ལུང་སྟོན་བྱམས་པའི་དཀར་ཆག་གདངས་སྙན་ཆོས་ཀྱི་གཎྜི།
བྱཱཀརཎཾམཻཏྲེཿ པཀྟྲསྭརཡཀདྷརྨབྱགཎྜིནཱམབིཧརཏིསྨཿ
ལུང་སྟོན་བྱམས་པའི་དཀར་ཆག་གདངས་སྙན་ཆོས་ཀྱི་གཎྜི་ཞེས་བྱ་བ་བཞུགས་སོ། །
པྲཛྙེཉྩཀབྷབཙྪཏཤྩརཿ ཀཱརོཎོདམབནྡྷཙཱབྷབཿ ཏྲཻལོཀྱདྭིསཏིགྲཏལླགྷོཿ བནྡེསེབལབརྡྷདཱཤདཱཤདྷྲྀཀ྄ ཿ
ཤེས་རབ་འཁོར་ལོས་སྲིད་པའི་རྒྱུ་བ་བཅད། །སྙིང་རྗེ་ཐ་གུས་སྲིད་མིན་སྲིད་པར་བཅིངས། །བདེན་གཉིས་གོམ་པས་འཇིག་རྟེན་གསུམ་གནོན་པ། ། སྟོབས་ཀྱི་འཇུག་པ་བཅུ་མངའ་དེ་ལ་འདུད། །
ཡེ་ཤེས་ལྔ་ཡི་ཅོད་པན་གདེངས་ཀའི་འོད། །གང་གི་སྤྱི་བོར་བཀོད་བཞིན་གསུང་གི་མཆོག །སྦས་དོན་སྙིང་པོའི་མཛོད་བརྒྱ་ཕྱག་ཏུ་གཏད། །མི་ཕམ་རྒྱལ་བའི་རྒྱལ་ཚབ་རྒྱལ་གྱུར་ཅིག །ལས་ཉོན་ན་ཀྲས་རབ་དཀྲུགས་སྲིད་པའི་མཚོ། །སྡུག་བསྔལ་རླབས་འཕྲེང་སྲིད་རྩེར་འཕྱོ་བ་ལས། །སྒྲོལ་བའི་དེད་དཔོན་གཅིག་པུར་ཁྱོད་བསྟེན་ནོ། །འཕྲིན་ལས་གྲུ་གཟིངས་སྦྱོར་ཅིག་ཐུགས་རྗེའི་གཏེར། །གྲགས་པའི་སྒྲ་བརྒྱ་རོལ་པའི་སྤྲིན་དཀར་ལ། །རེ་བའི་མིག་འབུར་གཏོད་པའི་མདོངས་མཐའ་ཡང༌། །བསོད་ནམས་འདུ་བྱེད་གར་དང་ལྷན་ཅིག་ཏུ། །སྙིང་ལ་མངོན་དགའ་རྒྱས་པའི་ཅ་ཅོ་འཆོར། །རྒྱལ་གསུང་ལོང༷ས་སྤྱོད༷་རྫོགས་པའི་ངོ་བོ་ཉིད། །ངག་གི་ལོང༷ས་སྤྱོད༷་དབྱངས་ཅན་ངང་མོའི་གར། །མགྲིན་པ་ལོང༷ས་སྤྱོད༷་འཁོར་ལོའི་འོ་མཚོ་རུ། །ཅི་དགར་ལོང༷ས་སྤྱོད༷་མགྲིན་རྔ་འདི་ན་བརྡུང༌། །མཆོག་གསུམ་རྟེན་གྱི་
ངོ་བོ་བཞེངས་པའི་ཚུལ། །ཕྱག་མཆོད་སྐོར་བ་བཅས་པའི་ཕན་ཡོན་རྣམས། །མཐོང་ཐོས་རྣམ་གྲོལ་ལྷ་ཡི་རྔ་བོ་ཆེ། །བསྒྲགས་ཟིན་ཟློས་བུར་འགོད་པའི་ངལ་བ་བསྐྱུངས། །དེང་ནི་ཉམས་འགྱུར་འདབ་མའི་བཀྲག་མདངས་དང་། །དོན་གྱི་སྙིང་པོ་དད་པ་སྦྲང་རྩིའི་བཅུད། །ཟུང་དུ་གཉེར་བའི་བློ་གསལ་བྷྲ་མ་རཿ། །དགའ་སྐྱེད་མེ་ཏོག་ཕོན་པོ་འགའ་ཙམ་སྤེལ། །གཞུང་ལུགས་རྣམ་མང་ཐོས་པའི་དངོས་གྲུབ་ལ། །འདོད་ཆུང་ཆོག་ཤེས་འགྲམ་པ་མི་སྟོན་པར། །ལེགས་བཤད་ནོར་བུ་སྐྱུག་པའི་ནེའུ་ལེའི་ཁར། །རྣ་བའི་ཡོལ་གོ་གཏད་དེ་བཟེད་པར་མཛོད། །དེའང་རྒྱལ་བ་རྣམས་ཀྱིས་བྱིན་གྱིས་རློབས་པའི་ཚེ་ཕྱག་གཡས་པ་སྤྱི་བོར་བཞག་སྟེ་བྱིན་རླབས་ཞུགས་པའི་ཚུལ་མདོ་སྡེ་ས་བཅུ་པ་དང་ལང་གཤེགས། རབ་ཞི་རྣམ་ངེས་སོགས་དུ་མ་ལས་གསུངས་ཤིང་། ཁྱད་པར་དུ་བཤད་རྒྱུད་རྡོ་རྗེ་འཕྲེང་བ་ལས། དེ་ནས་ལུང་བསྟན་ཐོབ་དོན་དུ། །ཞེས་པ་ནས། གཡས་པ་མི་འཇིགས་སྦྱིན་བྱས་ལ། །དབུགས་དབྱུང་བ་ཡི་མཆོག་བྱ་བ། །ཞེས་བྱང་ཆུབ་ཏུ་ལུང་སྟོན་པའི་ཚེ་ཕྱག་གཡས་པ་མི་འཇིགས་པ་སྐྱབས་ཀྱི་སྦྱིན་པའི་ཕྱག་རྒྱ་བཅས་ཏེ་ལུང་བསྟན་པ་ལ་དགོས་པ་དང་རྟེན་འབྲེལ་ཁྱད་པར་ཅན་ཡོད་པར་གསུངས། དོན་དེ་ལ་དགོངས་ཏེ་པཎ་ཆེན་དགེ་འདུན་གྲུབ་ཀྱིས་ཀྱང་། དེ་ཚེ་རྒྱལ་བ་བྱམས་པ་རབ་ཏུ་དགྱེས། །ཕྱག་གཡས་བདག་གི་མགོ་ལ་བཞག་བཞིན་དུ། །བླ་མེད་བྱང་ཆུབ་མཆོག་ཏུ་ལུང་བསྟན་ནས། །ཞེས་གསུངས་
ཤིང༌། རྗེ་བཙུན་ངག་དབང་བྱམས་པའི་ལྗགས་བཀོད་ཀྱི་བྲིས་ཐང་མང་པོར་ཡང་དེ་བཞིན་འབྱུང་བས། རྟེན་འབྲེལ་གྱི་སྒོ་ལ་བསམས་ནས་བྱང་ཆུབ་ཏུ་ལུང་སྟོན་པར་མཛད་པའི་བྱམས་མགོན་གྱི་སྣང་བརྙན་གསར་བསྐྲུན་བགྱིས་ཏེ་དཀར་ཆག་མདོ་ཙམ་འགོད་པ་ལ། རྟེན་བཞེངས་མཆོད་ཀྱི་ཕན་ཡོན་སོགས་ནི་མཐོང་གྲོལ་ཆེན་མོའི་དཀར་ཆག་ཏུ་བཤད་ཟིན་པ་ལས་ཤེས་པར་བྱ་ཞིང༌། འདིར་གང་གི་ཕྱིར་བཞེངས་པའི་དགོས་པ། གང་གིས་བཞེངས་པར་བྱེད་པའི་བཟོ་བོ། གང་བཞེངས་པའི་རྟེན་གྱི་ངོ་བོ། དེ་ལྟར་བཞེངས་པའི་དགེ་བ་བསྔོ་བ་སྟེ་དོན་ཚན་བཞི་ལས། དང་པོ་ནི། སྔོན་སངས་རྒྱས་འོད་སྲུང་གི་བསྟན་པ་ལ་ཐོས་བསམ་གྱིས་ཞུགས་པ་རྣམས་བསྟན་པ་འདི་ལ་ཐོག་མ་ཁོ་ནར་སྨིན་ཅིང་གྲོལ་བའི་ཚུལ་ལུང་སྡེ་བཞི་སོགས་ལས་རྒྱ་ཆེར་འབྱུང་བ་དང༌། བསྟན་པ་འདི་ལ་བྱ་བ་ཅུང་ཟད་བྱས་པ་རྣམས་ཀྱང་མ་འོངས་པ་ན་བྱམས་མགོན་གྱི་གདུལ་བྱར་འགྱུར་བར་སྟོན་པས་མདོ་སྡེ་དུ་མ་ལས་གསུངས་ཤིང༌། བྱམས་མགོན་ཉིད་ཀྱིས་ཀྱང་རང་གི་འདུལ་སྐལ་དུ་གཟིགས་པས་ད་ལྟ་ནས་བདག་གིར་མཛད་པ་ནི་བྱམས་ཆོས་ལྔ་སྐྱེས་སུ་བསྐུར་ཏེ་བདུད་རྩིའི་བགོ་སྐལ་སྔ་མགྱོགས་སུ་སྦྱིན་པར་མཛད་པ་འདི་ཉིད་ཀྱིས་ཤེས་ལ། ཀུན་མཁྱེན་བླ་མ་སྐུ་སྔ་ཕྱི་སོགས་དམ་པ་གོང་མ་རྣམས་ཀྱིས་ཀྱང་བྱམས་མགོན་གྱི་སྐུ་རེ་བཞེངས་ཏེ་རྗེས་འཇུག་རྣམས་དེ་ལ་འབྲེལ་བ་འཇོག་ཏུ་འཇུག་པ་ནི་མཛད་སྲོལ་ངེས་ཅན་ལྟ་
བུར་སྣང་བས། རང་ཉིད་ཀྱིས་ཀྱང་དེ་དག་གི་རྣམ་ཐར་སྨོན་པའི་ཡུལ་དུ་བྱས་ཏེ་བྱ་བའི་འཁོར་ལོ་འདི་ཉིད་ལ་ཞུགས་པ་ཡིན་པས་ཚུལ་དེ་དབྱངས་ཀྱིས་བསྙད་ན། ཐུབ་དབང་རང་གི་བསྟན་ལ་སྨིན་གྲོལ་ལམ། །བགྲོད་པ་མ་རྫོགས་ཞི་བའི་མགྲོན་པ་ཀུན། །ཁྱོད་ཀྱིས་སྐྱོང་ཞེས་མགོན་དང་གདུལ་བྱ་རུ། །ཕན་ཚུན་མཚམས་སྦྱོར་བཀའ་ཆེམས་རིམ་པར་བཞག །འོད་སྲུང་བསྟན་ལ་ཆེས་ཕྲའི་ས་བོན་ཡང༌། །ཉི་མའི་གཉེན་གྱིས་མོད་ལ་སྨིན་པའི་ཚུལ། །སྡེ་བཞིའི་ལུང་གི་དུས་སྟོན་དར་བའི་གཏམ། །ཕྱི་མའི་སྐལ་བཟང་མཚོན་པའི་མཚན་མ་མཆོག །རྒྱལ་བསྟན་འདི་ལ་ད་ལྟ་ཞུགས་སོ་ཅོག །རྒྱལ་ཚབ་ཉིད་ཀྱིས་སླད་ནས་འདྲེན་པའི་བརྡར། །རྒྱལ་ཡུམ་དགོངས་འགྲེལ་མངོན་རྟོགས་རྒྱན་ལ་སོགས། །རྒྱལ་བའི་ཐུགས་བཅུད་ཟབ་དགུ་སྐྱེས་སུ་བསྐུར། །དེ་ལྟའི་ངོ་མཚར་རྣོ་ལྡན་ཀྱོ་བ་ཡིས། །དྲངས་པ་སྤྲོ་བའི་ཡིད་ཀྱི་པདྨོའི་ཁ། །རྒྱལ་བའི་ཉི་མ་གང་གི་རྗེས་ཕྱོགས་ལས། །རྣམ་དཀར་འདུ་བྱེད་སྦྲང་རྩིའི་བཅུད་དུ་འདུས། །ལུང་ཆོས་སྨྲ་བའི་སྒོ་ལ་རྨོངས་པའི་རྒྱ། །ཚུལ་བཞིན་སྒྲུབ་པའི་སྒོ་ལ་གཡེང་བའི་རྒྱ། །བྱ་བ་ལས་ཀྱི་སྒོ་ལ་སེར་སྣའི་རྒྱ། །བཏབ་སྟེ་ཐང་སྟོང་བསྟན་ལ་ཅི་ཞིག་བགྱི། །མཁས་པའི་རྣ་བར་ལེགས་བཤད་བདུད་རྩིའི་རྒྱུན། །ཕལ་བའི་ལག་ཏུ་གཏོང་བའི་ནོར་གྱི་རྒྱུན། །ཀུན་ལ་རྟེན་མཆོག་མིག་གི་བདུད་རྩིའི་རྒྱུན། །ལམ་གསུམ་འབབ་པས་འགྲོ་གསུམ་དྲི་མ་འཁྲུད། །སྤྱི་བོར་བླ་མའི་ཞབས་རྡུལ་ལྷན་སྐྱེས་བཞིན། །མགྲིན་པར་ལེགས་བཤད་རོལ་མོ་ལྷན་སྐྱེས་བཞིན། །སྙིང་ལ་སྐྱོ་བའི་འདུ་ཤེས་ལྷན་སྐྱེས་བཞིན། །སྒོ་གསུམ་རྣམ་དཀར་
བྱ་བ་ལྷན་སྐྱེས་བཞིན། །དཀོན་མཆོག་རྒྱལ་བ་ཀུན་འདུས་ཀུནྡའི་གཉེན། །འཇིགས་མེད་སྣང་བའི་བྱིན་རླབས་བྱིན་པ་ཡིས། །ཡིད་དབང་དད་པའི་རྒྱ་མཚོ་རྒྱ་ཆེ་རུ། །འཕྱུར་བའི་ལེགས་བྱས་རླབས་ཆེན་རླབས་འདི་འཕྲོས། །མཐའ་ཡས་མཆོག་གསུམ་རྟེན་རྣམས་བྱིན་རླབས་ཀྱི། །གཏེར་དུ་མཉམ་ཡང་ཁྱད་འཕགས་རྟེན་འབྲེལ་སྒོ། །དམ་པའི་ལེགས་ཕྱེའི་སྲོལ་བཞིན་བྱང་ཆུབ་ཏུ། །ལུང་སྟོན་བྱམས་པ་མགོན་པོའི་སྐུ་འདི་བསྒྲུབས། །བདོ༡ག་པའི་སྙིང་པོ་སྡིག་མེ༢ད་གཙང་མའི་དངོས། །གཏོང་བའི་རྒྱུ་འབྲས་ངེས་སེ༣མས་སྤྲོ་བ༤་ཡིས། །རྩེ༥་གཅིག་ཡིད་ཀྱིས་བླང་དོར་མ༦་ནོར་བར། །བསྒྲུབས་པ་འདི་ཡང་རྒྱལ་བའི་གཞུང་ལམ་ཡིན། །༈ གཉིས་པ་གང་གིས་བཞེངས་པའི་བཟོ་བོ་ནི། སྔ་སོར་འདི་འདྲའི་རྟེན་བཞེངས་ཤིག་གི་འདུན་པ་ཡོད་ཀྱང་ཉེ་འཁོར་དུ་དེ་ལྟ་བུའི་བཟོ་བོ་མེད་ལ། ཐག་རིང་ཞིག་ཏུ་བཏང་ན་བཀོད་པ་སོགས་བློ་དང་མཐུན་པ་ཞིག་མི་འོང་བས་ཇི་ལྟར་བྱེད་སྙམ་དུ་ཐེ་ཚོམ་གྱི་ངང་ལ་གནས་པའི་ཚེ་བཟོ་བོ་འདི་ཉིད་གློ་བུར་དུ་འོངས་ཏེ་ཐེག་མཆོག་འཁོར་ལོ་བཞི་ལ་བརྟེན་ནས་རེ་བའི་ཤིང་རྟ་ཇི་ལྟར་སྨོན་པའི་ལམ་དུ་བགྲོད་པའི་རྟེན་འབྲེལ་རང་འགྲིག་ཏུ་གྱུར་ཏོ། །དེའང་འདིའི་སྐྱེས་ཡུལ་ནི་ཧོར་རྒྱལ་པོ་རྣམས་ཀྱིས་ཆོས་ཀྱི་རྒྱལ་སྲིད་རིམ་པར་བསྐྱངས་ཤིང༌། འཇམ་མགོན་ས་པཎ་དང་ཀརྨ་པཀྴི་སོགས་དམ་པ་མང་པོས་བྱིན་གྱིས་བརླབས་པའི་གནས་ལང་གྲུའུ་སྡེ་བཞིར་གྲགས་པའི་མཁར་གྱི་ནང་དབུལ་ཕྱུག་བར་མའི་ཁྱིམ་སྐྱིད་དེ་བ་ཞིག་ཡིན་ལ། དེར་བཟའ་ཚང་མི་མཐུན་པ་
སོགས་མི་བདེ་བའི་རྐྱེན་ཅིའང་མེད་ཀྱང་ལོ་བཅུ་དྲུག་བཅུ་བདུན་ནས་བཟུང་ཡུལ་དུ་གཏན་མི་འཁོར་བར་མགར་བསླབས་ཏེ་ཕྱོགས་སྣ་ཚོགས་སུ་འཁྱམས་ཤིང་འགྲོ་བ་དང༌། ཕྱོགས་རེར་ལོ་ཟླ་ཁ་ཤས་རེར་བསྡད་དེ་ཡོན་གྱི་འཕྲོ་སོགས་ལེན་པ་ལྟ་ཅི། རང་གི་ལག་ཆ་སོགས་ཀྱང་བསྐྱུར་ཏེ་འགྲོ་བས་ཕལ་མོ་ཆེ་རླུང་སེངས་ལྟ་བུར་རྩིའང༌། དེ་འདྲ་ཡིན་ན་སླར་དྭངས་ནས་ཕྱིར་འཁོར་དགོས་རྒྱུ་ལ་བློས་གང་བཅད་དེ་ལས་སླར་འགྱུར་ལྡོག་མེད་པས་བསམ་བཞིན་དུ་དེ་ལྟར་བྱས་པ་ཡིན་པར་སྣང༌། ཕྱོགས་འདིར་ཡང་སྔར་གཏན་ནས་འདྲིས་མེད་ཅིང་འདི་ན་རྒྱུས་ཡོད་ཀྱི་མི་བསྙེགས་ནས་འོང་ས་གཅིག་མེད་ཀྱང་འདི་ཕྱོགས་སུ་བསྙེགས་འོངས་པ་དང༌། རང་ལའང་འདི་བཟོ་སོགས་ཇི་ལྟར་ཡིན་ཞིབ་ཆ་རྒྱུས་མེད་བཞིན་དུ་ཕན་ཚུན་བློ་མཐུན་པས་བྱ་བའི་འཁོར་ལོ་རྩོམ་རྒྱུར་སོང་བ་ནི་སྔོན་གྱི་ལེགས་སྨོན་དང་དཀོན་མཆོག་གི་ཐུགས་རྗེས་རྒྱུད་བསྐུལ་བར་མངོན། བཟོ་བོ་ཉིད་ཀྱི་རང་བཞིན་ཡང་འཕྲལ་ལ་གཞན་གྱིས་ཅི་ཟེར་བའི་རྗེས་སུ་མི་རྒྱུག་པར་གྱོང་བོ་ལྟ་བུ། ཡུན་དུ་འགྲོགས་ན་ངང་ཚུལ་བཟང་ཞིང་ཕན་སེམས་ཆེ་བས་འགྲོགས་བདེ་བ། གནས་སྐབས་རྒྱུ་ནོར་ཚོལ་བ་ལྟ་བུར་སྣང་ཡང་འཕྲལ་གྱི་ཟས་གོས་སྒྲིག་རྟེན་ཕྲན་བུ་རེ་བྱུང་ཚེ་དགའ་ཚོར་ཆེ་ཞིང༌། ནོར་ཆེ་བ་རེ་བྱུང་ཚེ་འདི་འདྲ་བཟུང་ནས་གར་འགྲོ་རྒྱུ་ཡིན་ཞེས་དེ་ཙམ་གྱི་འདོད་པ་མེད་པ་དང༌། ནོར་གྱི་རིན་ཐང་སོགས་བློ་ལ་ཤིན་ཏུ་གསལ་ཡང་ཚོང་སོགས་ཀྱི་ཚེ་མ་ཤེས་པ་ལྟར་བྱས་ཏེ་རྒྱལ་ཁ་གཞན་ལ་སྟེར་ཞིང༌། གཞན་སུས་ཀྱང་མ་མཐོང་བར་བྱས་ནས་དབུལ་ཕོངས་ལ་སྦྱིན་པ་གཏོང་བ་སོགས་འདོད་ཆུང་ཆོག་ཤེས་ཀྱི་སྤྱོད་པ་ཡ་མཚན་པ་
དང༌། རིན་པོ་ཆེའི་རིགས་མང་པོ་རྩིས་གདབ་མེད་པར་ལག་ཏུ་བཞག་ཀྱང་སྐྱོན་མེད་པར་མ་ཟད་ཕྲ་ལེགས་པ་རེ་ཉེར་སྤྱད་ལྟ་བུ་ལ་འདེབས་རྒྱུ་བྱིན་ནའང་དེར་གཏོང་མི་བྲ་བར་དཀོན་མཆོག་གི་རྟེན་ལ་འགྲོ་ཐབས་བྱེད། གསེར་གཏོང་ཚུལ་རྒྱ་ནག་གི་ལུགས་འདི་བཞིན་བྱས་ན་འགྲོ་སྒོ་ཆུང་ཞེས་ལ་ལས་བཤད་པར། མཐུག་ན་བཟང་ཞེས་དེའི་ཚིག་ལ་མི་ཉན་ཞིང༌། དབུས་བཟོ་རྣམས་གསེར་བྱུགས་ཏེ་བསྲེག་མ་ཐག་བཙོད་དུ་བཅུག་པས་མདོག་དམར་སང་ངེ་བ་འོང་ཚུལ་བཤད་ཀྱང༌། གསེར་ཅི་ཡིན་རུང་རང་མདོག་དེ་གར་བཞག་ན་བཟང་ཞེས་མི་ཉན་པ་ནི་དེ་རིགས་ལ་འདྲིས་ཆུང་བའི་སྟབས་ཡིན་ནམ་སྙམ་ཡང༌། ཕྱིས་སུ་བརྟག་ཚེ་དཀོན་མཆོག་གི་ཞིང་ལ་རྒྱུ་འགྲོ་གང་ཆེ་དང་གཡོ་སྒྱུ་མ་འདྲེས་པའི་ཀུན་སློང་རྣམ་དག་ཅིག་ཡིན་པར་མངོན་ཏེ། བཟོ་བོ་ཕལ་ཆེར་སྐུའི་ཕྱི་ནང་རྒྱབ་མདུན་ལ་ཁྱད་འབྱེད་ཀྱང༌། འདིས་ནི་མཐོང་མི་མཐོང་གིས་གང་ལའང་ཞིབ་ཆ་བྱེད་ཚུལ་ཚོད་གཅིག་ཁོ་ནར་སྣང་བ་ནི་ལས་འབྲས་ལ་ཡིད་ཆེས་པའི་མཚན་མར་མངོན། བསྙེན་གནས་ཀྱི་སྡོམ་པ་ཞིག་ཕོག་ན་སྙམ་སྟེ་འཕྲོས་བཏང་བར། ཁོ་བོ་རབ་བྱུང་ཞིག་བྱས་ན་སྙམ་ཡང་སྲུང་དཀའ་བར་སྣང༌། བ་ཟ་བླ་མའི་མདུན་ནས་དགེ་བསྙེན་གྱི་སྡོམ་པ་ཞིག་བླངས་ཡོད་ཟེར་ཏེ། སྡོམ་པ་ལེན་རྒྱུར་སྲུང་མཚམས་ཀྱི་མནོ་བསམ་སྔོན་དུ་གཏོང་བ་འདི་ནི་དེང་དུས་ཀྱི་ཕལ་མོ་ཆེ་དང་མི་འདྲ་བའི་བློ་ལྡན་གྱི་གཏམ་དུ་སྣང༌། མདོར་ན་ཤཱ་རིའི་བུས་ཞུས་པ་ལས། བཟོ་བོ་བློ་ལྡན་གཙང་སྦྲ་ཆེ། །བསྟན་བཅོས་ཀུན་ལ་བསླབ་པ་དང༌། །ང་རྒྱལ་ཆུང་ཞིང་སྒྲུབ་ཕོད་ལ། །བརྩོན་ཞིང་དགེ་ལ་སྤྲོ་
བ་དང༌། །ཤེས་རབ་ཆེ་དང་ནན་ཏན་ཆེ། །ལྷག་པར་གསོ་སྦྱོང་བཟུང་བ་དང༌། །བསླབ་པ་ལ་གུས་ཆོས་བརྒྱད་སྤངས། །ཉིན་མཚན་ཀུན་ཏུ་མི་གཡེལ་བར། །དགེ་བ་ལ་ནི་བརྩོན་པ་དང༌། །བྲི་བའི་ལས་མཐའ་རབ་ཏུ་བྱུང༌། །བྲམ་ཟེ་གཙང་མའི་སྤྱོད་པ་བཞིན། །ཁྲུས་དང་གཙང་སྦྲ་དག་ལ་གནས། །འདོད་པ་ཆུང་ཞིང་ཆོག་ཤེས་པ། །ཞེས་སོགས་ཀྱིས་མཚོན་མདོ་རྒྱུད་དུ་མ་ལས་གསུངས་པ་ལྟར། འདོད་ཆུང་ཆོག་ཤེས། དཀོན་མཆོག་ལ་དད་པ། ལས་འབྲས་ལ་ཡིད་ཆེས། སྐྱོ་ངལ་མེད་པའི་བརྩོན་འགྲུས། སྒོ་གསུམ་བག་ཡོད་པའི་ཚུལ་ཁྲིམས། དེས་ཤིང་གཟུ་བོར་གནས་པའི་རང་བཞིན། བླང་དོར་མ་ལོག་པའི་ཤེས་རབ་སོགས་བཟོ་བོའི་མཚན་ཉིད་ཇི་སྙེད་ཅིག་གསུངས་པ་རྣམས་ཚང་ཞིང༌། དེའི་ལྡོག་ཕྱོགས་ཀྱི་སྐྱོན་མཐའ་དག་དང་བྲལ་བ་ཞིག་སྟེ། སྔོན་གྱི་ལོ་རྒྱུས་ལ་ལར་སྤྲུལ་བའི་བཟོ་བོ་ཞེས་གྲགས་པ་རྣམས་ཀྱང་གནས་སྐབས་དེའི་མི་རྣམས་ཀྱི་སྣང་ཚུལ་ལ་འདི་འདྲ་བའི་མི་དཀྱུས་མ་རེ་ཡིན་ཞིང༌། པཎ་ཆེན་དགེ་འདུན་གྲུབ་ཀྱིས་བྱམས་སྐུ་བཞེངས་པའི་ཚེ་བཟོ་བོ་གློ་བུར་དུ་ལྷགས་པའི་ཚུལ་ངོ་མཚར་ཆེ་བར་གླེང་བའང་འདི་བཞིན་ཡིན་པས། རང་གི་ངོས་ནས་བློ་འགེལ་ནུས་ན་དཀོན་མཆོག་གི་ཐུགས་རྗེ་ཉི་འོད་དང་ཆུ་ཟླ་བཞིན་མཆོག་དམན་ཀུན་ལ་མཉམ་པར་འཇུག་པ་གདོན་མི་ཟ་བ་ཞིག་གོ །དེ་ལ་འདི་སྐད་ཅེས་བྱ་སྟེ། མཐུན་དགུ་རྐྱེན་དུ་འཛོམས་པའི་ཡུ༡ལ་ལྗོངས་འདིར། །ཡབ་རྗེ་ད༢མ་པའི་མཛད་སྲོལ་བརྣག་པའི་ཚེ། །རིང་ནས་ལེ༣གས་སྨོན་གྱིས་བཀུག་བཟོ་བོ་ཡིས། །བསྒྲུབས་པ་བསོ༤ད་ནམས་མཐུ་བཞིན་གེགས་མེད་གྲུབ། །ཆོས་ནོར་སྡེ་བཞིའི་དཔལ་
གྱིས་མངོན་མཐོ་བ། །ལང་གྲུའུ་སྡེ་བཞིའི་གྲོང་ཁྱེར་མ་ལ་ཡར། །སྐྱེས་ཀྱང་སྣ་ཚོགས་ཡུལ་གྲུར་ལེགས་བྱས་ཀྱི། །ཁང་བཟང་སྣ་ཚོགས་འདེགས་པའི་ཀ་བར་གྱུར། །སྔར་ནས་འདྲིས་པའི་འབྲེལ་བ་མ་མཆིས་ཀྱང༌། །ལེགས་སྤྱད་མདུན་མར་ལྷན་ཅིག་ཚོགས་པ་ཡི། །ཕོ་ཉར་རང་གི་སྔོན་དགེའི་རྟ་ཞོན་ནས། །མཆོག་གསུམ་ཐུགས་རྗེའི་ཁྱེ་འུ་དཀྱུས་སོ་སྙམ། །གཏད་མེད་ཀུན་ཏུ་འཁྱམས་པ་རི༷་དྭགས་བཞིན། །དམ་བཅའི་མཚམས་ལས་མི་གཡོ་རི༷་བོ་བཞིན། །སུ་དང་མི་བསྟུན་གྱོང་པོའི་ཤིང༷་སྐམ་བཞིན། །འགྲོགས་ན་གཤིས་བཟང་འཇམ་པའི་ཤིང༷་བལ་བཞིན། །སྔོན་རབས་གཏམ་དུ་སྤྲུལ་བའི་བཟོ་བོ་ཞེས། །གྲགས་པའི་གཡེར་ཁ་འཁྲོལ་བ་དེ་དག་ཀྱང༌། །མཁའ་ལས་རྡོལ་མིན་སྤྱོད་དང་རྣམ་པར་བཅས། །དེ་ཚེ་སྣང་བར་འདི་ཀོ་ཙམ་དུ་བས། །བཟོ་བོ་བི་ཤྭ་ཀརྨ་གཉིས་པ་ཞེས། །སྨྲས་ན་ཀུན་གྱིས་ཅོལ་ཆུང་གཏམ་དུ་སེམས། །ལྷ་ཡི་ཞལ་བཟང་ཇོ་ཤཱཀ་གཉིས་པ་རུ། །མངོན་སུམ་ཚད་མས་གྲུབ་ལ་བསྙོན་དུ་ཅི། །སྤྱན་ཟུར་མཆུ་སྒྲོས་བརྫེས་པའི་འཛུམ་ཞལ་ཙམ། །བཟོ་བོ་ཕལ་གྱི་སྤྱོད་ཡུལ་ལགས་ན་ཡང༌། །བཅུ་དྲུག་ལང་ཚོ་གསར་བའི་གཞོན་ནུའི་ཉམས། །འདི་ཉིད་ཁོ་ནའི་སོར་མོའི་འཕྲུལ་ལས་བྱུང༌། །སྨྲ་བ་རྗེས་སུ་བསྟན་པའི་ཆོ་འཕྲུལ་གྱིས། །ཕན་པར་དཀའ་བ་སྙིགས་མའི་དུས་མཐའ་འདིར། །མིག་གི་བདུད་རྩིར་འཕྲུལ་བའི་འཛུམ་དཀར་གྱི། །ག་པུར་ཐིགས་པ་ཀུནྡའི་དཔྱིད་དུ་གྱུར། །ཐུབ་པས་ལེགས་བསྔགས་འདོད་ཆུང་ཆོག་ཤེས་དང༌། །དད་བརྩོན་བློ་གྲོས་ཁྲིམས་ཀྱི་
འདབ་འཕྲེང་ཅན། །བསོད་ནམས་སྦྲང་རྩིའི་འབྱུང་གནས་གསར་བ་ཞིག །ལེགས་བྱས་དོ་ར་མཛེས་པའི་རྒྱན་དུ་འཁྲུངས། །༈ གསུམ་པ་གང་བཞེངས་པའི་རྟེན་གྱི་ངོ་བོ་ལ་ཕྱིའི་སྐུ་དང་ནང་གི་གཟུངས་གཞུག་གཉིས་ལས། དང་པོ་ནི། ཐོག་མར་རང་གི་ལུས་ཚད་ཅིག་བཞེངས་རྒྱུའི་འཕེན་པ་བྱས་ཏེ་ལྷ་བཟོ་སྐལ་བཟང་ལ་བྲིར་བཅུག་པ་གཞལ་ཚུལ་གྱིས་རིམ་པས་ཇེ་ཆེར་སོང་སྟེ་རྒྱུག་མཐོ་བཅུ་བཞི་ལྷག་ཙམ་དུ་གྱུར་པས་དགེ་ཚོགས་གོང་འཕེལ་གྱི་རྟེན་འབྲེལ་མངོན་པར་འགྲིགས། མ་ཕྱིའང་འདུ་ཁང་ཕུར་བཞུགས་པའི་ཇོ་བོའི་སྐུ་འདི་ནི་སྔོན་གཞུང་གི་སྲིད་སྐྱོང་མི་དབང་བསོད་ནམས་སྟོབས་རྒྱས་ཀྱིས་བྱས་ཏེ་བོད་ཀྱི་བཟོ་གྲྭ་མ་ཉམས་པར་ཡོད་པའི་དུས་ལྷ་སའི་ཇོ་བོ་རིན་པོ་ཆེར་དཔེ་བླངས་ཏེ་གཟབ་ནས་བཞེངས་པ་ཡིན་པས་སྔོན་ཆད་ཕྱོགས་འདིར་བཟོ་ལེགས་པའི་ཚད་བཞག་ལྟ་བུ་ཡིན་སྟབས་དེ་དང་ཧོར་རྒྱལ་པོའི་དུས་ཀྱི་སྐུ་བརྙན་བྱོན་ལེགས་འགའ་ཞིག་ལ་དཔེ་བྱས་པ་ཡིན་ནའང༌། རྗེས་སོར་གྲུབ་པའི་ཚེ་དེ་དག་ལས་ཉམས་ཆེས་ཁྱད་པར་དུ་གྱུར་པ་ཇོ་ཤཱཀ་རྣམ་གཉིས་ཀྱི་སྐུ་ཉམས་ལ་འགྲན་བཟོད་པ་དང༌། ལྷག་པར་ཞལ་གྱི་གཞོན་ཉམས་སོགས་ཇོ་བོ་མི་བསྐྱོད་རྡོ་རྗེ་ཇི་ལྟ་བ་ཞིག་བྱུང༌། འགའ་ཞིག་ཕྱག་ཚད་ཀྱི་གཞུང་བཤད་ལ་མཁས་ཀྱང་ལག་ཏུ་བླང་བའི་ཚེ་ཇི་བཞིན་མི་འོང་བ་མང་ལ། འདིར་གཞུང་ཚིག་གཤར་རྒྱུ་མི་འདུག་ཀྱང་ཆ་མཐའ་དག་ཞིབ་ཏུ་གཞལ་བའི་ཚེ་གཞུང་དོན་དང་ཅུང་ཟད་ཀྱང་མི་འགལ་བས། ཇི་ཙམ་བརྟགས་ཀྱང་ཆ་མ་སྙོམས་པ་ལྟ་བུའི་སྐྱོན་གདགས་རྒྱུ་མེད་པར་མ་ཟད། གཞན་དང་བསྡུར་ཏེ་ཡུན་དུ་བལྟས་ཀྱིན་སྐུའི་སྟོད་སྨད། ཡན་ལག་དང་ཉིང་ལག་ཐམས་ཅད་སྐབས་ཕྱེད་ལ་ཤིན་ཏུ་འཇམ་ཞིང་གཞོན་
ཤ་ཆགས་པ། མཛེས་ཁྱད་སྔར་ལས་ལྷག་པ་རེ་བསྣན་གྱིན་ཤར་འོང་བ་ལྟ་བུས་ཡུན་རིང་པོར་འདྲིས་ཀྱང་ནམ་བལྟས་པའི་ཚེ་གསར་མཐོང་གི་དུས་དང་འདྲ་བར་ཡིད་དང་མིག་འཕྲོག་པས་ལྟ་བས་ཆོག་མི་ཤེས་པ་སྟེ། བསྟོད་པ་བརྒྱ་ལྔ་བཅུ་པ་ལས། ཁྱོད་ཀྱི་སྐུ་དེ་གང་གིས་ནི། །ལན་བརྒྱར་མཐོང་དང་གང་ཞིག་གིས། །དང་པོར་མཐོང་བ་དེ་གཉི་ག །འདྲ་བར་མིག་ནི་མགུ་བར་མཛད། །ཅེས་པ་ལྟར་རོ། །དེར་མ་ཟད་མདོ་སྡེ་རྣམས་ལས་དབུ་གདུགས་ལྟར་ཟླུམ་པ། དཔྲལ་བའི་དབྱིབས་ཟླ་བ་ལྟར་རྒྱས་པ། སྤྱན་ཨུཏྤ་ལའི་འདབ་མ་འདྲ་བ། འགྲམ་པ་ཟླུམ་ཞིང་རྒྱས་པ། མགྲིན་པ་དུང་འདྲ་བ། རོ་སྟོད་སེང་གེ་ལྟ་བུ། སྐེད་སྐབས་ལྡེམ་ཞིང་འཁྲིལ་བ། སྐུའི་ཁོ་ལག་ཡངས་པ་སོགས་མཚན་དཔེའི་ཁྱད་པར་གསུངས་པ་རྣམས་ཀྱང་རྒྱུན་པར་འོལ་སྤྱི་ཙམ་ལས་མི་འཆར་ཡང༌། འདིར་སྐུའི་སྟེང་དུ་བལྟས་པ་ན་གཞུང་ནས་བཤད་པ་དེ་འདི་ག་རང་དུ་འདུག་སྙམ་ནས་ཉམས་འཆར་ཚུལ་སྔར་དང་མི་འདྲ་བར་བློ་ངོར་ཁྲིག་གེ་ངོ་འཕྲོད་པ་ཞིག་འོང་བར་སྣང༌། ཁྱད་པར་དུ་ཕྱག་གཡས་པ་སྤྱི་བོར་བཞག་སྟེ་ལུང་སྟོན་པའི་རྣམ་པ་མཛད་པ་དེའི་སྟེང་དུ་སྐུའི་ཆ་ཐམས་ཅད་བསྒྲིམས་ཤིང་ཕྱོགས་ཏེ་དགོངས་པ་གཏད་ནས་བཞུགས་ཡོད་པའི་ཉམས་ཤིག་མཁས་བླུན་ཐམས་ཅད་ལ་མཐོང་ཙམ་ཉིད་ནས་འཆར་རྒྱུ་ཡོད་ཀྱང༌། དེ་བཟོ་ཚུལ་འདིའི་སྟོབས་ཀྱིས་ཡིན་པར་འདུག་ཅེས་སྨྲ་རྒྱུ་དང༌། རྩོལ་བས་བྱས་པའི་ཉམས་ཤིག་མེད་པར་རང་བྱོན་ཤུགས་འབྱུང་གི་ཉམས་ཤིག་ཏུ་སྣང་བ་ནི་ངེས་པར་ཐུགས་རྗེའི་སྤྱན་གྱིས་གཟིགས་པའི་མཚན་མ་དང༌། མ་འོངས་པ་ན་བྱང་ཆུབ་ཏུ་ལུང་སྟོན་པའི་རྟེན་འབྲེལ་གྱི་སྒོ་
འགྲིགས་པ་ཡིན་ནམ་སྙམ་དུ་དགའ་བ་ལྷག་པར་འཕེལ་ལོ། །ཕྲ་རྒྱན་ཡང་དབུ་རྒྱན་དབུས་མའི་དཀྱིལ་དུ་མརྒད་ཕུག་རོན་གྱི་སྒོ་ང་ཙམ་ཞིག་དང་པདྨ་རཱ་ག་མཐེབ་མགོ་ཙམ་གཅིག །རྩེ་མོར་མརྒད་མཐེ་བོང་ཙམ་གཅིག །དབུ་རྒྱན་བར་མ་གཉིས་ཀྱི་རྩེར་སུ་གནྡ་མཛུབ་རྩེ་ཙམ་རེ། མགུལ་རྒྱན་གྱི་གཤམ་དུ་པད་རག་མཛུབ་རྩེ་ཙམ་གཅིག །མརྒད་དང་སུ་གནྡ་སྲན་ཆེན་ཙམ་རེ། གཞན་ཡང་གཡུ་བྱུ་རུ་མུ་ཏིག་མུ་མེན་སྤོས་ཤེལ་སོགས་ཆེ་ཆུང་སྣ་ཚོགས་པ་དང༌། སྟོད་སྨད་རྒྱབ་མདུན་གྱི་འཕྲེང་བ་གང་དགོས་ལ་བྱུ་རུ་དང་གཡུའི་འཕྲེང་བ་སྤུས་ལེགས་གྲངས་མཚུངས་ཀྱི་འགྲམ་དུ་གསེར་གྱི་འབུར་སྒྲིལ་ཡོད་པ། ཕྲ་རྒྱན་ཧ་ཅང་སྤུངས་ཆེ་བས་རྫོབ་པོར་མ་སོང་ཞིང༌། ཉུང་བས་ཐོར་བུའང་མ་ཡིན་ལ། གཡས་གཡོན་སོགས་ཆ་མཚུངས་པས་མཛེས་པ་སྐྱེད་པ་སོགས་མདོར་ན་ཕྲ་རྒྱན་གོས་འཁྱུད་མདངས་སོགས་གང་ཐད་ནས་ཕུན་སུམ་ཚོགས་ཀྱང༌། གཙོ་བོར་གྱུར་པ་ནི་སྤྱན་སྔ་བློ་གྲོས་རྒྱལ་མཚན་གྱིས། མཁས་པ་ཚུགས་དང་ཚད་ལ་བརྟག །ཆགས་ཅན་རྒྱན་དང་ན་བཟའ་ལྟ། །བླུན་པོ་ཚོན་དང་མདངས་ལ་བརྟག །གསུངས་པ་བཞིན་མཁས་པའི་སྐྱེ་བོ་བློ་དང་ལྡན་པ་རྣམས་ཀྱིས་སྐུའི་ཆ་ཚད་དང་ཤ་ཚུགས་ལ་གཙོ་བོར་བྱེད་དགོས་སོ། །ད་ལྟ་དུས་དབང་གིས་བཟོ་བོ་རྣམས་ཀྱང་ཡོན་ལེན་པའི་ཐབས་ཙམ་ལས་ལག་ལེན་ཆད་ཚག་སློབ་པ་དཀོན་པར་སྣང་ནའང༌། མ་མཐའ་མིག་གིས་མངོན་སུམ་དུ་མཐོང་བ་འདི་ལྟ་བུ་རེ་ལ་དཔེ་བགྱིས་ཏེ་འབད་ན་རང་ལ་སྐྱེད་ཐོན་ཅིང་སྐལ་ལྡན་དང་བ་འདྲེན་པ་སོགས་དོན་གཉིས་ཕུན་སུམ་ཚོགས་པའི་དམིགས་རྐྱེན་དུ་འགྱུར་རོ། །དེའང་འདི་ལྟར། གྲངས་མེད་ཚོགས་གཉིས་རི་མོ་ཡོངས་
སྨིན་པ། །མི་ཕམ་རྒྱལ་བའི་སྐུ་ལས་རང་འདྲ་ཞིག །སྐལ་ལྡན་ཞིང་ལ་མངོན་མཐོ་ངེས་ལེགས་ཀྱི། །ཀོ་ཊ་བ་དང་སཱ་ལུ་གདབ་པས་བྲེལ། །མུ་མཐའ་ཡས་པའི་འགྲོ་ལ་བརྩེ་བའི་སྦྱིན། །མི་མངོན་ཆོས་ཀྱི་དབྱིངས་ནས་གཟིགས་པའི་མདངས། །མེ་ལོང་དག་པར་གཟུགས་བཞིན་གསལ་བ་ཡིས། །མོས་གུས་རྩོལ་མེད་འདྲེན་འདི་ཨ་ཧོ་རྨད། །ཡུན་དུ་བལྟས་ཀྱིན་མཚན་དཔེའི་ཉམས་རྫོགས་ཤིང༌། །ཡང་ཡང་བརྟགས་ཀྱིན་ཆ་ཚད་འཁྲུལ་པ་མེད། །གཞན་དང་བསྡུར་གྱིན་ཆ་ཀུན་སྙོམས་ཤིང་མཛེས། །ཚུལ་འདི་བསམས་ཀྱིན་དགའ་དང་སྤྲོ་བ་སྐྱེས། །མཚན་དཔེའི་རང་བཞིན་རྐང་པ་དྲུག་པའི་གླུ། །མཁའ་ལ་དྲི་ཟའི་འཇིག་རྟེན་རྫོགས་པ་ཡང༌། །རྒྱལ་སྐུའི་སྣང་བརྙན་པདྨའི་དགའ་ཚལ་དུ། །བབས་པས་ངེས་ཤེས་དོན་གྱི་ཟིལ་མངར་མྱོང༌། །མརྒད་པདྨ་རཱ་ག་སུ་གནྡཿ ། །མུ་ཏིག་གཡུ་བྱུར་སྤོས་ཤེལ་མུ་མེན་ཤེལ། །རིན་ཆེན་ཕྲ་ཚོམ་སྣ་ཚོགས་མེ་ཏོག་གི །འཕྲེང་བ་མཛེས་ལྡན་གསེར་བཟང་ལྗོན་པ་བཞིན། །ཐོག་མ་ཉིད་དང་རིང་དུ་འདྲིས་པའི་མིག །མཚུངས་པར་འཕྲོག་པ་བསོད་ནམས་ཚོགས་ཀྱི་སྐུ། །སྙིགས་མའི་མཐར་ཡང་མངོན་སུམ་གྱུར་པ་ནི། །རྒྱལ་བའི་ཐུགས་རྗེ་གཟུགས་ཅན་ཉིད་དུ་ངེས། །བརྩེ་བའི་དགོངས་པ་ཀུན་ཏུ་གཏད་པ་ཡི། །ཉམས་འགྱུར་འཛུམ་དཀར་འོད་ཀྱིས་གསལ་བ་འདིས། །བྱང་ཆུབ་སྙིང་པོ་མཆོག་ཏུ་ལུང་སྟོན་པའི། །རྟེན་འབྲེལ་ཐོག་མའི་སྒོ་འཕར་ཕྱེས་སོ་སྙམ། །དེང་དུས་དུས་འཁོར་སྡོམ་འབྱུང་ལ་སོགས་ཀྱི། །ཕྱག་ཚད་ཚད་ལྡན་མཁས་ལས་མ་བསླབ་ཅིང༌། །བྲིས་འབུར་མན་ངག་ངག་རྒྱུན་མ་ཐོས་པར། །རྨོངས་པའི་
རང་བཟོ་བཟོ་བོའི་ཆེ་བར་རློམ། །ཨ་ཧོ་བཟོ་རིག་ལས་ལ་གཞོལ་བ་རྣམས། །བློ་གྲོས་མིག་གིས་གཞུང་དོན་བལྟ་བའམ། །ཐ་ན་ཆུ་བུར་མིག་གིས་འདི་འདྲ་ལ། །བལྟས་ཏེ་དལ་བ་དོན་དང་ལྡན་པར་གྱིས། །ནང་རྟེན་རྣམ་པ་བཞི་ལས། ཆོས་སྐུའི་རིང་བསྲེལ་གཟུངས་གཞུག་རྒྱས་བསྡུས་ཚར་བཅུ། བདེ་གསང་འཇིགས་གསུམ་གྱི་རྒྱུད་ཚར་གཉིས་རེ། མཚན་བརྗོད་ཚར་གསུམ། རྡོར་གཅོད་ཚར་ལྔ། ཚེ་མདོ་ཚར་བཞི། སྡུད་པ་ཚར་གཅིག །བྱམས་ཆོས་ལྔ་ཚར་གཉིས་དང༌། ཡང་རྒྱན་ཚར་གཉིས། སྨན་ཆོག་རྒྱས་པ་ཚར་གཉིས། བསྡུས་པ་ཚར་གཅིག །འཇུག་པ་ཚར་གཅིག །བྱམས་སྨོན་ཚར་བདུན། སྨོན་ལམ་ལྔ་ཚར་གཉིས། ཤེར་སྙིང་ཚར་གསུམ། གདུགས་དཀར་ཚར་གཅིག །དགའ་ལྡན་ལྷ་བརྒྱ་མ་ཚར་ལྔ། བྱམས་པས་དམ་བཅས་གཟུངས་ལྔ་ཁྲི་སུམ་སྟོང་བརྒྱད་བརྒྱ། མི་འཁྲུགས་པའི་གཟུགས་དང་ཚུལ་ཁྲིམས་རྣམ་དག་གི་གཟུངས་སྒྲིལ་བཅུ་གཅིག་རེ། སྨན་བླའི་གཟུངས་སྒྲིལ་གསུམ། ཚེ་གཟུངས་སྒྲིལ་བཞི། ཨ་ར་པ་ཙ་སྟོང༌། མ་ཎི་སུམ་ཁྲི་ལྔ་སྟོང༌། དམིགས་བརྩེ་མ་ཉིས་སྟོང༌། གངས་ཅན་མཁས་གྲུབ་མ་སུམ་བརྒྱ། སྒྲོལ་དཀར་སྙིང་པོ་ཉིས་སྟོང་དྲུག་བརྒྱ། རྣམ་རྒྱལ་གཟུངས་རིང་བརྒྱད་བརྒྱ། ཀུན་རིག་རྩ་སྔགས་སྒྲིལ་གཉིས། ཡིག་བརྒྱ་དགུ་བརྒྱ། སྐུ་བལ་དང་སྐུ་གདུང་གི་རིང་བསྲེལ་ཡང་སྨྲྀ་ཏིའི་ཕྱག་ཚྭ་ཐུབ་པའི་སྐུ་གཅིག། །རྗེའི་ཕྱག་ཚྭའི་འོད་དཔག་མེད་དང་འཇིགས་བྱེད། རྒྱལ་བ་འཇམ་དཔལ་རྒྱ་མཚོའི་ཕུར་ཚྭ། བྱམས་སྐུ་སྟོང་དང་བདུན་བརྒྱ། འཇམ་དབྱངས་ཀྱི་སྐུ་བཞི་བརྒྱ་ལྔ་བཅུ། སངས་རྒྱས་བྱང་སེམས་ཀྱི་སྐུ་སྣ་ཚོགས་སུམ་བརྒྱ་ཅན་ཚར་གཉིས། མི་ལའི་སྐུ་སུམ་བརྒྱ།
རྗེའི་སྐུ་ལྔ་བརྒྱ། སྒྲོལ་དཀར་གྱི་སྐུ་བཞི་བརྒྱ་བདུན་ཅུ། ཛམ་དཀར་གྱི་སྐུ་སྟོང་དང་བདུན་བརྒྱ། སྟོན་པའི་འཕེལ་གདུང༌། ཆོས་འཕགས་ཀྱི་ཚེམས་ཀྱི་དུམ་བུ། སངས་རྒྱས་གླང་པོའི་གདུང་གི་ཚེམས་ཀྱི་ཆ་ཤས། ལྷ་སའི་ནང་རྟེན་སངས་རྒྱས་མཐའ་སྐུ་མེ་ལོང་མའི་ཆ་ཤས། ནག་པོ་སྤྱོད་པའི་རུས་རྒྱན། ཏཻ་ལོ་པའི་བཞུགས་གདན་ཁྲི་སྙན་ས་ལའི་པགས་པ། མ་ཅིག་གྲུབ་པའི་རྒྱལ་མོའི་ཚེམས་ལས་གྲུབ་པའི་རིལ་བུ། ཕ་དམ་པའི་སྒོམ་ཐག །པཎ་ཆེན་ཤཱཀྱ་ཤྲིའི་སྐུ་ཆོས། སྲོང་བཙན་སྒམ་པོའི་ན་བཟའ་དང་ཞབས་ཆག་གི་དུམ་བུ། བལ་པོ་ཨ་སུའི་རྡོ་རྒྱུས་ཀྱི་སྒོམ་ཐག །རྭ་ལོའི་དབུ་ལོ་དང་སྣམ་སྦྱར་སོགས་རིས་མེད་ཀྱི་རྟེན་སྣ་ཚོགས། ཇོ་བོ་རྗེའི་སྣམ་སྦྱར་གྱི་ཚལ་བུ། འབྲོམ་སྟོན་པའི་དབུ་ལོ། པུ་ཏོ་པའི་དབུ་ནབ། ཤ་ར་བའི་སྐུ་མཚལ། འཆད་ཀ་པའི་ཞབས་ཆག། །མཚོ་སྣ་པའི་སྣམ་སྦྱར། སངས་རྒྱས་སྒོམ་པའི་སྐུ་ཆོས། རྒྱ་མ་སངས་རྒྱས་དབོན་གྱི་སྣམ་སྦྱར། མཆིམས་ནམ་མཁའ་གྲགས་ཀྱི་སྐུ་ཆོས། གཉོས་རྒྱལ་བ་ལྷ་ནང་པའི་དབུ་ལོ། ལྷོ་བྲག་གྲུབ་ཆེན་གྱི་དབུ་ཞྭ་སོགས་བཀའ་གདམས་གོང་མའི་སྐོར། ས་པཎ་གྱི་ཞུན་ཐིགས། རྗེ་བཙུན་གྲགས་པ་རྒྱལ་མཚན་གྱི་སྐུ་བེར། བླ་མ་དམ་པ་བསོད་ནམས་རྒྱལ་མཚན་གྱི་སྐུ་ཆོས། བོ་དོང་ཕྱོགས་ལས་རྣམ་རྒྱལ་གྱི་སྣམ་སྦྱར། ཚར་ཆེན་གྱི་དབུ་ལོ། བདག་ཆེན་ཀུན་དགའ་བློ་གྲོས་ཀྱི་ན་བཟའ་སོགས་ས་སྐྱའི་རྟེན། མར་པའི་སྐུ་བེར་སེང་གེ་འགྱིང་གནོན། སྲས་དར་མ་མདོ་སྡེའི་ན་བཟའ། མི་ལའི་སྒོམ་ཐག །དྭགས་པོ་ལྷ་རྗེའི་ན་བཟའ། ཕག་མོ་གྲུབ་པའི་སྐུ་ཆོས། ཀརྨ་པཀྴིའི་ན་བཟའ།
འབྲི་གུང་སྐྱོབ་པ་རིན་པོ་ཆེའི་ན་བཟའ། ཐང་སྟོང་རྒྱལ་པོའི་སྒོམ་ཐག །རྒྱལ་བ་གཡའ་བཟང་བའི་ན་བཟའ། འབྲུག་པ་པད་དཀར་གྱི་རྟ་ཕྱིང་། འབྲུག་པ་ཀུན་ལེགས་ཀྱི་དོམ་གཤམ། སྤྱན་སྔ་ལྷ་གཟིགས་པའི་ན་བཟའ། གྲུབ་ཆེན་ཡེ་ཤེས་བཟང་པོའི་སྐུ་ཆོས། རྣལ་འབྱོར་བྱང་སེམས་ཀྱི་སྣམ་སྦྱར་སོགས་བཀའ་རྒྱུད་པའི་སྐོར། འཇམ་མགོན་ཙོང་ཁ་པ་ཆེན་པོའི་དབུ་ཞྭ། སྣམ་སྦྱར། ཕྱག་འཕྲེང་རྡོག་གཅིག །རྒྱལ་ཚབ་རྗེའི་ཚོམ་འབྲས། འདུལ་འཛིན་གྲགས་པ་རྒྱལ་མཚན་གྱི་གདུང་རས། ན་བཟའ། མཁས་གྲུབ་རིན་པོ་ཆེའི་བཞུགས་གདན། རྟོགས་ལྡན་འཇམ་དཔལ་རྒྱ་མཚོའི་སྣམ་སྦྱར། གནས་བརྟན་བཟང་སྐྱོང་བའི་སྣམ་སྦྱར། བྱམས་ཆེན་ཆོས་རྗེའི་གསེར་ཐེབ་ཀྱི་ལུང་དུ། བ་སོ་ཆོས་ཀྱི་རྒྱལ་མཚན་གྱི་དབུ་ལོ། གནས་རྙིང་ཀུན་དགའ་བདེ་ལེགས་ཀྱི་གདིང་བ། སྤྱན་སྔ་བློ་གྲོས་རྒྱལ་མཚན་གྱི་སྐུ་ཆོས། རྗེ་དགེ་འདུན་གྲུབ་ཀྱི་གདུང་རུས། མཁས་གྲུབ་ནོར་བཟང་པའི་སྣམ་སྦྱར། འཇམ་དབྱངས་དགའ་བློའི་སྣམ་སྦྱར། རྒྱལ་བ་དགེ་འདུན་རྒྱ་མཚོའི་ན་བཟའ། པཎ་ཆེན་བསོད་གྲགས་ཀྱི་ན་བཟའ། རྒྱལ་བ་བསོད་ནམས་རྒྱ་མཚོའི་དབུ་ལོ། རྒྱལ་བ་དབེན་ས་བའི་དབུ་ཞྭ། མཁས་གྲུབ་སངས་རྒྱས་ཡེ་ཤེས་ཀྱི་དབུ་ལོ། པཎ་ཆེན་བློ་བཟང་ཆོས་རྒྱན་གྱི་དབུ་ལོ། རྒྱལ་བ་ཡོན་ཏན་རྒྱ་མཚོའི་ན་བཟའ། འཁོན་སྟོན་གྱི་དབུ་ཞྭ། སྐུ་ལྔ་པའི་དབུ་ལོ། ཐང་ཤམ། སྐུ་རགས། རྡོ་རྗེ་འཛིན་པ་དཀོན་མཆོག་རྒྱལ་མཚན་གྱི་དབུ་ལོ། པཎ་ཆེན་བློ་བཟང་ཡེ་ཤེས་ཀྱི་དབུ་ལོ། གཙང་ཆབ་རིལ་བུ། པད་དཀར་འཛིན་པའི་སྐུ་མཚལ། ལྗགས་ཀྱི་ཆ་ཤས། རྒྱལ་བ་ཚངས་
དབྱངས་པའི་དབུ་ལོ། རྒྱལ་བ་བསྐལ་བཟང་རྒྱ་མཚོའི་དབུ་ལོ། སྐུ་ཆོས། རྒྱལ་བ་འཇམ་དཔལ་རྒྱ་མཚོའི་དབུ་ལོ། རྗེ་འཇམ་དབྱངས་བཞད་པའི་དབུ་ལོ། ཤངས་ཕྱིས། སྤྲུལ་སྐུ་བསོད་ནམས་ཡེ་ཤེས་དབང་པོའི་དབུ་ཞྭའི་ནང་ཤ། །གེ་ར་དཀའ་བཞི་སངས་རྒྱས་དབང་ཕྱུག་གི་སྐུ་ཆོས། རོང་པོ་ཆོས་པ་རིན་པོ་ཆེའི་སྐུ་ཆོས། ཁྲི་ཆེན་ངག་དབང་མཆོག་ལྡན་གྱི་གདུང་རུས། དབུ་ལོ། རྗེ་དགེ་ལེགས་རྒྱ་མཚོའི་དབུ་ཞྭ། འཕགས་པ་ལྷ་འཇིགས་མེད་དཔལ་ལྡན་བསྟན་པའི་མགོན་པོའི་དབུ་ལོ། འཕགས་པ་སངས་རྒྱས་ཀྱི་སྣམ་སྦྱར། འཕགས་པ་ལྷ་རྒྱལ་བ་རྒྱ་མཚོའི་སྐུ་ཆོས། འཕགས་པ་ལྷ་ཆོས་ཀྱི་རྒྱལ་པོའི་དབུ་ཞྭ། འཕགས་པ་ལྷ་འཇིགས་མེད་བསྟན་པའི་རྒྱ་མཚོའི་དབུ་ལོ། འཕགས་པ་ལྷ་མཐོང་བ་དོན་ལྡན་གྱི་ན་བཟའ། བ་སོ་སྤྲུལ་སྐུ་ངག་དབང་དཀོན་མཆོག་ཉི་མའི་ཌཾ་རྫར། བ་སོ་སྤྲུལ་སྐུ་ངག་དབང་ཆོས་ཀྱི་དབང་ཕྱུག་གི་སྐུ་འགག །བ་སོ་སྤྲུལ་སྐུ་བློ་བཟང་དཔལ་ལྡན་རྒྱལ་མཚན་གྱི་དབུ་ལོ། རྒྱལ་སྲས་སྤྲུལ་སྐུ་བློ་བཟང་དཔལ་ལྡན་འཇམ་དཔལ་རྒྱ་མཚོའི་ན་བཟའ། རྒྱལ་སྲས་ཡེ་ཤེས་གྲགས་པའི་ན་བཟའ། རྒྱལ་སྲས་སྐལ་བཟང་ཐུབ་བསྟན་འཇིགས་མེད་རྒྱ་མཚོའི་དབུ་ལོ། སྐུ་མཚལ། བྲག་གཡབ་སྤྲུལ་སྐུ་བློ་བཟང་རྣམ་རྒྱལ་གྱི་སྣམ་སྦྱར། ཡོངས་འཛིན་ཡེ་ཤེས་རྒྱལ་མཚན་དཔལ་བཟང་པོའི་ན་བཟའ། ཀུན་མཁྱེན་འཇིགས་མེད་དབང་པོའི་ཚེམས། དབུ་ལོ། ཞབས་སེན། ཀློང་རྡོལ་གྲུབ་དབང་རིན་པོ་ཆེའི་གདུང་རས། སྟག་ཕུ་བློ་བཟང་བསྟན་པའི་རྒྱལ་མཚན་གྱི་དབུ་ལོ། སྟག་ཕུ་བློ་བཟང་ཆོས་ཀྱི་
དབང་ཕྱུག་གི་དབུ་ལོ། ཐུའུ་བཀྭན་རིན་པོ་ཆེ་བློ་བཟང་ཆོས་ཀྱི་ཉི་མའི་གདུང་རུས། ཞིང་བཟང་འཕགས་པ་དགེ་ལེགས་རྒྱལ་མཚན་གྱི་དབུ་ལོ། ལྕགས་རྭ་སྤྲུལ་སྐུ་ངག་དབང་འཕྲིན་ལས་དཔལ་བཟང་གི་དབུ་ལོ། མཆོག་སྤྲུལ་རིན་པོ་ཆེ་བློ་བཟང་ཐུབ་བསྟན་འཇིགས་མེད་རྒྱ་མཚོའི་ན་བཟའ་སོགས་རི་བོ་དགེ་ལྡན་པའི་བསྟན་འཛིན་དམ་པ་མདོ་དབུས་ཁམས་སུ་བྱོན་པ་ཕལ་མོ་ཆེའི་བྱིན་རྟེན་སྣ་རེ་ཚང་བར་བཞུགས་སོ། །གཞན་ཡང་བྲི་སྒྲུབ་ཚུལ་བཞིན་བྱས་པའི་དོན་ཀུན་གྲུབ་པའི་འཁོར་ལོ་རིལ་བུ་དང་བཅས་པ། ཚོགས་བདག་དང་གནོད་སྦྱིན་འཁོར་ལོ་ཚར་གསུམ་རེ། བྱང་ཆུབ་ཤིང་གི་དུམ་བུ། རི་བོ་གྲུ་འཛིན་གྱི་ལྕགས་ཤིང་གི་ལོ་མ། བསིལ་བ་ཚལ་གྱི་རྡོ་ནག །སྐུ་འབུམ་ཙནྡན་ཡི་གེ་ཅན། དགའ་ལྡན་ཆོས་རྒྱལ་གྱི་ན་བཟའ། རི་བོ་རྩེ་ལྔའི་རྡོའི་རིལ་བུ་དང་རི་ལྔའི་རྡོ། ཀུན་བཟང༌། སྟག་མོ་ལུས་སྦྱིན་གྱི་ས། ཆུ་བོ་གངྒཱའི་བྱེ་མ། གངས་ཏེ་སེའི་བྱེ་མ། ཙ་རིའི་གནས་རྡོ། ལོ་ཀྱཱ་ཏུན་དང་ཨ་ར་པ་ཙའི་སྒྲུབ་ཕུག་ཀྱི་ས། གོ་མ་སཱ་ལ་གནྔྷ་དང་བྱ་རུང་ཁ་ཤོར་གྱི་སྐུ་དཀར། བྲག་དཀར་དབུ་མ་རྟ་སོ། གངས་པུ་ལེ་སོགས་མི་ལའི་སྒྲུབ་གནས་ཕལ་ཆེར་གྱིས་མཚོན་རྒྱ་བོད་ཀྱི་གནས་ཆེན་ཕལ་མོ་ཆེའི་ས་སྣ། ཆོས་རྗེ་དོན་གྲུབ་རིན་པོ་ཆེའི་གདུང་གི་བདུད་རྩི་རིལ་བུ། གཙང་དབུས་ཀྱི་རྟེན་བསྡུས། སྐྱེ་བདུན། མ་ཎི། བདུད་རྩི་རིལ་བུ་སོགས་རྟེན་སྣ་ཐོར་བུའང་བསམ་གྱིས་མི་ཁྱབ་པར་བཞུགས་སོ། །གོང་སྨོས་ན་བཟའ་སོགས་བུག་ཚང་མིན་ཡང་ཆ་ཤས་འཁྲུལ་བྲལ་ཁོ་ན་ཡིན་ཏེ། དེའང་རྟ་ཚག་རྗེ་དྲུང་རིན་པོ་ཆེ་དང་སྒོ་མང་ཆོས་གྲྭ་ལྷན་དུ་འགྲིམ་སྐབས་ཐུགས་ཡིད་གཅིག་
འདྲེས་ལྟ་བུར་ཡོད་པས། རྗེས་སོར་ཁོང་ནས་གཞུང་གི་ཆོས་སྲིད་ཡོངས་ཀྱི་བདག་པོ་མཛད་ཚེ་ཞུས་པ་བཞིན་ཕྱག་ཏུ་གང་ཡོད་ཀྱི་རྟེན་སྣ་ཆ་ཚང་བར་གནང་བས་གཞི་བྱས། གྲོ་ཚང་དང་མཛོ་མོ་མཁར། ཐུའུ་བཀྭན་བླ་བྲང་སོགས་ཀྱི་ནང་རྟེན་དང༌། ཁྲི་པ་བྱམས་པ་རྒྱ་མཚོའི་ནང་རྟེན་རྣམས་རྐང་ཚའི་སྣང་ལུག་ཏུ་ཡོད་པ་དང༌། ཁྲི་ཆེན་དགེ་འདུན་ཕུན་ཚོགས་ཀྱིས་རྗེའི་གསེར་གདུང་བཞེངས་དུས་ནས་ཡོད་པའི་རྟེན་རྙིང་སོགས་ཀུན་བསྡོམས་པ་ལས་འཕགས་བོད་ཀྱི་བྱིན་རྟེན་འཛོམས་ཆེ་བ་འདི་བཞིན་བྱུང་བ་ཡིན་པས་ཡིད་ཆེས་ཀྱི་གནས་སུ་བཟུང་སྟེ་ཕྱག་མཆོད་གསོལ་བ་འདེབས་པ་སོགས་ཀྱི་སྒོ་ནས་མངོན་མཐོ་ངེས་ལེགས་ཀྱི་ས་བོན་བསྐྲུན་པར་བྱའོ། །ཨེ་མ་ཧོཿ བྱེ་བ་ཐེར་འབུམ་གཟུགས་སྐུའི་སྐར་ཚོགས་ལ། །གོ་འབྱེད་ཆོས་སྐུའི་རིང་བསྲེལ་གོ་ལའི་རླུང༌། །ཡིད་སྐྱོབ་གདངས་སུ་ཤར་བའི་གཟུངས་ཀྱི་འཕྲེང༌། །མུ་མཐའ་ཡས་པའི་ཟ་མ་ཏོག་ཏུ་གྲུབ། །རབ་མང་གཟུངས་དང་བྱིན་རླབས་རྟེན་གྱི་ཚོགས། །རབ་འབྱམས་རྒྱལ་བའི་ཆོས་སྐུ་རོ་གཅིག་པར། །རབ་སྒྲུབ་ཆོ་ག་ལན་གྲངས་བརྒྱ་ཕྲག་གིས། །རབ་ཏུ་བརྟན་པའི་རྡོ་རྗེར་བྱིན་གྱིས་བརླབས། །འཁོར་ལོས་མཐིལ་མཛེས་ཞབས་སེན་རེག་པའི་རྡུལ། །ས་གསུམ་ཤེས་རབ་བསྒྲུབས་པ་ཤཱཀྱའི་ཏོག །གཞན་ཕན་ཐུགས་བསྐྱེད་ཡོངས་གྲུབ་རྒྱལ་བའི་སྲས། །འཕགས་པའི་ཡུལ་གྱི་པཎ་གྲུབ་ཕལ་མོ་ཆེ། །ཁྱད་པར་ལྔ་བརྒྱའི་གཙུག་ནོར་ཨ་ཏི་ཤ །ལྷ་ཆོས་བདུན་ལྡན་ཇོ་བོ་བཀའ་གདམས་པ། །གདན་གསུམ་ཚར་པ་རྡོ་རྗེ་འཛིན་པའི་རྗེ། །ས་སྐྱའི་བླ་ཆེན་ཡབ་སྲས་བརྒྱུད་པར་བཅས། །མར་མི་
དྭགས་བརྒྱུད་རིག་འཛིན་རས་དཀར་གྱི། །འདབ་ལྡན་གོལ་ཤོར་མཐའ་སྤངས་ཕྱག་རྒྱ་ཆེའི། །མཁའ་ལ་ལྡིང་བའི་རྒོད་པོ་བཀའ་བརྒྱུད་སོགས། །སྔོན་བྱོན་དམ་པའི་བྱིན་རྟེན་ཚར་དུ་དངར། །བརྟན་གཡོའི་དངོས་ཀུན་ཀུན་མཁྱེན་འོད་ཀྱིས་གསལ། །མཐའ་ཡས་འགྲོ་རྣམས་རྣམ་ཀུན་བརྩེ་བས་སྐྱོང༌། །བདུད་སྡེའི་དཔུང་ཚོགས་ཚོགས་གཉིས་སྟོབས་ཀྱིས་བཅོམ། །ཕྱོགས་ལས་རྣམ་རྒྱལ་རྒྱལ་དབང་གྲགས་པའི་དཔལ། །སྲས་མཆོག་གཉིས་སོགས་དངོས་ཀྱི་ཞལ་སློབ་དང༌། །པཎ་ཆེན་སྣང་མཐའ་པད་དཀར་འཆང་བའི་མགོན། །ཀུན་མཁྱེན་འཇམ་དབྱངས་བཞད་པའི་རྡོ་རྗེ་སོགས། །འཁྲུངས་རབས་བསམ་འཕེལ་ནོར་བུའི་འཕྲེང་བར་བཅས། །ཅོད་པན་གསེར་འོད་འགྱུ་བའི་བསྟན་འདི་ལ། །བཤད་སྒྲུབ་བྱ་བའི་རི་མོ་ཆེར་བགྱིད་པའི། །སྐྱེས་མཆོག་ཚད་མར་གྱུར་པ་ཇི་སྙེད་ཀྱི། །བྱིན་རླབས་རིགས་བརྒྱའི་དཀྱིལ་འཁོར་ཡོངས་སུ་རྫོགས། །སྔོ་དང་འབྲུ་སྨན་རིལ་པོ་མ་ཡིན་གྱི། །སྦྱོར་བ་ཚང་བས་ནད་ཀྱི་གདུང་སེལ་ལྟར། །འཁྲུལ་བྲལ་དམ་པའི་རིང་བསྲེལ་ན་བཟའ་སོགས། །རྟེན་སྣ་འཛོམས་རྣམས་སྲིད་གསུམ་རྒུད་པ་འཕྲོག །ཟག་བཅས་བསོད་ནམས་ལས་ཀྱིས་འདུ་བགྱིས་པ། །དབང་པོའི་གཙུག་ནོར་རེག་པས་ལྟར་བསྒྱུར་ན། །ཚོགས་གཉིས་རིག་སྔགས་གྲུབ་པའི་གསེར་འགྱུར་རྩིས། །རིག་པས་རིན་ཆེན་མཆོག་འགྱུར་སྨོས་ཅི་འཚལ། །བསྐལ་མང་བསགས་པའི་ལས་ཉོན་མུན་པའི་དཔུང༌། །དམིགས་མེད་དབྱིངས་སུ་བསྐྲད་དེ་རྒྱས་འདེབས་པ། །ཀུན་ཏུ་བཟང་པོའི་འོད་ཟེར་འབུམ་འགྱེད་པའི། །རྟེན་མཆོག་རྟ་བདུན་རྒྱལ་པོའི་གཟི་བྱིན་འབར། །
འཕགས་བོད་མཁས་གྲུབ་ཕྱོགས་བརྒྱའི་རི་བོ་ལས། །དལ་གྱིས་བབས་པའི་བྱིན་རླབས་རྟེན་མང་གི །ཀླུང་བརྒྱ་གཅིག་ཏུ་འཁྱིལ་བའི་ཡིད་བཞིན་མཚོར། །དད་ལྡན་ངང་མོའི་ཚོགས་རྣམས་གར་བྱོས་ཤིག །དེའང་རྟེན་གྱི་རྒྱུ་མཚན་མཐའ་དག་སྙན་ངག་གི་ཚིགས་སུ་བཅད་པས་བརྗོད་ན་རིག་གནས་ལ་སྦྱངས་པ་རྣམས་དགའ་བ་སྐྱེད་ཀྱང་ཕལ་མོ་ཆེའི་དོན་དུ་འགྱུར་དཀའ་བས། བརྗོད་དོན་དངོས་གཞི་ལྷུག་པའི་སྒོ་ནས་བརྗོད་ཅིང་ཚིགས་བཅད་རྣམས་ཀྱིས་ཀྱང་དེ་ལ་དགོས་ནུས་ཅི་རིགས་ཀྱིས་ཟུར་བརྒྱན་ནས་བཀོད་པ་ཡིན་པས། དགོས་པའི་གཙོ་བོ་རྟེན་གྱི་ཡོན་ཏན་མཐོང་ཞིང་མོས་གུས་བསྐྱེད་ནས་ཐར་པའི་ས་བོན་ཅི་ཐེབས་བྱེད་དགོས་ཀྱི། ཚིག་ཙམ་ལ་འཆེལ་བར་མི་བྱ་སྟེ། དེང་དུས་བློ་གྲོས་ཅུང་ཟད་གསལ་བ་རྣམས་ཀྱང་སྙན་ངག་གི་ཚིགས་བཅད་དམ་དུམ་སྦྱོར་བ་ལ་ཡོན་ཏན་གྱི་མཆོག་ཏུ་རློམ་ནས་གཞུང་ཆེན་མོ་ལ་སྦྱང་བར་མི་བྱེད་པ་ནི་ཟླ་བའི་སྒྲོན་གསལ་ལས། ཟླ་བ་ལྟ་འདོད་སོར་མོའི་རྩེ་ལ་བལྟ་དང་མཚུངས། །གསུངས་པ་བཞིན་ཡིན་པས་ཚིག་ལ་མི་རྟོན་དོན་ལ་རྟོན་པར་བྱེད་དགོས་ལ། བརྗོད་དོན་ཕུན་སུམ་ཚོགས་པའི་སྟེང་ནས་རྗོད་བྱེད་ཀྱང་སྙན་ཚིག་དང་འབྲེལ་བ་བྱུང་ན་ཕུན་སུམ་ཚོགས་པའི་ཡན་ལག་ཏུ་འགྱུར་བ་ནི། རིན་པོ་ཆེའི་གཏམ་གྱི་སྦྱོར་བ་ལས་གསུངས་པ་ལྟར་ཡིན་པས་མཁས་པ་རྣམས་ཀྱིས་དགོངས་པར་བྱའོ། །དེའང་འདི་སྐད་ཅེས་བྱ་སྟེ། སྒྲ་དོན་ཕུན་ཚོགས་བཅད་ལྷུག་རྒྱུད་དང་ཏོག །སྤེལ་བས་སྨྲ་ངན་མུ་སྟེགས་ཀླད་འགེམས་ཤིང༌། །སྐལ་བཟང་སྐྱེ་བོ་དགེ་བའི་དུས་སྟོན་དུ། །འབོད་པའི་ཆོས་
ཀྱི་གཎྜཱི་འདི་བརྡུངས་སོ། །རྒྱན་མང་ཁུར་ལྕི་དོན་གྱི་བུས་པ་དང༌། །དོན་གྱི་གཞོན་ནུ་ཕྱོགས་ཀྱི་གོས་ཅན་རྣམས། །རང་བཞིན་གསལ་བྱེད་མཛེས་པའི་རྒྱན་གསུམ་ཅན། །སྙན་ངག་རྒྱལ་པོ་འདི་ཡི་འབངས་སུ་རྒྱུག །མངོན་བརྗོད་མཁས་པའི་རྣ་རྒྱན་སྣ་ཚོགས་སུ། །སྤུང་ཞིང་གསིག་པས་རྣ་བ་ཚ་བ་ལ། །རྒྱན་དུ་རློམ་མིན་རྣ་བར་ལྷན་སྐྱེས་བཞིན། །འཇར་བའི་མུ་ཏིག་རྣ་ལུང་དོན་དམ་རྒྱན། །འོན་ཀྱང་ཐུབ་བསྟན་དབྱར་གྱི་དུས་སྟོན་ཡོལ། །གཞུང་ཆེན་སྒྲ་བརྒྱ་པ་རྣམས་སྒྲ་མེད་གྱུར། །གཅམ་བུའི་སྙན་ཚིག་བསེར་བུ་གཡུ་འབྲུག་བཞིན། །ཕྱོགས་བརྒྱར་རྒོད་པས་ཡིད་སྐྱོའི་སྤུ་ལོང་ལྡང༌། །བློ་ལྡན་དད་བརྩོན་ར་ཡིག་གཉིས་པའི་ཚོགས། །རྗོད་བྱེད་དྲི་བསུང་ཁོ་ནས་མ་ངོམས་པར། །དོན་ཟབ་པུཎྜ་རཱི་ཀའི་བཅུད་མྱང་སྟེ། །རྣམ་གྲོལ་སྦྲང་རྩི་གསོག་པའི་ཆོ་ག་མཛོད། །༈ བཞི་པ་དགེ་ཚོགས་བྱང་ཆུབ་ཏུ་བསྔོ་བས་རྒྱས་གདབ་པ་ནི། རྣམ་དཀར་གྱི་ཕུང་པོ་འདིའང་སྡེ་བཞིའི་དཔལ་གྱི་རིམ་པས་ཐར་པ་བླ་ན་མེད་པའི་རྒྱུར་འགྱུར་བ་དང༌། ཕན་བདེའི་འབྱུང་གནས་རྒྱལ་བའི་བསྟན་པ་རྒྱས་ཤིང༌། འཇིག་རྟེན་ཁམས་སུ་ནད་མུག་འཁྲུག་རྩོད་སོགས་ཞི་ནས་བདེ་འབྱོར་ཉམས་པ་མེད་པས་འཚོ་བ་དང༌། ཚེ་རབས་ཀུན་ཏུ་མི་ཕམ་མགོན་པོས་རྗེས་སུ་འཛིན་ཅིང་བྱང་ཆུབ་ཏུ་ལུང་བསྟན་ནས་རྒྱལ་སྲས་ཀྱི་སྤྱོད་པ་མཐའ་དག་ལ་སློབ་པ་དང༌། ཁྱད་པར་དུ་བྱམས་ཆོས་ལྔ་སོ་སོའི་བརྗོད་བྱའི་ལུས་དང་མཐུན་པར་ལམ་གྱི་རིམ་པ་ལ་བསླབ་ནས་དོན་གཉིས་ཕུན་སུམ་ཚོགས་པའི་རྒྱུར་བསྔོ་བ་ནི། ཤུགས་འབྱུང་ནོ༡ར་གྱི་ཤིང་སྣ་འཕྲུལ་སྦྱོར་གྱིས། །དགོ༢ས་པའི་དོན་ཆེན་གཟིངས་སུ་བསྒྲུབས་པ་འདིས། །
རྒྱུ་འབྲ༣ས་ཆོ་ས་ཚུལ་རྒྱ་མཚོའི་འཇིངས་བརྒལ་ཏེ། །བླ་མེད་ཐར་པ༤འི་གླིང་དུ་ཕྱིན་གྱུར་ཅིག །དྲང་སྲོང་ཛ་ཧཱུའི་ཞལ་སྒོ་ལས་འོངས་ཤིང༌། །མདོ་སྔགས་རླབས་ཀྱི་འཁྲི་ཤིང་བརྒྱས་རྩེན་མ། །བསྐལ་པའི་མཐར་ཡང་མ་ཉམས་འཕྱུར་བ་ཡིས། །ས་གསུམ་རྒུད་པའི་དྲི་མ་འཁྲུད་གྱུར་ཅིག །རྩུབ་འགྱུར་ཚལ་དུ་ཞི་དུལ་སྤྱོད་པས་མཛེས། །པྲེ་ཏ་པུ་རིར་འབྱོར་པའི་རྒྱག་གླུ་ལེན། །སྙིགས་མའི་མཐའ་ལ་རྫོགས་ལྡན་དཔལ་འབར་བས། །སྲིད་གསུམ་ཟག་མེད་དགའ་བས་རོལ་གྱུར་ཅིག །རྣམ་དག་ཐོས་བསམ་སྒོམ་པའི་རྒྱན་མང་ཅན། །དགུ་གཉིས་བསྒྲིལ་བའི་དལ་འབྱོར་སྲད་བུ་ལ། །ཆད་མེད་བསྟར་བ་སྐྱེ་བའི་བགྲང་འཕྲེང་ནི། །མ་ཕམ་ཐུགས་རྗེའི་ཕྱག་གིས་འདྲེན་གྱུར་ཅིག །མ་འོངས་ཚེ་ལོ་བརྒྱད་ཁྲིའི་དུས་ཀྱི་ཚེ། །མ་ཕམ་བླ་མས་དགྱེས་བཞིན་རྗེས་གཟུང་སྟེ། །མ་རྣམས་མངོན་དུ་བྱང་ཆུབ་སེམས་བསྐྱེད་ནས། །མ་ལུས་ཐེག་མཆོག་སྤྱོད་ལ་སློབ་གྱུར་ཅིག །འཇམ་མཉེན་པདྨའི་མྱུ་གུ་གསར་བ་བཞིན། །ལེགས་པའི་བརྐྱངས་པའི་ཕྱག་གཡས་སྐྱབས་སྦྱིན་ནི། །སྤྱི་བོར་བཞག་སྟེ་བླ་མེད་བྱང་ཆུབ་ཏུ། །ལུང་བསྟན་ཕྱིར་མི་ལྡོག་པའི་རྟགས་ཐོབ་ཤོག །གང་ཞིག་ཤེས་པར་བྱ་བ་ཀུན་མཁྱེན་ཏེ། །གང་ཞིག་སྒྲུབ་པར་བྱེད་པའི་སྦྱོར་བ་ཆུ། །གང་ཞིག་ཟག་མེད་ཆོས་ཀུན་བསགས་པའི་ས། །གང་གང་ཇི་ལྟར་གསུངས་བཞིན་འགྲུབ་པར་ཤོག །ཐེག་མཆོག་རིགས་ཀྱི་ས་བོན་མྱུ་གུར་བཅ༥ས། །ཐོས་བསམ་སྒོམ་པའི་དྲོད་གཤེར་གྱིས་བསྐྱངས་པས། །རྒྱལ་སྲས་སྤྱོད་པ༦་ཡལ་གའི་ཕྱོགས་རྫོགས་ཏེ། །སྤ༡ངས་རྟོགས་འབྲས་
བུའི་ཁུར་གྱིས་དུད་པར་ཤོག །ཆོས་ཀུན་མཚན་ཉིད་མཐའ་བྲལ་དབུ་མའི་ལམ། །མཐོང་བ་སྒྲིབ་བྱེད་རབ་རིབ་ཀུན་སེལ་བའི། །གཉེན་པོ་དེ་ཉིད་རྟོགས་པའི་མིག་སྨན་གྱིས། །བླ་མེད་ཐེག་པའི་འཇུག་ངོགས་གསལ་བྱེད་ཤོག །ཁྱད་པར་ཆོ༡ས་ཅན་རྒྱ་ཆེ་ཀུན་རྫོབ་དང༌། །ཆོ༢ས་ཉིད་སྤྲོས་བྲལ་ཟབ་མོ་གཉིས་མེད་དོན། །ཇི་བཞིན་རྟོགས་ནས་ཚོགས་གཉིས་སྤྱོད་པ་ཡིས། །རྒྱལ་བའི་ཆོས་གཟུགས་སྐུ་གཉིས་འགྲུབ་པར་ཤོག །མདོར་ན་མཆོག་གསུ༣མ་ཐུགས་རྗེའི་མཐུ་ལ་བརྟེན། །མ་དག་ཁམས་ཀྱི་དྲི་མ་ཡོངས་སྦྱངས་ནས། །བྱང་ཆུབ་སྙིང་པོ་ཡོན་ཏན་གཏེར་ཐོབ་སྟེ། །འཕྲིན་ལས་བཟང་པོས་འགྲོ་ཀུན་སྒྲོལ་གྱུར་ཅིག །ཅེས་ལུང་སྟོན་བྱམས་པའི་དཀར་ཆག་གདངས་སྙན་ཆོས་ཀྱི་གཎྜཱི་ཞེས་བྱ་བ་འདི་ནི་གཙུག་ལག་ལྟ་བའི་བློ་མིག་ཡངས་པ་སྔགས་རམས་པ་དཀོན་མཆོག་ཀུན་དགས་བསྐུལ་ཏེ། ྋབཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པའང་སྐུལ་བ་པོ་ཉིད་ཀྱིས་བགྱིས་པ་འདིའང་འགྲོ་ཀུན་བྱམས་པ་མགོན་པོས་རྗེས་སུ་འཛིན་པའི་རྒྱུར་གྱུར་ཅིག །