བཅོམ་ལྡན་འདས་མ་ལྷ་མོ་རིག་བྱེད་མ་ལ་འདོད་དོན་གསོལ་བའི་ཚིགས་བཅད།
བཅོམ་ལྡན་འདས་མ་ལྷ་མོ་རིག་བྱེད་མ་ལ་འདོད་དོན་གསོལ་བའི་ཚིགས་སུ་བཅད་པ་བཀྲ་ཤིས་ཆར་འབེབས་ཞེས་བྱ་བ་བཞུགས་སོ། །ལྷུན་གྲུབ་བདེ་ཆེན་གྱི་ཆོས་དབྱིངས་ཀུན་གསལ་གྱི་ངོས་ལ། །གཞན་ཕན་འཕྲིན་ལས་ཀྱི་རྩིབས་བརྒྱ་ཁོར་ཡུག་ཏུ་བཀྲ་བས། །སྲིད་ཞིའི་གདུང་སེལ་གྱི་གྲིབ་བསིལ་འགོག་མེད་དུ་སྤྲོ་བ། །བཅོམ་ལྡན་རིག་བྱེད་ཀྱི་དབང་མོས་བུ་བཞིན་དུ་དགོངས་ལ། །མ་ཞུམ་སྙིང་སྟོབས་ཀྱིས་བཟུང་བའི་ལྷག་བསམ་གྱི་ཡུ་བ། །མདོ་སྔགས་ཟུང་འབྲེལ་གྱི་ཉམས་ལེན་གོས་བཟང་གི་ཤམ་བུ། །རྣམ་གྲོལ་ནོར་བུ་ཡི་ཏོག་གི་གཟི་འོད་དང་བཅས་པའི། །བསྟན་པའི་གདུགས་དཀར་འདི་ཕྱོགས་བཅུར་བསྒྲེང་བ་རུ་མཛོད་ཅིག །ཇི་ལྟ་ཇི་སྙེད་ཀྱི་ཆོས་ཚུལ་རྒྱ་མཚོ་ཡི་ཀློང་ན། །མཉམ་རྗེས་དབྱེར་མེད་ཀྱི་རོལ་བས་ཅི་དགའ་རུ་རྩེན་ཞིང༌། །འགྲོ་ལ་རྗེས་ཆགས་ཀྱི་གསེར་མིག་ཉི་ལྟར་དུ་འཁྱིལ་བ། །བཅོམ་ལྡན་རིག་བྱེད་ཀྱི་དབང་མོས་བུ་བཞིན་དུ་དགོངས་ལ། །མདོ་རྒྱུད་མན་ངག་གི་ཀླུང་བརྒྱ་ལྷན་ཅིག་ཏུ་འཁྱིལ་བའི། །རྙོག་བྲལ་དགེ་ལྡན་གྱི་ལུགས་བཟང་ཡིད་བཞིན་གྱི་མཚོ་ལ། །བློ་གྲོས་ཉ་ཆུང་གི་བང་རྩལ་ཐོགས་མེད་དུ་འགྱུར་བའི། །ཀློག་པ་ཐོས་བསམ་གྱི་དགའ་སྟོན་རྒྱས་པ་རུ་མཛོད་ཅིག །བསོད་ནམས་ཡེ་ཤེས་ཀྱི་ཚོགས་གཉིས་གསེར་བཟང་ལས་གྲུབ་ཅིང༌། །མཆོག་ཐུན་དངོས་གྲུབ་ཀྱི་རིན་ཆེན་བྱེ་བ་ཡིས་གཏམས་པས། །བགྲང་ཡས་ལུས་ཅན་གྱི་རེ་སྐོང་འདོད་འཇོ་ཡི་བུམ་བཟང༌། །བཅོམ་ལྡན་རིག་བྱེད་ཀྱི་དབང་མོས་བུ་བཞིན་དུ་དགོངས་ལ། །བྱིན་རླབས་བུམ་དབང་གི་ཆུ་རྒྱུན་སྤྱི་བོ་ནས་བསྒྲེངས་ཏེ། །ཉེས་ལྟུང་སྡིག་སྒྲིབ་ཀྱི་དྲི་མ་ལྷག་མེད་དུ་སྦྱངས་ནས། །ཉམས་རྟོགས་ཡོན་ཏན་གྱི་ནུས་པ་བདེ་བླག་ཏུ་སྨིན་པའི། །སྤོང་བ་བསམ་གཏན་གྱི་འབྲས་བུ་དར་བ་རུ་མཛོད་ཅིག །ཁམས་གསུམ་དབང་བྱེད་ཀྱི་དཔལ་ཡོན་དྲི་
བཟང་གི་ཕོ་ཉས། །སྐལ་བཟང་ཐར་འདོད་ཀྱི་བུང་བ་དབང་མེད་དུ་བཀུག་ནས། །ཕུལ་བྱུང་དངོས་གྲུབ་ཀྱི་སྦྲང་རྩིའི་དགའ་སྟོན་གྱིས་ཚིམ་མཛད། །བཅོམ་ལྡན་རིག་བྱེད་ཀྱི་དབང་མོས་བུ་བཞིན་དུ་དགོངས་ལ། །སྲིད་འབྱོར་ཆུ་མཚོ་ལས་སྐྱེས་ཀྱང་སྲིད་པ་ཡིས་མ་གོས། །བཤད་སྒྲུབ་ཐུབ་བསྟན་གྱི་དགའ་ཚལ་མཛེས་བྱེད་ཀྱི་རྒྱན་མཆོག །མཐར་ཐུག་ངེས་ལེགས་ཀྱི་སྙིང་པོའི་ཟེའུ་འབྲུ་ཡིས་སྤུད་པའི། །བསྟན་འགྲོའི་དོན་ཆེན་གྱི་འདབ་བརྒྱ་བཞད་པ་རུ་མཛོད་ཅིག །སོར་རྟོག་ཡེ་ཤེས་ཀྱི་སྒྱུ་འཕྲུལ་ནཱ་ད་ཡི་རང་སྒྲ། །བཅུ་ཕྲག་དྲུག་ལྡན་གྱི་དབྱངས་སྙན་འགག་མེད་ཀྱི་ཆོས་དུང༌། །ནུབ་ཕྱོགས་བདེ་ལྡན་གྱི་མགོན་དང་དབྱེར་མེད་ཀྱི་ལྷ་མོ། །བཅོམ་ལྡན་རིག་བྱེད་ཀྱི་དབང་མོས་བུ་བཞིན་དུ་དགོངས་ལ། །ཟླ་བྲལ་རྣམ་དཔྱོད་ཀྱི་རང་མདངས་ཟླ་ཤེལ་ལྟར་གསལ་ཞིང༌། །གནས་ལྔ་རིག་པ་ཡི་སྐྱེ་བ་རྣམ་ལྔ་ཡི་མཐར་སོན། །འཆད་རྩོད་རྩོམ་གསུམ་གྱི་སྒྲ་དབྱངས་ས་གསུམ་དུ་ཁྱབ་པས། །སྐྱེ་བོ་གཏི་མུག་གི་གཉིད་ལས་སློང་བ་རུ་མཛོད་ཅིག །དགའ་བ་བཅུ་དྲུག་གི་ལང་ཚོ་ལྷན་སྐྱེས་ཀྱི་གཞོན་ནུས། །སྒྲིབ་བྲལ་ཆོས་དབྱིངས་ཀྱི་མཛེས་མར་རྩེ་དགའ་ཡིས་རོལ་བའི། །ཤྲཱི་གཉིས་མེད་ཀྱི་ཡེ་ཤེས་དཔལ་བེའུ་ཡི་རང་མདངས། །བཅོམ་ལྡན་རིག་བྱེད་ཀྱི་དབང་མོས་བུ་བཞིན་དུ་དགོངས་ལ། །ལུང་རྟོགས་དམ་ཆོས་ཀུན་གྲུ་བཞི་ལམ་ལམ་དུ་འཆར་ཞིང༌། །ཐོས་བསམ་སྒོམ་གསུམ་གྱི་གཟི་འོད་འབུམ་ཕྲག་ཏུ་འཁྱུག་པའི། །ཐུགས་མཚན་དཔལ་བེའུ་ཡི་རི་མོ་སྙིང་ག་རུ་བཀོད་ནས། །ལེགས་བྱས་འདོད་པ་ཀུན་ལྷུན་གྱིས་གྲུབ་པ་རུ་མཛོད་ཅིག །མི་མཐུན་བདུད་བཞི་ཡི་དགྲ་ལས་རྣམ་རྒྱལ་གྱི་མཚན་མ། །ཕྱག་བཞིའི་གར་སྟབས་ཀྱི་རི་མོ་
མཚར་སྡུག་གིས་སྤྲས་ཤིང༌། །ལས་བཞིའི་འཕྲིན་ལས་ཀྱི་གཡེར་ཁའི་སྒྲ་བརྒྱ་རུ་རྒོད་པ། །བཅོམ་ལྡན་རིག་བྱེད་ཀྱི་དབང་མོས་བུ་བཞིན་དུ་དགོངས་ལ། །མི་དང་མི་མིན་གྱི་ཉེར་འཚེ་ཐམས་ཅད་ལས་རྒྱལ་ཞིང༌། །མ་སྨད་སྙན་གྲགས་ཀྱི་དར་ལྕེ་སྲིད་གསུམ་དུ་གཡོ་བས། །དྲེགས་ལྡན་རྒྱལ་བློན་ཀུན་སྡེ་བཞིའི་དཔལ་འབྱོར་དང་བཅས་པ། །བདག་གི་མངའ་འབངས་སུ་དགའ་བཞིན་གཞུག་པ་རུ་མཛོད་ཅིག །བདེན་གཉིས་དབྱེར་མེད་ཀྱི་ཟུང་འཇུག་ལྟེ་བ་ལས་ཐོན་ཞིང༌། །གསང་གསུམ་སྒྱུ་འཕྲུལ་གྱི་རོལ་གར་རྩིབས་སྟོང་དུ་འབར་བའི། །ཁོར་ཡུག་དམིགས་མེད་ཀྱི་སྙིང་རྗེའི་མུ་ཁྱུད་ཀྱིས་བསྡམས་པ། །བཅོམ་ལྡན་རིག་བྱེད་ཀྱི་དབང་མོས་བུ་བཞིན་དུ་དགོངས་ལ། །མཁས་བཙུན་བཟང་གསུམ་གྱི་བདག་ཉིད་དམ་ཆོས་ཀྱི་འཁོར་ལོ། །ཐུབ་བསྟན་གླིང་བཞི་ཡི་མཁའ་ལ་ཐོགས་མེད་དུ་བསྒྱུར་བས། །འཇམ་དཔལ་སྙིང་པོ་ཡི་ཆོས་ཀྱི་རྒྱལ་སྲིད་ལ་འཁོད་ནས། །མཁའ་མཉམ་ལུས་ཅན་གྱི་མགོན་དུ་འགྱུར་བ་རུ་མཛོད་ཅིག །ཅེས་ཡུལ་དང་བྱ་བ་གཉིས་ཀ་བཀྲ་ཤིས་པའི་རྟགས་བརྒྱད་ལ་སྦྱར་ཏེ། བཅོམ་ལྡན་འདས་མ་ལྷ་མོ་རིག་བྱེད་མ་ལ་འདོད་དོན་གསོལ་བའི་ཚིགས་སུ་བཅད་པ་བཀྲ་ཤིས་ཆར་འབེབས་ཞེས་བྱ་བ་འདི་ནི། ྋབཙུན་པ་དཀོན་མཆོག་བསྟན་པའི་སྒྲོན་མེས་དམ་པ་སྔ་མའི་གསུང་ཟུར་བཅོས་པ་ཙམ་མ་ཡིན་པར། རང་བློས་དཔྱད་དེ་བསིལ་ལྡན་གྱི་ཆུ་བོ་གངྒཱ་ཡན་ལག་བརྒྱད་དང་ལྡན་པའི་ཀླུང་ཆེན་རྨ་ཆུའི་འགྲམ་དུ་སྦྱར་བའོ། ། བཀྲ་ཤིས།།