འཕགས་མ་རིག་བྱེད་མ་ཕྱི་སྒྲུབ་ཀྱི་རྗེས་གནང་བྱ་ཚུལ།
འཕགས་མ་རིག་བྱེད་མ་ཕྱི་སྒྲུབ་ཀྱི་ཐུན་མོང་དང་ཐུན་མོང་མ་ཡིན་པའི་རྗེས་གནང་བྱ་ཚུལ་གསལ་བར་བཀོད་པ་དངོས་གྲུབ་འགུགས་པའི་ལྕགས་ཀྱུ་ཞེས་བྱ་བ་བཞུགས་སོ། །
ན་མོ་གུ་རུ་ཀུ་རུ་ཀུལླེ་ཡེ། དབང་གི་དངོས་གྲུབ་ནོར་བུའི་དགའ་སྟོན་ལ། །སྦྱོར་བའི་གྲགས་སྙན་གཏམ་གྱིས་ཡིད་འཕྲོག་པའི། །སྐལ་བཟང་དོན་མཐུན་འཁོར་བའི་རྒྱ་མཚོ་ལས། །སྒྲོལ་མཛད་བཅོམ་ལྡན་མ་ཡིས་དགེ་ལེགས་སྩོལ། །དེའང་བཅོམ་ལྡན་འདས་མ་ལྷ་མོ་རིག་བྱེད་མའི་རྗེས་སུ་གནང་བ་བྱེད་པ་ལ། དཀའ་བོའི་ཕྱོགས་ཀྱི་ཚེས་བརྒྱད་དམ། འཕྲོད་སྦྱོར་བཟང་པོ་ལ་བབས་པའི་དུས་སུ་གནས་ཁང་བྱི་དོར་དང་ཆག་ཆག་བྱས། བ་བྱུང་དང་དྲི་བཟང་དམར་པོ་བྱུགས་པའི་སྟེགས་བུར་དུར་ཁྲོད་མེ་རི་དང་བཅས་པའི་དབུས་སུ་ཆོས་འབྱུང་དང༌། དེའི་ལྟེ་བར་པདྨ་དམར་པོ་འདབ་མ་བརྒྱད་པ། དེའི་དབུས་སུ་རྡུལ་ཚོན་ནམ་འབྲས་ཀྱི་ཚོམ་བུ་དམར་པོ་དགོད། ཆུ་བཞི་སྔོན་དུ་འགྲོ་བའི་ཉེར་སྤྱོད་དང༌། གཏོར་མ་པད་འདབ་བཞི་པ་སོགས་མཆོད་པ་ཐམས་ཅད་ཀྱང་ཁ་དོག་དམར་པོ་བྱ། སློབ་དཔོན་གྱི་མདུན་དུ་ནང་མཆོད་རྡོར་དྲིལ་མེ་ཏོག་རྣམས་བཤམ། རྗེས་གནང་ཐུན་མོང་མ་ཡིན་པ་བྱེད་ན། ཚོམ་བུའི་སྟེང་དུ་མཉྫིའི་ཁར་མཎྜལ་ལ་ཟན་ལེབ་སྒོར་མོ། དེའི་སྟེང་དུ་ཟླ་གམ་བཅད་ཁ་གདན་ལ་བསྟན་པ་མར་གྱི་ནོར་བུ་སོགས་ཀྱི་རྒྱན་སྤྲས་ཤིག་ཀྱང་དགོད། དེ་ནས་བདག་བསྐྱེད་བཟླས་པ་དང་བཅས་པ་སྔོན་དུ་བཏང༌། བུམ་པའི་ནང་དུ་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ཡིག་གི་མཐར་སྔགས་འཕྲེང་གིས་བསྐོར་བ་ལས་འོད་ཟེར་འཕྲོས། རྒྱལ་བ་སྲས་བཅས་ཀྱི་བྱིན་རླབས་ཐམས་ཅད་བསྡུས་ཏེ་སྔགས་འཕྲེང་ལ་ཐིམ། དེ་ལས་བདུད་རྩིའི་རྒྱུན་བབས་པས་བུམ་པ་གང་བར་བསམས་ལ། འཁྱིལ་བའི་སྔགས་བཟླ། ཟླ་
བ་ཧཱུཾ་ཡིག་སྔགས་འཕྲེང་དང་བཅས་པ་འོད་དུ་ཞུ་ནས་བུམ་པའི་ཆུ་ལ་ཐིམ་པར་བསམ། དེ་ནས་མདུན་གྱི་ཚོམ་བུ་བསངས་སྦྱངས། སྟོང་པའི་ངང་ལས་བཅོམ་ལྡན་འདས་མར་བསྐྱེད་དེ། མཆོད་བསྟོད་བཟླས་པ་གཏོར་འབུལ་སོགས་གཞུང་བཞིན་བྱས་ལ་སློབ་མའི་དོན་དུ་གསོལ་བ་གདབ། དེ་ནས་སློབ་མ་རྣམས་ཁྲུས་བྱས་ཏེ་གྲལ་དུ་འཁོད་པར་མེ་ཏོག་བཀྱེ་བསྡུ་བྱས་ཤིང་མཎྜལ་འབུལ་དུ་གཞུག ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱོང་བ། །དེ་རིང་བཤད་པའི་རིན་ཆེན་གཏེར། །གཙོ་བོས་བདག་ལ་བཀའ་དྲིན་སྩོལ། །ཅེས་པ་ལན་གསུམ་གྱིས་གསོལ་བ་གདབ། དེ་ནས་ཀུན་སློང་འཆོས་པ་ནི། རྗེ་བདག་ཉིད་ཆེན་པོས། འདིར་འཇུག་པ་ནི་སྐལ་བ་བཟང་ངོ་ཞེས། །ལེགས་པར་སོམས་ལ་དགའ་བའི་བཞིན་གྱི་མདངས། །རབ་གསལ་འཛུམ་པའི་ཉམས་དང་ལྡན་པ་ཡིས། །རྣམ་གཡེང་སྣོད་ཀྱི་སྐྱོན་གསུམ་སྤོང་ལ་ཉོན། །ཞེས་གསུངས་པ་ལྟར། རྙེད་དཀའ་ལ་དོན་ཆེ་བའི་དལ་འབྱོར་གྱི་རྟེན་བཟང་པོ་ཐོབ། མདོ་སྔགས་ཟུང་དུ་འཇུག་པའི་བསྟན་པའི་སྙིང་པོ་དྲི་མ་མེད་པ་འདི་ལྟ་བུ་དང་མཇལ། མཆོག་དང་ཐུན་མོང་གི་དངོས་གྲུབ་བདེ་བླག་ཏུ་སྩོལ་པའི་ལྷ་མཆོག་ཁྱད་པར་ཅན་འདི་ལྟ་བུ་སྒྲུབ་ཏུ་ཡོད་པའི་དུས་འདིར། འདི་སྣང་སྨྱོན་པའི་ཟློས་གར་ལྟ་བུའི་རྗེས་སུ་མ་འབྲངས་པར། གདམས་པ་ཟབ་མོ་འདི་ལྟ་བུ་ལེགས་པར་ཉན་ཅིང༌། ཐོས་དོན་སྒྲུབ་པས་ཉམས་སུ་བླངས་ནས་སྲིད་ཞིའི་འཇིགས་
པ་མཐའ་དག་ལས་གྲོལ་བའི་གོ་འཕང་བླ་ན་མེད་པ་མངོན་དུ་བྱས་ཏེ། སྡུག་བསྔལ་གྱི་རྒྱ་མཚོར་བྱིངས་པའི་མ་རྒན་སེམས་ཅན་ཐམས་ཅད་ཀྱང་བདེ་ཆེན་སངས་རྒྱས་ཀྱི་ས་ལ་འགོད་པར་བྱ། དེའི་ཕྱིར་དུ་དམ་པའི་ཆོས་ཟབ་མོ་འདི་ཉིད་གསན་སྙམ་དུ་ཆོས་ཉན་པ་དོན་ལྡན་དུ་འགྱུར་བའི་ཀུན་སློང་ཀུན་སྤྱོད་ཀྱི་རིམ་པ་མཐའ་དག་ལེགས་པར་གསལ་བཏབ་སྟེ་གསན་དགོས། གསན་བྱ་དམ་པའི་ཆོས་ནི་དཔལ་ལྡན་ས་སྐྱ་པ་རྣམས་ཀྱི་གདམས་པ་རྒྱ་མཚོ་ལྟ་བུའི་ནང་ནས་ཤིན་ཏུ་ཟབ་ཅིང་གསང་བ་ཐུན་མོང་བསྒྲུབས་པས་མཆོག་ཞར་ལ་འབྱུང་བ་དམར་པོ་སྐོར་གསུམ་དུ་གྲགས་པའི་ནང་ཚན་རྒྱལ་བ་ཀུན་གྱི་སོ་སོར་རྟོག་པའི་ཡེ་ཤེས་ཀྱི་རང་མདངས་བཅོམ་ལྡན་འདས་མ་ལྷ་མོ་རིག་བྱེད་མའམ་ཀུ་རུ་ཀུལླེ་ཞེས་དཔལ་ཀྱེ་རྡོ་རྗེའི་རྒྱུད་འབུམ་ལྔ་དང་བརྟག་གཉིས་སོགས་རྒྱུད་སྡེ་དུ་མ་ལས་གསལ་བར་གསུངས་པའི་ལྷ་མཆོག་ཁྱད་པར་ཅན། འདིའི་བརྒྱུད་པའི་བཀའ་བབས་ལའང་རྩ་བ་ལྟ་བུར་གྱུར་པ་རྒྱལ་པོ་ལྷན་སྐྱེས་རོལ་པ་ནས་བརྒྱུད་པའི་ཕྱི་སྒྲུབ་བམ་གཙོ་རྐྱང་དཔའ་མོ་གཅིག་པར་གྲགས་པ་དང༌། ཀླུ་སྒྲུབ་ནས་བརྒྱུད་པའི་ནང་སྒྲུབ་ལྷ་ལྔ་དང༌། ཌོམྦྷི་ཧེ་རུ་ཀ་ནས་བརྒྱུད་པའི་གསང་སྒྲུབ་ལྷ་ལྔ་སྟེ་གསུམ་དུ་ཡོད་ཅིང༌། ཕྱི་སྒྲུབ་གསང་སྒྲུབ་གཉིས་ལ་རྗེས་གནང་གི་རྒྱུན་ཡང་ད་ལྟའི་བར་དུ་མ་ཉམས་པར་བཞུགས་པ་ལས། འདིར་འབུལ་བར་བྱ་བ་ནི་ཕྱི་སྒྲུབ་ཀྱི་རྗེས་སུ་གནང་བ་ཡིན། འདིའི་ལོ་རྒྱུས་ནི་སྔོན་རྒྱ་གར་དུ་རྒྱལ་པོ་ལྷན་ཅིག་སྐྱེས་པའི་རོལ་བ་ཞེས་བྱ་བ་ལོངས་སྤྱོད་མངའ་ཐང་ཆེ་ཞིང་བཙུན་མོ་མང་དུ་ཡོད་པ། དེའི་ནང་
ནས་བཙུན་མོ་རྗེའུ་རིགས་མ་ཞིག་ལ་རྒྱལ་པོ་འཁོར་དུ་མ་འདོད་པས། དེས་རང་གི་བྲན་མོ་ཞིག་རྒྱལ་པོ་དབང་དུ་བྱེད་པའི་རིག་པ་ཚོལ་བའི་ཕྱིར་མངགས་པས། བྲན་མོ་དེ་ཉིད་སྐུད་པ་འཚོང་བའི་ཚོང་དུས་སུ་ཕྱིན་པ་ན། དེར་བུད་མེད་དམར་སྨུག་རས་གོས་དམར་པོ་གྱོན་པ་མཛེས་ཤིང་བརྗིད་ཆགས་པ་ཞིག་མཐོང་ནས་བྲིས་པས་གདམས་པ་ཡོད་པར་ཡིད་ཆེས་ཤིང་གསོལ་བ་བཏབ་པ་ན། གང་ལ་དམིགས་པ་དེ་ཉིད་ལ་བྱིན་ཅིག་ཅེས་རིལ་བུ་ཞིག་གནང༌། དེས་བཙུན་མོ་ལ་ཕུལ་ཡང་ཐེ་ཚོམ་སྐྱེས་ཏེ་ཕོ་བྲང་གི་ཉེ་ལོགས་ན་མཚོ་ཆུང་ཞིག་ཡོད་པ་དེར་བསྐྱུར་བས། དེའི་ནུབ་མོ་ནས་ཀླུའི་རྒྱལ་པོ་དེ་ཉིད་ལྷན་སྐྱེས་རོལ་བའི་རྣམ་པར་བརྫུས་ནས་བཙུན་མོའི་སར་འོངས་ཤིང་དེ་དང་ལྷན་ཅིག་འགྲོགས་པས་སེམས་ཅན་དང་ལྡན་པར་གྱུར་པ་ན། རྒྱལ་པོ་ཁྲོས་ཏེ་ཆད་པ་གཅོད་པར་བརྩམས་པ་ལ་སྔར་གྱི་ལོ་རྒྱུས་རྣམས་གསོལ་བས་རྒྱལ་པོ་ཐེ་ཚོམ་སྐྱེས་ཏེ། སྔར་རིལ་བུ་བསྐུར་བའི་བུད་མེད་དེ་ཚོལ་དུ་བཅུག་ནས་ཕོ་བྲང་དུ་སྤྱན་དྲངས་པ། དེ་ཉིད་རྗེ་བཙུན་མ་དངོས་སུ་གྱུར་ཏེ་གདམས་པ་དང་རྗེས་སུ་གནང་བ་སྩལ། རྒྱལ་པོས་ཀྱང་ཚུལ་བཞིན་ཉམས་སུ་བཞེས་པས་མཆོག་གི་དངོས་གྲུབ་ཐོབ་སྟེ། གདམས་པ་འདིའི་སྒོ་ནས་གདུལ་བྱ་མཐའ་ཡས་པ་སྨིན་ཅིང་གྲོལ་བར་མཛད། དེ་ནས་བཟུང་སྟེ་དམ་པ་བར་མ་ཆད་པ་ལ་རིམ་པར་བརྒྱུད་ཅིང༌། དེ་ཐམས་ཅད་ཀྱིས་འདིའི་སྒོ་ནས་བསྟན་པ་དང་འགྲོ་བའི་དོན་བསམ་གྱིས་མི་ཁྱབ་པ་མཛད་པས་བྱིན་རླབས་ཀྱི་གཏེར་ཆེན་པོར་གྱུར་པ་ཡིན།
དེས་ན་གདམས་པ་འདི་ཉིད་ཉམས་སུ་ལེན་པར་བྱེད་པ་ལ། ཐོག་མར་རྒྱུད་སྣོད་རུང་དུ་སྒྲུབ་པ་སྨིན་བྱེད་དབང་གི་དོད་ཐུབ་རྗེས་སུ་གནང་བ་ལེགས་པར་ཐོབ་པ་གལ་ཆེ་སྟེ། ལེགས་གྲུབ་ལས། གཞན་གྱིས་རྗེས་སུ་མ་གནང་བར། །གསང་སྔགས་གཟུང་བར་མི་བྱ་སྟེ། །ཞེས་གསུངས་པ་བཞིན། རང་གི་ལུས་ངག་ཡིད་གསུམ་ལྷའི་སྐུ་གསུང་ཐུགས་གསུམ་གྱི་རྗེས་སུ་སྦྱོར་བར་བྱེད་པ་ལ། བླ་མ་དང་ལྷག་པའི་ལྷས་དེ་ལྟར་དུ་གནང་བ་སྩལ་བ་ནི་ཆོས་དེ་ཉིད་ཉམས་སུ་ལེན་པ་ལ་དབང་བར་འགྱུར་བས། དབང་གི་གོ་དོན་དང་ཡང་ཕྱོགས་མཚུངས་པ་ཡིན། དེའི་རྒྱུ་མཚན་གྱིས་གསང་བ་སྤྱི་རྒྱུད་ལས། སྔགས་ཀྱི་ནུས་པ་བསྐྱེད་པའི་དབང༌། འབྱོར་བ་སྐྱེད་པའི་དབང༌། བགེགས་ཞི་བར་བྱེད་པའི་དབང༌། སྣོད་རུང་དུ་བྱེད་པའི་དབང་སྟེ་བཞི་གསུངས་པས། སྔ་མ་གསུམ་ཡང་རྗེས་གནང་དང་རིགས་གཏད་སོགས་ལ་གཙོ་བོར་བྱེད་པ་ཡིན། དེའང་ཆོས་འདི་ནི་གསང་སྔགས་ཟབ་མོའི་གདམས་པ་ཕུལ་དུ་ཕྱིན་པ་ཡིན་ཀྱང༌། དེ་ཐེག་ཆེན་གྱི་ཆོས་ཟབ་མོར་འགྲོ་བ་ཉམས་སུ་ལེན་པ་པོའི་གང་ཟག་ལ་རག་ལས། དེ་བསམ་པ་བྱང་ཆུབ་ཀྱི་སེམས་ལ་རག་ལས། དེའི་རྒྱུ་ཚོགས་བསགས་སྒྲིབ་སྦྱོང་ལ་རག་ལས་པས། ཚོགས་ཞིང་སྤྱན་དྲངས་ཏེ་མཆོད་པ་འབུལ་བ་སོགས་ཀྱི་སྤྱན་དམིགས་མ་ཡེངས་པ་མཛད་པར་ཞུ། བླ་མའི་ཐུགས་ཀ་ནས་འོད་ཟེར་འཕྲོས། རྩ་བརྒྱུད་ཀྱི་བླ་མ་རྣམས་སྟེང་གི་ཆ་ལ་བཞུགས་པའི་རྗེ་བཙུན་མ་ཀུ་རུ་ཀུལླེ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་བསམ་གྱིས་མི་ཁྱབ་པས་བསྐོར་བ་མདུན་གྱི་ནམ་
མཁར་སྤྱན་དྲངས། ཨོཾ་བཛྲ་ས་མ་ཛཿ དེ་ནས་ཐལ་མོ་སྦྱོར་དུ་བཅུག་ལ། ན་མོ་གུ་རུ་བྷྱཿ ན་མཿ ཀུ་རུ་ཀུལླེ་བྷྱཿ ཞེས་པ་ལན་གསུམ་གྱི་རྗེས་ཟློས་བྱ། དེ་ནས་སློབ་དཔོན་རང་ཉིད་ཀྱིས་ཕྱག་རྒྱ་དང་བཅས་ཏེ། ཨོཾ་ཀུ་རུ་ཀུལླེ་བཛྲ་པུཥྤེ་ཨཱཿ ཧཱུཾ། ནས་ཤཔྟའི་བར་གྱིས་མཆོད། དེ་ནས་དཀོན་མཆོག་གསུམ་ལ་སྐྱབས་སུ་འགྲོ་ཞིང་ཐོག་མེད་ནས་བསགས་པའི་སྡིག་པ་བཤགས་པ་ལ་སོགས་པ་ཡན་ལག་བདུན་པ་བྱ་སྙམ་པ་བྱས་ལ་འདིའི་རྗེས་ཟློས་མཛོད་ཅེས། དཀོན་མཆོག་གསུམ་ལ་ནས། འགྲུབ་པར་ཤོག་གི་བར་ལན་གསུམ་བྱ། དེ་ལྟར་རྒྱུད་དག་པར་བྱས་ནས་ཚོགས་ཞིང་རྣམས་རིམ་གྱིས་བསྡུས་ཏེ་མདུན་བསྐྱེད་ཀྱི་ལྷ་མོ་ལ་ཐིམ་པའི་མོས་པ་མཛོད་ཅིག །དེ་དག་གིས་སྔོན་འགྲོའི་རིམ་པ་རྣམས་སོང་ཟིན། དངོས་གཞི་ལ་སྐུའི་རྗེས་གནང་གི་སླད་དུ་དམིགས་པ་འདི་བཞིན་མཛད་པར་ཞུ། མདུན་བསྐྱེད་ཀྱི་ལྷ་མོའི་ཐུགས་ཀ་ནས་འོད་ཟེར་འཕྲོས། ཁྱེད་རང་རྣམས་ཀྱི་ལུས་ལ་ཞུགས་པས་ཚེ་ཐོག་མེད་ནས་བསགས་པའི་སྡིག་སྒྲིབ་བག་ཆགས་དང་བཅས་པ་སྦྱངས་ཏེ་ལུས་དྭངས་གསལ་འོད་ཀྱི་རང་བཞིན་ཅན་དུ་གྱུར། ཨོཾ་ཤཱུ་ནྱ་ཏ་ཞེས་སོགས་ཀྱིས་མངོན་རྟོགས་བཞིན་དུ་སློབ་མ་ལྷར་བསྐྱེད། བླ་མའི་ཐུགས་ཀའི་ཧྲཱིཿ ལས་འོད་ཟེར་འཕྲོས། ལྷོ་ཕྱོགས་རིག་བྱེད་ཀྱི་ཕུག་ན་བཞུགས་པའི་རྗེ་བཙུན་མའི་ཐུགས་ཀར་ཕོག་པས། དེའི་ཐུགས་རྒྱུད་བསྐུལ་ཏེ་ཐུགས་ཀ་ནས་འོད་ཟེར་དམར་པོའི་འཕྲེང་བ་བསམ་གྱིས་མི་ཁྱབ་པ་དམར་ཁྲིག་ཁྲིག་བྱོན་ཏེ་ཁྱེད་རང་རྣམས་ཀྱི་ལུས་ལ་ཐིམ་པས་ལུས་འོད་ཀྱི་རང་བཞིན་གྱུར། ཡང་འོད་ཟེར་འཕྲོས་སྣོད་བཅུད་ཐམས་
ཅད་ལ་ཕོག་པས། སྣོད་ཐམས་ཅད་གཞལ་ཡས་ཁང་དང་བཅུད་ཐམས་ཅད་རྗེ་བཙུན་མའི་རྣམ་པར་གྱུར་ཏེ་ཚུར་འདུས་ནས་ཁྱེད་རང་རྣམས་ལ་ཐིམ། ཡང་འོད་ཟེར་འཕྲོས་པ་ལྷོ་ཕྱོགས་རིག་བྱེད་ཀྱི་ཕུག་ན་བཞུགས་པའི་རྗེ་བཙུན་མའི་སྐུ་ལ་ཕོག་པས། དེ་ལས་རང་འདྲའི་སྐུ་ཆེ་ཆུང་དཔག་ཏུ་མེད་པ་སྤྱན་དྲངས་ཏེ་ཁྱེད་རང་རྣམས་ཀྱི་ལུས་ལ་སིབ་ཀྱིས་ཐིམ་པས་རྗེ་བཙུན་མའི་སྐུའི་བྱིན་རླབས་མ་ལུས་པ་ཐོབ་པའི་མོས་པ་མཛོད། ཅེས་དྲིལ་བུ་གསིལ་ཞིང་གུ་གུལ་གྱིས་བདུག སྔགས་ཀྱི་མཐར། བཛྲ་ཨ་བེ་ཤ་ཨ་ཨ། ཞེས་དང༌། ཛཿ ཧཱུཾ་བཾ་ཧོཿ ཞེས་བཏགས་པ་གང་མང་བརྗོད། དེས་རྗེ་བཙུན་མའི་སྐུའི་རྗེས་སུ་གནང་བ་ཐོབ། ལུས་ཀྱི་དྲི་མ་དག །ལུས་ལྷར་བསྒོམ་པ་ལ་དབང༌། རྗེ་བཙུན་མའི་སྐུ་དང་ཁྱེད་རང་རྣམས་ཀྱི་ལུས་དབྱེར་མེད་དུ་བྱིན་གྱིས་བརླབས་བྱུང་སྙམ་པའི་མོས་པ་བརྟན་པོ་མཛོད་ཅིག །དེ་ནས་གསུང་གི་རྗེས་གནང་གི་སླད་དུ་ཁྱེད་རྣམས་རྗེ་བཙུན་མར་གསལ་བའི་ཐུགས་ཀར་པད་ཉིའི་སྟེང་དུ་ཧྲཱིཿ ཡིག་ཅིག་གསལ་འདེབས་པ་དང༌། བླ་མ་དང་མདུན་བསྐྱེད་ཀྱི་རྗེ་བཙུན་མ་ལ་གུས་འདུད་དྲག་པོ་བྱས་པ་ན་དེ་གཉིས་ཀའི་ཐུགས་ཀ་ནས་སྔགས་ཀྱི་འཕྲེང་བ་བྱུང༌། ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། ཐུགས་ཀའི་ཧྲཱིཿ ཡིག་གི་མཐར་གཡས་སྐོར་དུ་འཁོད་པའི་མོས་པ་བྱས་ཏེ་ལག་པ་མེ་ཏོག་དང་བཅས་ཐལ་མོ་སྦྱར་ནས་སྔགས་འདིའི་རྗེས་ཟློས་མཛོད། བྱས་ལ། སྔགས་ཀྱི་རྗེས་ཟློས་ལན་གསུམ་བྱ། དེའང་རྗེས་ཟློས་ལན་གསུམ་གྱི་དང་པོའི་ཚེ་རང་གི་སྙིང་གར་དམ་ཚིག་པའི་ཚུལ་དུ་འཁོད།
གཉིས་པ་དེ་ལ་ཡེ་ཤེས་པའི་ཚུལ་དུ་བསྟིམ། གསུམ་པས་བརྟན་པར་བྱས་པའི་མོས་པ་དང་བཅས་བླ་མ་ལ་དྲིན་ལན་གྱི་ཚུལ་དུ་མེ་ཏོག་འཐོར་བཞིན་འདིའི་རྗེས་ཟློས་མཛོད། བཅོམ་ལྡན་བདག་གིས་གཟུང་ལགས་ཀྱི། །བདག་ལ་འགོ་བར་མཛད་དུ་གསོལ། །ཞེས་ལན་གསུམ་བྱ། དེ་ནས་ཁྱེད་རང་རྣམས་ཀྱིས་ཕུལ་བའི་མེ་ཏོག་གི་འཕྲེང་བ་སྔགས་སུ་བྱིན་གྱིས་བརླབས་ཏེ་སྤྱི་བོར་བཞག་ནས་བྱིན་གྱིས་བརླབས་པའི་མོས་པ་མཛོད། ཅེས་མེ་ཏོག་འཐོར་ཞིང༌། བཅོམ་ལྡན་འདི་ལ་སྩལ་ལགས་ཀྱིས། །འདི་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་ཐོབ་པ་དང༌། །བརྟུལ་ཞུགས་བརྟན་པར་མཛད་དུ་གསོལ། །བཅོམ་ལྡན་འདས་མ་ལྷ་མོ་རིག་བྱེད་མའི་གསུང་གི་བྱིན་རླབས་མ་ལུས་པ་རྡོ་རྗེ་སློབ་མའི་རྒྱུད་ལ་འཇུག་པར་གྱུར་ཅིག །དེས་གསུང་གི་རྗེས་སུ་གནང་བ་ཐོབ། ངག་གི་དྲི་མ་དག །ངག་སྔགས་བཟླ་བ་ལ་དབང་བར་བྱས། རྗེ་བཙུན་མའི་གསུང་དང་ཁྱེད་རང་རྣམས་ཀྱི་ངག་དབྱེར་མེད་དུ་བྱིན་གྱིས་བརླབས་བྱུང་སྙམ་པའི་མོས་པ་མཛོད་ཅིག །ཐུགས་ཀྱི་རྗེས་སུ་གནང་བ་བྱེད་ཚུལ་ལ་གཉིས་ལས། ཐུན་མོང་བ་ཙམ་བྱེད་ན། བླ་མའི་ཐུགས་ཀའི་ས་བོན་ལས་འོད་ཟེར་འཕྲོས། བཅོམ་ལྡན་འདས་མ་ལྷ་མོ་རིག་བྱེད་མའི་ཐུགས་ཀྱི་བྱིན་རླབས་མ་ལུས་པ་ཧྲཱིཿ ཡིག་གི་རྣམ་པར་སྤྱན་དྲངས། མདུན་བསྐྱེད་ཀྱི་ཐུགས་ཀ་ནས་ཀྱང་ཐུགས་གཉིས་སུ་མེད་པའི་ཡེ་ཤེས་ཀྱི་ངོ་བོ་ཧྲཱིཿ ཡིག་དང་ཕྱག་མཚན་སྣ་ཚོགས་པ་འཕྲོས། ཁྱེད་རང་རྣམས་ཀྱི་སྙིང་གར་སིབ་ཀྱིས་ཐིམ་པས་བཅོམ་ལྡན་འདས་མའི་ཐུགས་
ཀྱི་བྱིན་རླབས་མ་ལུས་པ་ཐོབ་པའི་མོས་པ་མཛོད། ཅེས་དང༌། སྔགས་ཀྱི་མཐར་ཨ་བེ་ཤ་བཏགས་པ་མང་དུ་བརྗོད་ཅིང་དྲིལ་བུ་དཀྲོལ། ཐུགས་ཀྱི་རྗེས་གནང་ཐུན་མོང་བའི་ངོ་བོ་དེ་ཙམ་གྱིས་འགྲུབ། དེས་ཐུགས་ཀྱི་རྗེས་སུ་གནང་བ་ཐོབ། ཡིད་ཀྱི་དྲི་མ་སྦྱངས། གནས་ལུགས་སྟོང་པ་ཉིད་ཀྱི་དོན་བསྒོམ་པ་ལ་དབང་བར་བྱས། ཁྱེད་རང་རྣམས་ཀྱི་ཡིད་དང་རྗེ་བཙུན་མའི་ཐུགས་དབྱེར་མེད་དུ་བྱིན་གྱིས་བརླབས་བྱུང་སྙམ་པ་མཛོད་བྱས་ཏེ། གཙོ་བོས་ཇི་ལྟར་སོགས་ཀྱིས་དམ་ཚིག་གཟུང་ཞིང་མཎྜལ་འབུལ་དུ་གཞུག །ཐུན་མོང་མ་ཡིན་པའི་རྗེས་གནང་བྱེད་ཚེ། ཐུགས་ཀྱི་རྗེས་གནང་ཐུན་མོང་བའི་ངོ་བོ་གྲུབ་མཚམས་སུ། བླ་མའི་ཐུགས་ཀའི་ཧྲཱིཿ ལས་འོད་ཟེར་འཕྲོས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་གཉིས་སུ་མེད་པའི་ཡེ་ཤེས་དང༌། སྟོབས་དང་མི་འཇིགས་པ་ལ་སོགས་པའི་ཡོན་ཏན་ཐམས་ཅད་འོད་ཟེར་ཁ་དོག་དམར་པོའི་རྣམ་པར་སྤྱན་དྲངས། ཁྱེད་རང་རྣམས་ཀྱི་ཐུགས་ཀར་ཐིམ་པས། དེ་རྣམས་ཀྱི་བྱིན་རླབས་རྒྱུད་ལ་ཞུགས་པའི་མོས་པ་མཛོད། བྱས་ལ། གུ་གུལ་གྱིས་བདུག་ཅིང་དྲིལ་གསིལ་དང་བཅས། ཨོཾ་ཀུ་རུ་ཀུལླེ་ཧྲཱིཿ ཧྲཱིཿ ཧྲཱིཿ ཨ་ཧྲཱིཿ བེ་ཤ་ཡ་ཧྲཱིཿ ཧྲཱིཿ ཧྲཱིཿ ཞེས་གང་མང་བརྗོད། ཡང་བླ་མའི་ཐུགས་ཀའི་ཧྲཱིཿ ལས་འོད་ཟེར་འཕྲོས། འཕགས་པ་ཉན་ཐོས་དང་རང་སངས་རྒྱས་རྣམས་ཀྱི་ལུང་དང་མངོན་པར་རྟོགས་པའི་ཡོན་ཏན་ཐམས་ཅད་འོད་ཟེར་དམར་པོའི་རྣམ་པར་སྤྱན་དྲངས། ཞེས་སོགས་སྔར་ལྟར། ཡང་ཐུགས་ཀའི་ཧྲཱིཿ ཡིག་ལས་འོད་ཟེར་འཕྲོས། ཚངས་པ་བརྒྱ་བྱིན་ལ་སོགས་པ་འཇིག་རྟེན་སྐྱོང་བ་རྣམས་དང༌། པཎྚི་ཏ་དང་གྲུབ་པ་རིག་འཛིན་རྣམས་དང༌། འཁོར་ལོས་སྒྱུར་བའི་རྒྱལ་པོ་དང་སྐྱེ་འགྲོ་བསོད་
ནམས་ཅན་རྣམས་ཀྱི་ལུང་དང་མངོན་པར་རྟོགས་པའི་ཡོན་ཏན། ཚེ་དང་བསོད་ནམས་དཔལ་དང་འབྱོར་བ་ཐམས་ཅད་འོད་ཀྱི་རྣམ་པར་བསྡུས་ཏེ་ཁྱེད་རང་རྣམས་ལ་ཐིམ་པས་ཚེ་བསོད་དཔལ་འབྱོར་ཐམས་ཅད་རྒྱས་པའི་མོས་པ་མཛོད། ཅེས་སྔགས་མང་དུ་བརྗོད། དེས་རྗེ་བཙུན་མའི་ཐུགས་ཀྱི་རྗེས་གནང་ཐོབ། ཡིད་ཀྱི་དྲི་མ་དག །སེམས་ཡེ་ཤེས་སུ་བསྒོམ་པ་ལ་དབང་བར་བྱས། རྗེ་བཙུན་མའི་ཐུགས་དང་ཁྱེད་རང་རྣམས་ཀྱི་ཡིད་དབྱེར་མེད་དུ་བྱིན་གྱིས་བརླབ་པའི་མོས་པ་མཛོད། དེ་ཡན་ཆད་བུམ་དབང་གི་དོད་ཡིན་པར་རྡོ་རྗེ་འཆང་དབང་ཕྱུག་རབ་བརྟན་གྱིས་གསུངས་པ་ལྟར་ཡིན་པས། དེ་ནས་དབང་གོང་མ་གསུམ་གའི་དོད་བདག་བྱིན་རླབས་ཀྱི་དམིགས་པའི་སྟེང་ནས་བྱེད་པ་ལ་ཁྱེད་རང་རྣམས་ཀྱིས་སྤྱན་དམིགས་འདི་བཞིན་མཛད་པར་ཞུ། ཁྱེད་རང་རྣམས་རྗེ་བཙུན་མར་གསལ་བའི་ལུས་ཀྱི་དབུས་དྲང་པོར་རྩ་དབུ་མ་མར་སྣེ་ལྟེ་བར་ཟུག་པ། ལྟེ་བར་ཨཾ་དང་སྙིང་གར་ཧྲཱིཿ ཡིག་དམར་པོ། ཡར་སྣེ་སྨིན་མཚམས་སུ་སླེབ་པ་ལ་ཧཾ་ཡིག་མགོ་བོ་ཐུར་དུ་བསྟན་པས་མཚན་པ། སྙིང་གའི་ཧྲཱིཿ ཡིག་ལ་དམིགས་པ་གཏད་པས་དེ་ལས་འོད་དམར་པོ་མེའི་རང་བཞིན་གྱེན་དུ་འཕྲོས་པ་དབུ་མའི་ལམ་ནས་གྱེན་དུ་སོན་པས་ཧཾ་ཡིག་ཕུག་སྟེ་སྨིན་མཚམས་ཀྱི་ཤ་ལྤགས་ཀྱི་མཚམས་བརྒྱུད་མགོ་བོ་ལ་གཡོན་སྐོར་དུ་སོང་བ་རྣ་བ་གཡོན་པའི་བུག་པ་ནས་ནང་དུ་ཞུགས། གཡས་ཀྱི་བུ་ག་ནས་ཕྱིར་ཐོན། མདའ་གཞུ་རྣ་བའི་དྲུང་དུ་བཀང་བའི་མདའི་ལྟོང་ནས་ཞུགས། ཨུཏྤ་ལའི་མདེའུ་རྒྱས་པར་བྱས་ཏེ་རྩེ་མོ་ནས་ཕྱིར་འཕྲོས། སྲིད་པ་གསུམ་
གྱི་སེམས་ཅན་ཐམས་ཅད། ཁྱད་པར་དུ་གང་ཞིག་དབང་དུ་བྱེད་པར་འདོད་པ་རྣམས་ཀྱི་སྙིང་ལ་ཞུགས་པས། དེ་ཐམས་ཅད་བདག་ཉིད་ཀྱི་དབང་དུ་བསྡུས་ཏེ་བདེ་བ་ཆེན་པོའི་རང་བཞིན་གྱི་འོད་ཟེར་དམར་པོའི་རྣམ་པར་གྱུར་པ་ཚུར་བསྡུས་ཏེ་ཨུཏྤ་ལའི་མདེའུའི་ནང་དུ་ཞུགས། མདའི་ལྟོང་ནས་རྣ་བུག་གཡས་སུ་ཞུགས་པ་གཡོན་ནས་ཐོན། མགོ་བོ་ལ་གཡས་སུ་བསྐོར་བ་སྨིན་མཚམས་ནས་དབུ་མའི་ནང་དུ་ཞུགས། ཧཾ་ཡིག་ལ་ཐིམ་པས་དེ་ལས་བདུད་རྩིའི་རྒྱུན་བབས། སྤྱི་བོ་དང་མགྲིན་པའི་རྩ་འཁོར་རྣམས་གང་ཞིག་གསང་དབང་གི་ངོ་བོ་བདེ་བ་ཆེན་པོའི་ཡེ་ཤེས་སྐྱེས་པའི་དམིགས་པ་མཛོད། སླར་ཡང་ཧཾ་ཡིག་ལས་བདུད་རྩིའི་རྒྱུན་བབས་པ་སྙིང་གའི་རྩ་འཁོར་བརྒྱུད་དེ་ལྟེ་བའི་ཨཾ་ཡིག་གི་སྟེང་དུ་བབས་པས་མེའི་སྟེང་དུ་སྣུམ་ཕོག་པ་བཞིན་ལྟེ་བའི་ཨཾ་ཡིག་ལས་གཏུམ་མོའི་མེ་འོད་ཆེར་འཕྲོས། ཧཾ་ཡིག་ལས་ཀྱང་བདུད་རྩིའི་རྒྱུན་ཆིལ་ཆིལ་བབས་ཏེ་གསང་གནས་ཡན་ཆད་བྱང་ཆུབ་ཀྱི་སེམས་ཀྱི་བདུད་རྩིས་གང་བས་འབར་འཛག་གི་དམིགས་པ་ལ་བརྟེན་ནས་ཤེས་རབ་ཡེ་ཤེས་ཀྱི་དབང་གི་ངོ་བོ་བདེ་སྟོང་གི་ཡེ་ཤེས་ཁྱད་པར་ཅན་སྐྱེས་པའི་མོས་པ་མཛོད། དེ་ལྟར་དགའ་བཞི་རིམ་གྱིས་དྲངས་པའི་མཐར་ལྷན་ཅིག་སྐྱེས་པའི་ཡེ་ཤེས་བདེ་བ་ཆེན་པོས་རང་གི་ལུས་དང་སྣོད་བཅུད་ཐམས་ཅད་ཁྱབ་པར་མོས་ཏེ། གང་ལ་ཐོག་མ་དབུས་མཐའ་མེད། །སྲིད་མེད་མྱ་ངན་འདས་པ་མེད། །འདི་ནི་མཆོག་ཏུ་བདེ་ཆེན་ཉིད། །བདག་མེད་གཞན་ཡང་ཡོད་མ་ཡིན། །ཞེས་པའི་དོན་སེམས་ཀྱི་ངོ་བོ་སྐྱེ་འགག་གནས་གསུམ་གྱིས་སྟོང་པའི་དེ་བཞིན་ཉིད་དང༌། འཁོར་འདས་
གཟུང་འཛིན་གྱི་རྟོག་པ་ཐམས་ཅད་དང་བྲལ་བའི་བདེ་བ་ཆེན་པོའི་ཡེ་ཤེས་དབྱེར་མི་ཕྱེད་པ་ནམ་མཁའ་ལྟ་བུའི་དོན་ལ་ངེས་པ་ཁྱད་པར་ཅན་སྐྱེས་ཏེ་ཚིག་གི་སྒོ་ནས་དབང་བཞི་པའི་རྟོགས་པ་རྒྱུད་ལ་འཁྲུངས་པའི་མོས་པ་མཛོད། དེ་དག་གིས་བཅོམ་ལྡན་འདས་མ་ལྷ་མོ་རིག་བྱེད་མ་ཕྱི་སྒྲུབ་ཀྱི་རྗེས་སུ་གནང་བ་ཐུན་མོང་དང་ཐུན་མོང་མ་ཡིན་པ་གཉིས་ལྷན་དུ་སྦྲགས་ཏེ་བླ་མ་དམ་པའི་ཕྱག་བཞེས་བཞིན་ལེགས་པར་ཐོབ་པ་ཡིན་པས་དམ་ཚིག་མཐའ་དག་ཚུལ་བཞིན་དུ་སྲུང་སྙམ་པ་གྱིས་ལ་འདིའི་རྗེས་ཟློས་མཛོད་ཅེས། གཙོ་བོས་ཇི་ལྟར་བཀའ་སྩལ་བ། །དེ་དག་ཐམས་ཅད་བདག་གིས་བགྱིད། །ཅེས་པ་ལན་གསུམ་དང༌། གཏང་རག་གི་མཎྜལ་ཕུལ་བའི་རྗེས་སུ། བདག་ཉིད་བྲན་དུ་དབུལ་བའི་རྗེས་ཟློས་མཛོད། །ཅེས། དེང་ནས་བརྩམས་ཏེ་བདག་བྲན་དུ། །ཁྱེད་ལ་བདག་ནི་འབུལ་ལགས་ན། །ཁྱེད་ཀྱིས་སློབ་མར་བཟུང་བ་དང༌། །ཆ་ཡིས་ཀྱང་ནི་སྤྱད་དུ་གསོལ། །ཞེས་པ་ལན་གསུམ་དང༌། བསྟན་པ་རྒྱས་པའི་བསྔོ་བ་སོགས་ཀྱིས་མཚམས་སྦྱར་བར་བྱའོ། །དེའང་ཐུན་མོང་མ་ཡིན་པའི་དབང་བཞི་ཏིང་ངེ་འཛིན་གྱི་སྒོ་ནས་བསྐུར་ཚུལ་འདི་ནི་རྗེ་དབང་རབ་ཀྱི་གསུང་དང༌། དཀོན་མཆོག་ལྷུན་གྲུབ་ཀྱི་ཡིག་ཆ་གཉིས་གུང་བསྒྲིགས་པ་ཡིན་ལ། ཆོ་གའི་བདག་བྱིན་བརླབ་ཀྱི་ཚེ་དགའ་བཞི་དང་དབང་བཞི་སྦྱར་ཡང་འདིར་དེ་དང་མི་འདྲ་སྟེ། བུམ་དབང་གི་དོད་ཐུགས་ཀྱི་རྗེས་གནང་ཡན་ཆད་ཀྱིས་སོང་ཟིན་པར་རྗེ་དབང་རབ་ཀྱིས་གསུངས་པས། ཕྱི་མར་སྦྱོར་རྒྱུ་དབང་གསུམ་ལས་མེད་ལ། གསང་དབང་དང་ཤེར་དབང་གི་དམིགས་པའི་མཚམས་འབྱེད་ཚུལ་ཡང་ཟུར་འདེབས་ཀྱི་ཡི་གེ་ཞིག་ཏུ་འདི་བཞིན་འདུག་པ་ལྟར་བྱས་པ་ཡིན་ནོ། །ཀརྨ་འཕྲིན་ལས་གཉིས་པའི་བུམ་ཐོད་མེ་ལོང་སོགས་ལ་བརྟེན་པའི་རྫས་ཀྱི་དབང་བཞི་
བསྐུར་ཚུལ་བཤད་པའང་ལུགས་གཅིག་ཡིན་ཏེ། མཉམ་མེད་ཆེན་པོ་དང༌། སྭོ་འཇིགས་མེད་གྲགས་པས་དེ་ལྟ་བུའི་དབང་བཞི་བསྐུར་ཚུལ་ཞིག་གསུངས་པ་ལ་ལས་གསང་སྒྲུབ་ལྷ་ལྔ་དང་སྦྱར་ཡང༌། ཕྱི་སྒྲུབ་དཔའ་བོ་གཅིག་པ་འདི་ཉིད་དང་སྦྱོར་དགོས་པར་མཁན་ཆེན་ངག་དབང་ཆོས་གྲགས་ཀྱིས་གསང་བ་ལྷ་ལྔའི་བྱིན་རླབས་ཀྱི་ཆོ་གར་གསུངས་པས་ཤེས་སོ། །འཕགས་མའི་བྱིན་རླབས་གཏེར་གྱི་སྒོ། །མན་ངག་ལྡེ་མིག་འདིས་ཕྱེ་བས། །མཆོག་ཐུན་འདོད་དགུའི་དངོས་གྲུབ་ཀྱིས། །ལུས་ཅན་མཐའ་དག་ཚིམ་བྱེད་ཤོག །ཅེས་འཕགས་མ་རིག་བྱེད་མ་ཕྱི་སྒྲུབ་ཀྱི་ཐུན་མོང་དང་ཐུན་མོང་མ་ཡིན་པའི་རྗེས་སུ་གནང་བ་བྱ་ཚུལ་གསལ་བར་བཀོད་པ་དངོས་གྲུབ་འགུགས་པའི་ལྕགས་ཀྱུ་ཞེས་བྱ་བ་འདི་ནི། ཡང་དག་པའི་སྒྲུབ་པ་ལ་གཞོལ་བའི་སྤོང་བ་པ་སྡོམ་བརྩོན་ཆེན་པོ་དཀོན་མཆོག་བྱམས་པས་བསྐུལ་ངོར་ྋབཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་བྷིཀྵུ་རཏྣ་ཨཱ་ནནྟའོ།། །།