ཡིད་དགའ་ཆོས་འཛིན་གྱི་ཞིང་གི་བསྔགས་བརྗོད་དང་བའི་མེ་ལོང་།
ཡིད་དགའ་ཆོས་འཛིན་གྱི་ཞིང་གི་བསྔགས་པ་བརྗོད་པ་ དང་བའི་མེ་ལོང་ཞེས་བྱ་བ་བཞུགས་སོ། །ཞིང་མཆོག་དག་པའི་དཀྱིལ་འཁོར་ཡོངས་སུ་རྫོགས། །སྨོན་ལམ་རྒྱ་ཆེན་རླུང་གི་ཤིང་རྟས་དྲངས། །སེམས་ཅན་སྨིན་བྱེད་བསིལ་བའི་འོད་དཀར་ཅན། །མི་ཕམ་ཟླ་བ་གཞོན་ནུ་རྒྱལ་གྱུར་ཅིག །གང་གི་ཞབས་སེན་འོད་ཀྱིས་རེག་པ་ཡིས། །དགེ་ལེགས་བྱིན་པའི་སྐལ་བཟང་སྣང་བ་ཅན། །ས་གསུམ་འཇིག་རྟེན་དགའ་བ་གཟུགས་ཅན་བཞིན། །གྱུར་པ་དེ་ནི་དགའ་ལྡན་ཞེས་སུ་གྲགས། །དེ་ཡི་ངོ་མཚར་བསྔགས་པ་སྤྲིན་གྱི་དབྱངས། །ནོར་འཛིན་ཕ་མཐའ་བརྒལ་བའི་རོལ་མོ་ནི། །བློ་ཆུང་བྷྲ་མ་རཿ ཡི་སྒྲོས་པར་ལས། །རྫོགས་པར་འཁྲོལ་བའི་རེ་བ་ག་ལ་ཞིག །འོན་ཀྱང་ནམ་མཁའི་མཐའ་ལ་མིག་གཏད་དེ། །སྙན་སྒྲོགས་ཀ་ལ་པིངྒའི་ཕྲུ་གུ་བཞིན། །དག་པའི་ཞིང་མཆོག་སྦྱོང་བ་ལྷུར་ལེན་རྣམས། །དེ་ཡི་རང་བཞིན་བརྗོད་ལ་སྤྲོ་བ་འཛིན། །གཏིང་ཟབ་འཁོར་བ་ཆུ་སྲིན་འབྱུང་གནས་ལས། །འགྲོ་སྒྲོལ་རྒྱལ་བའི་དབང་པོ་མཐའ་དག་ནི། །སྟུག་པོ་བཀོད་པའི་མཁའ་ལས་མ་གཡོས་ཀྱང༌། །ཆུ་ཟླ་ལྟ་བུར་བཅུ་གཉིས་གར་གྱིས་རྩེན། །དེ་ཚེ་ཛམྦུས་མཚན་པའི་ལྷོ་གླིང་གི །རྫིང་བུར་དལ་གྱིས་འཇུག་པའི་འབབ་སྟེགས་
བཞིན། །ཞིང་མཆོག་འདིར་ནི་མངོན་པར་སྐྱེ་བ་ཡི། །དགེ་མཚན་དང་པོར་ངོམས་པ་སྤྱི་ཡི་ལུགས། །ཐུབ་པ་མཆོག་ཀྱང་ཐུགས་རྗེའི་ན་དར་བས། །སྙིགས་མའི་གཅོང་རོང་སྟུག་པོར་ཆས་པ་ན། །མཆོག་ཏུ་ཡིད་འོང་ནོར་བུའི་ཅོད་པན་ནི། །གཅེས་ནོར་གཏམ་བཞིན་བྱམས་མགོན་དབུ་ལ་བཅིངས། །དེ་ཡི་ཆོས་ཀྱི་འབྱོར་པ་མ་ཉམས་པས། །རྣམ་གྲོལ་ནོར་བུའི་སྒོ་བརྒྱ་ཕྱེ་བ་ན། །བདག་ཅག་སྐལ་བ་ཕམ་པར་མ་གྱུར་ཅེས། །རབ་དགའི་དབྱངས་ཀྱི་མཚན་སྙན་དོན་དུ་གྲུབ། །ཕུན་ཚོགས་བྱེ་བའི་རླབས་ཕྲེང་རོལ་པའི་ཞིང༌། །ཟབ་རྒྱས་ནོར་ལ་དབང་བའི་གདེངས་ཅན་གཙོ། །ཕན་ཚུན་དཔལ་དུ་གྱུར་པའི་མཛེས་པ་ནི། །སྤྲིན་བྲལ་སྟོན་གྱི་མཁའ་ལ་ཉི་འོད་བཞིན། །སྲིད་པའི་སྣོད་བཅུད་ལྗོན་པ་སྐྱེད་པ་པོ། །ལས་དང་ཉོན་མོངས་རླན་གྱིས་མ་བསྐྱེད་ཅིང༌། །ས་གསུམ་འཇིག་རྟེན་འཇིག་པ་ལྷུར་བྱེད་པ། །རབ་འབར་བསྐལ་པའི་ཞུགས་ཀྱིས་མི་འཇིག་པའི། །དག་པའི་ཞིང་མཆོག་རིན་ཆེན་བརྒྱ་ཡི་ཁམས། །ཚོགས་གཉིས་བཟོ་བོའི་འཕྲུལ་གྱིས་བསྟར་བ་ཡིས། །རི་མོ་ཡོངས་སུ་སྨིན་པའི་བཀོད་པ་ནི། །དཔེ་ཟླ་བྲལ་བའི་ཁེངས་པ་སྲིད་ན་མཐོ། །ཁོད་སྙོམས་རྡུལ་བྲལ་གཙང་མའི་མེ་ལོང་བཞིན། །རེག་འཇམ་པཉྩ་ལི་ཀའི་རྗེས་སུ་འགྲོ། །ཕ་མཐའ་ཡངས་པ་ལྷ་ཡི་ལམ་དང་མཚུངས། །རྣམ་པར་བཀྲ་བ་དབང་གཞུའི་དགྲ་ཟླ་བྱེད། །ཁོ་ར་ཁོར་ཡུག་རིན་ཆེན་རི་བོའི་ཕྲེང༌། །འོད་ཀྱི་གདེངས་ཀ་འཐབ་པའི་རྩེད་འཇོ་ཡི། །འཛུམ་དཀར་ཕྱོགས་ཀུན་སྣང་བྱེད་བྱ་མ་རྟས། །ཕན་བདེའི་དངོས་པོ་མཐའ་དག་མགྲོན་དུ་འགུག །ནོར་བུའི་
འཁྲི་ཤིང་བཞད་པའི་མཚར་སྡུག་ལས། །བསུང་ཞིམ་དྲི་ཡིས་ལྷགས་པ་མ་ལི་ཀའི། །ཕྲེང་བ་ཚར་དུ་དངར་བའི་དོ་ར་ན། །དོན་ཟབ་རོ་ལྡན་བུང་བས་གླུ་དབྱངས་ལེན། །ཟླ་བ་ཆུ་ཤེལ་རྒྱུན་གྱི་ཉལ་འགྲོ་མ། །མུ་ཏིག་ལྦུ་བའི་གདུབ་ཀོར་འཁྲོལ་བ་ཅན། །ལྷུང་ལྷུང་གདངས་ལྡན་ཆོས་ཀྱི་སྡོམ་བཞིའི་དབྱངས། །ཟག་མེད་དགའ་བདེའི་འདུན་པ་ཁོང་ནས་སློང༌། །དེ་ཡི་ལན་ལྡོན་སྤྲོ་བའི་ཉེར་དྲངས་ཏེ། །མགྲིན་རྔ་དར་དིར་སྒྲོགས་པ་ངང་པའི་ཁྱུ། །ག་བུར་ཟེགས་མའི་འདབ་ཕྲེང་རྒོད་པ་ཡི། །རླབས་ཀྱི་འཁྲི་ཤིང་དང་འགྲོགས་གར་གྱིས་བྲེལ། །ཕྱོགས་མཚམས་ཀུན་ཏུ་དཀྲིགས་པའི་དཔག་བསམ་ལྗོན། །མཁོ་དགུའི་འབྱོར་པ་སྟོབ་པས་མི་ངལ་བ། །གཏོང་བའི་ཡོན་ཏན་རིག་པས་ཡིད་དྲངས་སམ། །བཟོད་དཀའི་ནོར་མང་ཁུར་གྱིས་ངལ་བ་སྙམ། །རྫི་ཕྱོགས་རླུང་གི་ཕོ་ཉ་རྒྱུ་བ་ཡིས། །ངལ་བ་མེད་པར་དྲངས་པའི་དྲི་ཞིམ་བསུང༌། །གདུང་སེལ་མཆོད་པའི་ཡོན་དུ་སྦྲེང་བས་ཀྱང༌། །སིམ་པའི་ཚོར་བ་མཆོག་གི་བདེ་དགའ་སྐྱེད། །དཀར་སེར་དམར་ལྗང་སྔོ་བའི་མེ་ཏོག་གི །ཕྲེང་བ་མ་སྙིགས་ནོར་འཛིན་བུ་མོའི་གོས། །མནན་ན་ནེམ་ཞིང་བཏེགས་ན་སྤར་བ་ཡི། །རེག་བྱ་མཆོག་གིས་བགྲོད་ལ་ངལ་གསོ་སྦྱིན། །དུས་སུ་མཐུན་པའི་རླུང་གི་བྱི་དོར་གྱིས། །དག་ཅིང་གཙང་བྱས་ཤེལ་དཀར་མེ་ལོང་བཞིན། །སླར་ཡང་གསར་པའི་མེ་ཏོག་འགྲེམས་པ་ཡིས། །བསོད་ནམས་བྱི་དོར་མཁན་པོའི་འཕྲུལ་འདི་མཚར། །ཆུ་མཐོངས་དཔལ་གྱི་བེའུའི་རེ་མིག་ཀུན། །ཉི་མ་སྟོང་ཕྲག་ཁུ་བས་བྱུགས་པ་ལྟར། །གསེར་སྦྱངས་དག་པའི་རང་བཞིན་འཛིན་མ་ལ། །བཻ་ཌཱུརྻ་ཡི་མིག་མངས་རིས་སུ་བྲིས། །མཐའ་ཡས་ཞིང་གི་འབྱོར་པའི་སྙིང་པོ་ནི། །སྤོ་མཐོར་བརྩེགས་པའི་རང་འོད་ངོམས་
པ་ལྟའི། །ནོར་བུའི་གཟི་འོད་འབར་བའི་གནྡྷོ་ལ། །རྣམ་པར་རྒྱལ་བའི་རྒྱལ་མཚན་མངོན་པར་མཐོ། །དགའ་ལྡན་གནས་ཀྱི་བདག་པོ་རབ་དགའ་ལྡན། །འབྱོར་བའི་ཆུ་མཚོ་སྲིད་པའི་འདམ་དང་བཅས། །དེ་ལྟ་ན་ཡང་ཡིད་དགའ་ཆོས་འཛིན་གྱི། །པད་དཀར་སྡོང་བུ་འདོད་པའི་འདམ་གྱིས་དབེན། །གེ་སར་རྡུལ་མང་མཚམས་སྤྲིན་འཁྲིགས་པ་ཡི། །འདབ་བརྒྱའི་འདབ་མ་གྲོལ་བའི་སྙིང་པོ་ལས། །ཉི་གཞོན་ལང་ཚོ་དར་བ་ལྷ་ཡི་བུ། །ལེགས་བྱས་སད་པའི་འཛུམ་དཀར་སྣང་བ་སྤྲོ། །མཐའ་དག་ཕྱོགས་སུ་བཀྲ་བ་དབང་པོའི་གཞུའི། །དར་གྱི་འདབ་ཡངས་རོལ་པའི་ཟློས་གར་མཁན། །རབ་འབྱམས་རྒྱལ་བའི་ཞིང་ནས་ལྷགས་པ་ཡི། །རྒྱལ་སྲས་མཁའ་འགྲོ་དཀར་པོའི་ཕྲེང་བ་ཡང༌། །ཞིང་བརྒྱར་འགྲོ་ཞིང་ཀུན་ནས་འོང་བ་དང༌། །དུ་མར་སྤྲོ་ཞིང་གཅིག་ཏུ་སྡུད་པ་སོགས། །མཁའ་དབྱིངས་ཁྱབ་པའི་འཕྲུལ་གྱི་ཟློས་གར་ནི། །མྱུར་གསལ་གློག་གི་འོད་དང་སྐར་མདའ་བཞིན། །སྣོད་བཅུད་འབྱོར་པའི་སྙེ་མ་ཡོངས་གང་བ། །དག་པའི་ཞིང་ནས་འདུས་པ་མཐའ་དག་ཀྱང༌། །རང་རང་འབྱོར་པས་སྙེམས་པའི་དབུགས་ཞི་ཡང༌། །ངོ་མཚར་ཤུགས་ཀྱིས་གཟིར་བའི་དབུགས་རྒོད་བརྩེགས། །མཆོག་ཏུ་དགའ་བའི་དབང་བསྒྱུར་རྒྱལ་པོའི་བཀས། །དཔལ་གྱི་འབྲུ་ལྡན་གྲགས་པའི་སྤྲིངས་ཡིག་ནི། །མ་ལུས་ཞིང་དུ་ཀློག་པ་མི་ངལ་བ། །སྐལ་བཟང་ཕོ་ཉའི་རྒྱུ་འགྲུལ་ཆད་པ་མེད། །ཐོས་པའི་མོད་ལ་སྙིང་གི་གདུང་སེལ་ཞིང༌། །ཡང་ཡང་སེམས་པས་སྲིད་རྩེ་དྲུངས་འབྱིན་པ། །ཤེར་ཕྱིན་ཆོས་ཀྱི་གནྜི་སྒྲ་བོ་ཆེས། །རྣ་བ་བདུད་རྩིར་བསྒྲུབ་པའི་དགའ་ཚལ་ན། །མི་འཇིགས་བཞི་ཡི་རང་
བཞིན་གདོང་ལྔ་པ། །རལ་པའི་ཁུར་འཆང་བརྒྱད་ཀྱིས་བཏེགས་པའི་ཁྲིར། །བཟང་པོའི་བཞུགས་སྟངས་མཛད་པའི་མི་ཕམ་མགོན། །འབུམ་ཕྲག་ཉིན་མོར་བྱེད་པའི་ཕུང་པོ་བཞིན། །འོད་བཟང་གསེར་ཞུན་ཁུ་བའི་རླབས་ཕྲེང་ཕྱོགས་ཀྱི་འཁོར་ལོ་འབྲི་བྱེད་ཅིང༌། །ཨུཏྤལ་འདབ་ཡངས་གཡོ་ལྡན་རྗེས་ཆགས་སྤྱན་གྱིས་འགྲོ་ལ་མངོན་པར་གཟིགས། །མཆུ་སྒྲོས་ཐུན་མཚམས་དམར་བའི་ཁོངས་ལས་ཆུ་ཤེལ་མྱུ་གུ་བཞད་པའི་རྩེས། །སྲིད་པའི་ཚ་གདུང་འཇིལ་བྱེད་ཡིད་འོང་བདུད་རྩིའི་བསང་གཏོར་ཅི་ཡང་འགྱེད། །གཟུགས་བཟང་འོད་ཀྱིས་དྲེགས་པ་ལྷ་ཡི་བུ། །གསེར་གྱི་ཏ་ལ་ཡངས་པའི་རྐང་འཐུང་ཕྲེང༌། །སྔོ་ལྗང་ཕལ་བའི་ཤིང་དུ་བསྒྱུར་བ་ཡིས། །ཆོས་ཀྱི་འབྲས་བུ་སྨིན་པའི་རྟེན་དུ་གྱུར། །དངོས་བསྟན་སྟོང་ཉིད་པི་ཝང་སྒྲར་དྲངས་ཏེ། །སྦས་དོན་ལམ་གྱི་རིམ་པ་སྟོན་པའི་གླུས། །རྨོངས་པས་བློ་མིག་ལྡོངས་པའི་སྐྱེ་བོ་ཀུན། །བླ་མེད་ཐར་པའི་གྲོང་དུ་འཁྲིད་པར་བྱེད། །ཡན་ལག་ལྔ་དང་ལྡན་པའི་ཚངས་དབྱངས་ཀྱིས། །རྣ་བའི་བཅུད་ལེན་སྤྲོ་བས་མི་ངོམས་ཤིང༌། །བསོད་ནམས་བརྒྱས་གཙང་རྒྱལ་བའི་ཞལ་བཟང་ལ། །བལྟ་བའི་དགེ་མཚན་རྟག་ཏུ་མི་ཉམས་པས། །འདི་ཡི་ལྷ་རྣམས་རང་གཞན་སྤྲུལ་བ་ལ། །འདོད་རྒུར་དབང་བྱེད་གོང་མའི་འདོད་ལྷ་དང་། །ཆགས་བྲལ་ཏིང་འཛིན་བདེ་ལ་རོལ་པ་ཡི། །བསམ་གཏན་གནས་ལའང་དགའ་བ་རིང་དུ་དོར། །སུམ་ཅུ་རྩ་གཉིས་ཁྲི་ཕྲག་དཔག་ཚད་ཀྱིས། །བསྐལ་པ་མི་ཡི་འཇིག་རྟེན་མཐའ་དག་ཀྱང༌། །ལག་པའི་མཐིལ་གནས་སྐྱུ་རུ་ར་བཞིན་དུ། །གསལ་མཐོང་ལྷ་མིག་དག་པས་ཀུན་ཏུ་གཟིགས། །གང་ལ་སྒྲིབ་པ་མེད་པའི་མངོན་ཤེས་དང༌། །ཀུན་ཏུ་ཐོགས་པ་མེད་པའི་རྫུ་
འཕྲུལ་གྱིས། །ལེགས་བྱས་སྤྱོད་པ་འདོད་དགུར་སྐྱོང་བ་ཡིས། །ཡིད་ལ་གདུང་བའི་གོ་སྐབས་རིང་དུ་སྤངས། །སྨིན་ལེགས་ཟུར་གྱིས་བལྟ་བའི་ལུས་ཕྲ་མ། །དགའ་སྐྱེད་ལྷ་མོའི་ཚོགས་ཀྱིས་མཆོད་བྱེད་ཀྱང༌། །བག་ཡོད་ནོར་བུའི་དོ་ཤལ་གྱིས་མནན་པའི། །ཚུལ་བཟང་དར་གྱི་ཤམ་བུ་གཡོ་བ་མེད། །ཨེ་མ་འབྱོར་པ་རྒྱ་ཆེན་དུལ་བས་མཛེས། །གྲགས་པས་ཀུན་ཏུ་ཁྱབ་ཀྱང་འཚེ་བ་མེད། །འདོད་ཡོན་རབ་རྒྱས་ཆོས་ལས་མི་གཡེལ་བ། །འདི་ཡི་སྣོད་བཅུད་ངོ་མཚར་བསམ་མི་ཁྱབ། །དེ་ལྟ་ན་ཡང་བློ་གྲོས་རྔ་ཡབ་རྩེས། །རྒྱལ་བའི་དཀྱིལ་འཁོར་དགེ་བའི་རོལ་མཚོ་ལས། །སྙམ་དངགས་མུ་ཏིག་སིལ་མའི་སྦྲང་ཆར་གྱི། །རྗེས་འགྲོ་བསྔགས་པའི་གཏམ་གྱི་ཕྲེང་བ་སྤེལ། །དེ་ཡི་དགེ་བ་ནམ་ཡང་མི་ཉམས་པའི། །རང་བཞིན་ན་ཡ་ཀྲོ་དྷའི་ས་བོན་ནི། །དགའ་བའི་དཔལ་ལྡན་ཆོས་ཀྱི་དགའ་ཚལ་དུ། །སྐྱེ་བའི་མྱུ་གུ་མཆོག་ཏུ་སྨིན་པར་ཤོག །མཚན་དཔེའི་གཟི་འོད་འབུམ་ཕྲག་སྤྲོ་བ་ཡི། །བྱམས་མགོན་ཉིན་བྱེད་དབང་པོའི་ཞལ་མཐོང་ཞིང༌། །ལེགས་གསུང་གསེར་ཞུན་འོད་བཟང་ཁུ་བའི་རྒྱུན། །དད་པའི་སྙིམ་པས་རྟག་ཏུ་འཐུང་བར་ཤོག །གཟུངས་སྤོབས་ཏིང་འཛིན་མངོན་ཤེས་རྫུ་འཕྲུལ་སོགས། །མཐུ་ཆེན་འདབ་མ་བསྐྱོད་པའི་ཟློས་གར་གྱིས། །རྒྱལ་སྲས་མཁའ་ལྡིང་དབང་པོ་མཐའ་དག་དང༌། །ལྷན་ཅིག་ཆོས་ཀྱི་རྩེ་དགས་རོལ་པར་ཤོག །རྒྱལ་སྲས་སྤྱོད་པའི་ལུས་རྩལ་རྫོགས་པ་ན། །རྒྱལ་རྣམས་འོད་ཟེར་ཆེན་པོས་དབང་བསྐུར་ཞིང༌། །རྒྱལ་ཚབ་དམ་པའི་ཆོས་ཀྱི་སྲིད་བཟུང་ནས། །རྒྱལ་བའི་མཛད་པ་མ་ལུས་
སྒྲུབ་གྱུར་ཅིག །ཅེས་དགའ་ལྡན་ཡིད་དགའ་ཆོས་འཛིན་གྱི་ཞིང་གི་བཀོད་པ་མཇུག་སྨོན་ཚིག་དང་བཅས་པ་འདི་ནི། ཨ་ལག་ཤ་ནས་རྣམ་དཔྱོད་མཆོག་ཏུ་ཡངས་པ་ཆོས་རྗེ་ངག་དབང་རྒྱ་མཚོས་བསྐུལ་མ་ནན་ཆགས་བྱུང་བར་བརྟེན། འདིའི་ཐུན་མོང་མ་ཡིན་པའི་ཞིང་གི་བཀོད་པ་མདོའི་ཁུངས་སོགས་ཆེར་མི་གསལ་བས་ཞིབ་ཆ་བྲི་མ་ནུས་ཀྱང་སངས་རྒྱས་ཀྱི་ཞིང་སྤྱི་འགྲོའི་བསྔགས་པ་དང་བླ་མ་གོང་མའི་གསུང་རྒྱུན་ལ་གཞི་བྱས་ཏེ། ༸བཙུན་པ་དཀོན་མཆོག་བསྟན་པའི་སྒྲོན་མེས་ཆོས་གྲྭ་ཆེན་པོ་བཀྲ་ཤིས་འཁྱིལ་དུ་བྲིས་པའོ།། །།