རྡོ་རྗེ་གསུམ་གྱི་སྣང་བའི་བསྡུས་དོན།
རྡོ་རྗེ་གསུམ་གྱི་སྣང་བའི་བསྡུས་དོན་བཞུགས་སོ། །
དཔལ་ཧེ་རུ་ཀ་ལ་ན་མཿ འདིར་ལྷ་མོ་རིག་བྱེད་མ་ལ་བསྟོད་པའི་རྒྱ་ཆེར་འགྲེལ་པ་རྡོ་རྗེ་གསུམ་གྱི་སྣང་བའི་བསྡུས་པའི་དོན་ལ། ཀླད་ཀྱི་དོན། གཞུང་དངོས། མཇུག་གི་དོན་གསུམ། དང་པོ་ལ་ལེགས་སྦྱར་གྱི་སྐད་དུ་ཕྱག་འཚལ་བ། མཚན་གྱི་དོན། མཆོད་བརྗོད་གསུམ་ལས། དང་པོ་ནི། ན་མོ་ཌཱ་ཀི་ཀུ་རུ་ཀུལླེ་ཡེ། གཉིས་པ་ནི་རྒྱུད་ཀྱི་ཁུངས་དང་སྦྲགས་ཏེ་སྟོན་པར། བཅོམ་ལྡན་འདས་མ་ཁམས་གསུམ་དབང་སྡུད་ཀྱི་ལྷ་མོ་རིག་བྱེད་མ་ཀུ་རུ་ཀུལླེ་ལ་བསྟོད་པའི་གླུ་དབྱངས་སྲིད་གསུམ་འགུགས་པའི་ལྕགས་ཀྱུ་ཞེས་བྱ་བ། གསུམ་པ་ནི། བཅོམ་ལྡན་འདས་མ་དཔལ་ཀུ་རུ་ཀུལླེ་ལ་ཕྱག་འཚལ་ལོ། །༈ གཉིས་པ་གཞུང་དངོས་ལ། ཇི་ལྟར་བསྟོད་པའི་ཚུལ། བསྟོད་པའི་ཚིག་དོན་དངོས་བཤད་པ། བསྟོད་པའི་དགེ་བ་བསྔོ་བ་འདོད་གསོལ་དང་བཅས་པ་གསུམ་གྱི་དང་པོར་བསྟོད་པའི་སྒོ་མང་ཡང༌། ལམ་བགྲོད་ཚུལ་དང་ཁྱད་པར་སྔགས་ལམ་གྱི་བགྲོད་ཚུལ་སྒོས་བསྟོད་པ་མཆོག་ཏུ་སྒྲུབ་པོ། གཉིས་པ་ལ་མདོར་བསྟན་རྒྱས་བཤད་གཉིས། དང་པོ་ནི། རབ་འབྱམས་ཉི་འོད་རྩེ་དགས་རབ་རྒོད་པ། །ཆུ་ལྷའི་ངོགས་སུ་ཕྱོགས་པའི་ལྷུན་པོའི་བཞིན། །དཔེར་མཚོན་མེ་ལོང་ནང་གཟུགས་ཤར་བའི་དབྱིབས། །ཇི་བཞིན་སྒྱུ་འཕྲུལ་གར་གྱིས་རོལ་དེར་འདུད། །༈ གཉིས་པ་རྒྱས་བཤད་ལ། སྐུ་ལ་བསྟོད་པ། གསུང་ལ་བསྟོད་པ། ཐུགས་ལ་བསྟོད་པ། ཐུན་མོང་དུ་བསྟོད་པ་དང་བཞི། དང་པོ་ལ་སྤྱི་དོན་གཞུང་དོན་གཉིས། དང་པོ་སྐུ་འགྲུབ་བྱེད་གཙོ་བོ་བསྐྱེད་རིམ་ལ་སྦྱོར་ཚུལ་བསྐྱེད་རིམ་གལ་ཆེ་
ཚུལ། དེའི་ཆིངས་ཐ་དད་པའི་དབྱེ་བ། སྐབས་འདིར་གང་དང་གང་གི་གནད་ཚང་ཚུལ། གཙོ་གང་ཆེ། དེ་ལ་དོགས་སློང་དགག་གཞག་དང་བཅས་བཤད་དོ། གཉིས་པ་ཡན་ལག་གི་དོན་ལ་དང་པོ་སྦྱོར་བའི་ཏིང་ངེ་འཛིན་ལ་བརྟེན་ནས་རང་དོན་ཕུན་ཚོགས་སྐུ་གསུམ་མངོན་དུ་བྱས་ཚུལ། དཀྱིལ་འཁོར་རྒྱལ་མཆོག་གི་ཏིང་ངེ་འཛིན་ལ་བརྟེན་ནས་དཀྱིལ་འཁོར་འཁོར་ལོ་སྤྲོ་ཞིང་སྡུད་པའི་བདག་པོར་གྱུར་ཚུལ། ལས་རྒྱལ་མཆོག་གི་ཏིང་ངེ་འཛིན་ལ་བརྟེན་ནས་ཞི་སོགས་ཀྱིས་ལས་རབ་འབྱམས་བསྒྲུབ་ཚུལ་གསུམ། དང་པོ་ལའང་ཆོས་སྐུ་དང༌། ལོངས་སྐུ་དང༌། སྤྲུལ་སྐུ་མངོན་དུ་བྱས་ཚུལ་གསུམ་གྱི་དང་པོ་ནི། མཐའ་བྲལ་མཁའ་དབྱིངས་འདྲ་བའི་འོད་གསལ་ལས། །འོངས་པའི་གསལ་རྫོགས་དབྱིངས་སུ་དག་པ་ཡི། །སྐྱེ་འགགས་གནས་གསུམ་བྲལ་བའི་ཆོས་ཉིད་ལས། །༈ གཉིས་པ་ལ་རྒྱུ་ལོངས་སྐུའི་ལམ་འཁྱེར་ལུགས་སོ་སོ་བ་བཀོད་ཅིང༌། འདིར་ཉེར་སྒྲུབ་ཀྱི་ཡན་ལག་གོམས་པ་ལས་ཆུ་ལས་ཆུ་བུར་རྡོལ་བ་བཞིན་རླུང་སེམས་ཙམ་ལས་ལོངས་སྐུར་ལྡང་བ་འབྱུང་བས་དེ་མངོན་དུ་བྱས་ཚུལ་ནི། །ཆུ་ལས་ཆུ་བུར་ཚུལ་གྱིས་ཉེ་བར་མཚོན། །༈ གསུམ་པ་སྤྲུལ་སྐུ་མངོན་དུ་བྱས་ཚུལ་སྦྱང་གཞི་སྦྱོང་བྱེད་སྦྱོར་དགོས་ཤིང་སྐུའི་རྣམ་པ་དངོས་ཀྱི་སྒོ་ནས་བསྟོད་པར། སྐུ་སྤྱི་ཙམ་དང་སྦྱར་ཏེ་གདུལ་བྱ་དབང་དུ་བྱེད་ཚུལ། ཕྱག་མཚན་སོ་སོའི་སྒོ་ནས་གདུལ་བྱ་དབང་དུ་བྱེད་ཚུལ། མཚན་ཙམ་གྱིས་ཀྱང་དབང་དུ་བྱེད་ཚུལ་གསུམ། དང་པོ་ཆ་སོ་སོའི་དག་པ་དང་སྦྱར་ཏེ་སྟོན་པ་ནི། ནང་གི་ཕག་མོ་ཞལ་གཅིག་ཕྱག་བཞི་པ། །ལྡེམ་ཀྱོག་སྒེག་པའི་ཞི་འཛུམ་
བཞིན་རས་ཀྱིས། །སྲིད་གསུམ་འདི་དག་ཡིད་ཀྱི་བརྟན་པ་ཡང༌། །ཅིག་ཅར་འཕྲོག་པའི་སྦྱོར་བས་རྣམ་པར་འགྱིངས། །༈ གཉིས་པ་ཕྱག་མཚན་སོ་སོ་དང་འབྲེལ་བར་གདུལ་བྱ་དབང་དུ་བྱེད་ཚུལ་ལ་རྩ་ཕྱག་དང༌། ལྷག་མའི་ཕྱག་མཚན་ལ་སྦྱར་བ་གཉིས། དང་པོ་ནི། ཨུཏྤལ་ཉག་ཕྲན་ཆགས་བྱེད་རྒྱུད་ལྡན་ལ། །ཐབས་ཤེས་གོ་བའི་རྣ་ཡི་ཕྱིར་སྦྱངས་ནས། །ལྷ་མི་གནོད་སྦྱིན་ཀླུ་དང་གྲུལ་བུམ་སོགས། །གང་སྙིང་བསྣུན་དེ་མེ་ཡིས་བུང་བ་བཞིན། །གཉིས་པ་ནི། འདབ་ལྡན་ལྕགས་ཀྱུ་ཞགས་པས་རེག་ཙམ་གྱིས། །ཚངས་དང་བརྒྱ་བྱིན་ཐོས་སྒྲོག་ལ་སོགས་ཀྱང༌། །རླུང་གི་ཤུགས་ཀྱིས་རིངས་པར་འོང་བ་ནི། །རྒྱ་མཚོའི་རླབས་བཞིན་དུས་ལས་ཡོལ་བ་མིན། །གསུམ་པ་མཚན་ཙམ་གྱིས་ཀྱང་གདུལ་བྱ་དབང་དུ་བྱེད་ཚུལ་ནི། ཆེ་ཞིང་འགྱིངས་པས་དྲེགས་པ་མཐའ་དག་ཀྱང༌། །ཁྱེད་ཀྱིས་མཚན་ཙམ་ཡིད་ལ་དྲན་བྱེད་པའི། །དབུལ་བོའི་མདུན་སར་རིམ་གྲོའི་སྦྱོར་བ་དག །བགྱིད་པར་འགྱུར་ལ་མྱོང་ལྡན་ཐེ་ཚོམ་བྲལ། །༈ གཉིས་པ་དཀྱིལ་འཁོར་རྒྱལ་མཆོག་གི་ཏིང་ངེ་འཛིན་ལ་བརྟེན་ནས་སྙོམས་འཇུག་གི་དགའ་བའི་རོལ་པས་དཀྱིལ་འཁོར་གྱི་འཁོར་ལོ་སྤྲོ་ཞིང་སྡུད་པའི་བདག་པོར་གྱུར་ཚུལ་ནི། དེ་ལྟ་མོད་ཀྱི་ཚུལ་འདི་ཕྲ་མོའི་གཏམ། །ཧེ་རུ་ཀ་དཔལ་སྙོམས་འཇུག་བདེ་བའི་རོས། །དགྱེས་དགུར་འགུགས་པའི་རྣལ་འབྱོར་སྙིང་གི་དབུས། །ཁྲག་འཐུང་དཔལ་དེ་ཅི་དགར་འོངས་མིན་ནམ། །༈ གསུམ་པ་ལས་རྒྱལ་མཆོག་གི་ཏིང་ངེ་འཛིན་ལ་བརྟེན་ནས་ཞི་སོགས་རབ་འབྱམས་ལས་ཀྱི་དངོས་གྲུབ་ལ་དབང་འབྱོར་པའི་ཚུལ་ནི། ཞི་དང་རྒྱས་དབང་མངོན་སྤྱོད་ལས་རབ་འབྱམས། །གྲུབ་ཆེན་བརྒྱད་དང་ཟུང་འཇུག་ཕྱག་རྒྱ་ཆེ། །མ་ལུས་བདེ་བླག་སྩོལ་མཛད་བཅོམ་ལྡན་མ། །ཁྱོད་ལ་ཡོན་ཏན་བརྗོད་
ནས་བསྟོད་པ་ལགས། །༈ གཉིས་པ་གསུང་ལ་བསྟོད་པ་ལ། ཕར་ཕྱིན་ཐེག་པ་དང་ཐུན་མོང་བ་དང་སྔགས་ཀྱི་ཐུན་མོང་མ་ཡིན་པའི་དབང་དུ་བྱས་པ་གཉིས། དང་པོ་ནི། མགྲིན་པ་ཆོས་ཀྱི་མགུར་ལས་ཆད་མེད་པའི། །ཡན་ལག་དྲུག་ཅུའི་དབྱངས་ཀྱིས་འགྲོ་ཀུན་རྣར། །༈ གཉིས་པ་ལ་མདོར་བསྟན་རྒྱས་བཤད་གཉིས། དང་པོ་ནི། སྙན་འཇེབས་ཕེཾ་ཀ་ར་ཡི་སྒྲ་སྐད་ཀྱིས། །ཁམས་གསུམ་མ་ལུས་མཁའ་འགྲོར་བཅས་ཏེ་བསྡུ། །༈ གཉིས་པ་རྒྱས་པར་བཤད་པ་ལ། གསུང་གི་སྒོ་ནས་ཇི་ལྟར་གདམས་ཚུལ་དང༌། གསུང་རྡོ་རྗེ་རང་གིས་མངོན་དུ་མཛད་ཚུལ་གཉིས། དང་པོ་ལམ་གྱི་ལུས་ཆ་ཚང་བ་དང་ཁྱད་པར་རྒྱུད་དོན་མཐའ་དག་གི་སྙིང་པོ་བདེ་སྟོང་དབྱེར་མེད་ཀྱི་ཨེ་ཝཾ་ལ་སྦྱོར་ཚུལ་འཕྲོས་དང་བཅས་སྟོན་པར། སྒྲུབ་པོའི་ལམ་གྱི་མན་ངག་ཆ་ཚང་བར། །དབུགས་དབྱུང་ཚིག་དང་བཅས་ཏེ་སྟོན་མཛད་པས། །ལྷན་སྐྱེས་བདེ་ཆེན་སྟོང་ཉིད་མཉམ་སྦྱོར་བའི། །དགའ་བའི་རོ་ལ་ཀུན་ནས་སྦྱོར་བར་མཛད། །༈ གཉིས་པ་གསུང་རྡོ་རྗེ་རང་གིས་མངོན་དུ་མཛད་ཚུལ་ལ། སྤྱི་དོན་དང༌། གཞུང་དོན་གཉིས། དང་པོ་ནི་རྒྱུད་སོ་སོའི་རྫོགས་རིམ་ལ་སློབ་ཚུལ་མི་འདྲ་བའི་ཁྱད་པར། འོན་ཀྱང་དོད་ཐུབ་ཀྱི་གནད་ཚང་ཚུལ། ལུགས་འདིས་ཐོག་མར་གཏུམ་མོ་ནས་བརྩམས་ཏེ་སློབ་པས་གང་ལ་གནད་དུ་སྣུན་དགོས་པ་དང་གནད་དུ་བསྣུན་སའི་རྩ་འཁོར་སོགས་ཀྱི་རྣམ་གཞག །བུམ་པ་ཅན་ནམ་གཙོ་བོར་མེ་དམིགས་སྐྱོང་ཚུལ། ཁྱད་པར་འདིའི་གཞུང་རིམ་པ་ལྔ་པར་བཤད་པའི་དམིགས་སྐོར་དང་སྦྱོར་ལུགས་དགག་བཞག་དང་བཅས་པ། དེ་དག་གིས་ཀུན་རྫོབ་སྒྱུ་མའི་སྐུ་འགྲུབ་ཚུལ་དང༌། དེ་ཉིད་གསུང་རྡོ་རྗེ་ལོངས་སྤྱོད་རྫོགས་པའི་སྐུ་འགྲུབ་བྱེད་ཐུན་མོང་མ་ཡིན་པར་སྒྲུབ་པ་རྣམས་ཀྱི་སྒོ་ནས་གཏན་ལ་ཕབ་བོ། ། ༈ གཉིས་པ་གཞུང་དོན་ལ། གསུང་རྡོ་རྗེའི་ངོ་བོའི་ཡོན་ཏན་དང༌། དེའི་ནུས་པའི་ཡོན་ཏན་
གཉིས། དང་པོ་ནི། དོན་ངོ་བོ་གཅིག་ཀྱང་གདུལ་བྱའི་བསམ་པའི་དབང་གིས་གསུང་རྡོ་རྗེ་ལ། གསུང་ལོངས་སྤྱོད་རྫོགས་པའི་སྐུ་དང༌། གསུང་རྣམ་པ་ཐམས་ཅད་པའི་ཆ་གཉིས་སུ་ཕྱེ་སྟེ་རིམ་བཞིན་རྐང་པ་གཉིས་གཉིས་ཀྱིས་སྟོན་པར། ཟབ་མོ་སྟོང་ཉིད་སྙིང་སྟོབས་ཆེས་དཔའ་བས། །ལྷན་སྐྱེས་བདེ་ཆེན་གཡུ་ཡི་རལ་པ་གཟིངས། །མི་ཞུམ་ཞི་བ་སྐྱེ་མེད་ང་རོ་ཡིས། །ལོག་རྟོག་བདག་འཛིན་ཝ་ཚོགས་སྐྲག་པར་མཛད། །༈ གཉིས་པ་ནུས་པའི་ཡོན་ཏན་གང་ལ་བརྟེན་ནས་འཁོར་རྩ་ཐུན་མོང་དང་ཐུན་མོང་མ་ཡིན་པ་རིམ་གྱིས་བཏུལ་བས་ལྷན་སྐྱེས་ཀྱི་བདེ་ཆེན་འདྲེན་ཚུལ་ལ་བསྟོད་ཅིང་དེའི་ཡོན་ཏན་མཐོང་ནས་འདུན་པ་སྐྱེད་ཚུལ་དང་བཅས་སྟོན་པར། གང་གི་སྙིང་ལ་ཆ་ཤས་ཞུགས་པས་ཀྱང༌། །ཐོག་མ་མེད་ནས་འཕུང་ཞེན་འགོང་བོའི་དཔུང༌། །སྙིང་གས་སྟོང་པའི་དབྱིངས་ཤི་མགུ་དཀའི་སེམས། །དབང་དུ་སྡུད་གསུང་རེ་བའི་ཡིད་ཀྱིས་བསྟོད། །༈ གསུམ་པ་ཐུགས་ལ་བསྟོད་པ་ལ། ཕར་ཕྱིན་ཐེག་པ་དང་ཐུན་མོང་བའི་དབང་དུ་བྱས་པ་དང༌། སྔགས་ཀྱི་ཐུན་མོང་མ་ཡིན་པའི་དབང་དུ་བྱས་པ་གཉིས། དང་པོ་ལ་རྣམ་པ་ཐམས་ཅད་མཁྱེན་པའི་ཡོན་ཏན་དང༌། སྟོབས་བཅུའི་ཡོན་ཏན་ལ་བསྟོད་པ་གཉིས། དང་པོ་ནི། རྒྱ་མཚོ་ལྟ་བུའི་གཏིང་ལྡན་ཤེས་བྱ་དང༌། །གངྒཱའི་རྡུལ་སྙེད་ཆོས་ཚུལ་མ་ལུས་པ། །ལག་མཐིལ་ཤིང་ཏོག་ཇི་བཞིན་མངོན་སུམ་དུ། །དུས་མཐའི་སྐད་ཅིག་ཡུན་ལ་མ་འདྲེས་གཟིགས། །གཉིས་པ་ནི། མཐར་ཐུག་དབྱིངས་ལས་མ་གཡོས་རྩེ་གཅིག་ཏུ། །མཉམ་པར་བཞག་བཞིན་སེམས་ཅན་ཁམས་སྣ་ཚོགས། །མ་འདྲེས་གསལ་ལེར་གཟིགས་པས་རང་རང་གི །བསམ་པ་ཇི་བཞིན་གང་འདོད་ཆོས་རྣམས་སྟོན། །༈ གཉིས་པ་སྔགས་ཀྱི་ཐུན་མོང་མ་ཡིན་པའི་དབང་དུ་བྱས་ནས་བསྟོད་པ་ལ། སྤྱི་དོན། གཞུང་དོན་གཉིས། དང་པོ་ནི།
ཐུགས་ཆོས་སྐུ་འགྲུབ་བྱེད་འོད་གསལ་དེ་ཉིད་མདོ་སྔགས་ཀུན་གྱི་སྙིང་པོར་གྱུར་ཚུལ། ཁྱད་པར་དུ་སྐབས་འདིར་གཙོ་བོར་བསྟན་ཚུལ། འོད་གསལ་ལྷན་སྐྱེས་ཀྱི་ངོས་འཛིན། དེ་འགྲུབ་བྱེད་རླུང་དང་གཏུམ་མོ་སོགས་ནང་གི་རྐྱེན་རྣམས་སྔར་བཤད་ཟིན་པས། འདིར་ཕྱིའི་རྐྱེན་ཕྱག་རྒྱའི་རྣམ་གཞག །རྐྱེན་གཉིས་ལས་དཔེ་དོན་གྱི་འོད་གསལ་རིམ་པར་འགྲུབ་ཚུལ་རྣམས་ཀྱི་སྒོ་ནས་བསྟན་ཏོ། །༈ གཉིས་པ་གཞུང་དོན་ལ། འོད་གསལ་ཡེ་ཤེས་ཀྱི་ངོ་བོའི་ཁྱད་པར་དང༌། དེའི་བྱེད་ལས་ཀྱི་ཁྱད་པར་གཉིས། དང་པོ་ནི། ནམ་མཁའི་མཐའ་ལྟར་རྒྱ་ཆེ་ཟླ་བའི་མ། །ལྟ་བུར་གཏིང་ཡངས་རྫིང་བུ་རྙོག་མེད་ལྟར། །དྭངས་པས་ཆོས་ཚུལ་རྒྱ་མཚོའི་གཟུགས་བརྙན་ཀུན། །ཅིག་ཅར་གསལ་རྫོགས་འཆར་ལ་མཁའ་རླུང་འདྲ། །༈ གཉིས་པ་བྱེད་ལས་ལ། སྒྲིབ་གཉིས་ཟད་པར་སྤོང་བའི་བྱེད་པ་དངོས་དང༌། འཕྲོས་དོན་སྤྱོད་པའི་ཁྱད་པར་གཉིས། དང་པོའང་སྒྲིབ་གཉིས་སྤངས་པས་སྲིད་མཐའ་ཁེགས་ཚུལ་དང༌། ཐབས་མཁས་པས་དེའི་ཤུགས་ཀྱིས་ཞི་མཐའ་ཁེགས་ཚུལ་གཉིས་ཀྱིས་སྟོན་པར། ཤེས་དང་ཉོན་མོངས་རྨོངས་བྱེད་མཆུ་རིང་བུང༌། །སྙིང་རྗེ་སྟོང་པ་ཉིད་ཞུགས་བསིལ་ཡབ་ཀྱིས། །རིང་དུ་བསྐྲད་ཀྱང་བརྩེ་བའི་ཞགས་པ་ཡིས། །འགྲོ་ལ་དམ་དུ་འཁྱུད་པས་ཡང་དག་རོལ། །༈ གཉིས་པ་འཕྲོས་དོན་སྤྱོད་པའི་ཁྱད་པར་ནི། དུག་གསུམ་བཏགས་པ་བར་འཇོག་ཚུལ་དང༌། དངོས་གནས་པ་ལམ་དུ་བྱེད་ཚུལ་གཉིས་ཀྱིས་བསྟན་ཅིང༌། དོན་གྱི་འོད་གསལ་གྱི་དོད་ཐུབ་མདོ་ལ་མེད་པས་ཟབ་ཁྱད་དང་བགྲོད་པ་གཅིག་པའི་ལམ་དུ་སྟོན་པར། ཆགས་པ་མིན་ཀྱང་བརྩེ་ཆེན་ཆགས་པས་མྱོས། །ཁྲོ་དང་བྲལ་ཡང་ཉོན་མོངས་དགྲ་མགོ་གཅོད། །གཏི་མུག་ཀུན་བཅོམ་འོད་གསལ་ངང་དུ་གཟིམས། །ཡ་མཚན་སྒྱུ་མས་ས་བཅུ་པ་ཡང་རྨོངས། །
༈ བཞི་པ་སྐུ་གསུང་ཐུགས་ཐུན་མོང་དུ་བསྟོད་པ་ནི་སྔར་དབང་གསུམ་གྱི་ལམ་བསྐྱེད་རིམ་དང་ཀུན་རྫོབ་སྒྱུ་མའི་རྫོགས་རིམ། དོན་དམ་འོད་གསལ་གྱི་རྫོགས་རིམ་གསུམ་གྱིས་སྐུ་གསུང་ཐུགས་སོ་སོར་སྒྲུབ་ཚུལ་བསྟན་པས། དེ་གསུམ་འདུས་པ་ཡན་ལག་བདུན་ལྡན་ཟུང་འཇུག་གམ། ལམ་འབྲས་ཀྱི་བཤད་པ་ལྟར་གསང་གསུམ་མི་ཟད་པ་རྒྱན་གྱི་འཁོར་ལོ་ནི་དབང་བཞི་པའི་ལམ་དབྱེར་མེད་ཟུང་འཇུག་གི་རྫོགས་རིམ་གྱི་བསྒྲུབ་བྱར་གོ་ནུས་ལ། དེ་ལྟར་བྱས་ན་ལམ་དང་འབྲས་བུའི་གནད་ཀུན་ཚང་ཞིང་དེ་ཉིད་རྡོ་རྗེའི་ཚིག་རྐང་གི་མན་ངག་ཏུ་བསྟན་པ། ཟུང་འཇུག་དང༌། ཡན་ལག་བདུན་ལྡན་དང༌། གསང་གསུམ་མི་ཟད་རྒྱན་གྱི་འཁོར་ལོ་རྣམས་དོན་གཅིག་ཀྱང་བཤད་ཐབས་མི་འདྲ་བའི་ཁྱད་པར་དང་བཅས་ཏེ་སྟོན་པར། དེ་ལྟར་སྐུ་གསུང་ཐུགས་ཀྱི་ངོ་མཚར་བའི། །གསང་གསུམ་མི་ཟད་རྒྱན་གྱི་འཁོར་ལོ་ལ། །བདག་གིས་ལུས་དང་ངག་ཡིད་རབ་གུས་པས། །ལེགས་པར་བསྟོད་ཀྱི་བགྱིས་པས་སྙན་དུ་བཞེས། །༈ གསུམ་པ་བརྩམས་པའི་དགེ་བ་བསྔོ་བ་འདོད་གསོལ་དང་བཅས་ཏེ་བཤད་པ་ལ། བསྔོ་བ་དང་། འདོད་དོན་གསོལ་བ། དོན་བསྡུ་བ་གསུམ། དང་པོ་ལ་མདོར་བསྟན་རྒྱས་བཤད་གཉིས། དང་པོ་ནི། དེ་ལྟར་བདག་གིས་བསྟོད་པའི་ནུས་མཐུ་ལས། །རབ་དཀར་དགེ་བ་ཟླ་ལྟར་དཀར་བ་དེས། །མར་གྱུར་དོན་དུ་སྟོབས་བཅུ་མངའ་བ་ཡི། །གོ་འཕང་ཚེ་འདིར་བདེ་བླག་ཐོབ་པར་ཤོག །༈ གཉིས་པ་རྒྱས་པར་བཤད་པ་ལ། རང་དོན་ཕུན་ཚོགས་བྱང་ཆུབ་འཐོབ་པའི་རྒྱུར་བསྔོ་བ་དང༌། གཞན་དོན་ཕུན་ཚོགས་འཕྲིན་ལས་ལྷུན་གྱིས་འགྲུབ་པའི་རྒྱུར་བསྔོ་བ་གཉིས། དང་པོ་ནི། དཔལ་ལྡན་རིག་བྱེད་ལྷ་མོའི་བསྐྱེད་པའི་རིམ། །རྣལ་འབྱོར་བསམ་གཏན་ལ་གཞོལ་ཡེ་ཤེས་མེས། །ཐ་མལ་སྣང་ཞེན་བུད་ཤིང་མ་ལུས་པ། །རིང་བོར་མི་ཐོགས་མྱུར་དུ་སྲེག་པར་ཤོག །༈ གཉིས་པ་གཞན་དོན་ཕུན་ཚོགས་
འཕྲིན་ལས་ལྷུན་གྱིས་འགྲུབ་པའི་རྒྱུར་བསྔོ་བ་ལ། དབང་དུ་སྡུད་པའི་ཕྱིར་སྨོན་པ་དང༌། བསྡུས་ནས་སྨིན་ཅིང་གྲོལ་བའི་ཕྱིར་སྨོན་པ་གཉིས། དང་པོ་ནི། ཏིང་འཛིན་སྒྱུ་འཕྲུལ་འོད་ཟེར་ཀྱོ་བ་ཡིས། །དབང་དུ་བྱ་བའི་བསྒྲུབ་བྱ་རླུང་དཀྱིལ་སྟེང༌། །བསིལ་ཟེར་བྱེད་དམར་ལ་བཀོད་འཐོར་བྱེད་ཤུགས། །དྲག་པོས་སྐད་ཅིག་ཉིད་ལ་འགུགས་པར་ཤོག །གཉིས་པ་ནི། མདུན་དུ་འོངས་སྙིང་ཨུཏྤལ་མདའ་རྣོན་གྱིས། །ཕུག་པར་དཔའ་བརྟན་སྙིང་སྟོབས་སྲོག་ཤི་སྟེ། །རབ་མྱོས་གོས་བྲལ་བདག་གི་རྐང་པའི་མཐིལ། །ལྕེ་ཡིས་བལྡག་ཅིང་ཅི་སྨྲས་སྒྲུབ་པར་ཤོག །༈ གཉིས་པ་འདོད་དོན་ལ་གསོལ་བ་འདེབས་པ་ལ་གསུམ། སྐབས་ཀྱི་འདོད་དོན་གཙོ་བོ་ངོས་བཟུང་སྟེ་གསོལ་བ་འདེབས་པ། དེ་ལ་ཕྱིའི་མཐུན་རྐྱེན་ཕུན་སུམ་ཚོགས་པའི་དོན་དུ་གསོལ་བ་འདེབས་པ། ནང་གི་མཐུན་རྐྱེན་ཕུན་སུམ་ཚོགས་པའི་དོན་དུ་གསོལ་བ་འདེབས་པའོ། །དང་པོ་བསྟན་འགྲོ་སྤྱི་བྱེ་བྲག་གི་ཕན་བདེའི་རྩ་ལག་༸རྒྱལ་དབང་རིན་པོ་ཆེའི་འཕྲིན་ལས་ལ་རག་ལས་ཚུལ་དང་བཅས་ཏེ་སྟོན་པར། ཁྱད་པར་བསྟན་དང་འགྲོ་བའི་དོན་ཆེན་གྱི། །རྩ་ལག་མཐར་ཐུག་རྒྱལ་དབང་རྡོ་རྗེ་འཆང༌། །གང་སྐུའི་སྤྲུལ་བའི་རོལ་གར་གསར་འཛུམ་ལ། །ཆེ་ཕྲའི་འགྲོ་བ་མ་ལུས་འདུད་པར་མཛོད། །གཉིས་པ་ནི། དབྱར་གྱི་ལང་ཚོ་དར་བའི་ཀུ་ཤའི་མདངས། །རབ་བཀྲ་ལོ་མའི་ཁུར་གྱིས་ལྕི་བའི་མདའ། །འདབ་ལྡན་དྷ་ནུའི་ཤུགས་ཀྱིས་ཕ་རོལ་བོའི། །ཡིད་ཀྱི་ཁྱེ་འུ་མྱོས་བྱེད་ཟུག་རྔུས་ཆོམས། །གསུམ་པ་ལ། རྗེ་རྒྱལ་བ་གཉིས་པ་ལྟར་ལུང་རྟོགས་ཀྱི་བསྟན་པ་ཡོངས་སུ་རྫོགས་པའི་མངའ་བདག་ཏུ་གྱུར་པའི་ཆེད་དང༌། དེ་ཐམས་ཅད་གཙོ་འཁོར་ཅི་རིགས་པའི་ཚུལ་དུ་ལམ་གྱི་མཐར་ཐུག་འདིའི་སྒྲུབ་བྱེད་དུ་འགྱུར་བའི་ཕྱིར་
གསོལ་བ་འདེབས་པ་གཉིས་རིམ་བཞིན་ཤོ་ལོ་ཀ་གཉིས་ཀྱིས་སྟོན་པར། དང་པོ་ནི། གཏིང་དཔག་དཀའ་ཞིང་མཐའ་བྲལ་གསུང་བསྟན་བཅོས། །ས་བཅུ་ལམ་ལྔའི་གྲོགས་འགུགས་དགའ་མ་གང༌། །ཟུར་ཕུད་ལྔ་པ་དགེ་སློང་གཟུགས་འཆང་བའི། །སྙིང་ལས་འོངས་ཏེ་འདི་ཡི་མཛའ་བོར་ཁུག །གཉིས་པ་ནི། བརྩེ་དང་གཞན་ཕན་རལ་གྲིས་བརྗིད་པ་ཡི། །དམ་བཅའི་གོ་ཆ་སྲ་བའི་དཔའ་བོ་དང༌། །རྣམ་དག་ཚུལ་ཁྲིམས་གྲོགས་མཆོག་མཁས་བཙུན་བཟང༌། །གཡོག་འཁོར་བཅས་པ་སྲོག་ནི་གཅིག་ཏུ་སྒྲུབས། །གསུམ་པ་དོན་བསྡུ་བའང༌། སྲོག་ནི་གཅིག་ཏུ་སྒྲུབས། །ཞེས་པ་འདིས་བསྟན་པ་ཡིན་ནོ། །༈ གསུམ་པ་མཇུག་གི་དོན་ལ། བསྟན་བཅོས་ཇི་ལྟར་བརྩམས་པའི་ཚུལ། བརྩམས་པའི་དགོས་དོན་འགྲུབ་པར་སྨོན་པ། རྩོམ་པ་པོའི་མཚན་བསྟན་པ་གསུམ། དང་པོ་ནི། དེ་ལྟར་བསྟོད་དང་སྨོན་པའི་ཨནྡ་རྙིལ། །བསམ་བཟང་སྲད་བུ་ཆེས་དཀར་རིང་པོ་ལ། །སྟར་དུ་བརྒྱུས་པའི་རྒྱན་ཕྲེང་དོ་ཤལ་འདི། །ཚུལ་བཞིན་ལྷ་མོ་ཁྱོད་ཀྱིས་མགུལ་བར་ཆོངས། །གཉིས་པ་ནི། ལས་འབྲས་རྟེན་འབྲེལ་བསླུ་བ་མེད་པ་དང་། །རིག་བྱེད་མཛེས་མ་མཐུ་སྟོབས་ཐོགས་མེད་པས། །ཇི་ལྟར་རེ་བའི་འབྲས་བུ་བདེ་བླག་ཏུ། །གེགས་དང་ཉེར་འཚེ་མེད་པར་འགྲུབ་གྱུར་ཅིག །གསུམ་པ་ནི། ཅེས་ཁམས་གསུམ་དབང་སྡུད་ལྷ་མོ་རིག་བྱེད་མ་ལ་བསྟོད་པ་འདི་ནི་ཆོས་སྨྲ་བ་སྙོམས་ལས་པ་བློ་བཟང་དཔལ་ལྡན་ཡེ་ཤེས་ཀྱིས་དོན་ཆེན་པོ་ལ་དམིགས་ནས་སུག་བྲིས་སུ་བགྱིས་པའོ། །ཞེས་གསུངས་ཏེ། འདིར་ཡང་དེ་དང་རྗེས་སུ་མཐུན་པའི་དགོས་དོན་ལྷུན་གྱིས་འགྲུབ་པའི་ཕྱིར་རོ། ། སརྦ་མངྒ་ལཾ།།