མེད། །གཅིག་པུར་བརྟགས་ན་རང་ཡིད་ཆེས། །དམ་པས་གཟིགས་ཀྱང་ཁྲེལ་སྙམ་མེད། །བསམ་གྱིན་འགྱོད་མེད་བློ་བདེའི་ངང་། །ཐུགས་ཡིད་བསྲེས་ལ་མཉམ་པར་བཞག །དེ་ཚེ་རྨི་ལམ་སྣང་བ་རུ། །ཀུན་མཁྱེན་རྡོ་རྗེ་གཟི་བརྗིད་དང་། །བླ་སློབ་དགོངས་པ་མཉམ་ཉིད་ཕྱིར། །པན་ཆེན་བི་མའི་ཐུགས་ཀློང་དུ། །ཐིམ་མོ་ཞེས་པའི་སྒྲ་ཡང་ཐོས། །རྔ་ཡབ་པདྨ་འོད་གླིང་དུ། །གུ་རུའི་ཚོགས་གྲལ་བཞུགས་སོ་ཞེས། །མཁའ་ལ་འཇའ་སྤྲིན་ལྡིང་ཁང་དུ། །ལྷ་རྣམས་མཆོད་པ་འབུལ་བར་མཐོང་། །བརྒྱུད་མར་དགྱེས་པའི་ཉམས་འགྱུར་བཅས། །བརྡ་ཐབས་རྟེན་འབྲེལ་གནང་བ་སོགས། །འབྲལ་མེད་རྗེས་སུ་སྐྱོང་བའི་རྟགས། །བྱིན་རླབས་མཚན་མ་ཅིར་ཡང་ཐོབ། །ད་ནི་མྱ་ངན་དབྱིངས་སུ་སངས། །སྡུག་བསྔལ་བདེ་བ་ཆེན་པོའི་ཀློང་། །བླ་མ་རང་སེམས་འབྲལ་བ་མེད། །དགའ་སྤྲོ་སྐྱིད་པའི་ཉམས་ཤིག་ཤར། །གུ་ཡངས་གཏད་མེད་ཉལ་སྙིང་འདོད། །བྱ་བྱེད་བྱིས་པའི་རྩེད་མོ་འདྲ། །བསྟོད་སྨད་བྲག་ཆའི་སྒྲ་སྙན་བཞིན། །བདེ་སྡུག་རྨི་ལམ་འཇའ་སྙེག་འདྲ། །ཤི་གསོན་ལག་པའི་འདུ་བྱེད་ཙམ། །འཕྲལ་གྱི་བྱེད་སྤྱོད་སྣ་ཚོགས་འདི། །འགྲུབ་ན་བླ་མའི་ཞབས་ཏོག་སྟེ། །བསྟན་དང་འགྲོ་ལ་གང་ཕན་ལགས། །མ་གྲུབ་ཀྱང་འདུས་བྱས་མཚན་མའི་གཤིས། །སྨིག་རྒྱུ་ལ་ཆུ་རགས་སུ་ཞིག་བྱེད། །ཆོས་བརྒྱད་ཀྱི་གཉེར་ཁ་བྱེད་དོན་ཆུང་། །བྱ་བ་བྱས་ཀྱང་ཆོག་ལ་བཞག་ཀྱང་ཆོག །གཅིག་ཏུ་བསྡད་ཀྱང་ཆོག་ལ་སོང་ཡང་ཆོག །རིག་པ་བཞག་ཀྱང་ཆོག་ལ་བཏང་ཡང་ཆོག །གང་བྱས་ཆོག་པའི་རྣལ་འབྱོར་བློ་བདེ་ལགས། །བླ་མ་དང་རང་སེམས་དབྱེར་མེད་པའི། །ཟང་ཐལ་གྱི་རིག་པ་རྒྱ་ཡན་ཀློང་། །ཤར་གྲོལ་གྱི་ཤེས་ཉམས་ཕྱད་མ་ཕྱོད། །སྡུག་བསྔལ་ཆོས་ཉིད་དུ་སངས་པ་ལགས། །གཅིག་གསུམ་གཉིས་ཀྱིས་དང་པོ་གྱིས། །ཨཐྎ། ཞེས་རྗེ་ཉིད་བླ་བྲང་དུ་སྐུ་མཚམས་ལ་བཞུགས་པའི་སྐབས་ཤིག གཟིམས་སྐྱིལ་ལ་རྒྱ་སྐར་གྱི་མཐོང་ཁུང་ཕྱེས་ནས་བཞུགས་འདུག་པ། ཉེ་གནས་པས་མཇལ་ཏེ་གསུང་ཐུན་གྲོལ་རྗེས་ཆབ་གསང་ལ་ཕེབས་ཤུལ་དུ་གཟིམས་ཁང་དུ་སོང་བས་གསོལ་ལྕོགས་ནང་ཤོག་དྲིལ་ཞིག་འདུག་པ་ལྐོག་ནས་ཁྱེར་བའི་ཕྱག་བྲིས་དངོས་ལས་ཁྲོ་ཤུལ་མཁན་རིན་པོ་ཆེ་ཚུལ་ཁྲིམས་རྒྱ་མཚོའི་དཔེ་བཤུས་པ་ལས་སླར་ཡི་གེ་མང་དུ་འཕེལ་བ་འདི་ཁོ་ནའང་རྗེ་བླ་མ་ཡབ་སྲས་གཉིས་ཀའི་ཐུན་མོང་མ་ཡིན་པའི་རྣམ་ཐར་དུ་འདུག་པ་དང་ཡང་བཀའ་བརྒྱད་སྒྲུབ་ཕུག་ཏུ་བཞུགས་སྐབས་ཀོང་སྤྲུལ་ཡངས་སྲིད་རིན་པོ་ཆེ་ཞབས་འབྲིང་དུ་བཅར་བཞུགས་ཡོད་པ་དང་པོའི་སྐབས་སུ་སྒྲུབ་ཕུག་གི་བྲག་རི་ཞིག་པ་དང་རྩོད་པ་འགྱེད་པའི་ཐུགས་ཉམས་ཀྱི་སྣང་བ་དང་དངོས་སུའང་མི་མ་ཡིན་གྱི་རྗེས་མཐོང་རྒྱུ་ཡོད་པ་སོགས་འཚུབ་སློང་ཆེར་བྱུང་ཞིང་མཐར་དེ་དག་ཞི་བའི་རྗེས་ཐུགས་དམ་འཕེལ་བས་སྒྲུབ་ཕུག་འདིར་ཤིན་ཏུ་སྐྱིད་པའི་བྱིན་རླབས་ཆེ་བར་འདུག་གསུངས་ཤིང་། དེ་ཡི་རིང་ལ་ཕལ་ཆེར་ཐུགས་སྣང་འགྱུར་ནས་གསུང་མགུར་ཤར་གྱི་གསུངས་པ་དང་། མཆོད་ཚོགས་གི་སྐོར་མང་དུ་མཛད་པ་སོགས་ངོ་མཚར་བའི་གཟིགས་སྣང་རྒྱ་ཆེན་ཞིག་བྱུང་ཡོད་ཚོད་ཡིན་ཀྱང་གསང་བ་སྲུང་བ་ལ་ཐུགས་ཤིན་ཏུ་སྒམ་པས་ཟུར་ཙམ་ཡང་བཀའ་གནང་བར་མི་འདུག་གསུངས། གོང་དུ་ཕྱོགས་ཙམ་བསྟན་པ་ལྟར། འོག་མིན་གསུང་གི་གནས་མཆོག་ཀརྨ་དགོན་གྱི་ཀརྨའི་ཡང་དབེན་རྗེ་ཀརྨ་རང་བྱུང་རྡོ་རྗེས་ཞལ་མངོན་སུམ་དུ་བསྟན་པ་ལས་བླ་སྒྲུབ་རྡོ་རྗེའི་ཚིག་རྐང་བསྐྱེད་རྫོགས་ཡི་གེར་བཀོད་པ་དང་། དེའི་ཐོག་མའི་བརྩམ་གཞིའི་མཛད་བྱང་གི་གཤམ་དུ་སྐུ་ཕྱི་མའི་མཆོག་སྤྲུལ་ཡང་གནས་དེའི་ཕྱོགས་སུ་འབྱོན་པའི་ཚིག་ཟུར་ཞིག་ཡོད་ངེས་དེ་སྐབས་ཞབས་འབྲིང་དུ་མས་ཕྱག་བྲིས་དངོས་ལས་མཇལ་འདུག་ཀྱང་ཕྱིས་རྗེ་ཉིད་ནས་བཅོས་བསྒྱུར་གྱིས་མི་མངོན་པར་མཛད་པ་སོགས་བསྟན་བཅོས་ཀྱི་མཛད་བྱང་འགའ་ཞིག་ལས་ཚིག་གི་ཟུར་གྱིས་རྗེས་སུ་དཔག་པས་ཤེས་པར་འགྱུར་བ་དང་། རང་གནས་གདན་སར་སྐུ་མཚམས་ལ་བཞུགས་པའི་སྐབས་ཤིག་འཇམ་མགོན་བླ་མ་འཆི་མེད་བསྟན་གཉིས་གླིང་པ་ལས་ཉིད་ཀྱི་ཟབ་གཏེར་ཡང་དག་ཧེ་རུ་ཀའི་གསང་བ་ཐུགས་ཀྱི་ཏནྟྲའི་སྨིན་གྲོལ་རྫོགས་པར་གསན་པའི་དག་སྣང་བྱུང་བ་གཏེར་ཁ་དེ་ཉིད་ཀྱི་རྩ་བའི་ཆོས་བདག་ཡིན་འདུག་པས་དེའི་ཆོས་སྐོར་སྐུ་དངོས་ལས་སྨིན་གྲོལ་མ་གསན་ཀྱང་དག་སྣང་ཉེ་བརྒྱུད་དུ་ཐོབ་པར་གསུངས་པ་དང་། འཇམ་མགོན་གཏེར་ཁ་ཚིགས་བདུན་བླ་སྒྲུབ་ཀྱི་ཆོས་བདག་དུའང་ལུང་གིས་ཟིན་པ་དང་། ཡང་འཆི་མེད་བསྟན་གཉིས་གླིང་པའི་ཟབ་གཏེར་གྲོ་ལོད་གསང་སྒྲུབ་གདུག་པ་ཀུན་འདུལ་གྱི་བསྙེན་སྒྲུབ་ལ་བཞུགས་སྐབས་གུ་རུ་རྡོ་རྗེ་གྲོ་ལོད་ཀྱིས་མངོན་སུམ་དུ་ཞལ་བསྟན་པའི་སྐུ་མདོག་ཕྱག་མཚན་རྒྱན་ཆས་སོགས་སྟག་ཤམ་རྡོ་རྗེའི་ཟབ་གཏེར་གྱི་གྲོ་ལོད་དང་མཚུངས་པར་འདུག་ཅེས་ཀོང་སྤྲུལ་ཡང་སྲིད་ལ་བཀའ་ཕེབས་པ་དང་། དགུང་གྲང་བཅོ་ལྔའི་སྟེང་རྩོམ་པའི་སྙན་ངག་གི་དོན་འགྲེལ་དང་དཔེ་བརྗོད་ཀྱིས་མཚོན་པའི་སྐུ་ཆུང་ངུའི་དུས་ནས་སྙན་དངགས་བྱེད་པ་ལ་ཐོགས་པ་མེད་ཅིང་སྒྲ་དབྱངས་ལྷ་མོས་དངོས་སུ་རྗེས་སུ་བཟུང་བ་དང་། བདེ་ཀུན་རྩ་རླུང་སྦྱངས་སྐབས་རྡོ་རྗེ་ལུས་ཀྱི་རྩ་འཁོར་ཤིན་ཏུ་གསལ་བར་དངོས་སུ་གཟིགས། ཕྲན་ཅག་ལ་ཆོས་དབང་ཕུར་པ་སྤུ་གྲིའི་དབང་གནང་སྐབས་ཐུགས་སྣང་ཤིན་ཏུ་དྭངས་ཤིང་རྗེ་བླ་མ་འཇམ་མགོན་ཀོང་སྤྲུལ་ཞབས་ཀྱི་དབུ་ཞྭ་སྐུ་དྲེག་ཅན་བཞེས་ནས་དབང་གི་བསྔོ་བའི་མཚམས་སྦྱར་སྐབས་ལྷག་པའི་ལྷ་མཆོག་འདི་ལས་ཁོ་བོ་ཡན་གྲུབ་པའི་རྟགས་མཚན་མངོན་དུ་མ་གྱུར་པ་མེད་དམན་པ་ཁོ་བོ་ཅག་ལྟ་བུས་ཀྱང་འདིའི་བསྐྱེད་རྫོགས་ལ་བརྩོན་པས་དངོས་གྲུབ་ཀྱི་རྟགས་མཚན་ཅི་རིགས་པ་ཐོབ་ཅེས་ཕེབས་ཀྱང་ཇི་ལྟར་བྱུང་ཞེས་བཀའ་འདྲི་ཞུ་བའི་སྤོབས་པ་བྲལ་བར་གྱུར་ཏོ། བསྙེན་སྒྲུབ་གནང་བའི་རིམ་པའང་། རྗེ་ཉིད་ཀྱི་རྩ་བའི་ཐུགས་དམ་ཕུར་པ་སྤུ་གྲི་ནི་ལོ་རེ་བཞིན་བསྟར་ཆགས་སུ་གྲངས་བསྙེན་ཚད་ལྡན་དང་བསྙེན་གསོས་ཞག་བདུན་ཕྲག་གསུམ་རེའི་མ་མཐའ་བྱས་པ་གང་ཆད་མེད་དུ་གནང་ཞིང་། གཞན་སྨིན་གླིང་རྡོར་སེམས་ལན་མང་པོ། སོ་ལུགས་ཡང་དག ཆོས་དབང་ཡང་དག་གི་བསྙེན་པ་ལན་གྲངས་མང་པོ། བཀའ་བརྒྱད་བདེ་འདུས་བསྙེན་ཆེན་ཟླ་བ་བཅུ་དྲུག ཡང་ཟླ་དྲུག་མ་སོགས་ཐེངས་ཁ་ཤས། རྗེ་མཁྱེན་བརྩེའི་ཟབ་གཏེར་ཡང་དག་ཕུར་པ་ཡང་ཕུར་སྦྲགས་མ། བཀའ་འདུས་ཆོས་རྒྱ། མཁའ་འགྲོ་གསང་འདུས། འཇམ་མགོན་རིན་པོ་ཆེའི་གྲོ་ལོད། གསང་ཐིག་ཡབ་བཀའ་ཡུམ་བཀའ། རཏྣའི་ཚེ་གསང་ཆོས་དབང་བླ་མ་གསང་འདུས། ཉང་གི་ཁྲོས་ནག བོ་དོང་སེང་གདོང་མ་བྱད་གྲོལ་གསེར་ལྡེ། འཇམ་དཔལ་སྨྲ་སེང་། འཇམ་དཀར། དབྱངས་ཅན་དཀར་མོ་རྣམས་ལན་ཁ་ཤས་སྒྲོལ་དཀར་ཡིད་བཞིན་འཁོར་ལོ། ནཱ་རོ་མཁའ་སྤྱོད། ཀར་ལུགས་དགྱེས་རྡོར་སོགས་གསར་རྙིང་གི་ལྷག་པའི་ལྷ་ཤིན་ཏུ་མང་པོའི་དུས་གྲངས་མཚན་མའི་བསྙེན་པ་མཐའ་རྒྱས་སུ་གནང་བའོ། །སྔ་སོར་སྐུ་ན་ཆུང་དུས་ཉམས་སྣང་གི་རྨི་ལམ་སྣ་ཚོགས་ཞིག་བྱུང་བའི་ནང་། མཁའ་འགྲོའི་ལུང་བསྟན་ལྟ་བུར་གཏེར་གྱི་ཁ་བྱང་སོགས་ཀྱི་ལུང་བསྟན་ཉམས་རྨི་ལམ་མང་ཞིག་བྱུང་བ་རྣམས་རིགས་བདག་འཇམ་མགོན་རྣམ་གཉིས་མདུན་ཞུས་པར། སྐུ་ན་ཆུང་དུས་མཁའ་འགྲོའི་ལུང་བསྟན་བྱུང་ན་དེ་ལ་མཆོག་འཛིན་བྱས་ནས་དེས་དབང་དུ་སོང་ན། སྒྲོ་སྐུར་གྱི་གནས་མང་ཞིག་མཐོང་བས། རེ་དོགས་མ་བྱས་ན་ཨི་དགའ་སྙམ། བར་ཆད་འདྲ་ཡིན་ན་བཟློག་རིམ་རྡོ་རྗེ་ཕུར་པའི་བསྙེན་སྒྲུབ་ཚད་ལྡན་དང་། གུ་རུ་ཞི་དྲག་གི་བསྙེན་སྒྲུབ་མཛད་རྒྱུ་བྱུང་ན་ཞི་འགྲོ་ན་ཅི་ཤེས། ལར་གཏེར་རྙིང་རིག་འཛིན་བརྒྱུད་པ་བར་མ་ཆད་པའི་བྱིན་རླབས་ཚན་ཁ་མཆོག་རྣམས་ཉམས་བཞེས་མཛད་གྲུབ་ན། དེ་ལས་ལྷག་པ་ཅི་ཡོད། དེང་སང་གཏེར་ཆོས་ཟེར་བ་དང་གཏེར་སྟོན་རྣམས་སྒྲོ་སྐུར་གྱི་གནས་ལྟ་བུ་ལས་མ་མཐོང་བས་དེ་འདྲ་ལ་ཆེད་གཉེར་མ་མཛད་ན་ཨི་དགའ་གསུང་བ་ལྟར་བཏང་སྙོམས་སུ་བཞག་ཀྱང་། ཉམས་མནོན་པ་ལྟ་བུའི་ཡི་གེ་མང་ཞིག་བྲི་དགོས་བྱུང་ཡང་མེ་ལ་བསྲེགས། རེ་དོགས་ཅི་ཡང་མ་བྱས་པས་ཕན་གནོད་གང་ཡང་མ་བྱུང་བ་དེ་བླ་མའི་ཐུགས་རྗེ་ཡིན་གསུངས་པའང་། དེང་དུས་ལྷ་མཐོང་འདྲེ་མཐོང་། ནག་ཆང་ལ་སྲེད་ནས་གཏེར་སྟོན་ཡིན་ཞེས་སྒྲོགས་པ་དང་། འགའ་ཞིག་ལ་ལྷ་བདུད་རྒྱལ་པོའི་ཆོ་འཕྲུལ་གྱིས་ཐོལ་བྱུང་ལྟ་བུའི་བྲི་རྒྱུ་མང་པོས་མགོ་འཁོར་ཞིང་། དེ་དག་གཏེར་ཆོས་ཟབ་མོར་རློམ་པ་མང་བས་རྗེ་བླ་མའི་ཞལ་གདམས་འདི་ལ་དཔྱད་ན་གོ་རྒྱུ་ཆེན་པོ་ཡོད་དོ། །དེ་ཡང་ཇི་སྐད་དུ། རྒྱལ་བ་ཐུབ་པའི་བསྟན་པ་ནི། །ལུང་དང་རྟོགས་པའི་བདག་ཉིད་དེ། །དེ་འཛིན་བྱེད་པ་སྨྲ་བ་དང་། །བསྒྲུབ་པར་བྱ་བ་ཁོ་ན་འོ། །ཞེས་ལུང་གི་ཆོས་ལ་འཆད་རྩོམ་མཛད་ཚུལ་འོག་ཏུ་འབྱུང་ལ། རྟོགས་པའི་བསྟན་པ་རིན་པོ་ཆེ་སྒོམ་སྒྲུབ་ཀྱི་འཛིན་དགོས་པ་དང་། སྔོན་བྱོན་འཕགས་བོད་ཀྱི་མཁས་གྲུབ་རིག་འཛིན་གོང་མ་རྣམས་ཀྱང་ཕལ་ཆེར་དབེན་པའི་སྒྲུབ་གནས་རྣམས་སུ་དཀའ་ཆེན་དང་དུ་བཞེས་ཤིང་སྒྲུབ་བརྒྱུད་ཀྱི་བསྟན་པ་རིན་པོ་ཆེར་འཛིན་ཏེ་རང་དོན་ཆོས་སྐུ་མངོན་དུ་བརྙེས་ནས། གཟོད་གཞན་དོན་གདུལ་བྱ་དུས་བབས་ཀྱི་འགྲོ་བ་རྣམས་འབད་རྩོལ་ཆེར་མ་དགོས་པ་ངང་གིས་འདུལ་བས་དོན་གཉིས་ལྷུན་གྱིས་གྲུབ། འགྲོ་དོན་ནམ་མཁའི་མཐའ་དང་མཉམ། ཆོས་བརྒྱུད་ཆུ་བོའི་རྒྱུན་ལས་རིང་བ་ལྟར། དཔལ་ལྡན་བླ་མ་འདི་ཡང་དམ་པ་གོང་མ་དེ་རྣམས་དང་མཛད་སྤྱོད་ལྟ་དགོངས་མཉམ་ཞིང་། དགོངས་པ་ལུང་སྟོན་ལས། །ཤིན་ཏུ་གྲངས་མེད་བསྐལ་པ་རུ། །སངས་རྒྱས་རྣམས་ཀྱིས་གང་མཁྱེན་པ། །སྔགས་པ་རྣམས་ཀྱི་དུས་གཅིག་ཏུ། །ཚེ་གཅིག་རྫོགས་པའི་བྱང་ཆུབ་ཐོབ། །ཅེས་དབང་རྣོན་ཚེ་གཅིག་ལ་གྲོལ་བའི་ཆོས་མྱུར་ལམ་མཐར་ཐུག་གི་མཚན་དོན་ཆུད་མ་ཟོས་པ་ཐུགས་ཉམས་སུ་བཞེས་པས་མཆོག་གི་དངོས་གྲུབ་བརྙེས་པའོ། །ཁྱད་པར་དུ་འོད་གསལ་རྫོགས་པ་ཆེན་པོ་ཡང་གསང་བླ་ན་མེད་པ་མན་ངག་སྡེའི་སྙིང་ཐིག་ཆེན་མོ་མ་བུ་དང་ཨ་ཏི་ཟབ་དོན་སྙིང་པོ་ལྕེ་བཙུན་ཆེན་པོའི་བི་མ་ལའི་ཟབ་ཏིག་སོགས་ཉམས་བཞེས་ཀྱི་སྙིང་པོར་གནང་བས་ཡིད་དཔྱོད་བློ་འདས་རིག་སྟོང་འོད་གསལ་ཆོས་སྐུ་ཆེན་པོའི་དགོངས་པའི་རྩལ་རྫོགས་ཤིང་ཉམས་ཀྱི་ཤུན་པ་དོར། མཉམ་རྗེས་རོ་གཅིག་ཏུ་གྱུར། བསྒོམ་བྱ་སྒོམ་བྱེད་ཀྱི་ཞེན་འཛིན་ཡལ། སྤྲོས་པའི་བརྫུན་ཕུག་རྡིབ། བྱར་མེད་ནམ་མཁའ་ལྟ་བུའི་རྣལ་འབྱོར་པ་ཆེན་པོ་ལ་བསྙེན་སྒྲུབ་ཆེད་དུ་གནང་བའི་སྐབས་ལས་གཞན་དུ་ཐུགས་དམ་ཞེས་པའི་སྒྲ་བོ་ཆེ་ཨ་འཐས་ཁྲིགས་ཆགས་འཛིན་སྟངས་ཅན་ཕྱིས་སུ་ཅི་ཡང་མེད་ཀྱང་། མ་འཁྲུལ་པའི་གནས་ལུགས་ཡེ་ཤེས་རང་སྣང་ཆེན་པོ་ཡངས་པ་ལ་ཕྱལ་བར་མ་ཤོར། རྒྱ་ཆད་ཕྱོགས་ལྷུང་ཀུན་བྲལ་བརྡལ་ཁྱབ་ཐིག་ལེ་ཆེན་པོའི་དབྱིངས་སུ་དུས་གསུམ་འདུ་འབྲལ་མེད་པར་བཞུགས་པ་ལས་ནམ་ཡང་མི་གཡེལ་བ་ཉིད་དེ། རྗེ་བླ་མ་མཆོག་གི་རྒྱུན་གྱི་བསྙེལ་གསོས་སྨོན་ལམ་དུ་འདེབས་མཛད་པའང་། ནང་གི་ཡེ་ཤེས་མངོན་དུ་མ་གྱུར་ནས། །ཟ་ཟིའི་སྤྱོད་པས་རང་མགོ་མི་བསྐོར་བ། །དབེན་གསུམ་བདུད་རྩིའི་གྲིབ་བསིལ་ལ་བརྟེན་ནས། །ཟུང་འཇུག་གྲུབ་པའི་གོ་འཕང་མངོན་བྱེད་ཤོག །ཟ་ཟིའི་ཉམས་ལ་མཆོག་འཛིན་རློམ་སེམས་སོགས། །འདིར་སྣང་བདུད་ཀྱི་དབང་དུ་མི་འགྲོ་བར། །ནམ་ཞིག་རང་དོན་རྫོགས་ནས་གཞན་གྱི་དོན། །མཁའ་ཁྱབ་ཞིང་དུ་སྲིད་པ་གནས་ཀྱི་བར། །གང་འདུལ་སྤྲུལ་པའི་རོལ་པ་ཚད་མེད་པས། །རྒྱལ་བ་རྒྱ་མཚོའི་རྣམ་ཐར་འཛིན་གྱུར་ཅིག །བདག་གི་རྒྱུ་འབྲས་དབྱེ་བ་ཅུང་ཤེས་ཀྱང་། །སྔོན་ལས་འཕྲལ་རྐྱེན་ངན་པའི་གཟེབ་ཏུ་ཚུད། །སྒོ་གསུམ་བྱ་བ་ཆོས་འགལ་འབའ་ཞིག་སྒྲུབ། །དེ་ཚུལ་བསམ་ན་སྙིང་རླུང་ལྡང་ལ་ཉེ། །འོན་ཀྱང་མཚན་ལྡན་བླ་མས་རྗེས་བཟུང་ཞིང་། །ཟབ་རྒྱས་གདམས་པའི་བདུད་རྩི་ཅི་འདོད་ཐོབ། །འགྲོ་དོན་སེམས་བསྐྱེད་བཟང་པོའི་སྨོན་ལམ་བཏབ། །ཐེག་ཆེན་རིགས་ཀྱི་སྐལ་ཆད་མིན་ནམ་སྙམ། །ཚེ་འདིའི་མི་ཚེ་ཡེང་མ་ལམ་ཟད་ཀྱང་། །ཕྱི་མའི་སྐྱེ་སྲིད་ཉེ་བར་ལེན་གྱུར་གང་། །ཉམས་དགའ་རིག་པ་དྭངས་པའི་དབེན་གནས་སུ། །བག་ཡོད་བདུད་རྩིའི་བཅུད་ཀྱིས་ལུས་འཚོ་བཞིན། །སྒྲུབ་པའི་རྒྱལ་མཚན་འཛུགས་པའི་སྨོན་ལམ་འཆའ། །ཅི་ལྟར་སྤྱོད་ཀྱང་རང་འདོད་འཁྲིས་དང་བྲལ། །གང་ལྟར་སྡོད་ཀྱང་གཞན་ཕན་འབའ་ཞིག་གཉེར། །ཇི་ལྟར་བྱས་རུང་ཆོས་ལ་མི་འདའ་བས། །སྲས་བཅས་རྒྱལ་བའི་རྣམ་ཐར་འཛིན་གྱུར་ཅིག །ནམ་མཁའ་ཇི་སྲིད་སེམས་ཅན་མཐའ་དེ་སྲིད། །ཇི་སྲིད་ལས་ཉོན་སྟོང་པར་མ་གྱུར་པ། །དེ་སྲིད་མི་སྐྱོ་བརྩོན་པའི་གོ་བགོས་ཏེ། །རྒྱལ་བ་སྲས་བཅས་ཕྲིན་ལས་སྒྲུབ་པར་ཤོག །དུས་གསུམ་རྒྱལ་བས་དབྱིངས་ནས་བྱིན་གྱིས་རློབས། །སེམས་དཔའ་རྣམས་ཀྱི་དགེ་བའི་གྲོགས་མཛོད་ལ། །ཆོས་མིན་རྟོག་པ་སྐད་ཅིག་མི་སྐྱེ་བར། །སྨོན་ལམ་མཐའ་རུ་ཕྱིན་པར་མཛད་དུ་གསོལ། །ཅེས་རང་གི་སྨོན་ལམ་དུ་བྱ་བའི་ཚུལ་ཉུང་ངུ་འདིའང་པདྨ་བི་ཛས་སོ། །ཞེས་གསུངས་པ་དང་མཐུན་པའི་ཉམས་བཞེས་སུ་མཛད་ཅིང་། ལས་བྱེད་པ་རྣམས་ལ། གསོན་གཤིན་རྣམས་ཀྱི་དངོས་རྫས་འབུལ་བ་རྟེན་བཞེངས་ལ་འགྲོ་ངེས་དགོས་རང་རེ་ལ་སྦྱིན་པ་རེད་པས། དེ་ལ་བསམ་ན་དཀོན་མཆོག་གི་དཀོར་ཡང་ཡིན་ལ། ང་དང་ཆོས་འབྲེལ་ཡོད་ལུགས་ལ་དཔག་ན་བླ་མའི་དཀོར་ཡང་རེད་པས་རྫས་ངན་འདི་འདྲ་ལ་ལོངས་སྤྱོད་དགོས་རྒྱུ་འདི། ཁོ་མེད་ན་མི་འབྱུང་། ཁོ་ཡོད་པ་ལས་རང་གཞན་ལ་གནོད་ཆེན་པོ་འབྱུང་། ཁྱད་པར་ཕྱི་མར་ཕན་པའི་རེ་ལྟོས་བྱས་ནས་སྦྱིན་པའི་དངོས་རྫས་འདི་ཉིད་ཀྱི་རྣམ་སྨིན་ནི། ཇག་རྐུན་གྱིས་ཕྲོགས་པའི་ཟས་ཞིག་ལས་ལྕི་སྟེ། དགྲ་ཇག་གིས་ཟོས་པ་ལ་མངོན་སུམ་ཚད་མས་འཕྲོག་བཅོམ་གྱིས་བླངས་པ་ཡིན་པས་སེམས་ཅན་བསླུས་པའི་ཉེས་ལྟུང་མེད། རང་ལ་ཕྱི་མར་ཕན་ཐོགས་སུ་རེ་བས་བྱིན་ཀྱང་ཕྱི་མར་དེ་ལ་ཕན་ཐོགས་སྦྱིན་པའི་ནུས་པ་ཕྲ་གཤིས་དད་ལྡན་བསླུས་པའི་རྣམ་སྨིན་ངན་པ་དེའི་ནོན་པ་ཡིན་གསུངས་ནས་ཐུགས་སྐྱོ་ཚད་མེད་པ་དང་། ཁྱེད་རྣམས་ནས་ལས་འབྲས་དང་རྣམ་སྨིན་ལ་བསམ་མནོ་ཞིབ་པར་ཐོངས་དང་སྔོན་བསགས་བཟང་པོའི་ལུས་རྟེན་ཁྱད་འཕགས་ཐོབ་པ་འདི་འཕེན་བྱེད་དགེ་བས་འཕངས་པ་ཡིན་པས་དོན་མེད་དུ་མ་སོང་བ་ཞིག་བྱེད་དགོས། དཀོར་ཟས་ལ་འཛེམ་མེད་དུ་སྤྱོད། སེམས་ཅན་གྱི་སྲོག་བཅད་དུ་འཇུག་པར་བྱེད་པ་རྣམས་རྫོགས་བྱེད་མི་དགེ་བས་རྫོགས་ནས་འོག་ནས་འོག་ཏུ་ངན་སོང་མུ་མཐའ་མེད་པར་འཁྱམས་དགོས་བྱུང་ན་དེ་ལས་ཕུང་ཚབས་ཆེ་བ་ཅི་ཡོད་ཅེས་རྒྱུན་དུ་བཀའ་སྩལ་པར་མཛད་དོ། །དེ་སྐད་དུ། རྣམ་ཐར་གསོལ་འདེབས་ལས། དབེན་པ་གསུམ་བསྟེན་རིམ་གཉིས་ལམ་ལ་བརྩོན། །མཚན་བཅས་མཚན་མེད་རྣལ་འབྱོར་དུ་མ་ཡི། །གསང་གསུམ་རྡོ་རྗེ་བཞི་དང་དབྱེར་མེད་གྲུབ། །རྣལ་འབྱོར་དབང་ཕྱུག་ཆེན་པོར་གསོལ་བ་འདེབས། །རྩ་གསུམ་ལྷ་ཡི་དགྱེས་ཞལ་རྟག་ཏུ་ངོམ། །ཡི་དམ་གྲུབ་པའི་གདེང་ཚད་ཕུལ་དུ་བྱུང་། །ཌཱ་ཀི་ཆོས་སྐྱོང་ཕྲིན་ལས་གཡེལ་མེད་སྒྲུབ། །གྲུབ་པའི་ཁྱུ་མཆོག་ཆེན་པོར༴ འཁོར་འདས་ཆོས་ཀུན་རང་རིག་གཉུག་མར་རྫོགས། །སྣང་ཤེས་རང་གྲོལ་གཏད་མེད་ཟང་ཐལ་ཆེ། །ལྷུན་གྲུབ་འོད་གསལ་སྣང་བ་འབྱམས་སུ་ཀླས། །ཆོས་ཟད་བློ་འདས་ཆེན་པོར་གསོལ་བ་འདེབས། །ཞེས་འབྱུང་ངོ་། །དཔལ་ལྡན་བླ་མའི་རྣམ་པར་ཐར་པ་ལས། རྗེ་བླ་མ་ཆོས་ཀྱི་རྒྱལ་པོས་རང་དོན་དུ་ཐོས་བསམ་སྒོམ་པ་ཇི་ལྟར་མཛད་པའི་སྐབས་ཀྱི་གླེང་བའི་སརྒ་སྟེ་གཉིས་པའོ།། །།༈ ད་ནི་གཞན་དོན་དུ་འཆད་རྩོད་རྩོམ་པའི་ཚུལ་ལས་འཕྲོས་པའི་རྣམ་པར་ཐར་པ་ཉུང་ངུའི་ངག་གི་འཆད་པ་ལ། དེ་ཡང་མདོ་སྔགས་རིག་གནས་ཀུན་ལ་མཁྱེན་པའི་དཀྱིལ་འཁོར་རྒྱས་ཤིང་ཤེས་བྱ་ཐམས་ཅད་ལ་ཆགས་ཐོགས་ཀྱི་སྒྲིབ་པ་སྤངས་པས་ངེས་དོན་དུ་རྗེ་བཙུན་འཇམ་དཔལ་དཔའ་བོ་དང་རྣམ་དབྱེར་མེད་པ་ཀུན་གཟིགས་ཆོས་ཀྱི་ཉི་མ་དེ་ཉིད་ཀྱིས་མཐའ་ཡས་པའི་འགྲོ་ཚོགས་རྒྱ་མཚོ་ཡོངས་སུ་སྨིན་པ་དང་གྲོལ་བར་བྱ་བའི་ཕྱིར། གནས་སྐབས་ཕན་པ་དང་། མཐར་ཐུག་གི་ངེས་ལེགས་མཆོག་སྦྱིན་པའི་ཆེད་དུ་སྲིད་པའི་རིམ་བརྒྱའི་འཇིགས་འཕྲོག་ཞི་བསིལ་བདུད་རྩིའི་སྨན་ཆེན་འདོད་འབྱུང་ཆོས་ཀྱི་གྲུ་ཆར་ཆེན་པོ་སྐལ་བཟང་གདུལ་བྱའི་ཞིང་སར་རྟག་པར་འབེབས་པས་རྣམ་གྲོལ་སྐུ་བཞིའི་ལོ་ཏོག་རྒྱས་པར་མཛད་ཅིང་། གང་ཞིག་སྲིད་པའི་རྒྱ་མཚོ་ཆུ་སྲིན་འཇིགས་རུང་གི་གནས་ལས་མ་བརྒལ་བ་རྣམས་བརྒལ། ཐར་པའི་མཆོག་དམ་པར་མ་སྒྲོལ་བ་རྣམས་སྒྲོལ། རྒྱལ་སྲས་སློབ་པ་དབུགས་མ་དབྱུང་བ་རྣམས་ཡོངས་སུ་མྱ་ངན་ལས་འདས་པ་ཆེན་པོར་དབུགས་དབྱུང་བའི་ཕྲིན་ལས་ཀུན་དགའ་རོལ་མོ་ཕྱོགས་དུས་གནས་སྐབས་མཐའ་ཡས་མུ་མེད་པར་འབྱམས་ཀླས་ཤིང་གསུང་གཅིག་དབྱངས་ཀྱི་བྱེད་ལས་གདུལ་བྱའི་མོས་པ་དང་འཚམས་པར་འཇུག་ཅིང་སྣང་བས་འགྲོ་ཀུན་དགའ་བར་བྱེད་པའི་གསུང་གི་ཕྲིན་ལས་ཕུན་ཚོགས་དགེ་ལེགས་བྱེ་བའི་འབྱུང་གནས་ཀྱི་གཏེར་ཆེན་པོར་བྱིས་བློས་གཞལ་བའི་ཡུལ་ལས་འདས་ཀྱང་། རེ་ཞིག་བདག་ཅག་མོས་ལྡན་ངོར་གང་གི་དཔལ་གྱི་མགུལ་ནས་ལེགས་པར་བསྒྲགས་པའི་དམ་པའི་ཆོས་ཀྱི་སྦྱིན་པ་རྒྱ་ཆེན་པོ་བསྙེན་སྒྲུབ་གནང་བའི་སྐབས་མ་གཏོགས་ཞུ་བ་པོ་མོས་ལྡན་སུ་བྱུང་གི་གསོལ་བ་གང་བཏབ་པ་ཐམས་ཅད་བརྩེ་ཆེན་ཡེ་ཤེས་ཀྱི་གཟིགས་པས་བསྐྱངས་ཤིང་ཐུགས་རྗེས་ཡར་བར་མི་འདོར་བས་རྗེ་གུ་ཎའི་ཡང་སྲིད་རིན་པོ་ཆེའི་དབུས་བློ་གསལ་ཁ་ཤས་ལ་སུམ་རྟགས། སྙན་ངག་ཐེངས་ཁ་ཤས་ཕྱག་ཁྲིད། སྤྱོད་འཇུག ཡིད་བཞིན་མཛོད། ཡོན་ཏན་མཛོད། མཁས་འཇུག སྡོམ་གསུམ་རྣམ་ངེས། ངལ་གསོ་སྐོར་གསུམ། བསྐྱེད་རིམ་ཟུང་འཇུག་སྙེ་མ། གསང་སྙིང་། རྒྱུད་བླ་སོགས་སྔ་ཕྱིར་ཐེངས་ཁ་ཤས་རེ་གསུངས་ཞིང་། ཁྱད་པར་བསྟན་པའི་སྙིང་པོ་རྡོ་རྗེ་ཐེག་པ་ཡིན་པས། བསྟན་པ་ལ་སྨན་པའི་འཆད་ཉན་གྱི་རྒྱུན་བཟང་མི་ནུབ་པར་བྱ་བའི་ཐུགས་དགོངས་རྒྱ་ཆེན་པོས་གསང་བའི་བདག་པོ་བློ་གྲོས་མཐའ་ཡས་ཀྱི་ངོ་མཚར་བཀའ་ཡི་བསྡུ་བ་མཛོད་ཆེན་རྣམ་པ་ལྔ་ལས་སྔགས་མཛོད་མ་གཏོགས་གཞན་རྣམས་ལན་རེ་འཆད་མཛད་ཅིང་། ཉང་གུར་བྱང་གསུམ། སངས་གླིང་། རྡོར་གླིང་། པདྨ་ལས་འབྲེལ་རྩལ། ཀུན་མཁྱེན་སྔ་ཕྱི། སྨིན་གླིང་གཏེར་ཆེན། མཁྱེན་བརྩེ་རིན་པོ་ཆེ། རྗེ་གུ་ཎ་སོགས་ཀྱི་གཏེར་ཆོས་རྣམས་སྔ་ཕྱི་ལན་གྲངས་དང་། སྔ་འགྱུར་བཀའ་མ་འདུས་པ་མདོ་དབང་ཆེན་མོ་དང་། སྒྱུ་འཕྲུལ་ཞི་ཁྲོ་སོ་ལུགས་ཡང་དག སེམས་ཀློང་མན་ངག་སྡེ་གསུམ། སྙིང་ཐིག་ཡ་བཞི། བཀའ་དགོངས་སོགས་ཚར་རེ་མ་འཆད་པ་མེད་པ་དང་འགའ་ཞིག་ནི་ལན་གྲངས་མང་པོར་འཆད། བཀའ་མ་གཞན་རྣམས་ཀྱང་ཚར་རེ། མདོར་ན་རྗེ་ཉིད་ལ་བཞུགས་པའི་སྨིན་གྲོལ་གསན་པ་རྣམས་ལས་རྒྱལ་བཀའ་རིན་པོ་ཆེ་དང་རྙིང་རྒྱུད་ཕྱེད་ཙམ་གསུངས་མཚམས་བསྙུན་པས་འཕྲོ་ལུས་པ་མ་གཏོགས་གཞན་རྣམས་ཚར་རེ་གསུངས་གྲུབ་པ་དང་། ཕལ་ཆེར་ལན་གྲངས་སྔ་ཕྱིར་སྩལ་པ་སྟེ། དཀོན་མཆོག་བརྩེགས་པ་ལས། ནམ་མཁའ་ཇི་སྙེད་ཁྱབ་གྱུར་པ། །སྐུ་ཡིས་ཀྱང་ནི་དེ་སྙེད་ཁྱབ། །སྐུ་ཡིས་ཇི་སྙེད་ཁྱབ་གྱུར་པ། །འོད་ཀྱིས་ཀྱང་ནི་དེ་སྙེད་ཁྱབ། །འོད་ཀྱིས་ཇི་སྙེད་ཁྱབ་གྱུར་པ། །གསུང་གིས་ཀྱང་ནི་དེ་སྙེད་ཁྱབ། །ཅེས་གསུངས་པ་ལྟར། སྐུ་དང་གསུང་གི་མཛད་པ་མཐའ་ཡས་པས་ཞིང་ཁམས་ཀུན་ཏུ་ཁྱབ་པ་ལས་ཞིང་འདིའི་གདུལ་བྱའི་ཆ་ཤས་ཉུང་ངུ་རྣམས་ལའང་གསུང་གི་སྣང་བ་ཆེན་པོས་ཁྱབ་པར་མཛད་པ་ནི། བདག་ཅག་གུས་སློབ་རྣམས་ཀྱི་བཀའ་དྲིན་བྱང་ཆུབ་སྙིང་པོའི་བར་དུ་གཞལ་བར་དཀའ་ཞིང་འཆད་པའི་གནས་སྐབས་སུ་ཡང་ཚིག་ཉུང་ལ་དོན་ཟབ་ཅིང་རྒྱ་ཆེ་བའི་ངག་གི་འདོམ་པར་མཛད་པ་ལས་དོན་གྱི་སྟོང་པའི་ཚིག་གྲིམ་ལ་བཤད་རྒྱ་ཆེ་བ། མཛེས་ཁྲིགས་ཅན་འབྲེལ་ལ་མ་འབྲེལ་བའི་ལུང་སྦྱོར་ལྟར་སྣང་རིགས་པ་སད་སུད་མང་པོས་མི་མགོ་རང་མགོ་སྐོར་ནས་སློབ་མའི་རྒྱུད་ཆུད་གསོན་པ་དེ་འདྲ་མ་ཡིན་པར་ཟང་ཟིང་དོན་དུ་མི་གཉེར་ཞིང་དད་ལྡན་སློབ་མའི་རྒྱུད་དང་བསྟན་པ་དང་སེམས་ཅན་གྱི་དོན་ལ་དགོངས་པའི་བྱང་ཆུབ་མཆོག་སེམས་རྒྱ་ཆེན་པོས་འཆད་པར་མཛད་པ་ན། ལྡབ་ལྡིབ་དང་། ཟློས་སྐྱོན་དང་། གོང་འོག་འཁྲུག་འཛིང་། དལ་མྱུར་ཆེས་པའི་སྐྱོན་ཐམས་ཅད་སྤངས་ཤིང་རྣམ་པར་སྙན་པ། བློ་ལ་བཟུང་བདེ་བ། དོན་གྱིས་གནད་ལ་ཕིགས་པ་ཤ་སྟག་དང་། ཁྱད་པར་གསང་སྔགས་སྟོན་པའི་སློབ་དཔོན་གྱི་མཚན་ཉིད་ཕྱི་ནང་གི་དེ་ཉིད་བཅུ་ལ་མངའ་དབང་འབྱོར་པས་དཀྱིལ་འཁོར་གྱི་ལས་རབ་འབྱམས་སྒྲུབ་པ་ལ་དབང་ཞིང་ཐ་ན་རྐྱེན་སེལ་གྱི་ཚེ་དབང་ཙམ་བསྐུར་བར་མཛད་ནའང་། བྱ་སླ་སྤམ་ཁྱེར་མི་མཛད་པར་ཆོ་ག་སྦྱོར་དངོས་རྗེས་གསུམ་ཚང་བ་རིག་འཛིན་བརྒྱུད་པའི་ཕྱག་བཞེས་ལྟར་གནང་བར་མཛད་པས་བྱིན་རླབས་ཀྱི་བབ་ཆེན་པོ་དང་ལྡན་ཞིང་བརྒྱུད་པའི་སྲོལ་ཀ་ཟིན་ངེས་པར་མཛད་པས་བསྟན་པའི་སྲོག་མཐུད་པར་གྱུར། འདོན་ཚིག་གི་གོང་འོག་དང་འཕྲལ་གྱི་ཡོ་བྱད་ཙམ་ལ་ཞིབ་ཚགས་ཡང་ཡང་བྱེད་ཅིང་དོན་གནད་སྒོམ་དོན་དང་རྒྱུད་དང་མན་ངག་གི་ཟབ་གནད་ནི་ཅི་ཡིན་ཀྱང་མི་ཤེས་པའི་བླུན་པོ་ཏི་ཐུགས་ཀྱང་མ་ཡིན་ཞིང་། གདུལ་བྱའི་དབང་པོ་མཆོག་དམན་གྱི་ཚུལ་ལ་གཏན་ནས་མི་དཔྱད་པར་རང་ཉིད་ལྟ་དགོངས་མཐོན་པོའི་ཁུར་གྱིས་ཐམས་ཅད་ལ་ངེས་དོན་ཟབ་མོ་འབའ་ཞིག་འཆད་པ་ལས་བློ་སྦྱོང་སོགས་དམན་ཆོས་སུ་རློམ་པའི་ཞྭ་དཔེ་ལྷམ་འགེབ་དང་། ཡང་ཟབ་དོན་གྱི་ཁྲིད་ཅེས་གླེང་ས་མེད་པའི་དམན་ལ་མཆོག་འཛིན་ཀྱང་མ་ཡིན་པ་གང་ཟག་སོ་སོའི་རྒྱུད་ཚོད་དང་མཐུན་པའི་བློ་སྦྱོང་གི་སྐོར་དང་། ཕྱག་རྫོགས་ཀྱི་ཉམས་ཁྲིད་ཀྱང་འདེབས་པར་གནང་ཞིང་། དེ་ཡང་ཚིག་ཁྲིད་ཙམ་མིན་པར། སློབ་མའི་རྒྱུད་དང་འཚམ་པ་གོ་མྱོང་རྡོ་རུས་འཕྲོད་པ་མ་བྱུང་གི་བར་དུ་སྨིན་ཁྲིད་ཞིབ་བཅའ་ཕྱག་ལེན་དུ་བཏབ་པ་མཛད་པས་རྟོགས་པ་དོན་བརྒྱུད་དང་ལྡན་པའི་ངེས་གསང་སྙིང་པོའི་བསྟན་པ་རིན་པོ་ཆེའི་སྲོག་འཛིན་པ་སྟེ། མདོར་ན་ཆོས་ཀྱི་སྦྱིན་པ་ནི་ཕན་ཡོན་ཚད་མེད་པའི་འཇུག་ངོགས་དམ་པར་གྱུར་པ་ཡང་། མདོ་ལས། གང་ལ་ཕན་ཕྱིར་ང་ཡི་ཆོས། །ཚུལ་བཞིན་བསྟན་པས་མཆོད་གྱུར་ཏེ། །མེ་ཏོག་བྱུག་པ་མར་མེ་ཡི། །རྒྱལ་བ་ཡང་དག་མཆོད་མ་ཡིན། །ཞེས་རྒྱལ་བ་མཆོད་པའི་མཆོག་ཏུ་བསྔགས་པ་དང་། བྱམས་པ་སེངྒེ་སྒྲ་ཡི་མདོ་ལས། གང་ཞིག་གངྒཱའི་ཀླུང་སྙེད་སངས་རྒྱས་ཞིང་། །རིན་ཆེན་བདུན་གྱིས་ཡོངས་སུ་བཀང་བྱས་ནས། །རབ་དགའི་སེམས་ཀྱིས་རྒྱལ་ལ་འབུལ་བ་དང་། །གང་གིས་སེམས་ཅན་གཅིག་ལ་ཚིགས་བཅད་བྱིན། །རིན་ཆེན་སྦྱིན་པ་ཤིན་ཏུ་རྒྱ་ཆེན་དེས། །ཚིགས་བཅད་སྦྱིན་པ་སྙིང་རྗེས་སྒྲུབ་དེ་ལ། །ཆར་ཡང་མི་ཕོད་གྲངས་སུའང་མ་ཡིན་ན། །གཉིས་དང་གསུམ་དུ་བསམ་དུ་ག་ལ་ཡོད། །ཅེས་སོགས་རྒྱ་ཆེར་བཀའ་སྩལ་པ་ལྟར་བསྟན་འཛིན་སྐྱེས་བུ་དམ་པ་རྣམས་ཀྱི་མཛད་པའི་རྣམ་ཐར་རྒྱ་མཚོའི་སྙིང་པོ་ཕུལ་དུ་བྱུང་བའོ། །གང་ཞིག་ལོག་པར་སྨྲ་བ་ཚར་གཅོད་པའང་རང་ཕྱོགས་ལ་ཆགས་ཤིང་། གཞན་ཕྱོགས་ལ་སྡང་བའི་སུན་འབྱིན་གྱི་རིགས་པ་ནི་རང་རྒྱུད་མ་རུངས་པར་བྱེད་ཅིང་ཆགས་སྡང་འཕེལ་བའི་རྒྱུ་ལས་མ་མཆིས་ཤིང་། སྙིགས་དུས་འདིར་རྩོད་པས་བསྟན་པ་རིན་པོ་ཆེ་གསལ་བར་ནུས་པ་མཁས་དབང་འགའ་ཞིག་གི་རྣམ་ཐར་ལས་གཞན་རྣམས་ཀྱི་བསྟན་དཀྲུག་དང་ཕུང་སེལ་གྱི་རྒྱུ་ལས་མི་འོང་བར་འདུག་པས་རྗེ་འདིས་ཀྱང་དུས་ཀུན་སྙིང་པོའི་དབེན་པའི་ཆོས་སྤང་གི་ས་བོན་གྲུབ་མཐའི་ཕྱོགས་ཞེན་གཏན་ནས་མི་མཛད་པ་བསྟན་པ་ཐམས་ཅད་འགལ་མེད་དུ་འཛིན་ཅིང་བསྟན་བཅོས་རྣམས་ཀྱི་སྐབས་ན་དག་སྣང་གི་ཟོལ་མས་རང་གཞན་གྱི་གྲུབ་མཐའ་གོང་འོག་ཐམས་ཅད་བསྲ་བསྲེའི་གཏད་སོ་གཅིག་ཀྱང་མེད་པ་མི་མཛད་པ་རང་ལུགས་བླ་མ་གོང་མའི་བཞེད་པ་གཙོ་བོར་སྟོན་པ་ཙམ་ལས་རང་ལྟ་ལ་ཆགས་པའི་སྒྲུབ་དང་སུན་འབྱིན་གྱི་ཚེར་མས་གཞན་རྒྱུད་སྲེག་པ་མི་མཛད་ཀྱང་། མངོན་རྗེས་ཀྱི་ཚད་མ་ཡང་དག་དང་། ལྟར་སྣང་གི་རྣམ་དབྱེ་ལེགས་པར་ཕྱེད་ཅིང་རྟོག་གེའི་ཚིག་དོན་རྣམས་མ་ནོར་བ་མཁྱེན་པ་ཡང་ཉིད་ཀྱི་གསུང་རབ་རྣམས་ལས་དངོས་དང་ཤུགས་ཀྱིས་གསལ་བ་དང་། རྒྱ་བོད་མཁས་གྲུབ་ཀྱི་བསྟན་བཅོས་ལུང་གི་ཚད་མ་དང་། དཔེ་ཉེར་མཇལ་གྱི་ཚད་མས་གཞལ་ཞིང་ཆོས་བཟང་རིག་པའི་རྣམ་དཔྱོད་བདུད་ཀྱི་བསླུ་བ་མེད་པས་གཏན་ལ་དབབ་པའི་དོན་ལེགས་པར་གསུངས་པའི་ཚོགས་རྣམས་ཀྱིས་སྙིགས་དུས་ཀྱི་ལྟ་སྤྱོད་ངན་པ་དང་འཁྲུལ་པ་ཐམས་ཅད་སེལ་བར་མཛད་ཅིང་། དོན་གསུམ་ཐེ་ཚོམ་མེད་པའི་བློ་ཡང་དག་པ་སྟོན་པར་མཛད་པས། ཀུན་མཁྱེན་བུ་རམ་ཤིང་པའི་བསྟན་པ་རིན་པོ་ཆེ་སྤྱི་དང་། ཁྱད་པར་སྔ་འགྱུར་གྱི་བསྟན་པ་མར་མེ་འཆི་ཀ་མ་ལྟ་བུ་འདི་འཇམ་མགོན་མི་ཕམ་སྨྲ་བའི་སངྒཻ་དང་། བདག་གི་ཀུན་མཁྱེན་བླ་མ་ཡབ་སྲས་འདི་གཉིས་ཀྱི་གསོ་བར་མཛད་པའོ། །དེ་ཡང་བསྟན་པ་ཇི་སྲིད་གནས་ཀྱི་བར་ཉམས་པ་མེད་པའི་ཆེད་དུ་བསྟན་པའི་བཙས་སུ་བཞག་པའི་གསུང་རབ་རིན་པོ་ཆེའི་མཆོད་སྡོང་འཁྲུལ་པའི་གཡའ་དྲིས་མ་གོས་པའི་བསྟན་བཅོས་ལེགས་པར་གསུངས་པའི་ཚོགས་རྣམས་ཀྱང་། ཇི་སྐད་དུ། དོན་མེད་དོན་ལོག་དོན་དང་ལྡན། །ངན་གཡོ་བརྩེ་བྲལ་སྡུག་བསྔལ་སྤངས། །ཐོས་རྩོད་སྒྲུབ་པ་ལྷུར་ལེན་པ། །བསྟན་བཅོས་དྲུག་བྲལ་གསུམ་དུ་འདོད། །ཅེས་ངན་པའི་སྐྱོན་དྲུག་དང་བྲལ་ཞིང་བཟང་པོའི་ཡོན་ཏན་གསུམ་དང་ལྡན་པ་རྒྱུ་སྙིང་རྗེ་ཆེན་པོས་ཀུན་ནས་སློང་བ་ལས་རང་ཆེ་མཁས་འདོད་ཀྱི་སྙེམས་པ་དང་གཞན་ལ་ཁྱད་གསོད་སོགས་ཡེ་ནས་མི་མངའ་ཞིང་། ཐུགས་བརྩེ་བས་ལེགས་པར་འདོམས་པའི་ཆོས་རྣམས་ཀྱང་འདུལ་བ་ལ་འཇུག མདོ་སྡེ་ལ་སྣང་། མངོན་པའི་ཆོས་ཉིད་དང་མི་འགལ་ཞིང་རང་བཟོ་དང་། ཕོ་ཚོད། གསར་བཞག་གི་གྲུབ་མཐའ་དང་དཔེ་སྣ་བསྡུས་པ་ལྟ་བུ་མ་ཡིན་པ་སྔོན་བྱོན་ལོ་པཎ་སྐྱེས་ཆེན་མཁས་གྲུབ་རྣམས་ཀྱི་བཀའ་དྲིན་རྗེས་སུ་གསོ་བའི་ཆེད་དུ་འཕགས་ཡུལ་གྱི་བཀའ་དང་བསྟན་བཅོས་རང་ལུགས་ཀྱི་མཁས་པ་ཆོས་ཀྱི་སྤྱན་ལྡན་གཟུ་བོར་གནས་པ་སྔོན་བྱོན་གོང་མ་རྣམས་ཀྱི་གསུང་རྒྱུན་དང་། ཁྱད་པར་འཇམ་མགོན་མི་ཕམ་ཆོས་རྗེའི་ཞལ་ལུང་དང་ལེགས་བཤད་གསལ་བར་བྱེད་པའི་རྒྱན་དུ་ཐུགས་རྩོམ་གནང་བའང་རྩོམ་པ་པོ་ཆོས་ཉིད་ཀྱི་བདེན་པ་རྟོགས། ཡི་དམ་ལྷ་ཡི་ལུང་བསྟན་ཐོབ། རིག་པའི་གནས་ལྔ་ལ་མཁས་པ་སྟེ་བསྟན་བཅོས་རྩོམ་པའི་རྒྱུ་ཚོགས་ཚང་བས་ལེགས་པར་གསུངས་པའི་ཚི ག་རྣམས་ཀྱང་སྨྲ་བའི་དབང་ཕྱུག་རྣམས་ཀྱི་མིག་གི་དགའ་སྟོན་དང་། མགུལ་པའི་རྒྱན་དུ་གྱུར་པ་བསྔགས་པའི་པད་དཀར་ཕྱོགས་བརྒྱར་འཐོར་བའི་འོས་སུ་གྱུར་པ་ཤ་སྟག་དང་། རྗེ་འདི་བར་སྦས་པའི་ཚུལ་དུ་བཞུགས་པས་སྔོན་དུས་རྒྱལ་ཁམས་ཡོངས་ལ་མཁས་པའི་གྲགས་སྒྲ་མི་ཆེ་ཡང་། འཇམ་མགོན་མི་ཕམ་ཆོས་རྗེས་དགོངས་གཏད་ཤིན་ཏུ་ཆེ་བ་དང་། འདས་རྗེས་ཞལ་ཆེམས་སུ། ཞེ་ཆེན་རྒྱལ་ཚབ་སློབ་གཉེར་ཅུང་ཡོད་པས་དཔེ་ཆ་རྣམས་དེ་ལ་ཕུལ་ཅེས་གསུང་གི་བསྔགས་པ་དོན་དང་ལྡན་ཞིང་རྗེ་དེ་ཉིད་གཤེགས་ཁར་ཐུགས་རྒྱུད་དགོངས་པའི་བྱིན་རླབས་འཕོས་པ་དང་། ཡེ་ཤེས་ཀྱི་སྐུས་ཡང་ཡང་རྗེས་སུ་བཟུང་བས་མཁྱེན་རྟོགས་ཡེ་ཤེས་ཀྱི་རྩལ་ཕྱོགས་མེད་དུ་ཆེས་ཆེར་རྒྱས་པར་གྱུར་པ་ནི་ཀུན་གྱིས་མངོན་སུམ་དུ་གྱུར་པ་དང་། ཕྱིས་ཉིད་མདུན་བླ་མ་རིན་པོ་ཆེའི་བསྟན་བཅོས་དང་མན་ངག་གི་སྐོར་གྱི་ཁྲིད་ལུང་སོགས་ཞུས་ཚེ་རྗེ་ཉིད་ནས་འཇམ་མགོན་མི་ཕམ་རིན་པོ་ཆེ་སྐུ་བཞུགས་པའི་སྐབས་སུ་མ་གསན་པ་དག་ཀྱང་ལུང་གནང་སྟེ་འཇམ་མགོན་བླ་མའི་འཕྲོར་ཁོ་བོའི་མིང་བྲིས་ཞེས་བཀའ་སྩལ་པའི་ཚིག་གི་ཟུར་གྱིས་ཀྱང་ཤེས་ནུས་པའོ། །དེ་ལྟར་ཚིག་དོན་ཕུན་སུམ་ཚོགས་པའི་བསྟན་བཅོས་དཔྱོད་ལྡན་མཁས་པ་རྣམས་ཀྱི་ཡིད་འཕྲོག་པའི་གསུང་རབ་ཇི་ལྟར་བཞུགས་པའི་མཚན་བྱང་རྒྱས་པ་དཀར་ཆགས་སུ་གསལ་བ་ལྟར་ལ་འདིར་ཡང་གཙོ་ཆེ་བ་རགས་བསྡུས་ཙམ་བཀོད་ན། སྟོན་པ་བདེ་བར་གཤེགས་པ་དང་རྒྱལ་སྲས་སེམས་དཔའ་ཆེན་པོ་རྒྱ་བོད་ཀྱི་ལོ་པཎ་མཁས་གྲུབ། བླ་མ་དགེ་བའི་བཤེས་གཉེན་རྣམས་ལ་བསྟོད་ཚོགས་ཤིན་ཏུ་མང་པོ་དང་། སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱི་ཆོས་འབྱུང་ལེགས་བཤད་པདྨ་དཀར་པོའི་རྗིང་བུ། རིན་ཆེན་གཏེར་གྱི་མཛོད་ཆེན་པོ་ལས་འཕྲོས་པའི་གཏམ་དཔག་བསམ་རབ་རྒྱས་ལྷ་ཡི་རྔ་སྒྲ། ཡི་གེའི་སྦྱོར་བ། བསྟན་རྩིས་ཉེར་མཁོ་རབ་གསལ་མེ་ལོང་འབྱུང་རྩིས་ཀྱི་རེའུ་མིག་ཉེར་མཁོ་བལྟ་བདེར་སྤེལ་བ་ཀུ་མུ་དའི་རྫིང་བུ། བལ་མོའི་ལྡིང་སྐོར་གྱི་མོ་བཤད་ཨུཏྤལ་དཀར་པོའི་ཕྲེང་བ། སྒྲ་ཀ་ལཱ་པའི་མཚམས་སྦྱོར་ལྔ་པའི་ལག་ལེན་བདུད་རྩིའི་ཉིང་ཁུ། དག་ཡིག་བློ་གསལ་མགུལ་རྒྱན། སྙན་ངག་དོན་འགྲེལ་པད་དཀར་རྫིང་བུ། དོན་རྒྱན་སོ་ལྔའི་དཔེར་བརྗོད་བློ་གསལ་དགའ་བྱེད། ཐེག་པ་ཆེན་པོའི་བློ་སྦྱོང་དོན་བདུན་མའི་ཁྲིད་ཡིག་ཟབ་དོན་སྦྲང་རྩིའི་བུམ་བཟང་། སྔོན་འགྲོ་སྤྱིི་ལ་སྦྱོར་ཆོག་པའི་ཐུན་མོང་གི་སྔོན་འགྲོའི་ཁྲིད་ཡིག་ཀུན་མཁྱེན་ཞལ་ལུང་རྣམ་གྲོལ་ཤིང་རྟ། དཀོན་མཆོག་རིན་པོ་ཆེ་དང་ལས་འབྲས་ལ་ཡིད་ཆེས་བསྐྱེད་པའི་གཏམ་རྒྱུད་མདོ་ནས་བཏུས་པ་ཡང་དག་ཐར་ལམ་བགྲོད་པའི་ཐེམ་སྐས། སྨིན་གླིང་ཐུགས་ཆེན་བདེ་གཤེགས་ཀུན་འདུས་ཀྱི་སྔོན་འགྲོའི་ཁྲིད་རབ་གསལ་སྒྲོན་མེ། མཆོག་གླིང་ཐུགས་སྒྲུབ་བར་ཆད་ཀུན་སེལ་གྱི་སྔོན་འགྲོ་ལྷ་རྫས་མེ་ཏོག སྔ་འགྱུར་རྡོ་རྗེ་ཐེག་པའི་བསྐྱེད་རིམ་སྤྱི་ཡི་རྣམ་གཞག་རབ་གསལ་ནོར་བུའི་མེ་ལོང་། ལས་དང་པོ་པ་ལ་མཁོ་བའི་བསྐྱེད་རྫོགས་གནད་བསྡུས་ཉུང་གསལ་གོ་བདེ། རྒྱུད་བླ་མའི་སྤྱི་དོན་རྣམ་པར་གཞག་པ་དད་པའི་རླབས་ཕྲེང་རྣམ་པར་གཡོ་བའི་ཆུ་གཏེར། སྤྱོད་འཇུག་ཤེར་ལེའི་མཆན་འགྲེལ་དོན་གསལ་མེ་ལོང་། ཐེག་དགུའི་རྣམ་བཤད་རིན་ཆེན་ཐེམ་སྐས། ངེས་དོན་སྙིང་པོའི་གནད་བསྡུས་པ་རིན་པོ་ཆེའི་སྒྲོན་མེ། དེའི་ས་བཅད། བདེན་གཉིས་བསལ་བཞག་དང་བྲལ་བའི་དོན་གྱི་དགོངས་བཤད་གློག་གི་སྒྲོན་མ། བཤེས་སྤྲིང་དང་། ཡིད་བཞིན་མཛོད་ཀྱི་མཆན་འགྲེལ་པདྨ་དཀར་པོའི་འཁྲི་ཤིང་། ཟུར་ཆུང་བའི་ཞལ་གདམས་བརྒྱད་ཅུ་པ་སོགས་ཀྱི་མཆན་འགྲེལ། ཐེག་དགུའི་ཚོགས་བཤད་ནོར་བུའི་ཏམ་བུ་ར། སྡོམ་གསུམ་ཚོགས་བཤད། གསང་སྙིང་ཚོགས་བཤད། ཚོགས་གཏམ་བྱ་ཚུལ། སྔ་འགྱུར་བསྟན་རྒྱས་སྨོན་ལམ་རྣམ་བཤད་བསྟན་པ་མི་ནུབ་པའི་རྒྱལ་མཚན། གུ་རུ་ཆོས་ཀྱི་དབང་ཕྱུག་གི་ཕུར་པ་སྤུ་གྲིའི་རྣམ་བཤད་རིག་འཛིན་ཞལ་ལུང་། མཁྱེན་བརྩེ་རིན་པོ་ཆེའི་སྙན་བརྒྱུད་ཡང་ཕུར་སྦྲགས་མའི་རྣམ་བཤད་གྲུབ་གཉིས་འདོད་འཇོའི་དགའ་ཚལ། རྙིང་ལུགས་དབང་གི་སྔོན་འགྲོའི་སྤྱི་བཤད་ཨུཏྤ་ལའི་ཆུན་པོ། ལྷག་པའི་ལྷ་ཡི་བསྙེན་ཡིག་སྐོར་རིན་ཆེན་ཕྲེང་བ། རྩ་གསུམ་ལྷག་པའི་ལྷའི་སྒྲུབ་ཐབས་རྒྱུན་ཁྱེར་མང་པོ། ཚེ་ལྷ་རྣམ་གསུམ། སྨན་བླ། སངས་རྒྱས་སྟོང་། ཉེ་སྲས་བརྒྱད། ས་ཡི་སྙིང་པོ། གནས་བརྟན་བཅུ་དྲུག མཁན་སློབ་ཆོས་གསུམ། རྗེ་འབངས་ཉེར་ལྔ་རྣམས་ཀྱི་མཆོད་ཆོག བསམ་ལྷུན་མཆོད་ཆོག སྔ་འགྱུར་རྡོ་རྗེ་ཐེག་པའི་ཤིང་རྟ་རྣམས་གཙོ་བོ་གྱུར་པའི་བླ་མཆོད། རྟེན་གསུམ་བཞེངས་པ་ལས་འཕྲོས་པའི་གཏམ་ཚོགས་གཉིས་པད་ཚལ་བཞད་བྱེད་ཡིད་ཆེས་ལུང་གི་ཉི་མ། འཇམ་མགོན་མི་ཕམ་ཆོས་རྗེའི་གསུང་གི་དཀར་ཆག རྗེ་དེ་ཉིད་ཀྱི་གདུང་རྟེན་གཉིས་ཀྱི་དཀར་ཆག་ངོ་མཚར་སྣང་བ། བླ་མའི་རྣལ་འབྱོར་དང་། ཞལ་གདམས་གསོལ་འདེབས་གསུང་མགུར་གཏམ་ཚོགས་སྐོར་ནང་གསེས་ཤིན་ཏུ་མང་བ་དང་། བཅའ་ཡིག་བླང་དོར་རབ་གསལ། བསང་གསོལ་སོགས་ཐོར་བུ་སྣ་ཚོགས། བཀྲ་ཤིས་མཆོད་ཆོག བསྔོ་སྨོན་ཤིས་བརྗོད་སྐོར་བཅས་བཞུགས་པ་སྟེ། དེ་ཡང་མདོ་སྡེ་རྒྱན་ལས། གང་ཞིག་རྒྱལ་བའི་བསྟན་པ་འབའ་ཞིག་གི། །དབང་བྱས་རྣམ་གཡེང་མེད་ཡིད་ཅན་གྱིས་བཤད། །ཐར་པ་ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྤྱི་བོས་བློངས། །ཞེས་གསུངས་པ་ལྟར་ལེགས་བཤད་ཁྱད་པར་དུ་འཕགས་པ་འདི་རྣམས་བློ་གསལ་རྣམས་དང་། ཁྱད་པར་སྔ་འགྱུར་གྱི་བསྟན་སྒོར་ཞུགས་པ་རྣམས་ཀྱི་སྙིང་གི་ནོར་བུར་གཟུང་བར་རིགས་སོ། །དཔལ་ལྡན་བླ་མའི་རྣམ་པར་ཐར་པ་ལས། གཞན་དོན་དུ་འཆད་རྩོད་རྩོམ་གསུམ་བགྱིས་པས་རྒྱལ་བའི་བསྟན་པ་ལ་བྱ་བ་ཇི་ལྟར་མཛད་པའི་སརྒ་སྟེ་གསུམ་པའོ།། །།མཁས་པ་མཁས་པའི་རྒྱུ་སྐར་ཚོགས་ཀྱི་ཉེ་བར་བསྙེན་པའི་དབུས་ན་མཚན་མོའི་མགོན་པོ་བཞིན། །གྲུབ་པ་གྲུབ་པའི་རི་བོར་མཐོན་པོར་འཇིགས་མེད་མཁའ་ལྡིང་གཤོག་རླབས་ཡངས་པས་བསྐྱོད། །དོན་གཉིས་ལྷུན་གྲུབ་ཆོས་ཀྱི་རྒྱལ་པོས་ལེགས་གསུངས་མ་ཎིའི་ཕྲེང་བ་སྤེལ་ལེགས་མཛེས། །ཤེས་རབ་གསེར་གྱི་ཉི་མིག་ལྡན་པའི་བློ་གསལ་བྱེ་སྙེད་དགའ་བའི་བདུད་རྩིར་གྱུར། །ཁྱོད་གསུང་ཟབ་ཅིང་རྒྱ་ཆེ་བས། །འཕགས་ཡུལ་ཤིང་རྟ་ཆེ་རྣམས་ནི། །གངས་ལྗོངས་ཐུབ་བསྟན་སྲོལ་འབྱེད་ཚེ། །སྙིགས་དུས་སླར་ཡང་བྱོན་ནམ་ཅི། །ཕྱོགས་ལྷུང་སྡང་བའི་རླུང་གིས་མ་དཀྲུགས་པའི། །བཤད་པའི་ཆུ་ཀླུང་གང་གཱའི་རྒྱུན་བཟང་གི། །འགྲོ་རྣམས་སྐོམ་པའི་དབུལ་བ་ཀུན་སེལ་ཞིང་། །ཐུབ་བསྟན་པདྨའི་དགའ་ཚལ་དར་ལ་བབས། མཁས་པར་གྲགས་པའི་བསྟན་བཅོས་ཕལ་དང་ཕལ། །དོན་བཟང་འབྲས་བུའི་སྟོང་པའི་སྤུན་པ་དང་། །ཆུ་ཤིང་དང་འདྲའི་ཁལ་རྒྱབ་ལོངས་པ་རྣམས། །གང་གསུངས་ཆ་ཤས་ཙམ་གྱིས་མོག་པོར་བྱེད། །འདི་དང་འདི་འདྲའི་ལེགས་བཤད་ཁྱད་འཕགས་རྣམས། །རིན་ཆེན་དབྱིག་ལྟར་གུས་པས་གཅེས་བཟུང་ནས། །གཞན་ལ་འཆད་དང་ཉམས་སུ་བླང་བ་རྣམས། །བསྟན་པ་འཛིན་པའི་སྐྱེས་བུ་དམ་པར་ངེས། །ཞེས་པའང་བར་སྐབས་ཀྱི་ཚིགས་སུ་བཅད་པའོ།། །།༈ ད་ནི་གཉིས་ཀའི་དོན་དུ་མཁས་བཙུན་བཟང་གསུམ་གྱི་རྟོགས་པ་བརྗོད་པ་མདོར་བསྡུས་པའི་གཏམ་གྱི་སྦྱོར་བ་ཉུང་ངུས་བསྙད་པར་བྱ་སྟེ། དེ་ཡང་བདག་ཅག་གི་སྐྱབས་གནས་དཔལ་མགོན་བླ་མ་ཉིད་ནི་རྒྱལ་སྲས་དམ་པ་རྣམས་ཀྱི་ཐུ་བོོ་མཁྱེན་རབ་ཀྱི་བདག་པོ་འཕགས་པ་འཇམ་དཔལ་དབྱངས་དང་དབྱེར་མ་མཆིས་པ་ཆོས་རྣམས་ཀྱི་ཤེས་བྱའི་དེ་ཉིད་རང་དང་སྤྱིིའི་མཚན་ཉིད་ཇི་ལྟ་བ་བཞིན་དུ་གཟིགས་ཤིང་སྒྲིབ་མེད་ཡེ་ཤེས་ཀྱི་ཆོས་སྤྱན་ཉེས་པའི་རྡུལ་ཐམས་ཅད་དང་བྲལ་བས་ཆོས་དང་ཆོས་ཉིད་ཐམས་ཅད་རོ་མཉམ་ཡེ་ཤེས་ཆེན་པོའི་ངང་ལས་མི་གཡོ་ཞིང་འདའ་བ་མེད་པའི་ཕྱག་རྒྱས་བཏབ་པས། རང་རིག་བྱང་ཆུབ་སེམས་ཀྱི་ཀློང་དུ་འུབ་ཆུབ་ཅིང་ཤེས་དང་ཤེས་བྱ་རོ་གཅིག་དབྱེར་མེད་ཆེན་པོའི་ངང་དུ་རྫོགས་པས་མཐའ་གཅིག་ཏུ་སྐྱེ་བ་འདི་ལ་སྦྱངས་པ་ཙམ་ལ་མ་ལྟོས་པར་སྐུ་སྐྱེ་གོང་མའི་གོང་མར་གྱུར་པ་ནས། རྒྱལ་བའི་ཆོས་ཐམས་ཅད་ལ་ཤིན་ཏུ་གོམས་འདྲིས་བྱས་པའི་སྟོབས་ལས་སྐུ་ཚེ་འདིར་འབད་པ་ཆུང་ངུས་ཆོས་རྣམས་ལན་རེ་ཟུང་རེ་ཐོས་པ་དང་གཟིགས་པ་ཙམ་གྱིས་མཁྱེན་པའི་ཡེ་ཤེས་ཀྱི་རིག་པའི་རྩལ་ཁ་ཕྱོགས་མེད་དུ་རྒྱས་ཤིང་རང་བྱུང་གི་ཡེ་ཤེས་ཀྱི་སྣང་བ་མཁའ་དང་མཉམ་པ་ལ་དབང་འབྱོར་པས་སྤོབས་པའི་གཏེར་ཆེན་བརྒྱད་གྲོལ་བར་གྱུར་ཏེ། རྒྱ་ཆེར་རོལ་བ་ལས། བརྗེད་པ་མེད་པ་དྲན་པའི་གཏེར་དང་། བློས་རབ་ཏུ་འབྱེད་པས་བློ་གྲོས་ཀྱི་གཏེར་དང་། མདོ་སྡེ་ཐམས་ཅད་ཀྱི་དོན་གྱི་རྣམ་པ་ཁོང་དུ་ཆུད་པས་རྟོགས་པའི་གཏེར་དང་། ཐོས་པ་ཐམས་ཅད་ཀུན་ཏུ་འཛིན་པས་གཟུངས་ཀྱི་གཏེར་དང་ལེགས་པར་བཤད་པས་སེམས་ཅན་ཐམས་ཅད་ཚིམ་པར་བྱེད་པས་སྤོབས་པའི་གཏེར་དང་། དམ་པའི་ཆོས་ཡོངས་སུ་བསྲུང་བས་ཆོས་ཀྱི་གཏེར་དང་། དཀོན་མཆོག་གསུམ་གྱི་རིགས་རྒྱུན་མི་གཅོད་པ་བྱང་ཆུབ་སེམས་ཀྱི་གཏེར་དང་། མི་སྐྱེ་བའི་ཆོས་ལ་བཟོད་པ་ཐོབ་པས་སྒྲུབ་པའི་གཏེར་ཏེ་གཏེར་ཆེན་པོ་བརྒྱད་པོ་དེ་དག་ཐོབ་པར་འགྱུར་རོ། །ཞེས་པ་ལྟར་བླ་མ་དང་ལྷག་པའི་ལྷ་དབྱེར་མེད་པའི་བྱིན་རླབས་ཐུགས་དབུས་སུ་ཐིམ་པས་ཕྱི་ནང་གི་རིག་པའི་གནས་མཐའ་དག་ལ་མཁྱེན་རབ་པདྨའི་འདབ་མ་ལྟར་རྒྱས་ཤིང་། ཤེས་བྱ་རིགས་པའི་གནས་ཆུང་ལྔ་དང་གནས་ཆེན་ལྔ་སྟེ་བཅུ་ཡི་ཡ་གྱལ་ཁྱད་པར་དུ་སྙན་ངག་བྱེད་པ་ལ་རྗེ་འདི་འགྲན་ཟླ་མེད་པ་སྟེ་སྐུ་ན་ཤིན་ཏུ་ཕྲ་མོའི་དུས་ནས་བསྟོད་ཚོགས་སོགས་རྩོམ་པ་ལ་དཔྱོད་ལྡན་མཁས་པའི་ཡིད་དབང་མེད་དུ་འགུགས་པའི་ཚིག་སྦྱོར་ཕུན་སུམ་ཚོགས་པའི་བདག་ཉིད་ཅན་ཏེ་སྒྲ་དབྱངས་ལྷ་མོ་ཐུགས་མཚོར་རོལ་ཞིང་དགྱེས་ཞལ་ཡང་ཡང་ངོམ་པས་འཕགས་ཡུལ་གྱི་སློབ་དཔོན་དཔའ་བོའི་ཞབས་དང་དབྱེར་མ་མཆིས་པ་ལྟ་བུ་ཡིན་ནོ། །དེ་ཡང་སྙན་ངག་གི་རང་བཞིན་ནི་བརྗོད་བྱ་གང་ཞིག་རྗོད་བྱེད་སྙན་ཅིང་འཇེབས་ལ་ཉམས་འགྱུར་དུ་མ་དང་ལྡན་པས་ཟབ་བརླིང་རྟོགས་པར་དཀའ་བའི་ཚིག་སྦྱོར་ཕུན་སུམ་ཚོགས་པའི་མཚན་ཉིད་དེ། ཇི་སྐད་དུ། དེ་ཕྱིར་མཁས་པས་སྐྱེ་རྒུ་རྣམས། །བྱེ་བྲག་རྟོགས་ལ་མངོན་དགོངས་ནས། །རྣམ་བཀྲ་ལམ་ལྡན་ཚིག་རྣམས་ཀྱི། །བྱ་བའི་ཆོ་ག་ངེས་པར་སྦྱར། །ཞེས་པ་ལྟར་གྱི་མཚན་ཉིད་དང་ལྡན་པ་ལྕི་ཡང་གི་སྡེབ་ལེགས་པའི་རྣམ་གསལ་ཚིག་གི་ཕྲེང་བ་བཻཌཱུཪྱ་བསྟར་ལ་བརྒྱུས་པ་ལྟ་བུའི་དོན་བཟང་པོའི་ལྕི་བ་རྗེ་བླ་མ་འདིའི་གསུང་རབ་རྣམས་ཕྱི་མའི་དུས་ན་བསྟན་བཅོས་བྱེད་པ་རྣམས་ཀྱི་ནང་ནས། བརྒྱ་བྱིན་གྱིས་ཐོགས་པའི་ནོར་བུ་རིན་པོ་ཆེ་ལྟ་བུའོ། །གང་ལ་མཁས་པའི་ཆོས་དེ་ལའང་སྤྱིར་ཆོས་ཀྱི་སྒྲ། ཇི་སྐད་དུ། ཆོས་ནི་ཤེས་བྱ་ལམ་དང་ནི། །མྱ་ངན་འདས་དང་ཡིད་ཀྱི་ཡུལ། །བསོད་ནམས་ཚེ་དང་གསུང་རབ་དང་། །འབྱུང་འགྱུར་ངེས་དང་ཆོས་ལུགས་ལའོ། །ཞེས་སྐབས་ཀྱི་འཇུག་སྒོ་བཅུ་ལ་འཇུག་ཀྱང་། འདིར་བསོད་ནམས་དང་། ལམ་དང་། མྱང་འདས་གསུམ་གྱི་བརྗོད་བྱའི་དོན། བརྗོད་བྱ་དང་རྗོད་བྱེད་ལ་ལྟོས་ནས། ལུང་རྟོགས་གཉིས། ལུང་གི་ཆོས་གསུང་རབ་ཡན་ལག་བཅུ་གཉིས། གཉེན་པོའི་སྒོ་ནས་སྡེ་སྣོད་གསུམ་དུ་དབྱེ་ཞིང་དེ་ལས་ལུང་གི་ཆོས་ནི་རྟོགས་པའི་དོན་ལ་འཇུག་པར་བྱེད་པའི་བརྗོད་པ་ཕུན་སུམ་ཚོགས་པ་མཐའ་དག་སྟེ། དེ་ལའང་འདས་པ་དང་མ་འདས་པ་གཉིས་ལས། དང་པོ་ནི། བརྟག་པ་བརྒྱད་སོགས་འཁོར་བའི་ཆོས་དང་ལྡན་པ། གཉིས་པ་ནི་དེ་བཞིན་གཤེགས་པའི་ཆོས་ཁམས་མཐའ་དག་ངེས་པའི་དོན་ལ་འབབ་ཅིང་གཞོལ་བར་འགྱུར་བ་ལས་འབྲས་བུ་རྟོགས་པའི་དམ་ཆོས་ཞེས་བྱ་བའོ། །དེ་ཡང་ཐུན་མོང་གི་རིག་པའི་གནས་ལ། གྲངས་ཀྱི་གནས་དང་། འཇིག་རྟེན་གྱི་ཁམས་ཞིབ་མོར་གཏན་ལ་དབབ་པར་བྱེད་པའི་སྐར་རྩིས་དང་། འབྱུང་རྩིས་ཀྱི་རྣམ་གཞག་དང་། བྲྀཏྟཱ་ཛ་ཏིའི་དབྱེ་བའི་སྡེབ་སྦྱོར་གྱི་བྱེ་བྲག་མང་པོ། ཟློས་གར་གྱི་ཆར་གཏོགས་དབྱངས་དང་རོལ་མོའི་ཉམས་འགྱུར་དང་མཚན་ཉིད། སྙན་ངག་ནི་གོང་དུ་སྨོས་པ་ལྟར་དང་། མངོན་བརྗོད་ཀྱི་བསྟན་བཅོས་འཆི་མེད་འདོད་འཇོ་དང་། གཞན་ཡང་སྔར་གྱི་མཁས་པ་རྣམས་ཀྱི་བྱས་པའི་མིང་གི་མངོན་བརྗོད་རྣམས་ཀྱང་ལེགས་པར་མཁྱེན་ཅིང་། སྒྲ་ཚད་གཉིས་ལ་སྦྱོང་བ་རྒྱ་ཆེར་མ་མཛད་ཀྱང་། སྒྲ་ཡི་བྱིངས་རྐྱེན་གྱི་རྣམ་འགྱུར། ཚད་མའི་འགྲོ་ཕྱོགས་རྣམས་ཀྱང་དེང་སང་གི་ལོ་ཟླ་མང་པོར་སྦྱངས་པ་རྣམས་ལས་ཀྱང་མཁྱེན་པ་ཟབ་ཅིང་། བཟོ་གནས་ཀྱང་བྱ་སླ་ཚེགས་ཆུང་མང་དུ་མཁྱེན་པ་དང་། རྟེན་གསུམ་དང་གཞལ་ཡས་ཀྱི་ཐིག་ཚད་སོགས་ཤིན་ཏུ་ངེས་པ་དང་། གསོ་བ་རིག་པ་ནི་ཕྱག་ལེན་དུ་བཏབ་པ་མི་གནང་ཡང་། ལུས་དང་རྩ་ཡི་གནས་ཚུལ་གསོ་བྱ་གསོ་བྱེད་གསོ་ཐབས་ཀྱི་མཚན་ཉིད་རྣམས་ཤིན་ཏུ་གསལ་བར་མཁྱེན་ཅིང་དཔལ་ལྡན་རྒྱུད་བཞི་ལ་ཐུགས་རྩིས་ཤིན་ཏུ་ཆེ་བར་མཛད་དོ། །ནང་དོན་རིག་པ་རྒྱུ་མཚན་ཉིད་ཐེག་པའི་མདོ་ཡི་བསྟན་དོན། ཆོས་ལྔ། རང་བཞིན་གསུམ། བདག་མེད་གཉིས། རྒྱ་ཆེན་མངོན་པའི་ཕྱོགས་ཀྱི་མཁས་པར་བྱ་བའི་གནས་བཅུ་སྟེ། ཕུང་པོ་དང་། ཁམས་དང་། སྐྱེ་མཆེད་དང་། རྟེན་འབྲེལ། གནས་དང་གནས་མ་ཡིན། དབང་པོ་དང་། དུས་དང་། བདེན་པ་དང་། ཐེག་པ་དང་། འདུས་བྱས་འདུས་མ་བྱས་རྣམས་ལ་མཁས་པ་དང་། གསང་སྔགས་རྡོ་རྗེ་ཐེག་པ་ཐུན་མོང་དང་ཐུན་མིན་ཁྱད་པར་མཆོག་གསང་རྫོགས་པ་ཆེན་པོའི་དགོངས་དོན་གཏན་ལ་དབབ་པ་ལ་རྒྱལ་བ་རིག་འཛིན་བརྒྱུད་པའི་ཞལ་ལུང་བཞིན་སྨྲ་བ་ནི་ཀུན་མཁྱེན་བླ་མ་འདི་ཉིད་ལ་མཚུངས་ཟླར་འོས་པ་འགའ་ཡང་མ་མཆིས་ཤིང་། རྗེ་འཇམ་པའི་དབྱངས་མི་ཕམ་རིན་པོ་ཆེའི་ཟིན་བྲིས་རྣམས་ཕྱོགས་གཅིག་ཏུ་བསྒྲིགས་པ་གཉུག་མ་འོད་གསལ་གྱི་དོན་གསལ་བར་སྟོན་པའི་བསྟན་བཅོས་ཆེན་པོ་དང་། གཉུག་སེམས་ཟུར་དཔྱད་སོགས་ཀྱང་མངོན་དུ་སྣང་བ་མཛད་པ་པོ་ནི་རྗེ་འདིས་མཁྱེན་རབ་ཀྱི་བཀའ་དྲིན་དུ་གྱུར་པས་སྙིང་པོའི་དོན་སྨྲ་བ་རྣམས་ཀྱི་ཁོག་པའི་སྙིང་དཔྲལ་བའི་མིག་ལྟར་གྱུར་པ་དང་། རྗེ་ཉིད་ཀྱི་གསུང་། བདེན་གཉིས་རྣམ་དབྱེ། ཐེག་དགུའི་རྣམ་དབྱེ་སོགས་ཀྱིས་ཀྱང་རྟོགས་པར་ནུས་ཤིང་སྐུ་གཞོན་དུས་ཀྱི་བསྟན་བཅོས་རྩོམ་པ་ཁ་ཤས་ཀུན་གཟིགས་མི་ཕམ་རིན་པོ་ཆེའི་སྤྱན་སྔར་འབུལ་བ་ན། ཐུགས་དགྱེས་པའི་རྩེར་སོན་པ་དང་། བསྟན་བཅོས་བརྩམ་པར་བཀས་བསྐུལ་ཞིང་། གསུང་བརྩམས་རིགས་བསྟན་པའི་གཙིགས་སུ་ཆེ་བས་འཐོར་ཟགས་སུ་མ་སོང་བར་ཕྱོགས་གཅིག་ཏུ་བསྡུ་དགོས་པར་ཡང་བཀའ་སྩལ་པའོ། །ཁྱད་པར་དུ་བཀའ་འཁོར་ལོ་ཐ་མའི་དགོངས་དོན་རྒྱལ་ཚབ་ས་བཅུའི་དབང་ཕྱུག་གི་ལེགས་པ་རྣམས་པར་ཕྱེ་བའི་བསྟན་བཅོས་ཆེན་པོ་དང་ཀླུ་སྒྲུབ་ཀྱི་སེམས་འགྲེལ་དང་། བསྟོད་ཚོགས་རྣམས་ཀྱི་བསྟན་དོན་ངེས་དོན་དབུ་མ་ཆེན་པོ་ཕྱིར་མི་ལྡོག་པའི་སེང་གེའི་སྒྲ་བསྒྲགས་པ་ལ་ཀརྨ་པ་རང་བྱུང་རྡོ་རྗེ། ཇོ་ནང་ཀུན་མཁྱེན་ཡབ་སྲས། ཀུན་མཁྱེན་དྲི་མེད་འོད་ཟེར། སྨིན་གླིང་པ་སྐུ་མཆེད། ཀུན་གཟིགས་ཆོས་ཀྱི་འབྱུང་གནས། ཀཿཐོག་རིག་འཛིན་ཆེན་པོ། པན་ཆེན་ཤཀ་མཆོག མང་ཐོས་ཀླུ་སྒྲུབ། སྐྱབས་མགོན་དགེ་པཎ་སོགས་རིས་མེད་མཁས་གྲུབ་རྒྱ་མཚོའི་སྙིང་ནོར་མདོ་སྔགས་ཟུང་འབྲེལ་གྱི་ལྟ་བ་འདི་ཉིད་ལ། དེང་སང་གི་སྐབས་འདིར་མཁས་གྲུབ་མང་པོ་གཞན་ལ་ཕན་པའི་བློ་ཅན་ཆོས་ཀྱི་སྤྱན་ལྡན་འགའ་ཞིག་གི་དབུ་མ་ཐལ་འགྱུར་གྱི་གྲུབ་མཐའ་རྩལ་དུ་འདོན་པ་དང་། དགོས་དབང་ཁྱད་པར་ཅན་གྱིས་འགོགས་པའི་ཚུལ་མཛད་པ་ན་ཅོལ་ཆུང་གི་སྐྱེ་བོ་ཕལ་ཆེར་དེའི་ཞལ་གཡམ་ལ་རྒྱུག་ནས་སྐུར་བ་མི་བཟད་པ་བཏབ་ཅིང་ལྟ་བའི་བྱ་ཐན་དུ་རྩི་ནའང་རང་ཉིད་བཟོད་དུ་མེད་པའི་དམྱལ་བའི་སྡུག་བསྔལ་ཉེ་བར་སྒྲུབ་པའི་སྔ་ལྟས་ལས་ངེས་དོན་གྱི་རི་མོ་སྲུབ་ཏུ་མེད་ཅིང་། ངེས་དོན་སྙིང་པོའི་མདོ་སྡེ་ཉི་ཤུ་བླ་མེད་སྔགས་རྒྱུད་རྒྱ་མཚོར་དཔང་པོར་བཞུགས་ཤིང་། རྒྱབ་རྟེན་འཇིགས་མེད་རྡོ་རྗེའི་རི་བོ་ལྟར་བརྟན་པ་དང་། རྒྱུད་བླ་མ་ངེས་དོན་དུ་ཁས་བླངས་བཞིན་གཞུང་གི་དགོངས་པ་དྲང་དོན་དུ་ཀྱོགས་པ་སོགས་རྒྱལ་ཚབ་ས་བཅུའི་དབང་ཕྱུག་གི་དགོངས་པ་དཀྲུགས་པ་དེ་དག་སེལ་བའི་ཕྱིར་དུ་ཀུན་མཁྱེན་བླ་མ་འདིས་ལེགས་བཤད་ངེས་དོན་སྙིང་པོ་དང་། བདེན་གཉིས་གློག་ཞགས་སུ་རྩལ་དུ་བཏོན་ཅིང་འཇིགས་བྲལ་ཕྱོགས་ཐམས་ཅད་ལས་རྣམ་པར་རྒྱལ་བའི་སེང་གེའི་སྒྲ་བསྒྲགས་པས་ལྟ་བ་ངན་པ་ཟིལ་གྱི་གནོན་ཅིང་ངེས་དོན་དབུ་མ་ཆེན་པོ་སྲིད་ཞིའི་མཐའ་གཉིས་ལ་མི་གནས་པའི་རྒྱལ་བའི་དགོངས་བཅུད། འཕགས་པའི་ཉམས་བཞེས། མཁས་པའི་གྲུབ་མཐའ། གྲུབ་པའི་དབང་ཕྱུག་རྣམས་ཀྱི་རྟོགས་དོན་ཆེས་ཆེར་གསལ་བར་བྱས་པས་བདེ་བར་གཤེགས་པའི་བསྟན་པ་ལ་མཆོག་ཏུ་བྱ་བ་བྱས་པ་སྟེ། མདོ་ལས། ང་ནི་མྱ་ངན་འདས་ཕྱིན་ནས། །མི་ཡི་ནང་ནས་ལ་ལ་ཞིག །སེམས་ཅན་རྣམས་པ་ཐམས་ཅད་ལ། །བདེ་གཤེགས་སྙིང་པོ་ཡོད་དོ་ཞེས། །མོས་པ་རྣམ་དག་བྱེད་ནུས་ན། །སངས་རྒྱས་བཀའ་དྲིན་འཚོབ་པ་ཡིན། །ཞེས་དང་། མྱང་འདས་ཆེན་པོ་ལས། སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་དོ་ཞེས་སྟོན་པར་བྱེད་པའི་སེམས་ཅན་དེ་དག་ནི་ཡོན་ཏན་དཔག་ཏུ་མེད་པ་དང་ལྡན་པ་སྟེ། དམ་པའི་ཆོས་འདོད་པའི་རིགས་ཀྱི་བུ་དེ་དག་ནི་ལས་གྲངས་མེད་པ་བྱས་པ་རྣམས་ཀླད་པ་ན་བ་དང་། རིམས་ཀྱིས་བཏབ་པ་དང་། ཟུག་རྔུ་དང་བསྐུར་པ་ཙམ་གྱིས་བྱང་བར་འགྱུར་རོ། །ཞེས་དང་། དེ་བཞིན་གཤེགས་པ་ལ་རྟག་པའི་ཆོས་ཅན་དུ་ཡིད་ཆེས་ན་གང་ཟག་དེ་ནི་མེ་ཏོག་ཨུ་དུམ་ཝཱ་ར་ལྟར་ཤིན་ཏུ་དཀོན་པའོ། །ང་མྱ་ངན་ལས་འདས་ནས་གང་གིས་ཐེག་པ་ཆེན་པོ་མདོ་སྡེ་ཤིན་ཏུ་ཟབ་མོ་འདི་ཐོས་ནས་དད་པའི་སེམས་སྐྱེས་ན། དེ་ནི་མ་འོངས་པའི་དུས་སུ་བསྐལ་པ་བརྒྱ་སྟོང་གི་བར་དུ་ངན་སོང་དུ་ལྟུང་བར་མི་འགྱུར་བར་རིགས་པར་བྱའོ། །ཞེས་དང་། རིགས་ཀྱི་བུའམ་རིགས་ཀྱི་བུ་མོ་རྣམས་ཀྱིས་དེ་བཞིན་གཤེགས་པ་རྟག་གོ །དམ་པའི་ཆོས་ནུབ་པར་མི་འགྱུར་རོ། །དགེ་འདུན་མེད་པར་མི་འགྱུར་རོ། །སྙམ་དུ་ཤེས་པ་ལ་བརྩོན་པར་བྱས་ན་དེ་དག་ཀྱང་ང་དང་འདྲ་བར་སངས་རྒྱས་ཀྱི་གནས་སུ་བལྟ་བར་བྱའོ། །ཞེས་སོགས་སྟོན་པ་བཀའ་དྲིན་ཅན་གྱིས་རྒྱ་ཆེར་རྗེས་སུ་གདམས་པར་མཛད་པ་ལ་བདག་ཅག་གི་ཀུན་གཟིགས་ཆོས་ཀྱི་སྣང་བ་འདིས་ཐུགས་གཞོལ་ཏེ་རྒྱལ་སྲས་འཇམ་དབྱངས་དང་། བྱམས་པ། འཕགས་པ་ཀླུ་ཐོགས་གཉིས་རྣམས་ཀྱི་དགོངས་པའི་གནད་གཅིག་ཏུ་དྲིལ་ཞིང་བཀའ་འཁོར་ལོ་བར་མཐའ་རྒྱབ་འགལ་དུ་མི་འགྱུར་བ་གཅིག་ཏུ་འདུས་པའི་དབྱེན་ཟླུམ་མཆོད་རྟེན་ཆེན་པོ་རྩོད་པ་དང་བྲལ་བ་འགྲན་ཟླས་དབེན་པ་ཉིད་དུ་ཤེས་ཤིང་གུས་པར་བྱ་བ་གསོལ་བ་འདེབས་སོ། །དེ་བཞིན་དུ་བཙུན་ཞིང་བརྟན་པའི་ཡོན་ཏན་ཀྱང་སྡོམ་པ་གསུམ་གྱི་ཉེས་པའི་དྲི་མས་མ་གོས་ཤིང་། ཕྱི་སོ་ཐར་གྱི་དབང་དུ་བྱས་ན་བཙུན་པ་འདུལ་བ་འཛིན་པའི་ཁྱུ་མཆོག་ཉེས་བྱས་ཕྲ་མོ་ཙམ་ལ་བག་ཡངས་སུ་ཇི་མི་སྙམ་དུ་མི་མཛད་པས་ཉེར་བ་འཁོར་གཉིས་པ་ལྟ་བུ། དབང་པོ་ཞི་བ། ཉེ་བར་ཞི་བ། དུལ་བའི་དཔལ་དང་ལྡན་པ། ཀུན་ཤེས་པ། རྣམ་པར་གྲོལ་བའི་ལམ་མངོན་དུ་མཛད་པས་སྲིད་པའི་ཉེས་སྦྱོར་ཐམས་ཅད་ཟད་པར་བྱེད་པ་འཕགས་པ་དགྲ་བཅོམ་པ་ཆེན་པོ། ནང་བྱང་ཆུབ་སེམས་དཔའི་དབང་དུ་བྱས་ན། གནུབས་ཆེན་སངས་རྒྱས་ཡེ་ཤེས་རིན་པོ་ཆེའི་མདོ་འགྲེལ་ལས། འཁོར་ལོས་སྒྱུར་བའི་རྒྱལ་པོ་ལ་བརྟེན་པའི་མི་ལ་དཔུང་བཞིའི་བག་ཚ་བ་མེད་པ་ལྟར་ཐེག་པ་ཆེན་པོར་སེམས་སྐྱེས་པས་རིགས་མི་འགྱུར་བ་ལ་ལོག་རྟོག་གི་སྡུག་བསྔལ་གྱིས་ཉམ་ང་བ་མེད་དོ་ཞེས་དང་། དཔེར་ན་རྡོ་རྗེ་རིན་པོ་ཆེ་ཆག་ཀྱང་ནོར་བུ་རིན་པོ་ཆེ་ཟིལ་གྱིས་གནོན་ཅིང་། རྡོ་རྗེ་ཆག་པའི་ཡོན་ཏན་མི་སྟོང་བར་སྤྱོད་པར་དབང་བའི་ལྟོགས་པའི་སྡུག་བསྔལ་འཇོམས་པ་བཞིན་ཐེག་པ་ཆེན་པོའི་དོན་དང་ལྡན་པའི་རྣལ་འབྱོར་པས་གཞུང་ཀུན་ནས་མ་དྲངས་པའི་ཆ་ཉམས་ཀྱང་བསམ་པའི་དོན་དང་མ་བྲལ་བས་རྒྱུའི་ཐེག་པ་ཆེ་ཆུང་གཉིས་ཀ་ཟིལ་གྱིས་གནོན་ཏེེ་དེ་ཅིའིི་ཕྱིར་ཞེ་ན། རྒྱུའི་ཐེག་པ་ཆུང་ངུ་པ་ལྟ་སྨོས་ཀྱང་མེད་ན། ཐེག་པ་ཆེན་པོའང་བདེན་པ་རེས་འཇོག་གི་སེམས་ལ་གནས་པས་གཉིས་མེད་ཀྱི་མཐའ་མི་མཐོང་སྟེ། དཔེར་ཁབ་མིག་སྐུད་པས་ནམ་མཁའ་མི་མཐོང་བ་བཞིན་ནོ། །དེ་བས་ན་བདེན་པ་གཉིས་རིས་མེད་པ་ཡེ་ཤེས་ཀྱི་སྟོབས་སོ། །དེ་ནས་དེ་མ་ཐག་ཏུ་དོན་ཟབ་མོ་རིག་པ་ལ་ཤར་ནས་འབྲས་བུ་ཆོས་ཀྱི་དབུལ་བ་སེལ་ཏེ། ཞེས་སོགས་རྒྱ་ཆེར་གསུངས་པ་ལྟར། བྱམས་པ་དང་སྙིང་རྗེའི་ས་གཞི་ལ་བྱང་ཆུབ་སེམས་དཔག་བསམ་གྱི་ལྗོན་པ་རབ་ཏུ་རྒྱས་པས་མཐའ་ཡས་པའི་སེམས་ཅན་ཐམས་ཅད་ལ་ཕན་བདེའི་འབྲས་བུ་སྟེར་ཞིང་རང་འདོད་ཡིད་བྱེད་ཀྱི་རྟོག་པ་ལ་ཞུགས་པ་ཐམས་ཅད་རིགས་དང་བློ་ཡི་སྟོབས་ཀྱིས་ཟིལ་གྱིས་གནོན་པས་སེངྒེ་གངས་ལ་གནས་པ་ལྟར། འཁོར་བར་མི་ལྡོག་ཅིང་སྐྱེ་མེད་ཀྱི་ཆོས་ལ་བཟོད་པ་ཐོབ་སྟེ་མཐོང་བའི་ལམ་གྱི་ཡེ་ཤེས་མངོན་དུ་བྱས་ཟིན་པ་བརྩེ་ཆེན་སྙིང་རྗེའི་དབང་ཕྱུག་འཕགས་མཆོག་ཕྱག་ན་པད་དཀར་འཆང་བ་དང་དབྱེར་མ་མཆིས་ཤིང་སྲིད་པའི་འགྲོ་བ་དུཿཁས་དུབ་པ་རྣམས་བདེ་ནས་བདེ་བར་འདྲེན་ཞིང་ཐར་པའི་ལམ་མཁན་མ་རིག་པའི་མུན་པ་སེལ་བའི་ཉི་ཟླའི་འོད་སྣང་གང་འབྲེལ་ཐམས་ཅད་འཁོར་བ་མཐའ་ཅན་དུ་བྱེད་པའི་སྙིང་རྗེའི་དབང་ཕྱུག་ཆེན་པོ་དེ་ཉོན་མོངས་པའི་ཀུན་ཏུ་དཀྲིས་པ་རྣམས་ཀྱི་མ་གོས་ཤིང་ཚུལ་ཁྲིམས་རྣམ་པ་གསུམ་དང་བསླབ་པ་རིན་པོ་ཆེ་རྣམ་པ་གསུམ་གྱི་ཐུགས་རྒྱུད་ཕྱུག་པ་བྱང་ཆུབ་སེམས་དཔའ་ཤཱནྟ་རཀྵི་ཏ་གཉིས་པ་ལྟ་བུའོ། །གསང་བ་སྔགས་ཀྱི་དབང་དུ་བྱས་ན་སློབ་དཔོན་གྱི་མཚན་ཉིད་མདོར་བསྡུས་པ། བླ་མ་ལྔ་བཅུ་པ་ལས། བརྟན་ཤིང་དུལ་ལ་བློ་གྲོས་ལྡན། །བཟོད་ལྡན་དྲང་ལ་གཡོ་སྒྱུ་མེད། །སྔགས་དང་རྒྱུད་ཀྱི་སྦྱོར་བ་ཤེས། །སྙིང་བརྩེར་ལྡན་ཞིང་བསྟན་བཅོས་མཁས། །དེ་ཉིད་བཅུ་ནི་ཡོངས་སུ་ཤེས། །དཀྱིལ་འཁོར་བྲི་བའི་ལས་ལ་མཁས། །སྔགས་བཤད་པ་ཡི་སྦྱོར་བ་ཤེས། །རབ་ཏུ་དྭངས་ཤིང་དབང་པོ་དུལ། །ཞེས་པ་ལྟར་གྱི་མཚན་ཉིད་ཐམས་ཅད་ཡོངས་སུ་རྫོགས་པའི་བཤེས་གཉེན་རྒྱལ་བའི་གདུང་འཚོབ་ཡོན་ཏན་གྱི་ཕུང་པོ་ཆེན་པོ་འདི་ལ་ནི། མཉམ་རྗེས་ཀུན་དུ་ཐ་མལ་མཚན་འཛིན་གྱིས་མ་གོས་ཤིང་སྣོད་བཅུད་ཐམས་ཅད་དག་མཉམ་བདེན་པ་དབྱེར་མེད། དབྱིངས་ཡེ་ཟུང་འཇུག་རང་བཞིན་ཡེ་ཤེས་ཀྱི་དཀྱིལ་འཁོར་དུ་ཤར་ཞིང་། གཟུང་འཛིན་ཡིད་དཔྱོད་ལས་འདས་པའི་རང་སྣང་ཀ་དག་རང་བྱུང་གི་ལྟ་བའི་གདན་ཁྲི་ལས་མ་གཡོས་ཤིང་འོད་གསལ་ལྷུན་གྲུབ་ཉི་ཟླའི་དཀྱིལ་འཁོར་གྱི་སྣང་བ་མུ་མེད་པ་ལ་སྤྱོད་པས་སྐུ་གསུམ་རིག་པ་ཚད་ལ་ཕེབས་ཤིང་བསྲུང་བྱ་སྲུང་བྱེད་ལས་འདས་པའི་ཡེ་བསྲུང་རྒྱལ་པོའི་དམ་ཚིག་ཉམས་ཤོར་མེད་པའི་ངང་དུ་བཤགས་བྱ་བཤགས་བྱེད་ཀྱི་སྤྲོས་པས་མ་གོས་པའི་ཆོས་ཉིད་གཉུག་མའི་ངང་དུ་འབྲལ་བ་མེད་པར་བཞུགས་པས་བཙུན་པའི་མཐར་ཐུག་པའོ། །བཟང་ཞིང་ཕན་འདོགས་པའི་ཡོན་ཏན་ཀྱང་། རྗེ་འདི་ལ་ལོག་པར་སེམས་ཤིང་སྡང་ཤུགས་དང་ལྡན་པའི་སྐྱེས་བུ་འགའ་ཞིག་ལའང་ཀུན་ནས་ཀུན་ཏུ་ཁོང་ཁྲོ་བ་ལྟ་ཞོག་སྤྱན་གྱིས་གཟིགས་ཕྱོགས་ལོག་པ་ཙམ་ཡང་མཛད་མ་མྱོང་ཞིང་། ལོག་སྒྲུབ་ཀྱི་སྐྱེས་བུ་གདུག་ཅན་རྣམས་ལ་བྱང་ཆུབ་སེམས་དཔའ་སྙིང་རྗེའི་གཞན་དབང་དུ་གྱུར་པས་ཐུགས་ཕྱི་ཕྱིར་ལྷག་པར་བརྩེ་བ་དང་། མཁས་བླུན་སྐྱེ་བོ་ཕོ་མོ་འབྱོར་པ་ཡོད་མེད་ཐམས་ཅད་བྱམས་པས་ཕྱོགས་རིས་མེད་པ་བསྐྱངས་ཤིང་ཀུན་ལ་མ་ལྟར་མཛའ་བ་དང་། ཞལ་མཇལ་ཙམ་ཞུས་པས་ཀྱང་དད་པ་དང་མོས་གུས་མཆོག་ཏུ་འཕེལ་ཞིང་དད་པ་སྔར་མེད་པ་རྣམས་ལ་གསར་དུ་རྙེད་ཅིང་ངེས་འབྱུང་རྒྱུད་ལ་སྐྱེ་བ་དང་། གསུང་སྙན་ཅིང་འཇེབས་པས་ཆོས་མཐུན་གྱི་གཏམ་དང་། སྐྱེ་བོ་ཕལ་པ་ལ་དགའ་བའི་གཏམ་སོགས་གང་ལ་གང་འཐད་གནང་བ་ལས་ཆེ་འཇིགས་དང་། ཟོལ་ཟོབ། བཀའ་བཀྱོན་དང་ཕྱག་འབེབས་སོགས་ནི་སྐུ་ཚེ་དེ་ལ་མཛད་མ་མྱོང་ཞིང་གཞན་སེམས་བསྲུང་བ་ལ་གཅིག་ཏུ་བརྩོན་པ་ཁོ་ན་དང་། མཐོན་པོ་ང་རྒྱལ་ཅན་ཁེངས་དྲེགས་ཀྱི་རློམ་པ་རྣམས་ལ་མཁོ་བའི་ངོ་བསྲུང་ཕྱེ་གཏོར་རྒྱུ་ཟས་སྦྱིན་པ་སོགས་ཀྱི་ལོག་འཚོའི་རིགས་དང་ཤི་གསོན་གྱི་རྒྱུ་ཆུད་ཟོས་དོན་མེད་དུ་གཏོང་བ་དེ་འདྲ་ཡང་གཏན་ནས་མི་མཛད་ཅིང་རང་གི་གཤིས་ལུགས་ཆོས་དང་མི་འགལ་བའི་བསྡུ་བ་རྣམ་བཞི་ཀུན་དང་མཐུན་ཞིང་ཀུན་དུ་བཟང་པོ་ཁྲོ་བ་སྤངས་པ་རྟོག་པའི་དྲྭ་བ་ཐམས་ཅད་རྣམ་པར་སེལ་བའི་འོད་ཟེར་གྱི་ཚོགས་བྱེ་བ་འབུམ་སྙེད་ཀྱི་བརྒྱན་པའི་རྒྱལ་སྲས་ཆེན་པོ་དང་རྣམ་དབྱེར་མི་ཕྱེད་པ་སྟེ། དེ་ལྟར་མཁས་བཙུན་བཟང་པོའི་ཡོན་ཏན་འབུམ་གྱི་མངོན་པར་མཐོ་ཞིང་འཕགས་པའི་ནོར་བདུན་གྱི་མངོན་པར་ཕྱུག་པའི་རྒྱལ་ཐབས་ལ་དབང་བསྒྱུར་བའི་ཆོས་ཀྱི་རྒྱལ་པོ་ཆེན་པོ་ནི། ལེགས་པར་བཤད་པ་རིན་པོ་ཆེའི་གཏེར་ལས། མཁས་པ་ཡོན་ཏན་མཛོད་འཛིན་པ། །དེ་དག་ལེགས་བཤད་རིན་ཆེན་སྡུད། །རྒྱ་མཚོ་ཆེན་པོ་ཆུ་བོའི་གཏེར། །ཡིན་ཕྱིར་ཆུ་བོ་ཐམས་ཅད་འབབ། །ཞེས་པ་ལྟར། མདོ་སྔགས་རིག་གནས་དང་བཅས་པའི་ཆུ་ཀླུང་གཅིག་ཏུ་འཁྱིལ་ཞིང་། ཁྱད་པར་སྒྲུབ་བརྒྱུད་ཤིང་རྟ་བརྒྱད་ཀྱི་གདམས་པ་མ་དྲོས་མཚོ་ཡི་བདག་པོ་གདེངས་ཅན་བྱེ་བའི་གཙུག་རྗེ་བཀའ་གཏེར་བཤད་སྒྲུབ་ཀྱི་རྒྱ་མཚོ་ཆེན་པོ་མཆོག་གཟིགས་འཇམས་དབྱངས་བློ་གྲོས་རྒྱ་མཚོ་ཞེས་པའི་མཚན་གྱི་སྙན་པ་དོན་དང་ལྡན་པ་ནི་རང་གི་བླ་མ་ཕྱོགས་ཞེན་གྱིས་བསྔགས་པ་མ་ལགས་ཏེ། དམ་པ་ཡོན་ཏན་སྦས་གྱུར་ཀྱང་། །འཇིག་རྟེན་ཀུན་ལ་ཁྱད་པར་གསལ། །སྣ་མའི་མེ་ཏོག་ལེགས་བཀབ་ཀྱང་། །དྲི་ཞིམ་ཀུན་ཏུ་ཁྱབ་པར་འགྱུར། །ཞེས་པ་ལྟར། གངས་རིའི་ར་བས་བསྐོར་བའི་འཇིག་རྟེན་དབང་ཕྱུག་གི་གདུལ་ཞིང་འདིར། དེང་དུས་མཁས་གྲུབ་རྣམས་ཀྱི་དབུས་ན་ལྷམ་མེ་ལྷང་ངེར་གསལ་བའོ། །མཁས་བཙུན་བཟང་པོའི་ཡོན་ཏན་གྱིས་བསྐྲུན་པའི་ཐུགས་སྲས་བསྟན་འཛིན་གྱི་སློབ་བུ་ཡང་། ཇི་སྐད་དུ། ཡོན་ཏན་ལྡན་ན་སྐྱེ་བོ་ཀུན། །མ་བསྡུས་པར་ཡང་རང་ཉིད་འདུ། །དྲི་ལྡན་མེ་ཏོག་རྒྱང་རིང་ཡང་། །བུང་བ་སྤྲིན་གྱི་ཚོགས་བཞིན་འཁོར། །ཞེས་པ་ལྟར་ཕྱོགས་མཐའ་དག་ནས་གདུལ་བྱའི་སློབ་ཚོགས་རྒྱ་ཆེར་བྱུང་བ་སྨོས་ཀྱིས་མི་ལང་ལ་རབ་འབྱམས་ལྔ་པས་ཀྱང་དབང་ཆོས་མང་པོ་གསན་ཅིང་། རྗེ་ཐམས་ཅད་མཁྱེན་པ་མི་ཕམ་རིན་པོ་ཆེ་ནས་ཚེ་དབང་དང་། ཐོག་སྲུང་སྐོར་སོགས་གསན་པར་མཛད། ཞལ་སློབ་གཙོ་ཆེ་བ་འགའ་ཞིག་ནི། སྔ་འགྱུར་བསྟན་པའི་ཉི་མ་རབ་འབྱམས་དྲུག་པ་ཀུན་བཟང་བསྟན་པའི་ཉི་མ་བཤད་སྒྲུབ་ཆོས་ཀྱི་གོ་ཆ། ཟུར་མང་དྲུང་རིན་པོ་ཆེ་སྐུ་ཕྲེང་བཅུ་པ་ཀརྨ་ཆོས་ཀྱི་ཉིན་བྱེད། འཇམ་མགོན་མཁྱེན་བརྩེའི་ཡེ་ཤེས་སྒྱུ་མའི་རོལ་གར་དུ་ཐར་རྩེ་རྡོ་རྗེ་འཆང་འཇམ་དབྱངས་བློ་གཏེར་དབང་པོ་དང་། རྗེ་ཉིད་བཅས་ཀྱིས་ལུང་གིས་བསྟན་པ་དིལ་མགོ་མཆོག་སྤྲུལ་འཇིགས་མེད་མཁྱེན་བརྩེའི་འོད་ཟེར། འཇམ་མགོན་ཐམས་ཅད་མཁྱེན་པ་ཀོང་སྤྲུལ་རིན་པོ་ཆེའི་ཡང་སྲིད་ཙཱ་འདྲའི་གདན་སའི་ཁྲི་འཛིན་པ་ཀརྨ་དཔལ་ལྡན་ཆོས་ཀྱི་དབང་ཕྱུག་བློ་གྲོས་དྲི་མེད་དང་། ཞེ་ཆེན་གདན་སར་བཞུག་པ་རྗེ་བླ་མ་མཆོག་དང་ལུས་དང་གྲིབ་བཞིན་འགྲོགས་ཤིང་ཐུགས་ཀྱི་གསང་མཛོད་རྫོགས་པར་ཐོབ་པའི་མཆོག་སྤྲུལ་པདྨ་དྲི་མེད་ལེགས་པའི་བློ་གྲོས། སངས་རྒྱས་མཉན་སྤྲུལ་དགུ་པ་ཀརྨ་བཤད་སྒྲུབ་བསྟན་པའི་ཉི་མ། རྫོགས་ཆེན་གླིང་བླ་སྤྲུལ་སྐུ། ཁྲོ་ཤུལ་མཁན་རིན་པོ་ཆེ་ཚུལ་ཁྲིམས་རྒྱ་མཚོ། བྱང་ཆུབ་སེམས་དཔའ་ཆེན་པོ་དགེ་མང་མཁན་ཡོན་ཏན་རྒྱ་མཚོ། མཁན་ཀུན་བཟང་དཔལ་ལྡན། རྫོགས་ཆེན་མཁན་བསོད་ཆོས། མཁན་ལྷ་སྒོང་། མཁན་བློ་གྲོས་སྒྲ་དབྱངས། ཚབ་ཚ་སྒྲུབ་སྤྲུལ། ཉ་འགེ་སྤྲུལ་སྐུ། གནམ་མཚོ་སྤྲུལ་སྐུ། སྒོ་མེ་དིང་ཀྱཱ་མཆོག་སྤྲུལ། ཕུ་ཁུང་ཞེ་སྤྲུལ། ཆུ་ངོས་ཀརྨ་རྒྱ་མཚོ། ཁྱུང་སྤྲུལ་ཀར་རྒྱལ། གཡུ་ཁོག་སྤྲུལ་སྐུ། མཁན་འཇམ་དཔལ་རྡོ་རྗེ། དཔལ་ལྷུན་འགྲུབ་སྟེང་གི་མཁན་ཆེན་རྡོ་རྗེ་འཛིན་རྒྱལ་བསམ་གཏན་བློ་གྲོས། ཞེ་ཆེན་དགོན་གྱི་འབར་ཆུང་དབང་རིས་སྤྲུལ་སྐུ། འབར་བླའི་སྤྲུལ་སྐུ། དགོན་སྟོད་སྐུ་གོང་འོག སིབ་བཀྲ་ཤིས་ཆོས་གླིང་གི་སྤྲུལ་སྐུ་བླ་མ་རྣམས་དང་། ལྕང་བྲག་སྤྲུལ་སྐུ། ཀཿཐོག་མཁན་ནུས་ལྡན། མགོ་ཚའི་མཁན་ཤིས་ལུ་དང་ཨུ་རྒྱན་བསྟན་འཕེལ། གླིང་བླ་དཔོན་རིན་འཛིན་འོད་ཟེར་སོགས་བསྟན་པ་རིས་མེད་ཀྱི་བླ་སྤྲུལ། མཁན་པོ་རྡོར་འཛིན་མང་པོ་དང་། ༧ ས་སྐྱོང་སྡེ་དགེ་ཆོས་རྒྱལ་ཡབ་སྲས། བོད་གཞུང་ཆེན་པོའི་སྐུ་དྲག་སྔ་ཕྱི་མང་པོ་སོགས་བསྟན་པ་སྟོབས་ཀྱིས་འདེགས་པའི་རྒྱལ་བློན་ཁྱིམ་བདག་གི་ཚོགས་རབ་ཏུ་མང་པོ་དང་། ཞལ་མཇལ་ཆོས་འབྲེལ་ཐོབ་པ་ནི་གྲངས་ལས་འདས་ཤིང་ཆེས་དམན་པ་བདག་ལྟ་བུའང་ལུགས་གཉིས་ཀྱི་གཟིགས་པ་ཆེན་པོས་དུས་རྟག་ཏུ་ཁྱབ་པའི་བཀའ་དྲིན་གཞལ་བར་དཀའ་ཞིང་། ཞལ་སློབ་ཀྱི་ཐུ་བོར་གྱུར་པ་རྣམས་ཀྱིས་ཀྱང་། གཞན་ལ་དབང་བསྐུར་ཆོས་བཤད། སྒྲུབ་པའི་རྒྱལ་མཚན་འཛུགས་པ་སོགས་བདག་དོན་རྟོགས་པ་མངོན་དུ་གྱུར་ཅིང་། གཞན་དོན་ཐུགས་རྗེའི་དཔལ་དང་ལྡན་པས་བསྟན་འགྲོར་ཕན་བདེ་སྦྱིན་ནུས་པ་ཤ་སྟག་གོ །སྙིགས་མའི་སྐྱེ་བོ་རྣམས་མ་རིག་པའི་མུན་པས་ཁེབས་པའི་སྐྱོན་གྱིས་རྗེ་རིན་པོ་ཆེ་ལ་ཡོན་ཏན་འདི་ཙམ་མངའ་བ་མ་མཐོང་བ་ནི། ཇི་སྐད་དུ། ཉི་མའི་འོད་ཟེར་ཤར་བ་ན། །འབྱུང་པོའི་བྱ་རྣམས་ལོང་བར་འགྱུར། །ཞེས་པ་ལྟར་རང་རང་གི་ལོག་པར་རྟོག་པ་ཡིན་ལ་དམ་པའི་ཡོན་ཏན་ནི་བཀག་ཏུ་མེད་ཅིང་ཉི་ཟླ་སྦར་མོས་མི་ཁེབས་པ་བཞིན་རྣམ་དཔྱོད་ཀྱི་སྣང་བ་ཟོལ་མེད་དུ་ངོམ་པར་མི་ཤེས་པར་རྒྱ་ཆེའི་བློ་གྲོས་ཀྱི་མིག་ལྡོངས་ཤིང་ལྟར་སྣང་རིགས་པའི་ལིང་ཐོག་གིས་བསྒྲིབས་པ་གཞན་དག་གིས་ཡིད་རབ་ཏུ་འཁྲུགས་ཤིང་དམ་པའི་ཡོན་ཏན་གྱིས་སེམས་ལ་གདུང་བ་ཆེན་པོར་གྱུར་པ་དེ་རྣམས་སྙིང་རྗེའི་ཡུལ་དུ་གྱུར་པ་དང་། དེ་ལྟར་གོང་དུ་བཤད་མ་ཐག་པ་ལྟར། མཁས་བླུན་གྱི་དབྱེ་བ་ཡང་། བསྟོད་འདོད་དང་མོས་བློས་བཞག་པ་ཙམ་མིན་པ་མཁས་པའི་ལག་རྗེས་ལེགས་བཤད་ཀྱི་ཕུང་པོ་རྣམས་ལ་རྣམ་དཔྱོད་ལྡན་པས་ཤེས་རབ་ཀྱི་མིག་སྒྲུབ་ན་ཤེས་པར་འགྱུར་ཏེ། ཆོས་རྗེ་ས་སྐྱ་པཎྜི་ཏ་ཆེན་པོའི་ཞལ་ནས། ནགས་ཚལ་ཤིན་ཏུ་མང་ན་ཡང་། །ཙནྡན་ས་མཆོག་སྐྱེ་བ་ཉུང་། །དེ་བཞིན་མཁས་པ་མང་ན་ཡང་། །ལེགས་བཤད་འབྱུང་བ་ཤིན་ཏུ་དཀའ། །རྟ་མཆོག་འགྲོ་བའི་ཚེ་ན་ཤེས། །གསེར་དངུལ་བཞུ་ན་ཤེས་པར་འགྱུར། །གླང་ཆེན་གཡུལ་ངོར་ཤེས་འགྱུར་ཏེ། །མཁས་པ་ལེགས་བཤད་རྩོམ་ན་ཤེས། །ཞེས་གསུངས་པ་ལྟར་རོ། །དེ་ལྟར་སྐྱེས་བུ་དམ་པ་དང་དེ་ལས་ལྡོག་པའི་ཁྱད་པར་རྣམ་པར་འབྱེད་པ་དེའང་བ་གླང་རྫི་བདག་དང་བདག་འདྲས་དབྱེ་བར་མི་ནུས་ཀྱང་འཕགས་པའི་སྐྱེས་བུ་ཚད་མས་གྲུབ་པ་རྣམས་ཀྱིས་ཀྱང་རྗེ་འདི་ལ་བསྔགས་པའི་མེ་ཏོག་འཐོར་བའི་ཡུལ་དུ་གྱུར་པ་སྟེ། ཀུན་གཟིགས་མཁྱེན་བརྩེ་རིན་པོ་ཆེས་ཀྱང་འཕྲིིན་ཡིག་རྣམས་སུ། སྔ་འགྱུར་བསྟན་པའི་རྩ་ལག་མཚུངས་བྲལ་རྒྱལ་བའི་མྱུ་གུ་མཆོག་གི་ཞབས་པད་དུ། ཞེས་དང་། རྒྱལ་བའི་མྱུ་གུས་ཞབས་པད་བརྟན། །རྒྱལ་སྲས་སྤྱོད་པ་མཁའ་ཁྱབ་རྒྱས། །རྒྱལ་བསྟན་སྲོག་ཏུ་ཡོངས་གྲུབ་པའི། །རྒྱལ་རྔ་སྲིད་ན་སྙན་གྱུར་ཅིག །ཅེས་པའམ་ཕྱི་མཐར་གཟིགས་པའི་གསུང་གི་བདེན་ཚིག་བསླུ་བ་མེད་པ་དང་། ཡང་། སྔ་འགྱུར་བསྟན་པའི་གསལ་བྱེད་ཆེན་པོ་རྒྱལ་ཚབ་མཆོག་གི་སྤྲུལ་པའི་སྐུའི་ཞབས་དྲུང་དུ། ཞེས་དང་། སྐུ་ཚེའི་རྒྱལ་མཚན་ཡུན་དུ་བརྟན། །གསན་བསམ་སྒོམ་པའི་ཕ་མཐར་སོན། །ཕན་བདེའི་ཕྲིན་ལས་ཕྱོགས་བརྒྱར་འཕེལ། །བདག་ཀྱང་ཡེ་ཤེས་གཟིགས་པས་སྐྱོང་། །ཞེས་སོགས་དེས་མཚོན་སྔ་རྗེས་གསུང་གི་གླེགས་བུ་དུ་མར་བསྔགས་འོས་བསྔགས་བསྟོད་དངོས་ཤུགས་ནས་གནང་བ་དང་། དངོས་མཇལ་སྐབས་ཀྱང་སྔ་ཕྱི་ཐེངས་ཁ་ཤས་ཆོས་ཀྱི་སྐྱེས་ཆེན་སྩལ་པའི་མཐར་དངོས་པོའི་གནང་སྐྱེས་གྱ་ནོམ་སྩལ་པ་དང་གོང་སྨྲོས་ལྟར་ཕུར་པའི་བསྙེན་སྒྲུབ་ཟིན་རྗེས་རྗེ་མཁྱེན་བརྩེའི་མདུན་ཡབ་སྲས་ཞལ་འཕྲོས་ཞིབ་པར་གནང་རྗེས་ཞེ་ཆེན་རྒྱལ་ཚབ་མཆོག་སྤྲུལ་གྱིས་ཉིན་རེ་གསེར་ལྷུང་བཟེད་གང་རེའི་དད་ཟས་ལ་སྤྱོད་ཀྱང་ལོག་འཚོའི་སྒྲིབ་པས་གོས་མི་ནུས་པའི་དགོངས་སྤྱོད་ཐུགས་ལ་འཁྲུངས་འདུག་ཅེས་ཞལ་འཕྲོས་ཀུན་གཟིགས་མཁྱེན་བརྩེའི་ཞབས་ཀྱིས་གཞན་ལ་གནང་བ་དང་། རྗེ་ཉིད་ཀྱི་གཏེར་བྱོན་གུ་རུ་རིན་པོ་ཆེའི་ཕྱག་མཚན་རྡོ་རྗེ་ཁྱད་འཕགས་མགུལ་སྲུང་དུ་གནང་བ་སོགས་དགོངས་གཏད་ཤིན་ཏུ་ཆེ་ཞིང་། དེ་བཞིན་འཇམ་མགོན་རྣམ་སྣང་ལོ་ཙཱ་བ་ཆེན་པོས་ཀྱང་སྔ་རྗེས་དུ་མར་ཆོས་དང་ཟང་ཟིང་གི་གཞན་དང་འགྲན་དུ་མེད་པར་དགོངས་གཏད་བརྩེ་བས་བསྐྱངས་ཤིང་ཐུན་མོང་ཐུན་མིན་གྱི་བསླབ་སྟོན་སྔ་རྗེས་བརྒྱུད་མར་ཕེབས་པ་དང་། གསུང་ཕྲིན་ཡང་ཡང་སྩལ་པའི་ཁ་ཅིག་ཏུ་འདི་ལྟར་འབྱུང་སྟེ། འཕགས་རྣམས་ཐུགས་བསྐྱེད་ཟབ་མོའི་རྒྱ་མཚོ་ལས། །མཁྱེན་བརྩེའི་རང་བཞིན་བཅུ་དྲུག་ཆ་རྫོགས་ཤིང་། །བསྟན་འགྲོའི་ཀུ་མུད་བཞད་པའི་གཉེན་གྱུར་པ། །མཆོག་གི་སྤྲུལ་སྐུ་ཟླ་བ་གསར་པའི་དྲུང་། །མ་སྨད་དགེ་བའི་ཐུགས་བསྐྱེད་རླབས་པོ་ཆེའི། །རིན་ཆེན་རྡུལ་མང་བརྩེགས་པའི་རྒྱུ་ཚོགས་ལས། །བསྟན་འཛིན་རི་བྲན་ཚོགས་པའི་མཇིང་དབུས་ན། །ལྷུན་མཐོར་འཕགས་པའི་རི་དབང་བཞིན་དུ་མཛེས། །རྒྱལ་དབང་པདྨའི་རིང་ལུགས་གཉེར་འཛིན་པའི། །སྔ་འགྱུར་བསྟན་པའི་རྒྱལ་མཚན་བླ་ནས་བླར། །འདེགས་བཟོད་དེང་གི་དུས་ན་ཉིན་སྐར་བཞིན། །ཁྱོད་ཀྱི་སྙིང་སྟོབས་དཔུང་པ་དར་བར་ངེས། །བསྔགས་འོས་ཡོན་ཏན་དཔལ་དེས་ཉེར་འཁྱུད་པའི། །སྐུ་དབང་ལྗོན་པ་བཟང་པོ་རིང་བརྟན་ནས། །བསྟན་འགྲོའི་དགེ་མཚན་གྲིབ་མ་སྣུམ་པའི་ཕྱིར། །དོན་དང་བཅས་ལ་འབྲས་བུར་བཅས་པ་ལགས། །དེས་ན་མཚན་དཔེའི་དཔལ་འབར་སྐུ་མཆོག་གི། །ཟླ་བའི་མ་མ་མངོན་པར་གསལ་བ་ནས། །དམ་པས་བསླབ་འོས་གནས་ལ་ཉེར་ཞུགས་པའི། །ཕྲིན་ལས་འོད་སྣང་དཀར་པོ་སྤྲོ་བཞིན་ནས། །དད་དང་དམ་ཚིག་དག་པའི་ཉེར་ལེན་གྱིས། །བརྗོད་བྱ་རྗོད་བྱེད་ཕུན་སུམ་ཚོགས་པ་ཡི། །དཎྜིའི་གཞུང་གི་ཉམས་འགྱུར་གྱིས་སྤུད་པའི། །གསུང་མཆིད་མཉེན་པར་འོས་པ་དེ་དག་དང་། །བཀྲ་ཤིས་ལྷ་ཡི་རེག་བྱ་ཟླ་མདངས་ཀྱི། །ཅོད་པཎ་ལྷབ་ལྷུབ་གཡོ་བས་མཛེས་བྱས་པའི། །རིན་ཆེན་མཎྜལ་བཀོད་ལེགས་བཟོ་དབྱིབས་ཀྱིས། །ཁྱད་པར་བྱས་བའི་རྟེེན་འབྱུང་དགེ་བའི་རྫས། །རིང་དུ་འཚོ་བའི་ཐབས་ཀྱི་མཆོག་གྱུར་པ། །མི་འཇིགས་སྲོག་གི་དགའ་སྟོན་ཉེར་སྟོབས་ནས། །བདེ་བར་རྒྱུ་བའི་སྤྱོད་ལམ་བྱིན་པ་ཡི། །བརྒྱ་དང་བཅུ་གསུམ་གྲངས་ལྡན་སྲོག་བསླུ་བཅས། །གནང་སྐྱེས་དག་པའི་དངོས་པོ་གྱ་ནོམ་པ། །འདི་དག་ཉེ་བར་ཐོས་པའི་དགའ་སྤྲོའི་དཔལ། །དབྱར་སྐྱེས་རྔ་གསང་དར་དིར་སྒྲོགས་པའི་སྒྲ། །མདོངས་མཐའ་ཅན་གྱི་རྣ་བར་ཞུགས་པ་བཞིན། །རྒྱལ་དབང་མཚོ་སྐྱེས་རྡོ་རྗེའི་ཐུགས་རྗེ་ཡི། །གདུགས་དཀར་གྲིབ་བསིལ་བསྟེན་པའི་རིག་འཛིན་གྱི། །བཙུན་པ་བདག་ཀྱང་བགྲང་བྱའི་ཁུར་ཆེན་པོའི། །ངལ་དུབ་སངས་པ་མེད་པས་ནོན་ན་ཡང་། །མེ་ཚོགས་སྤུ་གྲིས་གཏམས་པའི་མཚོ་ཆེན་ལས། །བརྒལ་ནས་དམ་ཆོས་བཙལ་དང་བསྲུང་བའི་ཚུལ། །འདི་ལ་མི་འཕྲོག་དམ་བཅའི་མདུད་པ་ནི། །ལྷོད་པ་མེད་པའི་སྙིང་སྟོབས་བསྐྱེད་བཞིན་ལགས། །འོན་ཏེ་སྙིགས་ལྔའི་སྨག་རུམ་ཆེར་བདོ་བའི། །སྐྱོན་གྱིས་བསླད་པའི་སྣོད་བཅུད་གནས་ཚུལ་གྱིས། །སེམས་ལ་སྐྱོ་བ་སྟེར་བའི་སྐབས་བྱུང་ཡང་། །ཐེག་ཆེན་སེམས་མཆོག་བདུད་རྩི་སྤྲོ་བསྲིང་བཞིན། །བསྟན་འགྲོར་དགེ་བའི་སྨན་དུ་འགྱུར་བ་ཡི། །སྨོན་ལམ་བཟང་པོ་གཡོ་དང་སྒྱུ་མེད་པས། །མཚམས་སྦྱར་ཕན་དང་བདེ་བའི་ཆོ་ག་ལ། །རང་ནུས་དང་འཚམ་བརྩོན་པས་འཇུག་བཞིན་མཆིས། །འབྱུང་འགྱུར་རྙིང་བསྟན་གསལ་བའི་སྒྲོན་མེ་མཆོག །གང་ཁྱོད་གསང་གསུམ་མི་གཡོ་བརྟན་པ་ཡི། །དགེ་ལེགས་འཆི་མེད་ཚེ་ཡི་ལྷ་མཆོག་གིས། །ཕྱོགས་སུ་ལྷུང་བ་བཞིན་དུ་སྦྱིན་གྱུར་ཅིག །དེ་སྲིིད་དུས་དང་གནས་སྐབས་ཀུན་ཏུ་ཡང་། །ཐོས་བསམ་སྒོམ་དང་འཆད་རྩོད་རྩོམ་པ་ཡི། །ངོ་མཚར་རྣམ་ཐར་མཁས་དང་གྲུབ་པའི་ཁྱུས། །བསྔགས་པའི་དཔལ་གྱིས་རབ་ཏུ་མཛེས་གྱུར་ཅིག །གཞན་གྱི་གྲགས་ཆ་ཟློ་ལ་མི་སྙེགས་པར། །གྲུབ་པའི་སློབ་དཔོན་རྣམ་གསུམ་དགོངས་པའི་བཅུད། །སོ་ཟུར་གནུབས་དང་དྲི་མེད་འོད་ཟེར་སོགས། །ཤིང་རྟ་ཆེ་རྣམས་དགོངས་པས་བརྒྱན་གྱུར་ཅིག །མཐའ་བྲལ་ཟབ་གནད་འཕགས་པ་ནཱ་གར་རྫུ། །རྒྱ་ཆེའི་གནད་རྣམས་འཕགས་པ་ཐོགས་མེད་དེ། །ཤིང་རྟ་རྣམ་གཉིས་ཟབ་དགོངས་མ་དཀྱོགས་པའི། །དྲང་པོའི་ལྟ་བས་ཁྱེད་ལ་བརྒྱན་གྱུར་ཅིག །དེ་དང་མི་འགལ་དེ་ལས་ཆེས་ལྷག་པའི། །ཟབ་གསང་རྫོགས་པ་ཆེན་པོའི་རྣལ་འབྱོར་ལ། །མ་ནོར་ངེས་པའི་འཇུག་སྒོ་ལ་ཞུགས་ཏེ། །འཁོར་འདས་རོ་མཉམ་གྲོལ་བའི་དཔལ་དུ་ཤོག །ཕྱི་ཚུལ་སོ་ཐར་ཁྲིམས་བཟང་རྩ་བ་བརླིང་། །བྱང་ཆུབ་སེམས་མཆོག་ལྷབ་ལྷུབ་རབ་ཏུ་གྲོལ། །བདེ་སྟོང་ཟུང་འཇུག་ཏོག་གིས་ཉེར་མཛེས་པའི། །ཆོས་ཀྱི་རྒྱལ་མཚན་ཆེན་པོ་ཉིད་གྱུར་ཅིག །ཅེས་བསྔགས་ཤིང་སྨོན་ཤིས་གནང་བ་དང་། ཀུན་གཟིགས་མི་ཕམ་རིན་པོ་ཆེས་ཐུགས་སྲས་བརྒྱུད་འཛིན་གྱི་གཙོ་བོར་དགོངས་གཏད་མངའ་གསོལ་ཡང་ཡང་གནང་བ་ལས་ཕྱག་བྲིས་ཚན་གཅིག་ན་འདི་ལྟར་འབྱུང་སྟེ། ༀ་སྭསྟི་བི་ཛ་ཡན་ཏུ། ཕྱོགས་དུས་རྒྱལ་བ་སྲས་དང་བཅས་པ་ཡི། །མཁྱེན་རབ་ངག་གི་དབང་ཕྱུག་འཇམ་པའི་དབྱངས། །གང་ཐུགས་པདྨའི་ཟེའུ་འབྲུར་རྟག་བཞུགས་ནས། །བཤད་པས་རྒྱལ་བསྟན་ཉི་བཞིན་གསལ་གྱུར་ཅིག །ཅེས་ཤིས་པར་བརྗོད་པའི་ཚིགས་གིས་མདུན་བསུས་ཏེ། གང་འདིར་ཤེས་རབ་ཟབ་མོའི་སྣང་བ་ཉི་མ་ལྟར་ལྷམ་པ་སྤྲུལ་པའི་སྐུ་མཆོག ༧འཇམས་དབྱངས་མཁས་གྲུབ་རྒྱ་མཚོ་ག ང་གི་མཁྱེན་རབ་ཀྱི་རླབས་རྒྱ་ཆེ་བས། ད་དུང་གསན་བསམ་བསྒོམ་པ་རྒྱ་ཆེར་མཛད་དེ་ཐུབ་བསྟན་སྤྱི་དང་ཁྱད་པར་སྔ་འགྱུར་བའི་བསྟན་པ་རིན་པོ་ཆེའི་གསོས་སུ་འཆད་རྩོད་རྩོམ་པའི་ཕྲིན་ལས་བཟང་པོ་ཟླ་བ་ཡར་ངོ་དང་དབྱར་གྱི་ཆུ་གཏེར་ལྟར་གོང་ནས་གོང་འཕེལ་གྱི་ཐུགས་དམ་རྡོ་རྗེའི་རི་བོ་སུས་ཀྱང་གཡོ་བ་མེད་པའི་ཁུར་བཞེས་པར་ནན་ཏན་གསོལ་བ་འདེབས་ཤིང་། དེ་ལྟ་བུའི་བཞེད་དོན་གོང་འཕེལ་འགྲུབ་ཕྱིར་བདེན་ཚིག་གི་ཤིས་བརྗོད་ཀྱང་སྨྲས་པ། མཆོག་གསུམ་རྩ་གསུམ་དམ་ཅན་བསྲུང་མར་བཅས། །སྐྱབས་འོས་རྒྱ་མཚོའི་མཐུ་བྱིན་རྨད་བྱུང་གིས། །སྤྲུལ་པའི་སྐུ་མཆོག་བསྐལ་བརྒྱར་ཞབས་བརྟན་ཅིང་། །ཕྲིན་ལས་ས་ཆེན་ཡོངས་ལ་ཁྱབ་པར་ཤོག །མཁྱེན་རབ་སྣང་བ་མཁའ་དང་མཉམ་པར་འཕེལ། །འཆད་རྩོད་ཆོས་ཆར་འཇིག་རྟེན་ཀུན་ཏུ་ཁྱབ། །རྒྱལ་བསྟན་སྙིང་པོའི་ཆོས་ཀྱི་རྒྱལ་མཚན་བསྒྲེངས། །རྟག་ཏུ་དགེ་ལེགས་བཀྲ་ཤིས་རྒྱས་གྱུར་ཅིག །ཅེས་ཞུ་མཚོན་ལྷ་རེག་རབ་དཀར། སྐུ་རྟེན་འཆི་མེད་པདྨ་ཀཱ་རའི་སྣང་བརྙན་གསར་པ། གསུང་རྟེན་བཀའ་གདམས་གླེག་བམ། ཐུགས་རྟེན་རྡོ་རྗེ་དྲིལ་བུ། འཇམ་དབྱངས་བློ་འཕེལ་རིལ་བུ། མན་ཇུས་བུམ་བཅས་འཇམ་དབྱངས་རྣམ་པར་རྒྱལ་བས་གུས་པས་ཕུལ་བ་དགེ་ལེགས་སུ་གྱུར་ཅིག་ཅེས་དང་། རྗེ་བླ་མ་འདི་ཞེ་ཆེན་སྒྲུབ་སྡེར་སྐུ་མཚམས་བཞུགས་པའི་སྐབས་ཀུན་མཁྱེན་མི་ཕམ་རིན་པོ་ཆེ་ཕེབས་སྟེ་འཇམ་མགོན་བླ་མ་ཡབ་སྲས་ཐུགས་རྒྱུད་ལ་རྟོགས་པ་འཁྲུངས་ཚུལ་གྱི་ཞལ་འཕྲོས་ཞག་དུ་མར་མཛད་ནས་ཕྱིར་ཕེབས་སྐབས་ཉེ་གནས་བླ་མ་འོད་གསལ་ནས་རྒྱལ་ཚབ་མཆོག་སྤྲུལ་རིན་པོ་ཆེ་ཐུགས་དམ་རྟོགས་པ་ཇི་ལྟར་ཞུས་པས་སྐུའི་སྐྱེ་བ་དུ་མར་གོམས་པའི་སྔོན་སྦྱངས་ལས་ཚེ་གཅིག་ཏུ་བསྒོམས་པས་ཉམས་རྟོགས་དེ་ཙམ་སུ་ལའང་སྐྱེ་བར་དཀའ་ངེས་ཞེས་སོགས་གསུངས་པ་རྣམས་རྗེས་འཇུག་སྤྲོ་བ་བསྐྱེད་པའི་སླད་དུ་བཀོད་པ་ཙམ་ལས་རྗེ་འདིའི་སྐུ་གསུང་ཐུགས་ཀྱི་མཛད་པ་གང་ལ་བརྟགས་ཀྱང་དམ་པའི་སྐྱེས་བུར་གྲགས་ཤིང་གྲུབ་པ་ཉིད་ལ་མང་དུ་བརྗོད་པས་ཅི་ཞིག་བྱ་སྟེ་རང་ཉིད་ངལ་བའི་རྒྱུ་ཙམ་དུ་ཟད་དོ། །དེ་སྐད་དུའང་གསོལ་འདེབས་ལས། བརྟན་པའི་འཁོར་ལོ་ཐུགས་ཀའི་དབུས་སུ་སྦས། །མཚོ་བྱུང་མགྲིན་པ་ལོངས་སྤྱོད་རྒྱན་དུ་རོལ། །མི་བརྗེད་གཟུངས་ཐོབ་སོ་སོ་རིག་བཞིར་དབང་། །མཁས་པའི་གཙུག་རྒྱན་དམ་པར་གསོལ་བ་འདེབས། །བཅས་དང་རང་བཞིན་ཉེས་པས་མ་གོས་ཤིང་། །ཆོས་བརྒྱད་འཁྲུལ་བའི་འདམ་རྫབ་གཞར་མི་མཛའ། །ཆོས་ཀུན་སྒྱུ་མའི་འཁྲུལ་འཁོར་ལྟ་བུར་གཟིགས། །བཙུན་པའི་རྗེ་བོ་དམ་པར༴ རྟག་པར་གཞན་དོན་ཁུར་ཆེན་ཁྱེར་བ་དང་། །ཕྲིན་ལས་ཐམས་ཅད་གཞན་ཕན་འབའ་ཞིག་སྣང་། །རྫོགས་སྨིན་སྦྱངས་པས་གཞན་དོན་ཕ་རོལ་ཕྱིན། །རྒྱལ་སྲས་འདྲེན་པ་བཟང་པོར་གསོལ༴ མཁྱེན་པའི་ཡེ་ཤེས་ལྷ་ལམ་ལྟར་ཡངས་ཤིང་། །བརྩེ་བའི་ཐུགས་རྗེ་ཉི་ཟླའི་འོད་བཞིན་གསལ། །ནུས་པ་དབང་པོའི་རྡོ་རྗེ་ལྟར་བརྟན་པས། །རིགས་གསུམ་དངོས་སྣང་བླ་མར་གསོལ༴ འཆད་ཚེ་ཚིག་དོན་གོང་འོག་འཁྲུགས་པ་དང་། །ཟློས་དང་ཉམས་སོགས་སྐྱོན་ཀུན་སྤངས་པ་ཡི། །བློ་གསལ་ཀུན་དགའི་རྣ་བའི་རྒྱན་དུ་གྱུར། །དབྱིག་གཉེན་གཉིས་པར་སྟོན་ལ༴ ངན་རྟོག་དུག་ཆུས་རབ་མྱོས་ལོག་རྟོག་མིག །གག་མདོག་ཁེངས་པའི་དྲེགས་ལྡན་སྡེར་ཅན་ཚོགས། །ཡང་དག་ལྟ་བའི་གངས་རི་ལ་གནས་པའི། །སྨྲ་བའི་སེངྒེས་བཅོམ་ལ༴ རྩོམ་ཚེ་བླ་མ་ལྷ་ཡི་ལུང་གིས་བསྐུལ། །བརྩེ་བས་ཉེར་དྲངས་སྔ་རབས་བཞེད་གཞུང་གསལ། །སྡེབ་ལེགས་འབྲེེལ་ཆགས་ནོར་བུའི་རྒྱན་ཕྲེང་གིས། །ཐུབ་བསྟན་གསལ་བར་མཛད་ལ༴ ལུང་གི་བསྟན་པའི་སྙིང་པོ་རྡོ་རྗེ་ཐེག །སྒྲུབ་བརྒྱུད་ཤིང་རྟ་བརྒྱད་ཀྱི་གདམས་པ་དང་། །སྔ་འགྱུར་བཀའ་གཏེར་སྨིན་གྲོལ་འཆད་སྤེལ་གྱི། །བསྟན་པའི་སྲོག་རྩ་འཐུད་ལ༴ ཆོས་ལྟར་བསྙད་པའི་རྣམ་གཡེང་འདུ་འཛི་དང་། །ཆེན་པོའི་ངོ་བསྲུང་ལ་སོགས་ཐག་བསྲིིངས་ཤིང་། །འདོད་ཆུང་ཆོག་ཤེས་ཉམ་ཆུང་ཁོ་ནར་བཞུགས། །བྱ་བྲལ་ཀུན་སྤངས་ཆེན་པོར༴ རྟོགས་པའི་བསྟན་པར་སྒྲུབ་པའི་རྒྱལ་མཚན་བཙུགས། །སྐུ་ཚེ་དེ་ལ་མཆོག་དངོས་མངོན་དུ་མཛད། །སྒོམ་པའི་ཕྱག་རྗེས་ཟབ་གསུང་ཐང་མར་བརྡལ། །ཀུན་མཁྱེན་བླ་མ་མཆོག་ལ༴ ཅེས་དོན་བསྡུ་བའོ། །མཁས་མཁས་མདོ་སྔགས་རྒྱ་མཚོའི་གླེགས་བམ་ཆེ། །སྔ་འགྱུར་ངེས་དོན་སྙིང་པོའི་ཤིང་རྟ་མཆོག །མཁས་མཁས་འཇམ་དཔལ་གཞོན་ནུ་དགེ་བའི་བཤེས། །ངུར་སྨྲིག་གར་རོལ་ཁྱོད་ལས་གཞན་སུ་ཞིག །བཙུན་བཙུན་སྡོམ་གསུམ་ཉེས་དྲིས་གཡའ་རྣམས་སེལ། །དྲི་མེད་དག་ཅིང་གཙང་བའི་དྭངས་ཤེལ་བཞིན། །བཙུན་བཙུན་བྱང་ཕྱོགས་ཐུབ་པའི་རྒྱལ་ཚབ་ཆེ། །འཇམ་དབྱངས་བླ་མ་མཁས་གྲུབ་རྒྱ་མཚོའི་སྡེ། །བཟང་བཟང་རྒྱལ་སྲས་འཕགས་པ་ཀུན་ཏུ་བཟང་། །གང་གི་རྣམ་པར་ཐར་པའི་རྗེས་འགྲོ་བ། །སྐྱབས་གཅིག་དཔལ་ལྡན་བླ་མ་རྒྱལ་སྲས་གཙོ། །བཟང་བཟང་བློ་གྲོས་རྒྱ་མཚོའི་སྤྲིན་དེར་བསྔགས། །ཅེས་པའང་བར་སྐབས་ཀྱི་ཚིགས་སུ་བཅད་པའོ། །དཔལ་ལྡན་བླ་མའི་རྣམ་ཐར་ལས། གཉིས་ཀའི་དོན་དུ་མཁས་བཙུན་བཟང་གསུམ་གྱི་ཡོན་ཏན་ཆ་ཙམ་བསྙད་ཅིང་སློབ་ཚོགས་ཇི་ལྟར་བྱུང་བ་བཅས་གླེང་བའི་སརྒ་སྟེ་བཞི་པའོ།། །།༈ ད་ནི་བསྟན་འགྲོའི་བསོད་ནམས་ཀྱི་མགོན་དུ་བྱ་བ་ལས་ཀྱི་འཁོར་ལོས་ཕན་བདེའི་དགེ་ལེགས་སྤེལ་བའི་མཛད་ཕྲིན་ཇི་ལྟར་གནང་ཚུལ་གྱི་ཚུལ་ཅུང་ཟད་བསྙད་པར་བྱ་སྟེ། དེ་ཡང་བྱང་ཆུབ་སེམས་དཔའ་ཆེན་པོ་རྣམས་རང་དོན་དུ་སྤངས་རྟོགས་ཡོན་ཏན་རྒྱ་མཚོར་དབང་འབྱོར་བས་གཞན་དོན་སྒྲུབ་པ་ལ་དངོས་སུ་འཇུག་པའི་མཐུ་ནུས་དང་ལྡན་པ་ན་ཇི་ལྟར་དམྱལ་མེ་བཟོད་པར་དཀའ་བའི་གནས་སུའང་ཐེ་ཚོམ་མེད་པར་འཇུག་པ་དང་། དབུ་དང་ཡན་ལག་སྦྱིིན་པ་ལའང་ཞུམ་པ་མེད་པའི་སྙིང་སྟོབས་དང་ལྡན་པའི་ཐབས་མཁས་ཀྱི་སྤྱོད་པ་རྒྱ་ཆེན་པོས་གདུལ་བྱ་རྣམས་འདུལ་བར་མཛད་པ་ནི་རྗེ་བླ་མའི་སྐུ་ཡི་སྐྱེ་བའི་ཕྲེང་བ་དག་དང་མ་དག་ཅིར་ཡང་འཕྲུལ་ཞིང་སྟོན་པ་རྣམས་ཀྱི་སྐབས་སུ་འགྲོ་དོན་རླབས་ཆེར་སྤྱོད་དང་སྤྱོད་འགྱུར་ལ་བྱིས་བློས་གཞལ་བར་དཀའ། ཚུར་མཐོང་ཕྱོགས་རེའི་ངོར་མཛད་པའི་ཕྲིན་ལས་སྐུ་ཚེ་འདི་ལ་གཙོ་བོར་བསྟན་པའི་སྙིང་པོ་ལུང་རྟོགས་གཉིས་ལས་ལུང་གི་ཆོས་ལ་འཆད་ཉན་སྔར་སྨོས་མ་ཐག་པ་དང་། གཙོ་བོར་རྟོགས་པའི་བསྟན་པ་རིན་པོ་ཆེ་སྤེལ་བ་སྟེ། ཀུན་མཁྱེན་བླ་མས། ལྟ་བའི་ཡང་རྩེ་རྫོགས་ཆེན་ཨ་ཏི་རྟོགས། །སྒོམ་པའི་མིང་མེད་ལྟ་བའི་ངང་དུ་གྲོལ། །སྤྱོད་པའི་རྒྱལ་པོ་སྒྲུབ་པའི་རྒྱལ་མཚན་བཙུགས། །ད་ནི་སྤྲང་པོ་ཤི་ཡང་འགྱོད་པ་མེད། །ཅེས་དང་མཁྱེན་བརྩེའི་འོད་ཟེར་གྱི་དོ་ཧ་ལས། བདག་ཅག་ས་ལམ་མཐོན་པོ་རུ། །སོན་པའི་ཁས་ལེན་མ་མཆིས་ཀྱང་། །མདོ་སྡེ་དྲན་པ་ཉེར་བཞག་ནས། །ཆོས་གཏེར་ཆེན་པོ་བརྒྱད་གསུངས་པའི། །དོན་ལ་རྟོན་པ་གང་ཞིག་གི། །ལས་དང་དངོས་གྲུབ་སྒྲུབ་པ་ལ། །བསླུ་བ་མེད་པའི་སྐྱེས་ཆེན་ཡིན། །ཞེས་གསུངས་པ་ལྟར་སྙིང་པོའི་དོན་ལ་རྩེ་གཅིག་ཏུ་གཞོལ་བ་ལས་ཐེག་མཆོག་འོད་གསལ་རྡོ་རྗེ་སྙིང་པོའི་དགོངས་པའི་རང་རྩལ་ཡོངས་སུ་རྫོགས་པས་ལམ་རྟགས་མཐོན་པོར་གཤེགས་པ་ལྕེ་བཙུན་ཆེན་པོ་དང་། རྣལ་འབྱོར་དབང་ཕྱུག་མི་ལ་རས་པ་ལྟ་བུའི་གོ་འཕང་བརྙེས་ཀྱང་རང་གི་ཡོན་ཏན་ས་འོག་གི་གཏེར་བཞིན་སྦས་ཤིང་གཞན་དོན་ལ་བསྙད་པའི་དཀོར་ནག་སྡུད་པ་དང་། གདུལ་བྱ་གྲོང་ཆོག་རྟེན་བཞེངས་སྐབས་སོགས་མི་ཕེབས་ཀ་མེད་བྱུང་བ་ལས་ཕལ་ཆེར་སྐུ་མཚམས་ཁོ་ན་བཞུགས་ཤིང་དད་རྫས་ཀྱི་འབྱོར་པ་དང་དཀོར་སྡུད་རིགས་ལ་ཐུགས་འཚེར་ཤིན་ཏུ་ཆེན་པོ་གནང་ཡང་། སེར་སྣ་མེད་ཅིང་འདོད་ཆུང་ཆོག་ཤེས་ཅན་དང་རང་སྣང་དབང་དུ་འདུས་པ་རྣམས་ལ་ཡོ་བྱད་ཕོངས་པ་མེད་པར་འབྱུང་བ་ཆོས་ཉིད་ཡིན་གཤིས་བྱོན་བཞུགས་གང་གི་སྐབས་སུའང་ལོངས་སྤྱོད་ཀྱི་གྲུ་ཆར་འབད་མེད་དུ་འཇོ་བ་རྣམ་ཐོས་བུའི་བང་མཛོད་ཁ་ཕྱེ་བ་ལྟ་བུ་ཞིག་ཡོད་པ་ལས་རྙེད་པས་རྙེད་ཚོལ། ཁ་བསགས་གཞོག་སློང་སོགས་དང་། བརྒྱ་བཤིག་སྟོང་འགུགས་ཀྱི་ཚོང་དང་གཡོ་སྒྱུས་འཕྲུལ་འཁོར་གྱི་ཤ་ཐང་ཆད་ཆད་དུ་ཚོལ་དགོས་པ་མ་ཡིན་ཏེ། འཇམ་དབྱངས་བླ་མས། གང་ཞིག་ཉུང་ངུས་ཆོག་ཤེས་པ། །དེ་ཡི་ལོངས་སྤྱོད་ཟད་མི་ཤེས། །ཞེས་གསུངས་པ་ལྟར། སྔོན་བསྐལ་པ་མང་པོའི་གོང་རོལ་ནས་སེམས་ཅན་གྱི་དོན་ལ་དགོངས་ནས་སྦྱིན་པའི་ཕ་རོལ་དུ་ཕྱིན་པ་ཡོངས་སུ་རྫོགས་པའི་འབྲས་བུ་ལ་བདག་གིར་སྤྱོད་ནས་བསྡུ་བ་རྣམ་པ་བཞིས་སྒོ་ནས་གཞན་དོན་སྒྲུབ་པ་ནི། མདོ་སྡེ་རྒྱན་ལས། སྦྱིན་མཚུངས་དེ་སྟོན་ལེན་འཇུག་དང་། །བདག་གི་རྗེས་སུ་འཇུག་རྣམས་ཀྱི། །སྙན་པར་སྨྲ་དང་དོན་སྤྱོད་དང་། །དོན་མཐུན་ཉིད་དུ་འདོད་པ་ཡིན། །ཞེས་སྙན་པར་སྨྲ་བའི་སྦྱིན་པས་མགུ་ནས་སོ་སོའི་རྒྱུད་ཚོད་དང་མཐུན་པའི་དམ་ཆོས་སྟོན་པ་དང་། ཆོས་ཐོས་ཀྱང་ཐོས་དོན་ཉམས་སུ་མི་ལེན་པ་ལ་ཐབས་ལ་མཁས་པའི་ཁྱད་པར་གྱི་སྒོ་ནས་དེ་ལེན་དུ་འཇུག་པ་དང་། གཞན་དགེ་བ་ལ་འཇུག་པའི་ཆེད་དུ་རང་ཉིད་དགེ་བའི་བྱ་བ་ལ་འབད་རྩོལ་གྱིས་འཇུག་པ་དང་བཞི་པོ་འདི་ལ། རྗེ་བླ་མ་རིན་པོ་ཆེ་འདི་ཉིད་ཀྱི་ཕྱག་ལེན་དུ་བཏབ་པ་གནང་ཞིང་། དེ་ཡང་མཆོག་གསུམ་རིན་པོ་ཆེ་ལ་བརྟེན་པའི་བསོད་ནམས་ཀྱི་ལས་ནི། ཚོགས་བསགས་ཐམས་ཅད་ཀྱི་རྒྱལ་པོ། དགེ་ཚོོགས་བྱིན་འཕེལ་རླབས་ཆེ་བ་སྟེ། དེ་ཡང་། ཇི་སྐད་དུ། ཀུན་དགའ་ར་བ་གཙུག་ལག་ཁང་། །མལ་སྟན་འཚོ་བ་ནར་མ་དང་། །གློ་བུར་ནད་པ་ལ་སོགས་དང་། །རྫས་ལས་བྱུང་བའི་བསོད་ནམས་བདུན། །ཞེས་འབྱུང་བའི་ཡ་གྱལ་དགེ་འདུན་བཞུགས་པའི་གཙུག་ལག་ཁང་ནི་སྐྱབས་རྗེ་རབ་འབྱམས་ལྔ་པ་ཀུན་བཟང་བསྟན་པའི་ཉི་མ་དང་། སྐྱབས་མཆོག་རྣམ་གཉིས་བཀའ་བགྲོས་ཏེ། ཞེ་ཆེན་བསྟན་གཉིས་དར་རྒྱས་གླིང་གི་ཆོས་གྲྭ་ཆེན་པོའི་གཙུག་ལག་ཁང་ཀ་བ་སོ་དྲུག་རྒྱ་མཐོང་ཀ་རིང་དྲུག་གི་མལ་གྱི་སྲ་བརླིང་སྒྲོས་ལེགས་ཅན་ཀ་གདུང་སོགས་ཚོན་རྩི་དང་ནང་འཁོར་རས་གཞི་ལ་ལྡེབ་བྲིས་རྣམས་ཚོན་མདངས། གསེར་འགྲོས་སོགས་ཞིབ་ཚགས་དང་། མེ་སྟག་ལོར་ཕུན་ཚོགས་ཡོངས་འདུས་ཀ་བ་བརྒྱ་དང་བཅུ་དགུ་ཐོག་བརྩེགས་བཞི་པ་གཟིམས་སྤྱིལ་སོགས་ནང་བཅད་དཔྱད་ཡུལ་ཕུན་སུམ་ཚོགས་པ་དང་། ཚོན་དབྱིས་སོགས་གང་ཅིར་གཟབ་ཁྱད་ཐོན་པ་འདི་གའི་སྐབས་སུ་སྡེ་དགེ་ཨར་མི་སུམ་ཅུ་གླིང་ཚང་ནས་ཉི་ཤུ་མངག་བྱུང་བ་ལས། གཞན་གླ་རྔན་ཕོག་ཆས་སྤྲོད་ནས་བཞེངས་པ་ལས་མི་སེར་ཁྲལ་འདེད་ཞུ་བསྐུལ་གཏན་ནས་མ་མཛད་ཀྱང་ཀུན་གྱི་ཡིད་སྨོན་དུ་གྱུར་ཅིང་དཔེ་བྱར་འོས་པར་གྲུབ་ཅིང་། བསྟན་པའི་རྩ་བ་དམ་ཆོས་འདུལ་བ་གཞི་གསུམ་གྱི་དབྱར་གནས་ཐོག་མར་མཁན་ཆེན་བླ་མ་པདྨ་དམ་ཆོས་འོད་ཟེར་གྱི་བཀའ་ཕེབས་བཞིན་མེ་ཁྱི་ལོར་དབུ་བཙུགས་ནས་མཁན་པོ་བླ་མ་རང་གྲོལ་དབུར་བཞུགས། འཁར་པ་དགེ་འདུན་གྱི་སྦྱིན་བདག་བྱས་ནས་རྟེན་ཐེབས་རྡོ་ཚད་དྲུག་ལྷག་དང་། ཆུ་རྟ་ལོར་བཀའ་མའི་སྒྲུབ་མཆོད་དཀྱིལ་འཁོར་དྲུག་གསར་འཛུགས་དང་། ཁྲོ་བོའི་རྩ་འཆམ་སོགས་སྔོན་ནས་ཡོད་པ་ལས། མཁས་དབང་རྡོ་རྗེ་རབ་བརྟན་གྱིས་ཐིག་རྡུལ་ཚོན་དང་ཆོ་གའི་ཆིངས་ཕྱག་ལེན་འོག་མིན་ཨོ་རྒྱན་སྨིན་གྲོལ་གླིང་གི་ཕྱག་སྲོལ་མ་ནོར་བ་ཁྲིད་ཅིང་། རྟེན་ཐེབས་རྡོ་ཚད་དྲུག་དང་། རྒྱ་སྲང་ཉེར་ལྔ་ཁལ་སོ་བདུན་བཅས་སྐྱབས་མཆོག་རྣམ་གཉིས་ནས་རྟེན་བཞག་དང་། ས་སྤྲེལ་ལོའི་དགུན་ཁ་སྐྱབས་མགོན་རབ་འབྱམས་ལྔ་པ་མགོ་ལོག་དབང་ཆེན་སྟོད་དུ་རིན་ཆེན་གཏེར་གྱི་མཛོད་ཆེན་པོའི་ཆོས་སྦྱིན་རྒྱ་ཆེར་གནང་བའི་རྗེས་ཐོག་ཏུ་ས་བྱ་ཟླ་བ་གསུམ་པའི་ཚེས་བཅུ་གསུམ་ལ་གཟུགས་སྐུའི་བཀོད་པ་ཆོས་དབྱིངས་སུ་བསྡུ་བས་གཤེགས་རྗེས་སྐུ་གདུང་རིན་པོ་ཆེའི་ཞབས་འདེགས་དང་དགོངས་རྫོགས་ཀྱི་མཆོད་སྤྲིན་རྒྱ་ཆེར་སྤྲོ་བར་གནང་ཞིང་། ཆུ་གླང་ལོར་རྒྱ་མིའི་ཟིང་ཆ་བྱུང་སྐབས་ཞེ་ཆེན་བླ་བྲང་ལོངས་སྤྱོད་སོགས་གང་ཅིའི་ཉམས་ཕྲར་གྱུར་པ་རྗེ་རང་གི་སྐུ་དབོན་དགེ་ལེགས་རྒྱ་མཚོར་ཕྱག་མཛོད་དུ་བསྐོས་བཞག་གནང་། རབ་འབྱམས་ལྔ་པའི་སྐུ་སྐྱེ་མགོ་ལོག་ཨ་ཁྱུང་སྦྲ་སར་དཔོན་ཚང་ལ་སྐུ་བལྟམས་པ་ཤར་ཀའི་ལམ་སྲོལ་དང་། འཁྲུངས་གཞིས་དཔོན་ཆེ་ཁག་གི་འགྲོས་བསྟུན། ཐོག་མའི་སྙན་ཞུ་བསླུ་ཡོན། ཁྲི་སྟོན་སྐབས་གསོལ་ཞབས་ལེགས་འབུལ་སོགས་དཔོན་ཚང་སྐུ་ཉེ་སྐུ་འཁོར་ཆར་གཏོགས་དང་བཅས་པར་ཁྱོན་དྲིལ། རྟ་ཕོ་རྒོད་བཅུ་ཕྲག་ལྔ་ལ་གསུམ་གྱིས་ལྷག་པ། འབྲི་ཁལ་བརྒྱ་སོ་དྲུག གཅན་ཤུན་སོ་དགུ། རྒྱ་སྲང་ལྔ་བཅུ་ང་བདུན། གོས་ཆེན། ཕྲུག་སོགས་དངོས་རྫས་གྱ་ནོམ་པའི་ལེགས་འཕུལ་གནང་བས་ཐམས་ཅད་དགྱེས་པའི་ཡང་རྩེར་སོན་པར་མཛད། ཁྲི་འབུལ་སྩལ་པ་དང་སྦྲགས་ཚེས་བཅུའི་འཆམ་གཟིགས་ལ་རྫོགས་ཆེན་རིན་པོ་ཆེ་དཔོན་སློབ་སྐུ་འཁོར་བརྒྱ་ཁ་ལྷག་ཕེབས་པར་གསོལ་སྟོན་ལེགས་འབུལ་གཟབ་རྒྱས། བཀའ་མའི་སྒྲུབ་སྤྱི་རྐང་ཞན་པས་ཆེ་ཁལ་སྤུས་ལྡན་སུམ་ཅུ་སོ་བཞི་དང་། དགུ་ཆེན་ལ་ཁལ་ཉེར་ལྔ། བུམ་སྒྲུབ་སྤྱི་པར་ཁལ་ཉེར་ལྔ། ཚེས་བཅུ་ལ་ཆད་མཐུད་ཁལ་ཉེར་ལྔ་བཞག གླང་ལོའི་བུམ་སྒྲུབ་ཕྱག་འཛུགས་དང་། ཤིང་ཡོས་ས་ཟླའི་བཀའ་བརྒྱད་སྒྲུབ་མཆོད་སྤྱི་གསར་བསྐོས་ལ་དངུལ་རྡོ་{རྡིལ་འདིའི་རིགས་འདི་ལྟར་ཞུས། } ཚད་བརྒྱད། ཁལ་ཆེན་ཉེར་བརྒྱད། མཛོ་བཅུ་གཉིས། ཇ་འབྲུ་འཁོར་བཅུ། གཞན་དགོས་ཆས་ཕྲན་ཚེགས་རིགས་རྣམས་དང་། མི་ཕམ་རིན་པོ་ཆེའི་སྐུ་མཆོད་དཔོན་སློབ་བཞི་བཅུ་ཞེ་ལྔས་བདེ་ཀུན་རབ་གནས་རྒྱས་སྤྲོས་ཅན་ཉིན་གཉིས་ལ་ཐེབས་དངུལ་རྡོ་ཚད་བཞིས་གཙོས་ཇ་མར་འབྲུ་དང་། སློབ་གྲྭ་གསར་བཞག་ལ་རྒྱ་རྡོ་ལྔ་དང་། བཞི་རུ། ཞེ་ཆེན་བླ་གཞུང་གཉེར་ཕྱག་ལ་རྩིས་ཐེབས་དངུལ་རྡོ་ཚད་བཅུ་གཉིས། ཁལ་བརྒྱད་བཅུ་མཛོ་༤༠ རྟ་དྲེལ་བཅུ་བཞི། ཐུགས་སྒྲུབ་ཀྱི་རྟེན་དངུལ་རྡོ་ཚད་གཉིས། ཚེས་བཅུ་ལ་དངུལ་རྡོ་ཚད་གཅིག རི་ཁྲོད་མགོན་བླ་དང་། དགོན་གཞུང་མགོན་བླ་ལ་ལོག་རྟེན་རྒྱ་རྡོ་རེ་རེ། འདུ་ཁང་ཐིག་ཁང་གསར་འགེབ། དངུལ་གྱི་ཕུད་ཕོར་ཉེར་ལྔ་རྣམས་གསར་བཞེངས་དང་སྤངས་དག་ལན་གཅིག་མཛད་པའི་སྐབས་དམན་པ་བདག་ལྟ་བུ་ལའང་དངུལ་རྐྱང་རྒྱ་རྡོ་གཉིས་དང་། ནོར་ནག་སུམ་ཅུ། རྟ་བཞི། ཇ་འཁོར་བཅོ་བརྒྱད། མར་རྒྱ་གཅིག་བརྒྱ་བརྒྱད་ཅུ། ཟངས་དཀར་བཞི། ཕྱི་གླིང་མེ་མདའ་སོགས་ཀྱིས་མགོས་བཏེག་པའི་གནང་སྦྱིན་རྒྱ་རྡོ་ཉི་ཤུ་ཐམ་པའི་བབ་ནོན་ངེས་སྩལ་པ་དང་། ཙཱ་འདྲའི་འཇམ་མགོན་མཆོག་སྤྲུལ་མདུན་དང་། སྐྱབས་རྗེ་ཀཿཐོག་སི་ཏུ་རིན་པོ་ཆེའི་མདུན་དང་། ཟུར་མང་དྲུང་རིན་པོ་ཆེ་སོགས་ལ་རྟེན་བཞེངས་ཞལ་འདེགས་རྒྱ་ཆེར་ཕུལ་བའོ། །ཁྱད་པར་དུ་མྱ་ངན་ལས་འདས་ཁར་སྔར་འཇམ་མགོན་མི་ཕམ་རིན་པོ་ཆེའི་བཀས་བསྐུལ་བ་དང་། ཀཿཐོག་སི་ཏུ་པཎ་ཆེན་གྱི་དགོངས་རྫོགས་དང་སྔར་ཡོད་སྒྲུབ་གྲྭ་བཅུ་གསུམ་བསྟན་དགྲ་ཉག་ཟིང་སྐབས་སྟོངས་པ་ཉམས་གསོས་དང་འབྲེལ་བཤད་སྒྲུབ་ཀྱི་གྲྭ་ཚང་མཁན་སློབ་བཅོ་ལྔ་མེ་སྟག་ཟླ་བ་དང་པོའི་ཚེས་བདུན་ནས་དབུ་འཛུགས་པའི་བཞུགས་ཤག་བཅས་གྲུབ་པ་མཁན་པོ་གླིང་བླ་རིག་འཛིན་འོད་ཟེར་དང་། དེ་རྗེས་དཔལ་འཚོ་བླ་རབ་ཐམས་ཅད་ཞེ་ཆེན་ཁོངས་གཏོགས། བླ་སློབ་ཆོས་འབྲེལ་ཆེ་བས། ཕྱིན་ཆད་འཇམ་དཔལ་རྡོ་རྗེས་མཁན་པོ་མཛད་རྒྱུའི་ཐུགས་བཀོད་ཞལ་ཆེམས་ཀྱི་ཚུལ་དུ་གནང་བ་དང་། མཁན་སློབ་རྣམས་ལོ་གཅིག་ནང་བསྙེན་སྒྲུབ་ཞག་བརྒྱ་ཤིན་ཏུ་དམ་པ་དང་། དེ་ལས་གཞན་རང་ལུགས་གཙོ་བོར་གྱུར་པའི་མདོ་སྔགས་འཆད་ཉན་གནང་རྒྱུའི་ཞལ་འདོམ་དང་། གསོལ་ཕོག་དགེ་རྩེ་ཨ་རིས་རྫ་དཔོན་བསམ་འཕེལ་གྱི་ལོ་གསུམ་ལ་རྒྱ་རྡོ་བཅོ་བརྒྱད་སྦྱར་བ་དང་། དེ་རྗེས་ཆད་ཉེར་སྐབས་རབ་འབྱམས་དྲུག་པ་དང་། གུ་ཎའི་སྐྱེ་སྲིད། རྗེ་དབོན་དགེ་རྒྱལ་དང་། ཞིང་སྐྱོང་མཁན་པདྨ་འོད་ཟེར་རྣམས་ནས་བླ་མའི་དགོངས་རྫོགས་ལ་གལ་གནད་ཆེ་བར་སེམས་ཏེ་ཐབས་ཤེས་གང་དྲག་གིས་རྗེ་དབོན་ནས་རྡོ་ཚད་ལྔ། མི་ཕམ་རིན་པོ་ཆེའི་རིགས་དབོན་འཇུ་ཆོས་དཔལ་ནས་རྡོ་ཚད་ཕྱེད་ཉེར་གཉིས། འདན་དིལ་མགོ་མཆོག་སྤྲུལ་སྐུ་མཆེད་ནས་རྒྱ་རྡོར་གཅིག་བཅས་ཇི་སྲིད་བར་ཐེབས་འཇོག་སྦྱར་བས། བསྟན་པ་ཡུན་དུ་གནས་པའི་ཐབས་བླ་ན་མེད་པའང་སྐྱབས་རྗེ་ཉིད་ཀྱི་ཕྲིན་ལས་ཁོ་ནའི་མཐུའོ། །བདེ་བར་གཤེགས་པའི་སྐུ་གསུང་ཐུགས་ཀྱི་རྟེན་བཞེངས་པ་ཡང་ཕན་ཡོན་ཚད་མེད་པའི་འཇུགས་ངོགས་དང་། ལྷར་བཅས་འགྲོ་བའི་མཆོད་སྡོང་བསོད་ནམས་ཀྱི་ཞིང་དམ་པར་གྱུར་པ་སྣོད་བཅུད་ཀྱི་དཔལ་གཡང་མི་ཉམས་ཤིང་བརྟན་པར་བྱེད་པ་དང་ས་ཡི་རྟེན་ཕུར་ཁྱད་པར་དུ་འཕགས་པ་སྟེ་སྙིང་རྗེ་པད་དཀར་མདོ་ལས། ཀུན་དགའ་བོ་ང་ལྟ་བུ་ལ་གནས། ང་ལྟ་བུ་ལ་བརྟེན་ཏེ་ཡོན་ཕུལ་ན་དེའི་བསོད་ནམས་ཀྱི་དཔེར་བྱ་བ་ཡང་སླ་བ་མ་ཡིན་ནོ། །ཞེས་དང་། དཀོན་མཆོག་ཏཱ་ལའི་མདོ་ལས། སྐུ་གཟུགས་དང་། མཆོད་རྟེན་བྱས་པ་དང་། དེ་མཐོང་བ་དང་། དེ་ལ་མར་མེ་སོགས་ཀྱི་མཆོད་པས་འོད་ཟེར་གྱི་ཁྱད་པར་མཐའ་ཡས་པ་འགྲུབ་པའི་རྒྱུར་གསུངས་པ་སོགས་དེ་བཞིན་གཤེགས་པ་ཉིད་ཀྱི་བདེན་པའི་ཚིག་གི་རབ་ཏུ་བསྔགས་པའི་རྟེན་གསུམ་བཞེངས་པར་མཛད་པའང་། འཇམ་མགོན་མི་ཕམ་རིན་པོ་ཆེས་རྙིང་དགོན་ཁག་འགའ་ཞིག་ལ་རྟེན་འབྲེལ་དགོས་གནད་ཁྱད་པར་ཅན་གྱི་ཉེ་བའི་སྲས་ཆེན་བརྒྱད་ཀྱི་སྐུ་དགོངས་དཔྱད་ཀྱི་བཞེངས་པར་བསྐུལ་བ་ལས་ཞེ་ཆེན་དུ་ས་ཡི་སྙིང་པོའི་སྐུ་བཞེངས་ན་སྣོད་བཅུད་ཀྱི་ཕྱྭ་གཡང་འཕེལ་བ་སོགས་དགོས་གནད་ཁྱད་པར་ཅན་དུ་བཀའ་ཕེབས་བཞིན་གསེར་ཟངས་ཀྱིི་འཕགས་པ་ས་ཡི་སྙིང་པོ་བྱོན་ལེགས་སྒྲོས་ལྡན་ཐོག་ཚད་ལ་ཕྲ་རྒྱན་མང་ལ་སྤུས་ནམ་ལྡན་པ་ཤ་སྟག་དང་། འཇམ་མགོན་མི་ཕམ་ཆོས་རྗེའི་ཐུགས་དགོངས་བཞིན་གསེར་ཟངས་ཀྱིི་རྗེ་བཙུན་འཇམ་དཔལ་དབྱངས་རྗེ་དེ་ཉིད་ཀྱི་ཐུགས་དམ་རྟེན་ཡེ་ཤེས་སེམས་དཔར་བཞུགས་པ་བདག་ཅག་གི་སྟོན་པ་དགུང་ལོ་བཅུ་དྲུག་པའི་སྐུ་ཚད་ཅན་ལ་ཕྲ་རྒྱན་ཁྱད་འཕགས། དེ་ཡི་དཀར་ཆག་སྐྱབས་རྗེ་ཉིད་ཀྱི་མཛད། དབོན་སྤྲུལ་སྐུ་ཕྲེང་གཉིས་པའི་གདུང་རྟེན་སྤྱན་གཟིགས་རྒྱང་མཐོ་བདུན་པ་ཟངས་གསེར་ལས་གྲུབ་པ་བཅས་ཀྱི་འཁོར་དུ་སངས་རྒྱས་ཀྱི་སྐུ་བརྒྱ་དང་ཉེར་གཉིས། སྒྲོལ་སྐུ་ལི་མ་དང་གསེར་སྐུ་འདྲེས་མ་བཅོ་བརྒྱད། ཙནྡན་གྱི་ཉེ་སྲས་བརྒྱད། གནས་བརྟན་བཅུ་དྲུག་སོགས་ཁྱོན་ཟངས་གསེར་དང་ལི་སྐུ་ཉིས་བརྒྱ་བཅུ་གསུམ། གསུང་རྟེན་ལ་བཀའ་འགྱུར། བསྟན་འགྱུར། རྙིང་རྒྱུད། མཛོད་ཆེན་རྣམ་ལྔ་སོགས་སྡེ་སྤར་ཇི་བཞུགས་རྣམས་ཆ་རེ། དཔེ་རྙིང་གསར་འབྱོར་དང་གསར་བྲིས་སྐོར་པོད་དྲུག་ཅུ་ཙམ། སྤར་དུ་བཞེངས་པ། གསང་སྙིང་འགྲེལ་སྤར་ཁབ་དང་། ཉི་འོད་སེང་གེའི་རྒྱ་ཆེར་འགྲེལ། ལམ་ཆེན་ལམ་ཆུང་། ཐུགས་ཐིག དམ་ཚིག་གསལ་བཀྲ་སོགས་དང་། ལོ་ཆེན་རིན་པོ་ཆེའི་བདེ་ཀུན་ཆོ་གའི་རྣམ་བཤད། སངས་རྒྱས་མཚན་འབུམ། ལས་སྒྲིབ་རྒྱུན་གཅོད། གཉུག་སེམས་དང་། ཟུར་དཔྱད་སྐོར། སྡེ་དགེ་དགོན་ཆེན་དུ་མི་ཕམ་རིན་པོ་ཆེའི་གསུང་རྗེ་ཉིད་ཀྱི་ཕྱག་རྫས་ཀྱིས་བཞེངས་པ་པོད་གྲངས་བཅུ་གཅིག་སྐོར། རྗེ་ཉིད་ཀྱི་གསུང་རྣམས་སྤར་བརྐོོ་བཞེད་མེད་ཀྱང་། ཀོང་སྤྲུལ་ཡང་སྲིད་རིན་པོ་ཆེ་ངེད་ཅག་མཆེད་གྲོགས་ཀྱིས་ཅི་འགྲུབ་ཅིག་བཞེངས་ན་ལེགས་ཚུལ་གྱི་གྲོས་མོལ་དང་བྲག་གཡབ་བླ་མ་ཞིང་སྐྱོང་ལ་དོ་ཁུར་བགྱིད་རོགས་ཞུས་ཏེ། ཀོང་སྤྲུལ་ཡང་སྲིད་རིན་པོ་ཆེ་དབྱར་རྒུན་གྱི་གདུལ་བྱ་ཐེངས་གཉིས་ལ་བྱོན་པའི་དངོས་རྫས་ཀྱི་བཞེངས་འཕྲོས་ཅུང་དགེ་ལེགས་རྒྱ་མཚོས་ཐུགས་འགན་བཞེས་ནས་སྐྱབས་རྗེ་ཉིད་ཀྱི་ཕྱག་རྫས་ཀྱི་བཞེངས་པར་མཛད་པ་ཁྱོན་པོད་བཅུ་གསུམ་བཞུགས་པ་རྣམས་དང་། ཐུགས་རྟེན་ལ་འཇམ་མགོན་མི་ཕམ་རིན་པོ་ཆེའི་གདུང་རྟེན་མཆོད་སྡོང་བཀྲ་ཤིས་འོད་འབར་རྒྱང་མཐོ་བདུན་པ་གསེར་དང་། ཕྲ་རྒྱན་སྒྲོས་རི་མོ་སོགས་གང་ཅིས་ཕུལ་དུ་བྱུང་བ་ཉིད་མཛད་ཀྱི་དཀར་ཆག་བཞུགས་པ་རྣམས་དང་། དེ་ལྟར་བཞེངས་པའི་ཕན་ཡོན་ཡང་། དམ་ཆོས་པདྨ་དཀར་པོ་ལས། ལ་ལས་དེར་ནི་རིན་ཆེན་གཟུགས་བྱས་པ། །སུམ་ཅུ་རྩ་གཉིས་མཚན་དང་ལྡན་པའི་གཟུགས། །གང་གི་དེ་ཕྱིར་བྱས་པ་དེ་དག་ཀྱང་། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །ཅེས་སོགས་དང་། ནམ་མཁའ་མཛོད་ཀྱིས་ཞུས་པའི་མདོ་ལས། སྟོང་གསུམ་རིན་པོ་ཆེས་བཀང་ནས་དེ་བཞིན་གཤེགས་པ་ལ་ཕུལ་བ་བས། བསྟན་པའི་མཇུག་དེང་སང་ལྟ་བུར་ཆོས་ཚིག་བཞི་པའི་ཚིགས་སུ་བཅད་པ་གཅིག་འབྲི་བ་དང་། ཀློག་པ་དང་། གཞན་ལ་འཆད་པ་སོགས་ཕན་ཡོན་ཆེ་བར་གསུངས་པ་དང་། ཐུགས་རྟེན་བཞེངས་པའི་ཕན་ཡོན་འོག་ཏུ་འབྱུང་བ་ལྟར་རོ། །གཞན་ཡང་བསྟན་འགྲོའི་བདེ་སྐྱིད་འབྱུང་བའི་དོན་དུ་བདུད་རྩི་སྨན་སྒྲུབ་དང་། མྱོང་གྲོལ་རིལ་སྒྲུབ་སྔ་ཕྱི་དུ་མ་མཛད་ཅིང་དགོན་འདིའི་ཚེས་དུས་མཆོད་རྣམས་ལ་སྐུ་མཚམས་སྐབས་ལས་ཕལ་ཆེར་འཚོགས་སུ་བྱོན་པར་མཛད་ཅིང་། རིལ་སྒྲུབ་སྐབས་སུ་རིལ་བུ་འཕེལ་བ་དང་འཕུར་བ། སྨན་སྒྲུབ་དུས་གཟུངས་ཐག་ལ་འཇའ་རིས་འཁྲིགས་པ་དང་། གཏོར་མ་དང་སྨན་ལས་བདུད་རྩི་འབེབས་པ་སོགས་རྟགས་མཚན་ངོ་མཚར་ཅན་ནམ་དུ་ཡང་འབྱུང་། དེ་ཡང་རྒྱུ་ཤེས་པའི་མཚན་ཉིད་སྣང་སྲིད་དག་མཉམ་ཆེན་པོའི་ལྟ་བས་གཏན་ལ་ཕེབས་ནས་རྐྱེན་འཇུག་པའི་མཚན་ཉིད་ཏིང་ངེ་འཛིན་ལའང་མོས་སྒོམ་དང་ངེས་རྫོགས་ཀྱི་ཚུལ་གཉིས་ལས། མོས་སྒོམ་ཙམ་བྱས་པས་ཀྱང་ཕན་ཡོན་ཚད་མེད་པ་དང་། གསང་སྙིང་ལས། ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་བསྒྱུར་རིགས་ཀྱི་དམ་པ་འགྲུབ། །ཅེས་དང་། དགོངས་འདུས་ལས། བླ་མེད་ཐེག་མཆོག་སྙིང་པོའི་དོན་རྣམས་དང་། །གང་འབྲེལ་ཐམས་ཅད་སངས་རྒྱས་འགྲུབ་པའི་ཕྱིར། །འདི་གྲོལ་འདི་མ་གྲོལ་གྱི་རྣམ་དབྱེ་བྲལ། །འབྲེལ་ཚད་དོན་དང་ལྡན་ཞེས་དེ་ལ་བརྗོད། །ཅེས་སོགས་ཕན་ཡོན་རྒྱ་ཆེར་འབྱུང་བ་དང་། དགུང་གྲངས་ཉེར་བདུན་པར་བྱ་ལོའི་ཟླ་བ་ལྔ་པར་དཔོན་གཡོག་ཉུང་འགྲོས་ཀྱི་རྫོང་ཤོད་དུ་འཇམ་མགོན་ཀོང་སྤྲུལ་རིན་པོ་ཆེ་མཇལ་ནས་རིམ་བརྒྱུད་ཀྱི་ཀརྨ་དགོན་སོགས་མཇལ་དབུས་རི་བར་བསྐོར་དང་། ཆོས་འཁོར་རྣམ་གསུམ་ལ་ཕྱག་མཆོད་སྨོན་ལམ་ཞིབ་རྒྱས་ཙཱ་རིའི་རྩེ་བསྐོར་དང་དུར་ཁྲོད་ལྷ་མོའི་བཞུགས་གནས་ཀྱི་རི་རྩེ་ནས་བསང་དུད་ལྟ་བུའི་ལྟས་ཡ་མཚན་པ་བྱུང་། ལྷོ་གནས་རྒྱས་པ་མོན་དང་ཐུག་གི་བར་ཞབས་ཀྱིས་བཅགས། ལོ་ཕྱེད་གཉིས་ཙམ་ལ་གུ་རུ་པདྨའི་སྒྲུབ་གནས་སོགས་སུ་རྟོགས་པའི་བོགས་འདོན་ཕྱིར་ཕལ་ཆེར་ཆིབས་སྤངས་ཏེ་གནས་བསྐོར་ཞིབ་རྒྱས་དང་། རྫོགས་ཆེན་བླ་མ་ཡོན་ཏན་དཔལ་བཟང་གི་སྦྱིན་བདག་མཛད་དེ་བསམ་ཡས་ཨཱཪྱ་པ་ལོའི་གླིང་དུ་བདུད་རྩི་སྨན་སྒྲུབ་དང་། གནས་ཆེན་རྣམས་སུ་ཚོགས་བསྐང་བཤགས་སྒྲུབ་པ་སོགས་མང་དུ་མཛད། བྱོན་ཚུལ་རྒྱས་པ་རྗེ་བླ་མ་ཉིད་ཀྱི་གསུང་མཛད་འཕྲོ་ལུས་པ་ལམ་ཡིག་ཤེལ་དཀར་མེ་ལོང་དུ་གསལ་བ་ལྟར་དང་། འཇམ་མགོན་ཀོང་སྤྲུལ་རིན་པོ་ཆེའི་གནས་ལམ་བཀའ་ཤོག་གནང་བར་རྗེ་འདི་འཕགས་པའི་སྐྱེས་བུ་འབྲེལ་ཚད་དོན་ལྡན་ཡིན་ཞེས་བཀོད་པར་འདུག རྒྱུན་དུའང་ཐབས་ཀྱི་ཆ་ཐམས་ཅད་ཁྱད་དུ་མི་གསོད་པར་རྒྱལ་བའི་དུས་ཆེན་རྣམས་དང་སློབ་དཔོན་རིན་པོ་ཆེ་དང་རྗེ་ཉིད་ཀྱི་ཐུན་མིན་བླ་མ་རྣམས་ཀྱི་དུས་དྲན་མཆོད་པ་རྣམས་ལ་སྤོས་དང་མར་མེ་ཞལ་ཟས་ཚོགས་ཀྱི་མཆོད་པ་རྣམས་བཟང་ལ་གྱ་ནོམ་མཛད་དེ་རྗེ་ཉིད་དམ་གཞན་ལ་གསུང་བསྐུལ་གྱི་མཆོད་ཕྲེང་བསྔོ་སྨོན་སོགས་ཀྱི་ཚོགས་གཉིས་རླབས་པོ་ཆེ་སྤེལ་བར་མཛད་པ་དང་སྣང་གསལ་གྱི་མཆོད་པ་སྔ་ཐོག་འབུམ་ཐེར་གཅིག་དང་། རྗེས་སུ་གྲངས་ཆེད་དུ་བརྩི་བར་མ་བྱུང་ཡང་ཤིན་ཏུ་མང་པོ་འབུལ་བར་མཛད་དོ། །བོད་ཕྱོགས་ཕེབས་སྐབས་ལའང་རབ་འབྱམས་གོང་མས་བཀྲ་ནང་ཆིབས་སྐྱེལ་བྱོན་པའི་གཟིགས་སྣང་དུ་ལུང་ཁོག་ཐམས་ཅད་མི་དང་མི་མིན་གྱི་སྐྱེལ་མས་གང་གསུང་པ་རྗེ་འདི་བས་ཀྱང་དེ་ནུབ་གཟིམས་ལམ་དུ་དེ་བཞིན་བྱུང་གསུང་། བསམ་ཡས་སུ་སྨན་སྒྲུབ་སྐབས་སྨན་གྱི་ཕོ་བྲང་སྟེང་དུ་འཇའ་ཟུག་པ་ཡང་རྟགས་མཚན་རྗེ་ཉིད་ཀྱི་ལམ་གླུ་འདི་ལྟར་ཏེ། ན་མོ་གུ་རུ། མཚན་དཔེའི་སྐུ་དངོས་མདོ་ཁམས་སྨད་ན་བཞུགས། །ཐུགས་ཀྱི་དགོངས་པ་དུས་གསུམ་རྒྱལ་དང་མཉམ། །ངོ་མཚར་སྙན་པས་འཛམ་གླིང་ཡོངས་ལ་ཁྱབ། །ཕ་མཆོག་བློ་གྲོས་མཐའ་ཡས་ཞབས་ལ་འདུད། །མཁོས་མེད་རོ་དང་འདྲ་བའི་ཉམ་ཆུང་ངས། །ཁམས་ཀོང་ལྷོ་མོན་དབུས་གཙང་ཆུ་བཞིན་ཉུལ། །རང་མཁོས་ཆོས་མཐུན་བྱ་བ་ཅི་ནུས་བསྒྲུབས། །བསམ་དོན་མཐའ་རུ་ཕྱིན་པའི་གླུ་ཞིག་ལེན། །རྒྱ་ཟོངས་དབུས་སུ་བྲིམ་པའི་ཚོང་སྐོར་དང་། །འདིར་སྣང་ཆོས་བརྒྱད་བསྒྲུབ་པའི་ཐོབ་སྐོར་གཉིས། །རང་གཞན་གཉིས་ཕུང་སྒྲུབ་པའི་ཁྲོམ་སྐོར་གསུམ། །མ་ཡིན་བསམ་སྦྱོར་རྣམ་པར་དག་པས་ཕྱིན། །འདུན་མའི་རྩེ་མོར་གྱུར་པའི་གླུ་ཞིག་ལེན། །བྱ་བ་མཐའ་རུ་ཕྱིན་པའི་བྲོ་ཞིག་འཁྲབ། རྟེན་མཆོག་ཁྱད་འཕགས་ཆོས་འཁོར་རྣམ་གསུམ་གཙོས། །ངོ་མཚར་གནས་རྟེན་གཙུག་ལག་བསྒྲང་ཡས་མཇལ། །རླབས་ཆེན་ཚོགས་གཉིས་འབྲེལ་འཇོག་ཅི་ནུས་ཞུས། །དགེ་ཚོགས་གང་མཆིས་བསྟན་འགྲོའི་དོན་དུ་བསྔོས། །བྱ་བ་མཐའ་རུ་ཕྱིན་པའི་གླུ་ཞིག་ལེན། །འདུན་མའི་རྩེ་མོར་གྱུར་བའི་བྲོ༴ ཁྱད་པར་ཟབ་ཡངས་དཔལ་གྱི་བསམ་ཡས་སུ། །བདུད་རྩི་སྨན་གྱི་སྒྲུབ་པའི་ཆོ་ག་བརྩམས། །བོད་ཁམས་ཡོངས་ལ་དགེ་བའི་རྟེན་འབྲེལ་བསྒྲིགས། །རྟེན་འབྱུང་ཤིས་པའི་མཚན་མ་ཅིར་ཡང་མཐོང་། །བྱ་བ་མཐའ་རུ་ཕྱིན་པའི་གླུ༴ འདུན་མའི་རྩེ་མོར་གྱུར་པའི༴ ས་སྤྱོད་འོག་མིན་ཨོ་རྒྱན་སྤྲུལ་པའི་ཞིང་། །སྨིན་གྲོལ་འདབ་སྟོང་བཞད་པའི་གླིང་མཆོག་ཏུ། །ཡེ་ཤེས་ཌཱ་ཀིས་ཟབ་རྒྱས་གདམས་པ་སྩལ། །བརྒྱུད་གསུམ་བླ་མས་བྱིན་རླབས་དགེ་མཚན་རྙེད། །བྱ་བ་མཐའ་རུ་ཕྱིན༴ འདུན་མའི་རྩེ་མོར༴ པད་དཀར་འཆང་བ་སྙིགས་འགྲོའི་སྐྱོབས་པའི་མགོན། །ཡོངས་སུ་གྲགས་པའི་རྒྱལ་མཆོག་རྣམ་གསུམ་གཙོས། །གསར་རྙིང་སྐྱེས་ཆེན་མང་པོ་གསེར་ཞལ་མཇལ། །དད་གུས་མོས་པའི་གསོལ་བ་ཡང་ཡང་བཏབ། །བྱ་བ་མཐའ༴ འདུན་མའི༴ སྐྱེས་ཆེན་རྣམས་ཀྱི་དགོངས་པ་ཆོས་ཀྱིས་བསྐང་། དད་ལྡན་བློ་སྣ་ཆོས་ལ་ཅི་འགྱུར་བྱས། །སྐལ་མེད་འགྲོ་ལ་ཕན་པའི་སྨོན་ལམ་བཏབ། །རང་མཐོང་ང་རྒྱལ་མ་སྐྱེད་གཅོམ་བསྐྱུངས་བཏང་། །བྱ་བ་མཐའ་རུ༴ འདུན་མའི་རྩེ༴ བློ་གཏད་གཅིག་ཆོག་དཀོན་མཆོག་གསུམ་ལ་ཞུས། །རྒྱབ་རྟེན་ཅི་སྒྲུབ་དགེ་བའི་ཕྱོགས་སུ་དྲིལ། །བསགས་སྦྱང་ཐམས་ཅད་གནད་དུ་གང་འགྲོ་བྱས། །ལྷ་ཁ་འདྲེ་ཁ་མང་པོ་མ་རྩེས་སྐྱུངས། །བྱ་བ༴འདུན་མའི༴ ལྷ་དང་བླ་མ་དགྱེས་པའི་དགེ་མཚན་གྱི། །མ་དང་མཁའ་འགྲོ་ལུས་དང་གྲིབ་བཞིན་འགྲོགས། །ཆོས་སྐྱོང་སྲུང་མས་ཕྱི་ནང་འགལ་རྐྱེན་བསལ། །ཆོས་མཐུན་བསམ་སྦྱོར་འབད་མེད་ལྷུན་གྱིས་གྲུབ། །བྱ་བ་མཐར་རུ༴ འདུན་མའི་རྩེ༴ རྣམ་གཡེང་འཛད་མེད་ཚོང་ཁྲོམ་མ་ཉུལ་བར། །ཡོ་བྱད་ལྷག་མ་དགེ་བའི་ཕྱོགས་སུ་གཏོང་། །ཚོགས་སྐོང་མཆོད་འབུལ་བཟང་འབྲེལ་ཀུན་ལ་བཞག །སྒྲུབ་གནས་ལྷ་ཁང་སྟོང་བསྐོར་མ་བྱས་ཙམ། །བྱ་བ་མཐའ༴ འདུན་མའི༴ ད་དུང་ཚེ་མཇུག་དམ་པའི་ཆོས་ལ་དྲིལ། །སྒོ་གསུམ་བྱ་སྤྱོད་བསྟན་འགྲོར་གང་ཕན་བགྱིད། །སྐྱིད་སྡུག་གང་བྱུང་རོ་སྙོམས་ལམ་དུ་ཁྱེར། །ད་ལྟ་ཤི་ཡང་མི་འགྱོད་བློ་བདེ་ཡིན། །བྱ་བ་མཐའ༴ འདུན་མའི༴ དགའ་བདེ་སྐྱིད་པའི་གླུ་ལེན་བྲོ་འཁྲབ་བཞིན། །རྒྱ་མཚོར་དོན་ཡོངས་གྲུབ་པའི་ཚོང་པ་ལྟར། །རྣལ་འབྱོར་དཔོན་སློབ་མདོ་ཁམས་ཡུལ་དུ་ལྡོག །དོན་གཉིས་མཐའ་རུ་ཕྱིན་པའི་བཀྲ་ཤིས་ཤོག །དེ་སྐད་རང་བྱུང་སངས་རྒྱས་པདྨ་སྐྱེས། །གྲུབ་པའི་དབང་ཕྱུག་བུདྡྷ་ཛྙཱ་ན་སོགས། །དམ་པས་བྱིན་རླབས་སྒྲགས་ཀྱི་ལུང་སྟོད་དུ། པདྨ་བི་ཛས་མཚར་གཏམ་བྲིས་པ་དགེ། །ཞེས་གསུངས་པ་ལྟར་རོ། །སྐབས་འདིར་འཕགས་ཡུལ་རྒྱ་གར་དང་བལ་ཡུལ་དུ་ཕེབས་པར་བཞེད་ན་ཡང་གྲྭ་སློབ་རྣམས་ཀྱིས་བཤོལ་བས་རྟེན་འབྲེལ་འཕྲོ་ཅན་དུ་གྱུར། མོས་ལྡན་རྣམས་ལ་ཞལ་མཇལ་གསུང་གི་རྗེས་སུ་བསྟན་པ། ཐུགས་ཀྱི་བྱིན་བརླབ། ཕྱག་དབང་སྔགས་མདུད། དམ་རྫས་ཀྱི་འབྲེལ་བས་ཀྱང་བཟང་འབྲེལ་ཚེ་གཅིག་སངས་རྒྱས་དང་། དམ་པ་འདི་ལ་ངན་སེམས་བགྱིས་པ་རྣམས་ཀྱང་ངན་འབྲེལ་འཁོར་བ་མཐའ་ཅན་དུ་འགྱུར་བ་གདོན་མི་ཟའོ། །དེ་སྐད་དུ་ཡང་གསོལ་འདེབས་ལས། །རྡོ་རྗེའི་གནས་ཡུལ་ཀུན་ཏུ་རྒྱུ་བ་དང་། །དཔའ་བོ་ཌཱ་ཀིའི་ཚོགས་དང་དགྱེས་རྒུར་སྤྱོད། །བརྟུལ་ཞུགས་རིག་པའི་རྩལ་ཆེན་སྦར་བར་མཛད། །ཧེ་རུ་ཀཿདཔལ་མཆོག་ལ༴ རང་གི་ཡོན་ཏན་ས་འོག་གཏེར་བཞིན་སྦེེད། །གཞན་ལ་བསྟོད་བསྔགས་བསྐུར་སྟིའི་རོལ་མོ་འཁྲོལ། །དད་པའི་རྫས་རྣམས་མཆོག་གསུམ་ཞིང་སར་གཏོང་། །བཤེས་གཉེན་གསེར་རིའི་ལྷུན་པོར༴ དབང་བསྐུར་སྒྲུབ་ཆེན་མྱོང་གྲོལ་སྦྱིན་པ་སོགས། །གྲོལ་བ་བཞི་ལྡན་ཕྲིན་ལས་རླབས་ཆེན་བསྐྱངས། །རྟེན་གསུམ་བཞེངས་པ་འདུས་པའི་སྡེ་ཉམས་གསོས། །སྐྱབས་མཆོག་མཚུངས་མེད་ཞབས་ལ༴ རིས་སུ་མ་ཆད་མཆོག་བར་དམན་པའི་འགྲོ། །བསྡུ་བ་རྣམས་བཞིས་ཡོངས་སུ་ཚིམ་པར་མཛད། །དམ་པའི་ཡོན་ཏན་པདྨའི་དགའ་ཚལ་དེར། །སྐལ་བཟང་རྐང་དྲུག་རོལ་ལ༴ ཧ་{ཧཱ}རིའི་ཙནྡན་ལྗོན་པའི་དྲི་བསུང་བཞིན། །བླ་མའི་གསང་གསུམ་སློབ་མའི་རྒྱུད་ལ་བགོ །བསླབ་གསུམ་ལུང་རྟོགས་དཔལ་གྱི་མངོན་མཐོ་བའི། །སློབ་ཚོགས་སྨིན་པར་མཛད་ལ༴ ཅེས་པས་དོན་བསྡུ་བ་སྟེ་གསོལ་འདེབས་འདི་ཡི་སྐབས་ཐོབ་ཀྱི་བསྟན་དོན་ཕལ་ཆེར་སྔར་ཡང་བཤད་ལ་ད་ལྟ་ཡང་བཤད་མ་ཐག་པའོ། །ཐུབ་བསྟན་གསལ་བའི་ཉི་མ་སྐྱེ་རྒུའི་མགོན། །བྱང་ཆུབ་སྤྱོད་པའི་ཕྲིན་ལས་མཐའ་ཡས་པ། །བྱིས་བློས་ཚད་དུ་བཟུང་བའང་ངལ་བའི་རྒྱུ། །འོན་ཏེ་མཛུབ་མོས་ནམ་མཁའ་མཚོན་པ་ཙམ། །རྒྱལ་བའི་ཆོས་མཛོད་འཛིན་པའི་རྒྱལ་བ་རྣམས། །མཉེས་པའི་མཆོད་སྤྲིན་འཛད་མེད་བདུད་རྩིའི་བུམ། །རྒྱལ་རྣམས་དགྱེས་པ་བསྐྱེད་ཕྱིར་རྒྱལ་བ་དང་། །མཚུངས་འདྲའི་བླ་མ་མཆོག་གི་ཕྱག་གིས་འབུལ། །མཛད་པའི་རྣམ་ཐར་འདི་འདྲར་མོས་བློ་ལས། དད་གསུམ་སོར་མོས་བསྐུལ་ན་ཡི་རང་གི། །གླིང་བུ་ཕྱོགས་བྲལ་རྣ་བའི་བཅུད་དུ་སྙན། །ངེས་ལེགས་ཐར་པའི་རི་དྭགས་བདེ་བླག་འགུགས། །དེ་ཕྱིར་འདིར་རྗེས་སློབ་ཅིག་བསྟན་འཛིན་ཚོགས། །ཆོས་བརྒྱད་སྒྱུ་མའི་གྲོང་གིས་མ་བསླུས་པ། །ཞི་བསིལ་ཐར་པའི་ཁང་བཟང་ཐེམ་སྐས་ལ། །འཛེགས་ན་སྐུ་གཉིས་གོ་འཕང་མྱུར་དུ་ཐོབ། །ཅེས་པའང་བར་སྐབས་ཀྱི་ཚིགས་སུ་བཅད་པའོ། །དཔལ་ལྡན་བླ་མའི་རྣམ་པར་ཐར་པ་ལས། བསྟན་དང་འགྲོ་ལ་ཕན་པའི་བྱ་བ་ལས་ཀྱི་འཁོར་ལོ་ཇི་ལྟར་བརྩམས་པའི་ཚུལ་གླེང་བའི་སརྒ་སྟེ་ལྔ་པའོ།། །།༈ ད་ནི་ཞིང་འདིའི་གདུལ་བྱ་རེ་ཞིག་རྫོགས་ཏེ་གཟུགས་སྐུ་ཆོས་དབྱིངས་སུ་བསྡུ་བའི་ཚུལ་བསྟན་པ་ཉུང་ངུའི་ངག་གི་གླེང་བ་ལ། དེ་ཡང་འདྲེན་མཆོག་སྲིད་ཞིའི་ཉི་མ་འདི་ཉིད་རང་དོན་སྤངས་རྟོགས་ཀྱི་ཡོན་ཏན་རྒྱ་མཚོ་མཐར་ཕྱིན། གཞན་དོན་གདུལ་བྱ་ཡིད་ཅན་རྒྱ་མཚོ་སྨིན་ཅིང་གྲོལ་བར་མཛད་ནས་ཞིང་འདིའི་འགྲོ་བ་རྣམས་ཀྱི་ངོར་ཐ་མའི་མཛད་པ་སྟོན་ལ་ཉེ་བ་ན། སྐུ་ལ་བསྙེལ་བ་མི་མངའ་བའི་འཕགས་པའི་ཆོས་ཉིད་མངོན་དུ་མཛད་ནའང་རྟག་འཛིན་ཅན་རྣམས་ཆོས་ལ་བསྐུལ་བའི་ཆེད་དུ་རྡོ་རྗེ་ལྟ་བུའི་གཟུགས་ཀྱི་སྐུ་གཤེགས་པའི་ཚུལ་བསྟན་པར་བརྩམས་ཏེ། སྒྱུ་འཕྲུལ་ལས། སངས་རྒྱས་མྱ་ངན་ཡོངས་མི་འདའ། །ཆོས་ཀྱང་ནུབ་པར་མི་འགྱུར་ཏེ། །མ་རིག་སྨིན་མཛད་འདུལ་བའི་ཕྱིར། །བྱུང་ནས་མྱ་ངན་འདའ་བར་སྟོན། ཅེས་པ་ལྟར་དེ་ཡང་སེམས་ཅན་བསོད་ནམས་དམན་པ་དང་། བསྟན་པ་ལ་གེགས་ཆག་ཆེ་ཞིང་ཁྱད་པར་རྙིང་བསྟན་རིན་པོ་ཆེར་སྒོས་ཆག་བཟློགས་མེད་ཀྱི་སྐབས་ལ་ཁེལ་བས་ཀཿཐོག་ཏུ་ཀུན་གཟིགས་སི་ཏུ་པཎ་ཆེན་ཞབས་པད་བརྟན་ན་རྗེ་འདི་ཡང་གདན་ས་དེ་ཉིད་དུ་ཕེབས་ནས་ནང་རྒྱུད་སྡེ་གསུམ་གྱི་འཆད་ཉན་རྒྱ་ཆེར་གནང་བའི་ཐུགས་བཞེད་ཡོད་ནའང་། སྔ་འགྱུར་པའི་བསོད་ནམས་ཀྱི་སྐལ་བར་མ་ཤོང་ནས་ཀཿཐོག་པཎ་ཆེན་ཞིང་གཞན་དུ་དགོངས་པ་དང་། སྐྱབས་མཆོག་རྡོ་པ་ཐམས་ཅད་མཁྱེན་པའང་བདེ་བར་གཤེགས་པ་སོགས་ཀྱི་གཏམ་ངན་སྙན་དུ་དེངས་པ་ན། ཐུགས་སྐྱོ་བ་ལྟར་མཛད་དེ་དེ་ཕྱིན། རྗེ་ཉིད་ཀྱང་ཞལ་རིང་དུ་མི་བཞུགས་པའི་གསུང་འཕྲོས་སྔ་རྗེས་ཡང་ཡང་གནང་བ་དང་། ཕྲན་ལྷ་ལྡན་ནས་སྟག་ལོར་ཕྱིར་འབྱོར་སྐབས་ཟླ་བ་༤པའི་ནང་སྐོར་སྩལ་པའི་ཕྱག་བྲིས་ཞིག་ཏུ་རྗེས་སུ་བརྩེ་བའི་བསླབ་སྟོན་དང་། བན་རྒན་འཆི་བ་སྒུག་ནས་འདུག་ཡོད་ཅེས་ཕེབས་པའང་། དགོངས་པ་གཞན་དུ་གཏད་པའི་གསུང་དུ་གོ སྐུ་གཤེགས་པའི་སྔ་ལོར་ཞེ་ཆེན་མདུན་རིའི་ཀླད་དུ་གཟིམས་སྦྲ་ཕུབ་སྟེ་ཟླ་བ་ཕྱེད་གཉིས་ཙམ་བཞུགས་ནས་སྐུ་མཚམས་གྲོལ་ཏེ་མཆོག་དམན་ཐམས་ཅད་ལ་ཞལ་མཇལ་ཆོས་འབྲེལ་སོགས་རེ་བ་རྫོགས་པར་བསྐངས་ནས་སླར་རི་ཁྲོད་དུ་ཕེབས་སྔ་ཐོག་ཅིག་ཏུ་གསོལ་བ་མི་འཕྲོད་པ་ཞིག་བྱུང་རྐྱེན་གྱིས་བསྙུན་རོ་རྒྱུན་དུ་ཡོད་པའང་འཕར་ལྡང་དང་། མེ་སྟག་ལོར་སྡེ་སྣོད་འཛིན་པའི་གཙུག་རྒྱན་མཁས་པའི་དབང་པོ་ཀུན་བཟང་དཔལ་ལྡན་ཆེད་དུ་ཕེབས་པ་དང་ལྷན་འཛོམས་ཀྱི་འཇམ་མགོན་མི་ཕམ་རིན་པོ་ཆེའི་གཞུང་གི་མཆན་འགྲེལ་སྐོར་ལ་ལྗགས་ཞུས་ཐུགས་བརྩོན་ཆེན་པོ་རྗེ་རང་གིས་ཀྱང་མཛད་མཁན་བླ་མར་ཡང་བསྐུལ་འདེད་ཞུས་གནང་གི་ཕལ་ཆེར་གྲུབ་ནས་ཆོས་མངོན་རིན་ཆེན་མཛོད་ཀྱི་མཆན་འགྲེལ་མཇུག་མ་རྫོགས་ཙམ་ལ་སྣྲོན་ཟླའི་ཚེས་བཅུ་ཆེན་མོའི་དུས་མཆོད་ཁེལ་བའི་སྐབས་དེར་མི་རྗེ་སྡེ་སྤྱི་ཐང་དཔོན་སྐུ་འཁོར་རྣམས་མཇལ་དུ་བྱུང་བར་ཚེ་དབང་སོགས་ཀྱིས་ཐུགས་བཞེད་བསྐང་། ཚེས་བཅུ་གྲུབ་རྗེས་བྱང་ཕྱོགས་ནས་ཞལ་མཇལ་ཞུ་མཁན་རྣམས་ལ་ཆོས་འབྲེལ་དང་ཕྱག་དབང་སོགས་སྩལ་ནས་དེའི་རྐྱེན་གྱིས་སྐུ་གྲིབ་ཀྱི་རྣམ་པ་ལྟ་བུས་སྐུ་ལུས་ཕྱེད་གཡོ་འགུལ་མེད་ཚུལ་བསྟན་ནའང་ཐུགས་རིག་དྭངས་ཤིང་དགྱེས་སྤྲོའི་ཉམས་དང་བཅས་དྲུང་ན་གནས་པ་རྣམས་ལ་ཞལ་འཛུམ་དང་སྐུ་རྩེད་ཀྱི་རྣམ་པ་ཅིར་ཡང་མཛད་པས་སྡུག་བསྔལ་ལས་དབུགས་དབྱུང་བ་དང་། ཉིན་གཅིག་རྗེ་ཉིད་ཀྱི་ཐུགས་དམ་སྐུ་འདྲ་དང་། བྱིན་རྟེན་རྣམས་རབ་འབྱམས་མཆོག་སྤྲུལ་དབུས་དད་སློབ་རྣམས་ལ་སོ་སོར་གནང་། ཡང་ཕྱག་གཡོན་གར་སྟབས་དང་བཅས་སྟེ་བརྐྱང་བ་དང་། གསུང་གདངས་ཆེན་པོས་ༀ་བཛྲ་ཀཱི་ལི་ཀི་ལ་ཡའི་སྔགས་བརྗོད་པ་དང་ཉེ་གནས་པས་གཏོར་སྒྲོམ་ནས་ཕུར་པའི་སྒྲུབ་རྟེན་ཕྱག་ཏུ་འབུལ་བ་ན། ཀཱ་ཡ་སིདྡྷི་སོགས་དང་སྦྲགས་སྐུ་ཡི་གནས་གསུམ་དུ་བཞེས་པར་མཛད་ནས་ཕྱིར་གནང་། ཆོས་སྐྱོང་གཏོར་མ་རྣམས་ཕྱི་རོལ་དུ་གཤེགས་པའི་བརྡ་མཛད་བྱུང་བའང་དེ་བཞིན་ཉེ་གནས་པས་ཕུལ། རབ་འབྱམས་མཆོག་སྤྲུལ་མདུན་དུ་ཕེབས་པ་ན་ཕྱག་དབུར་བཞག་སྟེ་ཐུག་ཐུག་ལན་ཁ་ཤས་དང་གསུང་བརྡ་གུ་རུ་ལ་གསོལ་བ་ཐོབས་ཞེས་ལན་གསུམ་དུ་གདམས་པར་མཛད་པའང་ཐུགས་ཀྱིས་གཅེས་པར་འཛིན་པའི་བརྡ་ཡིན་སྙམ། འཇམ་མགོན་གུ་ཎའི་ཡང་སྲིད་ཀྱིས་ཞབས་བརྟན་ཕུལ་བ་ན་ཐུགས་དགྱེས་ཉམས་དང་བཅས་ཚེ་མདའ་ཕྱག་ཏུ་བཞེས་ཤིང་ཚེ་རིལ་དྲུང་ན་གནས་པ་རྣམས་ལ་གནང་། མཁན་རིན་པོ་ཆེ་ཀུན་བཟང་དཔལ་ལྡན་ལ་རྗེ་ཉིད་ཀྱི་བསྟན་བཅོས་ཀྱི་ཐ་མ་སྔ་འགྱུར་བསྟན་རྒྱས་སྨོན་ལམ་ཆོས་རྒྱལ་དགྱེས་པའི་ཞལ་ལུང་གི་འགྲེལ་ཆེན་དབུར་བཞག་ནས་ཐུགས་སྨོན་དང་དབུ་གཏུག་མཛད། མདུན་ཅོག་གི་གསེབ་ཏུ་སྨོན་ལམ་ཤོག་དྲིལ་ཞིག་འདའ་རྗེས་ནས་རྙེད་པ་བཀའ་འབུམ་དུ་བཞུགས་པའོ། །སྐབས་དེ་ཙམ་ན་ཉེ་བར་གནས་པ་རྣས་ཀྱིས་ཆོས་སྡེ་ཁག་རྣམས་སུ་ཞབས་བརྟན་རིམ་གྲོ་རྒྱ་ཆེར་སྒྲུབ་པའི་ཡོན་འབུལ་བ་དང་། ཆོས་སྡེ་ཉིད་ནས་ཉིན་མཚན་བར་མེད་དུ་ཞབས་བརྟན་རྒྱ་ཆེར་སྒྲུབ་ཅིང་། ཕྲན་གྱི་གམ་དུའང་གྲྭ་མངག་ཆེད་བཏང་སྔ་རྗེས་འབྱོར་བ་བསྙེན་མཚམ་ཞིག་ལ་གནས་པ་གློ་བུར་དུ་གྲོལ་ནས་ལམ་དུ་ཞུགས་ཀྱང་དངོས་སུ་མཇལ་བ་དང་གསུང་གི་བདུད་རྩིར་ལོངས་སྤྱོད་པའི་སྐལ་བ་ཆད་པ་ནི་རང་ཉིད་ལས་སྒྲིབ་ཆེ་བ་དང་། བསོད་ནམས་ཤིན་ཏུ་ཕྲ་བར་གྱུར་པ་ཉིད་དོ། །དུས་ལ་བབ་ན་དཔག་བསམ་ཤིང་ཡང་འགྱེལ་ཟེར་བ་ལྟར་ཞབས་བརྟན་ཕུལ་བ་རྣམས་ཞལ་བཞེས་མ་གཏུབས་པར་མེ་སྟག་སྣྲོན་གྱི་ཟླ་བའི་ཚེས་བཅུ་དྲུག་ནངས་པར་དགོན་ནང་ནས་རྒྱལ་མདོས་སོགས་འཕང་བ་དང་འཚུབས་ལྷོང་ལྟ་བུས་ཐོག་སེར་དྲག་པོའང་བྱས་སྐབས་རྗེ་བླ་མས་ཕྱག་གཡོན་པས་སྡིགས་མཛུབ་དང་། སྤྱན་ཟུང་ལྟ་སྟངས་དང་བཅས་སྟེ་ཡུན་རིང་པོར་དགོངས་པ་གཏད་པ་ནི་ནགས་ཕྱོགས་ཀྱི་ལྷ་སྲིན་ཀླ་ཀློ་རྣམས་དམ་ལ་འདོགས་ཤིང་བསྟན་འགྲོའི་བར་ཆད་བསལ་ནས་རྗེ་ཉིད་དཔལ་ཆེན་ཧེ་རུ་ཀའི་ཕྱག་རྒྱ་མངོན་དུ་མཛད་པའོ་ཞེས་པའི་བརྡ་སྟོན་པའི་མཐར་སྤྱན་ཟིམ་བུར་སོང་བ་ཉེ་གནས་པ་སེམས་སྟབས་པོར་གྱུར་ནའང་ཡུ ན་རིང་ཙམ་གྱི་མཐར་སྔར་བཞིན་གྱུར་ནས་སྐུ་རྩེད་ཞལ་འཛུམ་གནང་། ཚེས་བཅུ་བདུན་གྱི་ནམ་སྨད་བཅོ་བརྒྱད་ཀྱི་སྐྱ་རེངས་དང་པོ་ཤར་བ་ཉེ་ཙམ་ལ་སྐུ་གཅེར་བུར་བསལ། ཕྱག་གི་དབང་བཞི་མངོན་དུ་མཛད་པའི་བརྡའ་ཐབས་སྣ་ཚོགས་ཀྱི་མཐར་སྐུ་རྒྱབ་ཅུང་བསྙེལ་ནས་ཕྱག་གཡོན་པས་རྡོ་རྗེ་ཁུ་ཚུར་ཐུགས་ཀར་གཏད། གཡས་པའི་ཁུ་ཚུལ་སྐུ་གཡས་པར་བརྟེན་པའི་ཚུལ་གྱིས་གསུང་ཤིན་ཏུ་གསལ་བས་ཨ་གསུམ་བརྗོད་པ་དང་། སྐུ་དང་ཡེ་ཤེས་ལ་འཇུག་པའི་འོད་གསལ་སྦུབས་འཇུག་གིས་གདོད་མའི་ནང་དབྱིངས་ཀ་དག་ཁྱད་ཆོས་དྲུག་ལྡན་གྱི་གྲོལ་གཞི་སྐུ་གསུམ་ལྷུན་གྲུབ་རིན་པོ་ཆེའི་སྦུབས་ཤིན་ཏུ་ཕྲ་བའི་ཡེ་ཤེས་ནང་གསལ་ཐིམ་ལ་མ་རྨུགས་པའི་ཆོས་སྐུའི་དབྱིངས་སུ་མངོན་པར་རྫོགས་པར་སངས་རྒྱས་པར་གྱུར་ཏོ། །ཀྱི་མ་ཀྱཻ་ཧུད་མགོན་པོ་གང་དུ་གཤེགས། །བདག་ཅག་རྣམས་ཀྱི་སྐྱབས་གནས་སུ་ལ་རེ། །ཐར་པའི་ལམ་མཁན་འདྲེན་པ་སུ་ཡིས་བྱེད། །བསྟན་པའི་སྲོག་ཤིང་སྟོང་པར་མ་གྱུར་རམ། །གླིང་བཞིའི་སྣང་བྱེད་ནུབ་པར་སུ་ཡིས་བཟོད། །བསྟན་འགྲོའི་བདེ་སྐྱིད་མུན་པར་གྱུར་པ་ལ། །ཁྱོད་ཐུགས་སྙིང་རྗེས་བརྩེ་བར་མི་འགྱུར་རམ། །སྙིགས་དུས་རྒུད་པའི་གདུང་བ་སུ་ཡིས་སེལ། །ཕ་གཅིག་མི་མངོན་དབྱིངས་སུ་གཤེགས་ལ་དགྱེས། །ལས་ངན་བདག་ནི་ཤུལ་དུ་ལུས་གྱུར་ན། །ཁྱོད་ཀྱི་ཐུགས་རྗེས་འདོར་བ་བཟོད་དམ་ཅི། མ་རིག་མུན་སེལ་བླ་མ་རིན་པོ་ཆེའི། །སྐུ་ཡི་སྣང་བ་ཡིད་ལ་དྲན་པ་དང་། །ཞལ་བཞུགས་ཚེ་ན་གསུང་གི་རྣམ་པ་ཀུན། །ཡིད་ལ་དྲན་པས་བདག་ཡིད་ཤིན་ཏུ་སྐྱོ། །སྡུག་བསྔལ་ཀུན་སེལ་སྨན་པའི་རྒྱལ་པོ་ཡི། །ཡེ་ཤེས་སྐུ་མཆོག་ཡང་ཡང་བསྟན་དུ་གསོལ། །གསུང་གི་གདམས་པའི་ཆོས་ཆར་དབབ་ཏུ་གསོལ། །ཐུགས་རྒྱུད་དགོངས་པའི་བྱིན་རླབས་འཕོ་བར་གསོལ། །བླ་མ་ཁྱེད་དང་མཉམ་པར་མཛད་དུ་གསོལ། །ཅེས་གུས་ཤིང་གདུང་བའི་སྨྲེ་ངག་ཀྱང་ཐལ་ལོ། །དེ་ཉིད་དུ་ཉེ་གནས་པས་བླ་གོས་ཀྱིས་སྐུ་ཡི་དཀྱིལ་འཁོར་འགེབས་ཤིང་། མཁན་ཆེན་རིན་པོ་ཆེར་སྙན་སྒྲོན་ཞུ་བར་ཉེ་གནས་པ་གཟིམས་ཁང་ནས་ཕྱིར་འོང་སྐབས་ལ་རྗེ་ཡི་གཟིམས་ཁང་སྟེང་ཉི་མ་ཤར་བ་ལྟ་བུའི་འོད་ཀྱིས་ཁྱབ་པ་དར་ཅིག་ན་མུན་པར་གྱུར་པ་དང་། མཁན་རིན་པོ་ཆེས་ཐུགས་ཡིད་བསྲེ་བའི་དགོངས་པར་རྒྱུན་རིང་ཙམ་བཞུགས། ཚེས་བཅུ་དགུ་ལ་ཕྲན་ཡང་འབྱོར་པས་གསང་རྒྱ་མ་གྲོལ་བས་གཟིམས་ཁང་ཕྱི་ཚོམ་དུ་གསོལ་འདེབས་དབང་བླང་གི་དམིགས་པ་ཡང་ཡང་ཐུགས་ཀློང་དགོངས་པའི་ངང་བསྐྱངས་ནས་ཅེམ་མེར་སྡད། དེའི་ཕྱི་ཉིན་གསང་རྒྱ་བཀྲོལ་ཏེ་སྐུ་གདུང་རིན་པོ་ཆེ་མཇལ་ཞིང་རྗེ་བླ་མའང་དབང་རབ་མཆོག་ཏུ་གྱུར་པས་གདུལ་བྱ་གཞན་དོན་ལ་དགོངས་ནས་སྐུ་ལུས་འོད་གསལ་ཆེན་པོར་དེངས་སུ་མ་བཞེད་ཙམ་ལས་སྐུ་ཚེ་དེ་ཉིད་ལ་གྲོལ་བ་ཡིན་སྟབས་ཐུགས་དམ་བཞུགས་མ་བཞུགས་སོགས་ཀྱི་གཉེར་ཁ་མི་དགོས་ཤིང་ལུས་རྒྱ་གྲོལ་མ་ཐག་གདོད་མའི་བཙན་ས་ཟིན་པ་དཔེར་ན་བུམ་པ་ཆག་པའི་ནམ་མཁའ་ཕྱི་དབྱིངས་དང་རོ་གཅིག་ཏུ་འདྲེས་པ་བཞིན་བར་དོ་མེད་པར་གྲོལ་བའི་ལྟས་མངོན་དུ་གྱུར་ཅིང་ཐེ་ཚོམ་དང་བྲལ་བའི་ངེས་ཤེས་ཀྱི་གདེང་རྙེད་ནས་སླར་ཡང་མོས་གུས་ཆེས་ཆེར་འཕེལ་བའི་གསོས་སུ་གྱུར་ཏོ། །དེ་སྐད་དུ་ཡང་ཉི་ཟླ་ཁ་སྦྱོར་ལས། སྐུ་དང་ཡེ་ཤེས་འཇུག་ལུགས་ནི། །རིག་པ་འདི་ལྟར་གཏད་པར་བྱ། །ཕུང་པོ་སེང་གེའི་ཉལ་ལུགས་ཀྱིས། །རིག་པ་ཉིད་ནི་མིག་ལ་གཏད། །ཡིད་ཙམ་བར་སྣང་ལམ་དུ་བྱ། །དབྱིངས་དང་རིག་པ་མ་འགྱུར་ན། །མི་དེ་བར་དོ་མེད་པ་ནི། །འཚང་རྒྱ་བ་ལ་ཐེ་ཚོམ་མེད། །ཅེས་དང་འོད་གསལ་རིན་པོ་ཆེའི་པྲ་ཁྲིད་ལས། ཇི་ལྟར་བུམ་པ་ཆག་པ་ན༔ ནམ་མཁའ་གསུམ་ཉིད་གཅིག་པ་བཞིན༔ ནམ་ཞིག་འབྱུང་བཞིའི་བུམ་པ་ཆག༔ རིག་པ་ཉིད་ནི་དབྱིངས་སུ་ཐིམ༔ རང་ངོ་ཤེས་པའི་གྲོལ་བ་ན༔ རྡོ་རྗེ་གདན་ལ་མངོན་བྱང་ཆུབ༔ གདོད་མའི་སར་ཕྱིན་མི་འཁྲུལ་བའོ༔ ཞེས་གསུངས་པ་ཇི་ལྟ་བ་བཞིན་གྱི་དོན་ཡིད་ཐོག་ཏུ་ཁེལ་བ་ལ། ཐུགས་དམ་བཞེངས་བསྐུལ་མ་དགོས་ཀྱང་། སྤྱི་འགྲིགས་ཕྱག་ལེན་བཞིན་ཞུ་བ་གླུས་བསྐུལ་གྱིས་ཆོས་སྐུ་ལས་གཟུགས་སྐུར་བཞེངས་པར་བསྐུལ་ཞིང་གསོལ་འདེབས་སྨོན་ལམ་ཡིད་ཚིམས་པར་ཞུས་མཐར། འཇམ་མགོན་གུ་ཎའི་ཡང་སྲིད་ངེད་ཅག་དཔོན་སློབ་རྣམས་ཀྱིས་སྨེ་བརྩེགས་སོགས་ཀྱི་སྒྲུབ་པའི་དྲི་བཟང་གི་ཆུས་སྐུ་གདུང་རིན་པོ་ཆེར་ལེགས་པར་བཀྲུས་ཤིང་བཏགས་གྲོལ་རིགས་དང་གནས་ཡིག་རྣམས་ཕུལ། རས་བཟང་པོ་དང་དར་གོས་ཁ་དོག་སྣ་ཚོགས་པས་ལེགས་པར་དཀྲིས། སྟོད་ཁེབས་དང་སྨད་ཁེབས་དང་དབུ་རྒྱན་དར་དཔྱངས་སོགས་དང་ཕྱག་ཏུ་རྡོ་རྗེ་དང་དྲིལ་བུ་ཕུལ་ཏེ་ལོངས་སྤྱོད་རྫོགས་སྐུའི་ཆ་བྱད་དུ་བསྒྱུར་ནས་ཁྲིའུར་བཞུགས་སུ་གསོལ། མཆོད་པ་སྣ་ཚོགས་ཀྱིས་མདུན་བསྟར། དེ་ནས་རབ་འབྱམས་མཆོག་སྤྲུལ་རིན་པོ་ཆེ་དཔོན་སློབ་རྣམས་ཀྱིས་མཆོད་པའི་ཕྲེང་བ་དང་། བླ་མ་མཆོད་པ་དང་འབྲེལ་བའི་ཐུགས་སྨོན་གནང་། ངེད་ཅག་དཔོན་སློབ་རྣམས་ཀྱིས་དཔལ་རྡོ་རྗེ་སེམས་དཔའི་དཀྱིལ་འཁོར་ཞལ་ཕྱེས་ཏེ་དཀྱིལ་འཁོར་གྱི་བདག་པོ་ཆོས་ཀྱི་རྗེ་ཉིད་དང་དབྱེར་མེད་དུ་སྒྲུབ་ནས་བདག་ཉིད་ཀྱི་དོན་དུ་དབང་བླངས་པ་དང་། སླར་ཡང་མདུན་རྟེན་ཉིད་ལ་དབང་ཕུལ་བ་རྣམས་རིག་འཛིན་བརྒྱུད་པའི་ཕྱག་བཞེས་ལྟར་དང་། བླ་མའི་རྣལ་འབྱོར་གྱི་མཆོད་པ་དང་འབྲེལ་བའི་གསོལ་འདེབས་དབང་བླངས་བསྟན་འགྲོ་སྤྱི་བྱེར་གྱི་དོན་དུ་སྨོན་ལམ་ཀྱང་ཡང་ཡང་བཏབ་འབྲེལ་ཐོབ་རྣམས་ལ་དམིགས་པའི་བྱང་ཆོག་ཀྱང་བགྱིས། བདུན་ཕྲག་གཅིག་གི་བར་དུ་དེ་ལྟར་མཆོད་ནས་སྐུ་གདུང་རིན་པོ་ཆེ་མཇལ་ཁ་སུ་བྱུང་ལ་སྟོན་ཅིང་དེ་རྣམས་ཀྱིས་མཆོད་པའི་ཕྲེང་བ་དང་། རང་རང་གི་དགེ་བ་ཁས་བླངས། གསོལ་འདེབས་སྨོན་ལམ་སོགས་འགོག་པ་མེད་པར་བྱེད་དུ་བཅུག་པས་ཚོགས་གཉིས་གོང་འཕེལ་དུ་འགྲོ་བ་དང་། ཐར་པའི་ས་བོན་ཚད་མེད་པའི་གཞི་ཐེངས་པའོ། །སྐུ་གདུང་རིན་པོ་ཆེ་ལས་བྱང་སེམས་དཀར་དམར་དང་སྦྲང་རྩི་ལྟ་བུ་ཁ་དོག་སེར་ལ་རོ་མངར་བའི་བདུད་རྩི་ཀྱང་བབས་པ་མྱོང་གྲོལ་མཆོག་ཏུ་གྱུར་བ་དང་། དེ་ལྟར་སྐུ་གདུང་མཆོད་པ་དེའི་ཚུལ་རྒྱུད་ལས་ཀྱང་། མཚན་ཉིད་ལྡན་པའི་བླ་མ་འདས་པའི་ཚེ། །གདུང་བའི་སེམས་ཀྱི་མཆི་མ་ཕྱུང་གྱུར་ན། །ཕྲ་རབ་རྡུལ་དང་མཉམ་པའི་གྲངས་སྙེད་ཀྱི། །བསྐལ་པར་བསགས་པའི་སྡིག་ཆེན་བྱང་གྱུར་ཏེ། །མ་འོང་དུས་སུ་ཞབས་དྲུང་སྐྱེ་བར་འགྱུར། །གདན་ཁྲི་ལེགས་པར་བཤམས་སྟེང་པུར་བཞག་ནས། །ཆུ་གཙང་ཨརྒས་སྐུ་ཁྲུས་ལེགས་གསོལ་ན། །བསྐལ་པ་བྱེ་བར་བསགས་པའི་སྡིག་བྱང་ནས། །ཟག་མེད་དྲི་བྲལ་ཆོས་སྐུ་ཐོབ་པར་འགྱུར། །ཅེས་གསུངས་སོ། །ཟླ་དེའི་ཚེས་ཉེར་དགུ་ལ་རབ་འབྱམས་མཆོག་སྤྲུལ་རིན་པོ་ཆེས་ཞི་ཁྲོ། གུ་ཎའི་ཡང་སྲིད་རིན་པོ་ཆེས་བདེ་ཀུན། ངེད་ནས་རྡོར་སེམས་ཀྱི་དཀྱིལ་འཁོར་རྣམས་པུར་ཁང་དུ་འཇོག་ནས་སྐུ་གདུང་རིན་པོ་ཆེ་འདོ་ལི་ལ་དྲངས་ཏེ་པུར་སྒྲོམ་མཆོད་རྟེན་གྱི་དབྱིབས་སུ་བཅོས་པའི་བུམ་པར་བཞུགས་སུ་གསོལ། དྲི་བཟང་གི་ཤིང་སྣ་ཚོགས་ཀྱི་དབུས་སུ་ཞུགས་འབུལ་བས་མེ་ལྕེ་རྣམས་བུམ་སྒོ་ནས་ཕྱིར་པདྨའི་འདབ་མ་ལྟར་མཆེད་པ་དང་། མདོག་དཀར་ཞིང་སྒྲ་ཡིད་དུ་འོང་། གཡས་སུ་འཁྱིལ་བ་དང་། གདུང་དུད་དྲི་ཞིམ་མདོག་དཀར་གསལ་བཀྲ་ཤིས་པའི་རྟགས་ཀྱི་རི་མོའི་རྣམ་པ་ཅན་དུ་འཕྲོ་བ་དང་། ཉི་མའི་འོད་ཟེར་ཀྱང་མ་སྒྲིབ་པའི་སྦྲང་ཆར་ཟིམ་བུར་འབབ་ཅིང་ཞུགས་འབུལ་ཟིན་ནས་ཕྱོགས་བཞིའི་སྒོོ་ཆུང་རྣམས་བསྡམས་ནས་པུར་ཁང་ཉིན་གསུམ་རྒྱས་བཏབ་ཅིང་བླ་མཆོད་གཟབ་རྒྱས་སྤྲོས། སྐུ་གདུང་བཞུ་བའི་ཉིན་གདན་ས་ནས་དྲོ་ལམ་ཙམ་གྱི་གནས་ནས་དད་མོས་ཤིན་ཏུ་ཆེ་བའི་ནམ་མདོ་བུ་ཚེ་རིང་དང་ནོར་ལྷ་མ་གཉིས་གདུང་མཇལ་མ་བསླེབས་པས་སེམས་མྱ་ངན་གྱིས་ནོན་ཏེ་སྐུ་གདུང་བཞུགས་པའི་ཕྱོགས་སུ་ཕྱག་འཚལ་བས་ནམ་མཁའ་ལ་འཇའ་ཁ་དོག་ལྔ་ལྡན་འཁྱིལ་བའི་ནང་སྤྱན་རས་གཟིགས་བཅུ་གཅིག་ཞལ་དངོས་སུ་མཇལ་བས་དད་སྤྲོ་བླ་ལྷག་ཏུ་འཕེལ་བར་གྱུར་ཅིང་། པུར་གདན་ཞུས་ཀྱི་གླིང་བུ་འབུད་པས་རོགས་པ་ཡོད་དུ་མི་ཚོར་ནས་གཞན་ཞིག་ནས་གླིང་བུས་སྒྲ་གདངས་ཤིག་ལ་འཁྲི་དགོས་བྱུང་བའང་མཁའ་འགྲོ་མའི་གླིང་བུའི་སྒྲ་ཡིན་པར་སེམས། དེ་རྗེས་གདུང་ཁང་ཞལ་དབྱེ་བ་ན། རིང་བསྲེལ་སོགས་ཡོད་མེད་ཀྱི་རེ་དོགས་གིས་མ་བཅིངས་ཤིང་། རྗེ་ཉིད་མངོན་ཚན་ཆུང་བ་ཁོ་ནར་ཐུགས་དགྱེས་པས་དེ་འདྲ་མི་འབྱུང་སྙམ་ཡང་ཐུགས་ལྗགས་སྤྱན་གསུམ་རྒལ་ཚིགས་ལ་འབྱར་ཞིང་དེ་སྟེང་དབུ་ཐོད་བབ་སྟེ་ཁྲུ་གང་མེད་ཙམ་བྱོན་པ་དང་གཞན་འཕེལ་གདུང་སོགས་བལྟ་རྟོག་མ་འཇུག་ཅིང་གདུང་རུས་ཐལ་སོལ་རྣམས་ཞིབ་བཅའ་བསྡུས་ཏེ་སྣོད་དུ་བཅར་ནས་ཕྲན་དཔོན་སློབ་བཅུ་ཐམ་པས་རྡོར་སེམས་གྱི་རུས་སྦྱོོང་ཡིག་བརྒྱ་འབུམ་ཕྲག་འགྲོ་ངེས་བྱས་པ་དང་། དེ་སྐབས་གཅིག་ན་པུར་ཁང་སྟེང་ནས་ཉེ་གནས་དགེ་སློང་ཞིང་སྐྱོང་གིས་རིང་བསྲེལ་མང་ཤས་རྙེད་པ་དང་འུར་སྒྲོགས་ལྟ་བུས་དགོན་གྱི་བླ་གྲྭ་ཕལ་མོ་ཆེས་བཙལ་བ་གྲངས་མེད་རྙེད་ཅིང་པུར་ཁང་ནང་ལོགས་ཀུན་དང་། མགལ་དུམ་གྱི་གསེང་། གདུང་དུད་ཀྱི་གར་ཁྱབ་ཕལ་མོ་ཆེར་གདུང་དང་རིང་བསྲེལ་མུ་ཏི་ཀའི་མདོག་ལྟར་དཀར་བ་ཤས་ཆེ་ཞིང་དབྱིབས་མ་ངེས་པ་དུས་རིང་པོའི་བར་བཙལ་དུ་ཡོད་པ་དང་། གདུང་རུས་དཀྱིལ་འཁོར་གྱི་དབུས་སུ་འཇོག་པའི་ཉེ་སྐོར་དུའང་འཕེལ་གདུང་མང་ཤས་ཕེབས་པ་དང་། རྡོ་རྗེའི་གདུང་གི་རིགས་རྣམས་ནི་ཤིན་ཏུ་སྲ་ཞིང་མཁྲེགས་པ་འབྱུང་བ་དངོས་མཐོང་དང་། དགུང་ཞག་རྫོགས་ཀྱི་བར་མཁའ་ལ་འཇའ་སྤྲིན་རྣམ་པ་མི་འདྲ་བ་མང་པོ་དང་། ལོ་༣ཙམ་ལ་ཟླ་བ་བྱུང་ངོ་ཅོག་གི་ཚེས་བཅོ་བརྒྱད་ནམ་བྱུང་ལ་གདུང་ཁང་གི་ཉེ་ལོགས་སུ་འཇའ་གུར་འཁྱིལ་བ་དང་། གཤེགས་པའི་ནང་པར་ཁ་བ་མེ་ཏོག་གི་དབྱིབས་ཅན་ཤིན་ཏུ་ཆེ་བར་བབ་པ་དང་སྐབས་སུ་ནམ་མཁའ་གཡའ་ཐག་ཆད་པ་སོགས་ངོ་མཚར་བའི་ལྟས་མང་པོར་སྣང་བ་ནི་འོད་གསལ་རྫོགས་ཆེན་གྱི་ལམ་རྟགས་མངོན་དུ་བརྙེས་པ་རྣམས་ལ་ལྟས་འདི་དག་འབྱུང་བ་ཆོས་ཉིད་དེ། རྡོར་སེམས་སྙིང་ཐིག་ལས། ཕྱིར་མི་ལྡོག་པའི་རྟགས་སུ་ནི། །རང་ལ་རང་བྱུང་ཡེ་ཤེས་འཆར། །བྱིན་རླབས་ལུང་བསྟན་བྱེད་པ་འབྱུང་། །རྟགས་སུ་འཇའ་འོད་ས་གཡོ་དང་། །དངོས་གྲུབ་མཁའ་འགྲོའི་གདན་འདྲེན་འབྱུང་། །སྤྲུལ་པའི་སྐུ་ཡི་ཞིང་དུ་འགྲོ། །གཞན་ཡང་ཕྱི་རྟགས་འཇའ་དང་འོད། །སྒྲ་དང་ས་གཡོ་མེ་ཏོག་འབབ། །ཅེས་འབྱུང་བ་ལྟར། སྐུ་གདུང་རིན་པོ་ཆེར་སྦྱིན་སྲེག་གི་ཆོ་ག་གྲུབ་ལ་ཉེ་བ་ན། པུར་ཁང་གི་ནམ་མཁའ་སྔོོ་སངས་ཤིན་ཏུ་དྭངས་པ་མཐིང་ཞུན་གྱི་མདོག་ལྟ་བུར་གྱུར་པ་ལ་འོད་ཁྱིམ་ཁ་དོག་སྣ་ལྔ་པའི་གུར་ཁང་འཁྱིལ་བ་དང་། ཕྱོགས་གཞན་ཐམས་ཅད་ལ་འཇའ་སྤྲིན་དཀར་པོ་རྣམ་འགྱུར་མཐའ་ཡས་པས་ཁེབས་པ་དང་། སྐུ་གདུང་ཞུགས་འབུལ་གྲུབ་པའི་དགོང་ཀ་ཞིག་ཏུ་འབྲུག་གི་སྒྲ་ལྟ་བུའི་ལྡིར་སྒྲ་འཇམ་ལ་རྒྱུན་རིང་ཙམ་ལན་གཉིས་བསྒྲགས་པ་བདག་གི་དངོས་སུ་ཐོས་ཤིང་དེ་དག་ཀྱང་གདོད་མའི་གྲོལ་གཞི་ཆེན་པོར་མངོན་པར་བྱང་ཆུབ་པའི་རྟགས་སུ་འོད་གསལ་རྫོགས་པ་ཆེན་པོའི་རྒྱུད་དང་མན་ངག་ལས་རྒྱ་ཆེར་འབྱུང་བ་བློ་ཡི་ནེམ་ནུར་མ་དགོས་ཤིང་ཡིད་ཆེས་པའི་རྟགས་མངོན་སུམ་ཚད་མར་གྱུར་པ་དང་། རྙིང་ཕྱོགས་ལ་ཁ་ཟེར་བ་འགའ་ཞིག་ན་རེ། རིགས་ལྔའི་གདུང་དང་རིང་བསྲེལ་སྐུ་གསུམ་གྱི་རྟེན་མཚོན་བྱེད་ཐུགས་ལྗགས་སྤྱན་གསུམ་མེས་མ་རྨས་{ སྨས} པར་འབྱུང་བ་སོགས་ལ་བོན་སོགས་ལའང་གདུང་དང་ཐུགས་ལྗགས་སོགས་འབྱུང་བས་ཡ་མཚན་རྒྱུ་མེད་ཅེས་སྒྲོགས་ཤིང་དེ་དག་གི་རྒྱབ་སྐྱོར་དུ་འཇམ་པའི་དབྱང་པཎྜི་ཏའི་ལུང་སོགས་དྲངས་ནས་སོམ་ཉི་ཟ་བ་དག་ཡོད་དུ་སྲིད་ཀྱང་། བཀའ་གདམས་གླེགས་བམ་ལས། བྱང་ཆུབ་སེམས་ལ་རིང་བསྲེལ་འཛག །བསྐྱེད་རིམ་ཅན་ལ་ལྷ་སྐུ་འབྱུང་། །འཁོར་བ་མི་སྤོང་སེམས་དཔའ་ལ། །ཐུགས་དང་ལྗགས་ནི་འབྱུང་བ་ཡིན། །ཞེས་དང་། སྤྱི་མདོ་དགོངས་འདུས་ལས། གང་འདིར་སྣང་བའི་སྒྲོན་མ་དག །མྱ་ངན་འདས་པའི་སྐུ་གདུང་ཡང་། །ཤ་རི་རམ་ཞེས་གྲགས་པ་འབྱུང་། །ཅེས་དང་། རྒྱལ་བའི་སྐུ་གདུང་ཤ་རི་རམ། །ཞིང་ཁམས་ཀུན་ཏུ་ཁྱབ་པ་ནི། །འགར་དང་བཟོས་ནི་བཟླུམ་པ་བཞིན། །བྱས་པ་མེད་ལས་སྣང་བ་དང་། །དཀར་འཚེར་མདོག་གསལ་འཛག་འདྲ་བ། །ཙན་དམར་མདངས་སུ་གསལ་བ་ཡི། །ནམ་མཁའ་གང་བར་ཆར་བཞིན་བབ། །ཅེས་དང་། གཞན་ཡང་སྐུ་གདུང་འབར་བའི་རྒྱུད་སོགས་ལས་དབྱེ་བ། ཡོན་ཏན་བསམ་གྱིས་མི་ཁྱབ་པ་རྒྱ་ཆེར་བསྔགས་པས་ན་གུས་ལྡན་རྣམས་ཀྱི་དད་སྤྲོའི་པདྨོ་འཛུམ་པར་བྱས་ན་ལེགས་པར་འདུག་ཤིང་། གང་དག་སྡིག་ཅན་དང་། གང་ཟག་ཕལ་ལ་འབྱུང་བ་དང་གདོན་གྱིས་བྱས་པའི་རིང་བསྲེལ་ནི་མངོན་རྗེས་ཀྱི་ཚད་མས་བརྟགས་ན་གསེར་དང་ར་གན་འབྱེད་པར་སླ་ཞིང་། དེས་ན་མཁས་པ་དཔྱོད་ལྡན་ཞིག་ལ་ནོར་འཁྲུལ་འོང་མི་སྲིད་དོ། །ཞར་བྱུང་དུ་སྨྲས་པའོ། །དེ་ལྟ་བུའི་རྒྱལ་བ་དང་རྣམ་དབྱེར་མེད་པའི་རིག་པ་འཛིན་པ་ཆེན་པོ་རྣམས་ཀྱི་གདུང་དང་རིང་བསྲེལ་གུས་པས་བཅངས་པའི་ཡོན་ཏན་ཡང་སྤྱི་མདོ་ལས། འདི་དག་ཕེབས་པའི་ཡོན་ཏན་ཡང་། །གང་དང་གང་དུ་བཅངས་པ་ཡི། །ཡུལ་ཁམས་དེ་དག་ཐམས་ཅད་དུ། །ནད་དང་མི་གེས་བགེགས་རྣམས་ཞི། །གནོད་སྦྱིན་སྲིན་པོ་མ་རུངས་པ། །དྲག་པོ་གཏུམ་པོའང་ལྷན་ནེར་འགྱུར། །རྒྱལ་པོ་འཁྲུགས་དང་ཁམས་འཁྲུགས་དང་། །ཡུལ་ཁམས་འཁྲུགས་པའང་ཞི་བར་འགྱུར། །འབྲས་བུ་ལོ་ཐོག་འཕེལ་སྨིན་ཅིང་། །ཡིད་དུ་འོང་བ་ཐམས་ཅད་འབྱུང་། །འདི་དག་སུ་ཡིས་འཆང་བ་རྣམས། །རིག་འཛིན་ས་དང་སྐལ་བ་མཉམ། །ཞེས་སོགས་ཡོན་ཏན་མཐའ་ཀླས་པར་གསུངས་པས། བདག་ཅག་རྣམས་སྐལ་བ་བཟང་ངོ་སྙམ་ནས་དད་མོས་ལྷག་པར་འཕེལ་ཞིང་ཀུན་མཁྱེན་བླ་མ་ཡང་ཡང་དྲན་པའི་གསོས་སུ་གྱུར་ཏོ། །བདག་ཉིད་ཆེན་པོ་ས་པཎྜི་ཏས། བྱང་ཆུབ་སེམས་དཔའ་གཞན་དོན་དུ་གཤེགས་པའི་ཚེ། ས་གཡོ་བ་དང་ལོ་ཉེས་པ་སོགས་འོང་བ་ནི་ཆོས་ཉིད་ཡིན་གསུངས་པ་བཞིན། བསྟན་འཛིན་སྐྱེས་ཆེན་དམ་པ་འདི་རྣམས་གཤེགས་ཕྱིན་ཡུལ་བཅུད་ཉམས་པས་ལོ་ཐོག་ཆེར་མ་བཟང་ཞིང་ས་ཕྱོགས་ཐམས་ཅད་མུ་གེ་འབྱུང་ལ་ཉེ་ཙམ་འདི་ཀའོ། །དགོངས་རྫོགས་མཆོད་སྤྲིན་གྱི་རིམ་པའང་། རྗེ་ཀུན་གཟིགས་དེ་ཉིད་ཀྱི་སྐུ་དབོན་ལུགས་གཉིས་ལ་མཁྱེན་རབ་ཡངས་ཤིང་བསླབ་གསུམ་རིན་པོ་ཆེའི་གཏེར་གྱིས་མངོན་པར་མཐོ་བ་དགེ་ལེགས་རྒྱ་མཚོས་གཙོར་མཛད། བླ་མ་སངས་རྒྱས་སུ་མཐོང་བའི་མོས་གུས་ཅན་ཉེ་གནས་དགེ་སློང་ཞིང་སྐྱོང་ནས་གྲོགས་དན་གྱིས། ཀུན་ཏུ་བཟང་པོའི་སྨོན་ལམ་ལ་ཅོ་འདྲི་བའི་ཚུལ་གྱིས་གཏོང་བའི་སྒོ་འཕར་རྒྱ་ཆེར་དབྱེ་བའི་ཐོག་མར་སྨིན་གླིང་ཁྲི་ཆེན་རིན་པོ་ཆེ་༧ཟུར་མང་དྲུང་རིན་པོ་ཆེ། ༧དཔལ་སྤུང་སི་ཏུ་རིན་པོ་ཆེ་༧ཙཱ་འདྲའི་འཇམ་མགོན་ཡང་སྲིད་རིན་པོ་ཆེ། ༧བེ་རུ་མཁྱེན་སྤྲུལ་གསང་སྔགས་སྤྲུལ་སྐུ། འཛི་སྒར་སྤྲུལ་སྐུ། ཤར་ཀཿཐོག་སྤྲུལ་སྐུ། དཔལ་ཡུལ་སྤྲུལ་སྐུ། ཕུ་ཁུང་མཆོག་སྤྲུལ། ཚབ་ཚ་སྒྲུབ་རྒན། བློ་གྲོས་སྤྲུལ་སྐུ། ཀཿཐོག་པད་འགུར། གདན་ཚབ། ཡ་ད་སྤྲུལ་སྐུ། པད་སྙིང་སྐུ་ཆེ་ཆུང་། བསྟན་འཕེལ། འགྱུར་སྤྲུལ། སྟོན་སྤྲུལ། ཁྲོ་འགབ་དགེ་སྤྲུལ། ཇོ་བོ་སྤྲུལ་སྐུ་རྣམ་གཉིས། ལེགས་དགོན་སྤྲུལ་སྐུ། མགོ་ཚ་མཆོག་སྤྲུལ། རྫ་རྒྱལ་མཚམས་སྤྲུལ། རྫོགས་ཆེན་སྐུ་ཞབས་དགེ་སྤྲུལ་རིན་པོ་ཆེ། ཀུན་བཟང་། འབྲུག་པ་སོགས་མཆོག་སྤྲུལ་རྣམས་ཀྱི་མདུན་འོས་བབས་དང་བསྟུན་པའི་མཛོད་དར། གཅན་གཟན། རྟ་མཛོ། མཆོད་ཆས་སྐོར། རྒྱ་དངུལ་རྡོ་ཚད་གྲངས་མང་སོངས་སོགས་རྫས་གང་ཟབ་རེ་དང་། གཞན་ཡང་ཨོ་རྒྱན་སྨིན་གྲོལ་གླིང་འདུས་སྤྱི་གཙོས། ཀཿཐོག དཔལ་ཡུལ། དཔལ་སྤུང་། སྡེ་དགོན། རྫོང་སར། རྫོགས་ཆེན། ཕུ་ཁུང་། འཇུ་ཉུང་། རྫོང་མགོ སིབ་མདའ། ལྕང་བྲག ཁྲོ་གོང་། ལྷ་འབྲང་། ཚབ་ཚ། རྫ་ཀཿཐོག བསྟན་འཕེལ། པད་སྙིང་། ཇོ་བོ། ཁྲོ་འགབ། མགོ་ཚ། རྫ་རྒྱལ། ལེགས་དགོན། རི་མགུལ། བོན་དགོན་འདུས་སྡེ་སོགས་གོང་སྨོས་ཀྱི་དགོན་སྡེ་ཆེ་ཤོས་རྣམས་དང་འབྲེལ་བའི་སྒྲུབ་སྡེ་དང་། བསླབ་གྲྭ་མཁན་པོ་བླ་མ་བཅས་ལ་འབྲེལ་དང་མཐུན་པར། དར། གོས་ཆེན། ཐེར་ཕྲུག གཅན་ཤུན། ཇ་དངུལ་སོགས་ནམ་བཟང་སོ་སོར་གང་ཟབ་རེ་ལེགས་པར་ཕུལ་ཞིང་། གདུང་མཆོད་ལ། བླ་སྤྲུལ་ཚུར་གདན་ཞུས་སྐོར། ཀཿཐོག་དགེ་རྩེ་རིན་པོ་ཆེ། རྫོགས་ཆེན་རིན་པོ་ཆེ། རབ་འབྱམས་མཆོག་སྤྲུལ་རིན་པོ་ཆེ། དགོན་སྟོད། འབར་ཆུང་། གླིང་རྗེ་དྲུང་རིན་པོ་ཆེ། ཚབ་ཚ་ཉ་འགེ། དབོན་སྤྲུལ། ལེགས་དགོན་ཟུངས་མཁར། བསྟན་འཕེལ་ལྕགས་མོ། ཆུ་ངོགས་པད་དཀར། ཀརྨ་རྒྱ་མཚོ། རི་འགུལ་ཆོས་གྲགས་སྤྲུལ་སྐུ། མཁན་རིན་པོ་ཆེ་ཀུན་དཔལ། ཁྲོ་བླ་ཚེ་གཅེས། མགོ་ཚའི་སྨར་ཁམས་བླ་མ་རྣམས་མདུན། ནང་མཛོད། སྐུ་གསུང་ཐུགས་རྟེན་གྱི་དབུ་བྱས་ཏེ། རས་དང་ཐེར་འཕྲུག་བུབ་མང་། བཟང་གོས་སྣ་ཚོགས། བཟང་ཇ། སྣོད་སྤྱད་རིགས་ཆེ་ཆུང་། སྐུ་ཆས་གཟབ་འཆོལ་འགང་ཆེན་སྐོར་གཞན་ཉེར་མཁོ་ཕྲན་ཚེགས་མཐའ་ཡས་པ། གཅན་ལྤགས་རིགས་སྣ་ཚོགས། འབྲི་ཁལ། མཛོ། མཛོ་མོ། རྟ་དྲེལ་རྣམས་དང་། གསེར། དངུལ་རྡོ་ཚད་གྲངས་མང་མདོར་ན་མཚན་བརྒྱ་སྟོང་གྲངས་མེད་པ་གྱ་ནོམ་པའི་ལེགས་འབུལ་དང་། ༧ རྗེ་བླ་མ་རིན་པོ་ཆེས་ལུགས་གཉིས་ཀྱི་བརྩེ་བས་གཅེས་པར་སྐྱོང་བའི་དམན་པ་ཁོ་བོ་ཅག་ལྟ་བུ་ལ་ཡང་ཡུལ་དམ་པར་བཟུང་ནས་དགོངས་རྫོགས་གནང་སྦྱིན་རྒྱ་ཆེར་སྩལ་གནང་དང་། སྐུ་ཚིགས་རྫོགས་ཀྱི་བར་དགོན་གྱི་བླ་གྲྭ་སུམ་ཅུ་རེས་ཞི་ཁྲོ་དང་། དཔལ་རྡོ་རྗེ་སེམས་དཔའི་སྐོང་ཆོག་གཉིས་གཟབ་རྒྱས་དང་། འབྲེལ་ཐོགས་རྣམས་ལ་ཁྲུས་ཆོག་བཅས་གསུང་བར་ཉིན་བསྟར། ཚོགས་དང་། མར་མེ། སྤོས། ཞལ་ཟས་ཀྱི་མཆོད་པ་གཟབ་རྒྱས་དང་། སོ་སོར་བསྙེན་ཡོན་རྒྱས་སྤྲོས་སུ་ཕུལ་བ་དང་། ལོ་བསྟར་སྐུ་གཤེགས་པའི་དུས་ཆེན་ལ་བླ་སྤྲུལ་མང་ཚོགས་ཀྱི་དཔལ་རྡོ་རྗེ་སེམས་དཔའི་ཐུགས་ཀྱི་སྒྲུབ་པའི་སྒྲུབ་ཆེན་དང་ཚོགས་ཁག་ཟུར་དུ་རྩ་གསུམ་དགོངས་འདུས་བདུན་ཕྲག་གཅིག་བར་འཛུགས་རྒྱུའི་རྟེན་ཐེབས་རྡོ་ཚད་ལྔས་གཙོས་སྦྱོར་འཇག་དང་། སྐྱབས་རྗེ་ཉིད་ཀྱི་སྐུ་གདུང་རིང་བསྲེལ་གྱི་ཕུང་པོ་གཙོ་བོར་གྱུར་པས་བལྟམས་པའི་ཟང་གསེར་ལས་བསྐྲུན་པའི་མཆོད་སྡོང་བྱིན་རླབས་འོད་འཕྲོ་རྒྱང་མཐོ་བཅུ་གཅིག་པར་སྒྲོས་ལྡན་ཕྲ་རྒྱན་གང་ཡོད་རྩལ་སྤྲུགས་བགྱིས་ཤིང་། དམ་ཚིག་པའི་རྟེན་ལ་ཡེ་ཤེས་སེམས་དཔའ་གཟི་བྱིན་ལྷག་པར་དབབ་ཅིང་བརྟན་པར་བྱ་བའི་རབ་ཏུ་གནས་པའི་ཆོ་ག་བཅས་བསྒྲུབས་པ ས་མཐོང་གྲོལ་ཆེན་པོར་བསྟན་པའི་བཙས་སུ་བཞུགས་པ་དང་། རྒྱན་ཁང་དུ་གསེར་དངུལ་བཀྲ་མའི་རྒྱག་གླིང་ཕྲ་ལྡན་སྤུས་ལེགས། བ་སོའི་ཌ་རུ་འཕན་ཚར་ཅན། ཧོར་དྲིལ་ནམ་ལྡན་སོགས་དངོས་རྫས་ཕུན་ཚོགས་ཀྱི་གསར་བཞག་གྲངས་མང་དང་། འཇམ་མགོན་མི་ཕམ་ཆོས་རྗེ་དང་། སྐྱབས་རྗེ་རིན་པོ་ཆེའི་ལེགས་གསུང་སྤར་གྱི་མཐའ་འདུམ་ཞུ་བཅོས་བཅས་ལེགས་པར་གྲུབ་ཅིང་། ད་འབྱུང་ཡང་སྔ་འགྱུར་གྱི་པཎ་གྲུབ་དབང་པོ་རྣམས་ཀྱི་གསུང་སྐོར་ཁ་ཤས་སྤར་དུ་བསྐྲུན་བཞེད་དང་། འདྲ་ཞལ་གསེར་ཟངས་ལས་གྲུབ་པ་མདའ་ཚད་བཞེངས་པ་བཅས་ལྷག་བསམ་ཡར་ངོའི་ཟླ་ལྟར་འཕེལ་ཞིང་། དེ་རྣམས་ཀྱང་གྲགས་འདོད་སོགས་ཆོས་བརྒྱད་ཀྱི་རྙོགས་པས་མི་བརྫི་བར། རྗེ་དེ་ཉིད་ཀྱི་ཟབ་དགོངས་ཡོངས་སུ་རྫོགས་པའི་ཐབས་ཁོ་ནར་གུས་སྦྱོོར་དང་རྟག་སྦྱོར་གྱི་བརྩོན་འགྲུས་འགྲིབ་པ་མེད་པ་དབྱར་གྱི་ཆུ་བོའི་རྒྱུན་ལྟར་འཕེལ་ཞིང་རྒྱས་བཞིན་པ་ལགས་སོ། །དེ་ལྟར་བགྱིས་པའི་དགོས་པའང་། ཆོས་ཐམས་ཅད་ཀྱི་རྒྱལ་པོ་ལས། ལྷ་དང་བཅས་པའི་འཇིག་རྟེན་ན། །དཀོན་མཆོག་གསུམ་པོ་མ་གཏོགས་པ། །ཡོན་གྱི་གནས་ནི་འགའ་ཡོད་མིན། །ཞེས་དང་། ཕལ་པོ་ཆེ་ལས། རིགས་པ་བརྩོན་པ་དཀོན་མཆོག་རྣམས་གསུམ་ལ། །སྦྱོར་བ་སྐྱོ་བ་མེད་པས་མཆོད་བྱས་ན། །དེ་དག་བདུད་བཞིའི་ལམ་ལས་རབ་འདས་ཏེ། །བྱང་ཆུབ་བླ་མེད་མྱུར་དུ་རེག་པར་འགྱུར། །ཞེས་དང་། ཁྱད་པར་ཐུགས་རྟེན་མཆོད་སྡོང་ཆེན་པོ་བཞེངས་པའི་ཕན་ཡོན་ཀྱང་། གཙུག་ཏོར་དྲི་མེད་ལས། མཆོད་རྟེན་གྱི་ལས་བྱས་པས་ཚེ་ཟད་པ་ཡང་སླར་ནུར་ཏེ། ཚེ་ཡང་རིང་པོར་བྱེད་དོ། །གལ་ཏེ་ཤི་བ་ན་ཡང་སྦྲུལ་གྱི་ལྤགས་པ་བརྗེས་པ་བཞི་དུ་ལུས་བོར་ནས་བསྐལ་པ་མཉམ་པས་འཇིག་རྟེན་གྱི་ཁམས་བདེ་བ་ཅན་དུ་འགྲོ་བར་འགྱུར་རོ། །འཆི་བའི་སྡུག་བསྔལ་མྱོང་བར་མི་འགྱུར་རོ། །ཕྱིན་ཆད་ནམ་ཡང་འཆི་བའི་ཚོར་བ་མཐོང་བར་མི་འགྱུར་རོ། །ཕྱིན་ཆད་སེམས་ཅན་དམྱལ་བ་དང་། དུད་འགྲོ་དང་། གཤིན་རྗེའི་འཇིག་རྟེན་དང་། ངན་འགྲོར་འགྲོ་ཞིང་སྐྱེ་བར་མི་འགྱུར་རོ། །ཞེས་སོགས་རྒྱ་ཆེར་བདེན་པའི་ཚིག་གིས་བཀའ་སྩལ་པ་དང་། ཁྱད་པར་དཔལ་ལྡན་བླ་མ་ནི་རིགས་ཐམས་ཅད་ཀྱི་བདག་པོ་རྩ་གསུམ་རྒྱ་མཚོའི་སྤྱི་གཟུགས་འདུས་ཞལ་ཆེན་པོ་ཡིན་ཏེ། འཇམ་དཔལ་ཞལ་ལུང་ལས། མ་འོང་རྡོ་རྗེ་འཆང་བ་སྟེ། །དེ་ལ་བརྙས་བྱེད་སེམས་ཅན་གང་། །དེ་ཡིས་ང་ལ་བརྙས་བྱེད་པས། །ངས་ནི་དེ་ཀུན་དུས་སུ་སྤོངས། །ཞེས་དང་། ང་ནི་དེ་ཡི་ལུས་གནས་ཏེ། །སྒྲུབ་པོ་གཞན་ལས་མཆོད་པ་ལེན། །དེ་མཉེས་དེ་ཡི་རང་གི་རྒྱུད། །ལས་ཀྱི་སྒྲིབ་པ་དག་བྱེད་དོ། །ཞེས་དང་། སྒྲོན་གསལ་ལས། རིགས་ཀྱི་བུ་སངས་རྒྱས་བཅོམ་ལྡན་འདས་ཕྱོགས་བཅུ་ན་ཇི་སྙེད་བཞུགས་པ་དང་། སངས་རྒྱས་བཅོམ་ལྡན་འདས་དེ་རྣམས་ཀྱི་སྐུ་དང་གསུང་དང་ཐུགས་རྡོ་རྗེ་ལས་བྱུང་བའི་བསོད་ནམས་ཀྱི་ཕུང་པོ་ཇི་སྙེད་པ་དེ་བས་ཀྱང་སློབ་དཔོན་གྱི་བ་སྤུའི་བུ་ག་གཅིག་གི་བསོད་ནམས་ཁྱད་པར་དུ་འཕགས་སོ། །དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་ཀྱི་སེམས་ནི་སངས་རྒྱས་ཀྱི་ཡེ་ཤེས་ཀྱི་སྙིང་པོ་གྱུར་པའོ། །ཞེས་མདོ་སྔགས་རྒྱུད་སྡེ་རྒྱ་མཚོ་ལས་ལན་གཅིག་མ་ཡིན་པ་ཡང་ཡང་བསྔགས་པ་དོན་དང་ལྡན་པས་ན་བླ་མའི་དགོངས་རྫོགས་ནི་བླ་མ་བཞུགས་པ་ལ་མཆོད་པ་དང་ཁྱད་པར་མེད་ཅིང་། ཁྱད་པར་ཡེ་ཤེས་ཀྱི་གཟིགས་པ་ལ་ཆགས་ཐོགས་ཀྱི་སྒྲིབ་པ་སྤངས་པས་རང་ལ་དད་པ་ཡོད་ཅིང་དམ་ཚིག་དང་འགལ་བའི་ནོག་དྲིས་མ་གོས་ན་ཇི་ལྟར་མེ་ཤེལ་དང་། ཉི་མ། སྤྲ་བ་གསུམ་འཛོམས་པ་ན་མེ་ཡི་ཤུགས་འབར་བ་ལ་ཆེས་མྱུར་བ་བཞིན་དུ་བླ་མའི་བྱིན་རླབས་ཀྱི་རྡོ་རྗེའི་མེ་འོད་ཆེན་པོས་རང་རྒྱུད་ཀྱི་སྒྲིབ་པའི་ཚང་ཚིང་བསྲེགས་ནས་རྡོ་རྗེ་སེམས་དཔའི་ཡེ་ཤེས་རང་བྱུང་གི་མེ་ཆེན་འབར་བས་ཁམས་གསུམ་ཀུན་ནས་ཀུན་ཏུ་སྣང་བའི་འོད་ཆེན་འབྱིན་པ་ལ་ལྷག་པར་ཡང་སྟོབས་མྱུར་བས་འདིར་ཞུགས་འདིར་བརྩོན་པ་རྣམས་ནི་སྐལ་བཟང་གི་ནང་ནས་ཆེས་སྐལ་བ་ལྡན་པ་སྔོན་བསགས་ལས་འཕྲོ་བཟང་པོའི་རྣམ་དཀར་རྒྱ་ཆེན་པོ་རང་ཤུགས་ཀྱིས་གྲུབ་པ་ཅན་དུ་ཁོ་བོས་རྟོགས་སོ། །སྐབས་དོན་དེ་རྣམས་ཀྱི་མདོར་བསྡུས་པའང་གསོལ་འདེབས་ཚིགས་བཅད་ལས། ཞིང་འདིའི་མཛད་པ་རེ་ཞིག་རྫོགས་པ་དང་། །རྟག་འཛིན་ཅན་རྣམས་ཆོས་ལ་བསྐུལ་བའི་ཕྱིར། །མཛད་པ་ཐ་མ་སྟོན་ལ་ཉེ་བ་ན། །སྤྲོས་པའི་དྲྭ་བ་བཅད་ལ་གསོལ་བ་འདེབས། །འོད་གསལ་འཁོར་ཡུག་ཏིང་འཛིན་ལ་བཞུགས་ནས། །སྐུ་གསུམ་ནང་དབྱིངས་ནམ་མཁའ་ལྟ་བུའི་ཀློང་། །རིག་པ་སྐྱེ་འཆིའི་མཚན་མ་ལས་འདས་པ། །ནང་གསལ་ཆེན་པོར་བཞུགས་ལ་གསོལ༴ དེ་ཚེ་འབྱུང་བ་ཆེ་རྣམས་མྱ་ངན་གྱིས། །ནོན་པར་གྱུར་ན་སེམས་ལྡན་ལྟ་ཅི་སྨོས། །མཁའ་སྤྱོད་ཌཱ་ཀིས་མེ་ཏོག་ཆར་འབེབས་ཤིང་། །ངོ་མཚར་ཆོ་འཕྲུལ་སྟོན་ལ༴ སྤུར་སྦྱངས་ཚེ་ན་མཁའ་ལ་འཇའ་གུར་བབ། །མེ་ལྕེ་ཐམས་ཅད་པདྨ་རིས་སུ་མཆེད། །བྱིན་རླབས་ཐུགས་རྟེན་ལྷ་མིའི་མཆོད་སྡོང་བྱོན། །དད་ལྡན་ཡིད་ཆེས་བསྐྱེད་ལ་གསོལ༴ ཞེས་འབྱུང་ངོ་། །དེ་ལྟར་བདག་ཅག་གི་རྣམ་འདྲེན་ཆོས་ཀྱི་ཉི་མ་ཕན་པ་དང་བདེ་བ་སྦྱིན་ཅིང་གྲོལ་བའི་དཔལ་སྟེར་ཁྱབ་བདག་རྡོ་རྗེ་སེམས་དཔའ་དེ་ཉིད་ཀྱི་གཟུགས་སྐུའི་བཀོད་པ་གདུལ་བྱ་ཐུན་མོང་བ་རྣམས་ཀྱི་སྣང་ངོར་མི་མཐོང་བ་ལྟ་བུར་རང་རང་གི་འཁྲུལ་བའི་ཀུན་རྟོག་གི་ཉེར་ལེན་སྤྲིན་རུམ་སྟུག་པོས་སྒྲིབ་པས་དཔེར་ན་ཡི་དྭགས་ཀྱིས་ཆུ་ཀླུང་རྣག་མཐོང་གི་བློ་ངན་ཞུགས་པ་ལྟ་བུས་མྱ་ངན་ལས་འདས་པར་སེམས་ན་ཡང་། དོན་དམ་པར་ཡོངས་སུ་མྱ་ངན་ལས་འདས་པ་མེད་ཅིང་། ཚིག་དེ་ཡང་བྱང་ཆུབ་སྙིང་པོར་གཤེགས་པ་ལ་དེ་སྐད་བྱ་ཡི། གང་སྟོང་ཉིད་ཟབ་མོར་རྒྱབ་ཕྱོགས་པའི་བློ་ཆུང་ཉན་ཐོས་ཀྱི་བྱང་ཆུབ་ལྟ་བུ་དུ་བ་མེད་པའི་མེ་བཞིན་མནལ་བ་ལྟ་ག་ལ་ཞིག གང་དུ་མངོན་པར་རྫོགས་སངས་རྒྱས་པའི་གནས་དེ་ཉིད་ལས་འོག་མིན་ཞེས་གཞན་དུ་ཡོད་པའང་མི་སེམས་ཏེ། ཤེས་པ་རྟག་གཅིག་རང་དབང་ཅན་ཞིག་གཅིག་ནས་གཅིག་ཏུ་འཕོ་བའི་གྲུབ་མཐའ་ནི་རྫ་ཆག་བྱེའུ་འཕུར་གྱི་དཔེས་མུ་སྟེགས་པའི་ལྟ་བ་ངན་པར་འཕྱན་པ་ཡིན་ལ། དེས་ན་གང་དུ་མངོན་པར་བྱང་ཆུབ་པའི་གནས། སྐུ་གསུམ་འདུ་འབྲལ་མེད་པ་དུས་བཞི་མཉམ་པ་ཉིད་ཀྱི་ཀློང་གཞོན་ནུ་བུམ་པ་སྐུ་ཡི་སྦུབས་ལྷུན་གྲུབ་འོད་གསལ་གྱི་སྣང་བ་འབྱམས་ཀླས་ཤིང་མཐའ་དང་མུ་མེད་པའི་དབྱིངས་ན་བླ་མ་ཁྱབ་བདག་གདོད་མའི་མགོན་པོ་འཁོར་ཡེ་ཤེས་རང་སྣང་གི་རྒྱལ་བ་རྒྱ་མཚོས་ཆོས་སྒྲ་ཚིག་བྱ་རྩོལ་ལས་འདས་པ་ངེས་གསང་རྡོ་རྗེའི་ཆོས་འཁོར་རྒྱ་ཆད་ཕྱོགས་ལྷུང་ཀུན་བྲལ་མཐའ་དབུས་མེད་པར་འབྱམས་ཀླས་པར་རང་ཤར་རང་སྣང་བའི་ཚུལ་གྱིས་བཞུགས་པ་ལས་ཕྱིར་གསལ་རང་སྣང་ལོངས་སྐུའི་ཞིང་རྒྱན་སྟུག་པོ་བཀོད་པ་དང་མངོན་དགའ་སོགས་ཕྱེད་སྤྲུལ་དང་། ཐུགས་རྗེ་འགྲོ་བ་འདུལ་བ་སྤྲུལ་པའི་ཞིང་ཁམས་སོགས་མདོར་ན་སྐུ་དང་ཡེ་ཤེས་ཀྱི་ཞིང་ཁམས་ཚད་མེད་པས་དེ་བཞིན་གཤེགས་པ་དང་བྱང་ཆུབ་སེམས་དཔའ་དང་། འཕགས་པ་ཉན་ཐོས་དང་། རང་སངས་རྒྱས་སོ་སོའི་སྐྱེ་བོ་ལམ་ལ་ཞུགས་པ་དང་། མ་ཞུགས་པ། གཞན་ཡང་ས་དང་ཆུ་དང་མེ་སོགས་འབྱུང་བ་ཆེ་དང་ཡིད་བཞིན་གྱི་ནོར་བུ་དང་། དཔག་བསམ་གྱི་ཤིང་སོགས་གདུལ་བྱའི་རེ་སྐོང་གང་ལ་གང་དགོས་པ་འབད་མེད་དུ་སྩོལ་བ་ལ་སྔོན་སློབ་ལམ་གྱི་སྐབས་སུ་དམ་བཅས་པའི་ཐུགས་བསྐྱེད་ཀྱི་གོ་ཆ་བཙན་པོས་གཞན་དབང་དང་རང་གི་མངོན་དུ་བྱས་པའི་བྱང་ཆུབ་དང་སེམས་ཅན་གྱི་རང་བཞིན་དག་པའི་དབྱིངས་མཉམ་པ་ཉིད་དུ་མཁྱེན་པའི་ཕྱིར་ཚད་མེད་པའི་ཐུགས་རྗེ་དང་སྨོན་ལམ་གྱི་མཐུ་གྲུབ་པའི་རྣམ་འཕྲུལ་བསམ་གྱིས་མི་ཁྱབ་པ་འགོག་པ་མེད་ཅིང་ཐ་མལ་གྱི་བསམ་ཡུལ་ལས་འདས་པ་ཇི་སྲིད་ནམ་མཁའ་གནས་ཀྱི་བར་དུ་འབྱུང་བ་སྟེ། རྒྱུད་བླ་མ་ལས། གཞན་གྱི་དབང་གི་ངེས་འབྱུང་དང་། །བདག་དང་སེམས་ཅན་མཚུངས་གཟིགས་དང་། །མཛད་པ་ཡོངས་སུ་མ་རྫོགས་ཕྱིར། །འཁོར་བ་སྲིད་དུ་མཛད་མི་འཆད། །ཅེས་དང་། རྡོ་རྗེ་གུར་ལས། འདུལ་བའི་འཇིག་རྟེན་མཐོང་ནས་ནི། །མི་ཡི་གཟུགས་ནི་དུ་མར་བྱེད། །སངས་རྒྱས་སེམས་ཅན་སྐྱབས་བཞེད་པས། །སངས་རྒྱས་གར་ནི་རོལ་པར་མཛད། །ཅེས་དང་། ཀུན་མཁྱེན་ཆོས་ཀྱི་རྒྱལ་པོའི་དགོངས་པའི་གསང་མཛོད་ལས། ངོ་བོ་སྟོང་པ་རིན་པོ་ཆེ་ཆོས་སྐུའི་སྦུབས་ན༔ རང་བཞིན་གསལ་བ་ལོངས་སྐུ་དང་༔ ཐུགས་རྗེ་མ་འགགས་རིག་པའི་སྙིང་པོ་ཅན༔ ནང་གསལ་དུ་བཞུགས་པ་ནི་མི་སྣང་ལ་རང་བཞིན་ཡོད་པ༔ གནམ་སྟོང་གི་ཟླ་བ་ཕྱིར་གསལ་དུ་མ་གྲུབ་ཀྱང༔ ནང་གསལ་ལ་བཞུགས་སོ༔ དུས་གསུམ་སངས་རྒྱས་ཐམས་ཅད་དབྱིངས་ཀྱི་ཕོ་བྲང་ན་བསམ་གྱིས་མི་ཁྱབ་པ་བཞུགས་ཀྱང་གཅིག་ལ་གཅིག་མི་གཟིགས་ཏེ༔ ཆོས་སྐུ་སྤྲོས་པ་དང་བྲལ་བའི་ངང་ལ་བཞུགས་པའོ༔ དེ་ལས་མ་གཡོས་བཞིན་དུ་ཕྱོགས་བཅུའི་ཞིང་དུ་ལོངས་སྤྱོད་རྫོགས་པ་དང་༔ སྤྲུལ་པའི་སྐུ་ནམ་མཁའི་ཟླ་བ་ལས༔ ཆུ་ཟླ་ལྟར་སྣང་བས་འགྲོ་བའི་དོན་འཁོར་བ་མ་སྟོང་གི་བར་དུ་མཛད་པ་ནི༔ཐམས་ཅད་མཁྱེན་པའི་ཐུགས་རྗེ་དང་༔ ཐབས་ལ་མཁས་པའི་ཕྲིན་ལས་མ་བཙལ་ལྷུན་གྲུབ་ཏུ་བཞུགས་པ་ལས༔ འབད་རྩོལ་མེད་པར་དུས་ཐམས་ཅད་དུ་ལྷུན་གྱིས་གྲུབ་པ་ཡིན་ནོ༔ ཞེས་རྡོ་རྗེའི་གསང་བ་ཟབ་མོའི་གནས་ངེས་པར་བསྟན་པ་འདིས་རྒྱལ་བའི་དགོངས་པ་ཕྱོགས་ཙམ་མཚོན་པས་ན། རྗེས་འཇུག་གི་གདུལ་བྱ་རྣམས་ཀྱིས་གསོལ་བ་སྙིང་གི་དཀྱིལ་ནས་འདེབས་ན་ཡེ་ཤེས་གཟིགས་པའི་བྱིན་རླབས་འཇུག་པ་དང་། གདུལ་བྱའི་རང་སྐལ་དང་འཚམ་པའི་མཆོག་གི་སྤྲུལ་སྐུའི་ཟླ་སྣང་འཆར་ནས་བསྟན་འགྲོའི་དོན་རླབས་པོ་ཆེ་བསྒྲུབ་པར་འགྱུར་བའང་དཔལ་ལྡན་བླ་མའི་བྱིན་རླབས་ཐུགས་རྗེའི་རྣམ་རོལ་འགགས་མེད་དུ་སྣང་བའོ། །དེ་སྐད་དུ་གསོལ་འདེབས་ལས། གང་དུ་བྱང་ཆུབ་འོག་མིན་གནས་མཆོག་དེར། །ཕྱིར་གསལ་སྐུ་དང་ཡེ་ཤེས་སྤྲིན་བཀོད་པས། །སངས་རྒྱས་ཀུན་དང་རོ་མཉམ་སྤྱོད་ཡུལ་གཅིག །ཁྱབ་བདག་རྡོ་རྗེ་འཆང་ལ་གསོལ་བ་འདེབས། །སླར་ཡང་གང་འདུལ་སྤྲུལ་པ་ཆུ་ཟླ་དང་། །ནོར་བུ་དཔག་བསམ་ཤིང་ལྟར་རྒྱུན་མི་ཆད། །བགྲང་ཡས་འགྲོ་ཁམས་ཡོངས་སུ་སྨིན་པ་དང་། །རྣམ་གྲོལ་བྱང་ཆུབ་ལམ་ལ་དཀྲི་མཛད་གསོལ། །ཅེས་མོས་གུས་ཆེན་པོས་གསོལ་བ་འདེབས་པའོ། །དཔལ་ལྡན་བླ་མའི་རྣམ་པར་ཐར་པ་ལས་གཟུགས་སྐུ་ཆོས་དབྱིངས་སུ་བསྡུ་ཚུལ་འདས་རྗེས་དང་བཅས་པའི་སྐབས་ཀྱི་སརྒ་སྟེ་དྲུག་པའོ།། །།༈ དེ་ལྟར་འཇམ་དབྱངས་བླ་མ་སྲས་བཅས་རྒྱལ་ཀུན་འདུས་ཞལ་དེ་ཉིད་ཀྱི་བཀའ་དྲིན་བྱང་ཆུབ་སྙིང་པོའི་བར་དུ་བདག་ཅག་གི་ལུས་ལོངས་སྤྱོད་ཀྱི་དངོས་པོ་ཀུན་གྱི་མཆོད་ནའང་ཆ་ཙམ་གཞལ་བར་དཀའ་ཞིང་། ཇི་སྲིད་རང་རང་གི་ཤ་ཁྲག་གི་རྒྱ་མཚོ་སྐེམ་ཞིང་འཁོར་བའི་མཐའ་སྟོངས་པར་མ་གྱུར་གྱི་བར་དེ་སྲིད་དུ་དཔལ་མགོན་བླ་མ་རིགས་ཀྱི་བདག་པོར་ཐོབ་ནས་མཉེས་པ་གསུམ་གྱིས་མཉེས་པར་བགྱིད་ཅིང་མི་མཉེས་པ་ཕྲ་མོ་ཙམ་དུའང་མི་བྱེད་པ་དང་། ཟབ་པ་དང་རྒྱ་ཆེ་བའི་ཆོས་ཀྱི་བདུད་རྩིས་སྤྱིི་བོ་ནས་དབང་བསྐུར་བ་ནོད་སྟེ། བདག་རྒྱུད་ཡོངས་སུ་སྨིན་ཅིང་སྐུ་བཞི་གྲུབ་པའི་ལང་ཚོ་ཅིར་ཡང་རྒྱས་པ་དང་། ཁྱད་པར་མཆོག་གསང་རྡོ་རྗེ་རྩེ་མོའི་ཡེ་ཤེས་འཕོ་བའི་དབང་བསྐུར་རིག་པའི་བཅུད་དུ་སྨིན་པ་ལས་འཁྲུལ་བ་གཞི་དབྱིངས་སུ་དག་སྟེ་མ་འཁྲུལ་གདོད་མའི་གནས་ལུགས་མངོན་དུ་གྱུར་ཅིང་ཚེ་འདི་ཉིད་ལ་པཎ་ཆེན་དྲི་མེད་བཤེས་གཉེན་དང་། རྒྱལ་དབང་པདྨ་ལས་གྲོལ་ལྟ་བུའི་འཇའ་ལུས་རྡོ་རྗེའི་སྐུ་བརྙེས་ཏེ་འགྲོ་བའི་དོན་མཐའ་ཡས་པ་སྐད་ཅིག་རེ་རེ་ལ་སྒྲུབ་ནུས་པ་རྒྱལ་སྲས་འཇམ་དཔལ་དཔའ་བོ་དང་ཀུན་ཏུ་བཟང་པོའི་སྨོན་ལམ་ལ་དབང་འབྱོར་ཞིང་། དེ་ལྟ་བུའི་གོ་འཕང་མངོན་དུ་མ་གྱུར་གྱི་བར་དུ་མགོན་པོ་མཆོག་གི་ཞིང་གང་དུ་བཟུང་བ་དང་། བྱང་ཆུབ་དམ་པ་བརྙེས་པའི་ཚུལ་བསྟན་པ་ག་ལ་བ་དེར་བདག་ཀྱང་འཁོར་གྱི་ཐོག་མར་སྐྱེས་ནས་ཐེག་ཆེན་ཆོས་ཀྱི་བདུད་རྩིའི་དགའ་སྟོན་ལ་ལོངས་སྤྱོད་པ་དང་། གནས་སྐབས་སུ་འཇིག་རྟེན་གྱི་ཁམས་ཀུན་ཏུ་དཔལ་ལྡན་བླ་མའི་ཐུགས་རྗེའི་བྱིན་རླབས་ཀྱི་སྣང་བས་ཁྱབ་པ་དེ་སྲིད་དུ་བསྟན་པ་དང་བསྟན་འཛིན་གྱི་དབུ་འཕང་མཐོ་ཞིང་། སྣོད་བཅུད་ཀྱི་རྒུད་པ་ཞི་ནས་རྫོགས་ལྡན་གསར་པའི་དཔལ་ཡོན་རྒྱས་པ་དང་། ཁྱད་པར་གངས་ཅན་བསྟན་པའི་སྙིང་པོ་རྒྱལ་དབང་པདྨཱ་ཀ་རའི་རིང་ལུགས་ཕྱོགས་དུས་ཀུན་ཏུ་ཁྱབ་ཅིང་བཤད་དང་སྒྲུབ་པས་ཉམས་སུ་བླངས་པས་རིག་འཛིན་མཁས་གྲུབ་རྒྱ་མཚོས་ས་སྟེང་ཡོངས་སུ་ཁྱབ་པའི་སྨོན་ལམ་དང་འབྲེལ་བའི་ཤིས་པའི་ཚིག་གིས་དགེ་ལེགས་སུ་བྱ་བ་སྟེ། གསོལ་འདེབས་ལས། བདག་གི་དུས་གསུམ་བསགས་པའི་དགེ་བ་དང་། །ལུས་དང་ལོངས་སྤྱོད་འཁོར་གཡོག་དང་བཅས་པ། །རིགས་ཀྱི་བདག་པོ་བླ་མ་མཆོག་ལ་འབུལ། །སྐུ་གསུང་ཐུགས་ཀྱི་དམ་ཚིག་ཉམས་ཆག་བཤགས། །འདི་ནས་བཟུང་སྟེ་སྐྱེ་བ་ཐམས་ཅད་དུ། །དཔལ་ལྡན་བླ་མ་ཡིད་ལ་བྱེད་པ་དང་། །ལེགས་གསུངས་ཆོས་ཀྱི་བདུད་རྩིས་འཚོ་བ་དང་། །དགོངས་པ་ཟབ་མོ་ཡོངས་སུ་སྐོང་ནུས་ཤོག །མདོར་ན་སྐྱིད་སྡུག་ལེགས་ཉེས་ཅི་བྱུང་ཡང་། །ཕ་གཅིག་བླ་མ་འབོད་ལས་གཞན་མེད་པས། །ཐུགས་རྗེའི་ཕྱག་གིས་ནམ་ཡང་མི་གཏོང་ཞིང་། །དགོངས་པའི་བྱིན་བརླབ་རྒྱུད་ལ་འཕོ་བར་ཤོག །ནམ་ཞིག་བྱང་ཆུབ་དམ་པ་བརྙེས་པ་ན། །བདག་ཀྱང་འཁོར་གྱི་ཐོག་མར་སྐྱེ་བ་དང་། །ཐེག་མཆོག་ཆོས་ཀྱི་དགའ་སྟོན་ལ་སྤྱོད་པའི། །སྨོན་ལམ་ཁྱད་འཕགས་འགྲུབ་པར་བྱིན་གྱིས་རློབས། །བསྟན་འཛིན་སྐྱེས་རྣམས་ཞབས་བརྟན་བཤད་སྒྲུབ་འཕེལ། །དུས་འཁྲུགས་ཀུན་ཞི་འཇིག་རྟེན་བདེ་ཞིང་སྐྱིད། །བདག་ཅག་ཚེ་མཐར་ཕྱིན་ཅིང་བསམ་དོན་འགྲུབ། །རྒྱལ་བསྟན་དར་ཞིང་རྒྱས་པར་མཛད་དུ་གསོལ། །ཁྱད་པར་རྒྱལ་བ་ཀུན་གྱིས་རབ་བསྔགས་པའི། །པདྨའི་རིང་ལུགས་སྔ་འགྱུར་བཀའ་གཏེར་ཆོས། །ཉན་བཤད་སྒོམ་པས་ཕྱོགས་ཀྱི་ཐ་གྲུར་ཁྱབ། །རྡོ་རྗེ་རྩེ་མོའི་བཀྲ་ཤིས་དཔལ་འབར་ཤོག །ཅེས་པས་མཐའ་བརྒྱན་པའོ། །དེ་རྣམས་ཀྱིས་དཔལ་ལྡན་བླ་མའི་རྣམ་པར་ཐར་པ་ལས། རང་བློས་གང་དཔོག་ཙམ་དུ་སྨོས་པ་རེ་ཞིག་རྫོགས་སོ། །སླར་ཡང་ཚིགས་སུ་བཅད་པར་ཕྲེང་བས་མཇུག་བསྡུ་བ་ནི། ༀ་སྭ་སྟི་སིདྡྷཾ། རྒྱལ་བ་ཀུན་གྱི་ཡེ་ཤེས་གསང་བའི་མཛོད་འཛིན་པ། །དཔལ་ལྡན་བླ་མ་རྡོ་རྗེ་གསུམ་གྱི་རྣམ་རོལ་གར། རྩོད་དུས་གངས་ཅན་མཁས་དང་གྲུབ་པའི་གཙུག་རྒྱན་རྗེ། །ཞབས་ཀྱི་པདྨོར་སླར་ཡང་གུས་པས་སྤྱི་བོས་མཆོད། ༡ །གང་གི་རང་བཞིན་རྡོ་རྗེ་ནམ་མཁའི་དཀྱིལ། །བྱིས་བློའི་ལག་གིས་འཇལ་བར་བྱེད་པ་ནི། །ནམ་མཁའ་སྟོང་པར་སྦར་མོས་བསྙབས་པ་བཞིན། །འཛིན་པར་བྱ་བ་རྡུལ་ཙམ་མ་དམིགས་ཀྱང་། ༢ །གང་གི་བཀའ་དྲིན་སྲང་ལ་གཞལ་གྱུར་ན། །སྐྱེ་རྒུའི་བདག་པོ་ཡིས་ཀྱང་གཞན་དུ་ཅི། །དངོས་པོར་གྱུར་པའི་སྐབས་ཞིག་མཆིས་གྱུར་ན། །སྟོང་གསུམ་སྣོད་དུ་བྱས་ཀྱང་ཤོང་མི་སྲིད། ༣ །བདག་གཞན་རྣམས་ཀྱི་རྒྱུད་ལ་ཡེ་ཤེས་ཀྱི། །ཆོས་ཁམས་དམ་པ་སྒྲིབ་བྱེད་ཆུ་འཛིན་གྱི། །ཉེས་པའི་དྲི་མ་འཁྲུད་པར་བྱེད་པ་ལ། །ཐབས་མཆོག་བླ་མའི་བདུད་རྩི་འདི་རྨད་བྱུང་། ༤ །དགེ་ཚོགས་རིན་ཆེན་རྡུལ་གྱི་ཕུང་པོ་ནི། །གཅིག་ཏུ་སྤུངས་པས་སྐུ་བཞིའི་ལྷུན་པོ་བརྗིད། །འོད་གསལ་རྡོ་རྗེའི་བ་གམ་མངོན་པར་མཐོ། །ཡིད་བཞིན་རིན་ཆེན་ཏོག་གིས་རྣམ་པར་མཛེས། ཤིན་ཏུ་རྟོགས་དཀའི་གསང་བའི་སྙིང་པོ་འདི། །སྒོ་འབྱེད་གནད་ཀྱི་ལྡེའུ་མིག་གཞན་གྱིས་མིན། །འཁོར་འདས་མེས་པོ་ཀུན་ཏུ་བཟང་པོ་དེས། །ཟབ་མྱུར་བླ་མའི་ཐབས་མཆོག་བསྟན་འདིར་སློབ། ༦ །བླ་མ་འདི་ནི་བདེ་ཆེན་གཙོ་མཆོག་གར། །གཅིག་པུའི་ཉམས་ཀྱིས་ཡེ་ཤེས་རོས་སྒེག་ཅིང་། །ས་གསུམ་ཀུན་ན་ཁྱབ་པར་འཕྲོ་བ་ཡི། །བླ་མ་ལས་གཞན་འཁོར་འདས་ཆོས་མ་དམིགས། ༧ །དེ་ཕྱིར་བདག་ལ་དགྱེས་པའི་ཞལ་ངོམ་ཟབ་མོའི་གདམས་པ་རྗེས་སུ་བསྟན། །རིག་པ་དང་ནི་རྐང་པར་ལྡན་བྱས་ཆོས་ཀྱི་སྲས་སུ་བདག་དབང་བསྐུར། །བྱང་ཆུབ་རྡོ་རྗེ་སྙིང་ལ་བསྟིམས་བྱས་རང་རིག་ཆོས་སྐུའི་ནོར་བུ་རྙེད། །རྣམ་གྲོལ་ཞི་བ་མཆོག་གི་རང་བཞིན་བདག་བྱུང་དམ་པ་ཨེ་མ་ཧོཿ ༨ །དེ་སླད་ཉིད་དུ་བླ་མའི་རྣམ་ཐར་ནི། །ས་དང་ནམ་མཁའ་རྒྱ་མཚོ་ཆེན་པོ་བཞིན། །བསམ་ཡས་འཕགས་པ་ཁོ་ནའི་སྤྱོད་ཡུལ་ལ། །བདག་འདྲས་སོར་མོས་ངལ་བ་འདི་ཅི་ཞིག ༩ །དེ་ལྟ་ན་ཡང་ཚུ་རོལ་མཐོང་བའི་བློས། །ཆ་ཤས་ཙམ་ཞིག་གུས་པས་བླངས་བྱས་ཏེ། བཀོད་པའི་ལེགས་བྱས་དགེ་ཚོགས་ནོར་བུ་འདི། །བླ་མ་དགྱེས་པའི་མཆོད་སྤྲིན་དམ་པར་འབུལ། ༡༠ །མཐའ་ཀླས་འགྲོ་བ་ཀུན་ཀྱང་སྒྲིབ་གསུམ་དག །རང་རིག་དཔལ་ལྡན་བླ་མའི་རང་ཞལ་མཇལ། །ཡེ་ཤེས་བླ་མའི་ས་ལ་ཕྱིན་པ་དང་། །ཀུན་བཟང་གདོད་མའི་ཀློང་དུ་བྱང་ཆུབ་ཤོག ༡༡ །བདག་ཀྱང་ཚེ་རབས་ཀུན་ཏུ་བླ་མ་རྗེའི། །ཞབས་མཐིལ་རྡུལ་འོད་དམར་པོར་བཏུད་བྱས་ཏེ། །གསུང་གསང་གདམས་པའི་གཏེར་མཛོད་རྙེད་པ་དང་། །བླ་མའི་ལམ་གྱིས་གྲོལ་བ་རྙེད་གྱུར་ཅིག ༡༢ །བསྟན་འཛིན་སྐྱེས་རྣམས་ཞབས་པད་རབ་བརྟན་བསྟན་པའི་སྦྱིན་བདག་དབུ་འཕང་མཐོ། །བསྟན་ལ་གནོད་པའི་མི་མཐུན་ཀུན་ཞི་བསྟན་པའི་མངའ་ཐང་ཕྱོགས་བཅུར་རྒྱས། །བསྟན་པའི་སྙིང་པོ་བཤད་སྒྲུབ་ལ་བརྩོན་བསྟན་ལ་བྱ་བ་བྱེད་པ་དང་། །བསྟན་པ་རབ་སྤེལ་ཚེ་བསོད་འབྱོར་ལྡན་བསྟན་པ་དར་རྒྱས་བཀྲ་ཤིས་ཤོག ༡༣ །ཅེས་པའང་དཔལ་མགོན་བླ་མ་ཁྱབ་བདག་རྡོ་རྗེ་སེམས་པའི་ཞལ་སྐྱིན་འགྱུར་མེད་པདྨ་རྣམ་རྒྱལ་གྱི་རྟོགས་བརྗོད་མདོར་བསྡུས་དད་པའི་འཇུག་ངོགས་ཞེས་བྱ་བ་འདི་ཡང་དཔོན་མཁྱེན་རབ་མཆོག་རྒྱས་དགེ་ལེགས་རྒྱ་མཚོ་དང་བྲག་ཡབ་ཞིང་སྐྱོང་བཅས་ནས་རྗེ་བླ་མའི་བསྟན་བཅོས་རྩོམ་གཞིའི་ཕྱག་སམ་བྱིན་རླབས་ཀྱི་གཟི་འོད་དང་འཕྲོ་བའི་གནང་སྐྱེས་དང་བཅས་བྲི་བར་བསྐུལ་ཞིང་རྡོ་རྗེའི་མཆེད་པོ་འཇམ་མགོན་གུ་ཎ་ས་ག་རའི་མཆོག་སྤྲུལ་རིན་པོ་ཆེའི་ཞལ་སྔ་ནས་ཀྱང་གྲུབ་ན་ལེགས་པའི་གསུངས་བསྐུལ་མཛད་ཀྱང་། བདག་ཉིད་རྗེ་བླ་མ་འདི་ཉིད་ཀྱི་ཞབས་པད་བསྟེན་ཡུན་ཐུང་བ་དང་། གསང་བ་བསྲུང་བ་ལ་ཐུགས་ཤིན་ཏུ་སྒམ་པས་ཐུན་མིན་གྱི་རྟོགས་བརྗོད་སུ་ལའང་བཀའ་སྩལ་མེད་པས་རྣམ་ཐར་ནི་རྒྱུས་ཕོངས་པ་དང་། ཐུན་མོང་གི་རྟོགས་བརྗོད་ཀྱང་ཕྱག་ཐོ་སོགས་གསལ་པོར་མེད་པས་རྒྱས་པར་འབྲི་བ་རྔོ་མ་ཐོགས་ཀྱང་། རང་གི་སྔར་བྲིས་པའི་དམ་པའི་རྣམ་ཐར་སྤྱིར་བསྔགས་པའི་རྣམ་ཐར་གསོལ་འདེབས་ཀྱི་དོན་འབྲེལ་མདོར་བསྡུས་སུ་སྐྱབས་མཆོག་འཁོར་ལོའི་མགོན་པོ་དེ་ཉིད་ཀྱི་བཀའ་འབངས་ཀྱིི་གྲལ་མཐར་འཁོད་ཅིང་འཇམ་དབྱངས་མཁྱེན་བརྩེའི་དབང་པོའི་བྱིན་རླབ་ཀྱི་ཆ་ཤས་ཙམ་ཐོབ་པ་འཇམ་དབྱངས་བློ་གྲོས་རྒྱ་མཚོ་དཔལ་བཟང་པོས་སྨོས་རིས་བཞིན་ཡི་གེའི་བྱེད་པོ་རང་སློབ་མཆོག་སྤྲུལ་འགྱུར་མེད་བསྟན་འཛིན་གྱིས་བགྱིས་པ་འདི་ལ་སྒྲོ་སྐུར་གྱི་སྐྱོན་མཆིས་ན་དཔལ་མགོན་ཐུགས་རྗེའི་བདག་ཉིད་ཅན་ལ་བཟོད་པར་གསོལ་ཞིང་ལེགས་པའི་དགེ་བས་བདག་གཞན་ཐམས་ཅད་ཀྱི་རྒྱུད་ལ་ཡེ་ཤེས་གཟིགས་པའི་བྱིན་རླབས་མྱུར་དུ་འཇུག་པའི་རྒྱུར་གྱུར་ཅིག ཤུབྷམསྟུསརྦཛགཏཱཾ། ༀ་སྭསྟི། རབ་འབྱམས་ཕྱོགས་བཅུའི་རྒྱལ་བ་སྲས་བཅས་ཀྱི། །གསང་གསུམ་ཡོན་ཏན་གཅིག་ཏུ་བསྡུས་པའི་དཔྱིད། །མཚུངས་བྲལ་དགེ་བའི་བཤེས་སུ་མངོན་སྣང་བ། །དཔལ་ལྡན་བླ་མའི་ཞབས་ལ་ཕྱག་བགྱིའོ། །གང་གི་རྣམ་ཐར་མ་དྲོས་རྒྱ་མཚོ་ལས། །ལེགས་འོང་ཡོན་ཏན་བདུད་རྩིའི་ཟེགས་མ་ཙམ། །འཇམ་མགོན་མཁྱེན་སྤྲུལ་ཆོས་ཀྱི་བློ་གྲོས་ཀྱིས། །རྗེས་འཇུག་གདུལ་བྱའི་གསོས་སུ་ལེགས་སྩོལ་བ། །གཅིག་ལས་དུ་མར་འཕྲུལ་བའི་ངོ་མཚར་གཟུགས། །བསྟན་གཉིས་དར་རྒྱས་གླིང་གི་ཆོས་གྲྭ་ཆེར། །རྗེ་དབོན་དམ་པ་དགེ་ལེགས་རྒྱ་མཚོ་ཡིས། །ཤིང་སྤྲེལ་གསར་འཆར་ལོ་ལ་ལེགས་པར་བསྐྲུན། །དེ་ལས་བྱུང་བའི་རབ་དགེ་དྲི་མེད་ཀྱིས། །རྒྱལ་བསྟན་དར་ཞིང་དེ་འཛིན་ཞབས་པད་བརྟན། །བཤད་སྒྲུབ་སྡེ་རྒྱས་འགྲོ་རྣམས་དགེ་ལ་སྤྱོད། །ཀུན་ཀྱང་ཕྱམས་གཅིག་གདོད་གཞི་གྲོལ་བར་ཤོག །ཆོས་ཉིད་རང་བཞིན་རྣམ་པར་དག་པ་དང་། །ཆོས་ཅན་རྟེན་འབྱུང་བསླུ་བ་མེད་པ་དང་། །བླ་མ་མཆོག་གསུམ་རྩ་གསུམ་བྱིན་མཐུ་ཡིས། །ཇི་ལྟར་སྨོན་པ་དེ་བཞིན་འགྲུབ་གྱུར་ཅིག །ཅེས་གུས་སློབ་ཡོངས་ཀྱི་གྲལ་མཐར་འཁོད་པ་ལུང་རྟོགས་མཐར་ཕྱིན་གྱིས་སྨོན་པ་དགེ་ལེགས་འཕེལ།། །