བྱང་ཆུབ་བདེ་ལམ་གྱི་དམིགས་སྐོར་ལམ་མཆོག་སྙིང་པོ།
བྱང་ཆུབ་བདེ་ལམ་གྱི་དམིགས་སྐོར་ཆ་ཚང་བར་ཚིགས་བཅད་དུ་བསྡེབས་པ་ལམ་མཆོག་སྙིང་པོ་ཞེས་བྱ་བ་བཞུགས་སོ། །
བདེ་གཤེགས་ཐུགས་རྗེ་མངའ་བ་ཤཱཀྱའི་ཏོག །མ་ཕམ་འཇམ་དབྱངས་ཤིང་རྟ་ཆེ་གཉིས་དང། །ཇོ་འབྲོམ་རྒྱལ་བ་གཉིས་པ་བརྒྱུད་པར་བཅས། །བྱང་ཆུབ་བར་དུ་འབྲལ་མེད་མགོན་མཛོད་ཅིག །གསུང་རབ་ཀུན་གྱི་སྙིང་པོ་གཅིག་བསྡུས་པ། །ཆེ་བ་བཞི་ལྡན་བྱང་ཆུབ་ལམ་རིམ་ཞེས། །སྐལ་ལྡན་ཐར་འདོད་ཡོངས་ཀྱི་འཇུག་ངོགས་དེར། །སྦྱོར་དངོས་རྗེས་གསུམ་ཚང་བའི་ཉམས་ལེན་བྱ། །དེའང་གནས་ཁང་བྱི་དོར་བྱས་ཤིང་སྐུ་གསུང་ཐུགས་ཀྱི་རྟེན་དགྲམ། མཆོད་པའི་སྤྲིན་གྱི་གཟུངས་འདོན་བཞིན་དུ་མཆོད་པ་གཡོ་མེད་ཅིང་བཀོད་པ་མཛེས་པར་བཤམས་ལ་དེ་མ་ཐག་འབྲུ་གསུམ་བརྗོད་དེ་ཆབ་ཀྱིས་བྲན་པའམ། དཀོན་མཆོག་གི་བདེན་པས་བྱིན་གྱིས་བརླབ་པར་བསམ། བདེ་བའི་སྟན་ལ་སྤྱོད་ལམ་ཚུལ་མཐུན་གྱིས་འཁོད་ཅིང། དེ་དག་ཀྱང་དགོས་དོན་སེམས་ཀྱི་འཁྱེར་སོ་དང་བཅས་པ་དགོས་པས་ཚིགས་བཅད་ཀྱི་དོན་དྲན་བཞིན་པའི་སྒོ་ནས་བརྗོད་དེ། ༈ ཆོས་མཐུན་སྒྲུབ་གནས་གཙང་བྱས་ཉམས་དགའ་བར། །མཆོག་གསུམ་རྟེན་གྱི་གཟི་འོད་འབར་བའི་དྲུང། །བཀོད་ལེགས་ཕུལ་བྱུང་མཆོད་སྤྲིན་བསྟར་བ་ཡིས། །གཞན་དོན་གཞིར་གྱུར་རྒྱལ་བའི་ཞིང་སྦྱོང་བྱ། །སྤྱོད་ལམ་དག་པས་ལུས་ཀྱི་སྐྱོན་སྦྱངས་ཤིང། །ཀུན་སློང་མི་དགེའི་སྐྱོན་གྱིས་མ་སྦགས་པར། །དགེ་སེམས་ཁྱད་པར་ཅན་གྱིས་ཟིན་པ་ཡིས། །རྣམ་དག་སྒོམ་སྒྲུབ་རྩ་བ་ཚུགས་པར་
བྱ། །མདུན་དུ་སེང་ཁྲི་པད་ཟླ་ཉི་མའི་སྟེང། །རྩ་བའི་བླ་མ་ཐུབ་དབང་རྡོ་རྗེ་འཆང། །དངོས་བརྒྱུད་བླ་མ་ལྷར་བཅས་དཀོན་མཆོག་གསུམ། །བདག་སོགས་མགོན་དུ་དགྱེས་བཞིན་བཞུགས་པར་གྱུར། །ཐོག་མ་མེད་ནས་སྲིད་འདིར་ཆེས་མནར་ཡང། །ད་དུང་སྡུག་བསྔལ་གཏིང་མཐའ་མི་མངོན་པས། །ད་ནི་བསླུ་མེད་མཆོག་གསུམ་ལ་བརྟེན་ཏེ། །ཅིས་ཀྱང་བཙན་ས་ཟིན་པར་བྱེད་དགོས་པས། །༈ རྗེ་བཙུན་བླ་མ་རྣམས་ལ་སྐྱབས་སུ་མཆི། །སྟོན་པ་སངས་རྒྱས་རྣམས་ལ་སྐྱབས་སུ་མཆི། །སྐྱོབ་པ་དམ་ཆོས་རྣམས་ལ་སྐྱབས་སུ་མཆི། །འདྲེན་པ་དགེ་འདུན་རྣམས་ལ་སྐྱབས་སུ་མཆི། །ཡི་དམ་ལྷ་ཚོགས་རྣམས་ལ་སྐྱབས་སུ་མཆི། །དམ་ཅན་ཆོས་སྲུང་རྣམས་ལ་སྐྱབས་སུ་མཆི། །ལན་གསུམ། ཉམ་ཐག་མ་རྒན་འགྲོ་རྣམས་བསྒྲལ་བའི་ཕྱིར། །བདག་གིས་བྱང་ཆུབ་མཆོག་ཏུ་སེམས་བསྐྱེད་ཅིང། །ཟབ་མོ་བླ་མའི་ལམ་གྱིས་སྲོག་བཟུང་སྟེ། །བྱང་ཆུབ་ལམ་བཟང་མྱུར་དུ་བསྒྲུབ་པར་བྱ། །ལན་གསུམ། བླ་མ་ལྷ་ཡི་ཐུགས་རྗེའི་འོད་འཕྲོས་པས། །འགྲོ་ཀུན་ཐུབ་པའི་དབང་པོའི་སྐུར་བཞེངས་ཤིང། །དེ་ནས་སྐྱབས་ཡུལ་མཐའ་དག་གཅིག་བསྡུས་ཏེ། །སྨིན་མཚམས་ནས་ཐིམ་བྱིན་གྱིས་བརླབ་པར་གྱུར། །སླར་ཡང་སེང་ཁྲི་པད་ཟླ་ཉི་མའི་སྟེང། །བླ་མ་ཐུབ་པའི་
དབང་པོའི་ཕྱོགས་བཞི་རུ། །བརྒྱུད་པ་གསུམ་དང་དངོས་ཀྱི་བླ་མའི་ཚོགས། །རྒྱུད་སྡེ་རྣམ་བཞིའི་ཡི་དམ་དཀྱིལ་འཁོར་ལྷ། །སངས་རྒྱས་བྱང་སེམས་ཉན་ཐོས་རང་རྒྱལ་དང། །དཔའ་བོ་མཁའ་འགྲོ་ཆོས་སྲུང་རྒྱལ་ཆེན་བཞི། །འགོག་ལམ་རང་བཞིན་གསུང་རབ་གླེགས་བམ་བཅས། །དཔག་ཡས་སྤྲུལ་པའི་བཀོད་པ་སྤྲོ་བཞིན་བཞུགས། །སོ་སོའི་གནས་ལྔར་ཡི་གེ་ལྔས་བརྒྱན་པའི། །ཧཱུཾ་གིས་སྤྱན་དྲངས་རབ་འབྱམས་ལྷའི་འཁོར་ལོ། །རྫོགས་པར་བསྟིམ་པས་སྤངས་རྟོགས་དབྱེར་མེད་པས། །སྐྱབས་གནས་མ་ལུས་འདུས་པའི་ངོ་བོར་གྱུར། །དེ་བཞིན་གཤེགས་དང་དེ་ཡི་སྲས་རྣམས་ལ། །རིན་ཆེན་བུམ་པ་མང་པོ་སྤོས་ཀྱི་ཆུས། །ཡིད་འོང་ལེགས་པར་བཀང་བ་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བསྒོས་པས་སྐུ་དབྱི་འོ། །མཆོག་གསུམ་ཀུན་འདུས་བླ་མ་ལྷ་ཚོགས་ལ། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །ཐུགས་རྗེ་མངའ་བ་རྒྱལ་བ་སྲས་བཅས་ལ། །བདག་ཉིད་བྲན་དུ་འབུལ་ལོ་བརྩེ་བས་བཞེས། །སྔོན་ཆད་བཀའ་དང་འགལ་རྣམས་སྙིང་ནས་བཤགས། །སྲིད་ཞིའི་དགེ་བ་ཀུན་ལ་རྗེས་ཡི་རང། །ཉམ་ཐག་འགྲོ་ལ་ཕན་བདེའི་ལམ་སྟོན་ཕྱིར། །འཁོར་བ་མ་སྟོངས་བར་དུ་བཞུགས་སུ་གསོལ། །བདག་ལ་དུས་གསུམ་དགེ་བ་ཅི་ཡོད་པ། །མ་རྒན་རིགས་དྲུག་ཡོངས་ལ་བསྔོས་པ་ཡིས། །རང་རང་སྡུག་བསྔལ་རྒྱུ་བཅས་ལས་གྲོལ་ཏེ། །བླ་མེད་བདེ་བ་མཆོག་ལ་རེག་གྱུར་ཅིག །ས་གཞི་སྤོས་ཀྱིས་
བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག། །དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྤྱི་བོར་པད་ཟླའི་སྟེང་བཞུགས་ལ། །བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །ཕུན་ཚོགས་དགེ་ལེགས་བྱེ་བས་བསྐྲུན་པའི་སྐུ། །མཐའ་ཡས་འགྲོ་བའི་རེ་བ་སྐོང་བའི་གསུང། །མ་ལུས་ཤེས་བྱ་ཇི་བཞིན་གཟིགས་པའི་ཐུགས། །རྣམ་འདྲེན་ཤཱཀྱ་སེང་གེར་གསོལ་བ་འདེབས། །བྱམས་པ་ཐོགས་མེད་དབྱིག་གཉེན་རྣམ་གྲོལ་སྡེ། །མཆོག་སྡེ་དུལ་བའི་སྡེ་དང་གྲགས་པའི་སྡེ། །སེང་བཟང་ཀུ་སཱ་ལི་གཉིས་གསེར་གླིང་པ། །རྒྱ་ཆེན་སྤྱོད་པའི་བརྒྱུད་ལ་གསོལ་བ་འདེབས། །འཇམ་དབྱངས་ཡོད་མེད་ཕྱོགས་འཇིག་ཀླུ་སྒྲུབ་དང། །ཟླ་བ་གྲགས་པ་རིག་པའི་ཁུ་བྱུག་ཆེ། སངས་རྒྱས་དགོངས་སྐྱོང་འཕགས་པ་ཡབ་སྲས་ཏེ། །ཟབ་མོ་ལྟ་བའི་བརྒྱུད་ལ་གསོལ་བ་འདེབས། །ཐུགས་རྗེ་ཆེན་པོ་བདེ་གཤེགས་རྡོ་རྗེ་འཆང། །མཆོག་གཟིགས་ཏེ་ལོ་པ་དང་ནཱ་རོ་པ། དཔལ་མཆོག་ཌོཾ་བྷི་པ་དང་ཨ་ཏི་ཤ །ཉམས་ལེན་བྱིན་རླབས་བརྒྱུད་ལ་གསོལ་བ་འདེབས། །ལྷ་ཆོས་བདུན་ལྡན་བཀའ་གདམས་རིམ་བྱོན་དང། །ཁྱད་པར་རྒྱལ་བ་གཉིས་པ་ཡབ་སྲས་སོགས། །ཡང་དག་ལམ་བཟང་ཇི་བཞིན་གསལ་མཛད་པའི། །དངོས་བརྒྱུད་བླ་མ་རྣམས་ལ་གསོལ་བ་འདེབས། །བཤེས་ལ་མི་གུས་དལ་འབྱོར་ཆུད་གཟོན་ཞིང། །
འཆི་བ་མི་དྲན་ཚེ་འདིའི་བདེ་ཐབས་བསྒྲུབ། །ངན་འགྲོར་མི་འཇིགས་ཡང་དག་སྐྱབས་མི་འཚོལ། །ལས་འབྲས་མི་སེམས་བླང་དོར་ལོག་པར་བསྒྲུབ། །འཁོར་བ་བདེར་འཛིན་དེ་རྒྱུ་ལས་ཉོན་སྤེལ། །ཐར་པར་མི་སྤྲོ་བསླབ་གསུམ་སྟེན་མི་བྱེད། །མ་རྣམས་ཡལ་བོར་རང་ཉིད་གཅེས་པར་འཛིན། །བདག་ཏུ་མངོན་ཞེན་སྔགས་ལ་མི་མོས་སོགས། །ཕྱིན་ཅི་ལོག་གི་བློ་སྣ་མཐའ་དག་རྣམས། །མྱུར་དུ་འགག་པར་བྱིན་གྱིས་བརླབ་ཏུ་གསོལ། །བཤེས་ལ་དད་གུས་དལ་འབྱོར་སྙིང་པོ་ལེན། །འཆི་བ་རྗེས་དྲན་ཚེ་འདིའི་འདུན་མ་བསྐྱུངས། །ངན་འགྲོའི་འཇིགས་དྲན་དཀོན་མཆོག་སྐྱབས་སུ་འཛིན། །ལས་འབྲས་བསམས་ནས་བླང་དོར་ཚུལ་བཞིན་བསྒྲུབ། །འཁོར་བའི་སྐྱོན་མཐོང་ལས་ཉོན་སྤོང་བར་འདོད། །ཐར་པ་དོན་གཉེར་རྣམ་དག་བསླབ་གསུམ་བསྟེན། །མ་རྣམས་གཅེས་འཛིན་རང་ཉིད་ཡལ་བར་འདོར། །བདག་མེད་དོན་མཐོང་སྔགས་ལ་མོས་པ་སོགས། །ཕྱིན་ཅི་མ་ལོག་བློ་སྣ་མཐའ་དག་རྣམས། །མྱུར་དུ་སྐྱེ་བར་བྱིན་གྱིས་བརླབ་ཏུ་གསོལ། །ཁྱད་པར་བྱམས་དང་སྙིང་རྗེ་སེམས་བསྐྱེད་དང། །ཕྱིན་དྲུག་ལ་སོགས་རྒྱ་ཆེན་སྤྱོད་པའི་ལམ། །སྙིང་པོ་ལམ་དུས་ཀུན་རྫོབ་སྒྱུ་མའི་ལུས། །ཡང་སྙིང་འབྲས་བུའི་དུས་ཀྱི་རྡོ་རྗེའི་སྐུ། །བདག་མེད་གནས་ལུགས་ཇི་བཞིན་མཐོང་བ་ཡི། །ཞི་ལྷག་གཉིས་སོགས་ཟབ་མོ་ལྟ་བའི་ལམ། །སྙིང་པོ་དཔེ་དང་དོན་གྱི་འོད་གསལ་གཉིས། །ལམ་སྙིང་བདེ་སྟོང་དབྱེར་མེད་ཆོས་སྐུ་སྟེ། །ཟབ་དང་རྒྱ་ཆེའི་ལམ་བཟང་སྙིང་པོར་བཅས། །མྱུར་དུ་སྐྱེ་བར་བྱིན་གྱིས་བརླབ་ཏུ་གསོལ། །ཞེས་བདུད་རྩི་འབེབས་སྦྱང་དང་
སྦྲགས་ཏེ་གསོལ་འདེབས་བྱ། སྤྲོ་ན་ཁྲུས་གསོལ་གྱི་འཕྲོར། ཇི་སྙེད་སུ་དག །ཅེས་སོགས་ཀྱིས་ཡན་ལག་བདུན་པ་དང། མཎྜལ་ལེགས་པར་ཕྱིས། འབྲུ་རྣམས་དྲི་བཟང་གིས་བརླན་ལ་སྔགས་བཏབ་སྟེ་སོ་བདུན་མའམ། ཉེར་གསུམ་མ་རྒྱས་པར་དབུལ། ལམ་མཆོག་སྒོ་འབྱེད་དང་བྱིན་རླབས་སྤུངས་ཞུས་ཀྱི་སྟེང་ནས་གསོལ་འདེབས་བྱས་ཀྱང་ལེགས་སོ། །དེ་ནས་ཚོགས་ཀྱི་ཞིང་རྣམས་གཙོ་བོར་ཐིམ། །ཁྱད་པར་རྡོ་རྗེ་འཆང་དབང་ཐུགས་ཀ་རུ། །སྤྱན་དྲངས་སེམས་དཔའ་གསུམ་གྱི་བདག་ཉིད་ནི། །སླར་ཡང་རང་གི་སྤྱི་བོར་བཞུགས་པར་གྱུར། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །མཆོད་ཚོགས་ཀུན་འབུལ་སྡིག་ལྟུང་ཐམས་ཅད་བཤགས། །དགེ་ལ་ཡི་རང་བསྐུལ་ཞིང་གསོལ་བ་འདེབས། །འདིས་མཚོན་དགེ་བ་བྱང་ཆུབ་ཆེན་པོར་བསྔོ། །བདག་ལུས་ལོངས་སྤྱོད་དུས་གསུམ་དགེ་ཚོགས་བཅས། །རིན་ཆེན་མཎྜལ་ཀུན་བཟང་མཆོད་སྤྲིན་འདི། །བློ་ཡིས་བླངས་ནས་བླ་མ་ལྷ་ལ་འབུལ། །ཐུགས་རྗེས་བཞེས་ནས་བྱིན་གྱིས་བརླབ་ཏུ་གསོལ། །བླ་མ་ཡི་དམ་དཀོན་མཆོག་རྣམ་གསུམ་སོགས། །སྐྱབས་གནས་མ་ལུས་འདུས་པའི་ངོ་བོ་ཉིད། །མགོན་པོ་ཁྱོད་མིན་རེ་ས་གཞན་མེད་པས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །དེ་ལྟར་གསོལ་བ་བཏབ་པས་སྐུ་ལུས་ལས། །འོད་དང་བདུད་རྩི་སྣ་ལྔའི་རྒྱུན་བབས་པས། །བདག་སོགས་འགྲོ་ཀུན་ཉེས་པའི་ཚོགས་སྦྱངས་ནས། །རྟོགས་པ་ཁྱད་འཕགས་རྒྱུད་ལ་སྐྱེ་བར་གྱུར། །དེ་དག་ནི་སྦྱོར་བའི་རིམ་པའོ། །༈ དངོས་གཞི་ནི། ཐུབ་པས་དུས་མཐར་ཐ་མལ་ཚུལ་འཛིན་
པར། །གསུངས་བཞིན་སྐལ་བ་མཉམ་པའི་སྐུར་བསྟན་ནས། །བསྟན་པའི་སྙིང་པོ་རྫོགས་པར་འདོམས་མཛད་པ། །རྒྱལ་བ་ཀུན་ལས་ལྷག་པའི་བཀའ་དྲིན་ཅན། །འདི་ཉིད་ཁོ་ན་ལེགས་ཚོགས་རྩ་བ་རུ། །ཡིད་ཆེས་རྙེད་པས་སྐྱོན་རྟོག་ཀུན་སྤངས་ཏེ། །སེམས་དགུས་བསྟེན་ཅིང་རྙེད་དང་བཀུར་སྟི་དང། །ཁྱད་པར་བཀའ་བཞིན་སྒྲུབ་པས་མཉེས་པར་བྱ། །དེ་ལྟ་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །མི་ཁོམ་སྐྱོན་བྲལ་མཐུན་རྐྱེན་ཀུན་ཚང་བའི། །དལ་འབྱོར་འདིས་ནི་མངོན་མཐོ་ངེས་ལེགས་ཀུན། །འགྲུབ་པས་ཡིད་བཞིན་ནོར་ལས་དོན་ཆེ་ལ། །རྒྱུ་དཔེ་ངོ་བོ་གང་ནས་བསམ་ན་ཡང། །རྙེད་ཐབས་མེད་དེ་བླ་མའི་དྲིན་ལས་ནི། །ལན་གཅིག་རྙེད་ཀྱང་སྔོན་ཆད་དོན་མེད་འདས། །ད་ནི་ཚེ་ལྷག་ཅུང་ཟད་གནས་ཀྱི་བར། །དོན་ལྡན་ཆོས་ཀྱིས་སྙིང་པོ་བླང་བར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །ཕྱི་རྐྱེན་བཤེས་གཉེན་དམ་པའི་མགོན་དང་བཅས། །ནང་ནས་དལ་འབྱོར་རྙེད་དཀའི་ལྕག་གིས་བསྐུལ། །སྙིང་པོ་ལེན་འདོད་རྣལ་མ་སྐྱེས་པ་ན། །དེ་ཡི་ཐབས་ཚུལ་མ་ནོར་ཚང་བ་གཅེས། །དེ་ཡང་བློ་སྟོབས་སྤེལ་ཕྱིར་འོག་མ་དང། །ཐུན་མོང་ལམ་ལ་སྔོན་དུ་མ་སྦྱངས་པར། །གོང་མའི་རྟོགས་པ་སྐྱེ་བའི་སྐབས་མེད་པས། །དང་པོར་ཚེ་འདིའི་སྣང་ཤས་བཟློག་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །ཤིན་ཏུ་མི་བཟད་སྟོབས་ལྡན་འཆི་བདག་ནི། །གློ་བུར་སྟེང་དུ་བབ་ཅིང་ཟློག་ཏུ་མེད། །ཉམ་ཆུང་སྲོག་གི་མར་མེ་
རྐྱེན་མང་གི །བུ་ཡུག་འཚུབ་པས་ནམ་གསོད་ཆ་མེད་ལ། །སྐབས་དེར་ཚེ་འདིའི་ཕུན་ཚོགས་མཐའ་དག་གིས། །བསླུས་ནས་ཤུལ་དུ་བསྐྱུར་ཏེ་འགྲོ་དགོས་ཤིང། །དེ་ཚེ་ཕན་པ་ཆོས་ལས་གཞན་མེད་པས། །རྣམ་དག་ཆོས་ཤིག་དེ་རིང་ཉིད་ནས་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །སྒོ་གསུམ་སྡིག་ལ་གཞོལ་བའི་ངང་ཚུལ་འདིས། །ཕྱི་མའི་སྐྱེ་གནས་ངན་འགྲོར་ཐག་ཆོད་ཅིང། །ད་ལྟ་ལུས་ལ་མེ་ཐིག་ཕོག་པ་འམ། །ཞག་འགའ་ཙམ་གྱི་བཀྲེས་སྐོམ་མི་བཟོད་ན། །མི་ལོ་དཔག་མེད་བཙོ་བསྲེག་དམྱལ་བ་དང། །ལོ་བརྒྱར་ཆུ་ཐིགས་མི་མྱོང་ཡི་དྭགས་གནས། །གཅིག་ལ་གཅིག་ཟ་གླེན་ལྐུག་དུད་འགྲོ་སོགས། །བཟོད་ཐབས་མེད་པས་དེ་རྒྱུ་སྤང་བར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །འཇིགས་ཆེན་དེ་ལས་སྐྱོབ་པར་བྱེད་པ་ནི། །སྲིད་པའི་ལྷ་ཆེན་རྣམས་ཀྱང་མི་ནུས་པས། །གང་ལ་བརྟེན་ན་བསླུ་བ་མེད་པ་ནི། །འཇིགས་པ་ཀུན་སྤངས་གཞན་སྒྲོལ་ཐབས་ལ་མཁས། །ཉེ་རིང་མི་མངའ་སྐྱབས་གནས་དཀོན་མཆོག་གསུམ། །ཁོ་ནར་ཡིད་ཆེས་སྐྱབས་འགྲོ་ལ་འབད་ཅིང། །དེ་ཡི་ཕན་ཡོན་མཐོང་བས་ཡིད་དྲངས་ཏེ། །གནང་བཀག་བསླབ་བྱ་ཉམས་པ་མེད་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །བསླབ་བྱའི་གཙོ་དང་འཇིགས་པའི་སྐྱབས་དངོས་ནི། །དཀར་ནག་ལས་ཀྱི་བླང་དོར་ཉིད་ཡིན་པས། །
ལས་འབྲས་འཆོལ་མེད་ངེས་ཤིང་འཕེལ་ཆེ་བར། །ཡིད་ཆེས་རྙེད་པས་མི་དགེ་བཅུ་ལ་སོགས། །ཆེ་ཕྲ་མཐའ་དག་སྤོང་ཞིང་བརྒྱ་ལམ་ན། །སྡིག་ལྟུང་ཕྲ་མོས་གོས་ཀྱང་ཕྱིར་བཅོས་དང། །སྟོབས་བཞིའི་གནད་ཚང་བཤགས་པས་མྱུར་སྦྱངས་ཏེ། །རྣམ་སྨིན་རྟེན་བཟང་འགྲུབ་པའི་གདེང་ཐོབ་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །དགེ་བཅུའི་ལམ་གྱིས་བདེ་འགྲོའི་རྟེན་ཐོབ་ཀྱང། །འཁོར་བ་འདི་ལས་གཏན་དུ་མ་ཐར་ན། །བཙོན་རའི་ནང་དུ་ཡུད་ཙམ་ངལ་བསོས་བཞིན། །ཡིད་བརྟན་མེད་པར་སླར་ཡང་འཁོར་བ་འདིར། །ལམ་གསུམ་ཟོ་ཆུན་འཕྱན་པ་ལྟར་འཁྱམས་ནས། །མཐའ་མེད་ངན་སོང་སྡུག་བསྔལ་མྱོང་དགོས་པས། །འདུ་བྱེད་སྡུག་བསྔལ་རང་བཞིན་ཉེར་ལེན་གྱི། །སྲིད་ལས་ཐར་འདོད་ངེས་འབྱུང་བསྐྱེད་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །སྡུག་བསྔལ་དེ་ཡང་ལས་ཉོན་བདག་འཛིན་ལས། །རིམ་པར་འབྱུང་ཚུལ་ལུགས་འབྱུང་ལུགས་ལྡོག་གི །རྟེན་འབྲེལ་བསམས་ནས་སྲིད་རྩ་གཅོད་པའི་ཕྱིར། །བདེན་པ་བཞི་ཡི་བླང་དོར་ལ་འབད་ཅིང། །ཁྱད་པར་གཉེན་པོའི་བསླབ་པ་གཉིས་ཀྱི་རྒྱུ། །བསྟན་པའི་གཞི་མ་ལྷག་པའི་ཚུལ་ཁྲིམས་ནི། །དྲན་ཤེས་བག་ཡོད་བརྟན་པོས་ལེགས་བསྲུངས་ཏེ། །ཉེས་མེད་ཐར་པའི་རྒྱལ་མཚན་ཚུགས་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །ཆགས་སྡང་འཁྲུལ་པས་དགྲ་གཉེན་ཕྱོགས་རིས་སུ། །བཅད་ཀྱང་ཁྱད་པར་མེད་པར་འགྲོ་
འདི་ཀུན། །ཐོག་མེད་དུས་ནས་འཁོར་བར་འཁྱམས་པའི་ཚེ། །ཡང་དང་ཡང་དུ་བདག་གི་མ་བྱས་ཏེ། །གནོད་པ་ཀུན་བསྲུངས་ཕན་པ་ཀུན་ལ་སྦྱར། །གཞལ་དཀའི་དྲིན་གྱིས་བསྐྱངས་པ་ཤ་སྟག་ཡིན། །དེས་ན་ཡལ་བར་འདོར་བ་མི་རིགས་པས། །ཕན་པ་བསྒྲུབ་ལ་དྲིན་དུ་གཟོ་བར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །འགྲོ་བ་མ་ལུས་སྡུག་པའི་བུ་བཞིན་དུ། །ཡིད་འོང་རྣམ་པའི་བྱམས་སེམས་སྐྱེས་པ་ན། །དེ་ཡི་སྡུག་བསྔལ་མི་བཟོད་གཅེས་པའི་བུ། །མེ་འོབས་ལྟུང་ལ་བརྩེ་བའི་མ་བཞིན་དུ། །ཤུགས་དྲག་སྙིང་རྗེ་ཆེན་པོའི་དབང་གྱུར་ཏེ། །མ་ལུས་བདེ་སྒྲུབ་སྡུག་བསྔལ་སེལ་བ་ཡི། །ཁུར་ཆེན་ཞུམ་པ་མེད་པར་རང་སྟེང་དུ། །བླངས་པས་ལྷག་བསམ་རྣམ་དག་བསྐྱེད་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །སྡུག་བསྔལ་མི་འདོད་བདེ་བས་མི་ངོམས་པ། །བདག་དང་གཞན་ལ་ཁྱད་པར་ཡོད་མིན་ཡང། །རང་གཅེས་འཛིན་པས་ཉེས་དམིགས་ཀུན་སྐྱེད་པ། །མ་རྣམས་གཅེས་འཛིན་ལེགས་ཚོགས་རྒྱུར་མཐོང་ནས། །གཏོང་ལེན་དམིགས་པས་གཞན་གྱི་སྡིག་སྡུག་ཀུན། །རང་གི་སྟེང་དུ་ལེན་ཞིང་རང་ཉིད་ཀྱི། །བདེ་དགེ་མ་ལུས་འགྲོ་ལ་གཏོང་བ་ཡི། །ཐབས་མཁས་རླབས་ཆེན་སྤྱོད་པའི་འཕྲུལ་འདེགས་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །དེ་ཡང་བླ་མེད་བྱང་ཆུབ་མ་ཐོབ་ན། །
དམན་པའི་དགྲ་བཅོམ་རྣམས་ཀྱང་གཞན་གྱི་དོན། །ལྟ་ཅི་རང་གི་དོན་ཡང་མ་རྫོགས་པས། །འཆིང་བ་ཀུན་ལྡན་བདག་འདྲ་སྨོས་ཅི་འཚལ། །དེས་ན་འབད་རྩོལ་མེད་པར་ལྷུན་གྲུབ་པའི། །སྐུ་གསུང་ཐུགས་ཀྱི་མཛད་པའི་ཆ་རེས་ཀྱང། །འགྲོ་བ་དཔག་མེད་སྒྲོལ་ནུས་སངས་རྒྱས་ཀྱི། །གོ་འཕང་ཐོབ་འདོད་སེམས་མཆོག་བསྐྱེད་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །དེ་ནས་བླ་མ་ཐུབ་པའི་དབང་པོའི་རྗེས་སུ་ཟློས་པར་དམིགས་ནས། སངས་རྒྱས་བྱང་ཆུབ་སེམས་དཔའ་ཀུན། །བདག་ལ་དགོངས་པར་མཛད་དུ་གསོལ། །ཇི་ལྟར་སྔོན་གྱི་བདེ་གཤེགས་གྱིས། །བྱང་ཆུབ་ཐུགས་ནི་བསྐྱེད་པ་དང། །བྱང་ཆུབ་སེམས་དཔའི་བསླབ་པ་ལ། །རིམ་པ་བཞིན་དུ་གནས་པ་ལྟར། །བདག་ཀྱང་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང། །བྱང་ཆུབ་སེམས་དཔའི་བསླབ་པ་ལ། །རིམ་པ་བཞིན་དུ་བསླབ་པར་བགྱི། །ཞེས་པ་ལན་གསུམ་གྱིས་སྨོན་འཇུག་མཉམ་དུ་ལེན་པའམ། སངས་རྒྱས་ཆོས་ཚོགས་མ་ཚར་གསུམ་གྱིས་སེམས་བསྐྱེད་གཟུང་ལ། ཨེ་མ་ལོང་བས་ནོར་བུ་རྙེད་པ་བཞིན། །རིན་ཆེན་སེམས་མཆོག་རྙེད་འདི་སྐལ་བ་བཟང། །ད་ནི་ཕན་ཡོན་བསམ་ཞིང་དུས་དྲུག་ཏུ། །སེམས་བསྐྱེད་བཟུང་སྟེ་སེམས་ཅན་བློས་མི་སྤོང། །དེ་ཉིད་འཕེལ་ཕྱིར་དཀོན་མཆོག་མཆོད་ལ་བརྩོན། །ནག་ཆོས་བཞི་སྤངས་དཀར་ཆོས་བཞི་ལ་སློབ། །མདོར་ན་ཇི་ལྟར་ཁས་བླངས་བསླབ་བྱ་ཀུན། །སྲོག་དང་བསྡོས་ཏེ་རྟག་ཏུ་བསྲུང་བར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །
ཞིང་དང་བསམ་སྦྱོར་རྣམ་པར་དག་པ་ཡིས། །ལུས་དང་ལོངས་སྤྱོད་དགེ་བའི་འབྲས་བུར་བཅས། །མ་ལུས་ཞེན་པ་མེད་པར་གཏོང་བའི་སེམས། །སྤེལ་བས་སྦྱིན་པའི་ཕར་ཕྱིན་རྫོགས་བྱེད་ཅིང། །རང་གིས་ཁས་བླངས་སྡོམ་གསུམ་བཅས་མཚམས་ཀྱི། །ཉེས་ལྟུང་མཐའ་དག་སྡོམ་པའི་ཚུལ་ཁྲིམས་དང། །དགེ་བ་ཆོས་སྡུད་སེམས་ཅན་དོན་བྱེད་ཀྱི། །ཚུལ་ཁྲིམས་རྣམས་ལ་ཚུལ་བཞིན་བསླབ་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩའི་ཆུ་ཡིས་བྱིན་གྱིས་རློབས། །གནོད་བྱེད་ཀུན་ལ་བཟོད་པའི་གོ་བགོས་ཏེ། །སྡུག་བསྔལ་རྐྱེན་ངན་མཐའ་དག་ལམ་དུ་སློང། །ཟབ་མོའི་ཆོས་ལ་མི་སྐྲག་སློབ་པ་སོགས། །རྣམ་གསུམ་བཟོད་པའི་ཕར་ཕྱིན་སྒོམ་བྱེད་ཅིང། །སེམས་ཞུམ་བྱ་བ་ངན་ལ་ཞེན་པ་སོགས། །གཡེང་བ་ཀུན་སྤངས་སྙིང་སྟོབས་གོ་བགོས་ཏེ། །དགེ་ཆོས་སྡུད་ཅིང་མཁའ་མཉམ་འགྲོ་བའི་དོན། །སྒྲུབ་པ་ལྷུར་ལེན་བརྩོན་པའི་སྟོབས་བསྐྱེད་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །ཉེས་པ་ལྔ་སྤངས་འདུ་བྱེད་བརྒྱད་ཀྱི་སྒོས། །དམིགས་པའི་རྟེན་ལ་གཡོ་མེད་ཏིང་འཛིན་མཆོག །བྱིང་རྒོད་སྐྱོན་བྲལ་དྭངས་གསལ་ངར་དང་བཅས། །ཤིན་སྦྱངས་སྟོབས་ལྡན་ཞི་གནས་སྒྲུབ་བྱེད་ཅིང། །དགག་བྱའི་སྣང་ཚུལ་མྱོང་བས་ངོས་བཟུང་སྟེ། །དྲི་མེད་རིགས་པས་སྤྲོས་པའི་མཐའ་བཀག་ནས། །ཟབ་མོའི་གནས་ལུགས་ཇི་བཞིན་ངེས་པ་ཡི། །སོ་སོར་རྟོག་པའི་ལྷག་མཐོང་བསྐྱེད་པར་བྱ། །དེ་ལྟར་ནུས་
པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །འཁྲུལ་སྣང་རྫུན་པའི་རང་མཚང་རིག་པ་ཡིས། །གདོད་མའི་དངོས་པོ་རྟག་པའི་མཐའ་འགོག་ཅིང། །གདོད་ནས་སྟོང་པས་ཆད་པའི་མཐའ་བཀག་སྟེ། །སྣང་ཙམ་བྱ་བྱེད་བསྙོན་མེད་འགྲུབ་ནུས་པས། །བདེན་གཉིས་ཟུང་འཇུག་ཆོས་ཀུན་དགོངས་པའི་མཐིལ། །ཀླུ་སྒྲུབ་ལུགས་བཟང་ཇི་བཞིན་ངེས་བྱེད་ཅིང། །རང་གིས་ཇི་ལྟར་ཉམས་སུ་བླངས་པ་བཞིན། །བསྡུ་བ་བཞི་ཡིས་འགྲོ་རྣམས་སྨིན་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །དེ་ལྟར་ཐུན་མོང་ལམ་གྱིས་རྒྱུད་སྦྱངས་ཏེ། །དེ་ཉིད་བཅུ་ལྡན་རྡོ་རྗེ་སློབ་དཔོན་ལ། །བརྟེན་ནས་ཟབ་གསང་རྡོ་རྗེ་ཐེག་པ་ཡི། །འཇུག་སྒོ་རྣམ་དག་དབང་གིས་སྨིན་བྱས་ཏེ། །བླ་མ་ལྷར་བཅས་དཔང་དུ་ལེགས་བཞག་ནས། །ཇི་ལྟར་ཁས་བླང་དམ་ཚིག་སྡོམ་པ་ཀུན། །སྲོག་དང་བསྡོས་ཏེ་ཚུལ་བཞིན་བསྲུང་བ་ཡིས། །དངོས་གྲུབ་གཉིས་ཀྱི་རྩ་བ་ཚུགས་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །གཞི་ཡི་འཆི་བ་བར་དོ་སྐྱེ་བ་གསུམ། །ལམ་དང་འབྲས་བུའི་དུས་ཀྱི་སྐུ་གསུམ་དུ། །སྒྱུར་བྱེད་བསྐྱེད་རིམ་ཕྲ་རགས་རྣལ་འབྱོར་གྱིས། །ཐ་མལ་སྣང་ཞེན་དྲི་མ་ཀུན་སྦྱོང་ཞིང། །རྡོ་རྗེ་ལུས་ལ་གནད་དུ་བསྣུན་པ་ཡིས། །ཞུགས་གནས་ཐིམ་པའི་འོད་གསལ་ཕྱག་རྒྱ་ཆེ། །ཀུན་རྫོབ་སྒྱུ་མའི་སྐུ་དང་ཟུང་འཇུག་པའི། །རྫོགས་རིམ་སྤྱོད་དང་བཅས་ལ་བསླབ་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་
བདུད་རྩིའི་ཆུ་ཡིས་བྱིན་གྱིས་རློབས། །མདོར་ན་བཤེས་གཉེན་དམ་པའི་དེད་དཔོན་གྱིས། །ཡོངས་བཟུང་ཚུལ་ཁྲིམས་དག་པའི་གྲུ་གཟིངས་མཆོག །གསུང་རབ་ཀུན་ལ་ཕྱོགས་རེར་མ་གྱུར་པའི། །ཐོས་བསམ་སྒོམ་པའི་དྲི་བཞོན་གྱིས་བསྐུལ་ཏེ། །མྱུར་བ་མྱུར་བར་སྐུ་གསུམ་གོ་འཕང་མཆོག །ཡིད་བཞིན་ནོར་བུའི་གླིང་དུ་ཕྱིན་གྱུར་ནས། །མཐའ་ཡས་འགྲོ་བ་སྲིད་མཚོ་ལས་བསྒྲལ་ཏེ། །བདེ་ཆེན་ཐར་པའི་ས་ལ་འགོད་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །ཞེས་རིམ་པ་བཞིན་གྱི་ཚིག་དོན་དང་བདུད་རྩི་འབེབས་སྦྱང་གི་དམིགས་རྣམ་སོགས་བདེ་ལམ་གྱི་ཞལ་ཤེས་ཇི་ལྟ་བ་བཞིན་དུ་དལ་བུའི་སྒོ་ནས་བློ་འབྱོངས་ངེས་སུ་བྱ། མཇུག་ཏུ། དགེ་འདིས་མཚོན་ནས་དུས་གསུམ་དང་འབྲེལ་བའི། །བདག་གཞན་དགེ་བའི་རྩ་བ་ཇི་སྙེད་པ། །དེ་དག་ཐམས་ཅད་སྐྱེ་ཞིང་སྐྱེ་བ་རུ། །བྱང་ཆུབ་མཆོག་གི་རྗེས་སུ་མི་མཐུན་པའི། །ཤེས་ཀྱི་ཁེ་འདོད་པ་དང་གྲགས་པ་དང། །འཁོར་དང་ལོངས་སྤྱོད་རྙེད་དང་བཀུར་སྟིའི་རྒྱུར། །སྐད་ཅིག་ཙམ་ཡང་ནམ་ཡང་མི་སྨིན་པར། །བླ་མེད་བྱང་ཆུབ་ཁོ་ནའི་རྒྱུར་གྱུར་ཅིག །རྒྱལ་སྲས་སྨོན་ལམ་གངྒཱའི་ཀླུང་རྣམས་ནི། །དམ་ཆོས་འཛིན་པའི་སྨོན་ལམ་ནང་འདུས་པར། །གསུངས་ཕྱིར་དགེ་རྩ་ཇི་སྙེད་བསགས་པ་ནི། །ཀུན་ཀྱང་ཐུབ་བསྟན་རྒྱས་པའི་རྒྱུ་རུ་བསྔོ། །བདག་གིས་ཇི་སྙེད་བསགས་པའི་དགེ་བ་འདིས། །ཞེས་སོགས་བསྔོ་སྨོན་རྣམ་པར་དག་པས་མཚམས་སྦྱར་ཏེ་རྒྱལ་བའི་བསྟན་པ་ཡོངས་སུ་རྫོགས་པ་ལ་བག་ཆགས་ཅི་ཐེབས་ཀྱི་སྒོ་ནས་དལ་བའི་རྟེན་ལ་སྙིང་པོ་བླང་བར་བྱའོ། །
སྨྲས་པ། གསུང་རབ་འོ་མའི་རྒྱ་མཚོ་ཆེ། །བསྲུབས་པའི་མར་གྱི་ཉིང་ཁུ་དང། །མན་ངག་གེ་སར་བཅུད་བསྡུས་པའི། །སྙིང་པོ་སྦྲང་རྩིའི་ཐིགས་པ་བཞིན། །བྱང་ཆུབ་ལམ་གྱི་རིམ་པ་ཡི། །དམིགས་སྐོར་ཚང་ཞིང་མདོར་བསྡུས་པ། །བསྙད་པའི་དགེ་འདིས་འགྲོ་བ་ཀུན། །ཡང་དག་ལམ་ལ་སྤྱོད་གྱུར་ཅིག །ཅེས་པ་འདི་ནི་སྔར་བྱང་ཆུབ་བདེ་ལམ་གྱི་དོན་ཚིགས་བཅད་དུ་བསྡེབས་པ་ཤིན་ཏུ་ཉུང་ངུ་ཞིག་བྲིས་ཡོད་པ་དེ་ལས་ཅུང་ཟད་རྒྱས་པ་ཞིག་དགོས་ཚུལ། བ་རོན་སུ་ཉིད་ཤོག་ནས་དད་བརྩོན་བློ་གྲོས་ཀྱི་ནོར་དང་ལྡན་ཞིང་སྒྲུབ་པ་ལ་གཞོལ་བ་གུ་ཤྲི་བློ་བཟང་དཀོན་མཆོག་གིས་བསྐུལ་བ་ལྟར། དོན་ཚན་གལ་ཆེ་བ་དུ་མས་ཟུར་བསྐངས་ཏེ། ༸བཙུན་པ་དཀོན་མཆོག་བསྟན་པའི་སྒྲོན་མེས་དབེན་གནས་ཡིད་དགའ་ཆོས་འཛིན་དུ་བྲིས་པའོ།། །།