མི་རྟག་པ་སྒོམ་ཚུལ་གྱི་བསླབ་བྱ།
མི་རྟག་པ་སྒོམ་ཚུལ་གྱི་བསླབ་བྱ་ཚིགས་སུ་བཅད་པ་བཞུགས་སོ། །
དཔལ་བདེ་བ་ཆེན་པོའི་མཁའ་དབྱིངས་ངོས། །སྐུ་གང་འདུལ་བཀོད་པའི་སྤྲིན་དཀྲིགས་ཏེ། །ཆོས་ཟབ་ཅིང་རྒྱ་ཆེའི་ཆར་འབེབས་པ། །རྗེ་བླ་མ་རྣམས་ལ་ཕྱག་འཚལ་ལོ། །དུས་ལན་གཅིག་རྙེད་པའི་དལ་འབྱོར་འདི། །དོན་མ་གྲུབ་ལག་ནས་འཆོར་ཉེར་གདའ། །ད་ཐར་བའི་ལམ་སྣ་བསྙེགས་རེ་རན། །དོན་དེ་ཕྱིར་སྐུལ་མའི་ལྕག་འདི་ཟུངས། །ལོ་ཟླ་བ་འདི་ལ་འདི་སྣང་གི །ལས་བྱ་བྱེད་ཚགས་སུ་ཚུད་བྱས་ནས། །སླར་གཙང་མའི་ཆོས་ཤིག་བྱེད་སྙམ་པ། །འདི་ཐམས་ཅད་བསླུ་བའི་ཕུང་འདྲེ་ཡིན། །ཚེ་འདི་སྣང་བྱ་བ་ཆུ་གཉེར་འདྲ། །གཅིག་འདས་རྗེས་གཅིག་གིས་མནན་ནས་འོངས། །དེ་བསྒྲུབ་ཀྱིན་བསྒྲུབ་ཀྱིན་མང་དུ་འགྲོ། །ད་བཙན་ཐབས་སུ་བཅད་ན་མི་ལེགས་སམ། །ཆོས་བྱེད་ཀྱི་སང་ཉིན་འཆར་གྱི་བར། །འཆི་དུས་ཀྱི་དེ་རིང་སླེབས་ཉེན་ཆེ། །ད་རང་མགོ་རང་གིས་མ་བསྐོར་བར། །ཆོས་བྱེད་ན་དེ་རིང་ཉིད་ནས་གྱིས། །སྔོན་བྱོན་གྱི་རྒྱལ་བ་སྲས་དང་བཅས། །མཛད་འཕྲིན་གྱིས་ས་གསུམ་ཁྱབ་ན་ཡང༌། །སྐུ་མི་བཞུགས་མཚན་ཙམ་ལྷག་མར་ལུས། །དེ་ཀུན་ཀྱང་མི་རྟག་སློབ་དཔོན་ཡིན། །སྟོབས་འབྱོར་གྱིས་དྲེགས་པའི་རྒྱལ་བློན་ཚོགས། །ལོ་རྒྱུས་ཀྱི་ཕྲེང་བ་ངོམས་ཆེ་ཡང༌། །མ་བརྟག་ན་ཡོད་ཡོད་འདྲ་བ་ལ། །ཁམས་གསུམ་དུ་འཐོར་ཏེ་ཤུལ་ན་མེད། །རང་ཉིད་དང་སྔར་ནས་འདྲིས་པའི་གྲོགས། །ཚེ་སྲོག་
དང་སྟོབས་མཚུངས་ཕལ་ཆེར་ཡང༌། །གློ་བུར་དུ་འཆི་བདག་དགྲས་ཁྱེར་ན། །ད་རང་ལ་མི་འཇིགས་གདེང་ཅི་ཡོད། །ཆེས་ཤིན་ཏུ་གླེན་པ་ལུག་གིས་ཀྱང༌། །རང་རིགས་རྣམས་བཤན་པས་གསོད་མཐོང་ཚེ། །སྙིང་འདར་ན་གཞན་དཔེ་རང་སྟེང་དུ། །སྦྱོར་མི་ཤེས་པ་དེ་ཕྱུགས་ལས་བླུན། །ངེས་མེད་དུ་འཆི་བ་གཟུགས་གྲུབ་འདི། །དངོས་སྟོབས་དང་ལུང་ལ་མ་ལྟོས་པར། །མངོན་སུམ་དུ་མཐོང་ཡང་མི་ཤེས་པ། །དེའི་མིང་ལ་ཅེ་རེ་ལོང་ཞེས་གསུངས། །གཉེན་ཉེ་དུ་གཡོག་འཁོར་འདུས་པ་ཡང༌། །རླུང་ཆེན་པོས་ཤིང་ལོ་སྤུངས་པ་འདྲ། །དར་ཅིག་ནས་རི་ཀླུང་ཀུན་ཏུ་འཐོར། །སླར་མི་འཛོམ་འདུས་པའི་ཐ་མ་ཡིན། །ཕྱོགས་ངེས་མེད་འདུས་པའི་ཁྲོམ་ཚོགས་ཀྱང༌། །སྟོན་ནམ་མཇུག་འཆད་ཁའི་སྦྲང་བུ་འདྲ། །འདུས་ཙམ་ནས་གྱེས་ཤིང་ཡལ་ཏེ་འགྲོ། །བསམ་ཤེས་ན་མི་རྟག་སློབ་དཔོན་ཡིན། །ཕྱི་འབྱུང་བའི་སྣོད་ལ་མཚོན་ན་ཡང༌། །དབྱར་དགུན་གྱི་མིང་བཏགས་བསླུ་བྲིད་ཀྱིས། །ཞག་བཅུ་གྲངས་ཙམ་ནས་རི་ཀླུང་ཀུན། །མདོག་འགྱུར་ཞིང་འགྲོ་དེ་མི་རྟག་པ། །ཆུ་སྔོན་མོ་རླབས་ཀྱི་གར་མཁན་མ། །སྒྲ་ལྷུང་ལྷུང་སྒྲོག་པ་དེ་ཡང་ནི། །དགུན་འཁྱག་རོམ་སྦུབས་སུ་ཚུད་པ་ན། །སྒྲ་ཤུབ་བུས་སྨྲེ་སྔགས་འདོན་པ་བཞིན། །ཚལ་ཡངས་པོ་སྐྱེ་དགུ་དགའ་བ་ན། །རྐང་དྲུག་གི་ཕྲེང་ལྡན་འདབ་བརྒྱའི་ཚོགས། །སྟོན་བ་
མོས་བཅོམ་པའི་མྱ་ངམ་ཐང༌། །སྐྱི་སེར་གྱིས་གདུང་བས་ཤུགས་གླུ་ལེན། །ཉིན་མཚན་གྱི་བྱི་བ་དཀར་ནག་གཉིས། །ཚེ་འཆིང་ཐག་གི་རྩྭ་ཕུང་རེས་ཀྱིས་ཟ། །དེར་མ་ཟད་སྐད་ཅིག་རེ་རེས་ཀྱང༌། །དགྲ་འཆི་བདག་གི་དྲུང་དུ་བསྙེགས་ནས་འགྲོ། །སྐྲ་དཀར་ཞིང་གཞུ་ལྟར་གུག་པ་ཡིས། །རྒས་འཁོགས་ཀྱི་ཕ་མས་འདར་བཞིན་དུ། །བུ་ལང་ཚོ་ཅན་གྱི་དུར་འདེབས་ན། །རྒན་གཞོན་གྱི་རིམ་པ་སུ་ཡིས་བརྩི། །ནོར་ལོངས་སྤྱོད་སྙེ་མའི་གང་བུ་ཡང༌། །རྐྱེན་ངན་གྱི་སེར་བས་བརྡུང་བ་ན། །སྔར་རང་གིས་གསོས་པའི་གཡོག་གི་སྒོར། །སྤྲང་ཞུ་བས་ཨང་ལན་ཁུག་པར་དཀའ། །དུས་དེ་རིང་ཡིད་གཅུགས་གྲོགས་པོ་ཡང༌། །ཚིག་ལེགས་ཉེས་གཅིག་ལ་རྣམ་རྟོག་གིས། །སྒྲོ་བཏགས་ནས་སང་ཉིན་དྭངས་མའི་དགྲ། །ཉེ་རིང་གི་འཛིན་པ་དེ་ནས་ཆོད། །བྱུར་དཔལ་དུ་རློམ་པའི་སྲིད་འབྱོར་ཀུན། །ཕྱེ་ལེབ་ལ་མར་མེ་ཁང་བཟང་བཞིན། །མཛེས་མཛེས་ལྟར་སྣང་བའི་བསླུ་བྲིད་ཀྱིས། །གཏན་བདེ་བའི་སྲོག་རྩ་གཅོད་བྱེད་ཡིན། །དོན་དྲིལ་ན་མྱུར་དུ་འོང་ངེས་ཤིང༌། །དུས་ནམ་ཞིག་འོང་བ་ཆ་མེད་ལ། །ནམ་སླེབས་ཚེ་ཟློག་ཏུ་མེད་པ་ཡིན། །དགྲ་འཆི་བདག་བདུད་ཀྱི་ཁར་ཆུད་ཚེ། །དུས་ཡུན་རིང་འགྲོགས་པའི་ལུས་འདི་ཡང༌། །མལ་དྲོན་མོར་བཞག་ནས་འགྲོ་དགོས་ན། །ནོར་ལོངས་སྤྱོད་གཉེན་དང་འཁོར་གཡོག་ལ། །ཕྱི་མིག་ཀྱང་བལྟ་བའི་གོ་སྐབས་མེད། །ཚེ་ཧྲིལ་པོར་ངལ་མེད་བསྒྲུབ་བསྒྲུབ་པའི། །དགྲ་འདུལ་དང་གཉེན་སྐྱོང་བྱ་བ་ཀུན། །འཕྲོ་བཤལ་ལེ་བཞག་སྟེ་དགེ་སྡིག་གི །ཁུར་བཀུར་ནས་འཇིག་རྟེན་ཕ་རོལ་འགྲོ། །ལམ་རྒྱུས་མེད་བགྲོད་དཀའ་བར་དོའི་འཕྲང༌། །
དགྲ་གཤིན་རྗེའི་དམག་གིས་བཀག་པའི་ཚེ། །སྲིད་འབྱོར་པས་དགོས་དུས་བསླུ་བ་ཡི། །མཚང་སྟོན་པར་ཤེས་ཏེ་འགྱོད་ཀྱང་འཕྱིས། །ལམ་རྒྱུས་མེད་ཀྱི་ས་མཁན་ཆོས་ཡིན་ཞིང༌། །ལམ་བཤུལ་རིང་གི་ལམ་རྒྱགས་ཆོས་ཡིན་ལ། །ལམ་བགྲོད་དཀའི་དེད་དཔོན་ཆོས་ཡིན་པས། །དུས་ད་ནས་སྒོ་གསུམ་ཆོས་ལ་སྦྱོར། །དབང་རང་ལ་ཡོད་པའི་གནས་སྐབས་འདིར། །གཏན་བདེ་བའི་བཙན་ས་མ་ཟིན་ན། །དབུགས་འགྲོ་འོང་རྒྱུ་བ་ཆད་པའི་ཚེ། །རང་ཅི་བྱ་གཏོལ་མེད་དུས་ཤིག་འོང༌། །དོན་དེ་ཕྱིར་མི་རྟག་སེམས་པ་འདི། །དུས་ཐོག་མ་བར་དང་ཐ་མ་རུ། །བློ་ཆོས་ལ་སྐུལ་བར་བྱེད་པ་ཡི། །ལམ་དབུ་མ་སྣང་སེལ་ཆེན་པོར་གསུངས། །སེམས་དེ་ལྟར་ཆོས་ལ་འཁུལ་བ་ན། །ཆོས་ཟབ་མོའི་སྒྲ་ཅན་མང་ན་ཡང༌། །མགོན་དུས་གསུམ་རྒྱལ་བའི་ཐུགས་ཀྱི་བཅུད། །རྗེ་བློ་བཟང་རྒྱལ་བའི་རིང་ལུགས་མཆོག །ཆོས་མདོ་སྔགས་བཤད་སྒྲུབ་ཟུང་འབྲེལ་གྱི། །ལམ་ངོ་བོ་གྲངས་དང་གོ་རིམ་སོགས། །གནད་ཚང་ལ་མ་ནོར་ཡོངས་རྫོགས་ལ། །དུས་ཉིན་བཞིན་བག་ཆགས་ཅི་ཐེབས་ཀྱིས། །བཤར་སྒོམ་ལ་ཉམས་ལེན་དངོས་གཞིར་བྱས། །དེའི་སྦྱོར་དང་མཇུག་གི་རིམ་པ་ཡང༌། །རྗེ་བླ་མའི་བཀའ་བཞིན་ལེགས་བསྒྲུབ་སྟེ། །དལ་འབྱོར་ལ་སྙིང་པོ་ལེན་པར་འཚལ། །ཚུལ་དེ་ལྟར་བསྒྲུབ་པའི་དགེ་ཚོགས་མཐུས། །བདག་རྟག་པར་འཛིན་པའི་ཆོམ་རྐུན་དང༌། །ཡུལ་བདེན་འཛིན་གྱི་ཕྱི་དཔུང་བཅོམ་བྱས་ཏེ། །དཔལ་འཆི་བ་མེད་པའི་གནས་ཐོབ་ཤོག །ཅེས་པ་འདི་ནི་སྔོན་བཟང་པོའི་བག་ཆགས་
ཀྱི་མཐུ་བརྟས་པའི་ཞབས་དྲུང་ངག་དབང་གྲགས་པས་འཕགས་པ་བཅུ་གཅིག་ཞལ་གྱི་དཀྱིལ་འཁོར་སྟེགས་བུ་མཆོད་ཆ་དང་བཅས་ཆ་འགྲིག །བཀྲ་ཤིས་པའི་ལྷ་རྫས་སོགས་ཀྱི་སྐྱེས་དང་བཅས་མི་རྟག་པ་སྒོམ་ཚུལ་གྱི་བསླབ་བྱ་ཚིགས་སུ་བཅད་པ་ཞིག་དགོས་ཚུལ་འཕྲིན་ཡིག་གི་ལམ་ནས་བསྐུལ་མ་བྱུང་བར་བརྟེན། ྋབཙུན་པ་དཀོན་མཆོག་བསྟན་པའི་སྒྲོན་མེས་མཆོག་དམན་ཀུན་གྱིས་གོ་བདེ་བའི་ཕྱིར་སྙན་ངག་མངོན་བརྗོད་སོགས་ཀྱིས་མ་བཅིང་བར་དམ་པ་གོང་མའི་གསུང་སྒྲོས་ལ་གཞི་བྱས་ཏེ་འབོལ་རྩོམ་དུ་བགྱིས་པ་འདི་ཡང་སྐྱེ་དགུ་རྣམས་བློ་ཁ་ཆོས་ལ་ཕྱོགས་པའི་རྒྱུར་གྱུར་ཅིག །