ཟབ་ལམ་བླ་མའི་རྣལ་འབྱོར།
ཟབ་ལམ་བླ་མའི་རྣལ་འབྱོར་བཞུགས་སོ། །འོད་གསལ་སྤྲོས་དང་བྲལ་བ་ནམ་མཁའི་དབྱིངས། །བདེ་ཆེན་ཐུགས་རྗེའི་ཆུ་འཛིན་རྣམ་རོལ་ལས། །གང་འདུལ་གཟུགས་སྐུར་སྣང་བའི་བླ་མ་ལྷ། །རབ་འབྱམས་རྒྱལ་བའི་ཚོགས་བཅས་འདིར་གཤེགས་ཤིག །གདོང་ལྔས་ཉེར་བཏེགས་འོད་འབར་ནོར་བུའི་ཁྲིར། །ཞི་དུལ་ཆོས་འཆད་མཉམ་གཞག་ཕྱག་རྒྱ་ཅན། །བཀའ་དྲིན་མཉམ་མེད་རྩ་བའི་བླ་མ་སོགས། །ཞིང་གི་མཆོག་རྣམས་བརྟན་པར་བཞུགས་སུ་གསོལ། །དམུ་རྒོད་གདུལ་དཀའ་སྙིགས་མའི་འགྲོ་བ་ལ། །སྐལ་བར་འཚམ་པའི་
ལེགས་བཤད་མཆོག་སྦྱིན་གྱིས། །མཐོ་རིས་ཐར་པའི་བདེ་ལ་སྦྱོར་མཛད་པ། །བཀའ་དྲིན་མཚུངས་མེད་ཞབས་ལ་ཕྱག་འཚལ་ལོ། །ས་གཞི་བར་སྣང་ནམ་མཁའི་ཁྱོན་གང་བའི། །དངོས་བཤམས་ཡིད་སྤྲུལ་མཆོད་པའི་སྤྲིན་ཕུང་སོགས། །རབ་འབྱམས་ཕྱི་ནང་གསང་བའི་མཆོད་ཚོགས་ཀུན། །བདེ་སྟོང་དབྱེར་མེད་ངང་དུ་དབུལ་བར་བགྱི། །ཐོག་མ་མེད་ནས་རྨོངས་པའི་བྲན་གྱུར་མཐུས། །རང་བདེ་འཇོམས་ཤིང་སྡུག་བསྔལ་ཀུན་འདྲེན་པའི། །ཕུང་ཁྲོལ་སྤྱོད་པ་ཇི་སྙེད་བགྱིས་པ་ཀུན། །གནོང་ཞིང་འགྱོད་པ་དྲག་པོས་མཐོལ་ལོ་བཤགས། །འདས་དང་མ་བྱོན་ད་ལྟར་བཞུགས་པ་ཡི། །རབ་འབྱམས་རྒྱལ་བ་སྲས་བཅས་སློབ་མར་བཅས། །ཀུན་གྱི་རྣམ་དཀར་མཛད་པ་མཐའ་དག་ལ། །མཆོག་ཏུ་གུས་པའི་ཡིད་ཀྱིས་རྗེས་ཡི་རང། །ཐར་པའི་ས་མཁན་སྟོན་པ་འཁོར་དང་བཅས། །རྨོངས་པའི་སྐྱེ་བོ་ལྡོངས་པར་མི་མཛད་པར། །ཟབ་རྒྱས་ཆོས་ཀྱི་སྒྲོན་མེ་ལེགས་སྦར་ནས། །བདེ་ཆེན་ཐར་པའི་གྲོང་དེར་འཁྲིད་དུ་གསོལ། །འདིས་མཚོན་དུས་གསུམ་དགེ་བ་ཅི་མཆིས་པ། །མཐའ་དག་རྒྱལ་བའི་ཆོས་ཀྱི་མཛོད་འཛིན་ཅིང། །མཁའ་མཉམ་འགྲོ་བ་སྲིད་ལས་སྒྲོལ་བ་ཡི། །དེད་དཔོན་མཆོག་ཏུ་འགྱུར་བའི་རྒྱུ་རུ་བསྔོ། །ཞེས་ཡན་ལག་བདུན་པ་བྱས་ལ། ས་གཞི་སྤོས་བྱུགས་མ་སོགས་ཀྱིས་མཎྜལ་ཕུལ། བསླུ་མེད་དཀོ༷ན་མཆོ༷ག་ཐུགས་རྗེ་མེ་ཤེལ་ཁམས། །མདོ་སྔགས་བསྟ༷ན་པ༷འི་འདབ་བརྒྱ་བཞད་པའི་གཉེན། །འགྲོ་བའི་མ་རིག་མུན་སེལ་སྒྲོ༷ན་མེ༷་མཆོག །རྗེ་བཙུན་
བླ་མའི་ཞབས་ལ་གསོལ་བ་འདེབས། །ཞེས་པ་ལྟ་བུ་རང་གི་བླ་མའི་གསོལ་འདེབས་ཀྱི་ཚིགས་བཅད་བཟླས་ལ་མཇུག་ཏུ། དཔལ་ལྡན་རྩ་བའི་བླ་མ་རིན་པོ་ཆེ། །ཞེས་སོགས་ཀྱིས་རང་གི་སྙིང་གར་སྤྱན་དྲངས་ཏེ། སྐྱེ་ཞིང་སྐྱེ་བར་རྗེ་བཙུན་བླ་མ་ཡིས། །འབྲལ་བ་མེད་པར་དགྱེས་བཞིན་རྗེས་འཛིན་ཅིང། །གསུང་གི་བདུད་རྩི་ངོམས་མེད་མྱོང་བ་ཡིས། །སྐལ་བཟང་མཆོག་ལ་འདོད་དགུར་སྤྱོད་གྱུར་ཅིག །དེ་ཡི་མཐུ་ལས་རྒྱུ་འབྲས་ཐེག་པ་ཡི། །ལམ་བཟང་སྐས་ཀྱི་གདང་བུ་རིམ་བགྲོད་དེ། །ཁྱབ་བདག་འཁོར་ལོའི་མགོན་པོ་བླ་མ་ལྷའི། །གོ་འཕང་བདེ་བླག་ཉིད་དུ་ཐོབ་གྱུར་ཅིག ། ཅེས་ཚེ་རབས་རྗེས་འཛིན་གྱི་སྨོན་པས་མཚམས་སྦྱོར་བ་སོགས་བྱའོ། །ཞེས་པ་འདི་ཡང་ཨ་ལག་ཤཱ་ཧོ་ཤོའུ་ནས་དད་བརྩོན་ལྡན་པ་ངག་དབང་དཀོན་མཆོག་གིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའོ། །