ཚེ་དཔག་མེད་དང་འབྲེལ་བའི་བླ་མའི་རྣལ་འབྱོར།
ཚེ་དཔག་མེད་དང་འབྲེལ་བའི་བླ་མའི་རྣལ་འབྱོར་བཞུགས་སོ། །བླ་མ་ཚེ་དཔག་ཏུ་མེད་པ་ལ་ཕྱག་འཚལ་ལོ། །མདུན་གྱི་ནམ་མཁར་མཆོད་སྤྲིན་རྒྱ་མཚོའི་དབུས། །རྨ་བྱས་བཏེག་པའི་ཁྲི་ལ་པད་ཟླའི་སྟེང། །བཀའ་དྲིན་མཉམ་མེད་རྩ་བའི་བླ་མ་དང། །གཉིས་སུ་མེད་པ་བཅོམ་ལྡན་ཚེ་མཐའ་ཡས། །ཉི་འོད་སྟོང་འབར་བྱུ་རུའི་ལྷུན་པོ་བཞིན། །སྐུ་མདོག་དམར་གསལ་མཚན་དཔེའི་དཔལ་གྱིས་བརྗིད། །མཉམ་གཞག་ཕྱག་རྒྱས་བདུད་རྩིའི་བུམ་བཟང་བསྣམས། །ལྷ་ཡི་གོས་དང་རིན་ཆེན་རྒྱན་
གྱིས་མཛེས། །སྐྱིལ་མོ་ཀྲུང་གིས་བཞུགས་པའི་གནས་གསུམ་དུ། །ཡི་གེ་གསུམ་མཚན་ཧཱུཾ་གི་འོད་ཟེར་གྱིས། །བདེ་ལྡན་ཞིང་ནས་མགོན་པོ་ཚེ་དཔག་མེད། །སྤྱན་དྲངས་དམ་ཚིག་པ་དང་དབྱེར་མེད་གྱུར། །བསླུ་མེད་དཀོ༷ན་མཆོ༷ག་གསུམ་གྱི་ངོ་བོ་ཉིད། །ངན་སོང་འཇིགས་སྒྲོལ་ལེགས་པའི་ལམ་བསྟ༷ན་ནས། །ཐར་པར་འཁྲིད་མཛད་འགྲོ་བའི་སྒྲོ༷ན་མེ༷་མཆོག །མགོན་པོ་ཚེ་དཔག་མེད་ལ་ཕྱག་འཚལ་ལོ། །དངོས་བཤམས་ཡིད་སྤྲུལ་ངོ་མཚར་མཆོད་པའི་སྤྲིན། །ནམ་མཁའ་རབ་འབྱམས་ཁམས་ཀྱི་མཐས་གཏུགས་པ། །བློ་ཡིས་བླངས་ཏེ་གུས་པས་འབུལ་ལགས་ན། །བརྩེ་བས་བཞེས་ནས་བྱིན་གྱིས་བརླབ་ཏུ་གསོལ། །སྲིད་ཞིའི་འཇིགས་པ་ཀུན་ལས་སྐྱོབ་པ་དང། །མཆོག་ཐུན་དངོས་གྲུབ་མ་ལུས་འགྲུབ་པའི་ཕྱིར། །རྩེ་གཅིག་གདུང་བའི་ཡིད་ཀྱིས་གསོལ་འདེབས་ན། །ཐུགས་རྗེས་མྱུར་བ་མྱུར་བར་བྱིན་གྱིས་རློབས། །དེ་ལྟར་གསོལ་བ་བཏབ་པས་བུམ་ནང་དང། །ཐུགས་ཀའི་སྔགས་འཕྲེང་འོད་ཀྱིས་རང་གི་ཚེ། །ཉམས་པ་གསོས་ཤིང་བརྟན་གཡོའི་བྱིན་རླབས་བཅུད། །ཚེ་དཔལ་ཀུན་བསྡུས་རང་ལ་ཐིམ་པར་གྱུར། །ཅེས་རྒྱལ་བ་སྲས་བཅས་ཀྱི་བྱིན་རླབས། ལྷ་དང་དྲང་སྲོང་འཁོར་ལོས་བསྒྱུར་བ་སོགས་ཀྱི་ཚེ་དང་བསོད་ནམས་འབྱུང་བ་ལྔའི་བཅུད། རང་གི་ཚེ་སྔར་གོད་པ་རྣམས་དང་བཅས་པ་བསྡུས་ཏེ་སྔགས་འཕྲེང་ལ་ཐིམ་པ་ལས་བདུད་རྩིའི་རྒྱུན་འབེབས་པའམ། དང་པོ་ནས་རང་ལ་བསྟིམ་པས་ལེགས་ཚོགས་ཀྱི་ཡོན་ཏན་ཐམས་ཅད་རྒྱས་ཤིང་། སླན་ཆད་འཚེ་བ་གང་གིས་ཀྱང་མི་ཚུགས་པའི་སྲུང་བ་ཆེན་པོར་
གྱུར་པར་བསམས་ལ་གཟུངས་རིང་ཐུང་རྣམས་བཟླ། མཇུག་ཏུ་ཡིག་བརྒྱས་ལྷག་ཆད་བསྐང་། ཚེ་དཔག་མེད་མགོན་བདུད་རྩིར་ཞུ་བའི་རྒྱུན། །ཚངས་བུག་ནས་ཞུགས་ལུས་ཀུན་གང་བ་ཡིས། །མི་ཤིགས་གཡུང་དྲུང་ཚེ་ཡི་རྟེན་གྱུར་ཅིང། །གསང་གསུམ་བྱིན་རླབས་མ་ལུས་ཐོབ་པར་གྱུར། །ཅེས་བརྗོད་ཅིང་དེ་ལྟར་བསམས་ལ། དུས་མིན་འཆི་བའི་མཚན་མ་མཐོང་བ་ན། །དེ་ཡི་མོད་ལ་ཚེ་དཔག་མེད་མགོན་སྐུ། ། ཞེས་སོགས་དང་། ཚེ་རབས་ཀུན་ཏུ་ཚེ་དཔག་མེད་པ་ཡིས། །ཐེག་མཆོག་བཤེས་གཉེན་དངོས་སུ་མཛད་པའི་མཐུས། །ཞེས་སོགས་སྨོན་པས་མཚམས་སྦྱར་བར་བྱའོ། །ཞེས་པ་འདི་ནི་བསྟན་པའི་གསལ་བྱེད་དམ་པ་ཨ་མོ་སྤྲུལ་པའི་སྐུ་བློ་བཟང་དཀོན་མཆོག་བསྟན་པའི་རྒྱལ་མཚན་གྱིས་བསྐུལ་བ་བཞིན༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའ་འོ། ། ༈ གནས་སྤྱི་གཙུག་བདེ་ཆེན་འཁོར་ལོའི་སྟེང། །སྐྱབས་དཀོ༷ན་མཆོ༷ག་གསུམ་འདུས་ངོ་བོ་ཉིད། །རྗེ་བློ་བཟང་རྒྱལ་བ་གཉིས་པ་ཡི། །ཆོས་ལུང་རྟོགས་བསྟ༷ན་པ༷འི་སྒྲོ༷ན་མེ༷་མཆོག །སྐུ་ཞི་དུལ་ངུར་སྨྲིག་འཆང་བའི་ཚུལ། །ཕྱག་ཆོས་འཆད་མཉམ་གཞག་ཕྱག་རྒྱ་ཅན། །ཡོངས་སྲས་བཅས་རྒྱལ་བའི་འཁོར་ལོར་བཅས། །མི་བདག་གི་མགོན་དུ་རྟག་པར་བཞུགས། །ཆེས་སྙིགས་མ་བདོ་བའི་དུས་མཐའ་འདིར། །ཡོངས་ཐུབ་བསྟན་སྙིང་པོ་དྲི་མ་མེད། །བཤད་སྒྲུབ་པས་ཉི་ལྟར་གསལ་མཛད་པ། །རྗེ་ཐུགས་རྗེའི་གཏེར་ལ་ཕྱག་འཚལ་ལོ། །ལུས་ལོངས་སྤྱོད་དུས་གསུམ་དགེ་ཚོགས་བཅས། །བློས་བླངས་ཏེ་གུས་པས་འབུལ་ལགས་ན། །ཐུགས་བརྩེ་བ་ཆེན་པོས་
ལེགས་བཞེས་ནས། །མཆོག་ཐར་པའི་རྒྱུ་རུ་བྱིན་གྱིས་རློབས། །དུས་ཡ་མཐའ་གཏུགས་པ་མེད་པ་ནས། །སེམས་ཉོན་མོངས་བྲན་དུ་གྱུར་པ་ཡིས། །ལས་སྡིག་པའི་དངོས་པོ་གང་བགྱིས་པ། །ཡིད་འགྱོད་པས་མཐོལ་ལོ་བྱང་བར་མཛོད། །རྒྱུ་མེད་པར་འགྲོ་ལ་མཉེས་གཤིན་པ། །མགོན་རྒྱལ་བ་སྲས་བཅས་ཐམས་ཅད་དང། །རྗེ་བླ་མའི་རྣམ་པར་ཐར་པ་ལ། །སེམས་རྩེ་གཅིག་དད་པས་རྗེས་ཡི་རང། །དུས་རིང་ནས་འགྲོ་བའི་དུག་གསུམ་གྱི། །ནད་གདུང་བ་སེལ་བའི་ཐུགས་བསྐྱེད་བཞིན། །ཆོས་ཟབ་རྒྱས་བདུད་རྩིའི་གཏེར་ཕྱེ་སྟེ། །ལས་ཉོན་མོངས་ཉེས་ཀུན་སྦྱང་དུ་གསོལ། །དགེ་འདིས་མཚོན་དུས་གསུམ་བསགས་པ་ཡི། །ལས་རྣམ་དཀར་ཕུང་པོ་བསྡོམས་པའི་མཐུས། །ཡོངས་ལེགས་ཚོགས་རྩ་བ་དྲིན་ཅན་རྗེ། །བསམ་སྦྱོར་བས་ཚུལ་བཞིན་བསྟེན་པར་ཤོག །དུས་རྟག་ཏུ་དལ་འབྱོར་རྟེན་ཐོབ་ཅིང། །ཚེ་འདི་སྣང་གདོན་གྱིས་མི་བསླུ་བར། །ལས་རྒྱུ་འབྲས་ངང་ཚུལ་ལེགས་བསམས་ནས། །སྐྱབས་མཆོག་གསུམ་གཙུག་གིས་སྟེན་གྱུར་ཅིག །གནས་འཁོར་བ་གཤིན་རྗེའི་བཙོན་ར་ལ། །ཡིད་གཏིང་ནས་ལོག་པའི་ངེས་འབྱུང་གིས། །ལམ་བསླབ་གསུམ་གྲུ་གཟིངས་ལ་ཞུགས་ནས། །མཆོག་ཐར་པའི་གླིང་དུ་བགྲོད་གྱུར་ཅིག །མ་མཁའ་མཉམ་འགྲོ་བ་མཐའ་དག་ལ། །སྙིང་བརྩེ་བའི་གཞན་དབང་གྱུར་པ་ཡིས། །ལམ་བྱང་ཆུབ་མཆོག་ཏུ་སེམས་བསྐྱེད་དེ། །ཡོངས་རྒྱལ་སྲས་སྤྱོད་ལ་སློབ་གྱུར་ཅིག །རྒྱུའི་ཐེག་པའི་ལམ་གྱིས་རྒྱུད་
སྦྱངས་ཏེ། །ཆོས་ཟབ་གསང་མྱུར་བ་གསང་སྔགས་ཀྱི། །སྒོར་ཞུགས་ནས་དམ་ཚིག་ལེགས་བསྲུང་ཞིང། །ལམ་རིམ་གཉིས་སྤྱོད་ལ་སློབ་གྱུར་ཅིག །ད་མདོར་ན་བློ་དམན་བྱིས་པ་བདག །སྔར་དལ་འབྱོར་ཚང་བའི་རྟེན་ཐོབ་ཀྱང། །དུས་དེ་རིང་ཡན་ཆད་སྟོང་པར་ཟད། །དེང་ཚེ་ལྷག་ཆོས་ཀྱིས་འདའ་བར་ཤོག །མགོན་རྒྱལ་ཀུན་ཐུགས་ཀྱི་བཅུད་བསྡུས་པ། །རྗེ་བློ་བཟང་བསྟན་པའི་སྒོར་ཞུགས་ཀྱང། །སྔོན་ཇི་བཞིན་བསྒྲུབ་པར་མ་ནུས་པས། །ད་ཚུལ་བཞིན་ཉམས་སུ་ལེན་པར་ཤོག །ལམ་འཁྲུལ་བྲལ་ཚང་ལ་མ་ནོར་བ། །རྗེ་བློ་བཟང་རྒྱལ་བའི་བཀའ་རྒྱུད་ཀྱི། །ལམ་བཟང་པོ་ཕྱོགས་བརྒྱར་སྤེལ་བ་ཡིས། །མ་འགྲོ་ཀུན་སྲིད་ལས་སྒྲོལ་གྱུར་ཅིག །ཅེས་པ་འདི་ནི་གཞུང་བརྒྱ་སྨྲ་བའི་དབང་ཕྱུག་གྲྭ་ཚང་འོག་གི་སློབ་ཟུར་ལྷ་རམས་པ་འཕྲིན་ལས་དཔལ་བཟང་། མཁས་བཙུན་བཟང་པོའི་བདག་ཉིད་གྲྭ་ཚང་བླ་མ་ཞབས་དྲུང་འཇམ་དབྱངས་རྒྱ་མཚོ། ལྷག་བསམ་རྣམ་དཔྱོད་ཡངས་པ་གཞུང་ལས་པ་འཇམ་དབྱངས་བཟང་པོ་རྣམས་ཀྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་གསེར་དགོན་དགའ་ལྡན་དམ་ཆོས་གླིང་དུ་སྦྱར་བའི་ཡི་གེ་པ་ནི་སྔགས་རམས་པ་རཏྣ་ཨཱ་ནནྟའོ།། །།