གཉན་རྩེ་དཔོན་སློབ་རིན་པོ་ཆེའི་བསྟོད་འགྲེལ།

གཉན་རྩེ་དཔོན་སློབ་རིན་པོ་ཆེའི་བསྟོད་འགྲེལ་ནོར་བུའི་དོ་ཤལ་ཞེས་བྱ་བ་བཞུགས་སོ། །

རྒྱ་ཆེན་ཐོས་པས་ངག་གི་དབང་ཕྱུག་བརྙེས། །ཚུལ་བཞིན་སྒྲུབ་པས་ཆོས་ཀྱི་དེ་ཉིད་གཟིགས། །འཕྲིན་ལས་ བཟང་པོས་རྒྱལ་བསྟན་འཕེལ་མཛད་པ། །དཔལ་ལྡན་བླ་མའི་ཞབས་རྡུལ་སྤྱི་བོས་མཆོད། །ངག་དབང་ཆོས་ཀྱི་ཆུ ་གཏེར་འཕེལ་བའི་བཅུད། །བསྟོད་དབྱངས་འཇིགས་བྲལ་འཆི་མེད་དབང་པོའི་ཆབ། །བསྟན་པའི་རྗེས་འཇུག་དད་པའི་སྲོག་ཟུང་དུ། །འགྲེལ་བྱེད་རིན་ཆེན་སྒྲོན་མེས་གསལ་བར་བྱ། །དེའང་མཁས་བཙུན་བཟང་པོའི་ཡོན་ཏན་ཡོངས་སུ་རྫོགས་པས་ཐུབ་བསྟན་རྩ་ལག་དམ་པར་གྱུར་པ་འཇིག་རྟེན་ཆོས་བརྒྱད་ཀྱི་འཁྲི་བ་རྩད་ནས་ཆོད་པའི་ཀུན་སྤངས་ཆེན་པོ། འགྲོ་བ་མཐའ་དག་ཡང་དག་པའི་ལམ་བཟང་པོ་ལ་བཀྲི་བའི་ཐེག་པ་མཆོག་གི་དགེ་བའི་བཤེས་གཉེན་རྗེ་བཙུན་བླ་མ་དམ་པ་ངག་དབང་ཆོས་འཕེལ་བའི་ཞལ་སྔ་ནས་ཀྱི་གསོལ་འདེབས་སྐྱབས་མགོན་རྡོ་རྗེ་འཆང་ཆེན་པོ་ཀུན་མཁྱེན་འཇིགས་མེད་དབང་པོའི་བཀའ་རྩོམ་འདི་ཉིད་ཀྱི་ཚིག་དོན་ཅུང་ཟད་ཙམ་ཞིག་འཆད་པ་ལ། མདོར་བསྟན། རྒྱས་བཤད། མཇུག་གི་དོན་དང་གསུམ། དང་པོ། རྒྱལ་སྲས་ཞི་བ་ལྷས། འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །ཞེས་གསུངས་པ་ལྟར། ལུས་ཅན་ཡོངས་ཀྱི་ཕན་བདེ་མ་ལུས་བའི་འབྱུང་གནས་ནི་རྒྱལ་བའི་བསྟན་པ་རིན་པོ་ཆེ་ཁོ་ན་ཡིན་ཞིང༌། དེའི་དབང་གིས་བསྟན་པ་དེ་ཉིད་ངེས་པར་

འཛིན་པའི་སྐྱེས་བུ་དམ་པ་རྣམས་ནི་འགྲོ་བ་ཡོངས་ལ་བཀའ་དྲིན་བསམ་གྱིས་མི་ཁྱབ་པས་བསྟོད་བཀུར་བསྔགས་པའི་ཞིང་བླ་ན་མེད་པ་ཡིན་ནོ། །འོན་ཀྱང་ད་ལྟ་ཆེས་ཤིན་ཏུ་སྙིགས་མར་སོང་སྟེ། ཁ་དྲག་དབང་ཆེ། སྟོབས་འབྱོར་གོ་ས་སོགས་ཀྱི་སྒོ་ནས་བསྟན་འཛིན་ཆེན་པོར་བཏགས་པ་ལ་སྙིང་པོ་ཅི་ཡང་མེད་པས། བསྟན་པ་འཛིན་ཚུལ་དཔྱིས་ཕྱིན་པ་ནི་མཁས་མཆོག་དབྱིག་གི་གཉེན་པོས། དེ་འཛིན་བྱེད་པ་སྨྲ་བྱེད་པ། །སྒྲུབ་པར་བྱེད་པ་ཁོ་ན་ཡིན། །ཞེས་གསུངས་པ་ལྟར། ལུང་གི་བསྟན་པ་བཤད་པའི་སྒོ་ནས་འཛིན་པ་དང༌། རྟོགས་པའི་བསྟན་པ་སྒྲུབ་པའི་སྒོ་ནས་འཛིན་པ་གཉིས་ལས་མ་འདས་པས། རབ་བྱེད་འདིར་ཡང་དེའི་དབང་དུ་མཛད་དེ། ངག་གི་དབང་ཕྱུག་རྗེ་བཙུན་ཙོང་ཁ་པའི། །བཤད་སྒྲུབ་ཆོས་ཀྱི་རྒྱལ་མཚན་འཛིན་པ་ལ། །ལྷག་བསམ་མཚོ་ལྟར་འཕེལ་བའི་སེམས་དཔའ་མཆོག །རྗེ་བཙུན་བླ་མའི་ཞབས་ལ་གསོལ་བ་འདེབས། །ཞེས་རྒྱལ་བའི་བསྟན་པ་སྤྱི་དང༌། ཁྱད་པར་དུའང་འཇམ་དཔལ་རྩ་རྒྱུད་ལས། ཁྱོད་ཉིད་བྱིས་པའི་གཟུགས་ཀྱིས་ནི། །སངས་རྒྱས་མཛད་པ་བྱེད་པར་འགྱུར། །ཞེས་ལུང་བསྟན་པ་ལྟར། ངག་གི་དབང་ཕྱུག་བརྟན་པའི་འཁོར་ལོ་གསུམ་ལྡན་ངུར་སྨྲིག་འཆང་བའི་གར་གྱིས་རོལ་པ་རྗེ་བཙུན་ཆོས་ཀྱི་རྒྱལ་པོ་ཙོང་ཁ་པའི་རིང་ལུགས་དྲི་མ་མེད་པ་ལྟ་སྒོམ་སྤྱོད་འབྲས་གང་གི་ཆ་ལའང་འཁྲུལ་བའི་དྲི་མ་ཕྲ་མོ་ཙམ་གྱིས་ཀྱང་མ་གོས་པས་གསེར་སྦྱངས་

བཙོ་མ་ལྟ་བུ། ལུང་གི་བསྟན་པ་ཀ་རཱི་ཀ་ལྔ་བཅུ་པ་ནས་རྒྱུད་རྒྱལ་གསང་བ་འདུས་པའི་བར་དང༌། རྟོགས་པའི་བསྟན་པ་རུང་ཆུ་འདེབས་པ་ཚུན་ཆོད་ཀྱི་བཅས་པ་ཕྲ་མོ་ནས་བདེན་གཉིས་དབྱེར་མེད་ཟུང་འཇུག་གི་བར་རྣམས་བཤད་སྒྲུབ་ཡ་མ་བྲལ་བའི་སྒོ་ནས་ཉམས་སུ་བཞེས་ཏེ། ཆོས་མིན་གྱི་གཡུལ་ངོ་ཕམ་པར་མཛད་ཅིང་ཆོས་ཀྱི་རྒྱལ་མཚན་སྲིད་རྩེའི་བར་དུ་བསྒྲེངས་ཏེ་འཛིན་པ་ལ་སྨོན་ལམ་རླབས་པོ་ཆེའི་མཐུ་གྲུབ་པས། སྙིགས་མ་ལྔ་ཤིན་ཏུ་བདོ་བའི་དུས་འདིར་ཡང་ཞུམ་པ་དང་སྐྱོ་ངལ་མེད་པར་ལྷག་བསམ་གྱི་འཇུག་པ་དབྱར་གྱི་མཚོ་ལྟར་འཕེལ་བའི་སྙིང་སྟོབས་ཀྱི་གོ་ཆ་བཙན་པོའི་སྒོ་ནས་རྒྱལ་སྲས་སེམས་དཔའ་ཆེན་པོ་རྣམས་ཀྱི་ཁྲོད་ནའང་རྒྱལ་མཚན་གྱི་ཏོག་ལྟར་མཆོག་ཏུ་འཕགས་པ་རྗེ་བཙུན་བླ་མའི་ཞབས་ལ་གསོལ་བ་འདེབས་སོ་ཞེས་མདོར་བསྟན་པ་ཡིན་ནོ། །གཉིས་པ་རྒྱས་པར་བཤད་པ་ལ། ཀློག་པ་ཐོས་བསམ་གྱི་སྒོ་ནས་ལུང་གི་བསྟན་པ་བཟུང་ཚུལ། སྤོང་བ་བསམ་གཏན་གྱི་སྒོ་ནས་རྟོགས་པའི་བསྟན་པ་བཟུང་ཚུལ། བསྟན་པའི་གནད་རྣམས་ཐུགས་ལ་འཁྲུངས་ཏེ་སྐལ་ལྡན་གཞན་རྗེས་སུ་བཟུང་བའི་ཚུལ་གསུམ། དང་པོ་ནི། བརྩོན་འགྲུས་ཆེན་པོས་དམ་པའི་ཞབས་བསྟེན་ནས། །སྡེ་སྣོད་གསུམ་ལ་ལེགས་པར་སྦྱངས་པ་ཡིས། །རྣམ་དཀར་གྲགས་པའི་རྒྱལ་མཚན་ལྷང་ངེ་བ། །མཁས་པའི་དབང་པོ་ཁྱོད་ལ་གསོལ་བ་འདེབས། །ཞེས་སྤྱིར་སྲིད་ཞིའི་ལེགས་ཚོགས་ཀྱི་རྩ་བ་བཤེས་གཉེན་བསྟེན་ཚུལ་ཡིན་ལ། ཁྱད་པར་དུ་སྡུད་པ་ལས། བླ་མ་མཁས་པ་རྣམས་ལ་རྟག་ཏུ་བརྟེན་པར་བྱ། །ཅིའི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང༌། །ཞེས་གསུངས་པ་ལྟར། ཆོས་

ཀྱི་རྩ་བ་བླ་མ་ལ་རག་ལས་པར་དགོངས་ཏེ། དཀའ་སྤྱད་དང་བརྩོན་འགྲུས་ཆེན་པོས་མདོ་དབུས་གཉིས་ཀར་ཐེག་པ་ཆེན་པོའི་དགེ་བའི་བཤེས་གཉེན་གྱི་མཚན་ཉིད་ཚང་བའི་བླ་མ་དམ་པ་དུ་མའི་ཞབས་ལ་གཏུགས། བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ནས་མཉེས་པར་བྱས། དེའི་གསུང་གི་བདུད་རྩི་ལམ་བསླབ་པ་རིན་པོ་ཆེ་གསུམ་བརྗོད་བྱའི་གཙོ་བོར་སྟོན་པ་མདོ་མངོན་འདུལ་བའི་སྡེ་སྣོད་གསུམ་ལ་རྟག་སྦྱོར་དང་གུས་སྦྱོར་གྱི་བརྩོན་པ་ཤུགས་དྲག་ཆུ་བོའི་རྒྱུན་ལྟ་བུས་ལེགས་པར་སྦྱངས་པར་མཛད་པའི་མཐུ་ཡིས་གཞུང་ལུགས་རྒྱ་མཚོར་གཞན་དྲིང་མི་འཇོག་པའི་སྤོབས་པ་བརྙེས་ཏེ། གཟུར་གནས་མཁས་པའི་སྐྱེ་བོ་ཐམས་ཅད་ཀྱིས་ཀྱང་འདི་ནི་ཚིག་གི་ན་ཡམ་ཙམ་མ་ཡིན་པར་གསུང་རབ་ལ་ནང་བྱན་ཚུད་པའི་སྨྲ་བའི་དབང་ཕྱུག་བླ་ན་མེད་པའོ་ཞེས་གཅམ་བུ་དང་ཟོལ་བསྟོད་ལྟ་བུ་མ་ཡིན་པར། དོན་ལ་གནས་པའི་རྣམ་དཀར་གྱི་གྲགས་པའི་རྒྱལ་མཚན་མཐོན་པོ་གདན་ས་གསུམ་གྱི་མཁས་པའི་ཁྲོད་ན་ལྷང་ངེར་འཕགས་པ་མཚུངས་ཟླ་མེད་པའི་མཁས་པའི་དབང་པོ་ཁྱོད་ལ་གསོལ་བ་འདེབས་ཞེས་ལུང་གི་ཡོན་ཏན་གྱི་ཆ་ནས་བསྟོད་པ་མཛད་དོ། །གཉིས་པ་ལ་གཉིས། སྒྲུབ་པ་མཛད་ཚུལ་དང། གྲུབ་པའི་གོ་འཕང་བརྙེས་ཚུལ་ལོ། །དང་པོ་ནི། རྒྱལ་བའི་བསྟན་པ་མཐའ་དག་ཉམས་ལེན་དུ། །གཞོལ་བའི་ཚུལ་འདི་དགོངས་ནས་དབེན་པ་རུ། །ཆོས་བརྒྱད་སྤངས་ཏེ་མང་དུ་ཐོས་བའི་དོན། །རྩེ་གཅིག་གོམས་པར་མཛད་ལ་གསོལ་བ་འདེབས། །ཞེས་རྒྱལ་བའི་བསྟན་པ་ཆོས་ཀྱི་ཕུང་པོ་ཇི་སྙེད་ཅིག་བཀའ་སྩལ་བ་ཐམས་ཅད་རྣམ་བཤད་རིགས་པ་ལས།

ཐོས་རྩོད་སྒྲུབ་པ་ལྷུར་ལེན་དང༌། །ཞེས་གསུངས་པ་བཞིན། ཐོས་རྩོད་ལྷུར་ལེན་པ་གཞན་སྡེའི་བསྟན་བཅོས་ལྟ་བུ་མ་ཡིན་པར་སྒྲུབ་པ་ཉམས་ལེན་དང་ཐོས་བསམ་སྒོམ་པའི་རིམ་པས་མཐར་རྣམ་གྲོལ་གྱི་རྒྱུ་འབའ་ཞིག་ཏུ་གཞོལ་བའི་ཚུལ་རྗེ་བླ་མས། ཞི་འགྱུར་མིན་མཛད་ཁྱོད་ལ་མེད། །ཅེས་དང༌། དཔལ་ལྡན་ཟླ་བས། བསྟན་བཅོས་ལས་དཔྱད་རྩོད་ལ་ཆགས་པའི་ཕྱིར། །མ་མཛད་རྣམ་གྲོལ་ཕྱིར་ནི་འདི་ཉིད་བསྟན། །ཅེས་དང༌། མདོ་སྡེ་རྒྱན་ལས་ཀྱང༌། དེ་ནི་བག་ཆགས་རྟོག་ཅིང་ཞི་བ་དང༌། །རབ་ཏུ་རྟོགས་པས་རྣམ་པར་གྲོལ་བར་བྱེད། །ཅེས་གསུངས་པའི་དོན་བཞིན་དུ་དགོངས་ནས་ནང་རྣམ་གཡེང་ལས་དབེན་ཞིང༌། ཕྱི་འདུ་འཛིས་དབེན་པ་སྒྲུབ་པའི་བསྟི་གནས་དུ་མར་རྙེད་མི་རྙེད། དགའ་མི་དགའ། སྙན་མི་སྙན། བསྟོད་སྨད་གཉིས་བཅས་འཇིག་རྟེན་ཆོས་བརྒྱད་ཀྱི་འཆིང་བ་རིང་དུ་སྤངས་ཏེ། ཚེ་འདི་སྣང་གི་རེ་དོགས་གང་ཡང་མེད་པར་ཅི་ཙམ་མང་དུ་ཐོས་པའི་དོན་དེ་དག་ཐམས་ཅད་རང་རྒྱུད་འདུལ་བའི་ཡན་ལག་ཏུ་ཁ་ནང་དུ་བསྐོར་ནས་རྩེ་གཅིག་ཏུ་གོམས་པར་མཛད་དེ། བཀའ་གདམས་གོང་མའི་རྣམ་ཐར་ལྷུར་བཞེས་པའི་བདག་ཉིད་ཆེན་པོ་ཁྱོད་ལ་གསོལ་བ་འདེབས་ཞེས་པ་ཚིག་དོན་ཙམ་ཡིན་ལ། རྒྱས་པར་ན་དབེན་པའི་རི་སུལ་དུ་མར་འཚོ་བ་དཀའ་སྤྱད་དྲག་པོ་རྗེ་བཙུན་མི་ལ་ལྟ་བུའི་སྙིང་རུས་བསྐྱེད་ཚུལ་གྱི་རྣམ་ཐར་ལོ་རྒྱུས་རྣམས་ཀྱང་འདི་དང་སྦྱར་ནས་བཤད་ན་ལེགས་སོ། །གཉིས་པ་ནི། དྲན་དང་ཤེས་བཞིན་ལྕགས་ཀྱུ་རྣོན་པོ་ཡིས། །གདུལ་དཀའི་སེམས་ཀྱི་གླང་པོ་རབ་བསྡུས་ཏེ། །དུལ་བའི་བརྟུལ་ཞུགས་རྫོགས་པའི་དཔལ་ཡོན་ཅན། །ཚུལ་ཁྲིམས་མཐར་ཕྱིན་

ཁྱོད་ལ་གསོལ་བ་འདེབས། །ཞེས་གསུངས་དོན་ནི་དབུས་མཐའ་ལས། དམིགས་པ་བརྗེད་པར་མ་གྱུར་དང༌། །བྱིང་དང་རྒོད་པ་རྟོགས་པ་དང༌། །ཞེས་གསུངས་པ་བཞིན། རྩ་བའི་དམིགས་པ་ལ་རྒྱུན་ཆགས་སུ་གཏོད་པའི་དྲན་པ་དང༌། ཕྱིན་ཅི་ལོག་གི་གཡེང་བ་འགོག་པའི་ཤེས་བཞིན་གྱི་ལྕགས་ཀྱུ་རྣོན་པོ་དེ་ཡིས་གདུལ་བར་དཀའ་བའི་སེམས་ཀྱི་གླང་པོ་ཆེ་ཐོག་མེད་ནས་དུག་གསུམ་མི་དགེ་བའི་ཕྱོགས་སུ་འཁྱམས་པ་དེ་ཉིད་བཙན་ཐབས་སུ་ལོག་པའི་ལམ་ལས་བཟློག་ནས་དབང་དུ་བསྡུས་ཏེ། ཞི་ཞིང་དུལ་བའི་ཚངས་སྤྱོད་ཀྱི་བརྟུལ་ཞུགས་ཁ་ན་མ་ཐོ་བ་མེད་པ་ལ་བཀོད་དོ། །འདི་ནི་སོ་སོར་ཐར་པའི་མདོ་ལས། སེམས་རྟ་ཁ་གླན་དཀའ་བ་ལ། །མཐུན་པའི་གཟེར་རྣོན་བརྒྱ་པ་ཡི། །སྲབ་ནི་སོ་སོར་ཐར་འདི་ཡིན། །ཞེས་དང༌། འདི་ནི་ལང་ཚོས་རྣམ་འཁྲུལ་བའི། །རྐང་གཉིས་གཞོན་ནུའི་ལྕགས་ཀྱུ་ཡིན། །ཞེས་པ་རྣམས་ཀྱི་དགོངས་པ་ཡིན་ཞིང༌། དབུ་མ་སྙིང་པོར། ཡིད་ཀྱི་གླང་པོ་ལོག་འགྲོ་བ། །དམིགས་པའི་ཀ་བ་བརྟན་པོ་ལ། །དྲན་པའི་ཐག་པས་ངེས་བཅིངས་ནས། །ཤེས་རབ་ལྕགས་ཀྱུས་རིམ་དབང་བྱ། །ཞེས་པའང་ཏིང་ངེ་འཛིན་སྒྲུབ་ཚུལ་གྱི་སྐབས་ཡིན་ཀྱང༌། བསླབ་པ་གསུམ་གྱི་གོ་རིམ་སྒྲུབ་པའི་སྐབས་སུ་ཏིང་ངེ་འཛིན་སྒྲུབ་ཚུལ་གྱི་མཆོག་ཚུལ་ཁྲིམས་ཡིན་པར་བསླབ་བཏུས་སུ་གསུངས་པས་འདི་དང་དོན་གཅིག་གོ །དེ་ལྟར་ལུས་ངག་གི་ཉེས་སྤྱོད་སྡོམ་པའི་ཚུལ་ཁྲིམས་ཡོངས་སུ་དག་པ་ན། རྒྱན་ལས། བཤེས་གཉེན་དུལ་བ་ཞི་བ་ཉེར་ཞི་བ། །ཞེས་གསུངས་པ་ལྟར་ཉོན་མོངས་མངོན་གྱུར་གནོན་པའི་ཏིང་ངེ་འཛིན་དང༌།

ས་བོན་སྤོང་བའི་ཤེས་རབ་ཀྱི་བསླབ་པའང་ཕུན་སུམ་ཚོགས་པར་གྱུར་ཏེ་བསླབ་གསུམ་ཡོངས་སུ་རྫོགས་པའི་དཔལ་ཡོན་ཅན་དུ་འགྱུར་རོ། །དེའང་དཔལ་གྱི་སྐད་དོད་ཤྲཱི་ལ་ཐུན་མོང་དང་ཐུན་མོང་མ་ཡིན་པའི་བཤད་པ་མང་དུ་འཇུག་ཀྱང༌། འདིར་བསླབ་པ་གསུམ་གྱི་ཁོངས་སུ་ཆོས་གཟུགས་ཀྱི་སྐུ་གཉིས་འགྲུབ་པའི་རྒྱུ་ཚོགས་གཉིས་ཟུང་དུ་འཇུག་པའི་དོན་ཏེ། དེ་ལྟར་ན་དངོས་སུ་ཚུལ་ཁྲིམས་མཐར་ཕྱིན་ཞེས་གསུངས་པའང་ཨུ་པ་ལི་བཞིན་ཆོས་འདུལ་བའི་བཀའ་བབ་ལྟ་བུར་གྱུར་པའི་གནད་ཀྱི་གཙོ་བོ་སྨོས་པ་ཡིན་ལ། དོན་གྱིས་དེ་ལ་བརྟེན་པའི་ཡོན་ཏན་ལམ་ཐུན་མོང་དང་ཐུན་མོང་མ་ཡིན་པའི་རྟོགས་པ་ཁྱད་པར་ཅན་རྣམས་མངོན་དུ་མཛད་དེ་གྲུབ་པའི་གོ་འཕང་མཐོན་པོར་གཤེགས་པའི་ཚུལ་བསྟན་པ་ཡིན་ནོ། །དེང་དུས་ཕལ་ཆེར་འདི་འདྲ་བ་ལ་གྲུབ་པ་བརྙེས་པའི་རྟགས་སུ་མི་འཛིན་པར་མངོན་ཤེས་ཕྲན་ཚེགས་རེའམ། རྡོ་ལ་ལག་རྗེས་བཞག་པ་ལྟ་བུ་ལ་ཆེས་ཡ་མཚན་དུ་བྱེད་པ་ནི་ཆོས་ཀྱི་གནད་མ་གོ་བ་ཡིན་ཏེ། ཚད་མ་རྣམ་འགྲེལ་ལས། ཚུར་ཤོག་བྱ་རྒོད་བསྟེན་པར་གྱིས། །ཞེས་སྐྱོན་བརྗོད་མཛད་པ་བཞིན། མངོན་ཤེས་ཕྲ་མོ་དུད་འགྲོ་ལའང་ཡོད་པ་མང་ཞིང༌། མཁའ་ལ་རྒྱུ་བའི་ཡི་དྭགས་རྣམས་དང༌། དེས་རྒྱུད་བརླམས་པ་ཕལ་ཆེར་ལ་འབྱུང༌། རྡོ་ལ་ལག་རྗེས་འཇོག་པ་ལྟ་བུ་རྩྭ་ཨ་ཝ་ཟོས་པའི་ར་ལུག་ཡན་ཆད་ཀྱིས་ཐུབ་ཀྱང་དེས་ཕྱི་མར་ཕན་རྒྱུ་ཅུང་ཟད་ཀྱང་མེད་པས། ཆོས་ཀྱི་གྲུབ་འབྲས་ཤསྟྲ་ཞེས་པའི་ཤ་ས་ན་ངེས་ཚིག་གིས་བཤད་པར། ཉོན་མོངས་དགྲ་རྣམས་མ་ལུས་འཆོས་པ་དང༌། །ཞེས་གསུངས་པ་བཞིན། ཤེས་རྒྱུད་ཀྱི་ཉོན་མོངས་ལ་གནོད་ཐུབ་པ་

དགོས་ཏེ། རྒྱལ་བས་ཆོས་བསྟན་པ་མཐའ་དག་ཀྱང་བྱིས་པའི་རྩེད་མོ་ལྟ་བུ་དེ་འདྲའི་དོན་དུ་མ་ཡིན་པར་སེམས་རྒྱུད་འདུལ་བའི་ཐབས་ཁོ་ནར་གསུངས་པས་སོ། །གསུམ་པ་སྐལ་ལྡན་གཞན་རྗེས་སུ་བཟུང་བའི་ཚུལ་ནི། གང་གི་ཡོན་ཏན་པདྨོའི་སྐྱེད་ཚལ་དུ། །འཁོར་བའི་བློ་གསལ་བུང་བ་མ་ལུས་པ། །ལེགས་བཤད་སྦྲང་རྩིའི་བཅུད་ཀྱིས་ཚིམ་མཛད་པ། །མཚུངས་མེད་བླ་མའི་ཞབས་ལ་གསོལ་བ་འདེབས། །ཞེས་བཤེས་གཉེན་དམ་པ་གང་གི་ལུང་རྟོགས་ཀྱི་ཡོན་ཏན་པདྨོའི་དྲི་བསུང་མངོན་པར་འཐུལ་བའི་ཆོས་ཀྱི་སྐྱེད་ཚལ་དུ་དད་པའི་ཤུགས་ཀྱིས་ཉེ་བར་འཁོར་བའི་ཐར་འདོད་བློ་གསལ་གྱི་བུང་བ་མ་ལུས་པ་རང་རང་གི་སྐལ་བ་དང་འཚམ་པར་ཟབ་པ་དང་རྒྱ་ཆེ་བའི་ལེགས་བཤད་སྦྲང་རྩིའི་བཅུད་ཀྱིས་ཚིམ་པར་མཛད་པ་སྐུ་གསུང་ཐུགས་ཀྱི་ཡོན་ཏན་དང་བཀའ་དྲིན་གང་གི་ཆ་ནས་ཀྱང་མཚུངས་ཟླ་མེད་པའི་དཔལ་ལྡན་བླ་མ་དམ་པའི་ཞབས་ལ་གསོལ་བ་འདེབས་ཞེས་པ་ཡིན་ལ། རྒྱས་པར་ན་སྒྲུབ་སྡེ་དུ་མ་ཕྱག་འདེབས་མཛད་ཚུལ་གསུང་ལས་སྐྱེས་པའི་བུ་ཆེན་རྣམས་ཀྱི་མཚན་དང་དེ་དག་གི་ཡོན་ཏན་བརྗོད་པའང་བླ་མའི་ཆེ་བར་འགྱུར་ཏེ། བསྟོད་པ་བརྒྱ་ལྔ་བཅུ་པ་ལས། ཁྱོད་ཀྱི་སློབ་མ་བཟང་པོའི་ཤིང༌། །དགེ་བའི་མེ་ཏོག་ཆེར་རྒྱས་པ། །དཔྱིད་ཀའི་ཤིང་ནི་མེ་ཏོག་གིས། །བརྒྱན་པ་ལྟ་བུར་མཛེས་པ་ལགས། །ཞེས་དང༌། ས་པཎ་གྱིས། དྲི་ལྡན་མེ་ཏོག་རྒྱང་རིང་ཡང༌། །བུང་བ་སྤྲིན་གྱི་ཚོགས་བཞིན་སྡུད། །ཅེས་གསུངས་པ་ལྟར་རོ། །གསུམ་པ་མཇུག་གི་དོན་ལ། ཇི་ལྟར་བརྩམས་པའི་ཚུལ། བརྩམས་པའི་དགེ་བ་བསྔོ་བ། སྦྱར་བྱང་གསུམ་གྱི་དང་པོ་ནི།

དེ་ལྟར་བླ་མའི་རྣམ་ཐར་རྒྱ་མཚོ་ལས། །ཆུ་ཐིགས་ཙམ་ཞིག་སྤེལ་བའི། ཞེས་གསུངས། གཉིས་པ་ནི། དགེ་བ་ཡིས། ཐེག་མཆོག་བཤེས་གཉེན་ཁྱོད་དང་མི་འབྲལ་ཞིང༌། །རྣམ་འདྲེན་རྒྱལ་བའི་གོ་འཕང་མྱུར་ཐོབ་ཤོག །ཅེས་གསུངས། དོན་ནི། འདིར་སྨོས་པ་འདི་ཉིད་ཡོན་ཏན་ཆ་ཚང་བར་བཤད་པ་ཡིན་ནམ་ཞེ་ན། དེ་ལྟར་བསྟོད་པ་བྱས་པ་འདི་ནི་བླ་མའི་རྣམ་ཐར་ཐུན་མོང་དང་ཐུང་མོང་མ་ཡིན་པ་རྒྱ་མཚོ་ལྟ་བུ་ལས། ཡོངས་སུ་གྲགས་པའི་མཛད་པའི་ཆ་ཤས་ཆུ་ཐིགས་ཙམ་ཞིག་ཚིགས་བཅད་དུ་སྤེལ་བ་ཡིན་གྱི། ཆ་ཚང་བར་བརྗོད་པར་ག་ལ་ནུས། འོན་ཀྱང་ཞིང་ཁྱད་པར་ཅན་གྱི་མཐུ་ལ་བརྟེན་པའི་དགེ་བ་འདི་ཡིས་མཁའ་མཉམ་འགྲོ་བ་མཐའ་དག་ཚེ་རབས་ཀུན་ཏུ་ཐེག་པ་མཆོག་གི་དགེ་བའི་བཤེས་གཉེན་ཁྱོད་དང་སྐད་ཅིག་ཙམ་ཡང་མི་འབྲལ་ཞིང༌། གསུང་གི་བདུད་རྩི་ངོམས་པ་མེད་པར་མྱོང་སྟེ་ས་ལམ་གྱི་རྟོགས་པ་རིམ་གྱིས་བགྲོད་ནས་རྒྱལ་བའི་གོ་འཕང་རིན་པོ་ཆེ་མྱུར་བ་ཉིད་དུ་ཐོབ་པར་ཤོག་ཅེས་དགེ་བ་མི་ཟད་པར་བྱེད་པ་བྱང་ཆུབ་མཆོག་ཏུ་བསྔོ་བས་རྒྱས་བཏབ་བོ། །སྦྱར་བྱང་ནི། ཅེས་འཁོར་བའི་བྱ་བ་མཐའ་དག་ཆུ་ཤིང་ལྟར་སྙིང་པོ་མེད་པར་གཟིགས་ནས་དབེན་པའི་གནས་སུ་སྒྲུབ་པའི་རྒྱལ་མཚན་འཛིན་པར་མཛད་པའ་ིསེམས་དཔའ་ཆེན་པོ་གཉན་རྩེ་དཔོན་སློབ་ངག་དབང་ཆོས་འཕེལ་བའི་ཞལ་སྔ་ནས་ཀྱི་གསོལ་འདེབས་འདི་ནི་རི་ཁྲོད་པ་དགེ་སློང་བཀྲ་ཤིས་རྒྱ་མཚོས་བསྐུལ་བའི་ངོར། ལུང་དང་རིགས་པ་སྨྲ་བ་༸དཀོན་མཆོག་འཇིགས་མེད་དབང་པོའི་སྡེས་དབེན་གནས་བཀྲ་ཤིས་དགེ་འཕེལ་དུ་སྦྱར་བའི་ཡི་གེ་པ་ནི་དགེ་སློང་ངག་དབང་ཕུན་ཚོགས་སོ། །

ཞེས་གསུངས་ཏེ་གོ་སླ་བའི་དབང་དུ་བྱས་ནས་མ་སྤྲོས་སོ། །སྨྲས་པ། ཡབ་རྗེའི་དགོངས་པ་ཟབ་མོའི་སྤྲིན་གྱི་ཀློང༌། །འགྲེལ་བྱེད་སྙན་པའི་འབྲུག་སྒྲ་རོལ་བ་ཡིས། །དགའ་དད་གར་གྱིས་རྩེན་པའི་མདོངས་མཐའ་མ། །རྣམ་གྲོལ་གཏོས་བཟང་འཛིན་པའི་སྒེག་གྱུར་ཅིག །ཅེས་པ་འདི་ནི་རྡོར་ཞར་ངག་དབང་ཆོས་འཛིན་སོགས་དོན་གཉེར་ཅན་འགའ་ཞིག་གི་མོས་ངོར། ཆོས་སྨྲ་བ་༸དཀོན་མཆོག་བསྟན་པའི་སྒྲོན་མེས་མདོ་སྨད་བསྟན་པའི་འབྱུང་གནས་དཔལ་ལྡན་བཀྲ་ཤིས་འཁྱིལ་དུ་སྦྱར་བའི་ཡི་གེ་པ་ནི་དགེ་སློང་དཀོན་མཆོག་ཀུན་དགའོ།། །།