ཀུན་གཞིའི་དཀའ་གནས་རྣམ་བཤད།
བིཁྱཱཏཔཊུསྱཏིརྠཾནཱམམནཙསརྦབསྟུསྱདུརྶྠབིཧརཏིསྨ།
ཡིད་དང་ཀུན་གཞིའི་དཀའ་བའི་གནས་རྣམ་པར་བཤད་པ་མཁས་པའི་འཇུག་ངོགས་ཞེས་བྱ་བ་བཞུགས་སོ། །
ན་མོ་མཉྫུ་གྷོ་ཥཱ་ཡ། གང་གི་ཐུགས་རྗེའི་དྲི་བཞོན་དང་འགྲོགས་ན། །བློ་གྲོས་གྲུ་གཟིངས་དད་པའི་བ་དན་ཅན། །གྲུབ་མཐའ་རྒྱ་མཚོའི་ཕ་རོལ་ཕྱིན་བྱེད་པ། །འཇམ་དབྱངས་བླ་མ་དེ་ཡིས་རིང་དུ་སྐྱོངས། །ཕན་བདེའི་འབྱུང་གནས་བཅོམ་ལྡན་ཐུགས་རྗེའི་རྒྱུན། །ཟབ་ཡངས་དྲག་ཏུ་འབབ་པའི་རྦ་ཀློང་ཆེ། །ཅིག་ཅར་རོལ་ལ་མི་ཕམ་སྙིང་སྟོབས་ཀྱི། །མཐུ་ལྡན་ཛ་ཧུའི་ཞལ་ལུང་གངྒཱ་མ། །ཐོགས་པ་མེད་པའི་རྣམ་དཔྱོད་བརྩོན་འགྲུས་ཀྱིས། །དབྱིག་འཛིན་ཁོར་ཡུག་ཁྱབ་པར་འདྲེན་པའི་གཉེན། །བློ་བཟང་གྲགས་སྙན་འབར་བའི་རྒྱལ་སྲིད་ལ། །མངའ་བསྒྱུར་འཇིགས་མེད་དབང་བོའི་ཞབས་ལ་འདུད། །སྣོད་བཅུད་འཁོར་འདས་སྣ་ཚོགས་དབང་བོའི་གཞུ། །མཐའ་ཀླས་ཀུན་བྱེད་སེམས་ཀྱི་རང་མདངས་སུ། །མཐོང་སྟེ་སྤྲོས་ཀུན་ཉེར་ཞིའི་དབྱིངས་རྟོགས་པ། །རྣམ་རིག་གཞུང་བརྒྱའི་དོན་གྱི་དེ་ཉིད་ཡིན། །དེ་ཕྱིར་བདེ་དང་
སྡུག་བསྔལ་ཀུན་གྱི་གཞི། །རང་སེམས་ཁོ་ནར་ངེས་ནས་གསུང་རབ་ཀུན། །དེ་ཉིད་འདུལ་བའི་ཐབས་སུ་འཁྱེར་བ་ཡི། །དཔྱོད་ལྡན་དེ་ཡིས་ལུགས་འདི་བརྟེན་པར་རིགས། །དེ་ཡང་མདོ་སྡེ་ལང་ཀར་གཤེགས་པ་དང། འཇམ་དཔལ་རྩ་བའི་རྒྱུད་སོགས་དུ་མ་ནས་ལུང་བསྟན་པ་ལྟར་ཐེག་པ་ཆེན་པོའི་བསྟན་པ་འཇིག་རྟེན་གསུམ་དུ་གསལ་བར་མཛད་པའི་ཤིང་རྟ་ཆེན་པོ་གཉིས་ཀྱི་ཡ་གྱལ་རྣལ་འབྱོར་སྤྱོད་པའི་ལམ་གྱི་སྲོལ་འབྱེད་ཆེན་པོ་ས་གསུམ་བརྙེས་པ་སློབ་དཔོན་ཐོགས་མེད་ཀྱི་རྗེས་སུ་འབྲངས་ཏེ་ཆོས་ཐམས་ཅད་ནང་སེམས་ཀྱི་བདག་ཉིད་ཙམ་དུ་སྨྲ་བ་རྣམ་རིག་པའི་གྲུབ་མཐའི་རྣམ་གཞག་དཔྱིས་ཕྱིན་པ་ཤེས་པར་འདོད་པ་དག་གིས་གཏན་ལ་དབབ་བྱའི་དངོས་པོ་ནི། ལང་གཤེགས་ལས། ཆོས་ལྔ་དག་དང་རང་བཞིན་དང། །རྣམ་པར་ཤེས་པ་བརྒྱད་ཉིད་དང། །བདག་མེད་གཉིས་ཀྱི་དངོས་པོར་
ནི། །ཐེག་པ་ཆེན་པོ་ཐམས་ཅད་འདུས། །ཞེས། མིང། རྒྱུ་མཚན། རྣམ་རྟོག །དེ་བཞིན་ཉིད། ཡང་དག་པའི་ཡེ་ཤེས་ཏེ་ཆོས་ལྔ། རང་བཞིན་ནམ་མཚན་ཉིད་གསུམ། ཀུན་གཞི་ལ་སོགས་པའི་རྣམ་ཤེས་བརྒྱད། བདག་མེད་གཉིས་རྣམས་སུ་འདུས་པར་གསུངས་ཤིང། ཐེག་བསྡུས་ལས། ཤེས་བྱའི་གནས་དང་མཚན་ཉིད་དེར་འཇུག་དང། །དེ་ཡི་རྒྱུ་འབྲས་དེ་རབ་དབྱེ་བ་དང། །བསླབ་པ་གསུམ་དང་དེ་འབྲས་སྤང་བ་དང། །དེས་ན་ཐེག་པ་མཆོག་གྱུར་ཁྱད་པར་འཕགས། །ཞེས་དོན་གྱི་གཙོ་བོ་བཅུར་བསྡུས་ནས་ཀུན་གཞི་ནི་འོག་མ་ཐམས་ཅད་ཀྱི་གཞི་ལྟ་བུ་ཡིན་པས་ཤེས་བྱའི་གནས་ཞེས་དང་པོར་སྨོས་སོ། །དེས་ན་རེ་ཞིག་ཀུན་གཞིའི་རྣམ་གཞག་གཏན་ལ་འབེབས་པར་བྱེད་པ་ལ། རྣམ་ཤེས་གྲངས་མང་ཉུང་གི་འདོད་ཚུལ་སྤྱིར་བསྟན་པ། ཀུན་གཞི་དང་ཉོན་ཡིད་ཀྱི་རྣམ་གཞག་བྱེ་བྲག་ཏུ་བཤད་པ་གཉིས། དང་པོ་ལ་ཡང་སྤྱིའི་དོན་དང། མཐའ་དཔྱད་པ་གཉིས་ལས། དང་པོ་ནི། སྤྱིར་རྣམ་ཤེས་ཀྱི་གྲངས་འདོད་ཚུལ་དུ་མ་ཡོད་དེ། གྲུབ་མཐའ་ཆེན་མོ་ལས། དངོས་སྨྲ་ལ་རྣམ་པར་ཤེས་པ་གཅིག་ཏུ་འདོད་པ་དང། གཉིས་སུ་འདོད་པ། དྲུག་ཏུ་འདོད་པ། བདུན་དུ་འདོད་པ། བརྒྱད་དུ་འདོད་པ། དགུར་འདོད་པ་དང་དྲུག་ཡོད་དེ། ཞེས་གསུངས་པ་ལྟར་རྣམ་ཤེས་གཅིག་སྨྲ་བ་དང། ཆོས་ཉིད་ཀྱི་སེམས་དང་མཚུངས་ལྡན་གྱི་སེམས་གཉིས་སུ་འདོད་པ་དང། རྣམ་ཤེས་
ཚོགས་དྲུག་ཏུ་སྨྲ་བ་དང། འཇུག་ཤེས་དྲུག་ཉོན་ཡིད་དེ་བདུན་དུ་འདོད་པ་དང། སྐབས་འདིར་རྣམ་ཤེས་ཚོགས་བརྒྱད་དུ་འདོད་ལ། སློབ་དཔོན་ཡང་དག་བདེན་པས་དགུར་ཡང་བཤད་པའི་ཕྱིར། དང་པོ་ལ་ཡང་གྲུབ་མཐའ་ཆེན་མོ་ལས། རྣམ་ཤེས་གཅིག་འདོད་མཁན་ལ་ཀུན་གཞི་ལ་འདོད་པ་དང། ཡིད་ཀྱི་རྣམ་ཤེས་ལ་འདོད་པ་གཉིས། ཞེས་ནང་གསེས་ཀྱི་ལུགས་མི་འདྲ་བ་གཉིས་ཡོད་པར་བཤད་ཅིང། རྩ་བར་འདོད་མཁན་གཅིག་སྨྲ་བའི་བྱང་སེམས་ཀྱིས་འདོད་ཚུལ་ནི་ཀུན་གཞི་རྩ་བར། ཡིད་ཤེས་གཅིག་ཉིད་དབང་དྲུག་གི །རྟེན་ལ་སོ་སོར་རྒྱུ་བའི་ཚེ། །སོ་སོའི་མིང་དུ་བཏགས་པ་ཙམ། །ཞེས་གསུངས་པ་ལྟར་ཏེ། དེ་ཡང་བྲམ་ཟེའི་ཚོམས་ལས། གང་ཞིག་ལུས་མེད་ཕུག་གནས་ཤིང། །རིང་དུ་འགྲོ་ལ་གཅིག་པུར་རྒྱུ། །ཞེས་སྤྲེའུ་གཅིག་གིས་ཁང་པའི་བུ་ག་སོ་སོ་ནས་བལྟ་བའི་དཔེས་གསུངས་པ་དང། སྐྱེ་མཆེད་བཅུ་གཉིས་སྟོན་པའི་མདོ་ལས། རྣམ་པར་ཤེས་པའི་ཚོགས་དྲུག་ནི་ཡིད་ཀྱི་སྐྱེ་མཆེད་དོ། །ཞེས་ནང་དུ་མར་མེ་གཅིག་སྦར་བའི་འོད་བུ་ག་སོ་སོ་ནས་འབྱུང་བ་དཔེར་བྱས་ཏེ་གསུངས་པ་རྣམས་ལ་བརྟེན་ནས་ཡིད་ཀྱི་གནས་སྐབས་སོ་སོ་ལ་བཏགས་པ་ཙམ་མ་ཡིན་པའི་དབང་ཤེས་དང་སེམས་བྱུང་ལོགས་པ་མེད་པར་འདོད་དོ། །གཉིས་པའི་འདོད་ཚུལ་ནི། ཝེན་ཚེག་གི་དགོངས་འགྲེལ་འགྲེལ་ཆེན་ལས། སློབ་དཔོན་བོ་དེ་
ལེའུ་ཅིས་བསྟན་བཅོས་རྣམ་པར་རིག་པ་ཙམ་དུ་གྲུབ་པ་ལ་བརྟེན་ནས། སེམས་རྣམ་པ་གཉིས་རྣམ་པར་འཇོག་གོ །དེ་ལ་དང་པོ་ནི་ཆོས་ཉིད་ཀྱི་སེམས་ཏེ། དེ་ཡང་དེ་བཞིན་ཉིད་ཀྱི་ངོ་བོ་ཉིད་དོ། །དེ་བཞིན་ཉིད་ཀྱི་ངོ་བོ་ཉིད་འདི་ཉིད་ལ་སེམས་ཞེས་བྱ་ཡང་དམིགས་པ་ཅན་ནི་མ་ཡིན་ནོ། །གཉིས་པ་ནི། མཚུངས་པར་ལྡན་པའི་སེམས་ཏེ། དད་པ་དང། འདོད་ཆགས་ལ་སོགས་པའི་སེམས་ལས་བྱུང་བ་རྣམས་དང་མཚུངས་པར་ལྡན་པའོ། །ཞེས་བཤད་དོ། །ཞེས་གསུངས། དགུར་འདོད་ཚུལ་ཡང། དེ་ཉིད་ལས། སློབ་དཔོན་ཡང་དག་བདེན་པས་རྣམ་པར་ངེས་པའི་མཛོད་ཅེས་བྱ་བའི་བསྟན་བཅོས་ལ་བརྟེན་ནས་རྣམ་པར་ཤེས་པ་དགུའི་དོན་འཇུག་སྟེ། ཞེས་དང། བདུན་པ་ནི་ལེན་པའི་རྣམ་པར་ཤེས་པ་སྟེ། བརྒྱད་པ་ལ་བདག་དང་བདག་གིར་འཛིན་པ་ཉོན་མོངས་པ་ཁོ་ནའི་སྒྲིབ་པ་དང་ལྡན་གྱི་ཆོས་ཀྱི་འཛིན་པ་ནི་མེད་དེ་ངེས་པར་སངས་རྒྱས་སུ་མི་འགྲུབ་བོ། །བརྒྱད་པ་ནི་ཀུན་གཞིའི་རྣམ་པར་ཤེས་པ་སྟེ་འདི་ཡང་རྣམ་པ་གསུམ་མོ། །དང་པོ་ངོ་བོ་ཉིད་ཀྱི་ཀུན་གཞི་ནི་སངས་རྒྱས་འགྲུབ་པའི་དོན་དང་ལྡན་པའོ། །གཉིས་པ་རྣམ་པར་སྨིན་པའི་ཀུན་གཞི་ནི་ཁམས་བཅོ་བརྒྱད་པོ་དག་ལ་དམིགས་པ་སྟེ། ཞེས་དང། གསུམ་པ་ཀུན་ནས་ཉོན་མོངས་པའི་ཀུན་གཞི་ནི། དེ་བཞིན་ཉིད་ཀྱི་ཡུལ་ལ་དམིགས་ནས་ང་རྒྱལ་རྣམ་པ་བཞི་འབྱུང་སྟེ་དེ་ནི་ཆོས་འཛིན་པ་ཡིན་གྱི་གང་ཟག་འཛིན་པ་མ་ཡིན་ནོ། །དགུ་པ་ནི་དྲི་མ་མེད་པའི་རྣམ་པར་ཤེས་པ་སྟེ། དེ་བཞིན་ཉིད་ཀྱི་བདག་ཉིད་དོ། །ཞེས་སོགས་ཀྱི་དོན་རྩ་བར། བརྒྱད་པ་ལེན་པའི་རྣམ་ཤེས་དང། །ཀུན་གཞི་གསུམ་དུ་འཆད་པ་དང། །དགུ་པ་དྲི་མེད་རྣམ་ཤེས་སུ། །འདོད་པ་ཡང་དག་བདེན་པའི་ལུགས། །ཞེས་
པ་ལྟར་རོ། །ཚོགས་བརྒྱད་ཀྱི་འདོད་ཚུལ་འོག་ཏུ་འབྱུང་ཞིང་ལྷག་མ་གོ་སླ་བས་མ་བྲིས། མཐའ་དཔྱད་པ་ལ། ཁ་ཅིག་ན་རེ། རྣམ་ཤེས་ཚོགས་དྲུག་འདོད་པའི་གྲུབ་མཐའ་གོང་འོག་དུ་མ་ཡོད་ཀྱང་བརྒྱད་དང་དགུ་དང་གཅིག་ཏུ་འདོད་མཁན་གསུམ་སེམས་ཙམ་པ་ཁོ་ན་ཡིན་ཟེར་ན་མི་འཐད་པར་ཐལ། གཅིག་སྨྲ་བའི་བྱང་སེམས་དེ་ཉན་ཐོས་སྡེ་པ་ཡིན་པའི་ཕྱིར། དེར་ཐལ། དེ་དབུ་མ་པ་མ་ཡིན་པ་གང་ཞིག །སེམས་ཙམ་པ་ཡང་མ་ཡིན་པའི་ཕྱིར། དང་པོ་གྲུབ་སྟེ། གྲུབ་མཐའ་ལས། དངོས་སྨྲ་བ་ལ་རྣམ་ཤེས་གཅིག་ཏུ་འདོད་པ་དང། ཞེས་གསུངས་ཤིང། འོག་ཏུ་འདི་དེའི་མཚན་གཞིར་བཤད་པའི་ཕྱིར། གཉིས་པ་གྲུབ་སྟེ། འདི་ཐེག་བསྡུས་སོགས་ཀྱི་སྔོན་ནས་བྱུང་བའི་ཕྱིར་ཏེ། ཐེག་བསྡུས་ལས། ཁ་ཅིག་ནི། ཡིད་ཀྱི་རྣམ་པར་ཤེས་པ་དེ་ཉིད་རྟེན་དེ་དང་དེ་ནས་འབྱུང་བ་ན་དེ་དང་དེའི་མིང་འཐོབ་སྟེ། སེམས་པ་ལ་ལུས་དང་ངག་གི་ལས་ཞེས་བྱ་བ་བཞིན་ནོ་སྙམ་མོ། །ཞེས་སེམས་པ་ལུས་ཀྱི་སྒོ་ནས་འཇུག་པ་ལ་ལུས་ལས་དང། ངག་གི་སྒོ་ནས་ཞུགས་ན་ངག་ལས་ཀྱི་མིང་འཐོབ་པ་དཔེར་བྱས་ཏེ་འདོད་ཚུལ་དང་ཤེས་བྱེད་ཀྱི་ཁུངས་སོགས་རྒྱས་པར་བཀོད་པའི་ཕྱིར། སྤྱིར་གཅིག་སྨྲ་བ་ལ་གཉིས་བཤད་ཀྱང་འདི་ཀུན་གཞི་མི་འདོད་མཁན་ཞིག་ཡིན་ཏེ། འདིའི་འདོད་ཚུལ་སྨོས་པའི་ཐད་ཀྱི་བཤད་སྦྱར་ལས། དེ་ལ་ཡིད་ཀྱི་རྣམ་པར་ཤེས་པ་མ་ཡིན་པ། རྣམ་པར་ཤེས་པ་གཞན་ཀུན་གཞིའི་རྣམ་པར་ཤེས་པ་ཞེས་བྱ་བ་དེ་ལྟ་བུ་ནི་མེད་དོ། །ཞེས་གསུངས་པའི་ཕྱིར། འོན་ཀྱང་ཐེག་བསྡུས་ལས་དངོས་སུ་དགག་པ་མི་མཛད་པའི་རྒྱུ་མཚན་ཡོད་དེ། ཚོགས་བརྒྱད་ཀྱི་སྒྲུབ་
བྱེད་གསུངས་པ་རྣམས་དོན་གྱིས་འདིའི་དགག་པར་འགྲོ་བ་དང། གཏན་ལ་དབབ་པ་བསྡུ་བ་ལས། སེམས་ལས་བྱུང་བའི་ཆོས་ནི་མི་འདོད་པ་གང་དག་ཡོད་པ་དེ་དག་ཀྱང་མི་འཐད་དོ། །དེ་ཅིའི་ཕྱིར་ཞེ་ན། ལྔ་ཉིད་འཐད་པ་མེད་ཕྱིར་དང། །དེ་ཡི་གནས་སྐབས་སྐྱོན་ཕྱིར་དང། །བྱེད་རྒྱུ་བྱེ་བྲག་མེད་ཕྱིར་དང། །ལུང་དང་འགལ་བར་འགྱུར་ཕྱིར་རོ། །ཞེས་གསུངས་པ་དེ་ཕྱོགས་སྔ་གཉིས་ཀར་ཐུན་མོང་གི་དགག་པར་འགྲོ་བའི་རྒྱུ་མཚན་གྱིས་ཡིན་པའི་ཕྱིར། དེས་འགོག་ཚུལ་ཡང་ཡོད་དེ། སེམས་བྱུང་མེད་ན་ཚོར་སོགས་ཕུང་པོ་ལྔ་མི་འཐད་པར་འགྱུར་ལ། དེའི་གནས་སྐབས་སོ་སོ་ལ་བཏགས་ཞེས་པ་ཡང་བཏགས་པ་ཙམ་ལས་སེམས་བྱུང་དང་དབང་ཤེས་དངོས་ཀྱི་དོན་མི་ནུས་ན་སྔ་མའི་སྐྱོན་སོ་ན་གནས་པ་དང། དེའི་དོན་བྱེད་ནུས་ན་ཚོར་སོགས་དང་དབང་ཤེས་སོགས་རྫས་སུ་གྲུབ་པས་སེམས་གཅིག་པུར་སྨྲ་བ་དོན་མེད་པར་འགྱུར་ཞིང། སེམས་གཅིག་པུར་འདོད་ན། ལུང་ལས། སེམས་འདོད་ཆགས་དང་བཅས་པ་ཞེས་གསུངས་པ་སོགས་དུ་མ་དང་འགལ་བའི་སྐྱོན་འབྱུང་བ་སོགས་ཀྱི་སྒོ་ནས་བཀག་པའི་ཕྱིར། ཡང་ཁོ་ན་རེ། འདིའི་གཅིག་སྨྲ་བ་དེ་ཐེག་ཆེན་གྱི་གྲུབ་མཐའ་སྨྲ་བ་ཞིག་ཡིན་པར་ཐལ། ཀུན་གཞི་དཀའ་འགྲེལ་ལས། ཐེག་པ་ཆེན་པོའི་སློབ་དཔོན་རྣམས་རྣམ་ཤེས་གྲངས་མང་ཉུང་དུ་འདོད་པ་རྒྱའི་སློབ་དཔོན་ཝེན་ཚེག་གིས་བཤད་པ་ལྟར་བཀོད་དོ། །ཞེས་གསུངས་པའི་གྲངས་ཉུང་བར་འདོད་མཁན་གཅིག་སྨྲ་བ་ལ་བྱེད་པའི་ཕྱིར་ཟེར་ན། མི་འཐད་པར་ཐལ། དྲུག་དང། གཉིས་དང། དགུར་འདོད་ཚུལ་རྣམས་ལ་རྒྱ་ནག་འགྲེལ་ཆེན་གྱི་བཤད་པ་བཀོད་ཀྱང་གཅིག་སྨྲའི་སྐབས་སུ་དེའི་ཟུར་
ཙམ་ཡང་མ་བཤད་པའི་ཕྱིར། ཡང་ཁ་ཅིག །རྣམ་ཤེས་གཅིག་སྨྲ་བ་དེ་ཉན་ཐོས་སྡེ་བ་ཁོ་ན་ཟེར་ན་ཡང་ཤིན་ཏུ་མི་འཐད་པར་ཐལ། དེ་ལ་ཀུན་གཞི་གཅིག་པུར་སྨྲ་བ་ཞིག་ཡོད་པ་གང་ཞིག །ཀུན་གཞི་འདོད་པའི་ཉན་ཐོས་སྡེ་བ་མེད་པའི་ཕྱིར། དང་པོ་བསྒྲུབས་ཟིན། གཉིས་པ་མ་གྲུབ་ན། དེ་ཆོས་ཅན། སྣོད་བཅུད་མཐའ་དག་ཀུན་གཞིའི་སྟེང་གི་བག་ཆགས་སྨིན་པ་ལས་འབྱུང་བར་འདོད་པར་ཐལ། ཀུན་གཞི་ཁས་ལེན་པའི་རྒྱུ་མཚན་ཡོད་པའི་ཕྱིར། ཁྱབ་སྟེ། ལེགས་བཤད་སྙིང་པོ་ལས། ཕྱི་རོལ་ཁས་ལེན་པའི་གནད་ཀྱིས་ཀྱང་ཀུན་གཞི་མི་འཇོག་པ་ཡིན་ཏེ། དེ་ཁས་ལེན་ན་དབུས་མཐའ་ལས། དོན་དང་སེམས་ཅན་བདག་རྣམ་རིག །སྣང་བའི་རྣམ་པར་ཤེས་པ་ནི། །རབ་ཏུ་སྐྱེ་འོ་དེ་དོན་མེད། །དེ་མེད་པས་ན་དེ་ཡང་མེད། །ཅེས་གསུངས་པ་ལྟར་འདོད་དགོས་པའི་ཕྱིར་རོ། །ཞེས་གསུངས་པའི་ཕྱིར་རོ། །གོང་དུ་འདོད་ན། ཆོས་ཐམས་ཅད་ནང་སེམས་ཀྱི་བདག་ཉིད་ཙམ་དུ་ཁས་ལེན་པར་ཐལ། འདོད་པའི་ཕྱིར། འདོད་ན། ཉན་ཐོས་སྡེ་བ་མ་ཡིན་པར་ཐལ། ཕྱི་དོན་མི་འདོད་པའི་ཕྱིར། ཁྱབ་སྟེ། ཕྱི་དོན་མི་འདོད་པའི་དོན་སྨྲ་བ་བཞད་གད་ཡིན་པའི་ཕྱིར་དང། ཕྱི་དོན་བདེན་ཞེན་གྱིས་ཁས་ལེན་པའི་ནང་པའི་གྲུབ་མཐའ་སྨྲ་བའི་གང་ཟག་དེ། ཉན་ཐོས་སྡེ་པའི་མཚན་ཉིད་ཡིན་པའི་ཕྱིར། ཡང་ཁ་ཅིག་ན་རེ། དབུ་མ་པ་ལ་རྣམ་ཤེས་ཚོགས་དྲུག་ལས་ལྷག་འདོད་པ་མེད་ཟེར་ན། དེ་མི་རུང་བར་ཐལ། སྐབས་འདིར་དབུ་མ་པ་ཡིན་ན་སེམས་ཙམ་པ་ཡིན་དགོས་པའི་ཕྱིར། ངོ་བོ་ཉིད་མེད་པར་སྨྲ་བ་ལ་བསམ་ན་ཡང་མི་འཐད་པར་ཐལ། ཐུབ་དགོངས་རྩོམ་དུས་ཀྱི་སློབ་
དཔོན་ཨ་བྷྱཱ་ཀ་ར་སོགས་ཀྱིས་རྣམ་ཤེས་ཚོགས་བརྒྱད་དུ་འདོད་པའི་ཕྱིར། ཐུབ་དགོངས་ན་གསལ། འོན་ཀྱང་སྐུ་ཚེའི་སྨད་ལ་ཀུན་གཞི་མི་བཞེད་པས། རྣམ་བཤད་དགོངས་པ་རབ་གསལ་ལས། ཞི་འཚོ་ཡང་ཀུན་གཞིའི་རྣམ་ཤེས་མི་བཞེད་པར་གསལ་ལ། ཨ་བྷྱཱ་ཀ་ར་ཡང་དེ་དང་འདྲའོ། །ཞེས་གསུངས་ཤིང། སྔགས་རིམ་ལས་དེས་ཀུན་གཞི་འདོད་པར་གསུངས་པ་སྐུ་ཚེ་སྟོད་ཀྱི་དབང་དུ་བྱས་པ་ཡིན་ཏེ། རིམ་ལྔ་གསལ་སྒྲོན་ལས། རྩོམ་པ་ཡང་སྔ་ཕྱིའི་དབང་གིས་འགལ་བར་བཤད། ཅེས་གསུངས་པའི་ཕྱིར། དེ་ལ་ཁོ་ན་རེ། ངོ་བོ་ཉིད་མེད་པར་སྨྲ་བ་ཕལ་ཆེར་ཀྱང་ཀུན་གཞི་བཞེད་པར་ཐལ། ཀླུ་སྒྲུབ་དང་འཕགས་སེང་སོགས་ཀྱིས་བཞེད་པ་གང་ཞིག །ཟླ་བས་བཞེད་པའི་ཕྱིར། དང་པོ་གྲུབ་སྟེ། ཀླུ་སྒྲུབ་ཀྱི་བྱང་ཆུབ་སེམས་འགྲེལ་ལས། ཇི་ལྟར་རྒྱ་མཚོ་ལ་ནི་ཤིང། །སེམས་ནི་མེད་ཀྱང་གཡོ་བར་འགྱུར། །དེ་བཞིན་ཀུན་གཞིའི་རྣམ་ཤེས་ནི། །ལུས་ལ་བརྟེན་ནས་གཡོ་བ་ཡིན། །ཞེས་དང། ཉི་སྣང་ལས། ཀུན་གཞིའི་རྣམ་པར་ཤེས་པ་ལ་སོགས་པ་ཤེས་བྱ་རྣམ་པ་བཅུས་བསྡུས་པས། ཞེས་དང། སློབ་དཔོན་གྱི་སྡུད་འགྲེལ་ལས། ཀུན་གཞིའི་རྣམ་པར་ཤེས་པ་ལ་ཆོས་ཐམས་ཅད་ཀྱི་བག་ཆགས་བརྟེན་པས། ཞེས་གསུངས་པའི་ཕྱིར། གཉིས་པ་གྲུབ་སྟེ། འཇུག་པ་ལས། ཀུན་གཞི་ཡོད་ཅིང་གང་ཟག་ཉིད་ཡོད་ལ། །ཕུང་པོ་འདི་དག་འབའ་ཞིག་ཉིད་ཡོད་ཅེས། །བསྟན་པ་འདི་ནི་དེ་ལྟར་ཆེས་ཟབ་དོན། །རིག་པར་མི་འགྱུར་གང་ཡིན་དེ་ལ་འོ། །ཞེས་གསུངས་པའི་ཕྱིར། ཁྱབ་སྟེ། དེས་ཀུན་གཞི་དང་གང་ཟག་དང་ཕུང་པོ་སོགས་ལ་ཁྱད་མེད་དུ་བཀག་པའི་ཡོད་པ་ཙམ་ལ་བྱེད་ན། གང་ཟག་དང་ཕུང་པོ་
གཉིས་ཡོད་པར་གསུངས་པ་སྒྲ་ཇི་བཞིན་པ་མ་ཡིན་པས། དེ་གཉིས་ཀྱང་མེད་པར་འདོད་དགོས་ལ། རང་བཞིན་གྱིས་ཡོད་པ་ལ་བྱེད་ན་ཀུན་གཞི་རང་བཞིན་གྱིས་ཡོད་པ་བཀག་པས་ཀུན་གཞི་མི་ཁེགས་པར་མ་ཟད་ཐ་སྙད་དུ་ཡོད་པ་དོན་གྱིས་གོ་བའི་ཕྱིར། ཞེས་ཟེར་བ་རྣམས་རིམ་པ་བཞིན་འགོག་པར་བྱེད་ན། དང་པོ་བྱང་ཆུབ་སེམས་འགྲེལ་གྱི་ལུང་དེས་ཀུན་གཞི་བཤད་པ་མ་ཡིན་པར་ཐལ། དེར་ཀུན་གཞིའི་མིང་གིས་བསྟན་པ་དེ་ཡིད་ཀྱི་རྣམ་ཤེས་ལ་བྱེད་པའི་ཕྱིར། དེར་ཐལ། དེ་ཉིད་ལས། དེའི་ཚེ་སྲིད་པ་འཛིན་པར་བྱེད་ཅེས་ཉིང་མཚམས་སྦྱོར་བའི་སེམས་སུ་བཤད་པ་གང་ཞིག །འཕགས་པ་ཡབ་སྲས་ཀྱིས་འདུས་པའི་སྐོར་གྱི་གཞུང་གཞན་ལས་འཆི་སེམས་དང་སྐྱེ་སེམས་གཉིས་ཀ་ཡིད་ཤེས་སུ་ཡང་ཡང་གསུངས་པའི་ཕྱིར། དེ་དང་བཤད་ཚུལ་མཐུན་མི་དགོས་སྙམ་ན་ཡང་མི་འཐད་པར་ཐལ། འདིས་འདུས་པའི་རྩ་རྒྱུད་ལེའུ་གཉིས་པའི་ནང་གི་རྣམ་སྣང་གིས་གསུངས་པའི་བྱང་ཆུབ་ཀྱི་སེམས་ཀྱི་ཚིགས་བཅད་དེའི་དོན་འགྲེལ་པས་མཚན་ཡང་བྱང་ཆུབ་སེམས་འགྲེལ་ཞེས་བཏགས་ཤིང་འདུས་པའི་ཡན་ལག་གི་གཞུང་ཡིན་པའི་ཕྱིར། གཞན་ཡང་བྱང་ཆུབ་སེམས་འགྲེལ་གྱིས་ཀུན་གཞི་གསུངས་པ་མི་འཐད་པར་ཐལ། དེར་ཕྱི་དོན་ཡོད་པར་བཤད་པའི་ཕྱིར་ཏེ། དེ་ཉིད་ལས། ཤེས་པས་ཤེས་བྱ་རྟོགས་པ་སྟེ། །ཤེས་བྱ་མེད་པར་ཤེས་པ་མེད། །ཅེས་སོགས་ཀྱི་དོན་སེམས་ཡོད་མེད་མཚུངས་པར་གསུངས་ཚུལ། འཇུག་པ་ལས། གཟུགས་མེད་ན་ནི་སེམས་ཡོད་མ་འཛིན་ཞིག །སེམས་ཡོད་ཉིད་ནའང་གཟུགས་
མེད་མ་འཛིན་ཞིག །ཅེས་པ་ཇི་ལྟ་བ་བཞིན་སྣང་བའི་ཕྱིར། སྟོང་ཐུན་ལས་སོ། །འཕགས་སེང་གཉིས་ཀས་ཀྱང་ཀུན་གཞི་མི་བཞེད་པར་ཐལ། དེ་བཞེད་ན་གང་ཟག་གི་མཚན་གཞིར་འཇོག་དགོས་པ་ལ་མ་བཞག་པའི་ཕྱིར། དེར་ཐལ། རྒྱན་སྣང་ལས། རྒྱུན་ཉིད་ཀྱིས་ན་གང་ཟག་ཅེས་བྱ་བ་ནི་གཅིག་གོ །ཞེས་དང། དབུ་མ་ལུང་རིགས་སྒྲོན་མེ་ལས། འཕགས་སེང་གཉིས་ཀྱིས་ཡིད་ཀྱི་རྣམ་པར་ཤེས་པའི་ཕུང་པོའི་རྒྱུན་བདག་གི་མཚན་གཞིར་བཞེད་དེ། ཞེས་གསུངས་པའི་ཕྱིར་དང། རྣམ་བཤད་སྙིང་པོ་རྒྱན་ལས་ཀྱང། སློབ་དཔོན་གྱི་འགྲེལ་ཆེན་དུ། ཞེས་པ་ནས། ཚོགས་དྲུག་ལས་ངོ་བོ་ཐ་དད་པའི་ཀུན་གཞིའི་བཤད་པ་ཟུར་ཙམ་ཡང་མེད་པའི། ཞེས་གསུངས་པའི་ཕྱིར། དེས་ན་ཀུན་གཞིའི་ཐ་སྙད་བཏགས་ཚད་ཀུན་གཞི་དངོས་ལ་བྱེད་མི་དགོས་ཏེ། མཁས་གྲུབ་རྗེའི་བརྟག་གཉིས་རྣམ་བཤད་ལས། ཀུན་གཞི་དང་ཉོན་ཡིད་ཀྱི་ཐ་སྙད་རྒྱུད་དང་གྲུབ་ཆེན་གྱི་གཞུང་དུ་མ་ལས་གསུངས་པ་ཡོད་ཀྱང་ཆོས་ཉིད་ལ་ཀུན་གཞི་དང། རླུང་ལ་ཉོན་ཡིད་ཀྱི་ཐ་སྙད་མཛད་པ་སོགས་དུ་མ་ཡོད་པས་ཚིག་ཙམ་གྱིས་འཁྲུལ་པར་མི་བྱའོ། །ཞེས་གསུངས་པའི་ཕྱིར། འཇུག་པའི་ལུང་དོན་ཡང་ཁྱོད་ལྟར་བཤད་མི་དགོས་པར་ཐལ། ཀུན་གཞི་འདོད་མི་འདོད་ཀྱི་གྲུབ་མཐའ་དུ་མ་ཡོད་ཅིང་འདི་ཡང་དེ་ལ་རྩོད་པའི་སྐབས་ཡིན་པས་དེ་གསུངས་པ་སྒྲ་ཇི་བཞིན་པ་མ་ཡིན་པར་བཤད་པ་ན་ཀུན་གཞི་གཏན་མེད་དུ་གོ་ལ། གང་ཟག་དང་ཕུང་པོ་མི་འདོད་པའི་གྲུབ་མཐའ་སྨྲ་བ་སུ་ཡང་མེད་པས་དེའི་སྒྲ་ཇི་བཞིན་པ་བཀག་ཀྱང་གཏན་མེད་ཀྱི་དོགས་པ་མེད་པས་རང་བཞིན་གྱིས་མེད་པར་གོ་བའི་ཕྱིར་དང། དགོངས་
གཞི་ཡང་ཕུང་སོགས་ཐ་སྙད་ཙམ་དུ་ཡོད་པ་ལ་བཀྲལ་ཞིང་ཀུན་གཞི་ལ་དེ་ལྟར་མ་བྱས་པར། འཇུག་འགྲེལ་ལས། དངོས་པོ་ཐམས་ཅད་ཀྱི་རང་བཞིན་རྗེས་སུ་ཞུགས་པའི་ཕྱིར་སྟོང་ཉིད་ཁོ་ན་ཀུན་གཞིའི་རྣམ་པར་ཤེས་པའི་སྒྲས་བསྟན་པར་རིག་པར་བྱའོ། །ཞེས་དོན་གཞན་ཞིག་གི་སྟེང་ནས་གསུངས་པའི་ཕྱིར། ཁྱོད་ལྟར་ན་དཔལ་ལྡན་ཟླ་བས་ལས་འབྲས་རང་བཞིན་གྱིས་གྲུབ་པར་བཞེད་པར་ཐལ། དེ་ཕྱིར་ཀུན་གཞི་མེད་ཀྱང་འདི་ནུས་ཕྱིར། །ཞེས་པའི་དོན་སྤྱིར་ཀུན་གཞི་མེད་ཀྱང་ཞེས་བཤད་མི་རུང་བས་དོན་དམ་པར་ཀུན་གཞི་མེད་ཀྱང་ལས་འབྲས་ཡོད་ཅེས་བཤད་དགོས་པའི་ཕྱིར། ཁྱབ་པ་འགྲིག །འཁོར་གསུམ། དེས་ན་ཐལ་འགྱུར་བས་ཀུན་གཞི་མི་བཞེད་པར་ཐལ། དེས་ཕྱི་དོན་བཞེད་པའི་ཕྱིར། ཁྱབ་སྟེ། ལེགས་བཤད་སྙིང་པོ་ལས། ཀུན་གཞི་འཇོག་པ་ན་ཕྱི་རོལ་དོན་གྱིས་སྟོང་པར་བསྟན་དགོས། ཞེས་གསུངས་པའི་ཕྱིར། མ་ཁྱབ་མཚམས་ཀྱི་རྟགས་གྲུབ་སྟེ། དོན་ཤེས་ཡོད་མེད་མཚུངས་པར་བཤད་ཚུལ་སྔར་དྲངས་པ་དང། ཇི་ལྟར་དེར་ནི་གཟུགས་བརྙན་སོགས་སྟོང་ལས། །ཤེས་པ་དེ་ཡི་རྣམ་པ་སྐྱེ་འགྱུར་ལྟར། །ཞེས་པས་ཀྱང་འགྲུབ་པའི་ཕྱིར། དེར་ཐལ། དེས་གཟུགས་དང་གཟུགས་འཛིན་མིག་ཤེས་གཉིས་རྒྱུ་འབྲས་སུ་བཤད་པའི་ཕྱིར། ཁྱབ་སྟེ། རྒྱུ་འབྲས་ཡིན་ན་རྫས་གཅིག་མ་ཡིན་དགོས་པའི་ཕྱིར། དེས་ན་ཁ་ཅིག་ཐལ་འགྱུར་བའི་ལུགས་ལ་ཡང་ཕྱི་དོན་མེད་པར་སྨྲ་བ་ནི་ཉམས་མྱོང་ལ་བསྐོར་བའི་མན་ངག་ཟབ་མོར་རློམ་པ་མི་འཐད་པར་ཐལ། དེའི་འཁྲུལ་གཞི་ནི་དོན་སྣང་ཙམ་གྱི་སྒོ་ནས་
ཕྱི་དོན་འཇོག་མ་ཤེས་པར་དེ་ཡོད་ན་ཚུགས་ཐུབ་ཏུ་གྲུབ་པའི་ཕྱི་དོན་ཉན་ཐོས་སྡེ་བས་སྒྲོ་བཏགས་པ་དེ་འདྲ་ཞིག་ཡོད་དགོས་སྙམ་པར་འདུག་པའི་ཕྱིར། དེས་ན་སྟོང་ཐུན་སྐལ་བཟང་མིག་འབྱེད་ལས། མདོ་སྡེ་པ་དང་ཐལ་འགྱུར་བ་གཉིས་ཀ་ཕྱི་དོན་ཁས་ལེན་ཞེས་པ་ཙམ་ཞིག་མཚུངས་ཀྱང་ལེན་ཚུལ་གཏན་མི་འདྲ་བ་ཡིན་ནོ། །ཞེས་པ་འདི་གོ་ན་མན་ངག་ཟབ་ངེས་ཡིན་ནོ། །ཡང་ཁ་ཅིག་ན་རེ། ཟླ་གྲགས་དང་ལེགས་ལྡན་གཉིས་ཀུན་གཞི་ཡོད་པར་སྟོན་པའི་མདོའི་དགོངས་གཞི་འདྲེན་ཚུལ་མཐུན་ཟེར་ན། མི་འཐད་པར་ཐལ། ལེགས་ལྡན་གྱིས་དེ་འདྲའི་མདོ་དེ་དྲང་དོན་གྱི་མདོར་མི་བཞེད་པའི་ཕྱིར། དེར་ཐལ། ལེགས་ལྡན་གྱིས་དེ་འདྲའི་མདོ་གཏན་ནས་མེད་པར་བཞེད་པའི་ཕྱིར། དེར་ཐལ། དབུ་མ་ལུང་རིགས་སྒྲོན་མེ་ལས། ཟླ་བས་མདོ་དེས་དེ་ལྟར་བསྟན་ཀྱང་དགོངས་གཞི་སྟོང་ཉིད་ལ་དགོངས་པར་བཤད། ལེགས་ལྡན་གྱིས། ཞེས་པ་ནས། མདོ་དེ་དག་ཀུན་གཞི་སྟོན་བྱེད་མ་ཡིན་པར་རྣམ་ཤེས་གཅིག་གི་གནས་སྐབས་ལ་འཁོར་འདས་ཀྱི་གཞི་བྱེད་པ་ལ་དགོངས་པར་བཤད། ཅེས་གསུངས་པའི་ཕྱིར། ཁྱབ་སྟེ། དེའི་རྒྱུ་མཚན་ཕྱི་དོན་མེད་པར་སྟོན་པའི་མདོ་ཡང་མེད་པར་བཞེད། གཞན་དབང་ཡོངས་གྲུབ་བདེན་གྲུབ་དང། ཀུན་བཏགས་ཀྱི་ཆོས་རྣམས་བདེན་མེད་དུ་སྟོན་པའི་མདོ་ཡང་མེད་པར་བཞེད་པས། སེམས་ཙམ་པའི་གྲུབ་མཐའ་ཐུན་མོང་མ་ཡིན་པ་ཐམས་ཅད་མདོའི་དོན་ཕལ་བ་ཙམ་ཡང་མ་ཡིན་ཞིང། ཐོགས་མེད་ཀྱི་རང་བཟོར་འདོད་པའི་ཕྱིར། དང་པོ་གྲུབ་སྟེ། ས་བཅུ་བ་ལས། ཁམས་གསུམ་པོ་འདི་ནི་སེམས་ཙམ་མོ། །ཞེས་པ་
འདིས་ཕྱི་དོན་བཀག་པ་མ་ཡིན་པར་ཟླ་བས་ཀྱང་བཞེད་ལ། ལེགས་ལྡན་གྱིས་ལང་གཤེགས་ལས། ཕྱི་རོལ་སྣང་བ་ཡོད་མིན་ཏེ། །ཞེས་སོགས་ཀྱིས་ཀྱང་ཕྱི་དོན་བཀག་པ་མིན་པར་བཞེད་པའི་ཕྱིར། ལེགས་བཤད་སྙིང་པོ་ལས། ཕྱི་རོལ་སྣང་བ་ཡོད་མིན་ཏེ། །ལུས་དང་ལོངས་སྤྱོད་གནས་འདྲ་བར། །སེམས་ནི་སྣ་ཚོགས་སྣང་བས་ན། །སེམས་ཙམ་དུ་ནི་ང་སྨྲ་འོ། །ཞེས་གསུངས་པས་ཀྱང་ཕྱི་རོལ་བཀག་པ་མིན་པར་བཞེད་པས་ཕྱི་རོལ་བཀག་པ་དེ་མདོ་གང་གིའང་དོན་མིན་པར་བཞེད་དམ་དཔྱད་པར་བྱའོ། །ཞེས་དང། སྟོང་ཐུན་ལས། ལེགས་ལྡན་གྱིས་ལན་འདེབས་པའི་ཚུལ་ནི། མདོ་དེས་ཕྱི་རོལ་བཀག་ནས་སེམས་ཙམ་བསྟན་པ་མ་ཡིན་གྱི། ཞེས་པ་ནས། དཔལ་ལྡན་ཟླ་བ་མདོ་དེས་སེམས་ཙམ་མ་བསྟན་ཞེས་མི་འཆད་ཀྱི་སེམས་ཙམ་གསུངས་པ་དྲང་དོན་ཡིན་པར་འགྲེལ་ཏེ། ཞེས་གསུངས་པའི་ཕྱིར། གཉིས་པ་གྲུབ་སྟེ། ལེགས་བཤད་སྙིང་པོ་ལས། དགོངས་འགྲེལ་ལས་མཚན་ཉིད་གསུམ་གསུངས་པའི་དོན་རྣལ་འབྱོར་སྤྱོད་པ་བ་དག་གིས་ཇི་ལྟར་བཀྲལ་བ་མདོའི་དོན་མ་ཡིན་པར་དབུ་མའི་དོན་དུ་འགྲེལ་པའི་སྲོལ་འདི་ནི་ལེགས་ལྡན་འབྱེད་ཀྱིས་ཕྱེ་བ་ཞེས་དང། གྲུབ་མཐའ་རྩ་བར། བྱེད་པོ་འགོག་ཕྱིར་གཟུང་མེད་མདོ་དོན་མིན། །ཞེས་གསུངས་པའི་ཕྱིར། ཁོ་ན་རེ། དེ་དགོངས་དོན་མཐར་ཐུག་གམ་གཙོ་བོ་མིན་ཞེས་པའི་དོན་ཡིན་ཟེར་ན་བླུན་གཏམ་ཡིན་ཏེ། དེས་ཕྱི་དོན་མེད་པ་མདོའི་དགོངས་དོན་མཐར་ཐུག་ཏུ་བཞེད་མི་བཞེད་ཀྱི་དོགས་པ་མེད་པས་རྗེ་བླ་མས་དེ་ལ་དཔྱད་དགོས་མི་གསུང་ཞིང། ཁྱོད་
ལྟར་ན་སྟོང་ཐུན་གྱི་དོན་ཡང། དཔལ་ལྡན་ཟླ་བས་ལང་གཤེགས་ལས། སེམས་ཙམ་དུ་གསུངས་པ་དེ་མདོའི་དགོངས་དོན་མཐར་ཐུག་ཡིན་ཀྱང་ཁས་ལེན་མི་རུང་ཞེས་པར་འགྲོ་བས་ཆོས་སྤོང་གི་ལས་སུ་འགྱུར་བའི་ཕྱིར་ཏེ། དེ་ལྟར་མ་བྱས་ན་ཟླ་གྲགས་དང་ལེགས་ལྡན་གྱི་བཞེད་པ་མི་འདྲ་བའི་ཁྱད་པར་བཤད་དུ་མེད་པའི་ཕྱིར། དེ་བཞིན་དུ་དེའི་ལུགས་ཀྱི་མཚན་ཉིད་གསུམ་མདོའི་དོན་མིན་གསུངས་པ་ཡང་གཙོ་བོ་ལ་བྱེད་ན། ཞི་འཚོ་སོགས་ཀྱི་སྐབས་སུ། ཆ་ཕྱེ་ནས་མདོའི་དོན་དུ་འཇོག་གོ །ཞེས་པ་དང། རྒྱན་སྟུག་དགོངས་འགྲེལ་ལང་གཤེགས་མདོ་སོགས་དོན། །གཙོ་ཕལ་ཆ་གཉིས་རིམ་བཞིན་དབུ་སེམས་ལུགས། །ཞེས་སྔ་མ་དང་ཆ་ཕྱེ་ནས་གསུངས་པ་འབྲེལ་མེད་དུ་འགྱུར་ཏེ་བསྟན་དོན་གཙོ་བོར་ཞི་འཚོ་ཡང་མི་བཞེད་ལ། བསྟན་དོན་ཕལ་བར་ལེགས་ལྡན་ཀྱང་བཞེད་པའི་ཕྱིར། རྟགས་ཁས། དེ་ལྟར་ན་དེ་རྣམས་བསྟན་དོན་ཕལ་པ་ཙམ་དུ་བྱེད་པའི་མདོ་ཡང་མེད་པས་ཐོགས་མེད་ཀྱི་བློས་བྱས་ཁོ་ནར་འཆད་དེ། མདོ་ལས་དྲང་དོན་གསུངས་པ་ཐམས་ཅད་ཀྱང་གདུལ་བྱ་བཀྲི་བའི་དགོས་པ་ཅན་ཤ་སྟག་ཡིན་ཞིང། སེམས་ཙམ་དུ་བཤད་པ་མངོན་སུམ་ལ་སྐུར་འདེབས་ཡིན་པས་གདུལ་བྱ་གོལ་སར་འཁྲིད་པ་ལས་དགོས་པ་ཅི་ཡང་མེད་པར་བཤད་པའི་ཕྱིར། ཤེས་རབ་སྒྲོན་མེ་ལས། དང་པོ་རྣམ་པར་རིག་པ་ཙམ་བླངས་ནས་ཕྱིས་དེ་ཡོངས་སུ་གཏོང་ན་ཡང་འདམ་རྫབ་ཀྱིས་སྦགས་ནས་འཁྲུ་བ་ལས་དང་པོ་ནས་ཐག་བསྲིང་བ་བཟང་སྟེ། ཞེས་གསུངས་ཤིང། རྟོག་གེ་འབར་བ་ལས་ཀྱང། སློབ་དཔོན་ཐོགས་མེད་དབྱིག་གཉེན་ལ་སོགས་པ། ཞེས་པ་ནས་ཐེག་པ་
ཆེན་པོའི་དོན་གྱི་ལུགས་གཞན་དུ་འདྲེན་པར་བྱེད་ཅིང་ངོ་ཚ་དང་ཁྲེལ་མེད་པ་དོན་རྣམ་པར་མི་ཤེས་བཞིན་དུ་རྣམ་པར་ཤེས་ཞེས་མཁས་པར་ང་རྒྱལ་བྱེད་པ་ཞེས་སོགས་སྐྱོན་བརྗོད་བྱས་པ་ལྟ་བུ་བྱེ་མདོ་སོགས་ལ་དགག་པ་བྱེད་པའི་སྐབས་སུ་ཡང་མ་བརྗོད་པར་སྣང་བའི་ཕྱིར། འོན་ཀྱང་དེ་གྲུབ་མཐའ་བཞི་བཞེད་མི་བཞེད་སོགས་བྱིས་པའི་རོལ་རྩེད་མང་ཡང་མ་སྤྲོས། ཡང་སྟག་ལོ་ན་རེ། ཀུན་གཞི་མི་འདོད་པའི་སེམས་ཙམ་པ་མེད་ཅེས་ཟེར་ཏེ། དེའི་གྲུབ་མཐའ་ཀུན་ཤེས་ལས། སེམས་ཙམ་པ་ལ་ཀུན་གཞི་བཞེད་མི་བཞེད། །གཉིས་སུ་གངས་ཅན་འདི་ན་གྲགས་མོད་ཀྱང། །སྐུ་མཆེད་གཉིས་ཀྱིས་གསལ་བར་བཤད་པ་ལས། །རྗེས་འབྲང་ལ་ལས་གསལ་བོར་མ་བརྗོད་ཀྱང། །འགོག་པའི་ལུང་རིགས་སུས་ཀྱང་མ་བརྗོད་ཕྱིར། །ཀུན་གཞི་མི་འདོད་སེམས་ཙམ་ཚད་ལྡན་དཀའ། །ཞེས་དང་དེའི་འགྲེལ་པར་ཡང་ཀུན་གཞི་མེད་ན་འཁོར་འདས་ཐམས་ཅད་འཇོག་པའི་གཞི་མེད་པ་དང་ཡིད་ཤེས་ལ་རྒྱུན་ཤིན་ཏུ་བརྟན་པ་མེད་ཅིང་བག་ཆགས་ཀྱི་གཞིར་མི་རུང་བས་དེ་བསྒོ་གཞི་མེད་པར་ཐལ་བ་དང། ལང་གཤེགས་དགོངས་འགྲེལ་སོགས་སེམས་ཙམ་མདོ་ལྔར་གྲགས་པ་རྣམས་དྲང་དོན་དུ་འགྲེལ་ན་སེམས་ཙམ་པ་མཚན་ཉིད་པར་མི་རུང་བ་དང། སྔགས་ལམ་གྱི་བསྒྲུབ་གཞི་མི་རུང་བ་དང། ཀུན་གཞི་ལས་གཞན་འབྱུང་བ་མིན། །ཞེས་པའི་ཚིག་དངོས་སུ་བྱུང་བ་དང། སེམས་ཙམ་དངོས་སུ་མ་ཟད་དེར་སྒོ་བསྟུན་པའི་ཞི་འཚོ་འཕགས་སེང་དང་བཅས་པས་ཀྱང་རྒྱས་པར་གསུངས་པའི་ཕྱིར། ཞེས་སྨྲ་བར་བྱེད་ཅིང། མདོ་དང་སྡེ་བདུན་
དུ་རྒྱ་ཆེར་མི་གསལ་བ་ནི། དེ་ལ་བརྟེན་པའི་བཤད་པ་དང་འབྲེལ་ཆུང་བས་ཡིན་ནོ། །ཞེས་བཤད་དོ། །སྒྲུབ་བྱེད་དེ་དག་ཐམས་ཅད་ནི་རིགས་པ་ལྟར་སྣང་ཁོ་ན་ཡིན་ཏེ། ཁྱོད་ལྟར་ན་སྡེ་བདུན་སྐབས་སུ་དེ་ལ་བརྟེན་པའི་བཤད་པ་འབྲེལ་ཆུང་བ་མི་འཐད་པར་ཐལ། འཁོར་འདས་ཀྱི་རྣམ་གཞག་ཐམས་ཅད་ཀུན་གཞིའི་སྟེང་ནས་བསྒྲུབ་དགོས་ལ། འདི་ཡང་ཀུན་བྱང་གི་རིམ་པ་མི་སྟོན་པར་བྱ་རོག་སོ་རྟོག་གི་བསྟན་ཆོས་མ་ཡིན་པའི་ཕྱིར་དང། ཕྱི་དོན་མེད་ཚུལ་དང། ལུགས་འདིའི་ཐ་སྙད་ཕྲ་མོ་འཇོག་ཚུལ་ལ་ཤིན་ཏུ་འབྲེལ་ཆེ་བའི་ཕྱིར་དང། མངོན་སུམ་ཚད་མ་དང་ལྟར་སྣང་གི་དབྱེ་བ་སོགས་བློ་རིག་མི་འདྲ་བའི་ཁྱད་པར་ཐམས་ཅད་གསུངས་ཀྱང་ཀུན་གཞི་དང་མི་འབྲེལ་བ་དེ། དེ་མི་བཞེད་པའི་རྟགས་ཡང་དག་ཡིན་པའི་ཕྱིར། ཡིད་ཤེས་ལ་རྒྱུན་བརྟན་པ་མི་སྲིད་པ་ཡང་མ་ཡིན་པར་ཐལ། ལེའུ་གཉིས་པར། ཐམས་ཅད་མཁྱེན་པ་བསྒྲུབ་པའི་སྐབས་སུ། རྟེན་མི་བརྟན་པ་ཉིད་འགྱུར་ན། །ཁྱད་པར་དག་ནི་མི་འཕེལ་ན། །རང་བཞིན་དེ་འདྲའང་མ་ཡིན་ཏེ། །ཞེས་རྟེན་བརྟན་པར་གསུངས་པའི་ཕྱིར། འཇུག་ཤེས་བག་ཆགས་ཀྱི་གཞིར་མི་རུང་བ་ཡང་མ་ཡིན་པར་ཐལ། ཕྱོགས་གླང་གི་དམིགས་པ་བརྟག་པ་ལས། ནུས་པ་འཇོག་ཕྱིར་རིམ་གྱིས་ཡིན། །ཞེས་སྔོ་འཛིན་སྔ་མ་སྔ་མའི་སྟེང་ན་ཕྱི་མ་ཡུལ་གྱི་རྣམ་ལྡན་དུ་སྐྱེད་པའི་ནུས་པའམ། བག་ཆགས་ཡོད་པ་དེ། ཕྱི་མ་ཕྱི་མའི་དམིགས་རྐྱེན་དུ་བཤད་པ་གང་ཞིག །དེ་དེའི་སྟེང་དུ་བསྒོས་ནས་ཡོད་ཀྱི། རེག་ལ་མ་འབྱར་བ་མ་ཡིན་པའི་ཕྱིར་དང། ལུགས་འདིའི་དབང་པོ་འཇོག་ཚུལ་ཐུན་མོང་མ་ཡིན་པ་ཡང། ལྷན་ཅིག་བྱེད་དབང་ནུས་པ་
ཡི། །ངོ་བོ་གང་ཡིན་ནུས་པའང་ཡིན། །ཞེས་བཤད་ཅིང། འཇུག་པ་ལས་ཀྱང། རང་གི་རྣམ་ཤེས་རྟེན་གྱི་ནུས་དེ་ལ། །དབང་པོ་གཟུགས་ཅན་མིག་ཅེས་བྱ་བར་རྟོག །ཅེས་ཕྱོགས་སྔར་མཛད་པའི་ཕྱིར། དེར་མ་ཟད། རྣམ་འགྲེལ་ལས། མེད་པ་སྔར་ནུས་མེད་ཕྱིར་དང། །ཕྱིས་ཀྱང་ཉེ་བར་མི་སྦྱོར་ཕྱིར། །རྒྱུ་རྣམས་ཐམས་ཅད་སྔར་ཡོད་ཡིན། །ཞེས་རྒྱུ་འབྲས་དུས་མཉམ་འགོག་པའི་རིགས་པས་བསྒོ་བྱ་བསྒོ་བྱེད་མཉམ་དུ་གྲུབ་ན་བག་ཆགས་ཀྱི་སྔོན་དུ་དེ་འཇོག་བྱེད་མེད་ཅིང། བག་ཆགས་གྲུབ་ཟིན་ནས་འཇོག་མི་དགོས་ཞེས་བསྟན་ལ། གྲངས་ཅན་གྱི་གཙོ་བོ་འགོག་པའི་རིགས་པའི་འགྲོས་ཀྱིས་ཀུན་གཞི་ལ་ས་བོན་ཐམས་ཅད་རྟག་ཏུ་ཡོད་ན། སྣོད་བཅུད་ཀྱི་རིགས་མཐའ་དག་རྟག་ཏུ་སྐྱེ་བར་ཐལ་བ་སོགས་ཀུན་གཞི་འདོད་པའི་ལུགས་དང་མི་མཐུན་པའི་རིགས་པའི་འགྲོས་ཤིན་ཏུ་མང་ངོ་། །ལང་གཤེགས་དང་དགོངས་འགྲེལ་སོགས་སེམས་ཙམ་པའི་ཁུངས་གཏུགས་པའི་མདོ་རྣམས་དྲང་དོན་དུ་འགྲེལ་ན་སེམས་ཙམ་པར་མི་རུང་ཟེར་བ་ཡང་ལྟག་ཆོད་ཡིན་ཏེ། དེ་དག་ལས་མཚན་ཉིད་གསུམ་ལ་བདེན་པར་ཡོད་མེད་ཀྱི་ཁྱད་པར་ཕྱེ་བ་ལྟ་བུ་ལེགས་ཕྱེའི་ཆོས་འཁོར་དུ་འཇོག་བྱེད་གཙོ་བོ་རྣམས་དྲང་དོན་དུ་བཀྲལ་ན་སེམས་ཙམ་པར་མི་རུང་ཡང། ལེན་པའི་རྣམ་པར་ཤེས་པ་ཟབ་ཅིང་ཕྲ། །ཞེས་པ་ལྟ་བུའི་དོན་ཚན་རེ་གཉིས་དྲང་དོན་དུ་བཀྲལ་བས་སེམས་ཙམ་པ་མིན་པར་མི་འགྱུར་བའི་ཕྱིར། མ་གྲུབ་ན། སློབ་དཔོན་ཆོས་གྲགས་ཀྱིས་ཀྱང་གཏན་ནས་རིགས་ཆད་དང་མཐར་ཐུག་ཐེག་པ་གསུམ་གྲུབ་སོགས་བཞེད་པར་ཐལ། སེམས་
ཙམ་གྱི་རྩ་བའི་མདོ་སྡེ་རྣམས་སུ་ཞི་བ་བགྲོད་པ་གཅིག་པུ་བ་ནི་སངས་རྒྱས་ཐམས་ཅད་བརྩོན་པ་དང་ལྡན་པར་གྱུར་ཀྱང་བྱང་ཆུབ་ཀྱི་སྙིང་པོ་ལ་བཞག་སྟེ་བླ་ན་མེད་པའི་བྱང་ཆུབ་ཐོབ་པར་བྱེད་མི་ནུས་སོ། །ཞེས་དང། ལོག་སྲེད་ཅན་གཏན་ཡོངས་སུ་མྱ་ངན་ལས་མི་འདའ་བའི་ཆོས་ཅན་ཞེས་གསུངས་ཤིང། མདོ་སྡེ་རྒྱན་ལས་ཀྱང། ཆོས་དང་བདག་མེད་རྣམ་གྲོལ་རྣམས། །མཚུངས་ཕྱིར་རིགས་ནི་ཐ་དད་ཕྱིར། །ཞེས་སོགས་ཀྱིས་མཐར་ཐུག་ཐེག་པ་གཅིག་བཤད་པ་དྲང་དོན་དུ་བཀྲལ་བའི་ཕྱིར། རྟགས་ཁྱབ་ཁས། འདོད་ན། རྣམ་འགྲེལ་ལས། རྟག་ཉིད་ཕྱིར་རམ་ཐབས་མེད་ཕྱིར། །ཞེས་སོགས་རིགས་པ་མཐའ་ཡས་པས་སེམས་ཅན་ཐམས་ཅད་ལ་སངས་རྒྱས་ཀྱི་རིགས་ཡོད་ཅིང་མཐར་ཐུག་ཐེག་པ་གཅིག་ཏུ་རྐང་བཙུགས་ནས་བསྒྲུབས་པའི་ལུང་རིགས་ཐམས་ཅད་བསུབ་པའམ། ཡང་ན་དཔལ་ལྡན་ཆོས་གྲགས་སེམས་ཙམ་པའི་གྲལ་ནས་འབྱིན་དགོས་པར་འགྱུར་རོ། །དེར་མ་ཟད་ལང་གཤེགས་དང་རྒྱན་སྟུག་གི་སྐབས་འགའ་ཞིག་ཏུ་ཀུན་གཞི་གསུངས་པའི་དགོངས་པ་བཀྲལ་ཏེ་དྲང་དོན་དུ་གསུངས་པ་དང། དེ་ལྔའི་ནང་ནས་ས་བཅུ་བར་ཆོས་མཉམ་པ་ཉིད་བཅུའི་སྒོ་ནས་ཆོས་ཐམས་ཅད་བདེན་མེད་དུ་བཤད་པ་སོགས་ཡོད་པས་འགལ་འདུ་ཐམས་ཅད་ཁས་ལོངས་ལ་སེམས་ཙམ་པ་ཚད་ལྡན་གྱི་གྲལ་དུ་སྡོད་ཅིག །སྔགས་ཀྱི་བསྒྲུབ་གཞི་མི་རུང་བར་ཐལ་བའི་ཟབ་ཁྱད་བཏོན་པ་ཡང་ཉ་དང་ཉུང་མ་བསྲེས་པས་སྐབས་སུ་མ་བབས་ལ། ཤིན་ཏུ་ཕྲ་བའི་གཉུག་སེམས་དེ་ཉིད་ལྷན་སྐྱེས་ཀྱི་བདེ་བ་ཆེན་པོའི་ངོ་བོར་བསྐྱེད་དེ་ཡུལ་སྟོང་པ་ཉིད་ལ་མཉམ་པར་འཇོག་པར་གསུངས་པ་དེ་ལ་བྱེད་ན། ཀུན་གཞི་ནི་ཐེག་
ཆེན་གྱི་སྒོམ་ལམ་མཐོན་པོར་མ་སླེབ་བར་དུ་མི་ལྡོག་ཅིང། དེའི་ངོ་བོ་ནི་སུམ་ཅུ་བར། རྣམ་པར་རིག་དང་མི་རིག་དང། །ཞེས་ཐོགས་མེད་སྐུ་མཆེད་བཞེད་པའི་ཀུན་གཞི་དེ་རང་ཡུལ་གང་ཡང་ངེས་མི་ནུས་པ་ཞིག་ཡིན་ལ་ཁྱོད་ཀྱིས་བཀྲལ་བའི་ཕྱོགས་གླང་ཡབ་སྲས་ལུགས་ཀྱི་ཀུན་གཞི་དེས་སྟོང་པ་ཉིད་ཀྱང་རྟོགས་པ་ངོ་མཚར་རོ། །ཀུན་གཞི་ལས་གཞན་འབྱུང་བ་མེད། །ཅེས་པ་ཙམ་བྱུང་ཡང་དེའི་དོན་བརྟག་པ་མཐའ་བཟུང་གི་ཀུན་གཞི་འདོད་ན་མ་གཏོགས་སེམས་རིགས་མཐུན་དུ་མ་ཅིག་ཅར་མི་འཇུག་པ་ལ་བཤད་དུ་རུང་ཞིང། ཡང་ན་བློ་གྲོས་ཡངས་པའི་ལེའུའི་ཚིག་རིས་དང་སྒོ་བསྟུན་ཙམ་ཡིན་ལ། ཀུན་གཞི་འདོད་ན་ཉོན་ཡིད་ཀྱང་འདོད་དགོས་པས་སྤྱིར་རྣམ་ཤེས་རིགས་མཐུན་དུ་མ་ཅིག་ཅར་མངོན་དུ་འགྱུར་བ་དང། ཁྱད་པར་དུ་བདག་མེད་རྟོགས་པའི་རྗེས་དཔག་དང། བདག་ཏུ་འཛིན་པའི་རྟོག་པ་གཉིས་ཅིག་ཅར་མངོན་དུ་གྱུར་པ་ཞིག་ཀྱང་འདོད་དགོས་པས། རྣམ་འགྲེལ་ལས། དེ་དག་རྣམས་ལས་རིགས་མཐུན་པའི། །རྣམ་པར་ཤེས་ལ་ངེས་པར་འགྱུར། །འདི་ལྟར་རྣམ་པར་རྟོག་པ་རྣམས། །རིམ་གྱིས་འབྱུང་བར་ཡང་དག་རྟོགས། །ཞེས་དང། རྟོག་གཉིས་ཅིག་ཅར་མཐོང་བ་མེད། །ཅེས་སོགས་ལན་གྲངས་བརྒྱ་ཕྲག་ཏུ་གསུངས་པ་རྣམས་ཇི་ལྟར་དྲང་ལེགས་པར་བསམ་དགོས་སོ། །དེ་དང་སྒོ་བསྟུན་པའི་ཞི་འཚོ་འཕགས་སེང་སོགས་ཀྱིས་ཀུན་གཞི་བཞེད་པར་སྨྲ་བ་ཡང་ལྐུག་པའི་རིགས་པ་ཡིན་ཏེ་ཟུར་ཙམ་གོང་དུ་བཀག་ཟིན་པས་མ་སྤྲོས་ལ་དེ་དག་གིས་རྣམ་ཤེས་གྲངས་མང་ཉུང་གི་འདོད་ཚུལ་རགས་པ་ཙམ་སྨོས་ཟིན་པས་གཞི་
བྱས་ཏེ་རྣམ་དཔྱོད་ཅན་རྣམས་ཀྱིས་མཁས་པ་སོ་སོའི་བཞེད་ཚུལ་ལ་ཞིབ་ཏུ་དཔྱད་པར་བྱའོ། ། ༈ གཉིས་པ་ཀུན་གཞི་དང་ཉོན་ཡིད་ཀྱི་རྣམ་གཞག་བྱེ་བྲག་ཏུ་བཤད་པ་ལ་གཉིས། ཀུན་གཞི་བཤད་པ་དང། ཉོན་ཡིད་བཤད་པའོ། །དང་པོ་ལ་སྤྱི་དོན་དང། མཐའ་དཔྱད་པ་གཉིས། དང་པོ་ནི། ཀུན་གཞིའི་རྣམ་གཞག་རྒྱས་པར་གཏན་ལ་འབེབས་ཚུལ་ཡོད་དེ། ས་སྡེ་ལས། རང་བཞིན་མཚན་ཉིད་དམིགས་རྣམ་འཁོར། །འཇུག་པའི་ཚུལ་དང་ལྡོག་པའི་དུས། །དབྱེ་བ་རྣམ་གྲངས་སྒྲ་བཤད་དོན། །ཚད་མ་དག་གིས་ཤེས་པར་བྱ། །ཞེས་པ་ལྟར། རང་བཞིན། མཚན་ཉིད། དམིགས་པ། རྣམ་པ། འཁོར། འཇུག་ཚུལ། ལྡོག་དུས། དབྱེ་བ། མིང་གི་རྣམ་གྲངས། སྒྲ་བཤད། སྒྲུབ་བྱེད་ཀྱི་ཚད་མ་སྟེ་དོན་ཚན་བཅུ་གཅིག་ཏུ་ཕྱེ་ནས་བཤད་པའི་ཕྱིར། དང་པོ་ངོ་བོ་ཡོད་དེ། གཞི་ལྔའི་ནང་ནས་གཙོ་བོ་སེམས་ཀྱི་གཞི་ཡིན་ཞིང། དགེ་རྩ་ཆད་པ་དང། ཁམས་གོང་མ་པ་སོགས་ཐམས་ཅད་ལ་ཡོད་པས་ལུང་མ་བསྟན་ཡིན་ལ། སྒྲིབ་མ་སྒྲིབ་གཉིས་ཀྱི་ནང་ནས་ཀྱང་འདི་རྣམ་སྨིན་གྱི་ཆ་ཡིན་པས་མ་སྒྲིབ་ལུང་མ་བསྟན་དུ་ངེས་པའི་ཕྱིར། སུམ་ཅུ་པ་ལས། དེ་ནི་མ་སྒྲིབ་ལུང་མ་བསྟན། །ཞེས་དང། རྩ་བར་ཡང། བག་ཆགས་བསྒོ་གཞི་ཡིན་ཕྱིར་དང། །དགེ་དང་མི་དགེ་མངོན་གྱུར་དང། །རྒྱུད་གཅིག་ལ་ནི་འཇུག་པའི་ཕྱིར། །མ་སྒྲིབ་ལུང་མ་བསྟན་དུ་གྲུབ། །ཅེས་དང། མཛོད་ལས། རྣམ་སྨིན་ལུང་དུ་མ་བསྟན་ཆོས། །ཞེས་དང། སྒྲིབ་ལ་བཅོ་བརྒྱད། ཅེས་གསུངས་པའི་ཕྱིར། ལུང་ཕྱི་མ་གཉིས་ལ་གྲུབ་མཐའ་གོང་འོག་མི་འདྲ་བའི་ཞིབ་ཆ་དགོས། གཉིས་པ་མཚན་ཉིད་དམ་འཇོག་བྱེད་ནི། རྒྱུན་ཤིན་ཏུ་བརྟན་
ཅིང་བག་ཆགས་བསྒོ་གཞིར་གྱུར་བའི་ཆ་ནས་བཞག་པའི་མ་སྒྲིབ་ལུང་མ་བསྟན་གྱི་གཙོ་སེམས་དེ། ཀུན་གཞིའི་མཚན་ཉིད། རྩོད་ཚེ་བག་ཆགས་བསྒོ་གཞིའི་ཆ་ནས་བཞག་པའི་སེམས་དེ་དེའི་མཚན་ཉིད། ཆ་བཞག་གིས་དག་ས་སོགས་ན་ཡོད་པའི་རྣམ་སྨིན་གྱི་རྣམ་ཤེས་གཅོད། དོན་དེ་ཅུང་ཟད་སྤྲོས་ན། གང་དུ་བསྒོ་བའི་གཞི། གང་གིས་བསྒོ་བའི་ཆོས། ཇི་ལྟར་བསྒོ་བའི་ཚུལ། བསྒོས་པའི་བག་ཆགས་ཀྱི་རང་བཞིན་བཞིར་ཡང་གསུང་ལ། བསྒོ་གཞི་ནི། ཐེག་བསྡུས་ལས། བརྟན་ལུང་མ་བསྟན་བསྒོ་བྱ་བ། །ཞེས་སོགས་བཞིན་དུ་རྩ་བར་ཡང། བརྟན་ལུང་མ་བསྟན་བསྒོ་བྱ་བ། །བསྒོ་བར་བྱེད་དང་འབྲེལ་བ་དང། །མཐའ་གཅིག་རྟེན་དུ་གྱུར་པ་སྟེ། །ཁྱད་པར་ལྔ་དང་ལྡན་པ་འོ། །ཞེས་གསུངས་ཏེ། དཔེར་ན་མེ་ཏོག་སྣ་མའི་དྲི་བསྒོ་བ་ལ། བརྟན་པ་ཤིང་སོགས་དེའི་རྟེན་དུ་རུང་གི མི་བརྟན་པ་སྒྲ་སོགས་དེའི་རྟེན་དུ་མི་རུང་བ་ལྟར། དབང་པོ་དང་དབང་ཤེས་རྣམས་གཟུགས་མེད་དུ་སྐྱེས་པའི་ཚེ་མི་འཇུག་པས་མི་བརྟན་ཅིང། དྲུག་པ་ཡིད་ཤེས་ནི། སུམ་ཅུ་བ་ལས། ཡིད་ཀྱི་རྣམ་ཤེས་འབྱུང་བ་ནི། །རྟག་ཏུའོ་འདུ་ཤེས་མེད་པ་བ། །སྙོམས་པར་འཇུག་པ་རྣམ་གཉིས་དང། །སེམས་མེད་གཉིད་དང་བརྒྱལ་མ་གཏོགས། །ཞེས་གསུངས་ལ། ཉོན་ཡིད་ཀྱང། འཇིག་རྟེན་འདས་པའི་ལམ་ན་མེད། །འགོག་པའི་སྙོམས་པར་འཇུག་ནའང་མེད། །ཅེས་སྐབས་དེ་དག་ཏུ་མེད་པས་བསྒོ་གཞིར་མི་རུང་ཡང། ཀུན་གཞི་ནི་བསྒོ་བྱེད་ཡོད་ཀྱི་བར་རྒྱུན་བརྟན་པས་དེར་རུང་ངོ་། །ལུང་དུ་མ་བསྟན་པ་ཡང་དགོས་ཏེ། སྒོག་སྐྱ་དང་ཙན་དན་ལྟ་བུའི་དྲི་ཆེ་བ་ལ་
གཞན་གྱི་དྲི་མི་འགོ་ཡང་ཏིལ་ལྟ་བུའི་དྲི་མཉམ་པ་ལ་འགོ་བ་ལྟར། དགེ་མི་དགེ་གང་རུང་ཡིན་ན། རིས་སུ་ཆད་པས་གཅིག་ཤོས་ཀྱི་བག་ཆགས་མི་འཛིན་པའི་ཕྱིར་དང། དེ་དང་ལྷན་ཅིག་མངོན་དུ་འགྱུར་ཡང་མི་རུང་བའི་ཕྱིར། བསྒོ་བར་བྱ་བའམ། བསྒོ་བར་འོས་པ་ནི། འདུས་མ་བྱས་རྣམས་རྐྱེན་གྱིས་ཁྱད་པར་དུ་བྱར་མེད་པས་བསྒོ་བྱེད་ཀྱི་ནུས་པ་མི་འཇུག་ལ་ཕྱི་རོལ་གྱི་དངོས་པོ་རྣམས་ཀྱང་བསྒོ་བའི་འོས་མ་ཡིན་ཏེ། ཐེག་བསྡུས་འགྲེལ་པ་ལས། བསྒོ་བར་བྱ་བ་མ་ཡིན་པ་འདི་ལྟ་སྟེ། རྡོ་བ་དང། དངུལ་དང། གསེར་ལ་སོགས་པ་ལ་ནི་མི་བསྒོའོ། །གང་བསྒོ་བ་འཛིན་པ་དེ་ལ་བསྒོ་བར་བྱེད་པས་བསྒོ་བ་ཞེས་བྱ་སྟེ། བསྒོ་བར་འོས་པ་ལའོ། །ཞེས་གསུངས་པའི་ཕྱིར་དང། གང་བསྒོ་བ་འཛིན་པ་དེ་ལ་བསྒོ་འོས་པའི་དོན་ཡང། དང་པོར་ལས་དེའི་བག་ཆགས་བཟུང་ནས་སླར་རྣམ་སྨིན་གྱི་ངོ་བོར་སྦྱར་ཏེ་མྱོང་ཞིང་དེ་ལ་སྨིན་པ་ཞིག་དགོས་པ་གང་ཞིག །མདོ་ལས། ལས་བྱས་ཤིང་བསགས་པ་རྣམས་ཀྱི་རྣམ་པར་སྨིན་པ་ནི་ཕྱི་རོལ་གྱི་སའི་ཁམས་ལ་སྨིན་པ་མ་ཡིན། ཞེས་སོགས་གསུངས་པའི་ཕྱིར། ཡང་ན་ཐེག་བསྡུས་འགྲེལ་པའི་དོན། མེ་ཏོག་གི་དྲི་དེ་སྙི་བ་ཏིལ་སོགས་ལ་འགོ་ཡང་སྲ་བ་རྡོ་སོགས་ལ་མི་འགོ་བ་ལྟར། བག་ཆགས་བསྒོ་གཞི་ཡང་འདུས་བྱས་ལ་རུང་གི་འདུས་མ་བྱས་ལ་མི་རུང་བའི་དོན་ཏེ། ལུགས་འདིས་རང་བཞིན་གནས་རིགས་ཀྱང་འདུས་བྱས་སུ་འདོད་ཅིང། དེའི་སྟོབས་ཀྱིས་རིགས་བདེན་གྲུབ་དང་དེ་ལ་བརྟེན་ནས་མཐར་ཐུག་ཐེག་པ་གསུམ་དུ་སྨྲ་དགོས་བྱུང་བ་ཡིན་ནོ། །བསྒོ་བྱེད་དང་འབྲེལ་བ་ཡང། མེ་ཏོག་གི་དྲི་ཡུལ་དུས་གཞན་གྱི་དངོས་པོ་ལ་མི་བསྒོ་
བ་ལྟར་རྒྱུད་གཞན་ལ་མི་རུང་བས་རྒྱུད་གཅིག་ལ་བསྒོ་བྱ་བསྒོ་བྱེད་ལྷན་ཅིག་ཏུ་འབྲེལ་བ་ཡིན་ལ། མཐའ་གཅིག་རྟེན་དུ་གྱུར་པ་ནི། དེའི་འཁོར་གྱི་རེག་སོགས་ནི་གཞན་ལ་བརྟེན་པ་ཡིན་པས་བསྒོ་གཞིར་མི་རུང་ཡང། ཀུན་གཞིར་རང་སྟོབས་ཀྱིས་བག་ཆགས་ཀྱི་གཞིར་ཡོད་པར་གསུངས་ཏེ། ཁྱད་པར་ཕྱི་མ་འདི་ཐེག་བསྡུས་ན་མི་གསལ་ཡང་དོན་གསང་གི་དགོངས་པ་བཀོད་པའོ། །འོ་ན་བསྒོ་གཞི་དེ་ལྟར་ཡིན་ན་བསྒོ་བྱེད་ཇི་ལྟ་བུ་ཞེ་ན། ཀུན་གཞི་རང་ཉིད་རང་ལ་བྱེད་པ་འགལ་བས་མི་རུང་ཞིང། དེ་ལས་གཞན་པའི་རྣམ་ཤེས་ཚོགས་བདུན་གྱིས་བསྒོ་ལ། བསྒོ་ཚུལ་ནི་ཏིལ་དང་མེ་ཏོག་ལྷན་ཅིག་ཏུ་བཞག་སྟེ། མེ་ཏོག་བསལ་ཀྱང་ཏིལ་ལ་དེའི་དྲི་གནས་པ་ལྟར་བསྒོ་བྱ་བསྒོ་བྱེད་གཉིས་རྒྱུད་གཅིག་ལ་ལྷན་དུ་ཚོགས་ཏེ་ཕྱིས་བསྒོ་བྱེད་རང་ཉིད་འགག་ཀྱང་རང་གི་བག་ཆགས་བསྒོ་གཞིའི་སྟེང་དུ་གནས་ཏེ། རྩ་བར། བསྒོ་བར་བྱེད་པས་བསྒོ་གཞི་ལ། །འགག་ལ་མངོན་དུ་ཕྱོགས་པའི་ཚེ། །བཞག་པའི་ནུས་པ་འོ། །ཞེས་དང། ཐེག་བསྡུས་ལས། ཏིལ་དག་ལ་མེ་ཏོག་དག་གིས་བསྒོས་པ་ཏིལ་དང་མེ་ཏོག་ལྷན་ཅིག་འབྱུང་ཞིང་འགག་ཀྱང་ཞེས་སོགས་ལྟར་རོ། །གསུམ་པ་དམིགས་པ་ནི། དོན་དང་སེམས་ཅན་བག་ཆགས་ལ། །ཞེས་ཕྱི་སྣོད་ཀྱི་རྣམ་རིག་དོན་ལྔ་དང། ནང་སེམས་ཅན་དུ་སྣང་བའི་དབང་སོགས་གཉིས་བཤད་དེ། དབུས་མཐའ་ལས་ཀྱང། དོན་དང་སེམས་ཅན་བདག་རྣམ་རིག །སྣང་བའི་རྣམ་པར་ཤེས་པ་ནི། །ཞེས་དོན་དང་སེམས་ཅན་དུ་སྣང་བའི་རྣམ་ཤེས་ཀུན་གཞི་དང། བདག་ཏུ་སྣང་བའི་རྣམ་ཤེས་ཉོན་ཡིད་དང། རྣམ་
པར་རིག་པར་སྣང་བའི་རྣམ་ཤེས་འཇུག་ཤེས་སུ་གསུངས་པ་ལྟར་འདིར་ཡང་སེམས་ཀྱིས་ཟིན་པའི་དབང་སོགས་ལ་སེམས་ཅན་གྱི་སྒྲས་བསྟན་ཅིང། སྒྲས་བརྗོད་ཀྱིས་ཕྱེ་ན་བག་ཆགས་ཏེ་དམིགས་པ་གསུམ་དུ་བཤད་དོ། །འོན་ཀྱང་བག་ཆགས་ནི་དམིགས་པ་དངོས་མིན་ཏེ། རྩ་བར། ས་བོན་གྱི། དབང་གིས་གནས་དོན་ལུས་སུ་ནི། །སྣང་ཕྱིར་དམིགས་པ་དག་ཏུ་འདོད། །ཅེས་བག་ཆགས་དེའི་སྟོབས་ཀྱིས་གནས་དབང་རྟེན་དང། དོན་ཡུལ་ལྔ། ལུས་དབང་པོ་སོགས་སྣོད་བཅུད་ཀྱི་སྣང་བ་འབྱུང་བས་དམིགས་པར་བཏགས་པ་ཙམ་དུ་བཤད་པའི་ཕྱིར། བཞི་པ་ནི། རྣམ་པ་རིས་སུ་མ་ཆད་ཅིང་མི་གསལ་བས་སྣོད་བཅུད་དེ་དག་སྣང་ཡང་ངེས་པ་འདྲེན་མི་ནུས་ཏེ། སུམ་ཅུ་བ་དང་འདི་གཉིས་ཀ་ལས། རྣམ་པར་རིག་པ་མི་རིག་པ། །ཞེས་གསུངས་ཤིང། དུལ་ལྷའི་འགྲེལ་བཤད་ལས་ཀྱང། དེ་ནི་དམིགས་པ་ཡོངས་སུ་མི་གསལ་བ་དང། རྣམ་པ་ཡོངས་སུ་མི་གསལ་བ་སྟེ། ཞེས་དང། ཀུན་གཞིའི་རྣམ་པར་ཤེས་པས་འདི་ལ་འདི་ཞེས་སོ་སོ་རང་གི་རིག་པས་རྣམ་པར་མི་རིག་སྟེ། ཞེས་སོ། ། ལྔ་པ་ནི། འཁོར་ཀུན་འགྲོ་ལྔ་ཁོ་ནར་ངེས་ཤིང། དེའི་ནང་ནས་ཚོར་བ་ཡང་བཏང་སྙོམས་འབའ་ཞིག་ཡིན་ཏེ། འདི་ཉིད་ལས། རེག་སོགས་ལྔར་ངེས་ཚོར་བ་ནི། །བར་མའོ། །ཞེས་བྱུང་སྟེ། མ་སྒྲིབ་ལུང་མ་བསྟན་ཡིན་པས་གཞན་རྣམས་ལ་དོགས་པ་ཆུང་ཡང་གཞན་འགྱུར་གྱི་ཁྲོད་དུ་དཔྱད་གཞི་ཅུང་ཟད་ཡོད། དྲུག་པ་འཇུག་ཚུལ་ནི། བསྡུ་བ་ལས། དམིགས་དང་མཚུངས་པར་ལྡན་པ་དང། །གཅིག་གི་རྐྱེན་ཉིད་གཅིག་ཡིན་དང། །ལྷན་ཅིག་དངོས་པོའི་འཇུག་པ་
དང། །ཞེས་ཡུལ་གང་ལ་དམིགས་ནས་འཇུག་ཚུལ། གྲོགས་གང་དང་མཚུངས་ལྡན་དུ་འཇུག་ཚུལ། འཇུག་ཤེས་སོགས་དང་ཕན་ཚུན་རྐྱེན་བྱས་ཏེ་འཇུག་ཚུལ། རྣམ་ཤེས་ཚོགས་དུ་དང་ལྷན་ཅིག་འཇུག་ཚུལ། རང་གི་དངོས་པོའི་འཇུག་ཚུལ་ཏེ་ལྔར་གསུངས་པའི་དང་པོ་བཞི་གོང་འོག་ཅི་རིགས་པར་འཆད་ཅིང། ལྔ་པ་ནི་རྒྱུན་གྱི་དབང་དུ་བྱས་ན་ཐོག་མ་མེད་པ་ནས་འཇུག་ལ། ཚེ་སྔ་ཕྱི་བརྒྱུད་དེ་འཇུག་ཚུལ་ཡང། སུམ་ཅུ་བ་ལས། ལས་ཀྱི་བག་ཆགས་འཛིན་གཉིས་ཀྱི། །བག་ཆགས་བཅས་པ་སྔ་མ་ཡི། །རྣམ་པར་སྨིན་པ་ཟད་ནས་གཞན། །རྣམ་སྨིན་བསྐྱེད་པ་དེ་ཡིན་ནོ། །ཞེས་ཚེ་སྔ་མར་ལས་ཀྱི་བག་ཆགས་གཟུང་འཛིན་གཉིས་སུ་སྣང་བའི་བག་ཆགས་ཀྱིས་གསོས་པ་ལས་ཚེ་འདིའི་རྣམ་སྨིན་གྱི་ཀུན་གཞི་གྲུབ་པ་ཡིན་ཞིང། འདི་ཟད་པ་ན་ཡང་སྔར་བཞིན་གསོས་ཏེ་རྣམ་སྨིན་གྱི་ཀུན་གཞི་གཞན་དང་གཞན་འབྱུང་བས་གཞན་སྡེའི་བདག་ལྟར་རྟག་པར་མི་འགྱུར་བ། ལས་འབྲས་ཀྱི་རྟེན་གཞི་ཆད་པར་ཡང་མི་འགྱུར་ཏེ། བློ་བརྟན་གྱི་འགྲེལ་པ་ལས། དེ་ལྟར་ན་ལས་ཀྱི་བག་ཆགས་འབའ་ཞིག་མ་ཡིན་གྱི། འཛིན་པ་གཉིས་ཀྱི་བག་ཆགས་ཀྱིས་ཟིན་པས་རྣམ་པར་སྨིན་པ་བསྐྱེད་དོ། །ཞེས་དང། སྔ་མའི་རྣམ་པར་སྨིན་པ་ཟད་ནས་ཞེས་བྱ་བ་འདིས་རྟག་པའི་མཐའ་སྤོང་ངོ༌། །རྣམ་པར་སྨིན་པ་གཞན་བསྐྱེད་དོ་ཞེས་བྱ་བས་ནི་ཆད་པའི་མཐའ་སྤོང་ངོ༌། །ཞེས་གསུངས་པའི་ཕྱིར། བདུན་པ། ལྡོག་མཚམས་ནི། ཐེག་དམན་གྱི་དགྲ་བཅོམ་དང། ཐེག་ཆེན་གྱི་ས་བརྒྱད་པ་ཐོབ་པ་ནས་ལྡོག་སྟེ། དེ་ཕྱིར་དབང་ཐོབ་དགྲ་བཅོམ་ལ། །ཀུན་
གཞི་ཡོད་པ་མ་ཡིན་ཏེ། །འཇོག་བྱེད་གཉིས་པོ་མེད་ཕྱིར་རོ། །ཞེས་དང། སུམ་ཅུ་པ་ལས། དགྲ་བཅོམ་ཉིད་ན་དེ་ལྡོག །ཅེས་སོ། །འོན་ཀྱང་གོང་དུ། ལྷག་མ་མེད་དང་རྡོ་རྗེ་ལྟའི། །བར་དུ་རྒྱུན་མི་འཆད་དུ་འཇུག །ཅེས་གསུངས་པ་དང་མི་འགལ་ཏེ། དེ་ནི་རྣམ་སྨིན་གྱི་རྣམ་ཤེས་ལ་དགོངས་ཤིང། ཀུན་གཞི་དངོས་ས་བརྒྱད་པ་ནས་ལོག་ཀྱང་རྒྱུན་ཟག་བཅས་ཀྱི་ཆ་སྤངས་པ་ནི་ཟག་པ་མེད་པའི་ཡེ་ཤེས་མེ་ལོང་ལྟ་བུར་གནས་གྱུར་པ་ནས་འཇོག་པའི་ཕྱིར། བསྡུ་བ་ལས། གནས་གྱུར་མ་ཐག་ཏུ་ཀུན་གཞིའི་རྣམ་པར་ཤེས་པ་སྤངས་པར་བརྗོད་པར་བྱ་སྟེ། ཞེས་དང། ཙནྡྲ་གོ་མིས། གང་ཡང་ཀུན་གཞིའི་རྣམ་པར་ཤེས། །མེ་ལོང་ཡེ་ཤེས་གནས་གྱུར་པ། །ཞེས་གསུངས་པའི་ཕྱིར། བརྒྱད་པ་དབྱེ་བ་ལ། སྒྲས་བརྗོད་ཀྱིས་དབྱེ་ན། རྟེན་དུ་གྱུར་པ་རྣམ་སྨིན་གྱི་ཀུན་གཞི། དེ་ལ་བརྟེན་པ་ས་བོན་གྱི་ཀུན་གཞི་གཉིས་སུ་བཤད་པའི་སྔ་མ་ནི་ཀུན་གཞི་དངོས་ཡིན་ལ། ཕྱི་མ་དང་ཀུན་གཞིའི་སྟེང་གི་བག་ཆགས་དོན་གཅིག་གོ །དེ་ལའང། ངོ་བོ། དབྱེ་བ་གཉིས། དང་པོ་ནི། འདི་ཉིད་ལས། བརྟེན་པ་ས་བོན་ཀུན་གཞི་ནི། །བསྒོ་བར་བྱེད་པས་བསྒོ་གཞི་ལ། །འགག་ལ་མངོན་དུ་ཕྱོགས་པའི་ཚེ། །བཞག་པའི་ནུས་པའོ། །ཞེས་བསྒོ་བྱེད་ཚོགས་བདུན་གང་རུང་གིས་ཀུན་གཞིའི་སྟེང་དུ་རིགས་འདྲ་ཕྱི་མའམ་རྣམ་སྨིན་སོགས་འབྲས་བུའི་ཁྱད་པར་ཅི་རིགས་འགྲུབ་རུང་གི་ནུས་པ་ཁྱད་པར་བ་ཞིག་བཞག་པ་དེ་ཉིད་ཡིན་པར་གསུངས་སོ། །གཉིས་པ་དབྱེ་བ་ལ། དྲུག་ཏུ་དབྱེ་བ། གསུམ་དུ་དབྱེ་བ། བཞི་ཚན་གཉིས་སུ་དབྱེ་བ་རྣམས་ལས། དང་པོ་ནི། ཐེག་བསྡུས་ལས། ཕྱི་དང་ནང་དང་མི་གསལ་བ། །གཉིས་དང་ཀུན་རྫོབ་
ཉིད་དང་ནི། །དམ་པའི་དོན་ཏེ་དེ་དག་ཀུན། །ས་བོན་རྣམ་པ་དྲུག་ཏུ་འདོད། །ཅེས་རྩ་བའི་དབྱེ་བ་ས་ལུ་སོགས་ཕྱིའི་ས་བོན། ཀུན་གཞི་ལ་གནས་པ་ནང་གི་ས་བོན་ཏེ་གཉིས་དང། དེ་གཉིས་རེ་རེ་ནས་དགེ་མི་དགེ་གང་དུ་ཡང་མི་གསལ་བ་སྟེ་ལུང་མ་བསྟན་ཡིན་པས་ཕྱིའི་མི་གསལ་བ་དང། ནང་གི་མི་གསལ་བ་ཞེས་གྲངས་གཉིས་དང། དེ་རིམ་པ་བཞིན་ཕྱི་ཐ་སྙད་པའི་ཤེས་པའི་སྣང་ཚོད་ཙམ་ཡིན་པས་ཀུན་རྫོབ་དང། ནང་དཔྱད་བཟོད་ཀྱི་ས་བོན་མཐར་ཐུག་པ་ཡིན་པས་དོན་དམ་པའི་ས་བོན་ཞེས་གྲངས་གཉིས་ཏེ་དྲུག་ཏུ་ཕྱེ་བ་ལྡོག་ཆ་ཙམ་ཡིན་གྱི་དོན་སྔ་མ་གཉིས་སུ་འདུས་སོ། །གསུམ་དུ་ཕྱེ་བ་ཡང། རྩ་བར། གཞན་ཡང་མངོན་བརྗོད་བདག་ལྟ་དང། །སྲིད་པའི་ཡན་ལག་བག་ཆགས་གསུམ། །ཞེས་ཆོས་རྣམས་ལ་འདི་ནི་འདིའོ་ཞེས་ཐ་སྙད་སྦྱོར་བའི་རྒྱུ་བྱེད་པ་མངོན་བརྗོད་ཀྱི་བག་ཆགས། རྟག་ཏུ་ངའོ་སྙམ་པ་སྐྱེད་པ་བདག་ལྟའི་བག་ཆགས། འགྲོ་བ་རྣམས་སུ་སྐྱེ་འཆི་འགྲུབ་བྱེད་སྲིད་པའི་ཡན་ལག་གི་བག་ཆགས་ཏེ། རིམ་པ་བཞིན་ཡིད་ཤེས་དང། ཉོན་ཡིད་དང། དགེ་མི་དགེའི་ལས་ཀྱིས་འཇོག་ཅིང། སྤྲོས་པའི་བག་ཆགས། འཇིག་ལྟའི་བག་ཆགས། སེམས་ཀྱི་བག་ཆགས་ཞེས་ཀྱང་བཤད་དོ། །བཞི་ཚན་གཉིས་ལས། དང་པོ་ནི། སྣོད་བཅུད་འགྲུབ་བྱེད་ཀྱི་བག་ཆགས་གཉིས་ལ་རིམ་བཞིན་ཐུན་མོང་དང་ཐུན་མོང་མ་ཡིན་པའི་བག་ཆགས་སམ། ཚོར་མེད་དང་ཚོར་བཅས་ཀྱི་བག་ཆགས་ཞེས་བཤད་པ་ཡིན་ལ། བཞི་ཚན་གཉིས་པ་ནི། གནས་ངན་ལེན་གྱི་བག་ཆགས། ཤིན་ཏུ་སྦྱངས་པའི་བག་ཆགས། སྤྱད་
ཟིན་པའི་བག་ཆགས། སྤྱད་མ་ཟིན་པའི་བག་ཆགས་ཞེས་ཀུན་ཉོན་ཕྱོགས་དང། རྣམ་བྱང་ཕྱོགས་དང། འཕངས་འབྲས་གྲུབ་ཟིན་དུས་ཀྱི་ལས་ཀྱི་ས་བོན་དང་མངོན་བརྗོད་ཀྱི་བག་ཆགས་བཞི་ལ་བཤད་པའི་དང་པོ་རྣམས་གོ་སླའང་སྤྱད་མ་ཟིན་པའི་དོན་ནི་མངོན་བརྗོད་ཀྱི་བག་ཆགས་དེ་ཉིད་ཐོག་མེད་ནས་ལྷན་སྐྱེས་སུ་འབྱུང་ཞིང། གཉིས་སྣང་འཁྲུལ་པའི་ཆ་གཉེན་པོས་མ་སྤངས་བར་དུ་སྤྱད་པས་ཟད་དུ་མེད་པ་ལ་བྱ་ཡི་སྔ་མའི་རིགས་པ་སྦྱར་ནས་འཕངས་འབྲས་ཕྱུང་མ་ཟིན་པའི་ལས་ཀྱི་བག་ཆགས་ལ་འདོད་པ་མི་འཐད་དེ། དཀའ་འགྲེལ་ལས། སྤྱད་མ་ཟིན་པའི་ས་བོན་ནི། མངོན་བརྗོད་ཀྱི་བག་ཆགས་ཏེ། དེ་ནི་ཐོག་མ་མེད་པ་ནས་འབྱུང་བའི་ཕྱིར། ཞེས་སོ། །དགུ་པ་རྣམ་གྲངས་དང། བཅུ་བ་སྒྲ་བཤད་གཉིས་ཕྱོགས་གཅིག་ཏུ་བཤད་ན་གོ་སླ་བས། དེའང་ཤེས་བྱ་ངོ་བོ་ཉིད་གསུམ་གྱི་གནས་ཡིན་པས་ཤེས་བྱའི་གནས་དང། ས་བོན་ཐམས་ཅད་ཀྱི་རྟེན་བྱེད་པས་ས་བོན་ཐམས་ཅད་པ་དང། རྣམ་སྨིན་གྱི་ལུས་ལེན་པས་ན་ལེན་པའི་རྣམ་ཤེས་ཞེས་ཐེག་ཆེན་གྱི་སྡེ་སྣོད་ལས་གསུངས་ལ། ཐེག་དམན་གྱི་སྡེ་སྣོད་ཀྱང་ཕལ་ཆེན་པའི་ལུང་ལས། ཉོན་མོངས་པའི་ཆོས་རྣམས་ཀྱི་རྩ་བ་ཡིན་པས་རྩ་བའི་རྣམ་ཤེས་དང། ས་སྟོན་པའི་ལུང་ལས། འཁོར་བ་ལས་མ་གྲོལ་བ་དེ་སྲིད་དུ་འཇུག་པས་འཁོར་བ་ཇི་སྲིད་པའི་ཕུང་པོ་དང། གནས་བརྟན་པའི་ལུང་ལས། སྲིད་པའི་རྒྱུ་བྱེད་པས་སྲིད་པའི་ཡན་ལག་གི་རྣམ་ཤེས་དང། མང་བཀུར་བའི་ལུང་ལས། ཟག་བཅས་ལས་ཀྱི་རྣམ་སྨིན་ཡིན་པས་རྣམ་པར་སྨིན་པའི་རྣམ་ཤེས་དང། ཐེག་པ་ཐུན་མོང་དུ། འཁོར་འདས་ཀུན་གྱི་གཞི་
བྱེད་པས་ཀུན་གཞིའི་རྣམ་ཤེས་ཞེས་བསྟན་པ་རྣམས་རྣམ་གྲངས་ཡིན་ཀྱང་དོན་གཅིག་ཁོ་ནར་མ་ངེས་སོ། །འོ་ན། ཐེག་བསྡུས་ལས། ཅིའི་ཕྱིར་ཉན་ཐོས་ཀྱི་ཐེག་པར་སེམས་དེ་ཀུན་གཞིའི་རྣམ་པར་ཤེས་ཞེས་བྱ་བའམ། ལེན་པའི་རྣམ་པར་ཤེས་པར་མ་བསྟན་ཅེ་ན། ཤེས་བྱ་ཕྲ་མོ་བསྡུས་པའི་ཕྱིར། ཞེས་དང། བསྟན་འདི་འདི་ལྟར་གཞན་ན་མ་མཐོང་ལ། །འདི་དག་བྱང་ཆུབ་ཆེན་པོའི་རྒྱུར་མཐོང་བས། །གནས་ཚུལ་བསྟན་པ་ཁྱད་ཞུགས་གང་ཡིན་པ། །ཐེག་པ་ཆེན་པོ་སངས་རྒྱས་བཀར་འདོད་དོ། །ཞེས་གསུངས་པས་ཀུན་གཞིའི་ཐ་སྙད་ཐེག་པ་ཐུན་མོང་དུ་གསུངས་པ་མི་འཐད་སྙམ་ན་སྐྱོན་མེད་དེ། འདི་ཉིད་ལས། ཐེག་དམན་གཙུག་ལག་རྣམས་སུ་ཡང། །ཀུན་གཞི་རྩ་བའི་རྣམ་ཤེས་དང། །སྲིད་པའི་ཡན་ལག་ཇི་སྲིད་པའི། །ཕུང་བོ་རྣམ་གྲངས་དག་གིས་བསྟན། །ཞེས་གསུངས་ཤིང། སྐྱེ་དགུ་ཀུན་གཞི་ལ་དགའ་བ། ཀུན་གཞི་ལས་ཡང་དག་པར་འབྱུང་བ་ཞེས་སོགས་ལུང་གཅིག་ལས་འཕྲོས་པར་འབྱུང་བའི་ཕྱིར། དེས་ན་ཐེག་བསྡུས་ཀྱི་དོན་ཐེག་དམན་གྱི་སྡེ་སྣོད་ལས་ཐེག་ཆེན་བཞིན་དུ་ཀུན་གཞིའི་རང་བཞིན་འཇོག་བྱེད། འཇུག་ལྡོག་གི་ཚུལ་སོགས་མ་གསུངས་པའི་དོན་ཡིན་གྱི། དེའི་ཐ་སྙད་ཙམ་མེད་པ་མིན་ཏེ། དེ་ཉིད་ལས། བསྟན་འདི་འདི་ལྟར། ཞེས་དང། ཐེག་པ་ཆེན་པོར་ནི། ཀུན་གཞིའི་རྣམ་ཤེས། ལེན་པའི་རྣམ་ཤེས། ཤེས་བྱའི་གནས། ཞེས་སོགས་སྒྲ་དྲང་བོར་རྫོགས་པར་བསྟན་ཅིང། དེ་ལྟ་བུ་ཉན་ཐོས་ཀྱི་ཐེག་པར་བསྟན་པ་མེད་པས། ཞེས་གསུངས་པའི་ཕྱིར་དང། རྫོགས་པར་
ཞེས་པའི་ཚིག་གི་ནུས་པ་འདོན་ཚུལ་ཡོད་པའི་ཕྱིར། དེས་ན་རང་ལུགས་འདིར་གཙོ་བོའི་དབང་དུ་བྱས་ན་སེམས་ཞེས་པ་ཡང་ཀུན་གཞིའི་མིང་གི་རྣམ་གྲངས་སུ་བཞེད་དེ། སྤྱིར་སེམས་ཡིད་རྣམ་ཤེས་གསུམ་དོན་གཅིག་ཀྱང། ངེས་ཚིག་གིས་བཤད་ན། ཀུན་གཞི་ནི་བག་ཆགས་བསགས་པའི་གཞི་ཡིན་པས་སེམས་དང། ཉོན་ཡིད་ཀྱིས་ཐོག་མེད་ནས་གོམས་པའི་ཤུགས་ཀྱིས་རྟག་ཏུ་ངར་སེམས་པས་ཡིད་དང། འཇུག་ཤེས་ཀྱིས་གཟུགས་སོགས་ཡུལ་དྲུག་སོ་སོར་རིག་པས་རྣམ་ཤེས་ཞེས་བཤད་དགོས་པའི་ཕྱིར། སུམ་ཅུ་པ་ལས། གྱུར་པ་དེ་ཡང་རྣམ་གསུམ་སྟེ། །རྣམ་པར་སྨིན་དང་ངར་སེམས་དང། །ཡུལ་ལ་རྣམ་པར་རིག་པ་འོ། །ཞེས་དང། བློ་བརྟན་གྱི་འགྲེལ་པ་ལས། བག་ཆགས་ཡོངས་སུ་སྨིན་པའི་དབང་གིས་ཇི་ལྟར་འཕངས་པའི་འབྲས་བུ་མངོན་པར་འགྲུབ་པ་ནི་རྣམ་པར་སྨིན་པའོ། །ཉོན་མོངས་པ་ཅན་གྱི་ཡིད་ནི་རྟག་ཏུ་ངར་སེམས་པའི་བདག་ཉིད་ཡིན་པས་ངར་སེམས་པའོ། །གཟུགས་ལ་སོགས་པའི་ཡུལ་སོ་སོར་སྣང་བའི་མིག་ལ་སོགས་པའི་རྣམ་པར་ཤེས་པ་དྲུག་ནི་ཡུལ་ལ་རྣམ་པར་རིག་པ་ཞེས་བྱའོ། །ཞེས་སོ། །དེས་ན་ཀུན་གཞི་ལ་རྣམ་པར་སྨིན་པ་ཞེས་པ་ཡང། སྔ་མའི་ལས་ཀྱི་རྣམ་སྨིན་དེའི་སྟེང་དུ་སྨིན་པ་ལ་མི་བྱེད་ཀྱི། དེའི་སྟེང་དུ་ཡང་ཡང་བསགས་པའི་བག་ཆགས་ཀྱི་ནུས་པ་སླར་སྨིན་པར་འགྱུར་བ་ལ་བྱེད་དེ། དགོངས་འགྲེལ་ལས། དེ་ནི་ལེན་པའི་རྣམ་པར་ཤེས་པ་ཞེས་བྱ་སྟེ། འདི་ལྟར་དེས་ལུས་གཟུང་ཞིང་བླངས་པའི་ཕྱིར་རོ་ནས། སེམས་ཞེས་ཀྱང་བྱ་སྟེ། འདི་ལྟར་དེ་ནི་གཟུགས་དང། སྒྲ་དང། དྲི་དང། རོ་
དང། རེག་བྱ་དང། ཆོས་རྣམས་ཀྱི་ཀུན་ཏུ་བསགས་པ་དང་ཉེ་བར་བསགས་པ་ཡིན་པའི་ཕྱིར་རོ། །ཞེས་དང། རེད་མདའ་བའི་ཀུན་བཏུས་ཊཱིཀྐ་ལས། ཀུན་གཞི་ནི་བག་ཆགས་བསགས་པའི་རང་བཞིན་ཡིན་པས་སེམས་ཉིད་དུ་རིག་པའི་ཕྱིར་རོ། །ཞེས་གསུངས་ལ། རྒྱུ་མཚན་དེའི་ཕྱིར། སུམ་ཅུ་པ་ལས་ཀྱང། དེ་ལ་ཀུན་གཞིའི་རྣམ་ཤེས་ནི། །རྣམ་སྨིན་ས་བོན་ཐམས་ཅད་པ། །ཞེས་དང། དུལ་ལྷའི་འགྲེལ་བཤད་ལས། ཀུན་གཞིའི་རྣམ་པར་ཤེས་པ་ལས་དགེ་བ་དང་མི་དགེ་བའི་རྣམ་པར་སྨིན་པར་འགྱུར་ཏེ། དེ་བས་ན་རྣམ་པར་སྨིན་པ་ཞེས་བྱའོ། །ཞེས་གསུངས་པའི་ཕྱིར། བག་ཆགས་བསགས་པས་སེམས་ཞེས་བཤད་ཚུལ་ཡང། ཙི་ཏ་ཞེས་པ་སེམས་ཀྱི་སྐད་དོད་ཡིན་ལ། དེ་ཡང་བྱིངས་མདོ་ལས། ཙིཉྲ་གསོག་པ་ལའོ། །ཞེས་པའི་བྱིངས་བཞག ཉྲ་རྗེས་འབྲེལ་ཡིན་པས་ཕྱིས། ལས་མེད་པ་སོགས་ཀྱི་རྐྱེན་ཀྟ་བྱིན། ཀ་བརྗོད་དོན་ཡིན་པས་ཕྱིས། རྣམ་དབྱེ་དང་པོའི་གཅིག་ཚིག་སི་བྱིན། ས་ར་དག་གིས་རྣམ་བཅད་དོ་ཞེས། ས་རྣམ་བཅད་བྱས་པས་ཙི་ཏཿགྲུབ་ཅིང། དེ་བཞིན་དུ་ཡིད་ཀྱང། མྣཱ་གོམས་པ་ལའོ། །ཞེས་པའི་བྱིངས་བཞག་སྟེ། རྐྱེན་ཏིཔྲ་བྱིན་ནས་བསྒྲུབས་པས་མ་ན་ཏི། ཞེས་པ་རྟག་ཏུ་གོམས་བཞིན་པའི་དོན་དུ་འགྲོ་ལ། རྣམ་ཤེས་ནི། བིད། ཤེས་པ་ལའོ། །ཞེས་པའི་བྱིངས་ལས་བསྒྲུབ་སྟེ། ཉེར་བསྒྱུར་གྱི་དབང་གིས། བི་བེ་དཿ ཞེས་པ་རྣམ་པར་རིག་པར་བྱེད་པ་དང། པྲ་བི་དི་ཏཿ ཞེས་པ་སོ་སོར་རིག་པར་བྱེད་པ་ལ་འཇུག་པའི་ཕྱིར། དེ་ལྟར་
སེམས་ཡིད་རྣམ་ཤེས་གསུམ་གྱི་ངེས་ཚིག་དང་སྦྱར་ཏེ། སོ་སོར་བཤད་པ་མདོའི་དགོངས་པའང་ཡིན་ཏེ། ལང་གཤེགས་ལས། སེམས་ནི་ཀུན་གཞིའི་རྣམ་ཤེས་ཏེ། །ངར་འཛིན་པ་ནི་ཡིད་ཡིན་ནོ། །ཡུལ་ལ་རྣམ་པར་རིག་པ་གང། །དེ་ནི་འཇུག་པའི་རྣམ་ཤེས་འདོད། །ཅེས་དང། དོན་གསང་ལས། སོགས་པས་ན་སེམས་སོ། །རྟོགས་པས་ན་ཡིད་དོ། །རྣམ་པར་ཤེས་པས་ན་རྣམ་པར་ཤེས་པའོ། །ཞེས་གསུངས་པའི་ཕྱིར། བཅུ་གཅིག་པ་སྒྲུབ་བྱེད་ལ། ལུང་རིགས་གཉིས་ལས། ལུང་ནི་ཆོས་མངོན་པའི་མདོ་ལས། །ཐོག་མ་མེད་པའི་དུས་ཀྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །དེ་ཡོད་པས་ན་འགྲོ་ཀུན་དང། །མྱ་ངན་འདས་པའང་འཐོབ་པར་འགྱུར། །ཞེས་དང། དགོངས་འགྲེལ་ལས། ལེན་པའི་རྣམ་པར་ཤེས་པ་ཟབ་ཅིང་ཕྲ། །ས་བོན་ཐམས་ཅད་ཆུ་བོའི་རྒྱུན་བཞིན་འབབ། །བདག་ཏུ་རྟོག་པར་གྱུར་ན་མི་རུང་ཞེས། །འདི་ནི་བྱིས་པ་རྣམས་ལ་ངས་མ་བསྟན། །ཞེས་དང། ལང་གཤེགས་ལས། དེ་བཞིན་ཀུན་གཞིའི་ཆུ་བོ་ནི། །སྣ་ཚོགས་ཡུལ་གྱི་རླུང་གིས་བསྐྱོད། །རྣམ་ཤེས་སྣ་ཚོགས་རྦ་རླབས་རྣམས། །གང་ཞིང་རབ་ཏུ་འབྱུང་བར་འགྱུར། །ཞེས་དང། རྒྱན་སྟུག་པོ་བཀོད་པར། དེ་བཞིན་ཀུན་གཞིའི་རྣམ་ཤེས་ཀྱང། །རྣམ་ཤེས་བདུན་དང་ལྷན་ཅིག་གནས། །ཞེས་སོགས་དང། ཐེག་དམན་གྱི་ལུང་གོང་དུ་སྨོས་པ་རྣམས་སོ། །རིགས་པ་ཡང་ཕུང་པོ་ལྔའི་རབ་བྱེད་དང་སའི་སྟོད་འགྲེལ་སོགས་ལས་གསུངས་པའི་རྣམ་གྲངས་མང་ཡང། གཙོ་བོ་ནི་བསྡུ་བར། ལེན་དང་དང་པོ་གསལ་བ་དང། །ས་བོན་ལས་དང་ལུས་ཚོར་དང། །སེམས་
མེད་སྙོམས་པར་འཇུག་པ་དང། །དེ་བཞིན་འཆི་འཕོ་མི་རུང་འགྱུར། །ཞེས་རིགས་པའི་གཙོ་བོ་བརྒྱད་དུ་བསྡུས་ནས་གསུངས་པའི་ནང་ནས་དང་པོ་མི་རུང་བ་དང། གསལ་བ་མི་རུང་བ་དང། ལས་བཞི་མི་རུང་བར་ཐལ་བ་གསུམ་ནི། ཕྱོགས་སྔ་མས། ཀུན་གཞི་འགོག་བྱེད་ཀྱི་གཙོ་བོ། སེམས་ཅན་རྣམས་ནི་རྣམ་པར་ཤེས་པ་རྒྱུད་རེ་རེ་བའོ། །ཞེས་པའི་ལུང་དང་འགལ་བར་ཐལ་བའི་རྩོད་སྤོང་གི་རིགས་པ་ཡིན་ལ་གཞན་ལྔ་ནི་ཀུན་གཞི་ཡོད་པར་སྒྲུབ་པའི་གཏན་ཚིགས་དངོས་སོ། །དང་པོ་ནི། ཀུན་གཞི་མེད་ན་ལུས་ལེན་བྱེད་མེད་དགོས་ཏེ། ཡིད་ཀྱི་རྣམ་ཤེས་དེར་མི་རུང་བའི་ཕྱིར། དེར་ཐལ། འཇུག་ཤེས་རྣམས་ནི། ཡུལ་དབང་ཡིད་བྱེད་གསུམ་འདུས་ནས་གསར་དུ་གྲུབ་དགོས་པས་ཉིང་མཚམས་སྦྱར་མ་ཐག་པའི་ཚེ་འཇུག་ཤེས་རང་ཉིད་མ་སྐྱེས་པའི་ཕྱིར་དང་དེ་ལུས་ལེན་བྱེད་ཡིན་ན་འཛིན་བྱེད་ཀྱང་ཡིན་དགོས་ལ། དེ་རྣམས་ལུས་ཀྱི་ཆ་སོ་སོར་གནས་པས་ངེས་མ་ཟིན་པའི་ཆ་རྣམས་རྒྱུད་ཀྱིས་མ་བསྡུས་པར་འགྱུར་བའི་ཕྱིར་དང། སེམས་མེད་ཀྱི་གནས་སྐབས་སོ་སོའི་མཐར་གསར་དུ་འཇུག་ཤེས་སྐྱེས་པའི་ཚེ་ལུས་བླངས་པར་འདོད་དགོས་པས་ཚེ་གཅིག་ལ་ལུས་ཡང་ཡང་འདོར་ལེན་བྱེད་པར་ཐལ་བའི་ཕྱིར། ཞེས་སོགས་རྟགས་སྒྲུབ་ལྔ་གསུངས་ཤིང་འདི་ལྟར་ན་ཡིད་ཤེས་ཀྱི་གནས་སྙིང་ཁོ་ན་དང། སེམས་མེད་ཀྱི་གནས་སྐབས་སུ་དགེ་སོགས་མེད་པར་འདོད་དགོས་ཞེས་མཁས་པ་ཁ་ཅིག་གསུངས་ཏེ་དཔྱད་པར་བྱའོ། །རིགས་པ་གཉིས་པ་ནི། ཕ་རོལ་པོས་ཀུན་གཞི་ཡོད་ན་རྣམ་ཤེས་དུ་མ་ཅིག་ཅར་མངོན་དུ་འགྱུར་བར་ཐལ་བའི་སྐྱོན་བརྗོད་པ་ལ། དེ་ལྟར་སྐྱེ་བ་འདོད་པ་ཁོ་ན་ཡིན་ཏེ།
དཔེར་ན། གཟུགས་སོགས་ཡུལ་དྲུག་ཁྱད་མེད་དུ་ཉེ་བར་གནས་ཤིང། དབང་པོ་དྲུག་ཀྱང་མཉམ་པར་ཡོད་ན་གཟུགས་ལ་བལྟ་འདོད་སོགས་ཡིད་བྱེད་དྲུག་ཉེ་རིང་ཁྱད་པར་མེད་པའི་ཚེ་མཇུག་དེ་མ་ཐག་རྣམ་ཤེས་དྲུག་ཀ་སྐྱེ་དགོས་པའི་ཕྱིར། དེར་ཐལ། རྒྱུའི་རྐྱེན་ཀུན་གཞི་ཡོད་ལ། དེ་མ་ཐག་རྐྱེན་སྔ་རོལ་དེ་མ་ཐག་འགག་པའི་ཤེས་པ་གང་ཡིན་གྱིས་བྱས་ཆོག་པ་གང་ཞིག །དམིགས་རྐྱེན་བདག་རྐྱེན་གཉིས་ཀྱང་འཛོམ་པས་རྐྱེན་བཞི་ག་ཚང་བའི་ཕྱིར། མ་ཁྱབ་ན། དེའི་ནང་ནས་དང་པོར་གཅིག་ཀྱང་མི་སྐྱེ་བར་ཐལ། རྐྱེན་ཚང་བར་ཁྱད་མེད་བཞིན་དུ་གཅིག་སྐྱེ་ལ་གཅིག་མི་སྐྱེ་བའི་རྒྱུ་མཚན་མེད་པའི་ཕྱིར། བློ་གྲོས་ཡངས་པའི་ལེའུ་ལས། གལ་ཏེ་རླབས་གཅིག་འབྱུང་བའི་རྐྱེན་ཉེ་བར་གནས་པར་གྱུར་ན་རླབས་གཅིག་འབྱུང་ངོ་ནས། ཀུན་གཞིའི་རྣམ་པར་ཤེས་པ་ལ་བརྟེན་ཅིང་རབ་ཏུ་གནས་ནས་གལ་ཏེ་མིག་གི་རྣམ་པར་ཤེས་པ་གཅིག་པུ་འབྱུང་བའི་རྐྱེན་ཉེ་བར་གནས་པར་གྱུར་ན་མིག་གི་རྣམ་པར་ཤེས་པ་གཅིག་པུ་འབྱུང་ངོ་། །གལ་ཏེ་རྣམ་པར་ཤེས་པ་གཉིས་སམ་གསུམ་མམ་ལྔ་འབྱུང་བའི་རྐྱེན་ཉེ་བར་གནས་པར་གྱུར་ན་ཡང་གཉིས་སམ་གསུམ་མམ་ལྔའི་བར་དུ་ཡང་འབྱུང་བར་འགྱུར་རོ། །ཞེས་སོ། །རིགས་པ་གསུམ་པ་ཡང། ཕྱོགས་སྔ་དེ་ཉིད་ལ་འཕངས་པ་སྟེ། དེ་ཡང་རྣམ་ཤེས་དུ་མ་ཅིག་ཅར་སྐྱེ་བ་ཡོད་པར་ཐལ། གཟུགས་མཐོང་བཞིན་པའི་དུས་ཀྱི་དེ་ལ་འཇུག་པའི་ཡིད་ཤེས་གསལ་བ་གཅིག་དང། དེ་འདས་རྗེས་སུ་དྲན་པའི་རྣམ་ཤེས་མི་གསལ་བ་གཅིག་དང་གཉིས་ཡོད་པར་མྱོང་བས་གྲུབ་པའི་ཕྱིར། ཁྱབ་སྟེ། རྣམ་ཤེས་དུ་མ་ཅིག་ཅར་མེད་ན་མིག་ཤེས་མངོན་དུ་གྱུར་དུས་ཀྱི་ཡིད་ཤེས་གསལ་བ་དེ་མེད་དགོས་པའི་ཕྱིར། བཞི་པ་ནི། ཀུན་གཞི་མེད་ན་སེམས་ཅན་གྱི་རྒྱུད་ལ་དགེ་
སོགས་ཀྱི་ས་བོན་མེད་པར་འགྱུར་བའི་ཕྱིར་ཏེ། རྟེན་ཀུན་གཞི་མེད་ཅིང་འཇུག་ཤེས་རྣམས་དེར་མི་རུང་བའི་ཕྱིར། དེར་ཐལ། འཇུག་ཤེས་དགེ་བའི་རྗེས་སུ་མི་དགེ་བ་དང་ཁམས་གོང་འོག་འདས་མ་འདས་སོགས་སྤེལ་ནས་སྐྱེ་བས་ཕན་ཚུན་རྟེན་དུ་མི་རུང་བའི་ཕྱིར་དང། འཇུག་ཤེས་ལ་བསྒོ་ན་བརྒྱལ་བ་སོགས་ཀྱི་ཚེ་འཇུག་ཤེས་མེད་པས་བག་ཆགས་རྒྱུན་ཆད་དེ་ལས་བྱས་པ་ཆུད་ཟོས་པར་འགྱུར་བའི་ཕྱིར། གལ་ཏེ་དེའི་ཚེ་འཇུག་ཤེས་མངོན་གྱུར་དུ་མེད་ཀྱང་ས་བོན་གྱི་ཚུལ་དུ་ཡོད་ཟེར་ན། སྔ་མའི་སྐྱོན་སོ་ན་གནས་ཏེ་ས་བོན་ས་བོན་གྱི་རྟེན་དུ་མི་རུང་བས། དེ་ལ་ཡང་བསྒོ་གཞི་ཞིག་དགོས་པའི་ཕྱིར། ཡང་དེའི་ཚེ་འཇུག་ཤེས་མངོན་གྱུར་ཡོད་ཀྱང་རྒྱུན་གྱི་འཇུག་ཤེས་དང་མི་འདྲ་བར་དམིགས་རྣམ་བྱེ་བྲག་ཏུ་གཅོད་མི་ནུས་པས་ཤིན་ཏུ་ཕྲ་བ་ཞིག་ཟེར་ན་ཡང་མི་འཐད་པར་ཐལ། ངོ་བོ་དམིགས་རྣམ་དེ་ལྟ་བུ་ལ་ས་བོན་ཐམས་ཅད་ཀྱི་རྟེན་བྱེད་པ་ཞིག་ཡིན་ན། ཁྱོད་ཀྱིས་དེར་ཡིད་ཀྱི་རྣམ་ཤེས་ཞེས་བཤད་ཀྱང། དོན་ཀུན་གཞི་ལས་མ་འདས་པའི་ཕྱིར། ཐེག་བསྡུས་ལས། གང་བརྒྱལ་བ་དེ་ས་བོན་ཐམས་ཅད་པ་ཡིན་ན་ནི། དེས་ན་ཡིད་ཀྱི་རྣམ་པར་ཤེས་པ་བྱ་བ་ཀུན་གཞིའི་རྣམ་པར་ཤེས་པ་ཉིད་ཀྱི་རྣམ་གྲངས་ཀྱི་མིང་དུ་གཞུག་པ་ཡིན་ནོ། །ཞེས་གསུངས་པའི་ཕྱིར། ས་བོན་མེད་ན་ཀུན་བྱང་ཐམས་ཅད་མེད་དགོས་པས་རིགས་པ་བཞི་པ་འདི་ཉིད་ལུགས་འདིའི་གཏན་ཚིགས་གཙོ་བོ་ཞིག་གོ །ལྔ་པ་ཡང་རྣམ་ཤེས་དུ་མ་ཅིག་ཅར་འབྱུང་བ་མེད་ན་ལས་མི་རུང་བར་འགྱུར་ཏེ། དཔེར་ན། ལམ་དུ་འགྲོ་བའི་ཚེ་སྣོད་ཀྱི་རྣམ་རིག་
ཕྱི་འཇིག་རྟེན་དུ་སྣང་བ་དང། གནས་ཀྱི་རྣམ་རིག་ནང་སེམས་ཅན་དུ་སྣང་བ་དང། ངའོ་སྙམ་པའི་རྣམ་རིག་བདག་ཏུ་སྣང་བ་དང། ཡུལ་གྱི་རྣམ་རིག་གཟུགས་སོགས་སོ་སོར་སྣང་བ་སྟེ་གང་དུ་འགྲོ་བ་དང། འགྲོ་བ་པོ་དང། འགྲོ་བའི་བྱ་བ་རྣམས་མ་ཤར་བར་འགྲོ་འོང་སོགས་ཀྱི་ལས་སམ་བྱ་བ་བྱེད་ཚུལ་མེད་པ་གང་ཞིག །དེ་དག་རྣམ་ཤེས་སོ་སོ་ལ་འཆར་བ་མ་གཏོགས་སེམས་གཅིག་ལ་སྐྱེ་མཆེད་ཐ་དད་པའི་སྣང་ཚུལ་དུ་མ་མི་རིགས་པའི་ཕྱིར། དྲུག་པ་ནི། ཀུན་གཞི་མེད་ན་དགེ་སེམས་ལྟ་བུ་མངོན་དུ་གྱུར་བའི་ཚེ་ལུས་ལ་ཕན་གནོད་བྱས་པས་མྱོང་བྱེད་ཀྱི་ལུས་ཚོར་མི་སྐྱེ་བར་འགྱུར་ཏེ། ཡིད་ཤེས་དགེ་བའི་དམིགས་པ་ལ་གཏད་པས་དེ་ཡིད་ལ་མི་བྱེད་ཅིང། ཀུན་གཞི་མེད་པས་དེ་ལ་རྟེན་སྦྱིན་པའམ་སློང་བའི་རྒྱུ་མེད་པའི་ཕྱིར། དཀའ་འགྲེལ་ལེགས་བཤད་རྒྱ་མཚོ་ལས། མྱོང་བ་དེ་ལ་རྟེན་སྦྱིན་པའི་སྒོ་ནས་ལུས་ལ་སྐྱེ་བར་འཇུག་པའི་རྟེན་མེད་པས། ཞེས་གསུངས་པའི་ཕྱིར། བདུན་པ་སེམས་མེད་སྙོམས་འཇུག་མི་རུང་བ་ནི། སེམས་མེད་སྙོམས་འཇུག་གཉིས་ལ་ཞུགས་པའི་གང་ཟག་གིས་ལུས་རྟེན་དེ་རྣམ་ཤེས་ཀྱིས་བོར་བས་ཤི་ལུས་སུ་འགྱུར་ཏེ། དེ་དང་རྟེན་བརྟེན་པའི་འཇུག་ཤེས་མེད་ལ་ཀུན་གཞི་མ་བཞག་པའི་ཕྱིར། འདོད་ན། ཆོས་སྦྱིན་མའི་མདོ་ལས། དྲོད་དང་མ་བྲལ་ཞིང་སྲོག་གི་དབང་པོ་དང་མ་བྲལ་བས། དེའི་རྣམ་པར་ཤེས་པ་ལུས་དང་མ་བྲལ་བ་ཡིན་ནོ། །ཞེས་སོགས་དང་འགལ་ཞིང་སྙོམས་འཇུག་གཉིས་ཀྱང་མེད་པར་འགྱུར་ཏེ། དེ་ལ་ཞུགས་པའི་གང་ཟག་མེད་པའི་ཕྱིར། དེ་བཞིན་དུ་མཉམ་གཞག་ཟག་མེད་ཀྱང་མི་
འཐད་པར་འགྱུར་ཏེ། དེ་ལ་གནས་པའི་གང་ཟག་མེད་པའི་ཕྱིར། དེར་ཐལ། ཡིད་ཤེས་ཟག་མེད་ཡིན་པས་ཁམས་གསུམ་གང་རུང་གི་འགྲོ་བར་མི་འཐད་ཅིང། དེ་ལས་གཞན་གང་ཟག་གི་མཚན་གཞི་མེད་པའི་ཕྱིར་ཏེ། ཐེག་བསྡུས་ལས། དེ་ཉིད་ན་འཇིག་རྟེན་ལས་འདས་པའི་སེམས་མངོན་པར་བྱེད་ཚེ་དེ་མ་ཡིན་པ་གཞན་འཇིག་རྟེན་པའི་སེམས་མེད་པར་འགྱུར་བས་དེའི་འགྲོ་བ་ལྡོག་པ་ཉིད་དུ་འགྱུར་རོ། །ཞེས་གསུངས་པའི་ཕྱིར། བརྒྱད་པ་ནི། ཀུན་གཞི་མེད་ན། རིམ་གྱིས་འཆི་འཕོ་ཞིང་དྲོད་སྡུད་པ་མི་རིགས་པར་འགྱུར་ཏེ། བྱེ་བཤད་ལས། ཀུན་གཞིའི་རྣམ་པར་ཤེས་པ་ནི་ཁོག་པ་ཐམས་ཅད་ལ་ཁྱབ་པའོ། །ཞེས་པ་ལྟར་དེས་ལུས་ཀུན་བཟུང་སྟེ། ནམ་འཕེན་པ་ཟད་པ་ན་ལུས་ཀྱི་ཆ་གང་ཀུན་གཞིའི་རྟེན་དུ་མི་རུང་བར་གྱུར་པ་དེ་ནས་བསྡུས་པས་རིམ་པ་བཞིན་དུ་དྲོད་ཀྱང་སྡུད་པའི་ཕྱིར། དེར་ཐལ། དབང་ཤེས་རྣམས་ལུས་ཀྱིས་ཕྱོགས་རེ་བ་ཙམ་ལ་བརྟེན་པ་གང་ཞིག །ཡིད་ཤེས་དེ་ལྟར་མིན་ཡང་ཀུན་གཞི་ལྟར་ཆ་ཐམས་ཅད་དུ་ཁྱབ་ནས་འཛིན་པའི་ནུས་པ་མེད་པའི་ཕྱིར། ཕྱི་མ་དེར་ཐལ། ཡིད་ཤེས་གསལ་བར་ཡོད་བཞིན་དུ་དྲོད་སྡུད་པ་དུ་མ་ཡོད་པའི་ཕྱིར། བསྡུ་བ་ལས། འཆི་བའི་རྣམ་པར་ཤེས་པ་ལུས་ཀྱི་སྟོད་དམ་སྨད་དུ་དྲོད་ཡལ་བར་བྱེད་ཅིང་འདོར་ན་ཡིད་ཀྱི་རྣམ་པར་ཤེས་པ་ནི་ནམ་ཡང་མི་འབྱུང་བ་མ་ཡིན་ཏེ། ཞེས་དང། དཀའ་འགྲེལ་ལས། ཡིད་ཤེས་ནི་ལུས་ཀྱི་ཆ་ཤས་ལ་མི་གནས་ཀྱང། ཞེས་གསུངས་པའི་ཕྱིར། འདིས་སྙིང་ཁོ་ནར་གནས་པར་འདོད་པ་ཁེགས་སོ། །
གཉིས་པ། མཐའ་དཔྱད་པ་ལ། ས་བཟང་མ་ཏི་པཎ་ཆེན་གྱི་གསུང་ན་རེ། ཀུན་གཞི་ལ་ཀུན་རྫོབ་པ་རྣམ་ཤེས་དང། དོན་དམ་པ་ཡེ་ཤེས་གཉིས་ཡོད་ལ། འོན་ཀྱང་དེ་གཉིས་དོན་གཅིག་ཏུ་འདོད་པ་བདེན་གཉིས་ཀྱི་རྣམ་དབྱེ་མ་ཤེས་པ་ཡིན་པས། ཤིན་ཏུ་ཁྱད་པར་ཆེ་བར་འདོད་དེ། དེ་ཉིད་ཀྱི་ཀུན་བཏུས་འགྲེལ་པ་ལས། གཞུང་ལུགས་ཆེན་མོ་རྣམས་ཀྱི་དགོངས་པ་ཤེས་པ་ལ་ཀུན་རྫོབ་དང། དོན་དམ་དང། ཆོས་ཅན་དང། ཆོས་ཉིད་དང། རྣམ་ཤེས་དང། ཡེ་ཤེས་ལ་སོགས་པའི་རྣམ་པར་དབྱེ་བ་ཤེས་དགོས་ཤིང། ཁྱད་པར་སེམས་དང་ཀུན་གཞི་ལ་ཡང་བདེན་གཉིས་ཀྱི་རྣམ་དབྱེ་ཤེས་དགོས་པས། ཞེས་པ་ནས། ཀུན་གཞི་ལའང་ཆ་གཉིས་ཀྱི་ཀུན་རྫོབ་པ་ཆོས་ཅན་རྣམ་ཤེས་ཀྱི་ཆ་ནི་གང་རྣམ་པར་ཤེས་པ་ཚོགས་བརྒྱད་ཀྱི་ཡ་གྱལ་དུ་གྱུར་པ་དེ་ཉིད་ཡིན་ལ། དོན་དམ་ཆོས་ཉིད་ཡེ་ཤེས་ཀྱི་ཆ་ནི་དེ་བཞིན་གཤེགས་པའི་སྙིང་པོ་ཉིད་ཡིན་ཏེ། རྒྱན་སྟུག་པོ་བཀོད་པ་ལས། ས་རྣམས་སྣ་ཚོགས་ཀུན་གཞི་སྟེ། །བདེ་གཤེགས་སྙིང་པོ་དགེ་བའང་དེ། །སྙིང་པོ་དེ་ལ་ཀུན་གཞིའི་སྒྲས། །དེ་བཞིན་གཤེགས་རྣམས་སྟོན་པར་མཛད། །སྙིང་པོ་ཀུན་གཞིར་བསྟན་པ་ཡང། །བློ་ཞན་རྣམས་ཀྱིས་མི་ཤེས་སོ། །ཞེས་སོགས་གསུངས་པ་ལྟར་རོ། །ཞེས་དང། བཅོམ་ལྡན་འདས་ཀྱིས་ཆོས་མངོན་པའི་ཞེས་པ་ནས། མྱ་ངན་འདས་པའང་ཐོབ་པར་འགྱུར། །ཞེས་གང་གསུངས་པ་དེ་ཉིད། གསུང་གཅིག་ཉིད་དུ་གསུང་ན་ཡང། །དུ་མ་ཉིད་དུ་སོ་སོར་གོ །ཞེས་པ་ལྟར་གདུལ་བྱའི་སྐལ་བ་ཇི་ལྟ་བ་བཞིན་དུ་གཉིས་ཀ་སྦྱར་ཏེ་བཤད་དུ་རུང་བས། འཕགས་པ་འདི་ཉིད་ཀྱི་ཐེག་པ་ཆེན་པོ་བསྡུས་པར། ཀུན་
གཞིའི་རྣམ་པར་ཤེས་པའི་སྒྲུབ་བྱེད་དུ་སྦྱར་ནས་བཤད་ཅིང། ཐེག་པ་ཆེན་པོ་རྒྱུད་བླ་མའི་འགྲེལ་པར་ཀུན་གཞི་དེ་བཞིན་གཤེགས་པའི་སྒྲུབ་བྱེད་དུ་མདོ་དང་སྦྱར་ནས་བཤད་པ་ཡིན་ནོ། །ཞེས་དང། འགའ་ཞིག་དེ་གཉིས་གཅིག་པར་བཤད་པ་ནི། གང་དག་བདེན་པ་དེ་གཉིས་ཀྱི་ཞེས་པ་ནས། སྦུན་པ་དང་སྙིང་པོ་ལྟར་ཁྱད་པར་ཤིན་ཏུ་ཆེ་བར་གནས་པའི་ཕྱིར་རོ། །དེ་བས་ན་གནས་སྐབས་ཐམས་ཅད་དུ་བདེན་གཉིས་ཀྱི་རྣམ་དབྱེ་ལ་མཁས་པར་བྱའོ། །ཞེས་སོ། །དེ་ལ་འོ་ན་སེམས་ཙམ་པས་ཀུན་གཞི་དང་དེ་བཞིན་གཤེགས་པའི་སྙིང་པོ་གཉིས་ཀ་མདོ་དེའི་བསྟན་དོན་དུ་བྱས་ནས་ཁས་ལེན་པར་ཐལ། དེ་ལ་བདེན་པ་གཉིས་ཀྱི་ཆ་ཕྱེ་ནས་དེ་གཉིས་སོ་སོར་བཞག་པའི་ཕྱིར། རྟགས་སོང། ཁྱབ་སྟེ། གྲུབ་མཐའ་སྨྲ་བ་སུས་ཀྱང་རང་ལུགས་ཀྱི་བདེན་གཉིས་གཅིག་གིས་གཅིག་མི་འགོག་པས་འགལ་མེད་འཐད་ལྡན་དུ་ཁས་ལེན་དགོས་པའི་ཕྱིར། སྟོང་ཐུན་ལས། གྲུབ་མཐའ་སྨྲ་བ་སུའང། ཁོའི་བདེན་གཉིས་ཀྱི་རྣམ་གཞག་ལ་གྲུབ་མཐའ་སྨྲ་བ་གཞན་གྱིས་འགལ་འདུ་བརྗོད་པ་ཡོད་ཀྱི། རང་གིས་བཞག་པའི་བདེན་གཉིས་ཀྱི་རྣམ་གཞག་ལ་འགལ་འདུ་ཡོད་པར་རང་གིས་ཁས་བླངས་ནས། དོན་དམ་དཔྱོད་པའི་ཚད་མས་ཀུན་རྫོབ་འགོག་པར་སྨྲ་བ་སུ་ཡང་མེད་དོ། །ཞེས་གསུངས་པའི་ཕྱིར་དང། ཀུན་གཞི་གཉིས་པོ་དེ་ཆོས་ཉིད་རྣམ་འབྱེད་ལས། གང་ཞིག་ཤེས་ནས་འགའ་ཞིག་སྤང་ཕྱིར་དང། །གཞན་གང་ཞིག་ནི་མངོན་སུམ་ཉིད་བྱ་བ། ཞེས་སོ་སོར་འབྱེད་རྒྱུའི་ཆོས་དང་ཆོས་ཉིད་ཀྱི་གཙོ་བོར་ཁྱོད་ཀྱིས་བཞག་པའི་ཕྱིར། གོང་དུ་འདོད་
ན། རྒྱུད་བླ་རྩ་འགྲེལ་ནས་བཤད་པ་ལྟར་གྱི་དེ་བཞིན་གཤེགས་པའི་སྙིང་པོ་དེ་ལུགས་འདིར་ཁས་ལེན་པར་ཐལ། དེ་དོན་དམ་བདེན་པར་འདོད་པའི་ཕྱིར། འདོད་ན། རྒྱུ་མཚན་གསུམ་གྱི་སྒོ་ནས་བདེ་གཤེགས་སྙིང་པོས་སེམས་ཅན་ཐམས་ཅད་ལ་ཁྱབ་པར་འདོད་པར་ཐལ། རྒྱུད་བླའི་འགྲེལ་པར། རྫོགས་སངས་སྐུ་ནི་འཕྲོ་ཕྱིར། ཞེས་སོགས་དང། ཆོས་མངོན་པའི་ལུང་སྔར་དྲངས་པ་གཉིས་དོན་གཅིག་ཏུ་བཤད་པའི་ཕྱིར། འདོད་མི་ནུས་ཏེ། སྐབས་འདིར་མཐར་ཐུག་ཐེག་པ་གསུམ་དུ་གྲུབ་པའི་ཕྱིར། གཞན་ཡང། སེམས་ཅན་གྱི་སེམས་ཀྱི་ཆོས་ཉིད་ལ་རིགས་སུ་འཇོག་པར་ཐལ། རྒྱུད་བླ་མ་ལས། མ་དག་མ་དག་དག་པ་དང། །ཞེས་སོགས་དང། དཀོན་བརྩེགས་ལས། རིགས་དེ་ནི་ཐམས་ཅད་ཀྱི་ཚེ་ཆོས་ཀྱི་དེ་བཞིན་ཉིད་ཡིན་པས་ཆོས་ཀྱི་རོ་གཅིག་ཏུ་གྱུར་པ་ཉིད་ཀྱིས་རྟག་པའོ། །ཞེས་སོགས་ཀྱིས་ཆོས་ཉིད་ལ་ཁམས་དང་བདེ་གཤེགས་སྙིང་པོར་བཤད་ཅིང་ཁྱོད་ཀྱིས་ཀྱང་དེ་དོན་དམ་བདེན་པར་འདོད་པའི་རྩ་བ་དེ་ལ་ཐུག་པའི་ཕྱིར། འདོད་མི་ནུས་ཏེ། བྱང་ས་ལས། རང་བཞིན་གྱི་གནས་པའི་རིགས་ནི་བྱང་ཆུབ་སེམས་དཔའ་རྣམས་ཀྱི་སྐྱེ་མཆེད་དྲུག་གི་ཁྱད་པར་གང་ཡིན་པ་སྟེ། ཞེས་པ་ནས། རིགས་དེ་ནི་ས་བོན་ཞེས་ཀྱང་བྱ། ཞེས་དང། ཉན་ས་ལས། དེ་ནི་ལུས་ལས་ཁྱད་པར་དུ་གྱུར་པ་དང། སྐྱེ་མཆེད་དྲུག་གིས་ཟིན་པ། ཞེས་སོགས་ཀྱིས་ཁྱད་ཆོས་བཞི་ཚང་བའི་སེམས་སྟེང་གི་ས་བོན་ཞིག་ཏུ་བཤད་པའི་ཕྱིར་དང། ཉི་སྣང་ལས། དེ་དག་གི་རང་བཞིན་དུ་གནས་པའི་རིགས་ལ་རང་བཞིན་དུ་གནས་པའི་དོན་བརྗོད་དགོས་སོ། །ཞེས་
སོགས་ཀྱིས་སེམས་ཙམ་པ་དང་རྩོད་ཚུལ་ཡོད་པའི་ཕྱིར། མདོ་དང་འཕགས་པའི་བཤད་ཚུལ་དེའང་ཁྱོད་ཀྱི་ཤེས་བྱེད་དུ་མི་རུང་བར་ཐལ། མདོ་ལས། བདེན་གྲུབ་དང་བདེན་མེད་གཉིས་ཀར་བཤད་པ་ཡོད་ཀྱང་གདུལ་བྱ་སོ་སོའི་དབང་དུ་བྱས་པ་ཡིན་ལ། འཕགས་པའི་གསུངས་ཚུལ་ཡང་སྐབས་སོ་སོ་ལ་མ་འདྲེས་པར་སྦྱོར་དགོས་པའི་ཕྱིར། ཕྱི་མ་དེར་ཐལ། དེར་རྒྱུད་བླའི་འགྲེལ་པར་དེ་བཞིན་གཤེགས་པའི་སྙིང་པོ་བཤད་ཀྱང། ཀུན་གཞི་ཟུར་ཙམ་ཡང་མ་བཤད། ཐེག་བསྡུས་སུ་དེ་བཞིན་གཤེགས་པའི་སྙིང་པོ་མ་བཤད་པར་ཀུན་གཞི་ལ་བཤད་པ་མ་གཏོགས་ཕྱོགས་གཅིག་ཏུ་བསྡེབས་ནས་ལུགས་གཅིག་ལ་མ་སྦྱར་བའི་ཕྱིར། དེར་མ་ཟད་གདུལ་བྱའི་སྐལ་བ་བཞིན་དུ་སོ་སོར་སྟོན་དགོས་པ་ཡང་རང་ཚིག་དང་འགལ་ཏེ། དེ་བཞིན་གཤེགས་པའི་སྙིང་པོ་དོན་དམ་དུ་བཤད་པའི་དོན་དམ་ཡང་སེམས་ཙམ་པའི་རང་ལུགས་ཀྱི་དོན་དམ་ལ་བྱེད་དགོས་པས་དེ་དག་ཀུན་གཞི་གཉིས་སྟོན་ཡུལ་གྱི་གདུལ་བྱ་ལ་ཁྱད་པར་ཅུང་ཟད་ཀྱང་མེད་པའི་ཕྱིར། གཞན་ཡང་དེ་དོན་དམ་ཡང་ཡིན་ལ་ཡེ་ཤེས་ཀྱང་ཡིན་པར་སྨྲ་བ་ནི་འཐད་ལྡན་སོགས་ཀྱི་ཚིག་ཟིན་འགའ་ཞིག་ལ་བརྟེན་ནས་སེམས་ཙམ་པའི་ཆོས་ཉིད་སེམས་སུ་འདོད་ཅེས་སྨྲ་མཁན་མང་དུ་བྱུང་བའི་ཤན་དང། ཁྱད་པར་དུ་ཇོ་ནང་པའི་ངེས་དོན་རྒྱ་མཚོ་ལས་དག་པ་ཡེ་ཤེས་ཀྱི་ཀུན་གཞི་འཁོར་བའི་ཆོས་ཐམས་ཅད་ཀྱིས་སྟོང་པའི་གཞན་སྟོང་རྟག་བརྟན་གཡུང་དྲུང་ཐེར་ཟུག་དང། ཞེས་པ་དེ་ཉིད་ཀྱི་དྲི་བྲོ་བར་སྣང་ཡང་ལེགས་བཤད་སྙིང་པོའི་མཆན་འགྲེལ་
དང། བདེན་བཞིའི་རྣམ་བཤད་དུ་དགག་ཟིན་པས་མ་སྤྲོས་ལ། ལུགས་འདིར་ཡང་ཆོས་ཉིད་ལ་དགག་བྱ་བཅད་ཙམ་གྱི་མེད་དགག་དགོས་པ་ནི། དགོངས་འགྲེལ་ལས། ངོ་བོ་ཉིད་དེ་ཁོ་ནས་ངོ་བོ་ཉིད་མ་མཆིས་པ་ཉིད་ཆོས་ལ་བདག་མ་མཆིས་པ་ཞེས་དང། ཐེག་བསྡུས་ལས། ཡོངས་སུ་གྲུབ་པའི་མཚན་ཉིད་གང་ཞེ་ན། གང་གཞན་གྱི་དབང་གི་མཚན་ཉིད་ལ་དོན་གྱི་མཚན་ཉིད་དེ་གཏན་མེད་པ་ཉིད་དོ། །ཞེས་སོགས་དུ་མས་འགྲུབ་བོ། །ཡང་ཁ་ཅིག །ཀུན་གཞིའི་ངོ་བོ་རྟོག་པར་འདོད་ཟེར་ན་མི་འཐད་པར་ཐལ། དེ་རྟོག་མེད་ཀྱི་བློ་ཡིན་པའི་ཕྱིར། དེར་ཐལ། གསལ་སྣང་ཅན་གྱི་བློ་ཡིན་པའི་ཕྱིར། དེར་ཐལ། རང་ཡུལ་གསལ་བར་སྣང་ཡང་དེ་ལ་ངེས་པ་འདྲེན་མི་ནུས་པའི་སྣང་ལ་མ་ངེས་ཀྱི་བློ་ཡིན་པའི་ཕྱིར། སུམ་ཅུ་པ་ལས། རྣམ་པར་རིག་པ་མི་རིག་པ། །ཞེས་དང། དཀའ་འགྲེལ་ལས། སྣོད་བཅུད་དེ་དག་སྣང་ཡང་རང་གིས་ཀྱང་མི་ངེས་ལ་རྗེས་སུ་ངེས་པ་ཡང་འདྲེན་མི་ནུས་པ། ཞེས་གསུངས་པའི་ཕྱིར། དེ་ལ་ཁོ་ན་རེ། ཀུན་གཞི་ལ་ཡུལ་གསལ་བར་སྣང་བ་མི་འཐད་པར་ཐལ། དེ་ཡུལ་འཆར་ཚུལ་རྟོག་པ་ལས་ཀྱང་མི་གསལ་བ་ཞིག་ཡིན་པའི་ཕྱིར། སྡེ་བདུན་ཡིད་ཀྱི་མུན་སེལ་ལས། རྣམ་པ་ཤིན་ཏུ་མི་གསལ་བ་ཐ་ན་ཡིད་ཤེས་རྟོག་བཅས་ལས་ཀྱང་མི་གསལ་བར་འདོད་དགོས་པའི་ཕྱིར་རོ། །ཞེས་གསུངས་པའི་ཕྱིར་ན་མ་ཁྱབ་སྟེ། དེ་ཀུན་གཞི་ལ་ཡུལ་གསལ་བར་མི་སྣང་བའི་དོན་མིན་གྱི་དེ་རང་ཉིད་ངོ་བོ་ཕྲ་བའི་དབང་གིས་གཞན་ལ་འཆར་དཀའ་བའི་དོན་ཡིན་པའི་ཕྱིར། རྟོག་གེ་འབར་བ་ལས། འདིའི་ཞེའམ། འདི་ནའོ། །ཞེས་
འཇིག་རྟེན་པའི་མཁས་པ་རྣམས་ཀྱི་ཡུལ་ཡང་མ་ཡིན་པས་རྣམ་པ་ཡང་དག་པར་མི་རིག་པའོ། །ཞེས་སེམས་ཙམ་གྱི་འདོད་པ་བརྗོད་པའི་ཐད་དུ་གསུངས་པའི་ཕྱིར། བྱས་པ་ལ་ཁོ་ན་རེ། དེ་མ་འབྲེལ་བར་ཐལ། དེ་ལྟ་ན་ཡིད་ཤེས་རྟོག་པ་ལས་ཀྱང་ཟེར་དོན་མེད་པའི་ཕྱིར་ཟེར་ན། སྐྱོན་མེད་དེ། དབང་པོའི་མངོན་སུམ་ལས་ཡིད་ཤེས་རྟོག་པ་འཆར་དཀའ་ཞིང། འདི་དེ་ལས་ཀྱང་འཆར་དཀའ་བའི་ཕྱིར། དེས་ན་ཁ་ཅིག །མི་རིག་པ་ཞེས་པའི་དོན་དེས་རང་ཡུལ་ངེས་མི་ནུས་པ་ཁོ་ནར་འཆད་པ་མི་འཐད་པར་ཐལ། དེའི་དོན་ཀུན་གཞིས་ཕར་རང་ཡུལ་ངེས་མི་ནུས་པ་དང། ཀུན་གཞི་རང་ཉིད་ཚུར་གཞན་གྱིས་ངེས་དཀའ་བ་གཉིས་ཀ་ལ་བཤད་དགོས་པའི་ཕྱིར་ཏེ། སུམ་ཅུ་པའི་འགྲེལ་པ་ལས། དེ་ནི་འདི་ལ་འདིའོ་ཞེས་ཚོར་བའི་རྣམ་པར་མི་རིག་པས་དེའི་ཕྱིར་དེ་ནི་ལེན་པ་མི་རིག་པ་ཞེས་བྱའོ། །ཞེས་དང། དེ་ལ་འདིའོ་ཞེས་རིག་པར་མི་ནུས་པས་དེའི་ཕྱིར་མི་རིག་པ་ཞེས་བྱའོ། །ཞེས་བཤད་ཚུལ་གཉིས་བཀོད་པ་ལྟར་དུལ་ལྷའི་འགྲེལ་བཤད་དུ་ཡང་གསུངས་པའི་ཕྱིར། ཁ་ཅིག་ན་རེ། དབང་དོན་བག་ཆགས་གསུམ་ག་ཀུན་གཞི་ལ་གསལ་བར་སྣང་ཟེར་ན། དབང་དོན་གཉིས་སྣང་ཡང་བག་ཆགས་དེ་ལ་མི་སྣང་བར་ཐལ། བག་ཆགས་དེའི་དམིགས་པར་བཤད་པ་ནི་བག་ཆགས་ཀྱི་དབང་གིས་ཡུལ་སྣང་བ་ཙམ་ལ་དགོངས་པ་ཡིན་པའི་ཕྱིར། དེར་ཐལ། དཀའ་འགྲེལ་ལས། ས་བོན་དེ་སྣང་ནས་ཡུལ་དུ་མི་འགྱུར་ཡང་དེའི་དབང་གིས། ཞེས་སོགས་གསུངས་པའི་ཕྱིར། བྱས་པ་ལ་ཁོ་ན་རེ། འོ་ན་གཟུགས་མེད་ཀྱི་ཀུན་གཞིའི་སྣང་ཡུལ་
མེད་པར་ཐལ། དེར་གྱུར་བའི་དབང་དོན་གཉིས་མེད། བག་ཆགས་ཀྱང་མེད་པའི་ཕྱིར། རྟགས་ཕྱི་མ་ཁས། དང་པོ་གྲུབ་སྟེ། ཁམས་དང་ས་དེའི་དབང་དོན་གཉིས་མེད་ལ། ས་གཞན་གྱི་དེ་ཡུལ་དུ་མི་བྱེད་པའི་ཕྱིར། འདོད་མི་ནུས་ཏེ། སྣང་ཡུལ་ཤེས་པ་ཀུན་ལ་ཡོད། །ཞེན་ཡུལ་རྟོག་པའི་སྒེར་ཆོས་ཡིན། །ཞེས་བཤད་པའི་ཕྱིར་ཟེར། དེ་ལ་ཁ་ཅིག་ན་རེ། དེ་རིགས་པའི་རྗེས་འབྲང་གི་བཤད་ཚུལ་ཡིན་ལ། སྐབས་འདིར་ཤེས་པ་ཡིན་ན་རང་གི་སྣང་ཡུལ་ཡོད་མི་དགོས་པར་ཐལ། དཀའ་འགྲེལ་དུ། ཐེག་བསྡུས་ལས། འདས་སོགས་དེ་བཞིན་རྨི་ལམ་དང། །གཟུགས་བརྙན་རྣམ་པ་གཉིས་པོ་ཡང། །དམིགས་པ་ཡོད་པ་མ་ཡིན་པས། །དེ་ལ་དམིགས་པ་རུང་ཕྱིར་རོ། །ཞེས་གསུངས་པ་ལྟར། ཤེས་པ་ཐམས་ཅད་དམིགས་པ་ཡོད་པ་ལ་ལྟོས་མི་དགོས་ཀྱི། ཞེས་པ་ནས། ལས་ཀྱི་སྟོབས་ཀྱིས་འཇུག་གིས་སྣང་བའི་དམིགས་པ་ནི་ཡོད་པ་མ་ཡིན་ནོ་ཞེས་གསུངས་པའི་ཕྱིར་ན་མ་ཁྱབ་སྟེ། དེའི་དོན་ཤེས་པའི་དམིགས་པ་ལ་ཕྱི་རོལ་གྱི་དངོས་པོ་ཞིག་ཡོད་མི་དགོས་ཞེས་པའི་དོན་ཡིན་པའི་ཕྱིར་ཏེ། དེ་ལྟ་མ་ཡིན་ན་དེའི་མཐུན་དཔེར་བཀོད་པའི་རྨི་ལམ་གྱི་ཤེས་པ་སོགས་ལའང་སྣང་ཡུལ་མེད་པར་ཐལ་བའི་སྐྱོན་འབྱུང་བའི་ཕྱིར་དང། ཡུལ་བཞི་གང་ཡང་མེད་ན་ཡུལ་རིག་པ་བློའི་མཚན་ཉིད་ཡིན་པས་ཤེས་པར་མི་རུང་ཞིང་ཡུལ་ཅན་ཙམ་ཡང་མ་ཡིན་པར་འགྱུར་བའི་ཕྱིར། གཞན་ཡང་དེ་མི་འཐད་པར་ཐལ། དེ་ལ་སྣང་རྒྱུའི་དམིགས་པ་ཞིག་ཡོད་ཀྱང་དབང་དོན་བག་ཆགས་གསུམ་གང་རུང་སྣང་མི་དགོས་པའི་ཕྱིར། དང་པོ་གྲུབ་སྟེ། སུམ་ཅུ་བའི་འགྲེལ་པ་ལས། དམིགས་པ་
མེད་པ་དང། རྣམ་པ་མེད་པའི་རྣམ་པར་ཤེས་པ་ནི་མི་རུང་ངོ༌། །ཞེས་དང། དུལ་ལྷའི་འགྲེལ་བཤད་ལས། ཀུན་གཞིའི་རྣམ་པར་ཤེས་པ་དམིགས་པ་དང། རྣམ་པ་མེད་པ་ནི་ཁོ་བོ་ཡང་མི་འདོད་མོད་ཀྱི། ཞེས་གསུངས་པའི་ཕྱིར། གཉིས་པ་གྲུབ་སྟེ། གཟུགས་མེད་པའི་མིང་གཞིའི་ཕུང་པོ་དེ་ཀུན་གཞིའི་དམིགས་པར་འཇོག་པའི་ཕྱིར། དེར་ཐལ། དེ་ནི་ལེན་པ་དག་དང་གནས། །རྣམ་པར་རིག་པ། ཞེས་ཀུན་གཞིའི་དམིགས་པ་ལ་ནང་གི་ཉེ་བར་ལེན་པ་དང། ཕྱི་སྣོད་ཀྱི་གནས་གཉིས་སུ་ཕྱེ་སྟེ། སྔ་མ་ལ་བག་ཆགས་དབང་པོ་མིང་གསུམ་བཞག་པའི་ཕྱིར། སུམ་ཅུ་པའི་འགྲེལ་པ་ལས། བག་ཆགས་དང། གནས་དང་བཅས་པའི་དབང་པོའི་གཟུགས་དང་མིང་སྟེ། དེའི་དམིགས་པ་ཤིན་ཏུ་ཕྲ་བའི་ཕྱིར་རོ། །ཞེས་གསུངས་པའི་ཕྱིར། ཁྱབ་སྟེ། དེའི་མིང་ཞེས་པ་གཟུགས་མེད་ལ་སྦྱར་དགོས་པའི་ཕྱིར། དེ་ཉིད་ལས། གཟུགས་མེད་པའི་ཁམས་ན་ནི། གཟུགས་སུ་རྣམ་པར་སྨིན་པ་མངོན་པར་མི་འགྲུབ་པས་མིང་གཞི་ལེན་པ་ཉིད་དེ། ཞེས་གསུངས་པའི་ཕྱིར། གཞན་ཡང། དེ་ལྟར་འཐད་པར་ཐལ། ལུས་དང་དབང་པོ་སོགས་དམིགས་པར་འཇོག་པའི་དོན་ཡང། དེ་དག་བླང་བྱའི་ཕུང་པོ་དང། ཀུན་གཞི་ལེན་པ་པོའི་གང་ཟག་ཡིན་པའི་རྒྱུ་མཚན་གྱིས་ཡིན་ལ། དེ་འདིར་ཡང་མཚུངས་པའི་ཕྱིར་དང། དམྱལ་བའི་སྡུག་བསྔལ་སོགས་ཀུན་གཞིས་དངོས་སུ་མ་མྱོང་ཡང་དེ་མྱོང་བྱེད་ཀྱི་ཚོར་བ་དེ་ཀུན་གཞི་ལ་སྣང་བའི་སྒོ་ནས་ཀུན་གཞི་རྣམ་སྨིན་མྱོང་བ་པོར་བཤད་པའི་ཕྱིར། འདི་ལ་ཐལ་འགྱུར་བས་གཞལ་ན།
ལེན་པོར་རང་ཉེར་ལེན་གཅིག་རིགས་དངོས་མིན། །ཞེས་པའི་འགལ་བ་བརྗོད་ཚུལ་ཞིག་བྱུང་ཡང་སྐབས་མིན་པས་མ་སྤྲོས། ཡང་ཁ་ཅིག་ན་རེ། དམྱལ་བའི་ཀུན་གཞིས་སྡུག་བསྔལ་མྱོང་བར་ཐལ། དེ་བདེ་སྡུག་སོགས་རྣམ་སྨིན་མྱོང་བ་པོ་ཡིན་པའི་ཕྱིར། དེར་ཐལ། དེ་རྣམ་སྨིན་མྱོང་བ་པོའི་ང་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། རྣམ་སྨིན་མྱོང་བ་པོའི་མཚན་གཞིའི་ང་ཡིན་པའི་ཕྱིར། དེར་ཐལ། དེ་འདྲའི་རྣམ་སྨིན་མྱོང་བ་པོ་དེའི་བཏགས་དོན་བཙལ་ན་རྙེད་པའི་ཕྱིར། དེ་རང་ངོས་ནས་གྲུབ་པའི་ཕྱིར། ཁྱོད་རང་ལ། རྒྱལ་པོ་མ་སྐྱེས་དགྲའི་རྒྱུད་ཀྱི་ཀུན་གཞི་དེ་རང་གི་ཕ་གསོད་པ་པོ་ཡིན་པར་ཐལ། དེ་ཕ་གསོད་པ་པོའི་རྒྱལ་པོ་མ་སྐྱེས་དགྲའི་མཚན་གཞིའི་ང་ཡིན་པའི་ཕྱིར། ཁྱབ་པ་འགྲིག །གོང་དུ་འདོད་ན། དམྱལ་བའི་ཀུན་གཞི་ཆོས་ཅན། རང་གྲོགས་ཚོར་བའི་སྒོ་ནས་སྡུག་བསྔལ་མྱོང་བར་ཐལ། སྡུག་བསྔལ་མྱོང་བའི་སེམས་ཡིན་པའི་ཕྱིར། ཁྱབ་སྟེ། དབུས་མཐའ་ལས། དེ་ལ་དོན་མཐོང་རྣམ་པར་ཤེས། །དེ་ཡི་ཁྱད་པར་སེམས་ལས་བྱུང། །ཞེས་གསུངས་པའི་ཕྱིར། འདོད་ན། དེ་ཆོས་ཅན། ཁྱོད་དང་མཚུངས་ལྡན་གྱི་སྡུག་བསྔལ་མྱོང་བའི་ཚོར་བ་ཡོད་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། ཚོར་བ་སྡུག་བསྔལ་ཡིན་པར་ཐལ། གདུང་བ་ཉམས་སུ་མྱོང་བའི་ཚོར་བ་ཡིན་པའི་ཕྱིར། ཁྱབ་སྟེ། དེ་དེའི་མཚན་ཉིད་ཡིན་པའི་ཕྱིར། འདོད་མི་ནུས་ཏེ། ཚོར་བ་བཏང་སྙོམས་ཡིན་པའི་ཕྱིར། ཀུན་གཞིའི་འཁོར་གྱི་ཚོར་བ་ཡིན་པའི་ཕྱིར། ཁྱབ་སྟེ། རྩ་བར། ཚོར་བ་ནི། བར་མའོ། །ཞེས་གསུངས་པའི་ཕྱིར། བྱས་པ་ལ་ཁོ་ན་རེ།
ཀུན་གཞིའི་འཁོར་གྱི་ཚོར་བས་སྡུག་བསྔལ་མྱོང་བ་ཡོད་པར་ཐལ། ཚོར་བ་དེ་ལ་སྡུག་བསྔལ་སྣང་བ་ཡོད་པའི་ཕྱིར། ཁྱབ་སྟེ། ཚོར་བ་ལ་སྣང་བ་དེ་ཚོར་བས་མྱོང་བའི་དོན་ཡིན་པའི་ཕྱིར་ཟེར་ན། སངས་འཕགས་ཀྱི་རྒྱུད་ཀྱི་ཚོར་བ་ཡིན་ན། འཁོར་བའི་སྡུག་བསྔལ་ཐམས་ཅད་ཅིག་ཅར་དུ་མྱོང་བས་ཁྱབ་པར་ཐལ། དེ་ཡིན་ན་བདེ་སྡུག་བཏང་སྙོམས་ཐམས་ཅད་སྣང་བས་ཁྱབ་པའི་ཕྱིར། འཁོར་གསུམ། གཞན་ཡང་ཚོར་བས་མྱོང་བ་དང། ཚོར་བ་དེ་ལ་སྣང་བ་གཉིས་གཏན་མི་འདྲ་བར་ཐལ། བསམ་གཏན་དང་པོའི་དངོས་གཞི་ཙམ་པོ་བས་སེམས་རྟེན་བྱས་པའི་བར་ཆད་མེད་ལམ་དང་མཚུངས་ལྡན་གྱི་ཚོར་བ་དེས་མྱོང་བ་དང། དེ་ལ་སྣང་བ་གཉིས་འགལ་བའི་ཕྱིར། དེར་ཐལ། དེ་བདེ་བའི་ངོ་བོར་སྐྱེས་པས་བདེ་བ་མྱོང་བར་འཇོག་ཀྱང་བདེ་བ་ཀུན་རྫོབ་ཡིན་པས་དེའི་སྣང་ཡུལ་དུ་མི་རུང། ཆོས་ཉིད་དེའི་སྣང་ཡུལ་ཡིན་ཀྱང་ཆོས་ཉིད་མྱོང་བའི་ཐ་སྙད་མེད་པའི་ཕྱིར། རྟགས་ཟུར་དང་པོ་གྲུབ་སྟེ། བདེ་བ་མྱོང་ཞེས་པའི་བདེ་བ་ཡང་ཚོར་བ་རང་ཉིད་ཡིན་གྱི་ཕྱིའི་ཆོས་མ་ཡིན་པའི་ཕྱིར། རྟགས་ཟུར་ཕྱི་མ་གྲུབ་སྟེ། བར་ཆད་མེད་ལམ་ཡིན་པའི་ཕྱིར། དེར་ཐལ། བར་ཆད་མེད་ལམ་པའི་རྒྱུད་ཀྱི་འཇུག་ཤེས་མངོན་གྱུར་པ་ཡིན་པའི་ཕྱིར་དང། དེས་ཆོས་ཉིད་མྱོང་ན་ཟག་བཅས་སྡུག་བསྔལ་དུ་རྟོགས་པའི་དངོས་གཞི་ཙམ་པོ་བ་དེས་སིམ་གདུང་གཉིས་ཀ་མྱོང་བའི་སྐྱོན་འཇུག་པའི་ཕྱིར། བྱས་པ་ལ་ཁོ་ན་རེ། ཚོར་བའི་མྱོང་བྱ་དེ་དེའི་ཡུལ་ལ་བྱེད་པར་ཐལ། སྤྱོད་འཇུག་ལས། གཞན་མྱོང་བ་དང་འབྲེལ་བ་
ལས། །ཞེས་སྔོ་འཛིན་གྱིས་སྔོན་པོ་མྱོང་བར་བཤད་ཅིང། རང་ཡུལ་རང་སྟོབས་ཀྱིས་མྱོང་བའི་སེམས་བྱུང་མྱོང་བ་དེ། ཚོར་བའི་མཚན་ཉིད་དུ་བཤད་པའི་ཕྱིར་ཟེར་ན། སྔ་མ་ནི་རང་མྱོང་གཞན་མྱོང་དཔྱད་པའི་ཟླས་དྲངས་ཏེ་ཤར་བ་ཙམ་ལ་མྱོང་བར་བཏགས་པ་ཡིན་ཞིང། ཕྱི་མ་ཡང་སིམ་གདུང་བར་མ་ཅི་རིགས་རང་སྟོབས་ཀྱིས་མྱོང་བའི་དོན་ཡིན་ཏེ། སྤྱིའི་མཚན་ཉིད་དེ་ལྟར་འཇོག་ན། བྱེ་བྲག་ཚོར་བ་བདེ་བའི་མཚན་ཉིད་ལ་ཡང་རང་ཡུལ་སིམ་པ་རང་སྟོབས་ཀྱིས་མྱོང་བ་ཞེས་བཤད་དགོས་པ་གང་ཞིག །ལུས་ཚོར་བདེ་བའི་ཡུལ་དུ་གྱུར་པའི་སིམ་པ་གཞི་མ་གྲུབ་པའི་ཕྱིར། ཡང་ཁོ་ན་རེ། སྤྱིར་ཚོར་བ་དེ་ལ་སྣང་ན་དེས་མྱོང་བས་མ་ཁྱབ་ཀྱང། ཀུན་གཞིའི་འཁོར་གྱི་ཚོར་བ་ལ་ཁྱབ་པར་ཐལ། དཀའ་འགྲེལ་ལས། འདོད་ན། དེ་དག་ལ་སྡུག་བསྔལ་གྱིས་གདུང་བ་ཡོད་པར་འགྱུར་ཏེ། དེ་དག་གི་ཀུན་གཞིའི་སྟེང་གི་དམྱལ་སྣང་མཚན་ཉིད་པ་སྣང་བའི་ས་བོན་སད་པའི་ཕྱིར་རོ། །ཞེས་གསུངས་པའི་ཕྱིར། ཁྱབ་སྟེ། ཀུན་གཞིའི་སྣང་ཚུལ་འདི་ལ་མངོན་པ་བ་ཁ་ཅིག །བསམ་གཏན་བཞི་པ་མན་ཆད་ཀྱི་སྣོད་བཅུད་ཐམས་ཅད་སྣང་ཟེར། ཁ་ཅིག །བསམ་གཏན་བཞི་པ་ནི་བསྐལ་པ་ཆགས་འཇིག་སོགས་ཀྱི་ཁོངས་སུ་མི་གཏོགས་པར་ཐུན་མོང་མ་ཡིན་པའི་ལས་ཀྱི་བདག་འབྲས་ཡིན་པས་གསུམ་པ་མན་ཆད་སྣང་ཟེར། ལ་ལས་སྣོད་བཅུད་ཐམས་ཅད་སྣང་ཞེས་འདོད་ཅིང་དེ་ལ་ནང་གསེས་ཀྱིས་ཕྱེ་ན་བལ་པོ་ཛ་ཧུ་སོགས་མིའི་ཀུན་གཞི་ལ་འཇིག་རྟེན་ཐམས་ཅད་མིའི་འཇིག་རྟེན་ལྟ་བུར་སྣང་ཟེར་བ་རྣམ་པ་གཅིག་ཏུ་སྣང་བའི་ལུགས་དང། མིའི་
ཀུན་གཞི་ལ་ཡང་རིགས་དྲུག་གི་སྣོད་བཅུད་རིགས་དྲུག་སོ་སོ་ལ་འཆར་ཚུལ་ལྟར་དུ་སྣང་ཟེར་བ་རྣམ་པ་ཁྲ་བོར་སྣང་བའི་ལུགས་སོགས་ཡོད་ཀྱང། སྐབས་འདིར་དེ་དག་བཀག་ནས་མིའི་ཀུན་གཞི་ལ་མིའི་སྣོད་བཅུད་ཁོ་ན་སྣང་བར་བསྒྲུབ་པའི་རྒྱུ་མཚན་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། ཀུན་གཞིའི་དམིགས་པ་ལ། དེའི་སྟེང་གི་ལས་ཀྱི་བག་ཆགས་སྨིན་པ་ལས་བྱུང་བའི་ཕྱི་རོལ་གྱི་ལོངས་སྤྱད་བྱའི་ཆ་དང། དེ་ལ་ལོངས་སྤྱོད་བྱེད་ནང་ལེན་པའི་ཆ་གཉིས་སུ་ངེས་ཀྱི་ཀུན་གཞི་རང་ཉིད་ཀྱི་སྟེང་གི་བག་ཆགས་སྨིན་པའི་མདངས་ཕར་འཕྲོས་པ་མ་ཡིན་པའི་སྣོད་སེམས་ཅན་གཞན་གྱི་ལས་ལས་གྲུབ་པ་ཞིག་དེའི་དམིགས་པར་འོང་དོན་མེད་པའི་ཕྱིར། རྣམ་པར་གཏན་ལ་དབབ་པ་བསྡུ་བ་ལས། མར་མེ་འབར་བ་ནི་སྙིང་པོ་དང་སྣུམ་གྱི་རྒྱུས་ནི་ནང་དུ་འཇུག་པར་འགྱུར་ལ་ཕྱི་རོལ་ཏུ་ནི་འོད་འབྱུང་བར་བྱེད་པ་དེ་བཞིན་དུ། ནང་གི་ལེན་པའི་དམིགས་པ་དང་ཕྱི་རོལ་གྱི་དམིགས་པའི་ཚུལ་འདི་ལ་ཡང་ཀུན་གཞིའི་རྣམ་པར་ཤེས་པའི་ཚུལ་འདི་དང་འདྲ་བར་བལྟ་བར་བྱའོ། །ཞེས་གསུངས་པའི་ཕྱིར། ཁྱབ་སྟེ། མར་མེའི་འོད་མར་མེ་ལས་འབྱུང་བ་ལྟར་ཀུན་གཞིའི་དམིགས་པའི་ཕྱི་རོལ་གྱི་དངོས་པོ་དེ་ལ་ཡང། ཀུན་གཞི་དེ་ཉིད་ཀྱི་རང་མདངས་ཕར་འཕྲོས་པ་ཞིག་དགོས་པར་བཤད་པའི་ཕྱིར། དེ་ལ་ཁོ་ན་རེ། བལྟ་བྱ་ཐུན་མོང་བའི་དངོས་པོ་གཅིག་མེད་པར་ཐལ། ལྷས་སྦྱིན་གྱི་ཀུན་གཞི་ལ་སྣང་ན་མཆོད་སྦྱིན་གྱི་ཀུན་གཞི་ལ་མི་སྣང་བས་ཁྱབ་པའི་ཕྱིར། དེར་ཐལ། དེ་ཡིན་ན་མཆོད་སྦྱིན་
གྱི་ལས་ཀྱི་བདག་འབྲས་མ་ཡིན་དགོས་པའི་ཕྱིར། དེར་ཐལ། ལྷས་སྦྱིན་གྱི་ལས་ཀྱི་བདག་འབྲས་ཡིན་པའི་ཕྱིར་ན། མ་ཁྱབ་སྟེ། དེ་གཉིས་ཀའི་གཞི་མཐུན་ཡོད་པའི་ཕྱིར། དེར་ཐལ། རྣམ་སྨིན་གྱི་འབྲས་བུ་ཐུན་མོང་བ་མེད་ཀྱང་བདག་འབྲས་ཐུན་མོང་བ་ཡོད་པའི་ཕྱིར་ཏེ། སྣོད་ཀྱི་འཇིག་རྟེན་གཅིག་ལ་དུ་མས་ཐུན་མོང་དུ་ལོངས་སྤྱོད་པ་ཡོད་པའི་ཕྱིར། ཁྱབ་སྟེ། དེའི་རྒྱུ་རེ་རེ་ནས་སུས་ཀྱང་མ་བསགས་ན་རྒྱུ་མེད་དུ་འགྱུར་བའི་ཕྱིར། བྱས་པ་ལ་ཁོ་ན་རེ། བལྟ་བྱ་ཐུན་མོང་བ་མེད་པར་ཐལ། དེ་ཁོ་ན་ཤེས་པའི་བདག་ཉིད་དུ་མ་གྲུབ་དགོས་པའི་ཕྱིར། དཀའ་འགྲེལ་ལས། དེའི་ཚེ་ནི་ཐུན་མོང་བ་ཁས་མི་ལེན་ལ་མ་བརྟགས་མ་དཔྱད་པའི་དོན་གཟུང་ཆ་ཐུན་མོང་བ་འདོད་ཀྱང་ཤེས་པའི་བདག་ཉིད་དུ་མི་འདོད་དེ་ཞེས་གསུངས་པའི་ཕྱིར་ན་མ་ཁྱབ་སྟེ། དེ་ནི་གྲུབ་མཐའ་ཀུན་ཤེས་ལས། འདི་དག་རྟོག་ངོར་ཕྱི་རོལ་དོན་ཡང་ཡོད། །དོན་ལ་གཞན་རིག་སེམས་དང་སེམས་བྱུང་མེད། །ཅེས་པ་ལྟར་སྔ་རབས་པ་རྣམས་དབུ་སེམས་གང་གི་སྐབས་སུ་ཡང་མ་བརྟགས་མ་དཔྱད་ན་འདི་ཡིན་ལ་བརྟགས་ཤིང་དཔྱད་ན་དེ་ཡིན་ཞེས་ཆ་གཉིས་རེ་འབྱེད་པའི་ཕྱོགས་མཐུན་བྱས་ཙམ་ཡིན་གྱི་བལྟ་བྱ་ཐུན་མོང་ཡོད་ཀྱང་ཕྱི་དོན་ཡོད་མི་དགོས་པར་ཡབ་སྲས་ཀྱི་ཕྱི་རྩོམ་ཐམས་ཅད་དགོངས་པ་མཐུན་ནོ། །ཁ་ཅིག་ན་རེ། ཀུན་གཞི་བཀྲར་འཛིན་གྱིས་དབེན་ཕྱིར། །ཞེས་གསུངས་པ་མི་འཐད་པར་ཐལ། ཀུན་གཞིའི་འཁོར་གྱི་འདུ་ཤེས་དེས་རང་ཡུལ་ལ་སོ་སོར་ཕྱེ་སྟེ་འདི་ནི་འདིའོ། །འདི་ནི་འདི་མ་ཡིན་ནོ་ཞེས་མཚན་མར་ཕྱེ་ནས་འཛིན་པའི་ཕྱིར། འཇུག་པ་ལས། འདུ་ཤེས་
མཚན་མར་འཛིན་པ་སྟེ། །ཞེས་དང། སུམ་ཅུ་པའི་འགྲེལ་པ་ལས། འདུ་ཤེས་ནི་ཡུལ་ལ་མཚན་མར་འཛིན་པའོ། །ཡུལ་ནི་དམིགས་པའོ། །མཚན་མ་ནི་དེའི་བྱེ་བྲག་སྔོན་པོ་དང་སེར་པོ་ལ་སོགས་པ་དམིགས་པ་རྣམ་པར་བཞག་པའི་རྒྱུའོ། །དེ་ལ་འཛིན་པ་ནི་འདི་སྔོན་པོ་ཉིད་ཡིན་གྱི་སེར་པོ་ནི་མ་ཡིན་ནོ། །ཞེས་རྟོག་པའོ། །ཞེས་གསུངས་པའི་ཕྱིར་ན་མ་ཁྱབ་སྟེ། ཀུན་གཞི་ལ་དབང་དོན་སོ་སོར་སྣང་ཙམ་དེ་འདུ་ཤེས་ཀྱི་བྱེད་པར་བསྟན་པ་ཡིན་གྱི་འདི་ནི་འདིའོ་ཞེས་ངེས་པ་དབང་ཤེས་ལའང་མེད་པའི་ཕྱིར། མདོ་ལས། མིག་གི་རྣམ་པར་ཤེས་པས་སྔོན་པོ་ཤེས་ཀྱི་སྔོན་པོའོ་སྙམ་དུ་ནི་མ་ཡིན་ནོ། །ཞེས་དང། མཛོད་ལས། ངེས་རྟོག་མེད་ཕྱིར་ལྟ་མ་ཡིན། །ཞེས་གསུངས་པའི་ཕྱིར། ཁོ་ན་རེ། དེ་ལ་འདི་ནི་འདིའོ་ཞེས་འཆར་བར་ཐལ། གཟུགས་མེད་དང་པོ་གཉིས་ཀྱི་ཀུན་གཞི་ལ་ནམ་མཁའ་མཐའ་ཡས་སོ། །རྣམ་ཤེས་མཐའ་ཡས་སོ། །སྙམ་དུ་འཆར་བ་གང་ཞིག །ཕྱི་མ་གཉིས་ཀྱང་རྒྱུ་ཕྲ་བ་དང་ཤིན་ཏུ་ཕྲ་བའི་དམིགས་པ་ཅན་ཡིན་པའི་ཕྱིར། བསྡུ་བ་ལས། གཟུགས་མེད་པའི་ཁམས་ནམ་མཁའ་མཐའ་ཡས་སྐྱེ་མཆེད་དང་རྣམ་ཤེས་མཐའ་ཡས་སྐྱེ་མཆེད་ན་ནི་རྒྱུ་ཚད་མེད་པའི་དམིགས་པ་ཅན་ནོ། །ཞེས་གསུངས་པའི་ཕྱིར་ན་མ་ཁྱབ་སྟེ། དེ་ཀུན་གཞིའི་འཆར་ཚུལ་མིན་གྱི་ཀུན་གཞིའི་དམིགས་པར་གྱུར་བའི་མིང་གཞིས་བསྡུས་པའི་སྙོམས་འཇུག་གི་ཡུལ་འཆར་ཚུལ་ཡིན་པའི་ཕྱིར། ལུང་འདི་ལ་བརྟེན་ནས་རྗེ་བཙུན་རེད་མདའ་བའི་ཀུན་བཏུས་ཊཱིཀྐར་མིང་གཞིའི་ཕུང་པོ་དམིགས་པར་མ་བཞག་པར་ནམ་མཁའ་མཐའ་
ཡས་སོ། །ཞེས་པ་ལྟ་བུ་དམིགས་པར་གསུངས་ཀྱང། བློ་བརྟན་དང་དུལ་ལྷའི་བཤད་ཚུལ་གོང་དུ་བཀོད་པ་དེ་ཉིད་བསྡུ་བའི་དགོངས་པའང་ཡིན་ཏེ། བསྡུ་བའི་ལུང་དེའི་གོང་གི་མདོར་བསྟན་དུ། དེ་ལ་ཕྱི་རོལ་གྱི་སྣོད་རྣམ་པར་རིག་པ་ནི་ཀུན་གཞིའི་རྣམ་པར་ཤེས་པ་ནི་ལེན་པའི་དམིགས་པ་གང་ཡིན་པ་དེ་ཉིད་ལ་བརྟེན་ནས་འཇིག་རྟེན་དང་སྣོད་ཀྱི་རྒྱུན་རྣམ་པར་རིག་སྟེ། ཞེས་གསུངས་པའི་ཕྱིར། ཁྱབ་སྟེ། ཁམས་གསུམ་ལ་ཆུང་ངུ་དང་ཆེན་པོ་ཚད་མེད་པ་སོགས་ཀྱི་དམིགས་པ་བཤད་པ་དེ་ཕྱིའི་དབང་དུ་བྱས་པའི་དམིགས་པའི་དབྱེ་བ་ཡིན་ལ། དེ་འཆར་ཚུལ་ནང་གི་དམིགས་པ་ལེན་པ་ལ་ཤར་བའི་སྒོས་ཀུན་གཞིའི་དམིགས་པར་འཇོག་པ་ལུང་དེས་ལེན་པའི་དམིགས་པ་གང་ཡིན་པ་དེ་ཉིད་ལ་བརྟེན་ནས་ཞེས་གསལ་བར་གསུངས་པའི་ཕྱིར། ཡང་ཁ་ཅིག་ན་རེ། ཀུན་གཞི་ལ་རང་ཡུལ་ངེས་པ་ཡོད་པར་ཐལ། དེ་ལ་སྟོང་ཉིད་རྟོགས་པ་ཡོད་པའི་ཕྱིར། དེར་ཐལ། འཕགས་རྒྱུད་ཀྱི་ཀུན་གཞི་འཕགས་པ་ཡིན་པའི་ཕྱིར་ཏེ། བདེ་འགྲོ་བའི་རྒྱུད་ཀྱི་ཀུན་གཞི་བདེ་འགྲོ་བ་ཡིན་པའི་ཕྱིར། ཁྱབ་སྟེ། བདེ་འགྲོའི་མཚན་གཞི་ཡིན་པས་བདེ་འགྲོར་འཇོག་ན་སྔ་མ་ལ་ཡང་མཚུངས་པའི་ཕྱིར་ཟེར་ན། ཤིན་ཏུ་མི་མཚུངས་ཏེ། ཤཱ་རིའི་བུ་ལྟ་བུ་ལ་ང་དང་འགྲོ་བ་ཞེས་པ་སྔ་མའི་རྣམ་སྨིན་གྱི་ཕུང་པོ་གྲུབ་པའི་ལྡོག་ཆ་ཙམ་ནས་བཤད་ཅིང་རིགས་མཐུན་གྱི་འགྲོ་བ་ཐམས་ཅད་དང་ཐུན་མོང་དུ་འཇུག་པས་གདགས་གཞིའི་ཆ་ཡིན་ལ་དགེ་སློང་དང་འཕགས་པ་ཞེས་པ་སྡོམ་པ་དང། འཕགས་ལམ་སོགས་ཁྱད་པར་གཞན་ལ་ལྟོས་ནས་བཞག་པའི་བཏགས་ཆོས་ཀྱི་ང་ཡིན་པའི་ཕྱིར། དེར་ཐལ། དེ་དགེ་སློང་སོགས་
སུ་འདོད་ན་དེའི་མཁན་སློབ་ཀྱང་འཇོག་དགོས་ལ་འོན་ཀྱང་དེའི་འགྲོ་བར་འཇོག་དགོས་པ་ནི། ཐེག་བསྡུས་ལས། རྣམ་པར་སྨིན་པའི་རྣམ་པར་ཤེས་པ་མེད་ན། ཞེས་པ་ནས། དེའི་འགྲོ་བ་ལྡོག་པ་ཉིད་དུ་འགྱུར་རོ། །ཞེས་པས་འགྲུབ་བོ། །གཞན་ཡང་ཁྱོད་ལྟར་ན། ལྷར་གྱུར་བའི་བྱང་སེམས་ས་དང་པོ་བའི་མཚན་གཞིར་གྱུར་པའི་ཀུན་གཞི་དེ་ལྷ་ཡིན་པར་ཐལ། དམ་བཅའ་འཐད་པའི་ཕྱིར། འདོད་ན། དེའི་སྤྲུལ་བར་གྱུར་པའི་འཁོར་ལོ་བསྒྱུར་རྒྱལ་གྱི་མཚན་གཞིར་གྱུར་པའི་ཀུན་གཞི་དེ་མི་ཡིན་པར་ཐལ། སྤྲུལ་བ་དེ་མི་ཡིན་པ་གང་ཞིག །མིའི་མཚན་གཞི་ལ་མིས་ཁྱབ་པའི་ཕྱིར། རྟགས་ཁས། འདོད་ན། དེ་གཉིས་ཀྱི་མཚན་གཞི་ལ་ཀུན་གཞི་སོ་སོ་བ་རེ་འཇོག་པར་ཐལ། དེ་ལ་ལྷ་ཡིན་པ་གཅིག་དང། མི་ཡིན་པ་གཅིག་སྟེ་གཉིས་ཡོད་པའི་ཕྱིར། འདོད་ན། དེའི་ཚེ་སྤྲུལ་པ་བརྒྱ་ལ་ཀུན་གཞི་ཡང་བརྒྱ་འབྱུང་བར་ཐལ་ལོ། །འདོད་ན། མ་དག་ས་བདུན་གྱི་སྐབས་སུ་ཀུན་གཞི་དང། ཉོན་ཡིད་བརྒྱ་སྟོང་འབུམ་སོགས་ཡོན་ཏན་གྱི་གྲངས་ལྟར་སྤྲུལ་ནས་འཕེལ་དགོས་པར་ཐལ་ལོ། །གཞན་ཡང་སྤྲུལ་པ་དེ་དག་རྒྱུད་གཅིག་མ་ཡིན་པར་ཐལ། དེ་དག་རྩ་བའི་རྣམ་ཤེས་སོ་སོ་ཡིན་པའི་ཕྱིར། རྟགས་སོང། ཁྱབ་སྟེ། སྐུའི་རྣམ་པ་སྣ་ཚོགས་སུ་བསྟན་ཀྱང་རྩ་བའི་རྣམ་ཤེས་གཅིག་ཡིན་པས་རྒྱུད་གཅིག་པར་བཞག་པ་ཡིན་པའི་ཕྱིར། དེར་ཐལ། རྒྱུད་གཅིག་ཅེས་པའི་རྒྱུད་ངོས་འཛིན་རྒྱུ་ཡོད་པའི་ཕྱིར། ཁོ་ན་རེ། དེ་བདེ་འགྲོ་བ་ཡང་མ་ཡིན་པར་ཐལ། འདོད་པའི་ཕྱིར་ཟེར་ན། མི་མཚུངས་ཏེ། སྤྲུལ་པ་སྤྲུལ་མཁན་ཐམས་ཅད་
བདེ་འགྲོ་བར་མཚུངས་པའི་ཕྱིར་ཏེ། བྱང་སེམས་ལ་བདེ་འགྲོ་བས་ཁྱབ་པའི་རྒྱུ་མཚན་ཡོད་པའི་ཕྱིར། ཁོ་ན་རེ། ལྷས་སྦྱིན་གྱི་ང་ལ་ཀུན་གཞིས་ཁྱབ་པར་ཐལ། དེ་ལ་ཉོན་ཡིད་ཀྱི་དམིགས་པས་ཁྱབ་པའི་ཕྱིར། དེར་ཐལ། དེ་ཡིན་ན་ངར་འཛིན་ལྷན་སྐྱེས་ཀྱི་དམིགས་པ་ཡིན་དགོས་པའི་ཕྱིར་ན་མ་ཁྱབ་སྟེ། དེ་ལྟར་གསུངས་པ་གཙོ་ཆེ་བ་ལ་དགོངས་པའི་ཕྱིར། གོང་དུ་འདོད་མི་ནུས་ཏེ། ལྷས་སྦྱིན་ཀུན་གཞི་མ་ཡིན་པའི་ཕྱིར། ཡང་ཁ་ཅིག །ལྷས་སྦྱིན་གྱི་ང་ལ་སྐྱེ་བ་སྔ་ཕྱིའི་ང་དུ་མ་ཡོད་ཟེར། ལ་ལས་དེ་བཀག་ནས་ལྷས་སྦྱིན་གྱི་ངའོ་སྙམ་པ་སྐྱེ་བའི་གཞིར་གྱུར་བའི་ང་ལ་སྐྱེ་བ་དེའི་ངས་ཁྱབ་ཟེར། དེ་གཉིས་ཀ་མི་འཐད་པར་ཐལ། ལྷས་སྦྱིན་གྱི་ང་ཞེས་བཤད་པའི་ཚེ་སྐྱེ་བ་དེའི་ཁྱད་པར་དུ་བྱས་པ་ཡིན་པས་སྐྱེ་བ་སྔ་ཕྱིའི་དུས་སུ་མེད་པ་གང་ཞིག །ངའོ་སྙམ་པའི་གཞིའི་ང་ཙམ་དེ་དུས་ཐམས་ཅད་དུ་ཡོད་པའི་ཕྱིར། དང་པོ་གྲུབ་སྟེ། རྩ་ཤེས་ཊཱིཀ་ཆེན་ལས། ལྷས་སྦྱིན་གྱི་སྐྱེ་བ་སོ་སོར་ཕྱེ་བའི་བདག་ལ་ངའོ་སྙམ་དུ་བཟུང་བའི་བདག་ནི་ཚེ་རེ་རེ་བའི་བདག་ཕྱོགས་རེ་བ་ཡིན་ནོ། །ཞེས་གསུངས་པའི་ཕྱིར། གཉིས་པ་གྲུབ་སྟེ། ལྷས་སྦྱིན་གྱིས་མངོན་པར་ཤེས་པས་སྐྱེ་བ་སྔ་མ་དྲན་ནས་ངའོ་སྙམ་པ་དང། དེ་ལ་དམིགས་པའི་འཇིག་ལྟ་སྐྱེ་བ་ཡོད་ལ་ང་སྐྱེ་བ་ཕྱི་མར་སྡུག་བསྔལ་གྱིས་དོགས་ནས་དགེ་བ་བསྒྲུབ་པའང་ཡོད་པས་ཡུལ་དུས་བྱེ་བྲག་མ་ཕྱེ་བར་ངའོ་སྙམ་པའི་གཞིའི་ང་ཙམ་དེ་ཚེ་སྔ་ཕྱི་གཉིས་ཀའི་དུས་སུ་ཡོད་པའི་ཕྱིར། རྩ་ཤེ་ཊཱིཀ་ཆེན་ལས། ཚེ་འདིའི་ལྷས་སྦྱིན་གྱིས་གང་ལ་དམིགས་ནས་ངའོ་སྙམ་
པ་སྐྱེ་བའི་དམིགས་པར་གྱུར་པའི་བདག་ནི་ཚེ་རབས་སྔ་མ་རྣམས་སུ་ཡང་ཡོད་ལ། ཞེས་དང། ཚེ་འདིའི་དུས་ཀྱི་གང་ཟག་དེ་ཉིད་སྐྱེ་བ་ཕྱི་མར་མི་འགྲོ་ཡང་ངའོ་སྙམ་པའི་དམིགས་པའི་ང་ཙམ་ཞིག་དེར་ཡང་རྗེས་སུ་འགྲོ་བས། ཞེས་གསུངས་པའི་ཕྱིར། འདི་ལ་ཞིབ་ཆ་དགོས། ཁོ་ན་རེ། ལྷས་སྦྱིན་གྱི་ངའོ་སྙམ་པ་སྐྱེ་བའི་གཞིའི་ང་དེ་ཚེ་སྔ་མར་མེད་པར་ཐལ། དེ་དང་ལྷས་སྦྱིན་གཉིས་ཕན་ཚུན་ངོ་བོ་གཅིག་ཡིན་པའི་ཕྱིར། དེར་ཐལ། དངོས་སྨྲ་བ་རྣམས་དེ་གཉིས་ངོ་བོ་གཅིག་ཏུ་འདོད་ལ། ཐལ་འགྱུར་བས་མི་འདོད་པའི་ཁྱད་པར་ཡོད་པའི་ཕྱིར། ཊཱིཀ་ཆེན་ལས། ལྷས་སྦྱིན་དང་དེའི་བདག་གཉིས་ངོ་བོ་ཉིད་ཀྱིས་གྲུབ་པའི་ཕྱོགས་ལ་སོ་སོ་བ་མི་འདོད་པས་ངོ་བོ་གཅིག་ཏུ་འདོད་ལ། ཞེས་གསུངས་པའི་ཕྱིར་ན་མ་ཁྱབ་སྟེ། དེ་རིང་གི་མི་ལ་ཁ་སང་ངས་གཟུགས་མཐོང་ངོ་སྙམ་པ་སྐྱེ་བ་མྱོང་བས་གྲུབ་པས་དངོས་སྨྲས་ཀྱང་འདོད་ལ། ལུང་དེའི་དོན་ལྷས་སྦྱིན་གྱི་གདགས་གཞིར་གྱུར་པའི་ང་དེ་ཐོག་མེད་ནས་ཡོད་པར་ཐལ་འགྱུར་བས་འདོད་ཀྱང་གཞན་གྱིས་མི་འདོད་པའི་དོན་ཡིན་པའི་ཕྱིར། དེ་ཉིད་ལས། ཐ་སྙད་འདོགས་མཁན་གྱི་མི་དང། ཐ་སྙད་བཏགས་པའི་གཞི་བདག་གཉིས་ཁྱབ་མཉམ་དུ་མི་གཟུང་བར་མི་དེ་བདག་དེའི་ཆ་གཅིག་ཡིན་པར་ཤེས་པར་བྱོས་ཤིག །ཅེས་གསུངས་པའི་ཕྱིར། དེའི་རྒྱུ་མཚན་ཡོད་དེ། སྐྱེ་བ་སྔ་ཕྱི་གཉིས་ཀ་ལ་ང་ཞེས་པའི་ཐ་སྙད་ཐུན་མོང་དུ་འཇུག་ཅིང་ཐལ་འགྱུར་བའི་ལུགས་ལ་ཐ་སྙད་དེ་ཙམ་གྱིས་ང་འཇོག་ནུས་པས་གཉིས་ཀའི་གདགས་གཞིར་
གྱུར་བའི་ང་ཐུན་མོང་བ་མིང་གིས་བཏགས་པ་ཙམ་ཞིག་ཡོད་ཀྱང་སྔ་མའི་གདགས་གཞིའི་ང་དེ་ཕྱི་མའི་གདགས་གཞིའི་ང་ཡིན་མི་དགོས་ཏེ། དཔེར་ན། གསེར་བུམ་ཟངས་བུམ་གཉིས་བུམ་པའི་བྱེ་བྲག་ཡིན་པས་དེ་གཉིས་ཀྱི་སྤྱིར་གྱུར་པའི་བུམ་པ་ཞིག་ཡོད་དགོས་ཀྱང་གསེར་བུམ་གྱི་སྤྱི་དེ་ཟངས་བུམ་གྱི་སྤྱི་ཡང་མིན་ལ་དེ་གཉིས་ཀྱི་སྤྱིར་གྱུར་བའི་བུམ་པ་དེ་དེ་གཉིས་ལས་གོ་ས་ལོགས་ན་ཡང་བསྟན་རྒྱུ་མེད་པར་བུམ་པ་ཞེས་པའི་མིང་ཙམ་གྱི་སྟེང་ནས་འཇོག་དགོས་པ་བཞིན་ནོ། །དངོས་སྨྲ་རྣམས་ལྷས་སྦྱིན་གྱི་བཏགས་དོན་བཙལ་ཏེ་གདགས་གཞི་ཡང་དེའི་ཚོགས་པ་ནས་རྙེད་དགོས་པར་འདོད་པས་སྐྱེ་བ་གཞན་གྱི་ཚོགས་པར་རྗེས་སུ་འགྲོ་ཚུལ་མེད་ཅིང་དེའི་གནད་ཀྱིས་གདགས་གཞི་ཐུན་མོང་བ་ཡང་མི་སྲིད་དོ། །འདི་ནི་ཤིན་ཏུ་དཀའ་བའི་རིགས་པའི་གསང་ཚིག་ཞིག་ཏུ་སྣང་བས་ལེགས་པར་བཤད་ཡོད་དོ། །སྐྱེ་འཕགས་ཀྱི་གདགས་གཞིའི་ཡིན་པ་ཡོད་མེད་སོགས་མ་སྤྲོས་ཀྱང་ད་ལྟའི་རིགས་སྨྲ་རྣམས་ཀྱིས་དགོངས་པར་འགྱུར་རོ། །ཁ་ཅིག་ན་རེ། ཀུན་གཞིའི་དམིགས་པའི་དབང་པོ་ལ་གཞན་རྒྱུད་ཀྱི་དབང་པོ་ཡོད་པར་ཐལ། སུམ་ཅུ་པའི་འགྲེལ་པ་ལས་སེམས་ཅན་ནི་བདག་དང་གཞན་གྱི་རྒྱུད་ལ་དབང་པོ་ལྔར་སྣང་བ་གང་ཡིན་པའོ། །ཞེས་གསུངས་པའི་ཕྱིར་ན་མ་ཁྱབ་སྟེ། ཀུན་གཞི་སྤྱི་ཙམ་དང་གང་ཟག་ལྟོས་ས་ལྟོས་འཇོག་གི་དབང་དུ་བྱས་པའི་ཕྱིར། དེར་ཐལ། ལྷས་སྦྱིན་གྱི་ཀུན་གཞི་ལ་མཆོད་སྦྱིན་གྱི་དབང་པོ་སྣང་ན་དེ་གཉིས་རྒྱུད་གཅིག་ཏུ་འགྱུར་བའི་ཕྱིར། འོན་ཀྱང་མངོན་ཤེས་ལ་གཞན་གྱི་སེམས་སྣང་ཡང་རྣལ་
འབྱོར་གྱི་སྟོབས་ཡིན་པས་རྒྱུད་གཅིག་པར་མི་འགྱུར་ཚུལ་ནི་རྒྱུད་གཞན་སྒྲུབ་པ་སོགས་ལས་ཤེས་པར་བྱའོ། །ཁ་ཅིག་ན་རེ། ཀུན་གཞི་སྒྲིབ་ལུང་མ་བསྟན་ཡིན་པར་ཐལ། ཤེས་སྒྲིབ་དང་ལུང་མ་བསྟན་གྱི་གཞི་མཐུན་ཡིན་པའི་ཕྱིར། དེར་ཐལ། རྣམ་མཁྱེན་ཐོབ་པ་དང་དུས་མཉམ་དུ་སྤང་རྒྱུའི་ཆོས་ཡིན་པའི་ཕྱིར་ཟེར་ན། མི་འཐད་པར་ཐལ། ཀུན་འབྱུང་ཕྲ་མོས་བསྡུས་པའི་ལས་ཏེ་ཟག་བཅས་དང་ལས་གཉིས་ཀ་ཡིན་ཀྱང། ཟག་མེད་ལས་སུ་བཞག་པ་ལྟར་འགའ་ཞིག་སྒྲིབ་པ་དང་ལུང་མ་བསྟན་གཉིས་ཀ་ཡིན་ཀྱང་མ་སྒྲིབ་ལུང་མ་བསྟན་དུ་བཞག་ཆོག་ལ་ཀུན་གཞི་སྒྲིབ་པ་ཡང་མ་ཡིན་པའི་ཕྱིར། དང་པོ་གྲུབ་སྟེ། མངོན་པ་གོང་འོག་གང་དུའང་ཤེས་སྒྲིབ་དང་སྦྱར་ནས་སྒྲིབ་ལུང་མ་བསྟན་དུ་བཤད་པ་མེད་ལ་མཛོད་ཀྱིས་ཉོན་སྒྲིབ་ལ་བཤད་པའི་རིགས་པ་སྦྱར་ན་འཁོར་དུ་སེམས་བྱུང་དུ་འཇུག་སོགས་ཐམས་ཅད་དང་མི་འགྲིག་པའི་ཕྱིར། གཉིས་པ་གྲུབ་སྟེ། ཀུན་གཞི་སྤང་བྱར་བཤད་པ་རྣམ་སྨིན་གྱི་ཆ་ཡིན་ལ་སྤོང་ཚུལ་ཡང་རྟོག་པའི་ངོ་བོ་སོགས་ཟག་བཅས་ཀྱི་ཆ་སྤོང་བ་ཡིན་གྱི་རྒྱུན་གཅོད་པ་མ་ཡིན་པའི་ཕྱིར། དེར་ཐལ། དེས་ལམ་འབྲས་གང་རུང་སྐྱེ་བ་ལ་གེགས་མི་བྱེད་པར་མ་ཟད་ལམ་གྱི་བག་ཆགས་འཛིན་བྱེད་ཡིན་ལ་མཐར་ཐུག་གི་ཚེ་མེ་ལོང་ལྟ་བུའི་ཡེ་ཤེས་སུ་འགྱུར་བའི་ཕྱིར། དེར་ཐལ། དགོངས་འགྲེལ་ལས། མེ་ལོང་ལྟ་བུའི་ལེན་པའི་རྣམ་པར་ཤེས་པ་དེ་ལ་བརྟེན་ཅིང་གནས་ནས་ཞེས་སོགས་ཀྱིས་རྣམ་ཤེས་གཞན་རྣམས་ཀུན་གཞི་ལས་འབྱུང་ཚུལ་དང། མདོ་སྡེ་རྒྱན་ལས། མེ་ལོང་ཡེ་ཤེས་
མི་གཡོ་སྟེ། །ཡེ་ཤེས་གསུམ་ནི་དེ་ལ་བརྟེན། །ཞེས་ཡེ་ཤེས་གཞན་རྣམས་མེ་ལོང་ཡེ་ཤེས་ལས་འབྱུང་ཚུལ་གསུངས་པའི་འབྲེལ་གྱིས་ཀྱང་ཀུན་གཞི་གནས་འགྱུར་གསུངས་པ་རྫས་རྒྱུན་སྔ་ཕྱི་རྣལ་མ་ཡིན་པར་བསྒྲུབ་ནུས་སོ། །ཡང་ཁ་ཅིག་ན་རེ། བརྒྱུད་ནས་དེ་ཡི་ཚོགས་དྲུག་གི །ཡུལ་དུ་སྣང་བར་གང་ནུས་པ། །ཀུན་གཞིའི་ཡུལ་དུ་འཇོག་པ་ཡིན། །ཞེས་པ་དང། དབང་དོན་ལས་གཞན་དྲུག་པའི་ཡུལ། །ཀུན་གཞིའི་ཡུལ་དུ་མི་འགྱུར་ཏེ། །ཞེས་པ་གཉིས་འགལ་ཟེར་ན་མི་འགལ་བར་ཐལ། སྔ་མའི་དོན་ནི་རྣམ་སྨིན་གྱི་དབང་པོ་དྲུག་ལ་སྣང་རྒྱུའི་ལས་ཀྱི་བདག་འབྲས་སུ་གྲུབ་པའི་ཡུལ་ཐམས་ཅད་ཀུན་གཞིའི་དམིགས་པར་འཇོག་པའི་དོན་ཡིན་ལ་ཕྱི་མ་ནི་དྲུག་པའི་ཡུལ་གྱི་གསུང་རབ་ཡན་ལག་བཅུ་གཉིས་དང་འདས་མ་འོངས་སོགས་འདུ་མ་བྱས་རྣམས་ཀུན་གཞིའི་ཡུལ་དུ་མི་འཇོག་པའི་དོན་ཡིན་པའི་ཕྱིར། ཁ་ཅིག་ན་རེ། བག་ཆགས་བསྒོ་བྱེད་ལ་དགེ་མི་དགེ་གང་རུང་གིས་ཁྱབ་ཟེར་ན། ཉོན་ཡིད་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། བདག་ལྟའི་བག་ཆགས་བསྒོ་བྱེད་ཡིན་པའི་ཕྱིར། གཞན་ཡང་བག་ཆགས་བསྒོ་བྱེད་ལ་ལུང་མ་བསྟན་ཡོད་པར་ཐལ། དགེ་མི་དགེ་གཉིས་ཀྱི་རྒྱུ་མཐུན་དང་རྣམ་སྨིན་གྱི་བག་ཆགས་གཉིས་ཀ་བསྒོས་ལ་ལུང་མ་བསྟན་གྱིས་རྒྱུ་མཐུན་གཅིག་པུ་བསྒོ་བའི་ཕྱིར། སུམ་ཅུ་པའི་འགྲེལ་པ་ལས། དགེ་བ་དང་མི་དགེ་བ་ནི་ཀུན་གཞིའི་རྣམ་པར་ཤེས་པ་ལ་རྣམ་པར་སྨིན་པའི་བག་ཆགས་དང་རྒྱུན་མཐུན་པའི་བག་ཆགས་བསྐྱེད་དོ། །ལུང་དུ་མ་བསྟན་པ་དང་ཉོན་མོངས་པ་ཅན་གྱི་ཡིད་ནི་རྒྱུ་
མཐུན་པའི་བག་ཆགས་ཉིད་བསྐྱེད་དོ། །ཞེས་གསུངས་པའི་ཕྱིར། ཡང་ས་བཟང་གི་འགྲེལ་པ་ལས། རྒྱུ་མཚན་ཚང་བའི་ཕྱིར། ཀུན་གཞིའི་འཁོར་གྱི་ཀུན་འགྲོ་ལྔ་པོ་དེ་དག་གིས་ཀྱང་རྒྱུ་མཐུན་པའི་བག་ཆགས་བསྒོས་པར་རིགས་པར་བྱའོ། །ཞེས་གསུངས་པ་མི་འཐད་པར་ཐལ། དེ་དམིགས་རྣམ་ཤིན་ཏུ་མི་གསལ་བའི་བློ་ཡིན་པའི་ཕྱིར། ཁྱབ་སྟེ། དེར་མ་ཟད་དམིགས་རྣམ་མི་གསལ་བ་གཟུགས་ཡིད་འོང་མཐོང་བ་ལ་ལྷག་པར་ཆགས་དུས་ཀྱི་སྒྲ་འཛིན་རྣ་ཤེས་ལྟ་བུས་ཀྱང་བག་ཆགས་བསྒོ་མི་ནུས་པའི་ཕྱིར། དེར་ཐལ། དེས་སླར་ངས་སྒྲ་འདི་ལྟ་བུ་ཐོས་སོ་སྙམ་དུ་དྲན་ཤེས་བསྐྱེད་མི་ཐུབ་པའི་རྒྱུ་མཚན་ཡོད་པའི་ཕྱིར། རེད་མདའ་བའི་ཀུན་བཏུས་ཊཱིཀྐ་ལས། དེ་དང་མཚུངས་ལྡན་གྱི་སེམས་ལས་བྱུང་བ་དག་གིས་ཀྱང་བསྒོ་བར་མི་བྱེད་དེ། དེ་དག་ཀུན་གཞི་བཞིན་དུ་དམིགས་རྣམ་ཤིན་ཏུ་མི་གསལ་བའི་ཕྱིར་རོ། །ཞེས་དང། བག་ཆགས་འཇོག་པའི་ནུས་པ་མེད་པར་མཐོང་སྟེ། གང་གི་ཚེ་ཡིད་རྣམ་པར་གཡེང་བ་དང་དམིགས་པ་ནང་དུ་གཏད་པ་ལ་སོགས་པའི་གནས་སྐབས་ན་མིག་གིས་གཟུགས་མཐོང་བ་དང། ཞེས་པ་ནས། མཐོང་ཐོས་ཞེས་པའི་དྲན་པ་སྐྱེ་བ་མེད་པའི་ཕྱིར་རོ། །ཞེས་གསུངས་པའི་ཕྱིར། འདི་དཀའ་འགྲེལ་ལས་ཀྱང་རང་ལུགས་སུ་མཛད་ལ་རིགས་པས་ཀྱང་འགྲུབ་སྟེ། བག་ཆགས་བཞག་པའི་དགོས་པ་ནི། རང་ཉིད་འགག་ཀྱང་ཀུན་གཞིའི་སྟེང་དུ་བག་ཆགས་བསྒོས་ཏེ་ཀུན་གཞིའི་ནུས་པ་གསོ་བྱེད་ཀྱི་རྒྱུ་བྱེད་ལ་དེའི་སྟེང་གི་བག་ཆགས་དེ་ཉིད་སླར་སད་ནས་རང་གི་རིགས་
འདྲ་ཕྱི་མ་དེ་ཀུན་གཞིའི་འབྲས་བུའི་ཚུལ་དུ་འབྱུང་བས་ཕན་ཚུན་རྒྱུ་འབྲས་སུ་སྦྱོར་བ་གང་ཞིག །སེམས་བྱུང་དེ་རྣམས་ཀུན་གཞི་དང་སྐྱེ་འགག་དུས་གཅིག་པས་དེ་འདྲ་བའི་དོགས་པ་གང་ཡང་མེད་པའི་ཕྱིར། ཆོས་མངོན་པའི་མདོ་ལས། ཆོས་ཀུན་རྣམ་པར་ཤེས་ལ་སྦྱོར། །དེ་དག་ལ་ཡང་དེ་དེ་བཞིན། །ཕན་ཚུན་འབྲས་བུའི་ངོ་བོ་དང། །རྒྱུ་ཡི་ངོ་བོར་རྟག་ཏུ་སྦྱོར། །ཞེས་དང། དབྱིག་གཉེན་གྱི་ཐེག་བསྡུས་འགྲེལ་པ་ལས། གང་གི་ཚེ་ཀུན་གཞིའི་རྣམ་པར་ཤེས་པ་རྒྱུ་ཡིན་པ་དེའི་ཚེ་དེ་འབྲས་བུ་ཡིན་ལ། གང་གི་ཚེ་དེ་རྒྱུ་ཡིན་པ་ན་ཀུན་གཞིའི་རྣམ་པར་ཤེས་པ་འབྲས་བུ་ཡིན་ནོ། །ཞེས་དང། རྩ་བར་ཡང། ཀུན་ནས་ཉོན་མོངས་ཆོས་ཐམས་ཅད། །རྒྱུ་འམ་འབྲས་བུའི་ངོ་བོ་རུ། །སྦྱོར་བའི་ཕྱིར་ན་ཀུན་གཞི་འོ། །ཞེས་གསུངས་པའི་ཕྱིར། དེའང་དགོངས་འགྲེལ་ལས། བདག་ཏུ་རྟོག་པར་གྱུར་ན། ཞེས་སོགས་ལྟར་ཀུན་གཞི་བསྟན་པ་ལ་རྗེ་བོ་ལྟ་བུའི་ཕུང་སོགས་ལ་དབང་སྒྱུར་བ་པོར་འཁྲུལ་པ་དང་སྣོད་བཅུད་མཐའ་དག་བྱེད་པའི་རྟག་པ་རང་བྱུང་གི་དབང་ཕྱུག་དང། རྣམ་འགྱུར་ཐམས་ཅད་སྤྲུལ་པའི་རྩ་བའི་རང་བཞིན་ལྟ་བུར་འཁྲུལ་ཉེན་ཆེ་ཡང་དོགས་པ་དེ་སེལ་བྱེད་ཀྱི་རིགས་པའི་གནད་འདི་ཡིན་ཏེ། གཞན་སྡེས་འདོད་པའི་དབང་ཕྱུག་སོགས་ནི་རང་ཉིད་གང་ལ་མ་ལྟོས་པའི་རྒྱུ་མེད་དང་རང་གིས་འབྲས་བུ་ཐམས་ཅད་འདོད་དགར་བྱེད་པར་འདོད་ལ་ཀུན་གཞིས་རང་སྟེང་དུ་སྔར་ལས་ཀྱི་ས་བོན་བཞག་པ་དེ་ལ་བརྟེན་ནས་དེ་དང་མཐུན་པའི་འབྲས་བུ་སྲེད་སོགས་ཀྱིས་གསོས་བཏབ་པ་ན་སྐྱེད་པར་འདོད་པའི་ཕྱིར། ཁ་ཅིག་ན་རེ། བག་ཆགས་བསྒོ་གཞི་དང་བསྒོ་བྱེད་འཇོག་པ་མི་འཐད་
པར་ཐལ། བག་ཆགས་དེ་ཉིད་བསྒོ་བྱེད་གཞན་ལ་ལྟོས་མི་དགོས་པའི་ཕྱིར། དེར་ཐལ། དེ་ཐོག་མ་མེད་པ་ནས་ཆོས་ཉིད་ཀྱིས་གནས་པའི་ཕྱིར། དོན་གསང་ལས། ཇི་ལྟར་ཆོས་ཉིད་ཀྱིས་གནས་པའི་བག་ཆགས་སུ་འགྱུར་ཞེ་ན། ནས། ཏིལ་ལ་སོགས་པ་ལ་ཆོས་ཉིད་ཁོ་ནས་དྲི་འཛིན་པའི་ནུས་པ་ཡོད་དོ་ཞེས་བྱ་བར་ཤེས་སོ། །ཞེས་གསུངས་པའི་ཕྱིར་ན་མ་ཁྱབ་སྟེ། དོན་གསང་མཁན་པོས་བག་ཆགས་ཆོས་ཉིད་ཀྱིས་གནས་པ་ཁོ་ནར་འདོད་ཀྱང། རྗེས་རང་ལུགས་སུ་མ་མཛད་པའི་ཕྱིར། དེར་ཐལ། བག་ཆགས་བསྒོ་ཚུལ་ལ་ཆོས་ཉིད་ཀྱིས་གནས་པའི་བག་ཆགས་རྙིང་པ་ཁོ་ན་གསོ་བར་འདོད་པ་དང། གསར་བཞག་ཁོ་ནར་འདོད་པ་དང། རྙིང་པ་གསོ་བ་ཡང་ཡོད་ལ་གསར་བཞག་ཀྱང་ཡོད་པར་འདོད་པའི་ལུགས་གསུམ་ཡོད་པས་དང་པོ་དོན་གསང་མཁན་པོའི་བཞེད་པ་གང་ཞིག །ལུགས་ཕྱི་མ་གཉིས་འདོད་མཁན་བཞེད་ཚུལ་མི་འདྲ་བའི་ཕྱིར། དང་པོ་གྲུབ་སྟེ། དཀའ་འགྲེལ་ལས། ལུགས་གསུམ་དོན་གསང་དུ་བཀོད་ནས་ཕན་ཚུན་སྐྱོན་བརྗོད་དང་འགལ་སྤོང་རྒྱས་པར་བྱས་ཤིང་ལུགས་དང་པོ་འཐད་ཕྱོགས་སུ་ཁས་བླངས་ཀྱང་འདིར་ནི་ཕྱོགས་གསུམ་པ་བཟུང་ངོ༌། །ཞེས་གསུངས་པའི་ཕྱིར་དང། ལུགས་དང་པོ་ནི། དོན་གསང་ལས། བག་ཆགས་ནི་བསྒོ་བར་བྱེད་པ་ལ་མི་ལྟོས་པར་ཆོས་ཉིད་ཀྱིས་གནས་ལ་འདོད་ཆགས་ལ་སོགས་པ་ལྷན་ཅིག་སྐྱེ་བ་དང་འགག་པས་ནི་ཡོངས་སུ་གསོ་བ་འབའ་ཞིག་ཏུ་ཟད་ཀྱི་སྐྱེད་པ་ནི་མ་ཡིན་ནོ། །ཞེས་གསུངས་པའི་ཕྱིར། སློབ་དཔོན་འདིའི་རང་ལུགས་འདི་ཉིད་ཡིན་པར་རེད་མདའ་བས་ཀྱང་
གསུངས་ལ། འོན་ཀྱང་གྲུབ་མཐའ་ཆེན་མོར་གསུམ་པ་མ་བཀག་པས་རང་ཡང་འདོད་པར་སེམས། ཞེས་གསུངས་པས་དཔྱད་གཞི་ཆེ་བར་སྣང་ངོ༌། །རྟགས་གཉིས་པ་གྲུབ་སྟེ། གྲུབ་མཐའ་ཆེན་མོ་ལས། བུ་སྟོན་ཐམས་ཅད་མཁྱེན་པས་ལུགས་དང་པོ་བློ་བརྟན་དང། གཉིས་པ་བཙུན་པ་ཡང་དག་བདེན་སྨྲ་དང། གསུམ་པ་མཆོག་གི་སྡེ་དང་དགའ་བའི་སྡེར་འདོད་ལ། དཔང་ལོ་དང་ས་བཟང། དང་པོ་ཟླ་སྐྱོང་དང་ཡང་དག་བདེན་སོགས་དང། གསུམ་པ་ཆོས་སྐྱོང་སོགས་ལ་འདོད་གསུང་ཡང་ལུང་དང་རྒྱུ་མཚན་སྤྲོས་པ་མ་མཐོང། ཞེས་གསུངས་པའི་ཕྱིར། བློ་བརྟན་གྱིས་དེ་ལྟར་བཞེད་པ་ནི། དུལ་ལྷའི་སུམ་ཅུ་པའི་འགྲེལ་བཤད་ལས། འགྲེལ་པ་བྱེད་པས་ཕྱོགས་པར་མ་བཞག་གོ །ཞེས་གསུངས་པས་འགྲུབ་སྟེ། དེར་བག་ཆགས་གདོད་མ་ནས་ཡོད་པ་དེ་ལུགས་གཉིས་པར་བཀོད་པའི་ཕྱིར། རྗེའི་རང་ལུགས་ལ་བཤད་ཚུལ་གསུམ་པ་འཐད་ལྡན་དུ་མཛད་དགོས་ཏེ། བཤད་ཚུལ་དང་པོ་མི་འཐད་པ་གང་ཞིག །གཉིས་པ་ཡང་མི་འཐད་པའི་ཕྱིར། དང་པོ་གྲུབ་སྟེ། བག་ཆགས་ཆོས་ཉིད་ཀྱིས་གནས་པ་ཁོ་ན་ཡིན་ན། ཀུན་གཞི་དང་ཀུན་ནས་ཉོན་མོངས་པའི་ཆོས་རྣམས་ཕན་ཚུན་རྒྱུ་འབྲས་སུ་སྦྱོར་ཚུལ་མེད་པས་ཐེག་བསྡུས་དང་འགལ་ཞིང་གྲངས་ཅན་གྱི་གཙོ་བོ་ལྟ་བུར་འགྱུར་བ་དང། ལམ་སྒོམ་པ་སོགས་ཀྱི་རྩོལ་བ་གསར་དུ་བྱེད་པ་དོན་མེད་དུ་ཐལ་བ་དང། ཐ་ན་ཏིལ་ལ་མེ་ཏོག་གི་དྲི་བསྒོ་བ་ལྟ་བུ་ཡང་མི་སྲིད་པར་འགྱུར་བའི་ཕྱིར། དེར་ཐལ། དེ་ལ་ནུས་པ་དེ་འབྱུང་བ་ལ་དེའི་ནུས་པ་སྔར་ནས་ཡོད་དགོས་པའི་ཕྱིར་ཏེ། སྔར་མེད་
ཀྱི་ནུས་པ་གསར་དུ་བསྒོ་བ་མི་སྲིད་པའི་ཕྱིར། གཉིས་པ་གྲུབ་སྟེ། བག་ཆགས་གསར་བཞག་ཁོ་ན་ཡིན་ན། ཀུན་གཞི་འགྲུབ་བྱེད་ཀྱི་ནུས་པ་གསར་བཞག་དགོས་པས་འཁོར་བའི་ཐོག་མ་ཡོད་པའམ། དེ་འདྲའི་ནུས་པ་གཏན་མེད་དུ་འགྱུར་ལ་ཟག་མེད་ཡེ་ཤེས་འགྲུབ་པའི་ནུས་པ་ཡང་གསར་བཞག་དགོས་ན་རང་གི་རིགས་འདྲ་ཞིག་གིས་འཇོག་དགོས་ཤིང་ཆོས་མཆོག་མན་ལ་འཕགས་ལམ་སྐྱེ་མ་མྱོང་བས་ཟག་མེད་སྐད་ཅིག་དང་པོ་རྒྱུ་མེད་དུ་ཐལ་བའི་སྐྱོན་འབྱུང་བའི་ཕྱིར། དེར་ཐལ། ཟག་མེད་ཡེ་ཤེས་འགྲུབ་རུང་གི་ནུས་པ་དེ་ཐོག་མེད་ནས་ཡོད་པའི་རྒྱུ་མཚན་གྱིས་རང་བཞིན་དུ་གནས་པའི་རིགས་ཞེས་བཤད་པའི་ཕྱིར། རྟགས་གྲུབ་སྟེ། རིགས་ལ་གནས་པའི་གང་ཟག་དེས་ནམ་ཐོས་བསམ་ཚུལ་བཞིན་དུ་བྱས་པ་ན་ལམ་གྱི་རྟོགས་པ་སྐྱེ་ལ་རིགས་ཆད་ཀྱིས་ནན་ཏན་བྱས་ཀྱང་ལམ་མི་སྐྱེ་བ་གདོད་ནས་དེ་འབྱུང་རུང་གི་ནུས་པ་དང་མི་ལྡན་པའི་དབང་གིས་ཡིན་པའི་ཕྱིར། དཔེར་ན། ནས་ཀྱི་ས་བོན་གྲུང་པོ་དེ་ཐོག་མ་ནས་མྱུ་གུ་སྐྱེད་པའི་ནུས་པ་དང་ལྡན་པས་ནམ་ཆུ་ལུད་དང་ཕྲད་པ་ན་མྱུ་གུ་སྐྱེ་ལ་ས་བོན་ཚིག་པ་རྐྱེན་དང་ཕྲད་ཀྱང་མི་སྐྱེ་བ་བཞིན་ཡིན་པའི་ཕྱིར། དེས་ན་ཟག་མེད་ཀྱི་ས་བོན་ལྟ་བུ་ཆོས་ཉིད་ཀྱིས་གནས་པ་དང། རྒྱུ་མཐུན་དང་རྣམ་སྨིན་གྱི་ས་བོན་ལྟ་བུ་གསར་དུ་བཞག་པ་གཉིས་ཀ་འདོད་དགོས་ཏེ། ཕྱོགས་རེ་རེ་ཁོ་ན་ཁས་ལེན་པ་བཀག་ཟིན་པའི་ཕྱིར། འདི་ལ་རྗེ་བཙུན་རེད་མདའ་བའི་ཊཱིཀྐར། ཁོ་བོས་ནི་བག་ཆགས་ཆོས་ཉིད་ཀྱིས་གནས་སམ་གསར་དུ་སྐྱེ་ཞེས་དཔྱོད་པ་ཉིད་གནས་མ་ཡིན་པ་ལ་དཔྱོད་པ་བྱེད་པར་
རྟོགས་སོ། །ཞེས་གསུངས་པ་དང། རྫས་གཅིག་ཐ་དད་གང་ཡང་མ་ཡིན་པར་གསུངས་པ་དང་གནད་གཅིག་སྟེ་འོག་ཏུ་འཆད་དོ། །བསྒོས་པའི་བག་ཆགས་ཀྱི་ངོ་བོ་ལ་ཁ་ཅིག་ན་རེ། དགེ་བའི་བག་ཆགས་དགེ་བ་དང་མི་དགེ་བའི་བག་ཆགས་མི་དགེ་བ་ཡིན་ཟེར་ན། མི་འཐད་པར་ཐལ། དེ་གཉིས་ཀ་མ་སྒྲིབ་ལུང་མ་བསྟན་ཡིན་པའི་ཕྱིར། དེར་ཐལ། རྩ་བར། འཇོག་བྱེད་དགེ་སོགས་གང་ཡིན་ཀྱང། །བཞག་པའི་བག་ཆགས་ལུང་མ་བསྟན། །ཞེས་གསུངས་པའི་ཕྱིར། བྱས་པ་ལ་ཁོ་ན་རེ། བག་ཆགས་ལུང་མ་བསྟན་ཁོ་ནར་འདོད་པ་མི་འཐད་པར་ཐལ། དེ་ལྟར་ན་ཀུན་བཏུས་ལས། རྗེས་སུ་འབྲེལ་བའི་དགེ་བ་གང་ཞེ་ན། དེ་དག་ཉིད་ཀྱི་བག་ཆགས་སོ། །ཞེས་རྗེས་འབྲེལ་གྱི་དགེ་བར་བཤད་པའི་ལུང་དང་འགལ་བ་དང་འཕེན་བྱེད་ལས་ཀྱི་བག་ཆགས་དེས་རྣམ་སྨིན་གྱི་རྒྱུ་བྱེད་མི་ནུས་པས་ལས་འབྲས་ཀྱི་རྣམ་གཞག་འཇིག་པར་ཐལ་བ་དང། དགེ་པའི་སྐལ་མཉམ་གྱི་རྒྱུ་ལ་དགེ་བ་ཞིག་དགོས་ཤིང་བག་ཆགས་ལ་དགེ་བ་མེད་ན་སེམས་མེད་ཀྱི་གནས་སྐབས་རྣམས་སུ་དགེ་མི་དགེ་གང་གི་ཡང་རིགས་འདྲའི་རྒྱུ་མེད་པར་འགྱུར་བས་སླར་དགེ་སེམས་སོགས་སྐྱེ་མི་སྲིད་པར་ཐལ་བ་དང། སོ་ཐར་གྱི་སྡོམ་པའི་ངོ་བོ་སྤོང་སེམས་རྒྱུན་ཆགས་པ་ས་བོན་དང་བཅས་པ་ལ་འདོད་ཅིང་སྡོམ་པ་ཐོབ་ལ་མ་ཉམས་པའི་བར་དུ་དགེ་བ་རྒྱུན་ཆགས་སུ་འབྱུང་བར་གསུངས་པ་དང་འགལ་བའི་ཉེས་པ་བཞི་འབྱུང་བའི་ཕྱིར་ཟེར། རྩོད་པ་དང་པོ་མི་འཐད་པར་ཐལ། རྗེས་འབྲེལ་གྱི་དགེ་བར་གསུངས་པས་དགེ་བར་འགྲུབ་ན། གཟུགས་མེད་ན་ཡང་གཟུགས་སྐྱེད་བྱེད་ཀྱི་བག་ཆགས་ཡོད་ཅིང་དེ་རྗེས་འབྲེལ་གྱི་གཟུགས་སུ་གསུངས་པས་དེར་གཟུགས་ཡོད་
པར་ཐལ་བ་དང། ཁམས་གོང་ན་མི་དགེ་བ་ཡོད་པར་ཐལ་བའི་སྐྱོན་སོགས་འབྱུང་བའི་ཕྱིར། རྩོད་པ་གཉིས་པ་ཡང་མི་འཐད་པར་ཐལ། འཕེན་བྱེད་ལས་ཀྱི་བག་ཆགས་དེ་རྣམ་སྨིན་འཕེན་བྱེད་ཀྱི་རྒྱུ་མིན་ལ་སྐྱེད་བྱེད་ཀྱི་རྒྱུ་ཡིན་ཀྱང་དགེ་མི་དགེ་གང་རུང་ཡིན་མི་དགོས་པའི་ཕྱིར། དེར་ཐལ། འཕངས་འབྲས་ཀྱི་མིག་དབང་སྔ་མ་སྔ་མས་ཕྱི་མ་ཕྱི་མ་བསྐྱེད་དེ་རྒྱུན་མ་ཆད་པར་འབྱུང་ཡང་སྔ་མ་ཕྱི་མའི་འཕེན་བྱེད་དུ་མི་འགྱུར་བ་བཞིན་ཡིན་པའི་ཕྱིར། དེ་ལྟར་ན་ལས་འབྲས་ཀྱི་རྣམ་གཞག་བསྒྲུབ་མི་ནུས་པའི་སྐྱོན་ཡང་མེད་དེ། སྤྱིར་གཞན་སྡེ་རྣམས་ཀྱི་ལས་འབྲས་མི་འཐད་པའི་རྩོད་པ་འགོག་ཚུལ་ནི། རྩ་ཤེ་ལས། གལ་ཏེ་སྨིན་པའི་དུས་བར་དུ། །གནས་ན་ལས་དེ་རྟག་པར་འགྱུར། །གལ་ཏེ་འགག་ན་འགག་འགྱུར་བས། །འབྲས་བུ་ཇི་ལྟར་འབྱུང་བར་འགྱུར། །ཞེས་གསུངས་པ་བཞིན་རྩོད་པར་བྱེད་ལ། དེའི་སྐྱོན་སྤོང་དུ་བྱེ་སྨྲ་ཁ་ཅིག་ཐོབ་པ་དང། ལ་ལས་བུ་ལོན་གྱི་དཔང་རྒྱ་ལྟ་བུའི་ཆུད་མི་ཟ་བ་དང། གྲུབ་མཐའ་གཞན་ཕལ་ཆེར་རྣམ་ཤེས་ཀྱི་རྒྱུན་དང་ཐལ་འགྱུར་བས་ཞིག་པ་དངོས་པོར་ཁས་བླངས་ཏེ་སྐྱོན་སེལ་ལ་སེམས་ཙམ་པས་ཀུན་གཞིའི་སྟེང་ནས་སྐྱོན་སྤོང་ཚུལ་ནི། དཔེར་ན། མདའ་འཕེན་པའི་ཚེ་དང་པོར་འདོམ་བཀང་སྟེ་འཕངས་ན་དེའི་ཤུགས་ཀྱིས་འབེན་ལ་མ་ཕོག་བར་དུ་རྒྱུན་ཆད་མེད་པར་འགྲོ་འང་སྐད་ཅིག་ཕྱི་མ་རྣམས་ལ་འཕེན་པའི་རྩོལ་བ་མི་དགོས་པ་ལྟར་དང་པོར་ལས་ཀྱིས་འཕང་སྟེ་དེ་ནས་ཀུན་གཞི་ལ་བག་ཆགས་བསྒོས་པས་ཕྱིས་སུ་དེའི་རྒྱུད་ལ་འཕེན་བྱེད་མེད་ཀྱང་སྔ་མའི་ནུས་པ་མ་ཉམས་པའི་དབང་གིས་འཕང་འབྲས་འབྱིན་པར་འདོད་དེ། ཐེག་
བསྡུས་ལས། མ་བཏབ་ཤི་བ་འཕེན་པའི་ཕྱིར། །མདའ་ནི་བར་དུ་མི་ལྟུང་བཞིན། །ཞེས་སོ། །རྩོད་པ་གསུམ་པ་ཡང་མི་འཐད་པར་ཐལ། སེམས་མེད་གནས་སྐབས་ཀྱི་མཇུག་ཐོགས་སུ་དགེ་སེམས་སྐྱེས་པ་ན་དངོས་སུ་སྐྱེད་བྱེད་བག་ཆགས་ལུང་མ་བསྟན་ཡིན་ཀྱང་བག་ཆགས་དེ་འཇོག་བྱེད་དགེ་བ་ཡིན་པས་ཕྱིས་ཀྱི་དགེ་སེམས་དེ་ཉིད་རིགས་མཐུན་སྐལ་བ་མཉམ་པའི་རྒྱུ་ལས་སྐྱེ་བར་འཇོག་པའི་ཕྱིར། དཔེར་ན། ནས་ཀྱི་ས་བོན་བཏབ་པ་ལས་སྐྱེས་པའི་མྱུ་གུ་སྔོན་པོ་དེ་ནས་དང་མི་འདྲ་ཡང་སླར་འབྲས་བུ་སྨིན་པ་ན་ས་བོན་དང་དབྱིབས་འདྲ་བས་འབྲས་བུ་མ་འཆོལ་བར་བཞག་པ་བཞིན་ཡིན་པའི་ཕྱིར། འདི་ལ་ཐེག་བསྡུས་ལས། བག་ཆགས་ཐ་དད་པ་མ་ཡིན་ཞིང་སྣ་ཚོགས་མ་ཡིན་པ་ཆོས་ཐ་དད་པ་སྣ་ཚོགས་དག་གི་རྒྱུར་ཇི་ལྟར་རུང་ཞེ་ན། དཔེར་ན། ཚིག་གུའི་རྩི་སྣ་ཚོགས་ཀྱིས་བསྒྱུར་བའི་རས་སྣ་ཚོགས་སུ་མི་སྣང་བ་གང་གི་ཚེ་ཚོན་གྱི་སྣོད་དུ་བཅུག་པ་དེའི་ཚེ་རས་ལ་ཚོན་རྣམས་ཀྱི་དབྱེ་བ་ཐ་དད་པ་རྣམ་པ་སྣ་ཚོགས་དུ་མ་སྟོན་པ་བཞིན་དུ། ཞེས་དང། དབྱིག་འགྲེལ་ལས། བག་ཆགས་ཀྱི་དུས་ན་སྣ་ཚོགས་མ་ཡིན་ཡང་འབྲས་བུའི་དུས་ན་རྣམ་པ་དུ་མའི་ཆོས་ཀྱི་རྒྱུའི་ངོ་བོ་མཐོང་སྟེ་བཙོས་པའི་གོས་བཞིན་ནོ། །ཞེས་རས་ཡུག་དཀར་པོ་གཅིག་ལ་ཚིག་གུའི་རྩིའམ་སྒྱུར་རྩི་གར་སླ་སྣ་ཚོགས་བསྒོས་ན་སྐབས་དེར་མདོག་མི་འདྲ་བ་མི་འཆར་ཡང། སླར་ཚོས་སྣོད་དུ་བཅུག་པའི་ཚེ་ཚིག་གུའི་རྩི་མི་འདྲ་བའི་ནུས་པས་མདོག་བཟང་ངན་སྣ་ཚོགས་འབྱུང་བ་དཔེར་བྱས་ནས་གསུངས་སོ། །རྩོད་པ་བཞི་པ་ཡང་མི་འཐད་དེ། སོ་ཐར་གྱི་སྡོམ་པ་སྤོང་སེམས་ས་བོན་དང་བཅས་པར་བཤད་པ་ནི། སྤོང་སེམས་
ཀྱི་ཤུགས་མ་ཉམས་པའི་དབང་གིས་ཉེས་ལྟུང་འབྱུང་བར་རྩོམ་པ་ན་དྲན་ཤེས་སྐྱེས་ཏེ་འགོག་ནུས་ཤིང་ཡུན་ཇི་ཙམ་བསྲུང་བ་བཞིན་དུ་རྣམ་སྨིན་གོང་འཕེལ་དུ་འགྲོ་བའི་དོན་ཡིན་གྱི་དགེ་བ་ཡིན་བཞིན་པར་ཡོད་པའི་དོན་མ་ཡིན་པའི་ཕྱིར་ཏེ། དེ་ལྟར་མ་ཡིན་ན་དགེ་མི་དགེ་གཉིས་རྒྱུད་གཅིག་ལ་ཅིག་ཅར་འཇུག་དགོས་པས་སྣང་མུན་ལྷན་གཅིག་སྐྱེ་བ་ལྟར་ཧ་ཅང་ཐལ་བའི་ཕྱིར། ལས་གྲུབ་པའི་རབ་བྱེད་ལས། སེམས་གཡེང་བ་དང། སེམས་མེད་པ་དག་ལ་སེམས་པ་དེ་མེད་ན་སྡོམ་པ་དང་སྡོམ་པ་མ་ཡིན་པ་གཉིས་ཇི་ལྟར་ཡོད་ཅེ་ན༌། སྡོམ་པའི་ཁྱད་པར་གྱི་བག་ཆགས་མ་བཅོམ་པའི་ཕྱིར། སྡོམ་པ་དང་སྡོམ་པ་མ་ཡིན་པ་གཉིས་ཀ་ཡོད་དོ། །ཞེས་དང། བཤད་སྦྱར་ལས། ནུས་པའི་རང་བཞིན་གྱི་ཁྱད་པར་གྱི་ཕྱིར་རོ་ནས། ནུས་པ་ཡང་ནུས་པ་ཅན་ལས་དེ་ཉིད་དང། གཞན་དུ་བརྗོད་པར་བྱ་བ་མ་ཡིན་ནོ། །ཞེས་དང། དཀའ་འགྲེལ་ལས། ཚུལ་ཁྲིམས་ཀྱི་རྒྱུན་སྡོམ་པའི་ནུས་པ་ཡོད་ན་དེ་ཙམ་གྱིས་སྔར་བླངས་པའི་སྡོམ་པ་ཡོད་པར་འཇོག་ནུས་ལ། ཞེས་པ་ནས། འགྲེལ་པ་གཉིས་ཀར་ལུང་མ་བསྟན་དུ་བཀྲལ་བས་ལུང་མ་བསྟན་དུ་གྲུབ་བོ། །ཞེས་གསུངས་པའི་ཕྱིར། འོན་ཀྱང་དེ་འདྲའི་སྐབས་ཀྱི་སྡོམ་པ་དགེ་བ་ཡིན་མིན་དང། དགེ་མི་དགེ་ཅིག་ཅར་འབྱུང་བ་མེད་ན་མི་གསོད་པ་གཞན་ལ་བཅོལ་ཏེ། རང་ཉིད་དགེ་སེམས་ཞིག་ལ་གནས་བཞིན་པའི་སྐབས་སུ་ཕ་རོལ་པོ་དེས་མི་གསོད་པའི་དངོས་གཞི་གྲུབ་ན་འདི་ལ་ཕམ་པ་འབྱུང་མི་འབྱུང་སོགས་སྤྲོས་པས་ཆོག་གོ །ཁ་ཅིག་བག་ཆགས་ལུང་མ་བསྟན་དུ་
བཤད་པ་ནི། ཞེ་སྡང་ལྟ་བུའི་བག་ཆགས་ལ་དེའི་རྒྱུན་དུ་གྱུར་བའི་ས་བོན་གྱི་ངོ་བོའི་བག་ཆགས་ཉོན་སྒྲིབ་ཏུ་གཏོགས་པ་ཞིག་དང། དེས་བཞག་པའི་བག་ཆགས་ཤེས་སྒྲིབ་ཀྱིས་བསྡུས་པ་གཉིས་ཡོད་པའི་ཕྱི་མ་ལ་དགོངས་ཟེར་བ་ནི་སྙིང་པོ་མེད་པའི་གཏམ་སྟེ། དེ་ལྟར་ན་རྩོད་ལན་དེ་ཐམས་ཅད་འབྲེལ་མེད་ཁོ་ནར་འགྱུར་བའི་ཕྱིར་དང། དེ་སླད་སྨྲ་བ་ནི་ཀུན་གཞི་དང་བག་ཆགས་བྱ་བའི་རྫས་སོ་སོ་བ་རེ་ལོགས་སུ་ཡོད་པར་གོ་བའི་སྐྱོན་ཡིན་པའི་ཕྱིར། དེར་ཐལ། ཞིང་ལ་འབྲས་བུ་སྣ་ཚོགས་བཏབ་པ་རྣམས་ཕན་ཚུན་དབྱིབས་དང་ཁ་དོག་མི་འདྲ་ཞིང། ཞིང་ལས་ངོ་བོ་ཐ་དད་དུ་ཕྱེ་ནས་ཟུར་དུ་སྟོན་རྒྱུ་ཡོད་པ་ལྟར་བག་ཆགས་ནང་ཕན་ཚུན་ཡང་དགེ་མི་དགེ་ལུང་མ་བསྟན་གྱི་རིགས་མི་འདྲ་ཞིང་བསྒོ་གཞིའི་བདག་ཉིད་དུ་གྱུར་པ་མ་ཡིན་པར་དེ་ལས་ལོགས་སུ་ཕྱེ་ན་ངོ་བོ་བཞག་ཏུ་ཡོད་པར་འཁྲུལ་པ་གང་ཞིག །དེ་ལྟར་གནས་ན་རང་རྐྱ་འཛིན་ཐུབ་པའི་རྫས་ཡོད་དུ་འགྱུར་ལ། དེ་ལྟར་མ་ཡིན་པར་ཀུན་གཞི་རང་ཉིད་རྣམ་སྨིན་དེ་དང་དེ་འབྱིན་པའི་ནུས་ལྡན་དུ་གྱུར་པ་ལ་དེས་བག་ཆགས་བཞག་ཅེས་བཏགས་པ་ཙམ་ཡིན་པས་བག་ཆགས་བཏགས་ཡོད་དུ་གསུངས་པའི་ཕྱིར། དཔེར་ན་མཚོན་བརྡར་དེ་གཅོད་བྱ་གཅོད་ནུས་སུ་གྱུར་པ་ལ་རྣོ་བ་ཞེས་བཏགས་ཙམ་ཡིན་གྱི་རྣོ་བ་མཚོན་ལས་ལོགས་སུ་མེད་པ་ལྟ་བུ་ཡིན་པའི་ཕྱིར། འདིའི་རྒྱུ་མཚན་གྱིས་སྔར་དྲངས་པའི་བཤད་སྦྱར་དང། རྗེ་བཙུན་རེད་མདའ་བས་བག་ཆགས་གསར་རྙིང་བསྒོ་ཚུལ་དཔྱོད་པ་གནས་མ་ཡིན་པར་གསུངས་པ་ཡང་བསྒོ་བྱ་བསྒོ་བྱེད་གཉིས་རྫས་ཡོད་ཀྱི་སོ་སོ་བར་བཟུང་ནས་སྔ་ཕྱི་དཔྱོད་པ་བཀག་པ་ཡིན་ནོ། །དེས་ན་རྩ་བར། བག་
ཆགས་དེ་ཉིད་རྟེན་ལས་ནི། །རྫས་གཅིག་ཐ་དད་གང་ཡང་མིན། །ཞེས་གསུངས་པ་ཡང། ཐེག་བསྡུས་ལས། གང་དེ་འབྱུང་བའི་མཐུའི་ཁྱད་པར་ཅན་ཀུན་གཞིའི་རྣམ་པར་ཤེས་པ་དེ། ཞེས་གསུངས་པ་ལྟར་བསྒོ་བྱེད་དེས་བསྒོ་གཞི་དེ་ནུས་ལྡན་དུ་བྱས་པའི་ཆ་ལ་བག་ཆགས་ཞེས་བཏགས་པ་ཡིན་པས་བག་ཆགས་རྫས་སུ་གྲུབ་ན་རྟེན་བརྟེན་པའི་འབྲེལ་བ་ཡང་རྫས་གྲུབ་ཏུ་འགྱུར་ལ། དེ་རྫས་སུ་གྲུབ་ན་རྫས་གྲུབ་ཀྱི་གཅིག་དང་དུ་མ་གང་རུང་ལས་མ་འདས་ཀྱང། དེ་གང་དུའང་ཁས་ལེན་དུ་མི་རུང་ཞེས་པའི་དོན་ཡིན་པའི་ཕྱིར། དེར་ཐལ། དེ་གཉིས་འབྲེལ་བ་རྫས་གྲུབ་ཀྱི་གཅིག་མ་ཡིན་པ་གང་ཞིག །དེའི་དུ་མའང་མ་ཡིན་པའི་ཕྱིར། དང་པོ་མ་གྲུབ་ན། ཀུན་གཞི་དང་བག་ཆགས་གཉིས་ཆོས་ཅན། ཆ་གང་ནས་ཀྱང་སོ་སོར་དབྱེ་རྒྱུ་མེད་པའི་གཅིག་ཡིན་པར་ཐལ། འབྲེལ་བ་རྫས་གྲུབ་ཀྱི་སྒོ་ནས་གཅིག་ཏུ་གནས་པའི་ཕྱིར། ཁྱབ་སྟེ། འབྲེལ་བ་བཏགས་ཡོད་ཙམ་ལ་ངོ་བོ་གཅིག་ཏུ་གནས་ཀྱང་ལྡོག་པ་ཐ་དད་པ་རུང་ལ། འབྲེལ་བ་རྫས་གྲུབ་ལ་ངོ་བོ་གཅིག་ཡིན་ན་ལྡོག་པ་ཡང་གཅིག་ཡིན་དགོས་པར་འདོད་པའི་ཕྱིར་ཏེ། དཔེར་ན་ཐལ་འགྱུར་བ་སོགས་ཀྱིས་ཀུན་རྫོབ་ཏུ་ངོ་བོ་གཅིག་ལ་ལྡོག་པ་ཐ་དད་རུང་ཡང་དོན་དམ་པར་ངོ་བོ་གཅིག་ཡིན་ན་དེར་སྣང་གི་བློ་ལ་སྣང་ཚུལ་དེ་གནས་ལུགས་མཐར་ཐུག་ཡིན་པས་ལྡོག་པ་ཡང་གཅིག་ཏུ་འདོད་དགོས་ཞེས་བཤད་པ་བཞིན་ཡིན་པའི་ཕྱིར། གོང་དུ་འདོད་ན། ཀུན་གཞིའི་སྟེང་གི་ས་བོན་དེས་ཀྱང་དམིགས་རྣམ་འཛིན་པ་དང། འགྲོ་བ་ལྔར་འཕེན་བྱེད་ཀྱི་དགེ་མི་དགེ་རྣམས་དང། ཁམས་སོ་སོའི་བག་ཆགས་རྣམས་ཀྱང་
ཕན་ཚུན་ཡིན་ཁྱབ་མཉམ་ཡིན་པར་ཐལ། དེ་དག་རེ་རེ་ནས་རྩ་བའི་ཀུན་གཞི་དང་ལྡོག་པ་གཅིག་ཡིན་པའི་ཕྱིར། ཁྱབ་སྟེ། ས་བོན་དམིགས་རྣམ་ཡོད་པ་དང། །འགྲོ་བ་ལྔ་ཡིས་ས་བོན་རྣམས། །འཆོལ་བ་ཉིད་དུ་འགྱུར་ཕྱིར་དང། །ཁམས་ཀྱང་འཆོལ་ཕྱིར་གཅིག་ཉིད་མིན། །ཞེས་གསུངས་པའི་ཕྱིར། རྩ་རྟགས་གཉིས་པ་མ་གྲུབ་ན། དེ་གཉིས་ཆོས་ཅན། འབྲེལ་མེད་དོན་གཞན་ཡིན་པར་ཐལ། རྫས་གྲུབ་ཀྱི་ཐ་དད་ཡིན་པའི་ཕྱིར། ཁྱབ་སྟེ། སྤྱིར་ཐ་དད་ཙམ་དུ་མ་ཟད་རྒྱུ་འབྲས་ལྟ་བུ་ངོ་བོ་ཐ་དད་ལ་ཡང་འབྲེལ་མེད་དོན་གཞན་མི་དགོས་ཀྱང་རྫས་གྲུབ་ཀྱི་ཐ་དད་ལ་དེ་དགོས་པའི་ཕྱིར། དེར་ཐལ། དེ་གཉིས་ཐ་དད་པའི་ཆ་དེ་རྫས་སུ་གྲུབ་ན་རྣམ་པ་ཐམས་ཅད་ནས་མ་འདྲེས་པའི་ཐ་དད་ཡིན་དགོས་པའི་ཕྱིར། ཐེག་བསྡུས་འགྲེལ་པ་ལས། ཐ་དད་ན་ནི་ཡན་ལག་ཐམས་ཅད་ཀྱིས་ཀྱང་ཐ་དད་པ་ཉིད་ཐོབ་པར་འགྱུར་ཞིང། ཞེས་གསུངས་པའི་ཕྱིར་དང། འཇུག་པ་ལས། གང་དག་རང་མཚན་ཉིད་ཀྱིས་སོ་སོ་བ། །དེ་དག་རྒྱུད་གཅིག་གཏོགས་པ་རིགས་མ་ཡིན། །ཞེས་ངོ་བོ་ཉིད་ཀྱིས་ཐ་དད་ཡིན་ན་རྒྱུད་གཅིག་ལ་གནས་པ་ཡང་མི་རུང་བར་བཤད་པའི་རིགས་པ་དང་འགྲོས་མཐུན་པར་སྣང་བའི་ཕྱིར། གོང་དུ་འདོད་ན། སོ་སྐྱེའི་རྒྱུད་ཀྱི་བག་ཆགས་དེ་ཆོས་ཅན། ཁྱོད་ཀྱང་ཀུན་གཞིའི་རྣམ་ཤེས་གཅིག་ཡིན་པར་ཐལ། གཟུགས་དང་ལྡན་མིན་རྣམ་ཤེས་ཚོགས་བདུན་གང་ཡང་མ་ཡིན་པའི་ཚུར་མཐོང་རྒྱུད་ཀྱིས་བསྡུས་པའི་ཆོས་གཅིག་ཡིན་པའི་ཕྱིར། དཀའ་འགྲེལ་ལས། གཟུགས་དང་ལྡན་མིན་དང་ཚོགས་བདུན་གང་ཡང་མ་ཡིན་ཏེ། རྫས་སུ་གྲུབ་པ་དང། གཟུགས་མེད་ན་ཡོད་པ་དང། ཞེས་སོགས་གསུངས་པའི་ཕྱིར། འདིའི་
རྫས་གྲུབ་ཅེས་པ་ལྡན་མིན་ཞེས་པ་དང་སྦྱོར་དགོས་པས། ཁ་ཅིག་འདིའི་ཐ་དད་མ་ཡིན་པ་རྫས་ཐ་དད་མ་ཡིན་པ་ཙམ་ལ་བྱེད་པ་མ་འབྲེལ་ཏེ། དེ་ལྟར་ན་ལྡན་མིན་མ་ཡིན་ཏེ། རྫས་ཐ་དད་ཡིན་པའི་ཕྱིར། ཞེས་ཟེར་དགོས་པས་རྟ་གླང་གཉིས་ཀྱང་རྫས་ཐ་དད་མ་ཡིན་པར་འགྱུར་རོ། །དེས་ན་སྔར་ལྟར་རྫས་གྲུབ་ཀྱི་ཐ་དད་མ་ཡིན་པ་ལ་བྱེད་པ་གཞུང་གི་དགོངས་པ་རྨ་མེད་པའོ། །གོང་དུ་འདོད་ན། སོ་སྐྱེ་དེ་ཆོས་ཅན། རྒྱུད་ཐ་དད་པ་ཅན་ཡིན་པར་ཐལ། ཁྱོད་ཀྱི་རྒྱུད་ལ་ཀུན་གཞི་གཉིས་ཡོད་པའི་ཕྱིར་ཏེ། རྣམ་སྨིན་དང་ས་བོན་གྱི་ཆ་རེ་རེ་ནས་ཀུན་གཞི་ཡིན་པའི་ཕྱིར། རྟགས་ཁས། ཁྱབ་སྟེ། རྩ་བར། རྟེན་གཅིག་ལ་ནི་ཀུན་གཞི་གཉིས། །འཇུག་པར་འགྱུར་བས་སོ་སོ་མིན། །ཞེས་གསུངས་པའི་ཕྱིར། བྱས་པ་ལ་ཁོ་ན་རེ། ཁྱོད་ལྟར་ན་ཡང་རྒྱུད་དུ་མར་འགྱུར་བར་ཐལ། དེའི་རྒྱུད་ལ་རྣམ་ཤེས་ཚོགས་བདུན་ཡོད་པ་གང་ཞིག །སེམས་སེམས་བྱུང་དུ་མ་ཡོད་པའི་ཕྱིར་ན་མ་ཁྱབ་སྟེ། ཚོགས་བདུན་ཀུན་གཞི་ལ་བརྟེན་ནས་འཇུག་ཅིང། སེམས་བྱུང་རྣམས་སེམས་ལ་བརྟེན་ནས་འཇུག་དགོས་པས་རྒྱུད་རང་རྐྱ་བར་མི་འགྱུར་བ་གང་ཞིག །ཀུན་གཞི་གཉིས་ཡོད་ན་གཉིས་ཀ་ཕན་ཚུན་ལྟོས་མི་དགོས་པའི་བརྟན་པ་རང་དབང་ཅན་གྱི་རྣམ་ཤེས་ཡིན་དགོས་པས་རྒྱུད་དུ་མར་འགྱུར་བའི་ཕྱིར། ཡང་ཁོ་ན་རེ། ཁྱོད་ཀྱིས་རྫས་གྲུབ་ཀྱི་གཅིག་ཐ་དད་ཅེས་བཤད་པ་དཀྱོག་བཤད་ཡིན་པར་ཐལ། རྩ་བ་དང། དཀའ་འགྲེལ་གང་དུ་ཡང་རྫས་གཅིག་ཐ་དད་གང་ཡང་མིན་ཞེས་བཤད་པ་མ་གཏོགས་རྫས་གྲུབ་ཀྱི་ཟུར་ཙམ་ཡང་མ་བྱུང་
བའི་ཕྱིར་ཟེར་ན། ཤིན་ཏུ་མི་འཐད་པར་ཐལ། དཀའ་འགྲེལ་དུ་དྲངས་པའི་ཐེག་བསྡུས་ལས། དེ་ལ་གནས་པ་དེ་དག་དང་རྫས་སུ་ཐ་དད་ཡང་མ་ཡིན། ཐ་མི་དད་པའང་མ་ཡིན། ཞེས་གསུངས་ལ། དེར་དྲངས་པའི་དོན་གསང་དང། བཤད་སྦྱར་གཉིས་ཀར་རྫས་སུ་ཐ་དད་པ་ཡང་མ་ཡིན། ཞེས་འབྱུང་ཞིང། ཡང་ས་བོན་ནི་བཏགས་པའི་ཡོད་པ་ཡིན་གྱི་རྫས་སུ་ཡོད་པ་ནི་མ་ཡིན་ནོ། །ཞེས་དབྱིག་འགྲེལ་གྱི་ལུང་དྲངས་པ་དང། ནུས་པ་བཏགས་ཡོད་ནུས་པ་ཅན་རྫས་ཡོད་དུ་བཞེད་པའི་ཞེས་སོགས་ཤིན་ཏུ་མང་ལ། རྩ་བར་སྒྲུབ་བྱེད་ཀྱི་དོན་བསྡུས་ཏེ་འཆད་པ་ན། བཏགས་ཡོད་ཙམ་དུ་གནས་ཕྱིར་རོ། །ཞེས་གསུངས་པས་སྔ་མ་རྫས་ཡོད་བཀག་པ་ཡིན་པར་ཤིན་ཏུ་གསལ་བའི་ཕྱིར། དེར་མ་ཟད་དཔེ་དང་ལུང་གིས་བསྒྲུབ་ཚུལ་གྱིས་ཀྱང་ཤེས་ཏེ། དཀའ་འགྲེལ་ལས། ཆོས་ཀྱི་རྗེས་ཀྱང། ཤིང་མིན་ལས་ལྡོག་དངོས་པོ་དེ། །ཤ་པ་ཡིན་ན་གཞན་ཤིང་ཡིན། །དེ་ཡི་རང་བཞིན་གཞན་མིན་ཕྱིར། །ཞེས་ཤིང་མ་ཡིན་པ་ལས་ལྡོག་པའི་དངོས་པོ་དེ་ཤ་བ་དང་རྫས་གཅིག་གམ་ཐ་དད། ཅེས་པ་ནས། ཞེས་གསུངས་པའི་རིགས་པ་དང་རྗེས་སུ་མཐུན་ནོ། །ཞེས་རིགས་གཏེར་གྱི་བསྒྲུབ་ཚུལ་དེ་དང་མཐུན་པར་གསུངས་པ་གང་ཞིག །དེས་འབྲེལ་བ་རྫས་གྲུབ་བཀག་པ་ཡིན་པའི་ཕྱིར། ཕྱི་མ་དེར་ཐལ། རིགས་གཏེར་རང་འགྲེལ་ལས། དེའི་མཚམས་སྦྱོར་དུ། བཞི་པ་སེལ་བ་དངོས་པོར་གྲུབ་མ་གྲུབ་བརྟགས་ནས་མི་འཐད་པ་སྤང་བ་ནི། ཞེས་པ་ནས། ལྡོག་པ་དང་སྤྱི་དངོས་པོར་ཁས་བླངས་པ་དེས་ཆོས་ཀྱི་གྲགས་པས་གང་བཀག་པ་དེ་སྙིང་ནད་
ཀྱི་ཁས་བླངས་པ་ཡིན་ནོ། །ཞེས་གསུངས་ཤིང། རྣམ་འགྲེལ་ལས། དེ་ཡིས་ཇི་ལྟར་ཀུན་བཏགས་པ། །དེ་ནི་དམ་པའི་དོན་དུ་མེད། །གསལ་བ་རྣམས་ནི་རྗེས་མི་འགྲོ། །རྗེས་འགྲོ་གཞན་ནི་སྣང་བ་མེད། །ཅེས་ཤིང་དང་ཤ་པ་གཉིས་སྤྱི་གསལ་དུ་གྲུབ་པའི་འབྲེལ་བ་རྫས་གཅིག་ཡོད་ན་ཆ་ཐམས་ཅད་ནས་འདྲེས་དགོས་པས་ཤིང་གིས་གང་ཁྱབ་ལ་ཤ་བས་ཁྱབ་པ་སོགས་ཀྱིས་ཤ་ཤུག་གཉིས་ཀྱང་ཕན་ཚུན་འདྲེས་པར་འགྱུར་བའམ། ཡང་ན་གསལ་བ་རྫས་སོ་སོ་བ་ཡོད་པ་ལྟར་ཤིང་སྤྱི་ཡང་རྫས་སོ་སོ་བ་ཡོད་དགོས་པ་ལ། དེ་ལྟ་བུ་རྫས་གཞན་ནི་བློ་མ་འཁྲུལ་བ་ལ་སྣང་རྒྱུ་མེད་ཅིང་གལ་ཏེ་ཡོད་ན་ཤིང་ཙམ་དེ་གང་གི་ཡང་སྤྱི་མ་ཡིན་པར་འགྱུར་བས་ཤ་བ་ཤིང་མ་ཡིན་པར་ཐལ་བ་འཕེན་ཚུལ་རིགས་གཏེར་དང་གཉིས་ཀ་མཐུན་པའི་ཕྱིར། དེར་ཐལ། སྤྱི་གསལ་གྱི་འབྲེལ་པ་རྫས་གྲུབ་ལ་བཀོད་པའི་སྐྱོན་དེ་རྟེན་བརྟེན་པའི་འབྲེལ་པ་རྫས་གྲུབ་ལ་ཡང་འཇུག་པ་དཀའ་འགྲེལ་གྱི་ལུང་དོན་གང་ཞིག །དེ་ཆོས་ཀྱི་གྲགས་པའི་དགོངས་པ་ཡིན་པའི་ཕྱིར། དང་པོ་བསྒྲུབས་ཟིན། གཉིས་པ་གྲུབ་སྟེ། རྣམ་འགྲེལ་ལས། ཆོས་དང་ཆོས་ཅན་རྣམ་གཞག་དང། །ཐ་དད་ཐ་དད་མིན་ཅི་འདྲ། །དེ་ཉིད་དོན་ནི་མ་བཏགས་པར། །འཇིག་རྟེན་ཇི་ལྟར་གྲགས་དེ་ལ། །དེ་བཞིན་ཁོ་ནར་བརྟེན་ནས་ནི། །བསྒྲུབ་བྱ་བསྒྲུབ་པ་ཀུན་བཞག་ལ། །དམ་པའི་དོན་ལ་འཇུག་བྱའི་ཕྱིར། །མཁས་པ་རྣམས་ཀྱིས་བྱས་པ་ཡིན། །ཞེས་བྱ་བྱེད་ཀྱི་འབྲེལ་པའི་ཆ་རྣམས་རྟོག་པ་འཁྲུལ་པའི་སྣང་ངོ་ཙམ་ལ་ལྟོས་ནས་འཇོག་
དགོས་པའི་བཏགས་ཡོད་དུ་མཚུངས་པར་གསུངས་པའི་ཕྱིར། དེར་ཐལ། དེའི་རྒྱུ་མཚན། དེ་དག་བཏགས་ཡོད་ཡིན་ན་བཏགས་ཡོད་ནི་བློ་འཁྲུལ་པའི་དབང་གིས་འཇོག་ནུས་པས་སྤྱི་གསལ་དང་རྟེན་བརྟེན་པ་སོགས་འདྲེར་རུང་གི་ཚུལ་དུ་སྣང་ཡང་དོན་ལ་འདྲེས་མི་དགོས་ཀྱང་རྫས་ཡོད་ལ་དེ་ལྟར་མ་ཡིན་པའི་ཕྱིར། རིགས་གཏེར་དར་ཊཱིཀ་ལས། ཤིང་མ་ཡིན་པ་ལས་ལོག་པར་སྣང་བ་དངོས་པོ་ཡིན་ན་དེར་སྣང་གི་བློ་མ་འཁྲུལ་བར་འགྱུར་ལ། དེ་ལྟ་ན་རྟོག་མེད་མ་འཁྲུལ་བའི་གཟུང་དོན་ཆ་དང་ཆ་ཅན་གྱིས་དབེན་པར་སྣང་གི་ཆ་ཅན་མི་སྣང་བས་ཤ་བ་ལ་རྗེས་སུ་འགྲོ་བའི་ཆ་ཤུག་པ་ལ་ཡང་རྗེས་སུ་འགྲོ་བར་ཁས་ལེན་དགོས་པས། ཞེས་དང། རྣམ་འགྲེལ་ཊཱིཀ་ཆེན་ལས། སྣང་བ་དེ་དམ་པའི་དོན་དུ་མེད་དེ། དོན་དམ་པར་ཡོད་ན་དེ་འཛིན་གྱི་སྤྱི་བློ་དེ་སྣང་ཡུལ་ལ་མ་འཁྲུལ་བར་འགྱུར་ལ། དེ་ལྟ་ན་ཤིང་གི་སྤྱི་བློ་དེ་ལ་ཤིང་གསལ་རྣམས་རང་བཞིན་འདྲེས་པར་སྣང་བས་ཤིང་གསལ་རྣམས་རང་བཞིན་འདྲེས་དགོས་ནའང། ཞེས་དང། ཤིང་གི་སྤྱི་འཛིན་ཤེས་པ་ལ་ཤིང་དུ་སྣང་བ་དེ་དངོས་པོར་གྲུབ་ན་དེར་སྣང་གི་རྟོག་པ་དེ་སྣང་ཡུལ་ལ་མ་འཁྲུལ་བར་འགྱུར་ལ། དེ་ལྟར་ན་སྣང་བ་དེ་ཉིད་དུ་ཐལ། དེ་ལ་ཤིང་དུ་སྣང་བ་གང་ཞིག །དེ་སྣང་ཡུལ་ལ་མ་འཁྲུལ་པའི་ཕྱིར། ཞེས་སོགས་གསུངས་པའི་ཕྱིར། དེས་ན་འདིར་གསལ་བ་རྣམས་ཕན་ཚུན་འདྲེས་པའམ་སྤྱི་རྫས་གཞན་ཡོད་པའི་ཉེས་པ་བརྗོད་ཚུལ་དང་ཀུན་གཞིའི་བག་ཆགས་ཕན་ཚུན་འཆོལ་བའམ་ཀུན་གཞི་རྫས་གཞན་ཡོད་པའི་འགལ་བ་བརྗོད་ཚུལ་ཤིན་ཏུ་མཚུངས་པའི་
ཕྱིར་ཏེ། དཀའ་འགྲེལ་ལས། དེས་ན་ཇི་སྲིད་གསལ་བ་རྣམས་ལས་མ་གཏོགས་པའི་སྤྱི་རྫས་སུ་གྲུབ་པར་འདོད་པ་དེ་སྲིད་དུ་རྫས་གཅིག་དང་ཐ་དད་བརྟག་པའི་སྐྱོན་སྤོང་མི་ནུས་སོ། །ཞེས་གསུངས་པའི་ཕྱིར། དཀའ་གནད་རྗེན་པར་བཤད་ཡོད་དོ། །ཡང་བཤད་སྦྱར་གྱི་དོན་དུ་བྱས་ནས་ས་བཟང་གིས་ལྡོག་པ་དེ་ཉིད་དུ་བརྗོད་དུ་མེད་ཅིང་རྫས་གཞན་དུ་བརྗོད་དུ་མེད་པ་ཞེས་བྱའོ། །ཞེས་གསུངས་པ་མི་འཐད་དེ། དེ་ལྟར་ན་དོན་གསང་དུ་ཡང་བྱེ་མདོ་གཉིས་ཀའི་འདོད་ཚུལ་རེ་བཀོད་ཡོད་པས་དོན་གསང་མཁན་པོས་དེ་གཉིས་ཀ་བཞེད་པར་འགྱུར་བའི་ཕྱིར་དང། དཀའ་འགྲེལ་ལས། རྫས་གཅིག་ལྡོག་པ་ཐ་དད་དུ་འདོད་པ་ནི་གཞུང་ལུགས་གཞན་གྱི་ཆོས་སྐད་འཆུགས་པས་རང་སྐད་མ་ཐོན་པ་ཡིན་ནོ། །ཞེས་གསུངས་པའི་ཕྱིར། བྱས་པ་ལ་ཁོ་ན་རེ། ཀུན་གཞི་དང་དེའི་སྟེང་གི་བག་ཆགས་གཉིས་རྫས་གཅིག་ལྡོག་པ་ཐ་དད་མ་ཡིན་པར་ཐལ། དཀའ་འགྲེལ་གྱི་ལུང་དེའི་ཕྱིར་ན་མ་ཁྱབ་སྟེ། སྐབས་འདིའི་རྫས་གཅིག་ཐ་དད་གང་ཡང་མིན་ཞེས་པའི་དོན་དེ་ལ་མི་བྱེད་ཅེས་པ་ཡིན་པའི་ཕྱིར། འདོད་མི་ནུས་ཏེ། འདུ་བྱས་གང་ཞིག །ངོ་བོ་གཅིག་ལ་ལྡོག་པ་ཐ་དད་ཡིན་པའི་ཕྱིར། ཡང་ཁོ་ན་རེ། དེ་གཉིས་ཀ་ཆོས་ཅན། རྫས་གཅིག་མ་ཡིན་པར་ཐལ། རྫས་གཅིག་དང་ཐ་དད་གང་ཡང་མ་ཡིན་པའི་ཕྱིར། དེར་ཐལ། རྫས་ཡོད་མ་ཡིན་པའི་ཕྱིར། ཁྱབ་སྟེ། གཅིག་དང་ཐ་དད་གང་རུང་ཡིན་ན་ཡོད་པས་ཁྱབ་པ་གང་ཞིག །སྤྱིའི་ཁྱབ་པ་གྲུབ་ན་བྱེ་བྲག་གི་ཁྱབ་པ་ཡང་འགྲུབ་དགོས་པའི་
ཕྱིར་ཟེར་ན་མི་འཐད་པར་ཐལ། རྫས་ཡོད་ཅེས་པའི་རྫས་དང་རྫས་གཅིག་ཐ་དད་ཅེས་པའི་རྫས་མི་འདྲ་བའི་ཕྱིར། དེར་ཐལ། སྔ་མ་རང་རྐྱ་འཛིན་ཐུབ་པའི་རྫས་ལ་བྱེད་ཕྱི་མ་དོན་བྱེད་ནུས་པའི་རྫས་ལ་བྱེད་པའི་ཕྱིར། དང་པོ་གྲུབ་སྟེ། བསྡུ་བ་ལས། དེ་ལས་གཞན་པ་དག་ལ་མི་ལྟོས་ཤིང་དེ་ལས་གཞན་པ་དག་ལ་མི་བརྟེན་པར་རང་གི་མཚན་ཉིད་འདོག་པར་བྱེད་པ་དེ་ནི་མདོར་ན་རྫས་སུ་ཡོད་པ་ཡིན་པར་བལྟ་བར་བྱའོ། །ཞེས་གསུངས་པའི་ཕྱིར། གཉིས་པ་གྲུབ་སྟེ། སྤྱིར་རྫས་ཀྱི་སྒྲ་འཇུག་ཚུལ་ལ་རྟོག་གེ་འབར་བ་ལས། རྫས་ཀྱི་མཚན་ཉིད་སྤྱི་ནི་བྱ་བ་དང་ལྡན་པ་དང། འདུ་བའི་རྒྱུར་གྱུར་པ་ཞེས་སོགས་གསུངས་པ་ལྟ་བུ་དུ་མ་ཡོད་ཀྱང་འདིར་རྒྱུ་འབྲས་ཀྱི་ཁྱད་པར་ལ་བྱེད་པའི་ཕྱིར། དེར་ཐལ། གཟུགས་དང་གཟུགས་འཛིན་ཚད་མ་གཉིས་བག་ཆགས་གཅིག་གིས་བསྐྱེད་པས་རྫས་གཅིག་པར་བཤད་པའི་ཕྱིར། གཞན་ཡང་ཁྱོད་ལྟར་ན་དེ་གཉིས་རྫས་གཅིག་མ་ཡིན་པར་ཐལ། དེ་གཉིས་བཏགས་ཡོད་ཡིན་པའི་ཕྱིར་ཏེ། ལྡན་མིན་འདུ་བྱེད་ཡིན་པའི་ཕྱིར། འདོད་ན། ལྷན་ཅིག་དམིགས་ངེས་ཡིན་ན་རྫས་གཅིག་མ་ཡིན་པས་ཁྱབ་པར་ཐལ། སྔོན་པོ་དང་སྔོ་འཛིན་མིག་ཤེས་གཉིས་ཀྱང་རྫས་གཅིག་མ་ཡིན་པའི་ཕྱིར། རྟགས་ཁས། འདོད་ན། རྣམ་ངེས་ལས། ལྷན་ཅིག་དམིགས་པ་ངེས་པའི་ཕྱིར། །སྔོ་དང་དེ་བློ་གཞན་མ་ཡིན། །ཞེས་པ་དེ་སྔོ་དང་དེ་བློ་གཅིག་མ་ཡིན་ཞེས་བཟློག་རིགས་པར་ཐལ་ལོ། །རྟགས་འདིའི་བསྒྲུབ་བྱ་ལ་དེ་གཉིས་རྫས་གཅིག་པ་འགོད་པར་རྣམ་འགྲེལ་ཊཱིཀ་ཆེན་དང་ལྕང་སྐྱ་
རིན་པོ་ཆེའི་གྲུབ་མཐར་གསུངས་ལ། ཡིག་ཆའི་སྐབས་ལྔ་པར་དངོས་ཟིན་དེ་ལྟར་བཀོད་ན་རྗེས་ཁྱབ་མི་འགྲུབ་པས་མི་རུང་བར་གསུངས་ཀྱང་རྟགས་དེ་ལ་བརྟེན་ནས་རྫས་གཅིག་ཏུ་རྟོགས་དགོས་པར་དགོངས་པ་མཐུན་ནོ། །ཀུན་གཞི་དང་བག་ཆགས་གཅིག་ཐ་དད་ཀྱི་དཔྱད་ཚུལ་འདིར་དོན་གསང་ལས། བག་ཆགས་མ་སྒྲིབ་ལུང་མ་བསྟན་དུ་ཐལ་བ་འཕངས་པ་ཐེག་བསྡུས་དང་འགལ་ཞེས་རྗེ་བཙུན་རེད་མདའ་བས་བཀག་པ་ཤིན་ཏུ་ལེགས་ལ་དེ་སོགས་མཁས་པའི་བཞེད་ཚུལ་དཔྱད་དགོས་མང་ཡང་ཚིག་ཚོགས་ཆེས་དོགས་པས་མ་སྤྲོས། ཁ་ཅིག་ན་རེ། ཀུན་གཞིའི་རྣམ་ཤེས་ས་བོན་ཐམས་ཅད་པ་མ་ཡིན་པར་ཐལ། དེ་ལ་མི་གནས་པའི་ཕྱིའི་ས་བོན་ཡོད་པའི་ཕྱིར་ན་མ་ཁྱབ་སྟེ། ཕྱིའི་ས་བོན་དེ་ཡང་ཀུན་གཞིའི་སྟེང་གི་ས་བོན་ལ་བརྟེན་ནས་འབྱུང་དགོས་པའི་ཕྱིར། བྱས་པ་ལ་ཁོ་ན་རེ། ཕྱི་སྣོད་ཀྱི་འཇིག་རྟེན་འབྱུང་འཇིག་ཀུན་གཞི་ལ་མི་ལྟོས་པར་ཐལ། གང་ཟག་ཤི་འཕོས་ཀྱང་དེའི་ལས་དབང་གིས་གྲུབ་པའི་སྣོད་མི་འཇིག་པའི་ཕྱིར། དེར་ཐལ། མི་གཅིག་ཤི་ན་དེའི་ལས་དབང་གིས་གྲུབ་པའི་ཁང་པ་ལྟ་བུ་འཇིག་མི་དགོས་པ་མངོན་སུམ་གྱིས་གྲུབ་པའི་ཕྱིར་ཟེར་ན། གོང་དུ་མ་ཁྱབ་སྟེ། སྣོད་འགྲུབ་བྱེད་ཀྱི་བག་ཆགས་ལ་ཚོར་མེད་དང་ཐུན་མོང་བའི་བག་ཆགས་ཞེས་བཤད་པའི་རྒྱུ་མཚན་གང་ཟག་དུ་མའི་སྤྱི་མཐུན་གྱི་ལས་ཀྱིས་འགྲུབ་དགོས་པས་གང་ཟག་རེ་རེ་ཤི་འཕོས་པ་ན་དེའི་ལོངས་སྤྱད་བྱའི་ཆ་འགགས་ཀྱང་རྩ་བའི་སྣོད་སྤྱི་ལྡོག་དེ་འགག་མི་དགོས་པའི་ཕྱིར། དེར་ཐལ། བསམ་
གཏན་བཞི་པའི་སྣོད་ལྟ་བུར་རང་རང་གི་ཐུན་མོང་མ་ཡིན་པའི་ལས་ལས་གྲུབ་པས། མཛོད་ལས། སེམས་ཅན་བཅས་ཏེ་འབྱུང་འཇིག་ཕྱིར། །ཞེས་གསུངས་པ་ལྟར་མཉམ་དུ་འགགས་པའང་ཡོད་ལ་གཞན་རྣམས་སྤྱི་མཐུན་གྱི་ལས་ཅན་མཐའ་དག་གི་ལས་ཀྱི་ནུས་པ་རྫོགས་པ་ན་སྣོད་ཀྱང་འགགས་ཏེ་བསྐལ་པ་འཇིག་པའི་ཕྱིར། དེར་ཐལ། མར་མེ་བརྒྱ་མཉམ་དུ་སྦར་བའི་ཚེ་འོད་སོ་སོར་བསྟན་དུ་མེད་ཀྱང་རིམ་གྱིས་འགག་པའི་མཐར་གསལ་ཆ་གཏན་མེད་དུ་འགྲོ་བ་བཞིན་ཡིན་པའི་ཕྱིར། དེར་ཐལ། ལྷས་སྦྱིན་གྱི་ཀུན་གཞིའི་སྟེང་ནའང་འཛམ་གླིང་གི་སྣོད་འགྲུབ་བྱེད་ཀྱི་བག་ཆགས་ཞིག་མེད་ན་དེས་དེར་ལོངས་སྤྱོད་མི་ནུས་པའི་ཕྱིར། ལམ་རིམ་ལས། འབྲས་བུ་ལ་ལོངས་སྤྱོད་པ་རྣམས་ཀྱིས་དེའི་རྒྱུ་ཐམས་ཅད་བསགས་མི་དགོས་ཀྱང་ཆ་གཅིག་བསགས་དགོས་པ་ཡིན་ནོ། །ཞེས་གསུངས་པའི་ཕྱིར། ཡང་ཁོ་ན་རེ། ཕྱིའི་ས་བོན་བཤད་པའི་རྒྱུ་མཚན་ཡོད་དེ། ཕྱིའི་ས་བོན་གང་བཏབ་མ་འཆོལ་བར་སྐྱེ་བ་དཔེར་བྱས་ནས་ནང་གི་ས་བོན་ཡང་དེ་ལྟར་འབྱུང་བ་རྟོགས་པའི་ཆེད་ཡིན་པའི་ཕྱིར་ཟེར་ན། རྒྱུ་མཚན་དེ་ཙམ་མ་ཡིན་པར་ཐལ། ནང་གི་ས་བོན་བཤད་པའི་ཟླས་དྲངས་ཏེ་བཤད་པ་ཡིན་ལ་ཕྱིའི་ས་བོན་འགའ་ཞིག་རིགས་མཐུན་མ་བཏབ་པ་ལས་ཀྱང་སྐྱེ་བ་ཡོད་ལ་ནང་གི་ས་བོན་ལ་དེ་འདྲ་མི་སྲིད་པས་ཕྱིའི་ས་བོན་ལས་ཀྱང་ནང་གི་ས་བོན་གཙོ་ཆེ་ཞིང་མི་འཆོལ་བར་བཤད་པ་ཡིན་པའི་ཕྱིར། དེར་ཐལ། ཏིལ་དང། ཨུཏྤ་ལའི་རྩ་བ་དང། དུར་བ་གསུམ་རང་རང་མ་བཏབ་ཀྱང་
རིམ་བཞིན་སོལ་བ་དང། བ་ལང་གི་ལྕི་བ་དང། ལུག་གི་བལ་ལས་སྐྱེ་བ་ཡོད་པར་བཤད་སྦྱར་ལས་གསུངས་པའི་ཕྱིར། ཡང་ཁ་ཅིག་ན་རེ། ས་བོན་ལ་ནང་གི་ས་བོན་གཅིག་མེད་པར་ཐལ། ས་ལུ་འགྲུབ་བྱེད་ཀྱི་ས་བོན་ནང་གི་ས་བོན་གཅིག་མེད་པའི་ཕྱིར། དེར་ཐལ། ས་ལུའི་ས་བོན་ལ་ནང་གི་ས་བོན་གཅིག་མེད་པའི་ཕྱིར་ན་མ་ཁྱབ་སྟེ། འཇིག་རྟེན་གྱི་ཐ་སྙད་གཙོ་ཆེ་བའི་ཕྱིར། ཡང་ཁོ་ན་རེ། མྱུ་གུ་ས་བོན་ལས་སྐྱེ་བར་རྟོགས་པ་ལ་ཀུན་གཞི་རྟོགས་དགོས་པར་ཐལ། དེ་སྐྱེད་བྱེད་ཀྱི་ས་བོན་ལ་ཀུན་གཞིའི་སྟེང་གི་ས་བོན་ཞིག་ཡོད་པའི་ཕྱིར་ན་ཡང་མ་ཁྱབ་སྟེ། མྱུ་གུ་སྐྱེ་བར་རྟོགས་ན་དེའི་རྒྱུར་གྱུར་པའི་ལས་ཉོན་ཐམས་ཅད་རྟོགས་མི་དགོས་པའི་ཕྱིར། བྱས་པ་ལ་འོ་ན། ཀུན་གཞིའི་སྟེང་གི་ས་བོན་ལས་སྐྱེ་བར་རྟོགས་ན་ཀུན་གཞི་རྟོགས་དགོས་པར་ཐལ། དམ་བཅའ་འཐད་པའི་ཕྱིར། འདོད་ན། བཅུ་གཅིག་པ་སྐྱེ་བའི་རྟེན་འབྲེལ་དེ་ཀུན་གཞིའི་སྟེང་གི་འཕེན་བྱེད་ལས་ཀྱི་བག་ཆགས་ལས་བྱུང་བར་རྟོགས་ན་ཀུན་གཞི་རྟོགས་དགོས་པར་ཐལ། འདོད་པའི་ཕྱིར། འདོད་ན། དེ་བཅུ་པ་སྲིད་པའི་རྟེན་འབྲེལ་ལས་བྱུང་བར་རྟོགས་ན་ཀུན་གཞི་རྟོགས་པས་ཁྱབ་པར་ཐལ། བཅུ་པ་སྲིད་པའི་རྟེན་འབྲེལ་དེ་ཀུན་གཞིའི་སྟེང་གི་བག་ཆགས་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། རྟེན་འབྲེལ་མདོ་འགྲེལ་ལས། བག་ཆགས་ཀྱི་གནས་སྐབས་ལ་སྲིད་པའི་མིང་ཐོབ་པ་ཡིན་ནོ། །ཞེས་གསུངས་པའི་ཕྱིར། མ་ཁྱབ་མཚམས་ལ་འདོད་མི་ནུས་ཏེ། དེ་རྟོགས་པའི་ཐེག་
དམན་རིགས་ངེས་ཡང་ཡོད་ཐེག་དམན་གྱི་གྲུབ་མཐའ་སྨྲ་བ་ཡང་ཡོད་པ་གང་ཞིག །ཀུན་གཞི་རྟོགས་པའི་དེ་དག་མེད་པའི་ཕྱིར། རྟགས་ཟུར་དང་པོ་གྲུབ་སྟེ། ཐེག་དམན་འཕགས་པ་ཡིན་ན་ཡན་ལག་བཅུ་གཉིས་མངོན་སུམ་དུ་རྟོགས་པས་ཁྱབ་པའི་ཕྱིར། དེར་ཐལ། རྣལ་འབྱོར་སྤྱོད་པའི་ས་ལས། རྒྱུན་ཏུ་ཞུགས་པས་ཡན་ལག་དུ་ཞིག་སྤངས་ཞེ་ན། ཐམས་ཅད་ཀྱི་ཕྱོགས་གཅིག་སྟེ། ཞེས་གསུངས་པའི་ཕྱིར། ཁྱབ་སྟེ། དེས་ངན་འགྲོའི་ཡན་ལག་བཅུ་གཉིས་སྤངས་པའི་ཕྱིར་དང། ཡན་ལག་བཅུ་གཉིས་མ་རྟོགས་པར་ཡན་ལག་བཅུ་གཉིས་ཀྱིས་བསྡུས་པའི་འཁོར་བ་སྤོང་ཚུལ་མེད་པའི་ཕྱིར། རྟགས་ཟུར་གཉིས་པ་གྲུབ་སྟེ། བྱེ་བྲག་སྨྲ་བར་གྱུར་པའི་བྱང་སེམས་ཡོད་པའི་ཕྱིར། ཁྱབ་སྟེ། དེས་ཡན་ལག་བཅུ་གཉིས་ལུགས་འབྱུང་ལྡོག་གཉིས་ཀར་རྟོགས་པའི་ཕྱིར། དེར་ཐལ། དེས་སྡུག་ཀུན་གཉིས་རྟོགས་པའི་ཕྱིར་ཏེ། འཁོར་བ་ལས་ངེས་པར་འབྱུང་འདོད་དང་ཐར་པ་ཐོབ་འདོད་ཀྱི་བློ་བཅོས་མིན་སྐྱེས་པའི་ཕྱིར། ཁྱབ་སྟེ། སའི་དངོས་གཞི་ལས། བདེན་པའི་ཚུལ་བསྟན་པའི་དབང་དུ་བྱས་ཏེ་འདི་ལྟར་སྐྱེ་བ་དང་རྒ་ཤི་ནི་སྡུག་བསྔལ་གྱི་བདེན་པའི་རབ་ཏུ་ཕྱེ་བའོ། །ཞེས་དང། རྗེའི་གསུང་མགུར་ལས། སྡུག་བདེན་ཉེས་དམིགས་བསམ་ལ་མ་འབད་ན། །ཐར་པ་དོན་གཉེར་ཇི་བཞིན་མི་སྐྱེ་ཞིང། །ཞེས་སོགས་གསུངས་པའི་ཕྱིར། རྟགས་ཟུར་གསུམ་པ་གྲུབ་སྟེ། དགོངས་འགྲེལ་ལས། ལེན་པའི་རྣམ་པར་ཤེས་པ་ཟབ་ཅིང་ཕྲ། །ཞེས་གསུངས་པའི་ཕྱིར། ཁྱབ་སྟེ། ཟབ་པ་འཇིག་རྟེན་རང་དགའ་བས་མ་རྟོགས་པ་དང་ཕྲ་བ་ཉན་རང་གིས་རྟོགས་མི་ནུས་པ་ལ་བྱེད་པའི་ཕྱིར། བཤད་
སྦྱར་ལས། ཕྲ་བ་ནི་ཉན་ཐོས་རྣམས་ཀྱིས་ཀྱང་ཤེས་པར་དཀའ་བའི་ཕྱིར་རོ། །དེའི་ཕྱིར་དེ་དག་ཤེས་བྱ་ཕྲ་བ་ཐམས་ཅད་ཤེས་པའི་སྐབས་མ་ཡིན་པས་ཉན་ཐོས་རྣམས་ལ་མ་བཤད་དོ། །ཞེས་གསུངས་པའི་ཕྱིར། གཞན་ཡང་དེ་ལྟར་ཡིན་པར་ཐལ། ཀུན་གཞི་མ་རྟོགས་པར་ཐར་པ་ཐོབ་ནུས་པ་གང་ཞིག །ཐམས་ཅད་མཁྱེན་པ་ཐོབ་མི་ནུས་པའི་ཕྱིར། དང་པོ་གྲུབ་སྟེ། ཐེག་བསྡུས་ལས། དེ་དག་ནི་བསྟན་པ་མེད་པར་ཡང་ཤེས་པར་རབ་ཏུ་གྲུབ་པས། ཞེས་དང། བཤད་སྦྱར་ལས། དེ་བསྟན་པ་མེད་པར་ཡང་ཞེས་བྱ་བ་ལ་སོགས་པ་ནི་ཉན་ཐོས་རྣམས་ལ་ཀུན་གཞིའི་རྣམ་པར་ཤེས་པ་མ་བསྟན་ཀྱང། ཞེས་པ་ནས། ཉོན་མོངས་རྣམས་སྤོང་སྟེ། ཞེས་གསུངས་པའི་ཕྱིར། གཉིས་པ་གྲུབ་སྟེ། ཐེག་བསྡུས་ལས། དེ་ཤེས་པ་མེད་པར་ཐམས་ཅད་མཁྱེན་པའི་ཡེ་ཤེས་ཐོབ་པར་སླ་བ་མ་ཡིན་ནོ། །ཞེས་གསུངས་པའི་ཕྱིར། དེ་ལ་ཁོ་ན་རེ། རིགས་ངེས་རྒྱུན་ཞུགས་ཆོས་ཅན། ཁྱོད་ཀྱིས་གསུམ་པ་རྣམ་ཤེས་ཀྱི་རྟེན་འབྲེལ་རྟོགས་པར་ཐལ། ཡན་ལག་བཅུ་གཉིས་རྟོགས་པའི་ཕྱིར། འདོད་ན། ཀུན་གཞི་རྟོགས་པར་ཐལ། དེ་ཀུན་གཞི་ཡིན་པའི་ཕྱིར་ན་མ་ཁྱབ། ཁྱོད་རང་ལ་དེ་ཆོས་ཅན། ཁྱོད་ཀྱིས་ཕྱི་རོལ་དོན་དུ་མ་གྲུབ་པའི་བུམ་པ་རྟོགས་པར་ཐལ། བུམ་པ་རྟོགས་པ་གང་ཞིག །བུམ་པ་དེ་ཡིན་པའི་ཕྱིར། ཁྱབ་པ་འགྲིག་བྱས་པ་ལ། དེ་མི་མཚུངས་པར་ཐལ། བུམ་པ་དེ་ཕྱི་རོལ་དོན་དུ་མ་གྲུབ་པའི་བུམ་པ་ཡིན་ཀྱང་རྟོགས་ཚེ་དེའི་ཁྱད་པར་དུ་བྱེད་མི་དགོས་པར་བུམ་པ་སྤྱི་ཙམ་རྟོགས་པར་བཞག་ཆོག་པའི་ཕྱིར་ཟེར་ན། གསུམ་པ་རྣམ་
ཤེས་དེ་ཀུན་གཞི་ཡིན་ཀྱང་རྟོགས་པའི་ཚེ་སྣོད་བཅུད་ཀུན་གྱི་གཞི་ཡིན་ཚུལ་གྱི་ཁྱད་པར་དུ་བྱེད་མི་དགོས་པར་རྣམ་ཤེས་སྤྱི་ཙམ་རྟོགས་པར་བཞག་ཆོག་པའི་ཕྱིར་བྱ་བའི་ལན་བྱ་རོག་གིས་མ་ཟོས་སོ། །ཡང་ཁ་ཅིག་ན་རེ། ཉན་ཐོས་སྡེ་བ་ལ་ཀུན་གཞི་ལུང་གིས་བསྒྲུབ་པ་མི་འཐད་པར་ཐལ། ཐེག་དམན་ལ་གྲགས་པའི་ལུང་གིས་ཀུན་གཞི་དངོས་སུ་བསྟན་པ་མེད་པའི་ཕྱིར། དེར་ཐལ། ཐེག་དམན་གྱི་ལུང་ལ་ཀུན་གཞི་དངོས་སུ་སྟོན་པ་མེད་པའི་ཕྱིར་ན་མ་ཁྱབ་སྟེ། དེ་ལ་གྲགས་ཞེས་སྨོས་པའི་རྒྱུ་མཚན་ཡོད་པའི་ཕྱིར། དེར་ཐལ། ལུང་གཅིག་ལས་འཕྲོས་པའི་ནང་གི་སྐྱེ་དགུ་ཀུན་གཞི་ལ་དགའ་བ་ཞེས་སོགས་ཀྱི་ལུང་འདི་ཐེག་དམན་གྱི་ལུང་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། རང་གི་ཆེད་དུ་བྱ་བའི་གདུལ་བྱ་ཉན་ཐོས་སྡེ་བའི་རིགས་ཅན་ལ་གདམས་པའི་མདོ་ཡིན་པར་ཐལ། ཐེག་དམན་གྱི་མདོ་ཡིན་པའི་ཕྱིར། འདོད་མི་ནུས་ཏེ། དེའི་ཆེད་དུ་བྱ་བའི་གདུལ་བྱ་ཉན་ཐོས་སྡེ་པ་མེད་པའི་ཕྱིར། དེར་ཐལ། ཀུན་གཞི་དངོས་སུ་སྟོན་ཡུལ་གྱི་ཉན་ཐོས་སྡེ་པ་མེད་པའི་ཕྱིར། དེར་ཐལ། ཆོས་ཀྱི་བདག་མེད་ཕྲ་མོ་དངོས་སུ་སྟོན་ཡུལ་གྱི་ཉན་ཐོས་སྡེ་པ་མེད་པའི་ཕྱིར། མ་ཁྱབ་ན། ཆོས་ཀྱི་བདག་མེད་ཕྲ་མོ་དངོས་སུ་སྟོན་ཡུལ་གྱི་དེ་མེད་པར་ཐལ། མ་ཁྱབ་པ་དེའི་ཕྱིར། འདོད་མི་ནུས་ཏེ། ཁྱོད་ལྟར་ན་སྲིད་པ་འཕོ་བའི་མདོ་ལས། མིང་ནི་གང་དང་གང་གིས་སུ། །ཞེས་སོགས་ཀྱི་ཚིགས་བཅད་འདིའི་ཆེད་དུ་བྱ་བའི་གདུལ་བྱ་དེ་སྟོང་ཉིད་དངོས་སུ་སྟོན་ཡུལ་གྱི་དེ་ཡིན་པའི་ཕྱིར། དེར་ཐལ། དེ་སྟོང་ཉིད་དངོས་སུ་སྟོན་པའི་ཐེག་དམན་གྱི་ལུང་
ཡིན་པའི་ཕྱིར། དེར་ཐལ། དེ་དངོས་སུ་སྟོན་བྱེད་ཀྱི་ཐེག་དམན་གྱི་མདོའི་ནང་གི་ཚིག་ཡིན་པའི་ཕྱིར་དང། ཐེག་དམན་རང་ལ་གྲགས་པའི་ལུང་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། ཐེག་དམན་གྱི་ལུང་ལས་ཆོས་ཀྱི་བདག་མེད་དངོས་སུ་བསྟན་པར་ཐལ་འགྱུར་བ་མ་གཏོགས་པས་ཁས་མི་ལེན་པའི་ཕྱིར། འཇུག་འགྲེལ་ལས། གང་ཞིག་གལ་ཏེ་ཉན་ཐོས་ཀྱི་ཐེག་པ་ལས་ཀྱང་ཆོས་ལ་བདག་མེད་པ་བསྟན་ན་དེའི་ཚེ་ཐེག་པ་ཆེན་པོ་བསྟན་པ་དོན་མེད་པར་འགྱུར་རོ་སྙམ་དུ་སེམས་པ་དེའི་ལུགས་དེ་ཡང་འདི་ལྟར་རིགས་པ་དང་ལུང་དང་འགལ་བར་རྟོགས་སོ། །ཞེས་གསུངས་པའི་ཕྱིར། ཁྱབ་སྟེ། དེ་དངོས་སུ་དགག་ཡུལ་ལེགས་ལྡན་ཡིན་ཀྱང་དེ་ལྟར་འདོད་པ་ལ་སེམས་ཙམ་པ་དང་རང་རྒྱུད་པ་མཚུངས་པའི་ཕྱིར། སྟོང་ཐུན་ལས། སེམས་ཙམ་པ་དང་དབུ་མ་རང་རྒྱུད་པ་གཉིས་ཀའང་ཐེག་དམན་གྱི་སྡེ་སྣོད་ལས་ཆོས་ཀྱི་བདག་མེད་ཅུང་ཟད་ཀྱང་མ་བསྟན་པར་འདོད་པ་ལ་ཁྱད་པར་མེད་ཅིང། ཞེས་གསུངས་པའི་ཕྱིར། ཡང་ཁ་ཅིག །ཐེག་ཆེན་གྱི་ལུང་གིས་ཀུན་གཞི་བསྒྲུབ་ཡུལ་གྱི་ཉན་ཐོས་སྡེ་པ་རིགས་པའི་རྗེས་འབྲང་ཡོད་ཀྱང་ལུང་གི་རྗེས་འབྲང་མེད་དེ། དེས་ཐེག་ཆེན་བཀར་ཁས་མི་ལེན་པའི་ཕྱིར་ཟེར། དེ་ལ་སྐྱོན་འཕེན་པ་ཁ་ཅིག་ན་རེ། ལུང་གིས་བསྒྲུབ་ཡུལ་གྱི་དེ་ཡོད་པར་ཐལ། ལུང་ལས་གསུངས་པའི་རིགས་པས་བསྒྲུབ་པ་ཡོད་པའི་ཕྱིར་དང། ཀུན་གཞི་སྒྲུབ་བྱེད་ཀྱི་རྟགས་སྦྱོར་ལ་ལུང་གི་ཚིག་ཡོད་པའི་ཕྱིར་ན་མ་ཁྱབ། ཁྱོད་རང་ལ་བསྒྲུབ་བྱ་དེ་བསྒྲུབ་ན་དཔྱད་གསུམ་གྱིས་དག་པའི་ལུང་
གིས་བསྒྲུབ་པས་ཁྱབ་པར་ཐལ། དེ་འདྲའི་ལུང་ལས་གསུངས་པའི་རྟགས་སྦྱོར་གྱིས་བསྒྲུབ་པས་ཁྱབ་པའི་ཕྱིར། འདོད་ན། བསྒྲུབ་བྱ་ཡིན་ན་ཤིན་ལྐོག་ཡིན་པས་ཁྱབ་པར་ཐལ་ལོ། །ཡང་ཁོ་ན་རེ། ཀུན་གཞིའི་སྒྲུབ་བྱེད་དུ་དྲངས་པའི་ཐེག་དམན་ལ་གྲགས་པའི་ལུང་དེ་ཆོས་ཅན། ཕྱི་དོན་འགོག་བྱེད་ཡིན་པར་ཐལ། ཀུན་གཞི་སྒྲུབ་བྱེད་ཡིན་པའི་ཕྱིར། འདོད་ན། ཉན་ཐོས་སྡེ་པ་འགོག་བྱེད་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་དག་གིས་ལུང་དེ་རང་གཞུང་དུ་ཁས་ལེན་པའི་ཕྱིར་ན་མ་ཁྱབ་སྟེ། དེས་དོན་ལ་ཀུན་གཞི་བསྟན་པ་ཡིན་ཀྱང་དེ་དག་ཀུན་གཞི་སྟོན་བྱེད་དུ་མི་འདོད་པའི་ཕྱིར། དེར་ཐལ། ཀུན་གཞི་ལ་དགའ་བ་ཞེས་པའི་ཀུན་གཞི་དེ་དབྱིག་བཤེས་ཀྱི་ཉེར་ལེན་གྱི་ཕུང་པོ་ལ་བཤད། བཙུན་པ་མིའུ་ཐུང་གིས་ཚོར་བ་བདེ་བ་ལ་བཤད། དབྱངས་སྒྲོགས་ཀྱིས་འཇིག་ལྟ་ལ་བཤད་པའི་ཕྱིར། རྩ་བར། དེ་ལྟར་གསུངས་པའི་ཀུན་གཞི་ལ། །དབྱིག་བཤེས་མིའུ་ཐུང་དབྱངས་སྒྲོགས་གསུམ། །རིམ་བཞིན་ཕུང་པོ་ཚོར་བ་དང། །འཇིག་ལྟ་གསུམ་ལ་དགོངས་ཞེས་ཟེར། །ཞེས་གསུངས་པའི་ཕྱིར། སློབ་དཔོན་དེ་གསུམ་གྱི་བཞེད་ཚུལ་དེ་ཡང་ཁས་ལེན་རུང་བར་ཐལ། ཚུལ་དེ་མི་རུང་མེད་མོད་ཀྱི། ཞེས་གསུངས་པའི་ཕྱིར་ན་མ་ཁྱབ། འདོད་མི་ནུས་ཏེ། ཐེག་བསྡུས་ལས། དེ་གསུམ་ལའང་རིམ་པ་བཞིན་སྡུག་བསྔལ་གྱིས་གཟིར་ནས་འཆི་བ་དོན་དུ་གཉེར་བའི་གང་ཟག་དང། བསམ་གཏན་བཞི་པ་ཡན་ཆད་དང། བདག་འཛིན་ལ་སྐྱོན་དུ་ལྟ་བའི་སོ་སྐྱེས་རྣམས་དེ་དག་ལ་དགའ་བ་མི་འཐད་པའི་སྐྱོན་བརྗོད་པའི་ཕྱིར། ཡང་ཁ་ཅིག །
ཀུན་གཞི་མེད་ན་ལུས་ལེན་པ་པོ་མེད་མི་དགོས་པར་ཐལ། ཉིང་མཚམས་སྦྱར་མ་ཐག་པའི་རྒྱུད་ལ་རྣམ་སྨིན་དུ་གྱུར་པའི་ཉོན་མོངས་ཅན་གྱི་སེམས་གཅིག་ཡོད་པའི་ཕྱིར། མཛོད་ལས། སྐྱེ་བའི་སྲིད་པ་ཉོན་མོངས་ཅན། །ཞེས་གསུངས་པའི་ཕྱིར་ན་མ་ཁྱབ་སྟེ། ཆགས་སྡང་གང་རུང་གིས་ཉེ་རྒྱུ་བྱེད་པའི་ཆ་ནས་ཉོན་མོངས་སུ་བཏགས་པ་ཡིན་ཞིང། གྲུབ་མཐའ་གཞན་གྱི་སྐབས་ཡིན་པའི་ཕྱིར། ཁོ་ན་རེ། ཉིང་མཚམས་སྦྱར་མ་ཐག་པའི་བྱང་སེམས་ཀྱི་རྒྱུད་ལ་སེམས་བསྐྱེད་མེད་པར་ཐལ། དམ་བཅའ་འཐད་པའི་ཕྱིར་ཟེར་ན། དེ་ཡོད་པར་ཁས་ལེན་གྲགས་ཆེ་ཡང་འདིའི་གཞུང་གོང་འོག་གི་བཤད་ཚུལ་གཞིར་བཞག་ན་མེད་པར་མངོན་ནོ། །འོ་ན་དེ་ཆོས་ཅན། བྱང་སེམས་མ་ཡིན་པར་ཐལ། སེམས་བསྐྱེད་རྒྱུད་ལ་མི་ལྡན་པའི་གང་ཟག་ཡིན་པའི་ཕྱིར་ཟེར་ན། མ་གྲུབ་སྟེ། དེའི་ས་བོན་དང་ལྡན་པས་དེ་ལྡན་པར་བཞག་ཆོག་པའི་ཕྱིར། དེ་རྣམ་མཁྱེན་དང་ལྡན་པར་ཐལ། དེར་ས་བོན་དང་ལྡན་པའི་ཕྱིར་ན་མི་མཚུངས་ཏེ། འདི་ཐོབ་འགྱུར་གྱི་ནུས་པ་ཙམ་ཡིན་ལ། གཅིག་ཤོས་སྔར་མངོན་གྱུར་དུ་ཐོབ་པ་དེའི་ས་བོན་ཡིན་པའི་ཕྱིར། འདི་ཡང་ཁྱབ་མཐའ་བཟུང་བ་མིན་ཏེ། སྡོམ་པ་མངོན་གྱུར་ཐོབ་ནས་བཏང་བའི་རྗེས་སུའང་དེའི་ས་བོན་ཡོད་པའི་ཕྱིར། རིགས་པ་གཉིས་པའི་སྐབས་སུ། ས་བཟང་ན་རེ། གཟུགས་མཐོང་འདོད་ནས། ཆོས་ཤེས་པར་འདོད་པའི་བར་གྱི་ཡིད་བྱེད་དྲུག་ཅིག་ཅར་སྐྱེ་བར་བཤད་པ་མི་འཐད་པར་ཐལ། དེའི་ཚེ་གཟུགས་
མཐོང་འདོད་ལྟ་བུའི་ཡིད་བྱེད་ཁྱད་པར་བ་ཞིག་ཀྱང་མེད་པའི་ཕྱིར། དེ་འདྲ་ཡོད་ན་དབང་ཤེས་གཞན་རྣམས་སྐྱེ་བ་ལ་གེགས་བྱེད་ཅིང། འདིར་ཆ་མཉམ་པའི་དོན་ཡིད་བྱེད་ཉེ་རིང་མེད་པར་གང་ཡིན་ཀྱང་སྐྱེ་རུང་གི་ཚུལ་དུ་ཡོད་པ་ལ་བྱེད་པའི་ཕྱིར། དེར་ཐལ། སུམ་ཅུ་པའི་འགྲེལ་པ་ལས། དམིགས་པའི་རྐྱེན་དང་ཕྲད་ན་དེ་མ་ཐག་པའི་རྐྱེན་གཅིག་པུ་དེ་ལས་ཀྱང་རྣམ་པར་ཤེས་པ་གཉིས་སམ་མང་པོ་འབྱུང་སྟེ། ཞེས་རྐྱེན་གཉིས་ལས་ཡིད་བྱེད་མ་གསུངས་ཤིང། དཀའ་འགྲེལ་ལས་ཀྱང། མཐོང་འདོད་ཉན་ཐོས་ཀྱི་རྟོག་པ་གཉིས་ཅིག་ཅར་སྐྱེ་མི་སྲིད་པས། ཞེས་གསུངས་པའི་ཕྱིར། ཁོ་ན་རེ། སྐབས་འདིར་དབང་ཤེས་ཀྱི་ཡུལ་ལ་དེའི་དམིགས་རྐྱེན་དུ་བཤད་པ་མི་འཐད་པར་ཐལ། དེ་དེ་དང་བདག་ཉིད་གཅིག་ཡིན་པའི་ཕྱིར་ན་མ་ཁྱབ་སྟེ། དེའི་དམིགས་རྐྱེན་དངོས་མིན་ཀྱང་ཡོད་མེད་རྗེས་སུ་འགྲོ་ལྡོག་མི་འཁྲུལ་བའི་ཆ་ནས་སྣང་བའི་དམིགས་རྐྱེན་ནམ་དམིགས་རྐྱེན་བཏགས་པ་བར་བཞག་པའི་ཕྱིར་ཏེ། དམིགས་བརྟག་ལས། གཅིག་ཆའང་མི་འཁྲུལ་ཕྱིར་ན་རྐྱེན། །ཞེས་གསུངས་པའི་ཕྱིར། ཡང་ཁོ་ན་རེ། སྔོ་འཛིན་མིག་ཤེས་ཡུལ་གྱི་སྔོན་པོ་དེ་མིག་ཤེས་དེ་དང་བདག་ཉིད་གཅིག་མ་ཡིན་པར་ཐལ། དེའི་སྔ་རོལ་ནས་གྲུབ་པའི་ཕྱིར། དེར་ཐལ། དེའི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་མིག་དབང་དེས་མཐོང་དགོས་པའི་ཕྱིར་ཟེར་ན། འདི་ལ་མདོ་སེམས་སུའི་ལུགས་བྱས་ཀྱང་ཞིབ་ཆ་ཞིག་དགོས་པར་སྣང། གསལ་བ་མི་རུང་བའི་དོན་ཡང། ཁ་ཅིག །རྣམ་ཤེས་དུ་མ་ཅིག་ཅར་སྐྱེ་བ་མེད་
ན་དབང་མངོན་འདས་མ་ཐག་ཡུལ་དེ་གསལ་བར་སྣང་བའི་ཡིད་ཤེས་དང་སླར་དེ་མི་གསལ་བར་སྣང་བའི་ངེས་ཤེས་སྐྱེ་བ་འགལ་ཟེར། ཁ་ཅིག །ཡུལ་ད་ལྟ་བ་གསལ་བར་སྣང་བའི་ཡིད་ཤེས་དང་འདས་མ་འོངས་སོགས་མི་གསལ་བར་སྣང་བའི་ཡིད་ཤེས་གཉིས་མི་འཐད་པར་ཐལ་བ་འཕེན་ཟེར། དང་པོ་མི་འཐད་པར་ཐལ། རྣམ་ཤེས་དུ་མ་ཅིག་ཅར་མི་སྐྱེ་བར་འདོད་པ་ལ་རིམ་ཅན་དུ་མི་སྐྱེ་བར་ཐལ་བ་འཕེན་པ་བཞད་གད་ཡིན་པའི་ཕྱིར། གཉིས་པ་ཡང་མི་འཐད་པར་ཐལ། དེ་འདྲའི་ཡིད་ཤེས་གཉིས་ཅིག་ཅར་མངོན་གྱུར་དུ་མི་སྐྱེ་བར་རང་ཡང་འདོད་དགོས་ལ། རིམ་ཅན་དུ་མི་སྐྱེ་བར་ཐལ་བ་ཙམ་འཕངས་ན་འབྲེལ་མེད་པ་སྔ་མ་དང་འདྲ་བའི་ཕྱིར། དེར་ཐལ། སྔོན་པོ་མཐོང་བའི་དབང་ཤེས་མངོན་དུ་གྱུར་བཞིན་པའི་དུས་སུ་དེའི་ཡུལ་གྱི་སྔོན་པོ་དེ་ཡིད་ལ་ཡང་གསལ་བར་སྣང་དགོས་པས་དེ་རྟོགས་ཀྱི་ཡིད་མངོན་ཞིག་འབྱུང་ལ། དབང་མངོན་འདས་ཚེ་ཡུལ་སྔོན་པོ་དེ་ཡང་འདས་ཟིན་པས་ཕལ་བས་མངོན་སུམ་གྱི་ཡུལ་དུ་མི་འགྱུར་བར་དྲན་ཤེས་རྟོག་བཅས་ཀྱིས་གཞལ་དགོས་པའི་ཕྱིར། བསྡུ་བ་ལས། འདས་པའི་ཡུལ་མྱོང་བ་རྗེས་སུ་དྲན་པ་དེའི་ཚེ་ཡིད་ཀྱི་རྣམ་པར་ཤེས་པ་རྒྱུ་བ་ནི་གསལ་བ་མ་ཡིན་ལ། ད་ལྟར་གྱི་ཡུལ་ལ་རྒྱུ་བའི་ཡིད་ནི་དེ་ལྟར་མི་གསལ་བ་མ་ཡིན་ཏེ། ཞེས་གསུངས་པའི་ཕྱིར། ཁྱབ་སྟེ། འདིའི་ཡུལ་ད་ལྟ་བ་ཞེས་པ་སྤྱིར་ད་ལྟ་བ་ཙམ་ལ་མི་བྱེད་པར་དབང་ཤེས་དེ་ལ་ལྟོས་ནས་དེས་མྱོང་བཞིན་པ་དེར་འཇོག་དགོས་པའི་ཕྱིར། དཀའ་འགྲེལ་ལས། གལ་ཏེ་དབང་ཤེས་དང་དུས་
མི་མཉམ་ཡང་ད་ལྟར་བའི་ཡུལ་ཅན་ཡིད་ནི་གསལ་འདས་པ་ལྟ་བུ་མི་གསལ་བ་ཡིན་ནོ། །ཞེས་ན་མི་རུང་སྟེ་ཞེས་དང། རེད་མདའ་བའི་ཀུན་བཏུས་ཊཱིཀྐ་ལས། སེམས་གཉིས་ཅིག་ཅར་མི་འབྱུང་ན་དབང་བོའི་ཤེས་པ་དང་ལྷན་ཅིག་འབྱུང་བའི་ཡིད་ཀྱི་ཤེས་པ་མི་སྲིད་པས་དེའི་ཕྱིར་ཡུལ་གསལ་བར་འཛིན་པའི་ཡིད་ཀྱི་རྣམ་ཤེས་མི་རུང་བ་ཡིན་ནོ། །ཞེས་གསུངས་པའི་ཕྱིར། བྱས་པ་ལ་ཁོ་ན་རེ། ཡིད་མངོན་དེ་ལྟར་སྐྱེ་བ་མི་འཐད་པར་ཐལ། མཛོད་ལས། དྲུག་པོ་འདས་མ་ཐག་པ་ཡི། །རྣམ་ཤེས་གང་ཡིན་དེ་ཡིད་དོ། །ཞེས་དང། བློ་རིག་གི་མཐའ་དཔྱོད་ལས། ཡིད་མངོན་ཡིན་ན་དབང་མངོན་གྱི་རྗེས་སུ་བྱུང་བས་ཁྱབ་སྟེ། རྟོག་གེའི་སྐད་ལས་དབང་མངོན་འདས་མ་ཐག་ཏུ་ཡིད་མངོན་སྐྱེའོ། །ཞེས་སོགས་གསུངས་པའི་ཕྱིར་ན་མ་ཁྱབ་སྟེ། རྣམ་འགྲེལ་རང་ལུགས་དེ་ལྟར་ཡིན་ཀྱང་ལུང་གི་རྗེས་འབྲང་རྣམས་དེ་ལྟར་འདོད་མི་དགོས་པའི་ཕྱིར། དེར་མ་ཟད་རྣམ་འགྲེལ་གྱི་རྗེས་འབྲང་རྒྱན་མཁན་པོས་ཀྱང། གོམས་ལས་བདུན་ན་གནས་པ་ལ། །འདི་འོ་ཞེས་ན་ཤེས་པ་གང། །མངོན་སུམ་བྱེད་ཕྱིར་དེ་ལ་ནི། །ཡིད་ཀྱི་མངོན་སུམ་ཡིན་པར་འདོད། །ཅེས་པ་ལྟ་བུ་ཡོད་པས་སློབ་དཔོན་སོ་སོའི་བཞེད་ཚུལ་མ་འདྲེས་པ་དགོས་སོ། །སྔ་མའི་བསྒྲུབ་ཚུལ་དེ་ཡང་ཅུང་ཟད་གསལ་བར་བཤད་ན་འདི་ཡིན་ཏེ། མདུན་གྱི་སྐྱེས་བུ་ལན་འདེབས་པ་པོ་ཆོས་ཅན། ཁྱོད་ཀྱིས་བ་ལང་མངོན་སུམ་དུ་རྟོགས་པར་ཐལ། དེ་མངོན་སུམ་དུ་རྟོགས་པ་ལ་མངོན་ཤེས་དང་འཕགས་ལམ་སོགས་ཐོབ་མི་དགོས་པའི་ཕྱིར། འདོད་ན། དེ་ཆོས་ཅན། ཁྱོད་ཀྱིས་
བ་ལང་མིག་གིས་མཐོང་བཞིན་པའི་དུས་སུ་མངོན་སུམ་དུ་རྟོགས་པར་ཐལ། དེ་མངོན་སུམ་དུ་རྟོགས་པ་གང་ཞིག །ལྐོག་ཏུ་སོང་བའི་ཚེ་དྲན་པའི་བློ་དེ་རྟོག་པ་ཡིན་པའི་ཕྱིར་ཏེ། དེའི་ཚེ་བ་ལང་གི་རྣམ་པ་ལྟ་བུར་སྣང་བ་དེ་དོན་སྤྱིའི་སྣང་བ་ཡིན་པའི་ཕྱིར། གོང་དུ་འདོད་ན། དེ་ཆོས་ཅན། ཁྱོད་ཀྱི་རྒྱུད་ལ་དེ་མངོན་སུམ་དུ་རྟོགས་པའི་ཡིད་མངོན་ཡོད་པར་ཐལ། དེ་འདྲའི་མངོན་སུམ་ཡོད་ལ། དབང་མངོན་མེད། རྣལ་འབྱོར་མངོན་སུམ་མེད། རང་རིག་ས་སྡེ་ལས་མ་གསུངས་ཤིང་ཡོད་ཀྱང་འཛིན་རྣམ་ཡན་གར་བ་ཡིན་དགོས་པའི་ཕྱིར། དང་པོ་གྲུབ་སྟེ། དེ་མིག་ཤེས་ཀྱི་གཟུང་བྱ་མ་ཡིན་པའི་ཕྱིར། ཞེས་པ་ཡིན་ལ། དེས་མཚོན་ཏེ་རྒྱང་རིང་པོའི་མེ་ཆུ་སོགས་ཀྱང་མིག་གིས་མཐོང་བའི་ཚེ་ཡིད་ཀྱིས་མངོན་སུམ་དུ་རྟོགས་པར་མ་བཞག་ན་དེ་དག་མངོན་སུམ་དུ་རྟོགས་ཚུལ་བཞག་དཀའ་བར་སྣང་ཞིང། འདི་ལ་སྤྱི་དོན་རོལ་མཚོ་ལས། དེ་འདྲའི་ཡིད་མངོན་མེད་པ་རྣམ་འགྲེལ་དང་སྒོ་བསྟུན་པའི་ལུགས་སུ་བྱས་ཏེ་མིག་སྔོན་པོ་ལ་བལྟ་བཞིན་པའི་དུས་ཀྱི་སྔོན་པོ་དྲན་པའི་དྲན་ཤེས་གསུངས་པ་ནི་དེ་ལས་ཀྱང་མ་འབྲེལ། ཡང་ཁ་ཅིག །རིགས་པ་ལྔ་པའི་སྐབས་ཀྱི་རྣམ་རིག་བཞི་ག་དྲུག་པ་ཡིད་ཤེས་ཡིན་ཟེར་ན་མི་འཐད་པར་ཐལ། འདིའི་སྣོད་ཀྱི་རྣམ་རིག་ཅེས་པ་ཡུལ་ཕྱོགས་སྤྱིའི་སྣང་བ་དང། གནས་ཀྱི་རྣམ་རིག་ཅེས་པ་རང་གི་ལུས་རྐང་པ་འདེགས་འཇོག་སོགས་ཀྱི་སྣང་བ་ཡིན་པས་དེ་གཉིས་གོང་དུ་དོན་དང་སེམས་ཅན་ཞེས་པ་ལྟར་ཀུན་གཞི་ལ་སྦྱོར་དགོས་ཤིང༌། ངའོ་
སྙམ་པའི་རྣམ་རིག་ཉོན་ཡིད་དང༌། ཡུལ་གྱི་རྣམ་རིག་ཡུལ་དྲུག་སོ་སོར་སྣང་བའི་འཇུག་ཤེས་ལ་བྱེད་པའི་ཕྱིར། དཀའ་འགྲེལ་ལས་སོ། །ཡང་ཁ་ཅིག་ན་རེ། ཀུན་གཞི་མེད་ན་ལུས་ཚོར་མི་རུང་བ་མ་ཡིན་པར་ཐལ། ཀུན་གཞི་ཡོད་ཀྱང་ལུས་ཚོར་བདེ་སྡུག་སོགས་དེས་མྱོང་བ་མ་ཡིན་པའི་ཕྱིར་ན་མ་ཁྱབ་སྟེ། འདིས་བསྒྲུབ་ཚུལ་དེ་ལྟར་མ་ཡིན་པའི་ཕྱིར། དེར་ཐལ། ཡིད་གཞན་ལ་གཏད་བའི་ཚེ་ལུས་ལ་ཕན་གནོད་བྱས་པའི་ཚོར་བ་བདེ་སྡུག་སྐྱེ་བ་ཀུན་གཞིའི་སྟོབས་ཡིན་པའི་ཕྱིར། དེར་ཐལ། ལུས་ཚོར་བདེ་སྡུག་སྐྱེ་བ་ཡིད་བྱེད་ལ་མི་ལྟོས་ཀྱང་ནང་དུ་དེ་སྐྱེ་བའི་རྟེན་ཞིག་ཡོད་དགོས་པའི་ཕྱིར། རྟགས་ཟུར་དང་པོ་གྲུབ་སྟེ། མཛོད་རང་འགྲེལ་དང་གནད་སྒྲོན་གཉིས་ཀ་ལས། སེམས་ཀྱི་བདེ་བ་དང་སྡུག་བསྔལ་ནི་ཕལ་ཆེར་རྣམ་པར་རྟོག་པ་ལས་སྐྱེ་ཡི་ལུས་ཀྱི་ནི་མ་ཡིན་ནོ། །ཞེས་གསུངས་པའི་ཕྱིར། གཉིས་པ་གྲུབ་སྟེ། ནང་གི་སེམས་ལ་མི་ལྟོས་ན་རོ་ལ་མཚོན་བསྣུན་པས་ཀྱང་ལུས་ཚོར་སྐྱེ་བར་ཐལ་བའི་སྐྱོན་འབྱུང་བའི་ཕྱིར། དེ་བཞིན་དུ་གཉིད་འཐུག་ལོག་པའི་ཡིད་བྱེད་མེད་ཀྱང་ལུས་ལ་ཕན་གནོད་དང་དུང་སྒྲ་སོགས་ཀྱིས་གཉིད་བསླངས་ཏེ་དབང་ཤེས་སྐྱེ་བ་ཡང་གཉིད་ལོག་བཞིན་པའི་དུས་སུ་སྐྱེ་བའི་རྟེན་གྱི་རྣམ་ཤེས་གཅིག་ཡོད་པའི་རྒྱུ་མཚན་གྱིས་ཡིན་པའི་ཕྱིར། ཁོ་ན་རེ། སྐྱོན་མེད་དེ། དེའི་ཚེ་རྣམ་ཤེས་མེད་ཀྱང་སྒྲ་ཐོས་པ་སོགས་ཀྱི་ས་བོན་ཡོད་པའི་ཕྱིར་ཞེ་ན། དེས་སྐྱོན་སྤོང་མི་ནུས་པར་ཐལ། དེ་འདྲའི་ས་བོན་དེ་ཡང་རྣམ་ཤེས་གཅིག་ལ་བརྟེན་དགོས་པས་ཀུན་གཞི་ལས་མ་འདས་ཤིང་སྔ་མས་སྒྲུབ་ཚུལ་ཡང་ས་བོན་དེའི་སྟེང་ནས་བཤད་པ་ཡིན་པའི་ཕྱིར།
ཡང་ཁོ་ན་རེ། གཉིད་ལོག་པའི་ཚེ་དྲུག་པ་ཡིད་ཤེས་མེད་པར་ཐལ། སེམས་མེད་སྙོམས་འཇུག་གཉིས་དང་གཉིད་དང་བརྒྱལ་བ་སོགས་ཀྱི་ཚེ་དེ་མེད་པས་ཀུན་གཞི་མེད་ན་དེ་དག་མི་རུང་བར་ཐལ་བ་འཕེན་ཚུལ་ཡོད་པའི་ཕྱིར་དང༌། སུམ་ཅུ་པ་ལས། ཡིད་ཀྱི་རྣམ་ཤེས་འབྱུང་བ་ནི། །རྟག་ཏུའོ་འདུ་ཤེས་མེད་པ་དང༌། །སྙོམས་པར་འཇུག་པ་རྣམ་གཉིས་དང༌། །སེམས་མེད་གཉིད་དང་བརྒྱལ་མ་གཏོགས། །ཞེས་གསུངས་པའི་ཕྱིར་ན་མ་ཁྱབ། འདོད་མི་ནུས་ཏེ། གཉིད་ལོག་པའི་ཚེ་དྲུག་པ་ཡིད་ཤེས་ཡོད་པའི་ཕྱིར། དེར་ཐལ། དེའི་ཚེ་གཉིད་དང་མཚུངས་ལྡན་གྱི་སེམས་ཡོད་པའི་ཕྱིར། དེར་ཐལ། དེའི་ཚེ་གཉིད་ཡོད་པའི་ཕྱིར་དང༌། སེམས་སེམས་བྱུང་མཚུངས་ལྡན་རྣམ་པ་ལྔ་མཚུངས་ཡིན་པའི་ཕྱིར། གོང་གི་མ་ཁྱབ་མཚམས་ཀྱི་ལུང་དོན་ཡོད་དེ། གཉིད་སྲབ་མོའི་ཚེ་རྨི་ལམ་རྨིས་བྱེད་ཀྱི་ཤེས་པ་གཉིད་དང་མཚུངས་ལྡན་དུ་ཡོད་པ་མྱོང་བས་གྲུབ་ལ། གཉིད་འཐུག་པོ་ལོག་པའི་ཚེ་རྨི་ལམ་ཡང་མི་འབྱུང་བས་གཉིད་ཀྱི་ཤེས་པ་མེད་པར་འགྲུབ་པའི་ཕྱིར་ཏེ། སུམ་ཅུ་པའི་འགྲེལ་པ་ལས། སེམས་མེད་པའི་གཉིད་ནི་གཉིད་འཐུག་པོས་ནོན་པའི་ཕྱིར་དུས་དེ་སྲིད་གཅིག་ཏུ་ཡིད་ཀྱི་རྣམ་པར་ཤེས་པ་མི་འབྱུང་བས་སེམས་མེད་པ་ཞེས་བྱའོ། །ཞེས་གསུངས་ཤིང༌། གཞུང་གཞན་ལས་ཀྱང་གཉིད་འཐུག་གི་ཐིག་ལེ་དང་རྨི་ལམ་གྱི་ཐིག་ལེ་ཞེས་སྐབས་སོ་སོར་བཤད་པའི་རྒྱུ་མཚན་ཡོད་པའི་ཕྱིར། ཁོ་ན་རེ། གཉིད་འཐུག་པོ་ལོག་པའི་ཚེ་གཉིད་ཀྱི་ཤེས་པ་ཡོད་པར་ཐལ། དེའི་ཚེ་གཉིད་འཐུག་པོ་
ལོག་པའི་ཕྱིར་ན་མ་ཁྱབ་སྟེ། སྡུག་བསྔལ་ཤུགས་དྲག་པོའི་དབང་གིས་བརྒྱལ་བའི་ཚེ་སྡུག་བསྔལ་དངོས་སུ་མེད་ཀྱང་སྔུག་བསྔལ་གྱིས་བརྒྱལ་བར་འཇོག་པ་བཞིན་གཉིད་ཀྱིས་སྟོབས་ཀྱིས་འཇུག་ཤེས་ཕྲ་རགས་ཐམས་ཅད་བསྡུས་པའི་ཚེ་གཉིད་འཐུག་པོ་ལོག་པར་འཇོག་ཀྱང་གཉིད་དེའི་ཚེ་ཡོད་མི་དགོས་པའི་ཕྱིར། ཁ་ཅིག །གཉིད་ཀུན་གཞིའི་འཁོར་དུ་འཇོག་ཟེར་ན། དེ་ལ་མ་སྒྲིབ་ལུང་མ་བསྟན་གྱིས་ཁྱབ་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་ལ་དགེ་མི་དགེ་དུ་མ་ཡོད་པའི་ཕྱིར། མངོན་རྟོགས་རྒྱན་ལས། རྨི་ལམ་ན་ཡང་ཆོས་རྣམས་ཀུན། །རྨི་ལམ་ལྟ་བུར་ལྟ་ལ་སོགས། །ཞེས་དང༌། གསེར་ཕྲེང་ལས། དགེ་བའི་གཉིད་སར་གནས་ལ་ཡང་ཡོད་པ་མི་འགལ་བས། ཞེས་གསུངས་པའི་ཕྱིར། གཞན་ཡང་དེ་ཀུན་གཞིའི་འཁོར་དུ་འབྱུང་བ་མི་རུང་བར་ཐལ། དེ་འཁོར་དུ་འབྱུང་ན་ཐོག་མ་མེད་པ་ནས་བར་མ་ཆད་དུ་འཇུག་དགོས་ལ་ཀུན་གཞི་ཡིན་ན་ཁྱོད་དང་མཚུངས་ལྡན་གྱི་གཉིད་ཡོད་པས་མ་ཁྱབ་པའི་ཕྱིར། རེད་མདའ་བའི་ཀུན་བཏུས་ཊཱིཀྐ་ལས། བར་མ་ཆད་པར་མ་སྒྲིབ་ལུང་མ་བསྟན་པའི་ངོ་བོར་གནས་པ་ཞིག་རྣམ་པར་སྨིན་པར་རིགས་ན། ཞེས་གསུངས་པའི་ཕྱིར། འདོད་པའི་ཀུན་གཞིའི་འཁོར་དུ་རྟོག་དཔྱོད་ཀྱང་མི་འབྱུང་བར་ཀུན་འགྲོ་ལྔ་ཁོ་ན་བྱེད་པའི་རྒྱུ་མཚན་དེ་ཡིན་ནོ། །ཡང་ཁ་ཅིག་ན་རེ། ཁྱོད་ཀྱིས་ཤེར་མདོ་སོགས་ལས་འདུ་ཤེས་དང་ཚོར་བ་འགོག་པའི་སྙོམས་པར་འཇུག་པ་ཞེས་གསུངས་པ་ལ་བརྟེན་ནས་འགོག་སྙོམས་ཀྱི་ཚེ་འཇུག་ཤེས་མེད་པར་འདོད་པ་མི་འཐད་པར་ཐལ། དེ་ལྟར་ན་ཀུན་གཞིའི་འཁོར་དུ་ཡང་ཚོར་
འདུ་གཉིས་ཡོད་པས་དེ་འགོག་དགོས་པའི་ཕྱིར་ཟེར་ན། མི་མཚུངས་ཏེ། དེའི་འཁོར་གྱི་ཚོར་འདུ་སོགས་དམིགས་རྣམ་ཤིན་ཏུ་ཕྲ་བས་འགོག་མི་དགོས་པའི་ཕྱིར། ཁ་ཅིག་ན་རེ། ཀུན་གཞིའི་ངོ་བོ་ཙམ་ས་བརྒྱད་པ་དང་ཐེག་དམན་དགྲ་བཅོམ་ནས་ལྡོག་ཀྱང་རྣམ་སྨིན་གྱི་རྣམ་ཤེས་རྒྱུན་མཐའ་དང་ཐེག་དམན་ལྷག་མེད་ཀྱི་ཚེ་ལྡོག་པར་ཐལ། ཁྱོད་ཀྱི་གཞུང་གོང་འོག་མི་འགལ་ཚུལ་འཐད་པའི་ཕྱིར། འདོད་ན། རྟག་པར་བདག་ཏུ་སྦྱོར་བའི་གཞི་ཡིན་པའི་ཆ་ནས་ཀུན་གཞིར་འཇོག་བྱེད་ཀྱི་ཉོན་ཡིད་དགྲ་བཅོམ་ཐོབ་མ་ཐག་སྤངས་ཀྱང་ཀུན་ཉོན་གྱི་ཆོས་རྣམས་འབྲས་བུའི་ངོ་བོར་སྦྱོར་བའི་ཆ་ནས་ཀུན་གཞིར་འཇོག་བྱེད་ཀྱི་སྒྲིབ་པའི་བག་ཆགས་མ་ལུས་པ་འདིའི་ཚེ་འགག་པ་ཡིན་པར་ཐལ། འདོད་པའི་ཕྱིར། འདོད་ན། དེའི་ཚེ་ཤེས་སྒྲིབ་ཀྱི་བག་ཆགས་མཐའ་དག་ཀྱང་རྒྱུན་ཆད་པར་ཐལ་ལོ། །འདོད་ན། དེའི་ཚེ་ཤེས་སྒྲིབ་ཀྱི་བག་ཆགས་མཐའ་དག་སྤངས་པར་ཐལ། འདོད་པའི་ཕྱིར་ན་མ་ཁྱབ། རྟགས་གྲུབ་སྟེ། བསྡུ་བ་ལས། ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ལ་ནི་སྒྲིབ་པ་དང་སྒྲིབ་པའི་རྣམ་པར་བཞག་པ་དག་མེད་ཀྱི། ཞེས་གསུངས་པའི་ཕྱིར། མ་ཁྱབ་མཚམས་ལ་འདོད་མི་ནུས་ཏེ། ཤེས་སྒྲིབ་སྤངས་ན་ཐམས་ཅད་མཁྱེན་པ་ཐོབ་དགོས་པའི་ཕྱིར། དཀའ་འགྲེལ་ལས། མ་ལུས་པར་སྤངས་པ་མེད་ཀྱང་ཤེས་སྒྲིབ་རྒྱུན་ཆད་པའི་ལྡོག་པ་ཡོད་དེ། ཕུང་པོ་ལྔའི་རྒྱུན་ལྡོག་པའི་ཕྱིར་རོ། །ཞེས་གསུངས་པའི་ཕྱིར། སོ་སོར་ཕྱེ་ན་སྲིད་པའི་ཡན་ལག་གི་བག་ཆགས་རྣམ་
སྨིན་ཕྱུང་ནས་དང༌། བདག་ལྟའི་བག་ཆགས་དངོས་གཉེན་སྐྱེ་ན་དང༌། མངོན་བརྗོད་ཀྱི་བག་ཆགས་ལྷག་མེད་དང་རྒྱུན་མཐའ་ནས་ལྡོག་པར་དོན་གསང་ལས་གསུངས་སོ། །གཉིས་པ་ཉོན་ཡིད་ཀྱི་རྣམ་གཞག་བཤད་པ་ལ་སྤྱི་དོན་དང། མཐའ་ཅུང་ཟད་དཔྱད་པ་གཉིས། དང་པོ་ངོ་བོ་ནི་ཀུན་གཞིའི་རྣམ་སྨིན་གྱི་ཆ་ཁོ་ན་ལ་དམིགས་ནས་རྟག་ཏུ་ངར་སེམས་པའི་རྣམ་པ་ཅན་གྱི་རབ་ཏུ་མ་ཞི་བའི་ཡིད་ཀྱི་རྣམ་ཤེས་བརྟན་པས་རབ་ཏུ་ཕྱེ་བ་ཞིག་ཡིན་ཏེ། རྩ་བར། ཀུན་གཞི་རྣམ་སྨིན་ཆ་ཉིད་ལ། །བདག་ལྟ་སྒྲིབ་ལ་ལུང་མ་བསྟན། །ཞེས་སོ། །འཁོར་ནི་ཀུན་འགྲོ་ལྔ། ལྟ་བ། མ་རིག་པ། ང་རྒྱལ། འདོད་ཆགས་ཏེ་སེམས་བྱུང་རྫས་ཡོད་དགུར་ངེས་ལ། དེའི་སྟེང་དུ་ལྟ་བ་ལ་བཏགས་པའི་རྣམ་གཡེང༌། རྨོངས་པ་ལ་བཏགས་པ་མ་དད་པ། ལེ་ལོ། རྨུགས་པ་གསུམ། འདོད་ཆགས་ལ་བཏགས་པའི་རྒོད་པ། ཆགས་སྡང་གཉིས་ཀ་ལ་བཏགས་པ་བག་མེད་དེ་དྲུག་བསྣན་ནས་བཅོ་ལྔར་ཡང་གསུངས་ཏེ། སུམ་ཅུ་པ་ལས། ཉོན་མོངས་བཞི་དང་རྟག་ཏུ་འགྲོགས། །བདག་ཏུ་ལྟ་དང་བདག་ཏུ་རྨོངས། །བདག་རྒྱལ་བདག་ཏུ་ཆགས་པ་སྟེ། །ཞེས་དང༌། དཀའ་འགྲེལ་ལས། དྲུག་པོ་དེ་དག་ཉོན་མོངས་པ་བཞི་པོ་དེའི་རྫས་ཡིན་པས་དེ་བཞི་ལས་གུད་ན་མེད་དོ་ཞེས་གསུངས་པའི་ཕྱིར། སའི་ཁྱད་པར་རང་ཉིད་གང་གི་རྒྱུད་ལ་ལྡན་པའི་གང་ཟག་ས་གང་དུ་གཏོགས་པ་དེས་བསྡུས་པ་དགོས་ཏེ། རང་དང་མཚུངས་པར་ལྡན་པའི་འདོད་ཆགས་ཀྱིས་ས་དེའི་རྣམ་སྨིན་གྱི་ཀུན་གཞི་ལ་དམིགས་ནས་སྲེད་པས་བདག་གིར་བྱས་པའི་ཕྱིར། སུམ་ཅུ་པ་ལས། གང་
དུ་སྐྱེས་པ་དེ་ཡི་འོ། །ཞེས་དང། མཛོད་ལས། བདག་གིར་མ་བྱས་ཞེས་དང། ཀུན་འགྲོ་མ་ཡིན། ཞེས་གསུངས་པའི་ཕྱིར། བྱེད་ལས་ཀྱི་ཁྱད་པར་ཡིད་ཤེས་ཀྱི་ཐུན་མོང་མ་ཡིན་པའི་བདག་རྐྱེན་བྱེད་ཅིང་ཀུན་གཞི་ལ་བདག་ལྟའི་ས་བོན་བཏབ་ནས་ཚོགས་དྲུག་ཀ་མཚན་མའི་གནས་ལ་འཆིང་བར་བྱེད་དོ། །འཇུག་ལྡོག་གི་ཁྱད་པར། འཕགས་ལམ་མ་ཐོབ་བར་དུ་རྒྱུན་མ་ཆད་པར་མངོན་གྱུར་དུ་འབྱུང་ཞིང་འཕགས་པའི་མཉམ་གཞག་ཡེ་ཤེས་དང་འགོག་སྙོམས་ཀྱི་དུས་སུ་མངོན་གྱུར་ལྡོག་ཀྱང་དེ་ལས་ལངས་མ་ཐག་འབྱུང་བས་གནས་སྐབས་ཙམ་ཡིན་ལ། ས་བརྒྱད་པ་དང་ཐེག་དམན་དགྲ་བཅོམ་ཐོབ་པ་ན་གཏན་དུ་ལྡོག་གོ །སྒྲུབ་བྱེད་ལ་ལུང་ནི། ལུང་ཕྲན་ཚེགས་ལས། ཉོན་མོངས་ཅན་ཡིན་རྟག་ཏུ་ནི། །ཉོན་མོངས་ལྷན་ཅིག་སྐྱེ་ཞིང་འབྱུང༌། །དེ་ནི་ཉོན་མོངས་རྣམས་ལས་ནི། །མ་གྲོལ་གྲོལ་བར་མི་འགྱུར་རོ། །ཞེས་དང༌། ལང་གཤེགས་ལས། སེམས་ནི་རང་བཞིན་དྭངས་པ་སྟེ། །རྙོགས་པར་བྱེད་པ་ཡིད་ཡིན་ནོ། །ཞེས་དང༌། སྟུག་པོ་བཀོད་པ་ལས། ངར་སེམས་བདག་ཉིད་ཡིན་ནོ། །ཞེས་དང༌། དགོངས་འགྲེལ་ལས། རེས་འགའ་ནི་ཀུན་གཞིའི་རྣམ་པར་ཤེས་པ་འདི་རྣམ་པར་ཤེས་པ་གཅིག་དང་ལྷན་ཅིག་སྟེ་ཡིད་དང༌། ཞེས་པ་ནས། རྣམ་པར་ཤེས་པ་བདུན་དང་ལྷན་ཅིག་འཇུག་སྟེ། ཞེས་དང༌། གསེར་འོད་ལས། ཀུན་གཞི་ལ་གནས་པའི་ཡིད་སྦྱངས་པས་ལོངས་སྤྱོད་རྫོགས་པའི་སྐུ་འཐོབ་བོ། །ཞེས་སོགས་ཤིན་ཏུ་མང་ངོ༌། །རིགས་པའི་སྒྲུབ་བྱེད་ནི། ཐེག་བསྡུས་ལས། ཉོན་མོངས་ཅན་གྱི་ཡིད་མེད་ན། །
མ་འདྲེས་པ་ཡི་མ་རིག་དང༌། །ལྔ་བོ་དག་དང་འདྲ་བ་དང༌། །སྙོམས་པར་འཇུག་པའི་བྱེ་བྲག་དང༌། །ངེས་ཚིག་མེད་པའི་སྐྱོན་དུ་འགྱུར། །འདུ་ཤེས་མེད་པར་སྐྱེས་པའི་རྒྱུན། །ངར་འཛིན་མེད་པའི་སྐྱོན་དུ་འགྱུར། །ངར་འཛིན་པ་དང་ལྡན་པ་ནི། །རྣམ་པ་ཀུན་ཏུ་མི་འཐད་དོ། །ཞེས་སྒྲུབ་བྱེད་དྲུག་གསུངས་ཏེ། རྒྱུན་ཆགས་སུ་མངོན་དུ་འགྱུར་བའི་རྟེན་མ་འདྲེས་པའི་མ་རིག་པ་མེད་པར་ཐལ་བ་དང༌། དབང་ཤེས་ལྔ་ལ་ཐུན་མོང་མ་ཡིན་པའི་བདག་རྐྱེན་དབང་པོ་རེ་ཡོད་ཀྱང་དྲུག་པ་ཡིད་ཤེས་ལ་ཐུན་མོང་མ་ཡིན་པའི་བདག་རྐྱེན་མེད་པར་ཐལ་བ་དང༌། འགོག་པའི་སྙོམས་འཇུག་དང་འདུ་ཤེས་མེད་པའི་སྙོམས་འཇུག་གཉིས་ལ་ཞི་བ་དང་མཐུན་མི་མཐུན་གྱི་ཁྱད་པར་མེད་པར་ཐལ་བ་དང༌། རྟག་ཏུ་ངར་སེམས་པས་ན་ཡིད་དོ་ཞེས་ཉོན་ཡིད་རང་གི་ངེས་ཚིག་གམ་ཉོན་ཡིད་ཀྱི་དབང་གིས་ངས་མཐོང་ངས་ཐོས་ཞེས་པ་ལྟ་བུའི་ངེས་ཚིག་འབྱུང་བ་མི་འཐད་པར་ཐལ་བ་དང༌། འདུ་ཤེས་མེད་པར་སྐྱེས་པའི་གང་ཟག་གི་རྒྱུད་ལ་ངར་འཛིན་མེད་པར་ཐལ་བ་དང། དགེ་བའི་ལས་ཀྱི་ཀུན་སློང་སོགས་སུ་ངར་འཛིན་འབྱུང་བ་མེད་པར་ཐལ་བ་རྣམས་སོ། །མཐའ་དཔྱད་པ་ལ། ཁ་ཅིག་ན་རེ། དམིགས་པ་རང་རྒྱུད་ཀྱི་ཀུན་གཞི་ལ་དམིགས་ནས་རྣམ་པ་རྫས་ཡོད་ཀྱི་བདག་ཏུ་འཛིན་པའི་བརྟན་པའི་རྣམ་རིག་དེ། ཉོན་ཡིད་ཀྱི་ངོ་བོ་ཟེར་ན། ཉོན་ཡིད་ཆོས་ཅན། བློ་དོན་མཐུན་ཡིན་པར་ཐལ། ཀུན་གཞི་རྫས་ཡོད་ཀྱི་བདག་ཏུ་འཛིན་པའི་བློ་ཡིན་པའི་ཕྱིར། རྟགས་ཁས། ཁྱབ་སྟེ། ཀུན་གཞི་རྫས་ཡོད་ཀྱི་བདག་ཡིན་པའི་ཕྱིར། མ་གྲུབ་ན། ཀུན་གཞི་ཆོས་ཅན། རྫས་ཡོད་ཀྱི་བདག་ཡིན་པར་
ཐལ། རང་ཉིད་ཚད་མས་ངེས་པ་རང་གི་ངོ་བོར་མ་གྱུར་པའི་ཆོས་གཞན་ཚད་མས་ངེས་པ་ལ་ལྟོས་མི་དགོས་པའི་བདག་ཡིན་པའི་ཕྱིར། དེར་ཐལ། དེ་འདྲའི་རྣམ་སྨིན་གྱི་རྣམ་ཤེས་ཡིན་པའི་ཕྱིར། ཁྱབ་སྟེ། མདོ་ལས། ལས་དང་རྣམ་པར་སྨིན་པ་ནི་ཡོད་ལ་བྱེད་པ་པོ་ནི་མི་དམིགས་སོ། །ཞེས་དང༌། ལེགས་བཤད་སྙིང་པོ་ལས། ལས་དང་རྣམ་སྨིན་ཀུན་རྫོབ་ཏུ་ཡོད་ཅིང་རྫས་སུ་ཡང་ཡོད་ལ།ཞེས་གསུངས་པའི་ཕྱིར་དང༌། རྣམ་བཤད་དགོངས་པ་རབ་གསལ་ལས་ཀྱང་འདི་དག་གིས་གང་ཟག་སྤྱི་ལྡོག་བཏགས་ཡོད་ཡིན་ཀྱང་གཞི་ལྡོག་ཀུན་གཞི་སོགས་རྫས་ཡོད་དུ་འདོད་པར་གསུངས་པ་ལ་སྒྲ་བ་ཤེས་རབ་རིན་ཆེན་གྱིས། རྫས་ཡོད་བདག་སྨྲ་གནས་མ་བུར་ངེས་དང༌། །རྣམ་ཤེས་བདག་སྨྲའི་དབུ་སེམས་ཡོད་པ་འགལ། །ཞེས་རྫས་ཡོད་ཀྱི་བདག་དང་རང་རྐྱ་ཐུབ་པའི་རྫས་ཡོད་ཀྱི་བདག་གི་ཁྱད་པར་མ་ཕྱེད་པར་དགག་པ་བྱས་པའི་ཕྱིར། ཁྱབ་སྟེ། དེ་ལ་ལན་འདེབས་པའི་ཚེ་རྗེ་བླ་མས་རང་རྐྱ་ཐུབ་པའི་རྫས་ཡོད་ཀྱི་བདག་ཁས་ལེན་པའི་རང་སྡེ་གནས་མ་བུ་བ་མ་གཏོགས་མེད་པར་གསུངས་ཀྱི་རྫས་ཡོད་ཀྱི་བདག་ཁས་ལེན་མཁན་གཞན་མེད་པར་མ་གསུངས་པས་ཁྱོད་ཀྱི་དགག་པ་དེ་ཕྱོགས་སྔ་ངོས་མ་ཟིན་པའི་ལྟག་ཆོད་དུ་འདུག་ཅེས་བཤད་དགོས་པའི་ཕྱིར། འདི་ལ་བྲ་སྟི་དགེ་བཤེས་ཀྱིས་རྫས་ཡོད་ཀྱང་གང་ཟག་གི་སྟེང་དུ་བཞག་ན་རང་རྐྱ་ཐུབ་པའི་རྫས་ཡོད་ཀྱི་བདག་གི་གྲུབ་ཚད་ལས་མ་འདས་པས་མི་འཇོག་ཅིང་ཤེས་པ་དང་གཟུགས་ཀྱི་སྟེང་དུ་འཇོག་ཚུལ་སྔར་ལྟར་རོ། །ཞེས་བཤད་པ་ཡང་
མི་འཐད་པར་ཐལ། མཚན་གཞིའི་རྣམ་ཤེས་རང་རྐྱ་ཐུབ་པའི་རྫས་ཡོད་དུ་འདོད་པའི་གྲུབ་མཐའ་གོང་མ་ཡོད་ན་རྗེ་བླ་མ་ལ་སྟག་ལོའི་དགག་པ་དེ་འཇུག་པར་ཐལ་བ་དང༌། སེམས་ཙམ་གྱི་ལུགས་ལའང་གང་ཟག་གི་བདག་མེད་སྟོང་གཞིའི་སྒོ་ནས་འཇོག་པར་ཐལ་བ་དང༌། དེ་འདོད་ན། མདོས་གཟུགས་ནས་འཕགས་ལམ་ཡན་ལག་གི་བར་གྱི་ཆོས་རྣམས་ཀྱི་སྟེང་དུ་འཁོར་ལོ་དང་པོའི་དགོངས་གཞིའི་གང་ཟག་གི་བདག་མེད་ཀྱི་དབང་དུ་བྱས་པའི་མཚན་ཉིད་གསུམ་བཞག་པ་མི་འཐད་པར་ཐལ་བ་དང༌། གང་ཟག་གི་བདག་མེད་ཕྲ་མོའི་དགག་བྱ་དེ་གཟུགས་ཤེས་གཉིས་ཀྱི་སྟེང་དུ་ཚད་མས་གྲུབ་ན་གཟུགས་ཤེས་གཉིས་གང་ཟག་གི་བདག་མེད་མ་ཡིན་པར་ཐལ་བ་སོགས་མི་འཚམས་པ་དུ་མ་འབྱུང་བའི་ཕྱིར། དེས་ན་ཀུན་མཁྱེན་བླ་མའི་དྲང་ངེས་རྣམ་འབྱེད་ཆེན་མོར་དེ་གཉིས་ཀྱིས་ཁྱད་པར་ཕྱེ་བ་ལ་ལྕང་སྐྱ་རིན་པོ་ཆེའི་གྲུབ་མཐར་ཁ་ཅིག་རང་རྐྱ་འཛིན་ཐུབ་པའི་རྫས་ཡོད་དང་རང་རྐྱ་ཐུབ་པའི་རྫས་ཡོད་གཉིས་ཀྱི་ཞིབ་ཆ་འབྱེད་པ་ཡང་རྒྱ་གཞུང་ཚད་ཐུབ་རྣམས་དང་རྗེ་ཡབ་སྲས་ཀྱི་གསུངས་གང་ལས་ཀྱང་མི་འབྱུང་བས་འཐད་རྒྱུ་ཞིག་མི་འདུག །ཅེས་སོགས་མང་དུ་གསུངས་པ་ཡང་མཁས་པ་སྔ་མ་ཁ་ཅིག་གི་བཤད་རྒྱུན་བསྐྱངས་པ་ཙམ་ལས་རྗེ་དེ་ཉིད་ཀྱི་རང་ལུགས་མིན་ཏེ། བསྡུ་བ་དང༌། རྣམ་བཤད་གཉིས་ཀར་དགག་བྱ་བཅད་པ་སོགས་ལ་མ་ལྟོས་པར་ངོ་བོ་བློ་ཡུལ་དུ་འཆར་དུ་ཡོད་པའི་རྫས་ཡོད་དང་གདགས་གཞིའམ་ཆ་ཤས་སོ་སོ་ལ་མ་ལྟོས་པར་ཚུགས་ཐུབ་ཏུ་གྲུབ་པས་རང་རྐྱ་ཐུབ་པར་གསུངས་པ་ལས་ལྷག་པའི་ཚད་ཐུབ་ཀྱི་གཞུང་དང་ཁྱད་པར་འབྱེད་ཚུལ་མེད་པའི་ཕྱིར་ཏེ། བུམ་པ་ལྟ་བུ་
དགག་བྱ་བཅད་པ་སོགས་ལ་མ་ལྟོས་པར་མངོན་སུམ་དུ་མཐོང་དུ་ཡོད་ཀྱང་ཁ་ཞབས་ལྟོ་བ་སོགས་ལ་མ་ལྟོས་པར་ཚུགས་ཐུབ་ཏུ་གྲུབ་ཚུལ་མེད་པས་དེ་གཉིས་ཆེས་མི་འདྲ་བའི་ཕྱིར། དེས་ན་ལྕང་སྐྱ་ཐམས་ཅད་མཁྱེན་པའི་གྲུབ་མཐར་གསུངས་པ་ཐམས་ཅད་ཉིད་ཀྱི་རང་ལུགས་ཁོ་ན་མཛད་པའི་ངེས་པ་མེད་དེ། དཔེར་ན་དེར་ཉན་རང་ལ་སྙིང་རྗེ་ཆེན་པོ་མེད་པར་གསུངས་ཀྱང་དེ་ཉིད་ཀྱིས་མཛད་པའི་དབུ་མའི་སེམས་བསྐྱེད་དང་པོའི་མཐའ་དཔྱོད་དུ་དེ་ཡོད་པར་ལུང་རིགས་དུ་མས་བསྒྲུབ་པ་ལྟ་བུའོ། །ཡང་ཁ་ཅིག་ན་རེ། ཀུན་གཞི་རྫས་ཡོད་ཡིན་ཀྱང་ང་མ་ཡིན་པས་ཉོན་ཡིད་ཀྱིས་དེ་ལ་རྫས་ཡོད་ཀྱི་ངའོ་སྙམ་དུ་བཟུང་བས་ལོག་ཤེས་སུ་འགྲོ་ཟེར་ན། ཀུན་གཞི་ཆོས་ཅན། ང་ཡིན་པར་ཐལ། ཉོན་ཡིད་དང་མཚུངས་ལྡན་གྱི་འཇིག་ལྟའི་དམིགས་ཡུལ་ཡིན་པའི་ཕྱིར་ཏེ། ཉོན་ཡིད་ཀྱི་དམིགས་ཡུལ་ཡིན་པའི་ཕྱིར། ཁྱབ་སྟེ། ལམ་རིམ་ཆུང་ངུ་ལས། ངར་འཛིན་གྱི་དམིགས་རྣམ་གཉིས་ཀྱི་ནང་ནས་དམིགས་པའི་ཡུལ་ཡིན་ན་བདག་ཏུ་བཞག་དགོས་པས་སོ། །ཞེས་གསུངས་པའི་ཕྱིར། གཞན་ཡང་འཇིག་ལྟ་ཡིན་ན་ང་ལ་དམིགས་དགོས་པར་ཐལ། དེའི་ཞེན་ཡུལ་མེད་པར་རྟོགས་པའི་ཡེ་ཤེས་ཀྱིས་ང་ལ་དམིགས་དགོས་པ་གང་ཞིག །དེ་གཉིས་དམིགས་པ་གཅིག་ལ་དམིགས་ནས་འཛིན་སྟངས་དངོས་འགལ་དུ་ཞུགས་པའི་བློ་ཡིན་པའི་ཕྱིར། དང་པོ་མ་གྲུབ་ན། དེ་དགོས་པར་ཐལ། དེས་དེ་ལ་མ་དམིགས་ན་ངར་འཛིན་འཇིག་ལྟའི་ཞེན་ཡུལ་དྲུངས་འབྱིན་མི་ནུས་པའི་ཕྱིར། འཇུག་པ་ལས། བདག་མེད་རྟོགས་ཚེ་རྟག་པའི་བདག་སྤོང་ཞིང༌། །འདི་ནི་ངར་འཛིན་རྟེན་
དུའང་མི་འདོད་པ། །དེ་ཕྱིར་བདག་མེད་ཤེས་པས་བདག་ལྟ་བ། །དཔྱིས་ཀྱང་འབྱིན་ཞེས་སྨྲ་བ་ཤིན་ཏུ་མཚར། །ཞེས་གསུངས་པའི་ཕྱིར་དང༌། བདག་མེད་གཏན་ལ་འབེབ་པའི་གཞུང་ཚད་ལྡན་ཐམས་ཅད་དུ་ཐ་སྙད་པའི་ང་ངོས་འཛིན་ཚུལ་ནན་ཏན་དུ་གསུངས་པའི་དགོས་པ་ཡོད་པའི་ཕྱིར། དེ་ལ་ཁོ་ན་རེ། ཉོན་ཡིད་ཀྱིས་ཀུན་གཞི་ལ་མ་དམིགས་པར་ཐལ། དོན་གསང་ལས། ཀུན་གཞི་རྣམ་པར་ཤེས་པ་ལ་ཇི་ལྟར་དམིགས་ཞེ་ན། དེའི་དབང་གིས་བདག་གི་རྣམ་པར་སྐྱེ་བའི་སྒོ་ནས་ཡིན་གྱི་རང་གི་ངོ་བོ་འཇོག་པའི་སྒོ་ནས་ནི་མ་ཡིན་ནོ། །ཞེས་གསུངས་པའི་ཕྱིར་ན་མ་ཁྱབ་སྟེ། ལུང་དེའི་དོན་ཉོན་ཡིད་ཀྱིས་ང་སྤྱི་ཙམ་དེ་ལ་དངོས་སུ་དམིགས་པ་མིན་ཀྱང་ཀུན་གཞི་ལ་དམིགས་པའི་སྒོ་ནས་ང་ལ་དམིགས་པར་འཇོག་པའམ། ཉོན་ཡིད་ལ་ཀུན་གཞི་དེ་རྣམ་སྨིན་ཡིན་ཚུལ་དང་བག་ཆགས་འཇོག་ཚུལ་སོགས་ཀྱི་ཁྱད་པར་མཐའ་དག་མ་ཤར་ཡང་ལུས་ལེན་པ་པོའི་བདག་ཏུ་སྣང་བའི་རྒྱུ་མཚན་གྱིས་ཀུན་གཞིའི་རྣམ་སྨིན་གྱི་ཆ་ལ་དམིགས་ཞེས་བཤད་པ་ཡིན་པའི་ཕྱིར། དང་པོ་གྲུབ་སྟེ། རེད་མདའ་བའི་ཊཱིཀྐ་ལས། ཀུན་གཞིའི་རྣམ་པར་ཤེས་པའི་དབང་གིས་འདི་བདག་གི་རྣམ་པར་སྐྱེ་བའི་ཕྱིར། དེས་བདག་ལ་དམིགས་པ་ཡིན་གྱི་དངོས་སུ་ནི་མ་ཡིན་ནོ། །ཞེས་གསུངས་པའི་ཕྱིར། གཉིས་པ་གྲུབ་སྟེ། དཀའ་འགྲེལ་ལས། རྣམ་སྨིན་གྱི་རྫས་དེ་ཉིད་སྣང་ནས་ཉོན་ཡིད་ཀྱི་ཡུལ་དུ་མི་འགྱུར་ཡང༌། ཞེས་གསུངས་པའི་ཕྱིར། མ་ཁྱབ་མཚམས་ལ་འདོད་མི་ནུས་ཏེ། སུམ་ཅུ་པ་ལས། དེ་ལ་དམིགས་པ་ཡིད་ཅེས་བྱ། །ཞེས་དང༌། དེའི་འགྲེལ་པ་ལས། དེ་ལ་ཞེས་བྱ་བའི་
སྒྲ་ནི་ཀུན་གཞི་རྣམ་པར་ཤེས་པ་ཉིད་ལ་སྦྱར་རོ། །ཞེས་གསུངས་པའི་ཕྱིར་དང༌། དོན་གསང་རང་ཉིད་ལས་ཀྱང༌། ཡིད་ནི་འཁོར་བ་ཇི་སྲིད་པར་རིགས་གཅིག་པ་དང༌། དམིགས་པ་ཉེ་བ་ཀུན་གཞི་རྣམ་པར་ཤེས་པ་ལས་འབྱུང་བ་ཀོ་ཇི་ལྟར་རྒྱུན་འཆད། ཅེས་ཉོན་ཡིད་རྒྱུན་ཆགས་སུ་འབྱུང་བའི་སྒྲུབ་བྱེད་དུ་འཇུག་ཤེས་དང་མི་འདྲ་བར་སྔ་ཕྱི་རིགས་མཐུན་ཅིང་དམིགས་ཡུལ་ཀུན་གཞི་རྟག་ཏུ་ཡོད་པ་བཀོད་པའི་ཕྱིར། ཡང་ཉོན་ཡིད་སྒྲིབ་ལུང་མ་བསྟན་དུ་བཤད་པའི་དོན་ལ། ས་བཟང་གིས། ཟག་མེད་ལམ་དང་ལྷན་ཅིག་མངོན་གྱུར་དུ་མི་འབྱུང་བས་ཐར་པ་ཐོབ་པ་ལ་སྒྲིབ་ཅིང་ཞེས་བཤད་པ་མི་འཐད་པར་ཐལ། འདིའི་སྒྲིབ་ཅེས་པ་རང་གི་ངོ་བོ་ཉོན་མོངས་གཞན་གྱིས་སྒྲིབ་པའི་དོན་ཡིན་གྱི་རང་གིས་གཞན་ལ་སྒྲིབ་པའི་དོན་མ་ཡིན་པའི་ཕྱིར། དཀའ་འགྲེལ་ལས། ཐར་པ་ལ་སྒྲིབ་མི་སྒྲིབ་ཏུ་འདོད་པ་ནི་སྒྲིབ་པ་དང་མ་སྒྲིབ་པའི་རང་གི་ངོ་བོ་མི་ཤེས་ཤིང༌། ཞེས་དང་ཡིད་འདི་ཡང་ཉོན་མོངས་པ་བཞིས་རྙོགས་རྙོགས་པོར་བྱས་པའི། ཞེས་གསུངས་པའི་ཕྱིར་དང༌། སུམ་ཅུ་བའི་འགྲེལ་པ་ལས། ཉེ་བའི་ཉོན་མོངས་པ་གློ་བུར་བ་རྣམས་ཀྱིས་མ་སྒྲིབ་པའི་ཕྱིར་མ་སྒྲིབ་པ་ཞེས་བྱའོ། །ཞེས་གསུངས་པ་དང་ཤིན་ཏུ་མཐུན་པའི་ཕྱིར། འདི་ལ་སྐབས་ཐོབ་ཀྱི་ཞིབ་ཆ་དགོས། ཡང་ཁ་ཅིག་ན་རེ། ཉོན་ཡིད་དང་མཚུངས་ལྡན་གྱི་འདོད་ཆགས་དང་ང་རྒྱལ་སོགས་མེད་པར་ཐལ། དེ་དག་ལ་དགའ་བའི་རྣམ་ཅན་དགོས་པའི་ཕྱིར། མཛོད་ལས། བདེ་བ་དག་དང་འདོད་ཆགས་སུ། །མཚུངས་ལྡན། ཞེས་པའི་རང་འགྲེལ་ལས། འདོད་
ཆགས་དང་ཞེ་སྡང་དག་ནི་དགའ་བ་དང་སྐྱེ་བའི་རྣམ་པར་འཇུག་པའི། ཞེས་དང༌། ང་རྒྱལ་དེ་དགའ་བའི་རྣམ་པར་འཇུག་པའི་ཞེས་གསུངས་ཤིང༌། བཤད་སྦྱར་ལས་ཀྱང༌། བདག་ལ་ཆགས་པ་འབྱུང་སྟེ། བདག་ལ་དགའོ། །ཞེས་གསུངས་པའི་ཕྱིར་ན་མ་ཁྱབ་སྟེ། ཆགས་སེམས་ཀྱིས་གཅེས་པའི་རྣམ་པར་སྐྱེ་བའི་དོན་ཡིན་གྱི་ཡིད་བདེ་བའི་རྣམ་ཅན་མ་ཡིན་པའི་ཕྱིར་ཏེ། དོན་གསང་ལས། དགའ་བའི་རྣམ་པ་ཅན་ཡིན་ཡང་སིམ་པའི་ཚོར་བ་ཅན་ནི་མ་ཡིན། ཞེས་དང༌། དཀའ་འགྲེལ་ལས། ཚོར་བའི་དགའ་རྣམ་མིན་གྱི་འདོད་ཆགས་ཀྱི་དགའ་རྣམ་ཡིན་ཏེ། ཞེས་གསུངས་པའི་ཕྱིར། ཁ་ཅིག་ན་རེ། ཉོན་ཡིད་ཀྱི་འཁོར་དུ་ཉེ་ཉོན་དེ་དྲུག་མེད་པར་ཐལ། ཉེ་ཉོན་ནི་རྩ་ཉོན་གྱི་ཤུགས་ཞན་དུ་སོང་བའི་གནས་སྐབས་ལ་འཇོག་ཅིང་ཉོན་ཡིད་གནས་ཀྱི་བར་དུ་དེ་འདྲ་མི་སྲིད་པའི་ཕྱིར་ཏེ། དོན་གསང་ལས། ཡང་ན་མཚུངས་པར་མི་ལྡན་པ་ཉིད་དེ། འདོད་ཆགས་ལ་སོགས་པ་ནི་གསལ་བའི་རྣམ་པར་ཞུགས་པ་ཡིན་ལ། དེའི་རྗེས་ལ་ཤས་ཀྱི་བྲི་བར་ཞུགས་པ་ན་ཉེ་བའི་ཉོན་མོངས་པ་རྣམས་ཞེས་གདགས་ན་ཡིད་ལ་ནི་དེ་ལྟ་བུ་མི་སྲིད་དེ། ཞེས་གསུངས་པའི་ཕྱིར་ཟེར། དེ་ལ་སྐྱོན་འཕེན་པ་ཁ་ཅིག་ན་རེ། དེ་མི་འཐད་པར་ཐལ། དེའི་རྩ་ཉོན་བཞི་ཡང་ཉེ་ཉོན་ཡིན་པའི་ཕྱིར། མཛོད་འགྲེལ་ལས། གང་དག་ཉོན་མོངས་པ་ཡིན་པ་དེ་དག་ནི་ཉེ་བའི་ཉོན་མོངས་པ་ཡང་ཡིན་ཏེ། སེམས་ཉེ་བར་ཉོན་མོངས་པར་བྱེད་དོ། །ཞེས་གསུངས་པའི་ཕྱིར་ན་མ་ཁྱབ་སྟེ། གྲུབ་མཐའ་གཞན་གྱི་སྐབས་ཡིན་པའི་ཕྱིར། གོང་དུ་འདོད་མི་ནུས་ཏེ། ཀུན་བཏུས་ལས། རྨུགས་པ་དང༌། རྒོད་པ་དང༌། མ་དད་པ་དང༌། ལེ་ལོ་དང༌། བག་མེད་པ་ནི་ཉོན་
མོངས་པ་ཐམས་ཅད་དང་མཚུངས་པར་ལྡན་ནོ། །ཞེས་གསུངས་པའི་ཕྱིར་དང༌། དེ་དག་རྩ་ཉོན་བཞིའི་རྫས་ལ་བཏགས་ཙམ་ཡིན་པས་སྔ་མ་དང་མི་འགལ་བའི་ཕྱིར། བྱས་པ་ལ་ཁོ་ན་རེ། འདོད་པའི་ཉོན་ཡིད་ཀྱི་འཁོར་དུ་རྟོག་དཔྱོད་ཀྱང་བཞག་ཆོག་པར་ཐལ། དེ་ཤེས་རབ་ཀྱི་རྫས་ལ་བཏགས་ཙམ་ཡིན་པའི་ཕྱིར་ན་མི་མཚུངས་ཏེ། འདོད་པའི་ཉོན་ཡིད་ཀྱི་འཁོར་དུ་ཡོད་ན་དེའི་རིགས་འདྲ་ཞིག་གོང་མའི་ཉོན་ཡིད་ཀྱི་འཁོར་དུ་ཡང་ཡོད་དགོས་པའི་ཕྱིར། དེར་ཐལ། འདོད་པ་ནས་གོང་མར་སྐྱེ་བ་དང༌། གོང་མ་ནས་འདོད་པར་སྐྱེ་བའི་ཚེ་ཉོན་ཡིད་ས་འཕོས་པ་བཞིན་དུ་འཁོར་གྱི་ཉོན་མོངས་རྣམས་ཀྱང་ས་དེའི་ཉོན་མོངས་དེ་དང་དེར་འགྱུར་དགོས་ཀྱི་བར་སྐབས་སུ་ཆད་པའམ་ལྷག་པ་འབྱུང་མི་རུང་བའི་ཕྱིར། དཀའ་འགྲེལ་ལས། འདིའི་འཁོར་ལ་ཁམས་གསུམ་གར་མང་ཉུང་མི་འབྱུང་སྟེ། བརྟན་པའི་རྣམ་ཤེས་ཡིན་པས་གཙོ་བོ་དང་འཇུག་ལྡོག་གི་དུས་གཅིག་ཡིན་པའི་ཕྱིར་རོ། །ཞེས་གསུངས་པའི་ཕྱིར། དེ་ལ་ཁོ་ན་རེ། འདིའི་ཉོན་མོངས་གོང་མའི་ཉོན་མོངས་སུ་འགྱུར་བ་མེད་པར་ཐལ། གང་སྤེལ་ལས། འདོད་པ་སྤྱོད་པའི་ཀུན་ཏུ་འགྲོ་བའི་རྒྱུའི་འབྲས་བུ་ནི་འདོད་པ་སྤྱོད་པའི་ཉོན་མོངས་པ་ཁོ་ན་ཡིན་ནོ། །ཞེས་སོགས་རྩ་འགྲེལ་གྱི་དོན་ཡོད་པའི་ཕྱིར་ཟེར་ན། ཀུན་གཞི་ཉོན་ཡིད་གཉིས་ཀྱང་མེད་པར་ཐལ། དེ་མེད་པར་བྱེ་སྨྲས་འདོད་པའི་ཕྱིར། ཁྱབ་པ་ཁས། ཡང་ཁོ་ན་རེ། འདོད་རྟེན་ཅན་གྱི་འབྲས་བུ་རིམ་གྱིས་པའི་ཕྱིར་མི་འོང་གི་རྒྱུད་ལ་འདོད་ཉོན་ཡོད་པར་ཐལ། དེའི་རྒྱུད་ཀྱི་ཉོན་ཡིད་དང་མཚུངས་ལྡན་གྱི་འཇིག་ལྟ་དེ་འདོད་ཉོན་
ཡིན་པའི་ཕྱིར། འདོད་མི་ནུས་ཏེ། དེས་འདོད་པའི་ཉོན་མོངས་མ་ལུས་པར་སྤངས་པའི་ཕྱིར། དེར་ཐལ། དེས་འདོད་ཉོན་སྐོར་དགུ་སྤངས་པའི་ཕྱིར་ན་མ་ཁྱབ། རྟགས་གྲུབ་སྟེ། འདོད་ཉོན་སྐོར་དགུའི་གཉེན་པོ་བར་ཆད་མེད་ལམ་དགུས་དྲངས་པའི་འདུས་བྱས་རྣམ་གྲོལ་ལམ་དགུ་དང་འདུ་མ་བྱས་འགོག་བདེན་དགུ་ཐོབ་ཟིན་པའི་ཕྱིར་ཏེ། འདུས་བྱས་རྣམ་གྲོལ་ལམ་བརྒྱད་ཅུ་རྩ་གཅིག་རིམ་གྱིས་ཐོབ་ཚུལ་ཡོད་པའི་ཕྱིར། བྱས་པ་ལ། དེ་འདྲའི་ཕྱིར་མི་འོང་དེས་སླར་ལས་ཉོན་གྱི་དབང་གིས་འདོད་པར་སྐྱེ་བ་ལེན་རུང་བར་ཐལ། དེས་འདོད་པའི་ཉོན་མོངས་མ་སྤངས་པའི་ཕྱིར་ན་མ་ཁྱབ་སྟེ། འདོད་པའི་ཡང་སྲིད་འགྲུབ་བྱེད་ཀྱི་ལས་ལ་གསོས་འདེབས་པའི་སྲེད་ལེན་གཉིས་སྤངས་ཟིན་པའི་ཕྱིར། ཡང་ཁ་ཅིག །འདོད་རྟེན་ཅན་གྱི་ཕྱིར་མི་འོང་དེས་འདོད་ཉོན་མ་སྤངས་ཡང་གོང་མའི་རྟེན་ཅན་དེས་སྤངས་ཟེར་ན། འོ་ན་འདོད་པ་ནས་ཁམས་གོང་མར་སྐྱེས་མ་ཐག་དེས་ཀྱང་སྤངས་པར་ཐལ། དེ་གོང་མའི་རྟེན་ཅན་གྱི་ཕྱིར་མི་འོང་ཡིན་པའི་ཕྱིར། འདོད་ན། འདོད་པ་ནས་འཆི་ཁ་མ་དེ་འདོད་ཉོན་སྤོང་ཁ་མ་ཡིན་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། འདོད་ཉོན་གྱི་དངོས་གཉེན་ལ་གནས་པའི་གང་ཟག་ཡིན་པར་ཐལ། དེ་སྤོང་ཁ་མ་གང་ཞིག །འདོད་པའི་ཉོན་མོངས་དེ་དངོས་གཉེན་གྱི་གཞོམ་བྱ་ཡིན་པའི་ཕྱིར། འདོད་མི་ནུས་ཏེ། འཆི་སྲིད་ཕྲ་མོ་ལ་གནས་པའི་གང་ཟག་ཡིན་པའི་ཕྱིར། ཡང་ཁོ་ན་རེ། ཉན་ཐོས་དགྲ་བཅོམ་ལ་ཅིག་ཅར་བས་ཁྱབ་པར་ཐལ། ས་དགུའི་ཉོན་མོངས་ཅིག་ཅར་སྤོང་དགོས་པའི་ཕྱིར་ན་མ་ཁྱབ་སྟེ། ས་དགུའི་ཉོན་མོངས་ཆུང་ངུ་དགུ་རིམ་གྱིས་སྤོང་
བ་ཡོད་པའི་ཕྱིར། དེར་ཐལ། ཉོན་མོངས་སྐོར་དགུ་འབྱེད་པ་འཇུག་ཤེས་སུ་གྱུར་པའི་ཉོན་མོངས་ལ་བྱེད་པའི་ཕྱིར། དེར་ཐལ། བསྡུ་བ་ལས། ཕྱིར་མི་འོང་བས་ཡན་ལག་དུ་ཞིག་སྤངས་ཞེ་ན་འདོད་པ་ན་སྤྱོད་པ་ཐམས་ཅད་དང༌། ཞེས་པའི་ཐོག་མའི་མ་རིག་པ་ཡང་འཇུག་ཤེས་ཀྱི་དེ་ལ་བྱེད་པའི་ཕྱིར། ཁོ་ན་རེ། རིམ་གྱིས་པའི་ཕྱིར་མི་འོང་དེས་འདོད་ཉོན་སྤངས་པར་ཐལ། དཀའ་འགྲེལ་དུ་འདོད་པ་ལ་ཆགས་བྲལ་གྱི་སོ་སྐྱེའི་རྒྱུད་ལ་འདོད་ཉོན་མངོན་འགྱུར་འབྱུང་ཚུལ་གྱི་སྐྱོན་སྤོང་ལུགས་འཐད་པའི་ཕྱིར་ན་མ་ཁྱབ་ཀྱང་དཔྱད་གཞི་ཆེ་བར་སྣང་ངོ༌། །ཡང་ཁ་ཅིག །མ་འདྲེས་པའི་མ་རིག་པ་ལ་ཉོན་ཡིད་འཁོར་གྱིས་ཁྱབ་ཟེར་ན། རང་གྲོགས་ཚོར་བ་ཡིད་མི་བདེ་དང་མཚུངས་ལྡན་གྱི་མ་འདྲེས་པའི་མ་རིག་པ་ཆོས་ཅན། དེར་ཐལ། དེའི་ཕྱིར། དེར་ཐལ། དེ་ཡོད་པའི་ཕྱིར། དེར་ཐལ། དེ་ལ་རང་གྲོགས་ཚོར་བ་ཡིད་མི་བདེ་དང་མཚུངས་ལྡན་གཅིག་དང་བཏང་སྙོམས་དང་མཚུངས་ལྡན་གཅིག་སྟེ་གཉིས་ཡོད་པའི་ཕྱིར། དེར་ཐལ། ཀུན་བཏུས་ལས། མ་རིག་པ་མ་འདྲེས་པ་གང་ཡིན་པ་དེ་འདོད་པའི་ཁམས་ན་ཡིད་མི་བདེ་བ་དང་བཏང་སྙོམས་དང་མཚུངས་པར་ལྡན་ནོ། །ཞེས་གསུངས་པའི་ཕྱིར། གོང་དུ་མ་ཁྱབ་ན་ཁྱབ་པ་ཡོད་པར་ཐལ། ཉོན་ཡིད་འཁོར་གྱི་མ་རིག་པ་ཡིན་ན། རང་གྲོགས་ཚོར་བ་བཏང་སྙོམས་དང་མཚུངས་ལྡན་དགོས་པའི་ཕྱིར། དེར་ཐལ། ཉོན་ཡིད་འཁོར་གྱི་ཚོར་བ་ཡིན་ན་བཏང་སྙོམས་ཡིན་དགོས་པའི་ཕྱིར་ཏེ། སུམ་ཅུ་པ་ལས། གང་དུ་སྐྱེ་བ་དེ་ཡིའོ་གཞན། །རེག་སོགས་ཀྱང་དེ། །ཞེས་གསུངས་པའི་ཕྱིར། ཁྱབ་སྟེ། ཀུན་
གཞིའི་འཁོར་གྱི་ཀུན་འགྲོ་ལྔ་དང་འདིའི་ཀུན་འགྲོ་ལྔ་ལ་སྒྲིབ་མ་སྒྲིབ་ཙམ་ལས་གཞན་གྱི་ཁྱད་མ་ཕྱེ་བས་ཚོར་བ་ཡང་བཏང་སྙོམས་ཁོ་ན་དགོས་པར་གྲུབ་པའི་ཕྱིར། དཀའ་འགྲེལ་ལས། ཀུན་གཞིའི་འཁོར་གྱི་རེག་སོགས་ལྔ་པོ་ཉོན་ཡིད་ཀྱི་འཁོར་དུའང་བཤད་ཅིང་ཚོར་བ་ལ་བྱེ་བྲག་མ་བྱས་པའི། ཞེས་གསུངས་པའི་ཕྱིར། དེ་ལ་ཁོ་ན་རེ། མ་འདྲེས་པའི་མ་རིག་པ་ཡིན་ན་ཉོན་ཡིད་འཁོར་ཡིན་དགོས་པར་ཐལ། ཉོན་ཡིད་མེད་ན་མ་འདྲེས་པའི་མ་རིག་པ་མེད་པར་ཐལ་བའི་སྐྱོན་བརྗོད་ཚུལ་ཡོད་པའི་ཕྱིར་ན་མ་ཁྱབ་སྟེ། དེ་མ་འདྲེས་པའི་མ་རིག་པ་ཙམ་མ་ཡིན་པར་སོ་སྐྱེའི་གནས་སྐབས་སུ་རྟག་ཏུ་རྒྱུན་མ་ཆད་པར་མངོན་འགྱུར་དུ་འཇུག་པའི་མ་རིག་པ་ཞིག་མེད་པར་ཐལ་བ་འཕངས་པ་ཡིན་པའི་ཕྱིར། དེར་ཐལ། དེ་འདྲ་ཞིག་ཡོད་པ་ནི། ཡང་དག་དོན་ལ་འཇུག་པ་ཡི། །སེམས་ཀྱི་གེགས་སུ་རྟག་གྱུར་དང༌། །དུས་རྣམས་ཀུན་ཏུ་འབྱུང་བ་དེ། །མ་འདྲེས་པ་ཡི་མ་རིག་འདོད། །ཅེས་པའི་ལུང་གིས་འགྲུབ་ལ་འཇུག་ཤེས་འཁོར་ལ་དེ་འདྲ་མི་རུང་བའི་ཕྱིར། དོན་གསང་ལས། ཐེག་པ་ཆེན་པོ་ལྟར་ན་རྣམ་པ་གཉིས་ཏེ། ཞེས་པ་ནས། འཇུག་པའི་རྣམ་པར་ཤེས་པ་དང་མཚུངས་པར་ལྡན་པ་ནི་གཅིག་གོ །གཉིས་པ་ནི། དུས་ཐམས་ཅད་དུ་ཀུན་ཏུ་འབྱུང་བའི་ཕྱིར། འཆད་པར་འགྱུར་བའི་སྒྲུབ་པས་རབ་ཏུ་གྲུབ་པ་ཡིན་ནོ། །ཞེས་དང༌། བཤད་སྦྱར་ལས། དུས་རྣམས་ཀུན་ཏུ་འབྱུང་བ་དེ། །ཞེས་བྱ་བ་ནི་དགེ་བ་དང་མི་དགེ་བ་དང་ལུང་དུ་མ་བསྟན་པའི་གནས་སྐབས་སུ་ཡང་རྗེས་སུ་འབྲེལ་བའི་ཕྱིར་རོ། །ཞེས་གསུངས་པའི་ཕྱིར། ཡང་དག་དོན་ལ་ཞེས་སོགས་ཀྱི་ལུང་འདི་དཀའ་འགྲེལ་ལས་རེད་མདའ་བའི་ཊཱིཀྐ་
དང་སྒོ་བསྟུན་ཏེ། ཐེག་བསྡུས་ལས་ཞེས་གསུངས་ལ། དོན་གསང་ལས། དེ་ནི་དེ་ཆོས་མངོན་པའི་མདོ་ལས་གསུངས་པའི་ཚིགས་སུ་བཅད་པའི་སྟོན་པར་བྱེད་དོ། །ཞེས་མདོ་ལུང་ཡིན་པར་གསུངས་ཤིང་ཐེག་བསྡུས་སུ་བར་གྱི་ཚིགས་བཅད་དང་དཀྱུས་གཅིག་ཏུ་འབྱུང་བས་དཔྱད་པར་བྱའོ། །མ་འདྲེས་པའི་དོན་ལ་ཡང་བཞེད་ཚུལ་མི་འདྲ་བ་དུ་མ་ཡོད་དེ། བཤད་སྦྱར་ལས། ཉོན་མོངས་པ་གཞན་དང་མཚུངས་པར་མི་ལྡན་པའི་ཕྱིར་མ་འདྲེས་པ་ཉིད་དུ་འདོད་པ་མ་ཡིན་གྱི་འོ་ན་ཇི་ལྟར་ཞེ་ན། གཞན་ལ་མེད་པའི་ཕྱིར་ཏེ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་བཞིན་ནོ། །ཞེས་འདིར་བསྟན་མ་འདྲེས་པའི་མ་རིག་པ་དེ་རྟེན་ཉོན་ཡིད་ཁོ་ན་དང་མཚུངས་ལྡན་དུ་ཡོད་པས་རྟེན་མ་འདྲེས་པ་ཡིན་པར་བཤད། དོན་གསང་ལས། ཐུན་མོང་མ་ཡིན་པའི་དོན་གྱིས་ནི་མ་ཡིན་ཏེ། རྣམ་པར་ཤེས་པ་གཞན་དང་མཚུངས་པར་ལྡན་པ་ཡང་དེ་ཐལ་བར་འགྱུར་དུ་འོང་བས་སོ། །ཞེས་དང༌། མ་རིག་པ་རང་དབང་ཅན་ཡོད་དེ་དེའི་སྟོབས་ཀྱིས་དེ་དང་མཚུངས་པར་ལྡན་པའི་འདོད་ཆགས་ལ་སོགས་པ་དྲངས་པའི་ཕྱིར་ཞེས་སེམས་གཞན་གྱི་འཁོར་དུ་མི་འགྲོ་བ་ཙམ་ཡིན་ན་མི་དགེ་བའི་སེམས་དང་མཚུངས་ལྡན་གྱི་མ་རིག་པ་དེ་ཡང་སེམས་གཞན་གྱི་འཁོར་དུ་མི་འགྲོ་བས་མ་རིག་པ་ཐམས་ཅད་མ་འདྲེས་པའི་དེར་ཐལ་བ་འཕངས་ནས་རང་ལུགས་རྫས་མ་འདྲེས་པའམ་རང་སྟོབས་ཀྱིས་ཉོན་མོངས་གཞན་རྣམས་འདྲེན་པའི་མཐུ་མ་འདྲེས་པ་ལ་བཤད་དེ་རྫས་ཀྱང་ནུས་པའི་རྣམ་གྲངས་ཡིན་པས་དོན་གཅིག་གོ །རྒྱ་གར་མཁས་པའི་བཞེད་པ་འདི་དག་དགོངས་པ་ཟབ་
པས་ཁ་ཚོན་གཅོད་དཀའ་ཡང་དཀའ་འགྲེལ་ལས། ཉོན་ཡིད་ཀྱི་འཁོར་རྣམས་ཕན་ཚུན་རྒྱུ་འབྲས་ཡིན་པས་འདི་ཁོ་ནས་དྲངས་ཞེས་བཞག་ཏུ་མེད་པའི་ཕྱིར་རོ། །ཞེས་ལུགས་ཕྱི་མ་བཀག་ནས་སྔ་མ་འཐད་ཕྱོགས་སུ་མཛད་དོ། །འདི་ལ་ཁ་ཅིག །མ་འདྲེས་པའི་མ་རིག་པ་དེ་དོན་གསང་མཁན་པོས་ནུས་པ་མ་འདྲེས་པར་བཤད་ཀྱང་རང་ལུགས་རྟེན་མ་འདྲེས་པ་ཡིན་ཟེར་ན། འོ་ན། རང་ལུགས་ལ་མ་འདྲེས་པའི་མ་རིག་པ་དེ་རྟེན་ཉོན་ཡིད་ཁོ་ན་དང་མཚུངས་ལྡན་ཡིན་པར་ཐལ། དེ་རྟེན་མ་འདྲེས་པར་འཇོག་ཚུལ་འཐད་པའི་ཕྱིར། འདོད་མི་ནུས་ཏེ། དེ་ལ་ཉོན་ཡིད་དང་མཚུངས་ལྡན་ཡིན་མིན་གཉིས་ཡོད་པའི་ཕྱིར། ཀུན་བཏུས་ལས། མ་འདྲེས་པ་ནི་བདེན་པ་རྣམས་མི་ཤེས་པའོ། །ཞེས་དང༌། དོན་གསང་ལས། མ་འདྲེས་པ་ནི་མི་བརྟན་པ་དང་བརྟན་པ་སྟེ། མི་བརྟན་པ་ནི་ཡིད་ཀྱི་རྣམ་པར་ཤེས་པ་དང་མཚུངས་པར་ལྡན་པ་ཞེས་པ་ནས། མཐོང་བས་སྤང་བར་བྱ་བ་ཁོ་ན་ཡིན་ནོ། །ཞེས་གསུངས་པའི་ཕྱིར། དེས་ན་གོང་དུ་བཤད་པ་ཉོན་ཡིད་འཁོར་གཞིར་བཞག་ཡིན་ནོ། །དེ་ལ་ཁོ་ན་རེ། འཇུག་ཤེས་དང་མཚུངས་ལྡན་གྱི་མ་འདྲེས་པའི་མ་རིག་པ་དེ་མཐོང་སྤང་དུ་བཤད་པ་མི་འཐད་པར་ཐལ། དེ་ལ་སྒོམ་སྤང་གིས་ཁྱབ་པའི་ཕྱིར། དེར་ཐལ། དེ་ལ་འཇིག་ལྟ་ལྷན་སྐྱེས་དང་མཚུངས་ལྡན་གཅིག་དགོས་པའི་ཕྱིར། དེར་ཐལ། རེད་མདའ་བའི་ཊཱིཀྐ་ལས། གཅིག་ནི་ཡིད་ཀྱི་རྣམ་པར་ཤེས་པའི་འཁོར་དུ་འབྱུང་བའི་འཇིག་ཚོགས་ལ་ལྟ་བ་ལྷན་ཅིག་སྐྱེས་པ་དང་མཚུངས་ལྡན་དུ་འབྱུང་བའི་མ་རིག་པའོ། །ཞེས་གསུངས་པའི་ཕྱིར་ཟེར་ན། འདིའི་ཡི་གེ་ནོར་པའམ་གང་ལྟར་ཡང་འཇིག་ལྟ་དང་མཚུངས་ལྡན་དུ་
ཁས་བླང་མི་རུང་སྟེ། ཊཱིཀྐ་རང་ཉིད་ལས། གང་གིས་བདེན་པའི་གནས་ལུགས་ལ་རྨོངས་པར་བྱེད་ཅིང་མི་ཤེས་པ་གང་ཡིན་པ་སྟེ། དེ་ཡང་ཡིད་ཀྱི་ཤེས་པའི་འཁོར་དུ་བྱུང་བ་ནི་ཉོན་མོངས་གཞན་དང་མཚུངས་ལྡན་མ་འདྲེས་པ་ཡིན་ལ། ཞེས་གསུངས་པ་གང་ཞིག །མཚུངས་ལྡན་མ་འདྲེས་པའི་དོན་རྩ་ཉོན་གཞན་དང་མཚུངས་ལྡན་དུ་མ་སོང་བ་ལ་བཤད་པའི་ཕྱིར། ཀུན་བཏུས་དར་ཊཱིཀ་ལས་ཀྱང༌། ཡིད་ཤེས་འཁོར་དུ་འབྱུང་བ་ནི་ཉོན་མོངས་གཞན་དང་མཚུངས་ལྡན་མ་འདྲེས་པ་ཡིན་ལ། ཉོན་ཡིད་ཀྱི་འཁོར་དུ་བྱུང་བ་ནི་རྟེན་ནམ་རྫས་མ་འདྲེས་པ་ཡིན་ནོ། །ཞེས་གསུངས་པའི་ཕྱིར། ཁྱབ་སྟེ། འདི་མཚུངས་ལྡན་མ་འདྲེས་པ་མིན་ན་མ་འདྲེས་པའི་དོན་གཞན་རྣམས་མ་ཚང་བས་དེར་འཇོག་ཚུལ་མེད་པའི་ཕྱིར། གཞན་ཡང་འཇུག་ཤེས་སུ་གྱུར་པའི་མ་འདྲེས་པའི་མ་རིག་པ་དེ་འཇིག་ལྟ་དང་མཚུངས་ལྡན་དུ་འགྲོ་བ་མི་འཐད་པར་ཐལ། འདོད་པའི་སས་བསྡུས་ཀྱི་དེ་འདྲའི་མ་རིག་པ་དེ་རང་གྲོགས་འཇིག་ལྟ་དང་མཚུངས་ལྡན་མ་ཡིན་པའི་ཕྱིར། དེར་ཐལ། དེ་འདྲའི་མ་རིག་པ་དེ་ལ་ཡིད་མི་བདེ་དང་མཚུངས་ལྡན་གཙོ་ཆེ་བ་གང་ཞིག །འཇིག་ལྟ་ལ་ཡིད་མི་བདེ་དང་མཚུངས་ལྡན་མ་ཡིན་པས་ཁྱབ་པའི་ཕྱིར། དང་པོ་གྲུབ་སྟེ། ཀུན་བཏུས་སྔར་དྲངས་ཟིན་ཅིང་དེའི་དར་ཊཱིཀ་ལས། མ་འདྲེས་པའི་མ་རིག་པ་ཉོན་ཡིད་ཀྱི་འཁོར་ལས་གཞན་པ་དེ་ནི་འདོད་པ་ན་ཡིད་མི་བདེ་བ་དང་བཏང་སྙོམས་དང་ལྡན་ལ། ཞེས་པ་ནས། ཡིད་མི་བདེ་བ་དང་ལྡན་པའི་རྒྱུ་མཚན་ཡིད་གཏན་ལ་མ་ཕེབས་པ་ལ་མོས་པ་མེད་པས་ཡིད་བདེ་མེད་པའི་ཕྱིར་རོ། །ཞེས་
དང༌། རྗེ་བཙུན་རེད་མདའ་བས་ཀྱང༌། ཉོན་ཡིད་འཁོར་ལས་གཞན་པ་དེ་ནི་འདོད་པའི་ཁམས་ན་བདེན་པ་ལ་རྨོངས་ནས་ཡང་དག་པའི་ཆོས་ལ་མི་དགའ་བས་ཡིད་མི་བདེ་བ་དང་འགག་ཁར་བཏང་སྙོམས་དང་མཚུངས་པར་ལྡན་ནོ། །ཞེས་གསུངས་པའི་ཕྱིར། ཤིན་ཏུ་གསལ་ལོ། །གཉིས་པ་གྲུབ་སྟེ། ཀུན་བཏུས་ལས། ང་རྒྱལ་ནི་འདོད་པའི་ཁམས་ན་ཡིད་བདེ་བ་དང་བཏང་སྙོམས་དང་མཚུངས་པར་ལྡན་ནོ། །ང་རྒྱལ་ཇི་ལྟ་བ་བཞིན་དུ་འཇིག་ཚོགས་ལ་ལྟ་བ་དང་ཞེས་གསུངས་པས་མ་རིག་པ་དེ་འཇིག་ལྟ་དང་མཚུངས་ལྡན་དུ་མི་འབྱུང་ལ་བདེན་པ་མཐོང་བ་ལ་གེགས་བྱེད་དུ་གསུང་ཚུལ་གྱིས་མཐོང་སྤང་དུ་འགྲུབ་པས་ལྷན་སྐྱེས་དང་མཚུངས་པར་ལྡན་པ་ལྷག་ཏུའང་མི་རུང་ངོ༌། །ཁོ་ན་རེ། འཇུག་ཤེས་སུ་གྱུར་པའི་མ་འདྲེས་པའི་མ་རིག་པ་དེ་མཛོད་ཇི་ལྟ་བ་བཞིན་འཇོག་པར་ཐལ། དེ་ཆགས་སོགས་ལྟ་མིན་བཞི་ལྟ་བ་ལྔ་ཁྲོ་སོགས་བཅུ་གང་དང་མཚུངས་པར་མི་ལྡན་པའི་མཐོང་སྤང་གི་མ་རིག་པ་ཞིག་ལ་འདོད་པའི་ཕྱིར་ན་མ་ཁྱབ། འདོད་མི་ནུས་ཏེ། མཛོད་ལུགས་དང་འདི་གཉིས་གྲོགས་སེམས་བྱུང་མང་ཉུང་མི་འདྲ་བའི་ཕྱིར། དེར་ཐལ། མཛོད་ལས། མི་དགེ་ལ་ནི་མ་འདྲེས་དང༌། །ལྟ་དང་ལྡན་ལ་ཉི་ཤུ་འབྱུང། །ཞེས་འདོད་པའི་མ་འདྲེས་པའི་མ་རིག་པ་དང་མཚུངས་ལྡན་གྱི་སེམས་དེའི་འཁོར་དུ་སེམས་ཀྱི་ས་མང་བཅུ། ཉོན་མོངས་ཆེན་པོའི་ས་པ་དྲུག །མི་དགེ་བའི་ས་མང་གཉིས། རྟོག་དཔྱོད་གཉིས་ཏེ་ཉི་ཤུ་འབྱུང་བར་འདོད་ཀྱང༌། ལུགས་འདིར་དང་པོ་བཅུའི་ནང་ནས་ཡུལ་ངེས་ལྔ་བསལ་ཏེ་དགེ་སེམས་ཁོ་ནའི་འཁོར་དུ་བཞག་པས་མ་རིག་པ་དང་མཚུངས་ལྡན་མི་རུང་བའི་
ཕྱིར། རིགས་པ་དང་པོ་འདི་ལ་སྤྱི་དོན་རོལ་མཚོར། ཉོན་ཡིད་འབའ་ཞིག་གི་འཁོར་གྱི་མ་རིག་པ་མེད་པར་ཐལ། ཉོན་ཡིད་མེད་པའི་ཕྱིར། ཞེས་འཕངས་པ་ནི་ཁྱབ་པ་ཡོད་ཙམ་ལས་བསྒྲུབ་བྱ་སྒྲུབ་ནུས་མིན་ཞིང༌། ལྔ་པོ་དག་དང་འདྲ་བ་དང༌། །ཞེས་པའི་དོན་ལ་ཡིད་ཀྱི་རྣམ་ཤེས་ལ་སྒོ་ལྔའི་དབང་ཤེས་དང་འདྲ་བར་བདག་རྐྱེན་ཡིད་དབང་ལ་བརྟེན་པ་ཡོད་པ་གང་ཞིག །དེ་ཡོད་ན་ཉོན་ཡིད་ཡོད་དགོས་པའི་ཕྱིར། ཞེས་པ་ཡང་སྐབས་དོན་ལ་མ་ཞུགས་ཏེ། རྣམ་ཤེས་དྲུག་ཀ་འཇུག་ཤེས་སུ་འདྲ་བ་ལ་རྟེན་དབང་པོའི་ཁམས་དྲུག་ཁྱད་མེད་དུ་དགོས་པར་བྱེ་སྨྲས་ཀྱང་འདོད་པའི་ཕྱིར། དེར་ཐལ། མཛོད་ལས། དྲུག་པོ་འདས་མ་ཐག་པ་ཡི། །རྣམ་ཤེས་གང་ཡིན་དེ་ཡིད་དོ། །དྲུག་པའི་རྟེན་ནི་རབ་སྒྲུབ་ཕྱིར། །ཞེས་དྲུག་པ་ཡིད་ཀྱི་རྣམ་ཤེས་ཀྱི་རྟེན་ནམ་བདག་རྐྱེན་སྒྲུབ་པའི་ཕྱིར་ཚོགས་དྲུག་སྔ་མ་འགག་མ་ཐག་པའི་ཡིད་དེ་ལ་ཡིད་ཀྱི་དབང་པོའམ་ཡིད་ཀྱི་ཁམས་ཞེས་ལོགས་སུ་བཞག་པའི་ཕྱིར། དེར་ཐལ། དེ་ལྟར་ན་ཡིད་ཀྱི་ཁམས་དང་རྣམ་ཤེས་ཀྱི་ཁམས་དྲུག་ཕན་ཚུན་དུ་འདུ་ཡང་ཁམས་བཅོ་བརྒྱད་དུ་མི་འགྱུར་བའི་སྐྱོན་མེད་ཚུལ་དཔེ་དང་བཅས་ཏེ་གསུངས་པའི་ཕྱིར། མཛོད་རང་འགྲེལ་ལས། རྣམ་པར་ཤེས་པ་གང་དང་གང་འགག་མ་ཐག་པ་དེ་ཉིད་ནི་ཡིད་ཀྱི་ཁམས་ཞེས་བྱ་སྟེ། དཔེར་ན་བུ་དེ་ཉིད་གཞན་གྱི་ཕར་འགྱུར་བ་དང༌།ཞེས་པ་ནས། རྫས་སུ་ན་ཁམས་བཅུ་བདུན་ནམ་བཅུ་གཉིས་སུ་འགྱུར་ན། ཞེས་སོགས་གསུངས་པའི་ཕྱིར་རོ། །དེས་ན་ལྔ་པོ་དག་དང་མི་འདྲ་བའི་སྐྱོན་བརྗོད་ཚུལ་དབང་ཤེས་ལྔ་ལ་བདག་
རྐྱེན་དབང་པོ་སྔོན་དུ་འགྲོ་དགོས་པ་ལྟར་ཡིད་ཤེས་ལ་ཡང་བདག་རྐྱེན་དགོས་ཞེས་བཤད་པ་མ་ཡིན་པར་ཐལ། མིག་ཤེས་སོགས་ལ་རང་དང་དུས་མཉམ་པའི་རྟེན་དབང་པོ་ཡོད་པ་ལྟར་ཡིད་ཤེས་ལ་ཡང་རང་དང་མཉམ་དུ་ཡོད་པའི་རྟེན་ཐུན་མོང་མ་ཡིན་པ་ཞིག་དགོས་ཞེས་བཤད་པ་ཡིན་པའི་ཕྱིར། ཐེག་བསྡུས་ལས། རྣམ་པར་ཤེས་པ་ལྔའི་ཚོགས་དག་གི་ལྷན་ཅིག་འབྱུང་བའི་གནས་ནི་མིག་ལ་སོགས་པའོ། །ཞེས་གསུངས་ལ། དབྱིག་འགྲེལ་ལས། ཡིད་ཀྱི་རྣམ་པར་ཤེས་པའང་དེ་དང་མཚུངས་པར་གྱུར་བའི་རྟེན་ཡོད་པ་ཡིན་ནོ། །ཞེས་གསུངས་པའི་ཕྱིར་དང༌། ལྷན་ཅིག་འབྱུང་བ་ཞེས་པའི་དོན་ཡོད་པའི་ཕྱིར། དཀའ་འགྲེལ་ལས་ཀྱང་དབང་ཤེས་ལྔ་ལ་འདས་པའི་རྟེན་འདས་མ་ཐག་པ་དེ་དང་ལྷན་ཅིག་པའི་རྟེན་དབང་པོ་ལྔ་སྟེ་གཉིས་ཡོད་ལ་ཡིད་ཤེས་ལ་མེད་པ་མི་འཐད་དེ། ཞེས་སོ། །དེ་ལ་ཁོ་ན་རེ། སྐྱོན་དེ་མི་འཇུག་པར་ཐལ། དྲུག་པ་ཡིད་ཤེས་ཀྱི་དུས་སུ་ཀུན་གཞི་ཡོད་པའི་ཕྱིར་ཟེར་ན། མི་འཐད་པར་ཐལ། ཀུན་གཞི་དབང་དོན་ཐམས་ཅད་ཀྱི་ཐུན་མོང་གི་རྒྱུ་རྐྱེན་ཡིན་པས། རྣམ་ཤེས་ཀྱི་ཐུན་མོང་མ་ཡིན་པའི་བདག་རྐྱེན་དུ་མི་རུང་བའི་ཕྱིར། དོན་གསང་ལས། རྩ་བའི་རྣམ་པར་ཤེས་པ་དང་འཁོར་བ་ཇི་སྲིད་པའི་ཕུང་པོ་ཞེས་བྱ་བ་རྣམ་པར་ཤེས་པ་དྲུག་ཆར་གྱིས་ཐ་མི་དད་པའི་རྒྱུ་ཡིན་པ་དེ་དག་ལ་ཡང་བརྗོད་པར་བྱ་སྟེ། ཡིད་ཀྱི་རྣམ་ཤེས་ནི་རྟེན་ཐུན་མོང་བ་ཅན་ཁོ་ན་མིན་ཏེ། འཇུག་པའི་རྣམ་པར་ཤེས་པ་ཡིན་པའི་ཕྱིར། དེ་དག་བཞིན་ནོ། །ཞེས་གསུངས་པའི་ཕྱིར། འདིས་ནི་ཕལ་ཆེན་པ་དང་ས་སྟོན་པའི་ལུགས་ཀྱང་ཁེགས་སོ། །ཡང་ཁ་ཅིག །སྐབས་འདིར་འགོག་ཡུལ་ལ་ཡིད་ཀྱི་རྣམ་
ཤེས་དང་དུས་མཉམ་པའི་དེའི་རྟེན་དབང་པོ་མི་འདོད་པས་ཁྱབ་པར་ཐལ། རྩོད་ཚུལ་འཐད་པའི་ཕྱིར་ཟེར་ན་མ་ཁྱབ། གཙོ་བོ་དེ་ལྟར་ཡིན་ཀྱང་དུས་མཉམ་པའི་རྟེན་འདོད་མཁན་ཡང་ཡོད་པའི་ཕྱིར། རྟགས་ཟུར་དང་པོ་གྲུབ་སྟེ། མཛོད་ལས། ཐ་མའི་རྟེན་འདས་ལྔ་རྣམས་ཀྱི། །དེ་དག་ལྷན་ཅིག་སྐྱེ་བའང་ཡིན། །ཞེས་གསུངས་པའི་ཕྱིར། གཉིས་པ་གྲུབ་སྟེ། དོན་གསང་ལས། གནས་བརྟན་པ་རྣམས་ཀྱི་ལྟར་རྣམ་པར་ཤེས་པ་ཚོགས་ལྔའི་ཐམས་ཅད་བྱེ་བྲག་ཏུ་སྨྲ་བས་བཤད་པ་བཞིན་ནོ། །ཡིད་ཀྱི་རྣམ་པར་ཤེས་པའི་ལྷན་ཅིག་སྐྱེས་པའི་རྟེན་ནི་སྙིང་གི་ཕྱོགས་བུ་ག་གཅིག་དང་གཉིས་དང་གསུམ་དང་བཞི་ནས་བུ་ག་དགུའི་བར་ཡིན་ནོ། །ཞེས་གསུངས་པའི་ཕྱིར། ཁྱབ་སྟེ། དེས་རྟེན་དུས་མཉམ་པ་བཞག་ཀྱང་དེ་རྟེན་དུ་མེད་རུང་བས་སྔ་མའི་སྐྱོན་སྤོང་མི་ནུས་བའི་ཕྱིར། དེར་ཐལ། ཡིད་ཤེས་ཀྱི་རྟེན་དབང་བོ་གཟུགས་ཅན་པ་ཡོད་ན་དེ་དབང་ཤེས་སུ་ཐལ་བ་དང༌། དབང་ཤེས་བཞིན་དུ་ཡུལ་འདས་པ་འཛིན་མི་ནུས་པར་ཐལ་བ་དང༌། གཟུགས་མེད་ཁམས་ན་ཡིད་ཤེས་ཀྱང་མེད་པར་ཐལ་བ་སོགས་འབྱུང་བའི་ཕྱིར། སྤྲོས་པས་ཆོག་གོ །ཡང་ཁ་ཅིག །ཡིད་ཤེས་ལ་ལྷན་ཅིག་བྱེད་པའི་རྟེན་བཤད་པ་མི་འཐད་པར་ཐལ། དེ་ཕ་རོལ་པོ་ཁ་ཅིག་གིས་རྣམ་ཤེས་ལ་ལྷན་ཅིག་པའི་རྟེན་ངེས་ཅན་དུ་དགོསཔར་བཤད་པའི་ཁས་བླང་ལ་འཁྲིས་ནས་དགག་པ་བྱས་པ་ཡིན་གྱི་རང་ལུགས་ལ་དེ་དང་ལྷན་ཅིག་པའི་རྟེན་སྒྲུབ་པའི་དབང་དུ་བྱས་པ་མ་ཡིན་པའི་ཕྱིར་ཏེ། བཤད་སྦྱར་ལས། ལྔ་པོ་དག་དང་འདྲ་བ་ཞེས་བྱ་བ་ནི་སྒྲུབ་པ་མ་ཡིན་ནོ། །འོ་
ན་ཅི་ཞེ་ན། སུན་འབྱིན་པ་སྟེ། ཞེས་པ་ནས། གཞན་གྱི་གཞུང་ལ་ནི་གང་ལྷན་ཅིག་སྐྱེ་བའི་གནས་མེད་པའི་རྣམ་པར་ཤེས་པ་ཅི་ཡང་མེད་དོ་ཞེའོ། །ཞེས་གསུངས་པའི་ཕྱིར་ན་མ་ཁྱབ་སྟེ། རྣམ་ཤེས་དེ་དང་དུས་མཉམ་པའི་དབང་པོ་དེ་དེའི་བདག་རྐྱེན་དུ་བྱེ་སྨྲས་འདོད་ཀྱང་སྐབས་འདིར་དེ་ལ་བརྟེན་པའི་ཆ་ནས་རྐྱེན་དུ་བཏགས་པ་ཙམ་ལས་རྐྱེན་དངོས་སུ་མི་འདོད་པའི་དོན་ཡིན་པའི་ཕྱིར་དང༌། ཕྱིར་རྒོལ་རང་ལ་གྲགས་པའི་ལུང་གིས་བསྒྲུབ་པ་ལ་སྔ་རྒོལ་རང་གིས་ཁས་མི་ལེན་མི་དགོས་པའི་ཕྱིར་རོ། །ཡང་ཁོ་ན་རེ། མཛོད་ལས། དྲུག་པོ་འདས་མ་ཐག་པ་ཡི། །ཞེས་སོགས་ཀྱི་སྐབས་ལྟར་འདིར་ཡང་ཁས་ལེན་པར་ཐལ། ཀུན་བཏུས་ལས། ཡིད་གང་ཞེ་ན། ཞེས་པ་ནས། རྣམ་པར་ཤེས་པ་དྲུག་པོ་དག་འགག་མ་ཐག་པའི་རྣམ་པར་ཤེས་པའོ། །ཞེས་གསུངས་པའི་ཕྱིར་ན་མ་ཁྱབ། མཛོད་ཀྱི་དེ་དྲུག་ཀའི་ཐུན་མོང་མ་ཡིན་པའི་བདག་རྐྱེན་གྱི་གཙོ་བོ་དང་ཡིད་ཁམས་ཀྱི་གཙོ་བོའི་དབང་དུ་བྱས་པ་ཡིན་ལ་སྐབས་འདིར་དེ་བདག་རྐྱེན་གྱི་གཙོ་བོར་མི་རུང་བ་གང་ཞིག །ཡིད་ཀྱི་ཁམས་ཀྱི་གཙོ་བོར་ཡང་མི་རུང་བའི་ཕྱིར། རྟགས་དང་པོ་གྲུབ་སྟེ། སྐབས་འདིར་བཤད་པ་དེ་མ་ཐག་རྐྱེན་གྱི་དབང་དུ་བྱས་པ་ཡིན་པའི་ཕྱིར། དེར་ཐལ། ཐེག་བསྡུས་ལས། ཡིད་ནི་རྣམ་པ་གཉིས་ཏེ། དེ་མ་ཐག་པའི་རྐྱེན་བྱེད་པའི་གནས་སུ་གྱུར་པའི་ཕྱིར་རྣམ་པར་ཤེས་པ་འགག་མ་ཐག་པ་ཡིད་ཅེས་བྱ་བ་རྣམ་པར་ཤེས་པ་སྐྱེ་བའི་གནས་དང་གཉིས་པ་ཉོན་མོངས་པ་ཅན་གྱི་ཡིད། ཅེས་གསུངས་པའི་ཕྱིར། གཉིས་པ་གྲུབ་སྟེ། ཀུན་བཏུས་དར་ཊཱིཀ་ལས། བསྟན་པའི་དབང་དུ་བྱས་ནས་ཁམས་བསྟན་པར་སེམས་
དང་སྐྱེ་མཆེད་བསྟན་པར་ཡིད་དང། ཞེས་སོགས་གསུངས་པའི་ཕྱིར། ཁྱབ་སྟེ། ཁམས་ཀྱི་སྒྲ་དོན། སྤོང་དང་སྐྱེ་སྒོ་རིགས་ཀྱི་དོན། །ཞེས་པ་ལྟར་འབྲས་བུ་ཕྱི་མ་འགྲུབ་པའི་ནུས་པའི་ཆ་ནས་གཙོ་བོར་འཇོག་དགོས་པ་གྲུབ་མཐའ་བཞི་ག་མཐུན་ལ་སྐབས་འདིར་བག་ཆགས་བསགས་པས་སེམས་སུ་འཇོག་ཚུལ་སྔར་བཤད་ཟིན་པའི་ཕྱིར། ཡང་ཁོ་ན་རེ། དྲུག་པོ་འདས་མ་ཐག་པའི་ཡིད་དེ་བདག་རྐྱེན་དང་ཉོན་ཡིད་དེ་མ་ཐག་རྐྱེན་དུ་བཞག་ནའང་ཆོག་པར་ཐལ། དྲུག་པ་ཡིད་ཀྱི་རྣམ་ཤེས་སྐྱེ་བ་ལ་དེ་གཉིས་ཀ་དགོས་པའི་ཕྱིར། དར་ཊཱིཀ་ལས། འགག་ཁ་མ་དེ་ཉིད་དུས་གཞན་གྱི་བར་དུ་མ་ཆོད་པའི་རྣམ་ཤེས་ཕྱི་མ་དེ་ཉིད་སྐྱེ་བའི་གོ་ཕྱེ་བའི་སྒོ་ནས་བདག་རྐྱེན་བྱེད་པའི་ཕྱིར་ཡིད་ཅེས་བྱའོ། །ཞེས་གསུངས་པའི་ཕྱིར་ན་མ་ཁྱབ་སྟེ། དེས་བདག་རྐྱེན་ཕལ་བ་ཙམ་བྱེད་ཀྱང་གཙོ་བོར་དེ་མ་ཐག་རྐྱེན་དུ་འཇོག་དགོས་པའི་ཕྱིར་ཏེ། །དེ་ཉིད་ལས། དེ་མ་ཐག་རྐྱེན་ཡིན་ཡང་ཕྱི་མ་སྐྱེ་བའི་གོ་འབྱེད་པའི་བྱེད་ལས་དང་ལྡན་པས་བདག་རྐྱེན་དུ་བཞག་ལ། ཞེས་གསུངས་པའི་ཕྱིར། དེས་ན་གཉིས་པ་ཡང་མི་འཐད་པར་ཐལ། དེ་མ་ཐག་རྐྱེན་ལ་རང་ཉིད་མངོན་གྱུར་དུ་ཡོད་པ་དེ་འགག་པའི་སྒོ་ནས་རྣམ་ཤེས་ཕྱི་མ་དེ་ལ་སྐྱེ་བའི་གོ་སྐབས་སྦྱིན་པ་ཞིག་དགོས་པ་གང་ཞིག །ཉོན་ཡིད་རྟག་ཏུ་མངོན་གྱུར་དུ་འཇུག་པས་དེ་འདྲའི་རྣམ་དབྱེ་མི་འཐད་པའི་ཕྱིར། རྗེ་བཙུན་རེད་མདའ་བས། འདི་ལ་ཀུན་གཞི་དང་ཉོན་ཡིད་ནི་འཇུག་པའི་རྣམ་པར་ཤེས་པ་དག་གི་དེ་མ་ཐག་པའི་གནས་མ་ཡིན་ཏེ། དེ་གཉིས་ནི་དུས་ཐམས་ཅད་དུ་འབྱུང་བས་དེ་དག་འགག་སྟོབས་
ཀྱིས་ཤེས་པ་གཞན་སྐྱེ་བའི་གོ་འབྱེད་པ་མ་ཡིན་པའི་ཕྱིར། ཞེས་གསུངས་ཤིང་འདིར་སྙོམས་འཇུག་ལས་ལངས་མ་ཐག་པ་སོགས་ལ་ཞིབ་ཆ་དགོས། ཁ་ཅིག་ན་རེ། ཉོན་ཡིད་ཀྱི་སྒོ་ནས་སྙོམས་འཇུག་གཉིས་ཀྱི་བྱེ་བྲག་གམ་ཁྱད་པར་འབྱེད་ཚུལ་ཉོན་ཡིད་དང་མཚུངས་ལྡན་དུ་འཇུག་མི་འཇུག་གི་སྒོ་ནས་འཇོག་ཟེར་ན། འོ་ན་འདུ་ཤེས་མེད་པའི་སྙོམས་འཇུག་དེ་ཉོན་ཡིད་དང་མཚུངས་ལྡན་ཡིན་པར་ཐལ། དམ་བཅའ་འཐད་པའི་ཕྱིར། འདོད་མི་ནུས་ཏེ། དེ་མཚུངས་ལྡན་མ་ཡིན་པའི་འདུ་བྱེད་ཡིན་པའི་ཕྱིར། ཀུན་བཏུས་ལས། སེམས་དང་སེམས་ལས་བྱུང་བའི་ཆོས་བརྟན་པ་མ་ཡིན་པ་རྣམས་འགོག་པ་ལ་འདུ་ཤེས་མེད་པའི་སྙོམས་པར་འཇུག་པ་ཞེས་གདགས་སོ། །ཞེས་དང། བསྡུ་བ་ལས། དེ་ཡང་བཏགས་པའི་ཡོད་པ་ཡིན་གྱི་རྫས་སུ་ནི་མིན་པར་རིགས་པར་བྱའོ། །ཞེས་གསུངས་པའི་ཕྱིར་དང། སྙོམས་འཇུག་དེ་ཉིད་ཤེས་པར་འདོད་ན་འགོག་སྙོམས་ལ་ཡང་འདྲ་བས་དེའི་ཚེ་ཤི་ལུས་སུ་ཐལ་བའི་སྐྱོན་སྤོང་བའི་ཚེ་ཀུན་གཞི་ཡོད་པས་སྐྱོན་མེད་ཅེས་བཤད་མི་དགོས་པར་སྙོམས་འཇུག་རང་ཉིད་ཡིད་ཤེས་ཡིན་པའི་ཕྱིར་ཞེས་ལན་བཏབ་ཆོག་པའི་ཕྱིར། གསེར་འཕྲེང་ལས། འགོག་སྙོམས་ཡིད་ཤེས་ཡིན་པས་སེམས་ཡོད་ཡིན་ཞེས་ལན་བཏབ་ཆོག་པའི་ཕྱིར། ཞེས་གསུངས་པའི་ཕྱིར། གལ་ཏེ་ཤེས་པར་འདོད་ན་ཡང་ཏིང་ངེ་འཛིན་དང་མཚུངས་ལྡན་ཅི་རིགས་ཡིན་པས་ཉོན་ཡིད་དང་མཚུངས་ལྡན་མི་རུང་བའི་ཕྱིར། གཞན་ཡང་སྙོམས་འཇུག་གཉིས་ཀྱི་བྱེ་བྲག་འབྱེད་ཚུལ་དེ་ལྟར་མ་ཡིན་པར་ཐལ། འགོག་སྙོམས་ཀྱི་ཚེ་ཉོན་ཡིད་མེད་ལ། འདུ་ཤེས་མེད་
པའི་སྙོམས་འཇུག་གི་ཚེ་ཉོན་ཡིད་ཡོད་པས་དེ་དང་མཚུངས་ལྡན་གྱི་ལྟ་བ་དང་འདོད་ཆགས་སོགས་ཀྱི་སྒོ་ནས་བདག་ཏུ་སྲེད་པའི་ཤུགས་མི་ཉམས་པའི་སྐྱོན་དང་བཅས་པའི་ཕྱིར། ཐེག་བསྡུས་འགྲེལ་པ་ལས། འདི་ལྟར་དེའི་དུས་སྐབས་ན་ཉོན་མོངས་ཅན་གྱི་ཡིད་མེད་ན་ངར་འཛིན་པ་མེད་པར་འགྱུར་རོ། །དེ་ལྟར་ན་ནི་འཕགས་པས་ཀྱང་སྨད་པར་མི་འགྱུར་ན་དེ་ནི་སྨད་པ་ཉིད་ཡིན་པས། ཞེས་གསུངས་པའི་ཕྱིར། ཡང་ཁོ་ན་རེ། སྙོམས་འཇུག་དེ་གཉིས་ལ་རང་གི་ངོ་བོ་ཞི་མ་ཞིའི་ཁྱད་པར་མེད་པར་ཐལ། དེ་གཉིས་ཀ་དང་མཚུངས་ལྡན་གྱི་ཉོན་མོངས་མེད་པ་འདྲ་བའི་ཕྱིར་ན་མ་ཁྱབ་སྟེ། དེ་དང་མཚུངས་ལྡན་གྱི་ཉོན་མོངས་མེད་ཀྱང་དེའི་ཚེ་ཉོན་མོངས་མངོན་གྱུར་དུ་ཡོད་པས་སྲེད་པའི་བརླན་དང་བཅས་པ་ཡིན་པའི་ཕྱིར་ཏེ། ཐེག་བསྡུས་ལས། འདུ་ཤེས་མེད་པའི་སྙོམས་པར་འཇུག་པ་ནི་ཉོན་མོངས་པ་ཅན་གྱི་ཡིད་ཀྱིས་རབ་ཏུ་ཕྱེ་བ་ཡིན་གྱི། ཞེས་གསུངས་པའི་ཕྱིར། དཔེར་ན་སྐྱེ་སྲིད་དེ་རྣམ་སྨིན་ཡིན་པས་ཉོན་མོངས་དང་མཚུངས་ལྡན་མི་རུང་ཡང་སྐྱེ་བའི་སྲིད་པ་ཉོན་མོངས་ཅན། ཞེས་བཤད་པ་ལྟ་བུ་ཡིན་པའི་ཕྱིར། ངེས་ཚིག་མེད་པའི་སྐྱོན་བརྗོད་ཚུལ་ལ་རོལ་མཚོ་སོགས་སུ་ཉོན་ཡིད་ཀྱི་ངེས་ཚིག་ལ་ངར་སེམས་པ་ཞེས་བཤད་པ་མི་འཐད་པར་ཐལ། དེ་མེད་པའི་ཕྱིར། ཞེས་པ་ནུས་པ་ཤིན་ཏུ་ཆུང་སྟེ། ཉོན་ཡིད་འཁོར་བཅས་ལས་གཞན་པའི་ངར་སེམས་པ་ཡོད་པའི་ཕྱིར་དང༌། རྟག་ཏུ་ཞེས་པའི་ཚིག་གི་ནུས་པ་མ་ཐོན་པའི་ཕྱིར། དེར་ཐལ། ཕྲན་ཚེགས་ལས།
ཉོན་མོངས་ཅན་ཡིད་རྟག་ཏུ་ནི། །ཞེས་སོགས་དང༌། དཀའ་འགྲེལ་ལས། ཉོན་ཡིད་མེད་ན་རྟག་ཏུ་ངར་སེམས་པའི་ཕྱིར་ཡིད་དོ། །ཞེས་པའི་ངེས་ཚིག་འདི་རྣམ་པར་ཤེས་པ་གང་ལ་ཡང་མི་གནས་པར་འགྱུར་ཞེས་གསུངས་པའི་ཕྱིར་དང༌། བྱིངས་མདོ་ལས། མྣཱ་གོམས་པ་ལའོ། ཞེས་པའི་བྱིངས་བཞག །རྐྱེན་ཏིཔ྄་བྱིན། བྱེད་པ་པོ་ལ་ཨཔ྄འོ། །ཞེས་པས་ཨཔ྄་བྱིན། མྣཱ་ཞེས་པ་མ་ན་རུ་བསྒྱུར། པ྄་གཉིས་དང་བྱིངས་མཐའི་ཨ་ཡང་ཕྱིས། ན་སྲོག་མེད་ཨ་ལ་དྲངས་པས་མན་ཏི་གྲུབ་ཅིང་རྟག་ཏུ་གོམས་པའི་དོན་དུ་འགྲོ་ལ། སོ་སྐྱེའི་གནས་སྐབས་སུ་རྒྱུན་མ་ཆད་པར་ང་ང་ཞེས་པའི་གོམས་པ་རྒྱུན་ཆགས་པ་ཉོན་ཡིད་ལས་གཞན་མེད་པའི་ཕྱིར། ཁ་ཅིག་ན་རེ། ངས་མཐོང་ངས་ཐོས་ཞེས་པ་ལྟ་བུའི་ངེས་ཚིག་ཀྱང་ཉོན་ཡིད་ཀྱི་དབང་གིས་འབྱུང་བ་མི་འཐད་པར་ཐལ། དགྲ་བཅོམ་པ་ཡང་དེ་ལྟར་གསུངས་པ་ཡོད་པའི་ཕྱིར་ན་མ་ཁྱབ་སྟེ། སོ་སྐྱེས་ཀྱིས་དེ་ལྟར་བཤད་པ་ངར་འཛིན་གྱི་དབང་གིས་ཡིན་ཀྱང་འཕགས་པས་གསུང་བ་དེ་དང་མཚུངས་མི་དགོས་པའི་ཕྱིར། ཉི་སྣང་ལས། དེའི་ཚིག་ནི་ཐ་སྙད་པ་ཡིན་གྱི་དོན་དམ་མ་ཡིན་པ་དེས་ན་སྙིང་པོ་མེད་དོ། །ཞེས་གསུངས་པའི་ཕྱིར། ཡང་ཁ་ཅིག །འདུ་ཤེས་མེད་པར་སྐྱེས་པའི་ཚེ་ཉོན་ཡིད་མེད་ཀྱང་གང་ཟག་དེ་ངར་འཛིན་དང་བྲལ་མི་དགོས་པར་ཐལ། དེ་ངར་འཛིན་གྱི་བག་ཆགས་དང་ལྡན་པའི་ཕྱིར་ཟེར་ན། དགྲ་བཅོམ་སྐྱོན་དུ་འཕེན་ལ། དེའི་ས་བོན་དང་ལྡན་པའི་ཕྱིར་ཟེར་ན་ཡང་མི་འཐད་པར་ཐལ། དེ་སྤྱིར་ཉོན་ཡིད་འདོད་པའི་དབང་དུ་བྱས་པ་ཡིན་ན་ཡང་མི་འཐད། མི་འདོད་པའི་དབང་དུ་བྱས་པ་ཡིན་ན་ཡང་མི་འཐད་པའི་ཕྱིར།
དང་པོ་གྲུབ་སྟེ། སྤྱིར་ཉོན་ཡིད་ཡོད་ན་འདུ་ཤེས་མེད་པའི་ཚེ་དེ་འགག་དོན་མེད་པའི་ཕྱིར། གཉིས་པ་གྲུབ་སྟེ། སྤྱིར་ཉོན་ཡིད་མི་འདོད་ན་ཀུན་གཞི་ཡང་མི་འདོད་དགོས་པས་དེའི་ཚེ་ངར་འཛིན་གྱི་བག་ཆགས་ཀྱང་མེད་དགོས་པའི་ཕྱིར། དེར་ཐལ། དེའི་བག་ཆགས་ཡོད་པ་ལ་བསྒོ་གཞི་ཞིག་དགོས་པས་ཀུན་གཞི་ཡོད་པར་གྲུབ་པའི་ཕྱིར། ཁ་ཅིག་གིས། དཀའ་འགྲེལ་ལས། ངར་འཛིན་མི་དགེ་བའི་སེམས་དང་མཚུངས་པར་ལྡན་པས་ན་དགེ་བ་ལུང་མ་བསྟན་གྱི་སེམས་དང་དུས་གཅིག་ཏུ་མི་འབྱུང་ངོ༌། །ཞེས་པའི་དོན་དུ་བསམས་ནས་ཉོན་ཡིད་འཁོར་བཅས་ལས་གཞན་པའི་ངར་འཛིན་ལ་མི་དགེ་བས་ཁྱབ་ཟེར་ན། གོང་མའི་སས་བསྡུས་ཀྱི་མཐོང་སྤང་འཇིག་ལྟ་ཆོས་ཅན། མི་དགེ་བ་ཡིན་པར་ཐལ། ཉོན་ཡིད་དང་མཚུངས་ལྡན་མ་ཡིན་པའི་འཇིག་ལྟ་ཡིན་པའི་ཕྱིར། ཟུར་དང་པོ་གྲུབ་སྟེ། མཐོང་སྤང་ཀུན་བཏགས་ཡིན་པའི་ཕྱིར། ཁྱབ་སྟེ། ཉོན་ཡིད་དང་མཚུངས་ལྡན་གྱི་འཇིག་ལྟ་ལ་ལྷན་སྐྱེས་ཀྱིས་ཁྱབ་པའི་ཕྱིར། གཉིས་པ་གྲུབ་སྟེ། གོང་མའི་སས་བསྡུས་ཀྱི་མཐོང་སྤང་འཇིག་ལྟ་ཡོད་པའི་ཕྱིར། དེར་ཐལ། ཀུན་བཏུས་དར་ཊཱིཀ་ལས། མཐོང་སྤང་ཉོན་མོངས་བརྒྱ་དང་བཅུ་གཉིས་ཡོད་དེ། འདོད་པའི་ཁམས་ན་ལྟ་བ་ལྔ་དང་ལྟ་མིན་ལྔ་སྟེ་བདེན་པ་བཞི་རེ་རེ་ལ་ལོག་ཞུགས་བཅུ་བཅུ་ཁམས་གོང་མ་གཉིས་ན་ཁོང་ཁྲོ་བཞི་བཞི་བོར་བས་སུམ་ཅུ་རྩ་དྲུག་པ་གཉིས་སུ་ཡོད་པའི་ཞེས་གསུངས་པའི་ཕྱིར། རྩ་བར་འདོད་མི་ནུས་ཏེ། གོང་མའི་སས་བསྡུས་ཀྱི་ཉོན་མོངས་ཡིན་པའི་ཕྱིར། ཁྱབ་སྟེ། མཛོད་ལས། གོང་མ་ཐམས་ཅད་ལུང་མ་བསྟན། །
ཞེས་གསུངས་པའི་ཕྱིར། ཉོན་ཡིད་ལྡོག་མཚམས་ལ་ཁ་ཅིག་ན་རེ། འཕགས་པ་མཉམ་གཞག་པའི་རྒྱུད་ལ་ཉོན་ཡིད་མེད་པ་མི་འཐད་པར་ཐལ། དེའི་རྒྱུད་ལ་ཉོན་ཡིད་ཡོད་པར་མ་ཟད་དབང་ཤེས་ཀྱང་ཡོད་པའི་ཕྱིར། དེར་ཐལ། སེམས་ནང་དུ་བསྡུས་ཏེ་ཏིང་ངེ་འཛིན་ལ་རྩེ་གཅིག་ཏུ་མཉམ་པར་གཞག་པའི་གང་ཟག་གི་རྒྱུད་ལ་ཡང་གཟུགས་མཐོང་བའི་མིག་ཤེས་ཡོད་པའི་ཕྱིར། དེར་ཐལ། རྣམ་འགྲེལ་ལས། ཐམས་ཅད་ལས་ནི་སེམས་བསྡུས་ནས། །ནང་གི་བདག་ཉིད་གཡོ་མེད་པར། །གནས་ནའང་མིག་གིས་གཟུགས་དག་ནི། །མཐོང་བའི་བློ་དེ་དབང་སྐྱེས་ཡིན། །ཞེས་གསུངས་ཤིང༌། རྣམ་བཤད་ལས། སྟོང་པ་ཉིད་ལ་མཉམ་པར་བཞག་བཞིན་པའི་དུས་ན་གང་ཟག་དེའི་རྒྱུད་ལ་ཐེག་ཆེན་སེམས་བསྐྱེད་ཡོད་མོད་ཀྱང༌། ཞེས་གསུངས་པའི་ཕྱིར་དང། དེ་གཉིས་འདྲ་བའི་ཕྱིར་ཏེ། རྣམ་འགྲེལ་ལས། རྩེ་གཅིག་གསལ་བས་སྒྲིབ་ན་ཡང། །སེམས་ཀྱི་ཁྱད་པར་རྒྱུན་དག་ལ། །ཞེས་དེ་དག་གི་སྐབས་སུ་བློ་གཞན་དང་གཞན་རྒྱུད་ལ་ཡོད་ཀྱང་མངོན་གྱུར་པ་དེས་སྒྲིབ་ནས་མི་གསལ་བ་ཡིན་པའི་ཕྱིར་ཟེར་ན། རེ་ཞིག་ཕྱི་མ་བཞག་ལ་སྔ་མ་མི་འཐད་པར་ཐལ། སློབ་པ་མཉམ་གཞག་པའི་རྒྱུད་ལ་དབང་ཤེས་མེད་པའི་ཕྱིར། དེར་ཐལ། དེར་མ་ཟད་གཉིད་ལོག་པའི་གང་ཟག་གི་རྒྱུད་ལ་དབང་ཤེས་མེད་པའི་ཕྱིར། དེར་ཐལ། འཇུག་པ་ལས། གལ་ཏེ་གཉིད་ན་མིག་བློ་མི་སྲིད་པས། །ཞེས་གསུངས་པའི་ཕྱིར། མ་ཁྱབ་ན་གཉིད་ལོག་པའི་གང་ཟག་གི་རྒྱུད་ཀྱི་མིག་ཤེས་ཆོས་ཅན། རང་གི་ཐུན་མོང་མ་ཡིན་པའི་བདག་རྐྱེན་མིག་དབང་ལ་བརྟེན་ནས་སྐྱེས་པའི་ཤེས་པ་ཡིན་པར་
ཐལ། མིག་ཤེས་ཡིན་པའི་ཕྱིར། འདོད་ན། གཉིད་ལོག་པའི་གང་ཟག་གི་རྒྱུད་ཀྱི་མིག་དབང་དེས་ཀྱང་མིག་ཤེས་ཀྱི་ཐུན་མོང་མ་ཡིན་པའི་བདག་རྐྱེན་བྱེད་ནུས་པར་ཐལ། འདོད་པའི་ཕྱིར། འདོད་ན། དེས་ཀྱང་གཟུགས་མཐོང་བར་ཐལ་བ་དང༌། དེ་རྟེན་བཅས་ཀྱི་དབང་པོར་ཐལ་བའམ། ཡང་ན་མིག་ཤེས་ཀྱིས་ཡུལ་འདས་པ་མཐོང་བར་ཐལ་བ་སོགས་སྤྲོས་པས་ཆོག་གོ །ཡང་ཁ་ཅིག །འགོག་པ་མཉམ་གཞག་གནས་སྐབས་དུས། །ཞེས་པའི་དོན་དུ་བསམ་ནས། མི་རྟག་པ་ལ་མཉམ་པར་བཞག་པའི་འཕགས་པའི་རྒྱུད་ལ་ཉོན་ཡིད་མེད་ཟེར་ན། འོ་ན་མི་རྟག་པ་མངོན་སུམ་དུ་རྟོགས་པའི་འཕགས་ལམ་མངོན་དུ་གྱུར་བའི་འཕགས་པའི་རྒྱུད་ལ་མེད་པར་ཐལ། དམ་བཅའ་འཐད་པའི་ཕྱིར། འདོད་ན། འགོག་སྙོམས་དམིགས་ཀྱིས་བསལ་བའི་དགོས་པ་མེད་པར་ཐལ། འཕགས་ལམ་མངོན་དུ་གྱུར་པ་ཐམས་ཅད་ལ་དེ་མེད་པའི་ཕྱིར། བྱས་པ་ལ་ཁོ་ན་རེ། དེའི་རྒྱུད་ལ་ཉོན་ཡིད་མེད་པར་ཐལ། དེ་འཕགས་པ་མཉམ་གཞག་པ་ཡིན་པའི་ཕྱིར། དེར་ཐལ། མི་རྟག་པ་ལ་མཉམ་པར་བཞག་པའི་འཕགས་པ་ཡིན་པའི་ཕྱིར་ན་མ་ཁྱབ་སྟེ། འཕགས་པའི་མཉམ་གཞག་ཡེ་ཤེས་ལ་བདག་མེད་ཕྲ་རགས་གང་རུང་ལ་མཉམ་པར་བཞག་པ་དགོས་པའི་ཕྱིར། དེར་ཐལ། རྩ་བར་མཉམ་གཞག་ཅེས་པ་དེ་སུམ་ཅུ་པ་ལས།འགོག་པའི་སྙོམས་པར་འཇུག་ན་མེད། །འཇིག་རྟེན་འདས་པའི་ལམ་ན་མེད། །ཅེས་པའི་འདས་ལམ་དེ་ལ་སྦྱོར་དགོས་བའི་ཕྱིར། ཁྱབ་སྟེ། སྤྱིར་འཕགས་ལམ་ལ་འདས་ལམ་གྱིས་ཁྱབ་ཀྱང་འདས་ལམ་དང་མཉམ་གཞག་ཡེ་
ཤེས་རྣམ་གྲངས་སུ་བཤད་པའི་སྐབས་ཀྱི་དེར་བདག་མེད་མངོན་སུམ་དུ་རྟོགས་པ་ཞིག་དགོས་པའི་ཕྱིར། དེར་ཐལ། ཡུམ་བར་མ་ལས། ཇི་ཙམ་དུ་གཉིས་པ་དེ་ཙམ་དུ་དམིགས་པའོ། །མི་གཉིས་པ་ནི་མི་དམིགས་པའོ། །ཞེས་དང༌། འཇུག་པ་ལས། གསུམ་ལ་ཆགས་པས་སྟོང་སྟེ་འཇིག་རྟེན་འདས། །ཞེས་གསུངས་པའི་ཕྱིར་དང༌། བདེན་སྟོང་སྒྱུ་མ་ལྟ་བུ་མངོན་སུམ་དུ་རྟོགས་མ་ཐག་པའི་མཐོང་ལམ་དེ་ཡང་རྗེས་ཐོབ་ཡེ་ཤེས་སུ་བཤད་པའི་ཕྱིར། གཞན་ཡང༌། རྫུ་འཕྲུལ་གྱི་མངོན་ཤེས་ལ་མཉམ་པར་བཞག་སྟེ་ནམ་མཁའ་ལ་འགྲོ་འཆག་ཉལ་འདུག་སོགས་བྱེད་པའི་བྱང་འཕགས་དེ་ཆོས་ཅན། མཉམ་གཞག་པ་ཡིན་པར་ཐལ། རྫུ་འཕྲུལ་གྱི་ཏིང་ངེ་འཛིན་ལ་མཉམ་པར་བཞག་པའི་འཕགས་པ་ཡིན་པའི་ཕྱིར། ཁྱབ་པ་ཁས། འདོད་ན། དེ་ཆོས་ཅན། མཉམ་རྗེས་ངོ་བོ་གཅིག་ཏུ་སོང་བའི་གང་ཟག་ཡིན་པར་ཐལ། མཉམ་གཞག་གི་ངང་ནས་རྗེས་ཐོབ་ཀྱི་བྱ་བ་བྱེད་ནུས་པའི་གང་ཟག་ཡིན་པའི་ཕྱིར། དེར་ཐལ། དེའི་ངང་ནས་སྤྱོད་ལམ་རྣམ་བཞི་དང་གཞན་ལ་ཆོས་སྟོན་པ་སོགས་ངེས་པ་གང་ཞིག །དེ་ལས་ལྷག་པའི་རྗེས་ཐོབ་ཀྱི་བྱ་བ་འཇོག་ཚུལ་མེད་པའི་ཕྱིར། ཡང་ཁོ་ན་རེ། འགོག་སྙོམས་ཀྱི་ཚེ་ཉོན་ཡིད་ཡོད་པར་ཐལ། འགོག་སྙོམས་ལས་ལངས་མ་ཐག་པའི་ཡིད་ཤེས་དེའི་ཐུན་མོང་མ་ཡིན་པའི་བདག་རྐྱེན་ཡོད་པའི་ཕྱིར་ཏེ། ཁྱོད་ཀྱིས་ལྔ་པོ་དག་དང་འདྲ་བ་དང༌། ཞེས་དྲངས་པ་དེའི་ཕྱིར་ཟེར་ན་གོང་དུ་མ་ཁྱབ་སྟེ། དེའི་སྐབས་སུ་ཡང་ཉོན་ཡིད་ཀྱི་རྒྱུན་དུ་གྱུར་པའི་ཡིད་ཤེས་གཅིག་ཡོད་ཀྱང་ཉོན་ཡིད་དུ་མི་འཇོག་པའི་ཕྱིར། དེར་ཐལ། དེའི་རྒྱུད་ན་
ཀུན་གཞི་ཡོད་པ་གང་ཞིག །ཀུན་གཞི་ཡོད་ན་དེ་དང་མཉམ་དུ་ཉུང་མཐའ་ལ་ཡང་ཡིད་ཤེས་གཅིག་ཡོད་པས་ཁྱབ་པའི་ཕྱིར། དཀའ་འགྲེལ་ལས། མཉམ་གཞག་གི་ཚེ་ཡང་ཡིད་ཤེས་ཀྱི་རྫས་རྒྱུན་ཆད་པའི་ལོག་པ་ནི་མེད་དེ། དགོངས་འགྲེལ་ལས། ཀུན་གཞི་དེ་ཉུང་ཡང་ཡིད་ཤེས་གཅིག་ཡིད་དང་ལྷན་ཅིག་འཇུག་པར་བསྟན་པའི་ཕྱིར། ཞེས་གསུངས་པའི་ཕྱིར། ཁོ་ན་རེ། དེའི་སྐབས་ཀྱི་ཉོན་ཡིད་ཀྱི་རྒྱུན་ཕྱི་མའི་ཡིད་དེ་ཆོས་ཅན། ཁྱོད་དང་མཚུངས་ལྡན་གྱི་ཉོན་མོངས་བཞི་སོགས་མེད་པར་ཐལ། ཁྱོད་ཉོན་ཡིད་དུ་མི་འཇོག་པའི་རྒྱུ་མཚན་ཡོད་པའི་ཕྱིར། འདོད་ན། དེ་ཆོས་ཅན། ཟག་མེད་ཡིན་པར་ཐལ། འདོད་པའི་ཕྱིར་ཟེར་ན། འདི་ལ་སློབ་དཔོན་སོ་སོའི་བཞེད་ཚུལ་མི་འདྲ་བ་གཉིས་ཡོད་དེ། དོན་གསང་ལས། ཡིད་དེ་ཡང་ཁ་ཅིག་ན་རེ། གནས་སྐབས་དེ་ན་ཟག་པ་མེད་པ་ཡིན་ཏེ། ཞེས་དང༌། ཁ་ཅིག་ན་རེ༌། ཟག་པ་དང་བཅས་པ་སྟེ་འདི་ལྟར་ནུས་པ་གཉིས་དང་ལྡན་པའི་ཕྱིར་རོ་ཞེས་ཟེར་རོ། །ཞེས་གསུངས་ཀྱང་རང་ལུགས་ལ་ཕྱི་མ་ཁས་ལེན་དགོས་ཏེ། རྗེ་བཙུན་རེད་མདའ་བས་ཕྱོགས་གཉིས་པ་འདི་ནི་ལེགས་པར་བཤད་པ་ཡིན་ཏེ། ཞེས་དང༌། རྩ་བར། ཉོན་མོངས་ཅན་དུ་འཇོག་བྱེད་པའི། །གང་ཟག་འཛིན་པ་ལོག་གྱུར་ཀྱང༌། །དེ་ཡི་རིགས་ཙམ་ཡོད་ཕྱིར་དང༌། །ཆོས་འཛིན་བསྐྱེད་ནུས་མ་ལོག་ཕྱིར། །ཡིད་ཤེས་མེད་དང་མཉམ་པ་ཉིད། །ཐོབ་པའི་སྐྱོན་གཉིས་རིང་དུ་སྤངས། །ཞེས་གསུངས་པའི་ཕྱིར། །ཁྱབ་སྟེ། དབང་ཐོབ་དགྲ་བཅོམ་གཉིས་དང་འགོག་པ་མཉམ་གཞག་སོགས་
ཀྱི་ཚེ་ཉོན་ཡིད་མེད་ཀྱང་དེའི་རྒྱུན་གྱི་ཡིད་ཡོད་པས་འཇུག་ཤེས་ཀྱི་བདག་རྐྱེན་མེད་པའི་སྐྱོན་མི་འོང་ལ། ཡིད་དེ་ཟག་བཅས་ཡིན་པས་ཉོན་ཡིད་གནས་འགྱུར་གྱི་མཉམ་ཉིད་ཡེ་ཤེས་ཐོབ་པར་ཐལ་བའི་སྐྱོན་ཡང་མི་ཡོང་པའི་ཕྱིར། དེར་ཐལ། དེ་ཟག་བཅས་སུ་འཇོག་པའི་རྒྱུ་མཚན་སྤྱིར་ཉོན་ཡིད་དེ་ལ་ཉོན་མོངས་པའི་སྒྲིབ་པ་ཅན་དུ་འཇོག་བྱེད་རང་གྲོགས་ཉོན་མོངས་བཞི་དང༌། ཤེས་སྒྲིབ་དང་བཅས་པར་འཇོག་བྱེད་འཇུག་ཤེས་ཀྱི་རྟེན་བྱེད་པའི་སྒོ་ནས་དེ་ཕྱི་རོལ་དོན་གྱི་སྣང་བ་དང་བཅས་པར་བསྐྱེད་པའི་ནུས་པ་གཉིས་ཡོད་པ་ལས་འདི་དག་གི་ཚེ་སྔ་མ་ལོག་ཀྱང་ཕྱི་མ་ཡོད་པས་ཤེས་སྒྲིབ་ཀྱི་ཟག་བཅས་ཡིན་པའི་ཕྱིར། དཀའ་འགྲེལ་ལས། ཐ་སྙད་སྣ་ཚོགས་འདོགས་པའི་ཡེ་ཤེས་ཀྱི་ལྷན་ཅིག་སྐྱེ་བའི་རྟེན་བྱས་ནས་ཆོས་འཛིན་པ་ཤེས་སྒྲིབ་བསྐྱེད་པའི་ནུས་པ་གཉིས་ཡོད་ལ། ཞེས་སོགས་གསུངས་པའི་ཕྱིར། ཁོ་ན་རེ། རིགས་ངེས་ཀྱིས་ས་བརྒྱད་པ་ནས་ཉོན་མོངས་སྤོང་བར་ཐལ། དེས་ཉོན་ཡིད་སྤངས་པའི་ཕྱིར། དེར་ཐལ། དེ་ནས་ཉོན་ཡིད་གཏན་དུ་ལོག་པའི་ཕྱིར་ན་མ་ཁྱབ་སྟེ། ཉོན་ཡིད་ལ་བློ་མངོན་གྱུར་པས་ཁྱབ་ཅིང་ས་བརྒྱད་པ་ནས་སྲིད་ཞི་མཉམ་ཉིད་ཀྱི་སྦྱོར་བ་ཐོབ་སྟེ། ཆོས་ཉིད་ཡེ་ཤེས་ལ་དབང་བའི་དོན་དུ་རྟོགས་པས་དེའི་འཁོར་དུ་ཉོན་མོངས་བཞི་གཏན་མི་འབྱུང་བར་བྱས་པ་ཡིན་པའི་ཕྱིར། མངོན་རྟོགས་རྒྱན་ལས། སྲིད་དང་ཞི་བར་མི་རྟོག་པ། །ཞེས་དང༌། མདོ་སྡེ་རྒྱན་ལས།ཞིང་དང་ཡེ་ཤེས་ལས་དག་ལ། །ཞེས་གསུངས་པའི་ཕྱིར། གོང་དུ་འདོད་མི་ནུས་ཏེ། སློབ་དཔོན་ཀླུ་སྒྲུབ་ཀྱིས་ས་བརྒྱད་པ་ནས་ཉོན་མོངས་སྤོང་བར་བཞེད་ལ། འཕགས་པ་ཐོགས་མེད་ཀྱིས་སངས་
རྒྱས་པ་དང་དུས་མཉམ་དུ་སྤོང་བར་བཞེད་པའི་ཕྱིར། ཀུན་བཏུས་དར་ཊཱིཀ་ལས། མགོན་པོ་ཀླུ་སྒྲུབ་ཀྱི་བཞེད་པ་དང་མི་འདྲ་སྟེ། དེའི་བཞེད་པས་ས་བརྒྱད་པར་ཉོན་སྒྲིབ་ཟད་པར་བྱེད་པའི་ཕྱིར། ཞེས་གསུངས་པའི་ཕྱིར། ཁྱབ་སྟེ། དེ་ལྟར་འབྱུང་བ་རྟེན་གཞིའི་མདོའི་དབང་གིས་ཡིན་པའི་ཕྱིར་ཏེ། དགོངས་འགྲེལ་ལས། ས་བཅུ་གཅིག་པ་ལ་ནི་ཉོན་མོངས་པ་དང་ཤེས་བྱའི་སྒྲིབ་པ་ཤིན་ཏུ་ཕྲ་མོ་སྤངས་པས། ཞེས་གསུངས་པའི་ཕྱིར་དང༌། ཀུན་བཏུས་ལས་ཀྱང༌། དེ་བྱང་ཆུབ་ཐོབ་པ་ནས་ཉོན་མོངས་པའི་སྒྲིབ་པ་དང་ཤེས་བྱའི་སྒྲིབ་པ་ཅིག་ཅར་སྤོང་ངོ༌། །ཅིག་ཅར་དགྲ་བཅོམ་པ་དང་དེ་བཞིན་གཤེགས་པར་འགྱུར་རོ། །ཞེས་སོ། །སྨྲས་པ། བློ་གྲོས་ཉི་མ་འབར་བའི་གདེངས་ཀ་ལས། །ཀུན་རྨོངས་མུན་པའི་དྲ་བ་མཐར་བྱེད་པའི། །ལེགས་བཤད་འོད་བརྒྱའི་སྣང་བ་སྤྲོས་པ་ཡིས། །བློ་གསལ་རྐང་དྲུག་རབ་དགའི་དབྱངས་ཀྱིས་བྲེལ། །ལུང་རིགས་ལང་ཚོ་དར་བའི་གཞོན་ནུ་འདིའི། །མཆེད་པོ་སྔོན་དགེའི་བསྐལ་པར་ཅི་སྟེ་མེད། །ཕྱི་མའི་དུས་ཀྱང་ཐུབ་བསྟན་སྒེག་མོ་ཡིས། །འདི་ལྟའི་མཛའ་བོ་རྙེད་པར་གྱུར་ཅིག་གུ། །ཐུབ་བསྟན་སྲོག་རྗེས་འགྲོ་ལྡོག་མི་འཁྲུལ་བའི། །བཤད་སྒྲུབ་དབུགས་བྲལ་འབྱུང་བོའི་སྟངས་སྟབས་གར། །བསྒྱུར་བའི་ཆོས་བརྒྱད་རོལ་པ་ལེགས་བྱས་ཀྱི། །རྩེད་འཇོར་འཁྲུལ་བས་གཡེང་རྣམས་སྙིང་རྗེའི་ཡུལ། །དེ་ཕྱིར་དམ་པའི་མགོན་ལ་གུས་བརྟེན་ནས། །གཞུང་མང་ཐོས་བའི་དཀའ་སྤྱད་ལྷུར་བླངས་པས། །འཕགས་བོད་མཁས་པའི་ལེགས་བཤད་དགའ་སྟོན་ལ། །ལོངས་སུ་སྤྱོད་པའི་སྐལ་བཟང་ཁོ་
བོས་རྙེད། །ཚུལ་འདིར་འབད་པ་ལས་བྱུང་ལེགས་བྱས་ཀྱི། །ཆ་ཤས་ཡོངས་སུ་གང་བའི་བསིལ་ཟེར་ཅན། །རང་བཞིན་དག་པའི་དབྱིངས་ཀྱི་མཁར་འཕགས་ཏེ། །དོན་གཉིས་ཀུན་དའི་དགའ་ཚལ་འབྱེད་གྱུར་ཅིག །ཅེས་ཡིད་དང་ཀུན་གཞིའི་དཀའ་གནད་རྣམ་པར་བཤད་པ་མཁས་པའི་འཇུག་ངོགས་ཞེས་བྱ་བ་འདི་ནི་ཆོས་གྲྭ་ཆེན་པོ་དཔལ་ལྡན་བཀྲ་ཤིས་འཁྱིལ་གྱི་གྲྭ་ཚང་ཐོས་བསམ་གླིང་ནས་སྒོ་མང་དཔོན་སློབ་ངག་དབང་དགེ་ལེགས་ཀྱི་སྤྲུལ་པའི་སྐུ་སྐལ་བཟང་དགེ་ལེགས་རྒྱ་མཚོ་དང༌། སྐྱོར་དཔོན་བློ་བཟང་ཤེས་རབ་སོགས་འཛིན་གྲྭའི་དགེ་འདུན་རྣམས་ཀྱིས་ཡང་ཡང་བསྐུལ་བའི་ངོར། བཙུན་བ་དཀོན་མཆོག་བསྟན་པའི་སྒྲོན་མེས་རང་ལོ་སོ་བདུན་པ་ས་ཕོ་རྟའི་ལོ་ཁྲུམས་སྟོད་ཟླ་བའི་དཀར་ཕྱོགས་ཀྱི་དགའ་བ་དང་པོའི་ཉིན་ཆོས་སྡེ་ཆེན་པོ་དགོན་ལུང་ བྱམས་པ་གླིང ་དུ་རྫོགས་པར་སྦྱར་བའི་ཡི་གེ་པ་ནི་སྡོམ་བརྩོན་རྣམ་དཔྱོད་ཡངས་པ་དཀོན་མཆོག་བསྟན་པའོ། །འདིས་ཀྱང་འཇམ་མགོན་བླ་མའི་རིང་ལུགས་དྲི་མ་མེད་པ་ཕྱོགས་དུས་ཀུན་ཏུ་རྒྱས་པར་གྱུར་ཅིག།། །།