ཀུན་མཁྱེན་བླ་མའི་འཁྲུངས་རབས་དང་འབྲེལ་བའི་བླ་མའི་རྣལ་འབྱོར།
ཀུན་མཁྱེན་བླ་མའི་འཁྲུངས་རབས་དང་འབྲེལ་བའི་བླ་མའི་རྣལ་འབྱོར་བཞུགས་སོ། །རྣམ་ཀུན་མཆོག་ལྡན་དབྱིངས་དང་དབྱེར་མེད་པའི། །ཡེ་ཤེས་སྒྱུ་འཕྲུལ་དྲ་བར་བཞེངས་པ་ལས། །གདུལ་བྱའི་མོས་པར་འཚམ་པའི་འཕྲིན་ལས་ཀྱི། །འཇུག་པ་དུས་ལས་མི་ཡོལ་ཐུགས་རྗེའི་བདག །གང་གི་བདེན་སྟོབས་གཟུངས་རིག་མོས་པའི་མཐུས། །མདུན་གྱི་མཁའ་ལ་དཔག་བསམ་ལྗོན་པའི་རྩེར། །པད་ཟླ་ཉི་མའི་གདན་བཅས་སེང་གེའི་ཁྲི། །ཡིད་འཕྲོག་ཚར་དུ་དངར་བའི་དབུས་མ་ལ། །སྐྱབས་གསུམ་ཀུན་འདུས་འཇིགས་མེད་དབང་པོའི་སྡེ། །ཆོས་འཆད་མཉམ་གཞག་ཕྱག་རྒྱས་གླེགས་བམ་བསྣམས། །གཡས་སུ་རྒྱལ་སྲས་དྲི་མེད་གྲགས་པའི་ཞབས། །དཔལ་ལྡན་སངས་རྒྱས་བསྐྱངས་དང་ཕྱོགས་ཀྱི་གླང། །ཟླ་བའི་ཞབས་དང་གྲུབ་ཆེན་ཛེ་ཏཱ་རི། །གཡོན་དུ་བདག་ཉིད་ཆེན་པོ་རིན་ཆེན་གསལ། །རྗེ་བཙུན་དབུ་མ་པ་དང་ཞྭ་ལུ་པ། །རྒྱུད་ཆེན་རྣམ་གཉིས་འཇམ་དབྱངས་བཞད་པའི་སྡེ། །གཞན་ཡང་མཁའ་ཁྱབ་གདུལ་བྱའི་མོས་པ་བཞིན། །གང་འདུལ་སྤྲུལ་པའི་ཟློས་གར་མཐའ་ཡས་དང། །སྐྱབས་ཡུལ་ཞི་ཁྲོ་རབ་འབྱམས་མ་ལུས་པ། །བདག་སོགས་འགྲོ་བའི་མགོན་དུ་བརྟན་པར་བཞུགས། །ཇི་ལྟར་དྭངས་པའི་མཚོ་ལ་ཟླ་གཟུགས་བཞིན། །གང་ལ་གང་འདུལ་གཟུགས་སྐུའི་རྣམ་རོལ་གྱིས། །མ་ལུས་འགྲོ་བ་སྲིད་ལས་སྒྲོལ་བའི་གཉེན། །སྐྱབས་མགོན་ཐུགས་རྗེའི་གཏེར་ལ་གུས་ཕྱག་འཚལ། །ཀུན་བཟང་མཆོད་པའི་སྤྲིན་གྱི་ཕུང་པོ་ནི། །བདེན་ཚིག་མོས་པའི་ཡིད་མཁར་གཡོ་བ་ཡང། །ལྷན་སྐྱེས་བདེ་བའི་ངང་དུ་རོལ་བ་ཡིས། །བདག་གི་
བསོད་ནམས་ཚོགས་ཆེན་རྫོགས་པར་མཛོད། །ལེགས་བྱས་མཐའ་དག་རང་ལུས་བཅས་འབུལ་ན། །སྔོན་བསགས་དགེ་ཚོགས་ཆུད་མི་ཟ་བ་དང། །སྒོ་གསུམ་སྤྱོད་པ་བླ་མའི་དབང་གྱུར་ཏེ། །རྟག་ཏུ་དོན་དང་ལྡན་པར་བྱིན་གྱིས་རློབས། །མནོག་ཆུང་སྲིད་འབྱོར་སྦྲང་རྩི་ལ་ཆགས་ཏེ། །མི་བཟད་སྡིག་ལྟུང་མཚོན་རྣོན་བལྡག་པ་ཡི། །རྣམ་སྨིན་སྡུག་བསྔལ་བཟོད་དཀའི་ཡིད་ཀྱི་རྨ། །གསོ་བར་མཛོད་ཅིག་ཐུགས་རྗེའི་སྨན་གྱི་བླ། །ཁྱོད་ཞབས་པདྨོ་གུས་པས་བསྟེན་བྱས་ཏེ། །ཟབ་ཅིང་རྒྱ་ཆེན་གདམས་པའི་ཨ་མྲྀ་ཏ། །འདོད་དགུར་སྤྱད་པས་དུག་གསུམ་ས་བོན་བཅས། །དྲུངས་ནས་འབྱིན་པའི་དགའ་སྟོན་མྱོང་བར་ཤོག །གང་གང་སྐྱེ་བའི་ཕྲེང་བ་དེ་དང་དེར། །སྲིད་དང་ཞི་བའི་མཐའ་ལ་ཞེན་པའི་བློ། །བྱིན་རླབས་ཐུགས་རྗེའི་ཕྱག་གིས་ཡོངས་བཟུང་སྟེ། །མི་གནས་ཞི་བའི་ལམ་དེར་དྲང་དུ་གསོལ། །དུས་གསུམ་རྒྱལ་ཀུན་ཐུགས་ཀྱི་གསང་བའི་མཛོད། །ཟབ་ལམ་ལྟ་བས་རྒྱས་བཏབ་རྡོ་རྗེའི་ཐེག །དབང་བཞིའི་སྒོ་འཕར་ཕྱེ་བའི་གྲོང་མཆོག་ཏུ། །རིམ་གཉིས་འབྱོར་པའི་དཔལ་ལ་སྤྱོད་པར་ཤོག །མི་འགྱུར་ལྷན་སྐྱེས་བདེ་བས་རབ་མྱོས་ཤིང། །མཚན་དཔེའི་དཔལ་འབར་མཛེས་སྡུག་ལང་ཚོས་སྒེག །དམིགས་མེད་སྙིང་རྗེའི་འཛུམ་དཀར་སྤྲོ་བ་ཡི། །ཟུང་འཇུག་དང་པོའི་མགོན་པོར་བདག་གྲུབ་མཛོད། །མདོར་ན་སྐྱབས་གནས་མ་ལུས་འདུས་པའི་དངོས། །འདྲེན་པ་ཁྱོད་མིན་སྐྱབས་གཞན་མི་འཚོལ་བས། །འདི་ཕྱིའི་བར་དོའི་འཇིགས་ལས་སྒྲོལ་བ་དང། །རང་གཞན་དོན་གཉིས་འགྲུབ་པར་བྱིན་གྱིས་
རློབས། །དེ་ལྟར་གསོལ་བ་བཏབ་པས་སྐྱབས་ཡུལ་ཀུན། །རིམ་གྱིས་བསྡུས་ཏེ་རྩ་བའི་བླ་མར་ཐིམ། །དེ་ཉིད་དགྱེས་བཞིན་རང་གི་ཚངས་བུག་ནས། །ཞུགས་ཏེ་གཉུག་མའི་སེམས་དང་དབྱེར་མེད་གྱུར། །དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྙིང་གར་པདྨའི་གདན་བཞུགས་ལ། །བཀའ་དྲིན་ཆེན་པོའི་སྒོ་ནས་རྗེས་གཟུང་སྟེ། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །གངས་ཅན་མཁས་གྲུབ་དུ་མས་རྗེས་གཟུང་ཞིང། །ཟབ་རྒྱས་གདམས་པ་བྱེ་བའི་བང་མཛོད་འཛིན། །སྐལ་ལྡན་སྨིན་ཅིང་གྲོལ་མཛད་ཆོས་ཀྱི་རྗེ། །འཇིགས་མེད་དབང་པོའི་ཞབས་ལ་གསོལ་བ་འདེབས། ། ཞེས་ཅི་འགྲུབ་བཟླས་ལ། མཇུག་ཏུ། དཔལ་ལྡན་བླ་མའི་རྣམ་པར་ཐར་པ་ལ། ། ཞེས་སོགས་དང་། སྐྱེ་བ་ཀུན་ཏུ་ཡང་དག་བླ་མ་ཞེས་སོགས་བསྔོ་སྨོན་གྱིས་མཚམས་སྦྱར་བྱའོ། །ཞེས་ཀུན་མཁྱེན་བླ་མ་མཆོག་གི་འཁྲུངས་རབས་དང་འབྲེལ་བའི་བླ་མའི་རྣལ་འབྱོར་འདི་ནི། དད་བརྩོན་དང་ལྡན་པ་དཀོན་མཆོག་ཡར་འཕེལ་གྱིས་འདི་ལྟ་བུ་ཞིག་དགོས་ཞེས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །