མཁན་པོ་བློ་བཟང་ཆོས་དར་བའི་རྟོགས་པ་བརྗོད་པ།
མཁས་བཙུན་བཟང་པོའི་བདག་ཉིད་སྒོ་མང་མཁན་རིན་པོ་ཆེ་བློ་བཟང་ཆོས་དར་བའི་ཞལ་སྔ་ནས་ཀྱི་རྟོགས་པ་བརྗོད་པ་གཟུར་གནས་མཁས་པའི་དགའ་སྟོན་ཞེས་བྱ་བ་བཞུགས་སོ། །
ཀུན༷་ཏུ་བཟང་པོའི་འོད་ཀྱི་གདེངས་ཀ་ཡིས། །ཀུན༷་རྨོངས་མུན་པ་བཅོམ་སྟེ་ཤེས་བྱའི་ཁྱོན། །ཀུན༷་ལ་བློ་གྲོས་མཆོག་སྟེར་འཇམ་མགོན་ལྷས། །ཀུན༷་མཁྱེན་མ་ཐོབ་དེ་སྲིད་མགོན་མཛོད་ཅིག །བློ༷་གྲོས་དྲི་མེད་མཁྱེན་པའི་དཀྱིལ་འཁོར་རྒྱས། །བཟ༷ང་པོའི་ཐུགས་བསྐྱེད་རི་དྭགས་མཚན་མས་མཛེས། །ཆོ༷ས་ཀྱི་དཔལ་འབྱོར་མི་ཟད་ཆུ་བོའི་གཏེར། །ད༷ར་ཞིང་རྒྱས་མཛད་ཀུནྡའི་གཉེན་ཁྱོད་རྒྱལ། །ཚུལ་ལྡན་མང་ཐོས་གནས་བརྟན་འདུལ་བ་འཛིན། །རྒྱ་ཆེན་ལྷག་བསམ་རྨད་བྱུང་སེམས་དཔའ་ཆེ། །རྡོ་རྗེའི་རྣལ་འབྱོར་ལ་གནས་རིག་སྔགས་འཆང༌། །གསུམ་ལྡན་རྡོ་རྗེ་འཛིན་ཁྱོད་བསྔགས་པར་འོས། །དེང་དུས་འདོད་ཡོན་མྱོས་འགྱུར་དཔེ་དང་བཅས་པས་རབ་སྨྱོས་ཏེ། །སྤྱོད་པའི་གོམ་སྟབས་རྩིང་པོས་ཐུབ་བསྟན་པད་ཚལ་འཇོམས་བྱེད་ཀྱང༌། །སྐལ་དམན་བུང་བས་བསྐོར་སླད་རིགས་མཐུན་རྨོངས་པའི་སྐྱེ་བོ་རྣམས། །ཕན་
བདེའི་དགའ་ཚལ་རྒྱན་དུ་བསྔགས་པའི་མུ་ཅོར་སྒྲོགས་བྱེད་ན། །རིན་ཆེན་སེམས་ཀྱི་རྩ་བརྟན་རྒྱལ་སྲས་སྤྱོད་པའི་ཡལ་འདབ་རྫོགས། །ལེགས་བཤད་མེ་ཏོག་རབ་རྒྱས་བསླབ་གསུམ་འབྲས་བུའི་ཁུར་གྱིས་བརྗིད། །མཁས་གྲུབ་རྐང་འཐུང་ཁྲོད་ན་ཆེར་འཕགས་བཤེས་གཉེན་དཔག་བསམ་ལྗོན། །གྲགས་པའི་དྲི་ངད་ལྡང་ལ་མཐུན་པའི་བསེར་བུ་ཅིས་མི་སྤྲོ། །མང་དུ་གསན་པས་རྨོངས་པའི་དགྲ་ལས་རྒྱལ། །ཚུལ་བཞིན་སྒྲུབ་པས་རྟོགས་པའི་བཙན་ས་ཟིན། །རྣམ་དཔྱོད་དཔུང་པས་བསྟན་པའི་རུ་མཚོན་བསྒྲེངས། །འདི་དག་ངོ་མཚར་གཏན་གྱི་ས་བོན་ཡིན། །ཡ་རབས་དམ་པའི་ལུགས་སྲོལ་ཤེས་འདོད་ཅིང༌། །རྒྱལ་སྲས་སྤྱོད་པའི་རྗེས་སུ་སློབ་འདོད་ལ། །ཡི་རང་གོམས་པས་དགེ་ཚོགས་སྤེལ་འདོད་པ། །དེ་དག་དགའ་དང་དད་པའི་ཡིད་ཀྱིས་ཉོན། །དེའང་ཕུན་སུམ་ཚོགས་པའི་ཐུགས་
བསྐྱེད་རླབས་པོ་ཆེའི་དབང་ཆེན་གསེར་གྱི་འཛིན་མ་ལ། རྣམ་པར་དག་པའི་ཚུལ་ཁྲིམས་ཀྱི་ཆུ་གཏེར་ཆེན་པོ་ཡོངས་སུ་འཁྱིལ་བའི་ཀློང་ན། རྒྱ་ཆེན་སྡེ་སྣོད་གསུམ་གྱི་དགོངས་དོན་ཐོས་བསམ་སྒོམ་པའི་བང་རིམ་མངོན་པར་མཐོ་ཞིང༌། གསང་ཆེན་རྒྱུད་སྡེ་རྣམ་བཞིའི་ལྕོག་གིས་ཉེ་བར་མཛེས་པའི་བཤེས་གཉེན་རི་ཡི་དབང་པོ་སྒོ་མང་མཁན་རིན་པོ་ཆེ་བློ་བཟང་ཆོས་དར་བའི་ཞལ་སྔ་ནས་ཀྱི་རྣམ་པར་ཐར་པ་རགས་པ་ཙམ་ཞིག་གཏམ་དུ་གླེང་བ་ལ། ཐོག་མར་གང་དུ་སྐྱེ་བ་བཞེས་པའི་ཡུལ་ཁ་བ་ཅན་གྱི་ལྗོངས་མདོ་ཁམས་སྨད་ཀྱི་ཕྱོགས་འདི་ཉིད་འཛམ་བུ་གླིང་གི་ཕྱོགས་ཆ་ཇི་ལྟ་ཞིག་ཏུ་གཏོགས་ཚུལ་ཟུར་ཙམ་བསྙད་ན། འབྲོམ་སྟོན་རྒྱལ་བའི་འབྱུང་གནས་ཀྱིས་ཇོ་བོ་སྤྱན་འདྲེན་པའི་དོན་དུ་བོད་སྟོན་རྣམས་ལ་འཕྲིན་དུ་སྤྲིངས་པ་ལས། ཤིང་རྟའི་དབྱིབས་འདྲ་འཛམ་གླིང་གི །བྱེ་བྲག་བརྗིད་ལྡན་གངས་རིའི་བྱང༌། །ཁ་བ་ཅན་ཞེས་མིང་གྲགས་པ། །བོད་ཅེས་བྱ་བ་གནས་པའི་ཕྱིར། །ཞེས་པ་ལྟར་འཛམ་གླིང་སྤྱིའི་དབྱིབས་ནི་རྒྱ་གར་གྱི་ཤིང་རྟ་རྟ་གླང་སོགས་ལ་འགེལ་བའི་ཕྱོགས་ཕྲ་ཞིང༌། འཁོར་ལོ་བརྟེན་པའི་ཕྱོགས་ཞེང་ཆེ་བ་ཞིག་ཡོད་པས་དེ་ལ་དཔེ་སྦྱར་བ་ཡིན་ཞིང༌། སོག་པའི་དབྱིབས་ལྟ་བུར་ཡང་བཤད་དེ། མཛོད་ལས། འཛམ་བུའི་གླིང་དེ་ངོས་གསུམ་ལ། །སྟོང་ཕྲག་གཉིས་སོ་ཤིང་རྟའི་དབྱིབས། །གཅིག་ལ་དཔག་ཚད་ཕྱེད་དང་བཞི། །ཞེས་པ་བཞིན་ནོ། །ཞེང་ཆུང་བའི་ངོས་གང་ལ་སྟོན་པའང་ད་ལྟ་
བྲིས་པ་ཕལ་ཆེར་ནང་དུ་རི་རབ་ངོས་ལ་བསྟན་ཡོད་ཀྱང༌། ཁང་བུ་བརྩེགས་པའི་མདོ་དང༌། རྨད་དུ་བྱུང་བའི་ཆོས་ཀྱི་རྣམ་གྲངས། རྡོ་འཕང་བའི་མདོ་སོགས་ལས་བྱང་ངོས་ཆེ་བར་གསུངས་ཤིང༌། དབུས་ཀྱི་རི་རྒྱལ་ལྷུན་པོ་ནི། །གླིང་བཞི་ཀུན་གྱི་བྱང་ན་འོ། །ཞེས་པ་ལྟར་གླིང་གང་ཡིན་ཀྱང་རང་གི་བྱང་རི་རབ་ལ་སྟོན་དགོས་པ་ཉི་མའི་འཆར་ཚུལ་གྱི་དབང་གིས་ཡིན་ནོ། །དེར་མ་ཟད་ལོ་རྒྱུས་སོགས་ལ་བརྟགས་ནའང་གླིང་ཕྲན་མང་པོ་དང་ཁད་ཉེ་ཚུལ་གྱིས་ལྷོ་ངོས་རྒྱ་མི་ཆེ་བ་དང༌། བྱང་ཕྱོགས་ན་ཤམ་བྷ་ལ་སོགས་ཡུལ་རྒྱ་ཆེན་པོ་ཕན་ཚུན་གཅིག་གཅིག་གི་མིང་མ་ཐོས་པའང་མང་པོ་ཡོད་པས་ཤེས་ནུས་སོ། །དེས་ན་ཡུལ་གྱི་དབུས་རྡོ་རྗེ་གདན་ནས་བྱང་ཕྱོགས་སུ་དཔག་ཚད་དྲུག་ཅུ་ཙམ་ནས་བོད་ཀྱི་སྡེ་ཟིན་ཅིང༌། དེ་ལ་ནང་གསེས་ཀྱིས་སྟོད་སྨད་བར་གསུམ་དུ་ཕྱེ་ན། སྟོད་མངའ་རིས་སྐོར་གསུམ་ནི། སྤུ་རང༌། མང་ཡུལ། ཟངས་དཀར་གསུམ་སྐོར་གཅིག །འཆི། བྲུ་ཤ།། སྦལ་ཏི་གསུམ་སྐོར་གཅིག །ཞང་ཞུང༌། ཁྲི་ཏེ་སྟོད་སྨད་གསུམ་སྐོར་གཅིག་ཏུ་བྱེད། བར་དབུས་གཙང་རུ་བཞི་ནི། སྔར་དབུས་ལ། དབུ་རུ། གཡོ་རུ་གཉིས། གཙང་ལ་གཡས་ར། རུ་ལག་གཉིས་ཟེར་ཡང༌། ཆོས་རྒྱལ་ཀཽ་ཤི་ཧན་གྱིས་ཁྲི་སྐོར་བཅུ་གསུམ་དབང་དུ་བསྡུས་ཏེ་རྒྱལ་དབང་རིན་པོ་ཆེར་ཕུལ་ཕྱིན་ལ། གཡས་རུ། གཡོན་རུ། སྦུས་རུ། གུང་རུ་བཞིར་བྱེད་དོ། །སྨད་མདོ་ཁམས་སྒང་དྲུག་
ནི། ཟལ་མོ་སྒང༌། ཚ་བ་སྒང༌། སྨར་ཁམས་སྒང༌། སྤོ་འབོར་སྒང༌། དམར་རྫ་སྒང༌། མི་ཉག་རབ་སྒང་དང་དྲུག་གོ །དེ་དག་ལ་བོད་ཆོལ་ཁ་གསུམ་དུའང་གྲགས་ཏེ། མངའ་རིས་གུང་ཐང་ནས་སོག་ལ་སྐྱ་བོ་ཡན་དབུས་གཙང་ཆོས་ཀྱི་ཆོལ་ཁ། དེ་ནས་རྨ་ཆུ་ཁུག་པ་མདོ་སྟོད་མིའི་ཆོལ་ཁ། དེ་ནས་རྒྱའི་མཆོད་རྟེན་དཀར་པོ་ཡན་མདོ་སྨད་རྟའི་ཆོལ་ཁར་བྱེད་དོ། །འདི་ཐམས་ཅད་ཟ་མ་ཏོག་བཀོད་པ་སོགས་མདོ་སྡེ་དུ་མར་སྤྱན་རས་གཟིགས་ཀྱི་འདུལ་ཞིང་ཁ་བ་ཅན་གྱི་རྒྱལ་ཁམས་ཞེས་གསུངས་པ་དེ་ཡིན་པས། འགའ་ཞིག་དབུས་གཙང་ཁོ་ན་དེར་ངོས་འཛིན་པ་ནི་རྨོངས་ཞེན་གྱི་གཏམ་ཡིན་ཏེ། གངས་ཅན་ནམ་ཁ་བ་ཅན་ཞེས་འདོགས་པའི་རྩ་བ་བོད་སྐྱོབ་པའི་གངས་ཆེན་བརྒྱད་དུ་གྲགས་ཤིང༌། དེའང་རྗེ་བླ་མས། གངས་ཅན་ཁྲོད་ཀྱི་གངས་རིའི་དབང་པོ་ཞེས་གསུངས་པ་ལྟར། གངས་རིའི་རྒྱལ་པོ་འོ་དེ་གུང་རྒྱལ། གངས་རིའི་དམག་དཔོན་སྦོམ་ར། གངས་རིའི་བློན་པོ་ཐང་ལྷ་སོགས་སུ་བཤད་པ་ལྟར་ཡིན་པས། རྨ་ཆེན་གངས་ཀྱི་གཙོ་བོ་ཞིག་ཏུ་བྱེད་ན་མདོ་སྨད་གངས་ཅན་དུ་མི་བྱེད་པའི་ཐབས་མེད་དོ། །འདི་དག་གནས་ཀྱི་ཁྱད་ཆོས་གཙོ་བོ་ཡིན་པས། རྒྱ་བལ་གྱི་རྒྱལ་པོ་སོ་སོའི་བསྔགས་པ་བརྗོད་ཚུལ་རྒྱལ་པོ་བཀའ་འབུམ་ལས། བོད་ཅེས་བྱ་བ་ཁྱད་པར་འཕགས་པའི་ཡུལ། །ས་མཐོ་རི་གཙང་གངས་རི་གཉན་གྱི་མགུལ། །ཞེས་དང༌། གངས་རི་རང་བྱུང་མཆོད་རྟེན་ཡ་མཚན་ཅན། །ཞེས་གསུངས་ཏེ། བཀའ་གདམས་གླེགས་བམ་ལས་ཀྱང༌། གངས་དཀར་པོ་ཤེལ་གྱི་མཆོད་རྟེན་ཡོད། །ཅེས་བྱུང་བ་དེ་ཀུན་མཁྱེན་འཇམ་དབྱངས་བཞད་པས་དགོན་འདིའི་ལུང་བསྟན་
དུ་འགྲེལ་སྐབས་རྨ་ཆེན་གྱི་གངས་ལ་ངོས་བཟུང་བ་ལྟར། སྐྱབས་མགོན་རྡོ་རྗེ་འཆང་ནས་དགོན་འདིར་རྨ་ཆེན་གཙོ་བོར་བསྟེན་པ་དང༌། ཀློང་རྡོལ་གྲུབ་དབང་རིན་པོ་ཆེས་རྨ་ཆེན་འདི་ལ་ལྷག་ཏུ་འཁོར་ཚུལ་གསུངས་པ་གུང་བསྒྲིག་རྒྱུ་མང་ངོ༌། །དེར་མ་ཟད་མདོ་ཁམས་ནི་སྔོན་ཆོས་རྒྱལ་གྱི་དུས་རྒྱ་བོད་ཀྱི་སོ་མཚམས་སོགས་སུ་བཞག་པ་ལས་མཆེད་པ་ཡིན་པས་སྐད་རིགས་ལའང་བརྡ་རྙིང་མ་འགྱུར་བ་མང་ཞིང༌། དེའི་རྒྱུ་མཚན་གྱིས་དབུས་གཙང་ལ་བོད་དང༌། མདོ་ཁམས་ལ་བོད་ཆེན་པོར་གྲགས་པ་ཙམ་ལས་དོན་འདྲ་བ། དཔེར་ན་འཇམ་དཔལ་རྩ་རྒྱུད་ལས། རྒྱ་དང་རྒྱ་ནི་ཆེ་ཉིད་ན། །ཞེས་རྒྱ་ནག་ཆེན་པོ་རྒྱ་ནག་ལས་ལོགས་སུ་གསུངས་ཀྱང༌། ཟན་ཤིའི་བྱང་ཕྱོགས་ཀྱི་རྒྱུད་ལ་རྒྱ་ནག་དང༌། མན་ཇིང་སོགས་ལྷོ་རྒྱུད་ལ་རྒྱ་ནག་ཆེན་པོར་འཇོག་པས་གཉི་ག་རྒྱ་ནག་ཏུ་འདྲ་བ་བཞིན་ནོ། །འདི་ལ་དགོངས་ནས་ལྷ་མོ་དྲི་མ་མེད་པས་ཞུས་པ་དང༌། ཤེར་ཕྱིན་གྱི་མདོའི་ཡུལ་དཔྱད་པའི་ཡོན་ཏན་གྱི་སྐབས་སོགས་སུ། བསྟན་པ་བྱང་ནས་བྱང་དུ་དར་བར་འགྱུར་རོ། །ཞེས་བྱང་ཕྱོགས་ཁ་བ་ཅན་གྱི་ལྗོངས་འདི་ལ་ནང་གསེས་ཀྱིས་ཆ་གཉིས་སུ་ཕྱེ་བའི་གཅིག་ནས་གཅིག་ཏུ་དར་ཚུལ་ལུང་བསྟན་པ་ཡིན་ཏེ། རྒྱ་གར་དབུས་ནས་བྱང་དུ་དཔག་ཚད་བརྒྱ་བརྒལ་བ་ན་ས་སྐྱ་ཡོད་ཅིང༌། དེ་ནས་བྱང་དུ་དཔག་ཚད་བརྒྱ་ལྷག་བརྒལ་ཚེ་མདོ་སྨད་ཀྱི་སྣེ་ཟིན་པས་ཀྱང་ཤེས་ནུས་སོ། །དེར་མ་ཟད་ཁྲོ་ཕུ་ལོ་ཙཱ་བས་པཎ་ཆེན་ཤཱཀྱ་ཤྲཱི་སྤྱན་འདྲེན་སྐབས་ཕུལ་བའི་ཞུ་ཡིག་ལས། མ་ག་དྷ་སོགས་རིག་འབྱུང་གནས་ན་སྡིག་ཏོ་ཡིས། །དམག་ཚོགས་ཀྱིས་བཅོམ་ཨོ་
རྒྱན་ཁ་ཆེ་བལ་ཡུལ་ཡང༌། །ལོག་སྤྱོད་ཀྱིས་ཁེངས་དེང་སང་བསྟན་སྲོག་ལེགས་གནས་ནི། །བོད་ཡུལ་འདིར་ཟད་སྐྱེས་ཆེན་བྱང་ཕྱོགས་ཞབས་བསྐྱོད་ཞུ། །ཞེས་པ་སྐབས་དེར་རྒྱ་བལ་ན་པཎྚི་ཏ་ཆེན་པོ་དུ་མ་ཡོད་ལ་བསྟན་པའི་འབྱུང་ཁུངས་སུ་རྩི་དུས་ཡིན་ཀྱང༌། བསྟན་པ་བྱང་དུ་འཕོ་བའི་རྟེན་འབྲེལ་གྱིས་ལྗོན་ཤིང་ཡར་སྐྱེ་བཞིན་འཕེལ་སྐྱེད་བོད་ཆེ་བར་གསུངས་པ་བཞིན། དེ་སྐབས་དབུས་གཙང་དུའང་གྲྭ་རྒྱུན་གྱི་ཁྲོད་ནས་མཁས་པའི་ཐོག་མདོ་སྨད་ཆེ་བར་ཡོད་འདུག་ལ། དེང་སང་འདི་ལས་ཀྱང་ཆོས་ཀྱི་དོན་གཉེར་དང་རྣམ་གྲངས་ལ་བློ་རྣོ་བ་སོགས་སྨད་ཕྱོགས་དྲག་པར་འདུག་པ་རྟེན་འབྲེལ་གྱི་ཆེ་བར་མངོན། དེ་ལྟར་ཐུབ་བསྟན་དབྱར་གྱི་ལང་ཚོ་དར་བའི་དུས་སྟོན་གསར་དུ་ངོམས་པ་མདོ་སྨད་ས་ཡི་ཐིག་ལེ། དེ་ལའང་རྒྱ་གར་ཆུ་བོ་གངྒཱ་གཉིས་པ་ཡན་ལག་བརྒྱད་དང་ལྡན་པའི་ཀླུང་ཆེན་རྨ་ཆུས་བགོས་ཏེ་ལྷོ་རྒྱུད་དང་བྱང་རྒྱུད་གཉིས་སུ་ཡོད་པ་ལས་ལྷོ་རྒྱུད། ལུང་པའི་མདའ་ཀླུང་ཆེན་དེ་ལ་གཏད་ཅིང༌། ཕུ་ཤར་ལྷོར་བལྟ་བའི་བོད་སྡེ་མང་དུ་ཡོད་པ་ལས་མར་ནང་ཚོ་ལྔར་གྲགས་པའི་ཡ་གྱལ་ཀ་རིང་ཞེས་པ། ལུང་པའི་སྐེད་ན་ཀེར་ལངས་ཀྱི་རྡོ་ཀ་བ་ལྟ་བུ་ཞིག་ཡོད་པ་ལས་བཏགས་པ་ཡིན་ཞིང༌། ལོ་རྒྱུས་ལ་ལར་འདི་འདྲ་བ་ལ་དངོས་གྲུབ་ཀྱི་རྟགས་མཚན་དུ་བཤད་པའང་ཡོད། ཆུ་ཤིང་འཛོམ་ཞིང་ལོ་ཏོག་སྨིན་པ། ཕུ་ན་འབྲོག་གི་རྩྭ་སའང་ཡོད་པས། ཁང་ས་ཞིང་ས་ས་ཡི་དགེ །འཐུང་ཆུ་ཞིང་ཆུ་ཆུ་ཡི་དགེ །གམ་འབྲོག་རྒྱང་འབྲོག་འབྲོག་གི་དགེ །ཁང་ཤིང་བུད་ཤིང་ཤིང་གི་དགེ །ཁང་རྡོ་ཐབ་རྡོ་རྡོ་ཡི་དགེ །ཞེས་པ་ལྟར་གྱི་སའི་དགེ་བཅུ་ཚང་བ་ཞིག་གོ །ཡུལ་མི་རྣམས་གཡོ་སྒྱུ་མེད་པ་མ་བཅོས་པའི་རང་བཞིན་དྲང་པོ་
ཅན། རྐུན་ཇག་སོགས་སྤྱོད་པ་ངན་པའི་མིག་ལྟོས་མི་བྱེད་ཅིང་དཀོན་མཆོག་ལ་དད་པ། ཕལ་ཆེར་གཟུགས་བྱད་བཟང་ཞིང་སྨྲ་སྒོ་ཡངས་པ་སོགས་ཆོས་སྒྲུབ་པའི་རྟེན་དུ་འོས་པ་ཤས་ཆེ་ལ། དེའི་ནང་ནས་དཔལ་འབུམ་བྱ་བ་དམ་པ་འདིའི་ཡབ་ཡིན་ཞིང༌། ཡུམ་ནི་དཔལ་མོ་མཁར་ཞེས་བླ་མ་དཀོན་མཆོག་ལ་གུས་པ། དབུལ་སྤྲང་སོགས་ལ་སྙིང་བརྩེ་བ་ཞིག་སྟེ། མི་ཚང་འདི་འདུལ་བ་ལུང་ལས། ཧ་ཅང་ཕྱུག་པོའི་ཁྱིམ་དང་ནི། །དབུལ་བོའི་ཁྱིམ་དུ་མི་སྐྱེ་བར། །བར་མའི་ཁྱིམ་དུ་སྐྱེ་འགྱུར་ཞིང༌། །རྟག་ཏུ་རབ་བྱུང་ཐོབ་པར་ཤོག །ཅེས་བསྔགས་པ་ལྟར་མཐའ་གཉིས་སུ་མ་ལྷུང་བ་ཞིག་གོ །ཡབ་ཡུམ་དེ་གཉིས་ཀྱི་སྲས་སུ་རབ་བྱུང་བཅུ་གཉིས་པའི་བགྲང་བྱ་ཞེ་དྲུག་པ། སྟོད་འགྲེལ་ལྟར་ན་ཡོངས་འཛིན་ཏེ་སཾ་སྐྲྀ་ཏའི་སྐད་དུ་པ་རི་དྷཱ་རི། ཙི་ནའི་སྐད་དུ་ཤིན་ཙི། དབང་ཐང་བསྟུན་པ་ཆུ་ཕོ་བྱི་བའི་ལོར་དགེ་མཚན་གྱི་ལྟས་དང་བཅས་ཏེ་བལྟམས། དེའི་སྔ་ལོ་སོག་ཚའི་རྩིས་པ་ལ་རྩིས་བྱེད་དུ་བཅུག་པར། སང་ཕོད་བུ་ཞིག་སྐྱེ་བས་དེ་རབ་བྱུང་བྱས་ན་དགོན་སྡེ་མང་པོའི་བླ་མ་དང༌། ཁྱིམ་པ་བྱས་ན་གྲོང་སྡེ་མང་པོའི་དཔོན་པོ་བྱེད་པའི་བསོད་ནམས་ཅན་ཞིག་ཡིན། དེའི་སྐུ་རིམ་ལ་གསེར་གྱི་སྐ་རགས་བྱས་པའི་དངུལ་གྱི་གཟུངས་འདུས་ཤིག་འབྲི་དགོས་ཞེས་བཤད་འདུག་པ་ནི། སྔོན་གཞོན་ནུ་དོན་གྲུབ་སྐུ་བལྟམས་པའི་ཚེ་མཚན་མཁན་སྔ་མས་ཁྱིམ་ན་གནས་ཚེ་འཁོར་སྒྱུར་དང༌། རབ་ཏུ་བྱུང་ཚེ་སངས་རྒྱས་སུ་འགྱུར་བར་ལུང་བསྟན་ལ། ཕྱི་མས་རྩོད་དུས་འཁོར་སྒྱུར་མི་འབྱུང་བས་སངས་རྒྱས་སུ་འགྱུར་བར་བཤད་པ་བཞིན་མདོ་དབུས་སུ་དགེ་འདུན་གྱི་
སྡེ་དུ་མའི་གཙུག་རྒྱན་དུ་འགྱུར་རྒྱུ་དེ་ཐིག་པར་སྣང་ངོ༌། །དེར་མ་ཟད་རིམ་གྲོ་འབབ་ཚུལ་ཡང༌། ཕྱྭ་གཡང་སེལ་གསུམ་ལྟ་བུ་ཞི་བའི་དཀར་བཅོས། མནན་བསྲེག་འཕང་གསུམ་ལྟ་བུ་དྲག་པོའི་རིམ་གྲོ་གྲོང་པ་ལ་བྲིན་པ་དེ་འདྲ་ཞིག་མ་བབས་པར། རྒྱལ་བའི་བཀའ་དྲི་མ་མེད་པ་སྒྲུབ་ཚུལ་བབས་པ་ནི་སྐུ་ཚེ་འདིའི་བཞེད་དོན་མཐའ་དག་ཆོས་དང་མཐུན་པར་འགྲུབ་པའི་རྟེན་འབྲེལ་གྱི་མགོ་ཚུགས་པར་སྣང༌། དེ་རྗེས་ཡབ་ཆེར་མ་འགྱང་བར་འདས་ཏེ་ཡུམ་གྱིས་བསྐྱངས། ཁམས་མི་བདེ་བ་སོགས་ཅི་ཡང་མེད་ཅིང་མཚོ་ནང་གི་པདྨ་བཞིན་སྐྱེད་ཆེ་བས་ཤིན་ཏུ་གསོ་སླ་བ་བྱུང༌། ཅུང་ཟད་ནར་སོན་ཏེ་བྱིས་པ་རྣམས་དང་ལྷན་ཅིག་རྩེ་བའི་དུས་ནའང་ཟླ་བོ་རྣམས་འཕྱོང་རྒྱུག་འར་འུར་ཅི་ཙམ་བྱས་ཀྱང་རྟོག་དཔྱོད་མི་གཏོང་བར་དེའི་རྗེས་སུ་མི་འགྲོ་བ་དང༌། རྩེད་མོའང་ངན་སྤྱོད་ཀྱི་རིགས་མི་བྱེད་པ་རྒན་པོའི་སྤྱོད་པ་ལྟ་བུ་ཀུན་གྱི་ཡིད་དུ་འོང་བ་ཞིག་ཡོད་པར་སྣང་ངོ༌། །ཀཻ་ལ་ཤས་མཚན་བསིལ་ལྗོངས་མདོ་ཁམས་སྨད། །ཀ་རིང་ཞེས་གྲགས་ས་ཡི་ཐིག་ལེ་རུ། །ཀུ་མུད་ཚལ་དུ་ཟླ་ཟེར་འཕོས་པ་བཞིན། །ཀུན་བཟང་དགེ་བའི་ལྟས་དང་བཅས་ཏེ་བལྟམས། །ན་ཚོད་པདྨའི་མྱུ་གུ་ཆེས་ཕྲ་ཡང༌། །ནེའུ་ལྡང་བག་མེད་བྱིས་པའི་ཚོགས་ཀྱི་ནང༌། །ནོར་འཁྲུལ་ཉེས་སྤྱོད་དྲི་མའི་འདམ་རྫབ་ཀྱིས། །ནམ་ཡང་མ་སྦགས་སྔོན་གོམས་མཐུ་དེ་རྨད། །སྐབས་ཤིག་ནས་ཨ་ཁུ་བླ་མ་ངག་དབང་དོན་གྲུབ་ཀྱི་དྲུང་དུ་ཀློག་བསླབ་པར་ཐོད་རྒལ་བྱས་ནས་མི་འགྲོ་བར་ཕྲལ་ཀློག་སྦྱར་ཀློག་སོགས་རིམ་པ་བཞིན་ནན་ཏན་གྱིས་དལ་བུས་ཞིབ་མོར་སློབ་ཅིང༌། གང་ཤེས་པ་དེ་ནམ་ཡང་མི་བརྗེད་པར་བྱས་ཏེ་ཡིད་ལ་འཇགས་པས་སློབ་མཁན་ལའང་དཀའ་ཚེགས་
མེད་ཅིང་ཤིན་ཏུ་མགུ་བ་བྱུང་སྟེ། གྲོག་མཁར་དང་སྦྲང་རྩི་ལྟར་ཡོན་ཏན་གསོག་ཚུལ་མ་ནོར་བའི་ཉེར་བསྡོགས་དང་པོར་བརྩམ་མོ། །དེ་ནས་བློ་བཟང་དར་རྒྱས་ཞེས་པ་མང་ཐོས་ཚུལ་ལྡན་མཁན་པོར་འོས་པ་ཞིག་གི་དྲུང་ནས་རབ་ཏུ་བྱུང་བའི་ཚུལ་ཁྲིམས་ཡང་དག་བླངས་ཏེ་ངུར་སྨྲིག་གི་རྒྱལ་མཚན་འཆང་ཞིང་མཚན་བློ་བཟང་ཆོས་དར་ཞེས་བཏགས། ཀ་རིང་སྒར་དུ་ཞུགས་ཏེ་དེ་ན་འདོན་རྒྱུན་ལ་ཡོད་པའི་ཆོ་ག་ཆོས་སྤྱོད་རྣམས་རྫོགས་པར་བསླབས། དེ་སྐབས་ཐུགས་ལ་རབ་ཏུ་བྱུང་བའི་མིང་ཙམ་དེས་གོ་མི་ཆོད་པར་འདུག །ཆོས་རྣམ་པར་དག་པས་གཏན་གྱི་མདུན་མ་འགྲུབ་ངེས་ཤིག་མི་བྱེད་པའི་ཐབས་མི་འདུག །དེ་བྱེད་པ་ལ་ཐོག་མར་གྲྭ་ས་ཆེན་པོ་ཞིག་ཏུ་ཞུགས་ནས་སློབ་གཉེར་ཚུལ་བཞིན་བྱས་ལ་ཆོས་ཀྱི་གནད་གོ་བ་ཞིག་བྱེད་དགོས་པར་འདུག་སྙམ་སྟེ། དབྱར་ཐོག་ཅིག་བཀྲ་ཤིས་འཁྱིལ་དུ་བྲོས་ནས་ཕེབས། ཡུལ་མི་རྣམས་ཀྱིས་རྗེས་བསྙེགས་ནས་འོངས་ཏེ་བཞུགས་ཐུབ་པ་མ་བྱུང་ཡང༌། དང་པོར་ཕེབས་པ་དེ་སྔོན་གྱི་ཐུགས་སྨོན་གྱིས་བསྐུལ་བ་ཡིན་ཞིང་ཕྱིས་འབྱུང་རྟེན་འབྲེལ་བསྒྲིགས་པ་ལྟ་བུར་ཡང་མངོན། དེ་ལོ་དབྱར་ཆོས་ཀྱི་གླིང་བསྲེ་དཀའ་བཅུ་ཨ་བར་བཟོད་པ་དང༌། སྐྱོར་དཔོན་རྣོ་འབུག་གཉིས་ཡིན་ཟེར་གིན་འདུག་ཅེས་ཕྱིས་དགུང་ལོ་བདུན་ཅུ་སྐོར་ལ་ཕེབས་དུས་བཀའ་ཆོས་འགའ་ཞིག་གི་སྐབས་སུ་གསུང་སྣང༌། དེས་མཚོན་སྐུ་ན་ཕྲ་མོའི་དུས་ནས་གསན་གཟིགས་བྱུང་ཚད་ནམ་ཡང་བསྙེལ་བ་མེད་པའི་དྲན་པ་བརྟན་པོ་ཞིག་མངའ་བ་ནི་སྐྱེ་བའི་འཕྲེང་བར་སེམས་ཀྱི་རྟ་མཆོག་དྲན་ཤེས་སྲབ་ཀྱིས་ཁ་ལོ་བསྒྱུར་ཏེ་བག་མེད་པའི་ལམ་དུ་ནམ་ཡང་
མི་གཏོང་བར། ཐུབ་པའི་གཞུང་ལམ་དྲང་པོར་བགྲོད་པའི་འབྲས་རྟགས་སུ་མངོན། དེ་ནས་ཡུལ་མི་རྣམས་ཀྱིས་ཀྱང་འདི་གྲྭ་ས་ཞིག་ཏུ་མ་བཏང་བར་མི་སྡོད་འདུག་སྙམ་སྟེ་ཇི་ལྟར་འོས་པའི་མཐུན་པའི་འཚོག་ཆས་བསྒྲུབས་པ་བཞིན་དགུང་ལོ་བཅུ་བདུན་པ་བི་དྷ་བ་སྟེ་རྣམ་འབྱུང་ཞེས་པ་ས་ཕོ་འབྲུག་གི་ལོ་དབུས་སུ་ཕེབས་པས་ལམ་སྐབས་སོགས་ནས་ཉེ་ཞོ་ཅི་ཡང་མེད་པས་བདེ་བར་སོན་ཏོ། །ཉི་མའི་གཉེན་གྱི་བསྟན་པའི་སྒོར་ཞུགས་ཏེ། །ཉེས་ལྟུང་རྙོག་པའི་དྲི་མ་རིང་དུ་སྤངས། །ཉོན་མོངས་གདུང་སེལ་ཚུལ་ཁྲིམས་བདུད་རྩིའི་བཅུད། །ཉམས་སུ་མྱོང་བས་དགའ་བ་ཅི་ཡང་བརྟས། །ཐར་པའི་གོ་འཕང་མཆོག་དེ་སྒྲུབ་པ་ཡང༌། །ཐོག་མ་ཁོ་ནར་རྒྱལ་བའི་གསུང་རབ་ལ། །ཐོས་བསམ་ཚུལ་བཞིན་བགྱིད་ལ་རག་ལས་པས། །ཐུགས་ཀྱིས་དགོངས་ཏེ་སྦྱོར་བ་འདི་བརྩམས་སོ། །དེ་ནས་སངས་རྒྱས་དངོས་དང་དབྱེར་མ་མཆིས་པ་ཇོ་ཤཱཀ་སོགས་ཀྱི་ཞལ་བཟང་མིག་གི་བདུད་རྩིར་གྱུར་པས་དགའ་དད་དབྱར་གྱི་ཆུ་གཏེར་བཞིན་རྒྱས་ཤིང་ཆོས་ཀྱི་བཞེད་དོན་སྨོན་པ་བཞིན་འགྲུབ་པའི་གསོལ་འདེབས་ནན་ཏན་ཞུས། རྒྱལ་དབང་ཐམས་ཅད་མཁྱེན་པ་བསྐལ་བཟང་རྒྱ་མཚོའི་ཞབས་ཀྱི་པདྨོར་མཇལ་ཞིང་མོས་གུས་ཚད་མེད་པ་སྐྱེས། དེ་ནས་མཁས་གྲུབ་ཀླུ་དབང་བྱེ་བའི་བསྟི་གནས། ལུང་དང་རིགས་པའི་དབྱངས་སྙན་སྒྲོགས་པའི་དགའ་ཚལ། དཔལ་ལྡན་འབྲས་དཀར་སྤུངས་པའི་གླིང་གི་གྲྭ་ཚང་བཞིའི་ནང་ནས་གུར་དཀར་པོའི་ཏོག་ལྟ་བུ་བཀྲ་ཤིས་སྒོ་མང་གི་ཆོས་གྲར་ཞུགས། ཚུལ་ཁྲིམས་རྣམ་པར་དག་ཅིང་བྱང་ཆུབ་ཀྱི་སེམས་ལ་མངའ་འབྱོར་པ་མཁན་པོ་སངས་རྒྱས་རྡོ་རྗེའི་དྲུང་ནས་བསྡུས་གྲྭའི་བརྩི་བཞག་ཐོག་མར་གསན།
རང་གི་ཁམས་ཚན་བསམ་བློ་ཡིན་ཀྱང་སྔོན་གྱི་འབྲེལ་བས་མཚམས་སྦྱར་ཏེ་ཡོངས་ཀྱི་དགེ་བའི་བཤེས་གཉེན་བྲ་ཉེ་ངག་དབང་དགེ་ལེགས་དགེ་རྒན་དུ་བསྟེན། ཚོགས་ཆོས་འགྲིམ། དཔེ་འཛིན་དང་གཤར་སྦྱང་མཛུབ་ཁྲིད་སོགས་ལ་བརྩོན་པ་ཆུ་བོའི་རྒྱུན་ལྟ་བུ་ཉིན་མཚན་ཁོར་མོ་ཡུག་ཏུ་མཛད། ཞར་ལ་དམིགས་བརྩེ་མ་དང་ཨ་ར་པ་ཙ་སོགས་ལ་འབད་ནས་ལྷ་དང་བླ་མར་གསོལ་བ་འདེབས་པ་བཤགས་སྦྱང་སོགས་རྒྱུ་དང་སྤུན་གྱི་ཚུལ་དུ་འབད་པས་ཆེར་མ་འགྱང་བར་བསྡུས་ཚད་ཀྱི་རིགས་པའི་སྒོ་ཕྱེ་སྟེ་བགྲོ་གླེང་ལེགས་པར་བྱེད་ཐུབ་པ་བྱུང༌། ས་སྦྲུལ་ལོ་པཎ་ཆེན་རིན་པོ་ཆེས་རྒྱལ་དབང་ཐམས་ཅད་མཁྱེན་པའི་མདུན་ནས་བཀའ་ཆོས་གསན་ཆེད་ས་ག་ཟླ་བའི་ནང་དུ་ཕེབས་པ་ལ་དན་འབག་གླིང་ཁར་སེར་འཕྲེང་གི་ཚེ་ཞལ་མཐོང་བ་ཙམ་ནས་དད་པས་བ་སྤུ་གཡོ་བ་བྱུང༌། སློབ་གཉེར་བྱེད་སའི་གཙོ་བོ་ཟབ་རྒྱས་ཀྱི་གཞུང་གཉིས་ཡིན་པས། བསྡུས་གྲའི་སྐབས་དེར་རྒྱན་འཇུག་གཉིས་ལ་བློ་འཛིན་ཤིན་ཏུ་བྱང་བ་མཛད། བསྡུས་གྲྭ་བློ་རྟགས་སོགས་ཀྱི་རྩོད་པ་རྫོགས་ནས་གཞུང་ཚུགས་ཏེ་ཕར་ཕྱིན་དབུ་མཛོད་འདུལ་བ་རྣམས་ལ་རིམ་བཞིན་སྦྱངས་པ་ན་བློ་གྲོས་ཇེ་རྒྱས་སུ་སོང་བ་བཞིན་བརྩོན་པ་ཇེ་ཆེར་འགྲོ་བས་ཀློག་པ་ཐོས་བསམ་གྱི་བྱ་བ་དབྱར་གྱི་ཆུ་གཏེར་བཞིན་དུ་འཕེལ། ཉིད་རང་བཞིན་གྱིས་ཐུགས་སྒམ་ཞིང་བརྟན་པའི་ཐོག་དགེ་རྒན་ནས་ཀྱང་རྗེ་ཡབ་སྲས་ཀྱི་གསུང་རབ་རྣམས་རྩ་བ་ཡིན་པ་སྨོས་ཅི་དགོས། གཞན་གྲྭ་ས་སོ་སོའི་ཡིག་ཆ་སྤྱི་དོན་ཐལ་ཕྲེང་མི་འདྲ་བ་མང་པོ་འདུག་མོད་ཀྱང་གསུང་རབ་ཀྱི་དགོངས་དོན་ཞིག་གོ་འདོད་ན་ཀུན་མཁྱེན་བླ་མའི་
ཡིག་ཆ་འདིའི་སྟེང་ནས་མ་གོ་བར་གཞན་ནས་ལྷག་པ་བླང་གཏོང་རྒྱུ་ཨེ་ཡོད་མི་ཤེས་ཞེས་ཡང་ཡང་གསུངས་སྟབས། རྣམ་བཤད་གསེར་ཕྲེང་སོགས་ལ་སྐབས་སྐབས་སུ་གཟིགས་པ་མ་གཏོགས་ཡིག་ཆ་ཁོ་ན་གཙོར་འདོན་གྱིས་འཛིན་སྐྱོར་ཆོས་ཐོག་ཆོས་མཚམས་ཀུན་ལ་གཤར་སྦྱང་དང་ཡིག་ཆའི་སྟེང་ནས་དཔྱད་པ་ཕུ་ཐག་ཆོད་པ་མཛད། ཁྱད་པར་གཞུང་ཚན་སོ་སོའི་རང་ལུགས་སྐབས་ཀྱི། མཚན་ཉིད། དབྱེ་བསྡུ། གྲངས་ངེས། གོ་རིམ། བྱེད་ལས། ས་མཚམས། སྒྲ་དོན། མུ་རྩི་ཚུལ་སོགས་གང་ཡོད་ཀྱི་ཚིག་དོན་གཉི་ག་བློ་ལ་ཤིན་ཏུ་བྱང་ནས་ཅིག་ཅར་འཆར་བ་ལྟ་བུ་ཤ་ཞག་རུས་ཞག་ཏུ་འགྲོ་བ་བྱས། དེང་སང་སློབ་གཉེར་ལ་འབད་པའི་ཁུལ་བྱེད་པ་ཕལ་ཆེར་ཡང་དཔེ་ཆ་ལྟ་ཚུལ་རང་གི་ཡིག་ཆ་འཛིན་སྐྱོར་བྱེད་རྒྱུ་བསྐྱུར་ནས་དཔེ་སྣ་མང་པོ་ཞིག་གིས་མ་ལོང་བ་བཞིན་བྱས་ཏེ་དཔེ་ཀློག་ཆབ་ཆོབ་ར་རྩི་ཐོག་ལ་ཡན་པ་བཞིན་ཐམས་ཅད་ཀྱི་སྣེ་བཏོག་རེ་བྱས་རུང་གནད་ལ་འབབ་རྒྱུ་གཅིག་ཀྱང་མེད། གཞུང་ཚན་དེའི་འང་རང་ལུགས་བསྐྱུར་ཏེ་གཞན་ལུགས་དགག་པའི་ཐད་ནས་ཕར་འཕེན་རྒྱུ་རེ་ཨེ་ཡོད་གཙོ་བོར་བྱས་པས་སྐབས་དེར་འགྲོ་ཐབས་ཙམ་འོང་ཡང༌། རང་ལ་ཚུར་འཕང་བ་ན་འབབ་ས་འདི་འདྲ་ཞིག་དགོས་སྙམ་དུ་བློར་འཛིན་རྒྱུའི་གཏད་སོ་ཞིག་མེད་སྟབས་རི་དྭགས་ཐང་ལ་བརྡས་པ་བཞིན་གར་འགྲོ་འདིར་འགྲོ་མེད་ཅིང༌། ལོ་ཟླ་ཁ་ཤས་སོང་དུས་སེམས་ངོ་ན་ཅི་ཡང་མེད་པ་ནི་དང་པོར་སློབ་གཉེར་རྒྱག་དུས་རྒྱག་མ་ཤེས་པའི་སྐྱོན་དུ་སྣང་སྟེ། ཀུན་མཁྱེན་འཇིགས་མེད་དབང་བོའི་ཞལ་སྔ་ནས། གཞུང་ཚིག་བློ་འཛིན་མི་བྱེད་གཞུང་གི་དོན། །དཔེ་ཀློག་ཙམ་གྱིས་
ཤེས་འདོད་བཞད་གད་གནས། །ཞེས་དང༌། ཐད་ཀའི་གཞུང་ལ་ལྟ་བ་ཡལ་བོར་ནས། །དཔེ་མང་བལྟ་བ་ཤེས་རབ་འཆལ་བའི་རྒྱུ། །གསུངས་པ་ལྟར་ཡིན་པས། བློ་གསར་རྣམས་ཡེང་མ་ཡེང་གིས་ཉི་མ་འཕུལ་ཐབས་དེ་འདྲར་མ་སོང་བ་དམ་པ་འདི་དག་གི་རྣམ་ཐར་ལ་ཁ་མིག་ཡར་བལྟ་བ་ཞིག་དགོས་སོ། །རྒྱུན་པར་བགྲོ་གླེང་གནང་ཚུལ་གཞུང་གི་གོ་དོན་ཚོལ་བ་གཙོར་འདོན་བྱས་པས་པམ་མེ་བ་ཞིག་ཡིན་ཀྱང༌། ཕ་རོལ་པོས་ཚིག་འཁྲི་སོགས་ཧ་ཅང་གི་རིགས་པ་ཞིབ་མདོག་དང་ངར་ངར་བྱས་ན་དེའི་ཚོད་ཀྱིས་རིགས་པ་ཇེ་རྣོར་བཏང་སྟེ་ཕྱི་རྒོལ་གྱི་སྤོབས་པ་གཞོམ་ནུས་པ་རྩོད་པའི་ཁྱུ་མཆོག་ལྟ་བུར་ཡོད་ཅེས་རྒྱུས་ཡོད་རྣམས་གླེང༌། ཉི་ཤུ་རྩ་གྲངས་ཤིག་ལ་མཉམ་མེད་ཐུབ་པའི་དབང་པོའི་ཆོས་ཀྱི་རྒྱལ་ཚབ་མཁས་གྲུབ་བྱེ་བའི་གཙུག་རྒྱན་དམ་པ་རྗེ་ངག་དབང་བྱམས་པའི་ཞབས་དྲུང་ནས་བསྙེན་རྫོགས་ཀྱི་སྡོམ་པ་བཞེས། དེ་ཉིད་ཀྱི་ལམ་རིམ་བཀའ་ཆོས་སོགས་ལའང་ལན་ཁ་ཡར་བྱོན་ཏེ་གསུང་གི་བདུད་རྩི་ཉམས་སུ་མྱོང༌། ཆུ་སྤྲེལ་ལོར་ཀུན་མཁྱེན་འཇིགས་མེད་དབང་པོ་དབུས་སུ་ཕེབས་པར་དགེ་རྒན་གྱི་སྟབས་ཐུགས་འདྲིས་ཆེ་བ་བྱུང༌། སྐབས་ཤིག་ཐོས་བསམ་གྱི་བར་ཆད་ལྟ་བུས་སྐུ་ཁམས་མི་བདེ་བ་ཞིག་བྱུང་སྟེ་ཐབས་ཅི་བྱས་ཀྱང་མ་ཕན། ཉིན་གཅིག་ཀུན་མཁྱེན་དེ་ཉིད་ཀྱི་མདུན་དུ་སོང་བར་ཐུགས་ཁྲོས་པའི་རྣམ་པས་ཁྱོད་མི་བདེ་བ་ཨེ་རེད་གསུངས་པས། གནོད་ཚབས་ཆེན་པོ་མི་འདུག་ཀྱང་སྐྱེད་གཏན་མི་འོང་བ་ཞིག་འདུག་ཞུས་པས། དེ་སྐྱོན་ཅན་ཞིག་ཡིན་པ་འདྲ། སང་ངས་རྟ་མགྲིན་གྱི་རྗེས་གནང་ཞིག་
བྱེད་གསུང༌། ཕྱི་ཉིན་ཡང་ཐུགས་ཁྲོས་པའི་རྣམ་པ་དེ་གའི་ངང་ནས་རྗེས་གནང་སྩལ་ཏེ་གྲུབ་ཟིན་པ་ན་དགྱེས་ཉམས་དང་བཅས་ད་སྐྱོན་མེད་མོད། རྟ་མགྲིན་ཅི་ཐུབ་རེ་ཐོན་གསུངས་པ་དེ་ནས་བཟུང་སྟེ་སངས་དྭངས་སུ་སོང༌། དེ་རྗེས་ཐུའུ་བཀྭན་རིན་པོ་ཆེའང་ཕེབས་པས་ཐུགས་ནང་ཤིན་ཏུ་ཉེ་བ་བྱུང་འདུག་པ་ནི། རྩ་བ་སྔོན་ནས་ཐུགས་སྨོན་གྱི་འབྲེལ་བ་ཞིག་ཡིན་འདུག་ལ། ཐུན་མོང་ལྟར་ཡང༌། བཟོད་པས་མཛེས་ཤིང་སྐྱེ་བོ་དམ་པ་ལ། །ཕངས་དང་ལུགས་དང་ལུགས་མིན་ཤེས། ཞེས་གསུངས་པ་དེར་མངོན། མེ་གླང་གི་ལོ་མཇུག་ལྕང་སྐྱ་ཐམས་ཅད་མཁྱེན་པའང་དབུས་སུ་ཕེབས་ཏེ་ལོ་སྔ་ཕྱིར་ཆོས་བཀའ་མང་དུ་གནང་བར་གསན་བཞེད་ཆེའང༌། དེ་སྐབས་ཆོས་འགྲིམ་གྱི་སྒང་དུ་སོང་བས་ལྷ་སར་གནང་བ་རྣམས་ལ་ཆེར་ཕེབས་མ་ཐུབ། ཆོས་མཚམས་དང་འགྲིག་དུས་ཁ་ཤས་དང་འབྲས་སྤུངས་ཚོགས་ཆེན་ནས་ལམ་རིམ་ཐུན་གཅིག །སྒོ་མང་ཆོས་གྲྭར་ལམ་གཙོའི་གཟབ་བཤད་གནང་བ་རྣམས་ཐུགས་ལ་འཇགས་ངེས་སུ་བྱས་ཏེ་གསན། རྩོད་བཞིན་པའི་སྐབས་གནས་སྐོར་ཆོས་ཉན་སོགས་ལ་འགྲོ་མི་རུང་བར་བླ་མ་རྣམས་ཀྱི་བཅའ་ཡིག་ཏུ་དགག་པ་མཛད་པའང་གནས་སྐབས་ཚོགས་ཆོས་གྲྭ་མི་འཆག་པའི་ཐབས་ཙམ་མིན་གྱི་དགོས་པ་ལས་དགག་བྱ་ཆེ་བ་ཞིག་ཡོད་པ་ཡིན་ཏེ། རྒྱལ་སྲས་ཞི་བ་ལྷས། གང་ཞིག་བསམས་ཏེ་བྱར་བརྩམས་པ། །དེ་ལས་གཞན་དུ་མི་བསམ་སྟེ། །དེར་གཏད་པ་ཡི་བསམ་པ་ཡིས། །དེ་ཉིད་རེ་ཞིག་བསྒྲུབ་པར་བྱ། །དེ་ལྟ་ན་ནི་ཀུན་ལེགས་བྱས། །གཞན་དུ་གཉི་གར་མི་འགྱུར་རོ། །ཞེས་གང་བརྩམས་རིམ་པ་ལྟར་འགྲུབ་པ་དགོས་ཀྱི། ཆོས་གྲྭར་
རྗེས་བཞག་ཙམ་ནས་དྲིལ་བུ་དཀྲོལ་ཚད་ཀྱི་རྩར་རྒྱུག་པའི་བློ་སྣ་མང་པོ་རྩི་སྐུད་མགོ་བྲེག་པ་ལྟ་བུ་དེར་སྔ་ཕྱི་གཉིས་པོ་གང་ཡང་མི་ཡོང་བར་གསུངས་སོ། །བརྩོན་འགྲུས་བྱེད་ལུགས་ཀྱང་ཉི་མ་ཁ་ཤས་ལྟོའང་མི་དྲན་པ་ལྟ་བུའི་ཚ་དྲག་བྱས། སྐབས་སྐབས་སུ་བརྗེད་སོང་བ་བཞིན་བསྐྱུར་ནས་འགྲོ་བའི་འཕར་ལྡང་དེས་གར་ཡང་མི་ཕྱིན་པར་གཟིགས་ནས་རྟག་སྦྱོར་གྱི་བརྩོན་འགྲུས་རྒྱུན་ཆགས་པ་ཆུ་བོའི་རྒྱུན་ལྟ་བུ། འདུ་འཛི་གཡེང་བ་སོགས་རྐྱེན་གཞན་གྱིས་བཟློག་ཏུ་མེད་པར་རི་གཟར་གྱི་རྦབ་ལྟ་བུ། ཚ་ཐུབ་གྲང་ཐུབ་ཀྱི་དཀའ་སྤྱད་དམ་པ་གོང་མའི་རྣམ་ཐར་དང་རྗེས་སུ་མཐུན་པ་ཞིག་མཛད་པས་སློབ་གཉེར་ལོ་རེ་ལས་ལོ་རེ་སྐྱེད་ཐོན་ཚབས་ཆེ་བར་བྱུང་བ་ནི་རྒྱུ་འབྲས་གོ་མ་ལོག་པའི་འབྲས་རྟགས་ཡིན་ཏེ། སྐྱེ་བོ་གསོ་ཐིགས་ལས། གཞོན་པའི་དུས་སུ་རིག་པ་བསླབ། །ཞོ་འདོད་བ་ནི་དགུན་ནས་གསོ། །དྲོད་གཤེར་ལྡན་དུས་ས་བོན་གདབ། །དེ་གསུམ་འཕྲལ་དུ་སྨིན་པའི་རྒྱུ། །ཞེས་དང༌། འཇམ་མགོན་ས་པཎ་གྱིས། མཁས་པ་སློབ་པའི་དུས་ན་སྡུག །བདེ་བར་འདོད་ལ་མཁས་མི་སྲིད། །གསུངས་པ་བཞིན་ཏེ། ལ་ལ་ཞིག་རང་གིས་བརྩོན་འགྲུས་མི་བྱེད་པར་ང་ལ་སློབ་གཉེར་ཡོང་ཐབས་ཞེས་ཐབས་ཤིག་ཐང་ནས་ཚོལ་བར་སྣང་ཡང༌། ཙ་ན་ཀའི་ལུགས་ཀྱི་བསྟན་བཅོས་ལས། ཡོན་ཏན་འབད་པས་འགྲུབ་པ་ཡིན། །འབད་པ་བདག་ཉིད་ལ་གནས་པས། །འབད་ནས་ཡོན་ཏན་མི་སློབ་པར། །གཞན་དག་ཡོན་ཏན་ལྡན་ཞེས་སྒྲོགས། །གསུངས་པའི་དཔེ་ལྟར་དགོས་པ་མེད་དོ། །དེ་ལྟར་ཐུགས་གཉེར་གནང་ཚུལ་མཁས་ཤིང་མགོ་
མཇུག་མཚུངས་པས་རིང་པོར་མ་ཐོགས་པར་བཀའ་པོཏ་ཆེན་པོ་ལྔའི་དགོངས་དོན་ཐུགས་སུ་ཆུད་དེ་མཁས་པའི་གོ་འཕང་ཐོབ་བོ། །ཚོགས་མཆོག་དགེ་འདུན་རིགས་པ་སྨྲ་བའི་གྲྭར། །ཚད་མ་སྡེ་བདུན་རིགས་ལམ་བསྡུས་གྲྭ་དང༌། །ཚུལ་གསུམ་གཏན་ཚིགས་རིགས་པར་སྦྱངས་པ་ཡིས། །ཚེགས་མེད་ལུང་དང་རིགས་པའི་དགའ་སྟོན་མྱོང༌། །ཤེས་རབ་གྲུ་གཟིངས་བརྩོན་པའི་བ་དན་ཅན། །ཤུགས་དྲག་བརྩོན་པའི་རླུང་གིས་བསྐུལ་བ་ན། །ཤཱཀ་གསུང་དགོངས་དོན་ཟབ་ཅིང་རྒྱ་ཆེའི་མཚོ། །ཤིན་ཏུ་བརྒལ་དཀའི་ཕ་རོལ་ཡུད་ཀྱིས་སོན། །སོ་བཞི་པ་ས་བྱའི་ལོ་ནས་མཁན་པོ་ངག་དབང་དགེ་ལེགས་སྒོ་མང་གི་ཆོས་ཁྲིར་ཕེབས་པས། ཁོང་གི་ཞལ་ནས་མཁན་ཐོག་སྔ་མ་གཉི་ག་དེ་ཙམ་མཐར་ཕྱིན་པ་མ་བྱུང་བ་སོགས་ཀྱི་སྟབས་དེང་སང་གྲྭ་ཚང་གི་བསྒྲིག་ལམ་སོགས་ཧ་ཅང་བློར་འབབ་པོ་ཞིག་ཡོང་གི་མི་འདུག །ཁྱེད་རང་སྨོན་ལམ་མིང་བཏགས་ཀྱི་ཚད་ལ་སླེབས་ཡོད་པ་ཅུང་འགྱང་འགྲོ་བར་འདུག་ཀྱང་འདི་གལ་ཆེ་བས་ཁྱོད་ཀྱིས་གྲྭ་ཚང་དགེ་བསྐོས་བྱེད་དགོས་གསུང་བར་དགོངས་པ་ཞུས་ཀྱང་ང་ལ་གྲོགས་ཤིག་དགོས་པར་འདུག་ཅེས་གསུང་ནན་ཆེ་བས་བཀའ་བཞིན་ཞུས། དེ་ནི་སྤྱོད་འཇུག་ལས། མ་བརྩམས་པ་ནི་མཆོག་ཡིན་གྱི། །བརྩམས་ནས་ལྡོག་པར་མི་བྱ་འོ། །གསུངས་པ་བཞིན་བྱ་བ་འདི་བྱེད་དགོས་པ་ལ་ཡལ་ཡོལ་གྱིས་འགྲོ་ཐབས་ཙམ་མ་ཡིན་པར་སེམས་ལ་འཛིན་རྒྱུ་ཡོད་པ་ཞིག་བྱེད་དགོས་པར་འདུག །བླ་མའི་བཀའ་ཡིན་པར་མ་ཟད། སྤྱིར་ནའང་བེའུ་བུམ་སྔོན་མོ་ལས། ཅི་ནས་བྱེད་འདོད་སངས་རྒྱས་བསྟན་པ། །འཇིག་རྟེན་ཡུན་རིང་ཅི་གནས་བྱ་སྟེ། །དེ་ཡང་དགེ་འདུན་སྡེ་ལ་རག་ལས། །
ནུས་པ་ཡོད་ན་དེ་གནས་ཐབས་བྱ། །ཞེས་འགྲོ་བའི་བདེ་སྐྱིད་བསྟན་པ་དང༌། དེ་དགེ་འདུན་གྱི་སྡེ་ལ་རག་ལས་པར་གསུངས་པ་དེ་འགྱེད་ཕོགས་ཀྱི་སྐལ་བ་ལེན་མཁན་མང་བས་གོ་མི་ཆོད། འཆད་ཉན་བསྒྲིག་ལམ་རྣམ་དག་ཅིག་ཡོད་དགོས་པར་འདུག །འདི་ལ་ཕན་ཞིག་ཐོགས་ན་ཆོས་ཀྱི་བྱ་བའང་དེ་ལས་ལྷག་མི་འདུག་དགོངས་ཏེ་དྲག་ཞན་སུ་ལའང་ངོ་དགའ་ཟོལ་འཇོག་ཏུ་མ་སོང་བས་བསྒྲིག་གི་རྟིང་གནོན་འཆུན་ཆེ་ཞིང་ཚ་རན་སྙོམས་པ་གང་ལ་གང་འོས་བབ་མཚུངས་ལེ་ཤོར་མེད་པ་གནང༌། དགེ་བཤེས་ཆེན་པོ་ཞི་ཞིང་དུལ་བ་ཟེར་བའི་མིང་བཟང་ལ་མ་ལྟོས་པར་བསྒྲིག་འགལ་ལང་ཤོར་དུ་སོང་བ་རྣམས་ལ་བརྡུང་བཏགས་ཀྱང་ཚ་ནན་མཛད་པ་ནི་དོན་གོ་ན་དེ་དག་ལའང་ཕན་བཏགས་པ་ཁོ་ན་ཡིན་ཏེ། ཤེས་རབ་སྡོང་བུ་ལས། མི་བསྲུན་སྐྱེ་བོ་ཞི་བས་མིན། །དེ་དང་འཚམ་པའི་རྩུབ་པ་བསྟེན། །བུ་ནི་མི་བསྒྲུང་བ་དག་ལ། །ཕན་འདོད་པ་ཡིས་མི་བསྡིགས་སམ། །མཁས་རྣམས་རྣ་བར་མི་སྙན་ཡང༌། །ཕན་ཚིག་སྨན་བཞིན་བསྟེན་པར་གྱིས། །སྐྱེ་བོ་ངན་དང་གསེར་དང་རྔ། །མི་བསྲུན་རྟ་དང་བུད་མེད་དྲེགས། །བརྡུངས་ན་དུལ་བ་ཉིད་འགྱུར་གྱི། །དེ་དག་ལེགས་བྱས་སྣོད་མ་ཡིན། །ཞེས་གང་གསུངས་པ་བཞིན་ནོ། །དེ་ལྟར་ཞི་དྲག་གང་དགོས་ཀྱི་བབ་བསྟུན་མཛད་པས་དམུ་རྒོད་དག་འཇིགས་ཤིང་དགེ་འདུན་རྣམས་སྤྲོ་བ་འཕེལ་བས་བསྒྲིག་ལམ་ལ་ཤིན་ཏུ་ཕན་ཐོགས་པ་དང་མཁན་རིན་པོ་ཆེའང་དགྱེས་པའི་རྩེར་སོན་པ་བྱུང༌། དེ་ནས་སྨོན་ལམ་གྲྭ་སྐོར་གནང་དགོས་པས་གཞུང་གོང་འོག་ཐམས་ཅད་ལ་ཁོལ་འདོན་ཙམ་མ་ཡིན་པར་ཆ་
མཉམ་པའི་ཞིབ་དཔྱོད་བསྐྱར་མ་དང༌། མཚོ་ཊཱིཀ་མཆིམས་མཛོད་སོགས་ལའང་ཞིབ་གཟིགས། སྡོམ་ཚིག་གལ་ཆེ་བའི་རིགས་བློ་འཛིན་བྱང་བར་མཛད། དགུང་ལོ་སོ་བརྒྱད་པ་ས་མོ་གླང་གི་དགུན་ཆོས་ཐོག་གྲྭ་ཚང་གི་དམ་བཅའ་དང༌། ལྕགས་སྟག་ལོའི་སྨོན་ལམ་ཐོག་ལྷ་སའི་དམ་བཅའ་བཞག་པར་གཞུང་འབབ་ཚན་ཆེའང་ཁས་ལེན་ཤོར་ཚབས་ཆེ་བ་མ་བྱུང་ལ། ལན་མྱུར་ཞིང་གསལ་ལ་དཔངས་མཐོ་བ་སྐུའི་རྣམ་འགྱུར་སོགས་གང་ཐད་ནས་ཁྱད་དུ་ཐོན་པས་མཁས་བླུན་མཐའ་དག་གི་ཡིད་མགུ་ཞིང་བསྔགས་པའི་རོལ་མོ་འཁྲོལ་བ་བྱུང་ངོ༌། །ཆོས་ཀྱི་སྡེ་ཆེན་བཀྲ་ཤིས་སྒོ་མང་གི །ཆོས་ཁྲིམས་འཛིན་པའི་རེས་སུ་སོན་པ་ན། །ཆོས་མིན་བརླང་པོར་སྤྱོད་རྣམས་སྤ་བཀོང་ཞིང༌། །ཆོས་མཐུན་ཚོགས་ཀྱི་དབུ་འཕང་ཅི་ཡང་བསྟོད། །རང་གཞན་གྲུབ་མཐའ་རྒྱ་མཚོའི་མཐར་སོན་ཏེ། །ར་ས་འཕྲུལ་སྣང་གཙུག་ལག་ཁང་ཆེན་དུ། །རབ་འབྱམས་སྨྲ་བའི་གྲྭ་སྐོར་མཛད་པ་ན། །རིགས་ལམ་དྲི་མེད་དགའ་སྟོན་མཆོག་ཏུ་འཕེལ། །ཉིད་ཀྱི་དགོངས་པར་སྨོན་ལམ་གྱི་དམ་བཅའ་གྲུབ་ཕྲལ་ནས་རྒྱུད་གྲྭར་ཕེབས་ཏེ་སྔགས་ལ་སློབ་གཉེར་ཚད་དང་ལྡན་པ་བྱས། དེ་རྗེས་མདོ་སྔགས་ཀྱི་ལམ་རྫོགས་པའི་ཉམས་ལེན་རྡོ་རུས་ཐུག་པ་ཞིག་གནང་བཞེད་ཤུགས་དྲག་པོ་ཡོད་པས། སྔ་ལོ་དགུན་ཐོག་རྒྱུད་པ་འབྲས་སྤུངས་སུ་ཕེབས་སྐབས་དགེ་རྒན་ལ་སྙན་གསན་ཕབ་ནས་གསོལ་ཇ་སོགས་དྲངས་ཏེ་ཐུགས་ཐག་བཅད་ཡོད་ཀྱང༌། ཚོགས་མཆོད་གྲོལ་མཚམས་འདུལ་བ་མཁན་པོ་གནང་དགོས་ཚུལ་རྒྱལ་དབང་ཐམས་ཅད་མཁྱེན་པའི་བཀའ་བབས། མ་འགྱང་བར་འདུལ་བ་བླ་བྲང་དུ་སྤོས་ཏེ་ཁྲི་འདོན་མཛད་
པར་རྩེ་ཤོད་ཀྱི་སྐུ་ཚབ། འབྲས་སྤུངས་བླ་སྤྱི་སོ་སོ། མཁན་པོ་དགེ་འདུན་བདེ་ཆེན་དང༌། མགྲོན་གཉེར་མཁན་པོ་སོགས་མི་དྲག་མང་པོའི་ངོ་ཚབ། བསམ་བློ་ཁམས་ཚན། བིས་མདོ་མི་ཚན་སོགས་སྤྱི་སྒེར་ཀུན་ནས་ཁྲི་འབུལ་གྱི་བདོག་པ་གྱ་ནོམ་པ་བསྟར། སྟོད་ལུང་ལྡིང་ཁའི་དགོན་པ་འདུལ་བ་མཁན་པོ་སྔ་ཕྱིའི་འཛིན་ཐེབས་སུ་སྤྲོད་ལེན་བྱེད་དགོས་པས་དེར་ཡང་ཁྲི་འདོན་མཛད། བླ་མ་གཞན་གྱི་སྐབས་སྣ་ཚོགས་བྱུང་ཡང་ཁོང་ལ་གུས་ཞེན་ཆེ་ཞིང་རིགས་གྲྭའི་ཞབས་འགྱུར་དུ་ཕན་ཐོགས་པ་བྱུང་བས། ཉིད་ནས་ཀྱང་རྗེས་སོར་འགྱེད་འཇོག་པ་སོགས་སྤྱན་བསྐྱངས་ཆེ་བར་གནང༌། དཔལ་རྡོ་རྗེ་འཇིགས་བྱེད་ཀྱི་བསྙེན་སྒྲུབ་ངག་མཚམས་དམ་པོ་ཟླ་གསུམ་ཙམ་གནང་སྟེ་རྡོ་རྗེའི་རྣལ་འབྱོར་བརྟན་པོ་ལ་གཞོལ་བར་མཛད་ཅིང་མཇུག་ཏུ་ཁ་སྐོང་གི་སྦྱིན་སྲེག་རྒྱས་པར་གནང༌། འདི་སྐབས་ལས་དོན་སོགས་ཀྱི་ཐུགས་གཡེང་ཆུང་བས་བྱམས་མགོན་བླ་མ་རིན་པོ་ཆེ་སོགས་ཀྱི་དྲུང་ནས་ལམ་རིམ་བློ་སྦྱོང་རིམ་གཉིས་ཀྱི་ཁྲིད་སོགས་ཡང་ཡང་གསན་པའི་དོན་བཞིན་ཐུན་མོང་བ་ལམ་གྱི་གཙོ་བོ་རྣམ་པ་གསུམ་དང༌། ཐུན་མོང་མ་ཡིན་པ་གསང་སྔགས་ཟབ་མོའི་ཉམས་བཞེས་ཟུང་དུ་འབྲེལ་བར་བརྩོན་པ་རྒྱུན་ཆགས་སུ་གནང་བས་ཉམས་རྟོགས་ཡར་ཟླ་བཞིན་འཕེལ། ཡི་དམ་ཆོས་སྲུང་གི་བསྙེན་པའང་ལོ་ལྟར་གྱིས་མ་ཆག་པ་གནང༌། ལན་ཅིག་རྩེའི་བཞུགས་གྲལ་དུ་སེ་ར་བྱེས་པའི་བླ་མ་མཁས་གྲགས་ཤིན་ཏུ་ཆེ་བ་དེ་དང་ལྷན་ཅིག་ཚོགས་གླེང་མཛད་དེ། ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་
རྣམས་ལ་ཞེས་སོགས་ཀྱི་བདེན་བཞིའི་ཆོས་འཁོར་གྱི་ཆེད་དུ་བྱ་བའི་གདུལ་བྱ་བསྟན་པ་ཡིན་ཚུལ་གྱི་བགྲོ་གླེང་བཏང་བས། སྐབས་ཤིག་ཕ་རོལ་པོས་བྱེ་བྲག་སྨྲ་བར་གྱུར་པའི་བྱང་སེམས་དེ་ཉན་ཐོས་ཀྱི་རིགས་ཅན་ཡིན་ཟེར་དགོས་པ་ལྟ་བུ་ཁས་ལེན་འཛིན་རྒྱུ་མེད་པ་བྱུང་བས་ཀུན་ཡ་མཚན་དུ་གྱུར། རྒྱུན་པར་ཐུགས་དམ་གཙོར་འདོན་དང་དོན་གཉེར་ཅན་ཁ་ཤས་ལ་ཆོས་བཀའ་ཐོར་བུ་དཔེ་ཁྲིད་སོགས་གནང་བཞིན་པའི་མུ་ནས་ལོ་དྲུག་སོང་བ་ཤིང་ལུག་ལོར་རིགས་གྲྭ་བཏང་སྟེ་དགེ་འདུན་སྟོང་ཕྲག་བདུན་དུ་ཉེ་བ་ལ་ཉིན་བཅོ་ལྔའི་རིང་མང་ཇའི་བསྙེན་བཀུར་དང་ཚ་ར། ཉིན་ལྟར་གྱི་འགྱེད་སྣ་རེ་དང་འགྱེད་ཆེན་དངུལ་ཊཾ་ག་གཉིས་རེ། ལྷག་མཆོད་དུ་སྒོ་མང་ལ་གྲྭ་ཇ་བཞི་དང་དངུལ་ཞོ་རེ། ཁམས་ཚན་ལ་སྐར་ལྔ། མི་ཚན་ལ་ཁ་དར་རེ་བཅས་བཏང༌། འདུལ་བ་བླ་བྲང་འདི་འཚུབ་ཆེ་བས་བླ་རབས་སྔ་ཕྱི་མང་པོས་མཐར་ཕྱིན་དཀའ་བ་བྱུང་ཡང༌། ཉིད་བཞུགས་སྐབས་འཚུབ་ཅི་ཡང་མེད་པས་ཤིན་ཏུ་བདེ་བར་བྱུང་བ་ཐུགས་བསྐྱེད་དང་རྒྱུན་གྱི་ཉམས་བཞེས་མ་གཡེལ་བའི་སྟོབས་ཡིན་པར་མངོན། དེ་སྐབས་ཀྱང་འགའ་ཞིག་གིས་རིགས་གྲྭ་གཅིག་པོ་འདི་གེགས་ཅི་ཡང་མེད་པར་མཐར་ཕྱིན་པ་ལེགས་བྱུང་བས་མཚམས་འདིར་དགོངས་པ་ཞུས་ན་ཞེས་གྲོས་འདེབས་པ་བྱུང་ཡང༌། དམ་པ་ཉིད་བྱ་བ་གང་བརྩམས་མཐར་ཐོན་ངེས་ཤིག་བྱེད་པ་རང་གི་གནས་ལུགས་ལྟ་བུ་ཡིན་པ་དང༌། ཟར་ཟིར་གྱི་གཡེང་བ་ཆུང་བས་ཐུགས་དམ་འཕེལ་བ་སོགས་ཀྱི་ཐུགས་སྤྲོ་བར་གྱུར་ཏེ་སླར་ཡང་བཞུགས་པས་ཉེ་ཞོ་མེད་ཅིང་རིགས་གྲྭ་ཕྱི་མ་སྔོན་ལས་བལྡབ་འགྱུར་ལྟ་བུར་གཏོང་རྒྱུ་བྱུང་བ་འོག་ཏུ་འཆད་པར་འགྱུར་རོ། །འདུས་པའི་དགེ་འདུན་
མཆོག་གི་གྲྭར་ཕེབས་པའི། །འདུན་པ་ཤུགས་དྲག་ཐུགས་ལ་བརྣག་ན་ཡང༌། །འདུལ་བ་མཁན་པོའི་གོ་སར་བཀའ་བབས་པ། །འདའ་བར་མ་ནུས་དེ་ཡི་ཁྲི་ལ་འཁོད། །ཐུན་མོང་ཐུན་མོང་མིན་པའི་ལམ་བཟང་གི །ཐུགས་དམ་ཟབ་མོས་ཉིན་མཚན་དུས་འདའ་ཞིང༌། །ཐེག་གསུམ་དགེ་འདུན་སྡེ་ལ་བསྙེན་བཀུར་སོགས། །ཐམས་ཅད་གེགས་མེད་སྨོན་བཞིན་ལྷུན་གྱིས་གྲུབ། །ཧར་ཆིན་ཝང་རཏྣ་སིངྷིའི་སྲས་ཐོ་ཡོན་མཐུ་སྟོབས་ཉི་མ། ཧར་ཆིན་ཞབས་དྲུང༌། ཧར་ཆིན་ཟླ་བ་ཐོ་ཡོན་སོགས་དུ་མས་དགེ་རྒན་དུ་བསྟེན། དགེ་ཕྲུག་སོགས་ལ་བཀའ་བཀྱོན་ཆེར་མི་གནང་ཡང༌། སྟོབས་ཀྱིས་བསྡིགས་པ་མེད་པར་འགྲོ་ཀུན་འདུད། །ཅེས་པ་ལྟར་ནང་གི་རྟོགས་པའི་སྟོབས་ཀྱིས་རིགས་མཐོན་པོ་ང་རྒྱལ་ཅན་སོགས་ཅི་འདྲ་ཞིག་ཡིན་ཀྱང་གསུང་ལས་འདའ་མི་ནུས་པར་སྐྲག་པ་དང༌། དེའི་ཚོད་ཀྱིས་གུས་ཞེན་ཆེ་རུ་འགྲོ་བ་ཞིག་ཡོད་ལ། དཔེ་ཁྲིད་གནང་ཚུལ་ཡང་ལ་ལ་ཤེས་རབ་ཆེ་མདོག་གིས་ཡིན་བྱས་ནའང་འདི་བཞིན་བྱས་ཆོག །མིན་བྱས་ནའང་འདི་བཞིན་བྱས་ཆོག་ཅེས་རྣམ་གྲངས་མང་བ་ལ། ནང་ན་རང་ལུགས་ཐག་ཆོད་པའི་མཛུབ་མོ་འཛུག་ས་མེད་པ་དེ་འདྲ་མང་པོ་འོང་བར་སྣང་ཡང༌། དེ་འདྲ་གཏན་མི་མཛད་པར་རྩ་བ་ཡིག་ཆའི་དགོངས་པ་གཞིར་བཞག །གྲྭ་ཚང་གི་ཁས་ལེན་གྱི་རྒྱུན་འདི་ཡིན་ཞེས་གོ་བདེ་ལ་མདོར་འདྲིལ་བའི་གཙང་སིང་ངེ་བ་རེ་གསུངས་པ་དེ་སེམས་ལ་འཇགས་ནས་ཤིན་ཏུ་ཕན་ཐོགས་པ། སྔོན་འབྲེ་ཆེན་པོ་ཤེས་རབ་འབར་གྱི་ཞལ་ནས། ཆོས་གཅིག་ལ་དགེ་བཤེས་རྭ་བའི་ཆོས་ལས་ཁ་ཞེ་གཤིན་པ་མེད། རྒྱ་གར་གྱི་པཎ་གྲུབ་འདི་འདི་
སྐད་གསུང་བྱ་བ་ལས་རང་བཟོ་དང་བོད་ཀྱི་སྲ་བསྲེ་གཏན་ནས་མི་བྱེད་གསུང་བའི་དཔེ་ལྟ་བུ་ཞིག་ཡོད་པས་ཕན་ཐོགས་ཤིན་ཏུ་ཆེ། དེའི་གནད་ཀྱིས་རྒྱུས་ཡོད་རྣམས་དེ་འདྲའི་རིགས་ལ་ཁོང་དགེ་རྒན་དུ་བསྟེན་འཇུག་པས་ཕྱིས་ནས་པཱ་རིན་ཝང་གི་ཐོ་ཡོན་དང༌། ཨ་ལག་ཤཱ་ཝང་གི་ཐོ་ཡོན་སོགས་མང་དུ་བྱུང༌། མེ་བྱའི་ལོ་གཉིས་པའི་ཉི་ཤུར་པཎ་ཆེན་ཐམས་ཅད་མཁྱེན་པ་རྒྱལ་དབང་རིན་པོ་ཆེར་ཐུགས་རྫོགས་གནང་རྒྱུའི་དོན་དུ་ཕེབས་པར་ཆིབས་བསུ་དང་འབྲས་སྤུངས་སྤྱི་སོའི་ཇ་ཐབ་སྟེང་ནས་མཇལ་ཁ་ཞུས། གསུམ་པའི་ནང་དུ་པཎ་ཆེན་མཆོག་ནས་བདེ་ལམ་གྱི་གཟབ་ཁྲིད་སོགས་ཆོས་བཀའ་མང་པོ་གནང་བ་ཕལ་ཆེར་གསན། ས་ག་ཟླ་བའི་ཚེས་བཅོ་ལྔར་ཇོ་བོ་ཤཱཀྱ་མུ་ནིའི་དྲུང་དུ་པཎ་ཆེན་ཐམས་ཅད་མཁྱེན་པས་ཀུན་གཟིགས་རྒྱལ་བའི་དབང་པོར་ཐུགས་རྫོགས་ཀྱི་སྡོམ་པ་ཕོག་པའི་ལས་གྲལ་དུ་བཞུགས་ཏེ་ཐུབ་བསྟན་རིན་པོ་ཆེའི་རྒྱལ་མཚན་བསྒྲེངས་པ་ལ་ལེགས་སྨོན་གྲུབ་པའི་སྐལ་བཟང་མངོན་དུ་གྱུར། དེའི་རྗེས་ཐོགས་སུ་རྒྱལ་དབང་ཡབ་སྲས་དགེ་འདུན་སྟོང་ཕྲག་མང་པོ་དང་བཅས་གསོ་སྦྱོང་ལྷན་དུ་མཛད་དེ་སོ་སོར་ཐར་པའི་མདོ་འདོན་པ་ཉམས་སུ་མྱོང་བས་བསླབ་གཞི་ཡོངས་སུ་དག་པར་མཛད། ལོ་ཧྲིལ་པོར་པཎ་ཆེན་ཐམས་ཅད་མཁྱེན་པས་ཆོས་ཀྱི་འཁོར་ལོ་རྒྱ་ཆེར་བསྐོར་བས་གསུང་གི་བདུད་རྩི་མང་དུ་མནོས། དེའི་ལོ་རྗེས་མའི་གཉིས་པའི་ཟླ་མཇུག་ཏུ་པཎ་ཆེན་རིན་པོ་ཆེ་གཙང་དུ་ཕྱིར་ཕེབས་པར་ཆིབས་སྐྱེལ་ཞུས། ལོ་དེར་ཀློང་རྡོལ་གྲུབ་དབང་རིན་པོ་ཆེའི་དྲུང་ནས་རྗེ་ཡབ་སྲས་ཀྱི་གསུང་སོགས་ཆོས་བཀའ་ཡང་མང་དུ་གསན་ནོ། །ཚུལ་ཁྲིམས་ཕུང་པོ་ཡོངས་སུ་རྫོགས་ཟིན་ཀྱང༌། །ཚངས་སྤྱོད་མཆོག་གི་བརྟུལ་ཞུགས་
གསར་ནོད་ཀྱི། །ཚུལ་བཞེས་ལས་ཀྱི་ཁ་སྐོང་མཛད་པ་ཡིས། །ཚེ་རབས་འཕྲེང་བར་འབྲེལ་བའི་ལེགས་སྨོན་གྲུབ། །ཡམ་བཤད་སྦུན་པའི་ཕུང་པོ་འཕྱར་མིན་པར། །ཡང་དག་དོན་གྱི་སྙིང་པོ་སིལ་མ་ཡིས། །ཡ་རབས་ཐར་འདོད་ཞིང་པའི་རེ་སྐོང་གི །ཡོངས་འཛིན་གང་དེ་གཙུག་གིས་བསྟེན་བྱ་ཡིན། །དགུང་ལོ་ཞེ་བརྒྱད་པ་ས་ཕག་གི་ལོ་བདུན་པའི་ཚེས་ལ་རྒྱལ་དབང་ཐམས་ཅད་མཁྱེན་པ་དང་ནོ་མིན་ཧན་ནས་ལོ་རྗེས་མར་འཇམ་དབྱངས་གོང་མ་ཆེན་པོ་དགུང་ལོ་བདུན་ཅུར་ཕེབས་རྒྱུའི་བ་ཡར་མཁན་པོ་ལ་འགྲོ་དགོས་པའི་བཀའ་བབས། དེ་ནས་ཕེབས་ཆས་སོགས་གང་དགོས་གཞུང་ནས་གྲ་བསྒྲིགས་པའི་ཐོག་ནས་བཅུ་གཅིག་པའི་ཚེས་ལ་ལམ་དུ་ཆས། ལྷོ་ཁ་བརྒྱུད་དེ་ཕེབས་པར་རྒྱ་བོད་ཀྱི་ས་ཚིགས་སོ་སོར་རྟ་འུལ་གྱི་གྲ་སྒྲིག་ལེ་ཐོགས་མེད་པས་ལམ་བགྲོད་ཤིན་ཏུ་བདེ་བ་བྱུང༌། ལྕགས་བྱི་ཟླ་བ་བདུན་པའི་ཉི་ཤུ་སྐོར་ལ་ཡཻ་ཧོར་དུ་འབྱོར། ཕྱི་ཉིན་གོང་མ་ཆེན་པོར་ཚེ་དཔག་མེད་ཀྱི་སྐུ། བྱི་རུའི་རྒྱན་འཕྲེང་སོགས་ཐོག་མའི་མཚམས་ཞུ་ཕུལ། དེ་ནས་བཟུང་དཔོན་གཡོག་ཐམས་ཅད་ལ་མཛོད་ནས་གསོལ་ཆས་ཀྱི་ཕོགས་སོགས་རྒྱ་ཆེ་བ་གནང༌། པཎ་ཆེན་ཐམས་ཅད་མཁྱེན་པར་མཇལ་བས་བོད་ཕྱོགས་ཀྱི་གསུང་གླེང་མང་དུ་གནང་ཞིང་དགྱེས་གཟིགས་ཆེ་བར་མཛད། ཉེར་བཞིའི་ཉིན་སྟོན་ཆེན་གནང་ཡུལ་གྱི་བཞུགས་གུར་ཤིན་ཏུ་ཆེ་བ་དབུས་སུ་ཀ་རིང་དྲུག །མཐར་ཀ་ཐུང་མང་པོ། ཕྱོགས་བཞིར་སྒོ་བཞི་ཡོད་པའི་དབུས་སུ་དཔངས་ལ་མི་ཚད་ཙམ་ཡོད་པའི་ཁྲི་རྒྱ་ཆེན་པོ་མདུན་དང་གཡས་གཡོན་ནས་སྐས་བཙུགས་པ། དེའི་སྟེང་དུ་
རིན་པོ་ཆེ་འབའ་ཞིག་ལས་གྲུབ་པའི་ཁྲི་ཆེན་པོ་ཉིས་བསྒྲིགས་ལ་གོང་མ་བདག་པོ་ཆེན་པོ་དང་པཎ་ཆེན་ཐམས་ཅད་མཁྱེན་པ་བཞུགས། གཡོན་ངོས་སུ་ལྕང་སྐྱ་རྡོ་རྗེ་འཆང༌། སྨིན་གྲོལ་ནོ་མོ་ཧན། རྟ་ཚག་རྗེ་དྲུང་རིན་པོ། ནང་གི་ཇ་སག་བླ་མ་རྣམས་དང་ཝང་ཆེ་ཁག་མང་པོ། གཡས་ངོས་སུ་གསོལ་དཔོན་གངས་ཅན་མཁན་པོ་དང་བ་ཡར་མཁན་པོ་ཉིད་སོགས་བཞུགས་པའི་གཤམ་ཙམ་ལའང་དཔོན་ཆེན་མང་པོ་འཁོད་པས། མཆོད་ཡོན་གཉིས་ལ་གསེར་རྐྱང་ལས་གྲུབ་པའི་སྡེར་བརྒྱ་ཕྲག་དང༌། གཞན་རྣམས་ལ་དངུལ་སྡེར་ཤ་སྟག་ཏུ་སྟོན་མོ་བསྟར་ཞིང༌། གོང་མའི་གསོལ་སྟོན་དེ་ནས་ནང་གི་བླ་མ་རྣམས་དང་མཁན་པོ་ཉིད་ལའང་གསོལ་རས་སྩལ། ཉི་ཤུ་ལྔ་ནས་བཟུང་ཉིན་བཅུའི་རིང་ཁྲང་ཞིའི་གཟིགས་མོ་བསྟར་བ་ལ་པཎ་ཆེན་གྱི་ཞབས་ཕྱི་ཞུས་ཏེ་ལན་ཁ་ཡར་ཕེབས། བརྒྱད་པའི་ཚེས་གསུམ་ལ་གོང་མ་ནས་པཎ་ཆེན་རིན་པོ་ཆེར་སྦོ་སྤས་ཞེས་པ་རིན་པོ་ཆེའི་ཐམ་ག་དང་འཇའ་ས་སྩལ་བར་བ་ཡར་གྱི་ཁ་བཏགས་ཕུལ། ཚེས་བདུན་ལ་པཎ་ཆེན་རིན་པོ་ཆེ་ནས་གོང་མར་བདུན་ཅུའི་བ་ཡར་གྱི་སྟོན་ཆེན་ཞུ་སྐབས་སོགས་གསོལ་སྟོན་རིམ་པ་དུ་མར་ཕེབས་ཏེ་གོང་མའི་གསེར་ཞལ་མཇལ། ཚེས་བཅུ་གསུམ་རྒྱལ་པོའི་འཁྲུངས་སྐར་གྱི་བ་ཡར་དངོས་གཞིའི་རྟེན་འབྱུང་གི་ཐོག་མ་རྒྱལ་དབང་རིན་པོ་ཆེའི་ལེགས་འབུལ་གྱིས་བྱེད་དགོས་པས་རྒྱལ་པོ་དང་པཎ་ཆེན་མཆོད་ཡོན་གོང་དུ་བཞུགས། ལྕང་སྐྱ་རྡོ་རྗེ་འཆང༌། བཙན་པོ་ནོ་མོན་ཧན། རྟ་ཚག་རྗེ་དྲུང་རིན་པོ་ཆེ། ནང་གི་ཇ་སག་བླ་མ་བཞི་སོགས་བླ་མ་སུམ་ཅུ་ཙམ་གྲལ་བྱས་ནས་འདོན་པ་གསུངས་པའི་འཕྲོར་མཁན་
པོ་ཉིད་ནས་བརྟན་བཞུགས་ཀྱི་བཤད་པ་གནང༌། འཇམ་དཔལ་རྡོ་རྗེ་རྣོན་པོ་མི་ཡི་རྗེར། །རོལ་པའི་གནམ་གྱི་ལྷ་མཆོག་ཞབས་པདྨོར། །གླིང་བཞི་རི་རབ་ཉི་ཟླ་ལ་སོགས་པ། །སྣོད་བཅུད་དགེ་མཚན་མཐའ་དག་དབུལ་བར་བགྱི། །ཞེས་སོགས་ཚིིགས་བཅད་རེ་དང་སྦྲགས་ཏེ་རིམ་པ་བཞིན་གོང་མའི་ཕྱག་ཏུ་ཕུལ་བ་བཞེས་ཏེ་ཤིན་ཏུ་དགྱེས་པའི་རྣམ་པ་མཛད། རྟེན་ཆས་ཀྱང་ནང་མཛོད་སྣ་ལྔའི་འདོག་བཅས་ཀྱི་མཎྜལ། འཇིགས་བྱེད་མགོན་ཆོས་ལྷ་མོ་སྐུ་ལྔ་སོ་སོ་དང་བཅས་པའི་ཐང་ཆེན་དཔངས་ཐོག་སོ་གཉིས་ཞེང་འདོམ་ཕྱེད་དོ་རེ་ཡོད་པ་གོས་ཆེན་རྒྱུ་རྙིང་ཁྱད་འཕགས་ཀྱི་གོང་གཤམ་ཅན་ཏོག་ཞལ་ཁེབས་སོགས་འགང་ཆེ་བ་གྲངས་མཚུངས་དགུ །དངུལ་གར་བླུག་གི་བདེ་མཆོག་ལྷ་ལྔ། ཀུ་རུ་ཀུལླེ་སོགས་དཔངས་ཁ་བརྒྱད་རེ་ཅན། དངུལ་དཀར་གྱི་རྒྱལ་སྲིད་སྣ་བདུན་བཀྲ་ཤིས་རྟགས་བརྒྱད་རྫས་བརྒྱད་སོགས་ཁྲུ་གང་ལྷག་ཙམ་རེ་ཡོད་པ། ཁ་ཆེ་ཤ་ཁམ། ཁ་སུར་བ་ཎི། འབའ་ཤ་རྒུན་འབྲུམ། བྱེ་རིས། ཤེལ་དཀར་སོ་སོ་ནས་སྒམ་བཅོ་ལྔ་རེ། སྤོས་དམར་དོ་པོ་ལྔ་བཅུ། ཕྲུག་དོ་པོ་བདུན་ཅུ་སོགས་རྟེན་ཆས་མཐའ་དག་རྒྱལ་བའི་ཕྱག་ཐམ་དང་བཅས་མ་ཉམས་པར་ཕུལ། དེའི་མཇུག་ཏུ་འཐུད་དེ་བཀྲ་ཤིས་ལྷུན་པོའི་སྐུ་ཆས་གསར་འབྱོར་གྱི་ཕུད་ལྟ་བུར་གོང་དུ་བདོག་པ་སྤེལ་བར་གནང༌། དེ་ནས་སྟོན་མོའི་སྐབས་མཁན་པོ་ཉིད་དང་ཡཻ་ཧོར་པོ་ཏ་ལའི་མཁན་པོ་མདུང་ནག་ཞབས་དྲུང་གཉིས་ཀྱིས་ཚོགས་གླེང་བྱས་པར་བརྗོད་དོན་ཕུན་སུམ་ཚོགས་ཤིང་རྗོད་བྱེད་ཚིག་བཀྲ་ལེགས་པ་དང་རྣམ་འགྱུར་སོགས་སྒོ་ཐམས་ཅད་ནས་ལྷུན་ཆགས་པས་མིག་དང་རྣ་
བའི་བདུད་རྩི་སྤྲོ་བར་མཛད། དེ་སྐབས་འཛམ་གླིང་གི་ཆེ་དགུ་ཕྱོགས་གཅིག་ཏུ་འཛོམས་པ་བཞིན་མཆོད་ཡོན་ཉི་ཟླ་ཟུང་དུ་འབྲེལ། གསེར་གྱི་རི་བོ་ལྟ་བུའི་བླ་མ་ཆེ་ཁག །འཇིག་རྟེན་མེས་པོ་ལྟ་བུའི་བློན་ཆེན་རྣམས་དང༌། གཞན་ཡང་ལུས་ཀྱི་ཆ་ལུགས་མི་འདྲ་བ། ངག་གི་སྐད་རིགས་མི་གཅིག་པ། བསམ་པའི་འཁྱེར་སོ་མི་མཚུངས་པའི་དཔོན་རིགས་དང་བློན་པོ་ཆེ་ཆུང་གྲངས་མེད་པ་ནམ་མཁའི་སྐར་ཚོགས་ལྟ་བུའི་དབུས་དེར་བརྟན་བཞུགས་ཀྱི་བཤད་པ་དང་ཚོགས་གླེང་སོགས་གང་གི་སྐབས་སུའང་དཔའ་ཞུམ་པ་མེད་པར་སྐུའི་གཟི་བྱིན་རྒྱས་ཤིང་གསུང་གི་གདངས་མཐོ་བས་ཁྲོམ་ཟིལ་གྱིས་གནོན་པ་བྱུང་བར། གོང་མ་ཆེན་པོ་ཤིན་ཏུ་ཐུགས་མགུ་བས་སྤྱིར་བླ་མ་སེར་མོ་བ་དང༌། སྒོས་སུ་ཉི་མ་ནུབ་ཕྱོགས་ཀྱི་བསྟན་པའི་ལར་རྒྱ། རྒྱལ་བའི་དབང་པོ་མཆོག་གི་འཕྲིན་ལས་ཀྱི་ཞབས་འདེགས་བླ་ན་མེད་པར་གྱུར། དེ་ནས་གྲལ་དུ་བཞུགས་སྐབས་གོང་མ་ཆེན་པོ་ནས་ཏཱ་ལའི་བླ་མའི་སྐུ་ཚབ་ཀྱི་གདན་དམའ་སོང་འདུག་གསུངས་ནས་འབོལ་སུམ་རྩེག་བྱེད་དུ་བཅུག་ཅིང༌། ཧོ་ཐོག་ཐུ་དེར་སྡོད་ཅེས་ཧོ་ཐོག་ཐུའི་ཐོབ་དང༌། མང་མྱུག་གི་ལྭ་བ། བྱུ་རུའི་རྒྱན་ཕྲེང་སོགས་གནང༌། གསོལ་སྟོན་གྲོལ་ནས་བླ་དཔོན་ཆེ་ཁག་མང་པོས་ཉིད་ལ་ལེགས་སོའི་ཁ་དར་ཕུལ། གོང་ནས་རྗེས་སོར་ཡང་གོས་ཆེན་དང་གོས་ཁུག་སོགས་ཀྱི་གནང་སྦྱིན་ལན་འགའ་ཞིག་སྩལ། གཙོ་ཆེར་པཎ་ཆེན་མཆོག་ནས་གོང་མར་ཞུ་མཁས་མཛད་པ་དང༌། དེའི་ཡན་ལག་ཏུ་དམ་པ་ཉིད་ཀྱིས་ཞབས་བརྟན་འབུལ་ཚུལ་སོགས་གང་ཅི་ནས་གོང་མ་ཆེན་པོ་ཤིན་ཏུ་དགྱེས་ཏེ་རྒྱལ་དབང་རིན་པོ་ཆེར་ཡུའུ་ཤིས་ཀྱི་ཐམ་ག་
འཇའ་ས་སོགས་གཟེངས་བསྟོད་ཚད་མེད་གནང་རྒྱུའི་སྒོ་དོད་པས་འཕྲིན་ལས་ཀྱི་གདུགས་དཀར་སྲིད་པའི་རྩེ་མོར་བསྒྲེངས་ཏེ་ཕེབས་པའི་དགོས་དོན་གཙོ་བོ་ལྷུན་གྱིས་གྲུབ། དགུ་པའི་ནང་ལ་ཕོ་བྲང་དུ་ཕེབས་ནས་ཤ་ར་སུ་མེར་བཞུགས། སྐུ་ཆས་རྣམས་དང་པོ་ནས་འདིར་ཕབ་ཡོད་པས་པཎ་ཆེན་རིན་པོ་ཆེར་མཎྜལ་སྐུ་གསུང་ཐུགས་རྟེན། ཕྲུག་བཅོ་ལྔ། ཐེར་དྲིལ་སུམ་ཅུ། སྤོས་དོ་པོ་གཅིག །མངའ་རིས་མགོ་སྟབ་པ་ཀོ་ཁྲ་གཅིག་བཅས་ཕུལ། ཞབས་ཕྱི་ཉེར་གསུམ་ཡོད་པ་སོ་སོས་ཀྱང་ཕྲུག་རེ་མཇལ་དར་དུ་ཕུལ། པཎ་ཆེན་རིན་པོ་ཆེ་ནས་ད་ལན་ཁྱེད་ཀྱིས་རྒྱལ་དབང་ཐམས་ཅད་མཁྱེན་པའི་སྐུ་དོན་ལར་རྒྱ་ལ་འདི་ལས་ལྷག་པའི་གོ་གཅོད་ཚུལ་མེད། ལེགས་སོ་རྒྱ་ཆེན་པོ་ཞིག་གི་བབ་འོས་ཡོད་ཀྱང་སླར་བོད་དུ་སོང་ནས་བྱེད་རྩིས་ཡིན་པས། ད་ལན་མཚོན་བྱེད་ཙམ་ཡིན་གསུང་སྟེ། མཛོད་གོས་ཁྱད་འཕགས་ཡུག་བཅུ་ནང་མཛོད་བཅས་གནང༌། ཞབས་ཕྱི་རྣམས་ལ་སྲང་བཅུ་རེ་དང་གོས་ཡུག་རེ་བདག་རྐྱེན་སྩལ། ཉིད་སྐབས་སྐབས་སུ་ལྕང་སྐྱ་རིན་པོ་ཆེའི་མདུན་དུ་ཕེབས་ཏེ་ཆོས་ཀྱི་འཕྲོས་པ། སྔོན་གྱི་གྲྭ་ས་སོ་སོ་དང་ཨ་མདོའི་ཕྱོགས་ཀྱི་ལོ་རྒྱུས། རྒྱ་ནག་གི་གནས་ཚུལ་སོགས་ལུགས་གཉིས་ཀྱི་གསུང་འཕྲོས་ཤིན་ཏུ་འཕེལ་ཞིང་ཐུགས་མཉེས་མཉེས་ཁོ་ན་གནང༌། ཉིན་གཅིག་ལམ་ཤེས་ཀྱི་ཡན་ལག་ལས་བརྩམས་པའི་དྲི་བ་ཞིག་གནང་བར་དོན་བདུན་ཅུ་དང་སྐབས་གཉིས་པའི་མཐའ་དཔྱོད་ཀྱི་ཚིག་ཟིན་ཅུང་མི་འདྲ་ཚུལ་དང་བཅས་ཞིབ་ཏུ་ཞུས་པར། ཁྱོད་ཀྱིས་ད་དུང་ཡིག་ཆ་མ་བརྗེད་འདུག་པ་ཤིན་ཏུ་ལེགས། འཇམ་དབྱངས་
བཞད་པའི་ཡིག་ཆ་འདི་གཅིག་གོ་ན་རི་མཐོན་པོའི་རྩེ་ནས་བལྟས་དུས་རི་ཆུང་ཐམས་ཅད་ཁ་འོག་ཏུ་ཆུད་ཡོད་པ་ལྟ་བུ་ཞིག་ཡིན། ངའང་ལས་དོན་གྱི་གཡེང་བ་ཆེ་སོང་བས་སློབ་གཉེར་བསམ་པ་ལྟར་ཞིག་བྱེད་རྒྱུ་མ་བྱུང་ཡང༌། ཡིག་ཆ་འདི་ལ་འཛིན་སྐྱོར་དགའ་མོ་བྱས་པའི་ཁུལ་ཡིན་པས་ད་ལྟ་པོ་ཏི་ལྔ་ལ་གོ་བ་ཞིག་ཆགས་པ་འདིའི་དྲིན་ཡིན། སྔ་མོ་ཅོ་ནེ་ནོ་མོན་ཧན་གྱིས་ང་ལ་ཉིན་གཅིག་གྲུབ་མཐའ་ཐམས་ཅད་ཀྱི་འདོད་ཚུལ་གསལ་བར་སྟོན་པ་ཁྱོད་ཀྱི་གྲུབ་མཐའ་འདི་ལྟ་བུའི་རྒྱས་པོ་སྔར་མ་བྱུང་འདུག་པས་བཀའ་དྲིན་ཆེ་ཟེར་བར། ངས་ཁྱེད་ཀྱིས་འཇམ་དབྱངས་བཞད་པའི་གྲུབ་མཐའ་ཆེན་མོ་གཟིགས་ཡོད་མོད་བྱས་པར་ལྟ་མ་མྱོང་ཟེར། འོ་ན་ངའི་འདི་དེའི་ནང་ནས་ཉེར་མཁོ་ཉུང་ཉུང་ཞིག་བཏུས་པ་ཡིན། གྲུབ་མཐའི་འགྲོ་ཕྱོགས་ཤིག་ཤེས་འདོད་ཚེ་བལྟ་ན་ལྟ་རྒྱུ་དེར་ཡོད་བྱས་པ་ཡིན་གསུང༌། དེ་ལས་འཕྲོས་ཏེ་བཀའ་མཆིད་མང་པོ་གནང་བའི་ལྷོངས་ཤིག་ལ་ཁྱེད་ཚོ་སྒོ་མང་གི་དགེ་བཤེས་ཚོས་རྡོ་རྗེའི་གཟེག་མའི་གཏན་ཚིགས་ཞེས་པའི་རྡོ་རྗེ་དེ་གསེར་གི་རྡོ་རྗེ་ཡིན་ཟེར་གི་ཡོད་དམ། ཟངས་ཀྱི་རྡོ་རྗེ་ཡིན་ཟེར་གི་ཡོད་གསུང་བར། དེ་འདྲ་མིན། རྡོ་རྗེ་ཕ་ལམ་དེས་རྡོ་དང་ལྕགས་ལ་སོགས་པ་ཐམས་ཅད་གཅོད་ནུས་པ་ལྟར། གཏན་ཚིགས་འདིས་མཐའ་བཞི་ལས་སྐྱེ་བར་འཛིན་པའི་སྒྲོ་འདོག་གི་མཐའ་ཐམས་ཅད་གཅོད་ནུས་པའི་དོན་ཡིན་ཞུས་པར། ངས་རྩེད་མོ་བྱས་པ་ཡིན། སྔ་མོ་ཁོང་གིས་དེ་འདྲ་བྱས་བྲིས་བྱུང་གསུངས་ནས་བཞད་མོ་གནང༌། དགེ་བཤེས་གཞན་འགའ་ཞིག་ལའང་དེང་སང་ཤེས་རབ་ཆེ་མདོག་ཁ་པོ་ཡོད་ཀྱང༌། རྩོད་གྲྭ་བཞག་ནས་ལོ་གཉིས་གསུམ་ཞིག་སོང་དུས་བརྩོད་
པའི་རྗེས་མེད་པར་འགྲོ་གི་འདུག །སྔོན་གྱི་དགེ་བཤེས་འདི་ཚོས་གང་ཤེས་པ་དེ་བརྗེད་རྒྱུ་མེད་པ་རྡོ་ཐོག་ཏུ་ཕུར་པ་བཏབ་པ་འདྲ་བ་ཞིག་འདུག་པ་དེ་སྔོན་དང་དེང་སང་གི་མིའི་རང་བཞིན་བརྟན་མི་བརྟན་དང་དང་པོ་ནས་སློབ་གཉེར་རྒྱག་ལུགས་མ་འདྲ་བ་རེད་ཅེས་བསྔགས་བརྗོད་མཛད་འདུག །ཉིན་གཅིག་ལྕང་སྐྱ་རིན་པོ་ཆེའི་མདུན་དུ་ཕེབས་སྐབས། ཨ་མྱེ་ཆང་ཁྱེད་རང་ལ་ཐུགས་ཤིན་ཏུ་དགྱེས་འདུག་པས། ཇ་སག་བླ་མའི་ཐོབ་ལྟ་བུ་རེ་ཞུ་འདོད་ན་ཟུར་ཙམ་ཞིག་བཏང་བས་ཆོག་ཚོད་རེད་གསུང་བྱུང་བར། སྤྱིར་བོད་ལུང་པ་ན་དེ་འདྲ་ཞིག་བྱུང་ཕྱིན་དོན་ཡོད་མེད་ཐམས་ཅད་འཇར་ནས་ཡོང་ཞིང༌། ཆེ་ཆུང་ཐམས་ཅད་མིང་དང་གོ་ས་ཞིག་མ་གཏོགས་བསམ་རྒྱུ་མེད་པའི་མིག་ལྟོས་ལ་དཔག་ན་རྙེད་པའི་མཆོག་ལེགས་པར་རྙེད་པ་ཡིན་མོད་ཀྱང༌། དམ་པ་འདི་ནི་རང་གི་གཤིས་ལུགས་ཀྱིས་འདོད་ཆུང་ཆོག་ཤེས་ལ་གནས་པ་དང་བྱ་བ་གང་ལའང་ཚོད་ཟིན་ཅིང༌། ཕུགས་སུ་དགོས་པ་ཅི་ཡོད་དང་གནོད་པ་ཅི་ཡོད་ཀྱི་ཕྱི་རྗེས་སུ་གཟིགས་པ་སོགས་ལུགས་གཉིས་ཆར་ནས་ལྷུས་ཐེངས་པའི་མཐར་ཐུག་པ་ཞིག་ཡོད་པས། དེ་རིགས་གཏན་མི་དགོས་ཞེས་ཞུས་ནས་དང་དུ་མ་བཞེས། ཚུལ་འདི་ནི་སྤྱོད་འཇུག་ལས། གྲགས་པའི་དོན་དུ་ནོར་གཏོང་ཞིང༌། །བདག་ཉིད་ཀྱང་ནི་གསོད་བྱེད་ན། །ཚིག་འབྲུ་རྣམས་ཀྱིས་ཅི་ཞིག་བྱ། །ཤི་ན་དེས་ཀོ་སུ་ལ་བདེ། །བསྟོད་དང་གྲགས་པའི་རིམ་གྲོ་ནི། །བསོད་ནམས་མི་འགྱུར་ཆེར་མི་འགྱུར། །བདག་སྟོབས་མི་འགྱུར་ནད་མེད་མིན། །ལུས་བདེ་བར་ཡང་མི་འགྱུར་རོ། །ཞེས་མིང་དང་གྲགས་སྐམ་དེས་
ཅི་ལའང་ཕན་རྒྱུ་མེད་པར་གསུང་བའི་དོན་ཁ་བཤད་ལག་ལེན་དུ་ཡོད་པ་ཆོས་དང་རྒྱུད་འདྲེས་པའི་རྣམ་ཐར་རྨད་དུ་བྱུང་བའོ། །དགུ་པའི་བཅུ་གསུམ་ལ་སོའུ་ཧེའི་རྟེན་བྱ་བ་རྒྱལ་པོ་ན་རིམ་ཁྲི་འདོན་གནང་སའི་ཕོ་བྲང༌། རྒྱུན་པར་རྒྱལ་པོའི་བཀའ་མེད་པར་ནང་དུ་སོང་ཡང་མི་ཆོག་པ་དེར་མཆོད་ཡོན་ཞལ་འཛོམ་གྱི་སྟོན་མོ་གནང་བའི་བཞུགས་གྲལ་དུའང་ཕེབས། རྒྱུན་པར་མཁན་ནང་རྣམས་ཞག་གྲངས་འཆར་ཅན་གྱི་ཕོགས་ཡོད་པ་གྲུབ་ནས་མི་སྡོད་ཀྱང་འདི་ལོ་གོང་མ་ཆེན་པོ་ནས་ད་ལོ་དགུན་གྲང་མོ་རེད། ཏཱ་ལའི་བླ་མའི་ཨེལྖི་མཁན་པོ་ལ་ཕོགས་འཕར་མ་གནང་རྒྱུ་ཡིན་པས་སེམས་བདེ་མོ་བྱས་ནས་སྡོད་ཅེས་བཀའ་བསྒྱུར་ཞིང༌། བུ་ལ་ཧན་གྱི་ཏཱ་ཧུ། དངུལ་གྱི་ཁྲུས་བུམ་ཁྲུས་གཞོང༌། སྒ་སྲབ་སྡོམ་བཅས་ཆ་འགྲིག་རྣམས་གནང༌། འོན་ཀྱང་ཉིད་ལོ་རྗེས་མར་རིགས་གྲྭ་གཏོང་དགོས་པའི་ཐུགས་ཁུར་གྱི་སྟབས་ལྕང་སྐྱ་རིན་པོ་ཆེ་ལ་ངས་རིགས་གྲྭ་མི་ནོན་འདུག་སྟབས་དགོངས་པ་ཞུ་ཐབས་ཤིག་བཀའ་དྲིན་བསྐྱང་དགོས་ཞུས་པར་ངས་ཁྱོད་ཤེས་རྒྱ་ཆེ་བསམ་རེ་མ་ཆེ་བ་རེད། གོང་མ་རྒྱལ་པོས་དགུན་གྲང་གི་གསུངས་པ་དེ་ས་དང་རྡོ་གྲང་གི་བྱས་པ་མ་རེད། ཁྱོད་ལ་ཐུགས་རྩིས་ཆེ་བས་ཤ་ཚ་གནང་བ་རེད། གཏོང་སྒོ་ཅི་འདྲ་བྱེད་རྒྱུ་ཡིན་ཡི་གེ་ཞིབ་མོ་བྲིས་ན་རྟ་ཟམ་ཐོག་ནས་གྲཻ་ཙི་བཏང་ཆོག་གསུང༌། དེ་བཞིན་བྱས་ཏེ་གྲཻ་ཙི་བཏང་བ་སྲིད་སྐྱོང་ནོ་མོན་ཧན་གྱི་ཕྱག་ཏུ་འབྱོར་བས། ཁོང་གིས་ཀྱང་སེར་འབྲས་ཀྱི་བླ་མ་རྣམས་ལ་ད་ལོ་མཁན་པོ་ཆོས་དར་གྱིས་གོ་བཅད་ཡོད་པར་སྣང༌། གཞན་གྱི་དོན་དག་ལ་གོང་མ་ཚང་གིས་འདི་འདྲ་བྱས་ནས་གྲཻ་ཙི་བཏང་མི་ཡོང༌། ཁོ་ལ་གོང་མ་ཧ་ཅང་མཉེས་ནས་བདག་
རྐྱེན་ཆེན་པོ་བྱུང་བ་རེད་གསུང་སྟེ་དེ་ག་རང་ཡིན་པར་སྣང་ངོ༌། །གོང་ཞབས་མཆོད་ཡོན་གདན་འཛོམ་མདུན་ས་ཆེར། །གོང་ས་མཆོག་གི་བཀའ་འཕྲིན་སྤེལ་བ་ལ། །གོང་ན་མེད་པའི་རྣམ་དཔྱོད་གར་བསྒྱུར་ཚེ། །གོང་མ་ཆེན་པོས་དགྱེས་ཞལ་ལྷུག་པར་བསྟན། །རྒྱལ་བློན་ནམ་མཁའི་སྐར་ཚོགས་ལྟ་བུའི་དབུས། །རྒྱལ་དབང་མཆོག་གི་མཛད་པ་འཕྲིན་ལས་ཀྱི། །རྒྱལ་མཚན་སྲིད་པའི་རྩེ་མོར་བསྒྲེངས་པ་འདི། །རྒྱལ་བའི་བསྟན་ལའང་བྱ་བ་ཆུང་ངུ་མིན། །རིགས་གྲྭའི་གཏོང་སྒོའི་སྐོར་ཉིད་ནས་གསུང་བཀོད་གནང་བ་བཞིན་སྡེ་པ་སྐལ་བཟང་སོགས་ཀྱིས་ཁུར་ལེན་བྱས་ཏེ། འགྱེད་ཆེན་ལ་ཞོ་ལྔ་རེ། ཉིན་ལྟར་གྱི་མང་འགྱེད། སྒོ་མང་ལ་ལྷག་མཆོད་གྲྭ་ཇ་བཞིའི་ཐོག་འགྱེད་དངུལ་ཞོ་གསུམ་རེ། ཁམས་ཚན་ལ་ཁ་བཏགས་བཅས་བཏང་སྟེ། རྒྱུན་པར་འདུལ་ཤག་རྒྱལ་གསུམ་རིགས་ཆུང་ཡིན་ཀྱང་རིགས་འབྲིང་གི་གཏོང་སྒོ་ལས་ཀྱང་ལྷག་པ་བྱུང༌། སྔ་ལོ་བསྐུལ་མ་གནང་ཡོད་པ་བཞིན་ངེད་ཀྱིས་ཀྱང་མང་ཇ་གཅིག་དང་རྡོ་ཚད་བདུན་གྱིས་སྐར་ལྔའི་འགྱེད་བཅས་རིགས་གྲྭའི་ཞལ་འདེབས་སུ་ཕུལ། དེ་ནས་ཕོ་བྲང་དུ་ཙནྡན་ཇོ་བོ་སོགས་ལ་མཆོད་འབུལ་དང་ཕྱག་སྐོར། དད་ལྡན་དུ་མར་ཆོས་སྦྱིན་ཡང་མང་དུ་གནང༌། པཎ་ཆེན་ཐམས་ཅད་མཁྱེན་པ་དགོངས་པ་གཞན་དུ་གཏད་རྗེས་ཧོ་ཐོག་ཐུ་རྣམས་དང་ལྷན་དུ་ཟླ་བ་གཅིག་གི་རིང་དགོངས་རྫོགས་ཀྱི་རིམ་པ་བསྒྲུབས་ཏེ་གསོལ་འདེབས་ཞུས། ཉིད་ནས་སྒེར་དུའང་མཆོད་འབུལ་སོགས་རྒྱ་གང་ཆེ་ཞུས། དེ་སྐབས་ཕྱོགས་སོ་སོ་ནས་པཎ་ཆེན་ཐམས་ཅད་མཁྱེན་པར་བསྙེན་རྫོགས་ཀྱི་
སྡོམ་པ་ཞུ་བའི་ཕྱིར་འོངས་པ་མང་པོ་ལུས་སོང་བ་རྣམས། ལྕང་སྐྱ་རིན་པོ་ཆེ་ནས་པཎ་ཆེན་གྱི་ཡོངས་འཛིན་ལ་བསྒྲུབ་ཏུ་བཅུག་ན་ཞུས་པར། གོང་མས་ཏཱ་ལའི་བླ་མའི་ཨེལྖི་མཁན་པོ་འདུག་པ་དེ་ལ་བསྒྲུབ་ཏུ་ཆུག་གསུང་སྟེ། བསྒྲུབ་བྱ་སུམ་བརྒྱ་ལྷག་ཙམ་ལ་བསྙེན་རྫོགས་ཀྱི་སྡོམ་པ་ཕོག་སྟེ་བསླབ་པ་ཡོངས་སུ་རྫོགས་པའི་གཞི་ལ་བཀོད་ཅིང་ཐར་པའི་ས་བོན་གྲུང་པོ་འདེབས་པར་མཛད། འདི་ནི་པཎ་ཆེན་མཆོག་གིའང་མཛད་པའི་འཕྲོ་བསྐངས་ཏེ་ཟག་མེད་ཀྱི་དགོངས་པ་ཡོངས་སུ་རྫོགས་པའི་སྒྲུབ་པའི་མཆོད་པ་བླ་ན་མེད་པ་ཡིན་ལ། བསྒྲུབ་བྱ་དེ་དག་ཀྱང་མགོན་མེད་སྐྱབས་མེད་དུ་ལུས་པའི་ཚེ་ཡིད་ལ་བརྣག་པའི་དོན་ལས་ཀྱི་ཆོ་གར། ཁྱོད་སྔོན་བདག་ལེགས་པར་གསུང་བའི་ཆོས་འདུལ་བ་ལས་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་ན་ཅི་མ་རུང་སྙམ་དུ་སྨོན་པ་དེ། དེང་ཁྱོད་མཁན་པོར་འོས་པ་དང་སློབ་དཔོན་དུ་འོས་པ་དང༌། གསོལ་བ་དང་གཞིའི་ལས་མི་གཡོ་བ་བཞག་པར་མི་འོས་པས་རབ་ཏུ་བྱུང་ཞིང་བསྙེན་པར་རྫོགས་སོ། །ཞེས་གསུངས་པ་བཞིན་མཛད་པས་བཀའ་དྲིན་བླ་ན་མེད་པར་གྱུར་ཏོ། །ཚུལ་དེ་དག་ལ་བརྟེན་ནས་ཚོ་ཆེན་ཞེ་དགུ་སོགས་ཀྱི་མཇལ་བ་དང་ཆོས་འབྲེལ་ཞུ་མཁན་ཡང་ཟམ་མ་ཆད་པར་བྱུང༌། དེའི་ཞར་ལ་བདོག་པའི་མཆོད་སྤྲིན་རྒྱ་ཆེ་ཞིང་དངོས་གཙང་བ་དབྱར་གྱི་ཆར་སྤྲིན་བཞིན་འདུས་པས་རིགས་གྲྭའི་གཏོང་སྒོ་སོགས་ཀྱི་ཐེབས་གང་དགོས་དཀའ་ཚེགས་ཅི་ཡང་མེད་པར་ལྷུན་གྲུབ་ཏུ་བྱུང་སྟེ། ཕར་ཕྱིན་བསྡུས་པ་ལས། ཚིག་ཏུ་མ་བརྗོད་ཚོགས་སུ་མ་གྱུར་ཀྱང༌། །ཉམས་སུ་མཁོ་བའི་ལོངས་སྤྱོད་རིམ་གྲོ་འདུ། །ཞེས་ཚུལ་ཁྲིམས་ཀྱི་ཕན་
ཡོན་དུ་གསུངས་པ་དང༌། དཔག་བསམ་འཁྲི་ཤིང་ལས། བསོད་ནམས་ལྡན་པའི་ཉེར་མཁོ་རྣམས། །འབད་པ་མེད་པར་ཕུན་སུམ་ཚོགས། །ཞེས་པ་ལྟར་རོ། །འདི་ནི་མཚོན་བྱེད་ཙམ་ཡིན་གྱི། མངོན་རྟོགས་རྒྱན་ལས། བདེ་སྒྲུབ་ཡོན་ཏན་ཕུན་ཚོགས་ཀུན། །རྒྱ་མཚོ་ཆེ་ལ་ཆུ་བོ་བཞིན། །འབྲས་བུ་མཆོག་གིས་སྦ་བ་ཡི། །སེམས་དཔའ་ཆེན་པོ་དེ་ལ་ནི། །རྣམ་པ་ཀུན་ཏུ་རྟེན་པར་བྱེད། །ཅེས་གསུངས་པ་ལྟར་སེམས་དཔའ་ཆེན་པོ་རྣམས་ལ་བདེ་དགེ་ལེགས་ཚོགས་ཀྱི་ཡོན་ཏན་ཐམས་ཅད་རྒྱ་མཚོ་ལ་ཆུ་བོ་བཞིན་དུ་འདུ་བ་ནི་ཆོས་ཉིད་ཡིན་ནོ། །དེ་རྗེས་གོང་མ་ཆེན་པོ་ནས་རྒྱལ་དབང་ཐམས་ཅད་མཁྱེན་པར་འཚམས་ཞུས་ཀྱི་ལན་གསེར་དངུལ་གོས་ཆེན་རིན་པོ་ཆེའི་སྤྱད་པ་སྣ་ཚོགས་པས་མཚོན་ཁྱད་ནོར་དཔག་ཏུ་མེད་པའི་རྟེན་ཆས་དང༌། ཉིད་ལའང་གནང་སྦྱིན་རྒྱ་ཆེན་པོ་བཅས་སྩལ་ཏེ་གསེར་གྱི་རྒྱལ་ཁབ་ནས་བཏེག་ས་ཚིགས་སོ་སོའི་རྒྱའི་དཔོན་པོ་རྣམས་ཀྱིས་བསུ་སྐྱེལ་དང་ཚ་ཞག་གི་གྲ་སྒྲིག་རྣམས་བཀུར་གཟོས་ཕུལ་དུ་ཆེ་བའི་སྟེང་ནས་རིམ་གྱིས་ཕེབས་ཏེ་རྒྱ་གྲོང་ཟད་མཚམས་སུ་དར་རྩེ་མདོ་ས་དཀར་མགོའི་ནང་ནས་བཞུགས། ལྕགས་ལ་རྒྱལ་པོའི་ཡཱ་མུན་ལ་གདན་འདྲེན་བྱས་ཏེ་འབུལ་བ་དང་བསྙེན་བཀུར་ཞུས། ལྔ་མཆོད་དགོན་དང་ལྷ་མོ་རྩེའི་དགོན་པ་གཉིས་ཀྱིས་གདན་དྲངས་ཏེ་བསྙེན་བཀུར་བསྟབས། དགའ་ལྡན་ལྷ་བརྒྱ་མ་དང་ཆོས་སྤྱོད་ཁ་ཤས་ཀྱི་ལུང་ཞུས། དངོས་འབུལ་གྱ་ནོམ་པ་ཕུལ། ཁམས་ལི་ཐང་ལ་ཕེབས་ནས་སྡེ་པ་ཨ་སང་ནོར་བུའི་ནང་དུ་བཞུགས། ལི་ཐང་མཁན་པོ་ཆོས་གྲགས་ཀྱིས་ལི་ཐང་དགོན་པར་གདན་འདྲེན་ཞུས་པར་
ཕེབས་ཤིང་མང་འགྱེད་གནང༌། དེ་ནས་རིམ་གྱིས་ཕེབས་ཏེ་འབའ་སྡེ་པ་རྣམ་ངེས་ཚང་ནས་བཞུགས། འབའ་སྡེ་ཆེན་ཁང་སར་དུ་གདན་འདྲེན་ཞུས། འབུལ་བ་དང་བསྙེན་བཀུར་གཟབས། སྨ་ཁམས་ལ་ཕེབས་ཏེ་འོད་ཟེར་སྤྲུལ་སྐུའི་ནང་དུ་བཞུགས། སྨ་ཁམས་ཐེ་ཇིས་གདན་དྲངས། དངོས་འབུལ་དང་བསྙེན་བཀུར་གང་ལེགས་བྱས། དེ་ནས་ཁམས་བྲག་གཡབ་བྱམས་མདུན་དུ་ཕེབས། བྲག་གཡབ་ཆེ་ཚང་དང་ཆུང་ཚང་གཉིས་ཀྱིས་མཚམས་ཞུ་ཕུལ། ཁམས་ཆབ་མདོར་རྒྱལ་བ་འཕགས་པ་ལྷ་དང་ཞི་བ་ལྷ་རྣམ་གཉིས་དང་མཇལ་འཕྲད་གནང༌། དངོས་འབུལ་གྱ་ནོམ་པ་བཏེག །ཚུར་ལའང་གནང་སྦྱིན་གཏོས་ཆེ་བ་སྩལ། ཁམས་རི་བོ་ཆེར་ཕེབས། ནགས་ཤོད་དགོན་པའི་ཇ་སག་བླ་མས་མཚམས་ཞུ་དང་དངོས་འབུལ་བགྱིས། ཁམས་ཤོ་པ་མདོའི་དགོན་པར་ཕེབས་སྐབས་གྲྭ་མང་ནས་རྟེན་འབྲེལ་བསྟོད་པའི་ལུང་སོགས་ཆོས་བཀའ་འགའ་ཞིག་ཞུས་ཏེ་དངོས་འབུལ་དང་བསྙེན་བཀུར་ཤིན་ཏུ་གཟབས། དེ་ནས་རིམ་གྱིས་ཕེབས་ཏེ་ནུབ་གངས་ལའི་མདོ་རྡོ་ཐུག་ན་བཞུགས་པའི་དགུང་མོ་ཕྱག་མཛོད་ལ་ནུབ་གངས་ལ་འདིར་བསྟན་མ་གནས་པ་འདྲ་གསུང༌། དེ་ཅི་རེད་ཞུས་པར། དེ་ནས་བསྟན་མ་ཕེབས་ཏེ་ཁྱོད་ལ་སྒོ་མང་མཁན་པོ་ཡོང་གསུང་བ་ཞིག་རྨིས་བྱུང༌། འོན་ཀྱང་ང་ལ་དེ་ཡོང་དོན་ག་ལ་ཡོད་གསུང༌། དེ་ལྟར་ལམ་སྐབས་སུ་ཉེ་ཞོ་ཅི་ཡང་མེད་ཅིང་བསྟན་འགྲོའི་དོན་མཛད་བཞིན་པའི་མུ་ནས་ལྷ་སར་ཕེབས། དེའི་ཚེ་ཨམ་བན་གཉིས་དང་བཀའ་བློན་བཞི། གོང་མའི་ཆོ་ལོ་ཡོད་པ་རྣམས་ཀྱིས་གསེར་ཡིག་ལ་ཕེབས་བསུ་དང༌། མཁན་པོ་ཉིད་ལ་ཇ་ཐབ་བྱས། དེ་རྗེས་
གསེར་ཡིག་པོ་ཏ་ལར་གདན་འདྲེན་ཞུས་སྐབས་ནོ་མིན་ཧན་གཟིམ་ཆུང་ཕྱི་མའི་སྒོར་ཕེབས་ནས་པུས་བཙུགས། རྒྱལ་བ་རིན་པོ་ཆེ་བཞུགས་ཁྲིའི་རྩར་ཕེབས། དེ་ནས་ཉིད་ཀྱིས་གོང་མའི་བཀའ་བསྒྱུར་བ་ནི་གནམ་གྱི་ལྷའི་བཀའ། ཁྱོད་ཏཱ་ལའི་བླ་མའི་སྤྲུལ་སྐུ་བདེ་མོ་ཨེ་ཡིན་ཞེས་ཞུས་ཏེ་རྒྱལ་བའི་ཕྱག་ཏུ་གསེར་ཡིག་ཕུལ། རྟེན་ཆས་བསམ་གྱིས་མི་ཁྱབ་པ་རྣམས་རིམ་བཞིན་སྤྱན་ལམ་དུ་བསྟར། ནོ་མིན་ཧན་དང་ཨམ་བན་གཉིས་བཀའ་བློན་བཞི། བོད་ཀྱི་ཆོ་ལོ་ཡོད་པ་རྣམས་ལ་སོ་སོའི་གོ་བབ་ཀྱི་གོང་མའི་རྟེན་ཆས་རིམ་པར་སྤྲད། དེ་ནས་གཞུང་གིས་སྟོན་ཆེན་གནང༌། དེའི་སྟེང་དུ་སྐྱབས་མགོན་རྒྱལ་བ་རིན་པོ་ཆེ་དང་ནོ་མིན་ཧན་སོགས་ཐུགས་ཤིན་ཏུ་དགྱེས་ཉམས་ཀྱི་གསུང་གླེང་མང་པོ་མཛད། ཞག་ཁ་ཤས་སོང་ནས་འབྲས་སྤུངས་སུ་ཕེབས། ཚོགས་ཆེན་ལ་མང་ཇ་བཞི་དང་འགྱེད་ཁ་རེ། སྒོ་མང་གྲྭ་ཚང་ལ་གྲྭ་ཇ་བཞི་དང་དངུལ་ཞོ་གསུམ་རེ། བསམ་བློ་ཁམས་ཚན་ལ་དངུལ་ཞོ་དོ་རེ་དང་ཚོམས་ཇ་བཞི། བིས་མདོ་མི་ཚན་ལ་དངུལ་ཊཾ་ཁ་རེ་དང་ཚོམས་ཇ་བཞི་བཏང༌། རྒྱལ་བ་རིན་པོ་ཆེར་གཟིམ་ཆུང་ནང་དུ་འབུལ་བ་དངུལ་གྱི་མཎྜལ་འདོགས་བཅས། ནང་མཛོད་ཁ་བཏགས། སྐུ་གསུང་ཐུགས་རྟེན། དངུལ་སྲང་ཉིས་བརྒྱ། གོས་ཡུག་བཅོ་ལྔ། ཤིང་ཐོག་སྣ་ཚོགས་ཀོ་ཁྲ་ལྔ། ཤིང་ཐོག་ཨ་མྲ་སྒམ་གསུམ། ཐ་མ་ཁ་ཀོ་ཁྲ་ལྔ་བཅས་རྣམ་གྲངས་ཉིས་བརྒྱ་དང་སུམ་ཅུ་རྩ་གསུམ། ནོ་མིན་ཧན་ལའང་མཎྜལ། མཛོད་བཏགས། སྐུ་གསུང་ཐུགས་རྟེན། དངུལ་སྲང་བརྒྱ། གོས་ཡུག་བདུན། ཤིང་
ཐོག་ཀོ་ཁྲ་བཞི། ཐ་མ་ཁ་ཀོ་ཁྲ་གསུམ་བཅས་རྣམ་གྲངས་བརྒྱ་དང་དགུ་བཅུ་ཕུལ། འདུལ་བ་བླ་བྲང་རྩིས་སྤྲད་ནས་ལྷ་དབང་གླིང་དུ་ཟུར་བཞུགས་མཛད། རྒྱལ་དབང་རིན་པོ་ཆེ་ནས་ཁྱོད་རང་གོང་མ་བདག་པོ་ཆེན་པོ་དགུང་ལོ་བདུན་ཅུར་ཕེབས་པའི་བཀྲ་ཤིས་ཁྲི་ཕྲག་གི་བ་ཡར་འབུལ་བར་ཕྱིན་སྐབས་འདི་གའི་བསྟན་སྲིད་ལ་རྒྱར་ཤིན་ཏུ་ཕན་པ་བྱུང་བས་དམིགས་བསལ་གྱིས་བསྐོ་བཞག་བགྱིས་པ་ཡིན་གསུང་སྟེ་ལྷོ་བྲག་ཆུང་ཚང་དགོན་མ་ལག་དང་བཅས་པའི་མཁན་ས་བདག་རྐྱེན་ལ་གནང༌། དེར་བྱོན་ནས་ཁྲི་འདོན་གནང་སྐབས་དངོས་འབུལ་རྒྱ་ཆེན་པོ་དང༌། ཁྱད་པར་སྐུ་གསུང་ཐུགས་རྟེན་གྱི་གཙོ་བོར་ཛྷཻ་ཁྱིམ་ལས་གྲུབ་པའི་ཇོ་བོའི་སྐུ་ཁྲུ་ཚད་མ་ཀན་ཆག་བྲག་རའི་ནང་རྟེན་གྱི་གཙོ་བོ་དེ་ཉིད་ཕུལ་བས་ཐུགས་ཤིན་ཏུ་དགྱེས། ཕར་ཡང་མང་འགྱེད་སོགས་ཀྱིས་ཚིམ་པར་མཛད། ལོ་བདུན་གྱི་རིང་ལ་འཛིན་བདག་བྱས། བིས་མདོ་མི་ཚན་ལ་སྔར་ཚོམས་མེད་པས། ཚོམས་ཇ་ཡོད་ཚེ་རྒྱུད་ཁང་སྟེང་གི་གཡབ་སྐོར་དུ་འཚོགས་དགོས་པ་སོགས་འོ་བརྒྱལ་བར་ཡོད་པ་དང༌། རྒྱལ་ཁང་རྩེའི་ཁང་མིག་རྣམས་སྔར་གྲྭ་པ་ནང་ཕན་ཚུན་ཉོ་ཚོང་བྱས་ཏེ་འགྲོ་བ་ཞིག་ཡོད་པ་དེ་སྐབས་ཉོ་མཁན་སོགས་འགྲིག་པ་ཞིག་མ་བྱུང་བས་ཚུར་བསྙེགས་ནས་འོངས་པ་ལྟ་བུས་དཀའ་ཚེགས་མེད་པར་བྱུང་བ་ཉོས་ཏེ་མི་ཚན་གྱི་ཚོམས་སུ་སྦྱོར་འཇགས་གནང༌། སྔར་གྲྭ་རྐྱང་སྐབས་དེར་ཡང་ཡང་བཞུགས་རྒྱུར་སོང་ཞིང༌། འདི་དུས་རྟེན་འབྲེལ་རང་འགྲིག་གིས་ཕྱག་ཏུ་འོང་ལུགས་དང༌། སྔོན་ཆོས་གྲྭ་འགྲིམ་སྐབས་མངའ་རིས་སྤྲུལ་སྐུ་རིན་པོ་ཆེ་ནས་ཁྱེད་རྒྱུད་གྲྭར་འགྲོ་རྒྱུ་བྱུང་ན་དགའ་ལྡན་ཁྲི་པ་བྱེད་རྒྱུའི་སྔོན་གྱི་ལས་སྨོན་གྱི་འཕྲོ་
ཞིག་འདུག་གསུངས་པ་རྣམས་གུང་བསྒྲིགས་ཏེ། དཔྱོད་ལྡན་འགའ་ཞིག་ཁྲི་རྒྱལ་ཁང་རྩེ་བའི་སྐྱེ་མཐར་གླེང་བའང་བྱུང༌། དེ་ནི་ཁྲི་ཐོག་ཉེར་ལྔ་པ། མཚན་དངོས་དཔལ་འབྱོར་རྒྱ་མཚོ་རྒྱལ་ཁང་རྩེར་ཡུན་རིང་བཞུགས་པས་རྒྱལ་ཁང་རྩེ་པར་གྲགས། རྭ་སྒྲེང་གི་ཇོ་བོ་འཇམ་པའི་རྡོ་རྗེ་དང་རྒྱལ་བ་བསོད་ནམས་རྒྱ་མཚོས་ཁུ་སྟོན་གྱི་སྐྱེ་བར་ལུང་བསྟན། ཕྱག་མཛོད་སེང་གེ་སོགས་རྒྱལ་བའི་སྤྲུལ་སྐུ་གདན་འདྲེན་ལ་སོག་ཡུལ་དུ་འགྲོ་སྐབས། ཐམས་ཅད་མཁྱེན་པ་ཡོན་ཏན་རྒྱ་མཚོ་ཞེས་མཚན་འདོགས་མཁན་ཡང་ཁོང་ཡིན་ལ། དུས་ཐོག་དེར་བསྟན་འགྲོ་ལ་ཕན་པའི་འཕྲིན་ལས་ཆེ་ཤོས་ཤིག་བྱུང་བར་སྣང་ངོ༌། །དེ་ལྟར་ལྷ་དབང་གླིང་དུ་ཟུར་བཞུགས་ཀྱི་སྐབས་ཕལ་ཆེར་བཅད་རྒྱ་ལྟ་བུའི་ངོས་ནས་ཐུགས་དམ་མཛད་ཅིང༌། གཞུང་ནས་བཀའ་ཕེབས་ཏེ་རྒྱལ་བའི་ཞབས་བརྟན་ལ་ཚེ་དཔག་མེད། སྒྲོལ་དཀར། མགོན་པོ་ཚེ་བདག་སོགས་ཀྱི་ཚེ་སྒྲུབ་ཀྱང་ལོ་ལྟར་བདུན་ཕྲག་གཉིས་གསུམ་རེ་གནང༌། ཆུ་སྟག་ལོ་ཉིད་ཀྱི་དགེ་ཕྲུག་ཧར་ཆིན་ཐོ་ཡོན་མཐུ་སྟོབས་ཉི་མ་ལ་ཞུར་བཅུག་སྟེ། སྙིགས་མའི་དུས་འདིར་རྗེ་བཙུན་མི་ལ་དང་མཚུངས་པར་ཆོས་བརྒྱད་ཀྱི་འཆིང་བ་གྲོལ་བའི་རྣལ་འབྱོར་གྱི་དབང་ཕྱུག་ཀློང་རྡོལ་བླ་མ་རིན་པོ་ཆེའི་དྲུང་ནས་ཐར་འདོད་ཡོངས་ཀྱི་འཇུག་ངོགས་གཅིག་པུ་བྱང་ཆུབ་ལམ་གྱི་རིམ་པ་ཆེན་མོ་མཆན་སུམ་སྦྲགས་ཀྱི་བཤད་ལུང་རྒྱས་པ་མན་ངག་གི་གནད་དུ་མས་བརྒྱན་པ་དང༌། རྒྱུད་སྡེ་ཀུན་གྱི་རྒྱལ་པོ་དང་མདོ་སྡེ་ཀུན་གྱི་ཟ་མ་ཏོག་དཔལ་གསང་བ་འདུས་པའི་རྒྱུད་འགྲེལ་པ་དང་བཅས་པའི་དགོངས་དོན་རྗེན་པར་སྟོན་པ་འགྲེལ་པ་བཞི་སྦྲགས་
ཀྱི་བཤད་ལུང་སྨིན་རྒྱས། གཞན་ཡང་བརྒྱད་སྟོང་པ། བཀའ་གདམས་གཞུང་དྲུག །འགྲེལ་ཆེན་དྲི་མེད་འོད། བྱམས་ཆོས་སྡེ་ལྔ། ཚད་མ་སྡེ་བདུན། མངོན་པ་གོང་འོག །འདུལ་བ་མདོ་རྩ་བ། མེ་ཏོག་ཕྲེང་རྒྱུད། མདོ་ཀུན་ལས་བཏུས་པ། བཞི་བརྒྱ་པ། ནག་པོ་གཞུང་དྲུག །ཕྲེང་བ་སྐོར་གསུམ། དྲིལ་བུའི་གཞུང་ཆུང་གསུམ། ལཱུ་ཨི་པའི་རྒྱ་གཞུང༌། མདོ་བསྲེ། མདོར་བྱས། དཀྱིལ་ཆོག་ཉི་ཤུ་པ། རྣམ་བཞག་རིམ་པ། གསང་འདུས་རིམ་ལྔ། སྒྲུབ་ཐབས་རྒྱ་མཚོ་དང་བ་རི་བརྒྱ་རྩའི་རྒྱ་གཞུང༌། སྣར་ཐང་བརྒྱ་རྩའི་རང་གཞུང་སོགས་རྒྱ་གཞུང་དང༌། བཀའ་གདམས་ཕ་ཆོས་བུ་ཆོས། རྒྱལ་པོ་བཀའ་འབུམ། དཔལ་འཁོར་ལོ་སྡོམ་པའི་རྒྱུད་འགྲེལ་སྦས་དོན་ཀུན་གསལ། རིམ་ལྔ་གསལ་སྒྲོན། བསྐྱེད་རིམ་དངོས་གྲུབ་རྒྱ་མཚོ། འཇིགས་བྱེད་བསྐྱེད་རིམ་ཆེན་མོ། འཁྲུལ་འཁོར་ཁམས་གསུམ་རྣམ་རྒྱལ། ཡིག་ཆུང་ཡང་ཆུང་སོགས་དང༌། མགོན་པོའི་བེ་བུམ། རྣམ་སྲས་བེ་བུམ། བེག་རྩེའི་བེ་བུམ། ལྷ་མོའི་ལས་གསུམ་རྣམ་གཞག །ཐར་རྩེ་པའི་སྒྲུབ་ཐབས་རྒྱ་མཚོ་དང༌། ཆོས་སྤྱོད་རབ་གསལ་གསར་རྙིང་གཉིས་ཀྱི་ལུང་སོགས་ཟབ་པ་དང་རྒྱ་ཆེ་བའི་ཆོས་རྒྱུན་དཔག་ཏུ་མེད་པ་ཟླ་བ་མང་པོར་སྦྲེལ་ཏེ་རྒྱ་མཚོ་ལས་ཆུ་བཅུ་པ་བཞིན་དུ་བཞེས་ནས་ཐུགས་ཀྱི་ཡོལ་གོ་འགེངས་པར་མཛད། ཕྱི་ནས་དགའ་ལྡན་ཁྲིར་ཕེབས་པ་གཟིམས་ཁང་ཆོས་མཛད་ངག་དབང་སྙན་གྲགས་སོགས་དགེ་བཤེས་མང་པོས་ཀྱང་དེའི་ཞར་ལ་ཐོབ་པས་རྒྱ་བོད་ཀྱི་གཞུང་འགངས་ཆེ་ཞིང་རྒྱུན་ཉག་ཕྲ་བ་མང་པོའི་ཆད་འཐུད་དུ་གྱུར་པའི་རྩ་བ་དམ་པ་འདི་ཉིད་ཀྱི་བཀའ་དྲིན་ཡིན། དེར་མ་ཟད་ཡོངས་འཛིན་ཡེ་ཤེས་རྒྱལ་མཚན་
དཔལ་བཟང་པོའི་ཞལ་སྔ་ནས་ལོ་ལྟར་སྟོན་དཔྱིད་ལ་བཀའ་ཆོས་ཆེན་མོ་གཉིས་རེ་གནང་གི་ཡོད་པས། ཤིང་འབྲུག་ལོའི་དཔྱིད་ཆོས་སྐབས་བདག་གིས་འདི་ལོ་སྟོན་ཀའི་བཀའ་ཆོས་ལ་འདུལ་བ་མདོ་རྩ་བའི་བཤད་ལུང་ཞིག་ཐུགས་རྗེས་གཟིགས་དགོས་ཞེས་གསོལ་བ་བཏབ་པར་དགྱེས་བཞིན་ཞལ་གྱིས་བཞེས། དབྱར་ཀ་ཡང་བསྐྱར་གྱིས་ཉེར་ལེན་ཞུས་པའི་ཚེ་ནོ་མིན་ཧན་ལ་གཅིག་ཞུ་དགོས་གསུང༌། དེར་ཕྱིན་ནས་ཞུས་པས། སྟོན་དཔྱིད་ཀྱི་བཀའ་ཆོས་འཆར་ཅན་འདི་སྡེ་པ་གཞུང་ནས་ཞུས་པ་ཡིན། སོ་སོས་གང་འདོད་རེ་གནང་རྒྱུ་ཡིན་ན་རང་རང་གིས་གདན་འདྲེན་ཞུས། རྨེ་རུ་ནས་འདུལ་བ་འདྲ་གནང་སྟེ་མི་ཚོའི་འདུ་ཁང་བཤིག་བཏང་མི་ཆོག་གསུང་ནས་དགོངས་པ་མ་ཁྲོལ། ད་བྱེད་ཐབས་མི་ཡོང་བར་འདུག་སྙམ་ཕྱིར་སོང་སྟེ་རྒྱུ་མཚན་བླ་མ་ལ་ཞུས་པས། ཁྱོད་རང་སེམས་ཕམ་མི་དགོས། འབྲས་སྤུངས་གདན་ས་ཁྱད་པར་ཅན་ཡིན་པས་ང་རང་ལ་མཇལ་འདུན་ཞིག་ཀྱང་ཡོད། ང་རང་ཚོའི་འདི་ཅི་ལས་ཀྱང་ཡག་པོ་ཞིག་ཡོང་གསུང༌། གསུང་ཟུར་དེ་ལ་བརྟེན་ནས་བདག་གི་དགེ་རྒན་རིན་པོ་ཆེ་མཁན་པོ་སྐལ་བཟང་དངོས་གྲུབ་པར་ད་ཆ་གཞན་སྟབས་མི་འདུག་པས་འབྲས་སྤུངས་སྤྱི་ཞུས་ཀྱི་མིང་ཞིག་འཇོག་དགོས་པར་འདུག་ཞུས་པས་ཐུགས་ཤིན་ཏུ་འཐད་ཀྱང་ནོ་མིན་ཧན་གྱི་སྟབས་དོགས་པ་གནང་གི་འདུག །འོན་ཀྱང་བླ་མ་ཚོགས་འདུའི་སྟེང་ནས་གླེང་བསླང་བར། དམ་པ་འདི་ཉིད་ནས། བླ་མ་གཞན་དང་མི་འདྲ་བ། གདན་ས་གཞན་དང་མི་འདྲ་བ། ཆོས་གཞན་དང་མི་འདྲ་བ་ཡིན་པས་དོགས་པ་བྱེད་རྒྱུ་ཡོད་དོགས་
མེད། ཞུས་ཐོང་ཞེས་གྲོས་མགོ་བཏོན་ཏེ་གདན་འདྲེན་ཞུས། གདན་ས་ཕན་ཚུན་ནས་བློ་གསལ་དོན་གཉེར་འདུས་པ་ལྔ་སྟོང་ཙམ་ལ་བདུན་པའི་ཚེས་བརྒྱད་ནས་བཟུང་ཉིན་ཉི་ཤུའི་རིང་བསྟན་པའི་ནང་མཛོད་འདུལ་བ་མདོ་རྩ་བའི་བཤད་ལུང༌། དེ་ནས་སྒོ་མང་ལ་མངོན་རྟོགས་རྒྱན་གྱི་བཤད་ལུང༌། བློ་གསལ་གླིང་དུ་འདུལ་བ་རྒྱ་མཚོའི་སྙིང་པོའི་བཤད་ལུང༌། བདེ་ཡངས་པར་སྨན་བླ་མཐོ་བརྩེགས་ཀྱི་རྗེས་གནང༌། སྔགས་པར་བླ་མ་ལྔ་བཅུ་པའི་བཤད་ལུང་བཅས་གནང༌། འབྲས་སྤུངས་སྤྱི་སོའི་གཏོང་སྒོ་རྣམས་རང་རང་ངོས་ཐད་ཀྱི་གཞི་ཀའི་ཐོག་ནས་ཡོང་བས་སྦྱིན་སྤྲོད་ལེན་བྱེད་རྒྱུ་ཆེར་མེད་སྟབས་སྤྱི་སོ་ནས་འབུལ་བའི་རྣམ་བཞག་ཆེར་མི་འདུག་ལ། རང་ཉིད་རྩ་བའི་ཞུ་བ་པོར་སོང་སྟབས་གཏང་རག་གི་ཡོན་དུ་མཎྜལ། སྐུ་གསུང་ཐུགས་རྟེན། དངུལ་རྟ་རྨིག་མ་གཉིས། གོས་ཡུག་ཁ་ཤས་བཅས་ཕུལ་བས། བཀའ་ཆོས་གྲོལ་ནས་ཕྱིར་ཡོང་སྐབས་དམ་པ་འདི་ཉིད་ནས། ཁྱེད་ཀྱིས་ངེད་འབྲས་སྤུངས་བླ་མ་ཚོའི་ངོའི་འབག་བཤུས་སོང་ཞེས་རྩེད་མོ་གནང་གི་འདུག་ལ། བཀའ་ཆོས་འདི་སྐོར་ལའང་ཁོང་བཀའ་དྲིན་ཆེ་བར་བྱུང༌། ཅི་མཛད་བསྟན་པ་ལ་ཕན་རླབས་བཀའ་དྲིན་ཆེ་བ་ཁོ་ནར་འབྱུང་བ་ནི་རྒྱལ་བའི་དམ་ཆོས་འཛིན་པའི་སྨོན་ལམ་གྲུབ་པའི་འབྲས་རྟགས་སུ་མངོན། དེས་མཚོན་ཏེ་ཡོངས་འཛིན་རིན་པོ་ཆེའི་མདུན་ནས་ཆོས་བཀའ་མང་པོ་སྔ་ཕྱིར་གསན་ཞིང༌། སྐབས་ཤིག་རྒྱལ་སྲས་རིན་པོ་ཆེ་སྐལ་བཟང་ཐུབ་བསྟན་འཇིགས་མེད་རྒྱ་མཚོའི་ཞལ་སྔ་ནས་ཀྱིས་རྣམ་རྒྱལ་གྲྭ་ཁང་དུ་རྡོ་རྗེ་ཕྲེང་བ་དང་མི་ཏྲ་བརྒྱ་རྩ་སོགས་གནང་བའང་ལེགས་པར་གསན་ཏེ་གསང་ཆེན་གདམས་པའི་ནོར་བུས་ཐུགས་ཀྱི་
བང་མཛོད་ཕྱུར་བུར་གཏམས། དོན་གཉེར་ཅན་འགའ་ཞིག་གིས་ནན་གྱིས་ཞུས་ཏེ་ཆོས་བཀའ་འགའ་ཞིག་གནང་ཡང་དེ་གཙོ་བོར་མི་མཛད་པར་རང་གིས་གསན་རྒྱུ་དང༌། དེ་མ་ཡིན་པའི་སྐབས་ཐམས་ཅད་དུ་དབེན་པ་ལས་སྐྱེས་པའི་བདེ་བས་ཐུགས་ཕྲོགས་ཏེ་ཉམས་བཞེས་ལ་ཤིན་ཏུ་འགྲུས་པར་མཛད་པས་ཐུགས་དམ་ཡར་ཟླ་བཞིན་འཕེལ། མཛད་པ་འདིའང་དོན་ཆེན་པོ་ཀུན་གྱིས་གོ་དགོས་པ་ཞིག་ཡིན་ཏེ། དེང་དུས་ཕལ་མོ་ཆེ་རང་གིས་མ་ཐོས་གོང་ནས་གཞན་ལ་བཤད་པར་རིངས་པ། སློབ་གཉེར་མགོ་ཚུགས་ཙམ་ནས་མཁས་པའི་གྲགས་པ་འདོད་པ། སྒོམ་སྒྲུབ་ཀྱི་སྣེ་མ་ཟིན་པར་གྲུབ་ཐོབ་རེ་བ་སོགས་འབྲས་བུ་འདོད་ཀྱང་རྒྱུ་ལ་གཡེལ་བ་ནི་གང་ཡང་མི་འགྲུབ་པའི་སྔ་ལྟས་ཡིན་པས། ཡོན་ཏན་ཕུན་སུམ་ཚོགས་པ་འདོད་ན་དམ་པའི་མཛད་སྲོལ་འདི་བཞིན་བྱེད་དགོས་ཏེ། བསྟོད་པ་བརྒྱ་ལྔ་བཅུ་པ་ལས། ཁྱོད་ནི་ཡོན་ཏན་རྒྱུ་རྣམས་ལ། །མངོན་དགྱེས་འབྲས་བུ་རྣམས་ལ་མིན། །ཡང་དག་སྒྲུབ་པ་དེ་ཉིད་ཀྱིས། །ཁྱོད་ཀྱི་ཡོན་ཏན་ཕ་མཐར་ཕྱིན། །ཞེས་གསུངས་པ་བཞིན་ནོ། །ཤིང་འབྲུག་གི་ལོ་མཇུག་ཏུ་ཀུན་མཁྱེན་འཇམ་དབྱངས་བཞད་པ་རིན་པོ་ཆེ་དབུས་སུ་ཆིབས་བསྐྱོད་པར་ཕེབས་བསུ་ཞུ་ཞིང་སྔར་ནས་ཐུགས་འདྲིས་ཆེ་བས་ཡང་ཡང་མདུན་དུ་ཕེབས་ཏེ་ལུགས་གཉིས་ཀྱི་གསུང་གླེང་འཕེལ། ཀུན་མཁྱེན་མཆོག་ནས་ཁྱེད་བཀྲ་ཤིས་འཁྱིལ་དུ་ཕེབས་དགོས་གསུངས་པར་ཁས་ལེན་ཞུས། ཕྱི་ལོ་ཀུན་མཁྱེན་མཆོག་གཙང་དུ་ཕེབས་ཏེ་ཆོས་ཀྱི་འཁོར་ལོ་རྒྱ་ཆེར་བསྐོར་བ་དང་པཎ་ཆེན་རྣམ་ཐར་བཀའ་རྩོམ་མཛད་པ་སོགས་ཀྱིས་
ལོ་ངོ་ལྷག་ཙམ་འགྱང་བས། དེའི་ཤུལ་དུ་གཞུང་ས་རིན་པོ་ཆེ་ནས་དམ་པ་འདིར་རྒྱ་ནག་མཁན་པོར་ཕེབས་དགོས་ཀྱི་བཀའ་བབས། གནང་བ་ཞུ་རྩིས་མཛད་ཀྱང་གནང་བ་ཞུས་མི་ཆོག་ཅེས་དགོངས་པ་མ་ཁྲོལ། དེ་ནས་བྱང་ཁ་བརྒྱུད་དེ་ཕེབས་པར་ལམ་སྐབས་ཀུན་ཏུ་དཔོན་གཡོག་རྟ་ཁལ་དང་བཅས་པར་ཉེས་སྐྱོན་ཅི་ཡང་མེད་པས་བདེ་སྐྱིད་དང༌། གོང་དུ་མཇལ་ཏེ་རྟ་ལོའི་ལོ་གསར་ལ་ཞབས་བརྟན་དང་རྟེན་ཆས་འབུལ་རྒྱུ་སོགས་གྲ་གང་འགྲིག །གོང་མ་ཆེན་པོས་ཀྱང་དགྱེས་གཟིགས་ཀྱི་བཀའ་སོགས་གང་ལེགས། འཆར་ཅན་གྱི་རྟེན་ཆས་རྒྱ་ཆེན་པོ་གནང་བ་སོགས་སྔ་མའི་སྐབས་བཞིན་བཀྲ་ཤིས་ལུགས་ལེགས་ཀྱི་མུ་ནས་ཡར་ཕེབས་པ་དང༌། ཀུན་མཁྱེན་འཇམ་དབྱངས་བཞད་པ་ཕྱིར་ཆིབས་ཁ་བསྒྱུར་བ་ནག་ཆུའི་མཚོ་མོ་རར་མཇལ་འཛོམ་བྱུང༌། ཕན་ཚུལ་ལེགས་སྐྱེས་སྤེལ་ཞིང་གསུང་འཕྲོས་མཛད། ཀུན་མཁྱེན་མཆོག་ནས་ཁྱེད་ཡར་ཕེབས་ན་རྒྱལ་དབང་རིན་པོ་ཆེའི་ཐུགས་ལ་སྒོ་མང་བླ་མར་བསྐོ་རྒྱུའི་ཐུགས་འདུན་འདུག་པས། དེ་བྱས་ཏེ་གྲྭ་ཚང་ལ་འཆད་ཉན་ཡག་པོ་ཞིག་གནང་ན་དེ་གལ་ཆེ། ཁྱེད་ཀྱིས་སྔར་འདུལ་བ་བླ་མ་བྱས་ཏེ་རིགས་གྲྭ་གཉིས་བཏང་འདུག་པས་ད་ལན་གཅིག་ལས་གཏོང་མི་དགོས། དེའི་མཚམས་སུ་ངེད་ཀྱིས་བསུ་མ་གཏོང་རྒྱུ་ཡིན་པས་ཕེབས་དགོས་ཞེས་གསུང་ཡང་བསྐྱར་ཕེབས་པར། སྔ་མའི་ཁས་ལེན་འགྱུར་མེད་ཀྱི་ལན་ཞུས། ཡར་འབྱོར་ནས་རྒྱལ་བར་གསེར་ཡིག་དང་རྟེན་ཆས་འབུལ་རྒྱུ། གཞུང་གིས་སྟོན་ཆེན་སོགས་སྔར་རྒྱུན་བཞིན་བྱས། རྒྱལ་དབང་ཐམས་ཅད་མཁྱེན་པར་གཟིམ་ཆུང་གི་འབུལ་བར། དངུལ་གྱི་མཎྜལ། མཛོད་བཏགས་
གཅིག །སྐུ་གསུང་ཐུགས་རྟེན། དངུལ་སྲང་བརྒྱ་དང་ལྔ་བཅུ། གོས་ཡུག་བཅོ་ལྔ། ཤེལ་ཀ་ར་སྒམ་གསུམ། ཐ་མ་ཀ་ཀོ་ཊ་ལྔ། སིས་ཐོག་ཨ་མྲ་སྒམ་གཉིས་བཅས་རྣམ་གྲངས་བརྒྱ་དང་བརྒྱད་ཅུ་གྱ་གཅིག་ཕུལ། དེ་ནས་འབྲས་སྤུངས་ལ་ཕེབས། འབྲས་སྤུངས་ཚོགས་ཆེན་ལ་མང་ཇ་བཞི་དང་འགྱེད་ཞོ་རེ། སྒོ་མང་གྲྭ་ཚང་ལ་གྲྭ་ཇ་བཞི་འགྱེད་སྐར་མ་ཕྱེད་བརྒྱད་རེ། ཁམས་ཚན་མི་ཚན་ལའང་ཚོམས་ཇ་འགྱེད་བཅས་བཏང་སྟེ་དེ་སྐོར་གྱི་བྱ་བཞག་ཐམས་ཅད་ཀྱང་བདེ་བླག་ཏུ་འགྲུབ་བོ། །ཆེ་དགུའི་ཐུགས་ཀྱི་རི་རྩེར་མི་འགྲོ་བ། །ཆོས་ཚུལ་ཟབ་རྒྱས་ཡན་ལག་བརྒྱད་ལྡན་གྱི། །ཆུ་རྒྱུན་དད་པའི་གཤོང་བུར་འཁྱིལ་བ་ཡི། །ཆ་ཙམ་གྱིས་ཀྱང་སྲིད་ཞིའི་གདུང་བ་སེལ། །འཇམ་དབྱངས་མི་ཡི་རྗེ་བོར་ཡང་བསྐྱར་གྱིས། །མཇལ་བས་བཞེད་དགུ་གྲུབ་ནས་སླར་ལོག་ཚེ། །འཇམ་དབྱངས་བཞད་པའི་རྡོ་རྗེས་སླད་ཀྱི་དུས། །མཇལ་འཛོམ་དགོས་པའི་བཀའ་ཕེབས་དང་དུ་བཞེས། །དེ་ནས་མ་འགྱང་བར་སྒོ་མང་མཁན་པོར་བསྐོ་བཞག་གི་བཀའ་བསྒྱུར། དགུང་ལོ་ང་ལྔར་ཕེབས་པས་ར་བྷ་བཱ་སྟེ་ཟིལ་གནོན་ཅེས་པ་མེ་ཕོ་རྟའི་ལོ་ཧོར་ཟླ་བཅུ་གཅིག་པའི་གྲལ་ཚེས་བཟང་པོར་མཁས་གྲུབ་ཀླུ་དབང་སྟོང་གི་རོལ་མཚོ། ལུང་རིགས་དབྱངས་སྙན་སྒྲོགས་པའི་དགའ་ཚལ། འཁྲུལ་བྲལ་བཤད་སྒྲུབ་བསྟན་པའི་འབྱུང་ཁུངས། འཛམ་བུའི་ལྗོན་པས་མཚན་པའི་གླིང་འདིར་བཤད་གྲྭ་ཇི་སྙེད་ཅིག་ཡོད་པ་ལས་རབ་དང་ཕུལ་དང་རྩེ་མོའི་ཏོག་ཏུ་སོན་པ་དཔལ་ལྡན་བཀྲ་ཤིས་སྒོ་མང་གི་ཆོས་ཀྱི་ཁྲི་འཕང་མཐོན་པོར་མངའ་གསོལ། རྒྱལ་དབང་རིན་པོ་ཆེ་ནས་ཨ་ཁུ་
ལགས་ཀྱི་སྐུ་ཚབ་མངགས་ཏེ་སྐུ་གསུང་ཐུགས་རྟེན་དང་ན་བཟའ་ཆ་ཚང་བཅས་ཕུལ། གཞན་ཡང་ཡོངས་འཛིན་རིན་པོ་ཆེ། བྱམས་པ་རིན་པོ་ཆེའི་སྤྲུལ་སྐུ། རྒྱལ་བའི་སྐུ་མཆེད་རྗེ་དྲུང་རྣམ་གཉིས། བཀའ་བློན་ཆུ་མིག །གཡུ་ཐོག་མདའ་དཔོན། དགའ་ལྡན་ཁང་གསར་གྱི་ཇ་སག་བླ་མ། སྐུ་ཅར་དགེ་འདུན། མགྲོན་གཉེར་ལྷ་རི་ཆོས་མཛད་སོགས་གཞུང་གི་མི་དྲག་དུ་མའི་ངོ་ཚབ། བཀའ་བློན་བཞིའི་ཚོང་དཔོན་སོགས་ཕྱོགས་ནས་འོངས་པ་ཆེ་ཁ་བཞི་བཅུ་སྐོར་དང༌། འབྲས་སྤུངས་སྤྱི་སོ་བླ་མ་གདན་ཟུར་གྱི་རིགས། ཕོ་བྲང་སྡེ་པ། བཀྲ་ཤིས་ཁང་གསར་གྱི་སྡེ་པ། གྲྭ་ཚང་སོ་སོའི་གཉེར་པ། ཧ་བསམ་གྱི་དགེ་རྒན་སོགས་ཕལ་ཆེར་གྱིས་ཁ་དར་ཕུལ་ཞིང་བདོག་པའི་ཚན་གྲངས་རྒྱ་གང་ཆེ་བཏེག །གཞི་བྱེས་ཀྱི་མགྲོན་རྣམས་ལ་དགའ་སྟོན་ཕུན་སུམ་ཚོགས་པ་བསྟབས། གཞུང་ནས་རིགས་ཆེན་གྱི་གཏོང་ཐེབས་ཤེལ་དཀར་དགོན་པའི་མཁན་ས་གནང་བར་ས་ཐག་རིང་བས་དངོས་སུ་ཕེབས་མ་ཐུབ་ཀྱང་མཱ་ཞབས་དྲུང་སྐུ་ཚབ་ཏུ་མངགས་ཏེ་འཛིན་བདག་མཛད། དགུན་ཆོས་ཆེན་མོའི་འཛིན་གྲྭ་ཕྱེ་བ་དང་དུས་འགྲིག་པས་པོ་ཏི་ཐམས་ཅད་ཀྱི་མགོ་ནས་བརྩི་བཞག་བཏང༌། དེའང་གཉུག་རིང་ལ་མ་ཆད་པ་སྒྲ་དག་ཅིང་གསང་བསྟོད་དེ་གནང་བས་རང་རང་གིས་སྐྱོར་དུས་དང་མི་འདྲ་བའི་གོ་བ་སྟེར་བ་ལྟ་བུ་དང༌། ཕར་ཕྱིན་སྟོན་མོའི་དམ་བཅའ་སྐོར་ལ་འཕྲོས་པ་ཡང་ཡང་མཛད་ཅིང༌། དེའང་རིགས་འགྲོས་དེད་ཙམ་མ་ཡིན་པར་ཡིག་ཆའི་སྟོད་སྨད་ཀུན་ལྷུ་བསྒྲིགས་ཏེ་འདི་ཨེ་འཕང་འདི་ལ་ཅི་ཟེར་ཞེས་གསུངས་པ་ན་རྩོད་བཞིན་པ་ཚོར་ཡང་དེ་ཙམ་མི་ངེས་པས་བློ་སྐྱེད་ཆེ་བ་དང༌། དེའི་རྐྱེན་
གྱིས་རྒྱུན་པར་ཁ་བརྒྱལ་གྱི་བགྲོ་གླེང་ཁོ་ནས་ཉི་མ་འཕུལ་ཐབས་བྱེད་པ་ཚོའང་ཚུར་ཡིག་ཆ་འབའ་ཞིག་གི་སྟེང་དུ་འཁོར་བ་བྱུང༌། སྐབས་ཤིག་བཅའ་ཡིག་གི་སྟེང་ནས་ཚོགས་གཏམ་ཞིབ་རྒྱས་གནང་བས་བཤད་བཞིན་པ་དང་ཉན་བཞིན་པའི་ཡམ་ཡམ་དེ་མ་ཡིན་པར། ཐམས་ཅད་ལ་འདི་བཞིན་མ་བྱས་པའི་ཐབས་ཡོད་རྒྱུ་མ་རེད་སྙམ་སེམས་ཐོག་ཏུ་ལྕི་ཡོར་གྱིས་འབབ་པ་དང༌། བསྒྲིག་འགལ་ལོག་སྒྲུབ་ཅན་རྣམས་རང་གནོང་ལ་མེ་བཙའ་ཤ་ཐོག་ཏུ་བབ་པས་ཚ་འུབ་ཀྱིས་འགྲོ་བ། ཚུལ་མཐུན་གྱི་སློབ་གཉེར་བ་རྣམས་དགའ་ལྷང་གིས་འགྲོ་བ་སྟེ། མདོར་ན་བསྟོད་པ་བརྒྱ་ལྔ་བཅུ་པ་ལས། བག་མེད་རྣམས་ནི་སྐྲག་པར་མཛད། །མཁས་པ་རྣམས་ཀྱི་དགའ་བ་སྐྱེད། །བར་མ་རྣམས་ཀྱི་བློ་ཡང་སྤེལ། །གསུང་འདི་སྐྱེ་བོ་ཀུན་ལ་སྨན། །ཞེས་པ་ཇི་ལྟ་བ་བཞིན་བྱུང༌། དེའང་བཤད་མཁས་པ་དང༌། དབང་ཆེ་བའི་སྟོབས་མིན་གྱི། གསུང་བ་པོ་རང་ཉིད་ལ་དེ་དང་དོན་མཐུན་པའི་མཚན་ཉིད་ཐམས་ཅད་ཚང་བ། བླ་མ་ལྔ་བཅུ་པ་ལས། བརྟན་ཅིང་དུལ་ལ་བློ་གྲོས་ཆེ། །བཟོད་ལྡན་དྲང་ལ་གཡོ་སྒྱུ་མེད། །ཅེས་སོགས་ཀྱི་ཁྱད་པར་མིག་མཐོང་ལག་བཟུང་ལྟ་བུར་གྲུབ་པའི་དབང་གིས་ཡིན་ནོ། །དེ་ནས་བསྒྲིག་ལམ་བྱ་སྤུ་ནོན་གྱི་ཚུལ་དུ་གནོན་ལུགས་ལས་སྣེ་སོ་སོ་ལ་བཀོད་པས་ཁྱབ་པར་མཛད་དེ་ཚོགས་ཆོས་གྲྭའི་རྟིང་སྐུལ། རྒྱུགས་བརྩི་བཞག་ཡོད་མེད་ཀྱི་བལྟ་རྟོག །དབྱར་དགུན་དུས་ཚོད་ལ་དཔག་པའི་འཚོགས་ཚད་གྲོལ་ཚད། འདོན་པའི་དལ་བྲེལ་ཚུན་ཆད་ཉི་མ་གཅིག་ལའང་ཡོ་བཟུར་མེད་པར་བྱུང་བས། གྲྭ་རྒན་མཐར་ཐུག་རྣམས་སྒོ་མང་
གྲྭ་ཚང་གི་བསྒྲིག་ལམ་ཟེར་བ་དེ་འདི་འདྲ་ཞིག་ཡིན་དགོས་ཞེས་གླེང་བ་བྱུང༌། བསྟན་པའི་འབྱུང་ཁུངས་དགེ་འདུན་གྱི་སྡེ་དང༌། དེའི་བྱ་བའི་གཙོ་བོ་ཆོས་འཆད་ཉན་ཡིན་ཀྱང༌། ཆོས་འཆད་ཉན་གྱི་རྨང་གཞི་ལ་འདུལ་ཁྲིམས་རྣམ་པར་དག་པ་ཞིག་མེད་མི་རུང་ཡིན་པས། དེའི་རྟེན་འབྲེལ་དུ་དགོངས་ཏེ་ཀློང་རྡོལ་གྲུབ་དབང་རིན་པོ་ཆེ་ནས་སྒོ་མང་གྲྭ་ཁང་གི་ཕུའི་མི་འཁྲུགས་པའི་ལྷ་ཁང་ཞིག་གསོས་བྱེད་དགོས་གསུངས་པ་བཞིན། མི་འཁྲུགས་པའི་བཞུགས་ཁྲི་གསར་བཟོ་དང༌། གཟུངས་གཞུག་སྐྱོན་ཞུགས་པ་རྣམས་ལ་ཆད་བསབ། གསར་དུ་གཟུངས་སྒྲིལ་དུ་མ་དང༌། ཀློང་རྡོལ་རིན་པོ་ཆེ་ཙ་རིར་ཕེབས་སྐབས་ཀྱི་ཐུགས་དམ་རྟེན་གཙོའི་གླེགས་བམ་དམ་སྦྱར་མ། རྒྱལ་བ་ཡབ་སྲས་ཀྱི་ན་བཟའ་སོགས་བྱིན་རྟེན་བསམ་གྱིས་མི་ཁྱབ་པ་གཟུངས་གཞུག་ཏུ་ཕུལ། གྲང་གསེར་སྲང་དུ་མས་ལྗིབ་ཐུམ་གྱིས་གསར་བཞེངས་ལྟ་བུ་དང༌། གཙང་ཁང་གི་ངོས་ཀུན་ལ་ལྡེབས་རིས་ཕུལ་དུ་ཕྱིན་པ་བཅས་བསྒྲུབས། བླ་བྲང་ཉིད་ཀྱི་ནང་རྟེན་དུའང་བཙོང་ཁ་བརྒྱད་ཅུའི་ཐང་ག་གསེར་ཚོན་རི་མོ་གོང་གཤམ་སོགས་ཁྱད་དུ་འཕགས་པས་མཚོན་སྐུ་གསུང་ཐུགས་རྟེན་མང་དུ་བཞུགས། ཆོས་ཐོག་ལ་ཆོས་གྲྭ་འཆག་མེད། དབྱར་སྟོན་ལམ་རིམ་ཆེན་མོའི་བཤད་ལུང་སོགས་རྒྱས་པར་གནང༌། དུས་དབང་གིས་ཉེ་འཁོར་ནས་ཆོས་ལུགས་སྣ་ཚོགས་བྱེད་མཁན་བྱུང་བར་ལ་ལས་དགག་པ་བྱས་ཀྱང༌། འགའ་ཞིག་དག་སྣང་སྦྱོང་ཁུལ་བྱས་ཏེ་དེ་འདྲ་ཟེར་མི་ཉན་བྱས་པ་གསན་ནས་ཐུགས་ལ་མ་བབ་པར་གསུང་ཆོས་སྐབས་སུ། ཁྱེད་ཚོས་དག་སྣང་ཆེ་མདོག་དང༌། རྒྱུ་དག་བཟང་མདོག་བྱེད་པ་ཧ་མ་གོ་བ་
ཡིན། ཆོས་རྣམ་དག་ཅིག་ཡིན་ན་རྗེ་བླ་མའི་དགོངས་པ་འདི་དང་མཐུན་དགོས། འདི་དང་མི་མཐུན་པའི་ཆོས་རྣམ་དག་ཅིག་མེད་ཅེས་ཐག་བཅད་ནས་བཤད་ཆོག །ནམ་མེ་ནེམ་མེ་བྱེད་མི་དགོས། དེ་འདྲ་ལ་ཆོས་སྤོང་དུ་འགྲོ་དོགས་མེད། དཔལ་ལྡན་ཟླ་བས། འདི་ལས་གཞན་ན་ཆོས་འདི་ནི། །ཇི་ལྟར་མེད་པ་དེ་བཞིན་དུ། །འདིར་འབྱུང་ལུགས་ཀྱང་གཞན་ན་ནི། །མེད་ཅེས་མཁས་རྣམས་ངེས་པར་མཛོད། །གསུང་བ་དེ་གསུང་རྒྱུ་མི་གསུང་རྒྱུའི་མཚམས་མ་ཟིན་པ་ཨེ་རེད་གསུང་ཚུལ་སོགས་རྒྱུས་ཡོད་རྣམས་ཀྱི་ངག་ནས་མང་དུ་ཐོས་ཀྱང་བྲིར་མ་ལང༌། མདོར་ན་གང་གསུངས་ཐམས་ཅད་རུས་པ་ཅན། ལོ་མང་པོ་སོང་ཡང་མི་བརྗེད་པར་བློར་བཞག་འདུག་པའི་ཤུགས་ཅན་ཞིག་ཡིན་པར་འདུག །ཆོས་མཚམས་རྣམས་སུ་ཤས་ཆེར་ཐུགས་དམ་དང༌། དོན་གཉེར་ཅན་དུ་མས་ཡང་ཡང་གསོལ་བ་བཏབ་སྟེ་བཀའ་ཆོས་ཀྱི་རིམ་པའང༌། ཐོར་གོད་དགེ་རྒན་ཆོས་འཕེལ་སོགས་མང་ཙམ་ལ་གསེར་ཕྲེང་དང་གྲུབ་མཐའ་རིན་ཆེན་ཕྲེང་བ་སོགས་ཀྱི་ལུང༌། ཧལ་ཧ་ཨེར་ཏི་ནི་ཆོས་རྗེ་དང་ནོ་མོན་ཧན་གཉིས་ཀྱིས་གཙོས་པར་སྐྱིད་ཤོད་གསུང་སོགས་ལུང་མང་པོ་དང་རྗེས་གནང་འགའ་ཞིག་ཧར་ཆིན་ཝང་གི་ཐོ་ཡོན་སོགས་དུ་མར་ཐུའུ་བཀྭན་རིན་པོ་ཆེའི་གསུང་འབུམ་གྱི་ལུང་གཞན་ཡང་ལུང་རྗེས་གནང་སོགས་མང་དུ་གནང་ཡོད་འདུག་ཀྱང་ས་བོན་མ་འཁོད་སྟབས་བྲིར་མ་ནུས་སོ། །སྒྲིག་ལམ་དང་འགལ་ཚབས་ཆེ་བ་འགའ་ཞིག་དང་པོར་ཚོགས་གཏམ་ཙམ་གནང་ནས་འཇོག་རྩིས་ཀྱིས་ཚོགས་གཏམ་གནང་ཞོར་ལ་ཧ་ཅང་ཉེས་པ་ཆེ་
བས་མི་འཚམ་པར་དགོངས་ཏེ། དེ་རིང་རང་འགྲོ་དགོས་ཞེས་མར་ནང་གི་སྤུ་བཞིན་བཏོན་པའང་འགའ་ཞིག་བྱུང་བས། ཚོགས་གཏམ་རེ་གནང་བའི་ཚེ་སྒྲིག་འགལ་ཅན་རྣམས་ཀྱི་སེམས་ལ་མགོ་ཐོག་གནམ་རྡོ་ལྷུང་བ་ལྟ་བུ་ཅི་འདྲ་ཞིག་བབ་ཡོང་སྙམ་ནས་གྲོལ་རིང་ལ་འདར་ཆུམ་མེ་སྡོད་དགོས་པ་བྱུང༌། འདི་དག་ཀྱང་གནད་གོ་ན་གཞན་ཕན་རྒྱལ་སྲས་ཀྱི་སྤྱོད་པ་ཡིན་ཏེ། འདུལ་བ་ལས་གནས་ཀྱི་བླ་མས་གནས་པ་མ་དུལ་བ་ལ་ནན་ཏུར་ལྔ་བྱེད་ཚུལ་དང༌། བྱང་སའི་ཚུལ་ཁྲིམས་ལེའུར་ཡང་སེམས་ཅན་གྱི་དོན་བྱ་ཚུལ་འཇམ་རྩུབ་སྣ་ཚོགས་ཤིག་དགོས་པར་གསུངས། གསང་སྔགས་ཀྱི་དྲག་ལས་བཤད་པ་རྣམས་ཀྱང་སེམས་སྙིང་རྗེའི་གཞན་དབང་དུ་གྱུར་པ་རྣམས་ཀྱི་དབང་དུ་བྱས་པ་མ་གཏོགས་རང་དོན་གཙོ་བོར་བྱེད་མཁན་རྣམས་ལ་རྡོ་རྗེ་འཆང་གིས་གསུངས་པ་མིན། ཆོས་མིན་སྤྱོད་པ་དེ་འདྲ་ཚར་བཅད་ཆོག་པ་ཙམ་མིན་གྱི་མེད་མི་རུང་དུ་ཚར་གཅོད་དགོས་པ་ཡིན་ཏེ། དཀོན་མཆོག་སྤྲིན་གྱི་མདོ་ལས། ཚུལ་ཁྲིམས་འཆལ་པ་རྣམས་དང༌། དམ་པའི་ཆོས་སུན་འབྱིན་པ་རྣམས་བྲན་བཞིན་དུ་ཚར་བཅད་པར་ངས་གནང་ངོ༌། །གང་དག་དེ་རྣམས་ཚར་གཅོད་པར་མི་བྱེད་པ་དེ་དག་ནི་ངའི་བསྟན་པ་ལ་ཤིན་ཏུ་རིང་བ་ཡིན། གང་དག་དེ་རྣམས་ཚར་གཅོད་པར་བྱེད་པ་དེ་དག་ནི་ངའི་སློབ་མ་དང་ཉན་ཐོས་ཡིན་ནོ། །ཞེས་གསུངས་ཤིང༌། དེའི་འཕྲོར། སངས་རྒྱས་བཅོམ་ལྡན་འདས་སེམས་ཅན་ཐམས་ཅད་ལ་སྒྲ་གཅན་འཛིན་ལྟ་བུར་དགོངས་པ། ཙནྡན་དང་སྟེའུར་མཚུངས་པ་ཡིན་ན་དེ་འདྲ་གསུང་ཚུལ་ཡོད་དམ་ཞུས་པ་ལ། དེ་རང་རང་ལ་ཕན་ཐབས་ཡིན་པས་སྐྱོན་མེད་ཚུལ་སོགས་གསུང་བ་དང༌། དེ་འདྲ་ཚོར་
ལུས་ངག་གིས་བྱམས་པོ་བྱས་པ་ལ་རྒྱུད་སྡེ་རྣམས་སུ་གདུག་པའི་བྱམས་པ་ཞེས་གསུངས། སྡོམ་གསུམ་རབ་དབྱེ་ལས་ཀྱང༌། སྨོད་ཅིང་བསྟན་པ་འཇིག་པ་ལ། །ཁྲོ་བས་བཟློག་པར་ནུས་བཞིན་དུ། །བཟོད་པ་བསྒོམ་ན་མ་དག་པའོ། །ཞེས་གསུངས་སོ། །དེ་ལྟར་བསྒྲིག་ལམ་དམ་ཞིང་འཆད་ཉན་དམར་བའི་ངང་ནས་ལོ་ངོ་ལྔ་ཙམ་འདས་པ་ལྕགས་མོ་ཕག་གི་ལོ་བསྟན་པའི་གེགས་ཆག་དང་སྐྱེ་དགུའི་བསོད་ནམས་མ་ཡིན་པའི་དབང་གིས་བལ་བོད་ཀྱི་འཁྲུགས་པ་ལངས། དེའི་རྐྱེན་ནི་སྔར་ལྷ་སའི་འཁྱམ་ར་ཞིག་གསོས་སྐབས་མཐའ་དམག་དང་མཐའ་འདྲེའི་ཁ་གནོན་གྱི་ལྡེབས་རིས་བྱིན་ཅན་མང་པོ་གཤེགས་གསོལ་བྱས་པའི་རྐྱེན་དུ་དགོངས་ཏེ་རྒྱལ་དབང་ཐམས་ཅད་མཁྱེན་པ་ཡོངས་འཛིན་རིན་པོ་ཆེ་དང་བཅས་པས་རབ་གནས་བསྐྱར་མ་ཡང་ཡང་གནང་ཚུལ་ཡོངས་འཛིན་རྣམ་ཐར་བཞིན་ཡིན་ལ། རྩ་བ་དེ་འདྲ་ཡིན་ཤས་ཆེའང་འཕྲལ་རྐྱེན་ནི་བལ་བོད་མཚམས་ཀྱི་སྡེ་འགའ་ཞིག་གི་སྟེང་ན་གོར་ཥ་ལ་དཔྱ་ཅུང་ཟད་ཅིག་སྡུད་རྒྱུ་ཡོད་པ་དེ། གཞུང་ལར་ཕན་རེས་བསམ་པའི་རྐྱེན་དང༌། ཁོ་རང་གིས་སྔར་བལ་པོའི་རྒྱལ་ཁག་ཡམ་བུ། ཡེ་རང༌། ཁོ་ཁོམ་གསུམ་ག་མངའ་འོག་ཏུ་བསྡུས་ཏེ་ཁེངས་དྲེགས་འབར་ཡོད་པ་ཐུག་པའི་རྐྱེན་ཡིན་ནོ། །དེ་ནས་བལ་པོའི་དམག་གི་མགོ་བརྩམས་པ་ན་ཨམ་འབན་གཉིས་ཀྱིས་པཎ་ཆེན་རིན་པོ་ཆེ་བདེ་ཆེན་རབ་རྒྱས་དགོན་ནས་ལྷ་སར་གདན་དྲངས། བལ་དམག་བཀྲ་ཤིས་ལྷུན་པོར་འབྱོར་པ་ན་རྒྱལ་བ་ཡབ་སྲས་གཉི་ག་ཁམས་ས་མགར་ཐར་དུ་གདན་འདྲེན་རྩིས་བྱས། བོད་པའི་དམག་རྣམས་འཐབ་ཡ་
འཛིན་རྒྱུ་ལྟ་ཞོག །བལ་པོ་སྟེང་དུ་སླེབ་པ་ན་གཞུང་གི་མེ་སྒྱོགས་ཆེན་མོའང་རྒྱག་ཡ་མིན་འབུལ་ཡ་ཡིན་ཞེས་དགྲ་ལ་སྤྲད། མི་སེར་བྱིངས་ནས། ང་ཚོ་ཇི་ལྟར་བྱས་ཀྱང་གཡོག་པོ་ཞིག་མ་གཏོགས་དཔོན་པོ་ནི་མི་ཉན། སྡུག་ལས་འདི་འདྲ་བྱེད་པ་ལས་བལ་པོས་ཐོབ་སོང་ན་དེས་དགའ་ཤས་ཆེ་ཞེས་འདི་ཕྱི་གང་ཡང་བསམ་རྒྱུ་མེད་པའི་ནང་ཆ་ཕྱིར་བཏོན། གཞུང་གི་མི་ཆེན་འཇིག་རྟེན་གྱི་མེས་པོ་ལྟ་བུའི་ཁེངས་དྲེགས་ཅན། སོས་བདེར་ཡོད་སྐབས་སེ་འབྲས་དགེ་གསུམ་དང་རྒྱལ་བ་ཡབ་སྲས་བསྙེགས་ནས་རྒྱ་བོད་ཧོར་གསུམ་འདུས་པའི་ཚེ་རང་རང་འགང་ཆེ་བར་འཁྲུལ་ཏེ་སུ་ལའང་བརྙས་ཐབས་ཁོ་ན་བྱེད་པ་ཚོའང་ཅི་བྱ་གཏོལ་མེད་དུ་གྱུར་ཏེ་ཁྱིམ་གྱི་དབྱེ་འབྱེད་དང་འགྲོ་ཆས་སོགས་ལ་གཡེང་ནས་རྩེར་འཁོར་མིའང་ཆེར་མེད་པར་གྲྭ་རྐྱང་ཚོའང་རྒྱལ་བའི་མདུན་ལ་གང་འདོད་དུ་སོང་ནས་གསུང་འཕྲོས་བྱས་ཆོག་པས་ཕྱི་སྡོམ་ནང་སྡོམ་ཐམས་ཅད་ཞིག་སྟེ། གཞུང་དགའ་ལྡན་ཕོ་བྲང་ཟེར་བའི་སྒྲ་བོ་ཆེ་དེ་སོག་མའི་ཁྲེས་པོ་ཕོན་ཐག་ཆད་པ་བཞིན་དངོས་མེད་དུ་འགྲོ་གྲབས་བྱུང་བའི་ཚེ། དམ་པ་འདི་ཉིད་ནས་འཕྲལ་ཡུན་གྱི་བྱ་བྱེད་ཀུན་ལ་བློ་གྲོས་བཀྲམ། ཞུམ་པ་མེད་པའི་སྙིང་སྟོབས་ཀྱི་གོ་ཆ་བགོས་ཏེ་སེ་འབྲས་ཀྱི་བླ་མ་རྣམས་བསྡུས་ནས་གྲོས་མགོ་བཟུང་སྟེ། ཨམ་འབན་གྱིས་བྱེད་ལུགས་འདི་རེད། གཞུང་གི་མི་ཚོས་ནི་ཁོས་གང་ཟེར་བལྟ་བ་ལས་ཅང་ལབ་ཐུབ་ཀི་མི་འདུག །རྒྱལ་བ་ཡབ་སྲས་མ་བཞུགས་ན་ཇོ་ཤཱཀ་རྣམ་གཉིས། སེ་འབྲས་དགེ་གསུམ་སོགས་ཐམས་ཅད་ཆགས་ཐབས་མེད་མོད་ད་ཇི་འདྲ་བྱེད་རྒྱུ་ཡིན་གསུང་བར། ཐམས་ཅད་ཀྱིས་ཁྱེད་ཀྱི་གང་གསུང་ནའང་དེ་ཀ་ཡིན། ང་ཚོ་ཐམས་ཅད་དེའི་རྟིང་པར་འཇུ་རྒྱུ་
ལས་མེད་ཞུས་པས། འོ་ན་རྒྱལ་བ་རིན་པོ་ཆེ་ལ་ཞུ་དགོས་པར་འདུག་གསུངས་ནས་ཐམས་ཅད་རྒྱལ་བའི་མདུན་དུ་སོང་སྟེ། མཁན་པོ་ཉིད་ནས། རྒྱལ་བ་ཐུགས་རྗེ་ཅན། ཁྱེད་ཀྱིས་གྲྭ་ས་སེ་འབྲས་དགེ་གསུམ་ནས་བཟུང་འདི་ཐམས་ཅད་ཐུགས་ཀྱིས་དོར་ཏེ་གཞན་ལ་ཕེབས་ལུགས་ཡོད་དམ་ཞུས་པས། རྒྱལ་དབང་མཆོག་ནས། དེ་མེད་མོད་ཀྱང་ཨམ་འབན་དབང་ཆེ་བས་མི་ཉན་པར་འདུག་གསུང༌། འོ་ན་ཨམ་འབན་ལ་ངེད་ཚོས་བཤད་ཆོག་ཅེས་བླ་མ་ཐམས་ཅད་ཨམ་འབན་གྱི་རྩར་ཕེབས། མཁན་པོ་ཉིད་ནས། རྒྱལ་བ་ཡབ་སྲས་མ་བཞུགས་ན་བོད་ལུང་པར་སངས་རྒྱས་ཀྱི་བསྟན་པ་འདི་གནས་ཚུལ་མེད་པས། ངེད་སེ་འབྲས་དགེ་གསུམ་གས་རྒྱལ་བ་གཞན་ལ་ཕེབས་འཇུག་རྒྱུ་མིན་བྱས་པར། མ་ཕེབས་ན་སྐྱོན་མི་ཡོང་བའི་ཁག་ཨེ་ཐེག །ཁྱེད་ཚོ་ལ་བློ་རྩེ་ཅི་ཡོད་པ་ཡིན་ཟེར། ལན་དུ། ངེད་སེ་འབྲས་དགེ་གསུམ་ལ་གྲྭ་པ་ཁྲི་ཕྲག་འགའ་ཡོད་པས་རྒྱལ་བ་ཡབ་སྲས་བསྲུང་ཐུབ་བློ་རྩེ་དེ་ཡིན་བྱས་པས་ཨམ་འབན་ཁྲོས་ཏེ། དེ་འདྲ་བྱས་པས་མི་ཆོག །འདིའི་ཁག་ང་ལ་ཡོད་པས་གདན་འདྲེན་མ་བྱས་པར་ཐབས་མེད་ཟེར། དེ་ནས་མཁན་པོ་རང་གིས་ཀྱང་ཇེ་ངར་ལ་བཏང་སྟེ་འོ་ན་གདན་འདྲེན་ཞུར་མི་འཇུག་ཐག་ཆོད་ཡིན། སྐུ་འབུམ་ཐང་དུ་གཅིག་བུད་དང༌། སྔོན་ལ་ང་རང་ཚོས་ཐག་གཅོད་དགོས། ཞེས་ཚམ་ཚོམ་མེད་པར་གསུང་པས། ཨམ་འབན་འུ་ཐུག་སྟེ། གོང་མར་ཞུ་རྒྱུ་ཡིན་བྱས་ནས་སྐྲག་ནས་ལྷོད་ཨེ་ཡོང་སྙམ་སྟེ། འོ་ན་ངས་སེ་འབྲས་ཚོའི་བླ་མ་རྣམས་ཀྱིས་རྒྱལ་བ་ཕེབས་མི་འཇུག་གི་ཞེས་གོང་མར་གྲཻ་ཙི་འཛིན་རྒྱུ་ཡིན་ཟེར་བར། ཅི་ནས་
ཀྱང་དེ་ལྟར་གྲཻ་ཙི་བཟུང་ཆོག་པ་ཞིག་བཀའ་དྲིན་ཆེ་དགོས་བྱས་པས། ཐབས་མ་རྙེད་པར་གྲཻ་ཙི་བཏང་སྟེ་རྒྱལ་བ་ཡབ་སྲས་བཞུགས་རྒྱུ་བྱས། མཁན་པོ་ཉིད་ནས་གྲྭ་ས་སོ་སོའི་གྲྭ་པ་གཞོན་ཤར་རྣམས་ཀྱིས་པོ་ཏ་ལ་སོགས་བསྲུང་ཚུལ། རྒྱབ་མདུན་གྱི་ལམ་འགོག་ལུགས་སོགས་ཀྱི་བཀོད་ཁྱབ་བཏང་བར་ཐམས་ཅད་ཀྱིས་ཅི་གསུང་དང་དུ་བླངས་ཏེ་མ་བསྐོས་རྒྱལ་པོ་རང་བྱོན་དུ་སོང༌། ཚུལ་འདི་ནི་ཤེས་རབ་སྡོང་བུ་ལས། ཇི་སྲིད་འཇིགས་པ་མ་བྱུང་བ། །དེ་སྲིད་དེ་ལ་འཇིགས་པར་བྱ། །འཇིགས་པ་མངོན་དུ་བྱུང་བའི་ཚེ། །འཇིགས་མེད་ལྟ་བུར་གཞོམ་པར་བྱ། །ཞེས་པའི་དགོངས་པ་ལུགས་གཉིས་གང་གི་དབང་དུ་བཏང་ཡང་དགོས་ངེས་པ་ཞིག་ཡིན་ནོ། །དེ་ནས་ཆེར་མ་འགྱང་བར་བལ་པོའི་དམག་ནང་དུ། སེ་འབྲས་དགེ་གསུམ་གྱི་དམག་སྔོན་མ་གམ་པ་ལའི་ཚུར་ནང་དུ་སླེབས་ཚར་ཞིང་མཇུག་ད་དུང་ལྷ་ས་ནས་མ་རྫོགས་པས་ཁྲི་ཕྲག་མང་པོ་ཞིག་འོང་གི་ཡོད་པ་རེད་ཅེས་པའི་གཏམ་ཞིག་འབྱོར་ཏེ་འུར་ཞོགས་ཀྱིས་རང་ཡུལ་དུ་ཆས། འདིའང་རྩ་བ་དགེ་ལྡན་པའི་བསྟན་སྲུང་རྣམས་ཀྱི་ཐུགས་རྗེ་ཡིན་ཀྱང༌། འཕྲལ་གྱི་ལྷན་ཅིག་བྱེད་རྐྱེན་ནི། སྔ་སོར་ངེད་ཚོ་གྲྭ་པ་ཁྲི་ཕྲག་མང་པོ་ཡོད་པ་འདིས་བྱེད་དགོས་བྱུང་ན་བལ་པོའི་དོ་ཡ་ཐུབ་ཐག་ཆོད་ཡིན་ཞེས་དཔའ་སྐད་ཅིག་བཏོན་པ་དེ་གཅིག་ལས་གཉིས་འཁྱར་དུ་སོང་སྟེ། ཕོ་ཁ་ཐང་ཅན་གྱིས། སྡར་མ་ཡུལ་འཕུད་པའི་དཔེར་སོང་བ་ཡིན་པར་སྣང༌། དེ་རྗེས་དམག་དཔོན་ཆེན་པོ་ཧཻ་གུང་གིས་སོ་ལོན་གྱི་དམག་ཁྲིད་དེ་བྱང་ཁ་ནས་འོངས། གསེར་གྱི་ཀ་བ་ལྟ་བུའི་ནང་གི་བློན་ཆེན་བཞིའི་ཡ་གྱལ་ཕུ་ཟི་ཀྲུང་ཐང་གིས་རྒྱ་དང་རྒྱལ་རོང་གི་དམག་ཁྲིད་དེ་ལྷོ་ལམ་ནས་འོངས།
དེ་ནས་རྒྱ་མཚོ་འཕྱུར་བ་བཞིན་དམག་གི་དཔུང་ཆེན་པོ་རིམ་པ་རིམ་པ་འབྱོར་པས་སྡིག་ཅན་གོར་ཥ་ཕམ་པར་བྱས་ཏེ་མངའ་འོག་ཏུ་བཅུག །དེ་སྐབས་ཤིག་ལ་གོང་ནས་སྔར་གྱི་གྲཻ་ཙིའི་ལན་བབ་པས། སེར་འབྲས་ཀྱི་བླ་མ་ཐམས་ཅད་སང་ཉི་མ་རྩེ་ཤར་ལ་ནོར་འཛིན་དགའ་ཚལ་དུ་འབྱོར་དགོས་ཞེས་བརྡ་བརྒྱབ། ཕྱི་ཉིན་འཛོམ་ཐོག་ཏུ་ཀྲུང་ཐང་ཆེན་མོས་རྒྱལ་པོའི་བཀའ་བསྒྲག་པ་ནི། ཁྱོད་སེར་འབྲས་དགེ་གསུམ་གྱི་བླ་མ་རྣམས་ཀྱིས་རྒྱལ་བ་ཡབ་སྲས་གདན་འདྲེན་ཞུར་མ་བཅུག་པས་སེར་འབྲས་དགེ་གསུམ་དང་ལྷ་ས་སོགས་བདེ་བར་གནས་པ་ནི་ཁྱེད་རྣམས་ཀྱི་དྲིན་ཡིན། ཁྱེད་རྣམས་སངས་རྒྱས་ཀྱི་དུས་ཀྱི་ཉན་ཐོས་ལྟ་བུ་རེད། པོ་ཨམ་འབན་གླེན་པ་ལུག་འདྲ་བ་འདིས་པཎ་ཆེན་རིན་པོ་ཆེ་ལྷ་སར་གདན་འདྲེན་ཞུས་པས་བཀྲ་ཤིས་ལྷུན་པོ་ལ་ཆག་འཇིག་བྱུང་བ་རེད། ཁྲིམས་ལ་བརྒྱབ་ན་འདི་ལ་སྲོག་གི་ཆད་པ་མིན་པ་མེད། འོན་ཀྱང་འདིས་ཨམ་མྱེ་རྗེ་རིན་པོ་ཆེའི་བསྟན་པ་ལ་ཤེ་མོང་ཕུལ་མཁན་ཞིག་ཡིན་པའི་ངོར་འདི་ལ་སྲོག་གི་ཆད་པ་ནི་མེད། ཟླ་བ་གསུམ་ལ་ཨན་བསྐོན་ནས་ལྷ་སའི་ཁྲོམ་ནང་ཞོག་གསུངས། བླ་མ་ཐམས་ཅད་ལ་བདག་རྐྱེན་དང༌། ཁྱད་པར་དུ་ཉིད་ལ་ནོར་བུ་མཁན་པོ་ཞེས་པའི་ཆོ་ལོ་གནང༌། ལན་གྱི་འབབ་ལུགས་ལ་བརྟག་ན། དང་པོར་གྲཻ་ཙི་འཛིན་པའི་ཚེ་མཁན་པོ་འདི་ཉིད་དམིགས་ཀྱིས་བཀར་ཏེ། འདིས་གཙོ་བྱས་པའི་བླ་མ་རྣམས་ཀྱིས་འདི་འདྲ་བཤད་ནས་ཕེབས་མི་འཇུག་པར་འདུག་ཅེས་ཞུས་པ་ན་བཤད་ཚུལ་དང་བྱེད་ལུགས་ལ་གོང་མ་ཤིན་ཏུ་མཉེས་ཏེ་ཨེར་ཏི་ནི་མཁན་པོ་སྟེ། མཁན་རིན་པོ་ཆེ་ཞེས་
གཟེངས་བསྟོད་པ་ཡིན་འདུག་པས། བོད་སྐད་དུ་མ་བསྒྱུར་ན་ཆོ་ལོའི་ཉམས་དོད་པ་ཞིག་འོང་ཡང༌། ལོ་ཙཱ་བས་ནོར་བུ་མཁན་པོར་བསྒྱུར་བ་ཡིན་འདུག་ལ། རྣམ་པ་གཅིག་ཏུ་རྟེན་འབྲེལ་ཕུན་སུམ་ཚོགས་པ་ཞིག་ཡིན་ནམ་སྙམ། བླ་མ་གཞན་ཐམས་ཅད་ཀྱིས་ཀྱང་མཁན་པོ་ཉིད་རང་གི་བཀའ་དྲིན་ཡིན་ཞེས་ལེགས་སོ་འབུལ་ཞིང་མངོན་ལྐོག་མེད་པར་དེ་ཁོ་ན་གླེང་ངོ༌། །དེ་ལྟར་འཁྲུག་ཟིང་ཞི་ནས་བསིལ་ལྡན་གྱི་ལྗོངས་ཀུན་བདེ་སྐྱིད་ཀྱི་དཔལ་ལ་སྤྱོད་རྒྱུ་བྱུང་བ་ནི་ྋའཇམ་དབྱངས་མི་རྗེའི་རྣམ་རོལ་ཁོ་ནའི་བཀའ་དྲིན་ཡིན་ལ། འོན་ཀྱང་དེའི་བཀའ་དྲིན་ཐུགས་རྗེའི་ཉི་མ་འཆར་བའི་བར་ལ་རང་གིས་རང་དངོས་མེད་དུ་གཏོང་གྲབས་བྱུང་བ། ཐབས་མཁས་སྐྱ་རེངས་ཀྱི་སྣང་བས་དེ་དང་མཚམས་སྦྱོར་བ་པོ་ནི་དམ་པ་འདི་ཉིད་ཡིན་པས་བཀའ་དྲིན་བླ་ན་མེད་པ་ཤེས་པར་བྱོས་ཤིག །བལ་པོའི་དམག་ཚོགས་འོང་བའི་སྒྲ་ཙམ་གྱིས། །བོད་ཡུལ་ཆེ་དགུས་རང་མདངས་བསྟན་པ་ན། །བར་གཅོད་དབང་དུ་མི་གཏོང་སྙིང་སྟོབས་ཀྱི། །བ་དན་བསྒྲེང་བར་ནུས་པ་ཁྱོད་མིན་སུ། །སོས་བདེར་གནས་ཚེ་མཆོག་དམན་སྐྱེ་བོའི་ཚོགས། །སུ་ལ་བརྙས་ཐབས་ཁྱད་གསོད་མི་མཛད་ཀྱང༌། །སེང་གེའི་ངར་སྐར་སྒྲོགས་པའི་དུས་བབས་ན། །ཡུད་ཀྱིས་མི་འགྲོ་དཔའ་བོའི་བརྟུལ་ཞུགས་ཡིན། །དེ་ནས་ཡང་སྒྲིག་ལམ་དང་འཆད་ཉན་དམར་བ་སྔར་རྒྱུན་བཞིན་མཛད་ཅིང༌། དགེ་འདུན་རྣམས་ཀྱང་ཐུགས་དགའ་སྤྲོ་དང་བཅས་པས་ཚོགས་ཆོས་ཤིན་ཏུ་འཕེལ། གྲྭ་འཚོགས་ཀྱང་ཉིས་སྟོང་ལྔ་བརྒྱར་ཉེ་བ་བྱུང༌། དགུང་ལོ་རེ་གཅིག་པ་ཆུ་བྱའི་ལོ་འདིར་རིགས་གྲྭའང་འཁོར་ཏེ། རྒྱལ་དབང་ལྔ་པ་བཞིན་རང་ལོའི་ཐད་ཐད་དུ་དོན་ཆེ་བ་
མང་པོ་འགྲུབ་པ་འདི་འདྲ་ལ་གེགས་ཡར་འགྲོའི་ཐ་སྙད་ཀྱང་བྱེད་པར་སྣང་། རིགས་གྲྭའི་འགྱེད་ཆེན་དུ་དངུལ་སྲང་ཁྲི་ཕྲག་ལ་ཉེ་བས་ཚོགས་པ་བདུན་སྟོང་སྐོར་ལ་དངུལ་སྲང་གང་དང་ཞོ་གསུམ་རེ་བཏང༌། ཉིན་བཅོ་ལྔའི་རིང་ལ་བསྙེན་བཀུར་དང་ཉིན་ལྟར་གྱི་འགྱེད་སྣ་རེ། སྒོ་མང་གྲྭ་ཚང་གི་ལྷག་མཆོད་ལ་དངུལ་ཞོ་ལྔ་རེ། ཁམས་ཚན་ལ་ཞོ་གསུམ་རེ། མི་ཚན་ལ་ཞོ་རེ་བཅས་བཏང༌། དེའི་རྗེས་སུ་སྒོ་མང་མཁན་པོའི་གནང་བ་ཞུས་ཏེ། ཉིད་ཀྱི་དགེ་ཕྲུག་ལྷ་བཙུན་མཐུ་སྟོབས་ཉི་མ་སྒོ་མང་མཁན་པོར་བསྐོ་བཞག་གི་མགོ་མཐའ་གནང༌། མཁན་པོ་རྗེས་མ་ལ་ནས་ཁལ་ལྔ་བཅུ་དང་ཐབ་ཆའི་སྐོར་གདན་ཆ་བཅས་གསར་འཇོག་དང༌། ཁྲི་འདོན་སྐབས་སྐུ་གསུང་ཐུགས་རྟེན། ན་བཟའ་ཆ་ཚང༌། ཆིབས་པ་བཟང་པོ་གཅིག་བཅས་བདོག་པ་བསྟར། དེ་ནས་སྔར་བཞིན་ལྷ་དབང་གླིང་ནས་ཟུར་བཞུགས་མཛད། སྔ་ཕྱི་ཅི་རིགས་ཤིག་ཏུ་ཀློང་རྡོལ་བླ་མ་རིན་པོ་ཆེའི་མདུན་ནས་ལམ་རིམ་ཆུང་ངུའི་བཤད་ལུང༌། སྦས་དོན་ཀུན་གསལ་གྱི་བཤད་ལུང༌། འཇིགས་བྱེད་བསྐྱེད་རིམ་ཆེན་མོའི་བཤད་ལུང་སོགས་ཟབ་རྒྱས་ཀྱི་གདམས་པ་མང་དུ་གསན་འདུག་ཀྱང་དུས་ཚོད་གང་ཡིན་མ་ངེས། ཉིད་ནས་གྲྭ་ཚང་ལ་མཆོད་རྫས་ཆ་ཚང་ཞིག་འཇོག་རྩིས་གནང་སྟེ། དེའི་རྒྱུ་མཚན་ཀློང་རྡོལ་རིན་པོ་ཆེར་ཞུས་པས། འོ་ན་རྒྱ་མཐོངས་ཀྱི་ཆུ་དར་ངེས་བཞག་སྟེ་སྨོན་ལམ་ལྷན་ཅིག་ཏུ་བྱས་ན་རྟེན་འབྲེལ་ཁྱད་པར་ཅན་ཞིག་ཡོད་གསུངས་ནས་དེ་བཞིན་གནང༌། མཁན་པོ་ཉིད་ནས་གོས་ཆེན་ཁྱད་འཕགས་ཤ་སྟག་ལས་བསྒྲུབས་པའི་ཀ་འཕན་ཕྱེ་འཕུར་བླ་བྲེ་
སོགས་མཆོད་རྫས་ཡོངས་སུ་རྫོགས་པ་དངུལ་སྲང་སུམ་སྟོང་གི་རྒྱུ་སོང་དང༌། དེ་མཚུངས་བསམ་བློ་རྒྱུད་ཁང་དུའང་སྲང་ཉིས་སྟོང་ལ་ཉེ་བའི་ཟོང་གི་མཆོད་རྫས་བཞག །གླང་གི་ལོ་ལྷ་སའི་སྨོན་ལམ་ལ་མང་ཇ་དང་རྡོ་ཚད་སུམ་ཅུ་སྐོར་གྱིས་འགྱེད་སྐར་ཕྱེད་བརྒྱད་རེ་བཏང་སྟེ་ཆོས་དང་ཟང་ཟིང་གཉི་གའི་སྒོ་ནས་གྲྭ་ཚང་གི་འཛིན་སྐྱོང་འགྲན་ཟླ་མེད་པ་གནང་བའི་བཞེད་པ་མཐའ་དག་བར་ཆད་ཕྲ་མོ་ཙམ་ཡང་མེད་པར་མཐར་ཕྱིན་ཏོ། །བཅོམ་ལྡན་ཐུགས་རྗེ་མངའ་བའི་དགོངས་པ་བཞིན། །བཅའ་ཁྲིམས་དམ་པོས་བག་མེད་གནས་ལས་བཟློག །བཅུ་ཕྱེད་བཀའ་པོད་དགོངས་དོན་ཨ་མྲྀ་ཏའི། །བཅུད་ཀྱིས་སྐལ་བཟང་ལྷ་རྣམས་ཚིམ་པར་མཛད། །མཁའ་ལས་གྲུ་ཆར་འཇོ་བའི་སྤྲིན་སྔོན་བཞིན། །མཁས་རྣམས་ལེགས་བཤད་གཏམ་གྱིས་ཚིམ་མཛད་ཅིང༌། །མཁོ་དགུའི་འབྱོར་པས་དམངས་ཀྱི་རེ་བསྐངས་ཏེ། །མཁན་པོར་གྲགས་པ་ཕལ་གྱི་དོ་ཟླ་མིན། །དེ་ནས་གཞན་ལ་ཆོས་བཀའ་ཅི་རིགས་དང༌། ལྷག་པར་རབ་བྱུང་བསྙེན་རྫོགས་ཞུ་མཁན་བརྒྱ་ཕྲག་བརྒལ་བ་དང༌། བསླབ་སྐྱོར་ཞུ་མིའང་མང་དུ་བྱུང་བའི་རེ་བ་བསྐངས་ཏེ་ལྷག་པའི་ཚུལ་ཁྲིམས་ཀྱི་དགའ་སྟོན་མཆོག་ལ་སྦྱར། སྐབས་ཤིག་རྒྱ་ནག་ཏུ་བླ་མ་བཟང་པོ་ཞིག་གཏོང་དགོས་ཀྱི་བཀའ་བབ་པས། ཨམ་འབན་གཉིས་ནས་གྲྭ་སའི་བླ་མ་རྣམས་བོས་ཏེ་བལྟས་ནས། མཁན་པོ་འདི་པ་འོས་ཚུལ་གླེང་བ་ན། ཐུགས་མ་བདེ་བར་ཀློང་རྡོལ་རིན་པོ་ཆེར་ཞུས་པས། རིམ་གྲོ་འགའ་ཞིག་དང༌། དེ་ནས་ཨམ་འབན་ལ་གསེར་སྲང་བཅོ་ལྔ་བྱིན་ན་ཟློག་ཐུབ་ཡོང་གསུང་བ་ལྟར་བྱས་པས་དེ་ཁོ་ན་བཞིན་བྱུང༌། དེ་སྐབས་ཀྱི་རྒྱུ་མཚན་ཉིད་ཀྱི་ཞལ་
ནས་ཀྱང༌། ཐམས་ཅད་ལས་ང་ལ་དགའ་མདོག་ཁ་བོ། ཁྷཽ་ཁྷོ་ཟེར་ར་འདྲ་མོ། སཻན་སཻན་ཟེར་ར་འདྲ་མོ་མང་པོ་ཞིག་ལབ་ཀི་འདུག །ཡག་པོ་མ་བྱུང༌། ལས་ཅི་འདྲ་ཞིག་བསགས་ཡོད་མི་ཤེས། རུས་པ་འདི་གང་ནས་འཇོག་དགོས་རྒྱུ་ཡིན་སྙམ་བློ་མ་བདེ་གསུང་བ་དངོས་སུ་ཐོས། གཞན་ཞིག་ཡིན་ན་ཐམས་ཅད་ལས་ཁོ་ལྷག་པ་བྱུང་སྙམ་རློམ་སེམས་སྐྱེའང༌། ཉིད་ནས་དེ་དག་གིས་བསྟོད་བཀུར་བསྔགས་པ་བྱས་ཚད་གཤིན་རྗེའི་འཛུམ་དང་འུག་པའི་ཐན་སྐད་ལྟ་བུར་དགོངས་པ་ནི་བསྟོད་སྨད་དང་སྙན་མི་སྙན་སོགས་ཆོས་བརྒྱད་རོ་སྙོམས་སུ་སོང་བའི་རྣམ་ཐར་རོ། །སྔ་སོར་ཀུན་མཁྱེན་མཆོག་ནས་དུས་ལས་འཛོལ་བ་མེད་པའི་མངོན་མཁྱེན་གྱིས་གཟིགས་ཏེ་གསུང་བའི་དོན་བཞིན་སྒོ་མང་གི་ཁྲི་མཐར་ཕྱིན། རྒྱ་མིའི་གླེང་བརྗོད་དེ་དག་ཀྱང་སྐུལ་མ་ལྟ་བུར་སོང་ཡོད་པའི་ཐོག །ཤིང་སྟག་ལོ་ངག་དབང་ཝང་གི་དཔོན་མོ་དབུས་ལ་ཡོང་བ་དེའི་སྐྱེལ་མར་བླ་བྲང་གི་དྲུང་ཡིག་དགེ་ལེགས་བཏང་ཡོད་པས་མཚམས་སྦྱར། ཀུན་མཁྱེན་གོང་མའི་སྐུ་ཚ་དབོན་པོ་དཀོན་མཆོག་སེང་གེ་གྲྭ་སར་ཡོད་པས་གཞུང་བཟུང་སྟེ་མདོ་སྨད་དུ་ཕེབས་རྒྱུའི་ཞུ་བ་ཕུལ། ཉིད་ནས་ད་སྐབས་སྐུ་ཞབས་རིན་པོ་ཆེ་མི་བཞུགས་པས་ངེད་སོང་སྟེ་ཕན་ཐོགས་ཡོད་མེད་མི་ཤེས། ཆོས་སྐྱོང་རྣམས་ལ་ལུང་བསྟན་ཞུ་དགོས་གསུང་སྟེ་གནས་ཆུང་ལ་ཞུས་པར། དགོན་གནས་སློབ་དཔོན་དམ་ལྡན་གྱིས་གཟུགས་མེད་ལ་དྲིས་པ་ལེགས། སླར་ཡང་ཆོས་འཆད་ཉན་འཕེལ་རྒྱས་སུ་རིམ་གྲོ་བསྐལ་བཟང༌། བརྒྱད་སྟོང༌། རྟག་བརྟན་གཟུངས་འདུས། སྐུ་ལྔ་དཔོན་བློན་གྱི་བསྐང་བ། ཕྲིན་
བཅོལ། རི་བསང་བརྒྱ། ཀླུང་རྟ་བརྒྱ་བཅས་བསྒྲུབ་ན། གཟུགས་མེད་ཡིད་ཀྱིས་མ་དོར་ན། ལུས་དང་གྲིབ་མ་བཞིན་དུ་འཕྲིན་ལས་བགྱིད། ཅེས་མདོ་སྨད་དུའང་འཆད་ཉན་ཡར་རྒྱས་སུ་གནང་རྒྱུ་སོགས་ཤིན་ཏུ་གསལ་བ་དང༌། དགའ་གདོང་བསྟན་མ་གཉིས་ཀྱིས་ཀྱང་རིམ་གྲོ་དང་འཕྲིན་ལས་སྒྲུབ་པའི་ཞལ་བཞེས་སོགས་གང་ལེགས་གནང༌། ལོ་མཇུག་ཏུ་དབོན་པོ་དང་དྲུང་ཡིག་སོགས་ཀྱིས་དེ་དོན་རྒྱལ་དབང་རིན་པོ་ཆེར་དགོངས་པ་ཞུས་པས། རྒྱལ་དབང་རིན་པོ་ཆེ་ནས་ཉིད་ལ་ནང་སྦྱར་གྱི་བཀའ་ཕེབས་ཏེ། ཁྱེད་རང་སྔར་ཕེབས་ཆད་ཡིན་ཟེར་བ་བདེན་ཞིང༌། བླ་མའི་བཀའ་དང་ཡུལ་མིའི་འདུན་པ་བཞིན་ཕེབས་འདོད་ཡོད་ན་གནང་བ་སྟེར། མིན་ན་མི་སྟེར། ཁྱེད་རང་གི་ཐུགས་བཞེད་དང་བསྟུན་ཆོག་གསུང་བར། སྔ་སོར་དེ་འདྲ་ཞུས་ཡོད་པ་བདེན། ད་ཆ་སྐུ་ཞབས་དེ་ཉིད་སྐུ་དངོས་མི་བཞུགས་ཀྱང༌། ང་བླ་མ་ཆོས་གོས་གྱོན་པ་ཞིག་གིས་ཁྲེལ་མེད་བྱེད་ལུགས་མེད་པས་འགྲོ་འདུན་ཡོད་ཞུས་པས། འོ་ན་དེ་བཞིན་བྱས་ཆོག་ཅེས་དགོངས་པ་དགྱེས་བཞིན་དུ་ཁྲོལ། ཡོས་ལོ་གསར་ནས་སྨོན་ལམ་ཐོག་ལ་དགའ་ལྡན་སེ་ར་གཉིས་ཀྱི་བླ་མ་རྣམས་ཀྱིས་འབྲས་སྤུངས་བླ་མ་རྣམས་ལ་སྒོ་མང་མཁན་པོ་རྒན་པ་འདི་པ་གྲྭ་ས་སེར་འབྲས་དགེ་གསུམ་གྱི་བླ་མ་རྣམས་ཀྱི་བློ་རྩེ་གཏད་ས་ཡིན། འབྲས་སྤུངས་ཚུགས་ནས་རིགས་གྲྭ་གསུམ་བཏང་བ་བླ་མ་འདི་མིན་པ་མ་བྱུང༌། ཁྱེད་རྣམ་པས་དང་པོ་མ་ཞུས་སྟབས་ད་གཟོད་ཞུ་ལུགས་མེད་རུང༌། ང་ཚོས་གཞུང་ལ་ཞུས་ཏེ་ཁོང་མི་ཕེབས་པ་ཞིག་བྱེད་དགོས་ཟེར་ནས་དེ་བཞིན་བྱས་ཀྱང༌། ཀུན་མཁྱེན་འཇམ་དབྱངས་བཞད་པ་མདོ་སྨད་ཀྱི་
བསྟན་པའི་བདག་པོ་ཡིན་པ་དང༌། ཆིང་ཝང་སྔར་ནས་ཞྭ་སེར་གྱི་བསྟན་པའི་སྦྱིན་བདག་ཆེན་པོའི་རྒྱུད་ཡིན་སྟབས་དམིགས་བསལ་གལ་པོ་ཆེ་གནང་སྟེ་རྒྱལ་བའི་བཀའ་བབས་ཚར་བ་ཡིན་པས། ད་ཆ། རི་ཆེན་པོའི་རྦབ་ལ་ཕྱིར་ལོག་མེད། དཔོན་ཆེན་པོའི་བཀའ་ལ་བཀའ་ལོག་མེད། ཟེར་བ་ཡིན་ཞེས་འགོག་ཐུབ་པ་མ་བྱུང༌། རྒྱུན་པར་གྲྭ་ས་རྒྱ་ཆེ་བས་ཕན་ཚུན་ཆེར་མ་ལྟོས་པ་ལྟ་བུ་ཞིག་ཡོད་ཀྱང༌། སྔ་སོར་ཉེན་ཆེ་བའི་སྐབས་མཆོད་རྟེན་གྱི་སྲོག་ཤིང་བཞིན་ཚང་མའི་རྟེན་སར་སོང་བའི་སྟབས་ཀྱིས་ད་དུང་ཡང་ཐག་རིང་དུ་ཕེབས་རྒྱུ་བློས་མ་བཟོད་པ་ལྟ་བུ་བྱུང་བ་ཡིན་འདུག་པས། རང་རྩ་ལས་ཀྱང་རྒྱང་ན་གནས་པ་ཚོའི་ངོར་ཕན་པའི་ཟིལ་ཆེ་བ་ཞིག་ཡོང་བ་ནི། དཔེ་ཆོས་འགྲེལ་པར། སྐྱེས་བུ་དམ་པ་ཚད་ལྡན་དེ། བཀྱེད་ཀྱིན་གསལ་བ་ཧས་པོའི་གངས་ལྟ་བུ། བཏུད་ཀྱིན་གསལ་བ་རྨ་བྱའི་མདོངས་ལྟ་བུ་ཞིག་འོང་བར་གསུང་བའི་དོན་ཡིན་ནོ། །དེ་ནས་མདོ་སྨད་དུ་འབྱོན་རྒྱུར་ཐག་ཆོད་དེ། རྒྱལ་དབང་ཐམས་ཅད་མཁྱེན་པར་སྐྱབས་འཇུག་ཞུ་རྟེན་ལ་མཎྜལ། སྐུ་གསུང་ཐུགས་རྟེན། ན་བཟའ་ཆ་ཚང༌། དངུལ་སྲང་བདུན་བརྒྱ། གོས་ཡུག་བཅོ་བརྒྱད། རྟ་ཚག་རིན་པོ་ཆེར། སྐུ་གསུང་ཐུགས་རྟེན། མཎྜལ། དངུལ་སྲང་བརྒྱ་དང་ལྔ་བཅུ། གོས་ཡུག་ལྔ་བཅས་ཕུལ། འབྲས་སྤུངས་ཚོགས་ཆེན་དང་གྲྭ་ཚང་ལ་སྐྱབས་ཞུས་ཀྱི་མང་ཇའི་ཐོག་འགྱེད་ཊཾ་ཁ་རེ། གྲྭ་ཚང་སྤྱི་འཇོག་ཏུ་འབྲི་བདུན་ཅུ་དོན་བདུན་དང་ཁྱིམ་ཁ་གསུམ་བཅས་བཞག །བླ་མ་རིགས་གྲྭ་པ་ལའང་འབྲི་བདུན་ཅུ་དོན་བདུན། བླ་མ་ཕྱག་མཛོད་ཕུ་ལ་འབྲི་སུམ་ཅུ་ཐམ་པ། ཁམས་
ཚན་ལ་ཚོམས་ཇ་དང་དང་འགྱེད་དངུལ་ཕྱེད་བརྒྱད་རེ། མི་ཚན་ལ་མཆོད་ཁྲི་དང་རྗེའི་སྐུ། གནམ་ཡོལ། ཉིད་ཀྱི་ན་བཟའ་ཆ་ཚང་བཞུགས་ཁྲི་དང་བཅས་པ་བཞག །གཞན་ཡང་ཕུར་བུ་ལྕོག །ཚེ་ཆོག་གླིང༌། སྟོད་ལུང་ལྡིང་ཁའི་དགོན་སོགས་ལ་མང་ཇ་དང་འགྱེད་ཊཾ་ཁ་རེ་བཅས་བཏང༌། ཇོ་ཤཱཀ་རྣམ་གཉིས་སོགས་ལྷ་སའི་རྟེན་རྣམས་དང༌། པོ་ཏ་ལའི་ཇོ་བོ་ལོ་ཀེ་ཤྭ་ར་དང༌། དེ་སྐབས་འཕགས་པ་ཝ་ཏིའང་དེར་བཞུགས་ཡོད་པས། དེ་གཉིས་ཀྱིས་གཙོས་པའི་རྟེན་ཕལ་ཆེར། འབྲས་སྤུངས་ཀྱི་བྱམས་པ་མཐོང་གྲོལ་མ་དང་ཐུབ་པ་ཚུལ་ཁྲིམས་མ་སོགས་རྟེན་རྣམས་ལ་གསེར་གསོལ་དང་མཆོད་པ་རྒྱ་ཆེན་པོ་ཕུལ་ཏེ་ཚེ་རབས་ཀུན་ཏུ་བློ་བཟང་རྒྱལ་བའི་བསྟན་པ་རིན་པོ་ཆེ་བཤད་སྒྲུབ་ཀྱི་སྒོ་ནས་འཛིན་སྐྱོང་སྤེལ་བའི་སྨོན་ལམ་གྱི་མཚམས་སྦྱར་ནན་ཏན་དུ་མཛད། དེ་སྐབས་ཕྱག་མཛོད་ཀྱིས་མདོ་སྨད་དུ་ཕེབས་ན་གཞན་ངོ་མི་ཤེས་ཤིང༌། གཞི་ཆེ་ཙམ་ཞིག་འཛིན་དགོས་པ་ཡོང་བས་འབྲི་འདིའི་ནང་ནས་གཞོན་པ་སྐོར་གཅིག་འཛིན་དགོས་པ་འདྲ་ཞུས་པར་མི་དགོས་གསུང༌། ཨུ་ཚུགས་བྱས་པས། ངས་འདི་ཐམས་ཅད་སྔར་ནས་དགེ་འདུན་པ་ལ་བསྔོས་ཡོད་པ་ཡིན། དེ་མ་བྱས་ན་ཁྱོད་རང་ལ་ཆོས་སྐྱོང་གིས་ཡག་པོ་མི་ཡོང་ཞེས་གསུང་བཙན་པོ་གནང་བས་བཀའ་བཞིན་བསྒྲུབས་འདུག །རྒྱུན་པར་ནོར་དངོས་པོ་ཀུན་ལ་ཞེན་པ་ལོག་པའི་ཚུལ་གྱིས་མིག་བཙུམ་སྐད་གདངས་ཚུན་ཆད་སྨད་དེ་ཞི་ཞིང་དུལ་བའི་ཉམས་ཁོ་ན་མི་སྟོན་ཡང༌། ཉམས་ལེན་སྐབས་བསླབ་སྤྱོད་ཀྱི་བཏང་བསྲུང་དག་སྤེལ་བཞིའི་དོན་བཞིན་བདོག་པ་ཐམས་ཅད་གཞན་ལ་བསྔོས་ཏེ་འཛིན་ཆགས་ཅི་ཡང་མི་མཛད་པ་ནི་ཚེ་
བློས་བཏང་གི་སྤྱོད་ཚུལ་ལྷད་མེད་པ་ཡིན་གྱི། ཆོས་པའི་ཉམས་ཕྱི་རོལ་ཏུ་ཐོན་ཆེ་བའི་རིགས་ལ་དགེ་སློང་གསེར་ལེན་སྤུ་སྐྱེལ་ལྟ་བུ་རྫུན་མ་མང་པོ་འབྱུང་སྟེ། གཟི་བརྗིད་ཅན་གྱི་མདོ་ལས། གཅོམ་བསྐྱུང་བའི་ཚུལ་འཆོས་པ་ཅན་ནི། གང་གི་ཚེ་རྒྱུ་མཚན་དུ་བྱས་ནས་ཚིག་ཞན་པ་ཞན་པར་བྱེད་པའོ། །འདོད་པ་ཆུང་བར་སྨྲ་བའི་ཚུལ་འཆོས་པ་ཅན་ནི། གང་གི་ཚེ་འདོད་པ་ཆུང་བར་སྨྲ་ཞིང་སེམས་ཀྱིས་རྙེད་པ་འདོད་པ་སྟེ། ཡོ་བྱང་བསྙུང་བར་སྟོན་པའོ། །ཞེས་སོགས་ཚུལ་འཆོས་པ་བཅུ་གསུང་ལ། འོད་སྲུང་གིས་ཞུས་པའི་མདོ་ལས་ཀྱང༌། དལ་གྱིས་འགྲོ་བའི་ཚུལ་འཆོས་པར་འགྱུར་བ་དང༌། མགོ་སྨད་པའི་ཚུལ་འཆོས་པར་འགྱུར་བ་དང༌། ཞེས་པ་ནས། ང་ལ་ཅུང་ཟད་ཀྱང་ཅུང་ཟད་ཀྱང་མི་དགོས་སོ་ཞེས་སྨྲ་བ་སེམས་ཀྱིས་རྙེད་པ་འདོད་ཅིང་ཚིག་གིས་འདོད་པ་ཆུང་བར་སྨྲ་བ་འདི་ནི་སེམས་ཀྱི་ཚུལ་འཆོས་པ་ཞེས་བརྗོད་དོ། །ཞེས་གསུངས་པས། དམ་པའི་རྣམ་ཐར་འདི་དག་དང་བསྟུན་ཏེ་རང་སེམས་དཔང་པོར་བཞག་ནས་ཞིབ་དཔྱོད་མ་བྱས་ན་ཕུབ་མའི་ཆུ་དོང་འབྱུང་ཉེན་ཆེའོ། །བཤེས་སྤྲིང་ལས་ཀྱང༌། མི་ནི་ཨ་མྲའི་འབྲས་བཞིན་མ་སྨིན་ལ། །སྨིན་པ་དང་འདྲ་སྨིན་ལ་མ་སྨིན་འདྲ། །ཞེས་སོགས་ཀྱིས་ཕྱི་ནང་སྨིན་མ་སྨིན་མུ་བཞིར་གསུངས་པའི་གཙོ་བོ་ནང་སྨིན་དགོས་པ་ཡིན་པས། ཁམ་ལུང་པ་ཕྱི་ནང་གཉི་ག་སྨིན་པ་དང༌། པོ་ཏོ་བ་ཕྱི་མ་སྨིན་ལ་ནང་སྨིན་པར་སྤྱན་སྔ་བློ་གྲོས་རྒྱལ་མཚན་གྱིས་གསུངས་ཏེ། པོ་ཏོ་བའི་རྣམ་ཐར་མཛེས་པའི་པདྨོ་ལས། སྙིང་རྗེ་ཅན་དུ་མངོན་མངོན་མི་མཛད་ཀྱང༌། །ཞེས་གསུངས་དོན་ཡང་དེ་ཡིན་ནོ། །དེ་
ནས་ཕེབས་རྒྱུའི་དུས་དང་ཉེ་བ་ན་རྒྱལ་དབང་རིན་པོ་ཆེ་ནས་ཐོན་ཕྱག་གི་གནང་ཆར། ཐུགས་རྗེ་ཆེན་པོ་ཕྱག་བཞི་པའི་ཞལ་ཐང་རྒྱལ་བ་ཉིད་ཀྱི་ཕྱག་དམ་ཅན། ཚེ་སྐུ་ལི་མ་གཅིག །ཐུབ་པའི་ལི་སྐུ་གཅིག །དབུ་ཞྭ། སྐུ་འགག །སྐུ་ཆོས། སྐུ་གཟན། སྐུ་ཤམ། ཞབས་ཆག །ཆིབས་པ་ཆིབས་འགྲོགས་གཉིས། ཆིབས་སྒ་ལེགས་པ་ཏོག་ཟེ་ཁེབས་ལོང་ཁེབས་བཅས་ཆ་ཚང༌། དུང་དཀར་ཆ། ཁ་ཆེ་དྲི་བཟང་སྲང་ལྔ་བཅུ། སྤོས་དམར་དོ་པོ་གཅིག །ཞྭ་སྣམ་ལྔ་བཅུ། ཕྲུག་བཅོ་ལྔ། ཧ་སག་གཅིག །ལ་ཏ་དང་ཀཾ་ཙ་ཡུག་དུ་མ་སོགས་དཔངས་མཐོ་བ་སྩལ་ཅིང་མདོ་སྨད་དུ་བསྟན་འགྲོར་གང་ཕན་གནང་དགོས་ཚུལ་དང་རྗེས་འཛིན་གྱི་ཞལ་བཞེས་སོགས་བརྩེ་གཟིགས་གང་ཆེ་གནང༌། རྟ་ཚག་རིན་པོ་ཆེ་ནས་སྐུ་བརྙན་ལི་མ་གསུམ། གྲགས་རྒྱལ་མའི་ཞལ་ཐང་གཅིག །དུང་དཀར་གཅིག །ན་བཟའ་ཆ་ཚང༌། ཐེར་དྲིལ་བཅོ་ལྔ། ཞྭ་སྣམ་སུམ་ཅུ། ཕྲུག་བརྒྱད། སོ་སོ་ནས་ཞབས་ཕྱི་རྣམས་ལའང་གོ་བབ་དང་བསྟུན་པའི་གནང་ཆ་སྩལ། དེའི་སྔོན་ཙམ་ལ་རྩེ་དྲུང་ནང་མ་འགའ་ཞིག་གིས། རྒྱལ་བའི་སྐུའི་ཆེ་བ་ཡིན་པས་ཞུ་རྟེན་ཅུང་ཟད་ཕུལ་ཏེ་མ་ཞུས་པར་གནང་བའི་དཔེ་ལམ་མེད། དེ་བྱས་ན་ནོ་མོན་ཧན་གྱི་ཆོ་ལོ་དང་གདུགས་རྟ་དར་སོགས་ཉིད་ལ་ཅིས་ཀྱང་གནང་ཡོང་ཞེས་གྲོས་འདེབས་བྱུང་བར། ང་རང་གི་ཆས་ཀ་གང་ཡོད་དགེ་འདུན་ལ་བཏང་སྟེ་ད་ཅི་ཡང་མེད་པས་ཞུ་མི་དགོས་གསུང་སྟེ་གསན་དགོངས་མ་མཛད། དམ་པ་ཉིད་ཀྱི་ངོས་ནས་གཞུང་གི་ཆོ་ལོ་མ་ཟད། ྋའཇམ་དབྱངས་གོང་མའི་ཆོ་ལོ་ལའང་ཐུགས་བཞེད་མེད་པ་སྔར་སྨོས་པ་ལྟར་ཡིན་པས་མི་དགོས་མོད། གཞུང་གི་སྐུ་དོན་ལ་དངུལ་
སྲང་ཁྲི་ཕྲག་མང་པོ་ཕུལ་བ་ལས་ཀྱང་ལྷག་པའི་ཞབས་འདེགས་བསྒྲུབས་པ་དེས་གོ་མ་ཆོད་པར་ཞུ་རྟེན་ཞིག་དགོས་པ་དང༌། དངུལ་ཕྲན་ཚེགས་རེ་ཕུལ་ན་སུ་ལ་ཡིན་ཀྱང་གནང་ཤོ་བཞག་པ་དེ་ནི་དཔེ་ལམ་གྱི་ནང་ནས་གནས་ལུགས་མེད་པའི་དཔེ་ལམ་ཞིག་ཏུ་སྣང༌། དགའ་ལྡན་ཁྲི་རིན་པོ་ཆེ་བློ་བཟང་སྨོན་ལམ་ནས་སྐུ་བརྙན་པཎ་ཞྭ་སྣེ་རིང་སོགས་ན་བཟའ་འགའ་ཞིག་བཅས་གནང་ཞིང་ཐུགས་འཕྲེང་བའི་ཉམས་ཀྱི་གསུང་གླེང་མཛད། སྒོ་མང་གྲྭ་ཚང་ནས་གནས་བཅུའི་ཞལ་ཐང་གསུམ། དངུལ་སྲང་ལྔ་བཅུ། སྒོ་མང་མཁན་པོས་ཚེ་སྐུ་ལི་མ། སྤོས་ཁྲེས་བཞི། སྣམ་ཕྲུག་སོགས་དང༌། གཞན་ཡང་བློ་གསལ་གླིང༌། རྒྱལ་པ། འདུལ་བ་སོགས་ཀྱི་མཁན་པོ། འབྲས་བླ་སྤྱི། ཁམས་ཚན་མི་ཚན། མི་དྲག་མང་པོ་སོགས་ཀྱི་ཕེབས་རྫོངས་དང༌། གྲྭ་པ་རྒན་གཞོན་སྐྱབས་འཇུག་ཞུ་མི་སོགས་ཉིན་མང་པོར་བར་མ་ཆད་ལྟ་བུར་བྱུང༌། སྒྲ་དབྱངས་གླིང་དུ་མང་ཇ་ཉིན་འཁྱོངས་ཐོག་ཆོས་སྐྱོང་སྤྱན་འདྲེན་གྱི་གཟབ་གསོལ་ཞུས། ཆོས་སྐྱོང་ཆེན་པོ་ནས་ཀྱང༌། ཧྲཱིཿསྙིགས་མའི་རང་རྟགས་ན་བུན་འཁྲིགས་པའི་ཀློང༌། །བླང་དོར་བྱ་བྱེད་གཟུགས་བརྙན་འཆར་དཀའི་ངོ༌། །འོན་ཀྱང་མཆོག་གསུམ་ཆོས་སྲུང་མཐུ་བསྐུལ་ལ། །ལས་འབྲས་དྲང་པོའི་གཞུང་ལམ་འགྲིམ་པ་གནད། །བགྲང་བྱ་མེ་ཏོག་མདའ་ལྷག་བདུན་ཕྲག་སྟོབས། །ཞེས་སོགས་ཀྱིས་སྐུ་ཚེ་མཐར་ཕྱིན་པའི་ལུང་བསྟན་དང་གཡེལ་མེད་འཕྲིན་ལས་སྒྲུབ་པའི་ཞལ་བཞེས་གང་ལེགས་གནང༌། ཚེས་བཟང་པོར་ལྷ་དབང་གླིང་ནས་ཆིབས་བསྒྱུར་བའི་སྐབས་
སུའང༌། ལྷ་དབང་གླིང་གི་སྟེང་ནས་འཇའ་ཚོན་ཞིག་ཤར་བ་གནས་ཆུང་ལྕོག་གི་སྟེང་དུ་ཟུག །དེ་ནས་གཅིག་ཤར་བ་གླིང་ཁར་འབྲས་སྤུངས་བླ་སྤྱིས་ཇ་ཐབ་བཟུང་ཡོད་པའི་སྟེང་དུ་ཟུག་པས། དགོན་པའི་གྲྭ་དཔོན་སློབ་ཐམས་ཅད་ལྷག་པར་ཡང་མོས་གུས་དང་སྐྱོ་ཤས་ཀྱིས་ཡིད་འཁུལ་བ་བྱུང༌། ཆོས་སྐྱོང་འདི་ལ་ཉིད་ནས་ཐུགས་རྩེ་གཏོད་ཅིང༌། ཆོས་སྐྱོང་གིས་ཀྱང་ཆོས་འཆད་ཉན་སོགས་བསྟན་པའི་བྱ་བ་གང་གི་ཚེ་ནའང་གཞན་དང་མི་འདྲ་བའི་སྡོངས་གྲོགས་མཛད་པ་ཞིག་ཡོད་པར་སྣང༌། འདི་ཁ་ཅིག་འཇིག་རྟེན་པའི་སྲུང་མ་ཡིན་གྱི། བསྟན་སྲུང་ཡེ་ཤེས་པ་མིན་ཟེར་ཡང༌། སངས་རྒྱས་བྱང་སེམས་རྣམས་མིའི་ཤ་ཚུགས་འཛིན་པ་ན་ཆོས་ཁོ་ན་སྟོན་པའི་བླ་མའི་རྣམ་པ་འབའ་ཞིག་མི་དགོས་པར། དགེ་སྡིག་སྣ་ཚོགས་སྤྱོད་པའི་རྒྱལ་པོ་སོགས་གདུལ་བྱ་དེའི་སྣང་ཚོད་ཀྱི་སྐལ་བ་དེ་དང་འཚམ་པར་སྟོན་པ་བཞིན། སྲུང་མའི་རྣམ་པར་སྟོན་པའི་ཚེའང༌། འཇིག་རྟེན་འདི་ཙམ་གཙོ་བོར་བྱེད་པ་རྣམས་ཀྱིས་བསྟེན་ན་འཕྲིན་ལས་ཀྱང་དེ་དང་མཚུངས་པ་ཞིག་བསྒྲུབ་ནས་འབྲེལ་འཇོག་ཐབས་བྱེད་ཅིང༌། ཆོས་རྣམ་དག་ཁོ་ན་སྒྲུབ་མཁན་ཞིག་གིས་བསྟེན་ན་ས་ལམ་གྱི་གྲོགས་ཚུལ་བཞིན་སྒྲུབ་པའི་སྲུང་མ་ཁྱད་པར་ཅན་དུ་འགྲོ་བ་ཡིན་ཏེ། འབྲོམ་སྟོན་པའི་ཞལ་ནས། ངེད་ཇོ་བོ་མཇལ་བར་མངའ་རིས་སུ་འགྲོ་སྐབས་མི་ངོ་མི་ཤེས་པ་གཅིག་གིས་ལམ་མཁན་བྱས་སོང་བ་དེ་པེ་ཧར་དུ་སྣང་བས། ཆོས་གཤའ་མ་བྱེད་ན་ཁོང་ཡང་ཆོས་སྐྱོང་བཟང་པོར་འདུག་ཅེས་གསུང་ཚུལ་དེབ་སྔོན་དུ་འབྱུང་བ་བཞིན་ནོ། །དེས་ན་ཆོས་སྐྱོང་ཡེ་ཤེས་པར་ངེས་པ་རྙེད་ནས་སྐྱབས་སུ་བཟུང་ན་ལེགས་ལ། ཚེ་འདིའི་
ཕན་པ་ཁོ་ན་སྒྲུབ་པའི་དགྲ་ལྷ་ཙམ་ཞིག་ཡིན་པ་ཞེ་ཕུགས་སུ་བཞག་ནས་སྐྱབས་སུ་བཟུང་ན་སྐྱབས་འགྲོ་ལ་གནོད་པས་སྤང་བླང་གི་མཚམས་འདི་འདྲ་རང་སེམས་ལ་ཞུ་དག་བཏང་སྟེ་བྱེད་དགོས་པ་ཞིག་ཡིན་ནོ། །དེ་ནས་རིམ་གྱིས་ཕེབས་པའི་ལམ་ནས་འདམ་སྙིང་གྲོང་གི་ཆུ་ཚན་ཁར་ཞག་བདུན་བཞུགས་ཏེ་སྐུའི་འཕྲོད་བསྟེན་མཛད། འཇོག་པའི་འབྲི་རྣམས་ཀྱང་ཉིད་ཀྱི་སྤྱན་ལམ་བསྟར་ཏེ་གང་བཟང་འདམ་སྤྲུག་བྱས་ནས་སྤྲད། ལམ་གྲོགས་ཚོང་དཔོན་འགའ་ཞིག་དང་བཅས་དགྲ་ཇག་ཆུ་སོགས་ཀྱི་འཚེ་བ་ཕྲ་མོ་ཙམ་ཡང་མེད་པར་གླང་ཆེན་དལ་འགྲོས་ཀྱིས་བྱོན་པ་བརྒྱད་པའི་ཚེས་ལ་སྟོང་འཁོར་དུ་བབས། དེར་བླ་བྲང་གི་གསོལ་དཔོན་དཔལ་ལྡན་ངོ་གཡོག་དང༌། ཉིད་ཀྱི་སྐུ་ཚ་ཀླུ་འབུམ་ལྷ་དང་ཡུམ་སྐྱབས་གཉིས་བཅས་འབྱོར། དེ་ནས་སྐུ་འབུམ་དུ་ཕེབས་པར་ཤངས་ལེན་གཟོས་སྒོ་གང་དྲག་ཞུས་ཤིང༌། རྟེན་ལ་མཆོད་མཇལ་དང་ཚོགས་སུ་མང་ཇ་ཁ་དར་གྱི་འགྱེད་བཅས་བཏང༌། དེ་ཚུན་ཆད་ཀྱི་ཞག་བབ་སོ་སོའི་སར་བླ་བྲང་གི་གཞིས་ཀ་ཡོད་པ་རྣམས་ནས་བསྙེན་བཀུར་གང་ལེགས་ཀྱི་གྲ་སྒྲིག་ཞུས། ཀ་མདོའི་དགོན་དང་གཅུ་འཁོར་དགོན་པར་ཡང་མང་ཇ་འགྱེད་བཅས་གནང༌། བླ་བྲང་ནས་ཆིབས་པ་ཁ་ཤས་དང་བཅས་བསྟན་འཛིན་བསུ་བར་བཏང་བ་གཅུ་འཁོར་གྱི་ལུང་པའི་ཕུར་འབྱོར་ཏེ་ཆིབས་པ་རྣམས་ཕུལ། ནང་ཆེན་རྣམས་ཀྱི་བསུ་བ་དང་བཅས་ཉི་མ་ལུང་དུ་སྤྱི་ཆེན་གྱི་གྲ་སྒྲིག་ཐོག་ཏུ་ཞག་ས་འདེབས་སྟེང་ཐོས་བསམ་གླིང་དང་རྒྱུད་པའི་གཉེར་པས་ཇ་ཐབ་ཞུས། རྒྱུད་པ་དཔོན་སློབ་ཀྱིས་གཙོས་པས་རྟ་བསུ་
དང༌། ངུར་སྨྲིག་འཆང་བའི་དགེ་འདུན་མཆོད་རྫས་སྣ་ཚོགས་ཐོགས་པས་སེར་སྦྲེངས་དང་བཅས་བླ་བྲང་ཆེན་མོར་ཕྱག་བབ། བླ་བྲང་ནས་གསོལ་སྟོན་དང་དགོན་པའི་ལས་སྣེ། བླ་བྲང་ཞབས་སྡོད་རྣམས་ཀྱིས་མཇལ་དར་ཕུལ། ངེད་དང་ཧོར་ཚང་གསེར་ཁྲི་རིན་པོ་ཆེའི་བླ་བྲང་ནས་ཀྱང་ཇ་ཞུས་ཐོག་གསོལ་སྟོན་ལེགས་འབུལ་དགའ་དར་བཅས་ཕུལ། དགེ་འདུན་ཉིས་སྟོང་བརྒལ་བར་མང་ཇ་བཞིའི་ཐོག་སྐྱེས་ཀྱི་ཚུལ་དུ་ཇ་བག་ཕྱེད་རེའི་འགྱེད་བསྟར། སྐུ་ཞབས་རིན་པོ་ཆེའི་སྐུ་སྐལ་ལྟ་བུར་ཁལ་མ་ཉི་ཤུ་ཕུལ། ངེད་ཅག་དང་བླ་བྲང་ཞབས་གྲས་སོགས་ལ་གང་འོས་ཀྱི་དབུས་རང་འཚེམ་མེད་དུ་གནང༌། ཞག་བཅོ་ལྔ་ཙམ་ནས་ཟུར་དུ་སྤོ་སྐབས་བླ་བྲང་ནས་ཐབ་འཛིན་གྱི་ཟུར་གསོས་སོགས་གང་ལེགས་ཕུལ། འཛོལ་མེད་མངོན་པར་མཁྱེན་པའི་བཀའ་ལུང་བཞིན། །འཛམ་གླིང་ཡངས་པའི་བྱང་ཕྱོགས་མདོ་སྨད་ཀྱི། །འཛིན་མར་ཞབས་སེན་འགོད་པའི་རྟེན་འབྲེལ་ཀུན། །འཛོམ་པས་དགེ་ལེགས་ལམ་བཟང་ཡངས་པོར་ཕྱེ། །བླ་ན་མེད་པའི་ཐུགས་བསྐྱེད་འབྲེལ་ཟབ་མཐུས། །བླ་བྲང་བཀྲ་ཤིས་གཡས་སུ་འཁྱིལ་བའི་སྡེར། །བླ་མ་མཆོག་གི་བཀའ་བཞིན་ཕེབས་པ་ན། །བླ་སློབ་ཞལ་འཛོམ་དགེ་མཚན་མཆོག་ཏུ་འཕེལ། །ཡོས་ལོའི་དགུན་སྨད་ནས་འབྲུག་ལོའི་སོས་ཀའི་བར་སྐུ་ངལ་གསོ་བ་དང་སྦྲགས་བཅད་རྒྱའི་ཚུལ་དུ་བཞུགས་ཏེ་ཐུགས་དམ་གཙོ་བོར་མཛད། ཕྱོགས་ནས་ཆེད་གཏད་ཀྱིས་འོངས་པ་རྣམས་ལ་ཐུན་མཚམས་སུ་མཇལ་ཁ་གནང༌། དབྱར་ཐོག་ནས་གཟིམ་ཁང་གསར་འབུབ་ཀྱི་སྦྱོར་བ་བརྩམས། སྟོན་ཀ་རིང་གི་དགོན་གྲོང་སྤྱི་ནས་གདན་འདྲེན་ཞུས་པ་བཞིན་
དེར་ཕེབས། བིས་ཀྱ་ཐང་དུ་སེར་སྐྱ་ཚང་མས་ཆིབས་བསུ་དང་ཐབ་བསུ་གང་རྒྱས་ཞུས། ཐར་པ་གླིང་རི་ཁྲོད་རྣམས་ཀྱིས་བསུ་བ་ཇ་ཐབ་ཞུས། དེ་ནས་སེར་སྦྲེང་དང་བཅས་ཀ་རིང་དགོན་པར་བབ་སྟེ་འདུ་ཁང་སྟེང་དུ་བཞུགས། ཡུལ་ལུགས་དང་བསྟུན་པའི་སྟོན་མོ་གཟབ་རྒྱས་ཞུས། ཚོགས་པར་མང་ཇ་དང་ཞྭ་སྣམ་རེའི་འགྱེད། སྡེ་པ་སྤྱི་ལའང་བདག་རྐྱེན་བཅས་ཡིད་མགུ་བར་མཛད། གྲོང་པ་རྣམས་ཀྱིས་འབྲུ་ཀོན་ཀོའུ་སུམ་བརྒྱ་སོགས་གང་འབྱོར་གྱི་འབུལ་བ་བཏེག །དེ་སྔོན་ཀ་རིང་བིས་མདོ་གཉིས་གྱོད་ལ་ཐུག་སྟེ་ཕན་ཚུན་གཉི་གའི་མི་དྲུག་ཅུ་རྩ་བདུན་བསད། ལོ་དགུ་ཙམ་འགྱང་ཡང་བླ་དཔོན་སུས་བཤད་དེ་མ་འགྲིག་པར་ཡོད་སྟབས། ཉིད་ནས་གསུང་དགོས་ཞུས་ཀྱང་འཕྲལ་དུ་ཞལ་བཞེས་མ་མཛད། དགུན་ཐོག་ཐར་པ་གླིང་ནས་ཟླ་བ་གཉིས་ཙམ་ལ་འཇིགས་བྱེད་ཀྱི་བསྙེན་མཚམས་གནང་སྐབས་ཁ་མཆུ་དེ་ཉིད་ཞི་བའི་ཕྱིར་སྤྱན་དམིགས་ཡང་ཡང་གནང་བས། ནུབ་ཅིག་མནལ་ལམ་དུ་རྒྱ་མོ་ཞིག་གིས་བོང་བུ་རྐང་པ་དྲུག་ཅན་ཞིག་ཞོན་ཏེ་མདུན་དུ་འོངས་ནས་ཉམ་ཐག་པའི་ཚུལ་གྱིས་ཡུན་རིང་ངུས། མཐར་རླུང་འཚུབ་ལྟ་བུ་ཞིག་ཏུ་གྱུར་ཏེ་ལུང་པ་དེ་ནས་བུད་སོང་བ་ཞིག་རྨིས། དེ་ནི་ཕན་ཚུན་གཉི་གའི་རྒྱུད་དཀྲུགས་པའི་གྱོད་འདྲེ་གདུག་པ་ཅན་ཞིག་ཡོད་པ་དེ་རྡོ་རྗེའི་རྣལ་འབྱོར་གྱི་མཐུས་གཟིར་ནས་གཞན་དུ་བསྐྲད་པ་ཡིན་པར་སྣང༌། བཅད་རྒྱ་གྲོལ་ཏེ་ལོ་གསར་གྱི་དགའ་སྟོན་མཛད། སྦྲུལ་ལོའི་ཟླ་བ་དང་པོ་ནས་སྡེ་པ་གཉི་གའི་བར་གྱི་གཟུ་གསུང་སྟེ་ཕན་ཚུན་དུ་འབྱོན་བཞུད་ལན་འགའ་དགོས་པ་བྱུང་ཡང་སྐྱོ་
ངལ་མེད་པར་ཕན་ཐབས་ཀྱི་དགོངས་པ་ཁོ་ན་མཛད་པས་གྱོད་ལེགས་པར་འགྲིག་སྟེ་སྐྱེ་བོ་དུ་མ་ཚེ་འདིར་འཆི་བདག་གི་མཆེ་བའི་ཕྲག་ནས་བླངས་ཤིང༌། ཕྱི་མ་ངན་འགྲོ་མི་བཟད་པར་འགྲོ་བའི་སྒོ་ལམ་བཅད་དེ་ཕན་པ་དང་བདེ་བའི་དཔལ་ལ་བཀོད། འདི་སྐོར་རྫོང་དཀར་མ་ཎི་པ་ཆུང་བ་ཚང་དང་འཕྲོས་བྱུང་བར། སྒོ་མང་མཁན་རིན་པོ་ཆེ་ནས། ཨ་ཁ་ཁ། མི་འདི་ག་ཙམ་བསད་དེ་ཡག་པོ་མ་རེད། ད་དེ་འདྲ་མ་བྱེད་གྱོད་འགྲིག་གི་ཆུགས། འགྲིག་གི་ཆུགས་གསུང་བ་མ་གཏོགས། ས་ཆའི་གྱོད་ངན་དེ་འདྲ་ལ་ཐུགས་རྒྱུས་མེད་སྟབས་གྱོད་ཀྱི་གནས་ལུགས་བརྡ་དེད་བྱས་ནས་གསུང་རྒྱུ་མི་འདུག་ཀྱང༌། སྐྱེས་བུ་དམ་པའི་ཐུགས་སྨོན་དང་བྱིན་རླབས་དེ་ཡ་མཚན་པོ་རེད། སྔར་ཅི་བྱས་ཀྱང་མི་འཕྲོད་པ་ཞིག་ཡོད་པ་ད་ལན་དཀའ་ཚེགས་མེད་པར་འགྲིག་བྱུང༌། ཞེས་གསུང་གི་འདུག་པ་དངོས་སུ་ཐོས་ཏེ། དབུ་མ་རིན་ཆེན་ཕྲེང་བར། འཇིག་རྟེན་ཀུན་ན་སྐྱེ་བོ་གང༌། །སྡིག་པ་བྱེད་པར་འདོད་གྱུར་པ། །དེ་དག་ཐམས་ཅད་གནོད་མེད་པར། །རྟག་ཏུ་ཅིག་ཅར་བཟློག་གྱུར་ཅིག །ཅེས་དང་སྤྱོད་འཇུག་ལས་གསུངས་པ་ལྟ་བུའི་སྨོན་ལམ་ཐམས་ཅད་གྲུབ་ཅིང་བདེན་ཚིག་གི་ནུས་པ་སྨིན་པའི་མཐུ་ཡིན་ནོ། །སྔར་འཐབ་རྩོད་འཁྲུག་ལོང་གིས་སྲིན་པོའི་གྲོང་ཁྱེར་ལྟ་བུར་ཡོད་པ། ཉིད་ཕེབས་ཏེ་ཟླ་ཤས་བཞུགས་པ་ནས་དུས་བདེ་ཞོད་འཇག་གིས་ཉམས་སྤྲོ་ཞིང་ཡིད་ཕེབས་པ་ཆེད་དུ་བརྗོད་པའི་ཚོམས་ལས། གང་ན་དམ་པ་བཞུགས་པ་ཡི། །ས་དེ་ཡིད་དུ་འོང་བ་ཡིན། །ཞེས་པ་ལྟར་གྱུར་ཏོ། གཏུམ་དྲག་ཁོང་ཁྲོའི་གདོན་གྱིས་བརླམས་པའི་གར། །གཏོལ་མེད་སྨྱོན་པའི་སྟངས་སྟབས་བཞིན་བསྒྱུར་ཚེ། །གཏུགས་པ་མེད་པའི་སྙིང་རྗེས་
ཡོངས་བཟུང་སྟེ། །གཏིང་ཟབ་ངན་འགྲོའི་གཡང་ལས་སྐྱོབ་པར་མཛད། །ཝ་ར་ཎཱ་སིའི་འཁྲུལ་འཁོར་རྩོམ་པའི་བདུད། །ཝ་སྐྱེས་ངན་པ་སེང་གེའི་ང་རོས་བསྐྲད། །ཝརྨྨ་མཆོག་ཏུ་བགོས་པའི་སྙིང་སྟོབས་ཀྱིས། །ཝ་ལེར་འཇིག་རྟེན་བདེ་བའི་གནས་ལ་བཀོད། །བདུན་པའི་ནང་ལ་བཀྲ་ཤིས་འཁྱིལ་དུ་ཕེབས་ཏེ་ཉིད་ཀྱི་གཟིམ་ཁང་གསར་བསྐྲུན་གྱི་ནང་དུ་བཞུགས། ཉིད་ཀྱི་དགེ་ཕྲུག་ཨ་ལག་ཤ་ཐོ་ཡོན་མཁན་པོས་གསེར་ཟངས་ལས་བསྒྲུབ་པའི་ཇོ་བོའི་སྐུ་ཁྱད་འཕགས་མི་ཚད་ལྷག་པ་ཞིག་ཕུལ་བ་གཟུངས་གཞུག་དང་རབ་གནས་སོགས་ཇི་བཞིན་བགྱིས་ཏེ་གཟིམ་ཁང་གི་རྟེན་གཙོར་བཞུགས་སུ་གསོལ། བླ་བྲང་ཆེན་མོའི་གཟིམ་ཁང་ཐུབ་བསྟན་ཕོ་བྲང་ཡང་གསར་དུ་གྲུབ་པས་ཚོམས་ཆེན་འདོད་དགུ་འཁྱིལ་པ་རྟེན་བརྟེན་པ་ཀུན་ལ་རབ་གནས་མཛད། དེ་ནས་ཟླ་བ་ལྔ་དྲུག་ཙམ་ལས་མ་འགྱང་བར་མཆོག་སྤྲུལ་རིན་པོ་ཆེ་གདན་སར་བཀོད་དེ། དེ་ཉིད་དུ་དཔོན་སློབ་ཐམས་ཅད་དགའ་སྟོན་ལ་ལོངས་སྤྱོད་ཆོག་པ་བྱུང་བས། རབ་གནས་ཀྱི་དུས། ཞལ་མཐོང་ཙམ་གྱིས་བདེ་བའི་མཆོག་བརྙེས་ཏེ། །ཉི་ལྟར་ཞལ་དྲོ་ཟླ་ལྟར་འོད་གསལ་ཞིང༌། །གསུངས་པ་དེ་ཁོ་ན་བཞིན་དུ་གྱུར། བདག་གིས་ཀྱང་རྟ་ལོའི་སྨོན་ལམ་གྱི་སྟེང་དེར་སྐྱབས་མགོན་མཆོག་གདན་སར་བཀོད་ནས་རང་གི་ཁྲི་ཁུར་བཞག་པས། དམ་པ་ཉིད་ཚོགས་ཆེན་གྱི་ཁྲིར་བསྐོ་བཞག་མཛད། ཀུན་མཁྱེན་བླ་མ་སྐུ་སྔ་ཕྱིས་བསྟན་འགྲོའི་དོན་སྒྲུབ་པའི་རྩ་བ་ལྟ་བུ་དགོན་སྡེ་འདི་ཉིད་ཡིན་པས། མཆོག་སྤྲུལ་རིན་པོ་ཆེའི་འང་མཛད་པའི་ཐོག་མ་བསྟན་པའི་འབྱུང་གནས་འདིར་བཤད་སྒྲུབ་ཀྱི་བསྟན་
པའི་དོན་སྒྲུབ་མཁན་གཙོ་ལ། མདོ་དབུས་ཀུན་ཏུ་བསྟན་པའི་བྱ་བ་གང་བརྩམས་ལྷུན་གྱིས་གྲུབ་པའི་བསྟན་པའི་རྩ་ལག་ཆེན་པོ་འདི་ལྟ་བུ་ཞིག་བསྐོ་རྒྱུའི་རྟེན་འབྲེལ་རང་འགྲིག་ཏུ་བྱུང་བ་ནི་བསྟན་པ་ཕྱོགས་མཐར་སྤེལ་བའི་ཐུགས་བསྐྱེད་ལྷན་ཅིག་པའི་འབྲས་བཟང་དུས་སུ་སྨིན་པའི་དགེ་མཚན་རྨད་དུ་བྱུང་བའོ། །ས་ག་ཟླ་བའི་ཡར་ཚེས་བཟང་པོར་ཁྲི་འདོན་མཛད་པར་སྤྱི་བླ་བྲང་ནང་ཚན་ཁག་ནས་ཁྲི་འབུལ་བསྟར། བདག་གིས་ཀྱང་བླ་མ་སྔ་ཕྱིའི་རྩིས་སྤྲོད་དཀྱུས་མའི་ཐོག་ཉིད་ཀྱི་བླ་བྲང་གསར་འཛིན་སོགས་འགྲོ་སྒོ་ཆེ་བ་དང༌། རིགས་གྲྭའི་དུས་ཀྱང་ཉེ་བར་གཏུགས་པའི་སྟབས་ཇ་མར་དངོས་པོ་སྣ་ཚོགས་བཅས་དངུལ་སྲང་ཕྱེད་དང་སུམ་བརྒྱའི་རྩིས་རིགས་གྲྭའི་ཞལ་འདེབས་ལ་ཟུར་དུ་ཕུལ། ཆོས་གྲྭར་བརྩི་བཞག་འཆག་མེད་ལྟ་བུ་དང་གསོན་གཤིན་གྱི་དོན་ལ་ཐག་ཉེ་རིང་གི་གདན་འདྲེན་བྱུང་བར་ཡང་འདུན་པ་བཞིན་ཕེབས། སྒྲིག་གི་རྟིང་གནོན་ཚ་དྲག་སྒོ་མང་མཁན་པོའི་སྐབས་ལྟ་བུ་མ་མཛད་ཀྱང༌། ཚོགས་གཏམ་སོགས་ཅི་གསུང་ཐམས་ཅད་རྒན་གཞོན་ཀུན་གྱིས་སྤྱི་བོས་ནོད་པས་ཤིན་ཏུ་ལེགས་པ་བྱུང༌། ཞལ་ནས་གསུང་དུས་འདིའི་བླ་མ་བྱེད་རྒྱུ་འདི་སྒོ་མང་ལས་དཀའ་ལས་ཆེ་བར་འདུག །སྒོ་མང་གྲྭ་ཚང་ལྟར་གྱི་བརྩི་བཞག་ཆ་ཚང་བར་འགྲོ་དགོས་པའི་ཐོག་ཏུ། ཡ་ཀི་ཚོ་དང་འདྲ་བའི་ཐེབས་ཅི་ཡང་མེད་པར་གྲོང་ཆོག་ཁོ་ནའི་སྟེང་ནས་རིགས་གྲྭ་གཏོང་དགོས་པ་དང༌། རིགས་གྲྭའང་ཡ་ཀིར་ལོ་དྲུག་རེར་བསགས་ནས་བཏང་ཆོག་ལ། འདིར་ལོ་རེ་བཞིན་གཏོང་དགོས་ཤིང་མང་ཇ་མ་བརྩིས་པའི་ཕོགས་རྐྱང་པ་ལའང་དངུལ་སྲང་སྟོང་དང་ལྔ་བརྒྱ་རེའི་ཚོད་མ་མཐའ་འགྲོ་གིན་འདུག་པས་བསྡོམས་སོང་ན་གཏོང་
སྒོ་འདི་ལྕི་བར་འདུག །དེའི་ཐོག་ཏུ་གཏོར་སྒྲུབ། གཏོར་ཆེན་གཏོར་རྒྱག་ཟེར་བ་ལྟ་བུ་སྔགས་གྲྭ་ཞིག་གིས་བྱེད་རྒྱུའང་མང་པོ་བྱེད་དགོས་པས་དཀའ་ལས་ཆེན་པོ་རེད་གསུང་ནའང༌། ཕྱག་ལེན་དུ་འདེབས་པའི་ཚེ་མིའི་མིག་ལྟོས་བསླད་མི་ཉན་གསུངས་ནས་དགོན་འདིའི་ལུ་གུ་ལག་སྐྱེས་ཀྱི་རྒྱུས་ཡོད། སྐུ་ན་གཞོན་པ་ཚོས་གང་མཛད་རྒྱུ་ཐམས་ཅད་ལྷག་དང་བཅས་ཏེ་གནང་ཡང་སྐུ་དང་ཐུགས་ལ་སྐྱོ་ངལ་གྱི་རྣམ་པ་དང་མི་ལྕོགས་པ་ཅི་ཡང་མེད་པས། ཐམས་ཅད་ཀྱང་སྐྱེས་བུ་དམ་པའི་ཐུགས་སྨོན་དང་ཐུགས་སྟོབས་ཀྱི་མཐུ་མ་གཏོགས་དགུང་ལོ་ལ་ལྟོས་པ་མི་འདུག་ཅེས་ཡ་མཚན་དང་དད་གུས་ལྷག་པར་འཕེལ། རིགས་གྲྭ་དང་པོའི་སྐབས་དགེ་འདུན་ཉིས་སྟོང་སུམ་བརྒྱ་ཙམ་ལ་ཕོགས་ཆེན་ཇ་བག་ཕྱེད་རེ་དང་ཇ་བག་ཕྱེད་རེའི་རྩིས་ཀྱི་ཕྲུག་སོགས་དངོས་པོ་སྣ་ཚོགས། ཉི་མ་གནང་ཆགས་ཀྱི་འགྱེད་སྣ་བདུན། ཐོས་བསམ་གླིང་པ་སྟོང་དང་ཉིས་བརྒྱ་སྐོར་ལ་ཟམ་ཡ་རེ་བཅས་ལོ་ལྟར་ངེས་ཅན་དང༌། རིགས་གྲྭ་ཕྱི་མ་གཉིས་ཀྱི་ཕོགས་ཆེན་ལ་ཇ་བག་རེ་བཏང༌། འཇམ་མགོན་ས་པཎ་གྱིས། དང་པོ་ཟང་ཐལ་བྱས་ན་འཁོན་པའི་རྒྱུ། །སྣ་ཚོགས་ཐབས་མཁས་བྱས་ན་གཡོ་སྒྱུར་གོ །སེམས་ལ་གཏད་མེད་བྱས་ཀྱང་མི་མི་མགུ། །འདུ་འཛིས་སྐྱོ་བ་མེད་དམ་ལོ་ཙཱ་བ། །དྲང་པོར་སྨྲས་ན་ཕལ་ཆེར་དགྲ་རུ་སྡང༌། །ཡོན་པོར་སྤྱད་ན་སེམས་ལ་རྣམ་སྨིན་ལྕི། །སྣ་ཚོགས་སྤྱད་ན་གཏད་སོ་མེད་པར་བལྟ། །བྱས་པའི་འབྲས་བུ་སོམས་དང་ལོ་ཙཱ་བ། །ཞེས་གསུངས་པ་བཞིན་སྤྱིར་སེམས་ཅན་མོས་པ་སྣ་ཚོགས་པ་ཡིན་པས་ཐམས་ཅད་མགུ་ཚུལ་མེད་ལ། ལྷག་པར་བྱ་
བ་ཞི་དྲག་གི་སྣེར་སླེབ་པ་འདིར་འགའ་ཞིག་དགའ་ཡང་འགའ་ཞིག་མི་དགའ་བ་ཞིག་ལས་འོང་མི་སྲིད་པ་ལྟ་བུར་འདུག་ཀྱང༌། དམ་པ་ཉིད་ལ་བགྲེས་གཞོན་བར་མ་སུའི་ཐད་ནས་ཀྱང་དད་གུས་བྱེད་པ་མ་གཏོགས་མི་དགའ་བའི་སྐྱོན་འདོགས་ཚིག་གཅིག་བརྗོད་པའང་ཐོས་མ་མྱོང་བ་ནི་ཚུལ་ཁྲིམས་དང་ལྷག་བསམ་རྣམ་པར་དག་པའི་ཆེ་བའོ། །ཁྲིར་བཞུགས་ཀྱི་རིང་ལ་ཆོས་འཆད་ཉན་འཕེལ་ཞིང་གྲྭ་ཚོགས་རྒྱས་པ་དང༌། ཡུལ་ཁམས་སུ་ནད་འཁྲུག་མེད་ཅིང་ལོ་ཏོག་སྨིན་པ་སོགས་བཀྲ་ཤིས་ཀྱི་དགེ་མཚན་མཆོག་ཏུ་འཕེལ། ལྕགས་སྤྲེལ་ལོར་ཁོ་བོ་ཅག་ལ་ཚོགས་ཆེན་དུ་བདེ་ལམ་གྱི་ཁྲིད་ཅིག་བྱེད་དགོས་ཀྱི་སྐུལ་མ་མཛད་པ་བཞིན། དམ་པ་ཉིད་ཀྱིས་དབུ་མཛད་པའི་དགེ་འདུན་སྟོང་ཕྲག་གཉིས་ལྷག་ལ་ཉིན་བཅོ་ལྔའི་རིང་ཁྲིད་དམིགས་རྒྱས་པ་སེམས་བསྐྱེད་མཆོད་པ་དང་བཅས་ཕྱག་ལེན་བཞིན་ཕུལ། ལོ་ལྟར་འདི་བཞིན་བཀའ་ཆོས་ཆེ་བ་རེ་དགོས་ཚུལ་གསུང་བ་ལའང་རྟེན་འབྲེལ་གྱིས་ཁས་ལེན་ཞུས། ལྕགས་བྱའི་ལོ་ཆོ་འཕྲུལ་སྨོན་ལམ་གྱི་དུས་མཆོད་ཁོ་བོ་ཅག་ནས་བཏང་བར་དངུལ་རྡོ་ཚད་གཅིག་ཞལ་འདེབས་སུ་གནང་ཞིང་སྨོན་ལམ་གསུང་ཆོས་སོགས་ཆག་མེད་བཀའ་དྲིན་བསྐྱངས་ཏེ་སྨོན་པའི་མཚམས་སྦྱོར་མཛད་པར་ཅི་འབྱོར་གྱི་ལེགས་འབུལ་བཏེག །སྨོན་ལམ་གྲོལ་རྗེས་ཁྲིའི་གནང་བ་ཞུས་ཏེ་ཟུར་བཞུགས་མཛད། སྐུ་ཞབས་རིན་པོ་ཆེར་གོས་ཡུག་བཅུ་རས་ལྔ་བཅུ་ལྷ་དར་བཅས་ཕུལ་བར་དགོན་པའི་འཛིན་སྐྱོང་གང་ལེགས་མཐར་ཕྱིན་པའི་དགའ་དར་གསོལ་སྟོན་རྒྱས་པ་བཅས་གནང༌། ཚོགས་ཆེན་དང་གྲྭ་ཚང་ལ་མང་ཇ་འགྱེད་བཅས་ཀྱི་ཐོག་འདུ་ཁང་ཆེན་མོར་མང་ནུག་དང་བཅད་ལྡན་
སོགས་གོས་ཆེན་གང་བཟང་གི་བླ་བྲེ་གྱན་དགུ་མ་ལོང་ཙམ་གསར་འཇོག་མཛད། དུས་ཇི་ཙམ་སྙིགས་མར་སོང་བ་བཞིན་གྱི་སྙིང་སྟོབས་དང་སྤྲོ་བ་ལྷག་པར་འཕེལ་བས་སྐུ་ལའང་མི་ལྕོགས་པ་མེད་པ། བྱམས་པའི་རླུང་ཤུགས་ཀྱིས་བསྐྱོད་པས། །ཤིང་བལ་བཞིན་དུ་སྲིད་པ་འདིར། །འགྲོ་བའི་དོན་དུ་གཡོ་བ་ལགས། །ཞེས་པའམ། སྤྱོད་འཇུག་ལས། ཇི་ལྟར་རླུང་གིས་འགྲོ་བའམ། །འོང་བས་ཤིང་བལ་དབང་བསྒྱུར་བ། །དེ་བཞིན་སྤྲོ་བས་དབང་བསྒྱུར་ཞིང༌། །དེ་ལྟར་ན་ནི་འགྲུབ་པར་འགྱུར། །ཞེས་པ་བཞིན་ནོ། །དུས་དང་ཡུལ་གྱི་མཐར་ཡང་བཤད་སྒྲུབ་ཀྱི། །དར་ཆེན་བསྒྲེང་ལ་སྙིང་སྟོབས་མ་ཞུམ་པ། །དམ་པ་རྣམས་ཀྱི་ཐུགས་བསྐྱེད་གྲུ་གཟིགས་ཀྱིས། །དོན་གཉིས་ནོར་བུའི་དགའ་སྟོན་ཅི་ཡང་དྲངས། །ཧཱ་རི་དྲ་ཡི་ཅོད་པན་འཆང་བའི་བསྟན། །ཧ་རི་བྷ་དྲའི་དགོངས་དོན་ཤེར་ཕྱིན་སོགས། །ཧ་རི་ཙནྡན་དྲི་བསུང་འཐུལ་བ་ཡིས། །ཧ་ས་བཛྲ་བཞེད་པ་ཡོངས་སུ་བསྐངས། །སྒྲུབ་པའི་རྒྱལ་མཚན་འཛིན་པ་ཆེན་པོ་མཛོ་དགེ་རི་ཁྲོད་པ་མཁས་གྲུབ་བསྟན་འཛིན་གྱིས་ཞུས་ཏེ་བླ་མ་དགེ་བཤེས་རགས་བསྡུས་བཞི་བཅུ་སྐོར་ལ་སྐྱིད་ཤོད་གསུང་འབུམ་གྱི་ལུང་དང༌། གཞན་ཡང་དོན་གཉེར་ཅན་མང་པོར་འདོད་ཆོས་ཅི་རིགས་གནང༌། དམ་པ་ཉིད་དབང་ལུང་ཁྲིད་མན་ངག་སོགས་ཀྱི་གདམས་པའི་མཛོད་ལྟ་བུ་ཡིན་མོད་ཀྱང་ད་དུང་ཆོས་ཚོལ་བ་ལ་དགྱེས་པར་སྐུ་ཞབས་ཐུའུ་བཀྭན་རིན་པོ་ཆེ་དགོན་པར་སྔ་ཕྱིར་ཕེབས་སྐབས་འཇིགས་བྱེད་ཞལ་ཕྱག་ཡོངས་རྫོགས་ཀྱི་རྗེས་གནང༌། མགོན་པོའི་གཏོར་དབང་བར་ཆད་ཀུན་སེལ། སྙིང་ཞུགས་ཀྱི་
ཐུན་མོང་མ་ཡིན་པའི་རྗེས་གནང༌། ཀུ་རུ་ཀུལླེའི་སྒྲུབ་ཐབས་ཚར་ཆེན་གྱིས་མཛད་པ་ལེ་ཚན་གཉིས། དེས་མཛད་པའི་ཚེ་ཁྲིད་ཟླ་བའི་ཆུ་རྒྱུན། རྟ་མགྲིན་གྱི་སྒྲུབ་ཐབས་རྒྱལ་དབང་དང་ཉིད་ཀྱིས་མཛད་པ། ཀླུ་སྒྲུབ་སྨོན་ལམ་སོགས་ལུང་ཐོར་བུ་མང་ཙམ་དང༌། བློ་སྦྱོང་ཚིག་བརྒྱད་མའི་ཉམས་ཁྲིད་བཅས་གསན། ཁོ་བོ་ཅག་གི་རྩ་ནས་ཀྱང༌། དྲིལ་བུ་ལྷ་ལྔ་དང་ལུས་དཀྱིལ་གྱི་དབང༌། མགོན་པོ་བཀའ་བཅུ་གསུམ། ས་སྐྱའི་གསེར་ཆོས་བཅུ་གསུམ། ཚེ་དཔག །སྒྲོལ་མ་དཀར་ལྗང༌། འཇམ་དབྱངས་དཀར་པོ། ལོ་གྱོན་མ་གཙོ་འཁོར་གསུམ་སོགས་རྗེས་གནང་ཐོར་བུ་མང་པོ་དང་ལུང་ཡང་འགའ་ཞིག་གསན། ཚོགས་ཆེན་ལ་རྡོར་ཕྲེང་དང་མི་ཏྲའི་དབང་བྱེད་སྐབས། ཉིད་སྐུ་ན་ཤིན་ཏུ་སྨིན་ཡོད་ཀྱང་དེའི་ནང་གི་འགའ་ཞིག་ལའང་ཕེབས་ནས་གསན་སོང་བ་ནི་ཆོས་ཀྱིས་ངོམས་པ་མེད་པའི་རྣམ་ཐར་དུ་སྣང༌། སྐབས་ཤིག་ཀ་རིང་སྒར་དུ་ཕེབས་ནས་དེར་གོས་སྐུ་ཐོག་ཚད་གསུམ་ཅན། གཙོ་བོ་བྱམས་མགོན་ལ། ལྷ་མགྲོན་དུ་རྗེ་ཡབ་སྲས། ཡི་དམ་ཆོས་སྲུང་སོགས་མང་པོ་བཞུགས་པ་ཞིག་སྦྱོར་འཇགས་མཛད། ཉིད་ཀྱིས་གཙོ་མཛད་པའི་གྲྭ་སློབ་མང་པོས་ཉིན་གཉིས་ཀྱི་རིང་སྤྱན་དབྱེའི་ཆོ་ག་རྒྱས་པར་བསྒྲུབས་ཏེ་བཀྲ་ཤིས་ཀྱི་མེ་ཏོག་ཆར་དུ་བསྙིལ། ཟམ་ཆ་རེའི་འགྱེད་བསྟབས། སྡེ་པ་སྤྱི་ནས་གསོལ་སྟོན་གཟབ་རྒྱས་ཞུས་ཤིང་ཐམས་ཅད་གྲོས་མཐུན་གྱི་སྒོས་དགོན་དེར་གཟིམ་ཁང་ཞིག་དགོས་ཚུལ་ཞུས་པ་ཞལ་གྱིས་བཞེས་ཏེ། དེའི་ཕྱི་ལོར་གཟིམ་ཁང་གྱན་ལྔ་པ་ཞིག་ཕུབ། འོད་དཔག་མེད་ཀྱི་སྐུ་མི་ཚད་ལྷག་ཙམ་ཞིག་དང་ལི་མ་ཁ་ཤས། ཞལ་ཐང་བྱིན་ཅན་མང་པོ་བཅས་དེར་
བཞུགས་སུ་གསོལ་ནས་ཡུལ་དེའི་བསོད་ནམས་ཀྱི་ཞིང་དུ་བསྒྲུབས། མཚམས་མཚམས་སུ་དེར་ཆུ་སྤོས་ནས་བཞུགས་ཏེ་སྐུའི་འཕྲོད་བསྟེན་མཛད་ཅིང༌། རྒྱུན་པར་བཀྲ་ཤིས་འཁྱིལ་དུ་གཟིམ་ཁང་ཆེ་བའི་གཡས་ཕྱོགས་སུ་ར་སྐོར་ཟུར་དུ་བཅད་དེ་བསྲོ་ཁང༌། ཉི་རྭ། གསོལ་ཐབ་སོགས་ཐམས་ཅད་ཚང་བ་ཁོད་ཡངས་ཤིང༌། ར་བར་མེ་ཏོག་གི་ཚལ་ཡོད་པ་ཤིན་ཏུ་འགོལ་ཞིང་སྟབས་བདེ་བ་ཞིག་བྱས་ནས་དེར་འཇིག་རྟེན་གྱི་གཡེང་བ་ཅི་ཡང་མེད་པར་ཐུགས་ཤིན་ཏུ་བག་ཕེབས་ཤིང་ཟབ་མོའི་ཉམས་བཞེས་ཀྱི་རྟོགས་པ་གོང་དུ་འཕེལ་བའི་དགའ་བདེའི་ངང་དུ་བཞུགས། སྟོན་མཇུག་ཅིག་ལ་སྒྲོལ་མ་ཕུའི་ཞབས་དྲུང་གིས་འདུ་ཁང་གསར་བསྐྲུན་བགྱིས་པ་རབ་གནས་ཀྱི་དོན་དུ་གདན་འདྲེན་ཞུས་ནས་དེར་ཕེབས་པའི་ཞར་ལ་བྱམས་པ་འབུམ་གླིང་དུ་མཇལ། འདི་ཁ་ཅིག་ཀོང་ཚེས་བཞེངས་ཟེར་ཡང༌། ཆོས་འབྱུང་མང་པོར་རྒྱ་བཟའ་ཀོང་ཇོ་བོད་དུ་ཕེབས་པའི་ལམ་ནས་བྲག་ལ་བྱམས་པ་ཁྲུ་བརྒྱད་ཅུ་པ་བརྐོས་ཞེས་འབྱུང་ལ། དེ་དུས་ཀྱི་ཕོ་བྲང་ཞིང་ང་ཕུ་ཡིན་པས་ལམ་འདི་དང་འགྲིག་ཅིང་གཞན་ན་དེ་འདྲ་སྟོན་རྒྱུ་མེད་པ་དང༌། འདིའི་ཉེ་སྐོར་དུ་སྒྲོལ་མ་རང་བྱོན་འོང་ལུགས་ཀྱིས་ཀྱང་ཤེས་པས། ཀོང་ཚེས་བཞེངས་ཟེར་བ་དེ་ཀོང་ཅོས་བཞེངས་ཞེས་པ་རིམ་གྱིས་སྒྲ་ལོག་པ་ཡིན་པར་སྣང་ངོ༌། །དེ་ནས་རྒྱ་བོད་ཀྱི་ཁྲོམ་ཆེན་པོས་བསུ་བ་སེར་སྦྲེང་དང་བཅས་སྒྲོལ་མ་ཕུར་ཕེབས། དགེ་ལེགས་ཆར་འབེབས་ཀྱི་སྟེང་ནས་རབ་གནས་རྒྱས་པ་སྦྱིན་སྲེག་དང་བཅས་གནད་སྨིན་མཛད་དེ་རྟེན་དང་བརྟེན་པ་མཐའ་དག་བྱིན་རླབས་མི་ཟད་པའི་གཏེར་དུ་བསྒྲུབས།
བཀའ་དྲིན་གཏང་རག་ཏུ་རྗེའི་གསེར་སྐུ་ཁྲུ་ཚད་མ་གཅིག་གིས་གཙོས་སྐུ་གསུང་ཐུགས་རྟེན། མཆོད་ཆའི་རིགས་མང་པོ། གོས་དར། རས། དོང་ཙེ་སོགས་དངོས་འབུལ་གྱ་ནོམ་པ་བཏེག །དེ་ནས་སྒྲོལ་མའི་སྒང་ལམ་བརྒྱུད་དེ་ཕེབས་བྱམས་ལ་བཞུགས་ནས་བདེ་མཆོག་རང་བྱོན་གྱི་ལྷ་ཁང་ལོ་ཀྱཱ་ཏུན་ཏུ་གྲགས་པར་ཕེབས། ཚོགས་འཁོར་གནང་ཚེ་འཇའ་ཚོན་སྣ་ལྔ་པ་ཞིག་ཤར་བས་རྒྱ་མི་རྣམས་ཀྱང་ངོ་མཚར་དུ་གྱུར་ཏེ་གུས་འདུད་ལྷུར་བླངས། ཡར་ལམ་ཨ་འགང་རྟ་མགྲིན་རང་བྱོན་གྱི་ལྷ་ཁང་དུ་མཇལ། དེའི་དགེ་འདུན་རྣམས་ཀྱིས་ཆོས་འབྲེལ་ཞུས་པའི་རེ་བ་བསྐངས། དེ་ནས་སྟག་ལུང་སྤྲུལ་བའི་སྐུས་གདན་འདྲེན་ཞུས་ཏེ་བསུ་བ་སེར་སྦྲེང་དང་བཅས་སྟག་ལུང་དགོན་དུ་ཕེབས། དེར་མཚན་ཉིད་ཀྱི་བཤད་གྲྭ་ཞིག་གསར་འཛུག་བྱེད་རྩིས་ཀྱི་སྐབས་སུ་ཡོད་པས་བརྩི་བཞག་གི་ཐོག་མ་གནང་སྟེ་ས་མཐར་བསྟན་པའི་སྒྲོན་མེ་སྤར། ཐུགས་སྨོན་གྱི་མཐུས་གྲྭ་ཚང་ཡང་དེ་ནས་བཟུང་ཡར་ངོའི་ཟླ་བ་བཞིན་འཕེལ། ཁོང་དཔོན་སློབ་ཀུན་ནས་དངོས་འབུལ་ཡང་རྒྱ་ཆེ་བ་ཕུལ། དེ་ནས་བྱོན་པར་ཧོར་ཚང་བླ་མ་རྒྱལ་མཚན་སོགས་ཀྱིས་ཇ་ཞུས་འབུལ་བ་བསུ་སྐྱེལ་སོགས་བཀུར་སྟི་ཕུལ་དུ་ཕྱིན་པ་བསྒྲུབས་ཏེ་རིམ་གྱིས་དགོན་པར་བབས། ཁོ་བོ་ཅག་ནས་མཆོད་རྟེན་མཐོང་གྲོལ་ཆེན་མོ་བཞེངས་པར་སྲང་སུམ་ཅུའི་ཞལ་འདེབས་དང༌། སྐུ་ཞབས་རིན་པོ་ཆེ་ནས་རབ་གནས་གནང་སྐབས་སྤྱན་དབྱེའི་ཆོ་གའང་ལྷན་དུ་གནང༌། ཕྱིས་སུ་དེའི་སྐོར་ཚད་ཀྱི་ཞབས་སྐོར་སྟོང་ཕྲག་བཞིའང་གྲངས་གསོག་མཛད། བླ་བྲང་ཕྱག་མཛོད་བློ་བཟང་དར་རྒྱས་དུས་ལས་འདས་པའི་དོན་དུ་སྤྱན་དྲངས་པར་འཕོ་བའི་སྤྱན་དམིགས་རྗེས་འཛིན་གྱི་བཀའ་དྲིན་སྩལ། ཨ་
མཆོག་དགོན་གྱི་ལམ་རིམ་གྲྭ་ཚང་གི་བླ་མ་དང༌། རྒྱལ་མོ་དགོན་གྱི་རེབ་ཚ་སྤྲུལ་བའི་སྐུས་དབོན་རྒན་འདས་པ་སོགས་ཀྱི་སར་གདན་འདྲེན་ནན་ཆེར་ཞུས་པ་བཞིན་ཕེབས་ནས་སོ་སོར་བསྔོ་སྨོན་སོགས་ཆེད་དམིགས་དང༌། དགོན་པའི་དགེ་འདུན་རྣམས་ལའང་ཆོས་ལུང་ཅི་རིགས་སྩལ། སོ་སོ་ནས་དངུལ་རྡོ་ཚད། གོས་ཕྲུག །ཉེར་སྤྱད། རྟ་ནོར་སོགས་འབུལ་བ་གང་རྒྱས་བསྟར། དེ་འདྲའི་ཕེབས་བཞུད་ཐབས་མེད་དགོས་པ་རེ་གཉིས་མ་གཏོགས་རྒྱུན་པར་ནང་དུ་ཏིང་ངེ་འཛིན་ལ་ཡང་དག་པར་གཞོལ་བས་ཟག་མེད་ཀྱི་དགའ་བདེས་ཉིན་མཚན་ཁོར་མོ་ཡུག་ཏུ་འདའ་བར་མཛད། དེའི་སྟོབས་ཀྱིས་སྔ་སོར་ཆོས་སྐྱོང་ཆེན་པོས་སྐུ་ཚེའི་ཚད་དགུང་ལོ་དོན་ལྔར་གསུངས་པ་ཇི་བཞིན་ཐོག་ཏུ་ཁེལ་བའི་སྟེང་དུ་ཐུགས་དམ་གྱི་མཐུས་སྐུ་ཚེ་བསྲིངས་ཏེ་བརྒྱད་ཅུ་རྩ་བགྲང་ཞིང༌། ཚེ་རབས་དུ་མར་གཞན་ལ་འཚེ་བ་སྤངས་པའི་མྱོང་བ་དང་བྱེད་པ་རྒྱུ་མཐུན་གྱིས། དེའི་རིང་ལ་འཕེལ་ཟད་འཁྲུགས་པས་སྙུན་སོགས་ཀྱིས་ཐུགས་དམ་ཉི་མ་གཅིག་འཆག་དགོས་པའང་མ་བྱུང་བར་ཟོ་མདོག་བདེ་ལ། ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པའི་དབང་གིས་སྐུའི་གཟི་མདངས་རྒྱས་བཞིན་པར་བཞུགས། རྒྱུན་གྱི་ཐུགས་དམ་མཛད་ལུགས་ཀྱང་ནང་པའི་རིམ་གྲོ་བཞིན་དུ་གྲངས་གང་འགྲོ་གཙོ་བོར་མི་མཛད་པར། ཐོག་མར་ཀུན་སློང་འཆོས་ཚུལ་དལ་བུས་གནད་དུ་འགྲོ་བ་ཞིག་མཛད་དེ། དེའི་ངང་ནས་ཞལ་འདོན་སོ་སོའི་སྐབས་ཀྱི་དམིགས་རྣམ་འཆར་ངེས་གནང༌། གཙོ་བོར་ཐུན་མོང་བ་སྐྱེས་བུ་གསུམ་གྱི་ལམ་གྱི་རིམ་པའི་གཞུང་ཤིང་ངེས་འབྱུང་བྱང་སེམས་ཡང་དག་པའི་ལྟ་བ་གསུམ་ལ་རྩལ་འདོན་
མཛད། ཆོ་ག་གང་གསུང་ནའང་དེ་གསུམ་རྨང་གཞིར་བྱས་ཏེ་རང་རང་གི་འགྲོས་ཀྱི་རིམ་པ་གཉི་གའི་རྣལ་འབྱོར་དང་སྦྲགས་ནས་གསུང་བ་ལས་གང་ཡང་མི་མཛད། ཉམས་ལེན་སྙིང་པོ་མཐར་ཐུག་པ་རང་གིས་ཁས་བླངས་པའི་ཚུལ་ཁྲིམས་རྣམ་པར་དག་པ་གཙོ་ཆེ་བར་གཟིགས་ཏེ་ཉིན་མཚན་དུས་ཀུན་ཏུ་དྲན་ཤེས་བཞིན་གྱིས་བྱ་ར་བྱས་ནས་རང་གི་སྒོ་གསུམ་གྱི་སྤྱོད་པ་བག་མེད་པའི་ཕྱོགས་སུ་ཅུང་ཟད་ཀྱང་མི་འཆོར་བས་བསླབ་ཁྲིམས་རྣམ་པར་དག་པ་མིག་གི་འབྲས་བུ་བཞིན་དུ་བསྲུང་བར་མཛད། ཡུལ་དུས་ཀྱི་དབང་གིས་བླ་མར་འཇོག་བྱེད་མོ་ལུང་བསྟན་ཞིག་ལ་གཙོ་བོར་བྱེད་སྟབས། ལ་ལས་ལུང་བསྟན་སོགས་ཞུས་པར་ངས་དེ་འདྲ་མི་ཤེས་གསུང༌། ཅིས་ཀྱང་ཕྱག་མོ་ཞིག་ཡིན་རུང་གནང་དགོས་ཞེས་ཨུ་ཚུགས་ཞུས་པར་ཨ་ཁ་ཁ་ད་རྫུན་ཡང་བཤད་དགོས་རྒྱུ་རེད་ཅེས་ཐུགས་ཤིན་ཏུ་འཚེར་བ་གནང༌། ཕལ་མོ་ཆེར་བཤད་ས་ཞིག་མ་རྙེད་པའི་ཞེ་འཚེར་ལས་བཤད་དགོས་པའི་ཞེ་འཚེར་མི་སྣང་མོད། དམ་པ་ཉིད་ཀྱི་དགོངས་པར་བློ་སྦྱོང་མཚོན་ཆ་འཁོར་ལོ་ལས། དམ་ཆོས་གཙུག་ལག་ཞུས་ནས་མོ་བོན་སྐྱོང༌། །ཕུང་བྱེད་རྟོག་པའི་མགོ་ལ་ཆེམས་སེ་ཆེམ། །གསུངས་པ་དང༌། བཀའ་གདམས་གོང་མའི་གསུང་སྒྲོས་ལས། རང་ཚོས་སངས་རྒྱས་ཀྱི་མཁྱེན་པ་ལ་མོ་མ་རྣོ་ཤོས་ཙམ་དུ་མི་རྩི་ཞེས་གསུངས་པ་བཞིན། བཀའ་གཙུག་ལག་གི་མདོ་རྒྱུད་རྣམས་སུ་བླང་དོར་རྒྱུ་འབྲས་ཐམས་ཅད་གསུང་བ་ལ་ཡིད་མི་ཆེས་པར། མོ་ལུང་རྩིས་གསུམ་གཙོ་བོར་བྱེད་པ་ལ་ཐུགས་ཤིན་ཏུ་མ་མཉེས་པའི་གསུང་དུ་སྣང༌། ཞབས་བརྟན་རིམ་གྲོ་རེ་སྒྲུབ་ནའང་གཏོ་མདོས་སོགས་གསར་རྙིང་མང་པོ་མི་མཛད་
པར། རྒྱལ་བའི་བཀའ་དྲི་མ་མེད་པ་ཀློག་འདོན་སོགས་འཕྲལ་ཕུགས་གཉི་གར་ཕན་ངེས་རེ་མཛད་དེ་གནད་ཤིན་ཏུ་ཆེ། ལ་ལ་ཞིག་དཔལ་མགོན་ཀླུ་སྒྲུབ་ཀྱིས། མཁའ་ལ་སྐར་མཁན་དག་གིས་རྩིས་བྱས་ནས། །ཟླ་བ་དང་ནི་སྐར་མའི་ལམ་རྣམས་ཤེས། །ཁྱིམ་ན་མི་དང་ཁྱིམ་ཐབ་ལོག་པ་དག །སྣ་ཚོགས་སྤྱོད་པ་དེ་ནི་མཐོང་མ་གྱུར། །གསུངས་པ་བཞིན། གཞན་གྱི་ལེགས་ཉེས་ཐམས་ཅད་ལུང་སྟོན་ཡང་རང་གི་འཕྲལ་ཡུན་གྱི་མདུན་མ་ཀུན་འཆོལ་འགྲོ་བ་མང་བར་སྣང་ནའང༌། ཉིད་ཀྱི་མཛད་པ་གང་ལའང་དང་པོ་ནས་དགོངས་པ་གཏད་ཚུལ་དེའི་ཐོག་ཏུ་མི་ཁེལ་མི་སྲིད་པ་ནི་འབྱུང་འགྱུར་གཟིགས་པའི་མཚན་མར་སྣང༌། ཚུལ་ཁྲིམས་རྣམ་པར་དག་པ་ཞིག་འོང་བའི་རྩ་བ་འདོད་ཆུང་ཆོག་ཤེས་ཀྱི་འཕགས་པའི་རིགས་བཞི་དང༌། སངས་རྒྱས་ཐུགས་རྗེ་ཅན་དེས་རབ་ཏུ་བྱུང་བ་དང་བསྙེན་པར་རྫོགས་པའི་དགེ་སློང་གི་གནས་བཞི་གསུངས་པ་ཐུགས་ལ་བཞག་སྟེ་ནོར་དངོས་པོ་གང་ལའང་འཛིན་ཆགས་སྤོང་ཞིང༌། རྩོལ་སྒྲུབ་ལ་མ་ལྟོས་པར་རང་ཤུགས་ཀྱིས་འོངས་པ་ཙམ་ལས། རྒྱ་ཆེ་གྲངས་མང་གི་རྩོལ་བ་མི་མཛད་དེ། འཕྲེང་བ་རྒྱན་ལྡན་ལེགས་པ་རེ་འབུལ་མཁན་བྱུང་ཚེ་ཕྱག་ཏུ་བསྣམས་ན་ཞུས་ཀྱང༌། བོད་པ་ཙ་ལེ་བ་བྱེད་རྒྱུ་མིན་རྗེ་བཙུན་འཇམ་དབྱངས་ཀྱིས་བྱིན་གྱིས་བརླབས་པ་འདིས་ཆོག་གསུངས་ནས་སྐུ་ཚེ་གང་པོར་འཕྲེང་སེར་རེ་ལས་མི་བསྣམས། དེས་མཚོན་པའི་ཉེར་སྤྱད་གང་ཡིན་ཀྱང་རྙིང་པ་དེས་སྤྱད་རུང་ཙམ་ཡོད་ན་དེས་ཆོག་པར་བྱེད་པ་མ་གཏོགས། བཀྲག་གང་ཆེའི་གསར་བའི་རིགས་སྤྱན་ལམ་དུའང་ཆེར་མི་འཇོག །ཞལ་
ནས་རུང་མི་རུང་གི་ཟུར་མང་པོ་མི་གསུང་ཡང༌། འགྲོ་འདུག་ཉལ་འཆག་གསུང་གླེང་ཟས་སྤྱོད་སོགས་གང་གི་ཚེའང་སྟོན་པའི་བཅས་པ་ལ་ཟོན་བྱེད་བཞིན་ཁོ་ནར་བཞུགས། འབད་མེད་དུ་བྱུང་བའི་ཕྱག་རྫས་རྣམས་ནི་ཅུང་ཟད་ཀྱང་ཆུད་ཟོས་སུ་མི་གཏོང་བར་དཀོན་མཆོག་གི་ཞིང་ཁོ་ནར་འགྲོ་བ་མཛད་དེ། རིགས་གྲྭ་སྔ་ཕྱིར་འབྲས་སྤུངས་ལ་ཕོགས་ཆེན་གསུམ་དང་བཅས་འགྱེད་བཞི་བཅུ་ཞེ་ལྔ། ཟུར་དུའང་ལྷ་ས་སྨོན་ལམ། འབྲས་སྤུངས་ཚོགས་ཆེན། སྒོ་མང་བཅས་འགྱེད་ལན་དགུ་ཙམ་གནང་ཞིང་སྲང་ལྔ་སྟོང་སྐོར་གྱི་མཆོད་རྫས། འབྲི་ཉིས་བརྒྱར་ཉེ་བའི་འཇོག་པ་སོགས་བསྡོམས་ཏེ་མང་ཇ་གྲྭ་ཇའི་རིགས་མ་བརྩིས་པ་ལའང་མ་མཐའ་སྲང་ཁྲི་ཕྲག་བཞི་ཙམ་གྱིས་དགེ་འདུན་མཆོད་སྣང་བ་ནི་པོ་ཏོ་བའི་ཞལ་ནས། ངས་གང་རྙེད་དགེ་འདུན་སོ་ཅན་གྱི་ཁ་ན་གསུང་བའི་རྣམ་ཐར་དུ་སྣང༌། དེས་ན་བདེན་པའི་རྣམ་པའི་མདོ་ལས། རབ་ཏུ་བྱུང་བ་ལ་ནི་ཟང་ཟིང་གི་སྦྱིན་པ་མ་གནང་ངོ༌། །ཞེས་གསུངས་པ་དང༌། བཀའ་གདམས་གོང་མ་རྣམས། ཁོ་བོ་ཅག་གིས་གཏོང་བའི་ཕན་ཡོན་རྣམས་མི་བརྗོད་ཀྱི། འཛིན་པའི་ཉེས་དམིགས་བརྗོད་པ་ཡིན། གསུང་བ་རྣམས་རང་གི་སྡོམ་ཁྲིམས་སོགས་ཡལ་བར་དོར་ཏེ་ཐབས་སྣ་ཚོགས་ཀྱིས་ལོངས་སྤྱོད་བསྒྲུབས་ནས་སྦྱིན་གཏོང་བྱེད་པ་བཀག་པ་ཡིན་པ་ནི། རྣལ་འབྱོར་སྤྱོད་པའི་ས་ལས། བྱང་ཆུབ་སེམས་དཔའ་རྣམས་ཀྱི་བསླབ་པ་ལས་འདས་ནས་ཇི་ལྟར་ཡང་སྦྱིན་པ་མི་གཏོང༌། ཞེས་པ་ལྟར་ཡིན་པས། རྩོལ་མེད་དུ་བྱུང་བའི་སྟེང་ནས་འདི་ལྟར་གཏོང་བ་རྒྱལ་སྲས་ཀྱི་ལག་ལེན་ཆེད་དུ་བསྔགས་པའི་གནས་སུ་གྱུར་པ་ཡིན་ནོ། །མདོ་སྨད་དུའང་དགེ་
འདུན་གྱི་བསྙེན་བཀུར་ལ་སྲང་ལྔ་སྟོང་ལྷག་པར་སོང་བའི་ཚོད་དུ་སྣང་ཡང་ཞིབ་ཆ་མ་ངེས་སོ། །དེའང་དམ་པའི་སྐྱེས་བུ་ནང་ཕན་ཚུན་དགོངས་པ་མཐུན་པ་ཆོས་ཉིད་ཡིན་སྟབས། ཁྲི་རིན་པོ་ཆེ་བློ་བཟང་སྨོན་ལམ་དང་དམ་པ་ཉིད་ཐུགས་ནང་ཤིན་ཏུ་ཉེ་བས་ཉིན་གཅིག་རྣམ་པ་གཉི་གས་གསོལ་ཚིགས་ལྷན་དུ་མཛད་དེ་གསུང་འཕྲོས་མང་པོ་གནང་བའི་ལྷོངས་ཤིག་ལ་བདེ་འགྲོར་སྐྱེ་ཐུབ་མི་ཐུབ་ཅིག་གསུངས་པར། དམ་པ་འདིས་འཁོར་བ་ཐོག་མ་མེད་པ་ནས་ལས་ཅི་འདྲ་བསགས་ཡོད་མི་ཤེས་པས་དཀའ་མོ་རེད་ཞུས་པར། ང་རང་གཉིས་བདེ་འགྲོར་སྐྱེ་ཐུབ་དྲག །ང་རང་གཉིས་སྐྱེ་མི་ཐུབ་ན་མི་ཚོས་གང་འདྲ་བྱེད་རྒྱུ་ཡིན་གསུང་བའང༌། དཔང་པོ་གཉིས་ཀྱི་གཙོ་བོ་བཟུང༌། ཞེས་པ་ལྟར་རང་སེམས་དཔང་པོར་བཞག་སྟེ་ཚུལ་ཁྲིམས་རྣམ་པར་དག་པའི་གདེང་ཚད་དང་ལྡན་པའི་གསུང་ཡིན་ཏེ། སྔོན་པོ་ཏོ་བའི་སློབ་མ་སྒོམ་པ་ཤེར་ཡོན་བྱ་བ་སྐུ་གཤེགས་ཁར། པོ་ཏོ་བས་ཁྱེད་དགའ་ལྡན་དུ་སྐྱེས་ན་དེར་ཇོ་འབྲོམ་གཉིས་བཞུགས་པས་ངའི་རྒྱུ་མཚན་དྲིས་ཚེ་འདི་འདྲ་ཞུས་ཞེས་འཕྲིན་བསྐུར་བར་ཁོང་གིས་དབུ་གུག་གུག་བྱས་པས། འགའ་ཞིག་བཞད་གད་བྱེད་ཀྱང༌། གཅིག་གིས་འདི་ངེས་པར་དགའ་ལྡན་དུ་སྐྱེའམ་ཞུས་པ་ལ། པོ་ཏོ་བས། འདི་དགའ་ལྡན་དུ་སྐྱེས་ཏེ་ཡོང་འདི་འདྲ་མི་སྐྱེ་ན་དགའ་ལྡན་སྟོངས་ཏེ་ཡོང་གསུང་བ་བླ་མ་ཐུགས་ཟིན་པའི་ཚད་བཞག་ཏུ་གསུང་བ་ལྟར་རོ། །དེར་མ་ཟད་ཁྲི་ཆེན་དེ་ནི་དེང་སང་གི་མི་ཞིག་དང་མི་འདྲ་བར་བཅོས་མ་ཅུང་ཟད་ཀྱང་མི་མཛད་ཅིང་ཐུགས་ལ་ཤར་བ་དྲང་ཐལ་དུ་གསུང་བ་ཞིག་ཡོད་པས། འགའ་
ཞིག་ལ་མཁན་པོ་ཆོས་དར་གྲྭ་པ་ཡག་པོ་ཡིན་ཁོ་ང་ལས་ཀྱང་ཡག་བསམ་པ་ཡོད་གསུང་སྟེ། གྲྭ་པ་ཡག་པོ་ཞེས་པ་དེ་བསྟན་པའི་གནད་ཤེས་པ་ཞིག་གིས་བལྟས་ན་རྣམ་ཐར་ཆེན་པོ་ཡིན་ནོ། །ཡང་ཕྱག་མཛོད་འདིས་ལན་ཅིག་རྒྱ་ནག་མཁན་པོ་ཞིག་གི་རྗེས་ལ་ཕྱིན་ནས་རྙེད་འཚོལ་ཞིག་བྱས་ཏེ་གྲྭ་ཚང་བསྙེན་བཀུར་ཞིག་ཨེ་ཐུབ་སྙམ། ཀློང་རྡོལ་རིན་པོ་ཆེར་ཞུས་པའི་ལན་དུ། སྒོ་མང་མཁན་པོ་གང་ཟག་རང་བཞིན་པ་མིན་པས་དེའི་དགོངས་པར་མ་མཐུན་ན་གྲྭ་ཇ་མང་ཇ་བཏང་ཡང་ཆོས་མིན། དེའི་གསུང་བཞིན་བྱས་ན་གང་བྱས་ཆོས་ཡིན་རྡོ་རྗེ་གྲགས་ལྡན་གྱིས་ཀྱང་གྲོགས་བྱས་ཡོང་གསུང་བ་དང༌། ཡང་ཀློང་རྡོལ་རིན་པོ་ཆེའི་མདུན་དུ་བླ་མ་འགའ་ཞིག་ཡོང་བའི་ཚེ་བཀུར་གཟོས་ཆེ་བ་མཛད་ཅིང༌། འདི་པར་ཅི་ཡང་མི་མཛད་པས་ཉེ་གནས་ཀྱིས་དེ་མི་མཛེས་པར་འདུག་ཞུས་པ་ལ། ཁྱོད་ཀྱིས་མི་ཤེས། སོ་སོ་སྐྱེ་བོ་ལས་དང་པོ་བ་ལ་དེ་འདྲ་མ་བྱས་ན་ཁོང་ཁྲོ་ལང་ཡོང༌། མཁན་པོ་ཆོས་དར་དེ་འདྲ་མིན་གསུང་བ་སོགས་ཚད་མར་གྱུར་པའི་སྐྱེས་ཆེན་དུ་མས་བསྔགས་པ་བརྗོད་ཚུལ་གྱི་ལོ་རྒྱུས་མང་ཡང་ཟུར་ཙམ་བཀོད་པ་ཡིན། མདོར་ན་སྐུ་གསུང་ཐུགས་ཀྱི་མཛད་པའི་བབ་མཐའ་དག །ལྷ་རྩེ་པའི་རྣམ་ཐར་འབྲུག་ཟླ་གྲགས་ཀྱིས་མཛད་པ་ལས། སྐུ་བསླབ་པ་གསུམ་པོའི་ཁྲིམས་ཀྱིས་བཙུན་པ། འཕྱར་གཡེང་གི་འཆོར་སྒེག་མི་སྟོན་པ། སྣང་ཤས་ཀྱི་དྲི་མི་བྲོ་བ། བཅོས་མའི་ཚུལ་མི་འཆོས་པ། སྙོམས་ལས་ཀྱི་རོ་མི་མྱང་བ། གསུང་ལྷད་མ་ཞུགས་ཤིང་ཟུར་མ་ཉམས་པ། གསོང་པོར་སྨྲ་ཞིང་ཆད་དོན་བཙན་པ། གནད་ཟབ་ལ་གོ་སླ་བ། རྒྱས་བཤད་དོན་དུ་འདྲིལ་བ། སྔ་ཕྱི་འབྲེལ་ཆགས་
པ། སྒྲ་མི་གསལ་བའི་ལྡབ་ལྡིབ་ཅན་མ་ཡིན་པ། ཐུགས་ཟབ་ཅིང་དཀྱེལ་ཆེ་བ། མ་བརྟག་པའི་བྱ་བ་དང་བྲལ་བ། གཡོ་དང་སྒྱུ་མེད་པ། དྲང་ཞིང་གཟུ་བོར་གནས་པ། ཁེངས་དྲེགས་ཀྱི་ཆེ་ཁྱད་སྤངས་པ། བབ་ཅོལ་ཐུབ་ཆོད་ཅན་དུ་མ་གྱུར་པ་ཞེས་པའི་ཁྱད་པར་རྣམས་ཇི་ལྟ་བ་བཞིན་དུ་ཚང་བ་ནི། དངོས་སུ་མཇལ་ཞིང་རྒྱུས་ཡོད་པ་མཐའ་དག་གི་མངོན་སུམ་ཚད་མས་བསྙོན་མེད་དུ་འགྲུབ་པ་བཞིན་ནོ། །ཞི་དུལ་བག་ཡོད་སྤུ་སྡུག་གོས་ཀྱིས་ཀླུབས། །ཞི་ལྷག་ཟུང་འཇུག་ཐབས་ཤེས་འདབ་ཟུང་གཡོ། །ཞི་བའི་མཁའ་ལ་མི་གནས་སྲིད་པའི་སྐྱོན། །ཞི་ཕྱིར་འཛིན་མར་མི་ལྟུང་ཨེ་མ་མཚར། །གཞུང་མང་ཐོས་པ་རྒྱ་མཚོའི་ཕ་རོལ་སོན། །གཞི་ལམ་འབྲས་བུའི་གནད་ཀུན་ཐུགས་སུ་ཆུད། །གཞར་ཡང་མི་ཉམས་རྟོགས་པའི་གདེང་ཚད་བརྙེས། །གཞན་དང་མི་མཉམ་རྣམ་ཐར་བསམ་མི་ཁྱབ། །དེ་ནས་དགུང་ལོ་བརྒྱད་ཅུའི་སྐབས་སུ་ཇོ་ཤཱཀ་སོགས་ལ་མཆོད་ཐེབས་དང༌། སྒོ་མང་གྲྭ་ཚང་ལ་མང་འགྱེད་ཀྱི་ཐེབས་དངུལ་སྲང་བཞི་བརྒྱ་བསྐུར། འདི་ཀའི་ཚོགས་ཆེན་ལ་མང་ཇ་བཞིའི་ཐོག་དུང་ཙེ་སུམ་བརྒྱ་རེའི་འགྱེད་བཏང༌། གྱ་གཅིག་བཞེས་པའི་དབྱར་ཐོག་ཉིན་གཅིག་ངེད་ཀྱི་རྩར་ཕེབས་ཏེ་ཞལ་ཆེམས་ཀྱི་རྣམ་པ་ལྟ་བུ་འགའ་ཞིག་གསུང༌། སྐུའི་བབ་སྔར་དང་ཕལ་ཆེར་འདྲ་བས་ད་དུང་ལོ་ཤས་སྐྱོན་མེད་མོད་སྙམ་ནས་དེ་ལུགས་དང་གང་གསུང་ཡིད་ལ་འཛིན་རྒྱུའི་ཁས་ལེན་ཞུས། བཅུ་པའི་ནང་སྐུ་ཁམས་ཅུང་ཟད་ལྟེམས་པས་ཕྱག་མཛོད་ལ། ད་ངའི་ཕུང་པོ་ཆོ་མི་འདུག་པས་ཁྱོད་ཀྱིས་གྲ་སྒྲིག་གྱིས་གསུང་བར། སྐུ་གཟུགས་ང་ཚོས་བལྟས་ན་
སྐྱོན་མི་འདུག །སྐུ་ཞབས་རིན་པོ་ཆེ་ཕེབས་རིང་ལ་བཞུགས་མོད་ཞུས་པས། དེ་ངའི་གཟུགས་པོས་མི་ལྕོགས་ཤིང༌། རྨི་ལམ་ལ་བལྟས་ནའང་མི་འདུག་པ་འདྲ་གསུང༌། མནལ་ལམ་ཅི་བྱུང་ཞུས་པར། སྨད་སོག་འདྲ་བ་ཕུ་ཐུང་ཅན་ཞིག་འོངས་ནས། ཁྱོད་དབུས་གཙང་ལ་འགྲོ་དགོས་ཟེར་བས། ངའི་སྐུ་གསུང་ཐུགས་རྟེན་དང་དཔེ་ཆ་རྣམས་ལ་བདག་པོ་མེད་པས་ང་མི་འགྲོ་བྱས་པར། དེ་མི་ཆོག་འགྲོ་དགོས་ཀྱང་ཕྱིར་མྱུར་དུ་འོང་ཆོག་པས། དེའི་རིང་ལ་སྐུ་གསུང་ཐུགས་རྟེན་རྣམས་ངས་བསྲུང་འདུག་ཟེར། ཁྱོད་སུ་ཡིན་བྱས་པར། རྡོ་རྗེ་གྲགས་ལྡན་གྱི་སྤྲུལ་བ་སྨད་སོག་གི་ཆ་ལུགས་བྱས་ནས་འོངས་པ་ཡིན་ཟེར། དེ་ངའི་ཆོས་སྐྱོང་ཡིན་གསུང༌། ཡང་ཟླ་བ་བཅུ་གཅིག་པའི་ནང་ལ་ལན་ཅིག་ཁོང་དགའ་ལྡན་ཤར་རྩེ་ནས་ཁྲི་འདོན་བྱས། གོས་ཐམས་ཅད་གསར་པ་གྱོན་པ་རྨིས། དེ་རྟགས་གཅིག་ཡིན་གསུང༌། སྐབས་ཤིག་ངེད་རྒྱ་ནང་ཞིག་ཏུ་སྐྱེས་གཏོང་བ་འདྲ་གསུང་སྟེ། སྨྲ་བརྗོད་སོགས་ཇི་བཞིན་མི་འོང་དགོངས་པ་ཡིན་ནམ་ཐུགས་ཁྲལ་ལྟ་བུ་མཛད། དེའི་ཆེད་དུ་རིམ་གྲོའང་འགའ་ཞིག་བསྒྲུབས་ནས་ད་དེར་མི་སྐྱེ་བར་འདུག་གསུང་ཐུགས་ལྷོད་པའི་རྣམ་པ་མཛད། གསུང་འཕྲོས་ཀྱི་ཞར་ལ་སྤྲུལ་སྐུའི་དོན་སྐུ་འབུམ་ཆོས་སྐྱོང་ལ་ཞུས་ན་འབྲས་སྤུངས་གནས་ཆུང་དང་གཅིག་ཡིན་པས་དེས་ཆོག་གསུང་སྟེ། ཉིད་དང་ཆོས་སྐྱོང་རྣམ་གཉིས་ཕན་ཚུན་ཐུགས་ཡིད་ཆེས་པའི་ནང་ཉམས་ཤིག་ཡོད་པར་སྣང༌། ཡང་བཅུ་གཅིག་པའི་ཚེས་བཅུ་གཉིས་ཀྱི་ཞོགས་ཀ་ཡར་བཞེངས་མ་ཐག་ཤིན་ཏུ་དགྱེས་པའི་རྣམ་པས་ཞོ་ཁྱེར་ཤོག་གསུང་སྟེ་ཐུར་མ་གང་བཞེས། མདང་ངའི་རྨི་ལམ་ལ་རྣལ་འབྱོར་
པ་ཞིག་ཕེབས་བྱུང་བར། ངས་ཁྱེད་སུ་ཡིན་དྲིས་པས། ང་བདེ་མཆོག་གི་རྣལ་འབྱོར་པ་ཞིག་ཡིན་གསུངས་ནས་ངས་ཁྱོད་ལ་བདུད་རྩི་ཁྱེར་ཡོང་ཡོད་གསུང༌། བདུད་རྩི་ག་རེ་ཞུས་པས། ཀ་པཱ་ལའི་ནང་ནས་བདུད་རྩི་ང་ལ་བྱིན་ནས་ད་ཁྱོད་ཀྱི་གདན་ཐོག་འདི་ནས་ཞིང་ལ་ཕེབས་རྒྱུ་ཡིན་གསུང་བྱུང༌། དེའང་རྟགས་གཅིག་ཡིན་གསུང་བ་ལ། ཕྱག་མཛོད་ཀྱིས་རྣལ་འབྱོར་པ་དེ་སུ་ཡིན་ཞུས་པས། དེ་ངའི་བླ་མ་ཁྲི་དགེ་འདུན་ཕུན་ཚོགས་པ་ཚང་བདེ་མཆོག་གི་རྣལ་འབྱོར་པ་ཡིན་གསུང་སྟེ། ངའི་བླ་མ་གསུང་ལུགས་ལ་དཔག་ན་སྐུ་ཚེ་སྔ་མར་ཁྲི་ཆེན་དེ་དང་འབྲེལ་ཆེ་བ་ཐུགས་ཀྱིས་དྲན་པ་ཡིན་ནམ་སྙམ། འཁོན་སྟོན་གྱི་འཁྲུངས་རབས་ཁོང་རང་གིས་མཛད་པ་ལས། དེ་དག་ཀུན་དང་ལས་འབྲེལ་སྟོབས་ཆེ་བས། །ཐར་པ་སྒྲུབ་པའི་རྟེན་བཟང་འདི་ཐོབ་པར། །སྐྱེ་བ་རིམ་པར་བརྒྱུད་པ་ཁྱོད་ཡིན་ཞེས། །འགའ་ཡིས་རབ་བཏགས་མཛད་ལ་གསོལ་བ་འདེབས། །གསུངས་པའི་དཔེ་ལྟར། རང་ལྟ་བུ་ཁྲི་ཆེན་དེ་འདྲའི་སྐྱེ་མཐའ་མིན་པ་རང་བློ་རང་ལ་ལྐོག་ཏུ་མ་གྱུར་པས་ཐག་ཆོད་ཀྱང༌། སྔོན་ལས་ཀྱི་འབྲེལ་བ་ཞིག་ལ་དགོངས་ནས་ལྷ་དང་བླ་མས་དེའི་སྐྱེ་བར་ལུང་བསྟན་ཏེ་མཚན་གྱིས་བྱིན་གྱིས་བརླབས་པ་ལ་དག་སྣང་སྦྱངས་ཏེ་འདི་སྐབས་ཀྱང་དམ་ཚིག་གསོ་བའི་ཕྱིར་དབང་དགོས་ཚུལ་གསུང་བ་བཞིན། བཅུ་གཅིག་པའི་གནམ་གང་ལ་གཟིམ་ཆུང་དུ་ཕྱིན་ཏེ་དྲིལ་བུ་ལྷ་ལྔའི་དབང་བཞི་རྫོགས་པར་ཕུལ། ས་སྦྲུལ་ལོ་ངེད་རང་གནས་མཇལ་དུ་འགྲོ་སྐབས་ལོ་ཀྱཱ་ཏུན་དུ་ཞག་གསུམ་བསྡད་པའི་གཉིས་པའི་དགུང་མོ་རྨི་ལམ་དུ་ལྷ་ཁང་དེ་རྒྱ་ཆེ་ཙམ་འདུག་པའི་ཕུ་ན་གདུང་གི་
ཉམས་མེད་པར་གསེར་ཟངས་ཀྱི་སྐུ་འགའ་ཞིག་བསྒྲིག་འདུག །དེ་སྔོན་མཛོ་མོ་མཁར་གྱི་ལྷ་ཁང་སོགས་མཇལ་སྐབས་ནང་རྟེན་རྣམས་ཀྱི་སྣེ་ནས་རྟེན་སྐལ་རེ་བསླང་བ་དེའི་བག་ཆགས་ལྟ་བུས་ང་ལ་རྟེན་སྐལ་ཞིག་དགོས་བྱས་པར། གཅིག་གིས་ཡུམ་གྱི་ཕྱག་གི་ཐོད་པ་དེ་ཁྱོད་ཀྱི་རྟེན་སྐལ་གྱིས། སྟབས་འགྲིག་ན་དེ་གཉིས་ལའང་བྱིན་ཟེར། ཕྱིར་བལྟས་པས་གཞན་མི་འདུག་ཅིང༌། སུ་ཡིན་མ་ཤེས། དེའི་མཚམས་ནས་གཉིད་སད། ཕྱི་ཉིན་གསེར་ཆབ་འབུལ་སྐབས་པིར་གྱིས་གསོལ་ཡང་ཇི་བཞིན་ཞིག་མི་འོང་འདུག་པས་སྐུ་ལ་བྱུགས་བཏང་ཡང་ཁྱད་མི་འདུག་སྙམ། རང་ལག་པས་ཡབ་ཡུམ་གཉིས་ཀྱི་ཞལ་དང་ཕྱག་སོགས་ལ་བྱུགས་སྐབས་བྱིན་རླབས་ཀྱི་རྫས་ཤིག་ལག་ཏུ་བྱུང་བས་རྨི་ལམ་དེ་དེ་ལ་བལྟའམ་སྙམ། དེའི་ལོ་རྗེས་མའི་རྗེས་མ་ཞིག་ལ་རྨི་ལམ་དུ་སྔར་གནས་མཇལ་ལ་སོང་ཚུལ། རྨི་ལམ་རྨིས་ཚུལ་སོགས་བཤད་ཀྱིན་འདུག་པས། རྨི་ལམ་གྱི་ངེད་ན་དེ་གཉིས་ཟེར་རྒྱུའི་གཅིག་སྒོ་མང་མཁན་པོ་ཚང་ཡིན་པ་ལྟ་བུ་ཞིག་ཤར་འདུག་པས་རྐྱེན་བྱས་ཏེ་དོགས་པ་བསླང་ཡོད་པའི་ཐོག །ད་རེས་སྟབས་འགྲིག་ལུགས་ཀྱིས་རྟེན་དེའང་ཕུལ་བ་ཡིན། རང་གིས་འཕྲིན་པ་ཙམ་ཞིག་བྱས་ཀྱང་རྩ་བའི་འབྱུང་ཁུངས་འཁོར་ལོ་སྡོམ་པའི་རྣལ་འབྱོར་གྱི་དབང་ཕྱུག་ཕམ་མཐིང་པ་ཡིན་པས། ཉིད་ཀྱི་མནལ་ལམ་དུ་བྱུང་བའི་རྣལ་འབྱོར་པ་དེའང་དེ་ལ་བལྟ་བར་མངོན། ཡང་ཟླ་བ་བཅུ་གཉིས་པའི་ནུབ་གཅིག་གསོལ་དཔོན་ལ་ཁྱོད་ཡར་ལོང༌། ཤར་རྩེ་མཁན་པོ་ཕེབས་ཀྱི་ཡོད། བདེ་མཆོག་གི་ལྷ་གྲངས་ཐམས་ཅད་ཀྱང་ཕེབས་ཀྱི་ཡོད་པས་ཁྱོད་ཀྱིས་ཨེ་མཐོང་གི །བདེ་མཆོག་གསུང་གིན་ཡོད་པ་ཁྱོད་ཀྱིས་ཨེ་ཐོས་གསུང་།
ལན་ཅིག་ན་བཟའ་གསར་པ་བཞེས་ཏེ་ཇོ་བོ་རིན་པོ་ཆེ། རྭ་མོ་ཆེ་གཉིས་ལ་མཇལ་བར་འགྲོ་རྒྱུ་ཡིན་གསུང་བ་སོགས་ལ་དཔག་ན་ཉམས་དང་རྨི་ལམ་འདྲེས་པའི་དག་པའི་སྣང་བ་སྣ་ཚོགས་ཤིག་བྱུང་བའི་ཚོད་དུ་སྣང༌། ཉིན་གཅིག་གསོལ་དཔོན་ལ་གདུང་འཁྲུ་བྱེད་ཀྱི་དྲི་བཟང་ཚགས་གྱིས་གསུང་བར། ཁོས་ཁྱེད་ཐུགས་དམ་ལ་བཞུགས་ཚེ་གདུང་བཀྲུས་ན་ཐུགས་དམ་ལ་ཨེ་གནོད་ཞུས་པ་ལ། ཐུགས་དམ་གྱི་སྐབས་དྲི་བཟང་གིས་འཁྲུ་བ་དང་སྤོས་སྤར་བ་སོགས་ཀྱིས་མི་གནོད་པ་ང་ཚོ་རི་བོ་དགེ་ལུགས་པའི་ཐུགས་དམ་གྱི་ཁྱད་ཆོས་ཡིན་གསུང་སྟེ། དགེ་ལུགས་པ་ཙམ་ལ་རྟོགས་པ་མཐོ་དམན་གྱི་རིམ་པ་སྣ་ཚོགས་ཤིག་ཡོད་ཀྱང༌། ཉིད་བསྟན་པའི་སྙིང་པོ་འཁྲུལ་བ་དང་བྲལ་བ་འདིའི་ཉམས་ལེན་གྱིས་རྟོགས་པ་བརྟན་པོའི་གདེང་ཐོབ་པའི་གསུང་དུ་སྣང༌། དེ་ལྟར་སྐུ་ཚེ་གཅིག་གི་བསྟན་འགྲོའི་དོན་དང་ཐོས་བསམ་སྒོམ་གསུམ་གྱི་མཛད་པ་ཐམས་ཅད་དགོངས་པ་བཞིན་མཐར་འཁྱོལ་ཏེ། དེད་དཔོན་ཆེན་པོ་དགོས་འདོད་གྲུབ་ནས་རང་ཡུལ་དུ་ལྡོག་པའམ། བུ་ཕ་ཁྱིམ་དུ་འགྲོ་བ་ལྟར་དགའ་སྤྲོའི་ངང་ནས་གྱ་གཅིག་པ་ཆུ་སྤྲེལ་ལོའི་ཟླ་བ་བཅུ་གཉིས་པའི་ཚེས་བཅུ་དགུའི་ཐོ་རངས་མངོན་པར་བྱང་ཆུབ་པའི་དུས་སུ་གཟུགས་སྐུའི་བཀོད་པ་བསྡུས་ཏེ་ཆོས་དབྱིངས་སུ་གཤེགས། བདུན་ཕྲག་གཅིག་གི་རིང་ཐུགས་དམ་ལ་བཞུགས་ཤིང༌། དེ་རྗེས་གྲོལ་བའི་རྟགས་ཀྱང་བཤད་ཚོད་ཇི་ལྟ་བ་བཞིན་བྱུང༌། ཞིང་དུ་ཕེབས་པ་ནས་ཉིན་ལྟར་བླ་གྲྭ་མང་པོས་དཀྱིལ་འཁོར་གྱི་འཁོར་ལོ་དུ་མ་ཞལ་ཕྱེ་སྟེ་བླ་མ་དང་གཙོ་བོ་ཐ་མི་དད་དུ་བྱས་ནས་མཆོག་ཁྲུས་འབུལ་བ། གྲྭ་ཚང་སོ་སོའི་དགེ་འདུན་མང་ནས་རྒྱན་འཇུག་རྒྱུད་གཞུང་སོགས་
གསུང་བ། ཕྱི་ནང་ཀུན་ཏུ་མཆོད་པ་རྒྱ་ཆེན་པོ་གསོལ་འདེབས་དང་སྨོན་ལམ་གྱི་རིམ་པ་སོགས་ཐུགས་ཀྱི་དགོངས་པ་རྫོགས་པའི་ཐབས་ལ་འདུན་པ་ཆིག་དྲིལ་དུ་འབད། ཉེར་བདུན་ལ་སྐུ་གདུང་ཞུགས་འབུལ་བྱས། ནང་ནས་ཀྱང་ཐམས་ཅད་ལ་བསྙེན་བཀུར་དང་ཡོན་གང་རྒྱས་དབུལ། གཙུག་ལག་ཁང་སོ་སོར་མཆོད་པ། ཉེར་བརྒྱད་ཀྱི་ཉིན་ཚོགས་ཆེན་ལ་བསྙེན་བཀུར་གཟབས་ཐོག་ཇ་བག་རེའི་འགྱེད་བཏང༌། སྐུ་ཞབས་རིན་པོ་ཆེར་སླར་ལྗགས་བསྔོ་ཞུ་རྟེན་ཆིབས་ཆིབས་འགྲོས། དངུལ་རྡོ་ཚད། གོས་ཡུག །ཉེར་སྤྱད་སོགས་འབུལ་བ་གྱ་ནོམ་པ། བླ་མ་གདན་ཟུར། སྤྲུལ་སྐུ་ཆེ་ཆུང་སོགས་ཐམས་ཅད་ལའང་འབུལ་ཚན་དངོས་དག །ཀ་རིང་དགོན་དུ་ཉིན་འཁྱོང་གི་བསྙེན་བཀུར་ཐོག་ཇ་བག་ཕྱེད་རེའི་འགྱེད་དང་ཚ་ར། ཚན་གྲངས་རོལ་ཆ་སོགས་སྤྱི་འཇོག །ཐར་པ་གླིང་ལའང་དེ་མཚུངས། གྲོང་སྡེ་རྣམས་ལའང་སྒོ་འགྱེད་ཡིད་ཚིམ་པ། གཞན་ཡང་ཕན་ཚུན་གྱི་དགོན་སྒྲུབ་སྡེ་དུ་མར་ཞལ་འདེབས། ངན་སློང་ལ་སྦྱིན་པ་སོགས་རྣམ་དཀར་གྱི་ཕུང་པོ་རླབས་ཆེ་བ་བསྒྲུབས། གདུང་རུས་ལ་ཁོ་བོ་ཅག་ནས་རྡོ་རྗེ་མི་འཁྲུགས་པའི་སྒོ་ནས་རུས་ཆོག་བགྱིས་ཏེ་སྐུ་དང་སཙྪ་མང་དུ་བཏབ་པ་རྣམས་གསེར་ཟངས་ཀྱི་མཆོད་རྟེན་རྒྱུག་མཐོ་གསུམ་ལྷག་པ་ཞིག་ཏུ་བཞུགས་སུ་གསོལ་ཏེ་གཟིམས་ཆུང་ནང་རྟེན་དུ་བཞུགས་པ་སོགས་ཞབས་སྡོད་རྣམས་ནས་ལྷག་བསམ་དག་པས་ཁུར་དུ་བླངས་པས་དགོངས་རྫོགས་ཀྱི་རིམ་པ་རྣམས་ཀྱང་ལེགས་པར་མཐར་ཕྱིན་ཏེ་ཐོག་མཐའ་བར་གསུམ་དུ་དགེ་བའི་དངོས་པོ་ཁོ་ནར་གྱུར་ཏོ། །གཙང་དབུས་མདོ་སྨད་རྒྱ་ནག་ཡུལ་ཀུན་ཏུ། །རྩོལ་མེད་བསྟན་འགྲོའི་དོན་ཆེན་མཐར་ཕྱིན་ཏེ། །རྩྭ་མཆོག་གྲོང་དུ་ཐུབ་པའི་མཛད་པ་བཞིན། །རྩེ་གཅིག་ཞི་བའི་དབྱིངས་སུ་གཞོལ་བར་གྱུར། །ཨེ་ཝཾ་
ཐབས་ཤེས་ཟུང་དུ་འཇུག་པའི་གར། །ཨ་ཧོ་དམ་པ་རྣམས་ཀྱི་མཛད་པ་ནི། །ཨེ་མ་མཐོང་ཐོས་དྲན་རེག་ཐམས་ཅད་ལ། །ཨ་མྲྀ་ཏ་བཞིན་ཐོག་མཐའ་བར་དུ་དགེ །དེ་ནས་ཡང་སྲིད་འཁྲུལ་བྲལ་མྱུར་གསལ་གྱི་དོན་ལ་ནང་ནས་ལྷ་བླ་མའི་ལུང་ཕེབས་ཀྱི་རིམ་གྲོ་ནར་མར་བསྒྲུབས་ཤིང༌། དད་ལྡན་བུ་སློབ་རྣམས་ཀྱིས་གསོལ་བ་རྩེ་གཅིག་ཏུ་བཏབ་པ་དང༌། ཀུན་མཁྱེན་བླ་མའི་བསྟན་པ་སྤེལ་བའི་ཐུགས་བསྐྱེད་ལྷན་ཅིག་པ་སོགས་རྟེན་འབྲེལ་ཕུན་སུམ་ཚོགས་པའི་དབང་གིས་ཡང་སྲིད་གཞོན་ནུའི་འཛུམ་ཞལ་མངོན་དུ་གྱུར་པའི་དགའ་སྟོན་ལ་ཉེ་བར་ཕྱོགས་པ་འདི་བཞིན་ལགས་སོ། །སྨྲས་པ། རྨད་བྱུང་ཐུགས་བསྐྱེད་རྟ་མཆོག་ཁ་སྒོ་ལས། །བབ་པའི་གསེར་གྱི་བྱེ་མ་རྒྱལ་སྲས་སྤྱོད། །སྡེབ་ལེགས་གཏམ་དུ་འདྲེན་པ་གངྒཱའི་རྒྱུན། །ས་གསུམ་ལུས་ཅན་དག་བྱེད་མཆོག་ཏུ་སྤེལ། །རླན་གཤེར་གཅིག་ལ་འགྲོ་གསུམ་སྣང་ཚུལ་བཞིན། །རླབས་ཆེན་རྒྱལ་སྲས་སྤྱོད་པའི་གདམས་པ་དང༌། །ཚུལ་ལྡན་གཟུར་གནས་མཁས་འདོད་བསླབ་བྱའམ། །སྒྲ་དོན་ཉམས་ལྡན་སྙན་ངག་གཞུང་དུ་མཛོད། །མ་སྨད་གྲགས་པའི་ཤུགས་འཆང་ཆོས་ཀྱི་རྔ། །བསྐུལ་བ་ཙམ་ལས་སྙན་པའི་གདངས་འབྱུང་གི །སྒྲ་མེད་རྩིག་པའི་ངོས་ལ་རྣམ་པ་བརྒྱར། །བསྣུན་ཡང་དོན་མཐུན་སྒྲ་སྙན་ཅི་ལས་འབྱུང༌། །དམ་པའི་ཡོན་ཏན་གསོང་པོར་སྨྲ་བའི་དགེས། །དོན་མིན་སྟོང་དུ་འགྱུ་བའི་རོ་འཛིན་འདིས། །ངག་གི་ཉེས་པ་ཅི་བགྱིས་ཀུན་བྱང་སྟེ། །འཇམ་དཔལ་གསུང་གི་དབང་ཕྱུག་འགྲུབ་གྱུར་ཅིག །འབྲེལ་ཐོགས་དད་ལྡན་ཀུན་ཀྱང་ལེགས་སྨོན་གྱི། །སྲད་བུ་མ་ཆད་དལ་འབྱོར་འཕྲེང་བརྒྱུད་པ། །དཔལ་ལྡན་བླ་མའི་མདུད་འཛིན་གྱིས་བཟུང་སྟེ། །བདེ་ཆེན་གསང་སྔགས་རྒྱལ་
པོ་འདྲེན་གྱུར་ཅིག །སྔོན་གོམས་ཐུགས་བསྐྱེད་འབྲས་བཟང་ས་བོན་དུ། །སླར་ཡང་སྨིན་པའི་ཡང་སྲིད་མྱུ་གུ་གསར། །མཁས་བཙུན་བཟང་པོའི་སྙེ་མ་ཡོངས་གང་སྟེ། །བསྟན་འགྲོའི་བསོད་ནམས་ཞིང་ས་མཛེས་གྱུར་ཅིག །ཕྱག་དྲུག་མྱུར་མཛད་མགོན་དང་ཆོས་ཀྱི་རྒྱལ། །སྤྲུལ་བའི་ཆོས་རྒྱལ་རྡོ་རྗེ་གྲགས་ལྡན་སོགས། །བསྟན་སྲུང་རྒྱ་མཚོས་རྡོ་རྗེའི་གཡར་དམ་བཞིན། །འདོད་དགུ་ལྷུན་གྲུབ་འཕྲིན་ལས་ཀཱརྻནྟུཿ །ཞེས་དགེ་ལྡན་བསྟན་པའི་རྩ་ལག་མཁས་བཙུན་བཟང་པོའི་བདག་ཉིད་སྒོ་མང་མཁན་རིན་པོ་ཆེ་བློ་བཟང་ཆོས་དར་པའི་ཞལ་སྔ་ནས་ཀྱི་རྟོགས་པ་བརྗོད་པ་གཟུར་གནས་མཁས་པའི་དགའ་སྟོན་ཞེས་བྱ་བ་འདི་ནི། ཉིད་ཀྱི་ཞབས་འདེགས་ཚུལ་བཞིན་བསྒྲུབས་པ་ཕྱག་མཛོད་བློ་བཟང་དོན་གྲུབ། དབོན་པོ་དཀོན་མཆོག་ཆོས་བཟང༌། གསོལ་དཔོན་བློ་བཟང་དགེ་འདུན་སོགས་ཀྱིས་སྔ་ཕྱིར་ཡང་ཡང་བསྐུལ་ཞིང༌། སྟག་ལུང་སྤྲུལ་བའི་སྐུ་སོགས་གསུང་ལས་སྐྱེས་པའི་ཞལ་སློབ་འགའ་ཞིག་གིས་ཉེ་བར་བསྐུལ་བས་མཚམས་སྦྱར་ཏེ། བཙུན་པ་དཀོན་མཆོག་བསྟན་པའི་སྒྲོན་མེས་མེ་བྱིའི་ལོ་དགུན་མཚམས་ཀྱི་སྐབས་ཉིན་གུང་གི་ཐུན་གསེང་དུ་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ།། །།