དགའ་ལྡན་ལྷ་བརྒྱ་མའི་གཞུང་བསྲངས་ཏེ་མདོ་སྔགས་ཉམས་སུ་ལེན་ཚུལ།
དགའ་ལྡན་ལྷ་བརྒྱ་མའི་གཞུང་བསྲངས་ཏེ་མདོ་སྔགས་ཆ་ཚང་བར་ཉམས་སུ་ལེན་ཚུལ་དགའ་ལྡན་ཞིང་དུ་བགྲོད་པའི་ནོར་བུའི་ཐེམ་སྐས་ཞེས་བྱ་བ་བཞུགས་སོ། །
ཆོས་ཀུན་དེ་ཉིད་འབྱེད་པའི་བློ༷་གྲོས་ཉིན་བྱེད་འོད་ཀྱིས་གདུངས་པ་ལས། །འགྲོ་ལ་རྗེས་ཆགས་ཀུན་བཟ༷ང་ཐུགས་རྗེ་གངས་ཀྱི་རི་བོ་བཞུས་པའི་རྒྱུན། །གཟུགས་སྐུ་དབང་ཕྱུག་ཡན་ལག་བརྒྱད་ལྡན་གྲ༷གས་པ༷འི་རླབས་འཕྲེང་རོལ་བ་ཅན། །སྙིགས་མའི་འགྲོ་བ་དུག་ཅན་ཚོགས་ཀྱི་དག་བྱེད་གཅིག་པུ་དེ་ལ་འདུད། །སྲིད་ཞིའི་འཇིགས་སྒྲོལ་བླ་མ་ལྷག་པའི་ལྷ། །དངོས་གྲུབ་འདོད་པ་འཇོ་བའི་ཡི་དམ་སྟེ། །བར་གཅོད་གཡུལ་ལས་སྐྱོབ་པའི་ཆོས་སྲུང་སོགས། །སྐྱབས་ཀྱི་དམ་པ་མཐའ་དག་གཅིག་གྱུར་པ། །མགོན་པོ་འདི་ཡི་ཐུགས་རྗེ་གྲུ་གཟིངས་ལ། །བརྟེན་ནས་སྲིད་ཞིའི་རྒུད་པའི་རྒྱ་མཚོ་ལས། །བརྒལ་ཏེ་ཟུང་འཇུག་ནོར་བུའི་གྲོང་ཁྱེར་དུ། །འཇུག་པར་རིགས་སོ་བློ་ལྡན་སྐལ་བཟང་ཚོགས། །དེ་ཡང་རང་ཅག་གསེར་མདོག་ཅོད་པན་འཆང་བ་ཀུན་གྱི་ལྷག་པའི་ལྷ་སྐལ་གཅིག་པུར་གྱུར་པ་འཇམ་མགོན་བླ་མ་ཙོང་ཁ་པ་ཆེན་པོ་ལ་བརྟེན་པའི་ཟབ་ལམ་བླ་མའི་རྣལ་འབྱོར་ཇི་སྙེད་ཅིག་ཡོད་པ་རྣམས་ཀྱི་ནང་ནས་ཆེས་མཆོག་ཏུ་གྱུར་པ་འཇམ་མགོན་སྙན་བརྒྱུད་ཀྱི་མན་ངག་ཟབ་མོ་དགའ་ལྡན་ལྷ་བརྒྱ་མ་ཞེས་རྒྱ་མཚོའི་མཐས་གཏུགས་པར་འཕྲིན་ལས་ཁྱབ་གདལ་དུ་ཆེ་བ་འདི་ཉིད་ཀྱི་གཞུང་བསྲངས་ཏེ་དེའི་ཁོངས་སུ་མདོ་སྔགས་གཉིས་གའི་ཉམས་ལེན་དང་བསག་སྦྱང་གི་གནད་ཆ་ཚང་བར་བྱས་ཏེ་ལག་ཏུ་བླང་བའི་ཚུལ་ནི། བླ་མའི་རྣལ་འབྱོར་འདི་གའི་ལུགས་ལྟར་གྱི་ཞིང་བཀོད་ཐང་ཀའམ། རྗེ་བླ་མའི་སྐུ་བརྙན་བྲིས་འབུར་ཅི་རིགས་
གཙོ་བོར་གྱུར་པའི་སྐུ་གསུང་ཐུགས་ཀྱི་རྟེན་ལེགས་པར་བཀྲམ། དེའི་མདུན་དུ་གཙང་ཞིང་གྱ་ནོམ་པའི་མཆོད་པ་ཡིད་དུ་འོང་བ་བཤམ། རང་ཉིད་སྟན་བདེ་བ་ལ་རྣམ་སྣང་གི་ཆོས་བདུན་ལྡན་དུ་འཁོད་དེ་རང་རྒྱུད་ལ་དགེ་བ་དང་མི་དགེ་བའི་ཕྱོགས་གང་ཆེ་བརྟག་ལ། དགེ་བར་སོང་འདུག་ན་རླུང་ནང་དུ་རྔུབ། མི་དགེ་བ་ཤས་ཆེ་ན་རླུང་ཕྱིར་འབུད་པ་དང་མཉམ་དུ་ནག་ཕུང་ངེ་ཕྱིར་ཐོན་པའི་མོས་པ་བྱ། དེ་ནས་སྐྱབས་འགྲོའི་ཡུལ་གྱི་ཚོགས་ཞིང་གསལ་གདབ་པ་ནི། ༈ མདུན་དུ་ཀུན་བཟང་མཆོད་སྤྲིན་རྒྱ་མཚོའི་དབུས། །རིན་ཆེན་ལས་གྲུབ་ཡངས་པའི་ཁྲི་སྟེང་དུ། །རྒྱབ་ལ་ཉེ་བར་འོད་འབར་ནོར་བུའི་ཁྲི། །སྣ་ཚོགས་པདྨ་ཉི་ཟླའི་གདན་བཅས་སྟེང། །རྩ་བའི་བླ་མ་འཇམ་དཔལ་སྙིང་པོ་དང། །དབྱེར་མེད་ཐུབ་དབང་བཙོ་མའི་གསེར་གྱི་མདོག །གཙུག་ཏོར་མཛེས་ལྡེམ་ས་གནོན་མཉམ་གཞག་མཛད། །ཞབས་གཉིས་རྡོ་རྗེ་སྐྱིལ་ཀྲུང་ཚུལ་གྱིས་བཞུགས། །གུར་ཀུམ་མདངས་ལྡན་ཆོས་གོས་རྣམ་གསུམ་གསོལ། །ཉིན་བྱེད་ལས་ལྷག་འོད་ཟེར་ཕྱོགས་བཅུར་འཕྲོ། །མཚན་དང་དཔེ་བྱད་གསལ་ལ་རབ་རྫོགས་པའི། །མཛེས་པའི་སྐུ་ནི་བལྟ་བས་ཆོག་མི་ཤེས། །ཡན་ལག་དྲུག་ཅུའི་དབྱངས་དང་ལྡན་པ་ཡི། །སྙན་པའི་གསུང་ནི་ཐོས་པས་ངོམས་པ་མེད། །མཁྱེན་དང་བརྩེ་བའི་གཏེར་དུ་གྱུར་པ་ཡི། །ཟབ་ཡངས་ཐུགས་ནི་གཏིང་མཐའ་གཞལ་ལས་འདས། །ཉེས་
པའི་དྲི་བྲལ་ལེགས་པའི་ཡོན་ཏན་རྫོགས། །དྲན་པ་ཙམ་གྱིས་སྲིད་ཞིའི་གདུང་བ་སེལ། །རབ་འབྱམས་ཞིང་དུ་བཅུ་གཉིས་མཛད་པ་སོགས། །གང་འདུལ་ངོ་མཚར་སྤྲུལ་པ་སྣ་ཚོགས་སྟོན། །དེ་ཡི་གཡས་གཡོན་པདྨ་ཉི་ཟླའི་གདན། །བླ་མ་བརྒྱུད་པའི་གྲངས་སྙེད་ཚར་དུ་དངར། །སྟེང་དུ་གཡས་སུ་རྒྱ་ཆེན་སྤྱོད་རྒྱུད་དང། །གཡོན་དུ་ཟབ་མོ་ལྟ་རྒྱུད་ཚོགས་རྣམས་བཞུགས། །ཐུབ་དབང་མདུན་དུ་གདན་ཁྲི་ཕུན་ཚོགས་སྟེང། །རྩ་བའི་བླ་མ་མཇལ་དུས་རྣམ་པ་ཅན། །ཆོས་འབྲེལ་མནོས་པའི་དངོས་ཀྱི་བླ་མ་རྣམས། །པདྨ་ཉི་ཟླའི་གདན་ལ་བཞུགས་པས་བསྐོར། །ཐུབ་པའི་དབང་པོའི་རྒྱབ་ཀྱི་སྟེང་གི་ཆར། །དཔལ་ལྡན་རིགས་བརྒྱའི་ཁྱབ་བདག་རྡོ་རྗེ་འཆང། །བྱིན་རླབས་བརྒྱུད་པའི་བླ་མ་མཆོག་རྣམས་ཀྱིས། །བསྐོར་བ་པད་ཉི་ཟླ་བའི་གདན་ལ་བཞུགས། །ཐུབ་དབང་གཙོ་འཁོར་རྣམས་ཀྱི་ཕྱོགས་བཞི་རུ། །གསང་འདུས་འཇིགས་མཛད་དུས་འཁོར་ཧེ་རུ་ཀའི། །དཀྱིལ་འཁོར་ལྷ་ཚོགས་རྣམས་དང་དེ་དག་མཐར། །ཡི་དམ་སངས་རྒྱས་བྱང་སེམས་ཉན་རང་དང། །དཔའ་བོ་མཁའ་འགྲོ་ཆོས་སྐྱོང་སྲུང་མར་བཅས། །ཞི་ཁྲོ་རབ་འབྱམས་རང་རང་གདན་ལ་བཞུགས། །རྡོ་རྗེ་འཆང་དབང་གཙོ་འཁོར་རྣམས་ཀྱི་མཐར། །འདུལ་མངོན་མདོ་དང་དབང་བཤད་མན་ངག་གི །བརྒྱུད་པའི་བླ་མ་དཔག་ཏུ་མེད་པ་རྣམས། །པད་ཉི་ཟླ་བའི་གདན་ལ་མཛེས་པར་བཞུགས། །དེ་དག་རྣམས་ཀྱི་མདུན་དུ་རང་རང་གིས། །
གསུངས་པའི་དམ་ཆོས་འོད་ཀྱི་རང་བཞིན་གྱི། །པོ་ཏིའི་རྣམ་པར་གདན་ཁྲི་བཟང་པོའི་སྟེང། །བཞུགས་པའི་སྐྱབས་ཡུལ་ནམ་མཁའ་གང་བ་རྣམས། །དཔག་ཡས་འོད་ཟེར་སྤྲོ་བསྡུའི་རོལ་པ་ཡིས། །རབ་འབྱམས་ཞིང་དུ་འགྲོ་བའི་དོན་མཛད་ཅིང། །རང་ལ་དགྱེས་པའི་ཉམས་ཀྱིས་བཞུགས་པར་གྱུར། །རང་དང་མཐའ་སྐོར་རིགས་དྲུག་འགྲོ་བ་ཀུན། །ཐོག་མེད་ནས་བཟུང་སྲིད་པའི་རྒྱ་མཚོ་འདིར། །བཟོད་དཀའ་ཡུན་རིང་སྡུག་བསྔལ་གྱིས་མནར་ཡང། །ད་དུང་གཏིང་མཐའ་མངོན་པར་མི་སྣང་བས། །དེ་ཡི་སྐྱབས་ཤིག་ད་ལན་བཙལ་དགོས་ཤིང། །དེ་ཡང་དཀོན་མཆོག་རིན་ཆེན་རྣམ་གསུམ་ལ། །བློ་འགེལ་ནུས་ན་ནམ་ཡང་མི་བསླུ་བས། །གདུང་ཤུགས་དྲག་པོས་སྐྱབས་སུ་འགྲོ་བར་བྱ། །བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཁྱད་པར་ཁམས་གསུམ་ཆོས་ཀྱི་རྒྱལ་པོ་ཙོང་ཁ་པ་ཆེན་པོ་ཡབ་སྲས་བརྒྱུད་པ་དང་བཅས་པ་རྣམས་ལ་སྐྱབས་སུ་མཆིའོ། །ཆོས་སྐྱོང་སྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་ལ་སྐྱབས་སུ་མཆིའོ། །ཞེས་ལན་གང་མང་བརྗོད་པའི་མཐར། སྐྱབས་ཡུལ་རྣམས་ལས་བདུད་རྩིའི་རྒྱུན་
བབས་པ། །བདག་སོགས་ཀུན་གྱི་སྤྱི་བོ་ནས་ཞུགས་པས། །དེ་དག་ལ་བརྟེན་ཉེས་པའི་ཚོགས་བྱང་ཞིང། །བྱིན་རླབས་མ་ལུས་རྒྱུད་ལ་ཞུགས་པར་གྱུར། །ཅེས་ལན་གཅིག །འབྲས་སྐྱབས་སུ་གྱུར་པའི་དཀོན་མཆོག་གསུམ་ལ་གཙོ་བོར་དམིགས་ནས་སེམས་ཅན་ཐམས་ཅད་ཀྱི་དོན་དུ་དེ་ཐོབ་བྱར་བྱེད་པ་ཐེག་ཆེན་ཐུན་མོང་མ་ཡིན་པའི་སྐྱབས་འགྲོ་དང་སེམས་བསྐྱེད་ཀྱི་དམིགས་རྣམ་གསལ་བཏབ་ལ། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །ནས། སངས་རྒྱས་འགྲུབ་པར་ཤོག །ཅེས་ལན་གང་མང་བརྗོད་དེ་བྱང་ཆུབ་ཏུ་སེམས་བསྐྱེད་ཅིང་སྤྱོད་པ་ཕྱིན་དྲུག་སོགས་རྒྱལ་སྲས་ཀྱི་སྤྱོད་པ་མཐའ་དག་ལ་བསླབ་པར་བྱའོ་སྙམ་པའི་འདུན་པ་ཤུགས་དྲག་པོ་གསལ་གདབ། མདུན་གྱི་བླ་མ་ཐུབ་པའི་དབང་པོ་ལས། །རང་འདྲ་ཆད་དེ་ཐིམ་པས་བདག་ཉིད་ནི། །ཐུབ་དབང་སྐུར་གྱུར་དེ་ཡི་འོད་ཟེར་གྱིས། །འགྲོ་ཀུན་བྱང་ཆུབ་མཆོག་ལ་བཀོད་པར་གྱུར། །ཅེས་སེམས་བསྐྱེད་འབྲས་བུ་ལམ་བྱེད་ཀྱི་ཚུལ་དུ་བསྒོམ་པ་ལན་གཅིག་བྱ། ཉེ་རིང་རིས་སུ་མ་ཆད་མ་རྒན་རྣམས། །སྡུག་བསྔལ་རྒྱུ་བཅས་ལས་གྲོལ་བདེ་ཐོབ་ཅིང། །ཟག་མེད་དགའ་བས་རོལ་ན་ཅི་མ་རུང། །དེ་བཞིན་གྱུར་ཅིག་དེ་ལྟར་བདག་གིས་བྱ། །དེ་བསྒྲུབ་ནུས་པར་བླ་མ་ལྷག་པའི་ལྷས། །བྱིན་གྱིས་རློབས་ཞེས་གསོལ་བ་བཏབ་པ་ན། །བྱིན་རླབས་བདུད་རྩིའི་རྒྱུན་གྱི་ཆར་བབས་པས། །འགྲོ་ཀུན་ཚད་མེད་བཞི་ལ་གནས་པར་གྱུར། །ཅེས་ཚད་མེད་བཞི་བསྒོམ་པ་ལན་གསུམ་སོགས་བྱ། ནམ་མཁའི་དབྱིངས་སུ་སྤྲིན་ཕུང་ཞི་བ་བཞིན། །ཚོགས་ཞིང་མཐའ་དག་ཐུབ་པའི་དབང་པོ་ལ། །བསྡུས་ཏེ་དེ་
ཡང་རང་གི་སྨིན་མཚམས་ནས། །ཐིམ་པར་བྱིན་རླབས་མ་ལུས་ཐོབ་པར་གྱུར། །ཅེས་ཚོགས་ཞིང་བསྡུ། ནམ་མཁའི་མཐས་གཏུགས་སེམས་ཅན་ཀུན་དོན་དུ། །བདེ་ཆེན་དང་པོའི་མགོན་པོ་བླ་མ་ལྷའི། །གོ་འཕང་མྱུར་བ་མྱུར་བར་ཐོབ་བྱའི་ཕྱིར། །ཟབ་མོ་བླ་མའི་རྣལ་འབྱོར་བསྒོམ་པར་བྱ། །ཞེས་ཁྱད་པར་གྱི་སེམས་བསྐྱེད་ལན་གང་མང་བྱ། འོག་ནས་འབྱུང་བ་བཞིན་སྔགས་ཀྱི་ཉམས་ལེན་དང་འབྲེལ་བར་བྱེད་པ་ལ་རང་ལྷའི་ང་རྒྱལ་ལ་གནས་ཤིང་དེའི་སྒོ་ནས་མཆོད་པ་སོགས་བྱིན་གྱིས་རློབ་པར་བྱེད་དགོས་པས་འདི་ལྟར། རང་བཞིན་རྣམ་དག་སྤྲོས་བྲལ་ཆོས་དབྱིངས་ལས། །རང་ཉིད་རྡོ་རྗེ་འཇིགས་བྱེད་སྐུར་བཞེངས་པའི། །གནས་གསུམ་ཡི་གེ་གསུམ་མཚན་ཧཱུཾ་ཡིག་གི །འོད་ཀྱི་སྣོད་བཅུད་མཆོད་རྫས་དང་བཅས་པའི། །མ་དག་འཁྲུལ་སྣང་ཉེས་པ་ཀུན་སྦྱངས་ནས། །དག་པའི་རྟེན་དང་བརྟེན་པར་ལེགས་འཆར་ཞིང། །མཆོད་རྫས་མཐའ་དག་ཁྱད་པར་གསུམ་ལྡན་གྱི། །ཀུན་བཟང་མཆོད་པའི་སྤྲིན་གྱི་ཕུང་པོར་གྱུར། །ཅེས་མཆོད་པ་བྱིན་གྱིས་བརླབ། དེ་ནས་ཚོགས་ཞིང་གསལ་གདབ་པ་ནི། མདུན་དུ་ཀུན་བཟང་མཆོད་སྤྲིན་རྒྱ་མཚོའི་དབུས། །རིན་ཆེན་ལས་གྲུབ་ཡངས་པའི་ཁྲི་སྟེང་དུ། །རྒྱབ་ལ་ཉེ་བར་འོད་འབར་ནོར་བུའི་ཁྲི། །སྣ་ཚོགས་པདྨ་ཉི་ཟླའི་གདན་དང་བཅས། །གསུམ་གྱི་དབུས་མ་ཅུང་ཟད་མཐོ་བའི་སྟེང། །འཇམ་མགོན་ཆོས་ཀྱི་རྒྱལ་པོ་ཙོང་ཁ་པ། །ཕྱག་གཉིས་ཆོས་འཁོར་ཕྱག་རྒྱས་ཨུཏྤ་ལ། །
བསྣམས་པའི་གཡས་ན་ཤེས་རབ་རལ་གྲི་དང། །གཡོན་པའི་སྟེང་དུ་ཤེར་ཕྱིན་གླེགས་བམ་བསྣམས། །གུར་ཀུམ་མདངས་ལྡན་ཆོས་གོས་གསུམ་གསོལ་ཞིང། །བཙོ་མའི་གསེར་མདོག་པཎ་ཞྭས་དབུ་ལ་མཛེས། །ཞབས་གཉིས་རྡོ་རྗེ་སྐྱིལ་ཀྲུང་ཚུལ་གྱིས་བཞུགས། །གཡས་སུ་སྲས་མཆོག་དར་མ་རིན་ཆེན་དང། །གཡོན་ན་སྨྲ་བའི་ཉི་མ་དགེ་ལེགས་དཔལ། །ཆོས་གོས་གསུམ་གསོལ་པཎ་ཞྭས་གཙུག་མཛེས་ཤིང། །ཆོས་འཆད་མཉམ་གཞག་ཕྱག་རྒྱས་གླེགས་བམ་བསྣམས། །ཡབ་སྲས་གསུམ་ཆར་མཚན་དཔེའི་དཔལ་རྫོགས་པས། །མཛེས་པའི་སྐུ་ནི་བལྟ་བས་ཆོག་མི་ཤེས། །ཞེས་པ་ནས། གཞན་རྣམས་གོང་ལྟར་ལ། ཡབ་རྗེའི་མདུན་དུ་གདན་ཁྲི་ཕུན་ཚོགས་སྟེང། །ཞེས་པ་དང། འཇམ་མགོན་བླ་མའི་རྒྱབ་ཀྱི་སྟེང་གི་ཆར། །ཞེས་པ་དང། འཇམ་མགོན་འཁོར་བཅས་རྣམས་ཀྱི་ཕྱོགས་བཞི་རུ། །ཞེས་པ་རྣམས་ཚིག་བསྒྱུར་དགོས། དེ་ནས། རབ་འབྱམས་ཞིང་དུ་འགྲོ་བའི་དོན་མཛད་ཅིང། །རང་ལ་དགྱེས་པའི་ཉམས་ཀྱིས་བཞུགས་པར་གྱུར། །དེ་དག་རྣམས་ཀྱི་གནས་ལྔར་ཡི་གེ་ལྔས། །ལེགས་མཚན་ཐུགས་ཀའི་ཧཱུཾ་ལས་འོད་ཟེར་འཕྲོས། །རབ་འབྱམས་ཕྱོགས་བཅུའི་ཞིང་ཁམས་ཐམས་ཅད་ནས། །བླ་མ་ཡི་དམ་རྒྱལ་བ་སྲས་བཅས་དང། །ཁྱད་པར་སྟེང་ཕྱོགས་དགའ་ལྡན་ལྷ་གནས་ལས། །གྲོང་དང་དགོན་པའི་ཚུལ་དུ་བྱས་པ་ཡི། །ཞིང་མཆོག་དམ་པ་ཡིད་དགའ་ཆོས་འཛིན་ཞེས། །མ་ཕམ་མགོན་པོའི་ཐུགས་བསྐྱེད་ལས་གྲུབ་པ། །སྲིད་
པའི་སྡུག་བསྔལ་མིང་ཡང་མི་གྲགས་ཤིང། །དག་པའི་ཞིང་གི་སྣོད་བཅུད་འབྱོར་བའི་དཔལ། །མ་ཚང་མེད་པར་ལྷུན་གྱིས་གྲུབ་པའི་དབུས། །ཉི་མ་སྟོང་ཕྲག་འོད་ཀྱི་གདེངས་ཀ་ཅན། །ཆོས་ཀྱི་ཕོ་བྲང་རྒྱལ་མཚན་མཐོན་པོ་རུ། །རྒྱལ་སྲས་རྒྱ་མཚོའི་ཚོགས་ཀྱིས་བསྐོར་བའི་དབུས། །མི་འཇིགས་གདོང་ལྔས་བཏེག་པའི་ནོར་བུའི་ཁྲིར། །བཟང་པོའི་བཞུགས་སྟངས་ཚུལ་གྱིས་འཁོད་པ་ཡི། །དགའ་ལྡན་ལྷ་བརྒྱའི་མགོན་གྱི་ཐུགས་ཀ་ནས། །རབ་དཀར་ཞོ་གསར་སྤུངས་འདྲའི་ཆུ་འཛིན་རྩེར། །ཆོས་ཀྱི་རྒྱལ་པོ་ཀུན་མཁྱེན་བློ་བཟང་གྲགས། །སྲས་དང་བཅས་པ་གནས་འདིར་གཤེགས་སུ་གསོལ། །རྣམ་དག་ཆོས་ཀྱི་དབྱིངས་ལས་མ་གཡོས་ཀྱང། །ཐུགས་རྗེས་ཚད་མེད་འགྲོ་ལ་ཕྱོགས་བཅུར་གཟིགས། །རྒྱལ་བ་ཀུན་གྱི་འཕྲིན་ལས་རྒྱས་མཛད་པ། །དུས་གསུམ་བླ་མ་འཁོར་བཅས་གནས་འདིར་གཤེགས། །ཛཿ ཧཱུཾ་བཾ་ཧོཿ ཡེ་ཤེས་པ་རྣམས་རང་རང་གི་དམ་ཚིག་པ་སོ་སོ་ལ་ཐིམ་པར་གྱུར། མདུན་གྱི་ནམ་མཁར་སེང་ཁྲི་པད་ཟླའི་སྟེང། །རྗེ་བཙུན་བླ་མ་དགྱེས་པའི་འཛུན་དཀར་ཅན། །བདག་བློ་དད་པའི་བསོད་ནམས་ཞིང་མཆོག་ཏུ། །བསྟན་པ་རྒྱས་ཕྱིར་བསྐལ་བརྒྱར་བཞུགས་སུ་གསོལ། །བསྟན་པའི་བདག་པོ་སྟོན་པ་བཅོམ་ལྡན་འདས། །རྒྱལ་བའི་དབང་པོ་བློ་བཟང་གྲགས་པའི་དཔལ། །བཀའ་དྲིན་མཉམ་མེད་ཡོངས་འཛིན་རིན་པོ་ཆེ། །དབྱེར་མེད་ཞབས་ཀྱི་པདྨོར་ཕྱག་འཚལ་ལོ། །
ཤེས་བྱའི་ཁྱོན་ཀུན་འཇལ་བའི་བློ་གྲོས་ཐུགས། །སྐལ་བཟང་རྣ་བའི་རྒྱན་གྱུར་ལེགས་བཤད་གསུང། །གྲགས་པའི་དཔལ་གྱིས་ལྷམ་མེར་མཛེས་པའི་སྐུ། །མཐོང་ཐོས་དྲན་པ་དོན་ལྡན་ལ་ཕྱག་འཚལ། །ཁྱོད་ཀྱི་ངོ་མཚར་སྤྲུལ་པའི་ཟློས་གར་ལས། །བྱུང་བའི་དངོས་བརྒྱུད་བླ་མ་ཡི་དམ་ལྷ། །སངས་རྒྱས་བྱང་སེམས་ཉན་རང་སྲུང་མར་བཅས། །ཞི་ཁྲོ་རབ་འབྱམས་རྣམས་ལ་ཕྱག་འཚལ་ལོ། །ཡིད་འོང་མཆོད་ཡོན་སྣ་ཚོགས་མེ་ཏོག་དང། །དྲི་ཞིམ་བདུག་སྤོས་སྣང་གསལ་དྲི་ཆབ་སོགས། །དངོས་བཤམས་ཡིད་སྤྲུལ་མཆོད་སྤྲིན་རྒྱ་མཚོ་འདི། །བསོད་ནམས་ཞིང་མཆོག་ཁྱེད་ལ་མཆོད་པར་འབུལ། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །རྣམ་དཀར་བཤད་སྒྲུབ་བསླབ་གསུམ་རིམ་གཉིས་སོགས། །རང་གཞན་ཀུན་གྱི་རྣམ་དཀར་དགེ་ཚོགས་ཀྱང། །ཡིད་འོང་མཆོད་པའི་སྤྲིན་དུ་ལེགས་བསྟར་ན། །བཞེས་ཤིང་ཟད་མི་ཤེས་པར་བྱིན་གྱིས་རློབས། །རིགས་ལྔ་ཡུམ་བཞིའི་རང་བཞིན་དམ་རྫས་རྣམས། །རྡོ་རྗེ་གསུམ་གྱི་འོད་ཟེར་སྤྲོ་བསྡུ་ཡིས། །སྦྱངས་རྟོགས་སྦར་བྱས་བདུད་རྩིའི་རྒྱ་མཚོ་ཆེས། །མཆོག་ཏུ་སིམ་ཞིང་དགྱེས་པ་བསྐྱེད་གྱུར་ཅིག །ཞིང་སྔགས་ལྷན་སྐྱེས་ཕྱག་རྒྱའི་ཚོགས་སྤྲོས་ཏེ། །རྡོ་རྗེ་འཆང་དབང་ཡུམ་ལ་ཐིམ་པ་ན། །དེ་དང་སྙོམས་འཇུག་དགའ་བའི་རོལ་བ་ཡིས། །འཁོར་བཅས་ཟག་མེད་དགའ་བས་ཚིམ་གྱུར་
ཅིག །ཆོས་ཀུན་སྤྲོས་བྲལ་ནམ་མཁའ་ལྟ་བུའི་ངང། །གཟུགས་སྐུའི་འཇའ་ཚོན་ཅིར་ཡང་འཆར་བཟོད་པ། །སྐུ་ཐུགས་ཟུང་འཇུག་ལྷན་སྐྱེས་བདེ་བ་ཆེ། །བྱང་ཆུབ་རྡོ་རྗེའི་མཆོད་པས་དགྱེས་པར་མཛོད། །མདོར་ན་ཕྱི་ནང་ཉེར་སྤྱོད་འདོད་ཡོན་དང། །དབང་བཞི་དང་འབྲེལ་མཆོད་པའི་མཎྜ་ལ། །བློ་ཡིས་བླངས་ཏེ་གུས་པས་འབུལ་ལགས་ན། །ཐུགས་རྗེ་ཆེ་ལྡན་ཉིད་ཀྱི་མཐུས་བཞེས་ཤིག །རབ་རྨོངས་བདག་སོགས་འགྲོ་དྲུག་སེམས་ཅན་རྣམས། །རིང་ནས་གདུལ་དཀའ་སེམས་ཀྱིས་དབང་བསྒྱུར་ཞིང། །སེམས་ཉིད་རྨོངས་པས་བྲན་དུ་བཟུང་བའི་མཐུས། །དཔག་ཡས་སྒོ་གསུམ་སྡིག་པ་ཅི་བགྱིས་པ། །གནོང་ཞིང་འགྱོད་པ་དྲག་པོས་མཐོལ་བགྱིད་ན། །བཅོམ་ལྡན་ཐུགས་རྗེ་མངའ་བ་ཁྱེད་རྣམས་ཀྱིས། །བྱིན་རླབས་མི་ཟད་བདུད་རྩིའི་ཆུ་རྒྱུན་གྱིས། །ལྷག་མེད་བྱང་ཞིང་དག་པར་བྱིན་གྱིས་རློབས། །ཞེས་ཐུགས་རྗེ་བསྐུལ་བའི་དམིགས་པ་དང་བཅས་ལྟུང་བཤགས་དང་བླ་མ་རྡོར་འཛིན་མ། མཇུག་ཏུ། གང་ཞིག་ཐོག་མེད་དུས་ནས་བསགས་པ་ཡི། །ལུས་ངག་ཡིད་ཀྱིས་མི་དགེ་ཅི་བགྱིས་དང། །ཁྱད་པར་སྡོམ་པ་གསུམ་གྱི་མི་མཐུན་ཕྱོགས། །སྙིང་ནས་འགྱོད་པ་དྲག་པོས་སོ་སོར་བཤགས། །ཞེས་པ་ལན་གསུམ་སོགས་བྱ། དེ་ནས། སྙིགས་མའི་དུས་འདིར་མང་ཐོས་སྒྲུབ་ལ་བརྩོན། །ཆོས་བརྒྱད་སྤངས་པས་དལ་འབྱོར་དོན་ཡོད་བྱས། །མགོན་པོ་ཁྱོད་ཀྱི་རླབས་ཆེན་མཛད་པ་ལ། །བདག་ཅག་བསམ་པ་ཐག་པས་ཡི་རང་ངོ་། །རྗེ་བཙུན་བླ་མ་དམ་པ་ཁྱེད་རྣམས་ཀྱིས། །ཆོས་
སྐུའི་མཁའ་ལ་མཁྱེན་བརྩེའི་ཆུ་འཛིན་འཁྲིགས། །ཇི་ལྟར་འཚམ་པའི་གདུལ་བྱའི་འཛིན་མ་ལ། །ལྷུན་འགྲུབ་ཆོས་ཀྱི་ཆར་པ་དབབ་ཏུ་གསོལ། །བདག་གིས་ཇི་སྙེད་བསགས་པའི་དགེ་བ་འདིས། །བསྟན་དང་འགྲོ་བ་ཀུན་ལ་གང་ཕན་དང། །ཁྱད་པར་རྗེ་བཙུན་བློ་བཟང་གྲགས་པ་ཡི། །བསྟན་པའི་སྙིང་པོ་རིང་དུ་གསལ་བྱེད་ཤོག །ཞིང་ཁམས་འབུལ་བར་ཞུ། ཨོཾ་བཛྲ་བྷུ་མི་ཨཱཿ ཧཱུཾ། ཞེས་པ་ནས། ཞིང་ཁམས་རྣམ་པར་དག་པ་འདི་ཉིད་ཁམས་གསུམ་ཆོས་ཀྱི་རྒྱལ་པོ་ཙོང་ཁ་པ་ཡབ་སྲས་ལ་སོགས་པ་རྩ་བརྒྱུད་ཀྱི་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཉན་རང་ཆོས་སྐྱོང་སྲུང་མ་རྣམས་ལ་དབུལ་བར་བགྱིའོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། བཞེས་ནས་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ས་གཞི་སྤོས་ཀྱིས་སོགས་དང། བདག་གཞན་ལུས་ངག་མ་སོགས་བརྗོད་དེ། རབ་འབྱམས་གསུང་རབ་ཀུན་ལ་བལྟ་བའི་མིག །༝༝གསལ་མཛད་བཤེས་གཉེན་རྣམས་ལ་གསོལ་བ་འདེབས། །སྒྲུབ་པ་པོ་ལ་བུ་ལྟར་གཟིགས་མཛད་ཅིང། །༝༝ཡི་དམ་ལྷ་ཚོགས་རྣམས་ལ་གསོལ་བ་འདེབས། །རླབས་ཆེན་ཚོགས་གཉིས་སྤྱོད་པ་ཡོངས་རྫོགས་ཤིང། །ཉེས་ཀུན་བག་ཆགས་བཅས་པ་དྲུངས་ཕྱུང་སྟེ། །མཁའ་མཉམ་འགྲོ་བ་ཀུན་གྱི་དོན་མཛད་པ། །རྒྱལ་བ་སྲས་བཅས་ཀུན་ལ་གསོལ་བ་འདེབས། །བཤེས་ལ་མི་གུས་དལ་འབྱོར་ཆུད་གཟོན་ཞིང། །འཆི་བ་མི་དྲན་ཚེ་འདིའི་བདེ་ཐབས་བསྒྲུབ། །ངན་འགྲོར་མི་
འཇིགས་རྣམ་དག་སྐྱབས་མི་འཚོལ། །ལས་འབྲས་མི་སེམས་བླང་དོར་ལོག་པར་བསྒྲུབ། །འཁོར་བ་བདེར་འཛིན་དེ་རྒྱུ་ལས་ཉོན་སྤེལ། །ཐར་པར་མི་སྤྲོ་བསླབ་གསུམ་བསྟེན་མི་བྱེད། །མ་རྣམས་ཡལ་བོར་རང་ཉིད་གཅེས་པར་འཛིན། །བདག་ཏུ་མངོན་ཞེན་སྔགས་ལ་མི་མོས་སོགས། །ཕྱིན་ཅི་ལོག་གི་བློ་སྣ་མཐའ་དག་རྣམས། །མྱུར་དུ་འགག་པར་བྱིན་གྱིས་བརླབ་ཏུ་གསོལ། །བཤེས་ལ་དད་གུས་དལ་འབྱོར་སྙིང་པོ་ལེན། །འཆི་བ་རྗེས་དྲན་ཚེ་འདིའི་འདུན་མ་བསྐྱུངས། །ངན་འགྲོའི་འཇིགས་དྲན་དཀོན་མཆོག་སྐྱབས་སུ་འཛིན། །ལས་འབྲས་བསམས་ནས་བླང་དོར་ཚུལ་བཞིན་བསྒྲུབ། །འཁོར་བའི་སྐྱོན་མཐོང་ལས་ཉོན་སྤོང་བར་འདོད། །ཐར་པ་དོན་གཉེར་རྣམ་དག་བསླབ་གསུམ་བསྟེན། །མ་རྣམས་གཅེས་འཛིན་རང་ཉིད་ཡལ་བར་དོར། །བདག་མེད་དོན་མཐོང་སྔགས་ལ་མོས་པ་སོགས། །ཕྱིན་ཅི་མ་ལོག་བློ་སྣ་མཐའ་དག་རྣམས། །མྱུར་དུ་སྐྱེ་བར་བྱིན་གྱིས་བརླབ་ཏུ་གསོལ། །ཁྱད་པར་བྱམས་དང་སྙིང་རྗེ་སེམས་བསྐྱེད་དང། །ཕྱིན་དྲུག་ལ་སོགས་རྒྱ་ཆེན་སྤྱོད་པའི་ལམ། །སྙིང་པོ་ལམ་དུས་ཀུན་རྫོབ་སྒྱུ་མའི་ལུས། །ཡང་སྙིང་འབྲས་བུའི་དུས་ཀྱི་རྡོ་རྗེའི་སྐུ། །བདག་མེད་གནས་ལུགས་ཇི་བཞིན་མཐོང་བ་ཡི། །ཞི་ལྷག་གཉིས་སོགས་ཟབ་མོ་ལྟ་བའི་ལམ། །སྙིང་པོ་དཔེ་དང་དོན་གྱི་འོད་གསལ་གཉིས། །ཡང་སྙིང་བདེ་སྟོང་དབྱེར་མེད་ཆོས་སྐུ་སྟེ། །ཟབ་དང་རྒྱ་
ཆེའི་ལམ་བཟང་སྙིང་པོར་བཅས། །མྱུར་དུ་སྐྱེ་བར་བྱིན་གྱིས་བརླབ་ཏུ་གསོལ། །འཇམ་དབྱངས་བླ་མའི་ཐུགས་ཀའི་ཧཱུཾ་ཡིག་ལས། །འོད་འཕྲོས་རྒྱབ་ཀྱི་རྡོ་རྗེ་འཆང་ལ་ཕོག །དེ་ཡི་ཐུགས་ཀའི་ཧཱུཾ་གི་འོད་ཟེར་གྱིས། །ཚོགས་ཞིང་གཞན་རྣམས་བསྡུས་ནས་དེར་ཐིམ་ཞིང། །དེ་ཉིད་ཡབ་རྗེའི་སྤྱི་བོ་ནས་ཞུགས་ཏེ། །ཡེ་ཤེས་སེམས་དཔའི་ཚུལ་གྱིས་བཞུགས་པར་གྱུར། །དེ་ཉིད་ལ་སླར་ཡང། ལུས་ངག་ཡིད་གསུམ་གུས་པས་ཕྱག་འཚལ་ལོ། །དངོས་བཤམས་ཡིད་སྤྲུལ་མཆོད་པ་མ་ལུས་འབུལ། །ཐོག་མེད་ནས་བསགས་སྡིག་ལྟུང་ཐམས་ཅད་བཤགས། །སྐྱེ་འཕགས་དགེ་བ་རྣམས་ལ་རྗེས་ཡི་རང། །འཁོར་བ་མ་སྟོངས་བར་དུ་ལེགས་བཞུགས་ནས། །འགྲོ་ལ་ཆོས་འཁོར་མ་ལུས་བསྐོར་དུ་གསོལ། །བདག་གཞན་དགེ་རྣམས་བྱང་ཆུབ་ཆེན་པོར་བསྔོ། །ཞེས་ཡན་ལག་བདུན་པ་མདོར་བསྡུས་དང། ས་གཞི་མས་མཎྜལ་ཕུལ། སྐུ་བཞིའི་བདག་ཉིད་བླ་མ་ལྷག་པའི་ལྷ། །ཐུབ་དབང་རྡོ་རྗེ་འཆང་ལ་གསོལ་བ་འདེབས། །སྒྲིབ་བྲལ་ཆོས་སྐུའི་བདག་ཉིད་བླ་མ་ལྷ། །ཐུབ་དབང་༝། །བདེ་ཆེན་ལོངས་སྐུའི་བདག་ཉིད་བླ་མ་ལྷ། །ཐུབ་དབང་༝། །སྣ་ཚོགས་སྤྲུལ་སྐུའི་བདག་ཉིད་བླ་མ་ལྷ། །ཐུབ་དབང་༝། །བླ་མ་ཀུན་འདུས་བླ་མ་ལྷག་པའི་ལྷ། །ཐུབ་དབང་༝། །ཡི་དམ་ཀུན་འདུས་༝། །ཐུབ་དབང་༝། སངས་རྒྱས་ཀུན་འདུས་༝། །ཐུབ་དབང་༝། །དམ་ཆོས་ཀུན་འདུས་༝། །ཐུབ་དབང་༝། །
དགེ་འདུན་ཀུན་འདུས་༝། །ཐུབ་དབང་༝། །མཁའ་འགྲོ་ཀུན་འདུས་༝། །ཐུབ་དབང་༝། །ཆོས་སྐྱོང་ཀུན་འདུས་༝། །ཐུབ་དབང་༝། །སྐྱབས་གནས་ཀུན་འདུས་བླ་མ་ལྷག་པའི་ལྷ། །ཐུབ་དབང་རྡོ་རྗེ་འཆང་ལ་གསོལ་བ་འདེབས། །ཁྱད་པར་རྒྱལ་སྲས་ཀུན་ལས་རིགས་གསུམ་མགོན། །མཁྱེན་བརྩེ་ནུས་པས་ཁྱད་པར་འཕགས་པ་བཞིན། །གངས་ཅན་མཁས་ཀུན་གཙུག་གི་རྒྱན་གྱུར་པ། །འཇམ་མགོན་བླ་མའི་ཞབས་ལ་གསོལ་བ་འདེབས། །མཁྱེན་བརྩེའི་གཏེར་དང་མཐུ་ཆེན་ཐོབ་བཞིན་དུ། །མཁྱེན་པའི་ཡེ་ཤེས་བརྩེ་བའི་ཐུགས་རྗེ་དང། །སྐྱོབ་པའི་ནུས་མཐུ་མཚུངས་ཟླ་མ་མཆིས་པ། །འཇམ་མགོན་བླ་མའི་ཞབས་ལ་གསོལ་བ་འདེབས། །ངེས་པའི་དོན་དུ་འཕགས་པ་རིགས་གསུམ་མགོན། །ངུར་སྨྲིག་འཆང་བའི་སྐུ་ཡི་རྣམ་རོལ་ཏེ། །རྒྱལ་བའི་བསྟན་པ་ཉི་ལྟར་གསལ་མཛད་པ། །འཇམ་མགོན་བླ་མའི་ཞབས་ལ་གསོལ་བ་འདེབས། །མར་གྱུར་འགྲོ་ལ་རྗེས་ཆགས་སྙིང་རྗེ་དང། །མཐའ་བྲལ་གནས་ལུགས་རྟོགས་པའི་ཤེས་རབ་མཆོག །ཕྱི་ནང་བདུད་སྡེ་འཇོམས་པའི་ནུས་པ་རྣམས། །བདག་སོགས་རྒྱུད་ལ་སྐྱེ་བར་བྱིན་གྱིས་རློབས། །ཞེས་ཕྱི་ནང་གསང་བའི་ཡོན་ཏན་དྲན་པར་བྱས་ཏེ་དམིགས་བརྩེ་མ་ཡོངས་གྲགས་ལྟར་རམ། དངོས་གྲུབ་ཀུན་འབྱུང་ཐུབ་དབང་རྡོ་རྗེ་འཆང། །དམིགས་མེད་བརྩེ་བའི་གཏེར་ཆེན་སྤྱན་རས་གཟིགས། །དྲི་མེད་མཁྱེན་པའི་དབང་པོ་འཇམ་པའི་དབྱངས། །བདུད་དཔུང་མ་ལུས་འཇོམས་མཛད་གསང་བའི་བདག །འཇམ་དཔལ་ཁྲོས་
པའི་ཟློས་གར་གཤིན་རྗེའི་གཤེད། །གངས་ཅན་མཁས་པའི་གཙུག་རྒྱན་ཙོང་ཁ་པ། །བློ་བཟང་གྲགས་པའི་ཞབས་ལ་གསོལ་བ་འདེབས། །ཞེས་སོགས་ལྟར་གྱི་ལྔ་སྐོར་དྲུག་སྐོར་སོགས་བྱ། འཇམ་མགོན་ཡབ་སྲས་གསུམ་གྱི་ཐུགས་ཀ་ནས། །ཐོན་པའི་འོད་ཀྱི་སྦུ་གུའི་ལམ་བརྒྱུད་དེ། །བདུད་རྩིའི་རྒྱུན་བབས་སྤྱི་བོ་ནས་ཞུགས་པས། །མི་ཤེས་རྨོངས་པའི་དྲི་མ་སྦྱངས་པར་གྱུར། །ཞེས་མ་དག་པ་འཁྲུད་པའི་དམིགས་པ་སྔོན་དུ་བཏང་ལ། བདུད་རྩིའི་རྡུལ་རྣམས་འཇམ་དཔལ་ཞི་ཁྲོ་ཡི། །སྐུ་ཡི་རྣམ་པར་གནས་པས་ལུས་གང་སྟེ། །རབ་འབྱམས་གཞུང་དོན་འབྱེད་ལ་ཐོགས་མེད་པའི། །རླབས་ཆེན་ཤེས་རབ་ཐོབ་པར་བྱིན་གྱིས་རློབས། །བདུད་རྩིའི་རྡུལ་རྣམས་༝། །སྔགས་ཀྱི་རྣམ་པར་གནས་བས་ལུས་གང་སྟེ། །དཀའ་གནད་ཕྲ་ཞིབ་མ་འདྲེས་འབྱེད་པ་ཡི། །ཤེས་རབ་གསལ་བ་ཐོབ་པར་བྱིན་༝། །བདུད་རྩིའི་རྡུལ་རྣམས་༝། །ས་བོན་རྣམ་པར་གནས་པས་ལུས་གང་སྟེ། །ཐེ་ཚོམ་འཆིང་བ་འཕྲལ་དུ་གཅོད་པ་ཡི། །ཤེས་རབ་མྱུར་བ་ཐོབ་པར་༝། །བདུད་རྩིའི་རྡུལ་རྣམས་༝། །ཕྱག་མཚན་རྣམ་པར་གནས་པས་ལུས་གང་སྟེ། །ཟབ་མོའི་དོན་གྱི་གཏིང་མཐའ་དཔོག་པ་ཡི། །ཤེས་རབ་ཟབ་མོ་ཐོབ་པར་༝། །བདུད་རྩིའི་རྡུལ་རྣམས་གང་ཞིག་བཤད་བྱ་ཡི། །གླེགས་བམ་རྣམ་པར་གནས་པས་ལུས་གང་སྟེ། །ཚིག་དོན་ཀུན་ལ་ངེས་པ་མཆོག་སྟེར་བ། །འཆད་པའི་ཤེས་རབ་ཐོབ་པར་༝། །བདུད་རྩིའི་རྡུལ་རྣམས་ཤེས་རབ་རལ་གྲི་ཡི། །
འཁོར་ལོའི་རྣམ་པར་གནས་པས་ལུས་གང་སྟེ། །སྨྲ་ངན་ཚོགས་ཀྱི་སྤོབས་པ་འཕྲོག་པ་ཡི། །རྩོད་པའི་ཤེས་རབ་༝། །བདུད་རྩིའི་རྡུལ་རྣམས་གཞུང་གི་གླེགས་བམ་དང། །རལ་གྲིའི་རྣམ་པར་གནས་པས་ལུས་གང་སྟེ། །སྒྲ་དོན་ཕུན་ཚོགས་བློ་གསལ་དགའ་སྐྱེད་པའི། །རྩོམ་པའི་ཤེས་རབ་ཐོབ་པར་བྱིན་གྱིས་རློབས། །ཞེས་དམིགས་སྐོར་བདུན་པོ་རེ་རེའི་མཚམས་སུ་དམིགས་བརྩེ་མ་གྲངས་ཇི་ལྟར་འཚམ་པ་རེ་བཟླས་ཏེ། ཡང་མ་དག་པ་འཁྲུད་པའི་དམིགས་པ་དང་སྦྲགས་ནས་རྗེས་མ་རྗེས་མ་བྱེད་པའམ། ཡང་ན་མ་དག་པ་འཁྲུད་པ་ཚར་གཅིག་གི་མཇུག་ཏུ་དམིགས་སྐོར་བདུན་གྱི་ཚིགས་བཅད་རྣམས་དཀྱུས་གཅིག་ལ་བརྗོད་དེ་དམིགས་བརྩེ་མ་བཟླ་བ་གང་མོས་བྱ། དེ་ནས། ཡོན་ཏན་ཀུན་གྱི་གཞིར་གྱུར་དྲིན་ཅན་རྗེ། །ཞེས་སོགས་ཀྱིས་ལམ་ཡོངས་རྫོགས་ལ་གཤར་སྒོམ་བྱ་ཞིང། རྐང་པ་ཐ་མ་ལན་གཉིས་གཉིས་སུ་བརྗོད་པས་དང་པོའི་ཚེ་དེ་དང་དེའི་རྟོགས་པ་སྐྱེ་བ་ལ་གེགས་བྱེད་ཀྱི་དྲི་མ་སྦྱངས་པ་དང། གཉིས་པའི་ཚེ་དེ་དང་དེའི་རྟོགས་པ་སྐྱེས་པའི་དམིགས་པ་བྱ། བདེ་བླག་ཉིད་དུ་འཇུག་པར་བྱིན་གྱིས་རློབས། །ཞེས་པའི་འཕྲོར། སངས་རྒྱས་བྱང་ཆུབ་སེམས་དཔའ་ཀུན། །ཞེས་སོགས་ཀྱིས་སྡོམ་པ་བཟུང་ལ། དེ་ནས། ཁྱོད་ནི་བླ་མ་ཁྱོད་ནི་ཡི་དམ་ཁྱོད་ནི་མཁའ་འགྲོ་ཆོས་སྐྱོང་སྟེ། །༝༝༝བར་གཅོད་སྲུངས། །ཞེས་པ་ལན་གསུམ་གྱིས་ཕུར་ཚུགས་སུ་གསོལ་བ་བཏབ་པས། རྗེ་ཡབ་སྲས་གསུམ་ཀ་དང་ཁྱད་པར་དུ་རྗེ་བླ་མའི་ཐུགས་ཀའི་རྡོ་རྗེ་འཆང་གི་གནས་གསུམ་ལས་བདུད་རྩིའི་རྒྱུན་བབས་པ་རང་གི་གནས་རྣམས་སུ་ཐིམ་པས་དབང་བཞིའི་རྟོགས་པ་སྐྱེས་པར་བསམས་ལ། རྗེ་བཙུན་བླ་མ་རྡོ་རྗེ་འཆང་དབང་གི །སྤྱི་
བོའི་ཨོཾ་ལས་བདུད་རྩིའི་རྒྱུན་བབས་པས། །ལུས་ཀྱི་སྒྲིབ་སྦྱངས་བསྐྱེད་རིམ་བསྒོམ་པ་དང། །འབྲས་བུ་སྤྲུལ་སྐུ་འགྲུབ་པའི་ནུས་པ་ཐོབ། །མགྲིན་པའི་ཨཱཿ ཡིག་ལས་བྱུང་བདུད་རྩིའི་ཆུས། །ངག་གི་སྒྲིབ་སྦྱངས་སྒྱུ་ལུས་བསྒོམ་པ་དང། །འབྲས་བུ་ལོངས་སྐུ་འགྲུབ་པའི་ནུས་པ་ཐོབ། །ཐུགས་ཀའི་ཧཱུཾ་ཡིག་འོད་དང་བདུད་རྩིའི་ཆུས། །ཡིད་ཀྱི་སྒྲིབ་སྦྱངས་འོད་གསལ་བསྒོམ་པ་དང། །འབྲས་བུ་ཆོས་སྐུ་འགྲུབ་པའི་ནུས་པ་བཞག །སླར་ཡང་གནས་གསུམ་ལས་བྱུང་བདུད་རྩིའི་ཆུས། །སྒོ་གསུམ་སྒྲིབ་སྦྱངས་ཟུང་འཇུག་བསྒོམ་པ་དང། །རྡོ་རྗེ་འཆང་དབང་གོ་འཕང་འགྲུབ་པ་ཡི། །ནུས་པ་བཞག་སྟེ་དབང་བཞི་ཐོབ་པར་གྱུར། །དེ་ཚེ་དངོས་གྲུབ་རྣམ་གཉིས་འགྲུབ་པའི་གཞི། །ཞེས་པ་ནས། རྡོ་རྗེ་འཆང་གི་གོ་འཕང་མྱུར་ཐོབ་ཤོག །དེ་ལྟར་གདུང་ཤུགས་དྲག་པོས་རྩེ་གཅིག་ཏུ། །གསོལ་བ་བཏབ་པས་སྲས་ཀྱི་ཐུ་བོ་གཉིས། །རྗེ་ལ་ཐིམ་ཞིང་དེ་ཉིད་ཚུར་བྱོན་ཏེ། །རང་ལུས་དབུས་ཀྱི་དྷཱུ་ཏཱིའི་སྟོད་ཡངས་པའི། །ཡར་སྣ་ཐལ་གྱིས་ཕྱེ་བའི་ནང་ནས་ཞུགས། །སྙིང་གའི་པདྨའི་དབུས་སུ་རང་སེམས་དང། །དབྱེར་མེད་ཚུལ་གྱིས་བརྟན་པར་བཞུགས་པར་གྱུར། །དཔལ་ལྡན་རྩ་བའི་བླ་མ་ཞེས་སོགས་དང། དེང་ནས་ཇི་སྲིད་བྱང་ཆུབ་སྙིང་པོའི་བར། །སྐད་ཅིག་ཙམ་ཡང་འབྲལ་མེད་རྗེས་བཟུང་སྟེ། །ཕྱིན་ཅི་ལོག་གི་བློ་སྣ་ཀུན་བཀག་ནས། །ཡང་དག་ལམ་བཟང་སྐྱེ་བར་བྱིན་གྱིས་རློབས། །འདི་སྣང་
འགག་ཚེ་དགའ་ལྡན་ཞིང་མཆོག་ཏུ། །མ་ཕམ་མགོན་དང་འཇམ་དཔལ་སྙིང་པོ་སོགས། །ཡབ་སྲས་ཀུན་གྱིས་དགྱེས་བཞིན་རྗེས་བཟུང་སྟེ། །ལམ་བཟང་དགའ་སྟོན་མྱོང་བར་བྱིན་གྱིས་རློབས། །མགོན་ཁྱོད་རྨད་བྱུང་བཀོད་པའི་ཞིང་ཁམས་སུ། །སེང་གེའི་ང་རོར་འཚང་རྒྱའི་ཚུལ་བསྟན་ཚེ། །འཁོར་དུ་སྐྱེས་ནས་ཟབ་མོའི་ལྟ་བ་དང། །གསང་ཆེན་ལམ་བཟང་བགྲོད་པར་བྱིན་གྱིས་རློབས། །མདོར་ན་དུས་དང་གནས་སྐབས་གང་དུ་ཡང། །བླ་མ་ཡི་དམ་དཀོན་མཆོག་གསུམ་གྱི་དངོས། །འདྲེན་པ་ཁྱོད་མིན་སྐྱབས་གཞན་མི་འཚོལ་བས། །འདུ་འབྲལ་མེད་པར་བྱིན་གྱིས་བརླབ་ཏུ་གསོལ། །དེ་ལྟར་གསོལ་བ་བཏབ་པས་དགྱེས་བཞིན་དུ། །སྙིང་དབུས་བཞུགས་ཤིང་དེ་ཡི་འདབ་མ་རྣམས། །ཟུམ་པའི་ཕྱི་ནང་སྔགས་ཀྱིས་བསྡམས་པའི་རྩེར། །མི་ཕྱེད་རྡོ་རྗེའི་རྒྱ་ཡིས་མཚན་པར་གྱུར། །དུས་གསུམ་དགེ་ཚོགས་གཅིག་ཏུ་བསྡོམས་པའི་མཐུས། །སྐྱེ་ཞིང་སྐྱེ་བར་འཇམ་མགོན་བླ་མ་དང། །འབྲལ་མེད་བསམ་དང་སྦྱོར་བས་ལེགས་བསྟེན་ནས། །བདེ་ཆེན་མགོན་པོའི་གོ་འཕང་མྱུར་ཐོབ་ཤོག། །ཐུན་མཚམས་རྣམས་སུ་ཡང་སྙིང་གར་རྗེ་བླ་མ་བཞུགས་ཡོད་སྙམ་པའི་མོས་པ་བྱས་ཏེ་ཟས་གོས་གནས་མལ་སོགས་ལ་ལོངས་སྤྱོད་པ་ན་སྙིང་གའི་རྗེ་བླ་མ་ལ་ཕུལ་བའི་དམིགས་པ་བྱས་པས་དཀོར་སྒྲིབ་སྦྱོང་ཞིང་ཚོགས་རླབས་པོ་ཆེ་ཞར་བྱུང་དུ་རྫོགས་པར་འགྱུར་བ་དང། སྒོ་གསུམ་གྱི་སྤྱོད་པ་གང་ལའང་དེ་ཉིད་དཔང་པོའི་ཚུལ་དུ་བཞུགས་པར་བསམས་པས་ཉེས་སྤྱོད་ལས་
ལྡོག་ཅིང་དགེ་ཚོགས་འཕེལ་བ་དང་ལྷ་རྗེས་སུ་དྲན་པའི་རྣལ་འབྱོར་མཆོག་ཏུ་འགྱུར་ལ། ཚེ་རབས་ཐམས་ཅད་དུ་རྗེ་བླ་མ་དང་མི་འབྲལ་ཞིང་གསང་སྔགས་ཟབ་མོའི་སྨིན་བྱེད་དུ་འགྱུར་བའི་གནད་ཁྱད་པར་ཅན་ཡོད་དོ། །ཐུན་རྗེས་མ་རྣམས་ཀྱི་ཚེའང་དགའ་ལྡན་ནས་སྤྱན་འདྲེན་པ་སོགས་སྔར་དང་འདྲ་ལ། དཔལ་ལྡན་རྩ་བའི་བླ་མ་ཞེས་སོགས་ཀྱི་སྐབས་སྙིང་པདྨ་བུམ་སྐུའི་རྣམ་པ་དེ་ཉིད་ཅུང་ཟད་ཁ་ཕྱེ་བའི་མཚམས་ནས་མར༌ཕབས་ཏེ་སྔར་བཞུགས་པའི་རྗེ་བླ་མ་དེ་ཉིད་ལ་བསྟིམ་པའི་དམིགས་པ་བྱས་ལ། སླར་ཡང་སྔགས་འཕྲེང་གིས་བསྡམས་པ་སོགས་གོང་བཞིན་བྱས་པས་བྱིན་རླབས་བརྟན་པ་སོགས་དགོས་པ་ཤིན་ཏུ་ཆེའོ། །སྨྲས་པ། མིང་ཙམ་ལྷག་མར་གྱུར་པ་ཐུབ་པའི་བསྟན། །ཉི་ལྟར་གསལ་མཛད་འཇམ་དཔལ་སྙིང་པོ་ཞེས། །སྙན་པ་འཇིག་རྟེན་གསུམ་ན་གྲགས་པ་ཡི། །མགོན་དེ་མ་ཕམ་རྒྱལ་བའི་དྲུང་ན་བཞུགས། །དེ་ཡིས་ལེགས་གསུངས་བསྟན་པའི་སྙིང་པོ་ལ། །མོས་པའི་བློ་ཅན་ཡབ་རྗེའི་མདུན་ས་རུ། །བསྙེགས་འདོད་དེ་དག་ནོར་བུའི་ཐེམ་སྐས་འདིར། །དད་བརྩོན་ཟུང་འབྲེལ་གོམ་པ་འདོར་བར་རིགས། །ཚུལ་འདིར་འབད་ལས་ཐོབ་པའི་རྣམ་དཀར་མཐུས། །མ་ནོར་བསྟན་པའི་སྙིང་པོ་དར་བ་དང། །ཟོག་གིས་མ་བསླད་བསྟན་འཛིན་གཙང་མ་ཡིས། །བསྟན་པའི་བྱ་བ་གེགས་མེད་མཐར་ཕྱིན་ཤོག། །ཅེས་དགའ་ལྡན་ལྷ་བརྒྱ་མར་གྲགས་པའི་བླ་མའི་རྣལ་འབྱོར་གྱི་གཞུང་བསྲངས་ཏེ་མདོ་སྔགས་ཆ་ཚང་བར་ཉམས་སུ་ལེན་པའི་ཚུལ་དགའ་ལྡན་ཞིང་དུ་བགྲོད་པའི་ནོར་བུའི་ཐེམ་སྐས་ཞེས་བྱ་བ་འདི་ནི་ཕུལ་དུ་བྱུང་བའི་ལྷག་བསམ་རྣམ་དཔྱོད་དང་ལྡན་པ་ཏཱ་བླ་མ་རབ་འབྱམས་པ་ཀུན་དགའ་རྣམ་རྒྱལ་དང། ཆོས་ཚུལ་འབྱེད་པའི་བློ་མིག་མཆོག་ཏུ་ཡངས་པ་ཀུ་ཤྲཱི་
བཀྲ་ཤིས་རབ་བརྟན་གཉིས་ཀྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་བིཀྵུ་རཏྣ་ཨཱ་ནནྟའོ།། །།