༈ ས་སྟག་ཟླ་༤ ཚེས་༧ ལ་ཐུན་གསེང་དུ།
རྣམ་རྟོག་རླུང་གིས་མགོ་བོ་འཁོར། །སྙིགས་དུས་ཀྱི་སྤྱོད་པར་ཞེན་ཁ་ལོག །ཁ་འཁྱལ་སྐྱུག་པ་འཆོར་ཉེ་བས། །རང་རང་གི་ན་བཟའ་ཕར་ལ་འཐེན། །ཤེས་རབ་ཀྱི་རལ་གྲི་སོ་གཉིས་མ། །ཤེས་བྱའི་གནས་ལ་གདེངས་ཆེས་པས། །རང་མགོ་སྨས་པ་ཨ་ཙ་མ། །རྣོ་ཕྱོགས་གཅིག་ཡིན་ན་ཆོག་པ་ལ། །འབད་རྩོལ་གྱི་རྟ་རྒོད་ཁ་ཡན་པོ། །བྱ་བའི་ཐང་ལ་རྒྱུག་ཆེས་ན། །གཡང་དུ་ལྟུང་བ་ཨ་ཙ་མ། །སྲབ་མཐུར་ཞིག་ཡོད་ན་ཆོག་པ་ལ། །རྒྱུ་ནོར་གྱི་གོ་རེ་ཅུང་རྡོག་དེ། །བརྣབ་སེམས་སྐྱུར་རྩིས་གསོབ་ཆེས་ན། །ཚལ་བར་འགས་པ་ཨ་ཙ་མ། །ཟ་བདེ་ཞིག་བྱུང་ན་ཆོག་པ་ལ། །སྨྲ་མཁས་ཀྱི་དཀར་ནག་ལྕེ་གཉིས་པོ། །གང་འགྲིག་ལ་གློག་བཞིན་འཁྱུག་ཆེས་ན། །རྩེ་མོ་འཆག་པ་ཨ་ཙ་མ། །ལྕེ་གཅིག་རང་ཡིན་ན་ཆོག་པ་ལ། །མཛའ་གཙུག་གི་གྲོགས་མཆེད་འཕང་འགོ་ཟུང༌། །ཚོད་མེད་ཀྱི་མཐུན་ཚབས་ཆེ་དྲགས་ན། །མཉམ་དུ་རུལ་བ་ཨ་ཙ་མ། །འགྲོགས་ལུགས་ཤིག་བྱས་པས་ཆོག་པ་ལ། །མིང་གོ་ས་སྐམ་པོའི་ཤིང་སྡོང་ལ། །ཇེ་མཐོོ་ཇེ་མཐོར་འཛེག་ཆེས་ན། །ཕྲས་ནས་ཆག་པ་ཨ་ཙ་མ། །རྐེད་པ་རུ་བསྡད་ན་ཆོག་པ་ལ། །གྲགས་སྐམ་གྱི་བོན་པོའི་རྔ་ཁོག་དེ། །ཚོད་མེད་དུ་ཤེད་ཀྱིས་བརྡུང་ཉེས་ན། །གཞུང་རལ་དུ་འགྲོ་བ་ཨ་ཙ་མ། །སྒྲ་ལྷོད་པོར་བྱས་ན་ཆོག་པ་ལ། །མཚན་སྙན་པོའི་རམ་གྱིས་བསྐྱབས་
པའི་ཝ། །ཁྱད་འཕགས་ཀྱི་ཆེ་བ་འདོན་ཉེས་ན། །ཐན་སྐད་ཀྱིས་བརྒྱལ་བ་ཨ་ཙ་མ། །འཛུམ་དམོལ་ལེ་བཞུགས་ན་ཆོག་པ་ལ། །ཆོས་སྲིད་ཀྱི་འབྱོར་པའི་ཉི་ཟླ་གཉིས། །གནམ་གང་ལ་ལྷན་ཅིག་འཛོམ་ཆེས་ན། །མུན་ནག་ཏུ་འགྲོ་བ་ཨ་ཙ་མ། །ངན་པ་ཞིག་བྱུང་བས་ཆོག་པ་ལ། །བྱ་བཞག་གི་མདུན་གྲོས་གཙུབ་ཤིང་ཟུང༌། །ས་མཚམས་མེད་པར་བརྡར་ཆེས་ན། །གཉིས་ཀ་འཚིག་པ་ཨ་ཙ་མ། །དྲོས་ཐོག་ནས་བཞག་ན་ཆོག་པ་ལ། །བསོད་ཆུང་གི་མི་ངན་དྲེའུ་མོ། །ཁ་དྲག་དབང་ཆེའི་མངལ་སྦྲུམ་ན། །རང་གཤེད་དུ་འགྲོ་བ་ཨ་ཙ་མ། །ཤ་ཡང་དུ་བསྡད་ན་ཆོག་པ་ལ། །བསྟན་འགྲོའི་དོན་གྱི་འོ་མ་ཞིག །བསྲུབ་པའི་སྙིང་པོ་བཙལ་ཆེས་ན། །བཤད་དྲི་ཁ་བ་ཨ་ཙ་མ། །དཀར་ཡིན་ཐོག་ཏུ་བཞག་ན་ཆོག་པ་ལ། །འོ་དོད་འབོད་པའི་གླང་བུ་དེ། །སྐྱོན་གྱི་ས་རློག་འཕེན་ཆེས་པ། །རང་ཐོག་ཏུ་བབ་པ་ཨ་ཙ་མ། །ཁ་རོག་བསྡད་ན་ཆོག་པ་ལ། །གཏམ་འདི་ཀུན་ལ་འཕོག་གྱུར་ཅིག །ཕོག་ནས་གོ་བློ་སྐྱེ་གྱུར་ཅིག །ཕྱི་མ་ཅུང་ཟད་བསམ་གྱུར་ཅིག །བླང་དོར་ལག་ཏུ་ལེན་གྱུར་ཅིག །ཅེས་པ་ལྗགས་རྩོམ་མཛད།