སྲད་རྒྱུད་ལུགས་ཀྱི་འཕོ་བའི་གདམས་ངག
སྲད་རྒྱུད་ལུགས་ཀྱི་འཕོ་བའི་གདམས་པའི་ངག་འདོན་ཁྲིགས་ཆགས་སུ་བསྡེབས་པ་བཞུགས་སོ། །
ན་མོ་གུ་རུ་མཻ་ཏྲི་ཡེ། འདིར་སྲད་རྒྱུད་ལུགས་ཀྱི་འཕོ་ཁྲིད་ཟབ་མོ་ཉམས་སུ་ལེན་པར་འདོད་པས། སྟན་བདེ་བ་ལ་ལུས་གནད་བཅས་ཏེ་རླུང་གི་སྐྱོན་བསལ་ཞིང་དགེ་སེམས་ཁྱད་པར་ཅན་གྱི་ངང་ནས་འདི་ལྟར། རང་གི་ཐུགས་ཀ་ནས་འོད་ཟེར་འཕྲོས། ཚོགས་ཞིང་ནམ་མཁའི་ཁམས་གང་བ་སྤྱན་དྲངས། མདུན་གྱི་ནམ་མཁར་བཞུགས་པར་གྱུར། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་རྟག་པར་བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ལན་གསུམ། བདག་གིས་སེམས་ཅན་ཐམས་ཅད་མུ་མཐའ་མེད་པའི་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་འདི་ལས་བསྒྲལ་ཏེ་བླ་ན་མེད་པའི་བྱང་ཆུབ་ཀྱི་སྙིང་པོ་ལ་འགོད་པར་བགྱི། དེའི་ཕྱིར་དུ་ཟབ་ལམ་འཕོ་བའི་གདམས་པ་ཉམས་སུ་བླངས་པར་བགྱིའོ། །མདུན་གྱི་ནམ་མཁར་སེང་ཁྲི་པད་ཟླའི་སྟེང། །བཟང་པོའི་བཞུགས་སྟངས་མཛད་པའི་མ་ཕམ་མགོན། །གསེར་རི་ལྟར་བརྗིད་ཆོས་འཁོར་ཕྱག་རྒྱ་ཅན། །དེ་ཡི་ཐུགས་ཀ་དཔལ་གྱི་བེ་འུའི་ནང། །རྒྱལ་བའི་དབང་པོ་རྗེ་བཙུན་ཙོང་ཁ་པ། །ཆོས་འཆད་ཕྱག་རྒྱས་གླེགས་བམ་རལ་གྲི་བསྣམས། །སྲས་ཀྱི་ཐུ་བོ་གཉིས་དང་བཅས་པ་ཡི། །གནས་གསུམ་ཡི་གེ་གསུམ་གྱིས་མཚན་པ་ལས། །འོད་འཕྲོས་
དགའ་ལྡན་གནས་ནས་བྱམས་མགོན་དང། །རྗེ་བཙུན་བླ་མ་ཡབ་སྲས་རྣམ་པ་གསུམ། །སྤྱན་དྲངས་དམ་ཚིག་པ་དང་དབྱེར་མེད་དུ། །འདྲེས་ཤིང་སྲིད་མཐའི་བར་དུ་བཞུགས་སུ་གསོལ། །ཤེས་བྱའི་ཁྱོན་ཀུན་འཇལ་བའི་བློ་གྲོས་ཐུགས། །སྐལ་བཟང་རྣ་བའི་རྒྱན་གྱུར་ལེགས་བཤད་གསུང། །གྲགས་པའི་དཔལ་གྱིས་ལྷམ་མེར་མཛེས་པའི་སྐུ། །མཐོང་ཐོས་དྲན་པས་དོན་ལྡན་ལ་ཕྱག་འཚལ། །ཡིད་འོང་མཆོད་ཡོན་སྣ་ཚོགས་མེ་ཏོག་དང། །དྲི་ཞིམ་བདུག་སྤོས་སྣང་གསལ་དྲི་ཆབ་སོགས། །དངོས་བཤམས་ཡིད་སྤྲུལ་མཆོད་སྤྲིན་རྒྱ་མཚོ་འདི། །བསོད་ནམས་ཞིང་མཆོག་ཁྱེད་ལ་མཆོད་པ་འབུལ། །གང་ཞིག་ཐོག་མེད་དུས་ནས་བསགས་པ་ཡི། །ལུས་ངག་ཡིད་ཀྱི་མི་དགེ་ཅི་བགྱིས་དང། །ཁྱད་པར་སྡོམ་པ་གསུམ་གྱི་མི་མཐུན་ཕྱོགས། །སྙིང་ནས་འགྱོད་པ་དྲག་པོས་སོ་སོར་བཤགས། །སྙིགས་མའི་དུས་འདིར་མང་ཐོས་སྒྲུབ་ལ་བརྩོན། །ཆོས་བརྒྱད་སྤངས་པས་དལ་འབྱོར་དོན་ཡོད་བྱེད། །མགོན་པོ་ཁྱོད་ཀྱི་རླབས་ཆེན་མཛད་པ་ལ། །བདག་ཅག་བསམ་པ་ཐག་པས་ཡི་རང་ངོ་། །རྗེ་བཙུན་བླ་མ་དམ་པ་ཁྱེད་རྣམས་ཀྱིས། །ཆོས་སྐུའི་མཁའ་ལ་མཁྱེན་བརྩེའི་ཆུ་འཛིན་འཁྲིགས། །ཇི་ལྟར་འཚམས་པའི་གདུལ་བྱའི་འཛིན་མ་ལ། །ལྷུན་འགྲུབ་ཆོས་ཀྱི་ཆར་པ་
དབབ་ཏུ་གསོལ། །བདག་གིས་ཇི་སྙེད་བསགས་པའི་དགེ་བ་འདིས། །བསྟན་དང་འགྲོ་བ་ཀུན་ལ་གང་ཕན་དང། །ཁྱད་པར་རྗེ་བཙུན་བློ་བཟང་གྲགས་པ་ཡི། །བསྟན་པའི་སྙིང་པོ་རིང་དུ་གསལ་བྱེད་ཤོག །རང་ལུས་ཤེལ་གྱི་བུམ་པ་ལྟར་གསལ་བའི། །ཚངས་བུག་ནས་བཟུང་ལྟེ་འོག་སོར་བཞིའི་བར། །དབུ་མ་སྨད་ཕྲ་སྟོད་ཡངས་ཟངས་ཐལ་དབུས། །རང་སེམས་ངོ་བོ་རྗེ་བཙུན་རྣམ་པར་བསམ། །ཀྱེ་མ་གནག་དཀའ་སྲིད་པའི་རྒྱ་མཚོ་ལས། །བརྒལ་ཏེ་དགའ་ལྡན་ཆོས་ཀྱི་ཞིང་ཁམས་དེར། །མ་ཕམ་འཇམ་དཔལ་སྙིང་པོ་སྲས་བཅས་ཀྱི། །འཛུམ་ཞལ་མངོན་དུ་གྱུར་ན་ཅི་མ་རུང། །སྟེང་དགའ་ལྡན་ལྷ་བརྒྱའི་མགོན་པོ་མཆོག །རྗེ་མ་ཕམ་ཆོས་ཀྱི་བླ་མ་དང། །དབྱེར་མེད་པ་འདྲེན་མཆོག་ཐམས་ཅད་མཁྱེན། །ཕ་བློ་བཟང་གྲགས་པ་ཡབ་སྲས་ལ། །ཡིད་རྩེ་གཅིག་གུས་པས་གསོལ་བ་འདེབས། །ལམ་ཟབ་མོ་འཕོ་བའི་རྣལ་འབྱོར་གྱིས། །ཞིང་དགའ་ལྡན་མཁའ་སྤྱོད་གནས་མཆོག་དེར། །དུས་ད་ལྟ་ཉིད་དུ་བགྲོད་པ་དང། །རྗེ་བླ་མ་ཡབ་སྲས་ཞལ་མཐོང་ཞིང། །གསུང་བདུད་རྩིའི་དགའ་སྟོན་མྱོང་བ་ལས། །ལམ་ཟབ་མོའི་རྟོགས་པ་མཐར་ཕྱིན་ནས། །མཆོག་མྱུར་དུ་ཐོབ་པར་བྱིན་གྱིས་རློབས། །ཕ་ཁྱེད་ཀྱི་ཐུགས་རྗེ་ལྕགས་ཀྱུ་ཡིས། །འོད་སྦུ་གུའི་ལམ་ནས་སྐད་ཅིག་ལ། །རྗེ་མ་ཕམ་ཆོས་ཀྱི་མདུན་ས་དེར། །དུས་ད་ལྟ་ཉིད་དུ་དྲང་དུ་གསོལ། །ལམ་འཕོ་བ་འབྱོངས་པར་བྱིན་གྱིས་རློབས། །དེ་ལྟར་གདུང་ཤུགས་དྲག་པོས་གསོལ་བཏབ་མཐུས། །བྱམས་མགོན་ཐུགས་ཀའི་རྗེ་
བཙུན་ཡབ་སྲས་ཀྱི། །ཐུགས་ཀ་ནས་བྱུང་འོད་ཟེར་དཀར་པོ་ཡི། །སྦུ་གུ་སྦ་ལྕག་ཙམ་ཞིག་ནར་གྱིས་བྱུང། །རང་གི་སྤྱི་བོ་ཚངས་པའི་བུ་གར་ཟུག །དེ་ནས་སླར་ཡང་ཐུགས་ཀའི་ས་བོན་ལས། །ལྕགས་ཀྱུ་ལྟ་བུའི་འོད་ཟེར་དཀར་པོ་ཞིག །རྒྱངས་ཏེ་བྱུང་ནས་འོད་ཀྱི་སྦུ་གུ་ཡི། །ལམ་དུ་ཞུགས་ནས་དྷུ་ཏཱིའི་ནང་བརྒྱུད་དེ། །སྙིང་དབུས་རང་སེམས་དབྱེར་མེད་རྗེ་བླ་མའི། །ཐུགས་ཀར་བཏབ་སྟེ་འདྲེན་པར་མངོན་ཕྱོགས་ཚེ། །འོག་རླུང་དྲག་ཏུ་འཐེན་པའི་གཞུ་མོ་ལ། །ཧིཀ་གི་མདའ་སྦྱར་མགྲིན་པའི་བར་དུ་སླེབ། །ཧིཀ །སླར་ཡང་སྟེང་རླུང་མནན་ཏེ་རང་གི་གནས། །སྙིང་གའི་ཐད་ཀྱི་དྷུ་ཏཱིའི་དབུས་སུ་ཕབ། །ཀ། །དེ་བཞིན་དུ་སྤྱི་བོའི་བར་དུ་སྤར་ནས་སླར་རང་གནས་སུ་འབེབས་པ་སོགས་རེས་མོས་ཀྱི་ཚུལ་དུ་ཧིཀ་དང་ཀ་སྦྲེལ་བ་ཉེར་གཅིག་སོགས་ཇི་ལྟར་འདོད་པ་སྦྱངས་ལ། མཐར་ཕཊ་ཅེས་བརྗོད་པས་བྱམས་མགོན་གྱི་ཐུགས་ཀའི་རྗེ་བླ་མའི་ཐུགས་ཀར་བསྟིམ་ནས། དེའི་ཐུགས་དང་དབྱེར་མེད་དུ་འདྲེས་པར་མོས་པའི་ངང་ལ་དར་ཅིག་མཉམ་པར་བཞག །སླར་ཡང་དམིགས་རྟེན་རང་གནས་སུ་ཕབ་པའི་མོས་པ་དང་བཅས། ཀ་ཞེས་བརྗོད། དེ་ནས། མདུན་གྱི་ནམ་མཁའི་དབྱིངས་བཞུགས་འཕོ་ཡུལ་རྣམས། །གསེར་ཞུན་ལྟ་བུའི་འོད་དུ་ལྟེམ་ཞུ་ནས། །ཚངས་པའི་བུ་ག་འཁྱིལ་གྱིས་རབ་བཀག་སྟེ། །རང་གི་སྒོ་གསུམ་བྱིན་གྱིས་བརླབས་པར་གྱུར། །འདིར་འབད་ལས་བྱུང་དགེ་ཚོགས་རྒྱ་མཚོའི་མཐུས། །བདག་དང་མཁའ་མཉམ་འགྲོ་བ་མ་ལུས་པ། །ནམ་ཞིག་ཚེ་འདིའི་སྣང་བ་འགག་མ་ཐག །ཡིད་དགའ་ཆོས་འཛིན་གནས་དེར་
སྐྱེ་བར་ཤོག །དེ་ཚེ་འཇམ་མགོན་བླ་མ་ཡབ་སྲས་ཀྱིས། །དབུགས་དབྱུང་གསུང་གི་བདུད་རྩིའི་བཅུད་མྱང་སྟེ། །རྒྱལ་སྲས་སྤྱོད་པ་རྒྱ་མཚོའི་ཟློས་གར་གྱིས། །མཐའ་ཡས་འགྲོ་བ་སྲིད་ལས་སྒྲོལ་བར་ཤོག །ཁྱད་པར་འཇམ་མགོན་བླ་མ་ཡབ་སྲས་ཀྱིས། །ཚེ་རབས་ཀུན་ཏུ་དགེ་བའི་བཤེས་མཛད་ནས། །རྒྱལ་བས་བསྔགས་པའི་ལམ་བཟང་དེ་ཉིད་ལས། །སྐད་ཅིག་ཙམ་ཡང་ལྡོག་པར་མ་གྱུར་ཅིག །ཅེས་སྲད་རྒྱུད་ལུགས་ཀྱི་འཕོ་བའི་གདམས་པ་ཉམས་སུ་ལེན་ཚུལ་ནག་འགྲོས་སུ་བཀོད་པ་འདི་ནི། དད་བརྩོན་བློ་དང་ལྡན་པ་དགེ་འདུན་རབ་རྒྱས་དང་འཇིགས་མེད་དགེ་འདུན་གཉིས་ཀྱིས་བསྐུལ་ངོར ༸བཙུན་པ་དཀོན་མཆོག་བསྟན་པའི་སྒྲོན་མེས་ཆོས་གྲྭ་ཆེན་པོ་བཀྲ་ཤིས་འཁྱིལ་དུ་བྲིས་པའོ།། །།